Oqaluuserisassani immikkoortoq 85-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersarnat, tallimanngorneq 28. marts 2003, nal. 14:22.
Per
Rosing-Petersen,
siunnersuuteqartoq, Siumut.
Kalaallit
Nunaanni Inatsisartut suleriaasianni paragraf 32. immikkoortoq siulleq
naapertorlugu matumuuna aalajangiiffigisassatut siunnersuut imaattoq
Inatsisartunut aalajangigasanngortippara.
Aalisarnermi
aningaasaateqarfimmik pilersitsisoqarnissaa siunertaralugu Inatsisartut
Naalakkersuisut ukiuni tallimani atuuttussamik siunnersuusiornissaannik
peqquneqarnissaat pillugu Inatsisartut aalajangiiffigisassaattut siunnersuut.
Ukiuni kingullerni ineriartortisisimanermi siunnersuut tunngaveqarpoq.
Ataatsimiititaliat
misissuisimanerpaalussuillu kingunerisaanik ineriartortitsineq annertooq
pisariaqartorlu aallartisarneqarnikuuvoq. Maanna paasisat pitsaasumik
inerititaqarfiusumillu kinguneqassappata siunnersuut una aamma
tunngaviulluinnartariaqarpoq. Taamaattumik Namminersornerullutik Oqartussat
nunatsinnilu aalisartut kattuffii APK aamma KNAPK kiisalu Royal Greenland A/S
suleqatigalugit aningaasaateqarfimmik pilersitsinissaq siunertaralugu
Namminersornerullutik Oqartussat aalisarnerup aningaasaateqarfianut
aningaasaliissapput ukiumut 20 million kr-nimik annertussusilimmik.
Aningaasaateqarfiup
ukiuni tulliuttuni tallimani suliassaata pingaarnersarissavaa sinerissap
qanittuani raajarniat angallataasa nutarteriffiginissaat. Angallatit nutaat
nunatta pinngortitakkut pisuussutiinut naleqquttut unammillersinnaassusillit
aalisartunit pisaariortorneqassapput.
Angallatit
20-t missaaniittut sinerissami suliffissuit pisassallu agguataarsimanerinut
naapertuuttumik pisinnaasallit ujartorneqassapput. Taamaaliornikkut angallatit
pinngortitap atugassarititaanut naleqqunnerusut akilersinnaassutsimillu
piareersimanerusut pigineqalissapput.
Aningaasaateqarfiup
angallatip akiata tamakkiisup 20-25 %-tii taarsigassarsinertut
angallatitaarniartumut atukkiuttalissavaa. Takorloorneqarpoq aningaasaliineri
sinneri imatut agguataaneqassasut. 70 %-a Det kongelige fiskeribankemiit aamma
5 imaluunniit 10 %-tit akornanni aalisartumiit namminermit siulequtitut.
Qujanaq.
Aqqaluk
Lynge,
ataatsimiinnermi aqutsisoq, sinniisussat pingajuat, Inuit Ataqatigiit.
Taava
akissuteqassaaq Aalisarnermut, Piniarnermut, Nunalerinermullu Naalakkersuisoq.
Simon
Olsen,
Aalisarnermut, Piniarnermut, Nunalerinermullu Naalakkersuisoq, Siumut.
Hr. Per
Rosing-Petersenip siunnersuutigaa aalisarnermik aningaasaateqarfimmik ukiuni
tallimani atuuttussamik pilersitsisoqarnissaa Naalakkersuisut
siunnersuusioqquneqassasut.
Inuutissarsiornermi
tapersiisarnermi aaqqissuussinerup allaffissornikkut ingerlanneqarnera 2001-mi
decemberip ulluisa aallaqqaataaniit Inatsisartut ataatsimiititaliaannit Naalakkersuisunut
nuunneqarpoq. Naalakkersuisut aalisarnermi aalisariutinik ingerlaavartumik
naleqqussaanermut anguniakkanullu Naalakkersuisut siunniussimasaannut imminut
akilersinnaasumik aalisartoqalernissaanut aaqqissuusinerup sunniutigisassai
malinnaavigeqqisaarpaat.
Atorfilittatigoortumik
2001-p ingerlanerani Danmarkip kunngeqarfiani aalisarnermut aningaasaateqarfik
kongeridet Danmarks fiskeribank attaveqarfigineqarpoq aalisarnermut
aningaasaateqarfik nunatsinni aalisarnermik inuussutissarsiuteqarnerup
ullumimiit annertunerusumik aningaasalersueqataaffigineqarnissaanut
soqutiginnippoq oqariartuut taannarpiaq 2001-mi oktoberimi Sisimiuni Sisimiut
kommuniata aaqqissugaanik isumasioqatigiinnermi aalisarnermik
aningaasaateqarfimmit oqaatigineqarpoq.
Imminut
akilersinnaasunngortitsinissaq siunertaralugu aalisarnermit nalinginnaasumik
naleqqussaanermut atatillugu kisianni kisiannili aammattaaq assersuutigalugu
EU-mut suleqatgiiissutigineqartut pillugit immikkut suliniutinut atatillugu
pasiniaalluni sulineq annertooq aallartinneqarpoq.
Tapersiisarnermik
aaqqissuussinerit aalisarnermut attuumassuteqartut tamakkerlugit
iluarsaateqqinneqarnissaat siunertaralugu.
Tassunga
atatillugu tapertaasinnaasut suulluunniit qujarunneqarput. Pissutsit
imaannaanngitsorujussuit pitsaanerpaamik aaqqiiviginissaat tassani soorunami
pineqarmat. Tassunga atatillugu inuutissarsiortunit taamallu pisortat
karsiannit aningaasalersueqataaffigineqartumit aningaasaateqarfiliortoqarnissaa
itigartikkusunngilara. Kisianni piffissaq sivikitsoq isigalugu
ajornartorsiutaasut aaqqiiviginiarneranni fondtimik aningaasaateqarfiliorluni
aatsaat aaqqiissuteqartarnissaq pissusissamisoortutut isiginngilara.
Taamaattumik
ukiut tallimat aallaavigalugit aningaasaateqarfimmik pilersitsisoqarnissaa anguniagarisamut
naapertuutinngilaq. Aammattaaq isumaqarpunga taamatut iluseqartumik
siunnersuuteqarnermi aningaasartaleereernissaq siusippallaartoq. Siullermik
sukumiisumik missuilluartoqaqqaartariaqarpoq.
Kisianni
imatut naatsorsuilaaraanni qanoq annertutigisumik
aningaasalersuisoqarnissaannik pisariaqartitsisoqarnersoq takuneqarsinnaavoq.
Missingersoraanni ukiut tallimat imaluunniit ukiuni tallimaniit qulinut
tulliuttuni sinerissamut qanittumi raajarniarnermi angallatit 25-t tamarmik 15
million kr-nit missaannik akeqartut taarsersorneqassasut. Katillugit 375
million kr-nit missaanni aningaasalersuisoqartariaqarpoq. Taakku 20-25 %-tii
Namminersornerullutik Oqartussani aaqqissuussineq aqqutigalugu
aningaasalersuiffigineqassappata taava 100 million kr-nit missaanni
aningaasaliissuteqartoqartariaqarpoq. Tassalu piffissap taassuma iluani ukiumut
10-20 million kr-nit missaannik amerlassusilinnik.
Tassani
takutinniarneqaannarpoq aalisarnerup tamarmiusup ilaannaata qanoq
annertutigisumik aningaasalersuiffigineqarnissaanik pisariaqartitsisoqarnersoq.
Soorluttaaq aalajangiiffigisassatut siunnersuummi Per Rosing-Petersen imminut
sanilliunneqarsinnaasunik eqqarsaatersuuteqartoq.
Taamaattumik
isumaqarpunga aningaasanut tunngatillugu aalajangiinissaq Inatsisartut utaqqimaaruttariaqaraat.
Paasiniaasoqaqqaanissaata tungaanut aammalu sukumiinerusumik siunissami
aalisarnermik inuutissarsiuteqarnerup iluani aningaasalersuisoqarnissaanut
aaqqissuussisinnaanerup ilusissaanik siunnersuuteqartoqarnissaata tungaanut.
Siunnersuut
pillugu aalisarnermik siunnersuisoqatigiit tusarniarneqarput. KNAPKp
oqaatigivaa sinerissap qanittuani raajarniarnermi aningaasaliinissamut
periarfissat ineriartortinnissaannut peqataarusulluni. Toqqaannartumilli
aalajangiussassatut siunnersuut isummerfiginngilaat.
Tamanna
tunngavigalugu Naalakkersuisut inassutigaat aalajangiiffigisassatut
siunnersuummi tunngavilersuutigineqartut aammalu aqqiissutissatut
tikkuartorneqartut inussutissarsiutinut tapersiisarnermik aaqqissuussinermik
nutarteraluni sulinermut aammalu aalisarnermut tapiissuteqariaatsit allat
aaqqissuunneqarsinnaanerannik nalilersuilluni misissuinissamut
ilanngunneqassasut. Kisianni aalajangiiffigisassatut siunnersuut taamatut
iluseqartillugu akuerineqassanngitsoq.
Aqqaluk
Lynge,
ataatsimiinnermi aqutsisoq, sinniisussat pingajuat, Inuit Ataqatigiit.
Taava
partiit oqaaseqartuinut nuuppugut. Siulliussaaq Ole Dorph, Siumut.
Ole
Dorph, Siumup
oqaaseqartua.
Qujanaq.
Siumumiit aalisarnermik aningaasaateqarfimmik pilersitsisoqarnissaa
siunertaralugu Inatsisartuni Naalakkersuisut ukiunut tallimanut atuuttussamik
siunnersuusiornissaannik peqquneqarnissaat pillugu Inatsisartut
aalajangiiffigisassatut Per Rosing-Petersen siunnersuutaanut ima
oqaaseqaateqassaagut.
Siumup tunngaviusumik
anguniarpaa Kalaallit Nunaat namminersortoq pilersissallugu. Aningaasarsiornikkut imminut napatittoq
innuttaalu imminut pilersortut pilersissallugit anguniakkat annertupput
unamminarlutilli.
Per
Rosing-Petersenip siunnersuutaa Siumumi ilassilluarparput. Siunnersuut
iluarisimaarparput minnerunngitsumik nunatta aningaasatigut avammut niuernikkut
ullumikkornit isaatitsinerunissaa pisariaqarluinnarmat. Siunissamilu suli
tamanna annertunerusumik pisariaqalerumaarluni.
Ilumut
inussutissarsiornikkut siunnersuutit oqallisissiat inuussutissarsiornermut
tunngassuteqartut amerlanerusuuppata suli nuannernerussagaluarpoq. Per
Rosing-Petersenip siunnersuutigaa aalisarnermut aningaasaateqarfimmik ukiuni
tallimani atuuttussamik pilersitsisoqarnissaanik Naalakkersuisut
siunnersuusioqquneqassasut.
Ukioq 2003
aallartilaaraa sinerissap qanittuani raajarniarnerup ingerlanera pillugu
Ilulissani ataatsimiissutigineqarpoq aalisarnermik soqutisasaqatigiinnit
peqataaffigineqartunit. Apeqqullu siunnersuutip imarisaata asserpiaa
annertuumik oqallisigineqarpoq. Maluginiarparpullu apeqqut taannarpiaq ukioq
2000-mi Sisimiuni aamma oqallisigineqarsimasoq, ilaatigut
fiskeribankeniminngaaniit peqataaffigineqartumit.
Naalakkersuisut
akissuteqaataanni oqaatigineqarpoq sulineq annertooq maanna Naalakkersuisunit
suliarineqartoq aalisarnermik tapersiisarnermik aaqqissuussinerit. Ilaliullugit
aalisarnermut aningaasaateqarfiup nunatsinni aalisarnermik
inussutissarsiuteqarnerup ullumimiit annertunerusumik?
Bånd 2 naavoq
Bånd 3
(Ole Dorph)
suleqatigalugit, tamannalu kingussinerusukkut Inatsisartuni saqqummiunneqarumaartoq. Suliaq ingerlanneqartoq Siumumiit ilassilluarparput, tassunga ilaammat siunissami aalisarnerup imminut akilersinnaajartuaarnissaata sulissutigineqarnera.
Taamaammat siunnersuut taamanikkut isikkulik maannakkuugallartoq itigartinneqarnissaa Siumuminngaanniit innersuussutigissavarput.
Taamatut naatsumik oqaaseqarluta Siumumiit isumarput saqqummiupparput.
Qujanaq.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Illillu. Taava Siumut oqaaseqartua Ole Dorph oqaaseqareermat tullinnguuppoq Agathe Fontain, Inuit Ataqatigiit.
Agathe
Fontain, Inuit
Ataqatigiit oqaaseqartuat.
Sinerissap
qanittuani aalisariutit nutarsarneqarnissaasa pisariaqassusia januar 2003-imi
Ilulissani pikkorissaatigalugu isumasioqatigiinnerup takutippaa.
Sinerissap
qanittuani aalisarneq nunami suliffisaqartitsinerup uummatigaa. Siunissamilu
taamatut ingerlaannassappat piorsaanissaq pisariaqartoq Inuit Ataqatigiit
ilisimaaraarput.
Aalisarnerullu
ajornartorsiuteqartarnera imminullu akilersinnaasumik ingerlanneqarnissaa
siunertaralugu ataatsimiititaliani nukinnik piffissanillu atuinaqisumik sulisoqarpoq,
naak suliaasa inaarneri ilaatigut erinitsaannarfiugaluartut.
Inuit
Ataqatigiit isumaqarpugut aalisarnermut aningaasaateqarfeqarneq
pisariaqarluinnartuusoq. Takorloorneqarsinaavoq pisarinngitsuukkat
aalisarnermik aningaasaateqarfimmiit pisiarineqartarnissaat, taassuminngalu
akisuninngorlugit tuneqqinnerisigut aningaasaateqarfimmut aningaasalersuineq
pisinnaasoq.
Aningaasaateqarfimmut
kattuffiit aningaasaliisarnissaannik aamma isumaqatigiinniarfiusariaqassapput.
Siunnersuuteqartup Per Rosing-Petersen-ip sinnersuutaa ukiuni tallimaannarnut
atuuttussatut siunnersuutaavoq. Ullumikkut sinerissap qanittuani imminut
akilersinnaasunngortinniarlugu aningaasaliissutaasartut ilumut
piviusorsiornersut paasiniarneqartariaqarpoq, aammalu nutarterinissamik
piffissaliinermut takorluuineq piviusorsiornersoq ilanngullugu.
Inuit
Ataqatigiit isumaqarpugut ukiunut tallimaannarnut aningaasaateqarfiliornissaq
piviusorsiortuunngitsoq, siunnersuulli pitsaassaaq ataavartumik
aningaasaateqarfilioraanni.
Taamaattumik
Naalakkersuisut inassutaat, tassa inuutissarsiutinut tapersiisarnermik
aaqqissuussinermik nutarteraluni sulinermut aammalu aalisarnermi
tapiissuteqariaatsit allat aaqqissuunneqarsimanerannik nalilersuinissamik
ilanngunneqarnissaat Inuit Ataqatigiit ataavartumik
aningaasaateqarfiliorsinnaaneq piaartumik suliarineqarnissaa
inassutigissavarput.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Agathe Fontain-imut qujavugut. Taava tullinnguupoq Jensigne Berthelsen, Atassut.
Jensigne Berthelsen, Atassutip oqaaseqartua.
Qujanaq.
Aalisarnermik aningaasaateqarfimmik pilersitsisoqarnissaanik, ukiullu tallimat taassuma atuunnissaanik Siumut sinnerlugu Inatsisartuni ilaasortap Per Rosing-Petersenip siunnersuutaa ATASSUT-mit imatut oqaaseqarfigissavarput:
Ilumoorpoq siunnersuuteqartoq, ataatsimiititaliat sulinerisigut aammalu misissuisoqartarneratigut aalisarnerup nutarterneqarnissaanik, imminut akilersinnaasunngorsarneqarnissaanik, tapiissutinik isumalluutaarutitinneqarnissaanik suliniuteqarnermi tunngavissatut innersuussutigineqartartut pitsaasut maanna pigineqartut atorluarlugit aalisariutigissaanerup aalisariutikillisaanerullu ingerlanneqarneri sukkatsissallugit tunngavissaqarluartitsivoq.
Taamaattorli peqqissaarluni arlaannaannulluunniit sapinngisamik annaasaqaataanngitsumik aaqqissuunneqartariaqarmat piffissangaatsiaq atorlugu ingerlanneqarpoq tamatta nalunngilarput. Taamaammat ATASSUT-mit naalakkersuisutulli piviusorsiornerusorinngilarput ukiunut aalajangersimasunut pituttuilluni aaqqissuussisoqarnissaa.
Naluneqanngilarmi teknologi qanoq pilertortigisumik ineriartortitsiviunersoq, allaammi ilaatigut oqartoqarsinnaavoq ullumikkut nutaaliaasut aqaguani nutaanngilereersimasarlutik taamaammat ATASSUT-mit orniginartinneruarput aningaasaateqarfiliortoqassappat siunniunneqartariaqartoq ataavartumik pilersitsisoqarsinnaanissaa.
Siunnersuuteqartoq isumaqatigaarput Namminersornerullutik Oqartussat, aalisartut kattufii, APK aamma KNAPK aammalu Royal Greenland A/S suleqatigalugit pilersitsisoqarsinnaasoq, aammattaaq ATASSUT-mit qularutiginngilarput tamanut akuersaarneqarsinnaasumik isumaqatigiissusiortoqarneratigut Kongeriget Danmarks Fiskeribank, tamatumalu saniatigut EU-mi aningaasaateqarfiit attuumassuteqartut suleqatigalugit tamanna piviusunngortinneqarsinnaassasoq.
ATASSUT-millu iluarisimaarparput Naalakkersuisut suliniuteqarmata siunissami aa-lisarnermik inuussutissarsiuteqarnerup iluani aningaasalersuisoqarnissaanut aaqqissuussisinnaaneq pillugu siunnersuuteqartoqarniarluni aamma, misissuinerillu takutissappassuk Fiskeribankitut ittumik nunatsinni pilersitsisoqarsinnaasoq akilersinnaasumik taava ATASSUT-mit piviusunngortinneqarnissaanut suleqataanissarput qularutigineqassanngilaq.
Aningaasanilli immikkootitsereerlutik Inatsisartut aalajangersaaniassagunik nunatta ani-ngaasaqarneranik annikinngitsumik navianartorsiortitsisinnaassapput, taamaattumik attuumassuteqarsinnaasut tamaasa peqqissaartumik suleqatiginerisigut aaqqissuussinissamik innersuussuteqartoqarpat Inatsisartut aalajangersaanissaat aatsaat killiffigineqassasoq ATASSUT-mit isumaqarpugut.
Siuliani taakkartukkavut tunngavigalugit siunnersuut taama iluseqarluni akuerineqassanngitsoq Naalakkersuisut inassutaat ATASSUT-mit ilalerparput.
Aqqaluk Lynge, ataatsimiinnermi aqutsisoq, sinniisussat pingajuat, Inuit Ataqatigiit.
Taava partiit oqaaseqartuinut ingerlaqqippugut. Demokraatit sinnerlugit Palle
Christiansen.
Palle
Christiansen, Demokraatit
oqaaseqartuat.
Siunnersuuteqartumut
Demokraatiniit imaattumik oqaasissaqarpugut.
Aalisarnermut
aningaasaateqarfimmik pilersitsinissaq eqqarsaatigalugu aaqqissuussinermik
naleqqussaassinissaq sinerissami qanittumi aalisarnerup iluani
ingerlanneqalereersoq siunnersuuteqartumit maluginiaqqussavarput.
Sinerissap
qanittuani aalisarnerup akilersinnaasumik ingerlanneqarnissaa eqqarsaatigalugu
siunnersuuteqartup iserfigisaa aaqqissugaanermik naleqqussagaanerup matuma
aaqqiivigisussaassavai. Taarsigassarsinissamut periarfissaq eqqarsaatigalugu Fiskeribankimi
taarsigassarsinissamut massakkut periarfissaqareerpoq. Taarsigassarsiat allatut
isikkullit eqqarsaatigineqarsinnaassappata aningaaseriviit pioreersut
innersuussutigineqartariaqarput, tassami taarsigassarsisitsisarnermut
Namminersornerullutik Oqartussanut ingerlaqatigiinnermut
equsoortitsissanngimmata.
Taamatut
oqaaseqarluta siunnersuutip itigartinneqarnissaa Demokraatit
kaammattuutigaarput.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Anthon Frederiksen,
Kattusseqatigiit.
Anthon
Frederiksen,
Kattusseqatigiit.
Inatsisartunut
ilaasortap Per Rosing-Petersen-ip siunnersuutaa Kattusseqatigiit sinnerlugit
imaattumik oqaaseqarfigissavara.
Ukiuni
kingullerni sinerissamut qanittumi aalisarnerup aaqqissuuteqqinneqarnerani
aammalu aalisariutikkillisaanerup kingunerisaanik raajarniuterpassuit
unerartinneqarsimapput, ilai qaleralinniarnermut ilaallu saattuarniarnermut
saassimapput, kisianni amerlaqaaat ingerlariaqqissinnaasimanngitsut. Ilaat
periarfissanik allanik misiliisimapput ilaalli uniinnavissimallutik
atorunnaavissimallutillu.
Soorunami ilaat
iluatsissimapput, kisianni aamma amerlaqaat iluatsitsisimanngitsut. Maannakkut
sinerissamut qanittumi aalisarnerup suli naleqqussarneqarneranut atatillugu
ilaatigut ukioq sinerissamut qanittumi raajarniarneq pillugu Ilulissani
isumasioqatigiinneq ingerlanneqarpoq, isumasioqatigiinnermi tassani ilaatigut
oqaatigineqarpoq sinerissamut qanittumi raajarniarnerup
iluarsaateqqinneqarneranut atatillugu angallatit ilaat pisoqalisoorsimasut
taarsersorneqarnissaannut, aallatulluunniit iluarsaanneqarnissaannut aningaasat
minnerpaamik 200 mio.kr.-init amigaatigineqartut.
Taakkuinnaanngillalli
aamma tamanit ilisimaneqarpoq sinerissap qanittuani qaleralinniarnermi
pingaartumik umiatsiaaqqanik taarsersuinissamut aamma aningaasaliisussanik
annertuumik pisariaqartitsisoqartoq. Tamannalu miserratissaananilu
pisariaqarluinnartuusoq aamma tamanit ilisimaneqarpoq. Minnerunngitsumik
EU-miit piumasaqaatit sakkortusiartornerat aamma eqqarsaatigalugu.
Taamaattumik Per
Rosing-Petersen-ip siunnersuutaa tunngaviatigut isumaqatigaara, soorunami
qulaaniit aalajangereerlugu iliuuseqarnissaq Kattusseqatigiinniit
orniginartinneq ajoratsigu, suliami matumani susassaqartut assigiinngitsut
soorlu aamma siunnersuuteqartup oqaatigissaatut taakkua tamaasa peqatigalugit
aalisartunut aamma angallateqarnikkut atugassarititaasut
aaqqissuussivigineqarnissaannut Kattusseqatigiit sinnerlugit tamakkiisumik
tapersiivunga.
Siunnersuut
sunaluunniit inuiaqatigiinnut iluaqutaasussamik kinguneqartussatut isikkulik
iluatinnaatilillu Inatsisartut ilaasortat ilaannit saqqummiunneqaraangat,
Naalakkersuisunit ileqquliutiinnarneqarpallaarunarpoq siunnersuut
akissuteqarfigisarlugu suliaq misissorlugu aallartinneqareerpoq, taava
siunnersuutip akuerineqarnissaa Naalakkersuisunit inassutigineqanngilaq.
Taamatut
suleriaaseqarneq allanngortinneqarluinnartariaqaraluarpoq, tassami
Naalakkersuisut akissuteqarnerminni ilaatigut oqarput; ?Tassunga atatillugu
tapertaasinnaasut suulluunniit qujarunneqarput?. Isumaqarpunga suliap
ingerlareernerani aamma siunnersuummi uani saqqummiunneqartut partiinit,
Kattusseqatigiinniillu aamma suliap ingerlateqqinnerani tapertaalluarsinnaagaluartut.
Taamatut
oqaaseqarlunga siunnersuut taperserlugu oqareernittuut
aappassaaneerneqannginnerani susassaqartut tamarmik tusarniaaffigineqarnissaat
inassutigaara, tamatumalu kingorna Inatsisartut inuutissarsiornermut
ataatsimiititaliaanut suliarineqarnissaa aamma inassutigalugu.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Taava
tullinnguuppoq siunnersuuteqartoq Per Rosing-Petersen, Siumut.
Per
Rosing-Petersen,
siunnersuuteqartoq, Siumut.
Qujanaq. Naalakkersuisut
akissutaannut aammalu partiit, Kattusseqatigiillu akissutaannut siullermik
qujarusuppunga.
Una
Aqqaluk Simon Olsen-ip akissummini qupperneq siullermi una pinnguatsiarpat
2002, 2001-imik oqarsorigakkit atorfilitsitagoortumik ingerlanera Danmark
taanna paatsuujallakkamaana pingaaruteqarami uani misissuisimanermi atatillugu
qanoq pisoqarsimaneranik ukioq taanna taaneqarnera pingaaruteqalaartutut
isigeriarakku, paaserusukkiga 2001-iusimanersoq allassimasutulluunniit
2002-imanersoq.
Taanna eqqaalaariarlugu
unaana aamma naggasiinerpit ilaatigut tunngavilersuininni KNAPK?p taanna aamma
tusarniaasimanermut atatillugu toqqaannartumik aalajangiussaq siunnersuisup
isummerfigisimanngikkaat ippassaaninnguaq una allatara nassiunneqartoq, uannut
aamma apuunneqartoq Inatsisartunut tamanut agguaanneqarsimasoq allassimagami,
uani issuaalaassuunga, imm. 2;
?Naalakkersuisup
akissutaani KNAPK isummerfigisimanngitsutut allaat oqaatiginiarneqarpoq,
tamanna eqqortuunngilaq matumuunalu ajuusaarutiginninnerput oqaatigineqarli?.
Taamannak
oqariarlutik aamma allapput;
?oqariartuutip
pingaarnersaat malugeqquvarput tassaasoq aningaasaateqarfeqalernissaq
tapersersoratsigu, aningaasaateqarfik ukiuni tallimani atuuppat, ukiumut 13-20
mio.kr.-nit tungaannut inuiaqatigiinnut pilliutaatissatut
taarsigassarsiaritillugit, imaluunniit tapiissutigalugit
naatsorsuutigineqassapput?.
Taanna
tassani tapersersuinerit ersarittorujorujussuugaluarpoq uani, arlaatigut immaqa
pisortatigoortumik pisortaqarfiup paatsoorsimassappat ajuusaarnalaassooq.
Kisianni taanna pivallaarnagu aamma uani assersuusiorninni
missingersuusiorninnilu kisitsit uani taakkartorneqartut imminnut
qanittuararsuunerat maluginiaannarpara, taavalu aamma Naalakkersuisut taanna
suliaq ingerlateqqissallugu allaat siunnersuutinninngaanniit ajunnginnerusumik,
pitsaanerusumillu aalisartunut atugassarititaanut pitsaanerusumik
siunnersuusiortussatut imminnut inissinnerat, kialluunniit
ajoriinnarsinnaanngilaa, tassami uanga siunnersuuteqarninni ukiunut
tallimaannarnut atuuttussatut siunnersuutigigakku, Naalakkersuisulli taanna
ataavartumik siunertaqarnera kialluunniit ajorisinnaanngitsutut
siunnersuuteqaraluaraanniluunnit taamaappoq.
Soorlu
aamma Siumup oqaaseqartuata taamannak oqariartuutigigaa Inuit Ataqatigiit
aammalu Atassumminngaanniit aamma taamannak oqariartuutigineqarpoq. Soorunami
aamma Anthon Frederiksen taamatut tapersiineranut aamma taamaappoq.
Taamaattumik tassani tunngaviatigut aamma paasinarpoq taanna malersorneqarmat,
kialluunniit assortoruminaatsissavaa, kisianni aamma una ineriartorneq, tassa
Enoksen?p atatsimiititaliaani toqqammaveqartutut uanga takusinnaasara,
paasisinnaasakka malillugit una ineriartorneq aallartinneqareersimasoq
ingerlareermat, neriuutigilaaginnassavaa aamma malugisinnaagakku oqaloqatigiittarnerit
arlallit siornali Sisimiuni eqqaaneqartutuut tamanna eqqarsaatersuuteqarneq
qaqinneqareersimavoq, aammalu februarimi Ilulissani isumasioqatigiinnermi aamma
taanna tikillatsiarneqareersimalluni. Taamaattumik suliarlu una ikaarsaarneq
ingerlareermat sivisoorujorujussuarmik misissuisoqarnissaa soorunami
sukumiisumik misissuisoqarnissaa kialluunniit qularissanngilaa, kisiannili
sivisoorujorujussuarmik misissuisoqarnissaa neriuutigissanngilarput.
Tassami
maannakkut taanna pisariaqartitsineq ullutsinni takussaalereernikuummat.
Tassa
itigartitsissutaagaluartoq kisianni Naalakkersuisut neriorsuuteqarmata
pitsaanerusumik siunnersuusiornissaminnik uannut neriorsuuteqarmata, aamma
taamannak partiinit tamanit ilalerneqarmat, taamaallaat Demokraatit taanna akerleraat.
Kisianni partiit sinneri, Kattusseqatigiillu taanna tapersersormassuk
ajoriinnagassaanngilaq.
Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Ja taava
Naalakkersuisut oqaaseqaleraangata aamma oqaaseqarfigigaangatsigit
Naalakkersuisup atia taaneq ajorparput, taamaattumik massakkut
oqaaseqartitassap taaguuteqarpoq Aalisarnermut, Piniarnermut,Nunalerinermullu
Naalakkersuisoq.
Simon
Olsen, Aalisarnermut,
Piniarnermut,Nunalerinermullu Naalakkersuisoq, Siumut.
Naalakkersuisumut
oqaatigissavara suliap siunnersuutigineqartup naammaginartumik tamanit
oqaaseqarfiginera maluginiaratsigut. Tassa siunnersuutigineqartoq Siumumiit
iluarisimaarneqarpoq aammattaaq oqariartuutit ukiariartornerani pisimasut
ukiullu nutaami suliat aallartereersimasut aamma ingerlanerat aamma tassani
paasissutissiissutigineqarpoq.
Taamaakkaluartoq
siunnersuutigineqartup tapersersorneqannginnissaa aamma erseqqilluni
Siumuminngaanniit. Inuit Ataqatigiinni siunnersuummik misissorluariaqartunik
saqqummiussinera aamma soqutiginartortaqarpoq, tassa uani oqaatigineqartunit
allaalaartumik oqaaseqartoqarmat, taanna misissugassatut soorunami
tigussavarput ilanngutassatullu pitsaasutut aamma qularnanngilaq
akuliunneqarsinnaassaaq.
Atassummiit
siunnersuutigineqartoq ilalernartinneqarportaaq, nassuiaatigineqartullu aamma
erseqqilluinnartuullutik. Taamaakkaluartoq aamma oqaaseq taanna atorneqartoq
tassalu; iluseq taamaattoq akuersaarneqanngikkallartoq, imaluunniit
akuersaarneqassanngitsoq. Demokraatit taamatorluinnaq oqaaseqarput, tassa
paasisariaqarluni amerlanerussuteqangaatsiartut siunnersuummik
ilalernartitsinngillat, kisiannili tunulequtaa tamatigut
paasinarluaqqissaarluni.
Kattusseqatigiinnit
pingaartinneqartut ilallit aamma Naalakkersuisuniit maluginiarneqarluarput,
erseqqilluinnarpoq aamma assortorneqarsinnaanngillat kisiannili suliat
ingerlaarnerat Naalakkersuisunit oqaatigineqartoq paasinarpoq aamma
paasilluarneqartoq.
Siunnersuuteqartup
apeqqutaanut siullermik 2001-imi taaneqarsimasumut tunngatillugu, tassa una
paatsuunganartinnguatsiarpat tassa Inuutissarsiornermut tapersiisarnermut
aaqqissuussisarnerup tapersiisarnerup taassuma Inatsisartuninngaanniit
Naalakkersuisunut nuunneqarpoq 2001-imi ukiup naalluinnalernerani,
taamaalilluni Naalakkersuisut ataanni taanna inissinneqarluni. Tassa taanna
2001-iuvoq aap.
Taava
taassuma saniatigut KNAPK?p oqaatigisaa uani quppernermi 2-imi oqaaseq
atorneqartoq; KNAPK peqataarusuttoq, toqqaannartumilli aalajangiussassatut
siunnersuut isummerfiginngikkaat, taanna aap ? pisortaqarfitta uagullu
paasinninnerput taamaappoq, taamaammat oqaloqatigissutiginissaa
pisariaqartitsineq malillugu naatsorsuutigineqassaaq.
Naggataatungaatigut
oqaatigissavara suliat maannakkumut naleqqussaanermut tunngasut aallarteruttornikuupput,
taamaammallu Naalakkersuisuniit ingerlanneqartoq ullumikkumut ilumoorullugu,
pimoorulluinnarlugu ingerlanneqarmat nuannaarutigaara Inatsisartut tamarmik
aammalu partiit, Kattusseqatigiillu ersersimmassuk taamatut aaqqissuussineq
tamanit tamakkiisumik tassa pimoorunneqartoq, taanna Naalakkersuisuniit assut
nuannaarutigaarput.
Qujanaq.
Aqqaluk
Lynge, ataatsimiinnermi
aqutsisoq, sinniisussat pingajuat, Inuit Ataqatigiit.
Qujanaq.
Taamaalilluni oqaluuserisassaq taanna naammassissaaq, tassa Inuutissarsiutinut
tapersiisarnermut aaqqissuussinermik nutarteraluni sulinermut una siunnersuut
aamma ilanngunneqassammat, tassa aalisarnermik tapiisarnerit allatoortut
aammalu nalilersuinerit pisussat Naalakkersuisut neriorsuutigimmatigit,
taamaattumik maani najuuttut tamarmik akuersissutigigaat imaalilluni
siunnersuut una angerneqassanngitsoq, kisiannili ukiamut taanna
aalajangiiffigivinneqartussaassaaq.
Taamaasilluni
naammassineqarpoq immikkoortoq 85, Aalisarnermut aningaasaateqarfimmik
pilersitsisoqarnissaa siunertaralugu Inatsisartunit Naalakkersuisut ukiuni
tallimani atuuttussamik siunnersuusiornissaannut peqquneqarnissaat pillugu
Inatsisartut aalajangiiffigisassaattut siunnersuut.
Siunnersuuteqartuulluni
Per Rosing-Petersen, Siumut. Tassalu taanna apeqqut aalajangiiffigineqavissaaq
ukiamut, ukiaanerani Inatsisartut ataatsimiinneranni.