Oqaluuserisassani immikkoortoq 28-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq aappaat, tallimanngorneq 10. maj 2002, nal 16:52
Ataatsimiinnermik
aqutsisoq: Anders Andreassen, Inatsisartut Siulittaasuata tullia, Siumut.
Ole
Dorph, Isumaginninnermut Suliffeqarnermullu Naalakkersuisoq, Siumut.
2001-imi
ukiakkut Inatsisartut ataatsimiinneranni ulluuneranni meeqqeriviit, ulluunerani
angerlarsimaffimmi paaqqinniffiit il.il. pillugit Inatsisartut
peqqussutissaattut siunnersuutip siullermeerneqarnerani arlalinnit
ujartorneqarpoq ulluunerani meeqqeriviit, ulluunerani angerlarsimaffimmi
pqaaqqinniffiit il.il. pillugit Inatsisartut peqqussutaanni siunertassatut
aalajangersagaqartariaqartoq.
Taamatut
kissaateqarneq akuersaarumallugu peqqussutip allannguutissaatut
siunnersuusiortoqarpoq. Siunertassatut aalajangersakkamik siunnersuut
KANUKOKA-mut, PIP-mut, IMAK-imut aamma meeqqerivinnut ataasiakkaanut
tusarniaassutigineqarsimavoq, taamatullu atuarfitsialammut
piareersarluarnissamut atatillugu suleqatigiissitami eqqartorneqarsimalluni.
Aammattaaq
siunersuut Naalakkesuisut isumasioqatigiisitsineranni eqqartorneqarsimavoq,
isumaginninnermut suliffeqarnermullu atatsimiititaliamit, suleqatigiissitamit
aammalu sulisartut peqatigiiffiinit marlunnit peqataaffigineqartumik.
Siunertassatut
aalajangersagaliinikkt allannguinerup saniatigut aningaasalersuinermik
aalajangersagaq ilanngunneqarpoq, tassuuna aaqqissuussaq maannakkut atuuttoq
meeqqanut inuusuttunullu ikiosiisarneq pillugu Inatsisartut peqqussutaanni
tunngaveqartoq ingerlateqqinneqarluni.
Kiisalu
allanngutissatut siunnersuutigineqarpoq 1. januar 2002 atortuulersitsinissamik
siullermik siunnersuutineqartumut taarsiullugu peqqussut 1. januar 2003
atortuulissasoq.
Siunnersuutip
2001-imi ukiakkut siullermeerneqareernerani Inatsisartut isumaginninnermut
suliffeqarnermullu ataatsimiititaliaata ulluunerani meeqqeriviit, ulluunerani
angerlarsimaffimmi paaqqinniffiit il.il. pillugit Inatsisartut
peqqussutissaattut siunersuut misissuataarsimavaa
isumaliutissiissuteqarsimallunilu.
Ataatsimiititaliami
amerlanerussuteqartut, Siumumeersut, Atassummeersoq Kattusseqatigiinneersorlu
nalinginnaasumik aalajangersakkanut allannguuinissamik siunnersuuteqarput,
imaalillugu atuarfitsialammut piareersarluarnissamut atatillugu siunniussanik
siuarsaataasunik sammisassanik meeqqanut atualertussanut tamanut
kommunalbestyrelsi neqerooruteqassasoq.
Siunnersuut
Naalakkesuisut akuersaarpaat allannguutissatulli siunnersuummi nr. 1-imi, § 1-ip allannguutissaatut ilanngunneqarpoq.
Ataatsimiititaliami
amerlanerussuteqartut taaneqareersut aamma siunnersuutigaat peqqussummi
siunertatut aalajangersagaliisoqassasoq. Siunnersuut Naalakkersuisut
akuersaarpaat allannguutissatulli siunnersuummi nr. 2-mi paragraffitut
nutaatut ilanngunneqarpoq.
Siunnersuutinut
taaneqareersunut marlunnut isumaliutissiissummi ikinnerussuteqartoq Inuit
Ataqatigiinneersoq oqaaseqaateqarpoq, oqaaseqatigiinnik allannguinissamik
aammalu aalajangersakkat paragraffinut marlunnut agguataarnerisigut
siunertamik erseqqissaanissamik, ilaatigut ulluunerani neqeroorutinut
siunertamut, ilaatigullu ulluunerani neqeroorutini meeqqat peqqinnartumik
toqqissisimasumillu perorsaanermik avatangiiseqarnissannik
neqerooruteqarnissamut.
Avatangiisit
il.il. pillugit sunnguit tamaasa ilanngullugit peqqussummi
aalajangersagaliornissamik ikinnerussuteqartup siunnersuutaa Naalakkersuisut
akuersaarsinnaanngillat. Siullermeerinermi siunnersuummi §2, immikkoortoq 3
malillugu Naalakkersuisut piginnaatitaanerat tunngavigalugu meeqqeriviit
pilersinneqarneri aamma pisatsersorneqarneri il.il. pillugit
maleruagassiornermi ikinnerussuteqartup ilanngunneqassamaarput.
Isumaginninnermut
Suliffeqarnermullu Ataatsimiititaliap isumaqatigiittup Naalakkersuisunut
kaammattuutigaa, ulluunerani meeqqeriviit siulersuisuinik pilersitsinissamut
aalajangersagaliornissamik periarfissat aammalu taakkununnga
aningaasarsiaqartitsinissamik apeqqut misissuiffigeqqullugit.
Piginnaatitaaneq
taaneqareersoq tunngavigalugu ulluunerani meeqqeriviit aqunneqarnerat
ingerlanneqarnerallugu pillugit aamma Naalakkersuisut maleruagassanik
aalajangersaasussaapput. Meeqqanik inuusuttunillu ikiorsiisarneq pillugu
Inatsisartut peqqussutaanni taamaaqataanik aalajangersagaq tunngavigalugu
kaajallaasitaqarpoq, tassani ilaatigut aalajangersagaalluni, ulluunerani
meeqqerivinni tamani siulersuisunik qiniisisoqassasoq, angajoqqaanit,
sulisunit kommunimillu aallartitaqarfiusumik.
Aalajangersakkat
taakku Naalakkersuisut ingerlateqqissamaarpaat tamatumuuna peqqussut nutaaq
tunngavigalugu aammalu nalilersussamaarlugu qanorpiaq
allannguisoqartariaqarnersoq.
Ataatsimiititaliap
KANUKOKA-mik oqaloqateqarnissamik kaammattuutaa Naalakkersuisut
malissamaarpaat aammalu ilanngullugu aningaasarsiaqartitsinissamik apeqqutip,
taamaattoqassappat meeqqerivinni ingerlatsinermi aningaasartuutaasussap
oqaloqatgiissutiginissaa.
Ataatsimiititaliap
aamma siunnersuutigaa, siunnersuummi aningaasalersuinermik
aalajangersagaqassasoq. Taamatut siunnersuuteqarneq Naalakkersuisut
akuersaarpaat allannguutissatullu siunnersuummi nr. 3-miippoq. Aalajangersagaq
meeqqanut inuusuttunullu ikiorsiisarneq pillugu Inatsisartut peqqussutaanni
aalajangersakkami atuuttumik ilaatigut ingerlateqqiineruvoq.
Ulluunerani
meeqqeriviit il.il. sananerinut tapiissuteqartarneq isumaginnittoqarfiup
aqunneqarnera aaqqissuussaaneralu pillugit Inatsisartut peqqussutaanni
taannalu tunngavigalugu isumaginninnermi sanaartukkanik ineriartortitsinissaq
pillugu kaajallaasitaq nr. 213-mi tunngavissaqareerpoq. Meeqqeriviit il.il.
pillugit Inatsisartut peqqussutissaattut siunnersuutip saqqummiunneqarnerani
tamanna allannguuteqanngilaq.
Namminersornerullutik
Oqartussat meeqqerivinnik ingerlatsinermut tapiissuteqarsinnaanerannik
aalajangersaq tamatumuuna ilanngunneqanngilaq. Oqaaseqatigiit atuuttut
paatsoorneqartarsimapput, kommunit ataasiakkaat isumaqarsimagamik
aalajangersakkamut tassunga innersuussillutik ulluunerani meeqqerivinnik
ingerlatsinermut aningaasanit immikkoortitanit tapiiffigineqarnissaminnik
qinnuteqarsinnaallutik. Tamanna aalajangersakkami siunertaasimanngilluinnarpoq,
tassami ulluunerani meeqqerivinnik ingerlatitsinermut tapiissutit kommuninut
ataatsimoortumik tapiissutini ilaareermata. Tamanna maannamut
suleriaasiusimasumut aammalu Namminersornerullutik Oqartussat KANOKOKA-llu
tamatuminnga nammaqatigiinnissamik sulissanillu agguataarinninnissamik
isumaqatigiissutaannut naapertuuppoq.
Ataatsimiititaliap
isumaliutissiissutaaniippoq immikkoortoq ataaseq ilinniartitaanermut tunngasoq,
ataatsimiititaliap Naalakkersuisunut kaammattuutigisimammagu ulluunerani
meeqqerivinni suliaqarfinni ataasiakkaani sulisorineqartut aningaasarsiaasa,
sulinerminni atugarisaasa aamma ilinniagaqaqqinnissaasa
pingaartinneqartuarnerisigut sulisorisat sulisoriinnarnissaat KANOKOKA
suleqatigalugu ingerlaavartumik sulissuteqqullugu.
Tassunga
atatillugu 2001-imi ukiakkut Inatsisartut ataatsimiinneranni
aalajangiiffigisassatut siunnersuuteqartoqarneratigut isumaginninnermut
tunngassuteqartunik ilinniarsimasut sulinerminni atugarisaannik misissuineq
ingersoq Naalakkersuisut innersuussutigissavaat. Naatsorsuutigineqarpoq
misissuineq qaammatialunnguit qaangiuppata naammassineqassasoq inerneralu
2002-mi ukiakkut Inatsisartut ataatsimiinneranni saqqummiunneqassamaartoq.
Tamatuma
kingorna nalilersuisoqassaaq, isumaginnnnermi qanoq immikku
iliuuseqartoqassanersoq, ilanngullugit ulluunerani meeqqeriviit aamma
ulluunerani angerlarsimaffinni paaqqinniffiit. Ilinniartitaanikkut
iliuuseqartoqassappat iliartitaanermut pisariaqartitanik ataatsimoortumik
naliliineq aallaavigalugu tamanna pisussaassaaq.
Tamatuma
saniatigut qanittumi PIP-mut ukiunut pingasunut isumaqatigiissuteqarneq,
illuatungeriinnit iluarisimaarneqartoq Naalakkersuisut innersuussutigissavaat,
naatsorsuutigineqarpormi pitsaanerusunik aningaasarsiaqartitsineq
perorsaasutut ilinniarsimasut ilinniarsimasaminnik suliaqaannarnissaannik
kaammattueqataajumaartoq.
Naalakkersuisut
neriuutigaat ataatsimiititaliap aalajangersakkanut ataasiakkaanut oqaaseqaatai
naammaginartumik oqaaseqarfigisimassallugit.
Imumaginninnermut
suliffeqarnermullu ataatsimiititaliami amerlanerussuteqartut Siumumeersut,
Atassummeersoq Kattusseqatigiinneersorlu inassuteqarput amerlanerussuteqartut
kaammattuutaannut naapertuuttumik Naalakkersuisut allannguutissatut
siunnersuummik saqqummiussereerpata siunnersuut iluserisani iluseralugu
akuersissutigineqassasoq, ataatsimiititaliamili ikinnerussuteqartoq Inuit
Ataqatigiinneersoq inassuteqarpoq ataatsimiititaliap isumaqatigiittup aamma
ikinnerussuteqartup kaammattuutaanut naapertuuttumik Naalakkersuisut
allannguutissatut siunnersuummik saqqummiussereerpata siunnersuut iluserisani
iluseralugu akuersissutigineqassasoq.
Amerlanerrussuteqartut
allannguutissatut siunnersuutaat Naalakkersuisut akuersaarpaat.
Naalakkersuisut
taamatut oqaaseqarlutik siunnersuut Inatsisartunut suliassanngortippaat.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Maannalu partiit, Kattuseqatigiit attaviitsullu oqaaseqartussaat
oqaaseqassapput, siulliulluni oqaaseqassaaq Ruth Helmann, Siumut,
tulliukkumaarpoq Godmand Rasmussen, Atassut.
Ruth Helmann,
Siumup oqaaseqartua.
Qujanaq.
Ulluunerani uagut allakkatigut meeqqeriviit tassa
paaqqinniffiusussaasut suli taanna allanngortinneqanngikkaluartut uagut
meeqqeriviit atorparput, taanna erseqqissaatigissavara.
Ulluunerani
meeqqeriviit, ulluunerani angerlarsimaffimmi paaqqinniffiit il.il.
Inatsisartut peqqussutissaattut siunnersuut.
Inatsisartuni
isumaginnermut suliffeqarnermullu ataatsimiititaliap isumaliutissiissutaa
Siumumiit tamakkiisutut piumasaaqaatitsinnullu naapertuuttumik suliaasutut
isumaqarfigaarput.
Ulluunerani
meeqqeriviit, ulluunerani angerlarsimaffimmi paaqqinniffiit il.il. pillugit
Inatsisartut peqqussutaani Naalakkersuisut ukiakkut 2001-imi peqqussutissatut
saqqummiussaata maannakkut aappassaaneerneqarnerani iluarsiissuteqarlunilu
ilassutissatut siunnersuutaasut Siumumiit oqaaserisatsinnut naapertuuttumik
suliaasutut isumaqarfigigatsigit. Naalakkersuisut taamatut akissuteqarlutillu
Inatsisartunut saqqumiussaqarmata nuannaarutigalugu qujassutigaarput, imatut
ilassutissiisoqarniarmat.
Atuarfitsialammut
piareersarluarnissamut atatillugu siunissami siuarsaataasunik sammisassanut
meeqqanik atualertussanut tamatut kommunalbestyrelsi neqerooruteqassasoq.
Taamatut
oqaasertaliinissaq pingaaruteqarluinnartuuvoq, meeqqamut qitiutitsinermut
suliniuteqarnermut naapertuulluinnartuulluni. Meeqqamut atualertussamut,
meeqqap mikineraniit siunissaanik qaamanerusumik atugaqartitsinissamut
qulakkeerinninniartuulluni.
Naalakkersuisut
taamatut atualernissamut piareersarfiusussamut siunnerfiusussamut piaartumik
ilisimasaqarluartunik attuumassuteqarluartunillu suleqatigiissitaliornerat
iluarinartuuteqaarput. Ilami nalunngilarput kommunini tamani pingaarutilittut
isigineqarluni meeqqerivinni atuarfinnilu ingerlatsisoqartoq allaat
siuarsimalereersunik ilaqarlutik. Tamanna Siumumiit iluarinartuuteqaarput.
KANOKOKA,
PIP., KIIIP, ISP, IMAK attuumassuteqartullu suliamut tunniussimalluarlutik
anguniagaasumullu naapertuutumik suliniarnerminnik paasissutissiilluartumik
ataatsimiititaliamut tunniussaqarluarnerat matumuunakkut qujassutigissavarput,
siammasissumillu suliniuteqarniarnerat pillugu tapersersuissaagut,
isumalluarfigaagullu angusaqarluarumaarnissaannik.
Atuarfitsialammut
piareersarluarnissaq Siumumiit pingaarteqaarput, taamaattumillu
meeqqerivilitsiammi meeqqap tamatigut periarfissinneqarnissaminik
aallaaveqartumik neqeroorfigineqarsinnaanissaannik ineriartortitsinissamik
toqqammaviliinissaq qangali Siumumiit pisariaqarluinnartutut
oqaatigisaratsigut, maanna Atuarfitsialaap peqqussisiornerani ataqatigiissumik
ineriartortitsinissamik ammaassisoqarnera Siumumiit nuannaarutigingaarparput,
pissusissamisoorluinnartutullu isumaqarfigalutigut.
Meeraq
naartuunerminit namminiilernissaminut tamakkiisumik
angajoqqaajusunut akisussaaffigineqarpoq, taamaattumik pingaaruteqarpoq
naqissusissallugu ulluunerani neqeroorutit angerlarsimaffimmi meeqqamut
perorsaanermut tapertaaginnartussaanerat.
Siumumiit
pingaarteqaarput meeraq angerlarsimaffeqartinneqassasoq nammineq ungagisaanik
nuannarisaanillu. Meeraanermi angerlarsimaffik tassaammat meeqqap sorlaqarfia,
peruleqqaarfia nammineersinnaalernissamut tunngavik.
Ullumikkut
suliffeqarnerup nalaani pingaaruteqarluinnarpoq meeqqat inuusuttaqqallu
innimiiginnartinneqannginnissaat. Meeqqat inuusuttullu
piginnaatitaaffigimmassuk naalagaaffiit peqatigiinni isumaqatigiissutaasut
naapertorlugit tamarmik isumagineqarnissaat inersimasunik isummersorneqarlutik
inerikkiartorneranilu tapersersorlugillu ilitsersorneqarnissaat.
Taamaattumik
taamatut anguniagaqarnermi pingaarluinnarpoq ulluunerani meeqqeriveqarnikkut
atuarfeqanikkut ulluuneranilu paaqqinniffeqarnerup ataqatigiissumik
susassareqatigiittumillu ikioqatigiiffiusumillu ingerlaaseqalernissaanik
aqqutissiuussinissaq.
Soorlu
nunatsinni atuartitsinikkut perorsaanikkullu misigisartuup oqaatigisaattut
issuaalaarpunga: Meeraq ataatsimut isigalugu attuumassuteqartut tamarmik
imminnut naleqqussakkanik pilersaarusiooqatigiinnissaat angerlarsimaffik,
atuarfik, meeqqerivik, inunnik isumaginnittoqarfik ilaatigullu allat
peqatigilluarnissaanik isumaqartoq.
Taamatut
isumaqarneq Siumumiit isumaqartigilluinnarparput.
Aqagunnguaq
Atuarfitsialammi peqqussut akuersissutigissavarput. Siumumiillu isumaqaratta
pingaaruteqartoq Atuarfitsialammi angajoqqaat, ilinniartitsisut meerarlu
peqataatilluinnarlugit pilersaarusiooqatigiillutik ingerlatsinissaannik
ullumikkornit suli annertunerusumik kajumissuseqartumik ingerlanissamut
tapertaliisussaasoq, tassani siulersuisuusut ajunngitsorsiaqartitaanissaanik
periarfissaanissaq isumaqartilluinnarparput.
Angajoqqaat
meeqqeriveqarnerup ingerlatitaanerani oqartussaaleqataalernerulernissaannik
kajumilersitsinerulernissamik siunertaqartutut tamanna isumaqarfigigatsigut.
Taamatuttaaq
tamanna meeqqeriveqarnermi pingaartigisutut isumaqarfigigatsigut,
meeqqerivitsialammi siulersuisut taamatut
ajunngitsorsiaqartitaasinnaalernissaanik Naalakkersuisunut KANOKOKA-mullu
misissueqqusinerput Naalakkersuisunut nalilersorniarneqarmat pissangalluta
utaqqissavarput.
Siumumiit
nalunngilarput meeqqeriveqarnikkut ineriartortitsineq ilaatigut
kingunissaasumi aningaasaliissuteqarnikkut ingerlalersimasoq, tamanna pillugu
Siumumiit isumaqarpugut aningaasalersueriaaseq ersarinnerusumik
isummersorfigineqartariaqartoq, KANOKOKA-p Namminersornerusullu akornanni.
Tassami isumaginninnikkut iluarsaaqqinnermi ataatsimiititaliarsuup
kaammattuutigimmagu 2005-imi meeqqat paaqqutarineqarnerat illoqarfinni
nunaqarfinnilu 80%-it angusimassagaat. Ullumikkut 61% missaaniinnerangaammat,
taamaattumik tassuunakkut eqqumaniarnissaq Siumumiit pingaarluinnartutut
isumaqarfigaarput.
Siumumiit
isumaqarpugut meeqqat paaqqutarineqarnerat kommunimiit nakkutigineqarluartumik
ingerlanneqarnissaa pingaaruteqartoq, aammalu ilinniarsimasunik perorsaasunik
sulisoqarnissaq ilanngullugu pingaaaruteqarluinnarluni.
Ajoraluartumik
ullumikkut tassuunakkut sulisorisassat ilinniarsimasut aamma
amigaataalluinnarput, tamannalu meeqqat inuusuttullu pitsaasumik
sullinneqarnissaanik siunertarisaasumik naapertuutinngitsuuvoq.
Taamaattumik
Siumumiit kaammattutigeqqissavarput nunagisaq qimannagu
isumaginnittunngorniarnermi ilinniarnissamik neqerooruteqarnerup aamma
nunaqarfinni illoqarfinnilu pimoorussaasumik sineriak tamaat isumagalugu
ingerlanneqarnissaa pisariaqarluinnartutut isumaqarfigaarput.
Siumumiit
taamatut oqaaseqarluta anguniakkatsinnik naapertuuttumik angusaqartutut
misigisimalluta nuannaarlutalu peqqussutissat amerlanerussuteqartut
Kattusseqatigiillu isumaat naapertorlugu pingajussaaneernissaminut taamatut
isikkoqarluni ingerlaqqinnissaanut akuerseqataassaagut. Qujanaq.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Tulliulluni
oqaaseqassaaq Godmand Rasmussen, Atassut, tulilukkumaarpoq Asii Chemnitz Narup
Inuit Ataqatigiit.
Godmand
Rasmussen, Atassutip oqaaseqartua.
Ulluunerani
meeqqeriviit, ulluunerani angerlarsimaffiit paaqqinniffiillu il.il. pillugit
Inatsisartunut inatsisissamik Atassummit naatsummik imatut
oqaaseqaateqassaagut.
Siullermillu
oqaatigeriissavara Naalakkersuisut akissutaat isummatsinnut assortuutinngimmat
takisuuliorusussimannginnama.
Soorluli
naluneqanngitsoq Inatsisartut ukiakkut 2001-imi ataatsimiinneranni qulaani
pineqartup ujartorneqarnera tunngavigalugu aalajangersakkami peqarnissaa
isummiineqarsimavoq.
Oqaatigereerlarali
siunitsinniilli arlaleriarlutik ataatsimiinnerpassuit atorlugit
assigiinngitsunillu susassaqartunik Naalakkersuisunillu naapitsiffiusimammata.
Aammattaarlu pineqartumut Atuarfitsialak attuumassuteqarsimalluni
ilimaneqartutuummi 1. januar 2002-mi atuutilernissaa
siunniunneqarnikuugaluarmat. Sussaqartunilli assigiinngitsunut tusarniaanerat,
tamannalu peqqissaartumik suliap naammassineqarnissaanut aallaavit
ilagisimallugu.
Taamaattumilli
1. januar 2003-mut atuuttussanngorlugu siunnersuutaasimalluni. Taamaattumik
ataatsimiititaliaq sinnerlugu kikkut tamarmik pineqartumut
attuumassuteqarlutik suleqataasimaneranut qutsavigerusuppakka,
minnerunngitsumilli Atassummi, Siumumi Kattusseqatigiinnilu
ataatsimiititaliami amerlasooruteqartuartut qutsavigerusuppakka
tapersersuinerannut.
Naalakkersuisut
tapersiinerat ataatsimiititalimittaaq qujassuteqarfigerusuppara.
Atassummiit
taamatut oqaaseqarluta ataatsimiititaliami amerlanerussuteqartut siunniussaat
aallaavigalugu taaseqataasaagut.
Anders
Andreassen, ataatsimiinnermik aqutsisoq, Inatsisartut Siulittaasuta tullia,
Siumut.
Qujanaq.
Tulliulluni oqaaseqassaaq Asii Chemnitz Narup, Inuit Ataqatigiit,
tulliukkumaarpoq Loritha Hendriksen Kattusseqatigiit.
Asii
Chemnitz Narup, Inuit Ataqatigiit oqaaseqartuat.
Qujanaq.
Ulluunerani paaqqinnittarfeqarneq il.il. peqqussutissatut siunnersuut maanna
aappassaaniiganngorlugu Inatsisartunut saqqummiunneqarpoq.
Isumaginninnermut
ataatsimiititaliaq isumaliutissiisiorpoq.
Inuit
Ataqatigiit ikinnerussuteqarluta oqaaseqaateqarpugut, taakkulu tunngavigalugit
taasinissarput matumuuna nalunaarutigaarput.
Inuit
Ataqatigiit isumaqartuarsinnarput meeqqat inuusuttuaqqallu inuuiaqatigiinnit
iliuuseqarfigineqarnerat tamanut sammisuullunilu anguniagaqarfiullunilu
ataqatigiissagaasariaqartoq, pingaarnertullu anguniaagaasariaqartoq meeqqap
naartunerminit inersimasutut inuulernissaata ataqatigiissutut ingerlalernissaa.
Inuit
Ataqatigiit isumaqartuarsinnarput meeqqap ukiuni inuuffigisaani siullerni
pingasuni-tallimani atuarfimmi aallartilluarnissaa
tunngaviliigineqartartoq.
Taamaammat
Inuit Ataqatigiit kissaatigalugulu piumasaraarput paaqqinniffinnut
tunngassutigut sulinermut ulluunerani paaqqinnittarfiit ulluunerani
angerlarsimaffinni paaqqinninneq il.il. pillugit Inatsisartut
peqqussutissaattut siunnersuusiorneq sioqqullugu sukumiisumik
iluarsartuussisoqartariaqartoq. Inuit suliamut attuumassutillit angajoqqaat
Naalakkersuinermullu suliallit inatsinniit tamarmeersut peqataallutik
Atuarfitsialaap aaqqissuunneqarnissaanut piarersaasiornerup assinganik
periuuseqarluni.
Taamatut
suleriaaseqarnerup ullunerani paaqqinnittarfiit atuarfiullu akornanni meeqqat
ikaarsaasernissaasa pitsaanerusumik pinissaa qulakkeertissimagaluarmagu.
Taamatut
isumaqarneq naliliinerlu inuit suliamut attuumassutilippassuit isumaqatigaat.
Inuit
Ataqatigiit naliliipput siunnersuut saqqummiunneqartoq kissaatigisatsinnik
piumasaqaatitsinnillu eqquutsitsisuunngitsoq.
Inatsisartuni
ilaasortaqatitsinnut malugeqqussavarput allannguutissatut siunnersuutit
tusarniaassuteqarmata, tusarniaanermili ullut 14-iinnaat akissuteqarnissamut
periarfissaasimammata.
Taamatuttaaq
malugineqartariaqarsorivarput ikittuinnaat tusarniaavigineqarsimammata.
Paatsuunganartipparput
sooq Naalakkersuisut allannguutissatut siunnersuummut nassuiaatimini oqarmat
tusarniaanermi pissuteqartoqarsimanngitsoq.
Peqqussutissatut
siunnersuutip akuersissutigineqarnerata kingunerissavaa meeqqat suli
atualinngitsut 4-6-nik ukiullit tamarmik atualernissaasa pitsaasumik
aallartinnissaa anguniarlugu suliniutinik neqeroorfineqartassasut.
Matumani
taamaalilluni pineqarpoq meeqqanut suli atualinngitsunut pisortat
neqeroorutaasa amerlineqarnissaat.
Inuit
Ataqatigiit isumaqarpugut siunnersuutip matumuuna aningaasatigut
sulisoqarnikkullu kingunerisassat pillugit naammaginartumik
erseqqissaasoqarsimanngitsoq.
Paasinarpoq
KANOKOKA-p aamma naatsorsuutigigaa peqqussut atulerpat pikkorissaanissat
pisariaqassasut.
Naalakkersuisut
suleqatigiissitaliorput suliamut tunngatillugu meeqqat 4-6-nik ukiullit
tamakkerlugit atualernissamut pitsaasumik piareersarneqarnissaanik
qulequtalimmik.
Suleqatigiissitaq
2000-imi november-ip naalernerani pilersinneqarpoq, ukioq mannalu maj-ip
naalernerani suliani naammassissallugu, suli sapaatit akunneri 2-3 taanna
suleqatigiissitaq sulisussaavoq.
Taamaalilluni
suleqatigiissitap suliani naammassisimanngilaa. Inuit Ataqatigiit
isumaqarpugut suleqatigiissitap kaammattuutaa tamakkerlugit Isumaginniinermut
Ataatsimiititaliap isumaliutissiissusiornerani tunngaviutinneqartariaqartut.
Taamatummi
suleriaaseqarnermi taakkua suleqatigiissitat aamma ataqqillugit
nalunaarnerussammat, kisianni suli tassa suliani naammassinngikkaa matumani
Inatsisartuniit piareerneqarumavoq suliaq.
Taamaammat
Inuit Ataqatigiit tungaanniit inassutigaarput peqqussutissatut siunnersuutip
pingajussaaneerneqarnissaa Inatsisartut ukiamut ataatsimiinnissaannut
kinguartinneqassasoq.
Taamatut
inassuteqarnitsinnut aamma peqqutaavoq Isumaginninnermut Ataatsimiititaliap
isumaqatigiittup Naalakkersuisut kaammattormagit ulluunerani paaqqinniffinni
siulersuisoqarnissaa pillugu KANOKOKA paaseqatigalugu peqqussummut
allannguutissamik siunnersuummik saqqummiussaqaqqullugit, Inatsisartut ukiamut
ataatsimiinnerani.
Inatsisartunit
peqqissaartumik torersumillu sulinissap anguniarnissaa salliuteqqullugu
ilaasortaqatitsinnut matumuuna kaammattuutigissavarput, peqqussutissatullu
siunnersuutip ukiamut pingajussaaneerneqarnissaa akuersaaqqullugu.
Naalakkersuisut
allannguutissatut siunnersuutaannut Inuit Ataqatigiit allannguutissatut
siunnersuuteqarpugut, taakku pingaarnersiorlugit naatsunnguamik
oqaaseqarfigilaassavagut.
Malugeqqussavarput
Inuit Ataqatigiit tungaanniit ulluunerani paaqqinnittaqarfeqarnerup
neqeroorutaata suuneranik oqaasertalerniarneqarneranni pingaartissimagatsigut
meeqqat meeqqerivimmiittartut paarineqaannarnatik tassa
illusimatinneqaannartanngimmata, aamma isumassorneqartarnerat
isumagineqartarnerallu ersissinniassallugu.
Taamatuttaaq
pingaartipparput meeqqamut timikkut eqqarsartaatsikkullu piginnaanikittunut
allatigulluunniit tapersersorneqarnissamik pisariaqartitsisunut
kommunalbestyrelsit neqerooruteqarnissamik pisariaqartitsineq immikkut
eqqumaffigissagaat.
Inuit
Ataqatigiit allannguutissatut siunnersuuteqarpugut meeqqeriveqarnerup
siunertaanut tunngaviinullu.
Isumaliutissiissummi
atuarneqareermata maanna uteqqissanngilagut taakkulu tamakkiinerusutut
isumaqarfigigatsigit ikinnerusuteqarluta oqaaseqaaterput naapertorlugu
taasissasugut oqaatigissavara, kisianni malugeqqulaassavara immikkut
piumasarisimagaluaratsigut malittarisassatigut erseqqissarneqassasoq
meeqqeriviit avatangiiseqarluartitsinikkut meeqqanut qulakkiissagaat meqqat
peqqissusiat. Taanna asuliinaanngitsumik tikkuarparput peqqutigalugu siorna
nakorsaq Preben Hormømik atillip doktorinngorniutigisimammagu nunatsinni
meerartatta siulluttarnerujussuat. Meerarpassuit allaat pingasuniit
arfineq-pingasut tungaanut ukiullit siullunnermik nappaateqarput, taavalu
aamma taakkua meeqqat tallimaagaangata ataatsip tusaasai
annikillereersimallutik 5-14-llu akornanni ukioqalernermi.
Assigiinngissutigut
tusaasat annikittut taakkua kinguneqarluttarput meeqqat inuuneranut.
Taavalu
ilanngullugu pitsanngorsaatissatut tikkuaavigisimavaa meeqqeriviit
paaqqinnittarfiit illutaasa pitsannngorsaavigineqartariaqarnerat aamma meeqqat
meeqqerivinni tattoqisaappallaarnerat, kisianni Naalakkersuisut taanna
ilassilluanngimmassuk tusaatissatut tiguarput, aamma oqartariaqarpugut
pitsanngorsaatinik taanatut tigussaasunik suliniuteqarniarnermi
kiserliornakulussinnaasarmat.
Taava
Inuit Ataqatigiit tassa oqaasissagut tassuunga naagallassavakka, taamatullu
oqaaseqarpugut ulluunerani paaqqinnittarfiit ulluunerani angerlarsimaffinni
paaqqinninneq il.il. pillugit Inatsisartut peqqussutissaattut siunnersuutip
aappassaaneerlugu Inatsisartunut oqaluuserineranut.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Tullinnguulluni oqaaseqassaaq Loritha Hendriksen, Kattusseqatigiit,
tulliukkumaarpoq Otto Steenholdt, attaviitsoq.
Loritha Hendriksen, Kattusseqatigiit oqaaseqartuat.
Ulluunerani paaqqinnittarfiit ulluunerani angerlarsimaffinni paaqqinnittarfiit il.il. pillugit inatsisissatut peqqussutissatut siunnersuut.
Kattuseqatigiinniit siullermeerneraniit malinnaaffigilluarsimallugu peqquutissamut siunnersuut imatut oqaaseqarfigissavarput.
Kattusseqatigiinniit oqaatigissavarput Atuarfitsialak oqallisigineqalermalli annertuumik aallaqqataaniilli soqutigalugu malinnaaffigisimagatsigut. Soqutiginninnerlu minnerulersimanngilaq oqallittarninni meeqqeriviit aamma ilanngunneqarnissaat pisariaqartutut tikinneqarmat.
Oqallittarnini sukumiisumik tamavinni aaqqiinissaq pisariaqartissinnaavarput, meeqqammi siunissamup annertuumik aamma taanna attuumassuteqarmat.
Ataatsimiititaliamiit piffissaq annertooq atorneqarsimavoq sukumiisumillu attuumassuteqartut susassaqartullu aamma tusarniaaffigineqartarsimapput, ataatsimeeqatigineqartarsimallutillu.
Mannalu annertuumik sukumiisumillu paasissutissanik tunniussisarsimanerat pitsaasutut taarusupparput.
Iluarisimaarlugu oqaatigerusupparput Naalakkersuisut immikkut suleqatigiissitamik sulisussamik attuumassutilimmik pisarialinnut suleqatigiissitaliorsimammat. Suleqatigiissitamilu peqaataasut aamma ilaqartinneqarsimallutik innarluutillit angajoqqaavinik, taamaalillutik meeqqat ulluunerani paaqqinnittarfinni tamavinni pineqartut qanittumik tamakkiisumillu attumassuteqartut peqataatinneqarsimallutik. Taakkualu ataatsimeeqatigiinninnermi annertuumik ataatsimiititaliamut paasissutissanik kusanartunik tunniussaqarsimanerat nuannaarutigaarput. Tamani qujanaqaaq.
Aammattaaq qularutissaanngitsumik isumalluarnartumillu siunissamik pitsaasumik meeqqanut sullissinissamut paasissutissanik atorluarneqarsinnaasunik tunniussisimapput.
Tassanimi siunertaammat meeqqat 4-niit 6-nut ukiullit sapinngisamik tamakkerlugit atualinnginnerminni pisinnaasaat sukumiisumik sapinngisamillu tamakkiisumik pitsaasumillu anguneqarnissaa, tassuuna qulakkerneqartussanngormat.
Taamaalillutik siunissami patajaatsumik meeqqat atuarfimmut appakaatinnginnermini pitsaasumik periarfissaqarnerat anguneqartussaalluni.
Kattusseqatigiinniillu anguniagaraarput meeqqat assigiimmik immikkoortitaanatik sutigut tamatigut pitsaasumik atugaqartinneqarnissaat anguniarlugu sulinissaq meeqqat pineqartut pisariaqartitaat aallaavigalugu.
Kattusseqatigiinniit pingaartinneqartoq aaamma iluatsillugu oqaatigerusupparput, tassalu meeqqat naartuunermininngaanniit sullinneqarlutik aallartinneqartarnissaat anguniarnissaa pingaaruteqarluinnartutut isigigatsigut, taarusupparputtaaq.
Tassanilu meeqqap siunissami pitsaasumik atugaqartitaanissaa patajaatsumillu aatsaat anguneqarsinnaammat angajoqqaat suleqatiginerasigut.
Taamatut naatsumik oqaaseqarluta siullermeernermi oqaaserisagut innersuussutigalugit aappassaaneernera akuersinissarput taaseqataaffigissavarput, pingajussaaneerneralu taaseqataaffigeqqissallugu.
Anders Andreassen, ataatsimiinnermik aqutsisoq, Siulittaasup tulliata aappaa, Siumut.
Qujanaq. Tulliulluni oqaseqassaaq Otto Steenholdt Attaviitsoq.
Otto Steenholdt, attaviitsup.
Ullumi oqaluuserisatta ilaanni eqqaavakka ulluunerani meeqqeriviit ulluunerani angerlarsimaffinni paaqqinniffiit il.il. Namminersornerullutik Oqartussat kisimiillutik aallartissimanerat assuarilaarlugu, utaqqigallarsimasariaqartutut nalilerlugit. Tassa KANOKOKA-p taamanikkut saaffigineqarluni ilaajumasimannginnera aamma pissutissaqarluarluni uniffiginagu ingerlaannarsimavoq, kisiannili kukkunersiuisartunit aamma oqaatigineqarluni tamanna aningaasanik annertuumik akeqaratarsinnaasoq, tassa Landskarsi kisimiilluni tamakkua ingerlatissappagit.
Qujanartumilli nalunngilarput aappaaguminngaanniit kommuni sassassasoq, tassalu akilersuinikkut tamanna assorujussuaq oqiliallaataassaaq, ilami kommunit allaat kisermaasillutiluunniit tamanna akilersortassatut isikkoqartilermassuk.
Peqqussutissatut siunnersuut tusarniaasutigineqarluarsimavoq, tassa peqqussutissamut attuumassuteqarluartunut uanga taakkua naammagisimaarinninnerat tunaartariumavara. Peqqussut suli misissorluarneqarnissaminut ukiumik ataatsimik kinguartinneqarpoq, atortuulissalluni 1. januar 2003.
Naalakkersuisut ataatsimiititaliani amerlanerussuteqartunut paasinnillutik tusarniarsimanerat isumaqatigaara. Ikinnerussuteqartut isorigalugit tikkuagaat isumaqarpunga imannarsuunngitsut, tassami KANOKOKA Namminersornerullutillu Oqartussat nammaqatigiissapput, tamannalu aamma uanninngaanniit naammagisimaarneqarpoq.
Taamatut naatsumik oqarlunga saqqummiussaq ilalersorpara.
Anders Andreassen, ataatsimiinnermik aqutsisoq, Inatsisartut Siulittaasuata tullia, Siumut.
Qujanq. Tulliulluni akissuteqassaaq Isumaginninnermut Suliffeqarnermullu Naalakkersuisoq.
Ole Dorph, Isumaginninnermut Suliffeqarnermullu Naalakkersuisoq, Siumut.
Qujanaq. Partiininngaanniit Kattuseqatigiinniit aamma attaviitsuninngaanniit oqaatigineqartut Naalakkersuisut sinnerlugit qujassutigissavakka, aamma oqaatigissavara una suliassaq, soorlu aamma tamanut oqaatigineqareersoq siorna Inatsisartunit siullermeerneqarsimavoq, aammalu aappassaaneerneqarnissaa Inatsisartunit aamma maannakkkumut suliarineqartussanngorlugu kinguartinneqarsimalluni. Tassuunga kinguartitsinermut pissutaaqataanngitsoorsimanngilaq Isumaginninnermut Suliffeqarnermullu Ataatsimiititaliap kissaatigisimammagu peqqussutissaq una nutaaq ersarissumik siunertaqassasoq, aammalu tamanna takunerqarsinnaavoq massakkut sapinngisaq naapertorlugu suliarineqarsimasoq, aammalu naammassineqarsimasoq.
Aammalu siullermik oqaatigissavara una kalaallisuuani qulequtsiunneqarsimasoq ulluunerani meeqqeriviit ulluunerani angerlarsimaffinni paaqqinniffiit il.il. pillugu Inatsisartut peqqussutaata siunnersuut. Tassa una allanneqareersimanerata meeqqeriviit, siusinaarpallaarumik taanna allataasimavoq, qanittukkut paasivara. Tassa ulluunerani paaqqinnittarfiit suli taanna taaguutigivaa, kisiannili ulluunerani meeqqerivinnut atip taasumap allanngortinnissaa pingajussaaneernissaanut allannguutissatut siunnersuummik Naalakkersuisuninngaanniit saqqummiussissuugut.
Kiisalu aamma oqaatigissavara oqaatigineqaraluartoq tusarniaanermi akissuteqartoqarsimanngitsoq, kisianni tusarniaanermi akissutit arlalialunnguit pissarsiarineqarsimapput, soorlu Aasiaat Kommunianinngaanniit, Isumaginnittoqarfimminngaanniit aamma Børnehave Aanikasimminngaanniit, PPR Nuumminngaanniit, Fritidshjem Aqqalumminngaanniit maani Nuummi, IMAK-i akissuteqarsimavoq aammalu KANOKOKA akissuteqarsimalluni. Taakkulu tusarniaanerit aammalu akissutaat aamma siunnersuusiarineqarsimasumi ilanngunneqarsimapput.
Taava taamaasinnarlunga partiininngaanniit oqariartuutit oqaaseqarfigilaassavakka, tassa siullermik Ruth Heilmann-ip oqaaserivai una siunnersuusiarineqarsimasoq pitsaasumik suliarineqarsimasoq, aamma siunnersuusiarineqarsimasumi meeraq atualinnginnerani taamannak periarfissinneqarnissaa, meeqqeriviillu aqqusaarsinnarlugit atuarfimmut ikaarsaarluni atualernissaa taamaalilluni anguneqarsimasoq. Taanna nuannaarutigaara tusarlugu, aamma ilumoorpoq una peqqussutissatut siunnersuut ukiup ilarsua suliarineqarsimavoq ataatsimiititaliuutitineq aqqutigalugu, kiisalu aamma upernassaq ingerlanerani isumasioqatigiissitsisimavugut, taasumalu peqqussutip qanoq siunertaqarnissaa taamaalillugu inuit assigiinngitsut aamma assigiinngitsunik aggerfeqartut suleqatigalugit sapinngisamik naapertorlugu suliariniarsimallugu.
Aamma oqaatigineqarpoq ataqatigiissumik ineriartorneq ingerlanneqassasoq, taanna meeqqerivimminngaanniit meeqqat atuarfianut ikaarsaarnissaannut atugassarititaasullu aamma meeqqerivimmi sammisassani assigiinngitsunut taanna atatinneqartoq aamma uanga iluarisimaarpara.
Aamma uani taaneqarpoq soqutiginartoq, tassa meeqqeriviit siulersuisui qanoq ilillutik skolebestyrelseqarneratulli aningaasarsiaqartinneqartalersinnaanerannut periarfissamik Naalakkersuisut kommunilu oqaloqatigiinnissaat, taanna aamma Naalakkersuisuninngaanniit suliarissavarput. Tassa nalunngilarput ajoraluartumik taanna oqaatigisariaqarpara meeqqerivinni siulersuisut toqqarneqareeraangamik piffissaasuatsillutik ajoraluartumik suliffimmit paarserusunnerullutik ataatsimiigiartarnernut assigiinngitsunut ingerlanneqartartunut peqataaneq ajorput. Taanna uggornarpoq, aamma taanna siunissami taama alloriarneq annertutigisoq sukumiitigisorlu angajoqqaaninngaanniit sunniuteqarfigineqassaguni aamma angajoqqaat piffissaqarlutik ataatsimiigiartarnissamut pinngitsoorani peqataasariaqarput. Taannalu aamma KANOKOKA suleqatigalugu pinngitsoornani misissorneqartussaassooq, aamma pisariaqarpat bloktilskudinik isumaqatigiinniarmut taanna immaqa ilanngunneqarsinnaassooq. Taanna kisiat apeqqutaavoq tassuunga qanoq aaqqiiffigineqarnissaa qanoq isikkoqassanersoq.
Aamma taaneqarpoq meeqqerivinnik sanaartorneq taanna ukiuni kingullerni immaqa aallunneqarpallaarsimanngitsoq. Tassa ukiuni kingullerni meeqqerivinnut sanaartornissanut aningaasat 5 million kruunit missaat Inatsisartuninngaanniit immikkoortinneqartarsimapput. Aammalu ukiut tamaasa 80 millionit ataannagit kommuniminngaanniit Namminersornerullutik Oqartussat tapiissuteqartarnissaat kissaatigineqartarpoq.
Taamaattumik aamma uanga Naalakkersuisut sinnerlugit neriuutigeqaara sanaartornerit eqqarsaatigalugit meeqqeriviit pisariaqartinneqartut minnerunngitsumillu Socialreformkommision-ip innersuutaa naammassineqassappat pinngitsoornani sanaartorneq ukiuni aggersuni aalluuneqarnissaa taanna avaqqunneqarsinnaanngimmat.
Aamma Ruth Heilmanniminngaanniit oqaatigineqarpoq ilinniarsimasunik sulisoqarneq ukiuni kingullerni ajornartorsiutaasimasoq, isumaqarpunga tamatta assortorsinnaanatigut.
Ulluunerani paaqqinnittarfiit sulisui eqqarsaatigalugit oqaatigineqartarpoq sulisut affaat missaat ilinniarsimasuusut affaasa missaat ilinniarsimanngitsut, kisianni massakkut sualunnik kingullermi isumaqatigiinniarnermi angusarineqartut aallaavigalugit tamatta neriuuteqarluinnarpugut taasuma tungaa pitsaasup tungaattut aallariarnermik pisoqassasoq.
Nalunngilara Pædagogit Perorsaasut Kattuffiat aamma siulersuisui isumaqatigiissumik maannakkut nutaamik atsiorneqaqqammersumi, assut neriulluartut. Taamaattumik neriuutigissavarput, taanna tamanut iluaqutaajumaartoq.
Aammalu una decentralimik pædagogimut ilinniarsinnaanermut periarfissaq, taanna aamma nunatsinni kommunini ilaanni misilinneqartareernikuuvoq, aamma iluatsittumik. Aamma massakkut paasivara kommunit pingasut massakkut piareersimagaluartut taamannak ilinniartitsinermik aallartitseriarsinnaanissaminnik, kisiannilu tassani aporfigiuinnartoq aningaasanut apeqqut.
Taamaattumik neriuutigaara ilinniartitaanikkut nukittorsaanikkut aamma taamannak najugaq qimannagu siunissami pædagogitut ilinniartitsisinnaaneq ilinniarsinnaanerlu periarfissiuunneqassasut.
Taava Atassumminngaanniit Godmand Rasmussenip Naalakkersuisuninngaanniit saqqummiunneqartoq taperserpaa, aamma taanna soorunami qujassutigissavara.
Taava Inuit Ataqatigiinninngaanniit Asii Chemnitz Narupip siullermik tikkuagai tassaapput tamanut sammisumik meeqqerivimmik pilersitsisoqarnissaat pinngitsoornagu anguneqarniartariaqartoq, aamma anguniaqarfiusumik pilersitsineq soorunami tunngaveqartariaqartoq, aamma pinngitsoornani pilersinneqartussaq ataqatigiissaarinikkut ajunngitsumik siunertaqartumik pilersitsivigineqarnissaa taanna pinngitsoorneqarsinnaanngitsoq.
Aamma Asii Chemnitz Narup ilumoorpoq suliassaq angisooq massakkut aggersoq, massakkut suliaq naammasseqqajanngilaq, suliassaq aatsaat aallartilaartussaavoq, suliassat annertoorujussuit piareersarnerit ikaarsaariarnermi suliniutissat ingerlanneqartussaapput piffissami aggersumi.
Aamma meeqqerivimminngaanniit atuarfimmut ikaarsaalernermi aqqusaagassat assigiinngitsut siunertamut ilanngunneqarsimasumi allanneqarsimasut piviusunngortinneqassappata kikkut tamarmik kommunit, kommunit atuarfiit, meeqqeriviit, angajoqqaat aammalu allat susassaqartut tamarmik pinngitsoornani suleqataanissaat taanna pinngitsoorneqarsinnaanngilaq.
Aatsaannguaq taatsiarpara tusarniaanermi akissuteqaateqarsimanersut kikkuunersut, taamaattumik taanna uteqqissanngilara.
Tassalu aamma oqaatigineqarpoq meeqqanut inuusuttuaqqanullu periarfissat nunatsinni annertusaaffigineqartariaqartut, tassuunga aamma isumaqatigiittorujussuuvugut. Taanna ilumoorpoq aamma qujanartumik ukiuni kingullerni kommunit taanna ajornartorsiut angisooq massakkut takusinnagamikku taasuma tungaa qujanartumik tappiffigigaluttuinnarpaat, neriuutigissavarpullu massakkut aamma minnerunngitsumik oqallinneq inuiaqatigiit akornanni ingerlanneqartoq aallaavigalugu taasumap suli taasumap ilaatigut kommunini nukittorsaaneq ingerlanneqarumaartoq, aamma aningaasaqarneq tassani eqqarsaatigalugu.
Ilinniaqqittarnerit pikkorissartarnerillu taakku ilumoorpoq aamma ukiuni tulliuttuni ingerlanneqartussaasapput pinngitsoornatik. Taanna avaqqunneqarsinnaanngilaq aamma taanna kommunini assigiinngitsuni nalinginaasumik kommunit sulisunik pikkorissaasarnerat aallaavigalugu aamma SPS-ikkut neqerooruteqartarnerat aallaavigalugu aamma periarfissat allat aallaavigalugit taamannak pikkorissartarneq naatsorsuutigilluinnarpara aamma ukiuni aggersuni ingerlanneqartarumaartoq.
Taava aamma Inuit Ataqatigiinninngaanniit taaneqarpoq kissaatigineqarluni pingajussaaneerneqarnissaa ukiamut Inatsisartut ataatsimiinnissaannut kinguartinneqassasoq. Tassa Naalakkersuisuninngaanniit aamma partiininngaanniit allaninngaanniit uani siunnersuummi tapersiisuninngaanniit tamanna kissaatigineqanngilaq.
Aamma oqaatigissavara ilumoorpoq Asii Chemnitz Narup oqaatigisat taanna suleqatigiissitaq suli naammassivissimanngilaq, naammassisussaassooq uani piffissami aggersumi. Kisianni taasumap suleqatgiissitap naammassinngikkaluarluni anguniagassatut siunnersuutai tamarmik uani siunertami ilanngunneqarput.
Aamma oqaatigisariaqarpara una meeqqanut innarluutilinnut periarfissat taakkua pinngitsoornatik aamma soorunami pingaartinneqartariaqartut, tassa isumaqarluinnarpugut Naalakkersuisuni meeraq innarluuteqaruni, innarluuteqanngikkuniluunniit tassa assigiimmik pineqartussaavoq, kisianni innarluuteqarnini pissutigalugu immikkut iliuuseqarfigineqassaguni taava taanna suliassaavoq immikkut suliarineqartariaqartoq, taassumalu tungaatigut aamma nalunngilara kommunit piareersimasut aamma taamaattumik suliassamik takkuttoqaraangat aallussisartut aamma taanna kommunit pisussaaffigilluinnarpaat.
Loritha Hendriksenip Kattusseqatigiinneersup aamma Naalakkersuisuninngaanniit siunnersuut taperserpaa, aamma taanna qujassutigissavara. Tassa aamma Loritha Hendriksenip oqaaseqarnermini taavaa taanna suleqatigiissitaq pilersinneqarsimasoq aamma piffissaq sivitsajaaq atorlugu massakkut sulisimasoq aamma sulilluarsimasoq aamma eqiingasumik, nuannersumillu sulisarsimanerup kingunerisaanik taamannak pitsaasumik siunertamik suliniuteqaqataasimasoq.
Taamaattumik Loritha aamma ilinnut itisoorujummik qujassuteqassuunga aamma naggataatigut Otto Steenholdtip aallartikkami ullumi oqaluuserisarput uterfigitsiarpaa, kisianni ullumi oqallinnermi pineqarpoq ulloq-unnuarlu angerlarsimaffiit taakkua døgninstitution-imik qallunaatut taaneqartartut, kisianni ullumikkut massakkullu una oqaluuserisarput tassaavoq ulluunerani paaqqinnittarfiit taakku assigiinngitsorujussuupput. Taamaattumik Otto Steenholdti aamma oqaatigisaa taanna isumaqatigiinniarnerup ingerlanneqartarnissaat Pisortaninngaanniit, KANUKOKA-p Namminersornerullutillu Oqartussat taanna soorunami avaqqunneqarsinnaanngitsoq aammalu pinngitsoornani eqqumaffigineqartariaqartoq aamma siunissami aggersumi.
Aammalu Otto Steenholdt nuannaarutigissavara siunnersuummut uunga aamma taperseeqataalluni nalunaaruteqarmat.
Tassa oqaatigerusutakka tassunga killeqarput.
Ruth
Heilmann, Siumut.
Qujanaq,
tassa naatsuararsuussaaq immaluunniit pisariaqanngikkaluarpoq
qaqeqqinnissara. Tassa Isumaginninnermut Naalakkersuisoq taamatut
oqaaserisatsinnut oqaaseqarnera aamma nassuiaateqarnera qujassutigaara. Aamma
ataatsimiititaliami ataatsimiinnittarnitsinni annertuumik oqallitareeqigatta
isumaqarpunga maani annertuumik oqallinnissaq tunngavissaqanngitsoq, kisianni
naatsorsuutigaara Naalakkersuisut suliamut ingerlatitseqqinnissaminni
meeqqerivinni siulersuisut taamatut ajunngitsussarsiassaqartitaanissaanik
siunnersuutigineqartup aamma naatsorsuutigigatsigu siulersuisut meeqqerivinni
peqatigalugit isuma taassumap eqqartorneqarnissaa ingerlateqqittussaagaat,
tassanilu naatsorsuutigaara annertuumik aamma oqallisigineqarumaartoq.
Taamaattumik
tassunga iluatsillugu ikaarsaariarnermi suliniutaasut aamma sakkugineqartut
massakkut atortuusut aammalu angusaasut eqqarsaatigalugit
naaperiarfiusinnaasutut isumaqarfigaara Inuit Ataqatigiinni aamma
annertunerusumik taassumap eqqartorneqarnissaa kissaatigisaanut tunngatillugu,
isumaqarpunga pikkorissaanernik malitseqartariaqartoq una peqqussut,
tassuunakkullu Naalakkersuisut neriuppunga piumassuseqarfigissagaat aamma
pisariaqartutut uanga nammineq takusinnaagakku taassumap
ingerlateqqinneqarnerani pikkorissaanerit atuarfimmut ikaarsaariarnermi aamma
meeqqerivinni sulisut tassani peqatigalugit ingerlanneqarnissaa aamma
isumaqarpunga pisariaqarumaartoq.
Anders
Andreassen, ataatsimiinnermik aqutsisoq, Inatsisartut Siulittaasuata tullia,
Siumut.
Qujanaq.
Tassa erniinnaq taasinialissuugut imaluunniit massakkut taasinialissuugut
allamik nappaasoqarsimanngimmat.
Oqaatigissavaralu
Isumaginninnermut Suliffeqarnermullu Ataatsimiititaliaq isumaqatigiipput
Naalakkersuisunut kaammattuuteqarpoq allannguutissatut siunnersuutinut
erseqqinnerusunik taasanit saqqummiusseqqullugu, taamatullu
kaammattuuteqarnera Naalakkersuisut malippaat.
Tamatuma
saniatigut ataatsimiititaliami amerlanerussuteqartut tassaasut Siumup,
Atassutip, Kattusseqatigiillu ilaasortaasitaasa Naalakkersuisut
kaammattoorpaat allannguutissatut siunnersuutinik erseqqinnersumik taasanik
saqqummiussaqaqqullugit. Taamatut kaammattuuteqarnerat aamma Naalakkersuisut
malippaat.
Ikinnerussuteqartoq
tassasoq Inuit Ataqatigiit ilaasortaatitaat Naalakkersuisunut
kaammattuuteqarpoq allannguutissatut siunnersuutinik erseqqinnerusunik
taasanik saqqummiusseqqullugit. Taamatut kaammattuuteqarnera Naalakkersuisunit
malinneqanngilaq oqaatigineqarlunilu ikinnerussuteqartut isummersuutaasa ilaat
paaqqinniffinnik pilersitsineq ilusilersuinerlu pillugit Naalakkersuit
maleruagassiornissaannik ilanngunneqarumaartut.
Maannalu
Naalakkersuisut allannguutissatut siunnersuutaat taasissutigineqassaaq.
Naalakkersuisut
allannguutissasut siunnersuutaannut isumaqataasut qinnuvigaakka nikueqqullugit.
21.
Taavalu
Naalakkersuisut allannguutissatut siunnersuutaannut akerliusut nikueqqussavakka.
6.
Taavalu
taaseqataanngitsut qinnuigissavakka nikueqqullugit.
Soqanngilaq.
Taamaalilluni
Naalakkersuisut allannguutissatut siunnersuutaat akuersissutigineqarpoq.
Siunnersuutigissavara siunnersuut maanna iluserilikkamisut iluseqarluni
ataatsimiititaliami suliarineqaqqigani pingajussaaniigassanngortinneqassasoq.
Tamatumunnga
akerliusoqarnerluni?
Naamik.
Akerliusoqanngilaq.
Tamannalu akuersissutigineqartutut naatsorsuutigaara.