Oqaluuserisassani immikkoortoq 41-2 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiusut aqqaneq
sisamaat, pingasunngorneq 26. marts 2003 nal. 13:05.
Arkalo Abelsen, Kultureqarnermut,
Ilinniartitaanermut, Ilisimatusarnermut Ilageeqarnermullu Naalakkersuisoq,
Atassut.
Atuarfik pillugu Inatsisartut
peqqussutaata allanngortinneqarneranik Inatsisartut peqqussutissaattut
siunnersuummik, teknikikkut kukkunialunnik amigaatinillu iluarsiisumik,
Inatsisartut Kultureqarnermut Ilinniartitaanermullu Ataatsimiititaliaata
suliaqarsimanera Naalakkersuisut iluarisimaarpaat.
Atuarfik pillugu Inatsisartut
peqqussutaannik nutaamik suliaqarneq pillugu ataatsimiititaliap oqaaseqaatai
Naalakkersuisut isumaqatigilluinnarpaat, taamatullu aamma ataatsimiititaliap
inassuteqaataa tapersiitigalugu iluarisimaarlugu tusaatissatut tigullugu.
Jonathan Motzfeldt, ataatsimiinnermi aqutsisoq,
Inatsisartut Siulittaasuat, Siumut.
Partiit oqaaseqartuinut. Doris Jakobsen,
Siumut.
Doris Jakobsen, Siumup oqaaseqartua.
Siumumiit atuarfik pillugu inatsisartut
peqqussutaata allanngortinneqarneranik inatsisartut peqqussutissaattut
siunnersuut Siumumiit paasilluarlugu Naalakkersuisut aaqqiissutissatut
siunnersuutaat annertunerusumik oqaaseqarfiginngikkaluarlugu tamakkiisumik
taperserlugu taamatullu isikkoqarluni peqqussutip pingajussaanneerneqarnissaa piumasaraarput.
Jonathan Motzfeldt, ataatsimiinnermi aqutsisoq, Inatsisartut
Siulittaasuat, Siumut.
Tulliuppoq Isak Davidsen, Atassut.
Isak Davidsen, Atassutip oqaaseqartua.
Atuarfiit pillugit peqqussutissaq taamatut isikkoqarluni pingajussaanneeqarnissaminnut ingerlaqqinnissaminnut Atassut-miit akuersilluta taaseqataassaagut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Maria Fleischer, Demokraatit.
Marie Fleischer, Demokraatit oqaaseqartuat.
Demokraatit siusinnerusukkut tikkuarnikuuvaat oqaluuserisassat amerlavallaartut ullormut oqaluuserisassanngortinneqartarnerat, tamannalu eqqaasissutigeqqissavarput.
Uggornartuuvormi piffissakinneq peqqutigalugu kukkusoqartarnera. Kisiannili pineqartumit kukkunerit annikitsuummata siunnersuut Demokraatiniit akuersaarparput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Anthon Frederiksen, Kattusseqatigiit.
Athon Frederiksen, Kattusseqatigiit.
Kukkuneq annikittutut oqaatigineqarsinnaagaluartoq, soorunami taamaattut pinngitsoortinneqarniissaat eqqarsaatigalugit minnerunngitsumik aamma Ataatsimiititaliami eqqumalluarnissaq innersuussutigerusuppara. Tassami ajuusaarnartarpoq aamma aatsaat siullerpaamik taamaattumik kukkunermik naammattoorsinnginnatta maani.
Ajuusaarnartarpoq taamatut kukkunernik pisoqarsimatillugu. Taamaattumik inassutigiinnarusuppara Ataatsimiititaliami aamma sulinermi annerusumik taamaattut kukkunerit pinaveersaartinniarlugit eqqumalluarnissaat.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Taava maannakkut Henriette Rasmussen, Inuit Ataqatigiit.
Henriette Rasmussen, Inuit Ataqatigiit oqaaseqartuat.
Tassa atuarfik pillugu Inatsisartut peqqussutaata allannguutissatut siunnersuutit uagut aamma Inuit Ataqatigiit tungaaninngaanniit akuersaarpagut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Taamaalilluta taasisussanngorpugut Kultureqarnermut Ilinniartitaanermullu Ataatsimiititaliap isumaqatigiittup siunnersuut ilusissamisut iluseqarluni akuersissutigineqassasoq inassutigaa.
Ataatsimiititaliap inassuteqaataa maanna taasissutigineqassaaq.
Ataatsimiititaliap inassuteqaataannut isumaqataasut qinnuivigissavakka nikueqqullugit.
28-it isumaqataapput.
Apeqqutigissavara
akerliusoqarnersoq?
Taamaanngilaq
Taasinngitsoortoqarpa?
Taamaanngilaq.
Taamaalilluni aappassaanneerneqarpoq
taamalu isikkoqarluni pingajussaanneerneqarnissaminut ingerlatinneqassalluni.