Oqaluuserisassani immikkoortoq 13-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq sisamaat, tallimanngorneq majip 3-at 2002, nal.
12:15
Daniel
Skift, ataatsimiinnermik aqutsisoq.
Anders
Andreassen qinnuvigissavara aqutsineq tigulaaqqullugu, Atassumminngaanniit
oqaaseqassagama.
Ataatsimiinnermik
aqutsisoq: Anders Andreassen, Inatsisartut Siulittaasuata tullia, Siumut.
Daniel
Skifte, Inatsisartut Siulittaasuat, Atassut.
Aningaasaqarnermut
Naalakkersuisoq saqqummiussissaaq aappassaaneerneqarnerani.
Augusta
Salling, Aningaasaqarnermut Naalakkissuisoq, Atassut.
Qujanaq.
Naalakkersuisut sinnerlugit Akileraartarnermut Akitsuuteqarnermullu
ataatsimiititaliaq qutsavigissavara Naalakkersuisut siunnersuutaanut
amerlanerussuteqarluni tapersiinerannut. Ataatsimiititaliami ikinnerussuteqartut
inassutigisaanut oqaatigissavara Naalakkersuisut allannguutissatut
siunnersuuteqarnianngimmata. Tamanna tunngavigalugu Naalakkersuisut inassutigaat
2003-imut akileraarutitigut ilanngaatissat ilai il.il. siullermeerinninnermi
siunnersuutigineqartutut aalajangersarneqassasut, tassalu 2002-imut
sanilliullugit allanngortinnagit.
Qujanaq.
Anders
Andreassen, Inatsisartut Siulittaasuat tullia, Siumut.
Maannalu
partiit, Kattusseqatigiit ataviitsullu oqaaseqartussaat oqaaseqassapput,
siulliulluni oqaaseqassaaq.
Lars Sørensen,
Inuit Ataqatigiit oqaaseqartuat.
Inuit
Ataqatigiinni isumaqaratta ullumikkut piffissanngortoq inuuniarnikkut
atugarisat pillugit misissuisimanerit aallaavigalugit maanilu nunatsinni
akissarsiakinnerpaartagut suli inuuniarnikkut oqilisaassiffigineqarnissaat
eqqarsaatigalugit minnerunngitsumillu aningaasarsiatigut isertitatigullu
nalimmassaarinissaq siunertaralugu iliuuseqartoqartariaqartoq, tamannalu
akileraartarnikkut nutaamik aaqqissuussisoqarneratigut anguneqarsinnaasutut
Inuit Ataqatigiit isigaarput, taaamaatumik Naalakkersuisut siunnersuutaanut
allannguutissamik siunnersuuteqarpugut.
Tassaasoq
2003-mut inummut ilanngaat 8.000 kr.-inik tassa ukiumut 48.000 kr.-inngorlugu
qaffanneqarneratigut aammalu aalajangersimasumik ilanngaat 2.000 kr-.inik
tassa ukiumut 10.000 kr.-inngorlugu qaffanneratigut. Tamanna nunatsinni
innuttaasut 80%-iisa missaaniittut iluaqutigissavaat.
Nunatsinni
inuuniarnikkut atugarisat pillugit misissuisimanerup aamma takutippaa inuit
10-it 100 kr.-ini agguaatissagunikku taakkunannga 5-it 90 kr.-it
pissarsiarisaraat, sinnerisalu tallimaasut taamaallaat 10 kr.-ini sinneruttoq
agguaattarlugu.
Aamma
nunatsinni innuttaasut sisamararterutaat ukiumut 100.000 kr. ataallugit
isertitaqartarput, aammalu innuttaasut affaat sinnerlugit ukiumut 200.000 kr.
ataallugit isertitaqartarlutik, tamannalu misissuinerit ilanngullugit aamma
takutippaat.
Taamatut
aningaasarsiatigut assigiinngitsorujussuarmik nunatsinni atugaqarnermut
Indiami pissutsinut sanilliunneqarsinnaavoq. Tamanna
iliuuseqarfigineqartariaqartoq Inuit Ataqatigiit isumaqarpugut.
Misissuinerit
qulaajaanerit ilami innuttaasut atugarisaat pillugit misissuinerit
qulaajaanerillu qassimmita aatsaat ingerlanneqareerpata iliuusissat
inuiaqatigiinni utaqqikatanneqartut Naalakkersuisunit Inatsisartunillu
nalimmassaavigineqassagamik.
Nunatsinni
inuuniarnitsigut assigiinngitsorujussuarmik ajornartorsiuteqarnerput
nalunngilarput, aamma nalunngilarput tamanna ilaatigut pissuteqarmat
aningaasarsiatigut isertitatigullu assigiinngippallaamik atugaqarnitsinnik.
Taamaattumik aningaasatigut ullumikkut killiffipput eqqarsaatigalugu aatsaat
taamak pisariaqartigaaq inuiaqatigiinni ajornartorsiutit annikillisarniarlugit
ataatsimimut kivitseqatigiinnissaq.
Tamanna
inuiaqatigiinni sanngiinnerusortatta inuuniarnerminni
atugarissaarnerulernerisigut anguneqarsinnaasutut Inuit Ataqatigiit
isumaqarfigaarput, tamannalu tamatta akisussaaffigaarput.
Daniel
Skifte, Atassutip oqaaseqartua:
Atassumminngaanniit
annertunerusumik oqaaseqarata, siullermeerinninnermi oqaatsigut
innersuussutigalugit Naalakkersuisut siunnersuutaat taperserlugu Atassut
taasissaaq.
Anders
Andreassen, Inatsisartut Siulittaasuat tullia, Siumut.
Qujanaq.
Tassuugunnguaq taasissaagut siullermilli Aningaasaqarnermut Naalakkersuisoq,
taannalu oqaaseqareerpat taasissaagut.
Augusta
Salling, Aningaasaqarnermut Naalakkersuisoq, Atassut.
Tassa
siullermeerinninnermi oqallinneq annertooq ingerlanneqarnikuuvoq, aamma Inuit
Ataqatigiinninngaanniit allannguutissatut siunnersuutigineqartoq massakkut
immikkut aamma oqaluuserissasut annertuumik oqallisigineqareernikuuvoq aammalu
amerlanerussuteqarluartunit itigartitsitsissutigineqarluni.
Taamaattumik
oqallinneq uani aallarteqqinnagu annertunerusumik oqaaseqarfiginagu
oqaatigiinnassavara nuannaarutigigakku amerlanerussuteqartut Naalakkersuisut
siunnersuutaat taanna akueriniarlugu oqaaseqarninnut.
Qujanaq.
Anthon
Frederiksen, Kattusseqatigiit.
Aalajangiiffigisassatut
siunnersuut Kattusseqatigiit sinnerlugit eqqaasitsissutigilaassavara
oqaaseqarniannginnama, kisiannili immikkoortoq siulleq tassalu inummut
ilanngaatip 8.000 kr.-inik 48.000 kr.-inut qaffanneqarnissaa taanna uanga
inuttut isumaqatigilluinnarakku, taamaattumillu eqqaasitsissutigeqqissavara
taasinissami Kattusseqatigiit sinnerlugit taasissannginnama kisiannili inuttut
nammineq isumaliortaasera malillugu taanna kiffaanngissusera atorlugu
taaseqataassagama.
Anders
Andreassen, Inatsisartut Siulittaasuata tullia, Siumut.
Qujanaq.
Maannalu taasinialissaagut aamma innersuussutigissavara Akileraartarnerut
Akitsuusiisarnermullu ataatsimiititaliap isumaliutissiissutaa, tassanilu aamma
amerlanerussuteqartut, tassalu Siumumeersut, Atassummeersut
Kattusseqatigiinneersullu inassuteqaataat kiisalu aamma Inuit
Ataqatigiinninngaanniit ikinnerussuteqartut aamma oqaaseqaataat.
Apeqqutigissavara
massakkut Naalakkersuisut siunnersuutaannut qassit isumaqataanersut,
nikueqqussavakkalu isumaqataasut:
16.
Taavalu
akerliusut:
9.
Taaseqataanngitsut:
1.
Anders
Andreassen, Inatsisartut Siulittaasuata tullia, Siumut.
Qujanaq,
tassa taamaalilluni ullumikkut oqaluuseriassani immikkoortoq 13, tassalu
2003-mut akileraarutitigut ilanngaatissat il.il. aalajangersarnerat pillugit
aalajangiiffigisassatut siunnersuut naammassineqarpoq, tassanilu
katersuuffigineqarpoq Naalakkersuisut siunnersuutaat.