Oqaluuserisassani immikkoortoq 12 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, pingasunngorneq 15. maj 2002 nal.
11:25
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Tassani
oqaaseqassaaq Ineqarnermut Attaveqarnermut Pilersuinermullu Naalakkersuisoq Jørgen
Wæver Johansen.
Jørgen
Wæver Johansen, Ineqarnermut, Attaveqarnermut Pilersuinermullu Naalakkersuisoq,
Siumut.
Qujanaq.
Matumuuna Naalakkersuisut sinnerlugit 2001-mut sanaartugassanut
iluarsagassanullu aningaasaateqarfik pillugu nassuiaat saqqummiutissavara.
Inatsisartut
ukiakkut 1999-mi ataatsimiinneranni Namminersornerullutik Oqartussat
missingersuutaat pillugu inatsit normu 8. 29. oktober 1999-meersoq
akuersissutigineqarpoq. missingersuutit pillugit inatsimmi ilaavoq
missingersuusiornermi teknikkimut tunngasut aallaavigalugit sanaartugassanut
iluarsagassanullu aningaasaateqarfiup pilersinneqarnera.
Sanaartugassanut
iluarsagassanullu aningaasateqarfimmik pilersitsinerup siunertaraa
sanaartornermut tunngasuni pilersaarusiornerup pingaarnersuilluni
tulleriiaarinerup aningaasanillu aqutsinerup pitsanngorsarnissaat.
Missingersuutit
pillugit inatsimmi paragraf 24-mi ima aalajangersagaqarpoq, issuarpara,
ANaalakkersuisut Sanaartugassanut iluarsagassanullu aningaasaateqarfiup
ingerlatai pillugit nalunaarusiortassapput. Tassungalu ilannguttassallugit
tulleriinneri malillugit pilersaarusiat nutaat pilersaarusiat ingerlanneqartut
kiisalu pilersaarusiat naammassineqarsimasut taamaatiinnarneqarsimasulluunniit
killiffiit pillugit nassuiaatit.
Nassuiaat
sanaartugasanut pilersaarusianut kiisalu iluarsagassanut pilersaarusianut
avinneqartassaaq.@ Issuaaneq naavoq.
Sanaartugassat
pillugit ukiumoortumik nassuiaat Inatsisartut upernaakkut ataatsimiinneranni
saqqummiunneqartarpoq. Matumani annikitsualuttai ilanngutinngikkaluarlugit
nassuiaammi pingaanerusut salliutissavakka. 2000-p naanerani
aningaasaateqarfimmiipput 256 million kr-nit. Aningaasaateqarfimmut 2001-mi
aningaasatigut iluarsiissutigineqarput 111 million kr-nit. 2000-mi
aningaasaateqarfimmi aningaasaliissutitut tiguneqarsimasut.
Taamaalilluni
aningaasaateqarfiup 2001-p aallartinnerani piviusumik aningaasaatigai 367
million kr-nit.
2001-mi
suliniutit nanginnerannut suliniutinullu nutaanut 726 million kr-nit
aningaasaateqarfimmut nuunneqarput. 2001-mi atorneqarsimapput 673 million
kr-nit tassalu aningaasaateqarfimmut nuunneqartunit 53 million kr-nik
ikinnerusut. Taamaalilluni 2001-mi 2000-mut sanilliullugu 80 million kr-nik
atuisoqarnerusimagaluartoq aningaasaateqarfiup aningaasaatai
amerlariarsimapput maannalu 420 million kr-ullutik.
Tamanna
imatut paasineqassanngilaq sanaartornissami suliassat 420 million kr-nik
nalillit suliarineqarsimanngitsut. Tassami Sanaartugassanut iluarsagassanullu
aningaasaateqarfik allanittaaq suliassaqarmat. Tamatumani
pineqarput atortussat maskiinat atugassallu pisiarineqarnerat illunik
pisineq taasigassarsisitsinerit allallu.
Maanna
assigiinngitsunut tunngatillugu ingerlatat iserfigitsiassavakka.
Assigiinngitsutigut ingerlatat assigiinngitsorujussuusimapput.
Sanaartugassanut Namminersornerullutik Oqartussanit aqunneqartunut
tunngatillugu aningaasaliissutit 790 million kr-niusunit 520 million kr-nit
atorneqarsimapput.
Tamatuma
naligaa 63%-nik atuisimaneq suliassanut tapiissutitalinnut tunngatillugu
aningaasaliissutinit 99 million kr-nit imaluunniit kr-usunit 34 million
kr-niinnaat atorneqarsimapput. Tassalu suliassanut taakkununnga taamaallaat
34%-tit atorneqarsimapput.
Sanaartukkanut
nutaanut aningaasaliissutinut tunngatillugu aningasaliissutinit 653 million
kr-usunit 353 million kr-nit atorneqarsimapput. Tassalu atuisimaneq
59%-ulluni.
Nutaamik
sanaartukkanut illuliortiterneq atuiffiunerpaasimavoq. Tassani 70%-tit
atorneqarsimammata.
Iluarsagassanut
aningaasaliissutinit 440 million kr-niusunit 290 million kr-nit
atorneqarsimapput. Tassa 66%-tii. Innaallagissamut imermut kiassarnermullu
tassa kontomi pisortat suliassaqarfiutaannut taaneqartartumi atuineq
96%-usimavoq. Illunik iluarsaassinernut atorneqarsimapput 104 million kr-nit
tamatumalu naligaa aningaasaliissutit 66%-at.
Tamakkua
saniatigut nalunaarusiami kisitsisit innersuussutigissavakka.
2001-mi
aningaasanut inatsisikkut aningaasaliissutit annertuumik
naleqqussarneqarsimapput. 2001-mi ingerlatat sapinngisamik
annertunerpaanissaannut allartinneqartunut tunngavissat inissikkumallugit.
Tamatuma kingornatigut iluarsaassinerup allanngortiterinerup nutarinerullu
immikkoortinnissaanut malittarisassiortoqarsimavoq.
Inatsisartut
aalajangiiniarnerminni tunngavigissaarneruleqqullugit Naalakkersuisut
aningaasanut inatsimmi sanaartugassat nutaat ilanngunneqartarnerat pillugu
nutaamik periusiliorsimapput. Periuseq naatsumik oqaatigalugu imaappoq.
Pilersaarutit nutaat aallaqqaammut pilersaarusiornermut kontomut
ilanngunneqartarlutik. Naammattumillu tunngavissaqalerpat Naalakkersuisut
aalajangertarlugu pilersaarut aningaasanut inatsisissatut siunnersuummut
ilanngunneqassanersoq. Taamaalillutillu Inatsisartut tunngavissaqarluarlutik
isummersinnaalissallutik.
Taamatut
periuseqarnikkut pilersaarusiornissamut tunngavissarissaarnerulerpoq taamalu
ingerlatat naammassisarnerunissaannut tunngavissarissaarnerulerlunittaaq.
Nassuerutigisariaqarpoq kinguuaatoorutinut pissutaanerpaasarmat amigartumik
pilersaarusiortarsimaneq. Naalakkersuisullu naatsorsuutigaat nutaamik
periuseqalernikkut kinguuaattoornerit pinngitsoortinneqarsinnaalissasut
taamaalilluni ukiuni aggersuni sanaartugassanut iluarsagassanullu
aningaasaateqarfimmit atortakkat qaffallutik
taamaalillunilu kinguaattoorutit aningaasaateqarfimmit
katersuinnalersut annertuumik annikillineqarlutik.
Taamatut
oqaaseqarlunga Sanaartugassanut iluarsagassanullu aningaasaateqarfik pillugu
nassuiaat Inatsisartunut akuersaartumik oqaluuserineqarnissaanut tunniuppara.
Qujanaq.
Anthon
Frederiksen, ataatsimiinnermik aqutsisoq, Siulittaasup tulliata sisamaat,
Kattusseqatigiit.
Ineqarnermut
Attaveqarnermut Pilersuinermullu Naalakkersuisumut qujavugut. Taava
tullinnguuppoq Mikael Petersen Siumut. Takanna.
Mikael
Petersen, Siumup oqaaseqartua.
Qujanaq.
2001-mut Sanaartugassanut iluarsagassanullu aningaasaateqarfik pillugu
Naalakkersuisut nassuiaataat Siumumit imaattumik oqaaseqarfigissavarput.
Aningaasaateqarfiup inatsisitigut tunngavigisaa pilersinneqarfialu tassaavoq
missingersuutit pillugit inatsit 1999-mi Inatsisartunit akuersissutigineqartoq.
Taamaalilluni oqaatigineqarsinnaavoq aningaasaateqarfiup ukiut atuuffiisa
pingajussaat aatsaat ingerlapparput.
Taamaattumik
oqaatigisinnaavarput aningaasaateqarfiup siunertarisaanut piviusorsiortumik
ikkukkiartortitsineq aallarteruttortoq. Tassa sanaartornermut tunngasuni
pilersaarusiortarnerup pingaarnersuilluni tulleriiaarisarnerup aningaasanillu
aqutsinerup pitsanngorsarneqarneri pillugit suliat aallartinneqaruttorput.
Tamanit
ilisimaarineqarpoq aningaasanut inatsisissat suliarineqartarnerini soorunami
Inatsisartunit annnertuumik sammineqartarput sanaartugassanut
tunngassuteqartut. Taakkununngalu aningaasalersuinermi kissaatigisat
naapertorlugit tulleriiaariniarnermi pissutsit annertuumik
oqallisigineqartarlutik.
Matumani
nassuiaammi pissusissamisoortumik annertuumik sammineqarpoq
aningaasaateqarfiup aningaasatigut inissisimaneranut takussutissat aammalu
sanaartornermut iluarsaassinermullu aningaasaliissutaasut immikkoortortanut
sunut samminerat kiisalu kommuninut sorlernut aningasaliissutit
nalunaarsorsimanerat.
Siumumiit
aningaasaateqarfiup aningaasatigut inissisimanera annertunerusumik matumani
sammissanngilarput. Nassuiaammimi annertuumik ersarissumillu tamanna
allaaserineqarmat.
Isumarpullu
naapertorlugu paasineqarsinnaasumik ilusilikkamik. Kisianni Siumumiit
isumaqarpugut nutaatut sanaartugassat iluarsaassinissallu pillugit
pilersaarusiortarneq tulleriiaarisarnerlu suli annertoqisumik
pitsaanerulersinneqartariaqartut. Aammalu sanaartugassanut iluarsagassallu
aningaasatigut nalilersorneqartarnerat sukumiinerujussuarmik
suliarineqartariaqarluni.
Ullumikkut
killiffitsinni Siumumiit pissusiviusut ilisimasavut naapertorlugit
sanaartugassatigut pilersaarusiortarnerup massakkutut ingerlanneqartup
kingunerilerpaa sanaartugassarpassuit ajoraluartumik
kinguuaatoorujussuartarnerat. Tamatumunngalu pissutaanerpaasorinarpoq
nunatsinni sumiiffiit ukiullu qanoq ilineri naapertorlugit
pilersaarusiortarnerit ingerlanneqartarmata.
Imaasooq,
taanna uteqqilaassavara. Nunatsinni sumiiffiit ukiullu qanoq ilineri
naapertornagit pilersaarusiornerit ingerlanneqartarmata. Taamaalilluni
sanaartornermi ingerlataqartut naatsorsuutiginngilluinnakkaminnik
kipusoortinneqartarlutik aningaasaqarniarnikkut annertuumik sunniuteqartumik.
Aammalu
sulisussaqarniarnikkut annertuumik akunnattuungassuteqalersitsisartumik.
Ilisimasavummi naapertorlugit ullumikkorpiaq imaappoq allaat piffiit ilaanni
ilaatigut sanaartornermik ingerlataqartut suliassaaleqinertik pissutigalugu
suliassaminnik sulisorisaminnik soraarsitsisariaqalersarlutik.
Pissutsit
taamaannerat eqqumiippoq. Naak sanaartugassanut Namminersornerullutik
Oqartussaniit kommuniniit namminersortuniillu sanaartornermut
aningaasaliissutit annertugaluaqisut. Assersuutigalugu avannaani sikusartumi
sanaartorneq aallartinneqartarpoq ukiuunerani tamanna ajornakusoortuummat.
Soorunami sanaartornermi atortussat aatsaat tassa imaanerani
tikisinneqarsinnaasarmata.
Taamaalilluni
ukioq naallugu atortussatigut suliassatigullu eqqanaarsarsimanissaq
pisariaqarluinnartoq ilanngullugu isumaginiarneqartarluni.
Siumumit
isumaqarpugut taamatut sanaartornerit iluarsaassisarnerillu
pilersaarusiortarnerillu tamatigut aallaavigisariaqaraa nunap immikkoortumini
ukiut ingerlanerani pissutsit atugassarititaasut aammalu minnerunngitsumik
nunap immikkoortumini avatangiisitigut atugassarititaasut ilanngullugit.
Tamakku
pissutsit ilorraap tungaanut saatinneqassappata aammalu aningaasalersuutit
annertunerpaamik pissarsissutaasumik kinguneqartinneqalertassappata taava
sanaartornermik ingerlataqartut siunnersortitullu atorneqartartut kommunillu
peqatigilluinnarlugit pilersaarusiornerit ingerlanneqartariaqalerput.
Taamaattumik
Siumumiit Naalakkersuisunut kaammattuutigissavarput taamatut
pilersaarusiortarnermi susassaqartut tamaasa suleqatigalugit
pitsanngorsaanerit ingerlateqqeqqullugit, minnerunngitsumik illoqarfinni
assigiinngitsuni sulisitsisut peqatigiiffii sunniuteqaqataatillugit.
Ilanngullugu
Siumumiit Naalakkersuisunut kaammattuutigissavarput sanaartornermi
ilinniagaqartut ullumikkornit annertunerungaartumik sulillutik
sungiusartarnissaminnut periarfissaasa pitsaanerulersinneqarnissaat
sulissutigeqqullugu. Aamma taamaappoq iluarsaassisarnermi sulisussatut
Danmarkimi ilinniartinneqarlutik pikkorissartinneqartut pinngitsooratik
sulisorineqartarnissaasa aqqutissiuunneqarnissaanni.
Manna
nassuiaat iluatsillugu ilanngullugu Naalakkersuisunut kaammattuutigissavarput
ukiunut tulliuttunut tassa 2003-p kingorna ukiuni sisamani ukiumut 50 million
kr-nik naalagaaffiup aningaasaliissuteqartarnikkut peqataanerata
nangeqqinneqarnissaa Danmarkimi Naalakkersuisunut isumaqatigiinniutigeqqullugu.
Naalagaaffimmi
tamatumani avaqqunneqarsinnaanngitsumik suli annertuumik pisussaaffeqarmat.
Siumumiit
sanaartugassanut iluarsagassanullu aningaasaateqarfik pillugu nassuiaatit
siunissami pitsaanerusariaqartut. Nassuiaat tamaat ataatsimut isigalugu
kikkunnilluunniit paasiuminartunngorlugu ilusilerlugu aammalu
sanaartugassatigut iluarsagassatigullu pingaarnersiulluni tulleriaarineq
ersarinnerujussuanngorlugu kiisalu kommuninut assigiinngitsunut
aningaasaliissutitigut agguataarineq pisariaqartinneqartunit
naapertuunerusumik aaqqissuunneqarsimasunngorlugu.
Nutaamik
sanaartornerit iluarsaassinerillu immikkuullarissunngorlugit ilanngullugu
ilusilerlugu. Naggasiullugu aningaasanut inatsit aqqutigalugu tassa ukioq
mannamut 3 million kr-nik sanaartornermut pisortaqarfimmut
pitsanngorsaanissanut aningaasaliissutit sunniutai Naalakkersuisunit ukiamut
Inatsisartut atatsimiinnissaannut nassuiaaqqullugit piumaffigissavagut.
Taamannak
oqaaseqarluta Siumumiit Naalakkersuisut nassuiaataat tusaatissatut tiguarput.
Kaammattuutittalu suliap ingerlaqqinneani ilanngullugit suliarineqarnissaat
piumasaralutigu.
Anthon
Frederiksen, ataatsimiinnermik aqutsisoq, Siulittaasup tulliata sisamaat,
Kattusseqatigiit.
Mikael
Petersen qujanaq. Taavalu tullinnguuppoq Jakob Sivertsen, Atassut. Takanna.
Jakob
Sivertsen, Atassutip oqaaseqartua.
Qujanaq.
2001-mut sanaartugassanut iluarsagassanullu aningaasaateqarfik pillugu
Naalakkersuisut nassuiaat manna saqqummiussaat Atassummi imatut
oqaaseqarniarpugut. Missingersuutit pillugit Inatsisartut inatsisaanni
paragraf 24 naapertorlugu Naalakkersuisut sanaartugassanut iluarsagassanullu
aningaasaateqarfiup ingerlatai pillugit nassuiaateqartarnissaannik
peqqussutaasoq malillugu nassuiaat manna saqqummiunneqartoq Naalakkersuisup
saqqummiummagu Atassummit ilassilluarparput.
Naalakkersuisut
ukiumi qaangiuttumi sanaartugassanut iluarsagassanullu
aningaasaliissutigineqarsimasut Inatsisartunut nassuiaatigineqartalernerat
Atassummi assut pingaaruteqartutut isigaarput. Inatsisartut aningaasanut
inatsisaanni sanaartugassanut iluarsagassanullu atugassatut
aningaasaliissutissatut akuersissutigineqarsimasut siunertanut eqqortunut
atorneqartarnissaannut paasissutissiisarnissaq assut pingaaruteqarmat.
Inatsisartuni
Atassummit ilaasortaasugut ataasiarata sanaartugassanut iluarsagassanullu
aningaasaliissutigineqartartut tamakkerlugit atorneqartannginnerat
arlaleriaqaluta uparuartarsimavarput. Aningaasaliissutimmi nunatsinni
suliffissaaleqiffioqisumi suliffissaqartitsiniarnermut assut iluaqutaasut
nalunnginnatsigit. Taamaattumik sanaartugassanut iluarsagassanullu
aningaasaliissutigineqartartut siammasissumik ukiunut arlalinnut siumut
pilersaarsiorneqartalernissaat Atassummit assut pingaartutut isigaarput.
Pingaartumik sanaartugassat annertuut tamatumani eqqarsaatigalugit.
Pilersaarusiorluarneq eqqortumik aningaasaliinissamut tunngaviulluuinnartartoq
nalunnginnatsigu.
Naalakkersuisup
nassuiaammini Inatsisartut sanaartugassanut aningaasaliissutissanik
aalangiiniarnerminni tunngavissaqarnerulernissaat pisariillisaaffiginiarlugu
nutaamik periuseqalersimanerat soorlu pilersaarutinut nutaanut aallaqqaammut
kontonut ilanngussisalernikkut pisariillisaaniarnerat Atassummiit
iluarsimaarparput. Aammalu pisariillisaaniarnerup sunniutissai
malinnaaffigilluassagatsigit matumuuna Atassummit oqaatigaarput.
Aningaasaliissutinut
tunngatillugu aningaasat sanaartukkanut assigiinngitsunut
atorneqarsimanerannik saqqummiussakkut oqaatigineqartut erseqqimmata
annertunerusumik oqaaseqarfigissanngilagut. Taamaallaat sanaartugassat
kommuninut agguartaarsimanerannut tunngatillugu pilersaarusioarluartannginneq
suli amigaataasoq takusinnagatsigu matumuuna oqaaseqarfigissavarput.
Soorlumi
2001-mi aningaasaliissutit atuinerlu tamarmiusoq nunap immikkoortuini tamani 1
milliarder 93 million kr-nit atugassatut immikkoortinneqarsimasuni taamaallaat
673 million kr-nit atorneqarsimapput. Taamaalilluni aningaasat sinneri 420
million kr-nit sanaartugassanut iluarsagassanullu
aningaasaateqarfimmiiginnarsimallutik.
Nunatsinni
1994-miit 2001-mut sanaartugassanut aningaasaliissutigineqartartut
misissoraanni naammassisaqarsinnaaneq killeqartorujussuusoq takuneqarsinnaavoq.
Soorlu 1994-mi 594 million kr-nit atorneqarsimapput. 2001-milu 373 million
kr-nit atorneqarsimallutik. Ukiut arfineq marluk ingerlaneranni sanaartukkanut
atukkat taamaallaat 79 million kr-nik qaffariaateqalaarsimapput. Tamatumani
takuneqarsinnaavoq nunatsinni sanaartukkanik naammassisaqarsinnaaneq
annertuseriaateqangaarsimanngitsoq.
Sanaartugassat
iluarsagassallu nunatsinni taamak annertutigisut naammaassisaqarsinnaaneq
annertusarniarlugu Naalakkersuisut aaqqiiniutissanik suliniuteqarnersut
matumuuna Atassummit paasersupparput.
Naggataatigut
nunatsinni kommunit ataatsimut tamaasa eqqarsaatigalugit sumiiffinni
assigiinngitsuni aningaasat sanaartugasanut atugassatut
immikkoortinneqartartut assigiinngitsorujussuupput. Kommunit ilaat
annikitsuaraannarmik aningaasaliiffigineqartarlutik. Matumuuna atassummit
Naalakkersuisunut apeqqutigissavarput kommunini naligiinnerusumik
aningaasaliisalernissaq anguniarlugu kommunit qanimut suleqatigineqartarnersut
pingaartumik sanaartugassat kommunit aningaasaleeqataaffigisassaat tamani
eqqarsaatigalugit.
Nunatsinni
sanaartorneq inissianillu iluarsaassisarneq suliffissaqartitsiniarmut taama
pingaaruteqartigisoq nunatsinnit kommunini tamani ingerlanneqartarnissaa
Atassummit assut pingaartikkatsigu matumuuna oqaatigaarput.
Taamatut
oqaaseqarluta 2001-mut sanaartugasanut iluarsagassanullu aningaasaateqarfik
pillugu Naalakkersuisut nassuiaat manna saqqummiussaat sukumiisoq Atassummit
akueraarput. Qujanaq.
Anthon
Frederiksen, ataatsimiinnermik aqutsisoq, Siulittaasup tulliata sisamaat,
Kattusseqatigiit.
Jakob
Sivertsenimut qujanaq. Taava tullinnguuppoq Josef Motzfeldt, Inuit Ataqatigiit
takanna.
Josef
Motzfeldt, Inuit Ataqatigiit.
Namminersornerullutik
Oqartussat missingersuutit pillugit inatsisaat 1999-mi Inatsisartuni
akuerineqarmat isumalluarluni siunertarineqartut ilagaat sanaartornikkut
pitsaanerusumik pilersaarusiortarnissaq eqaannerusumillu periuseqarnissaq.
Tamannaavormi sanaartornermi inuussutissarsiuteqartut ujartortuagaat.
Qinersivik
una aallartiffigalugu sanaartugassanut tunngasut tamarmik ineqarnermut
pisortaqarfimmi katersorneqarput. Taavalu tamanna sioqqullugu
Naalakkersuisoqarfiit arlaqartut namminerisaminnik sanaartornermut
immikkoortortaqarfeqarsimanerat atorunnaarpoq.
Tamanna
sulisunit aallaqqaammut ippigineqarluni sungiunniaqqaartariaqarmat
paasisinnaavarput. Kisianni ullumikkut ukiut pingasunngoreersut suli
utoqqatsissutiginiarneqarpoq. Ilaatigut taamak allanguinerit
annertugineqarsinnaasut sungiuttariaqarnerannik patsisissarsiorneq
utoqqatsissutipalaanngorpoq. Qaangiuttariaqalersoq Inuit Ataqatigiit
isumaqarput.
Oqareernitsitummi
1999-mili Naalakkersuisut pitsaanerusumik pilersaarusiortarnissaq
eqaannerusumillu periuseqarnissaq siunertaammata Inatsisartunut qujasaatigaat.
Naalakkersuisut
nassuiaamminnut saqqummiussissumminni oqaatsit makku suli atorpaat. Issuarpara
nassuerutigisariaqarpoq kinguaattoorutinut pissutaanerpaasarmat amigartumik
pilersaarusiortarsimaneq.
Suummiuku
amigartumik pilersaarusiorfigineqarsimasut kikkunnillu. Tamanna Inatsisartunut
oqaatigineqanngitsoq maluginiarparput. Sanaartugassatut
aningaasaliiffigineqareersut pilertortumik piviusunngortinneqarnissaat Inuit
Ataqatigiit pingaartuutikkatsigu Naalakkersuisooqataanitsinni
pilersaarusionerup naammaginartumik pitsaassuseqarnissaa siunertaralugu
aningaasaliiffik 80.00.80-kkut 8,5 million kr-niugallartunik sanaartugassat
piffissaalluartilluguli pilersaarusiorneqarnissaat annertusaaviginiarlugu
aningaasaliineq iluatsipparput.
Ukiuni
siusinnerusuni millionit affaannaanik aningaasaliiffigineqartarsimasoq.
Tamakku eqqortumik aningaasaliiffiunerlutik aningaasaliisuminnut
Inatsisartunut uppernarsaatissatut takussutissaqartittariaqarpaat.
Aamma
tassunga uiggiutiinnarlugu maluginiarparput sanaassat minnerpaamik 50 million
kr-nit nalingi siorna julimi unitsinneqarsimasut. Immikkut taaneqarsinnaasut
allat nassuiaatitalersoriarlugit taamanikkut sanaassat sorliit tamatumani
eqqorneqarnersut aammalu sooq sanaassanut aningaasaliissutaareersunut
aningaasaajaasariaqarneq pisariaqalersimanersoq ilanngullugit Naalakkersuisut
nassuiaateqarfiginagu qarsupiinnarsimagaat tupaallaatigaarput.
Nassuiarneqarnissaat pissusissamisoorpoq.
Sanaartornerup
qanoq ilusilerneqartariaqarneranik Inatsisartut Aningaasaqarnermut
Ataatsimiititaliaata ilassutitut aningaasaliissutissanut inatsisissatut
siunnersuutip ippassigami aappassaannerlugu oqaluuserineqarneranut tunngasumik
isumaliutissiissummigut oqaassutai Naalakkersuisunut
puigornaveersaarluinnaqquvagut.
Kommunit
ataasiakkaat sanaartugassatigut kinguuaattoorfiusut nalunngitsorsuullugu
sanaartugassanut nutaanut aningaasaleqqeqattaarneq kukkunerummat
nassuerutigisariaqarparput.
Sanaassat
siammarnerullugit sanaartornermut ingerlataqartut tamakkiinerujussuarmik
atorsinnaavagut. Sanaassat siammarnerunerisigut sanaartornermut
ingerlataqartut tamakkiinerujussuarmik atorsinnaavagut.
Suliffissaarukkallarnerit annikillisaaffigisinnaavagut. Aamma sanaartornermi
akigititaasut qularnanngilaq apparsarsinnaavagut taamak silatusaarnitsigut.
Sanaartornerup
nakkutigineqarnera sannarlutanik pinaveersaartitsisussaq minnerunngitsumik
inissianik nutaanik initaartunut naammagiittaalliuutigineqartuartoq
tusartaratsigu ilanngullugu Inuit Ataqatigiit naatsorsuutigisimagaluarparput
nassuiaammut tamanna ilanngunneqarsimassasoq. Ukiut tullissaanut
nassuiaasiornissami eqqaamaneqassasoq naatsorsuutigaarput.
Inissaaleqinerup
akiorniarneranut ikorfaasinnaasutut inissiarsuit qaliaasa atorneqanngitsut
atorluarniarneqarsinnaanerat siusinnerusukkut Inuit Ataqatigiit
periarfissatsialattut tikkuarsimasarput sanaartornermut naalakkersuisumit
ilassilluarneqartoq taamanikkut qanoq isumalitigeqqinneqarsimanersoq
paaserusutatta ilagaat.
Sanaartorfissagissaanermi
kommunini ataasiakkaani akit assigiinngissitaaqisut suut toqqammavigalugit
naatsorneqartarnersut nassuiaammi ilaasimasariaqaraluarpoq. Naalakkersuisut
ullumikkut akissutissaqartinnavianngimmassuk apeqqutip tamatuma allakkatigut
Inatsisartunut ilaasortanut tamanut nuunilerlugu akineqartariaqarnera Inuit
Ataqatigiit piumasaraat.
Naggataatigut
nassuiaammi ataatsimut isigalugu illuutinik nutarterinissamik pilersaarutit
ukiut marluk angullugit kinguaattooqqaneraanik uggornarpoq. Tamakkumi
ilaatigut pinngitsoortinniarlugit iluarsaassinernut sulisussanik
ilinniartitsineq annikigisassaanngitsunik aningaasalerneqartarpoq.
Aamma taakku
siunertarineqartutut sulisorineqarnissaat qulakkeerumallugu sanaartornemik
ingerlataqartunut attaveqaataasussamik atorfeqartitsisoqarpoq.
Taamaakkaluartoq
iluarsaassinermi suleqataasussat ikigisassanngitsut Danmarkimukartillugit
ilinniartillugit ilinniartinneqartut ilumut siunertarineqartunut
iluarsaassinerni atorneqarnerisa tamakkiisuunngilluinnarnerat
Naalakkersuisunit arlaqartunit akuuffigineqartoq sooq taamak
iluatsisimaarfiunnginnera Naalakkersuisunit nassuiaatissaqartinneqarnersoq
Inuit Ataqatigiit paaserusupparput.
Aningaasaliissutiminnut
naapertuuttunik Inatsisartut pissarsisarpat. Ilinniartinneqartut
sooq ilimagisaraluamittut atorneqarnerat taamak annikitsigaa. Taamatut
naatsumik nassuiaat oqaaseqarfigalugu tusaatissatut akuerisariaqarparput.
Aappaagumut nassuiaatissap suliarineqarnerani pitsanngoriaatissatut
tikkuartukkatta ilanngullugit sunniuteqartinneqartinneqarsinnaanerat
arajutsinaveersaaqquutigalugu.
Naggaterpiaatigut
sulisut suliaminnik pingaarutilimmik iluatsisimaarnissaannik kissaappagut.
Anthon
Frederiksen, ataatsimiinnermik aqutsisoq, Siulittaasup tulliata sisamaat,
Kattusseqatigiit.
Josef
Duusi Motzfeldt qutsavigaarput. Taavalu maannakkut oqaseqassaaq Mogens Kleist
Kattusseqatigiit.
Mogens
Kleist, Kattusseqatigiit oqaaseqartuat.
Qujanaq.
Oqaatigissavara nutsernera takkussimanngimmat arriitsunnguamik atuassavara.
Sanaartugassanut
iluarsagassanullu aningaasaateqarfik pillugu nassuiaat 2001 Ineqarnermut
Naalakkersuisup saqqummiussaanut Kattusseqatigiinniit imatut
oqaaseqaateqassaagut.
Sanaartornermi
pilersaarusiornerlunnerup kinguneranik ullumikkut aningaasaateqarfik 400
millionit sinnerlugit karsimiititarai. Uffalu illuatungaatigut kommunit
aammalu sulisitsisut sinerissami ilaat sanaasaminnut utaqqiinnartut.
Tamanna
Kattusseqatigiinniit akuersaarsinnaanngilluinarparput. Tassami aningaasat
sinerissami suliffisanik annertuunik pilersitsisinnaagaluit karsimi
uninngatiinnarneqarmata erniorujoorlutik.
Aperisariaqarpugut
erniat ullumikkut qanormitaava annertutiginersut Naalakkersuisut manna
oqaluttarfik aqqutigalugu taasinnaaneraat.
Sanaartugassat
assigiinngitsut taakkartorsinnaasagut amerlaqaat. Naalakkersuisullu
saqqummiinerminni taakkartorpai kisitsisit procentinngorlugit atorneqarsimasut
ulloq manna tikillugu.
Taamaakkaluartoq
ajuusaarnarpoq inuiaqatigiinni aningaasat kaaviiaartittussaagaluit
uninngatiinnarneqarmata ulloq manna tikillugu.
Illua
tungaatigut Kattusseqatigiinniit nuannaarutigalugu oqaatigerusupparput
sanaartornermi pilersaarusiortarnerup nutaamik aaqqiivigineqarnissaa.
Tassami
illoqarfiit sikusartumiittut pitsaanerusumik aamma ingerlaavartumik
sanaartortitsisinnaalernissaat anguneqassammat.
Taamatullu
suliffeqarfiit ukioq kaajallallugu sulisitsisinnaalernissaat anguneqassammata.
Taamatullu
akileraarutitigut kommunenut kaaviiaartitassat annertunerulernissaat
Kattusseqatigiinniit takusinnaakuttooratsigu.
Ullumikkut
pitsaanerusumik pilersaarusirtarnissat kattusseqatigiinniit
oqaatigerusupparput, tassa tassami assersuutigalugu imikkut Sanap eqqaani
sanaartornissat, tassalu Inatsisartut aningaasanut missingersuusiornerminni
akuersissutigisimasaat avaqqullugit pilersaarutaasunik ikinnerusunik
sanaartorniarneq. Tamanna pissuseq Kattusseqatigiinniit
akuersaarsinnaanngilluinnarparput.
Paaserusupparput
kia taamatut aaliangersimaneq akuersissutigisimaneraa Naalakkersuisut tamanna
Naalakkersuisumut tamanna akeqqugaluarparput, manna oqaluttarfik aqqutigalugu.
Sanaartoornermik
kinguartoornerup taakkartoneqarsinnaasut ilaat makkuupput. Piffissaq sivisooq
isigalugu pilersaarusiornerup amigaateqarnera. Aningaasaliissuteqariaaseq
suliami piffissaq eqqorlugu pilersaarusiornissamut ilaallu ilanngullugit
aningaasanik iluatsitsiviusimanngitsoq.
Sanaartornermi
ingerlatat tamarmiusut ataqatigiissaarnerisa qulliunerusumillu aqunnerisa
aaqqissuunnissaannut pisariaqartitat amigaateqarnerat.
Sanaartornermik
ingerlatsinermi suleriaatsit aammalu qarasaasiat atorlugu aqutseriaatsinik
amigaateqarneq.
Tassa taakku
ilaannarivaat.
Kommunet
ataasiakkaat eqqarsaatigalugit oqaatigisinnaavarput, aningaasat
sanaartornermut atorneqarsimasut taamaallaat 62 procentii atorneqarsimammata.
Tassami
aningaasanik 1093 millioniniit 673 millionit atorneqarsimammata.
Siunissamilu
neriuutigaarput sanaartornermut akuersissutaasarsimasut eqqornerusumik
atorneqartarnissaat, iluamik pilersaarusiornikkut kaammattuutigerusupparput.
Assersuutitut
taasinnaavarput Maniitsup kommuneani sanaartornermut aningaasaliissutinut 27
millioniniit taamaallaat 5 millionit atorneqarsimapput.
Uummannap
kommuneani 84 millioniniit taamaallaat 30 millionit atorneqarsimapput.
Qasigiannguit
kommuneani 14 millioniniit taamaallaat 9 millionit kisimik atorneqarsimapput.
Saqqummiussami
aammattaaq ersarippoq INI A/S 350 millioninik atugassaqartoq sanaartornermut
tunngatillugu.
Taakkunanngalu
ilaannaat ilaannaanik atuisimapput. Tassalu 100 millionit suli
atorneqartarsimanngimmata sanaartornissamut.
Kattusseqatigiinniit
oqaatigissavarput sanaartormi kinguarsaasut ilagisinnaammassuk INI A/S-ip
ullumikkut sanaartornermut ingerlatseriaasaa.
Ukioq
kingulleq aningaasaateqarfik 367 millioninik uninngasuuteqarsimavoq.
Ullumikkut 420 millioninik uninngasuuteqalersimalluni.
Taassuma
takutiinnarpaa ukioq kingulleq manna oqaluttarfik aqqutigalugu
oqaatigisimasarput eqqorsimasoq. Tassami sanaartornermi pilersaarutit
annertuallaarneri oqaatiginikuugatsigit.
Ukiormummi
nalinginnaasumik 590 millionit missaat sanaartornissamut atortarsimavagut.
Taamaasillunilu
aningaasaateqarfiup aningaasaatai ullumikkut suli amerligaluttuinnartut
takusinnaagatsigit.
Taamatut
oqaaseqarnaraluaqaaq taamaatut naatsumik oqaaseqarluta maani oqallinnissamut
ilaanissarput Kattusseqatiginniit oqaatigissavarput. Naalakkersuisullu
saqqummiussai tusaatissatut tigorusullugit.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Mogens
Kleist qutsavigaarput taava tulliulluni oqaaseqassaaq Otto Steenholdt,
Attaviitsoq.
Otto
Steenholdt, Attaviitsup oqaaseqartua.
Aammalimi
killormut ilungersuummernarpoq tassa aningaasat oqarta, pinngitsooratik
atugassat atunngitsoorsimasalli amerligaluttuinnartut atorneqaqqullugit
ilungersuuteqartualerluta.
Nassuiaammi
aningaasat taakkarsukkat qissimillattaarlugit eqqarsaatiginngitsoorneq
ajornaqaat.
Sineriassuatsinni
illut pisortat pigisaat, ilaatigut ima aserfallassimatigisut allaat meeqqat
uffarfinni atuartinneqartalersimallutik.
Allallu
oqaluffinnguaminnik aaqqissuusseqqugaluartut tulleriiaarinerooq pissutigalugu
ulloq manna utaqqisinneqartuarlutik.
Massali
aningaasat aamma tamakkununnga atugassaagaluit amerlitsikkaluttuinnartut.
Aningaasammi
atorsimasat 2001-imi qaffariarsimapput, 80 millionersuarnik taamaakkaluartorli
aningaasaateqarfiup aningaasaatai suli amerleriarsimapput.
Tassa
nassuiaat ataatsimut isigalugu oqartariaqarpoq, nunatsinni sanaartugassanut
iluarsagassanullu aningaasaateqarfitsinni aningaasaateqaraluaqaagut,
sanaartornerli iluarsaanerlu arriippallaamik ingerlanneqaannarput.
Tamanna
pillugu Inatsisartullu alliangiisarnerminni tunngavissarissaarneruleqqullugit
Naalakkersuisut nutaamik periuusissiorsimapput. Tassa pilersaarutit nutaat
aallaqqaammut pilersaartusiornermut kontomut ilanngunneqartarlutik.
Konto
kalaallisut qanoq taasarneraat nalugakku.
Sanaartornerli
angummassinnaanngitsoq uparuartortuagarput, Naalakkersuisunit
nassuerutigineqarpoq kinguartoorutinut suna pissutaanersoq.
Tassalu
nalunngeriikkatsitut amigartumik pilersaarusiortarneq.
Maana
Naalakkersuisut nutaamik periuuseqalerniarlutik nalunaaruteqarnerat
iluatsilluaqqunaqaaq. Tassami oqaluuseriuakkat kinguaattoornerpassuit
tamatumuunakkut pinngitsoortinneqartalissammata.
Aningaasallu
iluarsaassinernut sanaartugassanullu atukkat amerlanerulissallutik.
Aningaasanik
sipaaqqusiuarluta una oqaluuserisarput killormut sammisutut ittoq
iluatseqqunaqaaq. Tassami suliassat suliarineqartussaagaluit
suliarineqanngitsoortulli, aningaasartaat atorneqaratik aningaasaateqarfimmut
uterartuartut amerlagaluttuinnartullu, annertuumik annikillisartariaqarmata.
Suliarisariaqalersunik
pilersaarusiorluakkanik kusanartumik sukkasuumillu sulinikkut.
Nassuiaat
naammagisimaarpara. Aningaasaliussanillu atunngitsuuisarneq
sanaartorlualernikkut qaangeriartorneqassasoq assorsuaq kissaatigilerlugu.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Otto Steenholdt qutsavigaarput. Maannakkut Ineqarnermut Attaveqarnermullu Naalakkersuisoq, Pilersuinermut Naalakkersuisoq Jørgen Wæver Johansen oqaaseqassaaq.
Jørgen Wæver Johansen, Ineqarnermut Avatangiisinullu Naalakkersuisoq, Siumut.
Qujanaq. Siullermik partiit Kattusseqatigiit Attaviitsullu oqaaseqartuinut tamanut qujarusuppunga.
Isumaqarpunga nassuiaat sukumiisoq annertoorlu suliarisimasarput ilassilluarneqartoq, aamma maluginiarpara amerlanerussuteqartut assut iluarisimaataat, ukioq manna paasissutissat annertunerusut paasiuminarnerusut aammalu takulertoruminarnerusut nassuiaammi ilanngunneqarsimanerat.
Tamanna Siumup oqaaseqartuata Mikael Petersenip aamma oqaaseqarnermini ersersippaa, taamaattorli aamma piumasaqaatigalugu siunissami Naalakkersuisut taamatut saqqummiussaqartarnerminni, aamma avammut inuiaqatigiinnut paasissutissiinerusarnissartik ilanngullu suliamut atatillugu suliarisaqariaraat.
Tamannalu tusaatissatut tigorusupparput. Tassa eqqarsaatigineqarsinnaasut ilaat tassaavoq, nassuiaatip saqqummiunneqarneranut ilanngullugu, naqitamik paasiuminarsakkamik aviiseeraliakkamik, imaluunniit indlægsavisimik taaneqartartumik, ilanngulluni paasissutissiissutigineqartussatut pilersitsisoqarsinnaanera taanna Naalakkersuisuniit ukiumut tulliuttumut eqqarsaatigissavarput. Suliaralugulu.
Siumumiit neriulluarfigineqarpoq pilersaarusiorneq nutaaq periuuseq nutaaq toqqammavigalugu aamma pitsaanerusumik sanaartugassat ingerlanneqalersinnaanerat. Tamanna Naalakkersuisuniit isumaqatigaarput, taamaattumik aamma kaammattuutigineqartut assigiinngitsut ilaatigut sanaartugassat nunatsinni naammassisaqarsinnaassutsimut naleqqussarnerullugit, nunat immikkoortuinut kommunenullu agguataarluarneqarnerusarnissaat siunissami, Naalakkersuisuniit aqqutissiuunniassallugu Siumumiit kaammattuummut aammalu partiinit allanit taamatoqqissaaq kaammattuuteqarnerannut Naalakkersuisut eqqumaniarsarissapput.
Aamma tassani susassaqartut tamaasa suleqatigalugit pitsanngorsaaniarnerit ingerlanneqarnissaat pisariaqarpoq. Minnerunngitsumik sumiiffinni assigiinngitsuni kommunet peqatigalugit pilersaarusiorneq ingerlanneqarnissaa, taanna pisariaqarpoq.
Tamatumani eqqaanngitsoorusunngilara, ukioq kingulleq kommunenut isumaqatigiinniarnermi, tassa bloktilskude pillugu, isumaqatigiinniarnerni siusinnerusukkut aamma maanngaanniit eqqartoriigarput, tassa oqaluuserisassani immikkoortoq 75-I Anthon Frederiksenip saqqummiussaani. Naalakkersuisut ilaatigut ilisimatitsissutigaarput kommunenut aamma periarfissaammat immikkut ittumik sanaartugassanut tunngatillugu isumaqatigiissusiornissaq, kommunet taamatut kissaateqarpat, pisinnaasorippallu.
Taamaattumik taanna aamma aqqutigalugu qularnanngitsumik minnerunngitsumik kommuneni annerumaani ataqatigiinnerusumik, pilersaarusiornerit ingerlanneqarsinnaallutillu naammassiniarneqarsinnaaneri periarfissaavoq. Atorluaqqunaqaarlu periarfissaq taanna.
Siumumiit aamma kaammattuutigineqarpoq sanaartornermi ilaatigut aamma iluarsaassinermut iluarsaassinissaarsuarmut tunngatillugu, ilinniartinneqartartut taakkua ullumikkornit annertunerungaartumik sulisorineqarnissaannik tunngatillugu, Naalakkersuisut aamma kaammattuuteqarfigineqarput.
Tamanna pillugu Naalakkersuisuniit eqqumaffigivarput taassuma ilanngullugu ukiaru Inatsisartut ataatsimiinnerannut, tassa aningaasaqarnermut inatsisip suliarineqarneranut atatillugu, aamma siusinnerusukkut aningaasaqarnermut ataatsimiititaliamiit piumasarineqartut tunngavigalugit, erseqqinnerusunik kisitsisinik paasissutissiinissarput pisussaaffigisussaagaatsigu.
Ilaatigut qassit ilinniarteqqinneqarnissaat siunnerfigineqarsimanersoq, qassit aallartinneqarsimanersut, qassit naammassisimanersut, qassit ullumikkut aalaakkaasumik suliffittaarsimanersut. Tamakkua paasissutissat pissarsiarinissaat aammalu Inatsisartunut ukiaru aningaasat aamma aaliangiiffigineqarnissaannut atatillugu ilannguneqarnissaat, aamma Naalakkersuisuniit siunnerfigaarput.
Siumumiit aamma pingaarutilik taaneqarpoq ilaatigut naalagaafiiup tassa Danmarkip iluarsaassinermut peqataanermini ukiuni kungullerni aammalu 2003-p tungaanut, ukiuni sisamani ukiumut 50 million kronenik aningaasaliissuteqartarnermigut, sannarlutat assigisaallu iluarsaanneqarnissaannut tunngatillugu tapersersueqataasimanerannut tunngatillugu, naalagaaffimmut Naalakkersuisut isumaqatigiinniaqqinnissaat kaammattuutigineqarpoq. Aaqqissuussinerup tamatuma ingerlaqqinnissaa kissaatigineqarluni.
Tamanna Naalakkersuisuniit siunnerfigineqarpoq. Naalakkersuisulli isumaqatigiinniarnerit iluatsissanngippata aamma iluarsaassinernut aningaasat immikkoortinneqartartut, ikileriaateqartinnginnissaat isumannaarlugu maannakkut aappaagumut aningaasaqarnermut inatsisip suliarineranut atatillugu, pilersaarusiornertik ingerlappaat.
Iluarsaanneqartariaqartut pisariaqartumik iluarsaanneqartariaqarmata aammalu aningaasat taakkununnga immikkoortinneqartut naammattariaqarmata.
Atassummiit Jakob Sivertsenip ilaatigut siammasissumik ukiunut arlalinnut siumut pilersaarusiortoqartarnissaa, Atassummiit pingaartutut assut isigineqarpoq.
Naalakkersuisut taanna ilaatigut tunngavigalugu tassa periuseq nutaaq, eqqupparput januarip aallaqqaataaninngaaniit. Kisianni tassa periuseq nutaaq taanna imaaliallaannaq sunniunnaviannginnami. Tamakkiisumik sunniunnissaa naatsorsuutigaarput aatsaat ukiut marluk qaangiuppata malugineqarsinnaassasoq.
Tassa
taanna maluginiaqqussavara. Tamakkiisumik periuutsip nutaap
pilersaarusiortarnermi sunniutissaat, aatsaat ukiut marluk qaangiuppata
tamakkiisumik pinissaa naatsersuutigaarput.
Taannalu
soorunami eqqaamasariaqartut ilagissavaat.
Sanaartugassanut
iluarsagassanullu naammassinngitsoorsimasanut tunngatillugu, paasissutissat
nassuiaammi ilaareersut innersuussutigalugit Atassutip ujartugaanut
oqaatigerusuppara, tassa kommunet kommunenut aningaasaliissutigineqartartut
taakkua naligiinnerusumik agguataarneqarnissaat, taanna aamma
kissaatigineqartoq tassa aningaasaliunneqartartut siammasinnerusumik
naammassisaqarsinnaassuseq tunngavigalugu siammarterneqarnerunissaat
kissaatigineqartoq maluginiarpara.
Tassunga
tunngatillugu periuseq maannakkut atorneqartartoq tassaavoq kommunet tamarmik
sanaartugassanut tunngatillugu, kissaatitik tassa Namminersornerullutik
Oqartussaniit aningaasaleeqataaffigineqartussat pillugit, qinnuteqaatitik
martsip aallaqqaataa tikitsinnagu nassiuttarpaat.
Taava
Naalakkersuisoqarfiit ataasiakkaat pingaarnersiorlugit tulleriinneri
inissittarpaat suliassaqarfimminnut tunngatillugu. Tulleriiaarinerlu taanna
tunngavigalugu Naalakkersuisut aningaasaqarnermut inatsisissamut
siunnersuusiornerminni, suut ilanngunneqarnissaat siunnersuusiortarpaat.
Tamatumalu
kingorna tassa Inatsisartuniit aaliangiiffigineqartarluni. Taamatut
siunnersuusiorsimaneq pissusissamisoornersoq imaluunniit
allanngortinneqartariaqarnersoq.
Tassami
taassuma aaliangiiffigineqavinnissaa Inatsisartuniippoq, aningaasaqarnermut
inatsisip akuersissutigineqarneranut atatillugu, ukiumoortumik
naliliivigineqartartussaq.
Taamaattumik
aamma ukiaru Inatsisartut periarfissaqarumaarput Naalakkersuisut
tulleriiaarinermut siunnersuutigiumaagaannut allanngortitsinissaminnut.
Sulianut nutaanut tunngatillugu, soorunami ingerlareersut ingerlassapput.
Kisianni sulianut nutaanut tunngatillugu allatut pingaarnersiuisinnaaneq
Inatsisartuniippoq pisinnaatitaaffik, aammalu akisussaaffik taanna.
Inuit
Ataqatigiinniit neriuppunga aamma maluginiarneqarsimassasoq, sapinngisarput
tamaat naapertorlugu paasissutissat paasiuminarnerusunngorlugit, aammalu
annertunerusunngorlugit Inatsisartunut ukioq manna
saqqumiunniarsarisimagatsigit.
Nalunngilara
kinguaattoornernut tunngatillugu patsisiliunneqartartoq, Inuit Ataqatigiinniit
utoqqatsissutitut taagorneqartoq ataasiaannanngeqaluni maani
atorneqartareersoq.
Kisiannili
tassa 1999-imi allanngortiterineq tunngavigalugu malittarisassat maannakkut
februari naa martsimi, Naalakkersuisuni akueraagut.
Paatsoorneqarsinnaajunnaarlugu pisortaqarfinnit tamanit suliassaqarfimmut
tunngatillugu, imaluuuniit suliniuummut tunngatillugu, sanaartornerup
ingerlanerani kikkut sumik suna akisussaaffigineraat.
Malittarisassat
taakkua siusinnerusukkut amigaatigineqarsimapput. Massakkut pigineqalerput.
Taamaattumik taanna kingorna patsisitut atussallu imaluunniit
pissutigitissallugu atorsinnaajunnaassaaq.
Tamanut
erseqqissunik malittarisassaqalerpoq. Taamaattumik taakkua malillugit aamma
Naalakkersuisut ingerlatsinissarput naatsorsuutigaarput.
Nassuerutigisariaqarparput
kinguaattoorutinut pissutaasarmat amigartumik pilersaarusiortarsimaneq.
Apeqqutigineqarpoq
Inuit Ataqatigiinniit sumiuku amigartumik pilersaarusirfigineqarsimasut? Tassa
tassani aningaasaateqarfimmi kinguaattoorutit 420 million kronet qiviaraanni,
amerlanerpaartaasa kinguaattornerannut tunngatillugu patsiseq taannaavoq.
Suliassaqarfinni soorunami assigiinngitsuni kinguaattoorutit annertussusaat
nikerarpoq.
Kisianni
pilersaarusiorluarsimannginnerup kingunerisaanik patsiseqarpoq. Ilaatigut
immikkoortoq 5-imi aatsaaginnaq sammisatsinni, inissianut sanaartornissamut
tunngatillugu, tassa patsisit annerpaartaraat pilersaarusiorluarsimannginnerup
Inatsisartunut inaarutaasumik saqqummiussaqannginnermi.
Taamaattumik-una
periuseq allanngortikkipput. Allanngortipparput pilersaarusiorneqa aatsaat
naammassereeraangat, Inatsisartunut inaarutaasumik naliliiffigisassanngorlugu
inissinneqartarnissaa.
Taamaaliornikkut
novemberimi Inatsisartut nalileereerpata, pilersaarutit pigereerlugit
januarimi suliariumannittussarsiuussinerit assigiinngitsut
ingerlanneqartalersinnaanissaat aqqutissiuuneqassammat.
Massakkutuunngitsoq
aatsaat Inatsisartut aalajangereerpata, taava pilersaarusiornerit
aallartittarlutik sukumiinerusut.
Periuseq
tassani allanngortipparput, tamakkiisumillu sunniunnissa ukiut marluk
qaangiuppata tassa naatsorsuutigaarput.
Taamaattumik
aamma allanik assersuutinik oqaaseqassagutta, tassa taaneqarsinnaapput
ilaatigut inissianik sanaartornermi tunngatillugu 60/40. pilersaarutaasunit
akisunerulersut, taakkua kinguaattoruteqarfiusarput. Aamma ilaannikkut
kinguaattooruteqarfiusarput kommune nammineq sanaartugassamut tassunga
tunngatillugu tapiissutigisassani, piffissanngoraangat pigiunnaarsimasarmagu
ilaannikkut.
Taava
tamatumani suliniut taanna aningaasaateqarfimmut ikineqareermat
allanngortinneqarsinnaasanngilaq. Taava kommunep immaqa januarip
aallaqqaataani aappaaguani aningaasaateqalernissaa utaqqimaaqqaarneqartarpoq.
Taamaattumik
kinguaattoorutinut patsisaasut assigiinngitsorpassuupput. Kisianni tamarmik
ataatsimut oqaatigissagaanni qulequtaraat, pilersaarusiornerup amigartumik
ingerlanneqarsimanera.
Taamaattumik-una
periuseq allanngortikkipput, kissaatigalugu neriuutigalugulu
pilersaarusiorluakkat tunngavigalugit Inatsisartut aaliangiineri pisalerpata,
taava kinguaattoorutit annikillisinneqassapput. Kisiannili aamma
naammassineqartartut amerlineqassapput.
Tassungalu
taputartuullugu piviusunngortissinnaagutsigu siammasinnerusumik
naammaginarnerusumillu sanaartugassat naammassisaqarsinnaassutsimut
naapertuunnerusumik agguataaneri, taava isumaqarpunga suliassaq annertooq
naammassisimassagipput.
Taannalu
suliassaq naammassiniarnissaa Naalakkkersuisuniit pimoorullugu soorunami
ingerlapparput.
Inuit
Ataqatigiinniit aamma apeqqutigineqarpoq siorna julimi suliassat
unitsinneqartut allallu sanaartornerup iluani suliassanut tunngassuteqartut,
pillugit sooq erseqqinnerusumik nassuiaasoqarsimannginnersoq.
Tassa
tassunga tunngatillugu nassuiaatit tamakkiisut Naalakkersuisuni
sammineqareermata julimi, aamma Inatsisartut finansudvalgiannut, tassa
aningaasaqarnermut ataatsimiititaliaani sukumiisumik sammineqareerlutik
akuerineqarput.
Kisianni
imaanngilaq uani millionit eqqartorneqartut tamarmik unitsitsinermik
kinguneqartut. Uani amerlanerpaartaat nuutsinneqarput siliassanut allanut.
Amigartumik pilersaarusiorsimanerup kingunerisaanik aningaasanik
amerlanerusunik pisariaqartitsilersimasunut.
Tassani
assersuutigineqarsinnaapput tunumi nunaqarfinni atuarfiit arlallit. Taakkua
annertunerusumik aningaasaliiffigineqarput, kisianni
aningaasaliiffigineqarneri allaminngaannik soorunami tiguneqartariaqarput.
Aamma
paasissutissat erseqqilluinnartut taamani Naalakkersuisut aaliangiipput
aammalu paasissutissat taakkua sukumiisut tunngavigalugit, finansudvalgimut
aaliangertoqarluni.
Inuit
Ataqatigiinniit aamma sanaassat siammarnerunissaat taanna
oqaaseqarfigereerakku oqaaseqarfigeqqissanngilara, kisianni aamma taanna
ujartorneqarpoq. Aamma sannarlutanut tunngatillugu ujartuisoqarpoq.
Maluginiarneqarsimassaaq
nassuiaammi aamma kinguaattoorutinut ilaatigut ilaammata sannarlutat.
Soorlu
assersuutigalugu mittarfiliortiternernut tunngatillugu Qaarsuni mittarfiup
massakkut saqitsaassutaanera tunngavigalugu, tassa sanaartorneqaqqaarnerani
kukkussutaasut iluarsineqarnissaanut tunngatillugu inaarutaasumik
isumaqatigiittoqarnissaata tungaanut, aningaasat massakkut 60 millionit
uninngatinneqarput.
Naak
nalunngereeraluarlutigu mittarfittaa naammassereersoq ilaa?
Kisianni
saqitsaassutaapput qanorpiaq kukkusoqarsimanera tunngavigalugu
akiliisoqassanersoq. Taamaattumik 60 millionit tassani uninngatinneqarput.
Eqqartuussiviillu
tassa voldgift sagit aqqutigalugu massakkut ingerlanneqarlutik.
Aamma
nalinginnaasumik procenti aaliangersimasoq uninngatinneqartarpoq
sanaartugassanit nalinginnaasunik soorlu inissianut. Taava
saannarlutaasoqarsimappat ukiup ataatsip qaangiunnerani taakkua sanaajusimasut
misissoqqissaarneqartarput, aamma atuisut peqatigalugit.
Taakkulu
inaarutaasumik akuerineqarnissaasa tungaannut aamma aningaasat ilai
uninngatinneqartarput.
Inuit
Ataqatigiinniit aamma apeqqutigineqarput kommuneni ataasiakkaani akit
asigiinngisitaaqisut suut toqqammavigalugit naatsorsorneqartarnersut?
Tassa
tassunga tunngatillugu qallunaatut oqaatigisarpaat udbud og efterspørgsel.
Tassa qanoq annertutigisumik sanaartugassanut piumasaqarnerup taavalu
sanaartorsinnaasut qanoq suliaqareersimanersut. Taakkua aallaavigalugit akit
annertunerpaamik inissinneqartarput. Taamaattumik sanaartugassanik
pissaaleqiffiunngilluaasartuni, sanaartugassanut akit qaffasissorujussuusarput.
Taavalu
sanaartugassaale imaluunniit sanaartugassanik amikkittoorfiusuni akit
appasinnerusinnaasarlutik. Kisianni akit qaffakkaluttuinnannginnissaat pillugu
nalunngisassitut, ukiaq aallarnerfigalugu tassa inatsisini
toqqammavilersorpagut, qaffasinnerpaaffigisinnaasaat sunaassanersoq.
Andelsboliginut
13.500. 10/40/50-inut 15.000
kronit aamma asserluinnaanik 60/40-nut tunngatillugu, borgmesterit
KANUKOKA-llu aallartitai ilisimatinneqarput taakkunani malittarisassat
60/40-nut tunngatillugu aamma 15.000-t aallaavigalugit,
qaffasinnerpaaffilerniartut.
Tassa
landskassemiit tapiissutissat. Taamaaliornikkut akit qaffakkiartornerat taanna
killilersimaarniarsaraarput. Kisiannili soorunami aamma kommuneni
ataasiakkaani naak sanaartugassat amerlavallaanngikkaluartut ilaatigut akit
qaffasingaatsiartarput.
Tassanilu
toqqam imaluunniit pissutaanerpaasartoq tassaavoq, sumiiffimmi tassani
sanaartorsinnaasut imminnut unammillersinnaasut amerlagisassaanng imaluunniit
ataasiinnaasarnera. Taamaattumillu monopoleqapajaarlutik ilaasa akinik
inissititerisinnaanerat.
Inuit
Ataqatigiinniit aamma kaammattuuteqarput assigiinngitsutigut aappaagumut
nassuiaasiornissamut tunngatillugu paasissutissanik annertunerusunik
nassuiaammi ilanngussisoqarnissaani. Taakkununnga tunngatillugu
Naalakkersuisuniit nalilersussavagut, taavalu aappaagumut nassuiaammut
ilanngunneqarsinnaanersut aamma isummerfiginiassallugu.
Naggataatigut
Inuit Ataqatigiinniit apeqqutigineqarpoq iluarsaassinermut tunngatillugu
ataqatigiissaarisussamik allaffeqarfiup qanoq taassuma pilersinneqarnerata
kingunerisaanik angusaqartoqarsimanersoq.
Tassunga
siusinnerusukkut uani Siumup oqaaseqartuanut tunngatillugu oqaaserisakka
innersuukkusuppakka. Tassani pilersaarutigaarput aningaasaqarnermut inatsisip
inatsisissamut siunnersuut ukiaru suliarineqarnissaanut aktivitetstal
aningaasaqarnermut ataatsimiititaliami piumasarineqartarsimasut, tassa qanoq
angusaqarsimanermut aammalu qanorpiaq kisitsisinngorlugit anguniagaqarnermut,
kisitsisit tunngassuteqartut ilanngutissamaarpagut.
Kattusseqatigiinniit
oqaaseqartup Mogens Kleistimut tunngatillugu, tassa siammasinnerusumik
sanaartugassanut aningaasat agguataarneqarnissaat aamma tassanngaanniit
taakkartorneqarpoq. Tassa
oqaaseqartuniit tamanit. Taanna maluginiarpara oqaaseqartunit tamanit
sanaartugassat siammarnerullugit kommunenut agguataarneqarnissaat,
Naalakkersuisut eqqumaffigissagaat kissaatigineqarpoq.
Taamaattumik
aamma taamaaliornissarput Naalakkersuisuniit pissusissamisoorpoq.
Sanap
eqqaani sanaartornissat Mogens Kleistip apeqqutigai imatut: kia taamatut
aaliangersimaneq akuersissutigisimaneraa? Tassa taanna aatsaaginnaq
Inatsisartut akuersissutigaat.
Oqaluuserisassat
normu 5-p oqaluuserinerani aaliangiiffigisassatut siunnersuummi,
aningaasaqarnermut ataatsimiititalip isumaliuutissiissutaa Naalakkersuisunit
aamma akuersaarneqartoq. Taanna tunngavigalugu taakkua akuerineqarput.
INI
A/S-imut tunngatillugu, kigaalaqutitut ilaatigut isigineqartarnera taanna
Kattusseqatigiinniit aamma taaneqarpoq. Tasssunga tunngatillugu
oqaatigerusuppara INI A/S-imut tunngatillugu, Naalakkersuisut qanoq iliornerat
oqaluuserisassani immikkoortoq 71-mi sukumiisumik eqqartorparput. Ilaatigut
tassani sanaartugassanut tunngatillugu nalunaarusiaq 60/40-mik
tunngassuteqartartoq, tassa kommunenut kommuneni inissianut sanaartornermut
tunngatillugu siornatigut kommunet pinngitsaalisaasarput, pinngitsooratik
sanaartornermik aqutsisussatut INI A/S-I atortassagaat.
Taanna
allanngortilersaarparput tassa nalunaarut suli maannakkut
tusarniaassutigineqarpoq.
Nalunaarutip
ukiup qiteqqunnerani, tassa julip aallaqqaataani atuutilersinneqarnissaa
siunnerfigaarput. Tassani 60/40-nut sanaartugassat eqqarsaatigalugit, kommunet
nammineq pisinnaatitaaffigissagaat toqqassallugu kina kikkut sanaartornerup
ingerlanerani aqutsisussatut 60/40-nut tunngatillugu toqqarumanerlugu.
Imaassinnaavoq
kommune teknikkeqarfia nammineq, imaassinnaavoq illoqarfimmi tassani
siunnersuisartut, imaluunniit immaqa aamma imaassinnaavoq kommunep INI A/S-imik
suleqateqarnini iluarisimaarlugu ingerlatiinnaraa taamatut.
Aningaasat
ilumoorpoq aningaasaateqarfimmi naak ukiumut siulianut naleqqiullugu 80
millioningajannik atuinerusimagaluarluta. Taamaattoq amerligaluttuinnarput
Mogens Kleistip erseqqissaassutigisaatut. Massakkut 420 millioniupput.
Pilersaarusiortarneq
nutaaq tunngavigalugu aammalu aningaasaateqarfimmi tassani aningaasat
amerliinnannginnissaat siunnerfigalugu, Nalakkersuisuniit neriuutigaarput,
ukiut pingasut ingerlaneranni ullumikkornit appasinnerujussuarmut
pisissinnaasimassallugu.
Tassanilu
naatsorsuutigeqaarput neriulluarfigalugillu pilersaarusiortarnermut periuutsit
nutaat eqqunneqarsimasut.
Otto
Steenholdtimut oqaaseqaataanullu tunngatillugu oqaatigerusuppara, ilumoorpoq
naalakkersuinikkut suliaqartuulluni assut qinngarnartarpoq ilisimallugu
kommunerpassuarni pisariaqartitsineqartoq, taavalu aningaasat
uninngasutullusooq isigineqarsinnaasut amerlasoorujussuusut.
Soorunami
aamma naammaginanngilaq. Kisianni ukua 420 million krone aningaasaateqarfimmi
uninngasut, tamavimmik ateqareerlutillu sumiiffeqareeramik. Aammalu
missingersuusiortarnermut inatsiserput najoqqutaralugu imaaliallaannaq
allanngortinneqarsinnaanatik.
Taamaattumik
aningaasat 420 million kronet taakku, amerlagaluaqalutik tamavimmik
sumiiffeqareersutut oqaatigineqartariaqarpoq. Kisiannili naammassinissaat
taanna taamaallaat amigaataalluni.
Tassani
aamma soorunami nutaamik periuuseqalernissarput iluaqutaassasoq
naatsersuutigaarput.
Ullumikkut
oqareernittut finanslovemut akuersissutigineqartartut amerlavallaat iluamik
pilersaarusiorsimanatik akuerineqartaramik.
Taava
kingornatigut ugguutigilertarparput suliassaq taassuma kinguaattuuleraangat.
Maluginiarpara
Pttp Steenholdtip aamma nassuiaat naammagisimaaraa. Naalakkersuisuniit
neriuutigaarput aamma partiit oqaaseqartuinut nassuiaateqarnerput,
taamatuttaaq Inatsisartunit naammagisimaarneqarumaartoq. Qujanarlu
oqaaserineqartunut kaammattuutigineqartunullu.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Ineqarnermut
Naalakkersuisumut qujavugut. Maannakkut oqaaseqartussat ikittuararsuanngorput.
Kingulliulluni oqaaseqassaaq Mikael Petersen, Siumut.
Mikael
Petersen, Siumup oqaaseqartua.
Tassa
Naalakkersuisut Naalakkersuisup akissuteqaataanut qujarusuppunga aamma uani
kaammattuutigisagut tigulluarneqarmata. Aammalu suliap ingerlaqqinnerani
soorunami naatsorsuutigaarput, taakkua saqqummiussagut aamma Naalakkersuisup
tungaaninngaanniik aamma aningaasaqarnermut ataatsimiititaliami suliat
ingerlanneqarnerini, sammineqartarumaartut taakku akornanni.
Tamanna
naatsorsuutigissavarput taamaattuartarami.
Unaana
erseqqissaatigilaarniarlugu Siumuminngaanniik tassa sanaartornermik
suliaqartut ilinniartoqartarnerannut tunngassuteqartoq, taanna ukiut
arlaqalerput aaqqinniarlugu Inatsisartut oqalulerattali. Ila
ukiorpassuanngorpagut.
Ulloq manna
tikillugu suli malunnaataasumik aaqqiinerit suli angusaqarfiginngilagut.
Ullumikkut
ukiuni makkunani aningaasaliissuterparujussuupput sanaartornermut, taanna
arajutsisimaneqanngilaq.
Sanaartornermut
iluarsaassisarnermullu aningaasaateqarfik aatsaat taama aningaasaateqartigaaq.
Taanna tamatta
ilisimaaraarput.
Kommunet
aningaasaliissutaat ukiumut 200 millionit sinneqarput sanaartornermut.
Namminersornerullutik Oqartussat 700 angusarlugit, ukiumut
aningaasaliisarpugut. Namminersortut
soorunami aamma sanaartornermik ingerlataqarput.
Selskabet
ingerlatseqatigiiffissuit annertoorujussuarmik aamma KNI-kkut Royal Grønlandikkut
sanaartornermik ingerlataqartarput. Allallu.
Ila
aningaasarpassuupput sanaartornerup iluani nunatsinni ukiut tamaasa
kaaviaartinneqartut.
Kisianni
takusinnaajuarparput sanaartornermik ingerlataqartut suliffiutillit,
ilinniartoqarniarnerat ajortartorujorujussuusoq. Ilinniartunik
tigummiaqarniarnerat.
Assersuutigiinngarlugu
maani Nuummi ilisimatinneqarnerput naapertorlugu, sanaartornermi
ingerlataqartut suliffeqarfiit 25-t akornanni qulaaluat ilinniartumik
ataatsimilluunniit tigummiaqanngillat. Tigummiaqarsinnaagaluarlutik,
ilinniarsimasunik sulisoqarlutik, sulisorpassuaqarlutik, ilinniartumik
ataatsimilluunniit tigumiaqanngillat.
Kipiluttunarput
tamakku.
Piumasaqartariaqalerpugut
ersarissumik sanaartugassanik imaluunniit suliassanik tigusinermut atatillugu,
pinngitsoorani ilinniartumik aamma tigumiartariaqartut.
Praktikkerfissaaleqisut
ilinniartuugaluit uniinnartarput praktikkerfissaaleqalutik. Tamakku
akuerineqarsinnaanngilluinnarput.
Aningaasarpassuit
aningaasaliissutigisarpagut, milliardit angullugit pisortaniit.
Sulisulli
amerlavallaaqaat sulisitsisut amerlavallaaqaat ilinniartunik
tigummiaqarumanngitsut. Tamana akuerineqarsinnaanngilaq. Tamanna pillugu
oqaaseqaqqippunga neriullunga Naalakkersuisut tassuuna sakkortuumik qanoq
iliuuseqarumaartut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Mikael
Petersen qutsavigaarput. Tullliulluni oqaaseqassaaq Anthon Frederiksen,
partiimi oqaaseqartup avataatigut.
Anthon
Frederiksen, Siulittaasup tulliata sisamaat, Kattusseqatigiit.
Kattusseqatigiinniit
nuannaarutigaarput Sanaartornermut Ineqarnermut Sanaartornermut
Pilersuinermullu Naalakkersuisup akissuteqaammini, aamma ilaatigut
apeeqqutigisagut assigiinngitsut erseqqissaaffigimmagit.
Aammalu
oqaatigerusupparput soorunami sanaartornermi kinguaattoorutaasartut
assigiinngitsut qaangerniarlugit Kattuseqatigiinniit sapinngisarput tamaat
suleqataarusukkatta, aammalu tamanna siusinnerusukkut sanaartorneq pillugu,
eqqartuisarnitsinni siunnersuutit assigiinngitsut saqqumiuttarsimavagut.
Uani
nalunaarummi annertuumi imartuumilu aammalu nuannaarutigisatsinni, suliassat
assigiinngitsut nalunaarsorsimaneri, aammalu suut suliassat qanoq
inissisimaneri pillugit nassuiaat, annertuumik paasissutissiivoq uatsinnut.
Tamannalu nuannaarutigivarput.
Inatsisartut
ukiarmi ataatsimiinneranni ilaatigut Nuummi Sisimiuni Ilulissanilu ilinniartut
inissiaannut, inissialiornissamut tunngasut apeqquteqaateqarfiginikuuagut
Kattusseqatigiinniit.
Uani
nalunaarummi takusinnaasagut malillugit Nuummi Sisimiuni Ilulissanilu
ilinniartut inissialiornissaannut suliassanut pilersaarusiornerup,
aningaasaliissuteqarnerunissaa pisariaqalersippaa. Taamatut allassimasoqarpoq
aammalu ingerlaqqilaaraanni allassimalluni, ingerlatani suliassat 30-t
pineqarput. Taakkunannga 30-t juli qaammat nuussinikkut
taamaatitsinikkulluunniit peerneqarlutik. Suliassat arfineq pingasut aamma
naammassineqarput.
Taakkununnga
tunngasut assorujussuaq soqutiginarput erseqqissalaarneqarnissaat. Aammalu
suliassat taakku qanoq maannamut pilersaarutit malillugit inissisimaneri,
aamma Kattusseqatigiinniit soqutigivagut annerusumik paasisaqarfigissallugit.
Taassuma
saniatigut Naalakkersuisut nutaamik periuuseqalernerat, aamma soorunami
naatsorsuutiginngilarput periuutsimik nutaamik allanngortitsinikkut
imaaliallaannaq kinguaattoorutaasorpassuit aaqqinneqarsinnaanerat,
naatsorsuutigineqarsinnaanngilaq sumiluunniit.
Soorlu
Naalakkersuisup akissuteqarnermini oqaatigereerai ilaatigut aamma ukiut
marlussuit immaqa qaangiunnerisigut aatsaat suliassat pitsaanerusumik
naammassineqarsinnaanerat naatsorsuutigineqarsinnaasoq.
Tamanna
paasilluarparput. Aammalu suliassat assigiinngitsut piaartumik
naammassineqarnissaanut Kattusseqatigiinniit peqataajumaqaagut
kinguaattoortarnerit annikillisarneqarnissaanut. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Anthon
Frederiksen qutsavigaarput. Tulliulluni oqaaseqassaaq Vittus Mikaelsen,
partiimi oqaaseqartup avataatigut.
Vittus Mikaelsen, Siumut.
Qujanaq. Sanaartugassanut iluarsaassinermut tunngatillugu maligisimavara oqaaseqalaartariaqarlunga.
Ilumoorpoq pisariaqarpoq maannakkut nassuiaaneq aamma ingerlaqqisasoq nassuiaasarnerit ataatsimiittarnerit eqqarsaatigalugit.
Ukiuni kungullerni annertuumik oqallisigineqarsimavoq
kvadratmeterimut akit qaffasinnerujussuat. Sooruna nalunngilarput tamanna. Kisianni uanga isumaqarpunga tassani nuna
tamakkerlugu ataatsimut isigineqarnerani, immikkoortinneqartariaqartut
isorliunerusut.
Misilittakkat
tunngavigalugit aallaavigalugit pisariaqarluinnarpoq tamakkua
eqqumaffigineqarnissaat.
Assersuutigalugu
isorliunerusut ilaanni sanaassaraluit ukiut tallimat ingerlaneranni, allaat
ullumimut pisariaqanngikkaluamik 7 millionit angullugit akisunerulernikuupput
taakku sanaassarpiaat.
Taamaattumik
tamakku eqqarsaatigalugit isumaqarpunga, nalinginnaasumik akeq imaaliallaannaq
aamma malugisimagaat sanaartortartut Kalaallit Nunatsinni assigiimmik
ingerlatsisoqarsinnaanngitsoq.
Assersuutigalugu
inissiat 36-t Ammassallup kommuneata sanatinniakkat, tassani akit atorneqarpoq
nalinginnaasumik akeq qaffasinnerpaaffissaa ataatungaaniissasoq. Taamaalilluni
Kalaallit Nunaat tamakkerlugu neqeroorutigineqarnerani, akikinnerpaaq
tiguneqarpoq.
Ukiut
sisamat utaqqereerluta kommuneminngaaniik sanaassaq aallartippoq. Qanoq
pisoqarpa? Kalallit Nunaata sinneraninngaaniit namminersortut sanajartortut
suliartik aallartikkamikku paasivaat, naammassisinnaanagu. Allatut
ajornartumik ukiup affaa tikilersorlu allatut ajornartumik sanaartik
qimaannarlugu aallaannartariaqarsimapput.
Tassani
takuneqarsinnaavoq nunarput ataa tamaat ataatsimut isigalugu ajornakusoortoq
ingammik isorliunerusut eqqarsaatigalugit.
Taamaammat
Naalakkersuisup nassuiaammi oqarnera assorujussuaq nuannaajallannarpoq,
kommunet inissianik sanaartornermut akisussaanerulissasut. Taamaalilluni
taanna neriuppunga aamma kommunet allat isorliunerusut, namminneq
pilersaarusiornerminni atorluarnerulissagaat. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Vittus
Mikaelsen qutsavigaarput, tulliulluni oqaaseqassaaq Josef Tuusi Motzfeldt,
aappassaanik oqaaseqassaaq.
Josef
Motzfeldt, Inuit Ataqatigiit oqaaseqartuat.
Soorunami
uaguttaaq Naalakkersuisut akissuteqarniarnerminni oqaaserisaanut qujassuugut.
Uani
Siumup oqaaseqartuata naalagaaffiup iluarsagassanut ukiut sisamat 50 millionik
ukiumoortumik, akiliuteqartarneranik isumaqatigiissutaasimasup
sivitsorneqarsinnaaneranik Naalakkersuisunut kaammattuutaa
pisariaqarsorinarpoq. Tassa naalagaaffiup nalaani illuliarpassuit
inissialiarpassuit matumani pineqarmata.
Taamaattumik
Naalakkersuisut aamma siussuertariaqarpaat ilaatigut uani nalunaarusiami
allassimammat, iluarsaassiniarnermi naalagaaffiup aningaasaliutai
eqqartortillugit ima allammata: tamatuma paasiniarneqarneranut tassa tamatuma
paasiniarneqarneranut atatillugu paasineqarpoq nutarterinermut aningaasat
atorneqarsimanerat piumaqaatinut naapertuutinngitsoq.
Taamatut
sakkussanik torinngitsigisunik nassaarluta danskit Naalakkersuisui
isumaqatiginiassagutsigit, isumalluangaarnissamik pissutissaqarsorinanngilaq.
Taavalu
apeqquteqaatitsinni oqaaseqarnitsinni apeqquteqaatigisatsinnut
aningaasaliissutaareersuni aningaasaajaasariaqarsimaneq siorna, 0 stilling
julimi pisimasoq. Naalakkersuisunut ilaasortaq akussuteqarnermini
oqaatigiinnarpaa, taanna sukumiisumik aningaasaqarnermut ataatsimiititaliami
nassuiarneqareersimasoq.
Una
Inatsisartuninngaanniit isigalugu naatsorsuutigivarput isigaarput aamma uagut
Inuit Ataqatigiinninngaanniit, tassaasoq Inatsisartunut sanaartorsimanermut
2001-imi sanaartorsimanerup ingerlasimaneranut nassuiaataasoq.
Taamaattumik
aningaasaqarnermut ataatsimiititaliamut nassiussaqarsimaneq siusinnerusukkut,
taanna naammanngilaq. Sanaartornermut tunngasut ???? sapinngisaq
tamakkernerpaallugu qulaajarneqassasoq naatsorsuutigigatsigu.
Taavalu
sanaartorfissagissaanermut tunngatillugu, Naalakkersuisunut ilaasortap
akissuteqarnermini oqaaseqarfigitsiarpaa oqarluni tassani qanoq
ulapaartigisoqarnersoq. Qanoq sanaassanik annertutigisunik
ingerlatsisoqarnersoq tassunga aaliangiisuusartoq.
Taanna
assorujussuaq eqqarsarnarpoq, tassami nunaminertamik sanaartorfissagissaaneq
tassaavoq sanaartornissamik ingerlatserusuttut illuliorusuttut piumasarisaat,
pisortanit aningaasalersorneqartoq annertuumik, massakkulli
sanaartortitsiniartunut annertuumik nammagassiissutigineqartartoq.
Tamatumani
toqqammaviusumik maleruagassaqarnissaa aaliangersagaqarnissaa
pissusissamisoortutut Inuit Ataqatigiit ujartorparput. Taannalu
Naalakkersuisunut oqaatigaarput, ajunngilaq kingusinnerusukkut taanna
ullumikkut akisinnaanngikkunikku nassuiaassutigisariaqaraat,
aamma innuttaasut sinerissami soqutigalugu taanna
apeqqutigiuartarmassuk.
Isumaqarpugut
illuliortitsisup illuliorniartup ilisimasariaqarai suut-uku toqqammavigalugit
sanaartorfissagissaanermut akiliutit ilaatigut annertoorujussuusartut
pineqartut.
Taavalu
Siumup oqaaseqartuata aappassaanik oqaaseqarnermini, sanaartornermi
ingerlatsisut amerlavallaat ilinniartitaqarnissaminnik suusupaginnittutut
nipeqarsinnaanera ilumoorpoq. Taamaattumik siorna
suliariumannittussarsiuussinermut oqaluuserinerini, Inuit
Ataqatigiinninngaanniik kissaatigaarput, suliariumannittussiuussinerni
ilanngunneqartassasoq ilinniartunik sulisoqarnissaq. Ilinniartitsinissaq.
Taamaattumik isumaqarpugut suli pisariaqarpasissoq.
Taavalu
ukua ilinniartinneqarsimasut Danmarkimi ilinniartittakkagut ilaatigut
Viborgimi, amerlasoorpassuanngorput moduli sisamaat tallimmerneqarunarpoq.
Taamaattoq naapittarlugit atorneqannginnertik assorujussuaq imaluunniit
naammaginartumik atorneqannginnertik orullutigisarmassuk, sulisoqarmat
tassunga ataqatigiissaarisussatut taaguuteqartumik.
Naalakkersuisut
uani sanaartornermi nassuiaamminni aappaagu ilanngutissagaat kaammattuuterput
neriuppunga tusaaneqassasoq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Josef
Tuusi Motzfeldt qutsavigaarput, tulliulluni oqaaseqassaaq Jakob Sivertsen,
Atassut. Aggernerani Inatsisartunut ilisimasitsissutigissavara,
maannakkut upernaaq manna ataatsimiinnerup naammassigaluttuinnarnerani
Inatsisartunut ilaasortat inip matuma inip avataaniittut maaniillaqunarmata,
naammassinissatsinni.
Jakob
Sivertsen, Atassutip oqaaseqartua.
Qujanaq.
Tassaana uagut Atassummiit siammasissumik aningaasat atorneqartarnissaat
pingaartikkatsigu oqaaserisatsinni Naalakkersuisup akissuteqaataanut
qujavugut.
Taavalu
1994-imi 2001-imut sanaartukkani naammassisaqarsinnaaneq eqqarsaatigalugu
Naalakkersuisut siunnerfivimmik siunnerfeqarnerat paaserusussimagaluarparput.
Assersuutigalugu
´94-imiit 2001-imut agguaqatigiissillugu ukiumut 11 millioni taamaallaat
qaffariaataasimapput.
Ullumikkut
atuarfiit allallu iluarsagassat nunatsinni taama annertutigitillugit,
naammassisaqarsinnaaneq qaffatsinneqanngippat annerulersinneqanngippat,
piffissaq sivisoorujussuaq atorlugu iluarsagassat taakkua, immaqa ilaat
iluarsaannissaanut akilersinnaajunnaarnissaat anguneqassaaq,
naammassisaqarsinnaassuseq taanna oqaatigeriigarput annertunerusumik
qaffariaateqanngippat.
Taanna
assut Atassummit pingaartipparput. Iluarsagassat ima ilai
aserfallassimatigipput piaartumik iluarsarneqarnissaat
kinguarsaqqissinnaanani, taamaattumik naammassisaqarsinnaassutsip
qaffassarneqarnissaa Atassummit assut pingaartipparput.
Taamaalilluni
aamma suliffissaqartitsiniarneq annertuumik aamma iluaquserneqartussaammat.
Taavalu aningaasat Inatsisartuni akuersissutigineqartartut sanaartukkanut,
aamma ilinniartunut inuusuttullu pikkorissartartinneqartarnerannut aamma
ilaatigut immaqa ilaatigut isumaqatigiissuteqarnikkut
ingerlanneqartarnissaannik aamma Siumup oqaaseqartuata oqaatigisaa, assut
Atassummit taperserparput.
Ilumoorami
ilaatigut inuusuttut ilinniartuugaluarlutik, pikkorissarfissaqannginnertik
peqqutigalugu tunuaannartarput. Taanna uggornarpoq. Taamaattumik Inatsisartut
aningaasaliisutut aamma suliffeqarfinnut, namminersortunulluunniit
isumaqarpugut aamma piumasaqaammik annertunngikkaluamik ilalerlugit
tunniunneqartarnissaat anguniarneqartariaqartoq. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Jakob
Sivertsen qutsavigaarput. Taavalu maannakkut Ineqarnermut Pilersuinermut
Attaveqarnermullu Naalakkersuisoq oqaaseqassaaq.
Jørgen
Wæver Johansen, Ineqarnermut Avatangiisinullu Naalakkersuisoq, Siumut
Partiit
oqaaseqartuisa akissuteqarnerminni imaluunniit aappassaaneerlutik
oqaaseqarnerminni tamarmik sanaartornermi ingerlataqartut,
ilinniartoqartarnerannut tunngassuteqartut eqqaavaat. Taanna
maluginiagassaavoq.
Taamaattumik
naalakkersuisuniit nalilersorniarparput suliariumannittussarsiuussinermi
aaliangersimasumik piumasaqaatinngortinneqassannginnersoq.
Ilinniartoqartarnissaa.
Namminersornerullutik
Oqartussat karsianniit tapiiffigineqartumik sanaartugassat eqqarsaatigalugit.
Taanna nalilersussavarput.
Maluginiarpara
Kattusseqatigiit oqaaseqartua Anthon Frederiksenip Naalakkersuisut
suleqatigalugit siunissami, aamma pilersaarusiortarneq
naammassisaqartarnerunissarlu eqqarsaatigalugit suliniarnitsinni
ikorfartuutaaniartut, tamanna soorunami qujassutigaarput.
Kollegianut
tunngatillugu tassa aammalu suliassaqarfimmi tassani suliassanut
tunngassuteqartut eqqarsaatigalugit, tassa ilaatigut tunumi atuarfiit
atuarfitsialattut iluseqartut suliarinerinut tunngatillugu
aningaasartuutaanerusut, taakkua julimi aaqqiinermi ilaatigut ilaapput.
Ilaatigullu
aningaasalersorneqarput aningaasat iluarsaassinernut soorlu Qasigiannguani
atuarfimmut allallu atuarfiininngaanniit aningaasat ilai aaneqarput.
Kisianni
malugisinnaavara aamma Inuit Ataqatigiit oqaaseqartuata julimi pisoq taanna
kissaatigigaa, Inatsisartunut aamma nassuiaatigineqarnissaa. Taamaattumik
Naalakkersuisuniit pissutissaqanngilagut, taakkua julimi Inatsisartut aamma
aningaasaqarnermut ataatsimiititaliaata, akuersissutiginikuusai pillugit
allakkatigut Inatsisartut tamaasa ilisimatitsissuteqarfigissallugit
sukumiisumik.
Aamma
taamaaliussaagut. Tamatumani aamma kollegiat ilaapput kisianni
unneqqarissaarniarluta allareersimavarput takusinnaallugu
pisariaqartitsinerusoqartussaasoq.
Taamaattumik
aamma tassani allaqqasutuulli naatsorsuutigaarput, tamakkua pillugit soorunami
periusissaq naapertorlugu tassa aningaasaqarnermut ataatsimiititaliaq
aqqusaassallugu.
Aamma
qujassuteqarfigerusuppara Anthon Frederiksenip Kattuseqatigiinniit
paasisinnaanerarmassut, suut tamaasa imaaliallaannaq
naammassineqarsinnaanngimmata. Kisiannili uani alloriarnissatsinni
peqataanerannut aamma qujassutigaarput.
Vittus
Mikaelseni Siumup oqaaseqartuata saniatigut oqaatigivaa, iluarisimaarlugu
kommunet massakkut akisussaanerulernissaminnut periarfissinneqarnerat. Uagut
Naalakkersuisuniit neriuutigeqaarput kommunet periarfissaalersut tamakku,
atorluassagaat aamma tamanna soorunami sanaartornermut immikkoortortatsinni
oqiliallaataassammat. Taamaaliornikkullu pilersaarusiortarnerminni suli
pitsaanerusumik suliaqarnissaminnut piffissaqarlutillu nukissaqarnissaat
aqqutissiuunneqartussaammat.
Taamaatuunik
uagut kommunet kikkulluunniit taamatut annertunerusumik akisussaaffimmik
tiguserusullutik saaffiginnittut, ilasilluarnissaat naatsersuutigaarput.
Taava
pisariaqartitsineq naapertorlugu akuersisarnissat aamma aningaasaqarnermut
ataatsimiititaliaq aqqusaarlugu pisartussat, taakkua aaliangerumaarpaat
kommunet Naalakkersuisullu siunnerfigisaat akuerineqarsinnaassanersut.
Kisianni
tassa suli utaqqivugut. Kommuneniit annertunerusumik saaffigineqarnissarput
tamakku pillugit.
Soorunami
naalagaaffimmut isumaqatigiinniarnissamut tunngatillugu aallaqqaammuut
siunnerfiusussatut taakkartorneqartut, nikingasumik paasineqarsimaneri
pillugit inissittoorneq taanna uggornarpoq.
Kisianni
augustimili taakkua naalagaaffiup sinniisai aamma peqatigalugit,
isumaqatigiissutigineqarput uagut iluarsaassinermut tunngatillugu
naliliisarnerput, naalagaaffiup nutarterinermik ilaqarpallaartutut nalilerlugu
akueriumanngimmagu.
Taamaattumik
taanna iluarsineqarpoq augustimili. Taamaattumik aamma naatsersuutigaarput
neriuutigalugulu isimaqatigiinnialerutta aamma minnerunngitsumik nunatsinnut
aningaasaliissutigineqartartut, taakkua aappaagu
isumaqatigiinniutigineqalerpata tamakkua ilanngullugit aamma
isumaqatigiissummut ilaatinneqarumaartoq.
Uani
uanga oqaaseqarninni sanaartorfigissaaneq pinngilara. Sanaartorneq ataatsimut
isigalugu taanna oqaaseqarfigaara.
Sanaartorfigissaanermut
tunngatillugu tassa akisussaaffik kommuneniittoq ilisimaneqarpoq.
Naalakkersuisuniit ilisimaaraarput kommunet toqqammavissat tunngavigalugit,
aaliangiinissartik ilaasa allatut paasillugu fortolkertaraat.
Taaamaattumik
aamma suliarineqarpoq massakkut, assigiaarnerusumik sanaartorfigissaanermut
tunngatillugu kommunet paasinnilutik ingerlatsisarnissaat. Taamaattumik taanna
taakkartorneqartoq paasilluarsinaavara.
Iliniartunut
aammalu amocenterini ilinniarsimasunut ilinniaqqissimasunut tunngatillugu
oqaatigereerpara, Naalakkersuisut maannakkut nalilersorniaraat
suliariumannittussarsiuussinerni tamani, aaliangersimasumik ilinniartunut
tunngassuteqartut ilaatinneqartalernissaat pisariaqassanersoq.
Qanoq
imaluunnit qanoq allatut aaqqiisoqarsinnaanersoq.
Tassa
taamatut oqaaseqarlunga qujassuteqarfigeqqippakka partii Kattusseqatigiit
Attaviitsullu sinnerlugit oqaaseqartut.
Eqikkaalaassagumalu
taanna puiguleraluarpara. Oqaatigerusuppara nuannaarutigeqigakku ukioq affaata
ingerlanerani, Inatsisartuni isumaqatigiissutigigatsigu maannakkut,
sanaartornermut pilersaarusiortarneq eqqarsaarigalugu pilersaarusiorneq
pitsaanerusoq, qanoq periuuseq nutaaq atorlugu ingerlanniarnerlugu.
Sanaartoriaatsit
assigiinngitsut toqqammavigalugit kvadratmeterimut annertunerpaaffilerpagut
sanaartugassat, siornatigut taamaanneqanngikkaluarput, taamaaliornikkut aamma
sanaartornermi akigitinneqartartut qummut killilerumallugit.
Aamma
kommunet akisussaaffimmik annertunerusumik ukiuni kingullerni tigusinissaminnut
periarfissaqartitaalernerat. Taanna aamma iluarisimaarnarpoq. Tassa immikkut sanaartugassat pillugit
isumaqatigiissusiorsinnaapput.
60/40-nik
sanaartornermik aqutsinermik tigusisinnaalissapput. Aamma nammineq illuliassat
eqqarsaatigalugit, ilitsersuisussaatitaaneq taanna aamma Inatsisartuniit
aningaasaliiffigineqartartoq taanna aamma kommunenut nuutsinniarneqarpoq.
Taamaattumik
taakkua ataatsimut isigalugit Naalakkersuisuniit neriulluarfigivarput
siunissami, sanaartornerup iluani eqaannerusumik pissuseqarluta
naammaginarnerusumik pilersaarusiorluta, aammalu sanaartugassat eqqarsatigalugit
naammassisaqarfiunerusumik ingerlatsinissarput.
Daniel Skifte,
ataatsimiinnermik aqutsisoq, Inatsisartut siulittaasuat, Atassut.
Ineqarnermut
Pilersuinermut Attaveqarnermullu Naalakkersuisumut qujavugut.
Taamaalilluni
immikkoortoq 12, tassalu 2001-imut sanaartugassanut iluarsagassanullu
aningaasaateqarfik pillugu nassuiaat, Inatsisartunit tusaatissatut tiguneqarpoq.