Oqaluuserisassani immikkoortoq 34-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut tallimaat,
ataasinngorneq 10. marts 2003,
Mikael Petersen, Attaveqarnermut, Avatangiisinut
Ineqarnermullu Naalakkersuisoq, Siumut.
Qujanaq.
Naalakkersuisut matumani
saqqummiuppara Namminersornerullutik Oqartussat kommunellu inissiaataasa
attartortittakkat, pigisatut inissianngortissinnaanerat pillugu inatsisartu
peqqussutaata allanngortinneqarneranik, inatsisartut peqqussutissaattut
siunnersuut.
Peqqussutissatut siunnersuut
saqqummiunneqarpoq peqqussutip atuunnerani paasisimalikkat kingunerisaannik.
Paasinarsisimavoq inissiat
attartortittakkat niuernermi akiat sumiiffinni arlalinni inissiat teknikkikkut
aningaasatigullu naliliivigineqarneranniit appasinnerusoq.
Taamaatuumik inissiat maannakkut
attartortorisaminnut niernermi nalingannit appasinnerusumik akilersillugit
tunineqarsinnaanissaasa periarfissinneqarsinnaanissaa pisariaqarpoq.
Kiisalu siunnersuutip kinguneraa
tunisinermi akilitissaq niuernermi akigisinnaasaannit 5 %-imik annerusumik nikingassuteqarpat,
iluanaarniapilunniarsinnaaneq pinaveersaartinniarlugu akiligassat nalingisa
nikerarnerannut qularnaveeqqutip nalunaarsorneqarnissaa.
Taamatut oqaaseqarlunga
Namminersornerullutik Oqartussat kommunellu inissiaataasa attartortittakkat,
pigisatut inissiarnngortissinnaanerat pillugu inatsisartut peqqussutaata
allanngortinneqarneranik, inatsisartut peqqussutissaattut siunnersuut
inatsisartunit akuersortumik oqaluuserisassanngortippara.
Siunnersuutip
aappassaaneerneqannginnermini inatsisartut Attaveqarnermut Pilersuinermullu
aamma Ineqarnermut ataatsimiititalianni oqaluuserineqarnissaa
siunnersuutigineqarpoq.
Jonathan Motzfeldt, ataatsimiinnermik aqutsisoq,
Inatsiartut Siulittaasuat, Siumut.
Partiit oqaaseqartui, Kiistat P.
Isaksen, Siumut.
Kiista Isaksen, Siumup oqaaseqartua.
Qujanaq.
Namminersornerullutik Oqartussaq kommunellu
inissiaataasa attartortittakkat pigisatut inissianngortissinnaanerat,
inatsisartut peqqussutaata allanngortinneqarneranik inatsisartut
peqqussutissaattut siunnersuut Siumumiit eqqartoreerlugu, imaattumik
oqaaseqarfigissavarput.
Peqqussutip atuunnerani
allannguuteqartoqartariaqarnera paasinarsisimavoq, tassani paasineqarsimammat
inissiat attartortittakkat, niuernermi akiat sumiiffiinni arlalinni inissiat
teknikkikkut aningaasatigullu naliliivigineqarneraniit appasinnerusoq.
Kiisalu inissiat maannakkut
attartortorisaminnut niernermi nalinganit appasinnerusumik akilersillugit
tunineqarsinnaanissaasa periarfissinneqarnissaa pisariaqartoq.
Taamatuttaaq siunnersuutip
kingunerissallugu iluanaarniapilussinnaanerup pinaveersaartinnissaa.
Taamatut oqaaseqarluta inatsisartut
peqqussutaata allanngortinneqarneranik inatsisartut peqqussutissaattut
siunnersuut, aappassaaneerneqannginnerani inatsisartut Attaveqarnermut
Pilersuinermullu aamma Ineqarnermut ataatsimiitialiaani oqaluuserineqarnissaa
Siumumiit innersuussutigaarput.
Jonathan Motzfeldt, ataatsimiinnermik aqutsisoq,
Inatsiartut Siulittaasuat, Siumut.
Tulliulluni oqaaseqassaaq Johan Lund
Olsen, Inuit Ataqatigiit.
Johan Lund Olsen, Inuit Ataqatigiit oqaaseqartuat.
Inuit Ataqatigiit peqqussut manna
siorna upernaakkut sammigatsigu amerlanernik eqqaamaneqassajunnarsivoq
peqqussut una, tassalu inissianik attartortuunermut piginnittuulernissamik
aqqutissiuussiniartussaq, tamakkiisumik tapersersunnginnatsigu.
Taamaattumillu aamma akerliulluta
taaseqataaffigigatsigu, naak taamani siunnersuutaasoq ataatsimut isigalugu
ilalersornartikkaluarlutigu.
Taamanimi inissiat akissaasa
aalajangersaavigineqartarnissaani inissiat teknikkikkut aningaasatigullu
nalingisa naatsorsorneqartarnerisa saniatigut kissaatigivarput, inigisap
inissisimanini pissutigalugu nalinga ilanngullugu aamma
naatsorsuutigineqartassasoq.
Tassami assersuutigalugu inissiaq
illup tunuanut isikkivilik inissiamik kangerlummut isikkivilimminngarnit,
inissisimanini pissutigalug nalikinnerussasoq takorloorsinnaareeratsigu.
Allannguutissatut siunnersuummi
matumani ilisimatitsissutigineqarpoq inissiat attartortittakkat niuernermi
akiat, sumiiffinni arlalinni inissiat teknikkikut aningaasatigullu
naliliivigineqarnerarniit appasinnerusarsimasut.
Taamaattumillu tassuunakkut
aaqqiissuteqartoqartariaqartoq naak erseqqissumik qanoq ilinikkut tamanut
pisarnersoq itisilerneqanngikkaluartoq.
Siunnersuutip
aappassaaneerneqannginnerani taamaattumik inatsisartut Attaveqarnermut
Pilersuinermut Ineqarnermullu ataatsimiititaliaani tamanna sukumiinerusumik
sammineqassasoq kissaatigissavarput.
Paaserusunnarpormi siorna inissiat
inissisimanitik pissutigalugu akimikkut nalilersorneqartalernissaannik
siulittuuteqareersimanerput, aamma maanna allannguiniarnermut sunniuteqarsimasinnaanersoq
imaluunniit allanik peqquteqarsimanersoq.
Naalakkersuisup ataatsimiititaliamut
itisilereqqullugu taamaattumik maannangaaq kaammattuutigeriissavarput.
Allannguutissatut siunnersuut
januarip aallaqqaataanit tassalu kingumoortumik atuutilissasoq aamma
siunnersuutaavoq.
Inuit Ataqatigiit
kissaatigissavarput tamanna aamma immikkut sammineqaqqaarallassasoq.
Kingumoortumimmi inatsisiliorsinnaaneq immikkorluinnaq pisoqartinnagu
qaqutigoorluinnartuusoriaqarsorigatsigu.
Taamatullu oqaaseqarallaannarluta
ataatsimiititaliami suleqataanissatsinnut piareersimalluta nalunaarpugut.
Jonathan Motzfeldt, ataatsimiinnermik aqutsisoq,
Inatsiartut Siulittaasuat, Siumut.
Tulliulluni oqaaseqassaaq Isak
Davidsen, Atassut.
Isak Davidsen, Atassutip oqaaseqartua.
Atassummiit peqqussutinut siunnersuut imatut oqaaseqarfigissavarput.
Peqqussutissatut siunnersuummi Naalakkersuisup saqqummiussinermini peqqussutip atuunnerani paasisimalikkat toqqammavigineqarsimanerat eqqaammagu ATASSUT-mit isumaqataalluinnarpugut.
Tamatumani paasinarsivoq inissiat attartortittakkat niuernermi akiat sumiiffinni arlalinni inissiat teknikkikkut aningaasatigullu naliliivigineqarneranniit appasinnerusimasoq, aammalu inissiat maannakkut attartortorisaminnut niuernermi nalingannit appasinnerusumik akilersillugit tunineqarsinnaanerat periarfissinneqarsimammat.
Siunnersuummilu pineqartut ATASSUT-mit taperseratsigit oqaatigissavarput.
ATASSUT-miillu taamatut oqaaseqarluta Ineqarnermut Ataatsimiititaliamut aappassaaneerneqartinnagu isummersorfigineqarnissaa innersuussutigaarput.
Jonathan Motzfeldt, ataatsimiinnermik aqutsisoq, Inatsiartut Siulittaasuat, Siumut.
Tulliuppoq Palle Christiansen, Demokraatit.
Palle Christiansen, Demokraatit oqaaseqartuat.
Uagut attartugaqalernermut pigisaqalernissamut eqqarsaat taperserparput, tassuunga piffissaq ungasinnerusoq isigalugu attartugaqartut najugaqarneq akikinnerulissaaq. Aamma Namminersornerullutik Oqartussat nutaamik sanaartornissamik akissanik pissarsisinnaalissapput.
Demokratiniilli naatsumik oqassaagut inissiat attartukkani naliat anertussisariaqartoq, pisinissami tunisinissamullu attuumassuteqanngitsunik, ullutsinni piginnittuni kisimi aaliangiussisarnera atorunnaarlugu. Taamatut iliortarnermi nalunaaruteqarneq akigitinneqartussanut naapertuulluarnerusumik anguneqarsinnaalissapput.
Taakkua oqaatigalugit inassutigaarput siunnersuutaasup ataatsimiititaliamut suliarineqarnissaa.
Anthon Frederiksen, Kattusseqatigiit.
Namminersornerullutik Oqartussat kommunillu inissiaataasa attartortittakkat pigisatut inissianngortissinnaanerat pillugu Inatsisartut peqqussutaata normu 5-ip 21. maj 2002-eersup allanngortinneqarnissaannut siunnersuut Kattusseqatigiit sinnerlugit imaattumik oqaaseqarfigissavara:
Kattusseqatigiit sinnerlugit nuannaarutigaara peqqussutip allanngortinneqarneritigut aamma inissiat maannakkut attartortorisaminnut niuernermi nalinganik appasinnerusumik akilersillugit tunniunneqarsinnaanissaannut periarfissiisoqarmat. Aammalu iluanaarniapiluttoqarsinnaanerata pinaveersaartinneqarnissaa aamma annerusumik eqqumaffiginiarneqarmat.
Ilanngullugu Attaveqaqatigiinnermut Ineqarnermullu Ataatsimiititaliamut kaammattuutigissavara inissianik tuniniaasinnaanermut periarfissat suli eqaannerusumik pisariinnerusumillu ingerlanneqarsinnaanerat qularnaarniaqqullugu, periarfissanik ujartueqqullugit, ilaatigut inissianik tuniniaanermi 75%-mik piumasaqaatip allanngortinneqarsinnaanerata misissorneqarnissaa ilanngullugu, minnerunngitsumik attartortumiit piginnittuunermut ikaarsaariarnerup suli akimmiffissaqannginnerusumik ingerlanneqarsinnaanera aamma atuisunut piginnittuulerumaartussanullu kajuminnarninngortinneqarsinnaanera anguniarlugu.
Taamatut oqaaseqarlunga allannguutissatut siunnersuut tamakkiisumik taperserlugu Attaveqaqatigiinnermut Ineqarnermullu ataatsimiititaliami suliarineqarnissaa inassutigaara.
Jonathan Motzfeldt, ataatsimiinnermik aqutsisoq, Inatsiartut Siulittaasuat, Siumut.
Ineqarnermut Naalakkersuisoq.
Mikael Petersen, Ineqarnermut Naalakkersuisoq, Siumut.
Partiiniit Kattusseqatigiinniillu oqaatigineqartut qujassutigaakka.
Erseqqissaatigilaaginnassavara Demokraatit oqaaseqartuanut eqqaamassagatsigu illuutinik inissianillu tuniniaanermi tassani nalilersuisarneq eqqarsaatigalugu, tassa piginnittut nalilersuisanngimmata, kisianni soorunami uani massakkut peqqussutissap siunnersuummut tunngavigitinneqartussat tunngavigalugit akigititassatigut aaliangersaanissaq pisassammata,
aamma A/S Ini piginnittuunngimmat taakkunannga. Namminersornerullutik Oqartussat kommunillu piginnittuummata.
Apeqqutit assigiinngitsut Inuit Ataqatigiit tungaaninngaanniit qaffakaatinneqartut ataatsimiititaliap suliamut uunga ingerlatitseqqittussap pisariaqartippagu, isumasiorneqarnissannut piareersimajuarpunga.
Jonathan Motzfeldt, ataatsimiinnermik aqutsisoq, Inatsiartut Siulittaasuat, Siumut.
Taannalu Ineqarnermut Ataatsimiititaliap suliarissavaa, aamma Naalakkersuisup tassani qaaqquneqarsinnaanerminut neqerooruteqarpoq, apeqqutit assigiinngitsut paaseqatigiiffiginissaannut.