Oqaluuserisassani immikkoortoq 18-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut
arfersaneq tallimaat, tallimanngorneq 4. april 2003, nal. 13:12.
Agathe Fontain, Inuit Ataqatigiit
oqaaseqartuat.
2004-mut akileraarutitigut ilanngaatit il.il.
pillugit Inatsisartut aalajangiiffigisassaattut siunnersuummut Inuit
Ataqatigiinninngaanniit siunnersuutigaarput inummut ilanngaat 8.000 kr.-nik
qaffaavigineqassasoq tasaa 48.000 kr.-ninngorluni aamma aalajangersimasumik
ilanngaat 2.000 kr.-nik, tassa 10.000 kr.-inngorluni qaffaavigineqassasut.
Isertitatigut
ilanngaatit atorlugit isertitakinnerusut oqilisaanneqarlutik ulluinnarni
aningaasanik nammineq pigisaminnik inuuniuteqarnissaat taamaasilluni
piviusunngorsinnaavoq.
Siunnersuutigisatsitut ilanngaatit
qaffanneqarpata isertitakinnerit akunnattumillu isertitaqartartut
malunnaateqarluartumik akileraartarnermikkut oqilisaavigineqassapput. Soorlu
piniartut, sulinermik inuussutissarsiuteqartut, utoqqalinersiallit,
siusinaartumik pisartagaqartut, ilinniartut, ilinniartut ilinniarnermik
saniatigut sulinermikkut aningaasarsiorusuttut allallu isertitakinnerit akunnattumillu
isertitaqartartut.
Aamma siunnersuuterput aqqutigalugu Inatsisartunut ilaasortap Enos Lyberthip
oqaluuserisassanngortitaa pkt. 101, tassa utoqqalinersiat qaffaneqarnissaanik
siunnersuuta Siumumit Atassumiillu
itigartinneqartoq; uani siunnersuutitsinni malunnaatilimmik iluaquserneqartussaagaluarpoq, tassami
utoqqalinersiallit ilanngaatip qaffannerisigut amerlanerusunik
aningaasateqalernerinik kinguneqassagaluarmat.
Kiisalu Ilaqutariinnermut Nalakkersuisup Ruth
Heilmannip siunnersuutaani, tassa utoqqalinersiallit 400-innaat kisimik
pinnatik aamma 3.000-it sinneruttut ilanngullugit
aningaasatigut
pitsanngorsaaffigineqassagaluarmata.
Qineqqusaarnerup nalaani
maluginiarsimagaluarparput partiit allat isertitanit ilanngaatit
qaffanneqarnissaannik siunnerfipput tapersersoraat. Periarfissarli takkummat
peqataarusunngillat, paasivarpullu neriorsuutaasartut oqaasiinaasimasut.
Tamakku tunngavigalugit siunnersuummut
akerliulluta taasissaagut.
Jonathan
Motzfeldt, ataatsimiinnermi
aqutsisoq, Inatsisartut Siulittaasuat, Siumut.
Tulliulluni oqaaseqassaaq Anthon Frederiksen,
Kattusseqatigiit. Taanna pereerpat Aningaasaqarnermut Naalakkersuisoq.
Anthon Frederiksen, Kattusseqatigiit.
2004-mut akileraarutitigut ilanngaatit il.il.
pillugit Inatsisartut inatsisaata allanngortinneqarnissaanut siunnersuut
pillugu Kattusseqatigiinniit suliap siullermeerneqarnerani oqaaseqaatigisakka
innersuussutigalugit Akileraartarnermut Akitsuusiisarnermullu
Ataatsimiititaliap isumaliutissiissutaani ikinnerussuteqarlutik
oqaaseqaateqartut, tassalu Inuit Ataqatigiit, tassani maluginiarpara
isumaliutissiissummi minnerunngitsumik ilaqutariit inuillu ataasiakkaat
akissarsiakinnerit aammalu akunnattunik aningaasarsiallit
iluaquserniarneqarnerat siunertaralugu ikinnerussuteqarlutik oqaaseqarsimanerat
Kattusseqatigiinniit tamakkiisumik taperserlugu taaseqataaffigissavakka,
taamaattumillu taamatut naatsumik oqaaseqarlunga isummernissara ersarissumik
taamatut oqaatigaara.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Aningaasaqarnermut Naalakkersuisoq. Taanna
pereerpat Ilaqutariinnermut Peqqissutsimullu Naalakkersuisoq.
Augusta Salling, Aningaasarsiornermut
Naalakkersuisoq, Atassut.
Qujanaq.
Akileraartarnermut Akitsuutinullu Ataatsimiititaliami
amerlanerussuteqarluartut Naalakkersuisut siunnersuutaannik tapersersuinerat
Naalakkersuisut sinnerlugit qujassutigissavara.
Naalakkersuisut
isumaqarput akileraarutinik akitsuutinillu aaqqissuusseqqinnissap suliarinissaa
ataqatigiissuunissaalu pillugit pingaartuusoq 2004-mut akileraarutitigut
ilanngaatissat il.il. allanngortinnerisigut Inatsisartut suliassamik
maannangaaq aallartitseriinnginnissaat.
Tamanna
tunngavigalugu Naalakkersuisut inassutigaat 2004-mi akileraarutitigut
ilanngaatissat il.il. siullermeerinninnermi siunnersuutigineqartutuut, tassa
2003-misut annertussusilerlugit angissusilerneqarnissaat.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Ilaqutariinnermut
Peqqissutsimullu Naalakkersuisoq.
Ruth
Heilmann,
Ilaqutariinnut Peqqissutsimullu Naalakkersuisoq, Siumut.
Qujanaq.
Inuit Ataqatigiinninngaanniit Agathe Fontain oqaaseqarnermini uangarpiaq
siunnersuuteqarsimasutut utoqqalinersianut inuit 400-t eqqarsaatigalugit
kisiisa taakku pineqarnerannut tunngatillugu oqaatigissavara Naalakkersuisut
ukiarmi 2002-milu taanna qaqinnikuuaat. Tassa Naalakkersuisunuku
siunnersuutaat, uanga nammineq inuttut siunnersuutiginikuunngilara.
Taamaattumik taanna erseqqissaatigerusuppara. Aamma pingaartutut
isumaqarfigaara massakkut utoqqaat eqqarsaatigalugit ataatsimiititaliamik
pilersitsisoqarsimaneranik makku tunngaviusut uani isummersuutit tamaasa
ilanngullugit soorunami aamma isummersuutigiumaarmatigit.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taava
maannakkut taasissaagut. Inuit Ataqatigiit ikinnerussuteqarlutik siunnersuutaat
siullermik taasissutigissavarput, taannalu aamma Agathe Fontainimit
oqaatigineqarpoq. Inuit Ataqatigiit siunnersuutaannut isumaqataasut
qinnuigissavakka nikueqqullugit.
Arfineq
pingasut.
Tamatumunnga
akerliusut qinnuigissavakka nikueqqullugit.
21-t
akuersipput. Taasinngitsoortoqarpa? Naamik.
Taava
taamaalilluni amerlanerusut siunnersuutaat Akileraartarnermut Akitsuusiisarnermullu
Ataatsimiititaliami amerlanerit siunnersuutaat Siumumeersut, Atassummeersut
Demokratineersullu siunnersuutaannut isumaqataasut qinnuigissavakka
nikueqqullugit.
21-t.
Akerliusut
qinnuigissavakka nikueqqullugit.
Arfineq-marluk.
Taasinngitsut
qinnuigissavakka nikueqqullugit.
Ataaseq.
Taamaalilluni amerlanerusunit immikkoortoq 18 akuersaarneqarluni naammassivoq.