Oqaluuserisassani immikkoortoq 84 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut 21-at, marlunngorneq 8. april 2003
Jĝrgen Wĉver Johansen, saqqummiussisoq Siumut.
Qujanaq.
Inatsisartut Suleriaasianni § 35 naapertorlugu imaattumik apeqquteqaat aallaavigalugu oqallinnissamik siunnersuuteqarpunga:
Siusinnerusukkut Naalakkersuisuusut inuiaqatigiit aaqqissugaanerat pillugu iliuusissatut pilersaarutissatut siunnersuutaata misissorneqarnissaa nutarterneqarnissaalu apeqquteqaat aallaavigalugu oqallinnissamik siunnersuutikkut matumuuna saqqummiuppara. Taamaaliorpunga pingaarmat ataatsimut isiginnittumik siunissaq pillugu takorluugaqarnissaq apeqqutaammat inuiaqatigiit qanoq ittut pilersitseqataavigiumallugit - inuiaqatigiillu taakku sumut ingerlaneqassanersut isumaqarfigissallugu. Aamma apeqqutaavoq unneqqarilluni ammassumik oqariartuutigissallugu suna sulissutigiumanerlugu. Apeqqutaavorlu tamakku tamaasa suliarinissaannut piginnaassuseqarnissaq.
Kalaallit Nunaanni inuiaqatigiit ineriartornissaannut tamakkiisumik pilersaarummik Naalakkersuisut ukioq 2000-mi saqqummiussipput, pilersaarut saqqummiunneqarneraniilli amerlasuunit peqataaffigisimasutut oqaatigiumaneqartartoq. Tassungali tunngatillugu pingaartoq tassa - inaarutaasumik angusassaq anguniarlugu qanoq iliornissamut - siusinnerusukkut Naalakkersuisuusimasut aqqutissatut toqqakkaminnut pilersaarumminnik erseqqissumik saqqummiussisimanerat.
Piffissamili kingullermi tamatta qineqqusaarsimavugut, ilaat angusaqarluarsimapput allalli taama angusarissaartiginatik, ilumoortorli aana - Inatsisartunut ullumi ilaasortaasut, taamani ukiumi 2000-imi inuiaqatigiit aaqqissugaanerat pillugu Naalakkersuisut iliuusissatut pilersaarutaannik Inatsisartunit - ukiumi pineqartumi ammaalluni oqallinnermut atatillugu - tusaatissatut tigusisunit, ullumikkut Inatsisartut ilaasortaat allaanerummata.
Iliuusissatut pilersaarusiat allat tamaasa assigalugit ingerlanerup takutippaa iliuusissatut pilersaarutip immikkoortuisa ilaasa misissorneqartariaqarnerat, tamannalu taamaattuaannassagunarpoq. Taamaammat pissusissamisuussaaq inuiaqatigiit aaqqissugaanerat pillugu iliuusissatut pilersaarutitut pigineqartup misissoqqinnissaata nutarterneqarnissaatalu oqallisigineqarnissaa.
Taamaammat siunnersuutigissavara oqallinnerup matuma malitsigisaatut Naalakkersuisut qinnuigineqassasut inuiaqatigiit aaqqissugaanerat pillugu iliuusissatut pilersaarutissatut siunnersuummik iluarsisamik 2003-mi Inatsisartut ukiakkut ataatsimiinneranni oqaluuserineqartussamik saqqummiussinissaannik.
Apeqqut aallaavigalugu oqaluuserisassanngortitsinerup matuma siunertaraa tamakkiisumik pilersaarusiap taassuma nutarterneqarnissaani Inatsisartuni partiit aallaqqaataaniit sunniuteqarnissaasa qulakkeerneqarnissaa.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Aningaasaqarnermut Naalakkersuisoq akissuteqassaaq.
Augusta Salling, Aningaasaqarnermut Naalakkersuisoq, Atassut.
Qujanaq.
Inuiaqatigiit aaqqissugaanerat pillugu iliuusissatut pilersaarutissatut Naalakkersuisut siunnersuutaata misissorneqarnissaanik nutarterneqarnissaanillu apeqquteqaat aallaavigalugu oqallinnissamut aallaqqaasiullugu oqaatigissavara piffissami matumani arlalinnik suliaqartoqarmat ukiuni aggersuni nunatsinni inuiaqatigiit aaqqissugaanerannut sunniuteqarsinnaasunik.
Qanittukkut Namminersorneq pillugu Isumalioqatigiissitat isumaliutissiissumminnik saqqummiussisussaapput. Tulliullugu innuttaasut akornanni Inatsisartunilu ukiakkut katersuunnermi oqallinneq ukiuni aggersuni sammisassanut suliniutaasussanullu siunnersuuterpaalussuarnik kinguneqanngitsoornavianngilaq. Assersuutigalugu namminersulernissamut aqqutissat suliassartaqartarsinnaapput inuussutissarsiortunik nukittorsaanissanik aammattaaq inuussutissarsiutinut tunngatillugu naalakkersuinikkut ingerlatsinerup avataaniittunik.
Ministeriunerup naalakkersuisut siulittaasuatalu isumaqatigiissutigaat ataatsimiititaliortoqassasoq pissutsinik nunatsinni inuussutissarsiornerup ineriartortinneqarnerani killiliisunik misissuisussamik kiisalu tamakku qanoq allanngortinneqarsinnaanerinut kaammattuuteqartussamik. Ataatsimiititaliaq kaammattuuteqassaartaaq inuussutissarsiutinik ingerlatsinermut tunngavissat qanoq nukittorsarneqarsinnaanerinut. Sulineq 2003-mi ukiakkut naammassereersimassaaq tulliullugulu inerneri danskit naalakkersuisuinut, uagutsinullu naalakkersuisunut inatsisartunullu saqqummiunneqassallutik.
EU nunarpullu aalisarneq pillugu isumaqatigiissuteqarput 2006-ip naanissaata tungaanut atuuttumik. Maannakkut isumaqatigiissut taanna piffissap qiteqqunnerani nalilersorneqarpoq. EU-mit kissaatigalugu oqaatigineqarsimavoq EU-p nunattalu isumaqatigiissutaat ullumikkornit allaanserusumik iluseqartariaqartoq. Isumaqatigiissutip ingerlasup sinneranut tunngatillugu naatsorsuutigineqarsinnaavoq EU-mut aalisarnermut tunngassuteqartuni naalakkersuinikkut ingerlatsinerup nunatta siunissami malikkumasaata nassuiarneqartariaqarnissaa. EU-mit erseqqissaatigineqareerpoq taamatut naalakkersuinikkut ingerlatsinerup ilusilersorneqarneranut imarisaanullunniit akuliuttoqarnianngitsoq kisiannili taamatut erseqqissumik naalakkersuinikkut
ingerlatseriaaseqartoqarnissaa EU-p nunattalu siunissami isumaqatigiissuteqartarnissaannut pisariaqartoq.
2003-mut Aningaasaqarniarnikkut ingerlatsineq pillugu nalunaarut marsip ulluisa aqqaneq-aappaanni saqqummiunneqartumut oqallisigineqartumullu atatillugu Naalakkersuisut nunatsinni inuiaqatigiit aaqqissugaanerat pillugu naalakkersuinikkut ingerlatsinerup tamanit oqallisigineqarnissaanut periarfissiipput. Nalunaarummiipput inuiaqatigiit aaqqissugaanerat pillugu iliuusissatut suliassaqarfiit misissorneqarnerinik takussutissat kiisalu suliassat Naalakkersuisut qinigaaffimmi maannakkut ingerlasumi suliassamittut pingaartinniagaat. Aningaasaqarniarnikkut ingerlatsineq pillugu nalunaarummut atatillugu oqallinnermi Naalakkersuisut siunnerfigalugu ingerlaviat tapersersorneqarpoq, oqaatigineqartarlunilu inuiaqatigiit aaqqissugaanerat eqqarsaatigalugu naalakkersuinikkut ingerlatsineq aammattaaq siunissami nunattta naalakkersuinikkut aqunneqarnerani pingaaruteqarluni ilaajumaartoq.
Naalakkersuisut suliassaq tamanna malitseqartippaat assersuutigalugu aalisarnermi naleqqussaaneq, innaallagissap, erngup kiassaateqarfinniillu kiaap akiinik allanngortitsinissaq, Namminersornerullutik Oqartussanit tapiissuteqartarneq sulisartullu nuttarsinnaanerulernissaannut aningaasaliisarnissaq eqqarsaatigalugit annertuumik suliaqarnikkut. Tamakkununnga tunngatillugu naalakkersuinikkut aalajangiinissanut isummernissamut tunngavissiortoqarpoq.
Naalakkersuisut qulaajaanernit aallartinneqareersunit kaammattuutigineqartartussat siornangernianngillaat. Taamaammat Naalakkersuisut pissusissamisoortippaat Inuiaqatigiit aaqqissugaanerat pillugu iliuusissatut pilersaarutissatut siunnersuutip iluarsaateqqinneqarnissaani nutarterlugulu naleqqussarneqarnissaani EU-mut aalisarneq pillugu isumaqatigiissutissap nutaap, ministeriunerup siunnersuutigisaatut inuussutissarsiorneq pillugu ataatsimiititaliassap aamma Namminersorneq pillugu Isumalioqatigiissitat isumaliutissiissutissaata kiisalu suliat allat taaneqareersut inerneri oqallisigineqarnerilu utaqqineqarallassasut.
Taamaammat Naalakkersuisutut inuiaqatigiit aaqqissugaanerat pillugu iliuusissatut pilersaarutissatut siunnersuutip iluarsaateqqinneqarnera nutarterlugulu naleqqussarneqarnera siusinnerpaamik 2004-mi saqqummiunneqarsinnaassasoq naatsorsuutigaat.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Partiit oqaaseqartuinut. Jens Napaattooq Siumut.
Jens Napaattooq, Siumup oqaaseqartua.
Qujanaq.
Inatsisartunut
ilaasortap hr. Jĝrgen Wĉver Johansen, Siumut apeqquteqaat aallaavigalugu
oqaluuserisassanngortitaa pillugu Siumumiit imatut oqaaseqarfiginiarparput.
Siumumiit
pingaartipparput inuiaqatigiit aaqqissuussaanerat aallaavigalugu, inuiaqatigiit
peqataatinneqarnissaat minnerunngitsumillu inuiaqatigiit qanoq ittut
pilersinniarnerigut sumullu ingerlanersugut inuiaqatigiit peqataatissallugit.
Maannakkullu
suliat pissanganartut arlaqartut ingerlareerput qulaajaasussat inuiaqatigiit
aaqqissuussaaneratigut allannguutaasinnaasunik tikkuussisussat.
Soorlu
siullertut:
Namminersorneq pillugu Isumalioqatigiissitat isumaliutissiissummik
saqqummiussisussaapput.
Aappaattut:
Qallunaat
Ministeriunerata Naalakkersuisullu Siulittaasuata isumaqatigiissutigaat
ataatsimiititaliortoqassasoq pissutsinik nunatsinni inuussutissarsiornerup
ineriartortinneqarnerani suut ajornartorsiutigineqartarnersut ilanngullugit
misissuisussanik, tamakkulu qanoq allanngortinneqarsinnaaneranik
kaammattuuteqartussamik.
Pingajuattullu:
EU-p
nunattalu isumaqatigiissutaat 2006-ip naanissaata tungaanut atuuttussaasoq
piffissap qiteqqunnerani, EU-p kissaateqarneratigut ullumikkornit allaanerusumik
iluseqartariaqartoq oqariartuuteqartoqarpoq.
Taakkulu
qulequttat tamarmik annertuumik inuiaqatigiit aaqqissussaanerat pillugu
iliuuseqarnissamik toqqammaviliisuusussaapput alloriaqqinnissamilu
pingaruteqarluinnartuusussaallutik.
Taamatut
oqareeraluarluta makku ilanngullugit oqaatigerusuppagut.
Inuiaqatigiit
aaqqissugaanerat pillugu iliuusissatut pilersaarut Naalakkersuinikkut
Saqqummiunneqartoq
septemberi qaammat ukioq 2000
aaqqiissutissanik ? tassa ukiunut tulliuttunut qulinut ?15-inut
atuuttussanik- ineriikkanik imaqanngilaq. Tassami inuiaqatigiit kalaallit
silarsuarmioqatigiillu allanngoriartornerat taamaaliornissamut sukkavallaaqaaq.
Siunissamut ungasinnerusumut isigiartuinnartilluta suliniutissat suunissaat
tulleriaarinerillu qanoq pinissaat eqqoqqissaartumik
oqaatigisinnaajunnaariartortarpavut.
Akerlianilli
ineriartornermi kissaatigisatsitut ittumi nalerassagut inuiaqatigiit
aaqqissuussaanerat pillugu iliuusissatut pilersaarutikkut aalajangiunneqarput.
Taamaakkaluartorli
inuiaqatigiit aaqqissugaanerat pillugu ingerlatsinermi siunertarineqarpoq
nunatsinni inuussutissarsiutinik ingerlataqartut pitsaanerpaamik
atugassaqartinneqalissasut taamalu aningaasarsiornikkut siuariartorneq,
suliffissaqartitsineq inerisitaqassuserlu suli qaffikkiartuinnartissallugit.
Tamannalu
ilaatigut tapiissutit ikinnerusut takulertoruminarnerusut, assigiimmik
akeqartitsineq
atorunnaarsinneqarnera,
Namminersortunut ingerlatassanngortitsiortorneq, Attaveqaatitigut
pilersuinikkullu atortorissaaruteqarneq pillugu aaqqissuussineq ilaallu
ilanngullugit alloriarfissat ilaagaat.
Taamatut
inuaqatigiit aaqqissuussaanerat pillugu takorluukkat aallaavigalugit
iliuusissatut siunnerfiit arlallit maannakkut ilarpassui
piviusunngortiterneqarlutik alloriarfigereersimalerput aammalu unamminartut
pissanganartullu arlallit ornillugit.
Piffissami
aggersumi Inatsisartut ilungersuutissanik imaannaanngeqisunik
Naalakkersuinikkut ornigaqarpugut, ilungersuutissat tamakkua ilagaat ukiuni
qaninnerpaani ataatsimut isigalugu aningaasatigut qaffakkiartorpiarunnaarnissaq
ilimanarmat. Aningaasaqarnermi sunniutaasarput pissutsit uagut qanoq
sunniuteqarfigisinnaanngisagut/pisinnaanngisagut aammalu pissutsit nammineq
iliuuseqarfigisinnaasagut.
2003-mut
aningaasaqarnikkut ingerlatsineq pillugu nalunaarut saqqummiunneqarnerani
oqallissigineqarneranut atatillugu inuiaqatigiit aaqqissugaanerat pillugu
iliuusissatut suliassaqarfiit misissorneqarneranik takussutissat kiisalu
suliassat Naalakkersuisut qinigaaffimmi maannakkut ingerlasumi suliassamittut
pingaartinniagaat Naalakkersuisut ersarissagai oqaatigisaalu Siumumiit
naammagisimaarpagut.
Taamatut
ineriartoqqinnermi kommunit pilersaarutai nunaqarfiit ilanngullugit taavalu
Akisussaaffiit assigiinngitsut pilersaarusiornerat, soorlu ilinniartitaanikkut
pilersarutit, inuussutissarsiornikkut, sanaartornikkut angallannikkullu
pilersaarutit ilanngullugit maannakkut Nuna tamakkerlugu pilersaarusiornermut
ingerlateqqilernissaat Siumumiit manna iluatillugu kaammattuutiginiarpagut,
Taamatut pilersaarusiornermi Regionikkaartumik pilersaarusiorneq ilanngullugu.
Tamakku
pingaartikkatsigit Naalakkersuisut naggataatigut suliap matuma
ingerlaqqinnissaanut piffissaliinerat, oqaloqatigiinnerit suliallu EU-mi danskit
naalakkersuisuini minnerunngitsumillu Namminersorneq pillugu isumaliutissiisut
oqallisaareerpata ingerlaqqissasugut tamakkiisumik Siumumiit isumaqatigaarput.
Taamatut
Siumumiit oqaaseqarluta oqallinnissamut peqataanissarput qilanaaraarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
oqaaseqassaaq Kuupik Kleist, Inuit Ataqatigiit.
Kuupik
Kleist, Inuit Ataqatigiit oqaaseqartuat.
Inuiaqatigiit
aaqqissugaanerannut tunngasut ataatsimoorussamillu siunnerfiit
nutarterneqartuarnissaat Inuit Ataqatigiit naalakkersuinikkut
isummersornerminni toqqammaviisa pingaarnerit ilagaat. Taamaattumik
siunnersuuteqartup kingullermik ukioq 2000-imi taamatut saqqummiunneqartup
oqaluuserineqarnissaanik piumasaqarnera qujarupparput aammami Inatsisartut
upernaaq manna ataatsimiinneranni oqaluuserisanut allanut arlalinnut tamanna
naleqquppoq.
Siusinnerusukkut
Namminersornerullutik Oqartussat, kommunit Nunaqarfinnilu aqutsisut akornanni
pisussaaffinnik akisussaaffinnillu agguataarinerup pisariinerusumillu
ingerlatsinissamut tunngasut oqaluuseraagut aamma taamatut matumunnga
attuumassuteqartut pisortat ingerlatseriaasiannut, sanaartornerup
aaqqissuuteqqinneqarnissanut nunarpullu ataatsimut isigalugu
ineriartortitseqqinnissamut tunngasut oqaluuserineqareerput.
Taamaallaat
ajuusaarnarpoq oqaluuserisat tamakku ataatsimiinnermi matumani annerusumik
angusaqarfiunngimmata tassami Inatsisartut ataatsimoorlutik iliuusissatut
inassuteqaatigisassaannik oqaluuserisat inernilerneqanngillat ? kisianni
oqalliserujussuartarpugut ? tamanna immini ajoriinnagassaanngikkaluarluni
nuannernerpaajussagaluarpoq oqallinnerit aamma naammassisaqarfiusartuuppata.
Siunnersuuteqartoq
isumaqatigaarput allassimammat siunissamut takorluukkanik tunngaveqarluni
aammalu takorluukkat qanoq piviusunngortinnissaannik pilersaaruteqarluni
periuseqartoqartariaqartoq. Taamatulli oqareerluni taava pingaaruteqarnerpaaq
tikittariaqarpoq tassaasoq kia imaluunniit kikkut piviusunngortitassat
akisussaaffigissavaat sunalu qaqugukkut suliarineqassava. Nunatsinni
naalakkersuinikkut ingerlatsinermi pingaartumik kingulleq mininneqaqqajaasartoq
ilisarnaataalersarpoq takorluukkat pilersaarutillu pitsaasut
piviusunngortinneqanngitsoornerannut pissutaasartoq pingaarnerpaaq.
Ukiut makku
alloriaqqinnisatsinnik annertuumik piumasaqarput Naalakkersuisut siulittaasuata
ippassaq oqarneratuut inuiaqatigiinnit utaqqineqarpugut iliuuseqarnissaq
tullinnguuppoq.
Assersuutinik
ataasiakkaannguanik taasaqalaassaanga:
- Aningaasarsiornikkut immitsinnut
pilersornitta annertusarnissaa tamatta kissaatigaarput tamannalu
Naalakkersuinikkut kiffaanngissuseqalerniaraanni saneqqunneqarsinnaanngilaq.
Atuilluarnerunikkut minnerunngitsumillu nerisassanik immitsinnut
pilersornerusinnaanerput qanittuaraavoq ? ukiuni qassinngulersuni neqaatitta,
aalisangaatitta, nersutaatitta timmiaatittalu mamarnersui peqqinnarnersui
amerlanersuilu eqqartorpavut. Taamakkaluartoq ukiuni kingullerni aatsaat taama
annertutigisumik avataaniit nerisassanik eqqussuivugut. Kissaatigisavut
akimorlugit ingerlatsivugut ? aperisariaqarpugullu aaqqissuussinikkut suunuku
ajoqutaasut ? sooruna siunertarput qanilliartunngikkipput?
- Angallanikkut akit apparsarnissaat ukiualunnguit allortarlugit ilimasaarutigineqartarpoq. Akilli tamarmik qaffakkaluttuinnarput. Timmisartuussisartut nunatsinni angerlarsimaffillit kisermaasileraluarmataluunniit akit appariaratik killormut suli qaffariaqqipput. Nalunaarusiarpassuit tamarmik pisariinnerusumik akikinnersumillu ingerlatsilernissamut periarfissanik qulaajaanissamik siunertallit naammassineqareerput ? sumulli atorneqarpat? Air Greenland nunatsinni pigisutut oqaatiginiartagarput 37,5%-iinnarmik piginneqataaffigaarput sinneri 62,5%-it Naalagaaffimmit SAS-imillu pigineqarput ? tamannaana ajoqutaasoq, imaluunniit allarluinnarnik ajornartorsiuteqarpugut?
- Kikkut tamat oqartussaaqataanerisa timitalerneqarnissaa pissaanerullu siammartinneqarnissaa oqalugiaatigisaqaarput. Aamma upperaarput inuiaat namminersuleriartortut aqqutissatuarigaat oqartussaaqatigiinneq nammaqatigiinnerlu ? amerlanerilli misigisimasaat tassaavoq pissanerup eqiterukkiartuinnarnera qitiusumiillu aqutsinerup sakkortusiartuinnarnera. Tamatumani naalakkersuinikkut allannguinissamut piumassuserput sakkukippallaarnerpoq imaluunniit imaannerluni kissatigisatta piviusunngortinnissaannut nukilaappallaartugut? Inatsisiliarisimasagut immitsinnut siunertatsinnullu naalleraataaginnarnerpat ?
- Innuttaasut naligiinnerusunik atugaqalernissaannik siunertaq qanorluunniit isumaqaraluaraanni akerlilersorneqarsinnaanngilaq. Ullumikkulli pissutsit takutippaat atukkatsivut naligiinngissuserput annerusumik allanngoriartunngitsoq. Inatsisartut upernaaq manna ataatsimiinnerinnaanni paasisinnaalereerparput inuiaqatigiinni pisuussutinik agguaaseqqinnissamik siunnersuutit Inatsisartuni amerlanerusunit timitalimmik tapersersorneqanngitsut illuatungaanili aaqqiissutissamerngit inunnut ikittuinnarnut ilaatigut immaqa pisariaqartitsivinngittunut sunniuttussat ornigineqarnerusut. Akornatsinni agguaaseqqittarnikkut periutsivut inuiaqatigiit aqqissuussaanerannut attuumalluinnarput ? peqareersut periarfissarissaarnerunerat tamatta nalunngilarput ? siunissamilu suli naligiinnginnerusumik atugaqalersitsisinnaanerput mianerisassat annertuut ilagaat.
- Ilinniartitaanikkut sorpassuartigut kinguaattoqqavugut, naammattunik ilinniarsimasunik sulisussaqanngilagut, ilinniartut maanaannaq taamaatittartut amerlavallaaqaat kalaallisullu oqaasilinnik amigaateqaqaagut. Ilinniartitaanikkut aaqqissuussineq piniartuunermiit aalisartuunermut, suliffissuaqarnermiillu inuiaqatigiinnut nutartikkanut ikaarsaarsimanitsinnut malinnaatsinneqarnerat naammassimanngilaq. Piffiit nutaat, pissutsit nutaat aamma suliassanik nutaanik ilinniagassanillu nutaanik nassataqarput tamakkualu naleqqussarfigisariaqarpagut.
- Aamma taamatut ippoq erngup nukinganik nukissiorfissualiornerup kingorna innaallagiamik akikinnerusumik pilersorneqalersinnanermut neriuleraluarneq. Ukiut qulit qaangiunneranni akit nikeriarsimanngillat allaallu takorloorneqalerluni sumi najugaqarneq naapertorlugu innaallagiap assigiinngitsumik akeqartinneqalernissaa tulliinnguutissasoq ? tamannalu akitsuinermik kinguneqassasoq saneqqunneqarsinnagunanngilaq.
Inuussutissarsiornerup aningaasarsiornerullu ineriartortinniarneqarnerani aporfiit annersaat tassaavoq aningaasarsiornitta ataasiinnangaviammik, tassalu aalisarnermik, tunngaveqarnera. Inuiaqatigiinni aaqqissuussinerup eqaatsumik naleqqussarsinnaaneranut tamanna annertuumik killiliivoq, tamannalu qanngerniassagutsigu inuussutissarsiutinik allanik ingerlatsisoqalersinnaanissaa nukiit tamaasa atorlugit aqqutissiuunneqartariaqarpoq.
Ataatsimut isigalugu inuiaqatigiit aaqqissugaanerat qerattarsimasutut nikisikkuminaatsorujussuartutullu isikkoqarpoq, allanngortitsissagaanni piumassuseq sakkortooq takutittariaqarluni.
Taamatut assersuuteqalaarluta Inuit Ataqatigiit-niit inuiaqatigiit aaqqissuunneqarnerisa oqallisigineqarneranut nangittumik peqataassaagut. Soorunami soqutiginarluinnassaaq siunnersuuteqartoq nammineq qanoq ittunik takorluugaqarnersoq siunnerfissanillu qanoq ittunik tikkuussiniarnersoq ? minnerunngitsumik siunnerfiit qanoq ililluni piviusunngortinneqarnissaannik sunik takorluugaqarnersoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Isak Davidsen, Atassut.
Isak Davidsen, Atassitip oqaaseqartua.
Qujanaq.
Inatsisartunut ilaasortap Jĝrgen Wĉver Johansensenip oqallisissiaanut ATASSUT-mit imaattumik oqaaseqaateqassaagut.
Oqallilisissiamik saqqummiisup Naalakkersuisut inuiaqatigiit aaqqissugaanerannut tun-ngasumik suliaqarnerannut tunngatillugu misissorneqarnissaalu ilaatigut siunertaralugu saqqummiussivoq,
ATASSUT-mit Naalakkersuisut akissutaat misissuataarsimavarput. Naalakkersuisullu akissutaatigut takusinnaavarput Namminersorneq pillugu isumalioqatigiissitat qanittukkut saqqummiussisussaasut, tamannalumi qasseeriaqaluta tusartareerparput.
Oqaatigineqarportaaq 2003-mi ukiakkut naammasereersimassasoq, misissuisimanerullu inerneri danskit Naalakkersuisuinut kiisalu nunatsinni Naalakkersuisunut Inatsisartunullu saqqummiunneqarumaartut.
ATASSUT-mit maluginiarparput inuiaqatigiit aaqqissugaanerat pillugu Naalakkersuisut pilersaartut 2004-mi saqqummiussinissaminnut.
Tamanna ATASSUT-mit qilanaarluta utaqqissavarput.
ATASSUT-mit aamma eqqaanngitsoorusunngilarput
Naalakkersuisut aalisarneq pillugu EU-mik 2006-ip tungaanut atuuttumik
isumaqatigiissuteqarsimaneq aamma tikimmassuk ilaatigullu eqqaasimallugu EU-p pisariaqartikkaa
ullumikkornit isumaqatigiissut allaanerusariaqartoq nalilersuinermi
ersersimasoq. Taamaattorli Naalakkersuisut erseqqarissumik oqaatigaat
Naalakkersuisut isumaqatigiissutip imarisaanut maannakkuugallartoq
akuleruttoqarnianngitsoq. Tamanna ATASSUT-mit
iluarisimaarparput.
Naalakkersuisut
akissuteqaamminni aamma aningaasatigut
2003-mi inuiaqatigiillu aaqqissugaanerisigut inuiaqatigiit oqallinnissaannut
periarfissiisoqarsimasoq eqqaavaat. ATASSUT-mit tamanna suliatut kusanartutut
taajumavarput.
Nalunaarummilu
tassani inuiaqatigiit aaqqissugaanerat pillugu iliuusissatut suliassaqarfiit
misissorneqarnerinut takussutissamik Naalakkersuisut maannakkut qinigaaffimmi
pi-ngaartinniagaat takuneqarsinnaammata ATASSUT-mit pingaartutut isigaarput.
Inuiaqatigiit
ingerlatitaanerannut nutarterinissamik Naalakkersuisut suliniuteqarnerat
ATASSUT-mit tapersersorluinnarumavarput.
ATASSUT-miillu
Naalakkersuisut akissuteqaataat inuiaqatigiit aaqqissugaanerat pillugu
pilersaarutissatut siunnersuutip 2004-mi saqqummiunneqarsinnaaneranik oqarnerat
qilanaarluta utaqqissavarput.
ATASSUT-miilli
oqaluuserisaq manna soqutiginartipparput, oqallisigineqarneranilu
peqataassagatta oqaatigiumavarput.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni oqaaseqassaaq Per Skaaning, Demokraatit.
Per Skaaning, Demokraatit oqaaseqartuat.
Demokraatit tungaaniit Naalakkersuisut inuiaqatigiit aaqqissugaanerannut pillugu iliuusissaannut nutarterneqarnissaa pillugu siunnersuummi ima oqaaseqassaagut:
Inuiaqatigiit aaqqissugaanerat pillugu iliuusissat ukiut 2000-meersoq tunngavissaavoq pitsaasoq inuiaqatigiinni qanoq iliornikkut siuarsarneqarsinnaanerannut annertusiartortumik imminnut napatissinnaanerannut aqqutissaq. Taamatut isumaqarnerit amerlanerit tapersersussagunarpaat.
Ajornartorsiutitaqarporli, tassa pilersaarut iluamik malinneqanngimmat. Taama oqaruma suleqatigiilluta Naalakkersuisuusimasut maannalu Naalakkersuisut akerliussagunarput nittarsaallugillu tassani tassuuna suliarisimasatik pitsaasut.
Maannalu tikillugu aaqqissuussinikkut annikitsuinnaasimapput. Suli inuiaqatigiit aaqqissugaaneranni allannguutissat annertunerpaat amigaatigivagut, ilami minnerpaamilluunniit allanngorsarneqarnissaannut suli isumagineqarsimanngillat, tassami eqqarsaatigaakka inuussutissarsiutini tapiissutit assigiimmik akeqartitsineq aamma kiffartuussisarnermut isumaqatigiissutaasartut.
Naalakkersuisut 2003-mut aningaasaqarnikkut ingerlatsineq pillugu nalunaarutiminni inuiaqatigiit aaqqissugaanerat pillugit iliuusissanik arlaqartunik saqqummiussipput. Piaartumik naammassineqartussanik soorlu nalunaarutip quppernerup 38-anni imatut allassimasoq, issuaavunga: 2004-mut aningaasanut inatsisissatut siunnersuummiilli sammineqartussat tamarmik ersersinneqarnissaat naatsorsuutigineqanngilaq, Naalakkersuisulli suliaq ingerlatinneqarnissaat pingaartippaat. Issuaaneq naavoq.
Isumaqarpugut aamma tamanna naammaginanngitsoq, siunissamut qanoq iliorsinnaanermut neriorsuutit kisiisa isumalluutigalugit suliassanut sakkussaasinnaanngillat utaqqiinnarsinnaanngilagulli.
Tamanna pillugu Inatsisartut Naalakkersuisut siunnersuuteqarfigissavakka ukiamut ataatsimiinnissatsinnut erseqqissumik piffissaliussilluta aaliangiussissasugut qaqugu suut iliuusissatut pilersaarummi immikkoortut naammassineqareersimassanersut.
Pingaaruteqarpoq politikerit atorfilinnut aamma inuiannut ilisimatissallugu siunissamik aalajangersimasumik toraartaqarnissaq. Ilaanni isumaqarnartarpoq arlaanik iliuuseqanngeriarutta taava pissusiusut atukkavut allanngussanngitsut, tamannali ilumuunngilaq. Arlaannik iliuuseqanngikkutta inuiaqatigiiusugut piitsunngoraluttuinnassaagut. Iliuusissatulli pilersaarutit pisariaqartut piviusunngortissinnaassagutsigit taava ilimagisinnaavarput maannakkut atugassarititaasut pitsaassusiat attatiinnarsinnaanngikkipput, pitsaanerusumillu atugaqalersinnaanerput angusinnaagipput.
Tassuunga tunngatillugu pitsaanerpaassagaluarpoq iliuusissatut pilersaarummi naammassereeqqusat ilimagisamik pingaarnerusumik suliarisinnaagutsigit.
Tassuungali ilanngullugu eqqaamarsariaqarput pilersaarut pingasunik ukioqalertussaasasoq, taamaalilluni sananeqarmalli inuiaqatigiit aaqqissugaanerata allannguutissanik pisagaqartitsilluinnalersimavoq.
Taama oqareeratta aamma nalilersortariaqarparput suut iliuusissatut sukkanerusumik naammassineqarsinnaasimannginnersut. Suut pissutigalugit iliuusissatut innersuussutaasut naammassisinnaasimanngilagut?
Immaqa kissaatigisimanngilarput qunugaluguluunniit allanngortiterinerup kinguneranut tunngasumik piviusumik oqallinnissarput inuiaqatigiinnitsinni allannguutissani taama annertutigisuni eqqussisoqassatillugu takusissaasariaqarparput piffissap ingerlanerata ilaanni inuit ilaat eqqorneqartussaanersut.
Tupaallaataassanngilaq qulaaniittulli naalakkiutaanani isumaqaruma ukiut arlallit qaangiuppata nunaqarfiit ikiliumaartut ullutsinni naleqqiullugit. Nunat allat uagutsinnut sanilliussinnaasagut aamma taamatut ineriartorfiusimapput. Aamma tamanna innuttaasut illoqarfinnut anginernut katersuussimapput, tamanna periarfissaat suliffitigut ilinniartitaanikkut najugaqarnikkut aamma kulturikkut neqerooruteqarluartarmata.
Aamma nuna tamakkerlugu assigiimmik nioqqutissatigut akeqartitsisarnerup atorunnaariartorneranut taamatut ineriartorneq sakkortusarumaaraa ilimagisariaqarpoq.
Ullutsinniilli aamma siusinnerusukkut arlaleriarluta inuiaqatigiit aaqqissugaanerat pillugu iliuuseqarnissaq nassuerutigisariaqarparput, taamatullu allanngortitserinermut nassatariumaagaasa annertussusissai ilimagisimasariaqarlugit. Pissusissamisoorporlu iliuusissat ilaasa aalajangersimasut maannakkut allartinneqarnissaat, taama iliorutta annikillisaassaagut ajoqutaasussat allatut ajornartumik takkukkumaartut iliuuseqarnissaannut innersuussutit piviusunngortinneqarnissaasa nalaani. Tassa pilersaarusiortariaqarpugut, suliassaq qanoq iliorluta aamma suut atortoralugit ingerlanniarneripput. Tassuunga atasumik pingaarutaavoq oqaatigissallugu taama sulinissaq ingerlanneqartariaqartoq inuiaqatigiinnut suliassanik attuumassuteqartut qanimut attaveqatigalugit. Taava aamma suliassaq pissanganaqisoq piviusumik iliuuseqarluta aallartinniartigu, takussutissaqavissumik nunarput allanngortinneqaqqullugit imminut napatittutut aamma namminersortutut.
Naggasiullugu Naalakkersuisup akissuteqaataa oqaaseqarfigilaassavara. Akissuteqaat sunnerneqarsimavoq aalajangiussamik suli naammassineqanngitsumik, ingammik namminersorneq pillugu isumalioqatigiissitap nalunaarutissaanik. Tassa tamakku saqqummiunneqartinnagit isummertoqarnavianngilaq.
Ajoraluartumik Naalakkersuisut pisariaqartumik sapiissuseqarsimanngillat, maanna tamatumuunakkut isummiussaqarlutik. Tassa Naalakkersuisut isumaliuuteqqaarsimassagaluarput qanoq iliornikkut aamma sutigut suliat pineqartunut tunngasunut ingerlanneqarsinnaanersut.
Demokraatit nuannaarumaarpugut namminersorneq pillugu isumalioqatigiissitap nalunaarutigaa taamatut saqqummiunneqarpat. Ajoraluartumik maannakkut Naalakkersuisut apeqqutinut akerusunngisaminik naammattoorigaangamik nalunaarusiat aggersut taama tikkuaannartarmassuk.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Anthon Frederiksen, Kattusseqatigiit.
Inatsisartunut ilaasortap Jĝrgen Wĉver Johansenip siunnersuutaa soqutigalugu misissorsimavara, imaattumillu Kattusseqatigiit sinnerlugit oqaaseqarfigissallugu.
Siullermik Kattusseqatigiit tungaaniit erseqqissaatigissavara Kattusseqatigiinni aamma arajutsisimannginnatsigu inuiaqatigiit aaqqissuussaanerisa qanoq ililluni allanngoriartornera, aammalu sutigut assigiinngitsutigut sunniuteqartarnera. Aamma minnerunngitsumik naalakkersuinikkut iliuutsit aalajangersakkallu inuttaasunut assigiinngitsutigut qanoq inuiaqatigiinnut sunniuteqartarneri aamma malinnaaffigeqqissaaratsigit.
Taamaattumik aamma Kattusseqatigiit sinnerlugit nuannaarutigaara Inatsisartunut ilaasortap Jĝrgen Wĉver Johansenip apeqqut manna soqutiginarluinnartoq, aamma Naalakkersuisut inuiaqatigiit aaqqissugaanerat pillugu pilersaarutissatut siunnersuutaata misissorneqarnissaa nutarterneqarnissaalu pillugit oqallittoqarnissaanik saqqummiussaqarmat. Tassami siunnersuuteqartoq ilumoorluinnartumik aamma oqarpoq inuiaqatigiit sumut sammiveqarlutik ingerlanissaat ilisimasariaqarparput.
Kattusseqatigiinni ilisimavarput suut tamarmik ataatsikkut allanngortinneqarsinnaanngitsut, aamma ilisimavarput suliat suulluunniit pilersaarusiorluarnikkut tulleriiaarluarlugillu pingaarnersiulluarnertigut ingerlanneqartariaqarmata.
Tamanna inuiaqatigiinnut toqqissisimanermik pilersitsisinnaasoq ilisimavarput, taamaattumik inuiaqatigiit aaqqissugaanerannut tunngatillugu pilersaarutit tamanut ammasumik saqqummiunneqarlutillu oqallisigineqarnissaat Kattusseqatigiit sinnerlugit kaammattuutigissavara,
tassami inuiaqatigiit piumasaat kissaataallu malillugit maani suliaqartussaagatta. Nalunngilara qinigaanertigut innutaasuniit aalajangeeqataasinnaanermik pisussaatitaaffimmik tunineqartartugut.
Soorunami tamanna pissusissamisoorpoq, kisianni suliassat inuiaqatigiinnut annertuumik pingaaruteqartut suut sumut killinneri qanorlu ingerlanneqarneri minnerpaamik Inatsisartunut Naalakkersuisuniit ilisimatitsissutigineqartariaqarput, aammalu Inatsisartut tamanna ilisimasariaqarpaat.
Tassami sapinngisamik inuiaqatigiit aaqqissugaanerat pillugu apeqqutit assigiinngitsut innuttaasunit aamma oqallisigineqartariaqartut Kattusseqatigiinniit isumaqaratta.
Tassa naluneqanngitsutut Kattusseqatigiinni aamma pingaartitatta ilagilluinnarmagu innuttaasunik tusarniaasarnissat. Taamaammat aamma siunnersuuteqartoq tamakkiisumik taperserniarpara oqarmat suut sulissutigiumallugit ammasumik periuseqarluni unneqarillunilu ingerlatsivissaq pisariaqarmat Inatsisartut nutaat, Inatsisartut ukiakkut 2003-mi ataatsimiinnissaanut tamanna pillugu oqallittariaqartugut.
Naggataatigut Kattusseqatigiit sinnerlugit erseqqissaatigissavara inuiaqatigiit aaqqissugaanerat naalakkersuinikkut aaliangikkatigullu innuttaasunut qanoq sunniuteqartartoq soorunami politik-ikkut suliaqartuusugut ilisimasariaqaratsigut.
Tamatumani assersuutigineqarsinnaapput ineqarnermut tunngasut aamma ulluni makkunani tusagassiutitigut annertuumik oqallisigineqartut pissutsit taamaattut takutimmassuk naalakkersuinikkut aalajangernerit, aamma innuttaasunut qanoq ataasiakkaanut ilaqutariinnullu ataasiakkaanut sunniuteqartarnerat paasisariaqarmat. Tassami uani assersuutigineqarsinnaavoq Landskarsip 2002-mut naatsorsuutaani sinneqartoorutit aamma ineqarnermut tapiissutigineqartussaagaluanik ilaatigut ilallit tassani Inatsisartut aalajangernerminni qanoq innuttaasunut tamakku sunniuteqarneri aamma isumaqarpunga pingaaruteqartut. Tassami aperisoqarsinnaavoq Landskarsi ineqarnermut tapiissutinut sinneqartoormat taamannak million-inik tamatuma suna kingunerivaa, aammalu ineqartut qassit anisitaasimappat.
Taamatut oqaaseqarlunga Inatsisartut ukiamut, aammalu 2004-mi inuiaqatigiit aaqqissugaanerannut tunngasumik oqallinnissaannut qilanaarlunga siunnersuut taperserlugu oqaaseqarpunga.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Siunnersuuteqartoq Jĝrgen Wĉver Johansen, Siumut.
Jĝrgen Wĉver Johansen, siunnersuuteqartoq, Siumut.
Qujanaq.
Siullermik qujarusuppunga apeqquteqaat aallaavigalugu oqallisissiannut tunngatillugu Partiit, Kattusseqatigiit Naalakkersuisullu oqaaseqaataannut.
Taamatut saqqummiussaqarninnut tunngavilersuutigisakka paasilluarneqarsimammata qujavunga. Isumaqarpunga tamatuma takutikkaa qanoq pingaaruteqartigisoq inuiaqatigiit aaqqissugaanerat pillugu iliuusissatut pilersaarusiornermi Inatsisartuni Partiit ilaasortallu isummersuutaasa nutarterinissamut suliap aallartinnginnerani tusariissallugit. Tamattami kissaatigaarput inuiaqatigiinni kalaallinut naleqquttumik tamatuma suliarineqarnissaa.
Aamma partiit isumaa naapertorlugu assigiinngitsorpassuarnik iluatinnaateqarluartunik oqariartuuteqarput.
Maluginiarpara Naalakkersuisut inuiaqatigiit aaqqissugaanerat pillugu iliuusissatut pilersaarusiap nutarterneqarnissaa piumassuseqarfigalugulu suliariniaraat, aatsaalli 2004-p ingerlanerani nutartikkap Inatsisartunut saqqummiunneqarnissaat takorloorlugu.
Tamatumunnga tunngavilersuutigineqartut soorlu EU-mut isumaqatigiinniarnerit naammassineqarsimannginnerat Naalakkersuisup Siulittaasuata Statsminister-illu siunnersuisoriniaasa suliaasa saqqummiunneqaqqaartariaqarnerat, kiisalu namminersorneq pillugu isumalioqatigiisitap saqqummiussaata Inatsisartuni oqaluuserineqaqqaarnissaa kissaatigineqartoq.
Soorunami tamakkua naak assut sivisuginaraluarluni 2004 tunngaanut utaqqinissaq soorunami paasiuminarsinnaavoq Naalakkersuisut taamatut naliliinerat.
Nuannaarutigaarali Naalakkersuisuni oqaatigineqarmat tamatuma pinnginnerani, tassa 2004 tikitsinnagu taamatut paasivara Naalakkersuisut sisamanik suliaqartillutik oqariartuuteqarmata.
Siullermik: Aalisarnerup iluani naleqqussaaneq ingerlateqqinniarmassuk.
Aappassaanik: Sarfamut, imermut kiassarnermullu akigitinneqartut allangortinneqarnissaat suliarineqassapput.
Pingajussaanik: Namminersornerullutik Oqartussat tapiissutaasa atorneqartarnerat allanngortinniarpaat.
Kiisalu
Sisamaattut: Sulisinnaasut nuttarsinnaalernerulernissaannut aqqutissiuussinissat suliariniarlugit.
Tamanna iluarisimaarnarpoq, kisianni aamma ilisimaaraarput taamatut allanngortitsiniarnerit annertoorujussuarmik inuiaqatigiinnut sunniuteqassammata.
Taamaammallu naalakkersuinikkut isummerfigisassanik Naalakkersuisut suliaqalinnginnerini partiit isummersoqataanissaat pingaaruteqarluinnarnera isumaga naapertorlugu oqallinnerup maannamut aamma uppernarsareerpaa.
Assersuutigiinnartigumi sarfamut, imermut kiassarnermullu akit allanngortinniarneqarnerat, taakkulu kingunerisinnaasaat.
Soorunami Nuummi najugaqartuusugut iluarisimaassavarput akit piviusut aallaavigineqaleraluarpata. Taamaaliornikkummi sarfamut akiliuterput aaffaa inorlugu akeqalissaaq, 72 ĝre-nik annertussuseqalerluni kilowatt-imut ataatsimut.
Aamma erngup akia taamatut affaannanngussagaluarpoq, kisianni nunatta sinnerani akit appasinnerulernissaanut aningaasat million-erpaalussuarnik taamaalillutik amigalissapput, taakkulu million-it ukiut tamarluinnaasa atuisartunit allanit aaneqartariaqalissapput.
Eqqarsaallu taanna ingerlateqqilaarutsigu, taava taamaalillutalu takorloorutsigu akit piviusut aallaavigilissagaluarutsigit. Taava assersuutigiinnarlugu Ittoqqortoormiuni sarfamut ullumikkut akigitinneqartoq kilowatt-imut ataatsimut 271 %-inik qaffariartariaqalissagaluarpoq.
Erngup kupikliter-imut akia Ittoqqortoormiuni 681 %-imik qaffariassaaq.
Qaanaami imeq kupikliter-imut quleriaammik akisunerulissaaq.
Upernavimmilu 762 %-inik qaffariassalluni.
Malugalugu matumani Nukissiorfiit kisitsisaataat nutaanerpaat 2001-meersut aallaavigigakkit.
Taannamita Inatsisartunit Naalakkersuisuniillu maannangaaq qanoq isumaqarfigineqarpa?
Soorunami piffissami ikaarsaariarfimmi immikkut aaqqissuussisoqarsinnaassaaq, kisianni tamatuma kingorna taava qanoq namminersulivissaguttami tamatumani aamma allanngortitsisoqarnissaa avaqqunneqarsinnaagunanngimmat.
Taamaammat qularutivissaanngivissumik inoqarfiit ilaanni najugaqarnissaq allanut naleqqiullugu aningaasaqarnikkut ullumikkornit annerungaartumik pilerinarnerulissaaq. Uterpara ullumikkornit annerungaartumik pilerinarnerulissaaq. Tassa taamaattussaassaaq.
Taamaammat tamakku sillimaffiginiarlugit sulisut nuttarsinnaanerannut periarfissiinerunissamik Naalakkersuisut maannakkut suliaqarniarnerat pingaaruteqarpoq. Tamannalu isumaqataaffigigutsigu taava tamakku tamarmik ataqatigiinnerat eqqaamallugu aamma isumaqatigiissutigisinnaasariaqarparput nunap immikkoortuini illoqarfiit annerit tassa taakku sisamat amerlasuut ajorisartagaat immikkut illuliornikkut ullumikkornit annerusumik suliniarfiginissaat aningaasaliiffiginissaallu aamma isumaqataaffigisariaqarparput. Aamma allatigut.
Aamma nassuerutigisariaqarparput taamak iliussagutta taava inoqarfiit ilaat qularnanngitsumik inukinnerit periarfissakinnerillu ukiut arlaqanngitsuinnaat qaangiunnerini nutaamik naliliiffigineqarnissaat pisariaqalissaaq. Taamaanneralu ilisimagaanni taava isumaga naapertorlugu aamma pisussaaffiusariaqarpoq makku qanoq pilersaaruteqarfigineqarnissaat pillugu pilersaarusioreernissaq.
Naluneqanngilarmi assersuutigiinnarlugu inoqarfiit 100-jut inorlugit inoqartut nunatsinni 20-t sinneqalaarmata.
Taakkunanngamita qassit unneqqarissagutta ilumut periarfissaqarpat? Ila tamarmik taamaanngillat. Aamma nassuerutigisariaqarparput taakku ilaat allallumi oqaatigineqarsinnaanngimmata inuiaqatigiit atugartuunngorsagaasut akornanni nunaqqataasutut.
Tamanna isornartorsiunertut paaseqqunngeqaara. Kisianni kikkut tamat pitsaasumik inuuneqarnissartik pisinnaatitaaffigigaat isumaqarpunga. Taamaammat isumaqarpunga aalajangertariaqartugut siunissap inoqarfiini tamani atugarisat minnerpaaffilerneqassammata. Minnerpaaffiliinerit taakku naammassineqarsinnaanngitsutut nalilerneqarpata taava isumaga naarpertorlugu Inatsisartutut pisinnaatitaaffigiinnarnagu pisussaaffigaarput qanoq iliussalluta, nutaamillu naliliissalluta.
Eqqoriarparami isumaqatigiissutigisinnaagipput akuersaarumanatigu inuit atugarliortitaasut tamakkunani najugaqartinneqassappata.
Taamaattumik siunissap nunaqarfiini minnerpaamik makku nassaassaasariaqarput atuarfik pitsaasoq ilinniarsimasunik sapinngisamik ilinniartitsisulik inissiat pisariaqartinneqartumik amerlassusillit, tunisassiorfik imminut napatissinnaasoq, meeqqerivik, napparsimaveeraq iluameersoq, minihalle, katersortarfik, arsaattarfik, illu sullivik, pisiniarfik pitsaasoq, angallannikkut aaqqissuussineq naammaginartoq kiisalu utoqqaat illuat.
Kisianni tamanna aamma isumaqarpoq pingaarnersiuisariaqartugut sumiffinnimi tamani taamak iliornissamut akissaqanngilagut.
Tamanna Inatsisartut uagut aamma nassuerutigisariaqarparput. Inooqataarusuppugummi inuiaqatigiinni atugartuunngorsagaasuni. Oqartussaaqataaneq tunngavigalugu ingerlatsiffiusuni nalunagu ingerlalluarnissamut sinaakkutissat pigineqartut. Ilisimaaralugulu piginaasaqarluartunik Inatsisartoqarluta isumatusaarlutik innuttaasunut tamanut pitsaanerusussamik toqqaasartunik tamatta uninngaannarluta ajoqatigiimmik ineriartornissarput pinnagu.
Alloriarfissagut
imaannaanngillat kisianni pisariaqarput. Inuit Ataqatigiinniit ilaatigut aamma
ujartorneqarpoq siunnersuuteqartup qanoq nammineq ittumik takorluugaqarnersoq
siunnerfissanillu qanoq ittunik tikkuussiniarnersoq. Ilaat taareerpakka Inuit
Ataqatigiinniit arajutsisimaneqarunngikkaluarpoq. Kisianni Naalakkersuisut
aamma suleqataaffigisimasakka ilaat naammassisaqarfiusimanerat matumani
oqaaseqarfiginissaannut periarfissara naammat
pingajussaanik oqaaseqaleruma uterfigissavakka isummersuutigineqartut
matumani qularutigineqarsinnaanngitsumik Naalakkersuisut inuiaqatigiit
aaqqissugaanerat pillugu iliuusissatut pilersaarusiat nutarternissaannut
iluaqutigisinnaammatigit neriuppunga Inatsisartut amerlasuut isummersuutiminnik
saqqummiussaqarnissaminnut periarfissaq manna atorluarumaaraat. Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliulluni
Aningaasarsiornermut Naalakkersuisoq.
Augusta
Salling,
Aningaasarsiornermut Naalakkersuisoq, Atassut.
Qujanaq.
Naalakkersuisuninngaaniit oqallinnissamut siunnersuuteqartumut akissuteqarluta
oqaatigaarput Naalakkersuisuninngaaniit pingaartikkipput massakkut
saqqummiuteriikkatta suliarineqartussat saniatigut annertuumik suliat
ingerlareersut maani inimi aamma oqallisigineqarnissaat
utaqqeqqaartariaqaripput.
Tassa oqaatigivarput
Namminersorneq pillugu Isumalioqatigiissitaq taanna suliaqarsimavoq annertuumik
ullunilu qanittuni suliani naammassillugu tunniuttussaavaa aammalu
isumalioqatigiissitaq annertoorujussuarmik inuiaqatigiit akornanni
aaqqissussaanermi qanoq allanngortiterisoqarsinnaaneranik misissuillutillu
nalilersuinikuupput Naalakkersuisuninngaaniillu pingaartipparput taamatut
sulisitaqarsimanitsinni aamma suliaasimasut misissorluareerlugit aammalu
inuiaqatigiit akornanni maanilu aamma Inatsisartuni oqallisigilluarneqassasut.
Imaanngilaq
isumalioqatigiissitap siunniussimasai tamatigut malinneqassammata kisianni
pingaaruteqartorujussuuvoq annertuumik suliaqartitsereersimagaanni aamma
ilanngullugit nalilersuinermi ilanngunneqarnissaat taamaattumik ilaatigut siunnersuuteqartup
aamma eqqaasaa siunissami atuarfinni imaluunniit nunaqarfinni
atugassarititaasussat qanoq isikkoqartariaqarnerat ilaatigut
nalunngilluinnarparput namminiilivinnissaq pillugu isumasioqatigiissitat,
Namminersorneq pillugu Isumalioqatigiissitap tamakkorpiaat aamma samminikuugai.
Taamaattumillu Naalakkersuisut isumaqarput isumaliutissiissut ukiamut tamaat
sammineqartussaammat aamma nalilersuinissatsinni taanna ilanngullugu aamma
utaqqisariaqaripput.
Aamma
taamaappoq inuussutissarsiutit siunissami qanoq aaqqiivigineqarnissaanut
tunngatillugu massakkut ingerlanneqareersut saniatigut allanngortitsinissat
assigiinngitsut suliarissagutsigit tassani pingaaruteqarluinnarpoq
Naalakkersuisut Siulittaasuata danskillu statsministeriata isumaqatigiissutigisimasaat
tassalu aammalu Inatsisartuninngaaniit malugisavut tunngavigalugit
taperserneqarluartoq Ataatsimiititaliap suliaqareernissaa aamma taanna suliallu
aamma nalilersorneqarlunilu isummersorfigineqarnissaa pingaaruteqarpoq.
Taamaappoq
aamma soorlu oqaatigeereeripput EU-mi tapiissutit imaluunniit aalisarneq
pillugu isumaqatigiissut massakkut allanngortinneqarluni
atortinneqalertussaasoq taanna qularutissaajunnaareerpoq taamaattumillu aamma
suliat aallartereernikuupput siunissami qanoq isikkulimmik inuiaqatigiinni
aaqqissuussaanitsinni aamma EU-mi suleqateqarsinnaanerput.
Tassani
aamma pinngitsoornani nalilersukkani ilaatinneqartussaavoq. Taamaattumik
poingaarluinnaqqeqqissaarput inuiaqatigiinni inuiaqatigiit aaqqissuussaanerat pillugu
iliuusissatut pilersaarutinik allanngortiterinissamik eqqartuinitsinni suliat
annertuut aallartissimasagut aammalu isumaqatigiissutigisimasagut
nalilersoqqissaassallugit. Peqatigiilluta nalilersueqqissaassalluta taakkua
aamma ilanngullugit ilaatinneqarnissaat.
Nuannaarutigaaralu
tamanna amerlanerussuteqarluartunit paasilluarneqarsimammat.
Paasilluarneqarluni aamma tapersersorneqarmat. Suliat tamakku
naammassineqareerpata Naalakkersuisut suliamik nutarterinissamik
oqariartuuteqarnerat taanna tigulluarneqarmat qujassutigaara.
Demokratit
tungaaninngaaniit naak oqaatigineqaraluartoq soolu immaqa oqqisimaartutut
Naalakkersuisut oqqisimaartutut tassani taallugit oqarlutik ajoraluartumik
maannakut Naalakkersuisut apeqqutinik akerusunngisaminnik naammattuuigaangamik nalunaarusiaq aggersoq taanna
tikkuaannartarmassuk. Oqaatigisariaqarpara isumaqarpunga
pingaaruteqartorujussuusoq Naalakkersuisut Inatsisartut aamma
peqataatikkusuppaat inuiaqatigiit aaqqissugaaneranni ilusilersueqatigerusullugit.
Taamaattumik
pingaaruteqarpoq ilusilersuinissami pingaaruteqarluinnartut apeqqutit
suleqatigiissitat suliarisimasaat aamma Inatsisartut peqataaffigerusussaagaat
nalilersueqataaffigissallugit.
Nalilersuereernermilu
tamakku apeqqutit assigiinngitsut isummerfigineqarsimasut tunngavigalugit
Naalakkersuisut suliaqaqqissapput isummersuutit assigiinngitsut siunissami
qanoq ilusilerlugit timitalerniarneqarnissaat qanoq iliorluni
aaqqinneqarsinnaanersut. Piffissaq qanoq sivisutigisoq atorneqarsinnaanersoq
maani Inatsisartut siunniussimasaat naammassiniassagaanni.
Una aamma
arajutsineqassanngilaq aamma arajutsineqarsimanavianngilaq tassami ukiuni
aggersuni suliniutit assigiinngitsut aamma siunnersuuteqartup taagoriigai
Naalakkersuisuninngaaniit oqaatigisagut Naalakkersuisut suliariniarlugit
saqqummiutereersimagaat malugivarput maani inimi aamma tamakkiisumik
taperserneqareernikuusut. Suliniutit misissorneqarneri. Naak naammassineqarpata
misissuiffigineqarlutik saqqummiunneqarunik aamma maani inimi
oqallisigineqartussaasagaluartut.
Kisianni
tunngaviatigut suliniutaasut annertuumik taperserneqarnerat aamma
maluginikuugatsigu taamaattumik suliassat assigiinngitsut
Naalakkersuisuninngaaniit ingerlappagut. Siunnersuuteqartup ilaatigut una
oqaatigisaa soorunami massakkut suliat aamma 2000-minngaaniit inuiaqatigiit
aaqqissugaanerat pillugu iliuusissatut pilersaarummi siunniunneqareersimasut
tassa sarfap akiata allanngortiteriffigineqarnissaat.
Tamanna
soorunami assigiinngitsunik imannak allatut iliuuseqarfiginagu
atuutitinneqalissappat inuiaqatigiinni assigiinngitsuni annertuumik aamma
eqquisussaassaaq. Taamaattumik Naalakkersuisuni aamma sulinermi imaluunniit
piareersaasiornermi tamakku tunngaviisigut aamma soorunami
arajutsisimaneqanngilluinnaqqissaarput.
Kisianni
taamaakkaluartoq isumaqarpugut pingaaruteqartoq suliap ingerlateqqinneqarnissaa
nunatsinni inuussutissarsiornerup siuarsarneqarnissaa pimoorullugu
ingerlanneqassappat taava suliffinnik ingerlatsinermi aningaasartuutit
apparsarneqartariaqarput. Kisianni imaassanngilaq nunatsinni inuiaqatigiinni
inuusut allat aamma inuuniarnissaminnut artukkerluinnarlugit tassani
iliuuseqartoqassasoq. Soorunami aaqqissuussisoqartariaqassaaq. Aamma
minnerpaaffiliilluni atugassarisaasunik.
Taamaattumik
uanga isumaqanngilanga illoqarfiit sisamat ineriartortititassatut taakkua
kisimik isigineqassasut. Isumaqarpunga nunatsinni illoqarfeqartoq aamma allanik
ineriartornissaminnut pitsaasunik periarrfissaqartunik. Illoqarfiit
alliartornissaannut periarfissagissaartunik.
Taamaattumik tamakku aamma arajutsisimaneqanngillat.
Tamannalu
tunngavigalugu isumaqarpunga sulinermi tunngavissat tunngaviginiakkagut maani
Naalakkersuisuni tassa saqqummiussaqarnissarput aatsaat 2004-mi siunniussarput
taanna amerlanerussuteqarluartuni aamma taperserneqarmat qujassutigaara aammalu
suliniuteqarnitsinni tunngavigerusutagut taperserneqarmata aamma
qujassutigalugit. Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Tullinnguuppoq
Jens Napaattooq Siumut.
Jens
Napaattooq, Siumup
oqaaseqartua.
Qujanaq.
Siumumi isumaqarluinnarpugut namminersornerulernissatsinnit
namminersornerulernitsinniit maannamut ineriartornitsinni siunnerfik ataasiusoq
amerlanerpaajusugut isumaqatigiissutigisinnaagipput tassalu inuiaat kalaallit
suli anginerusumik nammineersinnaanissarput sulissutigissagipput. Aammalu
taamatut anguniagaqarnitsinnut qinikkat suliassaraarput suna sammivik atorlugu
ingerlaqqittoqarnissaa innersuussutigissallugu.
Taamatut anguniakkap
tamatuma anguniarnerani aqqutissaq sorleq sakkullu sorliit atorneqassanersut
akornitsinni aamma paaseqatigiissutigisariaqarpagut. Taamaattumik maannakkut
nalerassatut uterpara nalerassatut siunnerfigineqartut assiginngitsut
maannakkut anguneqalersimaneranni uani namminersulivinnissatsinni nammineq
aningaasartuutit matussuserneqarnissaannik oqariartuutigineqartut
eqqarsaatigalugit naatsumik oqaatigalugu qallunaat naalagaaffiata
tapiissutigisartagai atuutsillugit tassani inuiaqatigiit kalaallit pisussaaffreqartugut
nunarput tamaat pilersussallugu inuunikkullu inuit atugassaqartinniarnissaat
assigiinnerusumik ingerlatsiviunissaa.
Taamaattumik
namminersulivinnissarput orninnerani qallunaat nunaanninngaaniillu
aningaasaliissutigineqartartut toqqammavigineranni maannakkut ilaatigut
assersuutigineqartut soorlu Qaanaakkut Ittoqqortoormiikkut naatsumik
oqaatigalugu isorliunerusuni sarfap akitsorujussuarsinnaanera eqqarsaatigalugu
maannangaaq killiffik soorlu ittoqqortoormiit taaneqarmat ersarilluinnartumik
tassani akitsuutaasinnaasut procentinngorlugit taakkartorneqarneranni
ilutigalugu oqaatigisariaqarsoraara maannakkut taamatut innaallagissiorfiit
nutaanngorsarneqarsimammata ullutsinnut naleqqussarlugit allaat qujanartumik
maannakkut ukiut 20-t 30-t siumut inniminneereerlutik maannakkut
aaqqivigineqarsimallutik.
Naatsumik
oqaatigalugu siornaangaatsianngorpoq Sisimiuni pisimasoq innaallagissiornikkut
alianaqisoq qujanartumik taanna qaangerneqarsimavoq kisiannili
allaffissornikkut maannakkut ingerlatsinerit marloqiusamik assigiinngitsut
arlaqartut aamma maani taakkartorneqartartut immaqa akikillisaataasinnaasutut
siunnerfigineqartutuullu aamma maannakkut aqqutissat ilagilluinnarpaat.
Imeq
qiviaraanni soorunami aamma kipparissorujussuanngorlugu taamatut oqaatigineqarsinnaassappat
tupiginngilara. Ilaatigut oqartoqaraluarpoq oqallissaarisuninnganiit
ajoqatigiimmik ineriartornissarput pinnarnagut.
Isumaqatigilluinnaqqeqqissaarlugu
taanna oqartariaqarpunga. Uanimi imeq isorliunerusuni akisuneruneranut peqqutaavoq
imip aqqutaanik qallunaatut taalluaannarlugu rċvandsledninngeqannginnera.
Kisiannili
akerlianik erngup kuuinnartup aqqutaanik illoqarfinnik anginerusuni peqarnerani
aningaasaliisoqarsimaneranik annertuumik imeq akikinnerusutut ippoq.
Akerlianilli isorliunerusuni soorlu assersuutigineqarmat aamma Illoqqortoormiit
tassani qamussuit apusiutit akisoqisut illuminngaaniit illumut pajuttorlutik
ingerlaavarput naak akerlianik qujanartumik maannakkut naalakkersuinikkut
ataatsimut pilersaarummik ilanngunneqarsimasut ineqarnerup tungaatigut
aaqqiisoqartussaq. Taamaattumik aamma akit apparsaataasinnaasut.
Taamaattumik
uani qallunaat nunaannut naalagaaffimminngaaniit
namminersuleriartornissatsinnut aningaasaliissutaasartut atorneranni tassani
atuunneranni pisariaqarluinnaqqeqqissaarpoq maannangaaq inuiaqatigiit
isorartoqisumik najugaqartugut ineriartoqqinnissaannut tamakku qulaajarnissaat
inaarsarnissaat aningaasartuutaanerisa apparsarnissaat.
Taavalu
siunissamut namminiilivinnissatsinnut aamma qulakkeerinnittoqartussaavoq
tassuunatigut. Qularutissaanngilarmi isorliunerusuni aamma
inueruttoqarnavianngimmat inoqartuaannarnissaa ilimanaateqarluinnarmat.
Taamaattumik
uani Siumuminngaaniit uagut oqariartuutigisatsinni uterfigeqqiarukkit Siumup
oqariartuutigisai tassalu avannaani qeqqani kujataani tunumilu
regionikkaartumik ineriartortisinissaq, inuutissarsiornikkut,
ilinniartitaanikkut, sanaartornikkut angallannikkut pilersaarusiorneq nuna
tamakkerlugu ingerlateqqilernissaa. Tassani aamma Siumuminngaaniit aamma oqariartuutigivarput.
Taavalu
ilaatigut uani killiffitsinni eqqaaqqajaaneqartorujussuusoq ingammik
illuatungiuliuttuninngaaniit tassalu Naalakkersuisut qanoq
iliuuseqarumannginnerat qanorlu iliuuseqarsimannginnerat. Ilaatigut ilumoorpoq
ukiup naajartulernerani ullut nutaat aallartinneranni naatsumik ingasattumik
oqaatigalugu puullaaqisoqarsimavoq. Aatsaallu januarip 20-ani Naalakkersuisunit
pilersitsisoqarsimavoq. Taamaattumik Inatsisartuni oqaluuserisassanik
siunnerfinnik tunniussisoqarnissaata tungaanut tassalu martsip 4-ta tungaanut
ullut 15-niinnaat periarfissaasimapput.
Taamaakkaluartoq
Naalakkersuisut assigiinngitsutigut saqqummiissarnerminni maannakkumut
killiffik eqqarsaatigalugut siunnerfiit assigiinngitsut saqqummiussoreerpaat
aammalu nuannaarutigilluinnarpara uani Naalakkersuisut ersarissarluarmassuk
innuttaasut qanimut suleqatigilluinnarlugit alloriaqqinnissaq pissasoq.
Taamaattumik namminersulivinnissamut suleqatigiissitaq naatsumik oqaatigalugu
saqqummiussassai Inatsisartuni oqallisaareerpata alloriaqqinnissaq
tulliukkumaartoq.
Taamaattumik
siunnerfiit aammalu inuiaqatigiinnut sunniutaasussat
qularutiginngilluinnaqqeqqissaarpara taamanikkussamut inuit qanimut
suleqataaffigisimasatik aamma taamanikkut oqalliseqataaffigalugit
alloriarfigeqataaffigiumaaraat.
Taamaattumik
Siumumiit ilaatigut taakku toqqammavilersuutigalugit regionikkaartumik aammalu
nuna tamakkerlugu pilersaarusiortarneq inissinneqaqqinnissaa
kaammattuutigisimavarput. Aamma ilaatigut nunarput tamaat isigalugu
ineriartortitseqqinnissamik taakkartuigaangatta puigorneqaqqajaasarpoq
maannakkut naalakkersuinikkut eqqaaneqallattaarluni suliniuteqarfigineqalersoq.
Tassalu Kalaallit Nunatta kangiata avannaarsuani nunap eqqissisimatitap
nunarsuarmi annersap aningaasarsiornikkut aammalu ilisimasassarsiornikkut
annertuumik assigiinngitsutigut iluaqutaalersussaq maannakkut
qulaajarneqarsinnaanerani naalakkersuinikkut suliarineqartoq.
Ilaatigut
hvidbogeliortoqarsimanera tassalu qulaajaasoqarsimanera siunertaralugu uani
mingutsitsisimaneq kisiisa eqqartuinnarnagit kisianni ineriartortitsinissamut
atortorissaarutitigut periarfissaasinnaasut alloriaqqinnissamut
taakkartorneqartut isumaqarpunga aamma puigornagit eqqartortariaqaripput.
Assersuutigalugu
ilaatigut maannakkut folketingimi taakkartoqqajaaneqarpoq mestersvigep
matuneqarsinnaanera tassuunatigut qallunaat namineq illersornissamut aammalumi
hagenimi 1933-mi nunarsuarmi eqqartuussivissuarmi aalajangerneqarsimasut
toqqammavilersuutaat assigiinngitsut eqqarsaatigalugit 20 millionit tikillugit
aningaasartuutaasarsimalluni avannaani sakkutooqarnikkut ingerlatsinermi
mestervigep ingerlanneqarnera ilanngullugu peerneqarsinnaanerat
aarloqqutigineqarlutik taakkartorneqartarput.
Taamaattumik
aamma iluatsillugu naalakkersuinikkut suleriaqqinnissami nunarput tamaat
ataatsimut isigalugu ineriartoqqinissamut taakku misissugassatut
periarfissatsialattut isigaarput taamaalilluni aamma ilaatigut akit
toqqammavilersuutigineqartut qaffaseqisut immaqa apparsarneqarsinnaapput tunup
avannaarsua eqqarsaatigalugu.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Qujanaq
tassalu taamaalilluni allanik oqaluttussaarukkaluarami. Nalunaarpoq Kuupik
Kleist Inuit Ataqatigiit.
Kuupik
Kleist, Inuit
Ataqatigiit oqaaseqartuat.
Oqareernittuut
siunnersuuteqartup taamatut oqallisissiamik saqqummiussinera qujarupparput.
Imatut aamma paasivarput apeqquteqaat toqqammavigalugu oqallinnissamut
siunnersuuteqarneq tassaasoq Inatsisartunut Naalakkersuisunullu tikkuussinissaq
inuiaqatigiit aaqqissuussaanerat eqqarsaatigalugu suut aaqqissuussinermi
sianigisariaqarnersut aaqqitassatullu isigineqarnersut tikkuaaffigissallugit.
Taamaattumik
Inuit Ataqatigiit sinnerlugit oqaaseqartutut taamaaliorpunga. Aamma taamaattumik
amerlaneqqusaannermik una oqallinneq imaqarsorinngilara. Naak
Aningaasarsiornermut Naalakkersuisup arlaleriarluni oqaraluartoq
amerlanerussuteqarluartut imatut isumaqarmata taanna qujassutigalugu.
Isumaqarpunga uani oqallinnermi ikinnerussuteqartut amerlanerussuteqartullu
isumaat tassaasariaqartut suleriaqqinnissamut tunngavigineqartussat aammalu
Naalakkersuisut neriorsuuteqarnerminni saqqummiussissamaarlutik ilaatigut
eqqarsaatissamittut ilanngutissagaat. Aamma ikinnerussuteqartut saqqummiussaat.
Imaassinnaavoq
isumaqatigineqanngitsoq taanna. Soorunalimi takussavarput Naalakkersuisut
saqqummiussilerpata isummersornermi.
Aamma
pingaartumik inusssutissarsiornermik ineriartortitsineq aningaasarsiornermillu
ineriariartortitsineq eqqarsaatigalugu isumaqarpunga ersarissumik imaluunniit
eqqaamaqqissaartariaqaripput tamakkununnga tunngasut uagut nammineq
akisussaaffigigatsigit. Inatsisartut aammalu inuiaqatigiinnut kalaallinut
sulisut akisussaaffigaat aningaasarsiorneq inuussutissarsiornerlu ineriartortissallugu.
EU-mi
isumaqatigiinniartoqassagaluarpalluunniit imaluunniit statsministerip
siunnersuuteqarneratut inuussutissarsiorneq pillugu Danmarkip nunattalu
akornanni ataatsimiititaliortoqassagaluarpalluunniit naggataatigut
akisussaaffik tassaavoq kalaallit namminneq akisussaaffigisaat. Aammalu
Inatsisartut ilanngullutik akisussaaffigisaat. Taanna
puigornaveersaarneqartariaqarpoq.
Imaalissanngimmammi
oqalliffiit taakkua allat tamakkiisumik aalajangissagaat sumik siunnerfeqarluta
ineriartortitsissasugut. Taakkua ilapittuutaasinnaapput. Kisianni siunnerfiit
uagut nammineq aalajangissavagut. Aammalu ilusilersuineq aaqqissuussinerlu
nammineq aalajangissavarput.
Aamma uani
oqallinnermi oqaluttuarisaaneq ungasinneq qaninnerluunniit eqqarsaatigalugu
oqalussagaanni oqarpunga annertunerusumik kikkut sumik pisuutinniassallugit
oqallinnermik manna akoqanngitsoq. Uagut tikkuartorpagut ajornartorsiutitut
isigisagut inuiaqatigiillu aaqqissuussaanerisa kingunerannik
ajornartorsiutaalersimasut immaqa annertunerusumik ataqatigiissaarinnginnermik
pissutillit. Aamma soorunami uagut Inatsisartuni Naalakkersuisunilu
ilaasortaasarnitsinni tamakkiisumik akisussaaqataaffigisagut.
Akisussaaqataasimaneq
imaanngilaq kingornatigut isornartorsiusinnaannginneq imaluunniit isornartorsiuisinnaanermik
mattussineq isumaqarpunga pissussissaanngitsoq qanorluunniit
akisussaatigisimagaluaraanni.
Siunnersuuteqartup
annertuumik nunaqarfinnut tunngasut eqqartormagit tassani kingullermik
inuiaqatigiit aaqqissuussaanerat pillugu oqallittoqarmat akinik piviusunik
taaneqartartut atuutsilerneqarnissaannut tunngasumik oqallinnermi Inuit
Ataqatigiinni saqqummiussarput tassaavoq isumaqatigalutigu akit piviusut
saqqummersinneqassasut aammalu sapinngisamik atuutsinneqassasut. Kisianni
taassumap malitsigisaanik Inatsisartut imminnut pisussaaffilertariaqarput
tamatuma kingorna aalajangersussallugu kikkut taava akit taakkua qaffasissut
pinngorpata kikkut qanoq annertutigisumik tapiiffigineqassanersut
aalajangersussallugu.
Minnerunngitsumillu
siunnerfiit suut toqqammavigalugit tapiissutit tamakkua tunniunneqassanersut.
Soorunami eqiterussinissaq nunaqarfinnillu amerlasuunik matooraanissaq
siunnerfigigaanni taava akinik piviusunik taaneqartartut atuutsilerneqarnissaat
aqaguminngaaniit atuutsilerneqarsinnaapput. Taava nunaqarfinni illoqarfinnilu
minnerusunik inuusoqarsinnaajussaassooq ullormiit ullormut. Taanna
nalunanngilluinnarpoq.
Taamaattumik
akit piviusut atuutilersinnaanerat taamatullu annertutigisumik akinik apparsaanissamik
sumilu qanorlu amerlatigisunik inuusoqarnissaanik aalajangersuinissamik
imaqarpoq.
Isumaqarpunga
naalakkersuinikkut suliaqartut suliassaannik pingaarnerpaajusoq
aalajangersassallugu tapiissutit qanoq ittut sumi tunniunneqassanersut misissuiffigineqassasoq.
Akit piusut nassaarinissaat teknikerit nassaarisinnaavaat. Taanna maani
oqaluttarfimmi isumaqarpunga ajornakusuussasoq nassaariniassallugu.
Uagut
aamma siunnersuuteqartutuut Naalakkersuisut immaqa siusinnerulaartukkut
saqqummiussisinnaanera kissaatiginartissagaluarparput. Kisianni neriuppunga
periarfissaqassasut piffissap ingerlanerani uterfigillattaassallugu manna
oqaluuserisaq. Isumaqarpunga aamma allarpassuarnut Inatsisartut
aalajangersaaniartarnerannut sunniuteqartariaqartoq. Aammali inuiaqatigiit
aaqqissugaanerat pillugu oqallinnerit tassaasariaqartut oqallinnermi allanut
annertuumik sunniuteqartussat. Tassanimi aalajangersussavarput ungasinnerusoq
eqqarsaatigalugu siunnerfiit qanoq ittut siunnerfiginerlutigit. Taava
iliuusissat allat tamanna naapertorlugu aaqqissuunneqassapput. Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Tullinnguuppoq
siunnersuuteqartoq Jĝrgen Wĉver Johansen.
Jĝrgen
Wĉver Johansen,
siunnersuuteqartoq, Siumut.
Qujanaq.
Siullermik soorunami isumaqalersitsiniaasoqassanngilaq uanga nunaqarfippassuit
matoorarneqarnissaat siunnersuutigigiga. Kisianni Inatsisartut partiivinit akit
piviusut ilanngullugit naliliiffigineqarnissaat taanna pivara. Aamma
qularineqassanngilaq nammaqatigiinnermik tunngaveqarluta maani nunaatsinni
ingerlatsiuarnissarput taanna avaqqunneqarsinnaanngimmat. Nuna taamak
angitigisoq taamalu inikitsigisoq inuuffigigatsigu. Kisianni
sapiissuseqartariaqarpugut ilumut namminersulivikkusukkutta. Aamma taamaattariaqarpoq.
Taamaassaguttalu
aamma qularutigineqassanngilaq nuannersuinnavinnik aalajangigassanik
peqarnavianngimmat. Aamma nuanniitsorpassuarnik nalorninartunik aamma
ilaqassapput. Tassanilu soorunami apeqqutaaginnarpoq uagut naalakkersuinikkut
qinikkatut suliaqarnitsinni suna pitsaanerusutut nalilerneripput.
Uani
oqaaseqarfigineqarsimasut tamaasa oqaaseqarfigissanngilakka imaluunniit
oqaaseqarsimasut tamaasa oqaaseqarfigissanngilakka. Kisianni ataaseq
pingaartinneqartinneqartariaqartutut isumaqarfigisara, tassalu aamma
oqaaseqartup kingulliup oqaatigisaa apeqqutit makku
uterfigillattaarneqarnissaat pilersaarusiap nutarterneqarnerata
ingerlanneqarnerani pingaaruteqarpoq.
Taamatuttaaq
pingaaruteqarpoq Namminersorneq pillugu Isumalioqatigiissitat suliartik
saqqummiutereerpassuk Inatsisartut piffissaqarluarlutik oqaluuserinissaannut
periarfissaqarnissaat.
Ajornaqaaq
2 timet imaluunniit ualeq ataaseq atorlugu taassumap naammassineqarsinnaanera
uanga qularaara. Pitsaasumik erseqqissumillu siunnerfinnik tamatta
akisussaaqatigiilluta suliarisinnaasatsinnik angusaqarfiusumik
oqallisissagutta. Taamaammat taanna aamma soorunami neriuppunga Inatsisartut
Naalakkersuisullu nalilersorumaaraat. Tassalu selvstyrekommissionip suliaata
piffissaqarfigineqarluarluni suliarineqarnissaani oqaluuserineqarnissaanik
piffissaliinissaq immaqaluunniit qulequtakkaarlugit ullunut assigiinngitsunut
agguataarlugit.
Taakkulu
qulequttat ilaat tassaavoq tassaasussaassaarlu aningaasarsiornikkut qanoq aamma
aaqqissuussiniarneq. Sapaatip akunnerup kingulliup ingerlanerani imaluunniit
marlunngornerpat pensioninut tunngatillugu eqqartuivugut. Tassanilu naak ulloq
taanna Inuit Ataqatigiit suliumajunnaaqqagaluartut taamaattoq isumaqarpunga
Inatsisartuni oqaaseqartut oqalliseqataasullu annertuumik Naalakkersuisunut
piumasaqaateqartut aalajangiiffigisassatut siunnersuutaanngikkaluartoq
taamaattoq piumasaqaatigineqarpoq Naalakkersuisut aamma inuiaqatigiit
aaqqissugaanerannik pilersaarusiap suliarineqarani ilanngullugu suliarissagaat
aningaasat sapinngisamik amerlanerpaat maani nunatsinni
kaaviiaartinneqarnissaat. Aamma
soraarnerussutisiat eqqarsaatigalugit. Aamma allatigut taamaaliornissaat
soorunami avaqqunneqarsinnaanngilaq. Taamaattumik aamma inuiaqatigiit
aaqqissuussaanissarput oqaluuserilerutsigu avaqqussinnaanngilarput aamma ukiut
tamaasa sinneqartoortuusaartarnerput taanna oqaluuserissallugu.
15, 20, 30
millionikasiit nunarput ajutuuvissappat qanoq sivisutigisumik iluaqutaassagamik
uffa aningaasat taakkua immaqa sulisinneqarunik misileraanernut aalisarnerup
iluani inuussutissarsiutitigut siarsaanermut misileraanermut atorneqarunik
sunniuteqarnerungaartumik inissisimasinnaagaluartut.
Tamakkuupput
aamma tunngaviusumik isummerfigineqartariaqartut. Aningaasat sulisinneqarpata
pitsaaneruvoq uninngaannarluta ajoqatigiinnik ingerlatsinissarput pinnagu.
Aamma misileraanngikkutta nikeriarnavianngilagut. Taannalu
eqqaamasariaqarparput.
Taamaattumik
aningaasat nunatsinni sulisinneqarnissaat pingaaruteqarpoq aamma tamatuma
siunnerfigineqarluni inuiaqatigiit aaqqissuussaanerannut tunngassuteqartut
nutarterneqarlutik suliarineqalerpata qularutissaanngivissumik
iserfigineqartussaassaaq minnerunngitsumillu selvstyrekommissionip suliaa
saqqummiunneqarpat paasinarsiumaarmat aningaasat qasserpiaat maanga nunamut
tunnatilluunniit nunatsinniit aniaannartut ilaatigut sumi qanorlu nunatsinni
kaaviiaartinneqaqqaarnissaat taassuma isumagineqarnissaa qanoq iliornikkut
anguneqarsinnaanersoq.
Tamakku tamarmik
pingaaruteqarput aamma aningaasanut tunngassuteqartut pingaaruteqarput.
Isumaqarama paasineqartariaqartoq aningaasat kaaviiaarneri maani nunatsinni
isumaqarmata suliffinnik amerlanerusunik isertitsisoqartartoq. Misileraanerit
tamaasa suliffinnik pilersitsisisarpugut ilaat qularutissaanngitsumik immaqa
suliniutinik qulinik ingerlatsigutta arfinillit arfineq marluk ajutuussapput.
Soormi pingasut sisamalluunniit ataavartumik suliffinnik pilersitsinermik
nassataqarpata.
Taamatut
eqqarsartariaaseqanngikkutta suliffiit amerlanerusut
pilersitseqataaffiginavianngilagut. Suliffiit amerlanerusut
pilersitseqataaffiginngikkutsigit taava namminersulivinnissatsinnut
oqaluttuartarnerput taanna sinnattuinnaassaaq. Isumaqarpunga sorpassuartigut
Inatsisartuni Naalakkersuisullu peqatigalugit suleqatigiissutissaqartugut.
Taamaattumik oqaluuserisassat ima ittut uterfigillattaarneqarnissaat
neriuppunga aamma aqqutissiuunneqarumaartoq. Naggataatigullu
oqaatigeqqiinnassavara isumaqarama Inatsisartuni pisussaaffigigipput Namminersorneq
pillugu Isumalioqatigiissitap suliani saqqummiuppagu sukumiisumik
pipallataanngitsumik maani Inatsisartuni eqqartornissaa pisussaaffigigatsigu.
Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Taava tullinnguuppoq
Aningaasarsiornermut Naalakkersuisoq.
Augusta
Salling,
Aningaasarsiornermut Naalakkersuisoq, Atassut.
Qujanaq. Inuit
Ataqatigiit oqaaseqartuata Kuupik Kleistip oqaatigivaa amerlanerussuteqartut
tapersiinerat qujassutigigakku isumaqarfiginagu manna oqallinneq
amerlanerussuteqarnermik tunngaveqartumik oqaluffiussasoq. Kisianni tassa uani
siunnersuuteqartup taperserneqarnissani kissaatigivaa Naalakkersuisut 2003-mi
saqqummiusseriissasut inuiaqatigiit aaqqissugaanerat pillugu iliuusissatut
pilersaarummik nutartikkamik.
Tassalu taanna
uanga isumaqarfigilluinnarpara aamma Naalakkersuisuninngaaniit isumaqarpugut
taamatut saqqummiussinissaq pisariaqartoq kisianni tamanna 2003-mi ukiakkut
pisinnaanngitsoq pissutigalugu ilaatigut Ataatsimiititaliat annertuut
pilersissimasatta suliarisimasaat Inatsisartuninngaaniit ersarissumik
isummerfigineqaqqaarnissaat pisariaqarmat.
Taamaattumik
ukiamut saqqummiussinata 2004-mi saqqummiussinissatsinnik oqariartuupput taanna
amerlanerussuteqarluartunit taperserneqarmat taanna qujassutigaara. Aamma Inuit
Ataqatigiit oqaaseqartuata Kuupik Kleistip imannak oqaatigimmagu immaqa EU-mi
isumaqatigiinniarnerit aammalu Ataatsimiititaliat assigiinngitsut
oqariartuutaat kisimik utaqqineqassanngitsut taakkua politikkissarput suliarissanngikkaat.
Aamma Naalakkersuisut taamak isumaqanngillat.
Kisianni uagut
taakku atorusuppagut siunissami inuiaqatigiit aaqqissugaanerat pillugu
ilusilersuinissami politikkikkut taakku tunngavigalugit oqallissimaneq
atorfissaqartipparput. Taamaattumik alajangiusimavarput oqallinnissat taakkua
uagut pingaartutut aammalu soqutiginarluartutut suliatut isigisavut taakku
oqallisigineqareerpata taava inuiaqatigiit aaqqissugaanerat pillugu
iliuusissatut pilersaarummik Naalakkersuisut ilusilersukaamik maani oqallisereersimanerit
tunngavigalugit aamma ilusilersorsimasatsinnik aamma saqqummiussaqarusuppugut.
Taamaalinngikkutta naatsorsuutigisinaavarput saqqummiussarput immaqa
pipallataavallaassaqaaq. Taavalu inuiaqatigiinni immaqa aporannermik
annertuumik pilersitsisinnaassaaq. Tamannalu uagut Naalakkersuisut
tungaaninngaaniit kissaatiginngilarput.
Kissaatigaarput
annertuumik inuiaqatigiit oqallissimanerat tunngavigalugu aamma siunissami
inuiaqatigiinni aaqqissuussinissami pilersaarummik amerlasuunik peqataaffigineqarsinnaasumik
saqqummiussaqassalluta. Tamannalu naatsorsuutigaarput 2004-mi
naammassisinnaassallugu. Tassalu pissutigalugu ukua inuiaqatigiinnut
annertuumik suniuteqarsinnaasumik misissuinerit ingerlanneqarsimasut aammalu
EU-mut tunngatillugu isumaqatigiissutit nutarternissaanut tunngaviusinnaasut
takussutissartaat tassani takuneqarsinnaalissasut naatsorsuutigigatsigit.
Tamakku
utaqqeqqaanngikkutsigit massakkut ukiamut saqqummiussereeraluarutta
naatsorsuutigisinnaalluinnarparput oqallinnerit ingerlanerini annertuumik aamma
allanngortiterisariaqassalluta. Taamaattumik pingaaruteqarpoq ukua apeqqutit
annertuut inuiaqatigiinnut siunissamut annertuumik assut sunniuteqartussat
taakkua utaqqeqqaartariaqarpagut. Naak inuit ilaasa utaqqineq immaqa
utaqqikatanneq pilersimagaluaraat. Kisianni pisariaqartutut uagut
Naalakkersuisuninngaaniit isigaarput.
Siunnersuuteqartup
aatsaannguaq aamma eqqaasai aningaasat taakkua sinneqartoortuusaartarneq taanna
eqqartugaa uanga isumaqarpunga nunatta karsia aquttariaqarparput aamma
nakkutigisariaqarparput aamma sinneqartoortarnissaq pisariaqarpoq.
Sinneqartooruteqartumik aqutsisariaqarpugut. Pissutigalugu
nalunngilluinnaqqissaarparput ukiut ornitagut annertuumik
aningaasartuuteqarfissatut takusinnaalereersimasagut taakku aamma piareersarfigisariaqaratsigit.
Soorunami una
allaalluinnaqqissaarpoq aningaasaliiffissaq ukiuni qanittuni suli taakku
aningaasartuutit annertoorujussuit takkutinnginnerini
aningaasarsiorluarfissatut aningaasaatitta erniorluarfissaattut
takusinnaagutsigu taava tassa taanna soorunami aningaasaliinissaq taamatut
akilersinnaalluartuuvoq kisianni puigussanngilarput ukiorpaalussuit matuma
siornatigut nunatta karsia aningaasatigut amigaateqalermat annertuumik tamanna
aamma inuiaqatigiinni Namminersornerullutik Oqartussaniinnaanngitsoq
inuiaqatigiinni immaqa aamma annertuumik allaat ilaatigut annernartumik
misigisimasaqarfiusimasoq taanna tikeqqissannginnatsigu.
Taamaattumik
aningaasanut aqutsineq peqqissaarluta ingerlattariaqarparput. Tamannalu
tunngavigalugu Naalakkersuisuninngaaniit pingaartipparput aningaasanik
sinneqartooruteqartumik missingersuusiortarnissaq. Aamma minnerunngitsumik
ingerlatsinermut aningaasartuutit appartikkiartuaarnissaat taanna
pingaarluinnartutut aamma isigaarput. Tassa marloqiusamik ingerlatsinermut
aningaasartuutit annertuumik qaffasinnerat pisortat ingerlatsineranni taanna
misissuiffiginiarlugu oqaatigereerparput. Taamaattumik neriulluarpugut aamma
siunissami ingerlatsinermi aningaasartuutit appariartornissaanik tamanna
kinguneqarsinnaajumaartoq.
Kisianni soorlu
tassa oqareersunga Naalakkersuisuninngaaniit qilanaaraarput apeqqutit annertuut
inuiaqatigiinni isummerfigineqartariaqartut naammassereerpata taava
pilersaarummik maani aamma saqqummiussaqarumaarnissarput. Qujanaq.
Aqqaluk Lynge,
ataatsimiinnermi
aqutsisoq, sinniisussat pingajuat, Inuit Ataqatigiit.
Taava
tullinnguuppoq Ole Dorph Siumut.
Ole Dorph, Siumut.
Qujanaq.
Naatsuaraarannguamik. Siullermik inuiaqatigiit aaqqissugaanerat pillugu
iliuusissatut siunnersuutaa Jĝrgen Wĉver Johansenip assut uangattaaq
nuannaraara aamma oqallisigissallugu maannakkut tulluartutut isigaara. Aamma
oqarfigissavakkit tapersersorpakkit aamma tapersersortuassavakkit taanna
qularissanngilat.
Aamma Naalakkersuisut akissutaat uunga oqallisissiamut taakku uanga tusaatissatut tigussavakka. Naak pakatsissutigilaaraluarlugit annertunerusumik maannakkut oqariartuuteqarmata iliuuseqartoqanngitsoq. Namminersorneq pillugu suleqatigiissitamik ingerlatsisoqarpoq EU pillugu isumaqatigiinniartoqassooq. Statsministeri Naalakkersuisut Siulittaasuat taakku arlaanik pilersitsiniarput. Utaqqigallarta utaqqisa utaqqisa utaqqisa isumaqarpunga taanna patsinalaartoq.
Manna nuna unga inuuffigalugu nuannarivara aamma inuuffigiussavara kisiannili manna nuna qimatsiaraangakku nunanullu allanut alakkaraangama takusarpara qanoq sukkatigisumik nunat ullumikkut uagut unammisagut ingerlasut. Danmarkimut piinnaraangatta oqarsinnaagunarpugut 200 kilometerersorlutik ingerlarsorput. Aamma Islandikkut taamaapput.
Uagut maani ajaappisserluta pisorujoorpugut isumaqarpunga taamaattariaqanngitsugut. Ingerlasariaqarpugut sukkanerusariaqarpugut aamma pilersaaruteqarnerusariaqarpugut maannakkut tamatta namminersornissaq siunertaralugu suliuniuteqarpugut aamma taamaattariaqarpoq.
Taava nalunngilarput qisussagut aamma killeqartut. Taakkua atorluarnissaat pinngitsoornagu aamma tamatta qulakkeerniarsimasariaqarparput.
Immitsinnut oqarfigisariaqarpugut inerisaaneq sumiuna piguni pitsaaneq anguneqarsinnaasoq tassami tamatta nunarput tamavissuat assigiimmik pilersussallugu inerisassallugu akissaqanngilagut. Taamannak oqalunniarutta taava immitsinnut salloqittarujussuarpugut. Aalisarneq takornariaqarneq aatsitassarsiorneq allallu nunatsinni uagut isumalluutissatut siunissatsinni sumi pisinnaavagut.
Taava tamakkua pissappata sumi inerisaaneq ingerlanneqassava. Imaattariaqarattami suut ingerlalluartut suli ingerlalluarnerulernissaat pillugu taava taakku tapersersortariaqarpagut. Imannak oqarnata una sukkavallaaleqaaq niaquatigut kaanniartigu arriilliniassooq. Taamaassanngilagut taamaaliortutta kukkorujussuassuugut. Inuit ullumikkut nikerarnerusariqartut taanna tamatta takusinnaavarput. Aamma ippassaanikkunni oqallikkatta nassuerutigaarput siunissami utoqqaat amerlanerulertussaapput. Utoqqarnut aningaasat amerlanerusut atortussanngussavagut.
Taamaattumillu aningaasat pitsaasumillu tulleriiaarlugit atornissaat taanna avaqqussinnaanngilarput. Kommunit kattussuuttariaqarpagut ukiorpassuit taanna oqallisigerujoorlugu ulloq manna tikillugu qanoq iliuuseqannginnerput aamma qaangertariaqalerparput. Assigiimmik akeqartitsinerup sukumiisumik sammineqarnissaa taanna pinngitsoornagu tikittariaqarparput tapiissutit tikittariaqarpagut.
Tassami piffiit allat ingerlarusuttut ingerlasorusuttut nutsuinnarnatigit oqarfigisariaqarpagut ilissi takanna ingerlaniaritsi taava taamaaliornissigut sanilisi kalissavasi. Taanna periuseq nunatsinni amigaatigilluinnarparput. Aamma oqaluttup ilaaninngaaniit oqaatigineqarpoq inuiqatigiit piumasaat kissaataallu malillugit taanna sulinissarput taanna ilumoorpoq.
Kisianni aamma tamakku tamaasa naammassiniassagaluarutsigit nalunngilarput akissaqarnata. Politikkerillu suliassaa tassa annerpaaq tassaavoq tulleriiaarineq. Akissaqartikkusutagut akissaqartissavagut. Kisianni tulleriiaarineq taanna pinngitsoornagu pisariaqarpoq.
Politikkerip aamma suliassarivaa illinernik nutaanik
aqqutissiuussinissaq. Tassa
politikkerit suliassaasa aamma annertunerpaat ilagisaat. Aamma ullumikkut
sungiutiinnarlugu atuloorsimasarput tassa immitsinnut qunugisutut
pissusilersornerput taanna qimattariaqarparput. Tamatta ullumikkut immitsinnut
qunugivugut taanna qaanginngikkutsigu ingerlaqqissinnaanngilagut. Taamaattumik
una suliassaq uanga assut soqutiginartutut isigivara aamma siunissami
suleqatigiissaqqaarpugut.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Qujanaq. Anthon
Frederiksen Kattusseqatigiit. Taava taanna pereerpat tullinnguutissaaq
Naalakkersuisut Siulittaasuat.
Anthon
Frederiksen,
Kattusseqatigiit.
Tassa
saqqummiussaqarninni oqaaseqaatikka uteqqinnianngilakka. Kisianni aamma
nuannaarutigaara ilaatigut aamma maluginiarneqarsimammata oqaluttut
ilaanninngaaniit. Uani aamma isumaqarpunga oqallinnermi pingaaruteqartoq
mininneqartoq tassalu aamma Ataatsimiititaliat Ataatsimiititaliarsuit ilaat
suli aamma saqqummiussinngitsut maanga Inatsisartunut tassalu
eqqartuussiveqarneq pillugu Ataatsimiititaliarsuaq aamma
pingaaruteqarluinnartussaasoq nunatsinni qanoq ingerlariaqqinnissatsinnut.
Tassami
ullumikkut namminersornerulersimavugut kisiannili aamma suli ingerlatat danskit
naalagaaffianinngaaniit ingerlanneqartut taakkua eqqaaneqanngimmata
eqqaasitsissutigilaarusuppakka. Aamma taakkua soorunami nalilersuinermi
pinngitsooratik ilaasussaassammata. Taakkualu aamma aningaasaqarput,
taakkuninnga ingerlatsineq aamma naleqarpoq. Taamaammat pingaaruteqartut
arlallit nalilersuiffissat uani eqqartuinitsinni ilaasariaqarluinnarnerat
isumaqarpunga pisussaaffigigipput tamatta.
Taavalu
nunaqarfiit taakkua aamma ukiorpassuarni eqqartorlugillu oqallisigiuarpagut.
Aamma ilaatigut inuit nuttarsinnaanerannut tunngasut aamma ukiuni qaninnerusuni
eqqartorneqartalerput aammalu akiliussilluni nuutsitsisinnaanerit aamma
eqqartorneqartarlutik.
Soorunami
suliassat imaannaanngitsut aammalu nuutsitsiniaannarluni
nuutsitsisoqannginnissaat uagut Kattusseqatigiit tungaaninngaaniit aamma
malinnaaffigerusupparput. Unali pingaarnerpaasoraara taamatut
noorartitsissagaanni taava sunniutissai qanoq kingeqarumaarnersut
eqqartorneqarnerusariaqarmata.
Assersuutigalugu
oqaluttoqartarpoq fabrikkeqarfiit aalisartoqarfiit aasakkut
sulisussaaleqisartut. Assersuutigeriarutsigu Ilulissat aamma taanna
assersuutissaqqippoq, aasakkut fabrikki tamakkersorluni ingerlaleraangat
sulisussanik amigaateqartoqalertarpoq. Kisianni ukiukkut illuatungaani
saannerani fabrikki tamakkiilluni ingerlajunnaaraangat aamma suliffissaaleqisut
300-400-jut tungaannut amerlassuseqalertarput.
Immaqa
assersuutigalugu oqaatigigutsigu aasaanerani sulisussaaleqilersoqarmat
Tunuminngaaniit nunatta kangianinngaaniit ilaqutariit marluk tikisippagut
Ilulissani suliniassammata. Taava tassa qujanartumik suliartorput. Sulereermata
ukiukkut fabrikki matummat taava suniarpagut. Sumi sulisinniarpagut
suliffissaaleqisunut allanut 300-junut ilanngutiinnarlugit inunnik ikiusarnermi
aningaasartuuteqarfigineqarnissaat piffissami qanoq sivisutigisumik
ingerlanneqassava.
Isumaqarpunga
piffissat periarfissat taamaattut aamma oqaannarani taamaaliortoqartariaqarpoq.
Kisianni aamma kingunissai aammalu inuiaqatigiinnut minnerunngitsumillu inunnut
ataasiakkaanut pineqartunut qanoq tamakkua sunniuteqarsinnaaneri
nalilersuiffigilluartariaqarparput eqqarsaatigilluartariaqarlutillu.
Aamma
nunaqarfiit eqqarsaatigalugit oqartoqarniartarpoq ilaanni nunaqarfik una
imminut akilersinnaanngimmat tapiissutaannarnik ingerlatiinnarsinnaanngilarput.
Aammalu tunisassiorfiisa ilaat matuneqaannartarput. Tassanigooq
tunisassiortoqarsinnaanngimmat. Aamma assersuutissaqqissut ilagivaat Qeqertami
ukiuni qulinngulersuni tunisassiorfiup pisortaninngaaniit matuneqarnera.
Uninngareernerata kingorna namminneq nunaqarfimmiut piumassusertik
aallaavigalugu tunisassiorfik tigugamikku takutippaat imminut akilersinnaasumik
ingerlanneqarsinnaasoq.
Tassa
apeqqutaalluinnarpoq suut qanorlu piarfissaqartigisut inuussutissarsiornerup
ingerlatinneqarnissaanut aamma minnerunngitsumik inuussutissarsiorneq pillugu
tapersiisarnermi massakkut aaqqissuusseqqinniarnermi ingerlatsineq
nalilersuiffigilluartariaqartoq pinngitsoorani isumatuumik.
Tassami ilaatigut
aamma uagut Kattusseqatigiit tungaaninngaaniit naatsorsuutigisimagaluarparput
upernaaq manna Inatsisartut ataatsimiinnitsinni inuussutissarsiornermut
tapersiisarnermut inatsit nalilersuiffigineqartoq siornakkunnili siornali
upernaaq manna saqqummiunneqartussaasimagaluartoq.
Kisianni
taamaaliortoqanngilaq aamma isumaqarpunga kommuneqarfinninngaaniit aamma
tamanna allanillu inuussutissarsiutinik ingerlatsiniartunik soqutigisaqartunik
utaqqikatanneqalersoq. Taamaattumik pissutissat aammalu peqqutit assigiinngitsut
pingaaruteqarluinnartut inuiaqatigiit ingerlanneqarneranni arlalissuupput
eqqartorneqarsinnaasut.
Tassani
ingerlarsuinnarluni aamma ingerlarsortoqarsinnaanngilaq suna tamaat
puiguinnarlugu. Aamma qiviartariaqarput suut suullu assigiinngitsut
malinnaatinneqartussat. Taamaattumik ataatsimik alloriarutta aamma tullissaanik
alloriarnissamut suna alloriarfigissallugu soorunami ilisimasariaqarnera taanna
qanilliallattartoq nalunngilarput.
Taamaattumik
inuiaqatigiinni ineriartortitsineq aamma eqqarsaatigalugu saqqummiussanni
oqaatigisara inuiaqatigiinnut annertuumik pingaaruteqartut
eqqartorneqartillugit innuttaasunik tusarniaanerit taakkua annerusumik
akissuteqarfigineqanngimmata maqaasilaarpakka isumaqarpunga aamma
peqqinnartuusoq pingaartumik inuit tamat oqartussaaqataanerannik
oqaluttartilluta inuiaqtigiinni aalajangigassat pingaaruteqartut aamma
innuttaasuni oqallisigineqarnissaat taanna pisariaqartoq
avaqqutiinnarneqarsinnaanngitsoq.
Immikkoortup tulliani
tikitassatsinni isumaqarpunga aamma attuumassuteqartoq tassani oqallinneq.
Tassa illoqarfiit sisamat eqqartorneqartarput annertuumik
siuariartortinneqarnissaat kisiannili aamma puigorneqartartoq tassaavoq
illoqarfiit. Soorlu assersuutigalugu Nuuk ullumikkut qanoq inissisimanera
qiviarutsigit inissaaleqisut qanoq amerlatigisut aamma tamatta
malinnaaffigigunarpagut qanoq ittuunersut sanaartorfissaaleqinermut tunngasut
Namminersornerullutik Oqartussat ingerlataasa eqitinnginnissaat ataatsimut
kisiannili illoqarfiit allat mikinerusut ilaatigut inuerukkiartortut
inissaaleqiffiunngitsut illussaaleqiffiunngitsut. Sooq pioreersut
atorluassanngilagut. Nutaaleriinnarluta isumaqarpunga pioreersunik aamma
atorluaanissaq tassani inuiaqatigiit ataatsimut aaqqissugaanerat
eqqarsaatigalugu ilanngullugu eqqarsaatigineqartariaqartoq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Taava
Naalakkersuisut Siulittaasuat.
Hans Enoksen, Naalakkersuisut Siulittaasuat, Siumut.
Tassa una
oqallinneq pissanganartoq aamma siunissamut alloriaqqinnissamut ilaatigut
oqariartuuteqartoq assigiinnngitsorujussuarnik inuiaqatigiinni
nalilersorneqarsinnaavoq. Aammalu kingullermik eqqaamassavarput aaqqissuussineq
tassalu ingerlaasissatsinnut tunngasoq ukiup affaata missaannaani
suliarineqarnikuummat. Taassumalu kingunerisaanik ajoraluartumik inuaqatigiit
suleqatigiissutigisinnaasaat annertuumik innarlerneqarsimapput.
Politikkikkut aporaannerit sakkortuut ingerlanneqalersimapput. Kommunit anginerit sisamat ineriartortinneqarnissaat qitiutillugit oqariartuutigeqattaarneqarnerisa kingunerisaanik kommunit sanngiinnerusunik taaneqartartut mikinerusut aamma immikkoorlutik sulialersimapput.
Tassa kommunit imminnut mikisut annaanniarlutik kattullutik ataatsimeeqattaarnerit aamma ingerlappaat. Kommunillu anginerit aamma immikkut ataatsimiittaqattaarlutik. Taamaalillutik tassa suleqatatigeeriarnissamut aqqutissat annertuumik innarlerneqarput. Ajugaaniunnerit ingerlanneqalersoormata. Uffa ataatsimoorluta oqaloqatigiilluarlutalu aaqqissuussisimasuugutta pissutsit taakku qimanneqartussaagaluartut.
Kukkoqqittoqassanngilaq aamma Naalakkersuisut massakut pingaartilluinnaqqissaarparput innuttasut peqataatillugit ilusilersuinerit ingerlanneqartariaqartut. Uanilu Kuupik Kleistip oqariartuuta isumaqatigilluinnaqqissaaarpara tassalu uagut nammineerluta massakkut ilusilersuisariaqarpugut.
Takussutissaqareerpoq arlalippassuarnik kukkusaqattaarnivut ilinniarfiginagit ingerlaannaqattaartugut. Immikkunngooq ilinniarsimasut misilittagallit siunnersortigalugit inuiaqatigiinni aaqqissussuussisaqattaarnerit ingerlanneqarput. Assersuutigiinnartigu nunaqarfinni tunisassiorfiit KGH-minngaaniit tunissutisiarineqartut aammalu sanaartorneqartut landskarsip akiligai.
Nunaqarfinni tunisassiorfiit immikkoortinniarneqalermata 125 millionilerlugit landskarsiminngaaniit pisiarineqarput. Uffa naleqanngitsumik inuiaqatigiinnut tunniunneqarnikuugaluartut. Taassumap kingunerisaanik nunaqarfinni tunisassiornikkut pissutsit ilungersunartorujussuit atuutsinneqalerput. Annertuumillu tapiisaqattaarnerit ingerlanneqalerlutik.
Ukioq kingulleq 65 millionit qaavatigut nunaqarfinni tunisassiorfinnut tapiissutigisartakkatta NUKA A/S annaanneqarniassammat aamma 40 millioninik tapiissuteqaqqippugut. Taassumap saniatigut Royal Greenlandi ukiunut tallimanut naleqqussaanissaanut 269 millioninik tunivarput, oqaatigineqarmat taakkua aningaasat atorlugit imminut akilersinnaasumik siunissami imminut napatissinnaasumik ingerlatsineq tikinneqassasoq.
Kisianni piffissap taassumap iluani aamma 200 millioninik tuniseqqippugut. Nappanneqarsinnaanngimmat ajutuussammat taamatut akiliisoqanngippat. Tassa immikkut ilinniarsimasut siunnersuutaat malittariuannguarlugit uagutsinnut aamma naallerarluta ingerlavugut. Taanna miserratigineqarsinnaanngilaq.
Taassumap saniatigut ataqatigiissaagaanngitsumik ingerlatsinerit aamma nunaqarfiit eqqartorneqartaqimmata nunaqarfinnut nioqqutissanik pajuttuineq 58 millionit pilersuisumik kiffartuussinerit 58 millionit NUKAp sulissussinera 65 millionit taakkuinnaalluunniit qiviaraanni tassa 181millionit atugassiissutigineqartarput atugassiissutigineqartarput ataqatigiissaarneqanngitsumik.
Ataqatigiissaarisoqartuuppat qularnanngilluinnarpoq millionit arlallit sipaarneqarsinnaagaluarput. Tamakkuuku pissutigalugit Naalakkersuisut toqqissillutik aammalu inuiaqatigiit peqataatillugit pitsaasumik pilersaarusiornissaq siunnerfigigaat. Naak oqariartuutigineqaqattaaraluartoq Naalakkersuisut sunngitsut suliniuteqarnianngitsut. Taamatut oqariartortarnerit isumaqarpunga unikaallatsillugit suleqataanissamik kaammattuinerusariaqartut.
Naalakkersuisut massakkut siunnerfigimmassuk sapinngisamik imminut akilersinaanerpaamik ingerlanissaq minnerunngitsumillu aamma tapiissutit sapinngisamik minnerpaaffissaanut pisillugit ingerlanissaq siunertarimmassuk.
Angallanneq eqqarsaatigissagaanni 120 millionit missaanni ukiumut tapiissuteqartarpugut. Angalaniartullu akissaqanngillat, angallassineq annertunerpaamik pisortanit isumagineqarpoq. Inuinnaat namminneq angalasinnaanerat periarfissaqanngilaq ima akisutigimmata billitsit uffalu suli qaavatigut tapiissutit 100 millionikkaat tunniussuunneqaraluartut.
Royal Greenlandi allanngortiterneqalermat 350 millionit missaanik aamma amigartoorutigillaratsigu tamatta eqqaamagunarparput. Tassa immikkut ilisimasallit siunnersuutaat aasiit malikkatsiginaasiit.
KNIp allanngortiternera 400 millioninik ajunaarutigillaratsigu aamma eqqaamavarput ila taagugassagut amerlaqaat. INI A/S-ip massakkut aamma kiffartuussinera allanngortinnialerparput piffissap sivikitsup iluani. Taamanikkut uffa ilaatigut oqariartortoqaqattaaraluartoq kommunit suleqatigalugit taanna aaqqinneqarniarli. Arlariiaanik allaffissornikkut ingerlatsinerit qimanneqarniassapput.
Kisianni aamma soqutigineqanngilaq, arlariinnik allaffissornerit akissaajarnarnerummata taanna aamma siunertarineqarsimagunarami aamma taanna naammassineqarpoq.
Kommunit kattussuunnissaannut tunngasut oqaatigereerpara kommunit angisuut mikisullu akunnerminni assortuunnerannut pilersumik ajoraluartumik iluatsinngitsoorpoq. Uffa oqaloqatigiilluarnerit paaseqatigiinnerillu pitsaasumik ingerlanneqarsimasuuppata iluatsilluarsinnaagaluartut. Neriuppunga massakkut kommunit kattuffiat peqatigeqqissaarlugu aamma aaqqiissutissanik siunnersuuteqassaalluta. Tassa oqaluinnarluni ingerlatsiniarneq tamaanga killittariaqalerpoq.
Soorunami aamma Naalakkersuisut siunertaraat sapinngisamik inuiaqatigiit imminnut napatittut pilersinnissaat imminut akilersinnaasumik ingerlatsinissaq taanna avaqqunneqarsinnaanngilaq. Kisianni aamma eqqaamassavarput ilagut pilliutigissannginnatsigit. Aamma uagutsitulli innuttaaqataallutik nunatsinni napatitseqataammata. Taanna isumaqarpunga aamma eqqaamasariaqartoq. Tassami uppernarsaatissaqareerpoq kommunit angisuuni ingerlatsisut arlallit Namminersornerullutik Oqartussat selskabiutaasa nuussortinneqarnerat tunngavigalugu annaanneqarnikuusut annertuumik suliffissaqartitsinikkut aningaasarsiornikkullu isaatitsinermik kinguneqartumik. Taakku aamma eqqaamaneqalaassapput. Kommunit tamarmik assigiimmik periarfissinneqarsimasuuppata qularnanngilluinnartumik ullumikkornit pitsaanerusumik aamma kommunit ilaat ingerlatsissagaluarmata.
Isumaqarpunga allanngortitseriarnissami ataatsimoorluta paaseqatigiillutalu oqallinneq ingerlattariaqaripput. Soorunami aamma saneqqunneqarsinnaanngilaq assortuuttarnissarput. Kisianni eqqaamassavarput inuiaqatigiit ataatsimut isigalugit ingerlatsineq nunami maani saneqqunneqarsinnaanngimmat. Qujanaq.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Taavalu tullinnguuppoq Aningaasarsiornermut Naalakkersuisoq.
Augusta Salling, Aningaasarsiornermut Naalakkersuisoq, Atassut.
Qujanaq. tassa inuiaqatigiit aaqqissuussaanerat pillugu iliuusissatut pilersaarutit 2000-mi suliarineqarsimasoq massakkut tunngavigalugit suliat ingerlanneqarput. Aamma taakkua soorlu oqaatigereeriga soorunami inuiaqatigiinni ingerlaatsip aamma ullormiit ullormut nikerartuunera tunngavigalugu aamma naassaanngitsumut atuuttussaanngimmata taamaattumik pisariaqarpoq aamma naleqqussarlugit suliareqqinneqarnissaat.
Tamannalu aamma Naalakkersuisuninngaaniit pisariaqartutut isigaarput. Kisianni soorlu oqareersunga pingaaruteqarluinnarpoq inuiaqatigiinni annertuumik aaqqissuussaanermut aaqqissuussaanerup allannguuteqarnissaanik kinguneqarsinnaasumik oqallinnerit annertuut pisinnaasut ukiamut taakkua utaqqimaaqqaarneqarput, utaqqeqqaarniarpagut Naalakkersuisuninngaaniit taamatut allanngortiterinissamik siunnersuummik saqqummersitsinnginnitsinni.
Uani pingaartorujussuuvoq inuiaqatigiit aaqqissugaanerat pillugu iliuusissatut pilersaarutit Inatsisartuni maani oqallisigineqartut aamma oqallisigineqartut aamma eqqaassagaanni taamatut isumaqatigiikkaanni siunissamut inuiaqatigiit aaqqissuussaanerannut pilersaarummik isumaqatigiissuteqaraanni taava aamma ullormiit ullormut imaluunnit ukiualunnguit ingerlanerinnaani allanngorteqattaartarnissaa taanna pissusissamisuunngilaq. Kisianni pilersaarutip iluani suliassat ataasiakkaat pissutsit tunngavigalugit allanngortittariaqalertarsinnaanerat taanna qularutissaanngilluinnaqqissaarpoq.
Taamaattumik aamma Naalakkersuisuninngaaniit suliassat massakkut ingerlatat taakkartukkagut soorlu oqaatigivarput Naalakkersuisut suliassaq manna suliarivaat ilaatigut naleqqussaaneq innaallagissap akianut erngup kiassaateqarfinniillu kiaap akiinik allanngortiterinissaq eqqarsaatigalugu Namminersornerullutik Oqartussaniit tapiissuteqartarneq sulisartullu nuttarsinnaanerannut tunngassuteqartut suliassat tamakku ingerlanneqarpoq.
Aamma qularutissaanngilaq suliat peqqissaarullugit ingerlanneqassasut aammalu sunniutigisinnaasaat assigiinngitsut tamasa ilanngullugit suliarineqassalutik. Taamaattumik utaqqikatattoqaraluarpalluunniit isumaqarpunga peqqissaartumik suliassat ingerlanneqassappata taava tamanna pinngitsoorneqarsinnaanngitsoq.
Illerngit nutaat, illinernik nutaanik aqqutissiuussinissaq ujartorneqarpoq isumaqarpunga tamannarpiaq suliarigipput tassalu oqallinnissat annertuut ornippagut. Taakkua sunniuteqarsinnaapput illerngit nunatsinni atukkatta allanngorujussuarnerannik.
Tamanna aamma Naalakkersuisuninngaaniit peqataaffigissavarput qilanaarpugullu suliassat ingerlaqqinnissaannut. Qujanaq.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Taava tullinnguuppoq Jens Napaattooq, Siumut taamaallaat minutsit marluk.
Jens Napaattooq, Siumup oqaaseqartua.
Qujanaq. Inatsisartunut Ilaasortap Ole Dorphip oqariartuutigivaa nunanut allanut tikikkaangami 200 kilometerersorlutik ingerlasut uagullu ajaappisserluta ingerlasugut. Aamma ajunngilaq taanna nammineq taamatut nutserlugu oqariartuutigissappagu. Kisianni Hans Egedep tikinneraninngaaniit ukiut 282-nngorput. Aammalu nunatta nunasiaataajunnaarneraninngaaniit ukiut 50-nngortut taavalu naatsumik oqaatigalugu namminersornerulernitsinngaaniit ukiut 24-nngortut qiviaraanni nunap oqaluttuarisaanerani piniartukkormiuninngaaniit inuit maannakkut killiffiat eqqarsaatigalugu sulisartoqarnerup inuiaqatigiit silarsuaanut ikaarsaarsimasugut qiviassagaanni ukiualunnguit taakku suunngillat. Taamaattumik ajaappisarnata ineriartorsimanermi inuit allat 200 kilometerersortut uagut immaqa 400 kilometerersorluta ingerlaffigaarput. Taamaattumik aamma inuiaqatigiinni maannakkut killiiffigisagut eqqarsaatigalugit kakataasarsimasut uani oqaluttarfimminngaaniit eqqartorneqangaatsiartarsimapput.
Taamaattumik siunnerfiit assigiinngitsut oqaluuserineranni ilaatigut taakkartorneqarpoq nuuttoqarsinnaanerannik periarfissiisoqarnissaa. Taamaattumik ajaappiartutut isigissagaanni immaqa aamma taakku 200 kilometerersortut peqataaffigerusukkaanni immaqa mobiliti atorsinnaaruttortoq.
Taavalu illoqarfiit anginerit taakkartorneqartarput annertuumik taamaattumik illoqarfiit anginerit eqqartortillugit siunissamut ungasinnerusumut sukkaqisumik kalaallit ingerlasugut ingerlaqqinnissatsinnut aamma eqqartortariaqakkat ilaginnguatsialerpaat maannakkut sanaartorfissaaleqineq Nuuk eqqarsaatigalugu nunagissaaneq annertuumik aningaasartorfigeqqaarlugu ingerlatsilersimaneq eqqarsaatigalugu Sisimiukkut Ilulissakkut inuussutissarsiornermikkut periarfissagissaartut aammalumi illoqarfiit allat sikusartuniinngitsut periarfissarsiorsinnaanissai eqqartussannginnerlutigit. Tassuunatigut eqqartorneqarsinnaapput erngup tungaatigut tassunga killeqarmat tassunga killiinnarpunga.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Oqallisigisarput tassa aalaangiiffigisassaanngilaq. Tassalu apeqquteqaatit aallaavigalugit oqallinneruvoq. Tullinnguuppoq Ane Hansen, Inuit Ataqatigiit.
Ane Hansen, Inuit Ataqatigiit.
Tassa Ole Dorphip 200 kilometerersorneranut aliannaarnermik oqaaseqarusuummerpunga. Tassa uani uggornarpoq Naalakkersuisut annerusumik uunga oqallississiamut ersarissumik isumminnngimmata. Tassa oqallisissiortup ilaatigut oqarneratuut ukiut arlalinngorpagut piffimmi tassani uninngarusaarluta. Aammalu Atassutikkormiut saqqummiussaat annerusumik saqqummiussaqanngimmata oqaaseqarfiginianngilakka.
Kisianni Siumukkormiut ukiut qassersuanngorpagut illoqarfiit sisamat imaluunniit nunarput tamakkerlugu ineriartortitsinissamik oqalliserusaarneq isummerfiginaveersaarlugu ingammik Siumukkormiut akornanni. Taamaattumik erininarsigaluarpoq aamma sinerissami kommunit illoqarfiit sisamat avataaniittut eqqarsaatigalugit aamma uagut ingerlasoqataarusukkaluaratta kisianni annertuumik aporfissalersorneqartarpugut ingammik finanslove aqqutigalugu ingammik illoqarfiit sisamat immikkut isigineqarnerat suli annertoorujussuummat naak ersarissumik isummerfigineqarnikuunngikkaluartut qanoq nunatsinni ingerlaaseq pillugu ineriartortitsisoqassasoq.
Aamma una oqaaseqarfigerusuppara maluginiarakku Naalakkersuisut saqqummiinerminni Namminersorneq pillugu Isumalioqatigiissitap saqqummiussassaa aqaguagu assorujussuaq taakkartoraa aammalu sorpassuarnik isummernaveersaarnermut taanna kanngiffiusoq. Tassani siulleq Namminersorneq pillugu Isumalioqatigiissitap tunngaviusumik isumaliutissiissutaa saqqummermalli ersarissumik takuneqarsinnaavoq aamma suli inuussutissarsiornikkut nunattalu aningaasarsiornikkut Namminersorneq pillugu Isumalioqatigiissitap tikkuagai suli qulaajagassat annertoorujussuusut.
Tassani ilaatigut tunngaviulluni aamma tunnngaviulluinnarpoq Namminersornerullutik Oqartussat aningaasarsiornerup tungaatigut taavalu aningaasat nunatsinni kaaviiaartut eqqarsaatigalugit paasissutissanik aamma paasissutissiinaveersaartarnerat suliniarnermut tassani aporfiusarsimaqisoq pissutaaqataapput. Taamaattumik taanna inassuteqaat aqaguagu takkuttussaq aamma suli qulaajagassanik annertoorujussuarnik ilaqarpoq. Kisianni neriuppunga taamaakkaluartoq piffissami qaninnerpaami Naalakkersuisut tikkuussiumaartut qanoq isumaliuteqarnerminnut siunissaq eqqarsaatigalugu.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Taava Ole Dorph
Siumut.
Ole Dorph, Siumut.
Qujanaq. unaana
oqaaseqarfigilaarniarlugu asuli inuit nuutsinniaannarlugit
nuutsinneqartarnissaanik taanna oqariartuut soorunami inuit
nuutsinniaannarlugit nuutsinneqartussaanngillat. Taanna kialluunniit
nalunngilaa aamma isumaqarpunga piffissaajaatigeqqitariaqanngikkaluaripput
inuit nuukkusuttut pinngitsaalineqarnatik nammineq piumassusertik
aallaavigalugu nooriarsinnaanissaminnut periarfissinneqartariaqarput.
Ullumikkut
nunatsinni taamaallaat inuit pisortanit atorfillit suliffeqarfimminnit
akiliunneqarlutik nuuttartut ullumikkut nutserput. Nalunngilarput
nunaqarfippassuarni illoqarfinnilu inuit ajoraluartumik ukiup qaammatai
amerlanerpaartaat suliffissaqarneq ajortut suligatillu kommuniminngaaniit
ingerlanneqartartut annertuumik atorlugit imminnut napatinniarsarisarlutik.
Pitsaanerussannginnerluni
inuit taakkua piumassusertik aallaavigalugu nuuttuugunik
periarfissagissaartunut immaqalu taamaalillutik ukiup qaammataat arfineq
pingasut qulingiluat imminnut ilaquttatillu napatissinnaanngorlugit. Taava
qaammatit siulliit immaqa suliffissaaleqinerup nalaani pikkorissarnerit
assigiinngitsut aqqutigalugit piginnaasatik qaffatsissinnarlugit immaqa
ilinniarnernut ingerlaqqissinnaanissaat taanna pisinnaassagaluarpoq.
Oqaatiginiarneqartarunaraluarpoq
illoqarfiit taakku sisamat tassani najugaqarluniluunniit soorlu ajortuliaasoq.
Eqqaamasariaqarparput illoqarfinni taakkunani sisamani nunatta inuisa affai
tassaniipput ajortuliaasariaqanngilaq taakkunani najugaqarneq. Taamaattumik
eqqaamasariaqarparput inuit inuit ornittarpaat. Inuit inoqatitik ornittarpaat.
Taamaattumik siunissami inuit namminneq siunissaminni ujarlerlutik nuuttartut
taava tapersersortariaqarpagut.
Nuannaariinnarlugu
tallimanngornikkut unnukkut godthċbiliaasoqarneq ajorpoq godthċbiliaasartunuku
inuit inoqatitik ornittaramikkit ilaa. Aamma taanna assersuut taassunga
saatinneqarsinnaavoq.
Aamma
nalunngilarput Islandikkunni Savalimmiukkunni qanoq massakkut ineriartorneq
ingerlasoq Islandimi Reykjaviki tassani Isladimiut affai sinnerlugit
tassaniipput. Savalimmiuni ullumikkut imaattoq Savalimmiuni illoqarfiit
pingaarnerpaartaat Thorshavni taanna massakkut 18.000-nik inoqarpoq.
Taamaattumik tupigineqassanngilaq inuit inoqatitik ornittaraluarunikkit. Taanna
aamma siunissami politikkikkut isumaqarpunga unitsikkuminaattuusoq. Inuinuku
periarfissatik ujartorlugit nutersernertik ingerlakkaat.
Tapersersortariaqarparput akerlilersorunnaarlutigit. Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Taava
tullinnguuppoq kingullerpaajullunilu Palle Christiansen, Demokratit.
Palle Christiansen, Demokratit.
Marlussunnik apeqqutissaqarpunga Naalakkersuisunut aammalumi Siumumut aamalu naggataagut Atassummut.
Siullermik kingulleq tassa saqqummiussarsi atuareerpara aammali Siumut takorluukkanik ujarlersuraluarpunga taamaallaalli allatarsi tassaavoq Naalakkersuisut akissuteqaamminni allataat taanna siumut takorluugaqanngippallaarpoq. Tassa oqaasissatuakka. Uagut Demokratit tungaaninngaaniit aamma inuiaqatigiit tamaasa sinnerlugit Atassutip erseqqissumik siunissami takorluukkatik taasinnaasuugaluarpassuk taakkua Naalakkersuisut uteqaattaaginnarnagit issuaqattaaginnarnarnagit.
Taamaattumik partiissinninngaaniit saqqummiunneqarusuttut assut paaserusukkaluarpagut taamaalilluta siunissami ilusilersuinissamut qanoq ittumik ingerlariarnissarput tikkuussiffigisinnaasuugussiuk immaqa aamma piffissalersuilaarlusi ilaa.
Taava Naalakkersuisunut siusinnerusukkut ilissinnut allakkatigut apeqquteqartarnikuuvugut akissuteqarnissassinnillu piffissaqarsinnaasimagaluarlusi. Taamaattumik makkua apeqqutigeqqikkusuppakka.
Tassa apeqqutit ajornaatsunnguit pilersaarutisi sorpiaappat qanoq ilillutik aamma qanoq akeqassappat tamakkua pilersaarutit. Taava aamma pilersaaruteqaraanni taava aamma piffissalersuisoqartarpoq. Taava taakua inuiaqatigiit qaqugu piffissat killikkaangassigit qagukkut taakkua nalilersuiffigineqartarnissaat paaserusukkaluarparput. Tassa allatut oqaatigalugu siunissami takorluukkasi paaserusukkaluarpagut.
Tassa ullumi tusaasagut taavalu aamma isumaqatigiikkassili tassani kaaviiaartutullusooq iliorpusi tassalu Naalakkersuisutut tassa oqaluuseriumaneqanngitsut tassa taakkua qaqinneqartariaqarput. Taamaalilluta ilusilersuinissamut tunngasut tikinneqartussaassagamik. Taavalu aamma allatut ajornartormik inuiaqatigiit assigiinngitsumik eqqorneqartussaassapput. Taava aamma tassa saqqummiutissavasi. Kikkunnut iluaqutaassanersoq taavalu aamma qanoq eqquissanersoq inooriaatsiminnik qanoq allannguisariaqarnersut. Taavalu inooriaatsiminnik allannguissappata taava sunik neqerooruteqarsinnaassavisi. Taava ikaarsaariarneq aamma qanorpiaq ingerlassanersoq.
Taavalu Siumumut aamma apeqqutissaqarpunga Siumup oqaaseqartua maannakkut aninikuugaluarpoq. Tassa allappusi tassani misissorniarparsi ineriartornissamut killiliisut tassa inuussutissarsiornermut tunngasut taavalu aamma kaammaattuuteqarniarlusi qanoq tamanna allanngortinneqarsinnaanersoq.
Taamaattumik partiimut apeqqutigivara taakkua kaammattuutigineqartut malinniarnerisi. Tassami qineqqusaarnermi qineqqusaarutinik akerliulluinnartutut isikkoqarsinnaammata. Ilanngullugu aamma Siumut oqarpoq siunissamut samminnilerutta taava aamma ajornarnerulissaaq qanorpiaq oqassanerluni suliuniutit suut suliarineqartussaanersut. Isumaqarpunga taanna killormoortuussariaqarpoq. Taava siunissamut takorluuisinnaagaanni taava ajornannginnerulissaaq qaqukkut qanoq iliuuseqartussaassanerluni.
Taakkua naleqqatut taamatut oqallinnermi siunissamut tunngatillugu, allappusi tassa illuatungaatigut naleqqagut taamatut nutarterinissamut pilersaarutissat taakkua erseqqinnerulertartut. Imatut tamakkerlugu issuarnianngikkaluarpara, kisiannili assigiinngitsorpassuarni allagaqarpusi kisiannili nassuiaanasi. Tapiissutit ikiliserusuppasi paasinarsinerutilerlugillu aamma namminersortunngorsaarusuppusi, kisiannili qaqugu tamakkua takussavagut?
Tassa aamma assigiimmik akeqartitsiniarututta taava aamma piffiit ilaanni akikinnerulissaaq ilaannut akisunerulissalluni, taavami akisunerulerfiit qanoq iliuuseqarfiginiarpisigit?
Iliuusissatut pilersaarutit ilarpassui piviusunngoreersimasut, taava paaserusukkaluarpara aamma suut piviusunngortinneqarsimanersut. Taava Hans Enoksen, tassa Hans Enokseni suleqateqarusuppoq, taava aamma taamatut uagut perusuppugut, kisiannili suleqateqarniaraanni taava aallarniuteqartariaqarpoq taannarpiaq. Isumaqatigaara.
Taamaattumik aamma Siumumit illuatungeriit tamarmik illugiillutik taamatut siunnersuuteqarsinnaalluarput.
Qujanaq.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Tullinnguuppoq suli ingerlarsorput Anhon Fredersen, Kattusseqatigiinniit 2 minutsiinnaat kisianni periarfissarilerpatit.
Anthon Frederiksen, Kattusseqatigiit.
Tassa inuit nuttarneri nuttarinut tunngasut, uagut Kattusseqatigiinniit minnerpaamilluunniit akornutissaqartinngilarput nammineq piumassusertik tunngavigalugu nuttassappata. Aamma isumaqarpunga nunarput Savalimmiunut Islandimulluunniit tassunga atatillugu assersuunneqarsinnaanngilluinnartoq.
Taamaattumik inuit nuttarnerat imaaliinnarlugu tallimanngornikkut unnukkut Godthċbiliartarnermut assersuunneqarsinnaanngilluinnartoq, pissusissamisuunngilaq taamatut assersuussineq.
Aamma inuiaqatigiit tusiattutut ajaarpiartullu oqaatigineqarnerat isumaqarpunga pissusissamisuunngilluinnartoq. Inuppassuaqarpoq nammineerlutik suliffiuteqarlutik namminersortunik, tusiannatik ingerlalluartunik. Aamma tamakku eqqaamasariaqarput. Nersortariaqarlutillu, tusiattutut eqqartorneqarnerat ajaappiartullu eqqartorneqarnerat akuersaarneqarsinnaanngilaq.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Taava
Aningaasarsiornermut Naalakkersuisoq.
Augusta
Salling,
Aningaasarsiornermut Naalakkersuisoq, Atassut.
Qujanaq.
Demokraatininngaanniit
Palle Christiansenip apeqqutigisaa, Naalakkersuisut siunniussaannut
tunngatillugu oqaatigissavara, aningaasanik inatsisissaq aqqutigalugu aamma
Naalakkersuisut politikkikkut siuarsartariaqartutut isumaqarfigisatik aamma
suliniutit assigiinngitsut, qanoq iliuuseqarfigivaat. Tamanna aamma
aningaasaqarnermut ataatsimiititaliami peqataanissinni
naatsorsuutigilluinnarpara ilisimaarilluinnarissi.
Aamma uani
Naalakkersuisut oqaatigeqqissavara Naalakkersuisut assut pingaartippaat
inatsisartut peqataatinneqarnissaat oqallinnermi inuiaqatigiit, oqanngilagut
aqagu aaqqissuussaanerat kisianni siunissamut aaqqissuusaanerata
ilusilersorneqarnissaanut, inatsisartut peqataanissaat assut pingaartipparput.
Uagutsinnut
Naalakkersuisunut oqissagaluaqaaq oqinnerpaarpaassagaluarpoq ilissi
immineerlusi uagut tamanna suliarissagaluarutsigu suliarissagutsigu, kisianni
naatsorsuutigilluinnarparput peqataarusuttusi inuiaqatigiit siunissami
aaqqissuussaaneranut siunniussassat aamma ilissi peqataaffigerusussagisi.
Taamaattumik-una
aamma inatsisartuninngaanniit ataatsimiititaliarsuaq annertooq
pilersinneqarsimasoq. Aamma uagut Naalakkersuisuninngaanniit utaqqerusupparput
sulisitassi isumaat isummerfigeriarlugit, qanoq Naalakkersuisunut aamma
tikkuussaqarusunnersusi. Tamakku aamma ilanngukkusuppagut siunissamut
inuiaqatigiit aaqqissuussaaneranut ilusilersuinissatsinnut tamakku
ilaatikkusuppagut.
Kisianni
una eqqaasitsissutigeqqilaassavara, inuiaqatigiit aaqqissuussaaneranut suliaq
pilersaarut atuuttoq massakkut, Naalakkersuisut aamma tunngavigalugu suliartik
ingerlateqqippaat. Taanna arlaleriaqaluta maani oqaluttarfimminngaanniit aamma
oqaatigaarput.
Aamma
nalunngilara, aamma inatsisartuninngaanniit kissaatigineqartoq siunniussat
taakku ingerlateqqinneqarnissaat. Taamaammallu suliarput tamakku
tunngavigalugit ingerlapparput. Kisianni nalunngilarput inuiaqatigiinni
allanngortitsinissaq suli annertunerusoq pisariaqarsinnaasoq, kisiannili
tamanna oqallinnermik annertuumik tunngaveqartariaqartoq inuiaqatigiit tamarmik
misigisimassappata peqataallutik.
Imaaginnanngilaq
uagut Naalakkersuisuni siunniussagut inuiaqatigiinnut allat aperinagit
atuuttussanngortissagigut. Kisianni pingaartorujussuuvoq aamma
inuiaqatigiinninngaanniit siunissamut pilersaarutit annertuut
saqqummiunneqartartareersut isummerfiginissaat. Aamma oqallinnerit annertuut
tusagassiutitigut ingerlanneqartartareerput kisianni isumalioqatigiissitaq
annertoorujussuarmik suliaqarsimasoq suliaa tassa taannarpiaavoq, inuiaqatigiit
aaqqissuussaanerata qanoq allanngortinneqarsinnaanera. Tassani suliaavoq
annertoorujussuaq.
Taamaattumik
sooq utaqqissanngilarput oqallinnissarsi?
Apeqqutit
tassani eqqartorneqartut pillugit.
Uagut
Naalakkersuisuninngaanniit pingaartipparput tamakku aamma ilanngullugit
nalilersorusullugit. Taamaattumik Demokraatininngaanniit aamma partiinut
assigiinngitsuni minnerunngitsumik Atassummut apersuutigineqarmat, naak
siunniussasa? Sooq Naalakkersuisut akissuteqaataat kisiisa tunngavigalugit
akivisi?
Aamma
uanga oqarsinnaavunga immaqa Demokraatit aamma massakkut Naalakkersuisut
inuiaqatigiit aaqqissugaanerat pillugu iliuusissatut pilersaarut
tunngavigalugu, sulinerat malillugu aamma uani oqaaseqarnerminni oqaaseqartut
takusinnaalluarpakka.
Allaanerussuteqanngillat.
Taamaattumik
isumaqarpunga aamma imannak immaqa ullumikkut pisariaqaraluartumik
oqaluinnarnani, inuiaqatigiit aaqqissuussaanerat allanngortinneqarnissaanik
imaluunniit pilersaarutit allanngortinneqarnissaa ullumikkut ajartuinnarnagu,
kisianni suleqataarususseqartoqartoq aaqqissuussinissamut. Taanna malugisinnaagatsigu
uagut Naalakkersuisuninngaanniit nuannaarutigaarput.
Peqataarusuttusi
tamassi malugisinnaalluarparput aammalu qilanaaraarput oqallinnissat ukiamut
annertuut ingerlasussat tunngavigalugit, Naalakkersuisunut suliaqaqqinnissarput
taamaalilluta inuiaqatigiit siunissami aaqqissuussaanerata annertuumik allaat
allannguuteqarsinnaaneranut tunngaviusussat aamma isummerfigineqarnissaanut
tunngavissat suliarisinnaassagatsigit.
Qujanaq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Oqallinneq inimi tamarmi peqataaffigineqarmat,
oqaluttuisa saniatigut, eqqaasitsissutigissavara ilaasortat allat
ordfĝreunngitsut marloriaannarlutik aamma oqaaseqarsinnaammata.
Maannakku
tulliuppoq Palle Christiansen, Demokraatit.
Palle
Christiansen, Demokraatit.
Tassa
Aningaasaqarnermut Naalakkersuisoq oqarfigilaaginnarpara, tassa oqarputit
aningaasanut inatsisip siunissamut tikkuussisoq, aningaasanut inatsit
taamaattumik aqqutissaa eqqumiissaaq.
Tamatumalu
saniatigut aningaasanut ataatsimiititaliap suliaa innersuussutigineqarpoq,
taamaalilluni inatsisartuni sulineq tassani takutitsilluni. Tassalu qanoq
sulinerput takugutsigut aammalu malinnaasimasut nalunngilarput, aningaasanut
ataatsimiititaliaq isumaliutissiissuteqartoq. Naalakkersuisulli taanna
malikkusunngikkaa, taavali aamma malinneqarusukkusunnaartoq, naak tamanit
atsiorneqaraluartoq.
Taamaassimagaluarpat
taava amerlanerussuteqartut Naalakkersuisut ingerlanniagaannut allanngortitsivoq.
Kisiannili uanga ataatsimiititaliarsuit siumut takorluugaat utaqqinianngilakka,
ilissi siumut takorluukkasi takorloorusuppakka. Ilissiuna taanna suliassarsi
allanut suliakkiissutigisinnaanngilarsi. Suleqatigiinneq aamma taanna
tikkuuttaqattaarparsi, kisiannili tassa suli ataatsimiititalianut taamatut
suleqatigiinniarsarigaluarpugut kisiannili soorluli tukkarneqartutullusooq
imaluunniit tummartorneqaannartutut iliortarpugut.
Taanna
suleqatigiinneq qanoq ilissi nassuiarniarpisiuk? Tassa suleqatissquseq ima
uagut soqutiginngisatsitut tassa ilissi isummiussassinnut
malitsiinnartarnissatsitut iluseqartinniarparsi. Taanna soqutigisarinngilarput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Per
Berthelsen.
Isak
Davidsen, Atassutip oqaaseqartua.
Qujanaq.
Siullermik oqaatigissavara una oqallinneq aalangiiviusinnaanngimmat, kisiannili oqallisissiaq tunngavigalugu oqallinnerummat. Taamaattumik uagut aamma eqqissisimasumik maani inimi peqataasimavugut.
Kisianni una oqaatigissavara nunatta aaqqissugaanerani ukiorpassuarni kukkunerparparpassuit naammattoorsimavagut. Aamma Demokraatinut una oqaatigilaassavara, uagut ataasinnguamilluunniit oqariartuuteqarnianngilagut massakkut, nunaqarfiit ikilisarneqarnissaanik taaguilluta.
Ajornartorsiut annertooq pinngoreernikuuvoq, nunatsinni illoqarfiit ilassaraluat Qullissat matuneqarnikuuvoq. Qanorli ulloq manna tikillugu ukiuni 30-nngortuni atugarliortitsitigiva?
Aaqqissuusserusuinnarluta nunatsinni nunaqarfinnik matooraassagutta ikiligassagut amerlavallaassaqaat siunissamilu artorsaammik tassannga peqarlutik nunami maani qimaguttussat amerlavallaassaqaat.
Uagut oqallinnermi uani peqataanitsinni namminersorneq pillugu isumalioqatigiissitap suliaa aamma oqalliseqataaffigissallugu pissangagisarput ukiamut utaqqiumavarput. Nalunnginnatsigu aalajangiiviusussamik aamma oqallinnermi tassani pilersitsisoqarumaartoq.
Taamaammat-una taanna pillugu uani Jĝrgen Wĉverip oqallisissiaanut tunngatillugu annertoorujussuarmik oqallinnermik pilersitsiumanngitsugut. Oqallissaq takkuttussaavoq ornipparput tassa taanna utaqqimaarusunneruvarput uagut.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Per Berthelsen, Demokraatit.
Tulliuppoq Kuupik Kleist, naatsumik.
Per Berthelsen, Demokraatit oqaaseqartuat.
Qujanaq.
Tungitsinninngaanniit imaassinnaavoq uteqqiinerusoq.
Taassavarput Naalakkersuisut isumaqatigiissuteqarnikuupput.
Naalakkersuisut suleqatigiissutisanik ujartuipput.
Demokraatit saaffiginnissuteqarput suna suleqatiginnissutigiumaneqarnersut paaserusukkamikkit.
Nalugamikku saqqummiussuinikkut nammineq Demokraatut tungaaninngaanniit asuli oqallissaarineq pilersinnaasoq pinaveersaartikkusukkamikku. Suleqataarususseq ataatsimiititaliani isumaliuutissiissusiornikkut takutinneqarnikuuvoq. Tassani malunnarluinnarluni Naalakkersuisuninngaanniit ataatsimiititaliani ilaasortaatitat naqinneqartartut sakkortuumik, allaallu kaajallariataarujussuartarlutik.
Taamaattumik-una Demokraatit tungaaninngaanniit asuli siunertaqanngitsumik oqallitsitsinissaq asuli siunnerfeqanngitsumik sulinissaq, pakkersimaarumallugu apeqquteqartuartut akeqqusaminnik. Taakkua aallaavigalugit Demokraatit suleqataarusussusertik takutissinnaajumallugu suleriarsinnaaniassammata.
Taamaattumik ujartoqqissavarput qaqugu akineqarumaarpugut?
Ilami oqaaseqartutta oqaatigisaatut utaqqiinnarsinnaannginnatsigut suut tamarmik namminiilivinnissaq pillugu ataatsimiiititaliarsuup saqqummiussaata tungaanut utaqqisittuarsinnaannginnatsigit, taanna utaqqiinnarsinnaannginnatsigu.
Isak Davidsenimut atatillugu, oqaaseqarputit soorluli Demokraatut nunaqarfinnut matusinissat sunnguamilluunniit taasimagaat.
Naamerluinnaq.
Killormulli Demokraatut immaqa illersuiumaarput ilissinnillu annertunerusumik, kisianni tusaqqaarusupparput qanoq siunnerfeqarnersusi, Demokraatit pilersaaruteqarput saqqummiussassamik. Kisianni aamma Demokraatit piviusorsiortuugamik nalunngilluinnarpaat ikinnerussuteqarnertik qanorsuaq atornerlunneqarsinnasoq. Qanorsuaq siunnersuutit pitsaatigigaluarpataluunniit, Demokraatit tungaanninngaanniit saqqummiussaaneri piinnarlugit ikinnerussuteqartinneqarsinnaanerat illuatungiliuttuninngaanniit maannakkullu Naalakkersuisooqatigiinninngaanniit ingerlanneqarsinnaasoq.
Taamaattumik-una maanna Naalakkersuit, Naalakkersuisuunerat ataqqillugu tusarusuttut sunik takorluugaqarpisi? Suleqatigiinnissamut ujartukkasi suuppat? Taava nalilersuisinnaaniassagatta asuli qaqitseqattaarnata immaqa ilissi eqqarsaatigereersimasasi imaluunniit naaggaassallugit piareersimaffigisassat.
Tassa nukit atorluarlugit sulineq, taannalu ujartorparput.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tusarnaartunut aamma inimiittunut maani eqqaasitsissutigissavara punkt 84 suli oqallisigigatsigu, taanna oqaasertaqarpoq inuiaqatigiit aaqqissugaanerat pillugu iliuusissatut pilersaarutissatut Naalakkersuisut siunnersuutaata, misissorneqarnissaa nutarterneqarnissaatalu apeqquteqaat aallaavigalugu oqaluuserineqarnissaanik siunnersuut.
Taanna eqqaasitsissutigilaarpara.
Kuupik Kleist naatsumik.
Kuupik Kleist, Inuit Ataqatigiit oqaaseqartuat.
Qujanaq.
Siullermik Naalakkersuisut Siulittaasuat qujassuteqarfiginiarpara akisussaaffiup sumiinneranik oqaatsikka tapersermagit. Tassa isumaqarpunga siunnerfilersornermi eqqaamasassat pingaartorujorujussuit ilagigaat akisussaaffik sumiippa? Kikkut suut akisussaaffigaat?
Taanna puigorneqassanngilaq.
Uppernarsaqqissavara Inuit Ataqatigiit suleqataarusunnerat, aamma ikinnerussuteqartutut imaluunniit illuatungiliuttutut suleqataarusuppugut aamma sunniuteqarusukkatta soorunalimi inuiaqatigiit aaqqissuussaanerat eqqarsaatigalugu, Naalakkersuisooqataanngikkaluaruttaluunniit soorunami sunniuteqarusuppugut.
Taava mianersoqqusilaaginnassaanga tassa Ole Dorphi 200 kilomiiterersorniartoq, Jens Napaattooq 400 kilomiiterersorniarmat. Isumaqarpunga aamma piginnaaneq sinnerlugu ingerlarsornissaq mianersuutilaartariaqassasoq. Pingaartumik immaqa Godthċbimiissimagaanni taava sukkavallaartumik ingerlannginnissaq pisariaqarpoq.
Kisianni isumaqarpunga oqallinnerup aamma takutikkaa qanoq pisariaqartiginersoq aamma partiit iluini, sunik siunnerfeqarnerluni oqallinnissamik taamaattumik matuma kingorna partiit ataasiakkaat aamma iluminni oqallittariaqarput, taavalu maanga uteqqissaagut nangeqqillugulu.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Jensine berthelsen, Atassut.
Jensine Berthelsen, Atassut.
Oqallinnissamik siunnersuuteqartup Jĝrgen Wĉver Johansenip naggasiutigalugu oqaatigaa, malitsigisaanik Naalakkersuisut qinnuigineqassasut inuiaqatigiit aaqqissugaanerat pillugu, iliuusissatut pilersaarutissatut siunnersuummik iluarsisamik 2003-mi inatsisartut ukiakkut ataatsimiinneranni oqaluuserineqartussamik saqqummiussissasut.
Kisianni aamma eqqaamalluinnaqqissaartariaqarparput suliat imaannaanngitsut annertuut massakkoqqissaat suliarineqartut, qilaatiinnarlugit taamatut Naalakkersuisut peqquniarsarissagaluarutsigit aamma Palle Christianseni tupinnaannartumik Naalakkersuisunut tatiginningaarluni Naalakkersuisut suna tamaat naalakkersorlugu, inuiaqatigiit qanoq ilusilersugaanissaat aqqutissiuunniarsarigaat, taanna aqqutissaanngilaq.
Nalunngilluinnaqqissaarparput kommunet Naamminersornerullutillu Oqartussat akornanni suleqatigiinnerit annertusarneqaleruttortut. Naalakkersuisut suliassatik paarissavaat, inatsisartut inatsisiliussapput, kisianni aamma mininneqassanngillat maani oqallinnermi kommunet. Kommunet sunniuteqarluinnaqqissaartussaapput namminneq atugarisatik pillugit qanoq ilusilimmik inuiaqatigiit aaqqissugaaqqissanersut.
Taamaattumik piffissaliisariaqarpugut, qulaaninngaanniit naalakkersortariaqanngilagut, Naalakkersuisugut pisussaaffilersussanngilagut qulaaninngaanniit naalakkersuinissamik qanoq inuiaqatigiit nutaamik ilusilersugaassanersut tunngavileeqqullugit.
Tamaavitta inuiaqatigiit oqallisigisariaqarparput, nalunngilarput akisussaaffik sumiinnersoq, akisussaaffik inatsisartuniippoq, inatsisartuni sakkussat eqqortut pigilerutsigit aalajangersaanerit tamakkua pinngitsoornata tamaasa aalajangersortussaavagut.
Taamaattumik taamatut qulaassiinnarluni siunertaqannginnerarluni oqalunnerit, tamakkua minnerpaamik tunngavissaqanngillat. Imaakkami akisussaaffik inatsisiliortuniikkaluarpalluunniit oqallinneq inuiaqatigiinni pisussaavoq. Aammalu piffissaq taama sivikitsigisoq ingerlanerani suna tamarmi naammassineqarluni qulaajarneqarluni inissinneqarnavianngilluaasartoq nammineerlusi takorloorsinnaavarsi.
Ataqqisariaqarparsi innuttaaqateqaratta oqartussaaqataarusuttunik, aamma taakkua nipaat tusarneqartariaqarpoq. Taamaattumik oqallinneq manna tujorminartunngortinneqarnera pissusissamisuunngilaq, innuttaasut toqqissillutik oqalliseqataanissaat periarfissinneqartariaqarpoq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Ole Dorph, naatsumik.
Ole Dorph, Siumut.
Ilaana, maani inoqarpoq
paasinnissinnaangitsunik imaluunniit paasinnikkusunngitsunik. Taakkulu
siutaanulluunniit pulluni oqalukkaluallaraanni nalunngilarput
paasitissinnaanagit.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Tulliuppoq
Naalakkersuisut Siulittaasuat.
Hans Enoksen, Naalakkersuisut Siulittaasuat, Siumut.
Aap qujanaq.
Tassa Per Berthelsenip oqaasiinut taakkua apeqqutinut tunngasut, aqagu apuutissavagut pinngitsoornagit. Taanna neriorsuutigissavara naak 54-iliinissannut akineqarnissat ajorinagu maani oqariartuutigigaluarit, aqagu tunniutissavarput.
Uanilu aamma inatsisartuni ilaasortat Naalakkersuisunit naqinneqartarsimanerannik oqariartorneq, ilumuunngitsoq oqaatigissavara tassa minnerpaarpaamilluunniit uanga aamma taamaaliortitsisimanngisaannarama aamma ilimagaara naalakkersuisoqatikka taamaaliortitsisimanavianngitsut. Tassa inatsisartuni ataatsimiititaliani sulineq ataatsimiititaliat namminneerlutik ingerlattussaavaat, soorunami aamma partiiminnukarlutik ajornartorsiutitik oqariartuutigippatigit partiitik tunuliaqutaralugit sulimmata, taakku isumaat aallaavigineqartussaasut.
Kisianni Naalakkersuisuni siunertarineqanngilluinnaqqissaarpoq ataatsimiititaliani naqittaassinissaq, taamaattoqarsimassappat taava siulittaasoqarfiup suliassaq tigusariaqarpaa.
Qujanaq.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq
Kalistat Lund, Siumut.
Kalistat
Lund, Siumut.
Siullermik
Demokraatit ataatsimiititaliani sulisimaneq pillugu oqaaseqarnerannut
oqaaseqassaanga.
Tassa
nalunnginnakku immikkoortut 31, 32 tassani pineqartut. Tassani
ataatsimiititaliami ilaasortatut nassuiaatigisimasat maanna
innersuussutigissavakka, tassa akisussaaffik tamaat uagut tassani tigummisarput
nassuiaatigereersimavarput.
Aammalu
ataatsimiititaliami suliarisimasagut Naalakkersuisuninngaanniit akineqarmata,
aammalu siunnersuusiorfigineqarlutik taakkua naaperiarsimavagut, tamannalu
aallaavigalugu maani inimi uagut taasisimavugut. Kisianni ajornartorsiummik
eqqartuisoqassappat Demokraatit siunnersussavakka naalisagaq imaqarniliaq
atuaqqullugu aammalu maani taasisimanerit atuaqqullugit. Tassani immikkoortut
31-p atuarnerani paasissavarsi ilissi nammineq qanoq iliuuseqarsimalusi.
Tassa
neriuppunga taanna ajornartorsiut taamatut ukiuni tulliuttuni sisamani
utertuarlugu pissanngitsugut, tassa nassuiaatissat isumaqarama
nassuiaatissutigineqareersimasut taamaattorli amigaataalerpoq Demokraatit
namminneq qanoq iliorsimanerminnik aamma paasinninnissaat.
Maaniinnera
iluatsillugu aamma taalaassavara uani qitiusoqarfinnik oqallinneq aamma
tikinneqarmat taanna oqaaseqarfigilaassagakku. Taamanikkut qitiusoqarfiit
oqallisigineqalermata aamma taakkartorneqartarpoq illoqarfiinngooq saniliusut
aamma taakku ineriartornissaannut iluaqutaasumik pisoqartussaammat.
Kisianni
kingornatigut isumaqarpunga aamma paasereerneqarsimasinnaasariaqarpoq taamatut
ineriartorfinnik pilersitsisarnerit nunani allani ilaarsiniarnerupput, aammalu
nunani allani taakkua tassa ingerlasimasinnaanerat patsisaavpoq,
aqqusineqartarmata illoqarfiit akornanni. Illoqarfiillu akornanni
angalasinnaaneq aallaavigalugu ineriartorfiusut sanilianiittut aamma
ineriartorsinnaasarsimanerat pisinnaasarsimavoq.
Taamaattumik
nunatsinni taamatut pilersitsigaluarnikkut akerlerluinnaanik pisoqartussaavoq
illoqarfiit sanilerisat ammut ingerlalersussaapput, taakkuusussaappullu
tassatuat maannakkut sisamanik taaneqartartut taakkua aallunneqassagaluarpata,
kisianni oqareernittuut naatsorsuutigilluinnarpara tamakkiisumik piffiit
periarfissallu tamaasa atorlugit inuiaqatigiit ineriartornissamik
pisariaqartitsipput. Taamaammat taanna partiinut sorliugaluaruttaluunniit
pinngitsoornata saneqqussinnaanngisatsini ippoq.
Aamma
nunaqarfiit oqallisigineqarneranni sooq nunaqarfiit tassani kisimik
pineqassappat?
Tassa
nunaqarfiugunik illoqarfiugunillu piffiit tamarmik assigiimmik
eqqarsaatersorfigineqartariaqarput pineqartariaqarlutillu. Taamaammat uanga
nunatta ineriartorteqqinnissaani nunat immikkoortuinik aggorlugu ineriartornissat
pilernisasaanik siunertat orniginarnerutittorujussuuakka matusinnaanerneq
imaluunniit matujartuaarsinnaanerneq oqallinnerminngaanniit.
Nunap
immikkoortuani ineriartornermi pissutsit tassani aallaavigalugit tamanna
tassani najugaqartut nunap ineriartornissaa ingerlattariaqarpaat. Tassanilu
ineriartornerup takutissavaa piffiit sorliit sukkanerusumik ineriartussanersut
imaluunniit tamarmik assigiimmik ineriartortinneqassanersut.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Neriuppunga udvagit sulineri uterfigeqqissanngikkigut. Taava tulliuppoq Per Berthelsen, Demokraatit.
Per Berthelsen, Demokraatit oqaaseqartuat.
Sekundit qassit, 5 minutsit. Nċ.
Tassa uani oqaatigipallaannassavara tassa oqaaseqarsinnaanerput killeqarmat taamatut oqallinnermi.
Jensine Berthelsenimut taaginnassavara, uagut sumilluunniit tujormisaaraluta uani pinnginnatta, kisianni akissuteqaatit assorujussuaq tujormissutigaarput, taamaattumillu uani annertunerusumik aamma iliuuseqarfiginiarnagu.
Nuanninngilaq apeqquteqarluni, apeqqutinik nutaanik akineqaannaraangata.
Taamaattumik naak atorfissaarulluinnaraluartut massakkut oqallinnerni atortussaagaluarami issarli, 6. martsimili. Akissutit aqagu tigusinnaagutsigit soorunami nuannaarutigissavagut. Uagut nammineq massakkut atorsinnaajunnaaraluassavagut oqallinnerit naammassisussaammata tassa ullumikkuminngaanniit. Kisianni qularutiginngilara tusagassiortut soqutigalugit atorsinnaajumaaraat.
Kalistat Lundimut atatillugu taalaaginnassavara naatsorsuutigigakku tassani immikkoortoq 31, 32 pineqartoq. Tassa boligudvalgimi eqqartorneqartut. Tassani Demokraatit isummaminnik allannguipput paasissutissat eqqortut ikerinnarmit tunniunneqarmata. Paasinarsimmat siullermik aalajangiussaasimasut naapertuuttuunngitsut, taamaattumik allannguisariaqarnikuuvugut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Tulliuppoq Aqqaluk Lynge, Inuit Ataqatigiit.
Aqqaluk Lynge, Inuit Ataqatigiit.
Oqallittoqarnermik oqaluttorput Inuit Ataqatigiinninngaanniit oqaasissaqarnissamut periarfissaqanngimmat uani ilanngutilaarpunga. Isumaqarpunga manna tikillugu oqallinneq ajunngitsoq. Isumarpassuit assigiinngitsut siunnersuuteqartup Jĝrgen Wĉver Johansenip saqqummiussaa aallaavigalugit, partiit tamarmik saqqummiussaqarput.
Tusarnaarpakka, aammalu uagut Inuit Ataqatigiinninngaanniit oqaloqatigiissutissat assigiinngitsuni aammaassinera aamma takusinnaavarput.
Kisianni peqqutissaqanngilaq, asasakka inatsisartuni ilaasortaqatikka, ataasiakkaat maanga qaqissallutik tassanngaarnarlu oqallinnermi maani iserlutik akulerullutik uagut taamatut appisaluutissalluta. Isumaqarpunga oqallinneq imatut ataqqeqatigiinnermik pissuseqartariaqartoq unalu sualummik Jensine Berthelseniminngaanniit ataqqinartoq ilaasortaqaterput, saqqummiuttartoq tusaaginnarpara uanga inuit allat isumaannik ataqqinnikkumannginneq.
Oqallinnermik paasisimasaqannginneq. Allatut ajornartumik
immitsinnut akuereqatigiilluta assigiinngissutsigut tusarnaartussaavagut maani,
allatut ajornaqaaq. Tassa demokratiip aallaavia. Aamma innuttaasut sinnerlugit maaniippugut.
Taamaattumik
aamma Ole Dorphip oqaatigisaa aamma avaanngugaara, isumaqarpunga taamatut aamma oqarneq
eqqarsaatigilluagaanngitsoq. Utoqqatseraluarpunga. Oqallinneq torersumik
ingerlagaangami taava aamma illuatungaaninngaanniit immitsinnut
akueriniartariaqartarparput isummat assigiinngitsut maani
saqqummiussorneqarnerat. Inuillu maani nilliaffigalugit allanik isumaqarnerat
ippigalugu oqaluttoqartariaqanngilaq, kisiannili taanna qallunaatut
oqaatigisartagaat dialogi, demokratiip pilersitaa tassaavoq maaniinnitsinnut
peqqutaalluinnaqqissaartoq.
Taamaatumik
isumaqarpunga tamanna pissuseq qaangeriartornissaat
ilikkariartorsinnaasoqarumaartoq.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Ja oqallinneq
naalingajalissagatsigut, taava maannakkut oqallinnermi saqqummiisoq Jĝrgen
Wĉver Johansen, naatsumik pingajussaaniilerami.
Jĝrgen Wĉver
Johansen, siunnersuuteqartoq,
Siumut.
Qujanaq.
Oqallinneq
avaanngunanngitsoq tujorminanngitsoq, kisiat pissanganartoq taanna
ingerlanneqarmat qujarusuppunga siunnersuuteqartutut. Isumaqarpunga oqallinnitsinni
isumaqatigiissutigisagut arlaqartut, ilaatigut kalaaleq aatsaat suliguni
namminersulivissinnaasoq. Tassungalu aqqutissiuussinermut nukigut atorniarigut,
aalajangigassat ajornaraluarpataluunniit, nalunnginnatsigumi
nuannersuinnaanavianngimmata nukigut atorniarpagut.
Inuiaqatigiit
aaqqissuussaanerannut tunngassuseqartut pillugit pilersaaruteqartoqarnissaa
isumaqatigiisutigaarput tamatta, taannalu sapinngisamik piffissami qaninnermi
nuttarsinnaanermut periarfissat annertusarnissaat allallu isumaqatiginartut,
Sisimiuni Kangerlussuup aqquserniortoqarnissaata, Paamiuni
mittarfeqalernissaannik pingaaruteqarnerunera, allallu soqutiginarluinnartut
uterfigissaqqaarpagut.
Taamaammat
oqallinnermut qujarusuppunga, Palle Christiansenimut apeqquteqarmammi
akissuteqarusuppunga.
Siumup
tunngaviusumik isummiussai aamma Siumut nunap immikkoortuini inerisaanissamut
tunngatillugu siunnersuutaa oqallissaarut, aamma Siumup anguniagai, aamma
Siumut qineqqusaarnermit tunngavii 1999-imeersut 2002-minngaaneersullu innersuukkusuppakka,
kalaallisut qallunaatullu allassimapput. Tassani ersarissumik Siumup qanoq
isumaqarnera takuneqarsinnaavoq.
Uagut
neriorsuutigisartakkagut piviusunngortittarigut uppernarsaatissaqartipparput.
1999-imi qineqqusaarnermut tunngavigut atuakkit, nalilersorlugulu maannamut
suut piviusunngortinneqareersimasut, suullu suliarineqarnersut. Tassani
takussavat suliarineqartariaqartunit 79-t, 76-it
piviusunngortinneqareersimammata. Taamaattumik qujanarpoq soqutiginnikkavit.
Jonathan
Motzfeldt, ataatsimiinnermi
aqutsisoq, Inatsisartut Siulittaasuat, Siumut.
Tulliuppoq Jensine Berthelsen.
Jensine Berthelsen, Atassut.
Qujanaq.
Taamatut sakkortutigisumik oqartariaqalerninnut Demokraatit Atassummut uparuartuinerat siunertaqannginnerarlugit, aammalu oqariartuuteqannginnerarlugit oqalunnerannut tunngassuteqarpoq.
Ataqqilluinnarparput suliat arlalippassuit massakkut pingaaruteqarluinnartut inuiaqatigiit aaqqissugaanerannut ingerlanneqartut ingerlanneqarmata. Taamaattumik tamanna sioqqullugu pissusissamisuunngilluinnarpoq maani siunnerfinnik oqaluleriissalluta inuiaqatigiit oqallinnissaminnulluunniit periarfissaqarnikuunngitsut. Soorunami pisariaqarpoq erseqqilluinnartumik siunnerfeqarnissarput, tamanna tamatta soqutigisariaqarparput.
Kisiannili suliat ingerlasut qalliinnarlugit taamungaannaq oqallinneq aallaavigalugu apeqquteqaammi isummersornerit aalajangiisuusutut isummertitsiniaanerit, tamakkua minnerpaamilluunniit inissaminiinngillat. Taamaattumik Demokraatit tungaanut taamatut oqaaseqarpunga.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Taamaalilluni oqallinneq naammassivoq.
Naalakkersuisut innersuussutigisaat 2004-mut
saqqummiussaqarsinnaanissartik apeqqummi tamatumani amerlanernik
taperserneqarpoq. Aammalu qularutissaanngitsumik ukiaru nammineerluta
ingerlaniarnissarput pillugu ataatsimiititaliarsuup saqqummiussaa,
oqallisigineqalerpat aamma apeqqutit taakku allanullu aamma tunngatillugit
tusarfigineqartarumaarput.