Oqaluuserisassani immikkoortoq 68 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq pingajuat, 13. marts 2003
Palle
Christiansen, apeqquteqartoq,
Demokraatit.
Naalakkersuisunut
apeqqutigisara imaappoq: Naalakkersuisut imerniartarfiit diskotekillu
ammasarnerinut aalajangersakkat, soorlu assersuutigalugu ullaakkut tallimat
tungaannut ammasinnaasunngorlugit, allanngortinnissaat pilersaarutigaat?
Tunngavilersuutigaakka
imerniartarfiit diskotekillu ammasarnerisa sivitsornissaata arlalinnik
iluaqutissataqarnera apeqquteqarninnut tunngavigaara.
Imerniartarfinniittut
nuannallutik ataasinnguartuullualeruttorlutik diskotekiniittullu
qittallualeruttorlutik unnuakkut pingasunut piffimmiit qimaguteqquneqaraangamik
ima nuannisatsimaartigigajuttarput inatsisikkut ammasarnermut maleruagassat
sukangasuut taakkununnga uumatsassutaaginnartarlutik.
?Festertulli?
ilaasa ?festernertik? suli naammassinngimmat angerlarsimaffiit arlaannut
nangikkiakaasarput. Nangikkiarnerit avatangiisinut annertuumik
akornusersuisarput.
Aammattaaq
isumaqarpunga unnuami persuttaasarnerit ilaatigut inuit amerlasuut ataatsikkut
ornitaminniit aniasarnerisa kinguneranik pisartoq.
Ammasarfiit
ullaakkut tallimanut sivitsornerisigut ileqqut qulaani taaneqartut
ajoraluartumillu nunatsinni atugaasut pinngitsoortinneqarsinnaapput.
Inermiartarfiit
diskotekillu ullaakkut tallimanut matusalernerisa nangikkiakaasarnerit
persuttaasarnerillu annikillingaatsiarneranik kinguneqarnissaa ilimanarpoq,
tassami tamakkunaniittut ataatsikkut anianatik pingasut tallimallu akornanni
aniarusaarnissaat ilimagineqarsinnaammat.
Qujanaq
Isak
Davidsen, ataatsimiinnermi
aqutsisoq, sinniisussaq siulleq, Atassut.
Ilaqutariinnut
Peqqissutimullu Naalakkersuisoq.
Ruth
Heilmann, Ilaqutariinnut
Peqqissutimullu Naalakkersuisoq, Siumut.
Piffissap ammasarfiup
sivitsorneqarnissaa siunertaralugu matuffissatut aalajangersakkap
allanngortinneqarnissaanik Naalakkersuisut pilersaaruteqanngillat.
Imerniartarfiit diskotekillu matuffissaat pillugit aalajangersakkat imigassanik
aalakoornartortalinnik nioqquteqartarneq sassaallertarnerlu pillugit
Inatsisartut inatsisaata nr. 11, 11. November 2000-meersup kapitaliisa
sisamaanni §13-imi aamma kapitaliisa arfernanni §21-mi aalajangersagaapput.
Piffissaq
matuffissatut aalajngersagaq ileqqorinnerulernissarput aallaavigalugu nunamilu
maani imigassamik atuinerup annikinnerulersinneqarnissaanik anguniagaqarnermut
pingaarutilittut ilaatillugu aalajangersagaavoq. Naalakkersuisut maannakkut
siusinnerusukkutulli anguniagaraat imigassamik atuinerup tamarmiusup
inooqatigiinnermut peqqissutsimullu tunngasut pissutigalugit
annikillisinneqarnissaa. Anguniagaq tamanna nunatsinni annertuumik
tapersersorneqarpoq.
Nunatsinni
imigassamik atuineq annikilliartuaarusaarsimavoq inummut ataatsimut 14-inik
ukioqalersimasumut ukiumut imigassaq 12,5 literiulerluni. Imigassamik atuinerup
inooqatigiinnermut peqqissutsimullu kingunerisartagai suli ingasappallaartutut
Naalakkesuisut isumaqarfigaat taamaattumillu ileqqorinnerulernissatsinnut
tunngasut qasukkaaviginissaat piumassuseqarfineqanngilaq.
Akerlianilli
imerpallaarnerujussuup tamatumalu inooqatigiinnermi kingunipilugissagaasa
siunertaqartumik pinaveersaartinneqarnissaasa suliniuteqarfigineqarnissaa suli
pisariaqartinneqarpoq.
Piffissap
imigassanik sassaalliiffiusinnaasup sivitsorneqarnera kukkunerussaaq.
Pisiniarfinni imigassanik nioqquteqarsinnaanerup 2000-mi
ammanerulersinneqarneratigut imigassamik atuinerup kingunerisai siullermik
Naalakkersuisut malittareqqaarusuppaat.
Piffissap
ammaffiup sivitsorneqarnerata arlalinnik pitsaaquteqarnissaa inatsisartunut
ilaasortap Palle Christiansenip apeqquteqarnerminut pissutiginerarpaa.
Pitsaaqutit tassaatinneqarlutik festernerminnik nangitsisartut
persuttaasarnerillu amerlassutsimikkut ikilinissaat. Piffissap ammaffissap
sivitsorneqarneratigut pitsaaqutit taaamaattut
uppernarsaatissaqartinneqanngillat.
Nunani
allani imerniartarfiit diskotekillu piffissap matuffissaasa ullaassakkut
tallimat tungaanut sivitsorneqarsimanera imerniartarfiit diskotekillu
matunerinut atatillugu persuttaasarnerit uivernerillu maanisulli annertuumik
suli ajornartorsiutaavoq.
Piffissap
ammasarfiup sivitsorneqarnerata imigassanik aalakoornartortalinnik
nioqquteqarnerup annertunerulernera, taamatullu inuit aalakoortut
amerlanerulernerat nassatarisussaavai. Tamannalu immini ajornartorsiutinik suli
annertunerusunik pilersitsereerpoq.
Kiisalu
festernerup angerlarsimaffinni nanginneqartarneranut atatillugu sanileriit
akaareqatigiinngissuteqarsinnaanerisa pinngitsoortinniarnissaanut piffissap
matuffissatut aalajangikkap atorneqarnissaa Naalakkersuisut
pitsaasuusorinngilaat. Taamatut pisoqarsinnaanera INI A/S-ip attartortitsineq
pillugu inatsisaasigut iliuuseqarfiusinnaareerpoq.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Apeqquteqartoq
Palle Christiansen, Demokraatit.
Palle
Christiansen, apeqquteqartoq,
Demokraatit.
Taassa
naatsunnguamik oqaaseqarfigilaassavara.
Akissuteqaatigineqartoq
siullermik aatsaat massakkut Ruth Heilmann-imit isumaqatigiinngissutigisarput
saqqummiunneqarpoq. Tassa Naalakkersuisut politikkeraat Isumaginninnikkut
Peqqinnissakkullu ajornartorsiutit annikillinissaat, taanna
isumaqatigiissutigineqarsinnaavoq.
Taavalu
Danmarkimut sanilliunneqarsinnaavoq, tassani killilersuivallaanngitsumik matusisarnissamik
inatsiseqartoq. Taavalu tassani Danmarkimi innuttaasut agguaqatigiissillugit
Kalaallit Nunaanninngarnit imernikinnerupput.
Taava
Naalakkersuisup sanilinut ajornartorsiutaasarnera oqaatigivaa, taava
iluaqutaanngilaq Ini A/S-imut attartuisarnissami inatsisissamut
innersuisaramik, tassani sisamanut ullaakkut ajornartorsiutaalersaramik.
Taava
aamma Naalakkersuisut oqaatigivaat nunani allani tallimat tungaanut
imerniartarfinnut diskotekinut aammasarneranut tunngatillugu taanna
uppernarsaatissaqartoq. Naak taanna uppernarsaat?
Taava
aamma Naalakkersuisut ilannguppaat ammasarfiit sivitsorneqassappata,
annertunerusumik imigassanik tuniniaaneq qaffanneqassasoq.
Taava
aamma kingornatigut nangikkiassagaanni, taanna ajornartorsiutaanngilaq tassani pissarsinissaq.
Kisiat tassa isumagineqaannarsinnaagaluarpoq inatsisit naapertorlugit
imerniartarfinni imerfiusartussani imerneqarnissaat isumagineqaannarsinnaavoq. Paarlattuani imerniartarfinni akilersillugit, imaluunniit taxa-ni
assigiinngitsuniluunniit pisiarisinnarlugit sanilit ajornartorsiortillugit.
Tassa taannaana ajornartorsiutaasoq!
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Ilaqutariinnut
Peqqissutsimullu Naalakkersuisoq.
Tassa
ilisimasitsissutigissavara apeqquteqaatit oqallissutigineqarsinnaanngimmata.
Ruth
Heilmann, Ilaqutariinnut
Peqqissutimullu Naalakkersuisoq, Siumut.
Tassa
Palle-p oqaaseqarnermini soorunami Danmarkimut assersuunneqarsinnaanngilagut,
kisianni nalunngilarput ukiuni qanittuni kingullerni annertuumik
uparuartorneqarpugut nunatsinni imigassartornerujussuaq pillugu.
Taavalu
aamma imerniartarfiit ammasarneri aamma sivitsuvallanneqarnikuupput, aammalu
imigassaq akitsornaveersaarlugu immaqa akikillilaarneqarnikuulluni.
Taamaalilluni taamatut iliuuseqartoqaraluartoq imigassap atugaanera
annikilliartorsimavoq. Taannalu isumaqarpunga maannakkut iluartuusoq, aammalu
taasumap killissarititaasup iluani, taamatut angusaqarnerput suli sivitsorlugu
iliuuseqarutta suli angusassagut pitsaanerit isumaqarpunga tassuungakkut
angusinnaallugit.
Soorunami
allanut nangigiartarneq pinianngikkaanni aamma imerniartarfiit
ammajaartartorujussuupput, nalunngilarpullu aatsaat imerniartarfiit immaqa
ullaassakkut innuttarput, taamaalillunilu aatsaat nuannersiteruttorlugu
matusarlutik. Kisiannilu aamma nalunngilarput sisamat missaanni aatsaat
imerniartarfinninngaanniit aniasarput. Kisiannilu tallimanut matuppat,
arfinernut aniappata inuit kikkut takussavaat? Siulliullutik itertarput
meeqqat. Taamaalilluni aamma tassuunakkut qanoq perulluliorneq aamma soorunami
malitseqartinneqarsinnaalluni. Taamaattumik tassa taamatut isikkoqartillugu
Naalakkersuisut maannakkuugallartoq akuerisinnaanngikkaat
erseqqissaatigiinnaqqissavara.
Qujanaq.
Isak
Davidsen, ataatsimiinnermi
aqutsisoq, sinniisussaq siulleq, Atassut.
Taamaalilluta
immikkoortoq 68 naammassivarput.