Oqaluuserisassani immikkoortoq 67 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq pingajuat, 13. marts 2003
Palle Christiansen,
apeqquteqartoq,
Demokraatit.
Naalakkersuisunut
apeqquteqaatiga imaappoq: Sisimiut Kangerlussuullu akornanni
aqquserniornissamut Naalakkersuisut pilersaaruteqarpat?
Isuma
nutaajunngilaq. Amerikamiut Sisimiut Kangerlussuullu akornanni akeqanngitsumik
aqquserniornissamik Kalaallit Nunaat/Qallunaallu Nunaat siusinnerusukkut
neqeroorfigisimavaat. Taamanikkut qujaannarpugut.
Isumassarsiarli
ajoriinnagassaanngitsuuvoq. Illoqarfiit taakku marluk aqqusinikkut
attavilerneri piffimmut arlalitsigut ? nunatsinnullu tamanut ?
iluaqutissartaqarpoq.
Periarfissat
pissanganartut assigiinngiiartullu akikinnerusut pilersinnerisa takornarissat
annertuumik amerleriartissavaat. Aqqusernup eqqaani takornarissanut
periarfissaasinnaasut nutaat kisissaanngillat. Matumani ilaatigut sunngiffimmi
illuaqqiat attartortittarneri, tammajuitsussarsiorluni piniarnerit,
pisaqarfiusinnaasutut qulakkiikkani akiliisitsilluni aalisartitsinerit aammalu
takornarissanik piffimmi angalaartitsisarnerit eqqarsaatigaakka.
Tamatuma
saniatigut nioqqutissanik asiujasunik Sisimiut aqqutigalugit nunatta sinneranut
ingerlatsisarnissamut aqqusineq periarfissatsialaavoq. Taakku Kangerlussuaq
aallaavigalugu sinerissamut umiarsuarmik assartuisarnermit sukkanerusumik
ingerlanneqarsinnaalerneri pisinnaalissaaq.
Iluatsillugulu
Europamut nioqqutissanik nutaanik assartuinermi Kangerlussuup tungaanut
aqquserniorneq iluaqutaasussaavoq. Tamanna iluatsissappat Sisimiuni
umiarsualivimminnik nutarterilluni naleqqussaanissaq pisariaqassaaq. Apeqqut
tamatumunnga tunngasoq takuuk.
Aammattaaq
piffik aqqusinniorfiusussaq aatsitassaqarluartuuvoq, ilaatigut tantalinik
angallattakkanik oqarasuaatiliornermi atorneqartartunik, tamakkulu
aqqusinniortoqarneratigut ajornannginnerusumik akikinnerusumillu
piiarneqarsinnaalissapput.
Aqqusinniornissamut
aningaasalersuinissaq Namminersornerullutik Oqartussat Sisimiullu
suleqatigiinnerisigut pisinnaavoq, ingerlaavartumillu ingerlatsinermut
aningaasartuutit atuisunit akilerneqartarsinnaapput, taamaalillutillu
Namminersornerullutik Oqartussat ukiut tamaasa aningaasatuuteqartarnerisigut
artukkiissanatik.
Mikael
Petersen, Attaveqaqatigiinnermut,
Avatangiisinut Ineqarnermullu Naalakkersuisoq, Siumut.
Naalakkersuisut
Sisimit Kangerlussuullu akornanni aqqusinniorsinnaaneq pillugu oqallinneq
soqutigalugu malinnaaffigisimavaat. Aqquineq taamaattoq arlalippassuartigut
suliaqarnerulersitsisinnaagunarpoq, Sisimiut kisiat eqqarsaatiginagu,
kisiannili aamma nunatta sinnera eqqarsaatigalugu.
Aqqusinniornermut
tunngasut kommunit suliassarimmatigit Naalakkersuisut Sisimiut Kommuniata
Sisimiut Kangerlussuullu akornanni aqqusinniortoqarneratigut aningasatigut,
attaveqaqatigiinnikkut pilersuinikkullu kingunerisaasussanik
misissuisitsineranit paasisat utaqqimaaqqaarumavaat. Tassunga atatillugu attaveqaqatigiinnermi
pilersuinermilu pissutsinut tunngatillugu paasissutissanik pissarsiniarneq
pillugu Sisimiut Kommunia oqaloqatigineqartarsimavoq.
Ilisimatitsissutigisinnaavara qaammatip matuma naalernerani Sisimiut Kommuniata
misissuinerup inernera saqqummiutissamaarmagu.
Naggasiullugu
periarfissaq manna atussavara erseqqissaatigalugu, siunissami
sanaartorneqartartussat piviusorsiortumik tunngaveqartarnissaat,
Naalakkersuisut pingaartilluinnarmassuk.
Taamaammat
Naalakkersuisut Kangerlussuup Sisimiullu akornanni aqqusinniornissamut
isummerniarnerat, aqqusinermik taamaattumik pilersitsinerup inuiaqatigiit
aningaasaqarnerata ineriartortinneqarneranut iluaqutaasinnaaneranik
sunnersimaneqarumaarpoq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Apeqquteqartoq
Palle Christiansen, Demokraatit.
Palle
Christiansen, apeqquteqartoq,
Demokraatit.
Nalunaarusiassaq
inereersimasussaagaluaq eqqarsaatigalugu 4. marts inereersimasussaasoq
ilisimavara. Immaqa qaammat naalerpat takkutissaaq, aamma taanna
utaqqilluaannassavarput.
Taavalu
aamma akissuteqaammi takusaqarpunga. Naggasiullugu periarfissami atussavara
erseqqissassallugu, oqarmat aammattaaq aningaasanut inatsisissamut tamakku
tunngatillugit eqqarsaatigineqarsinnaanerat.
Tassa
inuuiaqatigiinni qanoq ingerlasoqarnerani aningaasaqarnermut tunngatillugu
taanna apeqqut aamma eqqarsaatigineqartariaqassagami, tassa
suliassaqalernerulernissamut tunngatillugu.
Tassalu
aamma taakkua qilanaaralugit tamakkua utaqqiumaarpakka.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Tassalu immikkortoq 67 naammassivarput.