Kalaallit Nunaanni Inatsisartut

Oqaluuserisassani immikkoortoq 41-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut aappaat, pingasunngorneq 5. marts 2003, nal. 13:10.

 

 

Oqaluuserisassani immikkoortoq 41

 

 

Atuarfik pillugu Inatsisartut peqqussutaata allanngortinneqarneranik Inatsisartut peqqus­sutissaattut siunnersuut. (inatsisitigut tunngavigisat pillugit aalajangersakkat)

(Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoq)

(Siullermeernera)

 

Arkalo Abelsen, Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoq, Atassut.

Naalakkersuisut sinnerlugit atuarfik pillugu Inatsisartut peqqussutaata allanngortinneqarneranik peqqussutissatut siunnersuut matumuuna saqqummiutissavara.

 

Nassuiaatini taaneqarsinnaasutut siunnersuummi Inatsisartut upernaakkut ataatsimiinnerani akuerineqartumi kukkunerit ajuusaarnartut marlussuit kisimik pineqarput.

 

Siunnersuummut nassuiaatit innersuussutigalugit siunnersuut matumuuna Inatsisartuni oqaluuserisassanngortinneqarpoq. Qujanaq.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Partiit oqaaseqartuinut tassani Doris Jakobsen Siumut. Tulliutissaaq Henriette Rasmussen Inuit Ataqatigiit.

 

Doris Jakobsen, Siumup oqaaseqartua.

Atuarfik pillugu Inatsisartut peqqussutaanni normu 8 21. maj 2000-meersumi aaqqitassat marluk pineqartut meeqqat inuusuttullu 20-t ukiullit inorlugit, ukiullit atuartut atuartuunngitsullu sunngiffimmi ilinniartitaanissamik sunngiffimmilu sammisassaqartitsinermik allani peqataanissamik neqeroorfigineqartarnissaat peqqussutip allanngortinneqarnissaanik Siumumiik paasilluarlugu Naalakkersuisut aaqqiissutissatut siunnersuutaat annertunerusumik oqaaseqarfiginngikkaluarlugu tamakkiisumik qujassutigalugu akuersaarparput.

 

Peqqussutillu aappassaaneerneqannginnerani ataatsimiititaliamut suliassanngorlugit saqqummiunneqaqqaarnissaat inassutigalugu.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Tulliulluni oqaaseqassaaq Henriette Rasmussen, taanna pereerpat Isak Davidsen.

 

Henriette Rasmussen, Inuit Ataqatigiit oqaaseqartuat.

Meeqqat atuarfiata meeqqanut inuusuttunullu atuartunut atuartuunngitsunullu 20-t inorlugit ukiulinnut sunngiffimmi ilinniartitaanissamik neqerooruteqartussaatitaanerata meeqqat atuarfiat pillugu peqqussutip siorna upernaakkut akuersissutaasup maani qallunaatuuanut ilanngunneqanngitsoorsimanera peqqutigalugu Naalakkersuisut allannguutissamik siunnersuuteqarnerat qujassutigaarput.

 

Taamatullu oqaaseqarluta allannguutissatut siunnersuutigineqartut akuersaarlugit ilinniartitaanermut ataatsimiititaliamut aappassaaneerneqannginnerani suliassanngortillugit ingerlateqqippagut.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Tulliulluni oqaaseqassaaq Isak Davidsen. Taava tulliuppoq Marie Fleischer.

 

Isak Davidsen, Atassutip qaaseqartua.

Peqqussutip allanngortinneqarnissaanut Kultureqarnermut Ilinniartitaanermut Ilisimatusarnermullu Ilageeqarnermullu Naalakkersuisup saqqummiussaanut Atassummit imaattumik oqaaseqaateqassaagut.

 

Inatsisartunut 2002-mi upernaakkut ataatsimiinnermi atuarfik pillugu peqqussut nutaaq atuarfik pillugu Inatsisartut peqqussutaat normu 8, 21. maj 2002-meersoq akueraat, tassa Inatsisartut. Matumali kingorna siunnersuummi akuerineqareersumi kukkunerit marluk paasineqarsimapput. Peqqussummi pineqartumi paragraf 18, immikkoortoq 4-mi inatsisit tunngavigisaat pillugit aalajangersarneqarnera kiisalu meeqqat atuarfianni sammisaqartitsineq pillugu nalunaarut normu 14-ni 29. majip 1990-meersup kukkusumik atorunnaarsinneqarsimanera.

 

Atassummit oqaatigissavara allaffissornikkut aningaasaqarnermullu kinguneqartussaanngimmat kukkunerillu marlussuit allannguinermi pineqarmata annertunerusumik oqaaseqarfiginatigu aappassaaneerneqarnissaanut ingerlaqqinnissaanut tapersiigatta nalunaarutigaarput.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Maanna oqaaseqassaaq Marie Fleischer tulliuppoq Anthon Frederiksen.

 

Marie Fleischer, Demokratit oqaaseqartuat.

Atuarfik pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut. Demokratit tungaanniit Naalakkersuisut allannguutissatut siunnersuutaat akuersaarparput. Tamannalu peqqutigalugu demokratinit pisariaqartutut isiginngilarput pineqartup ataatsimiititaliakkoortinneqarnissaa.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Maannakkut oqaaseqassaaq Anthon Frederiksen.

 

Anthon Frederiksen, Kattusseqatigiit.

Atuarfik pillugu Inatsisartut peqqussutaata normu 8-p 21. maj 2000-meersup allanngortinneqarnissaanut siunnersuut Kattusseqatigiit sinnerlugit imaattumik oqaaseqaateqarfiginiarpara. Ataasialinngilagut inatsisit peqqussutillu inimi maani kukkunilli akuersissutigisartakkatta kingorna paasilerlugit iluarsineqarnissaannut piffissamik atusarluta.

 

Taamaattumik Kattusseqatigiinniit Naalakkersuisunut soorunalimi aamma ataatsimiititalianut inassutigerusuppara inatsisissat peqqussutissallu Inatsisartunut saqqummiunneqartinnagit sapinngisamik kukkuneqannginnissaat isumageqqullugit. Soorunami inatsisissatut aamma peqqussutissatut siunnersuutit imarisamikkut allanngortinneqarsinnaanerat inimi maani uagut suliarisussaavarput.

 

Taamatut naatsumik oqaaseqarlunga kukkunernut naqqiutissat iluarsineqarnissaannut siunnersuutit akuersaarniarpakka. Suliallu aappassaaneerneqannginnerani kultureqarnermut ataatsimiititaliami suliarineqarnissaa inassutigalugu.

 

Aamma qulakkeerumallugu ilumut naqqiutissatut siunnersuutigineqartut kukkuneqannginnersut. Qujanaq.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Aap Ilinniartitaanermut Naalakkersuisoq.

 

Arkalo Abelsen, Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoq, Atassut.

Oqaaserineqartunut qujanaq.

 

Aamma Anthon Frederiksenip inassuteqaataa soorunami malinniakutsuussavarput. Atorfilittagullu kukkutinnaveersaarumaarpagut. Qujanaq.

 

Jonathan Motzfeldt, ataatsimiinnermik aqutsisoq, Inatsisartuni siulittaasoq, Siumut.

Taamaalilluni kukkuneqanngitsumik naammassineqarnissaa tamanit taperserneqarmat udvalgimut ataatsimiititaliami misissoqqissaarlugu naammassiniarneqarnissaa aamma arlallit kissaatigisaat naammassineqassaaq. Taamaalilluni oqaluuserisassaq inerpoq, naammassivoq.