Oqaluuserisassani immikkoortoq 15-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, tallimanngorneq 4. april 2003. nal.
14:42.
Augusta
Salling,
Aningaasarsiornermut Naalakkersuisoq, Atassut.
Qujanaq. 2002-mut
Inatsisartut ilassutitut aningaasaliissutinut inatsisissaattut siuimersuutip
aappassaaneerneqarneranut Inatsisartut Aningaasaqarnermut Ataatsimiititaliaat
isumaliutissiissutaanut naalakkersuisut sinnerlugit qutsavigaara.
Naalakkersuisut
paasivaat aningasaqarnermut ataatsimiitaliap 2002-mut Inatsisartut ilassutitut
aningaasaliissutinut inatsisissaattut siunnersuut allanngortinnagu
akuereqqullugu inassutigigaa.
Naalakkersuisulli
KNR-imik taarsigassarsisitsinermik isumaqatigiissut pillugu oqaasertaliussap
inatsisissatut siunnersuummit peerneqamissaa pingajussaaneerinermut
allannguutissatut siunnersuutiginiarpaat, oqaasertaliussat aningaasaqarnermut
ataatsimiititaliamit akuerineqarsimannginneri pissutigalugit.
Tamatumanili
Nunatta Karsiata 2002-mi KNR-imut taarsigassarsisitsisimanera
allaringortinneqassanngilaq. 2003-mut inatsisartut aningaasanut
inatsisissaattut siunnersuummi aamma KNR-ip akilersuutai ernianillu akiliutai
allanngortinneqassanngillat.
Naalakkersuisut
ullumi Inatsisartuni aappassaaneerinnginnermi aningaasaqarnermut
ataatsimiititaliaq teknikimut tunnganerusunik apeqqutaanik akivaat
Aningaasaqarnermut Ataatsimiititaliallu isumaliutissiissutimini paasissutissat
qinnutigisai tunniullugit.
Taamaattumik
tamanna sukumiinerusumik oqaaseqarfigeqqissanngilara.
Akerlianik
Naalakkersuisut sinnerlugit Aningaasaqarnermut Ataatsimiititaliap ilassutitut
aningaasaliissutinik qinnuteqaatinut tunngatillugu aningaasaqarnermut
ataatsimiititaliap oqaasii naapertorlugit aningaasaleeqqinnertut isigineqarsinnaasut
pillugit oqaasii naalakkersuisut sinnerlugit tusaatissatut tiguakka. Tamakku
naalakkersuisunit ilungersunartorujussuartut isigineqartariaqarput
pisariaqartillugulu periutsit pineqartut aaqqinniarneqartarlutik.
Suliassaqarfinni
ataasiakkaani aningaasaqarnermik aqutsinerup ingerlaavartumik
pitsanngorsarneqarnissaa naalakkersuisut pingaartippaat. Ukiuni tulliuttuni
nunatta aningaasaqarnikkut ilungersunartorsiorfigisinnaasarujussuisa
tulleriiaarisinnaanissarput pisariaqalersippaat.
Aammattaarli
pisariaqarpoq tulleriiaarinernik taakkuninnga
aalajangiusimannissinnaanissarput, aamma ukiup ingerlanerani
ajornartorsiulertassagaluarluta. Taamaattumik aningaasartuutinik kiisalu
ilassutitut aningaasaliissutinik pisariaqartitsinermik aqutsisinnaanermut pikkorissuusariaqarpugut.
Aningaasaqarnikkut
imminut napatissinnaanermik anguniakkamut atasutut oqallittariaqarpugut
tulleriiaarillutalu.
Innarluutilinnut
sanaartornermullu tunngasuni 2002-mi aningaasaliissutit aaqqissorniarneranni
ajornartorsiuteqarsimavoq. Tamanna aaqqinniarlugu naalakkersuisut suli
suliniuteqarput. Aningaasaqarnermut Ataatsimiititaliap suliassaqarfinnut
ataasiakkaanut oqaaseqaataat Naalakkersuisut paasivaat.
Ilaatigut
Naalakkersuisut 2003-mut aningaasanut inatsisissatut siunnersuutaanni takuneqarsiinnaasutut
sulineq tamanna aallartereerpoq.
Aningaasaqarnermut
ataatsimiititaliamit teknikikkut innersuussutigineqartut naalakkersuisut
siunissami sulineranni ilaatinneqassapput.
Taamatut
oqaaseqarlunga inatsisissatut siunnersuut Inatsisartunit
oqaluusereqqitassanngortippara. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Partiit
oqaaseqartuinit siulliulluni Ole Thorleifsen Siumut.
Ole
Thorleifsen, Siumup
oqaaseqartua.
Siumumiit
Inatsisartut 2002-mut ilassutitut aningaasaliissutinut inatsisissaatut
siunnersuut Inatsisartut siullermeerneqareerluni Aningaasaqarnermut
Atatsimiititaliamit piffissarujussuaq atorlugu peqissaartumik
suliarineqarneranut qujassuteqarniarpugut.
Siumumiit
tamaatsillugu Ataatsimiititaliamit isumaqatigiittumik isumaliutissiissummut
oqaaseqaatit innersuussutigalugit pingajussaaneerneqarnissaanut
ingerlateqqinneqarnissaata akuersissutigineqarnissaa innersuussutigaarput.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Asii Chemnitz Narup, Inuit Ataqatigiit.
Asii
Chemnitz Narup,
Inuit Ataqatigiit oqaaseqartuat.
Qujanaq.
Aningaasaqarnermut Atatsimiititaliap Inatsisartut 2002-mut ilassutitut
aningaasaliissutinut inatsisissaannut isumaliutissiissutaa sukumiisoq Inuit
Ataqatigiit tusaatissatut tiguaat. Ataatsimiititaliallu uparuaatai
kaammattuutaallu ilanngullugit akuerseqataaffigissagaat matumuuna
nalunaarutigaarput.
Aningaasarsiornermut
Naalakkersuisup akissuteqaataanut qujavugut. Nuannaarutigaarpullu
Aningaasaqarnermut Atatsimiititaliap uparuaatai kaammattuutaallu tusaaniarlugit
Naalakkersuisut suliaqqinniarnerminni tunngavigiumallugit neriorsuuteqarmata.
Aningaasarsiornermut
Naalakkersuisup peqqissaartumik aningaasanik aqutsinissap
pingaaruteqarluinnarneranik oqarnera isumaqatigaarput. Minnerunngitsumik
pisariaqartut ilagaat annertuumik innarluutilinnut sanaartornermut
sanaartornermullu aningaasaliissutit suli pitsaanerujussuarmik
aqunneqarnissaat. Tamannalu aaqqiissuteqarfiginiarlugu Naalakkersuisunit
sulissutigineqarmat iluarisimaarparput.
KNR
pillugu pingajussaaneerinninnissamut Naalakkersuisut allannguutissanik
siunnersuuteqarniarlutik nalunaarput iluarsissutissaq Inuit Ataqatigiinni
ilassilluassavarput. Inuit Ataqatigiit pingaartippaat aningaasanut inatsit
tassaasoq Inatsisartut aningaasaqarnikkut tulleriinnilersuinerannut
tamakkiisumik takussutissiissasoq. Taamaammat ilassutitut aningaasaliissutit
minnerpaaffimmiitinneqarnissaat ilungersuuneqartariaqarpoq.
Taamatut
oqaaseqarluta inatsisissatut siunnersuutip pingajussaaneerneqannginnerani
Aningaasaqarnermut Atatsimiititaliamut suliarineqartussanngorteqqinneqarnissaa
akuersaarparput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliuppoq Jakob Sivertsen, Atassut, tulliupporlu Per Skaaning Demokratit.
Jakob Sivertsen, Atassutip oqaaseqartua.
Qujanaq. Namminersornerullutik oqartussat missingersuutaat pillugit Inatsisartut inatsisaanni nr. 8-mi 29. oktober 1999-imeersumi 2000-imilu allanngortinneqartumi paragraf 26, imm. 3-mi aalajangersakkat malillugit inatsisissaq manna Naalakkersuisut saqqumiussaata siullermeerneqarnerani ATASSUT-mit oqaaserisagut innersuussutigaagut.
Kiisalu KNR-imut taarsigassarsisitsinermut isumaqatigiissutaanut oqaasertaliussap peerneqarnissaanik Aningaasaqarnermut Ataatsimiititaliap piumasaqaataa Aningaasaqarnermut Naalakkersuisumit paasilluarneqarluni pingajussaaneerinninnissami Naalakkersuisut allannguutissamik saqqummiussaqarnissaat inatsisissatut siunnersuummut allannguuteqassanngitsoq paasillugu ilassutitut aningaasaliissutinut inatsisissatut siunnersuut taamatut iluseqarluni pingajussaanneerneqarnissaanut ingerlaqqinnissaanut ATASSUT-mit akuersaarluta taaseqataaffigissavarput. Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Per Skaaning Demokratit.
Per Skaaning, Demokratit oqaaseqartuat.
Demokratinit Naalakkersuisunut Inatsisartut ilassutissatut aningaasaliissutinut siunnersuummut oqaasissaqarpugut.
Inatsisartut pingaarnerpaatillugu suliassarisussaavaat ilassutitut aningaasaliissutip inatsisip sapinngisamik saattuaraanissaa. Tassuuna takuneqarsinnaassaaq Naalakkersuisunit piviusut tunngavigalugit naatsorsuutiliat siumut pilersaarusiorneqarsimasoq. Aamma ukiumi naatsorsuuteqarfiusumi. 2002-mi ilassutissatut aningaasaliissutissatut inatsisissami paasinarsivoq Aningaasaqarnermut Atatsimiititaliap qinnuteqaatit 48-t Naalakkersuisuneersut suliarisimagai. Nutaanut aamma allannguutissatut aningaasaliissutissat.
Tamanna pillugu erseqqissaatigineqassaaq aningaasanut inatsisissamut aggersumut Naalakkersuisoqarfiit ataasiakkaat siumut naatsorsuusiussasut piviusut tunngavigalugit aamma piareersarluarlutik. Ilassutitut aningaasaliissutissanut inatsisissap isumaliutissiissutaani erserpoq Naalakkersuisoqarfiit ilaasa aningaasaqarnikkut aqutsineq qulaajassallugu suli naammattumik piginnaasaqarfiginngikkaat.
Naalakkersuisut sulipput 2003-mi isertitassanik tamanik 0,5% -tiinnaq sinneqartoorutissatuut tunaartaralugit. 2003-mili annikitsuinnarmik allannguisoqarpat soorlu ilassutissat aningaasaliissutissanik taava sinneqartoorutit pilertortumik atorneqalissapput. Tamanna pillugu Naalakkersuisut peqquvagut Naalakkersuisoqarfinni pineqartuni aningaasaqarnikkut aqutsinerit sammineroqqullugit.
Aningaasaqarnermut Atatsimiititaliap ilassutitut aningaasaliissutinut inatsimmut isumaliutissiissumminut kontomi pingaarnernit nuussisarnerit arlallit tikkuarsimavai. Taakku isumarput malillugu ernumanartortaqarmata ilaallu kukkunersiuinermut ataatsimiititaliamut suliareqqitassanngorlugit siunnersuutigisimallugit. Sunaluunniit suliaq kukkunersiuinermut ataatsimiititaliamut tunniunneqaraangat soorunami Naalakkersuisut pisussaapput suliamut attuumassuteqartut immikkut alapernaasersussallugit.
Ilimagivarpullu Naalakkersuisut siunissami pisariaqartitsineq malillugu iliuuseqassasut kukkunersiuinermut ataatsimiititaliamut suliassiisoqarnissaa pinngitsoortinniarlugu. Suliat taasakka Aningaasaqarnermut Atatsimiititaliap isumaliutissiissutaani ersarissarneqareermata maanna oqaaseqaatinni taagussanngilakka.
Demokratinilli isumaqarpugut ataasiakkaat oqaaseqarfigisariaqartut. Assiliaq una erseqqippoq tassa Isumaginninnermut Naalakkersuisoqarfimmi innarluutilinnut immikkoortortaqarfimmi oqartussaaffimmik tunniussuinermini erseqqissumik malittarisassaliorsimanngitsoq. Tassani Naalakkersuisut paasitinneqarput atuivallaarsimanerit 8 million kr-nit pallillugit annertussusilinnik inatsimmilu akuersissutigineqanngitsumik.
Aningaasaqarnermut Atatsimiititaliap tamanna isumaliutissiissummini tamanna oqaatigivaa issuarparalu: ?Annilaangassutigisariaqassaaq aningaasartuutit annertusinerannik kinguneqarumaartoq, oqartussaasut allat uani kommunit oqartussaasut allat sinnerlugit akiligassanik isumaginnittussanngoraangata. Tassa Namminersornerullutik Oqartussat akiligassaannik.?
Paasiniaanermik Aningaasaqarnermut Atatsimiititaliaq isumaqarpoq Isumaginninnermut Naalakkersuisoq suliaq pineqartoq pillugu pisussaaffimminik unioqqutitsisimasoq sakkortuumik innersuussutigineqarput aningaasaliissutit taakku pillugit piaarnerpaamik ersarilluinnartumik malittarisassaliortoqassasoq.
Demokratit isumaat malillugu aamma immikkoortortaqarfik alla takutitsisimavoq aningaasaqarnikkut aqutsineq tassani annertuumik sammineqartariaqartoq. Tassa Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisoqarfimmi. Aningaasaqarnermut Atatsimiititaliaq 16. december 2002-mi qinnuteqarfigineqarpoq immikkoortoqarfiup taassuma iluani aningaasanik nuussinissaq aamma siumut aningaasartuutissatigut naatsorsuinissaq pillugit.
Qinnuteqaammi ilassutissatut aningaasaliissutinit 105.000 kr-ninik Inerisaavik piniarpoq. Taamaattumik tupaallatsinneqarpugut takugatsigu Naalakkersuisut 2002-mut landskarsip naatsorsutai pillugit nalunaarutaani Inerisaavik suli aningaasaateqartoq 2 million kr-ninik. Paasiuminaatsipparput piffissap taamak sivikitsigisup iluani qanoq iliortoqarsimagaluarneratigut 1,8 million kr-nit kukkussutigineqarsinnaasimanera.
Innersuussutigalugu Naalakkersuisoqarfiup pineqartut oqaaseqaatit ukua atorumaarai siunissamilu aningaasaqarnermikkut aalajangersimasumik aqutsiuaannarluni.
Naggasiullugu taassavara Aningaasaqarnermut Atatsimiititaliap aalajangiiffigisimasaa 23. december 2002-meersoq piniartunut tapiisarnermut tunngasoq. Isumaqarpugut aalajangiineq taanna piniartunut juullimi tunissutitut isikkoqartoq. Aningaasaliissutilli taassuma ajornartorsiutaanera Naalakkersuisut siumut tusagassiuutinut taamalu innuttaasunut nalunaaruteqarsimanerat aningaasaliissutit taakku Aningaasaqarnermut Atatsimiititaliamit akuersineqareersimasut. Uffa Ataatsimiititaliap tamatumunnga suli qinnuteqaammik tigusaqarsimanngikkaluartoq.
Isumaqarpugut Naalakkersuisut aamma iliuuseqarsinnaanerat isumannartoqarluinnartuusoq. Taamatut iliornikkut Aningaasaqarnermut Atatsimiititaliap suleriaasia ajortisarneqarluinnartarpoq. Aningaasaliissutit suliluunniit akuersissutigineqanngitsut ilisimaarutigalugit. Aningaasaqarnermut Atatsimiititaliaq pituttoreerlugu. Taamaattumik siunnersuutigaarput taamatut isikkoqarluni pingajussaaneerneqassasoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tullinnguuppoq Anthon Frederiksen, Kattusseqatigiit.
Jeg vil gerne anmode landstingsmedlemmerne om at sætte sig på deres pladser da snart skal have en afstemnig. Også er det Anthon Frederiksen der få ordet nu.
Med henvisning til på vegne af Kandidat forbundet udtalelser under første behandling har jeg ikke følgende fyldestgørende udtalelser til finansudvalgets redegørelse. For det første er jeg glad for at finansudvalget overfor landstyret og landstinget har gjort opmærksom på at budgetloven fra 1999 skal følges. Og ikke mindst har finansudvalget gjort opmærksom på bestemmelser i paragraf.. pingajuat aalajangersakkat tassani Aningaasaqarnermut Atatsimiititaliap imatut eqqaasitsissutigimmagit.
Aningaasaliissuteqarnissamik sioqqutisigumik akuersissuteqareertinnagu aningaasartuutigineqarnatillu aningaasartuutinik atuisoqassanngitsoq. Aammalu paragraf 3-mi aalajangersakkat naapertorlugit Aningaasaqarnermut Atatsimiititaliap uku eqqaasitsissutigimmagit. Aningaasaliissuteqarneq Naalakkersuisunut ilaasortap aalajangersakkaat erseqqinnerusut malillugit aningaasanik atuinissaanut piginnaatitsisissutaasoq. Naalakkersuisunut ilaasortaq sukkulluunniit Naalakkersuisunut ilaasortaasoq Naalakkersuisoqarfimminut pineqartumut aningaasaliissutinut akisussaavoq.
Kiisalu inatsisit paragraffiisa 25-at aamma 26-at ilanngullugit eqqaasitsissutigineqarmata aamma iluaraara. Tassami 2001-mi Naalakkersuisoqarfiit marluk aningaasanik 60 millionit pallillugit akuerineqanngitsunik atuivallaarsimanerat inuiaqatigiinnut akisoreeqaaq uteqqinneqartariaqaranilu.
Taamatut naatsumik oqaaseqarlunga Aningaasaqarnermut Atatsimiititaliap inassuteqaatai kaammattuutalu tamaasa Kattusseqatigiit sinnerlugit akuersaarlugit taaseqataaffigissavakka.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Per Rosing-Petersen.
Per
Rosing-Petersen,
Aningaasaqarnermut Atatsimiititaliap siulittaasua, Siumut.
Ataatsimiititaliaq
sinnerlugu qujarusuppunga taamannak partiinit Kattusseqatigiit aammalu
soorunami minnerunngitsumik Naalakkersuisuninngaaniit isumaliutissiissut
taamannak tigulluarneqarmat. Aamma Ataatsimiititaliap isumaqatigiilluni taanna
isumaliutissiissut atsiorsimavaa.
Innersuussutit
kaammattuutit assigiinngitsut annertunerusumik tikiffiginngikkaluarlugit
taakkua aamma Naalakkersuisut taakku toqqammavigalugit ilaatigut
allannguutissatut siunnersuutinik pingajussaaneerneqarnissaanut oqariartuutaat
aamma qujassuteqarfigissavakka. Tassa uani immikkut KNR-mut atatillugu
oqaasertaliussaannaat taakkua pineqarput. Ilumoorpoq Naalakkersuisoq oqarami
aningaasaliissutinut assigiinngitsunut allannguuteqarnavianngitsoq.
Aammalu
uani kaammaatuutivut pingasut aamma ilanngullugit oqaaseqarfigineqarmata
qujarusuppunga. Piffissarli iluatsillugu ujartulaarusuppara Ataatsimiititaliaq
sinnerlugu ukiutoqqami ullukkut 31. december 2002-mi sanaartornermut
Naalakkersuisoq isumasioqatiginerani neriorsuuteqarami Aningaasaqarnermut
Atatsimiititaliamut sanaartornermut iluarsaaqqinnermullu aningaasaateqarfimmut
ataatillugu isumasioqatigiittoqarnissaanik oqariartortoqarmat. Taanna
Ataatsimiititaliaminngaaniit qilanaarigatsigu paaserusukkaluarparput qaqugu
taanna tassa naatsorsuutigigatsigu upernaaq manna piumaartoq. Taanna qaqugu
uagutsinnut qaaqqusissut apuunneqarnissaanik oqariartortoqarnissaa assut
qujarutissagaluarparput. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Aningaasarsiornermut
Naalakkersuisoq.
Augusta
Salling,
Aningaasarsiornermut Naalakkersuisoq, Atassut.
Qujanaq.
Aap oqaaseqaatinut qujavunga tassa una erseqqissalaavinnarusuppara
ilumoorluinnaqqissaarpoq missingersuusiortarnermi
aningaasartuutigisariaqartunut naapertuuttunik missingersuusiortarnissaq taanna
pingaaruteqartorujussuuvoq.
Kisianni
aamma pinngitsoorneqarsinnaanngilaq aamma ilassutitut aningaasaliissutinut
aningaasaliissutissanik aamma piareersimasuutitaqarnissaq tassami
sukkulluunniit arlaanik naatsorsuutiginngisamik ilaannikkut aamma
pisoqartarmat. Taamaattumik tamanna avaqqunneqarsinnaanngilaq. Qujassutigaaralu
aamma tamanna paasilluarneqarluni maani aamma akuersaarneqarmat.
Aamma
uparuarneqartut Naalakkersuisoqarfinnut marlunnut tunngatillugu
Demokratininngaaniit uparuaassutigineqartut oqaatigissavara aamma
Naalakkersuisuninngaaniit oqaaseqaatitsinni taanna erseqqissaratsigu.
Suliassaqarfinni ataasiakkaani aningaasaqarnikkut aqutsinerup ingerlaavartumik
pitsanngorsarneqarnissaa Naalakkersuisut assut pingaartikkaat. Taannalu aamma
suliassaq, suliaq ingerlanneqartuarpoq.
Taava
juullimi juullilernerani Naalakkersuisut siulitta piniartunut
aningaasaliissutigisimasaannut tunngatillugu oqaatigissavara
Naalakkersuisuninngaaniit aalajangikkat Aningaasaqarnermut Atatsimiititaliamut
ingerlasussat taakkua tusagassiuutinut toqqaannartumik nalunaarutigineqarneq
ajortut. Kisianni tusagassiuutit aamma imaqarniliat aamma tigusaramikkit.
Taakku tunngavigalugit ujartuisarput. Taamaattumik uani suliassaq taamaalilluni
tusagassiuutit aqqutigalugit aamma ingerlalernikuusimalluni, imaluunniit
oqallisigineqalernikuusimalluni.
Tassa
Naalakkersuisuninngaaniit mianersuutigeqqissaarparput suliat Aningaasaqarnermut
Atatsimiititaliameereerunik aatsaat naammassineqartussat taakkua suli suliap
naammasinnginnerani sioqqutaaraluni tusagassiuutit aqqutilgalugit
suliniartarneq taanna ingerlanneqarnera aamma matumuuna
erseqqissaassutigissavara.
Taava
sanaartornermut tunngatillugu. Sanaartornermi ataatsimeeqatigiissinnaaneq
imaluunniit pikkorissaqatigiissinnaanermut tunngatillugu taanna aamma
neriorsuutigineqarnikuusoq oqaatigissavara misissoqqissagatsigu qaqugu tamanna
pisinnaanersoq. Neriorsuutigineqarnikoq soorunami aamma taanna
piviusunngortinneqarumaarpoq. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taava
taasinialissaagut kisianni oqaluttoqartussaqarpoq suli. Ilaqutariinnut
Peqqissutsimullu Naalakkersuisoq, Ruth Heilmann.
Ruth
Heilmann,
Ilaqutariinnut Peqqissutsimullu Naalakkersuisoq, Siumut.
Qujanaq.
Tassa naatsunnguamik Demokratinut Aningaasarsiornermut Naalakkersuisoq
akissuteqareeraluartoq innarluutilinnut tunngatillugu soorunami suliassaq
taanna imaannaanngitsutut aamma uagut tigummivarput tassami kommunit
suleqatigalugit taamatut innarluutilinnut sullissineq annertoorujussuarmik
ingerlanneqalernikuummat.
Qanorlu
annertutigineranut tunngatillugu massakkut misissuineq ingerlanneqarpoq
pisortaqarfinni aammalu tassunga tunngatillugu suleqatigiissitaliaq ulapippoq paasiniaalluni
assigiinngitsunik. Naatsorsuutigaarpullu taanna nassuiaat aamma ilissinnut
ingerlatinneqarumaartoq, imaluunniit Inatsisartunut ingerlatinneqarumaartoq.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taava
taasissaagut 2002-mut ilassutitut aningaasaliissutinut Inatsisartut
inatsisissaattut siunnersuut Aningaasaqarnermut Atatsimiititaliap
isumaqatigiittut ilassutissatut siunnersuut allannguuteqarnani
akuersissutigineqassasoq inassutigaa.
Aningaasaqarnermut
Atatsimiititaliap inassuteqaataanut isumaqataasut qinnuigaakka nikueqqullugit.
28. akerliusoqarpa? Naamik, taasinngitsoortoqarpa? Naamik. Taamaalilluni
akuerineqarpoq aappassaaneerneqarnermini.