Oqaluuserisassani immikkoortoq 25-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut
ataatsimiiffiusut arfersaneq aappaat, ataasinngorneq 31. marts 2003, nal. 13:05
Jensine Berthelsen, Udvalgip Siulittaasua, Atassut.
Inatsisartut Aalisarnermut, Piniarnermut Nunalerinermullu Ataatsimiititaliaani ilaasortat
Ole Dorph, Siumut, siulittaasup tullia, uanga Jensine Berthelsen Atassut siulittaasoq,
Inatsisartuni ilaasortaq Ole Thorleifsen, Siumut, Inatsisartuni ilaasortaq Agathe Fontain, Inuit Ataqatigiit, aammalu Inatsisartuni ilaasortaq Palle Christiansen, Demokraatininngaaniit isumaqatigiilluta una saqqummiukkumavarput.
Siunnersuutip imarisai
Siullerrnik Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut Inatsisartut Aalisarnermut, Piniarnermut Nunalerinermullu Ataatsimiititaliaata qujaruppaa.
Inatsisartut Ombudsmandiata saaffiginnissutaa ilaatigut tunngavigalugu inatsisissatut siunnersuummi allannguinerit erseqqissaanerillu pisut ataatsimiititaliap maluginiarpaa.
Piniarneq aallaaniarnerlu pillugit Inatsisartut inatsisaanni maannakkut atuuttukkut ataatsimoorluni tikaagullinniarnermi siuttuusussamik najukkami aalisartut piniartullu peqatiiffiata toqqaasinnaanissaanut piginnaatitaanissaanik periarfissamik amigaateqartoqarnera Inatsisartut Ombudsmandiata tassuuna innersuussutigaa.
Tamatuma saniatigut, Piniarnermut siunnersuisoqatigiit ilaasortaligaaneratigut, inatsisissatut siunnersuut iluarsiissutissamik irnaqarpoq, taamaalilluni Aalisarnermut Piniarnermut Nunalerinermullu Pisortaqarfik, kiisalu Avatangiisinut Pinngortitamullu Pisortaqarfik siunnersuisoqatigiinnut pingaarnerusumik taaseqataasinnaanatik ataatsimeeqataasartutut siunissami inissisimasussanngussallutik.
Tamanna ataatsimiititaliap isumaqatigaa, suliassaqarfittummi pisortaqarfiit pisortaqarfinnik taakkunanngarpiaq siunnersuisutut suliaqartuni ilaasortaatitaqarlutik peqataanissaat tulluarpallaarnavianngimmat.
§ 16, immikkoortoq 4-p oqaasertaliivigineqarneratigut Aalisarnermut siunnersuisoqatigiinnut maleruagassanut atuuttunut Piniarnermut siunnersuisoqatigiinnik tusarniaasarnermut maleruagassat naapertuuttunngortinneqarput. Taamatut allannguuteqartitsinissamut ataatsimiititaliaq isumaqataavoq, Piniarnermullu siunnersuisoqatigiinnik tusarniaasarnerup naleqqussaavigineqarnissaa pitsaasutut isigalugu.
Piniarnermut siunnersuisoqatigiinnut 1997-imi suliakkiissut ataatsimiititaliap Naalakkersuisunut naggataatigut malugeqqussavaa, tassani oqaatigineqarmat siunnersuisoqatigiit Naalakkersuisunut oqaaseqaateqarumallutik suliassanik suliarinnissinnaasut.
Suliakkiissummi maannakkut atuuttumi saaffiginnissutit tamakkerlugit oqaaseqarfiginissaannut Piniarnermut siunnersuisoqatigiit pisussaafeqanngillat. Taamaammat inatsisip allannguuteqarneranut atatillugu Piniarnermut siunnersuisoqatigiinnut suliakkiissutip Naalakkersuisunit aamma allanngortinneqarnissaa ataatsimiititaliap kaammatuutigissavaa, taamaaliornikkut Naalakkersuisunit saaffiginnissutit tamakkerlugit Piniarnermut siunnersuisoqatigiinnit oqaaseqarfigalugit akissuteqarfigineqarnissaat pisussaafinngortinneqaqqullugu.
Tamanna siunnersuisoqatigiit tusarniaavigineqartarnerannut atatillugu nalornilernerit pilersannginnissaannik siunertaqassaaq.
Taamak oqaaseqarluni Ataatsimiititaliap isumaqatigiissup siunnersuut maannakkut iluserisamisut iluseqarluni akuersissutigineqassasoq inassutigaa.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Maannakkut Aalisarnermut, Piniarnermut, Nunalerinermullu Naalakkersuisoq.
Simon Olsen, Aalisarnermut, Piniarnermut, Nunalerinermullu Naalakkersuisoq, Siumut.
Aalisarnermut, Piniarnermut Nunalerinermullu Inatsisartut ataatsimiititaliaata isumaliutissiissutaanut Naalakkersuisut sinnerlugit matumuuna qujassuteqarpunga.
Naalakkersuisut qujassutigivaat ataatsimiititaliap isumaqatigiittup inatsisissatut siunnersuutip taamatut isikkoqarluni akuersissutiginissaa isumaqataaffigimmassuk. Naalakkersuisut maluginiarpaat, ataatsimiititaliap isumaliutissiissutimigut inassutigimmagu, inatsimmut allannguinermut atatillugu aamma Piniarneq Pillugu Siunnersuisoqatigiit suliassaat allannguiffigineqassasut, imaalillugit Piniarneq Pillugu Siunnersuisoqatigiit, Naalakkersuisut saaffiginnissutaat tamaasa oqaaseqarfigisassagaat.
Tamatumuuna anguniarneqarpoq Siunnersuisoqatigiinnut tusarniaanermi nalornisoornerit pinaveersaarneqarnissaat.
Kingullermut atatillugu Naalakkersuisut sinnerlugit nalunaarutigissavara, Piniarneq Pillugu Siunnersuisoqatigiit suliassaat iluarsineqassammata ataatsimiititaliap inassutteqaataa malillugu.
Taamatut oqaaseqarlunga Naalakkersuisut sinnerlugit suliassaq Inatsiartunut suliassanngortillugu ingerlatissavara.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Ole Dorph, Siumut.
Ole Dorph, Siumup oqaaseqartua.
Qujanaq. piniarneq aallaaniarnerlu pillugit Inatsisartut inatsisaata allanngortinneqarnissaanik Inatsisartut inatsissaattut Naalakkersuisut siunnersuutaat pillugu Siumumiit suliap siullermeerneqarnerani oqaaserisavut innersuussutigissavagut.
Allannguutissatut siunnersuutissatut taakkartorneqarsimasut maannamut Naalakkersuisut aaqqiiviginiarneqartut takuneqarsinnaavoq. Soorlulu tamanna Aalisarnermut, Piniarnermut, Nunalerinermullu Ataatsimiititaliamiit aamma kissaatigineqarsimasoq.
Siumumiit nuannaarutigaarput Naalakkersuisut innersuussutigineqartut suliarisimammatigit taamaasilluni inatsimmi nalornissutaasoq siunissami pinngitsoorneqarsinnaalissallutik.
Taamatut oqaseqarluta suliap Siumumiit pingajussaaneerluni suliarineqarnissaa siunnersuutigiumavarput Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Agathe Fontain, Inuit Ataqatigiit.
Agathe
Fontain, Inuit
Ataqatigiit oqaaseqartuat.
Inuit
Ataqatigiinninngaaniit siullermeernerani oqaaseqaativut innersuussutigalugit
pingajussaaneerneqarnissaanut innersuussutigaarput.
Jonathan
Motzfeldt, ataatsimiinnermi
aqutsisoq, Inatsisartut Siulittaasuat, Siumut.
Tulliuppoq Jensine Berthelsen, Atassut.
Jensine Berthelsen, Udvalgip Siulittaasua, Atassut.
Paatsuungassutaasartut ikiliartortinneqarnissaat nuannaarutigalugu inatsisiliakkut allanngortinniarneqartut iluarsiniarneqartut ilaatigut Atassumminngaaniit siullermeerluta oqaatigisavut innersuussugigalugit aamma pingajussaaneerneqarnisaanut taamatut iluseqarluni innersuussugissavarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Palle Christiansen Demokratit.
Palle Christiansen, Demokratit oqaaseqartuat.
Demokratit tungaaninngaaniit nuannarutigaarput Naalakkersuisut maluginiarsimagaat aammalu Ataatsimiititaliap innersuussutai malinniarlugit. Tassalu aamma Ataatsimiititaliaq isumaqatigiissoq inassuteqarmata taamatut annerusumik oqaasissaqanngilagut. Taamatullu innesuussutigalugu pingajussaaneerluni ingerlanneqassasoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tullinnguuppoq Anthon Frederiksen, Kattusseqatigiit.
Anthon Frederiksen, Kattusseqatigiit.
Suliap siullermeerneqarnerani Kattusseqatigiinni oqaaseqaativut innersuussutigalugit nuannaarutigalugu maluginiarpara suliap aappassaaneerneqarnissaanut Aalisarnermut, Piniarnermut, Nunalerinermullu Ataatsimiititaliap isumaqatigiilluni allannguiffigisassat assiginngitsut eqaallisaanissaq anguniarlugu isumaqatigiissutigisimagaat. Aammalu tamanna Naalakkersuisunit malinniarneqartoq paasinarmat taamatut isikkoqarluni pingajussaaneerneqarnissaa aamma uanga akuerseqataaffigissavara.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Maannakkut taasissaagut. Aalisarnermut, Piniarnermut, Nunalerinermullu Ataatsimiititaliap isumaqatigiittup siunnersuut taamatut iluseqartillugu akuersissutigineqassasoq inassutigaa.
Tamatumunnga isumaqataasut qinnuigissavakka nikueqqullugit. 22.
Akerliusoqarpa? Naamik taasinngitsoortoqarpa? Naamik.
Taamaalilluni aappassaaneerneqarluni taamatut isikkoqarluni akuerineqarpoq.