Oqaluuserisassani immikkoortoq 20-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, tallimanngorneq 4. april 2003, nal.
14:10.
Doris
Jakobsen, Siumup
oqaaseqartua.
Siumumiit arnat
angutillu naligiissitaanissaat pillugu Inatsisartut inatsisissaattut
Naalakkersuisut siunnersuutaat siullermeerneqarnerani paasilluarlugu
oqaluuserinikuuarput.
Siunnersuutip
siullermeerneqarnerani inatsisissap suliarineqarnera naammagisimaarparput
naammassisaqarfiusumillu malitseqarumaarnera isumalluarfigalugu.
Tamatut
Siumumiit oqaaseqarluta Inuussutissarsiornermut Ataatsimiititaliami
nalilersuineq naammagisimaarlugu siullermeerneqarneranilu oqaaserisimasat
innersuussutigalugit pingajussaaneerneqarnissaa inassutigaarput,
suleqataasimasunullu tamanut qujalluta.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliuppoq Ane Hansen, Inuit Ataqatigiit.
Ane Hansen, Inuit Ataqatigiit oqaaseqartuat.
Arnat angutillu naligiissitaanissaat pillugu Inatsisartut inatsisissaattut siunnersuutissamut Inuit Ataqatigiinninngaanniit siullermeernermi oqaaseqaatigut innersuussutigalugit nalunaarutigissavarput akuerseqataassagatta inatsisissamut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Ellen
Christoffersen, Atassut.
Ellen
Christoffersen, Atassutip
oqaaseqartua.
Siullermeerneqarnerani
Atassumminngaanniit akerlilersimagaluarparput, kisianni maannakkut
malunnaatilimmik amerlanerussuteqartut akuersaarlugulu pimmata
Atassumminngaanniit, naak ilaatigut ataatsimiititaliami angutit arnallu amerlaqatigiillutik
inissineqarsinnaanngikkaluartut kisianni tassa siumut utimullu gruppitsinni
oqaluuserereerlugu aalajangersimavugut akuersaarniarlutigu
aappassaaneerneqarnerani.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Marie Fleischer, Demokratit.
Marie
Fleischer, Demokratit
oqaaseqartuat.
Qujanaq.
Nuannaarutiginartuuvoq kalaallit inuiaqatigiit annertunerugaluttuinnartumik
nammineerlutik aalajangersagassat innuttaasut ulluinnarni inuunerannik
aqutsisuusussat ilusilersuiffigisalermatigit. Taamaattorli Demokratit
tungaanniit tikkuarusupparput inatsisiliorniaannarluni
inatsisiliortoqartannginnissaa. Inatsisissatut siunnersuummut tunngavittut
siunnerfiusut tunngaviisigut Demokratiniit tapersersinnaavagut, naak
naligiisitaaneq pissusissamisuuginnartutut isigigaluarlutigu.
Ilumummi suliat
assigiit assigiimmik akissarsiaqarfiusariaqarput. Ilumummi ilinnialernissamut
suliffeqarnissamullu il.il. assigiimmik periarfissaqartariaqarput. Demokratit
qularutiginngilluinnarparput oqaatigissavarput periaatsitut eqqortutut
isiginnginnatsigu pisortat ataanni ataatsimiititaliat siulersuisullu
suiaassuseq tunngavigalugu aveqatigiissinneqartalernissaannik inatsisip
piumasaqaateqarnera. Siunnersoqatigiit, ataatsimiittartoqatigiit, siulersuisut
il.il. inuttalersorneqartassapput pingaartumik inuit piginnaaneqarnerat
tunngavigalugu. Isumaqarpugut naligiinnerujartornissamut aqqutissaq tassaasoq
inuiaqatigiit ilutsinni naligiimmik qaffakkiartornissaagaluamut akimmerartitseqataallutik
aporfiusartut suussuseerneqarlutillu ajugaaffiginiarneqarnissaat. Demokratini
isumaqarpugut inatsisit isumasiorneqarnissamut periarfissarpassuatsinnik
siunnerfilerneqartassanngitsoq.
Inatsisartut
inatsimmik akuersissuteqassappata inatsisit imatut
ilusiliivigineqarsimasariaqarput maleruarneqarnissamini
paatsuunganartuerullugu.
Taamatut
tunngavilersuilluta inassutigissavarput siunnersuutip taamatut isikkoqarluni
itigartinneqarnissaa.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Maannakkut
oqaaseqassaaq Inuussutissarsiornermut Naalakkersuisoq.
Finn Karlsen, Inuussutissarsiornermut Naalakkersuisoq,
Atassut.
Naatsuarakasimmik.
Ataatsimiititaliami amerlanerussuteqartut, partiit amerlanerussuteqartut inatsisissatut
siunnersuut akuersaarmassuk annerusumik oqaaseqarnanga tusaatissatut
tigussavara ataatsimiititaliap isumaliutissiissutaa.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taava ikinnerussuteqartut
siunnersuutaat Demokratit siunnersuutip itigartitsissutigineqarnissaa
siunnersuutigaat, taannalu siulliullugu taasissutigissavarput. Demokratit
siunnersuutigaat immikkoortoq 20-p aappassaaneerneqarnerani taasissutissat
saqqummiunneqartut itigartitsissutigineqassasut. Tamatumunnga isumaqataasut
qinnuigissavakka nikueqqullugit.
Pingasut.
Tamatumunnga
akerliusut qinnuigissavakka nikueqqullugit.
22-t.
Taasinngitsoortoqarpa?
Naamik
Taava maannakkut
taasissutigissavarput Naalakkersuisut allannguutissatut siunnersuutaannut
isumaqataasut. Tassa taakkua udvalgimi suliarineqarsimasut maannakkullu
saqqummiunneqarlutik oqaaseqarfigineqareersut. Allannguutissanut taakkununnga
isumaqataasut qinnuigissavakka nikueqqullugit.
22-t
isumaqataapput.
Akerliusoqarpa?
Pingasut
akerliupput.
Taasinngitsoortoqarpa?
Naamik.
Taamaalilluni aappassaaneerneqarnermini arnat angutillu naligiissitaanissaat
pillugu Inatsisartut inatsisissaattut siunnersuut akuersissutigineqarpoq
maannalu akuerineqartut tunngavigalugit pingajussaaneerneqarnissaminut
ingerlaqqissalluni.