Oqaluuserisassani immikkoortoq 61-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut qulingiluaat, ataasinngorneq 17. marts 2003, nal. 14:50.
Kuupik
Kleist,
siunnersuuteqartoq, Inuit Ataqatigiit.
Inatsisartut
upernaaq manna ataatsimiinnissaannut siunnersuutigaara nunamik
piginnittuussanerup tamakkiisumik oqartussaaffigineqalernissaanik
anguniagaqarluni nunatsinni Naalakkersuisut Danmarkimi Naalakkersuisunut
isumaqatigiinnialernissaannik Inatsisartut aalajangersaassasut.
Tassa nunamut
pisuussutinullu tamakkiisumik oqartussaalernikkut aatsitassarsiornikkut
allatigullu nunatta aningaasarsiornikkut imminut annerusumik
pilersulernissaanut periarfissat annertusarneqassapput.
Tassa
siunnersuutigaara Inatsisartut aalajangissasut Naalakkersuisut periarfissaq
siulleq atorlugu Danmarkimi Naalakkersuisunut nunamik piginnittussaneq pillugu
isumaqatigiinnialernissaannik pisussaatillugit.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Akissuteqassaaq
inuutissarsiornemut aatsitassanullu Naalakkersuisoq.
Finn Karlsen, Inuutissarsiornemut Aatsitassanullu
Naalakkersuisoq, Atassut.
Nunamik
piginnittussaaneq pillugu aalajangiiffigisassatut siunnersuummut
saqqummiunneqar tumut aallarniutigalugu erseqqissaatigissavara nuna
pisuussutaalu pillugit qinigaaffimmi matumani naalakkersuinikkut sulinermi
Naalakkersuisut anguniagarigaat makku:
C Inuiaat
kalaallit nunatsinnik piginnittussaanitta akuersissutigineqarnissaa
sulissutigineqasoq.
C Nunatta
qanoq atorneqarnissaa pillugu pisuussutaalu iluaqutigineqamissaat
inatsisiliornikkut tamakkiisumik nunatta oqartussaalemissaa anguniarneqassaaq.
Naalakkersuisut
isumaqarput anguniakkat taakku siunnersuummut saqqummiunneqartumut
ataatsimoorutilerujussuusut. Naalakkersuisut isumaqarput tamanna nunatta
pisuussutaanik atorneqarnissaasa nunatsinnit susassaqarfittut
oqartussaaffigineqarnissaat pillugu inatsisartuni partiit akornanni annertuumik
isumaqatigiiffiuneranut takussutissaasoq.
Nalunaarutigisinnaavara
aatsitassat ikummatissallu pillugit nutaamik aaqqissuussinissaq pillugu Naalakkersuisut
danskit naalakkersuisuinut saaffiginnissuteqareersut. Danskit naalakkersuisui
erseqqissumik nalunaarutigisimavarput nunarput nunattalu pisuussutaasa qanoq
atorneqarnissaat iluaqutigineqarnissaallu inatsisiliornikkut ima
ingerlanneqartariaqartut nunatsinni oqartussat inatsisiliornermut
ingerlatsinermullu akisussaatillugit.
Tamanna
siusinnerusukkut naalakkersuisuusut kissaatitut saqqummiussimasaannut
naapertuulluinnarpoq.
Taamaattumik
aatsitassanut tunngasuni nunatta Danmarkillu akomanni marloqiusamik
ingerlatsinerup unitsinneqarnissaa erseqqissumik anguniagaralugu
isumaqatigiinniuteqarnissaq siunniussimavarput.
Naatsumik
oqaatigalugu aatsitassanut tunngasut nunatsinni inuiaqatigiinni
suliassaqarfinni allani nammineerluta aqutsinitsitulli aqutsivigineqalissasut
kissaatigaarput.
Suliassaq manna
pillugu Naalakkersuisut danskillu naalakkersuisuisa akornanni ataatsimiinneq
siulleq 2003-mi upernaaq manna pissasoq naatsorsuutigaara.
Uagut
namminersornerunitsinnut inatsimmut aamma ilaatigut Savalimmiuni aatsitassanut
tunngasutigut aaqqissuussineq pillugit oqallinnernut tunngatillugu nunamut
piginnittussaaneq pillugu apeqqut isummerfissanik assigiinngitsunik imaqartoq
ilisimavarput.
llaatigut
inatsisit naalagaaffimmut tunngasut, tassalu piginnaatitaaffinnik
pisinnaatitaaffinnillu Namminersornerullutik Oqartussanut danskit
naalagaaffianniit nuussinissamut inatsit tunngaviusumi aamma namminersorneruneq
pillugu inatsimmi killiliussanik imaqartut.
Ilaatigullu
inatsisit inuiannut tunngasut nunatsinni innuttaasut nunat tamalaat
isumaqatigiissutaat naapertorlugit nunamut pisuussutaanullu
pisinnaatitaaffinnik imaqartut.
Naalakkersuisut
isumaat malillugu namminersulemissaq nunattalu naalagaaffeqatigiit iluanni
qanoq inissisimanera pillugu oqallinnissamut atatillugu tamakku pitsaanerpaamik
oqaluuserineqarsinnaapput.
Oqallinnissaq
tamanna aatsitassanut tunngasutigut aaqqissuussinerup iluarsaanneqarnissaanit
annertunerujussuuvoq.
Kiisalu
ilisimavarput nunatta Danmarkillu akornanni aatsitassat pillugit aaqqissuussineq
pillugu namminersorneruneq pillugu inatsimmi aalajangersakkat
tunngavissaatitallu qanoq isumalersorneqarnissaat assigiinngitsunik
isunimerfigineqarsinnaasut.
Aatsitassat
ikummatissallu pillugit nutaamik aaqqissuussinissap isumaqatigiinniutigineqarnissaanut
Naalakkersuisut suliniuteqarnerminni pingaartissimavaat uagut tassaassasugut
nunatsinni ineriartortitsisut.
Uagununua
suliffissanik isertitassanillu pisariaqartitsisugut. Uagununa avatangiisinut
inuiaqatigiinnullu kinguniusussanik inooqatiginnittussat. Taamaattuminguna
naalakkersuisuni isumaqartugut uagut akisussaanermik tigusinissarput
eqqortuusoq.
Aatsitassat
pillugit inatsit maannakkut atuuttoq assersuutigalugu piginnaatitsissutitut
inatsimmut allanngortinneqamissaa kissaatiginarpoq, taamaalillutik
Namminersornerullutik Oqartussat aatsitassanut tunngasut
aaqqiivigineqarnerannut oqartussaalissallutik.
Taamatut
aaqqissuussineq suliassaqarfinni allani ilisimareerparput, tassa piumasaqaatit
erseqqinnerusut arlallit tunngavigalugit Inatsisartut Naalakkersuisullu
inatsisiliornissamut ingerlatsinissamullu oqartussaanermik tigusisimammata
Folketingip piginnaatitsissutitut immikkut inatsisiliaatigut.
Tamanna
pereerpat nunatsinni aatsitassanik ikummatissanillu atuineq pillugu piumasaqaatinik
inatsisartut peqqussutaatigut Inatsisartut aalajangersaasinnaalissapput.
Tamanna
naalakkersuisut naliliinerat malillugu akisussaaffiminik oqartussaaffimmillu
agguaanerussaaq Naalagaaffeqatigiinnermi mianerisassanut pingaarnernut
eqquutsitsillunilu suliassaqarfimmut inuiaqatigiinnut kalaallinut
tunngassuteqarpiartumut nunatsinnut akisussaaffiliillunilu
aqutsiviginninnissamut oqartussaaffiliisuussaaq.
Ilaatigut
isummat tamakkuupput naalakkersuisut danskit naalakkersuisuinut
saqqummiutilersaagaat.
Naalakkersuisut
isumaat malillugu aatsitassanut tunngasut taamatut iluarsiivigineqarnissaat
maannakkut naammassiniartariaqarparput namminersorneq pillugu nutaamik
aaqqissuussinissap oqaluuserineqarnissaa utaqqeqqaamagu.
Naalakkersuisut
sinnerlugit neriuutigaara isuma tamanna Inatsisartut isumaqatigissagaat aammalu
nunami maani aatsitassanut tunngasut naalakkersuinikkut allaffissornikkullu
kalaallit oqartussaasuinit aqutsivigineqalemissaat pillugu Naalakkersuisut
anguniagaqarnerat tapersissagaat.
Danskit
naalakkersuisuinik isumaqatigiinniarnissat takutikkumaarpaat anguniakkatta
angunissaannut sunik periarfissaqarnersugut.
Taamatut
oqaaseqarlunga aammaarlunga erseqqissassavara apeqqut manna tunngaviusumik
isumaqatigiiffiusorinarmat, tassa naalakkersuisut pingaartimmassuk
aatsitassanut tunngasut oqartussaaffigineqarnerat piaarnerpaamik
iluarsiiffigineqartariaqartoq.
Oqaatigineqareersutut
Naalakkersuisut isumaqarput nunatsinnut piginnittussaatitaaneq pillugu apeqqut
suliassatut angisuutut pingaaruteqartutullu namminersorneq pillugu
isumalioqatigiissitat isumaliutissiissutaata Inatsisartuni
oqaluuserineqarnerani oqaluuserineqartariaqartoq.
Naalakkersuisut
isumaat siunnersuuteqartup isumaqatigisinnaagai aammalu aalajangiiffigisassatut
siunnersuummut saqqummiunneqartumut naalakkersuisut akissutaat Inatsisartut
akuersaarsinnaassagaat naalakkersuisut neriuutigaat.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Taava massakkut
partiit Kattusseqatigiillu oqaaseqartui. Siuliussaaq Jens Napaattooq Siumut.
Jens
Napaattooq, Siumup
oqaaseqartua.
Qujanaq. Nunamik
piginnuttussaaneq pillugu Inatsisartut aalajangiiffigisassaattut Kupik Kleist,
Inuit Ataqatigiit sinnerlugit siunnersuutaanut pisarnertut Siumumiit oqaluuserilluareerlugu imatut
oqaaseqarfiginiarparput.
Inuiaat
kalaallit nunatsinnik piginnittussaanerput Siumup aallartikkamili
ilungersuutigalugu sulissutigisaasa ilagaat, taamaalilluta nunatta qanoq
atorneqarnissaa pillugu tamakkiisumik nunatsinni oqartussaalersinnaaleqqulluta.
Nunatsinnut
tamakkiisumik oqartussaalernissaq ukiorpassuanngortuni politikkikkut
assigiinngitsutigut naalagaaffeqatigiinnerup iluani annertuumik
oqalluffiusarsimasoq Siumumiit peqataaffigineratigut ilisimaaraarput.
1978-imi namminersornerulernissatsinni
naalagaaffeqatigiinnerup iluani tamannarpiaq pillugu taamanikkut danskit
matoqqalluinnarsimagaluarnerat Siumumiit eqqaamalluarparput, aammalumi
ilisimaaralugu namminersornerulersimanermi ilaatigut ilanngunneqarsimalluni
periarfissaqarsinnaanera killeqartoq.
Naalagaaffeqatigiinnerup
iluani namminersornerulersimanitsinni sinaakkutigisimasat arlalitsigut maanna
sipporlugit angusaqarsimalerpugut, taamaattumillu Siumumiit
qularutiginngilluinnarparput naalagaaffeqatigiinneriup iluani
ataqqeqatigiilluni suleqatigiilluarnikkut tamanna angusaqarfiussasoq.
Danmarkimi aamma
nunasiaqarfiusimasutut pisussaasutut misigisimavoq. Nunarput nammineq matumani
oqartussaaleruni tunngaveqarluartumik tatiginarluartumillu ingerlaqqissasoq.
Siumumiit
isumaqarpugut alloriarnerit pingaaruteqarluinnartut ilaat 1997-imi
piviusunngortinneqartoq, taamani isumaqatigiissutigineqarmat Aatsitassanut
ikummatissanullu Pisortaqarfik 1998-imi nunatsinnut nuunneqassasoq. Siumumiit suliaq tamanna tulluusimaarutigaarput.
Qularineqassanngilarlut suliap ingerlateqqinneqarnissaani siuttooqataalluta
suleqataassagatta.
Taamaammat aamma
nuannaarutigaarput nunatsinni Naalakkersuisut danskit Naalakkersuisuinut
erseqqissumik tamanna pillugu nalunaaruteqarsimanerat, tassalu nunarput
nunattalu pisuussutaasa qanoq atorneqarnissaat iluaqutigineqarnissaallu
inatsiliornikkut ima ingerlanneqartariaqartut: Nunatsinni oqartussat
inatsisiliornermut ingerlatsinermullu akisussaatillugit, tamanna
oqareernitsitut Siumumiit nuannaanaarutigalugulu naammagisimaarparput.
Naatsumik oqaatigalugu aatsitassanut tunngasut nunatsinni inuiaqatigiinni
suliassaqarfinni allani nammineerluta aqutsinitsitulli aqutsivigineqalissasut.
Suliarlu tamanna
pillugu Naalakkersuisut danskillu Naalakkersuisuisa akornanni ataatsimiinneq
siulleq 2003-mi upernaaq manna pisussaq Naalakkersuisut naatsorsuutigalugu
oqaatigisaat malillugu sulilluarnissaannik angusaqarluarnissaannillu Siumumiit
kissaappagut.
Taamatut
Siumumiit oqaaseqarluta Naalakkersuisut nunatsinnut piginnittussaatitaaneq
pillugu apeqqut suliassatut angisuutut pingaaruteqartutullu namminersorneq
pillugu isumalioqatigiissitat isumaliutissiissutaata Inatsisartuni
oqaluuserineqarnerani matuma oqaluuserineqartariaqarneranik oqariartuutaat
tapersersorlutigu siunnersuuteqartumut Naalakkersuisut akissutaat Siumumiit
tamakkiisumik naammagisimaarlutigit tapersorparput.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tulliulluni
oqaaseqassaaq Aqqaluk Lynge, Inuit Ataqatigiit.
Aqqaluk
Lynge, Inuit Ataqatigiit
oqaaseqartuat.
Nunamik
piginnittussaanerup nunatsinnit tamakkiisumik oqartussaaffigineqalernissaanik
Inatsisartut aalajangiiffigisassaattut siunnersuut Kuupik Kleist Inuit
Ataqatigiit sinnerlugit saqqummiussaa imaattumik oqaaseqarfigiumavarput.
Inuiaat
kalaallit nunaminnik piginnittuunertik killeqanngitsumillu atuisinnaanertik
qangaaniilli pingaartitarisimavarput. Tamanna qamuuna misigisimavarput, tassa
Kalaallit Nunaat nunagigatsigu aamma uagut inuiaat ataatsimut oqartussaaffigigipput,
taammaattumillu oqartarluta nammineq pigalugu.
Ajoraluartumilli
danskit inatsisaanni allassimasut taamaanngillat. Tassami ukiut 50-it matuma
siornagut danskit inatsisai tungaviusut
malilluugit Kalaallit Nunaat danskit naalagaaffiannut ilanngutitinneqarneragut
nunasiaanermi aaqqissuussineq ingerlatiinnarneqarmat, tassalu naalagaaffik
tassaavoq Kalaallit Nunaannik piginnittuusoq qullerpaatullu
aalajangiisinnaassuseqarluni.
1979-imi
Namminersornerulluni Oqartussanngornermi danskit naalagaaffiata nunatsinnik
piginnittuunini naqissuseqqippaa, Namminersornerulluni Oqartussaaneq pillugu
inatsimmi inuiaat kalaallit immikkut inuiaanerat aammalu immikkut nunamik
piginnittuunerat akuersaarnagit nunatta nunataa pisuussutillu nunamiittut
naalagaaffimmit tamakkiisumik oqattussaaffigineqarneri aatsitassat pillugit
inatsimmi aalajangersaaffigineqarmata.
Taamaatumik
nunalerngusaanneq ullutsinni suli ingerlavoq sulilu sivisuumik
akimmisaarfiusussaasoq Kalaallit Nunaanni inuiaat ataatsimut qanoq
iliuuseqanngippata.
Inuit
Ataqatigiinniit Kuupik Kleistip Folketingimi novemberimi 2002-mi oqallissimaneq
tunulequtaralugu maanna Inatsisartuni aalajangigassatut siunnersuutaa soorunami
isumaqatigaarput, Naalakkersuisunillu
akineqarnera sullugaarput suliassartarvianillu pimoorullugu
suliarineqarsimannginnera malunnarpoq, tassami pisuussutinut uumaatsunut
aqutsiveqarfimmut taamaallaat suliassiissutigineqarsimavoq, naak nunamik
piginnuttussaanermut apeqqutit inuiaassutsimullu attuumassuteqartut
Naalakkersuisut siulittaasuata suliassarigaluaraat.
Suliassiissutit
pingaarutillit taamaattut tunngaviusumillu isummerfigisassat sukumiinerusumik
suliarineqartarnissaat Naalakkersuisunut matumuuna kaammattuutigissavagut.
Inatsisartunummi ilaasortat siunnersuutitik pillugit sukumiisumik
suliaqaqqaartarnissaannik piumasaqaateqartoqartarpoq, aamma illuatungaatigut
iluamik Naalakkersuisut tungaanninngaanniit akineqarnissaq aamma
neriuutigisassavarput.
Taamatut
oqaaseqarnitsinnut pissutaavoq nunamik
piginittussaaneq pillugu uuma suliap qallunaatuunngortinneqarnerani taammaallat
isumaqartinneqalersimammat pisuussutinut uumaatsunut, tassalu aatsitasanut,
aqutsinermut sangutinneqarluni.
Erseqqissartariaqarpoq
sooq Inuit Ataqatigiit suliassaq una maanna qaqinneraat. Eqqaamaneqarunnarsivoq
novemberip 18-anni malinnaasimasunit naluneqassanngilaq nunatsinnit
folketingimi ilaasortaatitatta Kuupik Kleistip Lars Emil Johansenillu
siunnersuutaat oqallisigineqarmat statsminiterimut arlaleriarluni
apeqqutigineqartaraluarpoq sooq Kalaallit Nunaata nunamik piginnittuunera,
pisortatigut aqunneqarnera nunatsinni oqartussanit tiguneqarsinnaanngitsoq,
naak Savalimmiut 1990-ip aallartilaarnerani oqartussaaneq tamakkiisoq
tigusimagaluaraat. Taava statsministerip akissutaatiigut erserpoq Savalimmiuni
pisimasut assigalugit Kalaallit Nunaat taamaaliorfigineqarsinnaanngitsoq
danskit naalagaaffiata kikkunnilluunniit oqartussanit allanit
qulangerneqarsinnaannginnissaa piumasarineqarmat. Tassa allatut
paasineqarsinnaanngilaq Folketingimi oqallinnermi saqqummiussaq taamaattoq
taassaavoq Naalagaaffeqatigiinnermi immikkoortitsineq erseqqilluinnartoq.
Tassa
imaappoq danskit naalagaaffiup oqartussaaneranik salliutitsipput, inuiaalli
kalaallit pisinnaatitaaffiinik ataqqinnikkumanatik.
Inatsisartut
tunngaviusumik aalajangiusimasatik aammalu qinikkat siornatigut
aalajangiusimasaat allanngorsimanngillat, tassalu 1975-imi Landsrådit nunamik
piginnittussaanermik aalajangiusseqqaarnerminni pissutsit naak
allannguuteqarsimagaluartut. Tamatuma kingorna
Nunat Inoqqaavi Naggueqatigiillu pillugit FN-imi naalagaaffiit
isumaqatigiissutaat taaguuteqartoq ILO
Convention 169 danskit naalagaaffiata 1996-imi Inatsisartut aamma
akuersissuteqarneratigut Danmarkimit nunatsinnilumi atuutiilerpaat taamanikkut
Folketingimi ilaasortap nunatsinneersup Hans Pavia Rosingip
siunnersuuteqarneratigut.
Taassuma
isumaqatigiissutip pineqartup imaa ataatsimut isigalugu kalaallinut
nutaartalerujussuuvoq danskit naalagaaffiata iluani nunap inoqqaavisut
pisinnaatitaaffivut erseqqissarmagit. Nutaartaa uaniippoq, naak uagut kalaallit
uatsinnut inuiattut taasaraluarluta taamaattoq immikkut naalagaaffiunata
danskilli naalagaafiata ataaniikkatta immikkut inuiattut
pisinnaatitaaffeqanngilagut, ?taamaallaat? nunap inoqqaaviisut
pisinnaatitaaffeqarpugut, danskit naalagaaffiata tamanna
timitalerniartussaavaa. Tassalu Kuupik Kleistip Inuit Ataqatigiit sinnerlugit
saqqummiussaani taanna apeqqut qitiulluinnartoq.
Naalagaaffik
Kalaallit Nunatsinni Inatsisartunit erseqqissaaffigineqartariaqarpoq
isumaqatigiissut 169, Artikel 14, immikkoortoq 1-imi ima erseqqitsigisumik
allassimammat, nunap inoqqaavisa nunaminnik piginnittussaanerat
atuisinnaanerallu qangaaniilli atuisinnaatitaanertik najoqqutaralugu tamanna
naalagaaffimmit akuerineqartussaasoq.
Siunnersuumi
maani oqallisigisatsinni tamanna qitiulluinnarpoq, pisuussutinullu
atuisinnaanermut kisimi atuumassuteqarani. Uagummi nunamik piginnittuusutut
misigisimanerput silarsuarmi inatsisit atorlugit ingerlatsiviusumi
naammanngillat, taamaattumillu inatsisitigut erseqqissumik aamma allassimasariaqarluni.
Nunarsuaq
tamakkerlugu suleqatigiiffinni ilaatigut FN aqqutigalugu kalaallit
akuusorujussuuvugut mannalu tikillugu qallunaat Naalakkersuisa nunanut allanut
namminersornerulluta oqartussaanerput nunap inoqqaaqarfiusunut tulluusimaarutigisaraluaramikku
nunatsinni inunnut ajunngisaarnersuartik. Kisiannili maanna nunarsuaq
tamakkerlugu tutsiutereerpoq ukiut 50-it matuma siornagut Avanersuarmiut
nunaannik arsaarinnissimanertik pillugu danskit eqqartuussiveqarfiata
qullerpaartaanni naalagaaffiup unnerluutigineqarnerata kingorna nunap
inoqqaaviniit danskit oqartussaasuinik isiginninneq allanngoriartorsimavoq
piviusorsiornerulerlunilu. Tamanna
minnerunngitsumik FN-imi nunat inoqqaavisa atugaat pillugit
ataatsimiititaliarsuani Permanent Forumimi siorna aallartittumi aatsaat
erseqqisiartorpoq.
Nunarsuarmi
FN aqqutigalugu aalajangersakkat pingaarnerit arlaqarput inuiaat kalaallit
pisinnaatitaaffiinut tunngassuteqartut, pingaartumik inuit inuiattut
taaguuteqarsinnaatitaasut akornanni atuuttut. Ullumikkulli danskit
naalagaafiata iluani inuiattut akuerisaannginnitsinni aqqutissat FN-imi
isumaqatigiissutaareersut iluanni sorliit najoqqataassanersut nalornissutaasarput, taamaattumik
pingaartumik Inatsisartuni erseqqissumik isumaqatigiissuteqarsimannginneq aamma
tunulequtaasarpoq.
Novemberimi
2002-mi Folketingimi oqallinnermi danskit Naalakkersuisuisa siulitaasuata
Anders Fogh Rasmussenip Folketingip
oqaluttarfiatigut arlaleriarluni nalunaarutigisarpaa nammineq
Namminersornerulluni Oqartussaanermi Inatsit allannguuteqartinnialersaarlugu,
qanorli iliuuseqarnissaminik manna tikillugu suli erseqqissaasimanngilaq.
Nalunanngilaq qallunaat eqqarsartaatsiminni nunamik piginnittuuneq taamaallaat
pisuussutinut, tassalu aatsitassanut tunngatittaraat. Kisiannili pisortat
eqqarsartaatsiminni inorsartarput, inuiaat kaalaallit nunaminnik
piginnittuunerat oorinut tungaannanngimmat kisiannili uagut inuiaassutsitsinnut
tunngatipparput, immitsinnut tatitiginitsinnut, anersaakkut inuunitsinnut
sutigullu tamatigut toqqissisimanissatsinnut attuumassuteqarmat, pisortat
uungaannaq isiginninnerat aalajaassuseqanngilaq.
Inuit
Ataqatigiit isumaat malillugu danskit naalagaaffiata nunatsinnik
pisuussutaanillu
nammineq
piginnittutut suaarutiginnittuarnera isigaarput FN-ip isumaqatigiissutaanik
uijarterinertut. Tamannalu Kalaallit Nunaanni Inatsisartut Naalakkersuisullu
eqiingaffiginerusariaqarpaat.
Inuit
Ataqatigiit pingaartipparput pisinnaatitaaffitta tamakkiisumik qallunaanit
timitaliiffigineqarnissaat marloqiusamik
isummersorunnaarlutik. Inuit Ataqatigiit inuiattut immikkullu nunaqartutut
danskit naalagaaffianit akuerineqarnissarput suliarittuinnarpaat, soorlu aamma
Folketingimi aatsaat taama erseqqitsigisumik saqqummiisoqarneratigut ersertoq
apeqqut qanoq naalagaaffimmit tukermersorfigineqartigisoq. Soorlumi nunatsinni
Naalakkersuisut aamma uagut isumarput malillugu qunugigaat apeqqut maanna
ammasumik erseqqissumillu suliarineqarnissaa.
Tamanna
Namminersorneq pillugu Isumalioqatigiissitat suliaannut saqqummertussamut
utaqqinneqarsinnaanngilaq, naalagaaffiummi nunatsinnilu Naalakkersuisut
kinguartiterinerat peqquteqaannarpoq politikkikkut qanoq aaqqiinissaq
Naalakkersuisut isumassaqartissimagunanngimmassuk, taamaattumillu una akissut
allaffissornikkut suliaavoq allaffimmiut akissutaat, amigaatigaarpullu suli
politikkikkut akissutissaq.
Aallaqqaasiininni
oqaaatsikka innersuussutigalugit matumuuna Inuit Ataqatigiinniit
siunnersuutigissavarput suliaq manna sukumiinerusumik eqqortumillu pisortanit
suliarineqareersimalerpat ukiamut Inatsisartut ataatsimiinneranni
aappassaaneerneqarluni suliarineqassasoq.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliulluni
oqaaseqassaaq Jensine Berthelsen, Atassut.
Jensine
Berthelsen,
Atassutip oqaaseqartua.
Nunamik
piginittussaanerup nunatsinnit tamakkiisumik oqartussaaffigineqalernissaanik
Inatsisartut aalajangiiffigisassaattut Inatsisartuni ilaasortap Inuit
Ataqatigiinneersup Kuupik Kleistip siunnersuutaa Atassummit imatut oqaaseqarfigissavarput.
Maluginiarnarpoq
siunnersuuteqartup piumasarigaa Inatsisartuni ataatsimiinnermi matumani nunamik
piginnittussaanerup tamakkissumik oqartussaaffigineqalernissaanik
anguniagaqarluni nunatsinni Naalakkersuisut Danmarkimi Naalakkersuisunut isumaqatigiinnialernissaannik
Inatsisartut aalajangersaassasut noqqaassutigigaa. Siunnersuuteqartullu
taamatut siunnersuuteqarnermini tunngavilersuutigaa nunamut pisuussutinullu
tamakkiisumik oqartussalernikkut, aatsitassarsiornikkut allatigullu nunatta aningaasarsiornikkut
imminut annerusumik pilersulernissaanut periarfissat
annertusarneqassanerarlugit.
Atassummit
maluginiarparputtaaq nunamik piginnittussaanerup nunatsinnit tamakkiisumik
oqartusaaffigineqalerneratigut misissueqqaartartussarsiornernut, misissueqqaarnernut,
qalluisoqassappat qalluinernut aatsitassalerinermilu allaffissornermut
nalinginnaasumut aningaasartuutaasussat pillugit siunnersuuteqartoq
missingersuusiorsimanngitsoq oqarami aningaasarsiornikkut imminut annerusumik
pilersuinissaanut periarfissat annertusarneqassanerarlugit. Atassummillu
paasisavut naapertorlugit nunamik piginnittussaanerup tamakkiisumik
oqartussaaffigineqalernissaanut aningaasatigut kingunerusussat
naatsorsorneqarsimanngillat maannamut.
Taamaammat
qulaajagassat isumannaagassallu imaannaanngitsut tamakkiisumik nunamik
piginnittussaanerup oqartussaaffigilernissaanut attuumassuteqartut piaartumik
suliarineqarlutik aallartinneqarnisssaat Atassummit Naalakkersuisunut
kaammattuutigissavarput.
Assersuutigiinnarlugu
ullumikkut aaqqissuussinermi danskit suliffeqarfii DMU, avatangiisit
mingutsaaliorneqarnissaannut tunngatillugu aammalu GEUS, nunap pisuussutaasa
ilisimatuussutsikkut misissorneqartarneranut tunngatillugu nunatsinnit
iluaqutigilluarpavut, tamakkiisumillu nunamik piginnittussaaneq
oqartussaaffigilerutsigu nunatsinni suliffeqarfinnik taama ittunik
pilersitsisariaqassanersugut imaluunniit suliffeqarfiit pioreersut
iluaqutigiinnarsinnaanerigut nunatsinni Naalakkersuisut danskillu
Naalakkersuisuisa isumaqatigiinniarnissaanni nunatsinnut qanoq iluaqutaasumik
aaqqiissummik nassaartoqaruimaarnersoq maani eqqoriaqattaassanngilarput.
Taamatulli
oqaratta isumaqartoqassanngilaq nunamik piginnittussaaneq Atassummit
pingaartinngikkipput, naamik, nunatta pisuussutaasa, qanoq, kimit, qaqugu
qanorlu akilerlugit atorneqarsinnaanerat minnerunngitsumillu nassaarineqartut
piiarneqalernerini pinngortitap mingutsaaliorneqarnissaanik tunngavilimmik
ingerlanneqartarnissaat sapinngisamik nunatsinnit nammineq
oqartussaaffigissagipput Atassummit pingaartilluinnarparput.
Folketingimi
ilaasortaatitatta Kuupik Kleistip aammalu Lars Emil Johansenip siunnersuut
assingusoq novemberimi saqqummiukkamikku maluginiarnarpoq nunatsinnit taamatut
kissaateqarneq Folketingimi ilassilluarneqartoq, ministeriunerullumi
erseqqissaatigaa nunatsinni Naalakkersuisut saaffiginnissuteqareersut
oqartussaaffiup tamakkiisup nunatsinnut nuunneqarnissaanik kissaateqarnerput
pillugu, oqaloqatigiinnissallu utaqqimaarunneqartut namminersorneq pillugu
isumalioqatigiissitap innersuussutai tamakkiisut tiguneqarsimalereernissaannut.
Atassummiillu
tamanna isumatusaarnertut nalilerlutigu Naalakkersuisut kissaataat, tassalu
namminersorneq pillugu isumalioqatigiissitap innersuussutai tamakkiisut
tiguneqarsimalereerpata Inatsisartuni oqaluuserineqartariaqarnerarlugu
kissaataat ilalissavarput.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliulluni oqaaseqassaaq Per Berthelsen, Demokratit.
Per Berthelsen, Demokratit oqaaseqartuat.
Qujanaq. Naalakkersuisut akissuteqaataatigut takusinnaagatsigu maanna siunnersuuteqartup anguniakkamitut siunnerfigisai anguniarlugit suliniuteqartoqalereersoq Demokratit tungaannit inassutigissavarput suliaasut taakku ajoquserlugit ingerlanissat pinngitsoortinniarneqassasut qalleraattumik ingerlanissaq siunertaqanngimmat pisariaqanngilluinnarlunilu.
Demokratit tungaanniit erseqqissarumavarput pingaartilluinnaratsigu pineqartup mianersortumik isumatuumillu ingerlanneqarnissaa, tassani anguniarneqartuaqqullugu tigusiartorneq ima ingerlassammat tassani ernumanaatsumik inissaqartinneqassalluni sammiviusumut naammattumik aningaasaliisinnaassuseqarnissaq, sulisussanik naammattunik peqarnissaq, ilinniarsimasunik naapertuuttunik peqarnissaq kiisalu atortutigut pisariaqartunik ernumanaatsumik peqarnissaq.
Sammivimmi pineqartoq siunissamut periarfissarpassuarnik ammaassisinnaasuuvoq, nalunngilarpulli aamma annertuumik ilisimatusarnermut misissuisarnernullu aningaasaliissuteqarfigineqartuartussaassasoq. Qulakkeertariaqarparput ineriartornissamut periarfissanik sanngiillisaannginnissarput nammineq tamakkiisumik tigumminninnilernissamut utaqqisinnaassuseqannginneq peqqutigiinnarlugu.
Qujanaq.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Tulliulluni oqaaseqassaaq Anthon Frederiksen, Kattusseqatigiit.
Anthon Frederiksen, Kattusseqatigiit.
Inatsisartunut Folketingimullu ilaasortap Kuupik Kleistip siunnersuutaa soqutiginartoq Kattusseqatigiit sinnerlugit imaattumik oqaaseqarfiginiarpara.
Takusinnaavara siunnersuut danskit Folketingiani aalajangiiffigisassatut siunnersuutigineqarluni oqaluuserineqarsimasoq. Aamma takusinnaavara Folketingimi partiit tamarmik tunngaviusumik paasisinnaallugulu akerlerinngikkaat nunatsinnik piginnittussaanerup oqartussaanerullu soorunami nunatsinnut nuunneqarnissaa danskit ammaffigigaat. Kisianni Folketingimi partiit amerlanerpaat isumaat naapertorlugu Namminersornerullutik Oqartussat danskit Naalakkersuisuinut saaffiginninnissaat kisimi apeqqutaasoq aamma oqaatigineqarpoq. Tassa takusinnaasakka naapertorlugit Folketingip kalaallit oqartussaasui qulaatiinnarlugit aalajangiinissaq orniginngikkaat, naak aalajangernissaq oqartussaanerlu Folketingimiikkaluartoq.
Taamaakkaluartoq tupigusuutiginngitsuunngilara danskit Naalakkersuisuisa siulittaasuata apeqqut naalagaaffeqatigiinnerup iluani kalaallit savalimmiullu nunamik piginnittussaatitaanermut tunngasoq pillugu assigiinngisitsisoqarneranut tunngatillugu akissuteqarumasimannginnera.
Taamaammat nuannaarutigaara nunatsinni Naalakkersuisut, tassa uku maannakkut Naalakkersuisut atuuttut siuliisa allakkatigut danskit Naalakkersuisuinut aatsitassat ikummatissallu pillugit isumaqatiginninniarnissat pillugit saaffiginnissuteqarsimammata. Soorunami aamma maannakkut Naalakkersuisuusut akissuteqarnerminni aatsitassanut tunngasut oqartussaaffigineqarnerat piaarnerpaamik iluarsiiffigineqartariaqartoq oqaatigimmassuk pissusissamisoorluinnartutut isigaara.
Kisianni isumaqarpunga apeqquserneqartariaqanngitsoq apeqquserneqarsinnaanngitsorlu nunamik piginnittussaanerup nunatsinni tamakkiisumik oqartussaaffigilernissaa pillugu piaarnerpaamik danskit Naalakkersuisuinut saaffiginnissutigineqartariaqarmat. Taamaattumik isumaqarpunga apeqqut taanna Namminersorneq pillugu Isumalioqatigiissitap isumaliutissiissutaata Inatsisartuni oqaluuserineqarnissaanut utaqqisinneqarsinnaanngitsoq, nalornissutigineqassanngilarmi nuna manna tummagarput kiap oqartussaaffigalugulu pigineraa. Tassa soorunami uagut kalaallit.
Suliaq manna nunatsinnut inuinullu pingaaruteqaqimmat Inatsisartunut Naalakkersuisunullu kaammattuutigerusuppara Folketingimut ilaasortaatitavut peqatigalugit Inatsisartuni partiit Kattusseqatigiillu ilaasortaatitallit tamarmik ataatsimik aallartitaqarlutik Naalakkersuisut danskit Naalakkersuisuinik oqaloqatiginninnissaq sulissutigisariaqaraat.
Taamatut oqaaseqarlunga siunnersuut tamakkiisumik taperserpara aammalu suliap aappassaaneerneqannginnerani Inatsisartut ataatsimiititaliaanni susassaqarfiusumi suliarineqarnissaa innersuussutigalugu.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Siunnersuuteqartoq Kuupik Kleist, Inuit Ataqatigiit.
Kuupik Kleist, siunnersuuteqartoq, Inuit Ataqatigiit.
Qujanaq. Naalakkersuisut akissutaannut allanillu oqaaserineqartunut qujavunga.
Siullermik ajuusaarnartuutippara soorunalimi uani siunnersuutinni siunertarisara ilaatigut immaqa qallunaatut nutserinerup nutserinerlunnerulluunniit kinguneranik sangutiallanneqarsimammat, tassa Inuit Ataqatigiit oqaluttuata oqarneratuut aatsitassalerinermut tunngasuinnangajattut sammivilerneqarsimavoq, naak nunamut piginnittuuneq arlarpassuarnik imaqaraluartoq, tassalu tamakkiisumik nunamut oqartussaanermik imaqarluni. Tassalu uanga oqallisissatut siunnersuutinni, aalajangiiffigisassatut siunnersuutinni aamma imarineqarmat?.
Kalaallisut oqaasertaliininni allappara nunamut pisussutinullu, tassa marloqiusaavoq nunamut pisuussutinullu. Taanna qallunaatuani malugineqanngitsoorsimavoq, taamaalillunilu Naalakkersuisut akissuteqarnissaannut suliaqarnermi aatsitassanut tunngasunngortinneqarsimalluni allamullu tunngatinneqarani. Tamanna soorunalimi ajuusaarnarpoq.
Taamatut oqareerlunga aamma oqassaanga uani Naalakkersuisut siunertarisaat soorunalimi Inuit Ataqatigiinninngaanniit, aamma uanga siunnersuuteqartutuut akerlerisinnaanngilluinnarpakka soorunalimi. Aatsitassaqarnermut tunngasutigut suliassat marloqiusaanngitsumik suliarineqartarnissaannik siunertaqarneq aammalu aatsitassarsiornermut tunngasutigut tamakkiinerusumik oqartussaalernissamik siunertaqarneq tapersersorluinnarparput, kisianni tassunga killeqanngilaq.
Naalakkersuisut akissuteqarnerminni ilaatigut oqaatigaat inatsisit naalagaaffimmut tunngasut piginnaatitaaffinnik pisinnaatitaaffinnillu aammalu Namminersornerullutik Oqartussaanermut tunngasut matumani kalluarneqartussatut oqaatigalugu. Tamanna ilumoorpoq. Uani nunatta Danmarkillu akornanni pissutsit eqqarsaatigalugit ajornartorsiutinngortussaq imaluunniit aaqqitassanngortussaq, tassami naatsorsuutigaara maani piumassuseqarutta aaqqissinnaajumaarlugu tamanna, tassaassaaq Danmarkip nunatsinnut oqartussaanera, imaluunniit Danmarkip nunatta qanoq atorneqarnissaanut oqartussaanera tamatumani sillimaniarnikkut nunanut allanut atortinneqartarnera ilanngullugu imaluunniit nunatsinni oqartussaasut nunatta allanut atukkiunneqarsinnaaneranut oqartussaaneq tassani aamma ilaavoq.
Tassa USA-mut Danmarkip nunatsinnik atortitsinera Danmarkip atortitsinerivaa, nunatsinni oqartussaasut oqartussaanngillat tassunga. Uani siunnersuutinni siunertarigaluarpara uagut nammineq oqartussaalissasugut aamma tamakkununnga, ilumut nunarput atortissanerlugu sillimaniarnikkut siunertanut.
Aamma Naalakkersuisut akissuteqaamminni oqaasiannut isumaqataavunga ukununnga aatsitassanut tunngassuteqartut maannakkut aaqqiivigineqarnissaat piffissanngortoq. Aamma Naalakkersuisunut ilaasortaq oqarpoq Namminersorneq pillugu Isumalioqatigiissitap isumaliutissiissutaata maani suliarineqarnissaa inersiillugu utaqqineqartariaqanngitsoq taamatut aaqqiiniarnermi. Tamanna soorunalimi isumaqatigilluinnarpara.
Kisianni aamma uuma apeqqutip uanga siunnersuutima qiterisaa eqqarsaatigalugu isumaqarpunga Inatsisartut aalajangiiniartariaqartut, kisiannili immaqa oqallinneq nangeqqittariaqassaaq ukiamut Inatsisartut ataatsimeeqqinneranni Inuit Ataqatigiit siunnersuutigisaattuut. Tassami Naalakkersuisut piareersarsinnaasariaqarput apeqqut una pillugu, aatsitassanut tunngasuinnaq pinnagu.
Taava partiit ataasiakkaat oqaaseqaataat ataasiakkaanngikkaluarlugit oqassaanga annertunerusumik partiit oqaaseqaataat, tassa Naalakkersuisut akissutaannut sammitinneqarmata taamaalillutillu aamma aatsitassarsiornermut tunngasuinnangajannik imaqarlutik, taamaattumik partiit akissuteqaataat annertunerusumik iserfigisinnaanngilakka oqaatigeriikkakka pissutigalugit.
Taamaallaat uani maluginiakkama ilaat tassaavoq Atassutip oqaaseqartuata Anders Fogh Rasmussen uanninngaanniit isumaqatiginerullugu oqaaseqarmat. Soorunalimi taamatut isumaqartoqarsinnaavoq. Ajuusaassaanga uanga isumaqatiginanga Anders Fogh Rasmussen matumani isumaqatigineqarmat.
Taava aamma maluginiakkama ilaat Demokratit oqaaseqartuata oqaaseq atormagu suliassat ingerlasut ajoqusersorlugit manna siunnersuut taamatut oqaasertalerneqartoq ajoqusersornerarlugit. Demokratit oqaaseqartuanut oqassaanga, soorunalimi ajoqusersuiniartutut ataatsimilluunniit siunertaqarlunga siunnersuuteqannginnama. Isumaqarpunga siunnersuut manna nunatsinnut pitsaasumik kinguneqassasoq, aamma Inatsisartut maani nunatsinni suliarisariaqarpaat. Kisianni aamma Folketingip suliarisariaqarpaa. Naggataatigut Folketingi oqartussaavoq nunamut piginnittussaaneq pillugu. Folketingi aalajangerusunngippat Inatsisartut kisimiillutik tamanna aaqqissinnaanngilaat. Taamaattumik ajoqusersuiniarnermik oqaasertaliineq akuerisinnaanngilara aamma utertikkusuppara.
Anthon Frederiksenip tamakkiisumik tapersersuineranut qujassuteqassaanga. Inuit qassiullutik isumaqatigiiniariartornissaannut tunngasoq soorunalimi maani aalajangeruminaappoq, kisianni taamatut oqarnerup isumaa uaniitippara Anthon Frederiksen taamatut oqarnermini isumaqartoq Inatsisartunut ilaasortat sapinngisamik tamarmik isumaqatigiittariaqartut aammalu tamarmik tunuliaqutaasariaqartut piumasaqaateqarnermi taamaattumi.
Soorunalimi suliassaq annertuvoq, aamma Naalakkersuisut
oqarnerattuut, imaalitsiaannaq oqaannarluni anguneqarnavianngilaq. Ilungersortariaqarpugut, aamma inatsisinik
aporfissaqarpoq. Aamma immaqa ilaatigut danskit naalagaaffiata inatsisaanut
tunngaviusumut kalluaasinnaasutut Dansk Folkepartiiminngaanniit ilimagineqarnera
soorunalimi misissugassanut ilaassaaq. Kisianni inatsisit inunnit suliaapput
aamma naalakkersuinikkut suliaqartut allanngortittarpaat. Taamaattumik nunamut
tamakkiisumik oqartussaalernissatta aammalu pisuussutaanut taanna
angujumaaripput qularinngilluinnarpara.
Oqaaseqartunut
qujavunga.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Inuussutissarsiornermut
Naalakkersuisoq.
Finn Karlsen,
Inuussutissarsiornermut
Naalakkersuisoq, Atassut.
Uanga aamma
qujavunga siunnersuuteqartup siunnersuutaanut Naalakkersuisut sinnerlugit
akissutitsinnut partiit amerlanerussuteqarluartut akissuterput isumaqatigalugu
oqaaseqarmata.
Soorunami Inuit
Ataqatigiit paasilluarsinnaavakka sulluginnimmata, aamma naatsorsuutigereerpara
taamatut isumaqarnissaat. Tassa nunamut piginnittussaanerup tamakkiisumik
tassani erseqqissumik uanga .. uannut tunngasortaanna annerusumik
oqaaseqarfigigakku, kisianni aamma erseqqissaatigalugu nunamut
piginnittussaanerup aalajangiivigineqarnissaa uani utaqqeqqaarneqartariaqartoq.
Namminersulernissaq pillugu Ataatsimiititaliarsuaq pilersinnikuuarput aamma
aningaasarpassuarnik naleqarpoq. Massakkut nalilersuipput taakkua.
Inatsisartunut tunniuttussaavaat qanittukkut. Taanna oqaluuserineqareerpat
pinngitsoornata tamakku tikittussaavagut, annertoorujussuarmik
oqallisissaraagut tamakkua. Taamaattumik tupiginngilluinnarpakka partiit
amerlanerussuteqarluartut Naalakkersuisut taamatut oqarnerat isumaqigimmassuk.
Soorunami
nuannaarpunga siunnersuuteqartup massakkut aallarnisaatigalugu uagut
Naalakkersuisunit allagaqaateqarsimavugut qallunaat naalakkersuisuannut
susassaqartumut aatsitassat pillugit oqartussaaffiup maanga tiguneqarnissaa
sulissutigalugu. Taanna neriuppugut qallunaat Naalakkersuisuininngaanniit pitsaasumik
isumaqatigiinniarnerup ingerlanissaa, akuersaartumik ingerlanissaa
neriuutigilluinnarpara.
Ilaatigut
Folketingimi ilaasortatta Lars Emil Johansenip Kuup Kleistillu
siunnersuuteqarsimanerat itigartitsissutigineqarsimasutut oqaatigineqarnera,
tupiginngilara uanga tassani Naalakkersuisutut .... ajuunnavissutut paasivara
suunngitsutut isiginagu akisimagaat. Susassaqartut uani tassa Inatsisartut
Naalakkersuisullu. Taakkua saqqummeeqqaartinnagit imaanngilaq itigartivikkaat. Uagut taama paasivarput Naalakkersuisuni.
Itigartinneqanngilaq, Naalakkersuisunuku Inatsisartullu maani
saaffiginninnissaat pisariaqartikkaat taakku siulliullutik
saaffiginnittussaammata. Kisianni soorunami aamma uagut
Naalakkersuisuninngaanniit pisussaaffigaarput taamatut amerlanerussuteqartut
aalajangerpata, tassa naatsorsuutigaara Namminersorneruneq pillug
Isumalioqatigiissitap saqqummiussereernerata kingorna tamakku suliassat
aallartilluariarpata Folketingimi ilaasortaatitavut pinngitsoornagit aamma
attaveqarfigilluarlugit taanna suliaq ingerlakkumaaripput. Taamatut
suleriaaseqarnissarput naatsorsuutigisariaqassavarput.
Soorunami
aamma ilaatigut isumaqatigii...., soorlu Demokratit oqaaseqarnerat uanga aamma
isumaqatigilluarsinnaavara sapinngisamik qalleraannaveersaartariaqarpugut suliat
ingerlammata. Tamatta isumaqatigeereerpugut nunamik piginnittussaanitta
tiguneqarnissaa isumaqatigiissutigigatsigu. Massakkut suliat tamakku
ingerlapput, isumaqatigiinniarneq suli aallartinngilaq, taamaattumik suliat
ingerlanerisa nalaani siunnersuuteqaqattaartarnerit ilaatigut taamatut
oqaaseqarfigineqarsinnaammata tupiginngilakka qalleraattutut
taaneqarsinnaammata. Taamaammat ajornanngippat qalleraannaveersaarnissaq
piumasarineqarmat uanga isumaqatigilluarsinnaavara. Suliat tamakku ingerlapput,
aamma tamatta naatsorsuutigaarput neriuutigalugulu nunamik piginnittussaanerput
tamatta isumaqatigiissutigalugu isumaqatigiiffigilluarlugu, tamatta
tigusinissarput isumaqatigiissutigereeratsigu, taakkua suliassartai soorunami
naammassineqartinnagit oqareersinnaanngilagut qanoq inerneqarumaarnersoq. Tassa
taanna utaqqimaarallarniarparput amerlanerussuteqarluartut maani oqaatigisaat,
Naalakkersuisut aamma oqaatigisaat Namminersorneq pillugu
Isumalioqatigiissitami naammassippata saqqummiippatalu taanna kingusinnerusukkut
tikeqqinneqartussaavoq annertoorujussuarmillu oqallisigineqartussaalluni.
Ugut
Naalakkersuisuni paasinninnerput Folketingip, imaluunniit qallunaat
Naalakkersuisuisa siulittaasuat toqqaannartumik itigartitsisimanngilaq. Uagut
taamatut paasivarput Naalakkersuisuni. Tassa pisussaasut oqaaseqarteqqaarlugit
soorunami saaffiginnitseqqaarlugit taanna suliassaq tikinneqaqqittussaammat
imatut Folketingimi ilaasortatta taamatut siunnersuuteqarsimagaluarneri
itigartitsivinnertut taaneqarsinnaanngillat, taama erseqqitsigisumik
allassimapput misissorluaraanni. Tunngavilersuinnarpaat taamani
oqaaserisimasaminni oqartussaasut qulaatiinnarlugit aalajangiinissamut
massakkut itigartitsisimasut.
Ataatsimut
isigalugu amerlanerussuteqarluartut Naalakkersuisut akissutaat siunnersuuteqartumut
isumaqatigineqarmat tapersersorneqarlunilu nuannaarutigaara. Taamaammat
annerusumik oqaaseqarnanga tamaanga unikkallarpunga.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliuppoq Per Berthelsen, Demokratit. Taanna pereerpat Jensine Berthelsen, Atassut.
Per Berthelsen, Demokratit.
Qujanaq. Ilaatigut ulapilillaraangatta oqaaseqartuulluni saqqummiussassat allatanngorlugit tunniunnissaat ilaatigut apeqqusernartaraluarpoq ulapilertilluni. Kisianni qujanartaqaaq taama pisarmat, tassami saqqummiunneqartumi sangutitsilluni oqaaseqarnerit taamaalillugit erseqqissaavigalugit eqqortumut sangusaqqinneqarsinnaasarmata.
Hr. Kuupik Kleist Inuit Ataqatigiinninngaanniit oqaaseqarmat isumaqatiginngilluinnarakku imatullusooq oqaaseqartugut tassa siunnersuut una ajoqusersuisuusoq sulianut ingerlanneqartunut. Taama oqaaseqanngilluinnaratta. Una atituumik tunngaveqartillugu taaginnarparput, suliat ingerlasut, soorlu aamma Naalakkersuisup taanna eqqaagaa, qallerartutullusooq illugit siunnersuutitigut puullaaqisitsinaveersaarnissarput tamaviaarutiginerusariaqaripput, Demokratillu aamma oqaatigereerpaat sooq taamatut suleriaaseqarnissaq kaammattuutigalugu, tassa nalunnginnatsigu ulluinnarni inuuniarnermut attuumassuteqartunik pisariaqavissunillu maanna pisariaqartinneqarluinnartunik aalajangiussassat amerlaqisut isumagisassarigatsigit. Taanaana nukinnik atorluaanissaq aammalu imminut piffissamik annertuumik pisariaqanngitsumik suliassiissuteqarnikkut tunniussuinaveersaarnissaq kaammattuutigiinnaripput. Isumaqanngilluinnarpugut hr. Kuupik Kleistip siunnersuutaa asuli ajoqusersuutaasoq. Naamerluinnaq, tunngavia soqutiginarluinnartuuvoq aammalu qularinngilara piffissami aggersumi ungasinngitsumi annertunerusumik oqallisaaqqissasoq, tamannalu aamma siunertaqarluartumik peqataaffigissavarput tungitsinninnaanngiit.
Taamaalillunga naqqiuteqaannarpunga imatut paasineqassanngimmat siunnersuut una soqutigerpianngikkipput. Naamik, taamaanngilaq. Oqaannarpugut ingerlanneqartut taakkua ataqqillugit qaavatigut ingerlanneqareersut sammiviinut attumassuteqartunut qallerarnaveersaartigit, taamaalilluta immitsinnut suliakkersorpallaarnaveersaarluta nukissat atorluarniassagatsigit.
Qujanaq.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Jensine Berthelsen, Atassut. Tulliuppoq Jens Napaattooq, Siumut.
Jensine Berthelsen, Atassut.
Qularnanngitsumik naalaartutta paatsuungassutigilluinnassavaat Inuit Ataqatigiit massakkut nunamik piginnittussaaneq tamakkiisumik siunnersuutigineqarsimasoq tunngavigalugu oqallinnissamik pilersitsinissamik maani kissaateqartut. Erseqqissaatigissavara ilanngussatut Kuupik Kleistip siunnersuuteqarnermini Folketingimi nunap pisussutaanik nunatta tigumminnilernissaanik oqallinneq aallaaviusimasoq ilanngullugu tunniussimammagu, taamaattumillu itisiliinani siunnersuuteqarnermigut paatsuungasitsinera uagut utoqqatsissutissarsiutigissanngilarput.
Aamma Kuupik Kleistip nammineerluni nalilersussavaa Atassut sinnerlugu oqariartuuteqarnitsinni naalakkersuisutigut ingerlanneqartut oqaloqatigiinnerit oqaatigigatsigit isumaqanngilaq Anders Fogh Rasmussen Kuupik Klestiminngaanniit isumaqatiginerugiga. Naamerluinnaq, taamatut paasineqassanngilaq. Oqaloqatigiinnerit naalakkersuisutigoortumik ingerlanneqartut torersumik ingerlanneqartariaqarput. Unalu bilagitut ilanngunneqarsimasoq aallaqqaataaniit naggataanut atuaraanni assut oqallinneq tujorminarsimavoq naalagaaffiup Kuupik Kleistip Lars Emil Johansenillu oqallinneranni, uffalu aallaqqaammulli statsminister Anders Fogh Rasmussenip erseqqissaatigereeraa oqaloqatigiinnerit aallartinneqareersut. Tamakkua pinaveersaartittariaqarpagut, paatsuungassutaasinnaasunik iliuuseqarnitsigut immitsinnut naallerujussuarsinnaavugut iluaquserata. Taamaattumik eqqarsaatigillaqunarpoq Inatsisartuni Folketingimilu sulinitsinni anguniagaqaqatigiinnitsinni aporaartumik pisoqannginnissaa siunertaralugu erseqqilluinnartumik suleqatigiinnerit aammalu naalakkersuisutigut suliat ingerlasut misissorluaqqaarlugit taamatut oqallinnerit assortuunnertut allaat oqaatigineqarsinnaasut tunngavissaqarnersut nalilersorluarneqartarnissaat.
Ataatsimut isigalugu nunamik piginnittaasermut tunngasutigut assortuussuteqanngilagut. Periuseq uani eqqartorneqartoq tassaavoq naalakkersuisutigoortumik peqqissaartumik tamakkua ingerlanneqassapput, Atassutillu tungaaninngaanniit aningaasartuutit eqqartoriikkatta saniatigut suli aningaasartuutinik amerlanerungaartunik oqaluttariaqalissaagut Kuupik Kleistip siunnersuutaa Per Berthelsenip oqartarneratuut atituumik taamak atitutigisumik imaqarsimappat suli annerujussuarmik akisussaaffimmik nunamik piginnittussaanermut tunngatillugu danskit ullumikkut uagutsinnut ingerlataat assigiinngitsorpassuit tamaasa tigooqqartussaassagatsigit, tamakkulu suliassat peqqissaartumik ingerlanneqartussaapput. Ullormiit ullormut pinavianngillat, nalunngilluinnaqqissaarpagut. Taamaattumik Atassutip tungaaninngaanniit kajumissaarutigissavarput taamatut, soorlu Demokratit oqarnerattut aporaartumik pisoqartitsinaveersaartariaqarpugut, ataqatigiissaarisariaqarpugut. Torersumik ingerlatsisariaqarpugut. Ulluni makkunani siunnersuutit assigiinngitsut Namminersorneq pillugu Isumalioqatigiissatanut tunngassuteqartut eqqartuussiveqartunut suliaqartunut ataatsimiititaliarsuarnut tunngassuteqartut Inatsisartunut ilaasortat ataasiakkaat saqqummiuttaqattaarpaat. Sooruna nalunatigulu ukiamut sammisussaallutigit peqqissaartumik sulinissatsinnut tamakkua utaqqissutiinnanngikkigut maani piffissaajaatiginagit?
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Jens Napaattooq,
Siumut. Taanna pereerpat Aqqaluk Lynge, Inuit Ataqatigiit.
Jens
Napaattooq, Siumut.
Qujanaq. Inuit
Ataqatigiit oqaaseqartuata ilaatigut toqqammavilersuutigaa Folketingimi
oqallissimanerit toqqammavigalugit Savalimmiunut tunngassuteqartut
aallaavigalugit qupperneq 2-mi erseqqissaassuteqarnerit assigiinngitsut
Savalimmiut tungaartaralugit. Isumaqarpunga tassunga tunngasumik
oqartariaqartugut uani Inatsisartuni ataatsimiikkatta aamma naalakkersuinikkut
Inatsisartut siunnerfii aallaavigalugit tulleriiaarinikkut siunnersuuteqartup
oqariartuutaa Siumumiit toqqammavilersorluakkamik, ersarilluinnartumik
paatsoorneqarsinnaanngitsumillu akissuteqarfigigipput. Tassuunatigut
aatsitassanut ikummatissanullu tunngassuteqartut Siumuminngaanniit kisimik
oqariartuuteqanngilagut, aamma erseqqissaassutigaarput Siumut aallartikkamili
nunamut oqartussaanerput tamaviaarluta sulissutiginiakkatta ilagigaat, aammalu
angusat assigiinngitsut ilaatigut tassuunatigut saqqummiinitsinni
taakkartorpagut.
Savalimmiut
eqqaaqqajaanartoqartorujussuuvoq, assersuutigalugu nunatsinnut assersuutitut.
Eqqaasariaqarporlu tassuunatigut Savalimmiut 40-kkut naalersut aatsaat
nunasiaajunnaarsimapput, uagulli kingunerujussua 79-imi aatsaat
nunasiaajunnaarsimalluta.
Ilaatigut
eqqartorneqanngippallaarujussuartarpoq oqaluttuarisaanerup ineriartornerullu
qanoq ingerlasimaneri saqqummiisoqarnerani,
allaatigullu killormut qallunaat amiilaarnartunngorlugit maannakkut
ilaatigut toqqammavilersuutigineqartarnerit akuersaaruminaattartorujussuupput.
Assersuutitummi taaginnarsinnaavarput norskit Tunup Avannaarsua 1900-kkut
aallartilaarneranni tiguniarnikuusimagaluarpaat. Kalaallit taamanikkut uagut
?isiginnaartuuinnartugut? qanoq iliuuseqarnerput killeqartoq qallunaat nunarput
sinnerlugu, taama oqarsinnaalluarpugut, ullutsinnimi aningaasarsiornikkut
aalisakkatigut Tunu iluaqutigilersimaqigatsigu, taamanikkut qulakkeersimavaat
33-mi Haagenmi Hollandimi qallunaat nunaannut Tunup Avannaarsua tamaat
norskinit tiguneqarani qallunaanut kalaallinullu kingorna inuiaqatigiinnit
pigineqalerneranik kinguneqartitsisumik inaarutaasumik.
Taavalu aamma
saqqummiinitsinni ersarissarparput 78-mi saqqummiunneqarsimagaluarpoq
nunatsinni oqartussaaneq taamanikkut Naalakkersuisunut siulittaasuusimasup
statsministerip Anker Jørgensenip ersarilluinnaqqissaartumik
oqariartuutigisimavaa: Naamerluinnaqqeqqissaaq tamanna
eqqartorneqassanngilluinnaqqissaarpoq. Naatsumik, silittumik, manngersumik taamanikkut
oqariartuuteqarsimavoq. Kisianni ineriartornitsinni ullutsinni pissutsit
allanngorsimapput, taamattumik maannakkut uani oqaluuserineqartumi
iserfigineqallattaartumi aamma oqariartuutigineqartut Folketingimi Kuupik
Kleist, Inuit Ataqatigiit taavalu Lars Emil Johansen, Siumut,
siunnersuuteqarnerisigut nunatsinnut oqartussaaneq pillugu tassuunatigut
matoqqasimaneq taanna peersimavoq. Ammasumik oqallinnissaq kissaatigineqartoq
malunnartorujussuarmik ataasiarani oqariartuutigineqarpoq.
Aamma tassunga
tunngatillugu uani Kuupiup saqqummiisimanermini arlallit paatsuunganerarlugit
oqariartuuteqarmat kaammattornarpoq paatsuungananngitsunik
siunnersuuteqassaguni ersarinnerusumik, itisuumik naqissuserlugu
siunnersuuteqarniarnissani siunissami aallussinnaagaa, taamaalilluni immaqa
partiit aamma minnerunngitsumik Naalakkersuisut paatsoorneragai
paatsorpallaaratik immaqa saqqummiisinnaassapput.
Uani suliap
ingerlasimanera siorna Naalakkersuisuni siulittaasuusimasup Jonathan Motzfeldt tamannarpiaq
pillugu ilaatigut aatsitassat ikummatissallu pillugit qallunaat nunaannut
saaffiginnissuteqarsimavoq, taavalu Naalakkersuisut ilaatigut kinguneranik
Inuit Ataqatigiit peqataanerannik Mikael Petersen taannarpiaq aamma pillugu
saaffiginnissuteqartoqaqqissimalluni. Kisianni nalunngilarput
puullaaqisoqarsimasoq, taassumalu kingunerisaanik aamma Naalakkersuisut
nutaamik inisseqqinneranni maannangaaq aamma qujanartumik Naalakkersuisut
sinnerlugit Finn Karlsen aamma saaffiginnissuteqaqqissimavoq. Taamaattumik uani
kinguartitsinermi kinguarsaariinnarluta uagut Siumumi tungitsinninngaanniit
saqqummiussinngilagut, kisianni suliap peqqissaartumik tulleriiaartumillu
ingerlanneqartariaqarneranik tunaartaqarluta suliap ingerlanissaa
mianersuuteqqeqqissaarlugu ingerlattariaqarmat, soorlu ilaatigut aamma
Atassutikkormiut toqqammavilersuutit assigiinngitsut saqqummiukkaat
apeqquterpassuit akineqartussat, taamaattumik suliassaq aqagu naammassinagu,
aqaguagu naammassinagu, kisianni peqqissaartumik uagutsinnut inuiaqatigiinnut
kalaallinut tamatsinnut pitsaanerpaamik iluaqutaasussamik
ingerlattariaqarparput.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliulluni oqaaseqassaaq Aqqaluk Lynge, Inuit Ataqatigiit. Taanna pereerpat Anthon Frederiksen, Kattusseqatigiit.
Aqqaluk Lynge, Inuit Ataqatigiit.
Manna siunnersuut saqqummersoq tassaavoq piareersarluarluni tunngaveqarluarlunilu saqqummiussaq. Inatsisartunut ilaasortaasugut saqqummiussanik amerlanerusunik taamaattunik takorusunnartassaaq. Siusinnerusukkut oqallisigineqartut innersuussutigiinnarsinnaavakka.
Uani pineqartoq soqutiginaateqarpoq ugguuna Danmarkimi statsministerip akissuteqarnermini Lars Emil Johansenimut nalorninartut marloqiusat saqqummersissimammagit. Tassalu siullermik oqaatigisimammagu Savalimmiutut Kalaallit Nunaat pineqarsinnaanngitsoq. Tassanilu apeqqutigineqarmat sooq pissutsit taamaannersut taanna akineqarsimanngilaq erseqqissumik. Kisiannili akissutaani Folketingimi oqallinnermi akissutaani ilaatigut takusassaavoq naalagaaffik isumaqartoq Savalimmiuni pisimasut taakkua kukkunerusimasut. Tassalu naalagaaffiup tunngaviusumik inatsisaanik ilaatigut unioqqutitsisimanertut isikkulerlugit ilisimatuut assigiinngitsut oqaatigisimavaat.
Taamanikkut eqqaamalluinnarpara taakkua pisut aamma maani oqallisigineqarmata. Maanilu uniffiugallarsimasut tassaanerupput taamanikkut aamma suli ilimagigatsigu suliarineqarlunilumi aatsitassat pillugit inatsisip ataatsimoortumik nunatsinnut nuutinneqarnissaa.
Ukiut suli arlariissuit tamanna ingerlavoq, aammalu tassa paasissavarput Naalakkersuisut siulittaasuata maani najuunnissaminut piffissaqaleruni immaqa akisinnaajumaarpaa Naalakkersuisut tunngaviusumik nunamik piginnittussaanermut tunngasut taakkua qanoq isummerfigineqassanersut, pissutigalugu erseqqissumik aajuna aammalu immikkoortittariaqakkat tassaammata Namminersornerullutik Oqartussaanerup ullumikkut aaqqissuussaanera imaammat uagut inuiattut aammalu immikkut nunaqartutut akuersaarneqarsimannginnerput pissutigalugu, taava inuiattut immikkut pineqarsinnaanngilagut. Taamaattumik danskit naalagaaffiata iluani innuttaasutut ?nalinginnartut? isigineqarpugut.
Taavalu alloriarnermi uani eqqaasarput tassaagaluarpoq nunap inoqqaavi pillugit isumaqatigiissut ILO 169 malillugu nunap inoqqaavisut pisinnaatitaaffigut qanoq erseqqissarneqartariaqarnersut.
Eqqaamassavarput aamma taamatut apeqqutip iluarsiniarnerani Naalakkersuisut suliniarnerminnik nalunaaruteqareermata, taannalu qujassutigaarput. Tassa imaappoq aatsitassanut tunngasortaa aammalu aatsitassanik ingerlatsinermut tunngasortaa oqaluuserineqarniartoq, tunngaviusumilli kalaallit pisinnaatitaaffigeriigaat, tassalu nunaminnik piginnittuunerminnik inatsisitigut akuersaartumik saqqummiinissaat suliassaavoq Folketingimi suliarineqartussaq. Qanoq ililluta maani oqaluttarfimminngaanniit Folketingimi ilaasortaatitavut killilersorniarsinnaavagut suna tasamani oqaluuserissaneraat? Taamaattumik Kuupik Kleistip aammalu Lars Emil Johansenip Folketingimi ilaasortatuut saqqummiussimasaat isumaarpunga pissarsinartoq assullu pissanganartoq. Neriuppugut Naalakkersuisut una suliassaq aatsitassanut tunngasortaa naammassillugu suliarisinnaajumaaraat, unali pisinnaatitaaffitsinnut tunngaviulluinnartumik tunngassuteqartoq neriuppugut aaqqinniarneqarsinnaasoq, tassami Namminersulivinnissaq pillugu Ataatsimiititaliarsuarmi suliarineqarnera aamma suliassaq allarluinnaammat ullumikkullu pissutsit atuuttut aamma qaangerniartariaqarput nunarsuarmi isumaqatigiissutit malillugit aaqqiinissaq najoqqutaralugu.
Uagut Inuit Ataqatigiinninngaanniit qujassutigaarput partiit tamarmik una apeqqut pingaartillugu oqallisigimmassuk, aammalu una suliassaq maangaannaq uninnavianngimmat aammalu nalunanngitsumik Folketingimi aamma uterfigineqaqqikkumaarluni statsministerip namminersorneq pillugu inatsit allannguuteqarnissaanut taamani novemberimi oqallinnermi aamma oqaaseqareersimammat pissangalluta naalarnissavarput qanorpiaq taanna isumaqartinniarsimaneraa.
Kisianni aajuna naggataatigut naatsuaqqamik erseqqissumillu oqaatigisariaqartoq akineqarsinnaanngitsoq danskinit imaluunniit nunatsinni Naalakkersuisunit tassaavoq sooruna naalagaaffeqatigiinnerup iluani Savalimmiormiut immikkut pineqartut kalaallillu immikkoortinneqarlutik?
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguuppoq Anthon Frederiksen, Kattusseqatigiit.
Anthon Frederiksen, Kattusseqatigiit.
Assorujussuaq uggornarpoq uani suliami taama nunatsinnut inuinullu pingaaruteqartigisumi oqallinnermi Naalakkersuisut siulittaasuat annerusumik peqataanngimmat aammalu uanga takusinnaasakka naapertorlugit tassaasariaqaraluarmat uani apeqqummi pingaaruteqartumi akissuteqartussaq.
Paasisinnaanngisama uani suliami ilagaat soorlu Folketingimi
oqallinnermi pappilissat assigiinngitsut tunniunneqartut takusinnaasagut
naapertorlugit apeqqut pingaaruteqartoq naalagaaffeqatigiinnerup iluani
assigiinngisitsisoqarneranut tunngasoq. Ilaatigummi oqaatigineqarpoq
Savalimmiuni nunamik piginnittussaatitaanermut tunniussinermi ullup qeqqata
siorna, imaluunniit ullup qeqqata kingorna taamaallaat atorlugu kaffisornermi
akuerineqarsimasoq Savalimmiut nunamik piginnittussaatitaanerat. Soormi
nunatsinnut nunamik piginnittussaanerup tunniunneqarnissaa taama
sivisutigisumik ajornartigisumillu kalaallinut tunniunneqarsinnaanera
ingerlassava? Ilaatigut Siumup oqaluttuata oqaaseqarnermini oqaatigaa inuiaat
kalaallit nunatsinnik piginnittussaanerput, issualaarpara taanna: ?Siumup
aallartikkamili ilungersuutigalugulu sulissutigisaasa ilagaat?. Tassa nalunngilarput Siumut ukiut 25-t sinnerlugit
atareersoq. Ilumut nunamik piginnittussaatitaaneq ukiut 25-t sinnerlugit
ilungersuutigisimagaanni sooq namminersulivinnermiit 1979-imiilli
tiguneqarsimanngila? Sooq oqartussaaffik piginnittussaanerlu kalaallit uagut
nammineq pigisarput taamanikkulli tiguneqarsimanngila? Aamma ukiut 25-t
utaqqeqqissanerluta? Savalimmiormiut imaaliallaannaq ajornanngitsigisumik
oqartussaaffik nunamillu piginnittussaaneq taama ajornanngitsigisumik
tigusinnaappassuk sooq Siumup ukiut 25-t sinnerlugit atussavai suliaq taanna
taamak ilungersunartigisumik tiguniarneranut? Tassa paasiuminaatsoq
tassaniippoq aamma.
Taamaattumik
Siumukkormiut kaammattuinnarusuppakka una siunnersuut ersarilluinnartoq
paatsoorneqarsinnaanngitsorlu sooq paatsunganartutut partiit anginerit taakkua
paatsuunganartutut saqqummiunneraat. Paasiuminaatsippara uanga taanna. Uanga
ersarilluinnartumik paatsoorneqarsinnaanngitsumillu pappilissat tunniunneqartut
uatsinnut tunngavigalugit takusinnaavara ersaringaarmat siunnersuut tassaasoq
aatsitassat ikummatissallu pillugit oqartussaaffimmut soorunami
attuumassuteqartoq, kisiannili nunamik piginnittussaatitaanermut
oqartussaanermullu attuumassuteqarpoq una, aammalu immikkut Naalakkersuisut
suliassamik ingerlatsereernerat aammalu namminersorneq pillugu
isumalioqatigiissitap isumaliutissiissutaanik utaqqisinneqartariaqanngitsoq
suliassaq ersarippoq. Minnerunngitsumillu oqartussaaffiup aalajangiisussallu
Folketingimiinnera pissutigalugu Inuit Ataqatigiit oqaluttuata ilaatigut
oqarneratuut oqartussaaffik taanna aalajangiiffigisassarlu tassa danskit
Naalakkersuisuiniippoq.
Oqallinnermi
Danmarkimi ingerlanneqarsimasumi takusinnaasagut tamatta naapertorlugit
tunngaviatigut Folketingimi ilaasortat amerlanerpaarpaat isumaqatigaat
siunnersuut. Kisiannili tassa apeqqusigaat tassatuaannaavoq kalaallit
Naalakkersuisuisa saaffiginninnissaat. Tassa kisimi. Taamaattuminguna Inuit
Ataqatigiit qass?tusind procentiugaluarnersumik taperserlugit suliassaq
paasingaarakku kissaatigilluinnaraluariga Inatsisartut tamarmiulluta
paaseqatigiilluarluta taamatut danskit kissaateqarnerat piaartumik
Naalakkersuisuninngaanniit saaffiginnissutigineqassasoq
ilungersuutigineqartariaqartoq.
Apeqquserneqartariaqanngilarmi
una nuna tummagarput uagut kiap pigigaa kiallu oqartussaaffigissaneraa.
Minnerpaamilluunniit paatsuungananngillat tamakku. Taamaammat neriussaanga
paatsoornermik oqalunneq eqqunngimmat atuagassasi atuarluaqqulaarlugit.
Ersaripput paatsuungananngillat. Uanga paasisinnaasakka naapertorlugit immaqa
siunnersuuteqartup aamma oqarneratuut, suliassaq sangutinniarneqarpoq
aatsitassat ikummatissallu oqartussaaffigineqarnerat pillugu inatsimmut.
Taannaana ilissi paatsoorsimagissi amerlanerpaat. Ersarilluinnartumik siunnersuuteqartup
siunnersuutigaa nunamik oqartussaaffeqalernissaq, nuna kiap pigilerlugulu
oqartussaaffigilissaneraa.
Taamaammat aamma
Inuit Ataqatigiit oqaaseqartuata ukua oqaatsit
sanioqqunneqarsinnaanngilluinnartut oqaatigisai issualaarusuppakka imaattut:
?Immitsinnut tatiginitsinnut anersaakkut inuunitsinnut sutigullu tamatigut
toqqissisimanissatsinnut attuumassuteqarpoq?. Assorujussuaq suliassaq taanna
uatsinnut attuumassuteqarpoq taakkua oqaatigineqartut tunngavigalugit.
Piginnittussaalerneq nunamik oqartussaanerulernerlu inuiannut kalaallinut
anersaakkut timikkullu sakkortuumik tunisisussaavoq uatsinnut. Sakkortuumik
nukissamik tunisisussaavoq. Taamaattumik isumaqarpunga paatsuungasuusaarneq
taanna qaangerlugu iluamik siunnerfeqarluni danskit Naalakkersuisui
piumaffigineqaannartariaqartut nunamik piginnittussaalerneq oqartussaalernerlu
kalaallit massakkorpiaq piumavaat. Ukiunut arlalinnut
utaqqisinneqartariaqanngilaq.
Aamma
Namminersorneq pillugu Isumalioqatigiissitat isumaliutissiissutaannut utaqqisinneqartariaqanngilaq.
Ajornanngippat ippassarlili pereersimasariaqaraluarparput oqartussaaffik
aammalu akisussaaffik taamaattoq. Immaqa 1979-imili
pereersimasariaqaraluarparput. Tassa taamaattariaqarpoq. Kiami
apeqqusersinnaavaa Kalaallit Nunaat? Apeqquserneqartariaqanngilaq.
Nukissagut
atorluarniassagutsigit, ilaatigut aamma taamatut oqartoqarpoq, suliassanik
qalleraassinata allanillu ingerlareersunik immaqa
?akornusersuisariaqanngitsugut? ilaatigut oqaatigineqarpoq. Namminersorneq
pillugu Isumalioqatigiissitat isumaliutissiissutaat kingusinnerusukkut
pisussaavarput. Aap, ajunngilaq. Suliarissaqqaarparput taanna. Kisianni una
suliaq pingaaruteqartoq kalaallinut inuiannut taanna piaartumik apeqqusernagu
ingerlanneqarnissaa pisariaqarluinnartoq erseqqissarusuppara.
Soorunami
torersumik ingerlatsinissaq ujartorneqarpoq, aamma tupinnanngitsumik taanna
anguniartariaqarpoq.
Danskit
Naalakkersuisuisa siulittaasorisimasaat Kalaallit Nunatta
piginnittussaalernermut oqartussaaffeqarnissaanut tunngatillugu qanoq oqarsimasoq
aamma nalunngilarput. Tassa immeraatigineqartariaqanngilarluunniinngooq. Tassa
danskit taamannak annertutigisumik qulangersimanninnerat ullumikkut
takussutissaaginnarpoq aamma qanoq Inatsisartunut ilaasortat ilaannut partiinut
angisuunut sunniuteqarsimasoq. Allaat uani oqaatigineqarpoq soorlulusooq uagut
oqartussaasuuniartugut danskinut qunulluta tunniusimaannartugut. Isumaqarpunga
ullut tamakku qaangiuttut. Ukiut 50-it sinnerlugit danskit naalagaaffianni
naligiittut inooqataaniaraluarpugut. Tamatta assigiimmik
oqartussaaqataaniaraluarpugut, naak Siumup oqaluttuata oqaatigigaluaraa
Kalaallit Nunarput aatsaat nunasiaajunnaarpoq 1979-imi. Taamanngilaq. Kalaallit
Nunarput 1953-imi junip tallimaani nunasiaajunnaartussaaniaraluarpoq inatsisit
tunngaviusut naapertorlugit. Tassa Savalimmiut nunasiaajunnaarneranniit ukiut
tallimat qaangiummata. Ukiorpassuit nikinganngillat. Savalimmiut
nunasiaajunnaarput 1948-mi. Ukiut tallimaannaat nikingavugut tassani.
Taamaattumik ukiorpassuarnik nikingasumik oqalunneq tunngavissaqanngilaq.
Taamaattumik
paaseqqunaqaaq aamma ilungersunaqaaq nunamik piginnittussaanermik
ilungersuuteqarneq taanna isumaqarpunga eqqarsaatigilluaqqittariaqarissi
aammalu uani aalajangiiffigisassaammat suliassaq Naalakkersuisut
saaffiginnissuteqarnissaat soorunami taperserneqarumaartoq neriuppunga.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tulliuppoq
Kuupik Kleist, Inuit Ataqatigiit. Taava tullinnguukkumaarpoq Naalakkersuisut
siulittaasuat.
Kuupik
Kleist, Inuit
Ataqatigiit.
Soorunalimi
piareersarluakkanik torersumillu maani Inatsisaruni siunnersuuteqartassaagut.
Taanna uagut Inuiat Ataqatigiinni aamma pingaartittupilorujusuuarput. Aamma
nassuerutigisariaqarpara Inatsisartuni ataatsimiinnermi matumani arlalippassuartigut
siunnersuutit nalaattakkagut piareersarluarsimanngitsutut isigigatsigit,
aammalu ilaatigut piffissaajaasutut maani isigalutigit.
Kisianni una
siunnersuut isumaqarpunga soqutaanngitsutut oqaatigineqarsinnaasoq (?).
pingaarutilerujussuuvoq. Aamma oqartoqaraluarpalluunniit suliassat allat
pingaarnerit suliarisariaqarigut uanga isumaqarpunga nunatsinnut
siunissatsinnullu apeqqutit pingaaruteqarnerpaat ilagigaat nunamik
piginnittussaaneq.
Taamatut oqareerlunga
oqassaanga malugigakku aamma oqallisigineqartoq manna misigissutsinik
sakkortungaatsiartumik attuisoq, oqaluttut nipaat oqaatsillu atorneqartut
eqqarsaatigalugit misigissutsinut sangoqqajaaneq malunnarpoq. Tamanna
ilimagisimanngikkaluarpara, ilimagisimagaluarpara oqallineq matumani
isumaqatigiiffioqalunilu siunnerfinnillu ungasikannersoq eqqarsaatigalugu
siunnerfinnik aalajangiiffissatut isumaqataaffiujumaartoq. Taamaakkaluartoq
oqallinneq ilaatigut torerpallaanngitsumik ingerlasutut oqaatigisariaqarpoq.
Uanga
pisussuteqarsimassaguma tassunga soorunalimi ajuusaarutigissavara, kisianni
pappialat ilanngussukkakka siunnersuutinnut pappialarpaalussuit, tassa imatut
isumaqartikkaluarpakka erseqqissaatitut ilanngullugit. Nalinginnarmik
siunnersuuteqarsimasuuguma pappialaq ataaseq tunniussimassagaluarpara, tassa.
Ajunngilaq,
taanna taamaanniarallarli.
Taava
nunatsinninngaanniit Folketingimut ilaasortaatitaqarnerput eqqarsaatigalugu
ulluni kingullerni aammalu siusinnerusutigut maani Inatsisartut ataatsimiittarneranni
puttutillattaasartoq tassaavoq ilumut kalaallit Folketingimut ilaasortaatitaat
qanoq pisinnaatitaaffeqarnersut apeqqusersorneqartarluni. Aamma arlaatigut
killerlersorneqartariaqarnerannik, qanoq isumaqarsinnaanerannik, sunik
siunnersuuteqarsinnaanerannik qanorlu oqalussinnaanerannik
ilitsersuisoqartarluni oqaluttarfimminngaanniit maanngaanniit.
Soorunalimi
isummersorfiusinnaavoq, kisianni tamanna paasinarnerpaassagaluarpoq
oqallisigineqassasoq Folketingimi ilaasortaq nunatsinni Naalakkersuisunit
Inatsisartuni ilaasortanillu akerlilersuilluni sukataartartuuppat nunatsinni
inuit illua-tungilersorlugit, siunertarineqanngitsunik oqalulluni, soorlu aamma
pisarsimasoq nalunngikkipput siusinnerusukkut.
Kisianni
massakkut Folketingimi ilaasortaasugut nalunngisara naapertorlugu manna
tikillugu ataasiarlutaluunniit, ilaatigut naak Inatsisartuni illua-tungiliuttut
partiianiittaraluarluta ataasiarlutaluunniit Inatsisartut kissaatigisaat
akimorlugit siunnersuuteqaratalu oqalunnikuunngilagut. Aamma Naalakkersuisut
suliaat eqqarsaatigalugit taamaappoq. Taamaattumik una isumaqatigaara
isumaqatigiilluta pisariaqartugut. Sapinngisamik ataatsimoorluta
ikorfartoqatigiillutalu oqaluuserisassat, pingaartumik nunarput tamakkerlugu
oqaluuserisariaqartut aammalu inuiannut tamakkiisumik sunniuteqartut pillugit
tassunga killinnaveersaartariaqarpugut.
Aamma
oqaatigissavara uanga isumaqarama aqqutissaasinnaasut tamaasa atorlugit
nammineeriartornitsinni piumasagut saqqummiuttassagigut, imaanngitsoq
Inatsisartuni matumani oqaluttarfik kisiat atorlugu tamakkua
oqaluuserissagigut. Annertunerpaamik avatangiisitsinnut aammalu nunanut
suleqatitsinnut nunat tamalaat akornanni isummat tamakkua
saqqummiussortariaqarpagut ilisarineqaqqulluta aammalu ilisimaneqaqqullugu
qanoq ineriartornissaq qanoq ittoq uagut kissaatigineripput.
Aamma una
apeqqut siunnersuutinnut tunngaviusoq pillugu naggataatigut oqaannassaanga
qineqqusaarnerni Folketingimut Inatsisartunullu qineqqusaarnerni Inuit
Ataqatigiit erseqqilluinnartumik neriorsuutigimmassuk qinersisiminnut aammalu
qinersisiginngisaminnut apeqqut una malersorusullugu periarfissat tamaasa
atorlugit aammalu nukigut atorusullugit apeqqutip naammassineqarnissaa
siunertaralugu.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Naalakkersuisut siulittaasuat. Tullinnguutissaaq Jonathan Motzfeldt, Siumut.
Hans Enoksen, Naalakkersuisut Siulittaasuat, Siumut.
Qujanaq. Uani oqallinnermi uparuarneqarpoq Naalakkersuisut siulittaasuat soqutiginninngippallaartoq. Kisianni tassa aamma uanga suliassakka malinnaaffiginiarsaraakka aammalu ataatsimiinneq højttalerikkut malinnaaffigeqqissaarlugu tusarnaarpunga. Aamma saqqummiussiissut Inuussutissarsiornermut Naalakkersuisup isumagisussaammagu suliassa agguataarneqareermata, kisianni toqqaannartumik uanga taaneqarama soorunami erseqqissaassuteqalaassaanga.
Nunamik piginnittussaanermut tunngasoq malugisinnaavara oqariartuutigineqartoq assortuussutaanngilluinnaqqissaartumik. Tamarmillu oqaaseqartut siunnerfigaat taanna aaqqinneqartariaqartoq, aamma Naalakkersuisut massakkut piumassuseqarput aaqqiiniarnermi ilungersorlutik peqataanissaminnut aammalu siuttuussallutik.
Nunamik piginnittussaaneq aatsaat ukua Naalakkersuisunngortut nutaat Atassut Siumullu tunngavigalugit aallartinneqanngilaq. Ukiorpassuarni sorsuutigineqarsimavoq. Aamma partiit allat naalakkersuisooqataasarsimasut tassani peqataasarsimapput, ilaatigullu Inuit Ataqatigiit oqaluttuata oqaatigisaa, tassalu Naalakkersuisut massakkut immaqa siunnerfeqarpianngitsutut taamaallaalli atorfillit isumaat tunngavigalugit sulisutut nalilermagit assorujussuaq taanna pakatsissutigaara. Tassami aamma Inuit Ataqatigiit naalakkersuisooqataasarput, periarfissami aamma pitsaasumik inissisimallutik. Aamma periarfissaqarput tassani uparuartuinissaminnut. Imaanngilaq aatsaat suliassaq taanna massakkorpiaq saqqummertoq. Ukiorpassuarni sorsuutigineqareerpoq, partiillu allat peqataasarsimasut aamma taanna eqqaamannguatsiarpaat.
Numik piginnittussaanermut tunngatillugu Kattusseqatigiit oqariartortuata oqaatigaa soormi 1979-imili taanna tigunnginnassiuk. Siumut ukiuni 25-ni ingerlareerluni sooq taamanikkulli aaqqissimanngilaa? Kattusseqatigiit oqaluttuata aamma eqqarsaatigisariaqarpaa inuiaqatigiit kalaallit aningaasatigut inissisimaffiat oqitsuinnaanngimmat. Tassami nunamut piginnittussaanermut tunngasut uagut massakkorpiaq tigussagaluarutsigit taava ukiumut nammineerluta aningaasaajaatigisartagassagut 50-60 mio.-t missaanni annertussuseqaleriataassapput.
Misissuinerit, ujarassiornerit, aatsitassarsiornerit, nunap assiliorneri, oliamik misissuinerit qallunaat naalagaaffiata qujanartumik massakkumut ukiumut 50-60 mio.-t missaanni annertussusilimmik akissaajaatigisarpai. Taamanikkuli uagut tigusimasuugutsigu taakkua aningaasat tamaasa akilertartussaagaluarpagut, agguaqatigiissillugulu massakkumut tassa 1,2 mia.-t missaanni ilimagaara atorneqarsimassasut qallunaat naalagaaffiata akiligaanik. Taamaammat isumaqarpunga taamanikkulli tigusimasuugutsigu massakkut alloriarfissarput annikitsuaraarannguusimassagaluartoq. Assiliornerit, ujarassiornerit allallu annikitsuinnarmik ingerlanneqartussaasimassagaluartut taanna qularineqarsinnaanngilaq. Taamaammat Kattusseqatigiit oqaluttuata aamma eqqarsaatigisariaqarpai aningaasat suminngaanniit pissanerigut imaaliinnarlugu nunamik piginnittussaaneq massakkut tiguneqassappat.
Aamma siuligut naalakkersuisuusarsimasut ilungersorlutik sulipput. Nunamik piginnittussaaneq aallaavigalugu nunatsinnut eqqussiniarneq ilungersuunneqarpoq. Aatsitassanut allaffeqarfiit massakkut nussorneqarput Naalakkersuisullu siuligut sulilluarsimanerat aamma isumaqarpunga tassani nersorneqartariaqartoq. Ajortuinnavissuarmik sulisimanngillat. Taanna isumaqarpunga aamma oqaluttut oqariartuutigilaartariaqaraat. Aammalu uani ataatsimoornissarput pingaartorujussuusoq oqaatigeqqissavara, tassa illersornissamut tunngasunik ataatsimoorsinnaagutta suli pingaarneruvoq piginnittussaanermut tunngasuni ataatsimoornissarput. Taanna isumaqarpunga maani inimi attanneqartariaqartoq.
Maani oqallinneq malinnaaffigaara aammalu
oqariartuutigineqartut tusarnaaqqissaarlugit. Taamaammat suusupaginnittutut
maani inimi uani issiavimmi issiannginnama oqariartuutigineqarnera
nuannarivallaanngilara, kisianni uanga malinnaavunga. Inuit taamatut nalileerusuttut naliliiniarlik.
Pisinnaasara tamaat ajunnginnerpaamik siunertaqarluta nunarput
kiffartuukkusupparput aamma nunamik piginnittussaaneq ilungersuullugu
suleqataaffigissavarput.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Jonathan Motzfeldt, Siumut.
Jonathan
Motzfeldt, Inatsisartut
Siulittaasuat, Siumut.
Isumaqarpunga
Inatsisartunut ilaasortanit paasineqarsinnaasariaqartunga oqaluttarfimmut
qaqiguma. Naalakkersuisunut siulittaasuunerma nalaani pisimasut arlallit
apeqquserneqartutut ittut pillugit isumaqarpunga erseqqissaasariaqarlunga.
Siullermik
oqaatigissavara Savalimmiormiut oqartussaaffiat annertunerusoq tunniunneqarmat
uanga taamanikkut Naalakkersuisunut siulittaasuunngilanga. Taamanikkut
Naalakkersuisunut siulittaasuusoq uannit ilisimasaqarnerussaaq tamakkuninnga
akissuteqarnissaminut, kisianni oqaatigineqartut pillugit naatsumik
akissuteqassaguma sooq uagut ullumikkumut aaqqissuussineq ingerlakkipput.
Aatsaannguaq Naalakkersuisut siulittaasuata tamakkua tungaatigut attullatsiagai
ilumoorluinnaqqissaarput, tassa Kalaallit Nunaanni pisuussutit uumaatsut
iluaqutigineqarsinnaasut misissorneqarneri taamatullu aamma
iluaqutigineqarnissaat misissoqqissaarneri iluaqutigineqarnissaallu
pineqalersillugit Danmarkip naalagaaffiani administrationit, tassa
suliffeqarfiit suleqatigisagut akilersueqataapput. Taamaalillunilu
Danmarkiminngaanniit taanna ataatsimoorluni akilersueqataaneq tamakkunani
misissuinerni aatsaannguaq Naalakkersuisut siulittaasuata taasaqarfia
uagutsinnut aamma aningaasatigut oqilisaataavoq annertuumik.
Isumaqarpunga
Kalaallit Nunaat piumaguni Savalimmiormiutut aamma aaqqissuussinermik
tunineqarsinnaasimassagaluartoq taamatut qinnuteqarsimaguni. Kisianni pissutsit
ingerlaannarnerannut pissutaapput aningaasatigut ingerlatsinikkut
ajornartorsiutit, Kalaallit Nunaata aningaasatigut tulleriiaarinermini
tamakkiisumik ingerlassinnaanngisai. Maannakkut pissutsit uunga killinneranni
erseqqissumik Naalakkersuisut nalunaariartuutaat paasilluarsinnaavarput uagut
Siumumi aamma tamakkuninnga malinnaasugut.
Tamakkiisumik
inatsisitigut oqartussaanerup tiguneqarnissaa Naalakkersuisut maannakkut
kissaatigisaat taanna pissusissamisoortumik noqqaaneruvoq. Taamatut
isumaqarfiginarpoq. Aammalu taassuma saniatigut nammineerluta
ingerlalernissatsinnut Ataatsimiititaliarsuarmi apeqqutit ingerlanneqarnissaat
aamma illua-tungaatigut utaqqineqarsinnaalluni. Kisianni taannaluunniit
utaqqinngikkaluarlugu råstoffit tungaatigut inatsisinik maannakkut inatsimmik
nutarterisinnaaneq aammalu tassuunakkut alloriarsinnaaneq Naalakkersuisut
siunniussaat aammalu oqaloqatigiinnissamut neriorsorneqarfigisimasaat
aqqutissatut maannakkut saqqummiussaavoq.
Taamaattumik
nunamik piginnittussaaneq akerleriissutaanngimmat kisiannili nunamik atuineq
qanoq ilillugu atorneqarnera inatsisitigut oqartussaaneq tamakkiisumik
tigullugu, ingerlallugu naliliiniarnermik oqalunneq aamma piviusorsiortutut
isigisariaqarpoq, Naalakkersuisut tikkuarsimasaat qiviassagaanni. Taamaattumik
uanga aamma assortuussutitut imminullu assortortutut misigisimanngilanga,
taamatulluunniit oqartoqassagaluarpat allanit. Nunamik piginnittussaaneq
aalajangiusimallugu ingerlavugut. Inatsisitigut tamakkiisumik nunap
atorneqarnissaanut piginnaatitaanermik tigusaqarutta ingerlatilerlugulu
namminerlu tassani aqutsilerluta aamma akisussaaffik annertoorujussuaq
tigussavarput. Taassumalu qaavatigut aamma pitunneqassaagut silarsuarmi tamarmi
nunamut atuinermut aamma isumaqatigiissutinut assigiinngitsunut avatangiisinut
tunngasut allarpassuillu tamakkuupput aqutsinermi aamma annertoorujussuarmik
kinguneqartussaasut inunnillu pikkorissunik amerlaqisunik pisariaqartut.
Tamakkuupput eqqarssaatigalugit aamma suliassap peqqissaartumik
suliarinissaanik oqalunneq tunngavissaqarluartoq. Taamatut isumaqarfigaara.
Taakku
Naalakkersuisuunitta nalaani aamma tunngasut tikitsinermik imaqarmata
taamaalillunga erseqqissaavigitsiarpakka.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Jens Napaattooq, Siumut, naatsumik.
Jens
Napaattooq, Siumut.
Qujanaq. Anthon
Frederiksenip oqariartuutigimmagu 1948-minngaanniit 53-imut ukiualunnguusut,
ilumoorpoq. Kisianni 1948-mi namminersornerulersimapput Savalimmiut uagullu
79-mi namminersornerulersimalluta aatsaat. Taanna erseqqissaassutigilaarpara
naqissuseqqilaarlugulu. Kisianni 79-mi erseqqarilluinnartumik oqaatigaarput,
aamma Siumuminngaanniit saqqummiinitsinni, namminersornerulernermi
isumaqatigiinniarnermi 78-mi ajornartinneqarsimasoq nunamut oqartussaaneq
qallunaat Naalakkersuisuisa oqariartuutigisimavaat
paatsoorneqarsinnaanngitsumik. Oqaluuserisariaqanngilaq. Taamak naatsigisumik
oqaatigineqarsimavoq taamanikkut. Kisiannili ukiuni 25-mi Siumumi
politikkitsinni anguniakkat pingaarnerit ilagimmassuk sanarfisimavarput
suliniaqataaffigalugu. Aammalu maannakkut killiffipput tusaasinnaavat qallunaat
Naalakkersuisui allaat maannakkut allaanerungaartumik pissusilersorlutik
qujanartumik inussiarnersumik oqaloqatigiinnissarput kissaatigigaat
killiffigisimagipput. Taamaattumik angusaqartoqarsimavoq ukiuni 25-ni Siumukkut
suliniuteqarneranni. Aamma illit nammineq taamatut oqalussaguit kingumut
saatissinnaasariaqarpat. Ukiuni arfineq pingasuni suli maani qaqissimanngilagut
maani ilaasortaaninni. Taanna aamma isumaqarpunga oqaatigisariaqartoq
erseqqissartariaqarlugulu taamatut oqippallaaleqaaq maleruussiinnartarneq
partiinut allanut.
Taamatut
sinaakkuteqarsimanera ilaatigut 1948-mi namminersulernerulersimanerat Savalimmiut
sinaakkutaqartinneqarsimanngillat nammineq nunaminnut oqartussaanerminnut.
Taamaattumik ullup qeqqartinnagu ajornanngitsumik taassuma aaqqissinnaaneranik
aamma aqqutissiueqataasimasut qularnanngilaq. Uagullu taamatut
sinaakkuteqarnitsinni ullup qeqqata qaangilaarnerani qularnanngitsumik
aaqqiisoqassaqqaarpoq.
1953-mi
nunasiaajunnaarpugut, aap. Kisianni aamma eqqarsartariaqarpugut taamanikkut
inuiaqatigiit kalaallit 1953-mi taasitinneqarsimasuuppata takorloorsinnaavarput
oqaluttuarisaanikkut inissisimanerput qiviassagutsigu kalaallit taamanikkut
ilimanaateqarsinnaasoq qallunaat naalagaaffiannut akuersiinnarlutik
nunasiaataajunnaarlutik kisianni qallunaat nunaattulli ilaattut immaqa
akuersillutik taasisimassagaluarmata. Taamaattumik nuannaarutigisariaqarparput
ullutsinni taamatut killiffeqartoqarsimanngimmat.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tulliulluni oqaaseqassaaq Per Berthelsen, Demokratit, naatsumik.
Per Berthelsen, Demokratit.
Qujanaq, naatsuarannguussaaq naak oqaatigiumasinnaasat amerlagaluartut, hr. Anthon Frederiksen-ip ilinniartitsinerujussuata kingorna.
Kisianni oqaatigiinnassavara uani illuinnaasioqisumi saqqummiussaqarninni eqqarsarnarpoq, oqaluinnartumut ajornartoqanngitsoq, puigunngisaannagassarpummi unaavoq: Piginnaatitaaffiit, pisussaaffiillu imminnut tasiormata, tassanilu aamma avaqqunneqarsinnaanani ingerlanniarneqartup oqallisaasullu aningaasartuutissat eqqarsaatigalugit nunatsinnut nammakkiinissaa.
Isak Davidsen, ataatsimiinnermi aqutsisoq, sinniisussaq siulleq, Atassut.
Tulliinnguppoq
Ellen Christoffersen, Atassut.
Ellen
Christoffersen, Atassut.
Ja qujanaq.
Tassa misigisimavunga maannga oqaluttarfimmut qaqilaartariaqarlunga, tassa
annertuumik uani oqaaseqartuni eqqartorneqarmat Savalimmiuni akisussaaffik
annerusoq, tassa 1990-ikkunni tiguneqarsimasoq ilaatigut tassunga sanilliullugu
Kalaallit Nunaat assersuunneqattajoormat. Isumaqarpunga pingaaruteqartoq
erseqqissaatigissallugu 1990-imi taamanikkut Kalaallit Nunaata sineriaa qanoq
assitigut suliarineqarsimanera, tassa qallunaatut taaneqartarpoq ?kortlægning?
? assitigut suliarineqarsimanera taamanikkut sumut killissimava? Ulloq
mannaluunniit Kalaallit Nunaata sineriaannaa suli assilianngorlugu
naammassineqarnikuunngilaq, aatsaat naammassiartulerpoq.
Tamakkua
eqqarsaatigalugit pingaaruteqarluinnarpoq kingumut aamma qiviassalluni suliat,
GEUS-iminngaanniit ingerlanneqarsimasut aamma qujarullugit
tigulluartariaqarigut, taamaaliorsimanngitsuugutta taamanikkut, kiammitaava
taakku akilersimassagaluarpaat ulloq mannamut suliassaasimasut. Aamma una
eqqaamasariaqarparput Inatsisartuni sulinermi maannakut aatsaat
GEUS-iminngaanniit aallartisarneqaleruttorpoq 200 sømil grænsip avataatigut 300
sømil tikillugu nunap imaluunniit imartaata misissuiffigineqarnissaa,
assilissatigullu aamma misissuiffigineqarnissaa.
Taamaattumik
pingaaruteqarluinnarpoq tamakku suliat ingerlareersut aamma
eqqumaffiginiarneqarnissaat. Tamakkumi akisussaaffik imaasiallaannaq
tigussagutsigu tamakku aningaasartuutissat aamma nalilersueqataasussaapput.
Taamaattumik taamatut imaasiallaannaq tigusisinnaanermik imaluunniit
atuisinnaanermik oqalunnissaq isumaliorpunga mianersuullugit
ingerlanneqartariaqartut, aamma Demokraatiniit taanna erseqqissumik oqaatigineqareerpoq,
pisussaaffiit aamma malinnaaqataasarput akisussaaffinnut tigusassatsinnik.
Taamaattumik tamakkua eqqumaffigineqaqqissaartariaqarput, aamma taamatut
Ataatsimiititaliarsuit suliai ingerlareersut ikerinnarmi taamatut
aallarniisajoortaqattaarnerit qaqitsisaqattajoortarnerillu ilumut
apeqqusertariaqalerpaat, inatsisartut Ataatsimiititaliarsuarnik
sulititsisarnera unitsittariaqalernersoq-una.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tulliinngorpoq
Josef Motzfeldt, Inuit Ataqatigiit.
Josef
Motzfeldt, Inuit
Ataqatigiit.
Tassa siullermik
oqaatigineqareersoq Inuit Ataqatigiinninngaanniit Naalakkersuisut
akissuteqaataat qallunaatuani qulequtsiunneqartoq aallaavigalugu
akineqarsimammat / ilusilerneqarsimammat, taanna tupaallaatigigatsigu
isertussanngilarput. Kalaallisut ilusilerlugu tunniunneqarpoq,
tassanngaanniillu partiit akissuteqaataat siunnersuuteqartup siunnersuutaanut
akissutaanatik Naalakkersuisut akissuteqaataanut oqaaseqaataammata,
Inatsisartuni suleriaatsimi ? suleriaaseq taamatut ingerlaannassappat
Inatsisartut imminnut atorunnaarsinneqarnissaannut allaat
kinguneqarsinnaasumik. Ingerlaaseq taamak ingerlaannassappat
ulorianartorsiortitsisinnaammat, isumaqarpunga Inatsisartunit
eqqumaffigisariaqaripput.
Inatsisartut
inatsisartuupput, Naalakkersuisut naalakkersuisuupput. Inatsisartut
inatsisiliortuupput, Inatsisartut inatsisartunut oqaluuserisassanik
siunnersuutiminnik oqaluuseqartussaapput, tassani pingaarnerunngilaq
Naalakkersuisup qanoq akissuteqarsimanera.
Taavalu
qalleraatinngitsumik oqallinnerit, naalakkersuinikkut politikkikkut
oqallinnerit ingerlanneqartariaqartariaqarnerannut oqartoqarneranut
erseqqissaatigeqqittariaqarpoq, oqaluttarfiit marluk matumani pineqarmata.
Folketing-imi oqaluttarfeqarpoq, Inatsisartuni maani oqaluttarfeqarpugut,
pisariaqartut marluk apeqqummi matumani pisariaqartut marluk
atorluartariaqakkagut tamatigut. Danskit Naalakkersuisui itigartitsivinngillat
oqartoqarpoq, kisianni arlaannattaluunnit oqaatigisinnaanngilaa danskit Naalakkersuisui
qanoq isumaqarnersut, isumminngillat.
Taavalu nunamut
piginnittussaaneq, nunamut piginnittussaanermut apeqqut Inatsisartut kalaallit
Inatsisartuisa oqartussaaffigaat siullertut. Aatsitassanut inatsit Folketing
inatsisaa, folketing-inut suliassatut naleqqunneruvoq, kisianni nunamut
piginnittussaanermut apeqqut nunatsinninngaanniit puttuttussaavoq, aamma
Naalakkersuisut akissuteqaataanni erseqqissaatigalugu oqaatigaa, inuiaat
Kalaallit nunatsinni piginnittussaanitta akuersissutigineqarnissaa
sulissutigineqassaaq, tassa Naalakkersuisut anguniagaat tamakku taaneqarput.
Soormi tamatuma
danskit Nalakkersuisuinut isumaqatigiinniutigineqarnissaanik massakkut
siunnersuut ilassilluaannanngikkaat? Aamma taanna akissuteqarfigineqanngilaq.
Isumaqarpunga
una Isumasioqatigiissitaliarsuarnik pilersitsisarneq nunatsinni paatsoorlugu
mikiarsiivittut kinguarsaavittut atortaripput. Eqqaamavara 1994-imi
Eqqartuussiveqarneq pillugu Isumalioqatigiissitaliarsuaq danskit
inatsiseqarnermut ministeriata suliarineqartussaq nunatsinni Isumaginninnermut
taamanikkut Naalakkersuisuusorlu aallartimmassuk, Inatsisartuni
pingaartinneqarluni oqaatigineqartoq, Isumalioqatigiissitaliarsuaq
suligaluarpalluunniit sulianiluunnit suli naammassinngikkaluarpagu
iluarsisariaqartutut imaaliallaannaq takuneqarsinnaasoq suli suliap
ingerlanerani iluarsineqarsinnaapput qanoq iliuuseqarfigineqarsinnaallutillu.
Sooq uagut taanna maani suleriaaseq atussanngilarput? oqartuaannartarpugut
taanna Isumalioqatigiissitaliarsuarmi naammasseriarpat avani ? avani taava
taanna isummerfigiumaarparput.
Apeqqut una
pingaaruteqartoq nunamut piginnittussaaneq, inuiattut ilivitsunngorniarnitsinni
pingaaruteqartutut qitiulluinnartutut inissisimavoq. Aatsaat
puttutinngikkaluarpoq oqaatigineqartutut, kisianni Naalakkersuinikkut sulinermi
Inatsisartunut Naalakkersuinermi sulinermi suliat uiguleriiaarlutik
ineriartortinneqartariaqarput, manna killiffipput Inuit Ataqatigiit
Naalakkersuusimanerata nalaani pisimanngitsoq, suliat uiguleriiaarlutik
tulleriiaarlutik ingerlapput, massakkullu tamakkua
utoqqatsissutissarsiorfigisariaqanngitsutut uagut isumaqarpugut.
Aamma nunami
piginnittussaaneq massakkut Naalakkersuisup Siulittaasuata 50-60
mio.kr.-nilerlugu akiginiaraa paasivarput. Naalagaaffiup tigummisaasa
Namminersornerulluni Oqartussanut tunniunneqarnerani Namminersornerulernermi
inatsimmi § 4-minngaanniit allassimasoqarpoq, arlaannaataluunniit taamatut
oqartussaaffinnik tunniussinermi tigusinermilu aningaasartuuteqaranilu
iluanaaruteqarfiunnginnissaanut aalajangersaasoqarpoq. Danskit Naalagaaffiat
Naalakkersuisullu pilersaaruteqarsimagunik imak, imatullu ittunik nuna
assiliornermik Ellen Christoffersen oqarneratut Naalagaaffiup
isumaqatigiinniarnikkut pisussaaffigaa Namminersornerullutik Oqartussanut
aningaasartuutigiumaagassatut isigisani, aningaaasartuutigeriikkami nalinginik
Namminersornerullutik Oqartussanut aningaasartalerlugit tunniutissallugit.
Taamaammat ersisaarinerit 1,2 milliardit uagut akilersimassagaluarigut
isumaqarpunga Namminersorneq pillugu inatsimmik toqqammaveqarani, asuli
silaannarmit tigusaasoq.
Soorunami
oqaluuserisassanngortinneqartut pingaarnersiorneqarsinnaapput, Qaanaami,
Upernavimmi, Uummannami, Qasigiannguani, Paamiuni, Narsami, Nanortalimmi,
Ittoqqortoormiini palasit illuminni allaffeqarnerminni orsussakkut, taavalu
aamma innaallagissamut akiliisarnermut ikiorneqarnissaat
pingaarnerutinneqarsinnaavoq. Kisianni uani apeqqummi imatut pingaartigisumi
Inatsisartuni partiit amerlanerit isummersimannginnerat siunnersuutigineqartoq
toqqammavigalugu assut ajuusaarnarpoq.
Aammalu
nunasiaajunnaarsimanermik 1953-iunersoq 1979-iunersorluunniit, takussutissaq
pingaarnerpaaq immaqa tassaavoq 1950-ikkunnili danskit naalakkersorisimasaasa
taamanikkut, Atom pillugu politikkeqarsimanerat, Danmarkimi allatut Nunatsinni
allatut. Nunasiaaneq atasimavoq ukioq 1953-imi tunngaviusumi inatsit
allanngortinneqarnerata kingornatigut. 1999-imi ippassigami Inatsisartuni
Ilaasortap Johan Lund Olsen-ip oqaatigisaattut Danmarkimi qinikkat,
Naalakkersuisut Folketingillu oqartussaanerata annertoorujussuup
tunniunniarneqarnera pillugu eqqartuussivilersuussisoqarmat, Folketingimi
Naalakkersuisunut oqaatigineqarpoq suliassaq, apeqqut taanna apeqqummut
tunngasoq taanna isummerfigineqasannitsoq, eqqartuussinermi suliap naammasineqarnissaa
sioqqullugu. Taamatorpiaq aamma ittariaqaraluarpoq Hingitaq 53-ip
eqqartuussiviit qullersaanut sulitsinera eqqarsaatigalugu.
Nunarput
Danmarkilu immikkut danskit oqartussaasuininngaanniit suliarineqartuarpoq,
taamaammat pisariaqarpoq nunamik piginnittussaaneq inuiaqatigiit
ilivitsunngorniarnitsinnut kinguarsarnagu Naalakkersuisut aamma anguniakkamisut
oqaatigimmassuk, massakkut tamanna piviusunngortissallugu Inatsisartut
aalajangertariaqarnerannut siunnersuut kinguarsaqqinnagu akuerineqartinniarsarissallugu.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tullinnguuppoq
Jensigne Berthelsen, Atassut, naatsumik.
Jensigne Berthelsen, Atassut.
Minnerpaamilluunniit assortuussuteqanngilagut. Naluara sooq Inuit Ataqatigiit taamak assortuukkusutsiginersut, apeqqutaaginnarpoq uani alloriarnerit qanoq ittut atussanerigut, sikumi qajannartumi pisutsilluta. Uagut pisukkusuttugut mianersorluta, maaffissat, naaffissat tamaasa sillimaffigalugit ? ilissi pisseqattaarlusi, puttaarlusi ingerlarusuttusi. Apeqqut taamatut isigisariaqalerpoq, assortuussuteqanngilagut minnerpaamilluunnit, tamatta anguniarparput nunamik piginnittussaaneq nunatsinni sapinngisamik annerpaamik akisussaaffigineqalertariaqartoq. Aamma Ataatsimiisitaliarsuaq innersuussutigineqaqattaareerpoq.
Saqqummiussilerput isummerfigisassatsinnik, aamma tassani tulleriiaarinermut taanna tunngassuteqarpoq. Qaqugu namminersulernissarput aamma taasissutigineqassasoq aatsaarannguaq puttarsineqarpoq maani, aamma Ataatsimiisitaliarsuarmi suliarineqartoq. Taamaattumik Atassumminngaanniit Naalakkersuisunut oqariartuuterput, tassalu aningaasatigut kingunesussat qulaajarneqarnissaannik kaammattuuterput Naalakkersuisunut kingumut eqqaasitsissutigalugu, taamatut assortuunniarsarineq tunngavissaqanngitsutut nalilertariaqarparput, suliassarlu takkuppat peqqissaartumik suliarineqarnissaa tigusariaqarparput, taamatut pipallatamik sulinissaq minnerpaamilluunniit tunngavissaqanngilaq, inuiaqatigiit illersorneqarsinnaanngitsumik ingerlatissanngikkutsigit.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguuppoq Attavigeqatigiinnermut, Avatangiisinut Ineqarnermullu Naalakkersuisoq.
Mikael Petersen, Attavigeqatigiinnermut, Avatangiisinut Ineqarnermullu Naalakkersuisoq, Siumut.
Tassa uangattaaq pinngitsoorusunngilanga erseqqissaateqalaassallunga oqallinneq tamakkiisumik malinnaaffigalugu, ilaatigut paatsunganarsinnaammat, aamma tusarnaartununut tamanna immaqa Inatsisartunut.
Una siullermik erseqqissaatigilaarusuppara ilaatigut aamma oqaaseqartup kingulliup Inuit Ataqatigiit siulittaasuata Josef Tuusi Motzfelt-ip pasiuminaatsillugu oqariartuutigimmagu partiit assigiinngitsut akissuteqaataanut tunngatillugut, aammalu ilaatigut Naalakkersuisut akissuteqaataanut tunngatillugu.
Siunnersuuteqartup qulequtsiussaa ersarilluinnarpoq paatsuugassaanngilaq, kisianni aamma siunnersuugeqartup siunnersuumminut nassuiaammini oqaaseqatigiit kingulliit atugaat, tassaapput tunngavilersuutit pingaarnersaat, uanga takunnissinnaanera naapertorlugu. Issuaalaarusuppunga tassunga tunngatillugu, siunnersuuteqartoq ima naggasiivoq: ?Siunnersuutigaara Inatsisartut aalajangissasut, Naalakkersuisut periarfissaq siulleq atorlugu Danmarkimi Naalakkersuisunut nunamik piginnittussaaneq pillugu isumaqatigiinnialernissaannik pisussaatillugit?.
Tassa siunnersuutip tunngavia, siunnersuutigaara Naalakkersuisut peqquneqassasut Inatsisartuniit nunamik piginnittussaaneq piaarnerpaamik isumaqatigiissutigeqqullugu danskit Naalakkersuisuinut, tassa taamatut paasisariaqarpoq.
Taamaattumik Naalakkersuisut akissuteqaataat paatsuugassaanngilluinnarpoq, akissuteqarmat pingaartinneqarmat Namminersorneq Pillugu Isumaqatigiissitaliarsuup suliaata naammassinerani aamma nunamik piginnittussaanermik tunngatillugu danskit Naalakkersuisuinut isumaqatigiinniarnermut aamma ilaatinneqassasoq. Isumaqarpunga paatsuugassaanngitsumik Naalakkersuisut akissuteqartut.
Naalakkersuisut pingaartingaaramikku tamanna apeqqut peqqissaartumik suliarinissaa oqariartuutigaat nunamut piginnittussaaneq pillugu isumaqatigiinniarnissaq aamma Namminersorneq pillugu Ataatsimiisitaliarsuup inassuteqaataanut ilanngullugu, aammalu Naalakkersuisut Inatsisartunut, taamanikkornissaanut inassuteqaatissaanut ilanngullugu oqaluuserineqassasoq. Aamma akissuteqaammi ersarilluinnarpoq sillimaffigisassat suut taakkartorneqartut, tunngaviusumik inatsisit sillimaffigisassaapput allapparsuillu avatangiisinut tunngasut minnerunngitsumik tamakkuupput tamarmik sillimaffigineqartussat.
Taamaattumik tupinnarpoq illuatungiliuttuninngaanniit Naalakkersuisut akissuteqaataat aammalu Naalakkersuisut partiivisa oqariartuutut suusupagalugit, suusupagisutut nipeqartumik eqqartorneqarmata.
Taamaattumik erseqqissaatigerusuppara Naalakkersuisut ilanngullugu pingaartilluinnarmassuk, soorlu aamma Inuussutissarsiornermut, Aatsitassarsiornermullu Naalakkersuisup eqqaagaa nunamut piginnittussaanermut tunngatilugu apeqqummut isumaqatigiinniarnissat, taakku pingaartillugit ilusilersorneqarumaartut aamma folketingimut ilaasortat ataatsimilluunniit Naalakkersuisuninngaanniit apersuuserneqanngillat. Naalakkersuisuninngaanniit Folketingimi ilaasortat suleqatigiilluarnissaat aamma matumani apeqqummi pingaartilluinnarneqartoq aamma oqaatigineqarpoq.
Taassumallu saniatigut Naalakkersuisut piumasarisaat Kuupik Kleist-ip Inuit Ataqatigiinninngaanneersup siunnersuutaa asuliinnartinnagu aamma atorluarumallugu, Naalakkersuisut Inatsisartunut piumasaraat nukingernarsisut apeqqutit, tassalu allaffisornikkut tamakkiisumik nunatsinni ingerlatsilernissamik tunngasoq kiisalu aamma aatsitassanik atuinerup pillugu nammineerluta inatsiseqalernissatsinnik tunngasoq. Taakkuupput marluk pingaaruteqarluinnartut alloriaqqinnissatsinnut tunngaviliisussat ilaat Inatsisartunut akuersaarneqaqqullarlugit Naalakkersuisut saqqummiussaat.
Isumaqarpungalu Inatsisartuni amerlanerussuteqarluartut tamanna aamma akuersaarlugit nipeqarlutik oqaaseqarfigigaat. Taamaattumik Kuupik Kleist-ip siunnersuutaa oqallisigineqarnera isumaqarpunga asulliinanngitsoq, aamma nunatta iluaqutissaanik alloriaqqinnissaanullu aamma tunngavileeqataalluinnartoq, naak massakkut takusinnaasakka malillugit amerlanerussuteqartut aalajangiiffigisassatut siunnersuutaammat, amerlanerussuteqarluartut Inatsisartuni Naalakkersuisut akissuteqaataat isumaqatigalugu nalunaarutigigaluaraat.
Tassalu imatut paasisariaqarpoq, Kuupik Kleist-ip siunnersuutaa itigartinneqarpoq Naalakkersuisut akissuteqaataat taanna isumaqataaffigineqarmat.
Isak Davidsen, ataatsimiinnermi aqutsisoq, sinniisussaq siulleq, Atassut.
Tulliinnguppoq Aqqaluk Lynge, Inuit Ataqatigiit, naatsumik.
Aqqaluk Lynge, Inuit Ataqatigiit.
Ja, oqaatigissavara tassa taanna aalajangiusimajuaratsigu Inuit Ataqatigiinninngaanniit pisinnaatitaaffimmik erseqqissaanissaq, taavalu illuatungaani allaffissornikkut, Namminersornerusut Naalagaaffiullu Oqartussaaffiini immikkoortiterineq, taanna pisussaaffimmut oqaluuserineqartumi uani immikkoorluinnaqqissaarpoq. Aatsaannguaq oqaluttup Naalakkersuisunut Ilaasortap nammineq saaffiginninneratigut 6. januar 2003-imi Danmarkimi Økonomi aamma Erhversministeri allaffigisimavaa, imaluunniit saaffigisimavaa tassani isumaqatigiinniarumallugu Aatsitassap pillugu inatsisip nunatsinnut, nunatsinninngaanniit isumaqatigiinniutigineqarnissaa. Taanna qanoq toqqammaveqarnersoq ilisimanngilarput, taamanikkut aamma naalakkersuisooqataagaluarluta qanorpiaq, suna tunuliaqutaralugu taamaaliortoqarsimanersoq aamma ilisimanatigu, taamaattumik neriuutigissavarput Naalakkersuisut erseqqissaassuteqarumaartut Inatsisartunillu aamma tunulequtaqartumik isumaqatigiinniarsinnaajumaartut apeqqummut tassunga tunngasumut.
Taamaattumik uani suleriaatsimi killormut mumittullusooq ingerlasimasumi piumasarissavarput siullermik taanna apeqqut Inatsisartuni aamma saqqummiunneqarumaartoq, qanoq 2003-imi 7. januar Bent Bendtsen-imut nunatsinnut taamanikkut Naalakkersuisut tassunga oqartussaasoq oqaaseqarsimanersoq, aammalu suna isumaqatigiinniutiginiarlugu aalajangiusimaneqarniarnersoq.
Suu ajuusaarnaraluaqaaq paaseqatigiittoqarsinnaannginnami maani inimi, pissutsit taamaapput Inuit Ataqatigiit uagut tungitsinninngaanniit ajuusaarnartuutipparput Inuit Ataqatigiinniit saqqummiunneqartut tunngaviusumik oqallisaasussat politikkikkut isummerfigineqaratik taamaattoq killormut isummertinniartarnerat, uagut aamma suleqataarusuppugut, soorunami aamma Naalakkersuisut isumaqataaffigigaangatsigit aamma isumaqataaffigalugit aamma suleqatigissavagut, kisianni tamatigut imaaliallaannaq allamut sangutinneqartarneri soorunami akuerisinnaanngilarput.
Isak Davidsen, ataatsimiinnermi aqutsisoq, sinniisussaq siulleq, Atassut.
Tulliinnguuppoq Anthon Frederiksen, Kattusseqatigiit, 2 minutsit.
Anthon Frederiksen, Kattusseqatigiit.
Tassa uani oqallinnermi qanoq oqaatigisariaqarnerpat qunusaarutit assigiinngitsut aningaasat millionit ? milliardit taagorneqartut, aammalu akisussaaffiit anguneqarnissaani ilaatigut Demokraatininngaanniit erserpalaartumik saqqummiussinerit. Tupiginngilara uanga Demokraatit taamatut qunusutut akisussaaffiup taamatut tiguneqarnissaanut saqqummiussinerat.
Aamma namminersorneq pillugu inatsit alakkaamasimagaanni takuneqarsinnaavoq suulluunnit oqartussaaffiit, pisussaaffiillu Kalaallit Nunaannut nuunneqarneranut atatillugu danskit oqartussaasui isumaqatigiinninniarneqassasut, aningaasartuutit assigiinngitsut eqqarsaatigalugit, taamaatumik qunusaarineq tassaniittoq isumaqarpunga tunngavissaqanngitsoq.
Aap Siumut oqaluttuata iluamik oqaatigivaa, soorunami aamma uanga nassuerutigisariakakkannik tassa ukiut arfineq-pingasut Inatsisartuni Ilaasortaaninni apeqqut taanna nammineerlunga qaqissimannginnakkut, taanna miserratigissanngilara. Kisianni nalunngisakka naapertorlugit ukiut 25-it sinnerlugit Siumup aamma Inatsisartuniikkami aamma taana apeqqut nunamik piginnittussaatitaanermut tunngasoq aamma qaqissimanngilaa ? taamak oqartariaqarpoq. Qaqitsisartut tassaapput Inuit Ataqatigiit, apeqqummi tassani, kialluunniit inuiaqatigiinni malinnaasup taanna nalunngilluinnarpaa.
Taamatut akisussaaffimmik aammalu nunamik piginnittussaanermik tiguserusunnermik ilungersuuteqartut, isumaqarpunga sikukkut qajannartumik pisuttutut nalilerneqarnerat kusananngilluinnartoq ? pissusissamisuunngilaq. Sikumi qajannaatsumi pisuppugut aamma nunarput isumannanngilluinnartoq toqqissisimaffigisariaqagarput pisuffigivarput, taamaattumik akisussaaffimmik tigusiniarnermi ersineq, qunusaarineq, sikukkut qajannartukkut pisunnermik tunngassuteqanngilluinnarpoq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tullinnguupoq Kuupik Kleist, Inuit Ataqatigiit aamma 2 minutsit.
Kuupik Kleist, Inuit Ataqatigiit.
Tassa piginnaatitaaffiit pisussaaffiillu tasioqatigiinnerannut oqaseqarneq, isumaqarpunga Per Berthelsen taamatut oqartoq taanna isumaqatigilluinnarparput. Taakkualu qilanaareqaagut tamakkiisumik atulissallugit, imaanngilaq pisussaaffeqalissanata taama oqartugut, naamik akisussaaffik tigunianngilarput. Qilanaareqaagut pisussaaffiit piginnaatitaaffiillu ataatsikkoortissallugit, isumaqarpugut tassa ilivitsumik ingerlatsineq aammalu inuup ilivitsup, inummut ilivitsumut atugassarititaasut.
Taava Namminersorneq pillugu Isumalioqatitarsuarmut tunngatillugu aamma soorunami taakkua nalunaarutissat Inatsisartunut qilanaareqaarput aamma oqallisigissallugu, naluara qanorpiaq nunamut piginnittussaanermut pillugu inassuteqarumaarnersut, aamma naluara isumaqatigiumaarnerlugu Ataatsimiititaliarsuup inassuteqaatigiumaagai Inatsisartunut. Taamaattumik uanga isumaga Inuit Ataqatigiit isumaat maani saqqummiuppara, taanna inerteqqutaanavianngilaq, oqaluuserissaqqaarparput Namminersorneq pillugu Isumalioqatigiissitat nalunaarusiassaa. Allarpassuarnik imalik aammalu naatsorsuutigaara ukiut arlallit ingerlaneranni piviusunngortinniarlugu suliaasussaq nunamut piginnittussaaneq ilagissagunnarsivaat kisianni takussavarput, taamanikkut taakkua qanoq siunnersuuteqarumaneersut.
Taavalu Namminersornerulersimanitta ukiuni 25-inngulerneranni pissusissamisuussaaq aamma eqqaassallugu Namminersorneruneq eqqunniarneqalermat nunatsinni, tassa akigineqarpoq nunamut piginnittussaaneq. Taamanikkut nunarput sinnerlugu isumaqatigiinniartut immaqa oqartariaqarpugut allatut ajortumik naggataatigut Namminersornerulerumallutik nunamut piginnittussaaneq sapangittariaqarsimavaat, qallunaat kalaallillu sakkortuumik aporaapput taamanikkut, taannaana taamanikkut sapangitarput utertinniarlugu aamma taamatut siunnersuuteqartugut.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tulliinnguppoq Naalakkersuisut Siulittaasuat.
Hans Enoksen, Naalakkersuisut Siulittaasuat, Siumut.
Qujanaq. Uani Inuit Ataqatigiinninngaannit saniatigut oqaluttut, tassalu Josef Tuusi Motzfeldt-ip oqariartuutaa tassa, oqariartormat uanga nunamik piginnittussaaneq tuniniariga ? taamaattoqanngilluinnaqqissaarpoq aamma taamatut oqanngilanga. Uani pissutsit piviusut oqaatigiinnarpakka misissuinermi aningaasat ukiumut 50 mio.kr.-it miss. atorneqartartut Qallunaat Naalagaaffiata akilertagai, oqanngilanga nunarput tunissagipput aamma tuninngisaannassavarput, aammalu uani 1,2 milliardikkunni allanillu ersisaarillunga oqalunnera, taamatut nipilerlugu oqaatigineqarnera nuannarinngilluinnaqissaarpara, tassa ersisaarutaanngillat pissutsit piviusut tassani oqaatigineqarput aamma paasineqartariaqarput. Taakkua aningaasat nammineq akilersimasuugutsigit taava sumummitaava killilluta massakkut misissuinerit ingerlanneqarsimassagaluarpat.
Aamma Savalimmiut uani assersuunneqaqattaarnerat isumaqarpunga tunngavissaanngitsoq. Tassa Savalimmiut Nuup kangerluaniissinnaapput, taamatut annikitsigivoq nuna, uagulli nunarput allarluinnaavoq aammalu misissugassarpassuit aatsitassarsiornermut, uuliasiornermut allanullu tunngasut annertoorujussuupput, taamaammat uani isumaqarpunga Qallunaat Nalagaaffia peqatigalugu taamatut misissuisimanerit aamma nuannaarutigineqartariaqartut.
Uanilu aningaasat eqqartorneqarmata ippassaaninnguaq oqariartuutigineqarpoq aamma oqaluttut ilaaninngaanniit, inissialiornermi 50 mio.kr.-init massakkut atorunnaartussaammata taakkua sumik taarserniarnerigut. Uani apeqqutigissavara taakkununnga 50 mio.kr.-init massakkut suminngaanniit akilerniarneraat, tassa akilerniarneri oqitsuinnaagunanngimmata massakkut inuiaqatigiit aningaasaqarnerat eqqarsaatigalugu.
Taamaammat tuniniaasumik oqalunnerat akuerisinnaanngilluinnaqqissaarpara, sapinngisarput tamaat uagut suleqataaffiginiarparput aamma Naalakkersuisut siulitta suliarisimasaat. Uanilu aamma Aqqaluk Lynge-ip ilaatigut oqariartuutigai taamanikkut Inuutissarsiornikkut Naalakkersuisup Danmarkimi ministerimut allagai Bent Bendtsen-imut taakkua tassaammata, Inatsisartut oqallittarnerisa piumasaat aallaavigalugit, tassa Naalakkersuisut Siulittaasorisimasaat Jonathan Motzfeldt aamma allagaqarpoq. Taava aamma Mikael Petersen-i aamma massakkut Finn Karlsen-i aamma taamatut. Tassa Inatsisartut piumasaqarnerat malillugu sulivugut, tassa allaanerusumik iliuuseqarsinnaanngilagut Naalakkersuisunut Inatsisartut saneqqutiinnarlugit, taava neriuppunga aamma ataqqineqarlunilu pissuseq attatiinnarneqarumaartoq, minnerpaarpaamilluunniit siunertarineqanngimmat Naalakkersuisuni Inatsisartut saneqqullugit sulinissaq.
Qujanaq.
Isak Davidsen, ataatsimiinnermi aqutsisoq, sinniisussaq siulleq, Atassut.
Tassa oqallisigisap naammassisariaqalermat, taamaattumik Josef Motzfeldt Inuit Ataqatigiit immaqa naggataarutigissavarput.
Josef Motzfeldt, Inuit Ataqatigiit.
Oqaluuserisat ilungersunaraluartulluunniit ilaannikkut qungujunnarsinnaasunnguanik oqartarneq inerteqqutaalluinnartariaqanngitsoq uanga isumaqarfigaara. Soorunami Naalakkersuisup Siulittaasuata nunarput tuniniaraannik isumaqanngisaannarpunga, taamaallaat una oqarnera tigusimassagaluarutsigu nunamut piginnittussaaneq, taava 50 mio.kr.-inininngooq ukiumut naleqarsimassagaluarpoq uagutsinnut, taannaana oqaatiginiariga.
Apeqqutaavoq nunamut piginnittussaanermik oqartussaarusunneq aammalu nuna assiliorneq, taakkua imminnut qanoq attuumatiginersut aammalu Naalagaaffiup nunattalu isumaqatigiissutigisimasaat xxxxx pillugu Namminersorneruleq pillugu Isumalioqatiigiissitarsuarmi, tassa arlaannataluunniit iluanaarutiginagulu aningaasartuutiginerussanngikkaa oqartussaaffinnik tunniussineq eqqarsaatigalugu, taanna sooq atorneqarsinnaassannginnersoq suli uppernarsineqanngilaq. Kiisalu nunamut piginnittussaanermut apeqqut, apeqqummi nunap qanoq angitiginera apeqqutaanngilaq. Savalimmiut Nuup kangerluaniissinnaanersoq apeqqummut uani apeqqutaanngilaq, tunngaviusumik inuiaat nunaminnik piginnittuunerannik isummerusunnerat nunap nammineq inuisa oqartussaalerusunnerannik aallaaveqarpoq angissuseq tamatumani apeqqutaanngilaq.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Tulliulluni
oqaaseqassaaq Ellen Christoffersen, Atassut.
Ellen
Christoffersen, Atassut.
Ja imatut
qassiiliortitsinianngitsukassaagaluarpunga, kisianni aamma tassa soorunami
pissutsit maannakkut oqallisigisagut aamma annertuumik Folketingimi ilaasortaasimaninni
malinnaaffigilluarnikuugakkit oqaaseqarfiginngitsoornanngillat.
Tassa soorunami
ilaatigut oqartoqartarpoq ersisaarisoqartorooq, naamik taamaattoqanngilaq
erseqqissaaniaannartoqartoruna, suut ernumassutaasinnaaneranik aamma
taakkartuerusulluta taamaattumik oqallinnermik taamaattumik peqataavugut.
Aamma taamatut
Ataatsimiititaliarsuarni suliat ingerlareersut taamatut ikerinnakkut
qaqittajoqqqajoorlugu pisassagutta suliniutigerusutarput tamatta, tassa
aningaasartuutinik annikillisaaniarneq taava qanoq isilluta
anguniarsarissagatsigu marloqiusamik sulinerit ingerlajuassappata, taanna
akisussaassusilimmik politikkeqarnerunngilaq. Ilumut akisussaaffimmik
tigusinermi aamma isumaqatigiinniussutigissagaanni aningaasanik
malitseqartinneqarnissaa, tamakkua eqqarsaataassappata ilumut taava
akisussaaffimmik tigusinerusinerluni, tamakkua aamma apeqqutit soorunami
naassaanngitsumik oqallisigisaqattajoorlugit allaat pisinnaavugut.
Taava aamma
ilaatigut oqaatigineqarpoq siunnersuutigeqartunngooq tassa Folketingimut
ilaasortaasup Inatsisartunut Ilaasortaasup Kuupik Kleist-ip siunnersuutaa
tunngavilersorluagaasoq. Isumaqarpunga ? uanga apeqquserusuppara taanna ilumut
tunngavilersorluagaanersoq, uani titarnerit amerlanngitsut atorlugit
siunnersuut saqqummiunneqarpoq bilagitullu ilanngussuunneqarlutik Folketingimi
oqallinnerup imaa, aviisinilu aamma allaaserineqarsimanera, tassa
tunngavilersuutissat.
Taava siunissami
Inatsisartuni siunnersuuteqarnialeraangatta sumi tamaani
oqallisigineqarsimanera aallaavigalugu, taava tamakkua
tunngavilersuutigissavagut? Erseqqinnerusumik
tunngavilersuuteqarnerusariaqarsimagaluarpoq siunnersuuteqartoq. Uani
erseqqissumik tunngavilersuinngilaq, oqallinnermi Folketingimi oqallinnermi
assilineri qallunaatuut taakku kisiisa tunngavilersuutitut ilanngussimavai.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Tulliuppoq
Naalakkersuisut Siulittaasuat.
Hans Enoksen, Naalakkersuisut Siulittaasuat, Siumut.
Qujanaq, tassa assortuussuteqanngilagut kisianni suleriaqqinnissaq ingerlaqqinnissaanut tunngavissaq taanna pingaartorujussuuvoq isumaqatigiissutiginissaa. Uanilu Savalimmiunut tunngatilugu oqaatigissavara ilisimatinneqarama nunamik piginnittussaaneq Savalimmiormiunut tunniunneqarsimanngitsoq, akerlianilli atuisinnaaneq piiaasinnaanerlu, taavalu soorlu piiaaneq, uuliasiorneq ingerlanneqalerpat aamma atuisinnaatitaanermut tunngasut isumaqatigiinniutigineqaqqittussaasut, taamaammat uani uagut ataatsimoorluta siunnerfeqarnissarput pingaartorujussuuvoq Savalimmiut assersuutigisaqattaaginnarnagit, uagullu nammineerluta isummersulaariarluta inuiaat allat aallaavigivallaarnagit, kisianni nammineq, nunap ilusia aammalu innuttaasut piumasaat aallaavigalugit.
Uagut taanna peqataaffigissavarput Naalakkersuisuni aamma qularinngilara partiit peqataarusuttut aammalu uanga tuniniaasunut peqataanngilluinnarnissara matumuuna oqaatigissavara.
Qujanaq.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Aqqaluk Lynge, Inuit Ataqatigiit, naatsumik.
Aqqaluk Lynge, Inuit Ataqatigiit.
Isumaqarpunga Ellen Christoffersen-ip Inuit Ataqatigiit siunnersuutaannut uparuaataa tunngavissaqanngitsoq, tassaana uagut uparuaasugut Naalakkersuisut Siulittaasuannik akineqaqqusimagaluarluta, pisortatigoortumik tassani suliat immata. Inuutissarsiutinut Naalakkersuisup tassani ataaniinngimmata, taamaatumik apeqqutit taakkua ukua pisagut, tassaavoq inuit pisinnaatitaaffeqarnerannut tunngaviusumik tunngassuteqartut taakkua Naalakkersuisut Siulittaasuata suliassarivaa. Taamaattumik sukumiisumik tullianik taamaattunik apeqqutinik saqqummiussisoqarpat Naalakkersuisut Siulittaasuata aamma suliaqarnissaa piumasaqaatigaarput. Inatsisartuni ataasiakkaat allaffissuarnik ikiorserneqanngitsut avoqqaarlerfigineqarsinnaanngillat taamaattunik saqqummiussaqarnerannik, allanik assersuutissanik ulikkaarpoq maani piareersarsimanngitsunik saqqummiussanik, taamaattumik una saqqummiussaq isumaqarpunga sukumiisumik annertunermik tunngaviusumillu oqalliffiusussaagaluartoq taamaalilluni maangaannartoq, ajuusaarnaraluaqaaq.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Oqallinneq ingerlaqqitsinnagu oqaatigissavara Inatsisartut suleriaasiat naapertorlugu oqallinnermik, maannakut oqallisigitaq ittumik akuerisimavarput inimi maani ilaasortaq pingasoriarluni tassa oqaaseqarpat, tassa oqaaseqarteqqinneqassanngitsoq maannakkut ilai sisamariarlutik oqaaseqarput, tassa naammattoorpagut taamaattumik maannakkuminngaanniit pingasoriarlutik oqaaseqartut tassa oqaaseqaqqissinnaannginnerat tassunga killilissaaq.
Tulliuppoq Johan Lund Olsen.
Johan Lund Olsen, Inuit Ataqatigiit.
Ja qujanaq. Tassaana oqallinneq manna soqutiginarpallaaleqimmat naak pilersaarutaanngikkaluartoq aamma oqaaseqalaarnissannut qinnuteqartunga.
Isumaqarpunga siunnersuuteqartup siunnersuutigisaa atuarluaraanni aammalu tusarnaarluarsimagaanni paatsuugassaanngilluinnartuusoq, tassami siunnersuutaa taanna siunnersuuteqartup oqaaseqarnermini aamma oqaaseqaqqaarnermini oqaatigivaa immaqaana nutserneqarnerani allatut paasineqarsinnaasunngorlugu qallunaatuungortinneqarsimasoq. Kisianni kalaallisuua, tassami pingaartittarparput kalaallisut oqaatsigut atorlugit suliarisartakkagut taakkua maani nunatsinni salliutittassagigut inatsisiliornermi, allatigullu maani nalinginnaasumik inuiaqatigiinni inooqataanitsinni.
Siunnersuuteqartup siunnersuutini Inatsisartut Siulittaasoqarfianut tunniukkamiuk imatut oqaasertaqartippaa:
?Matumuuna siunnersuutigaara Inatsisartut tulliani ataatsimiinnerminni nunamik piginnittuunerup tamakkiisumik oqartussaaffigineqalernissaanik anguniagaqarluni, nunatsinni Naalakkersuisut Danmarkimi Naalakkersuisunut isumaqatigiinnialernissaanik Inatsisartut aalajangersaassasut?.
Taava oqaaseqatigiit tullinnguuttut, taakkua tusarnaarlualaassavagut, imatut allappoq siunnersuuteqartoq:
?Nunamut pisuussutinullu tamakkiisumik oqartussaalernikkut, aatsitassarsiornikkut, allatigullu nunatta aningaasarsiornikkut imminut annerusumik pilersulernissaanut periarfissat annertusarneqassapput?.
Tassa tunngavilersuutaa, taanna immikkoortitaassavarput oqaaseqatigiit uani pineqartut, nunamut taavalu pisuussutinut, taakkua immikkoorput aamma. Pisuussutit uani eqqartorneqartut tassa qaarsup ataaniittut, kisianni nunamut pisuussutit allat eqqartorneqartut aamma taakkua isumaqarpunga aamma isumaliutigillualaassagivut, tassami siunnersuuteqartup taanna pivaa aamma. Maannakkut nalunngilarput kikkulluunniit illuutillit, nalunngilluinnarpaat illup toqqavigisaa qaquguluunniit pigilersinnaanagu, taamaallaat atorsinnaavarput Danmarkip Naalagaaffiata tamakkiisumik taanna oqartussaaffigivaa, husret-eqaannarpugut. Tassa pigilersinnaanngilarput qanorluunniit ilungersortigigaluaruttaluunniit.
Tassa taannaana siunnersuuteqartup aamma ilanngullugu unatsisartunut nalilersorneqarnissaa taanna aamma kissaatigigaluaraa.
Kisianni tassa ajuusaarnartumik aamma oqaaseqartutta oqaaseqarfigeriigaattut ajuusaarnartumik naalakkersuisut akissuteqarnerminni pisuussutit, tassa qaarsup ataaniittut taakkua kisimik eqqarsaatigalugit siunnersuuteqartumut akissuteqarput.
Taanna uggornarpoq.
Taamaammat tassa kissaatiginaraluaqaaq una suliaq ingerlaqqittussaassaammat, aammalu aappassaaneerneqartussaagami aalajangiiffigisassatummi siunnersuutaavoq. Taamaammat kissaatiginaraluaqaaq ukiamut aatsaat taanna aappassaaneerneqarsinnaasuuppat.
Tassami ukiap tungaanut taava qaarsup ataaniittuinnaat kisimik eqqartornatigit, taava aamma allat ilanngullugit aamma nalilersuiffigissagaluaratsigit.
Taavalu aamma una erseqqissaassutigilaarusuppara, Savalimmiut eqqartorneqarmata arlaleriarluni aamma Naalakkersuisut Siulittaasuata tungaaninngaannik.
Savalimmiormiut namminersornerulersimanerat pillugu inatsisaat taavalu uagut inatsiserput, namminersornerulernerput pillugu inatsit, taakkua aamma assigiinngitsuteqarmata. Apeqqummut tassanerpiaq tassa aatsitassanut, tassa aatsitassanik imaluunniit pisuussutinik atuisinnaanermut tunngasortaani.
Savalimmiuni inatsimmi pisuussutinik uumaatsunik atuisinnaatitaaneq, taanna namminersornerulerneq pillugu inatsisaanni, qanoq-una ilanngussami ilaatinneqarpoq bilagimi. Savalimmiormiut tigusinnaasaattut.
Uagulli namminersornerulerput pillugu inatsisitsinni bilagimi ilaatinneqanngilluinnarpoq.
Tassa taanna ajorsassutigigatsigu 1978-imi taamani namminersornerulernerput pillugu inatsit folketingimi suliarineqartussanngormat. Taamaammat maannakkut oqartussaaffik tamaat aamma tassa oqartariaqarpugut Danmarkip suli tigummivaa.
Taamaattumik-una tassa siunnersuuteqartoq taanna tapersersussallugu, tamatta taanna katersuuffigisariaqaraluaripput assortuuteruusaaginnarata.
Taava aamma una ilanngullugu oqaatigilaassavara, aatsitassat pillugit inatsit maannamut atuuttoq, taanna ila eqqumiilluinnartumik imaluunniit eqqumiilluinnaqqissaartumik tassa inatsisaavoq avatangiisit pillugit nammineq inatsisiliarisatsinnut, qaffasinnerusumik inissisimalluni.
Ila
eqqumiissusia ilaa?
Aatsitassarsiornikkut
avataangiiserput mingutsinneqaratarsinnaavoq, taanna nalunngilarput aamma
mingutsitsisoqartareerpoq. Kisianni aatsitassat pillugit inatsit, inatsisaavoq
avatangiisinut inatsiserput qulangersimallugu. Taamaammat Danmarkimi folketingi
imaluunniit fællesråde taanna aatsitassat pillugit siunnersuisoqatigiit,
taakkua qulliunerupput. Aamma avatangiisinut apeqqutinut tunngatillugu
aatsitassarsiortoqaraangat.
Taanna
aamma eqqumiilluinnaqqissaartuuvoq. Taamaammat pisariaqarluinnarpoq una
aalajangiiffigisassatut siunnersuutigineqartoq sukumiilluinnartumik
suliarineqarnissaa. Taamaammat tassa uteqqiinnassavara, kissaatiginarmat
ukiamut aatsaat aappassaaneerneqarsinnaappat. Oqaatigeriikkattuut qaarsup
ataani pisuussutit uumaatsut taakkua piinnarnagit, kisianni aamma nunap
qaaniittut pisuussutit pisuussutigisagut, nunarput aamma ilanngullugu taanna
aamma nalilersuiffigineqarsinnaaniassammat.
Jonathan
Motzfeldt,
ataatsimiinnermi aqutsisoq, Inatsisartut Sulittaasuat, Siumut.
Oqallinnermi
malittarisassagut §48-miittut malillugit, sisamariarluni oqaaseqarsinnaaneq,
immikkut akuerineqarsinnaavoq. Taamaattumik aatsaannguaq akersereerama aamma
sisamariartumik, maannakkut aamma alla sisamariartussaq naggataamik
oqaaseqartissavara.
Tassa Jensigne Berthelsen.
Jensigne Berthelsen, Atassut.
Uteqattaarinianngikkaluarlunga kisianni periarfissamut qujallunga, Inuit Ataqatigiikkunnut 1979-imi nunamut piginnittussaanermut tunngassuteqartut isumaqatigiissutigineqarsimaneri, taamatut isikkoqarnera uteqattaarfigimmassuk, qujanartumik eqqaasitsissutigissavara qujanartumik danskit naalakkersuisui aatsaat taama ammatigisumik nunatsinnut pissuseqarlutik, suleqatiserinnillutillu naalakkersuisunut pissusulersornerat akortariaqarparput.
Uagut inatsisartuni maani naalakkersuisugut tapersersorlutigit angusarissaarnissaannik nunatsinnut inuinullu, ukiorpassuarnut siumut isigisumik aaqqiissutaasinnaasuni ujartuineranni ikiutaasariaqarpugut assortuunniarsarinata.
Qaarsup ataaniittuinnaat pinnagit aammali siunissaq qulakkeerlugu, taamaalilluta aatsaat isumannaarinnissinnaavugut ataqatigiissaarinikkut maani inatsisartuni, folketingimi aammalu naalakkersuisut sulineranni. Allatigut aqqutissat periarfissaanngillat.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Inuussutissarsirnermut, Aatsitassassiornermullu Naalakkersuisoq.
Finn Karlsen, Inuussutissarsirnermut, Aatsitassassiornermullu Naalakkersuisoq, Atassut.
Qujanaq.
Naatsuarakasimmik una uteqattaarneqaannarmat paatsoorneqarsimasut kalaallisut saqqummiussaq, qallunaatut nutserneqarluni.
Uagut naalakkersuisuni paatsuunngilarput taanna.
Taamaattumik aamma naalakkersuisunut oqarpugut, nunamik piginnittussaanitta naalakkersuisut uani oqaatigivarput, naalernerani naalakkersuisut isumaqarput nunatsinni piginnittussaaneq pillugu apeqqut suliassat annertuut pingaaritillillu, namminersorneq pillugu isumalioqatigiissitami taakku suliarineqartussaapput.
Taamaattumik paatsornermik oqartaqattaarneq tunngavissaqanngilaq. Aamma erseqqissumik aallaqqaataani oqaatigivarput naalakkersuisut sulissutiginiaraat, inuiaat kalaallit nunatsinnik piginnittussaanerat akuerineqarnissaa taanna pissagipput.
Kisianni oqarpugut tassa taanna aatsaat suliariniarparput namminersorneq pillugu isumalioqatigiit saqqummeereerpat. Taamaattumik qallunaatuua tunngavigalugu taamatut akisoqanngilaq.
Tassa annerusumik oqallisiginianngilarput maannakkut naalakkersuisunut taanna akissuteqarnitsinni. Kisianni aamma aatsitassaq pillugu tassani oqaaseqarmat taamaattumik tassunga tunngasut annertunerusumik oqaaseqarfigivarput.
Taamaammat qallunaatoortaanut paatsoorsimanertut oqaatigineqaqattaarnerput ilumoortumik oqaatigineqarsinnaanngilaq.
Uani tassa oqaatigineqareeraluartoq aamma Savalimmiunut tunngatillugu, Savalimmiunut assersuutigineqaqattaarnerput aamma uanga aamma isumaqatigisinnaanngilara. Savalimmiut ilumoorpoq apeqqutaavoq qanoq isumaqatigiinniutissaqartigisimassanersoq Savalimmiut, uagutsinnut sanilliullutik.
Uagut annertoorujussuarnik isumaqatigiinniutissaqarpugut, suut tamaasa qulaaqqaarsinnaasariaqarparput nunarput annertoorujorujussuuvoq. Taamaattumik Savalimmiormiunut isumaqatigiinniarnissamut, Savalimmiormiunut assersuutigineqaqattaarniarnerput uanga atorsinnaanngitsutut isigaara.
Uagut nunarput allarluinnaavoq aamma pinngitsoornata qulaagassagut Savalimmiut qulaagassaanut sanilliullugit annertunerujorujussuupput. Taamaammaat Savalimmiunut assersuutigineqaqattaarnerput uanga akuerisinnaanngilara.
Aamma oqaluttut ilaannit siullermik, ukiut 25-t utaqqeqqissanersugut. Uanga taanna naatsorsuutiginngilarput. Naalakkersuisuni isumaqatigeereerpugut aamma inatsisartut amerlanerussuteqarluartut tamarmiullutilluunniit isumaqatigaat taanna nunamik piginnittussaanitta tigunissaa.
Taamaattumik assortuussutissaqanngilagut aamma naatsorsuutiginngilarput naalakkersuisuninngaanniit ukiut 25-t utaqqeqqissasugut.
Taamaammat tamakkua qanoq oqaatigisariaqarnerput, ilaatigut ersisaarisunik oqalupput. Ersisaarutaanngillat piviusunik-una tunngaveqarluta oqaluttut maani. Ilaa aningaasartai aamma kinguneqartussaammata ersisaarutigineqanngillat taakku, erseqqissumik-uku nassuiaatigineqartut pinngitsoornani aningaasanik kinguneqartussaammat.
Taamaattumik ersisaarutitut taagorneqarnera aamma akueriuminaatsorujussuupput.
Jonathan Motzfeldt, ataatsimiinnermi aqutsisoq, Inatsisartut Sulittaasuat, Siumut.
Taamaalilluni oqaluuserisassaq taanna naammassivoq.
Taavalu tassa naalakkersuisut nalunaarutigereersimasaat, danskit naalakkersuisuinut saaffiginnissuteqartoqareersimavoq. Oqaloqatigiissutiginiarlugu inatsisiliorsinnaaneq tamakkiisumik aatsitassat tungaatigut nunatsinnut eqqunneqarsinnaanera oqaloqatiginnissutigiumallugu.
Aammalu oqaaseqartuni tamanit aammalu Inuit Ataqatigiit oqaasii kingulliit najoqqutaralugit, ukiamut apeqqutip taassumap tamakkiisumik uterfigineqarnissaa naatsorsuutigisariaqarpoq.
Tassa nammineerluta ingerlanissatsinnut oqallinnissamut atatillugu apeqqut taanna tikinneqanngitsoornavianngimmat.
Taamaalilluni oqaluuserisassa taanna naammassivoq.