Oqaluuserisassani immikkoortoq 127-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq 7. marts 2003, nal. ?.
Jonathan Motzfeldt, Inatsisartut Siulittaasuat, Siumut.
Taanna uanga saqqummiutissavara.
Tapiissutinik pissarsisinnaatitaasut
ukiumut siulianut naatsorsuutinik kukkunersiukkanik januarimili
nassiussereersinnaanerat piviusumik isigalugu periarfissaqanngilaq.
Naleqquttuunngitsup taassuma
siusinnerusukkut aamma siunnersuutikkut matumuuna
piviusunngortinneqarsinnaasumik aaqqivineqarsinnaanera anguniarsimavaa.
Partiimummi, Kattusseqatigiinnut
Attaviitsumulluunniit tunniunneqarsinnaasutut tapiissutit marlunnut avillugit
tunniunneqartarmata.
Tapiissuteqarfigineqarnissamik
qinnuteqaammik tapissuutitut qinnuteqaatigineqartut atorneqarnissaannut
aammalu, ukiup siuliani tapiissutit atorneqarsimanerannut uppernarsaammik
ilaqartinneqartumik, siulittaasoqarfiup suliarinninnera tunngavigalugu,
tapiissutit affaat siulliit tunniunneqassapput.
Naatsorsuutit kukkunersiukkat
inatsisartut siulittaasoqarfiannut nassiunneqarpata tapiissutit avinnerisa
arlaat tassa affaasa affaat kingulliit tunniunneqassapput.
Taama oqaaseqarlunga inatsisartunut
oqaaseqarfigisassanngortippara.
Isak Davidsen, ataatsimiinnermik aqutsisoq,
sinniisussa siulleq, Atassut.
Partiit oqaaseqartuinut. Per Rosing
Petersen, Siumut.
Per Rosing Petersen, Siumup oqaaseqartua.
Qujanaq.
Siumumiit allannguutissatut
siunnersuut imatut naatsumik oqaaseqarluta tapersissavarput.
Ajornartorsiuutaasutut taaneqartut
tunngavilersuutillu paasilluarlugit allannguutissatut siunnersuut tamakkiisumik
Siumumiit taperserparput.
Siunnersuutip akuersissutigineqarnerata
kingunerissavaa manna tikillugu inatsisip atuuttuusimasut eqarpallaanera
taarsussallugu.
Tapiissutit inatsit nutaaq
tunngavigalugu tunniunneqarsinnaalerneri marloqiusami naafferaarlugit
pisalissapput.
Siullermik ukiup nutaap aallartinnerani
aappassaanilu aasap ingerlanerani partiip, Kattusseqatigiit,
Attaviitsulluunniit naatsorsuutit inatsisartut siulittaasoqarfianut
tunniutereerpagit. Tamannalu kingusinnerspaamik pissaaq ulloq junip 30-ani.
Inatsisitullu allannguutissap atuuttunngornissaa
decemberip 31-anut 2003 siunnersuutigineqarnera aamma Siumumiit taamaasillugu
taperserparput.
Qujanaq.
Isak Davidsen, ataatsimiinnermik aqutsisoq,
sinniisussa siulleq, Atassut.
Tulliulluni oqaaseqassaaq Aqqaluk
Lynge, Inuit Ataqatigiit.
Aqqaluk Lynge, Inuit Ataqatigiit oqaaseqartuat.
Inuit Ataqatigiit siunnersuummut
pineqartumut angerput.
Isak Davidsen, ataatsimiinnermik aqutsisoq,
sinniisussa siulleq, Atassut.
Tulliulluni oqaaseqassaaq Jakob
Sivertsen, Atassut.
Jakob Sivertsen, Atassutip oqaaseqartua.
Politikkikkut suliniaqatigiiffiit,
partiit, Attaviitsut Kattusseqatigiit Attaviitsullu tapiissutinik
pisinnaatisaasut aningaasanik tapiissutisiaminnik qinnuteqaateqarnerminni,
uppernarsaatinik soorlu naatsorsuutinik kukkunersiorneqarsimasunik
qinnuteqaatit takussutissaqartinneqartarnissaannik
piumasaqaateqartoqartalernissaannik inatsimmi ilanngussisoqarnissaa
naalakkersuisut timitaliiniarnerat Atassummik tamakkiisumik taperserparput.
Inatsisartut inatsisaata
allanngortinneratigut politikkikkut suliniaqatigiiffiit pisortanit
tapiissutisiarisartagaasa siunertaminnut, atorneqartarnersut naatsorsuutinik
kukkunersiukkanik uppernarsarneqartalernissaat anguneqartussanngormat,
Atassummit ilassilluarparput.
Kiisalu naatsorsuutit kingusinnerpaamik
qaammatini qaammammi junimi nassiunneqartarnissannik aalajangiussaqarneq
Atassummit pissusissamisoortumik isigaarput.
Naatsorsuutit
suliarilluarneqarnissaanik piffissaqartoqarnissaq naalakkersuisunit
sillimaffigineqarsimasoq takusinnaagatsigu.
Taamatut naatsumik oqaaseqarluta
inatsisissatut siunnersuut tamakkiisumik taperserparput.
Isak Davidsen, ataatsimiinnermik aqutsisoq,
sinniisussa siulleq, Atassut.
Tullinnguuppoq Per Berthelsen, Demokraatit.
Per Berthelsen, Demokraatit oqaaseqartuat.
Qujanaq.
Siunnersuutaasumut oqaaserpassuit saqqummiunneqartut avataatigut annertunerusumik saqqummiussassaqannginnatta, nalunaarutigiinnassavara Demokraatit tungaannit allannguuteqarnissamik siunnersuuteqarnermut tunngavilersuutaasoq paasilluaratsigu.
Taamaammallu allannguutissatut siunnersuut taamatut isikkoqartillugu akuersaarlugu.
Isak Davidsen, ataatsimiinnermik aqutsisoq, sinniisussa siulleq, Atassut.
Massakkut oqaaseqassaaq Anthon Frederiksen, Kattusseqatigiit.
Anthon Frederiksen, Kattusseqatigiit.
Naalakkersuinikkut sulinermi aningaasatigut tapersiissuteqartarneq pillugu, inatsisartut inatsisaata allanngortinneqarnissaanut siunnersuut Kattusseqatigiit sinnerlugit, tamakkiisumik taperserlugu oqaatigissavara. Siunnersuummi allannguutissatut siunnersuutigineqartut pissusissamisoorluinnarmata.
Tassami innuttaasunut piumasaqaatit suulluunniit annertusiartortillugit aamma inatsisartunut partiinullu piumasaqaatit soorunami annertusisariaqarput.
Taamatut oqaaseqarlunga siunnersuutip taamatut isikkoqarluni aappassaaneerneqarnissaa akuersaaqataaffigissavara.
Isak Davidsen, ataatsimiinnermik aqutsisoq, sinniisussa siulleq, Atassut.
Oqaluuserisassaq 127 aappassaaneerneqarnissamut taamatut isikkoqarluni ingerlaqqissaaq.