Ullut ataatsimiiffiusut tallimaat, ataasinngorneq 15. april, nal. 13:05

Oqaluuserisassani immikkoortoq 23

Folkehøjskolet pillugit Inatsisartut peqqussutissaattut siunnersuut.

(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)

(Siullermeerneqarnera)

 

 

Ataatsimiinnermik aqutsisoq: Daniel Skifte, Inatsisartut Siulittaasuat, Atassut.

 

 

Jonathan Motzfeldt, Naalakkersuisut Siulittaasuat, Siumut.

 

Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq napparsimanini pissutigalugu saqqummiisinnaanngimmat, saqqummiussassai ullumikkut uanga saqqummiutissavakka.

 

Folkehøjskolet pillugit Inatsisartut peqqussutissaattut siunnersuut siullermeerneqarluni saqqummiunneqarpoq maannakkut saqqummiutissavara.

 

Kalaallit Nunaanni Folkehøjskolet allaffissornikkut aqunneqarput højskolet pillugit inatsisit peqqussutaat nr. 16 1980-imeersoq Kalaallit Nunaanni højskolet pillugit inatsit nr. 609, 23. december 1980-imeersoq tunngavigalugu aalajangersarneqartoq malillugu.

 

Peqqussutissatut siunnersuutip matuma aalajangiunneqarneratigut peqqussut 1980-imeersoq atorunnaarsinneqassaaq.

 

Peqqussutissatut siunnersuummi peqqussutip siunertaa ullumikkut atuuttoq tunngavigineqarpoq taamaattumillu folkehøjskole pillugu isumaa atatiinnarneqarluni. Taamaalilluni allannguutissatut siunnersuut ullumikkut pissutsinut naleqquttunngorsaaneruvoq.

 

Folkehøjskolet pillugit Inatsisartut peqqussutaat massakkut atuuttoq 1980-iminngaaneersuummat taamanimiillu peqqussutip aalajangiunneqarneraniit maannamut annertuumik pisoqarsimammat ilisimaneqarpoq.

 

Ilinniartitaanermut tunngasut allanngorsimapput. Aammalu ilinniartitaanerit iluani tamarmik peqqussutit nalunaarutillu arlalippassuit aalajangersarneqarsimallutik. Aalajangersakkatigullu nutaatigut ilinniagaqarnersiutinut aningaasaliisarnermik periaatsit allanngortinneqartarsimallutik.

 

Folkehøjskolet pillugit Inatsisartut peqqussutaat 1980-imeersoq pisoqalisimasutut oqaatigineqartariaqarpoq. Tassani aamma eqqarsaatigalugit folkehøjskolet pillugit taaguutit atorneqartut ilinniagalinnut tapiissutit aningaasaliisarnermullu maleruagassat. Taamaattumik pissusissamisoorpoq aalajangersakkat ataasiakkaat iluarsaatissallugit aamma naleqqussassallugit.

 

Kalaallit Nunaanni folkehøjskolet marluupput;  Knud Rasmussenip Højskolea aammalu Sulisartut Højskoleat. 1990-ikkut ingerlalerneraniilli peqqussutit pissutsinut naleqqussarneqarnissaat taakkua kissaatigisimavaat.

 

1990-ikkut ingerlaneranni peqqussut pillugu arlaleriarluni ataatsimiittoqartarsimavoq. Taamaattorli peqqussut iluarsaallugu suliniutit aatsaat 1998-imi pimoorullugit aallartinneqarlutik.

 

Peqqussutip iluarsarnissaanut peqatigitillugu højskoleni taakkunani marluusuni timersuutinik ingerlatsisarnissat, nipilersornermik ilinniarfik kiisalu assassorluni kusanartuliornermik ilinniartitsinissaq oqaluuserineqartarput.

 

Tamatuma saniatigut inuusuttut ilinniagaqarusuttut ilinnialivinnissaminnut piukkunnarnerulersinnaanissaannut højskolep atorneqarsinnaanera aamma eqqartorneqartarsimavoq. Soorlu højskolernikkut ilinniartut atuagarsornikkut pisinnaasaat pitsanngorsarlugit.

 

Tamakku tamarmik peqqussutissatut siunnersuummi pingaartillugit periarfissatut ilaatinneqarput. Eqqaamassavarput folkehøjskoleqarnermi pingaarnerpaaq tassaammat inersimasut tamanik tunngasunik ilisimasaqalernissaannik ilinniartitsisarnissaq.

 

Peqqussutissatut siunnersuummi allannguutissat pingaarnerit tassaapput højskolet aningaasaqarnerat pillugu aalajangersakkat. Aalajangersakkat taakku pillugit højskolet pisortaqarfiillu ukiuni arlalinngortuni ajornartorsiuteqartarsimapput. 1980-imiilli Inatsisartut ataatsimiittarnerini højskolet aningaasaqarnerat eqqartorneqartalereersimavoq.

 

Ilaatigut oqaatigineqartarsimalluni højskolet sulinerannut aningaasaqarnikkut aaqqissuussinissaq nassaarineqartariaqartoq. Taamaalilluni taakkua nalinginnaasumik isumatuumillu ingerlanneqassasut. Aningaasaqarniarneq piffissarujussuarmik nukinnillu atuiffigiuaannarnagu.

 

Ukiuni kingullerni nunatta avataani højskolertunut ilinniagaqarnersiuteqartitsisoqartarpoq. Nerisaqarnerup ineqarnerullu ilanngaatigereerneratigut qaammammut 1.850,00 kruunit.  Maleruagassat taakku atuussimapput oqaatsinik ilinniarfinni højskoliniittunut, taamatullu Danmarkimi timernermut nipilersornermullu højskoleniittunut. Ilinniartunut højskoleniittunut ilinniagaqarnermi tapisiasssat pillugit maleruagassat siunnersuummi uani annertuumik allanngortinniarneqarput.

 

Tassami Kalaallit Nunaanni Knud Rasmussenip Højskoleanni aammalu Sulisartut Højskoleanni peqqussut manna malillugu ilinniagaqarnersiuteqarsinnaalissammata.

 

Taamaalillutik ilinniartut nunatsinni højskoleniittut ilinniartunit Danmarkimi højskoleniittunut naligitinneqalissallutik.

 

Siunnersuummi aningaasatigut ataatsimut kingunerisassai katillugit 1 million kruuniussapput. Ilinniagaqarnersiutinut maannakkumut akiusut naatsorsuutigigaanni. Tamatuma saniatigut naatsorsuusiornermi ukioq naallugu atuaqatigiittussanut sisamanut sapaatip akunnerini 18-Naalakkersuisut sivisussusilimmik atuartussanut 40-nut ilinniagaqarnersiutit tunniunneqartarnissaat tunngavigineqarpoq. Tassa naatsorsuinermi.

 

Højskoleni marluusuni tamani atuaqatigiittussat marluiit upernaakkut ukiakkullu atuartussat.

Siunissami højskoleni tapiissutaasartussat kontomi 40.12.12 tassa Finanslovemi 40.12.12-mi højskolet marluk akornanni marlunngorlugit assigiimmik avinneqartassapput. Højskole ataaseq ukioq naallugu aningaasartuutissat naatsorsorneranni ilinniartunik 20-nik atuartoqassappat aammalu sapaatip akunnerini36-ni sammisaqartitsinissamik tapiissutissanik pissarsinissamik pisinnaatitaaffiusumik ingerlatsiviussappat.

 

Højskolet aningaasartuutissat naatsorneranni ilinniartunik 20-nik atuartoqanngippat tapiissutit ikilisinneqassapput. Ukiumut atuartuusimasut amerlassusiannut aammalu sapaatip akunneranut atuartitsiviusimasunut naleqqiullugit.

 

Taamatut oqaaseqativut siunnersuut Inatsisartuni kajumittumik oqaluuserineqarnissaanut ingerlatinneqarpoq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Naalakkersuisut Siulittaasuannut Jonathan Motzfeldtimut qujavugut. Taavalu maannakkut partiit, Kattusseqatigiit attaviitsullu oqaaseqartuinut nuuppugut.

 

Lars-Karl Jensen, Siumup oqaaseqartua.

Kalaallit Nunaanni folkehøjskolet marluusut tassalu Knud Rasmussenip Højskoleat aammalu Sulisartut Højskoleannut tunngasunik peqqussutissatut siunnersuut Naalakkersuisut saqqummiussaat Siumumiit tikilluaqqullugu imatut oqaaseqarfigissavarput:

 

Siullermik oqaatigissavarput højskolet taaneqartut ukiuni arlaqaleqisuni ingerlanneqarnerat nunatsinni inuiaqatigiinni piorsarsimassutsikkut ilinniartitaanikkut allatigullu eqeersagaanermi assut annertuumik sunniuteqarluartumillu iluaqutaanerat nuannaarutigeqigatsigu.

 

Ullumikkullu ineriartornermut peqatigitillugu aamma højskolet suliassaqarfiisa annertusarneqarnerannut naleqquttumik pequssusiorfigineqarnissaat pingaarutilittut siulersullu sulinerannut oqilisaataasussatut Siumumiit isumaqarfigilluinnaratsigu.

 

Siumumiit nuannaarutigivarput takusinnaagatsigu arlaleriaqisumik inimi maani oqallisigisartakkagut tassalu timersuutinik aammalu nipilersornermik kiisalu assassorluni kusarnartuliornernik ilinniartitsinerit højskolet ingerlassinnaasaattut periarfissalerlugit Naalakkersuisut peqqussutissamik suliaqarsimammata.

 

Siumut isumaqarpoq højskolet ilinniagaqarnermik pikkorissarnermillu ilinniagaqarfinnut allanut isernissamut piareersarfiusunik ingerlatsinerisa annertusarniarneqarnerannik siunertaqarneq ilinniagaqartut pikkorissartullu aningaasalersugaanissaannik malitseqartariaqartoq ilinniagaqarfinnut allanut pioreersunut naapertuuttumik.

 

Taamatullu ingerlatsinermi tapiissuteqarsinnaaneq uani Inatsisartutigoortumik aningaasaliissutissanut killiliussaqarnikkut pisariaqartussaassasoq. Matumani højskolet suliffeqarfittut imminut pigisutut ingerlaaseqarnissaat akornusinngikkaluarlugu.

 

Siumumiit taamatut oqaaseqarluta højskolet pillugit Inatsisartut peqqussutissaattut siunnersuut ilassilluarparput akuersaarneqarnissaalu inassutigalugu aappassaaneerlugu suliarineqannginnerani Kultureqarnermut Ilinniartitaanermullu Ataatsimiititaliamut suliassanngortinneqarnissaa kaammattuutigivarput.

 

Naimanngitsoq Petersen, Atassutip oqaaseqartua.

Peqqussutissatut siunnersuut Atassummiit oqaatigereersinnaavarput peqqussutissatut siunnersuut ullumikkut højskolet eqqarsaatigalugit peqqussummik nutarteriniarneq ullutsinnut naleqqussarneqarnissaa pisariaqartoq. Nunatsinni højskolet ingerlasut atorluarneqarnissaat eqqarsaatigalugit Atassummiit isumaqarpugut nunat issittormiut eqqarsaatigalugit højskolet nunatsinniittut nunat issittormioqatitsinnut neqeroorutiginerusariaqarigut. Højskolet ingerlanerat annertusarneqassappat.

 

Isumaqarpugut tamanna eqqarsaatigineqartariaqartoq peqqussutissatut siunnersuummi ilinniagaqarnersiutit pillugit Atassummiit oqaatigerusupparput højskolini atuarnermi assigiimmik ilinniagaqarnersiuteqartitsinissaq Atassummiit isumaqataaffigigatsigu.

 

Pissutigalugu nunatsinni højskoleni atuarneq inuttassaaleqisoqarsinnaanera pinngitsoortinneqarsinnaammat assigiimmik pinninnikkut. Taamatut naatsumik oqaaseqarluta Naalakkersuisunit peqqussutissatut siunnersuut saqqummiunneqartoq peqqussummilu aaqqissutaasussat Atassumiit akueraagut.

Olga Poulsen, Inuit Ataqatigiit oqaaseqartuat.

Nunatsinni Højskolet pillugit Inatsisartut peqqussutaat nr. 1, 16. oktober 1980-imeersoq, 1. januar 1981-imilu atortussanngortinneqarsimasup allannguuteqarnissaanut suliniuteqarsimanerup sivisuup naammassine                      qaleriartornera Inuit Ataqatigiinni nuannaarutigaarput.

 

Minnerunngitsumik Inuit Ataqatigiinniit iluarisimaarparput peqqussutip nutarterneqarnermigut ullumikkut pissutsinut malinnaatinninniarneqartunngornissaa. Tassami ukiuni ingerlasuni ilinniartitaanerup iluani allanngoriartortoqarpoq. Tamannalu pissutigalugu højskolet malinnaatinnaatinneqartuarnissaat inuiaqatigiinnut pingaaruteqarluinnarpoq.

 

Nunani ineriartortuni suniluunniit pingaaruteqarluinnarpoq inuiaqatigiit imminermut tunngassuteqartunik nalinginnaasumik ilisimasassanik annertuumik ilisimasaqarluarnissaat. Taamatut inuiaqatigiinnut tunngasunik ilisimasaqarnissamik ineriartortitsineq annertuumik nunatsinni højskoleusunut marluusunik ingerlanneqartarpoq inuiaqatigiinni inuusuttorpassuarnut iluaqutaasumik. Taamaattumik pingaaruteqarpoq taamatut naammassinnissinnaanissaminnut pitsaasunik atugassaqartinneqartuarnissaat.

 

Inuit Ataqatigiinniit Peqqussutissatut siunnersuutip ullumikkut atuuttup siunertaanik pingaartitsilluni inuiaqatigiinni ineriartorneq malinnaaffigineqartuaannarsinnaanngorlugu peqqussutissamik ilusilersuisimaneq iluarisimaarparput. Minnerunngitsumillu timersornerup nipilersornerup eqqumiitsuliornerullu aaqqissuussaanerusumik ilanngutsinneqartussaanera ineriartornerup pitsanngortinneqarnissaanut aqqutissiueqataasinnaasutut isigaagut.

 

Aammalu inuusuttut ilinniarusuttut ilinniagaqalinnginnerminni piukkunnarsarnissamut højskolenik atuisinnaalersinnaanerat. Taamaasillutillu meeqqat atuarfianni angusarisassaminnik pitsanngortitsiniarnermik ilalimmik højskolemiissinnaatitaalernissaat ilinniagaqarusussutsip annertunerulersinneqarnissaanik aqqutissiueqataasussatut isigilluinnarpagut.

 

Taamaattumik ilimagivarput siuliani taasatta ilanngunneqarsinnaanngornerisa kinguneriumaaraa højskolemi atuarusunnerup kajungernarnerulernissaa.

 

Højskoleni ilinniartunngortussanut ilinniagaqarnersiuteqartitsisalernissaq angalanissaannullu akiliuteqartalernissap Namminersornerullutik Oqartussaniit tiguneqarnissaata kingunerisassaa tassalu ilinniagaqalersussat nunatsinneersut apeqqutaatinnagu kommunerisaq akissaqarnersoq inuusuttunut amerlanerusunut periarfissiimmat Inuit Ataqatigiinni iluarisimaarparput.

 

Taassumap saniatigut isumaqarpugut ilinniagaqarniarnermut pitsanngorsaataasinnaasut suulluunniit aningaasatigut sipaarfigineqartarnissaat imaluunniit aningaasaliiffigineqannginnissaat siunissaq ungasinnerusoq eqqarsaatigalugu silatusaarnerussanngitsoq.

 

Allannguutissatut siunnersuummi §12-imi, immikkoortoq 3-mi oqaaseq siunersioreerlugu atorneqarpoq. Nalinginnaasumilli nassuiaammi oqaaseq isumasioreerlugu atorneqartussatut innersuussutigineqarluni.

 

Tassunga tunngatillugu paaserusunnarpoq oqaaseq sorleq atorneqassanersoq.

 

Taamatut oqaaseqarluta allannguutissatut siunnersuut kultureqarnermut ilinniartitaanermullu ataatsimiititaliami misissorluagassanngorlugu ingerlateqqipparput.

 

Mogens Kleist, Kattusseqatigiit oqaaseqartuat.

Qujanaq. Peqqussutip 1980-imeersup nutarterneqarnissaa nuannaarutigaarput. Taamatummi nutarterinermi nunatsinni højskolet marluusut sullissineranut pitsanngorsaanerusussaammata. Sisimiuni Knud Rasmussenip Højskoleani atuartitsisarnerit sukumiinerusumik pitsaanerusumik ingerlanneqalernissaat naatsorsuutigilluinnaratsigit taamattaaq Sulisartut Højskoleanni.

 

Ullumikkummi højskoleni ilinniartoqarniarnikkut pissutsit aammattaaq pitsaasumik kinguneqartalernissaat naatsorsuutigilluinnarpagut. Aammalu ullumikkut periarfissiissaagut ilinniartunut pitsaanerusumik tassa højskolet atorluarnerisigut ilinniartunut piukkunnarsarfiusinnaanngortillugit ammaassissagatta.

 

Nalunngilarpummi STI-mi ilinniartut ullumikkut taamaatiinnartartut ikinngeqisut. Atuakkatigut atorsarnertik pissutigalugu. Taamatut ammaassinikkut assersuutigalugu Sisimiuni højskole atorluarneratigut piareersarnerit pitsaasut ingerlanneqalertalersinnassammata.

Aammattaaq højskolet tukoq naangajavillugu ilinniartitsisalernissaannut ammaassinissat takusinnaalissagatsigit.

 

Ullumikkut assersuutigalugu Knud Rasmussenip højskoleani ukiumut ilinniartunut angalanerannut minnerpaamik 200.000-it atorneqartarput. Taamatut aaqqiiniarnermi højskolet aningaasaqarniarneranut annertuumik iluaqutaanissaat naatsorsuutigisinnaavarput. Ullumikkummi ullumikkullu aamma aammattaaq takornariaqarnermi ajornartorsiutaasartut ilaat aaqqiivigineqarnissaat aammattaaq ilimagaarput. Tassami hoteliniit oqaatigineqartarmat takornarissat amerlasuut akikinneq toqqarniarlugu højskoleni unnuisartut.

 

Peqqussutissap aammattaaq takutippaa piumasaqaatit assigiinngitsut toqqammavigalugit aningaasaliisarnissat atuutsinneqalertussanngortut. Tamanna aamma nuannaarutigaarput. Ullumikkummi periusaasarsimasut nutarterneratigut ersarinnerusumik naatsorsueriaatsit atuutilertussaammata.

 

Taamatut højskolet pikkorissarfittut atorneqalissappata ilinniartuusussanut annetuumik iluaqutaanissaat naatsorsuutigilluinnarparput. Aammattaaq højskolet siulersuisuisa anguniagaat pitsaanerusumik anguniarneqalersinnaanissaat Kattusseqatigiinnit naatsorsuutigilluinnarparput. Ingammik aningaasaqarniarup tungaatigut.

 

Piusummi suli pitsaanerusumik atorluarnerusariaqarpagut. Ilinniarnersiutinut tunngatillugu oqatigissavarput højskolenut aammattaaq kommuninut annertuumik pitsanngortitsissammata ilinniartuusut ilinniarnersiuteqalertarnerisigut.

 

Aammattaaq højskolet annertunerusumik atorluarnerulernissaat naatsorsuutigilluinnarparput. Ilinniartoqarnerup tungaatigut aammattaaq piffissamik atorluaasinnaanerat eqqarsaatigalugit.

 

Taamatut naatsumik oqaaseqarluta peqqussutissatut siunnersuut tamakkiisumik Kattusseqatigiinnit taperserlugu oqaatigissavarput. Ataatsimiititaliamullu attuumaassuteqartumut innersuussutigerusullugu. Qujanaq.

 

 

Otto Steenholdt, attaviitsoq.

Nunatsinni højskolet qanganisanngulersut, tassa aamma periaatsimikkut ullutsinni piumasanut tulluussarlugit aaqqiivigineqarnissaannit Naalakkersuisut siunnersuutaat tupinnartutut isiginngilara. Pisariaqalersimavormi. Pisariaqalersimavormi taamatut iliortariaqalerneq.

 

Højskolevut 1980-ikkunneersut periaatsimikkut nutarteriffigineqartariaqalersut ullutsinnut naleqqussartariaqalerput. Aamma kissaatiginaqaaq immaqa silarsuarmi siullersaalluti højskolenik ingerlataqarsimasut tassa qallunaat Danmarkimi taakkua højskolet ingerlaasiat ingerlattaarneqassasoq. Taakkua tassa misigisaqarluartuummata højskolet qanoq ingerlakkaanni aamma ullutsinni akilersinnaanerusumik ingerlasinnaanersut.

 

Tassa maanna saqqummiussami anguniagaat ukiuni arlaqaleqisuni ingerlarisimammatigit. Aammali isertorneqarsinnaanngilaq Danmarkimi højskolet nutarterneqartuartuummata periutsimikkut ilaatigut atuarfinnut annerusunut nuunniartunut ilinniartunut piareersarfiusarlutik. Tassa uanniit isornartussaqanngilaq. Danmarkimi aamma højskolet ukiuni makkuni periaasii alapernaallugit maani nutarterineq ingerlanneqaraluarpat.

 

Aningaasartassai qiviarlugit imannarsuunngillat. Taamaattumik siunnersuut uanga tunginninngaanniit aamma akuersaarneqarpoq.

 

Jonathan Motzfeldt, Naalakkersuisut Siulittaasuat, Siumut.

Partiit, Kattusseqatigiit aammalu ataviitsut tapersiinerat qujassutigaara. Aammalu oqaatigissavara ilumut kultur undervisningsudvalgimut atuartitaanermut kultureqarnermullu udvalgimut tassani suliassap misissoqqinneqarnissaa aamma pisariaqartinneqartoq aamma taperserpara.

 

Siumup oqaaseqartuata una Lars-Karl Jensenip oqaatigisaa maluginiarpara aammami oqaaseqartunit tamanit taaneqaraluarpoq. højskoleni maannakkut ilanngullugit timersuutit nipilersornerit aammalu assassorlutik kusanartuliornernik ilinniartitsinerit.

 

Tassunga tunngatillugu oqaatigissavara arnat atuarfiat Sisimiuniittoq højskolep ingerlatsineranut aamma peqataalluni aamma ingerlanneqartoq Arnat Atuarfiat. Taanna maannakkut siunerfigineqarmat aamma pappiaraqarfigalugu aamma ilinniarfittut atorneqarsinnaaneranik eqqarsaatit kingumut qaqeqqinneqarlutik suliarineqarnissaat.

 

Isumaqarpunga, assassorluni kusanartuliornerit kalaallit atisaliortarnermikkut kusanartuliorsinnaaneranut tunngasut eqqarsaatigalugit taamak ittoq atuarfik aamma atorluarneqanerunissaa siunnersuusiornera naammassiniarsinnaagipput allagartaqalerfiulluni.

 

Taamatullu aamma atisanik mersornikkut allagartaqarnermut aamma taamak kusanartuliornermut kalaallisut kusanartuliorsinnaaneq aamma tassani atorlugu. Atisaliornernut atorneqarsinnaanera aamma atuarfiup pappiaraqarfigalugu siunnerfigalugu taanna misissorneqarnera nangeqqissavarput.

 

Aamma oqaatigissavara ilaatigut Inuit Ataqatigiinninngaaniit oqaaseqartoq Olga Poulsenip taaserisaani. Aammalu Kattusseqatigiinnit aamma taaneqartoq tunngavigalugit oqaatigissavara højskole aamma atuarnissamut piginnaanngorsarfittut atorneqarsinnaanerannik siunnerfeqarneq § 2-mi tassani periarfissatut aamma innersuukkumaneqarmat. Tassa ulluinnani nalinginnaasumik ilinniaqqinnissamut periafissat pitsanngorsarneqarnissaannut neqerooruteqassallutik. Immikkoortoq 2-mi tassani oqaatigineqarpoq folkehøjskolemi pissutsit immikkut ittut atuutsillugit maleruagassat Naalakkersuisunit aalajangersarneqartut malillugit pisinnaatitaaffimmik pissarsisitsisumik ilinniartitsinermik neqerooruteqarsinnaapput.

 

Imaappoq allagartalerluni aamma ilinniagaqarsinnaanermut ammalugit tassani periarfissaannik innersuukkumaneqarput. Aamma Olga Poulsenip oqaatigisaa §12, 3-mi oqaaseq siunnersioreerlugu aamma isumasioreerlugumik taarserneqarsinnaaneranut tunngatillugu oqaatigissavara tassani pineqarmat kommunit tassa KANUKOKA-p aammalu direktoratip akornanni isumaqatigiinniartoqartassammat ilinniartunut tunngatillugu taava kommunip qanoq akiissuteqarnissaa aammalu uagut nammineq qanoq akiliissuteqarnissarput.

 

Tassa soorunami isumaqatigiinngitsoqarpat imaasanngilaq taava ilinniartussaq maangaannassasoq. Taamaassanngilaq. Kommuni pisussaaffilerneqarnianngikkaluarpoq kisiannili paaseqatigiinnikkut aningaasartuuteqaqatigiinnissaq tassani anguniarneqarpoq. Aamma taanna udvalgimi misissoqqinneqarsinnaamma Olga Poulsenimut taamaalillugu innersuussutigisinnaavara.

 

Taavalu aamma Kattusseqatigiinninngaanniit oqaatigineqartoq aamma oqallinnermi ulluinnarni tikinneqartartoq højskolet hotelletut atorneqarneri taaneqarmat oqatigissavara kiffaanngissuseq tassaniittoq højskolet siulersuisuisa namminneq naliliinertik atorlugu periarfissaat Naalakkersuinerminngaaniit aamma imaaliinnarlugu akuleruffiginissaa orniginanngilaq.

 

Siulersuisut namminneq taakkua højskolet namminneq siulersuisoqarlutik ingerlapput aningaasartuutissatik pilersaarusiortarpaat. Taavalu aamma qaqugu atuartut aammalu atuartuunngitsut atuarfimmik atuisinnaanerat pilersaarusiortarlugu.

 

Taanna kiffaanngissuseq pigissagaat Naalakkersuisuninngaaniit pingaartipparput. Aammalu oqaatigissavara nalunngilarput ilaatigut højskolet taakku marluk aamma suliaminnut atatillugu avataaninngaaniit tigusisarnerat periarfissanut ilaatinneqarmat. Tassa ilaatigut nammineq soqutigisaqaqatigiiffiit kikkuugaluarnersut suleqatigalugit tassuunakkut aamma aaqqissuussisarmata.

 

Sulisartut Højskoleata qangalili nunanut avannarlernut suliaqarneq. Qaqortumi neqeroorutiminut annertuumik ilaatittarpaa. Tassanilu aamma avataaninngaanneersut annertuumik tikeraartorisarlugit. Kattuffinnut allanullu peqataanerminnut ilanngullugu højskolemiinnerat... Aamma taamaattut ileqqut ileqquvut taamaattut imaaliinnarlugit unitsinnissaat kajuminnanngillat.

 

Imaappoq højskolet namminneq pilersaarusiornerminni Siulersuisunut ilaatissavaat qanoq højskolemik atorsinnaaneri nammineq piffissami atuiffiginngisaminni allanut aamma atorsinnaallugit.

 

Atassutip oqaaseqartuata Naimanngitsoq Petersenip oqaatigisamini issittormiunut neqerooruteqarnerunissat tassani aamma ujartorpai. Isumaqatiginarpoq, issittormioqatitsinnik tassani neqeroorutinut ilaatinneqartassasut højskolemi atuartarneq. Aamma taamaattoqartariaqarpoq.

 

Taamaattumillu tassuunakkut neqeroorutit taakkununnga aamma ingerlateqqinneqarnissaat Naalakkersuisuninngaaniit aamma kissaatigineqartoq, maanngaaniit kissaatigineqartoq aamma taamaalillugu saaffiginnissutissanut ilanngullugu oqaatigineqarumaarpoq.