Oqaluuserisassani immikkoortoq 34-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, tallimanngorneq 4. april 2003, nal. 14:
33.
Mikael
Petersen,
Attaveqaqatigiinnermut Ineqarnermullu Naalakkersuisoq, Siumut.
Erseqqissaatigissavara
akissuteqaat naqitanngorlugu Inatsisartunut Ilaasortanut agguaatereersimammat.
Taamaattumik immikkoortuata affaaninngaaniit saqqummiussap affaaninngaaniit
saqqummiutissavara tassa.
Naalakkersuisut
sinnerlugit Inatsisartut Attaveqaqatigiinnermut Ineqarnermullu
Ataatsimiititaliaat isumaliutaanut, apeqqutaanut isumaliutissiissutaanullu
tamakkiisumut qutsavigaara. Naalakkersuisut paasivaat ataatsimiititaliaq
isumaqatigiilluni aappassaaneerinissamut allannguutissatut siunnersuummik
saqqummiussiniartoq, tamatumuuna attartortumiit piginnittumut aaqqissuussineq
malillugu inissiamik allanngortitsinermi akiusoq teknikikkut aningaasatigullu
naliliinermiit appasinnerugaangat aningaasat nalingisa nikerarnerannut
qularnaveeqqutip piumasaqaataannginnissaa qularnaarniarlugu.
Siunnersuummut
Ataatsimiititaliap tunngavilersuutai Naalakkersuisut paasilluarpaat.
Sumiiffiit
ilaanni niuernermi akiusoq teknikikkut aningaasatigullu naliliinermiit
appasinnerusinnaavoq. Ilimagisariaqarpoq sumiiffinni taamaattuni niuernermi
akit imaaliallaannarlutik qaffannavianngitsut attartortup niuernerani
siunertarineqanngitsumik iluanaaruteqarnissamik nassataqarsinnaasumik.
Taamaattumik
Ataatsimiititaliap allannguutissatut siunnersuutaa Naalakkersuisut tamakkiisumik
ilalersinnaavaat.
Naggasiullugu
ataatsimiititaliap isumaliutissiissutaanut Naalakkersuisut sinnerlugit
tamakkiisumut qujassaanga, taamaalilluni
- Namminersornerullutik
Oqartussat kommunillu inissiaataasa attartortittakkat pigisatut inissianngortissinnaanerat pillugu
Inatsisartut peqqussutaata allanngortinneqarneranik inatsisartut peqqussutissaattut siunnersuummut
allannguutissatut siunnersuut akuersissutigineqassasoq,
aammalu
- Namminersornerullutik
Oqartussat kommunillu inissiaataasa attartortittakkat pigisatut inissianngortissinnaanerat pillugu
Inatsisartut peqqussutaata allanngortinneqarneranik inatsisartut peqqussutissaattut siunnersuut
saqqummiunneqarnermisut iluseqarluni pingajussaaniigassanngortinneqassasoq
inassutigaarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Maannakkut
oqaaseqassaaq Johan Lund Olsen Inuit Ataqatigiit.
Johan
Lund Olsen, Inuit
Ataqatigiit oqaaseqartuat.
Qujanaq. Tassa
Inatsisartut Attaveqaqatigiinnermut Ineqarnermullu Ataatsimiititaliaata
isumaqatigiittup kaammattuutigisaannut Naalakkersuisut paasinnilluarlutik,
tassanga allannguutissatut siunnersuutigineqartoq akuersaalersaarlugu
oqaaseqareermata Inuit Ataqatigiit takisuuliorata nalunaarutigiinnassavara -
allannguutissatut siunnersuut ilanngullugu - maannakkut aappassaaneerinninnermi
akuersaarluta taasiumaaratta.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Inatsisartut
qinnuigissavakka issiavimminnut ingeqqullugit. Maannakkut taasinissarput
pisussanngormat. Tassa Inatsisartut 34 tamatumani pineqarpoq udvalgip
Ataatsimiititaliap Ineqarnermut Ataatsimiititaliap allannguutissatut
siunnersuutaa Naalakkersuisut akissuteqaataat aamma tassaniittoq aatsaannguaq
tusarparput oqaaseqafigineqarneralu. Taamaattumik akuersaarneqarmata
Naalakkersuisuninngaaniit taakkua allannguutissatut siunnersuutit maannakkut
taasissutigissavagut.
Ataatsimiititaliap
allannguutissatut siunnersuutaanut isumaqataasut qinnuigaakka nikueqqullugit. 23.t akerliusoqarpa? Naamik.
Taasinngitsoortoqarpa? Naamik. Taamallilluni 34-p suliarineqarnera
naammassivarput aappassaaneerneqarnerani.