Oqaluuserisassani immikkoortoq 62 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ulloq
ataatsimiiffiusut aqqarnat, sisamanngorneq 20. marts 2003 nal. 14:27.
Otto
Jeremiassen, apeqquteqartoq,
Atassut.
Soorlu
malugisimassagipput ukioq kingulleq tunitsivarnikkut aalisakkanut assut
ajornartorsiorfiusimavoq. Umiatsiaararsortut aammalu angallatit mikinerusut
eqqarsaatigalugit isumaqarpungalu tamanna qaangerniarlugu
iliuuseqarniartoqartariaqartoq.
Tassami nalunngilarput
nunatsinni aningaasat killeqarneri pissutigalugit nutarterinermik annertuumik
iliuuseqarsinnaaneq killeqaraluartoq, tamaattorli isumaqarpunga nutarterineq
pinngikkaluarlungu qerititsiveqarnikkut annertusaasoqartariaqartoq tamaalilluni
tunisat annertunerusut tigoorarneqarsinnaalernerannut
periarfissaqalissagaluarmat, tamaalillunilu tunisineq aalisartunut
uneqattaarpallaanngitsumik aningaasarsiortussanullu iluaqutaangaartumik
iliuuseqarnerussagaluarluni.
Tassami
aalisartunut aningaasarsiorneq ajoraluartumik killilimmik ingerlanneqaraangat
ukiup naalernerani immikkut aningaasaliissutissanik qinnuteqarnerit pilersarput
(soorlu umiatsiaarar sortunut tarnaaliortartugut) taamaattumillu
qularutiginngilara tamanna sukumiisumik misissorlugu piaartumillu qanoq
iliuuseqarfigalugu aalisartunut aaqqinniarneqartuuppat aalisartunut
iluaqutaangaassagaluaqimmat aammalu nunami sulisunut, tassami ukiut siuliisa
takutittareerpaat umiarsualiisarneq ajunngikkaluarluni nunami sulisinnaaneq
ajoraluartumik eqqortaraa. Qujanaq.
Isak Davidsen, ataatsimiinnermi aqutsisoq, sinniisussaq siulleq,
Atassut.
Inuussutissarsiornermut
Naalakkersuisoq.
Finn Karlsen, Inuussutissarsiornermut Naalakkersuisoq,
Atassut.
Tunisineq
aalisartunut uneqattaarpallaanngitsumik ingerlanneqarsinnaalersinniarlugu
taamaasillunilu aningaasarsiortussanut iluaqutaasumik iliuuseqarnerulernissaq
anguniarlugu apeqquteqartoq isumaqarpoq nutarterineq pinngikkaluarlugu
qerititsiveqarnikkut annertusaasoqartariaqartoq.
Taamatuttaaq
apeqquteqartoq isumaqarpoq umiarsuarnik tunitsiviliisarneq siunissami
pinngitsoorniarneqartariaqartoq taamaaliortoqarneratigut nunami
suliffissaqartitsiniarneq eqqorneqartarmat.
Naalakkersuisut
arajutsisimanngilaat Nuka A/S-imut tunineqartartut ukiuni kingullerni
annertuumik amerleriarsimanerat soorlu 2002-mi tunisat 2001-imut sanilliullugit
45%-imik amerleriarsimasut.
Oqaatigissavara
aasaq mannaagallartoq tunisineq aalisartunut uneqattaarpallaanngitsumik
ingerlanneqarsinnaajumallugu Nuka A/S Namminersornerullutik Oqartussanut umiarsuarnik
tunitsiviliisinnaanissaminik qinnuteqarpoq.
Qinnuteqaat
suliffeqarfiit allat sinerissami umiarsuarnik tunitsiviliinissamik
qinnuteqaataat allat assigalugit suliarineqarlutillu ataqatigiissaarneqarput.
Qinnuteqaatit piffissami qanittumi isummerfigineqarissaat
naatsorsuutigineqarpoq.
Tamatuma
saniatigut Nuka A/S aalisakkeriviit ilaanik piorsaanissaminik
pilersaaruteqarpoq ilaa tigut MIFRESTA-mit aningaasaliissutit atorlugit
qerititsivinnik piorsaanermigut. Naalakkersuisuttaaq ilisimavaat tunisaasartut
amerliartornerisa kingunerisaanik Nuka A/S aalisakkeriviit ilaannik
piorsaanissaminik eqqarsaateqartoq.
Naalakkersuisulli
aningaasaliissutissatut pisariaqartinneqartut annertussusaat massakkuugallartoq
ilisimanngilaat.
Ilaatigut
tamatuma kingunerisaanik ingerlatseqatigiiffiup ataatsimeersuarnerani
Naalakkersuisut piumasaqarput ingerlatseqatigiiffik niuernikkut
aaqqissuussaanikkullu pilersaarutinik sapinngisamik piaarnerpaamik
suliaqaqqullugu taakkulu ingerlatseqatigiiffiup siunissami aaqqissuussaaneranut
aalajangernissamut tunngavissiap ilaatut Naalaakkersuisunut kingusinnerpaamik
junip naanerani ingerlatinneqassasut.
Tassanittaaq
Naalakkersuisut piumasaqarput ingerlatseqatigiiffik siunissami
mianersornerusumik aningaasaliissuteqartassasoq aamma aningaasaliissutaasartussat
ingerlatassanut imminut akilersinnaasunut ajornanngippat
aningaasaliissutigineqartassasut.
Naggasiullugu
Naalakkersuisut ilisimatitsissutigissavaat suleqatigiissitamik pisortaqarfinnit
assigiinngitsunit ilaasortaaffigineqartumik pilersitsisoqarmat, Nuka A/S-ip
tamakkiisumik ajornartorsiutaanik qulaajaasussamik ilaatigut
nalilersorneqassalluni Nuka A/S suliarisartagaasa ilaanakortumik
tamakkiisumilluuniit namminersortunngorsarneqarsinnaanerat.
Isak Davidsen, ataatsimiinnermi aqutsisoq, sinniisussaq siulleq,
Atassut.
Apeqquteqartoq
Otto Jeremiassen.
Otto
Jeremiassen,
apeqquteqartoq, Atassut.
Naalakkersuisut
akissuteqaataannut qujavunga. Akissuteqaateqarnerminilu tunisassiorfinnik
pitsanngorsaaniarnermik siunnerfigisimasai neriuppunga pimoorullugit
iliuuseqarfiginiarneqarumaartut. Tassami umiatsiaararsortut ukiuni makkunani
atugaat imaannaanngitsuummata.
Akissuteqaallu
tunngavigalugu suliaq malinnaaffigissallugu oqaatigissavara.
Isak Davidsen, ataatsimiinnermi aqutsisoq, sinniisussaq siulleq,
Atassut.
Taamaalilluni
Naalakkersuisunut apeqquteqaat normu 62. naammassivarput.