Oqaluuserisassani immikkoortoq 21-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut sisamaat, tallimanngorneq 12. april 2002, nal. 12:25
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Jørgen
Wæver-Johansen, Ineqarnermut, Attaveqarnermut Pilersuinermullu Naalakkersuisoq,
Siumut.
Qujanaq.
Naalakkersuisut sinnerlugit nuannaarutigaara matumuuna Namminersornerullutik
Oqartussat kommuunillu inissiaataasa attartortittakkat namminerisamik inissatut
inissianngortissinnaanngornissaannut Inatsisartut peqqutissaattut siunnersuut
nutaaq saqqummiutissagakku.
Peqqussutissatut
siiunnersuutip saqqummiunneqarnera namminerisamik iniutillit
amerlanerulersinneqarnissaannik
anguniagaqarniarmut ilaavoq. Peqqussutissatut siunnersuut aamma
saqqummiunneqarpoq pilersaarummut attartortumiit piginnittumut atatillugu.
Annertunerujartuinnartumillu kommuunit inissiaatiminnik attartortittakkanik
tunisinissaminnik kissaateqarnerat aammalu innuttaasut inissianik maannakkut
attartukkaminnik pigisatut inissianngortitsiniarlutik pisinissaminnik
kissaateqarnerat naammassisinnaajumallugit.
Peqqussutissatut
siunnersuutip piviusunngornissaa aatsaat pisinnaavoq soqutiginninneq
attartortumiit
piginnittumut pilersaarummut kommunalbestyrelse-mut inissiaatiminnik
tunisinissamut pigineqarpata. Pigineqarpat imaluunniit pisortat
inissiaataanni attartortittakkani najugaqartut soqutiginninnerisigut. Tassa
periafissat marluupput.
Kiisalu
siunnersuutip piviusunngornissaannut pisariaqarpoq kommunalbestyrelsip
tuniniakkani ataasiakkaarlugit tuniniarsinnaassagai, tassa inissiamiit
inissiamut illuatungaani attartortut inigisaminnik pisinissaminnik
soqutiginnittuuppata najugaqarfinni ataasiakkaani piserusuttut
amerlanerussuteqarnerisigut aatsaat tamanna pisinnaassaaq. Kommunalbestyrelsep
inissiaqarfik attartortsittagaq namminerisamik pigisatut inissiaqarfinnut
allanngottippagu naatsorsuutigisariaqanngilaq tassannga attartortuusut
tamarmik piginnittunngorsinnaanissaat. Taamaalillutik attartortut taakku
kommunalbestyrelse attartortsisisoralugu najugaqaannassapput.
Najugaqaqatigiiffik
pisortanit pigineqartoq minneruleriartuaassaaq inissiat attartortittakkat
ataasiakkaat attartoorukkiartuaarnerat ilutigalugu ammasumik
akiliuteqarnerpaamut tunineqartarnerisigut. Naatsorsuutigisariaqartorli
unaavoq, taamaaliartuaarnissaata ukiorpassuarni ingerlanissaa aammalu
allaffissornikkut aningaasatigullu pisariusuunissaa. Inissiat
ataasiakkaarlugit
tuniniarneqartarnissaat naalakkersuisut nangaasaarutigisimavaat
kaammattuutitalugulu allanngortitsisoqannginnerani inissiaqarfinni
attartortut ikinnerpaamik 3/4-iisa, tassa sisamaraarterutini pingasut imminnut
pisussaaffilernissaat.
Peqqussutissat
siunnersuutip nassataaraa kommunalbestyrelsep inissiaatiminik
attartortittakkaminik
tuniniaaniarluni aalajangersimasup agguataarereersimanissaa ileqqoreqqusanik
pisariaqartunik piginnittullu peqatigiiffianut missingersuutinik
suliarinnereersimanissaa aammattaaq kommunalbestyrelsep neqeroorutaa
imarissavaa pisussaaffeqarluni tunisinissamik neqeroorut.
Naatsorsuutigineqarportaaq
tunisisup peqqusersuitsumik pissuseqarnissaa aammalu inissiaqarfiup
pineqartup tunineqarnissaanut pilersaarutip pitsaasorujussuaanermik
imaluunniit paasissutissanik eqqunngitsunik imaqartinnginneqarnissaa.
Tunisisup attartortup ilanngaaserneqanngitsumik ilanngaatissallu
ilanngutereerlugit maannakkut ineqarnermut akiliutaasa aammalu
ilanngaaserneqanngitsumik ilanngaatissallu ilanngutereerlugit siunissami
akiliutissaasa naatsorsorneqarnerat suliarissavai.
Naalakkersuisut
pingaarluinnartutut isigaat attartortut imaluunniit attartortup suut tamarmik
erseqqilluinnartumik paasiuminartumillu saqqummiussaanerisigut pisinissamigut
aalajangersinnaanissaa. Attartortoq inissianik attartorneq pillugu
Inatsisartut peqqussutaa malillugu pisinnaatitaaffimminik
illersorneqarnerminillu allaktigut ilisimatinneqassaaq. Minnerunngitsumik
atugassarititat allanngortinnagit attartortutut inissisimaannarsinnaanerminik
inissiamillu massakkut attartukkaminik pisiarinnissinnaajuarnissaminik
pisinnaatitaaffeqarnini pillugit .
Peqqussutissatut
siunnersuummut nassuiaatini apeqqutit attuumassutillit annertuut pillugit
paasissutissaqarmat, taakku innersuussutigerusuppakka.
Taamatut
oqaaseqarlunga Namminersornerullutik Oqartussat Kommuunillu inissiaataasa
attartortittakkat namminerisamik pigisatut
inissianngortinneqarsinnaanerinut Inatsisartut peqqussutissaattut
siunnersuut inatsisartunut oqaluuserisassanngortippara. Siunnersuutigineqarpoq
siunnersuut aappassaaneerneqannginnermini Attaveqarnermut Pilersuinermullu
aamma Ineqarnermut Ataatsimiititaliami oqaluuserineqassasoq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Naalakkersuisumut
ilaasortamut qujavugut. Maannakkut oqaaseqassaaq Tommy Marø, Siumut.
Tommy
Marø, Siumup oqaaseqartua.
Qujanaq.
Namminersornerullutik Oqartussat kommuunillu inissiaataasa attartortittakkat
nammineq pigisassanngortinneqarnissaat pillugu Inatsisartut peqqussutissaat §
19-iusimasup oqaluuserillugulu nalilersorluareerlugu imaattumik Siumumiit
oqaaseqarfigissavarput.
Ukiorpassuarni
nunatsinni pisortat inissiataanni attartortutut inuujuarsimanerup
akilersuiuarsimanerullu allaanerusumik periuuseqarluni attartortumiit
piginnittuulernissamut periafissiilluni peqqususiorneq nuannaarutissaavoq
inummut namminerisamut akisussaassuseqarluni illuute
qalerusuttumut.
Ukiorpassuarni
imaluunniit piffissami sivikinnerusumi Namminersornerullutik Oqartussat
aammalu kommuunit inissiaataanni ineqartut piginneqatigiillutik inigisaminnik
piginnittuulernissaat taamaasilluni ammaanneqartussaanngorpoq.
Peqqussutissatut naalakkersuisut saqqummiussaanni maluginiagassat arlaqartut
oqaaseqarfigissavagut.
Siullermik
taasariaqarpoq nalorninaatsumik inigisamik attartortut annertuumik
periarfissamik tunineqartut inigisaminnut piginnittuulernissaminnut. Tassami
peqqussummi § 5-imi allaqqavoq inissiami affarleriiusuni imaluunniit
amerlanerusuni inissianik najugaqarfiusuni ataatsimut isummernikkut
imaluunniit inissianik najugaqartut sisamaagaangata pingasut kissateqarpata
imaluunniit kissaateqarnermikkut attartortitsisunut nalunaarnikkut
piginnittunngornissamut ammaanneqarnissaq.
Ilanngulluguttaaq
pingaarutilittut taasariaqarpoq inuit ataasiakkaat pisortat inissiataannik
attartortut, kisiannili piginneqatigiinnut ilaajumanatik aalajangersimasut
illersorneqarlutik
periarfissaasut
peqqussutikkut aqqutissiuunneqarsimanerat.
Peqqussutissami
nutaajusumi maluginiagassat pingaarnerit ilagilluinnarpaat
Namminersornerullutik
Oqartussat imaluunniit kommuunit attartortittakkatut inissiaataanni
attartornermiit piginnittuulinnginnermi inissiamut imaluunniit inissiap
aserfallatsaaliornissaannut apeqqutini attartortitsitsoq
piginnittussanngortussarlu paaseqatigiinnissaannut tunngasut. Soorlu tamanna
peqqusutip § 7-mi takuneqarsinnaasoq.
Aningaasalersuineq
eqqarsaatigalugu naalakkersuisut kommunalbestyrelseluunniit inissiamik
tunisinermi illup teknikkikkut akiata nalinganik 40%-imik annertussusilimmik
taarsigassarsisitsisinnaavoq ukiuni 15-ini atuuttussamik erniaqanngitsunik
aammalu piffissami taaneqartumi taarsersugassanngitsunik. Taamatut
aaqqissuusilluni taarsigassarsisitsisinnaanermik naalakkersuisut
peqqussutissaq aqqutigalugu periarfissiiniarnerit Siumumiit iluarisimaarparput.
Tassanimi taarsersueriaaseq aammalu illup nalinganik missingersueriaasissaq
aqqutissiuussisussaammat innuttaasunut akunnattumik isertitalinnut.
Siumumiit
erseqqissumik oqaatigissavarput maluginiakkatsinnut iluarisimaaratsigu § 11-mi
aalajangersakkakkut pinngitsoortinniarneqarmata Namminersornerullutik
Oqartussat imaluunniit kommuunit inissiaataanni pisinermi
tuniseqqinnissamiluunnii iluanaarniapilulluni tuniniaasoqarsinnaanerannut
killiliiniarnerit.
Nunatsinni
pisortat inissiaataasa attartortittakkat ukiopanngortuni annertuumik Siumumiit
attartortunut pigisassanngortinneqarnissaannut tunngasunik
siunniussaqarsimanitsinni saqqumiussisarsimavugut. Qanorli ilinikkut
attartortumiit piginnittuulernissamut maleruagassanik imaluunniit kikkunnut
tamanut naammaginarsinnaasumik peqqussusiornissaq anguniartuarsimallugu.
Ullumikkut
inuiaqatigiinni killiffitsinni pisortanit isumalluuteqarluni inissamik
innersuunneqarnissaq qaangeriartulersinnaalerparput. Taamaattorli
eqqaamaneqassaaq suli annertuumik akornitsinni inissaaleqineq annertooq
akiorniarlugu iliuuseqartariaqaratta.
Kommuunit
ullumikkornit annertunerusumik periafissaqalissapput inissiaatimik tuninerini
isertitamikkut inissianik nutaanik sanaartornissamikkut.
Taamatut
oqaaseqarluta Namminersornerullutik Oqartussat kommuunillu inissiaataasa
attartortittakkat
namminneq pigisassanngortinneqarnissaat pillugu Inatsisartut
peqqussutissaattut siunnersuut siullermeerlugu oqaaseqarfigaarput.
Peqqussutissarli
imartooq suliarilluagaasorlu annertuumik atuisunit piginnittuulersussanullu
attuisussaammat aappassaaneertinnagu Ineqarnermut, Attaveqarnermut
Pilersuinermullu Ataatsimiititaliami sukumiisumik nalilersorlugulu
suliareqqaarneqarnissaa innersuussutigissavarput.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Tommy
Marø qutsavigaarput. Maannakkut oqaaseqassaaq Godmand Rasmussen, Atassut.
Godmand
Rasmussen, Atassutip oqaaseqartua.
Qujanaq.
Siunnersuut takivoq assiginngitsunillu isummerfigineqarsinnaalluni.
Aallarteriarnermilu oqaatsit Atassummit paasilluarpagut. Pineqarmammi
Namminersornerullutik Oqartussat kommuunillu inissiaataasa attartortittakkat
amerlisarneqarnissaannut siunertaqarnera.
Eqqaaneqartut
ilagaat kommuunit inissiaatiminnik tunisaqartalernissaat aqqutissatut
tikkuarneqartut ilagimmassuk. Illuatungaatigullumi attartortut iniminnik tigusisinnaanerat
periarfissattut ilaattut siunniunneqarsimalluni. Tamannalu alloriarneruvoq
Atassutip pitsaalluinnartutut oqaatigiumasaa. Oqaatigineqartut ilagaat
isumaqatigaarput, tassa pisortat inissiaataannik tigisineq akisuujusarmat.
Taamaattumik aallarteriarnermi kommuunit akissaajaatinik
akilissivallaarnissaat
pissusissaattut isigalutigu, naak piffiit ilaanni narlumuinnaq ingerlanissaa
isumakulunnartumik aamma ilaqarsinnaassagaluartoq. Pineqartormi ukiuni
arlaqalersuni oqallisaajuarpoq. Taamaattumik nutaanik eqqarsalersitsinerit
aqqutissat pitsaasut ilagaat. Qanormi iliuuseqarani ajornartorsiut
aaqqinneqarsinnaanngilaq.
Siunnersuummi
illuutini ataasiakkani peqatigiit piginnittullu Landskarsimi
allattorneqalernissaat Atassummiit iluarisimaarparput taamaaliornikkut
toqqissisimanermik pilersitsissammata.
Peqqussutissami
taaneqartut ilagaat teknikkikkut aningaasatigullu misissuisarnissat.
Ilaatigullu misissuisarnissat. Ilaatigut ukiup affaanik ukiulluunniit aappaa affaanik
sivisussuseqartarnissaa oqaatigineqarluni. Pineqartoq Atassutip
paasilluaraluarlugu siusinnerusukkut taamatut pisartut kingumut kiviassagaanni
eqqarsarnartoqartippai.
Inissaaleqinerullu
annertussusia pissutigalugu eqqarsaatigalugulu illunik piaarnerusumik
inuttaliisarnissaq pisariaqarluinnartutuut isigigatsigu. Naluneqanngilarmi
nunatsinni illut ilaatigut inuttalersorneqarsinnaasorinartut sivisuvallaamik
inoqaratik napaannartarneri, naak nalunngikkaluarlugu suleriaaseq
sukkanerusuuppat inissaaleqinermik sukkanerusumik millisaataasinnaagaluartoq.
Tamannaannaanngilarli.
Aningaasat isaasut atorfissaqarteqisagut aamma pitsaanerusumik
ingerlalissagaluartut. Initaartunullumi toqqisismanarnerusumik aammattaaq
inuunermut pilersitsissammata.
Aammattaaq siunnersuummi eqqaaneqarpoq attartortut tamarmik piginnittussanngunngitsut. Atassummiit tamanna qularinngilarput. Kikkut tamarmik periarfissamut ikaarsaariarneranni periarfissat killeqassammata. Attartukkanik illuutillit attartortunit qimagarneqalersillugit kikkuknnut tamanut akissaqartunut tuniniaasinnaaneq isumaqatiginarpoq. Pissarissaanerusunullu siornatigut periaasiusoq atugallaqqunanngeqaaq.
Tassa akisuunngorlugit attartortitsisarnerit. Tamannalu aaqqiinermi nutaami Atassutip eqqummaariffigineqarnissaa sillimaffigineqarnissaalu innersuussutigerusuppaa.
Missingersuummi oqaatigineqarpoq ukiuni tallimani 375-it tunineqartarnissaat. Tamannalu takussutissiivoq aallartitseriarnerup tassanngaannaq pinnginnissa, taamatullu periarneq Atassummiit iluarisimaarparput.
Aammattaaq oqaatigineqarpoq tunisinermi akiusoq m2-imut 13.000-it missaaniissangatinneqarmat. Ullumikkut sanaartukkat akia qissimissagaanni naammagisimaannarpoq. Naluneqanngilarmi inissianik iluarsaaqqinneq aammattaarlu atuummat aningaasarpassuanik nassatalik.
Atassummiit taamatut oqaaseqarluta Ineqarnermut Ataatsimiititaliamut aappassaaneerneqartinnagu isummersorfigineqarnissaa innersuussutigaarput.
Daniel Skifte, ataatsimiinnermik aqutsisoq, Inatsisartut Siulittaasuat, Atassut.
Godmand
Rasmussenimut qujavugut. Maannakkut oqaaseqassaaq Johan Lund-Olsen, Inuit
Ataqatigiit.
Johan
Lund-Olsen, Inuit Ataqatigiit oqaaseqartuat.
Qujanaq.
Pingasunngormat ullormut oqaluuserisassani immikkoortoq 18-imi19-imilu
siullermeerinnilluta
oqaluuserivagut attartortumiit piginnittumut atatillugu peqqussutinut
pioreersunut allannguutissatut siunnersuutit. Attartortumiit piginnittumut
sunniuteqarnermut atatillugu ullumikkut oqaluuserisassami imm. 21-mi
siullermeerparput peqqussutitassavia imaluunnit inatsisitigut
immikkuullarissutut ilusilerlugu siunnersuutitavia.
Attartortumiit
piginnittumut suliaq allarnisarneqarpoq Inatsisartut 2000-imi upernaakkut
ineqarnerup, tassungalu ilanngullugu A/S Inissiaatileqatigiiffik INI-p
atuunneranik nassuiaat Inatsisartut oqallisigimmassuk. Tamanna pivoq majip
15-iani oqaatigineqareersutut ukioq 2000-imi.
Inuit
Ataqatigiit taamani tunngaviatigut attartortumiit piginnittumut allariarnissaq
akuersaarparput ilaatigummi imaattunik oqaaseqarpugut issuaaneq aallartippoq:
APeqataaffigisinnaavarpulli
innuttaaqatitta akiliisinnaassuseqarluareersut annertunerusumik maannamiit
namminneq illutaarniarnissamut inissiaatitaarniarnissaannut imaluunniit
piginneqatigiinnikkut illuliornerulernissaannut kajuminnerulersitsiumalluni
bånd
nr. 25 aallartippoq Daniel Skifte) ...sivitsorsaataasumik oqaatigineqarmat
ataatsinut aallartittuaannassasugut. Ataatsinut aallartissimasuugutta tassa
arfineq marluk qaangeraluarpai. Qulingiluat tungaanuussaagut. Tassa taassumap kingunera. Siuartittuugaanni.
Taamaattumik
partiit kaammattuutiginarpoq partiit oqaaseqartuisa avataatigut oqallittut
taakkua aalangeeqataassammata ullumikkut oqallinneq qanoq sivisutigisumik
ingerlanneqassanersoq, kisianni arfernup qaangernissaa ullumikkut
naatsorsuutiginngilarput. Taavalu angunngitsuukkagut kingusinnerusumut
inissinniartariaqassavagut. Suli oqaluttussat arlaqarput.
Otto Steenholdt, attaviitsoq.
Tassa Naalakkersuisup aatsaannguaq erseqqissaanermini erseqqissakannereeraluaraa tassa taanna tusanngikkallarakku nappaagami maanga qaqeqqilaarpunga.
Godmand Rasmussenip akissuteqarnermini Naalakkersuisup erseqqissarpaa killissaqartoq, kisianni aajuna uanga apeqqutigeqqerusutara. Illu nammineq akilereersimagukku tassa ukiut qulit ingerlaneranni. Tassa nammineq pigisaraara, soorlu aamma uatsiaarara taamaaliorsinnaagiga.
Nammineq pigisama atukkiunnissaat Naalakkersuisut akuliuffissarinngilaat. Una paasilluarpara suli akilertinnagu aqagulu tunillarlugu. Tassa taanna paasivara, kisianni namminerisat uanga nammineq atukkiussinnaassavara arlaata oqarfigippanga uumaak inissaqanngilluinnaqqissaarpunga. Illulu taanna akilereersimallugu. Saniani oqassooq. "Uanga atorusunneruara.@" Soorunami uanga pisussaaffigissavara kina allaat akisunerusumik atorusunnersoq uanga pinnik akilereersimasannik. Taanna Naalakkersuisut akuliuffissarinngilaat.
Tassa una tamakku suli akilertinnagit nakkutigineqarpata ajorinngilakka, kisianni Olga Poulsenip oqaatigisaanut aamma uanga qangali tamakkununnga iluanaarniartunut ersisaarisareernikuugama.
Takuat, ajunngilaq aamma siunissaq ungasissoq eqqarsaatigalugu iluanaarniassagaanni ukiut qulit utaqqinissaq ajussanngilaq. Taava tamatuma kingorna uanga nammineq akilereerukku sapinngisamik akisunaarlugu arlaanut atukkiussinnaassagakku.
Aningaasaatillillu taamaaliornissaat nammineq pigisanut, privatimik pigisanut Naalakkersuisut akuliunnissaat sapinngisamik killilersortariaqarparput maanngaanniit. Naak nalunngikkaluarlugu taanna aamma atornerlunniarneqarsinnaasoq. Illup akilereernerata kingorna, kisianni utaqqisinnaasarput ima sivisutigisumik akilersinnaasumik aamma atukkiussisinnaassagunik.
Tassa taanna uanga eqqarsaatiga immaqa kukkugaluarnersoq oqaaseqaqqittussap Naalakkersuisup erseqqissaaffigilaartariaqassavaa.
Johan Lund-Olsen, Inuit Ataqatigiit.
Naalakkersuisup saqqummiussatsinnut akissuteqaataanut qujavugut. Erseqqipput akissutigineqartut, kisianni tassa una oqaatigilaarusuppara peqqussutissatut una siunnersuut saqqummiussinitsinni oqaatigeriikkatsituut tassa tunngaviatigut akuersaareerparput. Aamma aallartisarniarneqalermat 2000-imi upernaakkut taamani aamma maani Inatsisartuni oqallisigineqarmat annertuumik aamma taanna tapersersoreerparput.
Kisianniuna tikkuakkatsinni suleqqinnissami tikkuakatsinni aamma una maluginiaqqugipput. Tassa maani Inatsisartuni inatsisilioraangatta aammalu peqqussutit Naalakkersuisuninngaaniit siunnersuutigineqartut suliarigaangatsigit ilaanneeriarluta eqqumaffigerujussuanngitsoortarpagut. Imaluunniit suliassagut imaaginnangaarmata eqqumaffiginngitsoortarpagut Naalakkersuisunit piginnaatitsisarnerit.
Assersuut tassa § 1-imi taanna aamma Olga Poulsenip ippassaq radiokkut oqaaseqarfigisaatigut taanna aamma erserpoq tassa §1-imi, immikkoortut tallimaanni uani sammisatsinni. Taamaattumik tassa piginnaatitsissummik imaqarpoq. Tassa imaakkamik §1, immikkoortoq 5 imatut allaqqavoq. Inissiaqarfiit attartortittakkat sorliit peqqussummi uani pineqannginnissaat pillugu maleruagassat Naalakkersuisut aalajangersarsinnaavaat.
Taava Naalakkersuisut taanna piginnaatitsissut atorlugu namminneerlutik Nalunaarutit aqqutigalugit immersorsinnaavaat qanorsuaq qanorsuaq Inatsisartut peqataatinngikkaluarlugit.
Inatsisiliornitsinni peqqussutiliornitsinni taamaammata aamma uagut eqqumaffiginiartariaqarpagut inatsisissatut peqqussutissatullu siunersuutit maani suliarineqarneranni periarfissaqartilluta taava tamakkua Nalunaarutiliornerit sumik siunnerfeqassanersut taava aamma aalangersueqataaffiginiartariaqaratsigit. Tassami piginnaatsitsissummik tunniussereeraangatta taava sunniuteqarsinnaanerput taanna mattunneqareertarpoq.
Taanna inassutigerunnarpoq uungaannaanngitsoq kisianni aamma peqqussutinut siunnersuutigineqartunut allanut aamma inatsisissatut siunnersuutigineqartunut allanut. Tassami ukiumut, ukiup ataatsip ingerlanerinnaani maani nunatsinni Naalakkersuisut Inatsisartunit taamatut piginnaatinneqartarnertik atorlugu ukiumut agguaqatigiissillugu nalunaarutiliortarput bekendtgørelsiliortarput 150-it 200-llu akornanni.
Tassa ullut tamangaaviisa imaluunniit amerlasuupilorujorujussuupput. Taakkulu nalunaarutit inunnik pituttuisuupput, kisianni Naalakkersuisut tunniussimavagut Naalakkersuisut taakkua namminneerlutik immersorsinnaallugit uagut maanngaaniit piginnaatereeratsigit.
Arlaleriarluta takusareerparput aammalu oqallinnersaarsuarmik inuiaqatigiinneq pilersitsisoqartarpoq isumaqartoqaleraangat Naalakkersuisut Inatsisartunit piginnaatinneqarsimanertik qaangerlugu sipporujussuarlugu taava nalunaarusioraangamik.
Taava
Inatsisartut Naalakkersuisullu aporaatilersarput. Assersuut ataaseq
tikkuassagukku nutaanerpaaq tassaavoq timmissat eqqissisimatitaanissaat
pillugit taanna nalunaarut. Annertuumik oqallisigineqartoq. Tassa taanna
Naalakkersuisunit aamma piginnaatitsinermik aallaaveqarpoq, kisianni ajoqutaa
uaniinnikuuvoq Inatsisartut piginnaatitsinerat qaangerujussuarlugu taanna
suliarineqarsimammat.
Taamaammat
tassa annertoorujussuarmik inuiaqatigiinni oqallisigineqarpoq. Inatsisartullu
aamma tassani soorunami akuullutik. Tassa taakku apeqqutit saqqummiussagut
aamma ilaatigut tamakkuninnga tunuliaqutaqarput.
Taamaammat
ataatsimiititaliaq sulilluarnissaanik kissaallugu aamma tamakkua
eqqarsaatigilaassagai kaammattuutigerusuppagut.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Johan
Lund-Olsen qutsavigaarput. Tulliulluni oqaaseqassaaq Olga Poulsen aappassaanik
partiimi oqaaseqartitap avataatigut.
Olga
Poulsen, Inuit Ataqatigiit.
Qujanaq.
Tassa eqqissiartuaalertutut misigisimavunga Naalakkersuisup erseqqissumik
aamma akissuteqarnera peqqutaalluni. Unali apeqqut aamma soqutinartutut
pingaaruteqartutullu aamma isigigiga erseqqarissumillu akineqanngitsutut
misigisimaffigigiga.
Tassa
oqarputit uanga peqataarusunngikkuma piginneqatigiiffimmik taava
Namminersornerullutik Oqartussat taakkua piginneqataassutit taakkua
pigisinnaavaat. Aamma taanna paasivarput. Aamma paasivarput taakkua
piginneqataassutit Namminersornerullutik Oqartussat tunisinnaavai
akisunerpaamillu akileerusuttumut aamma tunisinnaallugit.
Qanormi
uanga iliussaanga uanga utaqqisuni ukiut qulit utaqqinikuuvunga, kisianni
akissaqanngilanga taanna pisiarissallugu. Tassunga Namminersornerullutik
piginneqatigiiffianut tassunga nuussinnaatitaavunga utaqqisuninngaanniit.
Utaqqisut allattorsimaffianinngaanniit.
Isumaqarpunga,
taanna aamma ataatsimiititaliami misissorneqartariaqartoq. Naalakkersuisut
pigisat andeleqarfigisaanninngaanniit utaqqisunit allattorsimaffimmit
nooqqusaasinnaanissaat, imaluunniit paaserusunnaraluarpoq.
Ove-Karl Evaldsen, Kattusseqatigiit.
Naatsuaraarannnguaminguna apeqquteqarniaannarlunga neriullungalu naqqiissuteqaataasinnaasoq uani.
Tassaana
uani § 4, imm. 5 aamma § 5, imm. 5. Tassani allaqqagami attartortut soorunami
nuannersorujussuuvoq ukiut arlallit attartoreersimalluni taava pisigaanni
arlaannik attartortoq. Uffa immaqa taanna nuukkaanni piginnittumut. Taanna
kusanarnerussagaluarami. 300.000 kr-neerlunga pisivunga. Aah attartorinuna.
Qujanaq.
Jørgen Wæver
Johansen, Ineqarnermut, Attaveqarnermut Pilersuinermullu Naalakkersuisoq,
Siumut.
Oqaaseqartut
akissuteqarfigilaassavakka; siullermik Otto Steenholdtip apeqqutigivaa taavami
tamakkiisumik akilereerukku. Taava soorunami pisinnaatitaasariaqarpunga
qanorluunniit akilersillugu attartitsinissamut.
Tassa
Inatsisartuni ukioq kingulleq majip 31-ani ilaasortat 28-t najuuttut tamarmik
akuerivaat taamaaliorsinnaassanngitsutit.
§13-imi
allaqqavoq qanoq naatsorsorneqartassanersut. Tassa annertunerpaaffissaat.
Tassani killilersorneqarput. Taamaattumik januarip aallaqqaataani
atuutilersinneqarpoq una. Taamaattumik januarip aallaqqaataaniit siunissamut
uumap allanngortinneqarnissaata tungaanut taanna atuuppoq.
Qaffasinnerpaaffeqarpoq. Taannalu eqqaamalaartigu qaffasinnerpaaffissaq
eqqunneqarmat ilaatigut maani Nuummi ilaasa sussaajunnaarlutik
iluanaarutigimmassuk aamma pisortanut attartortitsisarnermi.
Taamaattumik
Inatsisartut aalajangernikuupput majip 31-ani januarip aallaqqaataani
atuutilersumik qaffasinnerpaaffeqassasut. Aamma tamakkiisumilluunniit
nammineq pigisarigaluaraanni. Uanga taanna isumatusaarnertut isigaara.
Johan
Lund-Olsen-imut tunngatillugu - nalunaarutit ilumoorput Naalakkersuisut
pisinnaatinneqarlutik Inatsisartuniit nalunaarutit suliarisarpaat, kisianni
aamma eqqaamassavarput teqeqqumut pillutik matut tunuanni Naalakkersuisut
suliarisanngimmatigit, kisiannili nalunarutit tamaavimmik susassaqartunut
eqqarsaatigineqarsinnaasunut tamanut tusarniaassutigineqartarmata.
Taamaattumik
aamma uanga ajoriffissaqartinngilara Inatsisartuni piginnaatitsissutinut
tamakkununnga tunngatillugu suut siunnerfigineqartariaqarnerinik
Inatsisartut ilanngullutik naliliisarpata. Taanna ajoriffissaqartinngilara.
Olga
Poulsenip apeqqutaa una tassalu Namminersornerullutik Oqartussat
piginneqataassutaat taanna ataaseq qulit akornanni. Attartortoq tassani
nuuppat taava ventelistiminngaaniit ikkussisoqarnissaa. Taannaana
apeqqutigigit taamaaliortoqarsinnaanersoq. Taanna siunnersuutiginngilara.
Siunnersuutigaarput Olga Poulseni uani attartortutut inissisimaguni sinnerilu
piginnittunngoreernikut, taava Olga Poulsen nuunniarluni aalajangeruni taava
taanna tunineqassasoq.
Tassanilu
eqqaamasassaq unaavoq soorunami taanna nuuttoq imaassinnaavoq
attartittakkamiit piginnittunngorusulluni tassunga nuuttoq. Taamaattumik ilaa
imaanngilaq tunineqarpat taava ataaseq amigaatigineqalissasoq. Aammami
utaqqisut ilaat immaqa tassunga nuuttussaavoq.
Taavalu
eqqaamalaartigu aningaasat tunisinermi isertitsissutaasut tamavimmik kommunimi
tassani inissianik nutaanik sanaartornermut atorneqarnissaat tamatta
siunnerfigigatsigu taakkulu peqqussutit ippassaani sammigatigu.
Ove-Karl
Evaldsenimut tunngatillugu oqaatigerusuppara tassa § 4-mi imaluunniit § 4, imm.
5-imi pineqartut tassaammata attartortutut ingerlaannartut soorunami
piginnittut piginnittuupput aamma ulloq taanna piginnittunngornertik
aallaavigalugu meeqqaminnut kingornutsissinnaavaat
akukkiuttaqattaarsinnaavaat soorunami killiliussat iluini, kisianni
tamakkiisumik pigisatuulli allatuulli ippoq, kisianni 4, imm. 5-imi
pineqartut tassaapput naagaarnikut. Uagut peqataajumanngilagut. Attartortut
ingerlaannarusuppugut. Tassa
taakkua pineqarput § 4, imm. 5-imi.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Inatsisartuni
isumaqatigiinngitsoqanngimmat. Taamaattumik naggaterpiaatigut Johan Lund-Olsen
kissaateqarpoq oqaaseqalaassalluni. Pingajussaaniilerami naatsuararsuarmik
oqaaseqassaaq.
Johan
Lund-Olsen, Inuit Ataqatigiit.
Qujanaq.
Tassa naatsuaraannannguussaaq tassa aap nalunaarutiliortarnerit
Naalakkersuisini tasa piginnaatitsinermik tassa aallaaveqarput, kisianni
akornutissaqanngilaq Naalakkersuisut piumassuseqarunik taava aamma
ataatsimiititaliat susassaqartut aamma tusarniaaneq
ingerlattussaareeraangamikku
kattuffinnut assigiinngitsunut soqutigisaqaqatigiiffinnullu
tusarniaasussaagaangamik taava aamma Inatsisartut ataatsimiititaliaat
susassaqartoq aamma tusarniaaffigaluguluunniit aamma
peqataatissinnaasuugaluarunikku.
Taamaalisoqarsinnagaluarpammi
taava pisariaqanngitsumik Inatsisartut ataatsimeereernerisa kingorna
ataatsimeeqqinnissatta tungaanut pisariaqanngikkaluarmik aamma Inatsisartut
Naalakkersuisullu aamma qanoq aporaattarnissaat
pinaveersimatinneqassagaluarmat taamaaliornikkut.
Taamaammat
tassa taanna isumaliutigeqquinnarparput. Oqaatigeriikkattuummi ukiuni
kingullerni imaalernikuuvoq piginnaatitsisarnerit Inatsisartuninngaaniit ima
annertutigilersimapput ukiumut agguaqatigiissillugu Naalakkersuisut
nalunaarutinik bekendtgørelsenik suliaqartalersimallutik 150-it 200-llu
akornanni amerlassuseqartunik.
Taanna
eqqarsariarnartorujussuuvoq. Tassa imaappoq Inatsisartut qanoruna
peqataatinnagit Naalakkersuisut innuttaasunut ataasiakkaanut
annertoorujussuarmik pituttuisarsinnaasunik nalunaarutit aqqutigalugit
inatsisiliortutut inissisimalernikuupput. Taannaana eqqarsaatigeqqugiga
suliaqarnissani tullinnguuttuni aamma.
Olga
Poulsen, Inuit Ataqatigiit.
Tassa
una Naalakkersuisup ilisimatippaatigut soorlu taamatut Namminersornerullutik
Oqartussat piginneqatigiilluni pigisaanni tassanngaaniit nuukkuma, taava
tassa utaqqisuninngaaniit aamma tassunga pisoqarsinnaavoq.
Aammali
taanna tunineqassaaq. Taavami taanna utaqqisoq utaqqisut
allattorsimaffianiittoq sumut pissava? OK, oqarputit soorunami taakkua
pisinermut akigitinneqartut taakkua atorlugit inissianik sananeq
ingerlajuassasoq, kisianni suli utaqqisut allattorsimaffiat qanoq issanersoq
taanna paaserusunnarpoq. Aamma
soorlu massakkut imatut ippoq. Uanga inigisara suliffinnut atatillugu
inigigukku ajunngilaq inigivara, kisianni taassumap saniatigut aamma
utaqqisunik allattorsimaffimmi allattorsimavunga ullullu tamaasa
akiliisarlunga tassunga allattorsimaffimmik allassimanera peqqutigalugu.
Taanna
qanoq ilissava. Pissutigalugu imatut naatsorsuutigisariaqaratsigu
tjenesteboligit pigisinnaanngorutsigit taava aamma
allattorsimaffimminngaaniit utaqqisuniit peertussaavugut.
Otto Steenholdt, attaviitsoq.
Naalakkersuisup uannut akissuteqarnerani paasivara tassa qiiammissutigaara aamma uanga ilaaffigisimasara taamak oqaatigiinnarlara.
Tassa inuit namminersortut naalagaaffimminngaaniit akuleruffigineqarnatik tassa pisortaninngaaniit akuleruffigineqarnatik pisinnaanerani illersuisuullunga aammalu maani taamaattoqarpoq. isumaqarluuinnarpunga taanna misissoqqittariaqartoq inuup nammineq pigisaa nammineerluni tunisinnaasaa. Umiatsiaarara uanga tunissagukku Naalakkersuisuninngaaniit tanna akuliuffigineqassanngilaq uanga pigigakku tunissavara.
Massakkullu una pivarput illu taanna taamanikkut illuinnarmut tunnganera paasisinnaagaluarpara uanga tamakkuninnga bolighajenut aamma ersisuugama kisianni tassungaannaq tunngatinneqassaaq. Immaqa tuniluuteratarsinnaasoq. Allaat umiatsiara tuniniassagukku qaffasinnerpaaffissaanut Naalakkersuisut periarfissaqalernissaat assorsuaq qiiaammissutigaara. Tassa aamma illumi taamaappoq.
Jørgen Wæver-Johansen, Ineqarnermut, Pilersuinermut Attaveqarnermullu Naalakkersuisoq, Siumut.
Otto Steenholdti qujanartumik Inatsisartunut ilaasortaagami pisinnaatitaaffeqarpoq siunnersuuteqarsinnaalluni. Taamaattumik siunnersuusiorusukkuni periarfissaqarluarpoq.
Nalunaarutit pillugit eqqaamassavarput Johan Lund-Olsenip eqqartugai Nalunaarutit 150-iniit 200-nut tungaanoorsinnaasartut amerlanerpaarpaartaat teknikkemut tunngassuteqarmata. Aammalu allaffissornikkut malittarisassanut tunngassuteqarmata. Aammalu eqqaamaqqilaartigu tusarniaassutigineqartarmata tamarmik. Taamaattumik oqaatigeqqillara eqqaamaannassagatsigu nalunaarutit tassaammata allaffissornikkut suliassat aammalu allaffissornermik ulluinnarnilu ingerlatsinermik suliassat Inatsisartutullu inatsisiliorneq taakkua avissaartinniarlugit qangarsuarli aalajangereernikuugamik Inatsisartut.
Taannalu eqqaamaneqassaaq pinngitsoorani soorunami peqqussutit inatsisillu suliarineqartarneranni Inatsisartut namminneq paragrafit stykkikkaarlugit saqqummiunneqartarnerinut qanoq sukangatigisumik Naalakkersuisunut piumasaqaateqarniarnerlutik politikkikkut nammineq aalajangersartarpaat.
Taamaattumik tassuunatigut Inatsisartut aqutsisinnaanertik pigivaat. Taamaattumik ajornartorsiutaasutut isiginngikkaluarpara. Uanga Olga Poulseni innersuukkusuppara immikkut oqaasertaliussanut tassani assersuutit assigiinngitsut allattorneqarsimapput. Taakkulu naammaginanngippata aamma Naalakkersuisumut apeqquteqarnikkut allakkatigut akissuteqarfigineqarsinnaaneri taanna periarfissatut tikkuartorusuppara.