Oqaluuserisassani immikkoortoq 27-3 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut 23-at, sisamanngorneq 10. april 2002 nal. 18:00.
Ruth
Heilmann,
Ilaqutariinnut Peqqissutsimullu Naalakkersuisoq, Siumut.
Inuit Ataqatigiinnit
Asii Chemnitz Narupip apeqqutaanut allakkatigut akissutinni inatsisilerinikkut
paatsoorneqarsinnaasumik akissuteqarsimanera ajuusaarutigaara. Inuttut
pisinnaatitaaffiit pillugit apeqqut eqqarsaatigalugu oqaatigineqartariaqarpoq
naalagaaffiit arlallit akornanni isumaqatigiissutit konventionit
aalajangersakkanik tunngavissanillu tamatigoortorujussuarnik
oqaasertalersukkanik imaqartarmata inatsisilerinikkut assigiinngitsunik
isumalersorneqarsinnaasunik.
Naalakkersuisut
pingaartippaat utoqqalinermi aapparisap isertitarisartakkatigut atugarisai
pissutigalugit pisortanit soraarnerussutisiaqarsinnaanermut
mattunneqartannginnissaq, taamalu aapparisamit pilersorneqarnissamut
innersuunneqartannginnissaq. Taamatut nammineerluni qanoq ilioriarsinnaannginneq
amerlasuunit naammaginanngitsutut isigineqartarpoq, minnerunngitsumik
tamatumani pineqaraangata aappariit sulisinnaasutut inuunertik tamaat
namminerisaminnik isertitaqarsimasut, taamaattumillu annerusumik
minnerusumilluunniit aapparisamit aningaasatigut allatulluunniit
pilersorneqarnissamik pisariaartitsisimanngitsut.
Naggasiullugu
oqaatigineqassaaq Naalakkersuisut isumaqanngimmata tamatumani naalagaaffiit
arlallit akornanni isumaqatigiissutinik taakkunaniluunniit artikelinik
aalajangersimasunik inatsisiliornikkut pineqartukkut unioqqutitsisoqartoq.
Peqatigitilluguli Naalakkersuisut isumaqarput pingaaruteqartoq nunat tamalaat
isumaqatigiissutaanni isummat tunngaviusut isiginiarneqartarnissaat, taamatullu
aamma nunani ataasiakkaani inatsisiliornerni immaqa isumaqatigiissutit
ataasiakkaat naapertorlugit piumasarineqartut qaangerlugit
inatsisiliortoqarsinnaasariaqartoq. Taamaattumik inatsisiliornermi nunat tamat
akornanni minnerpaaffiliussatut aalajangersakkat taakkuinnaatillugit
naammagiinnartariaqanngillat.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Asii Chemnitz Narup, Inuit Ataqatigiit.
Asii
Chemnitz Narup,
Inuit Ataqatigiit.
Qujanaq.
Ilaqutariinnut Peqqissutsimullu Naalakkersuisoq Inatsisartut Ilaqutariinnut
Peqqissutsimullu Ataatsimiititaliaannut martsip 28-anni allappoq
Naalakkersuisut isumaqartut inuit pisinnaatitaaffiinut unioqqutitsinerusoq
utoqqaat inuunertik tamaat namminneq aningaasarsiorfeqarsimasut
pensionistinngornerminni tamatuminnga periarfissaarutsinneqassagunik.
Inuit
Ataqatigiit Ilaqutariinnut Peqqissutsimullu Naalakkersuisumut
nassuiaqqunikuuaat nunat tamalaat akornanni isumaqatigiissutit sorliit,
taakkunanilu maleruagassat suut unioqqutinneqarsimanersut. Naalakkersuisup
akissuteqaammini innersuussutigaa inuttut pisinnaatitaaffiit aammalu
kiffaanngissusilittut piginnaatitaaffiit tunngaviusut illersornissaannik
naalagaaffiit isumaqatigiissutaat artikel 12 aamma artikel 13. Kiisalu
isumaqatigiissummut tapiliussaq nr. 7, tassanilu artikel 5 aamma artikel 7.
Inuit Ataqatigiit Inatsisartut allattoqarfiannit inatsisinik naliliinermik
imaattunik paasitinneqarpugut: Artikel 12 pillugu aappariilersinnaanermut
tunngassuteqarpoq, aamma imarisaa inatsisilerituunit immikkut ilisimasalinnit
ima nassuiarneqarpoq, issuaassaanga: ?Ilaqutariinnik pilersitsinissamut
pisinnaatitaaffik tassaanngilaq isumaginninnikkut aningaasaqarnikkullu
pisinnaatitaaffik naalagaaffimmut ilaqutariit najugaqartinnissaannut aammalu
aalajangersimasumik pitsaassusilimmik inuuneqarnissaannut il.il.
pisussaaffiliinissamut pituttuisoq.?
Artikel 13
inatsisinik pitsaasunik illersorteqarsinnaanermut tunngassuteqarpoq,
aappariillu pensionisiaannut tunngassuteqanngilluinnarluni. Isumaqatigiissummut
tapiliussamut nr. 7-mut artikel 5, aappariit naligiimmik
pisinnaatitaaffeqarnerannut tunngavoq, aappariit aappariittut
inooqatigiinneranni imminnut pisussaaffeqarnerannut tunngalluni.
Artikel 7
tapiliussap isumaqatigiissummut qanoq attuumassuteqarnerannut tunngavoq, aappariillu
pensionisiaannut tunngatinneqarsinnaanngilluinnarluni. Imatut
inerniliisinnaavugut: Konventionimi immikkoortortat Naalakkersuisumit
patsisigineqartut arlaannaalluunniit Namminersornerullutik Oqartussat
pisussaaffilinngilai uiusup nuliaasulluunniit naammattumik isertitaqartup
aappaata pensionisiaqartinnissaanut.
Ilaqutariinnut
Peqqissutsimullu Naalakkersuisup oqarsimanera, tassa utoqqaat inuunertik tamaat
isertitaqarsimasut soraarninngoraangamik isertitaaruttarnerat inuttut
pisinnaatitaaffiinik unioqqutitsinerusoq kukkunermik tunngaveqartutut
isigisariaqartoq.
Naalakkersuisup
oqarsimanera, issuaavunga: ?Kalaallit Nunaat nunat tamalaat akornannit
pisussaaffimminnik naammassinnissinnaaqqullugu Naalakkersuisut
siunnersuuteqartut?. Inatsisartunik eqqunngitsumik paasissutissiineruvoq.
Eqqunngitsunik paasissutissiineruvoq oqassalluni pisortanit pensionit pillugit
Inatsisartut peqqussutaat maanna atuuttoq Europami inuit pisinnaatitaaffii
pillugit konventionip oqaasertaanik tikkuarneqartunit unioqqutitsisuusoq.
Inuit
Ataqatigiit naatsorsuutigaat Naalakkersuisup oqaaserisimasani aamma
allakkatigut saqqummiussimasani pillugit utoqqatsiinnarnani oqaatsit taakkua
tunuartissagai.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Apeqqutigissavara allanik oqaasissaqartoqarnersoq. Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Qujanaq. Utaqqimisaaraluaratta Naalakkersuisup oqaatsini tunuartikkumanerai, tassalu suleriaaseq malillugu taamatut iliortoqarsinnaagaluarpoq. Kisianni Naalakkersuisuni ilaasortap paasivara una qinnuteqaaterput malinnianngikkaa. Kisianni paasivara massakkut oqaaseqarniarluni nappaasimasoq, taamaattumik uanga oqaasissakka kinguartikkallarpakka.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Ilaqutariinnermut Peqqissutsimullu Naalakkersuisoq.
Ruth Heilmann, Ilaqutariinnut Peqqissutsimullu Naalakkersuisoq.
Oqaaseqarninni imatut paasineqartariaqarpoq taakku oqaaserisakka tunuartikkikka. Akissutiga tunuartippara, taavalu taamatut oqaaseqarlunga.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Taanna ilumut tusaatissatut tigusinnaanerlugu
paasissavarput. Ajoraluartumik ullumikkut aamma namminersornerusut
tusagassiivianinngaanniit naqqiut nassiunneqarsimavoq, tassanilu
oqaatigineqarpoq Naalakkersuisut siulittaasoqarfianinngaanniit, assiami uani
ersippoq, allassimavoq taanna Naalakkersuisumit saqqummiunneqarsimasoq
inatsisilerituunik arlariinnik assortuussutigineqartoq. Assortuussutaasutut uagut paasinngilarput.
Paasissutissat erseqqissut Inatsisartut allattoqarfianinngaanniit uani
suliassamut tunngasumut oqaatigineqarsimapput. Ullumikkulli
Tusagassiivimminngaanniit nalunaarummi oqaatigineqarpoq tamanna Naalakkersuisut
naqqiutigeqqaarfigerusukkaat oqarlutik ippassaq uagut oqaatigisimasagut
Qanoruumi taakkua ilumoortuunngitsut. Taamaattumik Naalakkersuisut
siulittaasuat aperissavara soorlu aatsaannguaq Naalakkersuisunut ilaasortap
oqaatsini tunuartereerai, aamma Naalakkersuisut siulittaasuata una nalunaarut
aamma tunuartissaneraa.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Naalakkersuisut
siulittaasuat.
Hans
Enoksen,
Naalakkersuisut Siulittaasuat, Siumut.
Qujanaq.
Uani ippassaq Qanoruumi oqariartuutigineqartut aatsaat takuakka, aammalu
siulittaasoqarfiup ataatsimiissimanerata Inatsisartut siulittaasuaninngaanniit
aatsat tusarlugu. Aammalu uanga minnerpaarpaamilluunniit Ombudsmandimut
akornusersuiniarsimanngilanga, aamma Naalakkersuisuni
siunertaqarsimanngisaannarpugut akornusersuiniarnissatsinnik, taamaammat uanga
uani kukkusimaninnik nassuerutissaqanngilanga aamma uannut allakkanik
apuussisoqarsimanngilaq. Uanga atsiukkannik ingerlatsisoqarsimanngilaq,
toqqaannartumik uanga attavigineqarsimanngilanga. Taanna erseqqissaassutigaara.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Naalakkersuisut siulittaasuat nalunaarfigissavara illua-tungiliuttut saaffiginnissuteqarnerat toqqammavigalugu Inuit Ataqatigiinninngaanniit aamma allagaqarsimagatta siulittaasoqarfimmut suliassaq taanna oqaatigisat tusagassiuutinullu ullumikkut nalunaarlutit kukkunerakkat Inatsisartut siulittaasuannut nammineq qinnutigisimagakku kinguartinneqassasoq, ukiamullu aatsaat suliassaq taanna suliarineqassasoq. Taanna suliassaq pingajussaanik Naalakkersuisut siulittaasuannut utertipparput, inatsisit malillugit sulisoqarnissaa tassani torersumillu sulisoqarnissaa anguniarlugu.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Inatsisissaq taanna pineqartoq ukiamut kinguartitaareernikuuvoq, taanna Inatsisartut akuersissutigereerpaat. Naalakkersuisut siulittaasuat.
Hans Enoksen, Naalakkersuisut Siulittaasuat., Siumut.
Tassa tjenestemandinut inatsit taanna siullermeerneqarmat ataatsimiititaliami aamma isumaqatigiissut taperserpaat, aappassaaaneerneqarmat aamma isumaqatigiissut taperserpaat. Uani ippassaq aatsaat paasigatsigu misissorparput, tassanilu Ombudsmandip oqaaseqaatai aporfiusutut nalilerneqarmata akornutissaqartinngilluinnaqqissaarlugu taakku piumasaasut naammassineqarnissaat siunertaralugu kinguartinneqarnissaa aalajangerparput.
Aamma uanga oqaatigissavara minnerpaarpaamilluunniit inatsisiliortunut akornutaaniarlunga aammalu akornusersuillunga pissusilersorsimannginnama, aatsaalli ippassaq paasillugu Inatsisartut siulittaasuata oqaatigimmagu.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Kissaatigissavara taanna apeqqut ukiamut kinguartitaareersoq maani uterfigeqqittariaqanngitsoq, uanilu oqaluuserisarput kingumut 27 oqaaseqarfiginissaa innersuussutigalugu. Ilaqutariinnermut Peqqissutsimullu Naalakkersuisoq.
Ruth Heilmann, Ilaqutariinnut Peqqissutsimullu Naalakkersuisoq, Siumut.
Oqaaserisakka innersuussutigalugit kissaatigaara immikkoortoq 27-p Naalakkersuisut sinnerlugit pingajussaaneerneqarnissaa akuerineqassasoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Per Berthelsen, Demokratit.
Per Berthelsen, Demokratit.
Aap,
ilumoortoq kinguartitsineq pimmat. Kisianni tusagassiuutitigut nalunaarummi
nassuerumasoqanngilaq sumilluunniit. Taamaallaat oqaatigineqarpoq sumilluunniit
siunertaasimanngitsoq taamatut Inatsisartunut kukkusumik paasissutissanik
eqqunngitsunillu paasissutissanik tunniussiniarneq. Kisianni tamanna pivoq,
tamannalu aallaavigalugu tusagassiuutit aqqutigalugit nalunaarutigineqarsimasup
Naalakkersuisut siulittaasuaninngaanniit utertinneqarnissaa
piumasaqaatigissavarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Naalakkersuisut
siulittaasuat.
Hans
Enoksen,
Naalakkersuisut Siulittaasuat, Siumut.
Tassami
kukkunermik ilisimatinneqarsimasuuguma aammalu suna ajornartorsiutaanersoq
uannullu apuussisoqarsimasuuppat utertitsisinnaagaluarpunga, kisianni ilisimatinneqarnangalu
kukkusumillu uanga siunnerfeqarnanga sulillunga, aammalu minnerpaamilluunniit
akornusiiniarnanga tusagassiuutinut nalunaarut taanna aalajangiusimavara.
Qujanaq.
Jonathan
Motzfeldt, ataatsimiinnermi
aqutsisoq, Inatsisartut Siulittaasuat, Siumut.
Maannakkut
immikkoortoq 27 taasissutigissallugu piareersarparput, taava tulliulluni
oqaaseqassaaq Ane Hansen, Inuit Ataqatigiit.
Ane Hansen, Inuit Ataqatigiit.
Qujanaq. Tassa uani pisimasup, imaluunniit tusagassiorfinnut nalunaaruteqarnermi nalunaarutaasup aappaa Naalakkersuisut siulittaasuata pisaa tjenestemandinut inatsisissatut nutaatut siunnersuutigineqarsimasoq siornali ukiakkut aamma taannarluinnaq siunnersuutigineqarsimasup ingerlanerani paasissutissat eqqunngitsut uatsinnut Inatsisartunut saqqummiunneqartarsimapput. Aammalu uani aatsaat aappassaaneernerata kingorna ulloq taanna allakkatigut taakkua uppernarsarneqarsinnaalermata Inuit Ataqatigiinninngaanniit qinnuteqarpugut taassuma inatsisissatut siunnersuutip paasissutissat uatsinnut tunniunneqartut tunngavigalugit ukiamut kinguartinneqassasoq kukkussutisi ilissi naqqinnissaannut periarfissillutigit tassani. Naak uagut Inatsisartut paasissutissinneqartarnigut Naalakkersuisuninngaanniit pinngitsooratik ilumoortussaagaluartut uani pingaartikkatsigu Naalakkersuisut Ombudsmandillu akornanni tatiginneqatigiinnerup pitsaasumik ingerlaqqinnissaa tassa periarfissiivugut kukkussutit taakkua aaqqinneqarnissaannut. Kisianni tassa paasineqarsimanngippata taanna pisoq allaavoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Oqaatigeqqissavara pineqartoq siunnersuut ukiamut kinguartitaasimammat maannakkullu oqallisissaanani. Oqallisigisassami 27-miittut oqallisigissavagut. Naalakkersuisut siulittaasuat.
Hans Enoksen, Naalakkersuisut Siulittaasuat, Siumut.
Aap, tassami ajortoqavissimappat sooq Inatsiseqarnermut Ataatsimiititaliap uanga aggersarsimanngilaanga, taavalu kukkussutit suut aammalu ajortut suut aporfiginerlugit toqqaannartumik aamma isumasiorneqarsinnaammata Naalakkersuisut sukkulluunniit. Kisianni qaaqqusissummik arlaatigulluunniit takkuttoqarsimanngilaq, aatsaallu Inatsisartut siulittaasuannik oqaluuserineqareersimammat tusarlugu.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Aqqaluk Lynge, naatsunnguamik.
Aqqaluk Lynge, Inuit Ataqatigiit.
Inatsisartut inatsisaanni Inatsisartunut ilaasortanut akisussaaneq pillugu, taanna Inatsisartunut ilaasortanut ataasiakkaanut piinnarani aamma Naalakkersuisut siulittaasuannut atavoq.
§ 6 atuarussiuk immikkoortoq 2, tassani allassimavoq: ?Naalakkersuisunut ilaasortaq eqqunngitsumik paasinerlutaasinnaasumillu Inatsisartunut paasissutissiisimappat, taava tatiginnikkunnaarnermik nalunaartoqarsinnaasoq?.
Suliassamut tjenestemandinut tunngasumik Naalakkersuisut siulittaasuata oqaatigisaa, taanna suliassaq utaqqivoq, suliarissavarput. Inatsisartut suleriaasiat malillugu taanna suliarineqassaqqaarpoq uterfigineqarlunilu. Taamaattumik tusagassiuutitigut nalinginnaannaq aamma Naalakkersuisut paasissutissiissuteqartussaanngillat taama pingaaruteqartigisuni. Taamaattumik qujassutigaarput Ilaqutariinnut Peqqissutsimullu Naalakkersuisoq unneqqarissumik oqaatsini oqaatigisimasani utertimmagit tunuartillugillu. Qujanaq, tassa malitassaavutit taamaalioravit. Taamaattumik qanoq iliuuseqaqqissanngilagut uagut Inuit Ataqatigiinniit, Demokratiniit Kattusseqatigiinniillu.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Jens Napaattooq, Siumut.
Jens
Napaattooq, Siumut.
Suleriaaserput
naapertorlugu uani oqaluttarfimminngaanniit assigiinngitsutigut ullormut
oqaluuserisassat innersuunneqartarput aammalu ilaatigut oqaatsit nutaraaneqartut
aammalu taamatut oqaluttariaqanngikkaluarnermut maanngaanniit oqaaqqissaarutit
assigiinngitsut ingerlanneqartarput. Taamaattumik maannakkut ullormut
oqaluuserisassap immikkoortoq 27-p eqqartornerani immikkoortoq 11
kinguartinneqarsimasoq, tassalu naatsumik oqaatigalugu marloriarluni
aappassaaneerneqarluni ingerlanneqareertuni tusarniaanerit assigiinngitsut
naammagisimaarneqarlutik partiinit tamanit Kattusseqatigiinninngaanniit
toqqammavilersorneqarlutik oqariartuutigineqarsimasut Rigsombudsmandip
Inatsisartut Ombudsmandiata saqqummiussaa aallaavigalugu pissutsit
qulaajarneqarsinnaasut pillugit ingerlariaqqinnissamut ukiamut kinguartitsineq
ersarereeraluartoq maani immikkoortoq 27 kaputartuullugu maannakkut
eqqartorneqarpoq.
Inatsisartut
sulinitsinni maannakkut qularutigineqanngilaq una, tassalu inuiaqatigiit
avatitsinningaanniit politikkikkut maani ingerlatsinitsinni malinnaasuupput,
taamatullu malinnaasoqarnerani ilaatigut naluneqanngilaq soorlulusooq
kinguarsaaneq, ajortisaarineq, qunusaarineq, qaqqalaarluni annertuunik
assigiinngitsunik ingerlatsinerup kigaallisarneqarnera maannakkut
takuneqarsinnaasorujussuuvoq. Aamma ilaatigut oqaatigineqarsinnaavoq nammineq
politikkikkut qineqqusaariarluni siunnerfigisat qineqqusaarutigisimasat tunuartiteriarlugit,
taavalu tunuartiterneqarnerat ilutigalugu politikkikkut siunnerfigisaraluit
piunnaarlugit maannakkut alla suliarineqanngilaq naalakkersuinikkut
naalleraaniarneq annertuumik.
Ila,
inuiaqatigiit avoqqaarinerit, naalleraanerit taamatullu avoqqaarineq
qatsuppaat. Naalakkersuisut inuiaqatigiit avissaartuutsikkunnaarlugit
politikkikkut inuiaqatigiinnik kiffartuussinerput pitsaanerpaamik
ingerlannissaa salliutillugu suliniarta.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Taasilissaagut.
Anthon Frederiksen, naatsumik.
Anthon
Frederiksen,
Kattusseqatigiit.
Tassa
naalakkersuinikkut sulineq aamma illua-tungiliuttut pisussaaffiat aamma
naalakkersuisooqatigiit paasisariaqagaat tassaavoq soorunami illua-tungiliuttut
tassaapput nakkutiginneqqissaartussat aamma naalakkersuisooqatigiit arlaatigut
inatsisinik kukkussuteqassagaluarpata uparuaasussat. Tassa naalakkersuinikkut
sulineq. Imaanngilaq qaqqaqqalaarneq imaluunniit naalleraaniarneq. Taanna
paasilluinnaqqissaartariaqarpoq. Illua-tungiliuttuusugut pisussaaffeqarpugut
aamma uagut, pisussaaffippullu naapertorlugu aamma sulivugut. Taamaattumik
killilersuisoqassanngilaq kikkut qanoq oqassasut kikkullu qanoq oqassanngitsut.
Kiffaanngissuseqarpugut tamatta, tamattalu inuit tamat oqartussaaqataaneranni
ataqqinnilluta suliniarpugut. Taamaattumik aamma naalakkersuisooqatigiit aamma
tamanna ataqqisariaqarpaat.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Naalakkersuisut
siulittaasuat, aamma naatsumik.
Hans Enoksen, Naalakkersuisut Siulittaasuat.
Qujanaq. Tassa ataatsimiititaliaminngaanniit Inatsiseqarnermut Ataatsimiititaliamiit allakkanilluuniit tigusaqarsimasuuguma kukkusumik oqariartortarsimaninnik taakkua maani nassuerutigissagaluarpakka utoqqatsissutigalugillu, kisianni allakkanik uannut apuuttoqarsimanngilarluunniit.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Per Berthelsen, Demokratit, naatsumik.
Per Berthelsen, Demokratit.
Erseqqissumik Inuit Ataqatigiinni gruppeformandip taareerpaa Ilaqutariinnut Peqqissutsimullu Naalakkersuisup qinnuigineqarnini malillugu utertitsinera akuersaarneqartoq. Tamanna aamma Demokratit tungaaninngaanniit peqataaffigaarput. Kisianni taamaakkaluartoq aamma Jens Napaattuup Siumuminngaanniit oqaaseqartup oqaatigisai mamianangaartut uani uparuartariaqarput. Pissusilersorneq tassa kiffaanngissuseqarluni oqarsinnaatitaanermut minnerunngitsumillu illua-tungiliuttutut akisussaaffigisaq aallaavigalugu suliniarnermik naqisimanninniarneruvoq, tamannalu qaqugukkulluunniit akuerineqanngisaannassaaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Maannakkut taasissaagut. Oqallinneq tassunga killeqarpoq. Tassa immikkoortoq 27 pillugu allannguutissamik siunnersuuteqartoqarsimanngilaq Naalakkersuisunit imaluunniit Inatsisartunit. Taamaattumik aappassaaneerneqarnerani Inatsisartut aalajangerput siunnersuut ima iluseqarluni pingajussaaneerneqarnissaminut ingerlatinneqassasoq akuerineqassasorlu. Taama isikkoqarluni akuerineqarnissaanut isumaqataasut qinnuigissavakka nikueqqullugit.
16-t isumaqataapput.
Akerliusut qinnuigissavakka nikueqqullugit.
Aqqanillit. Taaseqataanngitsut qinnuigissavakka nikueqqullugit.
Naamik. Taamaalilluni amerlanerusunit akuersissutigineqarpoq
immikkoortoq 27, Pisortanit pensionisat pillugit Inatsisartut
peqqussutissaattut siunnersuut.