Oqaluuserisassani immikkoortoq 23-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq pingajuat, ataasinngorneq 13. maj 2002, nal.
13.56
Daniel Skifte,
ataatsimiinnermik aqutsisoq, Inatsisartut siulittaasuat, Atassut.
Tassani
oqaaseqartoqarumanersoq apequtigissavara. Tassa atuartitaaneq pillugu
Naalakkersuisuugallartoq Naalakkersuisut Siulittaasuat oqaaseqassaaq.
Jonathan
Motzfeldt, Naalakkersuisut Siulittaasuat, Siumut.
Inatsisartut
april ulluisa 15-anni 2002 Folkehøjskolit pillugit Inatsisartut
peqqussutissaattut siunnersuut siullermeerlugu oqallisigaat.
Siunnersuut
Inatsisartunit ilassilluarneqarpoq partiinillu tamarmiunngikkaluartunit
Kattusseqatigiinnillu Kultureqarnermut Ilinniartitaanermut Ataatsimiititaliamut
inassutigineqarluni.
Kiisalu Inuit
Ataqatigiinnit paaserusunneqarluni oqaaseq sorleq siunnersuummi paragraf 12.
immikkoortoq 3-mi atorneqartoq. Siunersioreerlugu imaluunniit nassuiaatini
atorneqartoq isumasioreerlugu atorneqassanersoq.
Siunnersuut
Kultureqarnermut Ilinniartitaanermut Ataatsimiititaliami suliarineqarsimavoq
inassutigineqarlunilu Inatsisartuni taperserneqassasoq. Siullermeerinninnerup
kingorna Inuit Ataqatigiinnit apeqqutigineqartoq siunnersuutip nassuiaatitaani
aaqqinneqarpoq tassa peqqussutissatut siunersuut allannguutitaqanngilaq.
Taamatut
oqaaseqarlunga Naalakkersuisut inassutigaat peqqussutissatut siunnersuut
taamatut isikkoqarluni pingajussaaneerneqarnissaminut ingerlateqqinneqassasoq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisunut
qujavugut. Maannakkut tulliulluni oqaaseqassaaq Lars-Karl Jensen Siumut.
Lars-Karl
Jensen, Siulittaasup tulliata pingajuat,Siumut.
Qujanaq.
Folkehøjskolet pillugit Inatsisartut peqqussutissaatut siunnersuut taanna
Siumuminngaaniit imatut oqaaseqarfigilaarniarparput. Inatsisartut
Kultureqarnermut Ilinniartitaanermut Ataatsimiititaliaata isumaliutissiissutaa
taamatullu tassunga Naalakkersuisut akissuteqaataat Siumumiit
isumaqatigilluinnarlugit akuersissutiginiarparput.
Nunatsinni højskolet
marluusut ilinniartuinit ilinniarnersuiteqalernissaq ammaanneqartoq
neriulluarfigaarput. Tamannalu inuusuttut amerlanerusut højskoleriarnissaannik
kinguneqassasoq isumalluarfigalutigu.
Siumumiillu
periarfissaq manna iluatsillugu Naalakkersuisunut maluginiaqqussavarput højskolit
marluusut aningaasaliiffigineqartarnerat 1989-miit allannguuteqarani
ullumikkumut ingerlasoq taamaaginnassappat ernumaginartoqartikkatsigu. Akit
qaffakkiartornerannut malinnaatitsinnginneq ingerlatsinermut
sunniuteqarlulereersoq paasisinnaagatsigu.
Tamanna
ukiup tullissaanu 2003-mut aningaasaliissutissat suliarineqarnissaanut
ilanngullugu Naalakkersuisunut nalilersoqqussavarput. Taamatuttaaq højskolit
marluusut illutaat qanganitsilersut ingerlatsinermut aningaasaliissutit
kisiisa isumalluutigalugit aserfallatsaaliorneqarnissaat aamma
akisaaleqiffiujartorput. Taakkua nuna tamakkerlugu iluarsaassinissamut
ilanngullugit pilersaarusiorfigineqarnissaat Siumumiit Naalakkersuisunut aamma
kaammattuutiginiarparput.
Siumumiit
tamatut oqaaseqarluta Naalakkersuisut inassutigisaattut peqqussutissatut
siunnersuutip taamatut isikkoqarluni pingajussaaneerneqarnissaanut
taaseqataassaagut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Lars Karl
Jensen qutsavigaarput. Tulliulluni oqaaseqassaq Jakob Sivertsen Atassut.
Jakob
Sivertsen, Atassutip oqaaseqartua.
Qujanaq.
Tassa ataatsimiititaliami assortuuttoqarsimanngikkaluartoq uaguttaaq aamma
ataatsimiitialiap innersuussutai taaavalu aamma 2003-mi aningaasaliissutinut
tunngasut Naalakkersuisuni misissoqqissarneqaqqinnissaa aamma
isumaqatigatsigit matumuuna oqaatigaarput.
Taamaalilluta
oqaaseqarluta aapaassaaneerinninnermi Atassummiit taaseqataassaagut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Jakob
Sivertsen qutsavigaarput. Tulliulluni oqaaseqaassaaq Inuit Ataqatigiit.
Olga
Poulsen, Inuit Ataqatigiit oqaaseqartuat.
Qujanaq.
Tassa Inuit Ataqatigiinninngaaniit aamma qujassutigaarput Naalakkersuisut
aaqqeeqqusinerit aaqqinneqarmata.
Siumukkut
oqaasiannut tunngatillugu aserfallatsaaliinermut aammalu aningaasaqarnermut
tunngasortaannut isumaqarpunga pingaaruteqartoq inuit imaluuniit højskolininngaaniit
taamatut tamakkiisumik ataatsimiititalianut nalunaaruteqarneq taanna
assorujussuaq iluaqutaassasoq, taamatut aserfallatsaaliinermut aammalu
aningaasanut tunngatillugu qaffaaniarnermut nalunaarusiamik
tunniussisoqarsinnaappat.
Taamaalilluni
aamma ataatsimiititaliami nalilersueqqissaarluni Naalakkersuisunut aamma
innersuusseqarsinnaanissaq aqqutissiuunneqarsinnaaniassammat.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Olga Poulsen
qutsavigaarput. Tulliulluni oqaaseqassaaq Mogens Kleist Kattusseqatigiit.
Mogens
Kleist, Kattusseqatigiit oqaaseqartuat.
Qujanaq.
Uaguttaaq peqqussutissiaq taamatut isikkoqarluni aappassaaneerneqarnissaanut
Kattusseqatigiinniit akuersaarnerput aamma oqaatigissavarput.
Paasiuminaatsilluguli Naalakkersuisut Siulittaasuat maangarami iluamik
paasiuminaatsumik oqaaseqarami Kattusseqatigiit qanoruku taarpalunnerpai sumut
attuumassuteqarnersut. Iluami tusaaniaraluarakku paasisaqannginnatta
Naalakkersuisut Siulittaasuata oqaatigisaanut.
Kisianni
oqaatigissavarput taamatut højskolit marluusut pitsaanerusumik
eqaannerusumillu maannakkut ammaanneqarnissaat uagut tungitsinninngaaniit
aamma nuannaarutigigatsigu. Tassami aningaasartuutaasartut
assigiinngitsorparujussuit højskolinut ataasiakkaanut, marluusunut
annertusarsimapput. Assersuutigalugu Sisimiuni Knud Rasmussenip højskoliani
ilinniartuinnarnut ukiumut 220.000-t nammineq aningaasartuutigisarsimavaat.
Aamma
nalunngilara Sulisartut højskolianni aningaasanik annertungaatsiartunik
taamatut arlaatigut atuisarsimassasut. Oqilisaataasussaassapput. Aammalu højskolertalernermi
taamatut assigiinnngitsut nipilersornermut timersornermut
eqqumiitsuliornermullu tunngasut assigiinngitsut ammaanneqartussaassammata.
Taamatut
oqaaseqarluta suliassap aappassaaneerneqarnissaa uagut tungitsinngaaniit aamma
akuersaassavarput. Qujanaq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Taava
maannakkut Naalakkersuisut Siulittaasuat akissaaq.
Jonathan
Motzfeldt, Naalakkersuisut Siulittaasuat, Siumut.
Partiit
oqaaseqartuinut Kattusseqatigiinnullu qujavunga. Taavalu Siumup oqaaseqartuata
Lars Karl Jensenip oqaaserisaanut Naalakkersuisunut innersuussutigineqartut
aamma paasivakka oqaluttunit allanit aamma taperserneqartut ilaatigut Inuit
Ataqatigiinniinngaaniit Olga Poulseni aamma aserfallatsaaliinernut tunngasut
aamma tikimmatigit.
Taakkua
innersuussutigineqarput aappaagu aningaasartuutissat
aaqqissuunniarneqarneranni nalilersuinernut ilaatinniaqqullugit.
Oqaatigissavara maannakkut nalilersorneqartut tamaavimmik illut atuarfiit
napparsimaviit allarpassuillu pisortaninngaaniit ingerlanneqartut tamarmik
taakku eqqarsaatigalugit nalilersorneqarneranni højskolit aamma
alaatsinaanneqarnissaannut piumasaqaat aamma eqqaamaniassagipput.
Siumuminngaaniit oqariartuut taamaalillugu oqaatigisinnaavara aamma allat
isumaqatigiissutaat ilanngukkumaaripput.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisut
Siulittaasuannut qujavugut. Tulliulluni oqaaseqarumavoq Olga Poulsen.
Olga
Poulsen, Inuit Ataqatigiit oqaaseqartuat.
Qujanaq.
Uanajuna erseqqissaatigilaarniarlugu Naalakkersuisut Siulittaasuanut tassa
Siumukkut saqqummiinerminnut tunngatillugu højskolit arlaat
pisariaqartitsisinnaanerannut tunngasumik oqaaseqarnerannut. Oqaaseqarnitsinni
oqaatigivarput pingaaruteqartoq aammalu pisariaqassasoq ataatsimiititaliamut højskolit
nalunaarusiaqarsinnaappata ataatsimiititalianut ingerlatinneqartunik.
Taamaasilluni
ataatsimiititaliap nalilersueqqissaarluni aamma højskolimi suut
aserfallatsaaliinermi pisariaqarnersut aningaasallu pisariaqartinneqartut
qaffakkiartornerannut tunngavissanik peqarsinnaaqqulluta taanna oqaatigigipput.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Olga Poulsen
qutsavigaarput. Tulliulluni oqaaseqassaaq Lars-Karl Jensen.
Lars-Karl
Jensen, Siulittaasup tulliata pingajuat, Siumut.
Tassa una
suliarput ingerlannerani uagut aamma højskolinut paasisassarsiorsimavugut.
Peqqussutit iluaniittut qanoq isummerfigineqarsinnanerinut tunngasunik.
Sulisartut højskolianninngaaniit
aatsaat qanittukkut saaffigineqarpugut una atsioreeripput uagut. Aammalu
Inatsisartuni taamatut sullitatsinnut oqariartortuusinnaanerput uagut
nangaassutiginngilarput ataatsimiititaliamut annguteqqaanngikkaluarlugu. Aamma
naatsorsuutiginngilara ataatsimiititaliap højskolinut kikissat qassit
atorlugit iluarsaanneqarnissaa sammissagaa. Tamakkununnga suliassallit
suliassaq tigusinnaappassuk taamaallaat qujassaagut.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Lars-Karl
Jensen qutsavigaarput. Tulliulluni oqaaseqassaaq Naalakkersuisut Siulittaasuat.
Jonathan
Motzfeldt, Naalakkersuisut Siulittaasuat, Siumut.
Kingullermik
oqaaseqartunut oqaatigiinnassavara højskolininngaaniit nalunaarutit soorunami
pissusissamisoorpoq aamma kultureqarnermut udvalgimut atuartitsinermullu
ingerlanneqartarpata. Aamma taanna taamaattarsimanngippat isumagisassavarput.
Oqaatigissavara
naggataatigut højskolit maannakkut ataatsimut nalilersorneqarneri aamma maani
malugisinnaavara taanna kissaatigineqartoq. Ukiuni atuuffigiisimasaani
maannamut tikillugu nalilersorneqarnerat ingerlavoq. Aammalu højskolit
tungaatigut atuartitsinerup nutaanngorsarneqarsinnnaanera aamma maannakkut
eqqarsaatigisanut ilaatillugu suliarineqarpoq.
Imaappoq
atuarfeqarnerup iluani aamma atorluaanermik kinguneqartumik højskolit
atorsinnaanerat misissorlugu maannakkut ilanngussaavoq ilaavoq.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Naalakkersuisut
Siulittaasuannut qujavugut. Taavalu tulliulluni oqaaseqarumavoq Olga Poulsen.
Pingajussaaniilerami naatsuararsuarmik.
Olga
Poulsen, Inuit Ataqatigiit oqaaseqartuat.
Qujanaq.
Tassa uku paasisassarsiorsimasunut Lars Karl Jensenip oqarnera
iluatinnaateqarsorivarput. Uagut aamma soorunami ataatsimiititaliami
ilaasortatut pisariaqartipparput nalilersuinissami aamma tamakkua
paasisissarsiornermi paasisarisimasat aamma uagut artorfissaqartillugit.
Aserfallatsaaliinermut
allallut ilaalu ilanngullugit tunngasunik oqaaseqarnitsinnut imannak
paasitinniarneqassanngilagut akerlerigipput. Taanna kisianni
ilisimasariaqarparput aserfallatsaaliinermut tunngatillugu kulturikkut
atuartitaanerup iluani annertoorujussuarnik suliassaqarpugut.
Taamaattumik
aamma tulleriissaarinissat nalilersuinissaanut tunngatillugit aamma
pisariaqartippagut tamakkua paaissutissat paasissalugit.
Daniel
Skifte, ataatsimiinnermik aqutsisoq, Inatsisartut siulittaasuat, Atassut.
Olga Poulsen
qutsavigaarput. Taavalu Lars Karl Jensen pingajussaaniilerami
naatsuararsuarmik.
Lars-Karl
Jensen, Siulittaasup tulliata pingajuat, Siumut.
Tassa
ersarissaannassavara kinaluunniit Inatsisartunut ilaasortaq suliaminut
tunngatillugu sumulluunniit paasisassarsiorsinnaanera isumaqarpunga
ataatsimiititaliaq suiffigisani taamaalillugu kiffartuussinnaagaa
ataatsimiititaliami avaqqullugumik sulisutut tikkuarniarneqassagutta taanna
eqqumiigissavara.
Peqqussutissap
suliarineqaranut tunngatillugu taanna oqaatigiinnarparput maluniarsimallutigu
aserfallakkiartortut. Aammalu maluginiarsimallutigu
aningaasaliiffigineqartarnerat ullumikkumut naleqqutinngitsoq.
Udvalgi
isumaqarpunga aamma susassaqanngitsoq sorliit atuarfiit iluarsaanneqarnissaannut
fagudvalgeqarpoq tamakkununnga suliaqartunik Naalakkersuisut aamma taakkua
tulleriaarinerit ingerlattarpaat. Taannalu uanga ataqqivara oqariartuuterpullu
tigulluarmagu qujassutigiinnarlugu.
Daniel Skifte,
ataatsimiinnermik aqutsisoq, Inatsisartut siulittaasuat, Atassut.
Lars-Karl
Jensen qutsavigaara. Taavalu allanik oqaaseqarumasoqanngimmat taava taasissaagut.
Inatsisartut 23-p tassalu folkehøjskolit pillugit Inatsisartut
peqqussutissaattut siunnersuutip aappassaaneerneqarnerani taasissutigisassat.
Kultureqarnermut
Ilinniartitaanermullu Ataatsimiititaliap isumaqatigiittup siunnersuutip
akuersissutigineqarnissaa isumaliutissiissummini inassutigaa. Allannguutissanik
siunnersuutinik saqqummiussisoqanngilaq.
Maannalu
siunnersuut taasissutigissavarput. Peqqussutissatut siunnersuummut isumaqataasut
qinnuigissavakka nikueqqullugit. 28.
Peqqussutissamut
siunnersuummut akerliusut qinnuigissavakka nikueqqullugit. Soqanngilaq.
Peqqussutissamut siunnersuummut isumaqataanatillu akerliunngitsut
qinnuigissavakka nikueqqullugit. Soqanngilaq.
Siunnersuutigissavara
siunnersuut ataatsimiititaliamit suliarineqaqqaarani
pingajussaaneerneqarnissaminut ingerlaqqissasoq. Tamanna akerlerineqanngippat
akuersissutigineqartutut isigissavara. Akerlerineqanngilaq. Taamaalilluni
siunnersuut akuersissutigineqarpoq.