Daniel Skifte, ataatsimiinnermik aqutsisoq, Inatsisartut siulittaasuat, Atassut.

Naalakkersuisut Siulittaasuannut qujavugut. Taava maannakkut partiit Kattusseqatigiit kiisalu Attaviitsut oqaaseqartuinut nuuppugut. Siulliulluni oqaaseqassaaq Ruth Heilmann Siumut.

 

Ruth Heilmann, Siumup oqaaseqartua.

Qujanaq. Siumumiit Inatsisartut Kultureqarnermut Ilinniartitaanermut Ataatsimiititaliaata pingajussaaneerinninnissamut isumaliutissiissutaanut Naalakkersuisut akissuteqaataat amerlanerussuteqartut Siumup Atassutip Kattusseqatigiillu isumaqatigiillutik allannguutissamik siunnersuutaannut Naalakkersuisut malinnikkumanerat Siumumiit nuannaarutigaarput.

 

Taamatullu aappassaaneerinninnermi kukkussutaasut iluarsineqareermata Siumumiit Atuarfitsialammut malittareqqinninnissarput qilanaaralugu aamma iluarisimaarlugu Naalakkersuisut ingerlaavartumik ataatsimiititaliamut peqqussutip nutaap atuutilernerani malitsigisassai pillugit oqaloqatigineqarnissaannik malittaritinneqarluarnissaanillu Naalakkersuisut neriorsuuteqarnerat Siumumiit naammagisimaarlugulu pissusissamisoortutut isumaqarfigaarput.

 

Pingajussaaneerinninnermi Kultureqarnermut Ilinniartitaanermut Ataatsimiititaliaq Naalakkersuisut allannguutissatut siunnersuutaannut saqqummiussaqarput.

 

Ataatsimiititaliaq isumaqarmat perorsaanikkut aaqqissuussaanikkut aningaasatigullu tunngavissat pigineqalerpata immikkut atuartitsinerup tamarmiusup kommuninut aatsaat nunneqarsinnaanerat pillugu Naalakkersuisut ataatsimiititaliaq taamatut aamma kattuffiit susassaqartut KANUKOKAmullu tusarniaassuteqarernermikkut tamatumuunakkut atortuulersinneqarnissaa tamakkiisumik aatsaat isummerfigineqarsinnaajumaartoq.

 

Taamatut piumasaqarneq Siumumiit neriuutigaarput Naalakkersuisut malikkumaaraat. Aammalu maannakkut Naalakkersuisut akissuteqarnerminnut qujassutigaarput taamatut allannguutissamik siunnersuuteqarnerput aamma tapersermassuk.

 

Atuarfitsialak tamatta tapersersugarput maanna akuersissutigisussanngorparput suliaq aallaqqaataaniit malittaralugu nuannersoq pissanganartorlu ingerlassimavarput peqataasimapput inuppassuit nunatsinnit nunattalu avataanit KIIP Inerisaavik annertuumik suleqataalluarsimapput ilaatigullu aallaat nunanit atugartuunngorsimasunit iliuutsigut nuannaartorineqarlutik.

 

Tamanna Siumumiit tulluusimaarutigeqaarput tassani takussutissaavoq qanoq ikioqatigiinneq nukittuunngortitsisartot uppernarseqqikkatsigu. Suliassaq pingaarutilik aallartittussanngorpoq pilersaarusiornerit pimoorunneqartussanngorput ataatsimoorneq ikioqatigiinneq susassareqatigiinnerlu qiteralugit.

 

Atuarfitsialammi meeqqap siunissaalu qaamasoq ornillugu allorassaaqatigiissaagut aamma taamatut pingaaruteqartigaaq ilisimatusarfeqarfissaq suliasat tullerisassaat piumassuseqarluarluta anguniassagipput taamatut iliornissaq Siumumiit qularutiginngilluinnarparput.

 

Inatsisartuni suleqatigiilluarnitsinnut Naalakkersuisuttaaq qutsavigaavut. Aammalu minnerunngitsumik Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisoq Lise Skifte Lennert suleqataalu qutsavigingaarpagut. KANUKOKA kommuneqarfiit IMAK malinnaallutillu isummersueqataasullu tamaasa ilanngullugu uummammik pisumik Siumumiit qutsaviginiarpagut. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Ruth Heilmann qutsavigaarput. Taavalu maannakkut oqaaseqassaaq Jakob Sivertsen, Atassumminngaaniit.

 

Jakob Sivertsen, Atassutip oqaaseqartua.

Qujanaq. Meeqqat atuarfiat pillugu Inatsisartut peqqussutissaattut siunnersuut kiisalu Kultureqarnermut Ilinniartitaanermut Ilisimatusarnermut Ilageeqarnermullu ataatsimiititaliap isumaliutissiissutaa peqqussutissap pingajussaaneerneqarnerani Atassummit imatut oqaaseqarfiginiarparput.

 

Peqqussutissatut Siunnersuut aappassaaneerlugu oqaluuserineqarmat Atassummit oqaatsit erseqqissaassutigisagut imaattut oqaatigeqqissavagut. Meeqqat atuarfiat ineriartornermi pitsaanerpaamik angusaqarnissamut ineriartornermilu mianerisassanut ilikkagaqarnissamullu tunngaviliisuulluinnartartut tamatta nalunngilarput.

 

Taamaammat meeqqat atuarfiat pillugu peqqussutissaq oqaluuserisarput meeqqat ilinniartitaaneranni siunnerfimmik nutaamik Atuarfitsialammik siunertaqartoq siunissami meeqqat ilinniartitaanerannut angusaqarnissaanullu oqaluttuarisaanermi assut pingaaruteqarmat matumuuna Atassummit oqaatigaarput.

 

Meeqqat atuarfiat pillugu peqqussutissap aappassaaneerlugu Inatsisartuni oqaluuserineqarmat Atassummit oqaaserpassuit atorlugit oqaaseqarfigisimagatsigu matumuuna allannguutinut tunngassuteqartut taamaallaat oqaaseqarfeqqissavagut.

 

Peqqussutissap pingajussaaneerneqarneranut atatillugu ataatsimiitititaliamiit allannguutissatut saqqummiunneqartut Naalakkersuisunit taperserneqarnerat Atassummit qujarullugit tiguarput. Pingaartumik atuarfiup siulersuisuini atuartut sinniisaasa ajunngitsorsiassaqartitaalernissaaq anguneqartussanngormat pitsaasutut nalilerlugu tamakkiisumik Atassummit taperseratsigit.

 

Taamatullu aamma atuarfiit nutarsarneqarnissaannut tunngatillugu Naalakkersuisut tulleriiaarilluni pilersaarusiorsimanermut nalilersuiffigineqaqqinnissaanik neriorsuuteqarnerat Atassummit naammagisimaaratsigu matumuuna oqaatigaarput.

 

Atuarfiimmi ilaasa piaartumik iluarsaanneqaqqinngippata akisunerungaartumik nutarsaanissaq saneqqunneqarsinnaangitsoq Atassummit nalunnginnatsigu. Tiimit ilinniartitsiviusussatut peqqussutissami siunnersuutigineqartut Atassummit iluarisimaarparput taperserlugillu. Naak KANUKOKAmit apeqquserneqarsimagaluartut.

 

Taakkununnga tunngatillugu Atassummiit isumaqarpugut ilinniartitsisut meeqqanut tunniussinnaasaat periaasiallu meeqqat angusaqarnissaannut aalajangiisuulluinnartartup. Tamatumani tiimit qanoq amerlatigisut atuartitsinermi atorneqarsimanersut apeqqutaasaratik. Peqqussutissami paragraf 43-p sinnersuutigineqartup atuarfinni pisortassat allaffissornikkut perorsaanikkullu misilittaqarnissaannik taarsiullugu ilinniartitsisutut ilinniarsimasuunissaannik ataatsimiititaliamit piumasaqaateqarneq Atassummit taperserparput.

 

Atuarfiup ingerlatitaanerani minnerunngitsumillu qanoq imaqartitaanissaanik atuarfiup pisortaa tassaasariaqarmat Atuarfitsialammut ikaarsaarnermi meeqqat ilinniartitaaneranni ilinniartitseriaatsinik misilittagaqartuullunilu siunnersuisinnaassuseqartoq.

 

Peqqussutissatut siunnersuutip aappassaaneerlugu Inatsisartuni oqaluuserineqarmat annertusisamik immikkut ilinniartitsarnerup atuutiinnarallarnissaa Atassummit pingaartillugu oqaatigisimavarput. Annertusisamik ilinniartitsisarneq meeqqat piginnaanikitsut immikkut ilinniartinneqartarnissaq assut pisariaqartittaraat nalunnginnatsigu. Matumuuna aaqqissuussinerup 1. januar 2004-p tungaanut Naalakkersuisut siunniummassuk Atassummit iluarisimaarlugu taperserparput.

 

Naggataatigut meeqqat atuarfiat pillugu peqqussutissaq manna suliarisarput oqaluttuarisaanermi siullerpaamik kalaallit oqaatsivut atorlugit allanneqarlunilu suliarineqarsimavoq. Suliaq pingaaruteqarmat Atassummit suleqataasimasut tamaasa uummammik pisumik tulluusimaarutigalugit qutsavigaagut.

 

Naatsorsuutigilluinnarparpullu meeqqat ilinniartitaaneranni pitsaanerpaamik angusaqarnissaannut tunngaviliisuulluarumaartoq. Taamatut Atassummit oqaaseqarluta peqqussutissap pingajussaaneerneqarnerani allannguutissat ilanngullugit akuersilluta taaseqataassaagut. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Jakob Sivertsen Atassut qutsavigaarput. Tulliulluni oqaaseqassaaq Olga Poulsen Inuit Ataqatigiit.

 

Olga Poulsen, Inuit Ataqatigiit oqaaseqartuat.

Qujanaq. Meeqqat atuarfiat pillugu peqqussutissap aappassaaneerneqarnerani Inatsisartut Ilinniartitaanermut ataatsimiititaliaata isumaliutississutaa naapertorlugu pingajussaaneerinninnissamut Naalakkersuisut neriorsuuteqarput isumaliutissiissut naapertorlugu allannguutissamik siunnersuuteqassallutik.

 

Naalakkersuisut pingajussaaneerininnermut siunnersuutaat Inuit Ataqatigiinniit peqataaffigisinnaannginnatsigit Inatsisartut Ilinniartitaanermut ataatsimiititaliaata Naalakkersuisut allannguutissatut siunnersuutaannut allannguutissatut siunnersuutigisaat massakkut Naalakkersuisut oqaaseqarnermini taperserlugit oqaaseqarfigisaat Inuit Ataqatigiinninngaaniit qujassutigissagatsigit oqaatigissavarput.

 

Peqqussutissap pingajussaaneerneqarnissaanut atatillugu Inuit Ataqatigiinniit ataatsimiititaliami ikinnerussuteqarluta ikaarsaariarfimmi tiiminik ikilisoqannginnissaanik atasumik Naalakkersuisunut siunnersuuteqaqqusiluarpugut. Tamanna Naalakkersuisut malinneqarumanngilaq.

 

Taassumap malikkumaneqannginnera ajuusaarutigaarput kissaatigissavarpullu ikaarsaariarfimmut tunngatillugu atuartuusussat malinnaafigilluarneqarnissaat siunertaralugu atuartut ilikkagassatigut angusinnaasaasa naammassineqarluarsimanerat malinnaaffigineqartuaannaqqullugu.

 

Meeqqat atuarfiannut tunngatillugu nalunaarutiliaasussat naammassineqareersimanissaasa peqqussutissamut ilanngullugit inissinneqarsinnaanissaannut tunngatillugu Inuit Ataqatigiit piumasaqatitta peqqussutissakkut naammassinngikkaluarlugu Naalakkersuisut akissuteqarnerminni naammassinninnissaminnik oqariartuuteqarnerat Inuit Ataqatigiinniit iluarisimaarparput.

 

Taamatut oqaaseqarluta Inuit Ataqatigiinniit nalunaarutigissavarput meeqqat atuarfiat pillugu Inatsisartut Peqqussutissatut Siunnersuut akuersaassagatsigit. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Olga Poulsen qutsavigaarput. Tulliullunilu oqaaseqassaaq Mogens Kleist, Kattusseqatigiit.

 

Mogens Kleist, Kattusseqatigiit oqaaseqartuat.

Qujanaq. Peqqussutissaq ullumikkut aalajangiiffigisassarput ukiut arlallit ataatsimiititaliami suliarisimavarput. Taamaattumik ataatsimiititaliami ilaasortaaqatigisimasagut Kattusseqatigiinniit qutsavigerusuppagut suliamut annertuumut aammalu piffissamik annertuumik atuisimanitsinni suleqatigisimasagut ilinniartitsisut kattuffiat KANUKOKA Inerisaavimminngaaneersullu.

Aammalu sinerissamik angajoqqaarpassuit ilinniartitsisut, aammalu atuartut soorunami.

 

Siunnersuutissamut tunngatillugu tassa Naalakkersuisut allannguutissamik ataatsimiititaliap piumassaqaateqarnera toqqammavigalugu Naalakkersuisut taamatut akuersaarsimapput. Kattusseqatigiinniit oqaatigerusupparput nalimmassaasinnaanissat tassa tiiminut appartitsiniarnermut tunngatillugu ilinniartitsisut kattuffiat allanik kisitsisinik peqarpoq. KANUKOKA allaanerusunik peqarpoq Naalakkersuisoqarfik aamma allanik peqarpoq.

 

Taamaattumik taassumap tungaatigut periarfissaqarmat ataatsimiititaliami suliap ingerlanerani nalimmassaasinnaanissaminut allannguisinnaanissaminut aammalu Naalakkersuisut ilinniartitaanermut Naalakkersuisut taamatut siunnersuuteqarsinnaanera toqqammavigalugu Kattusseqatigiinniit oqaatigissavarput taanna aamma ataatsimiititaliami eqqumaffigissagatsigu.

 

Tassami peqqussutissap taamatut piviusunngortinnerani nalimmassaassagutta aamma aaqqiiisariaqarnissarput ataatsimiititaliamiit suliarisussaassavarput.

 

Immikkut atuartitsinermut tunngatillugu tassa Naalakkersuisut oqariartuuteqarsimapput januarip aallaqqaataani 2004-mi taanna pilersinneqarnissaa anguniarneqassaoq. Kisianni oqaatigerusupparput Kattusseqatigiinninngaaniit siunerissami maannakkut ilinniartitsisunik aammalu ilinniarsimasunik assigiinngitsunik taamak amigaateqartigitilluta una ulloq aalajangiunneqarsimasoq qanoq eqquutsinneqarsinnaanersoq apeqquserusukkatsigu.

 

Ajornartorsiummi maani kisimi nuummiinnaanngilaq aammali sinerissamiittut taamatut immikkut ilinniartitsinermut ajornartorsiutit assigiinngitsut. Aammattaarlu taamatut kommuninut tunniussiniarnermi aningaasatigut aamma pinngitsoorani kommuninut naleqartussaanissaa ataatsimiititaliaminngaaniit uanga ilaasortatut oqaatigissavara. Aamma taanna eqqumaffigisussaassagatsigu.

 

Taamaattumik Naalakkersuisut qujarusuppunga aammalu suleqatigisimasagut tamaasa uunga peqqussutissamut sulisimanitsinnik. Aammalu Kattusseqatigiinniit oqaatigissavarput aamma peqqussutissamut akuersaarnissarput nalunaarutigissagatsigit. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

 Mogens Kleist qutsavigarput. Tulliulluni oqaaseqassaaq Otto Steenholdt Attaviitsoq.

 

Otto Steenholdt, Attaviitsup oqaaseqartua.

Ileqqorinngikkaluarpara uanga pingajussaaneerinermi oqaaseqarniartarneq taamaattoq oqaaseqartorpassuarnut aamma kajaanngilerlunga oqaatigisariaqarpara saaffiginnissut allaganngorlugu IMAK-minngaaniit aamma KANUKOKAminngaaniit uanga taperserluarlugu maanngaaniit kingullermik aappassaaneerinninnermi piumasarisimasara tassa pisortaq tassaassasoq ilinniartitsisutut ilinniarsimasoq.

 

Qujanartumik tassa taanna erseqqissumik paragraf 43-mut ikkunneqarsimavoq qujasorpassuit ilagalugit taanna qujassutigiinnarpara.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Otto Steenholdtittaaq qutsavigaarput. Taava tulliulluni oqaaseqassaaq Naalakkersuisut Siulittaasuat.

 

Jonathan Motzfeldt, Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisuugallartoq, Naalakkersuisut Siulittaasuat, Siumut.

Oqaaseqartunut tamanut qujavunga tassa taperserneqarmata Naalakkersuisut allannguutissatut siunnersuutaat tunngaveqartup Kultureqarnermut Atuartitsinermullu Ataatsimiititaliap sulilluarnermigut aamma siunnersuusiaat tassaniittut suliarisimammatigit.

 

Siumup oqaaseqartuanut aamma qujallunga atuartitsinermut Naalakkersuisumut aamma Naalakkersuisut qujassutaa nuannaarutigaara inuttaanut aamma apuukkumaarpara Lise Skifte Lennart maannakkut sulinngiffeqarallarpoq. Kisianni neriuppunga erniinnaq peqqissilluni uterumaartoq.

 

Taavalu Jakob Sivertsen oqaaserisaanut ataaseq imaattulaarniarpara aamma Otto Steenholdtip oqaaseqarnermini attullatsiarmatigit.

 

Paragraf 43-mi ilinniartitsisuunissamik piumasaqaat taanna pissusissamisoortutut aamma uagut isigaarput Naalakkersuisuniit. Aammalu atuarfip pisortaata ilinniartitsisutut ilinniarsimanerup saniatigut aamma atuarfimmik ingerlatsinermi imaappoq siulersuinermi administrationimik allatigullu suliassat tungaatigut aamma pimmaanissaanik alaatsinaataqarneq aamma pissusissamisoortutut isigalugu.

 

Siulersuinermi aamma pilersaarusiornerit ingerlalluarnerit allallu aamma atorfimmi taamak ittumi piumasaqaatinut ilaasariaqarmata.

 

Taavalu Olga Poulsenip oqaatigisaani oqaatigilaarniarpara uani akuersissummi taasinissamut maannakkut tikitatsinni oqaatigissavara uanga taarsisiisimanninnilu Naalakkersuisumut maluginiarsimasara aajuna suliap ingerlanerani Naalakkersuisut uangalu aamma tassani suliaqartitaasunga annertuumik udvalgit oqariartuutaat naalaarneqartarsimammata.

 

Taamaattumillu uani suliarineqartuni udvalgip naalaarneqarnera piinnarani kisianni aamma KANUKOKAmit oqariartuutigineqartut tunngavigalugit paaseqatigiinniarneq anguniarneqarsimammat.

 

Immikkullu atuartitsineq specialundervisningimik taaneqartartoq inissinniarneqarnera januarip aallaqqaataani aamma taanna Mogens Kleistimut tunngatillugu oqaatigilaarusuppara. Januarip  aallaqqaataani 2004-mut aamma taanna assigiinngitsunik kommunillu aningaasatigut aamma inissisimaffii allallu tamakkua nalilersoreernerisigut paaseqartigiiffiusimavoq ulloq ukiorlu taanna aallarnerfigalugu taamatut aqqissuussineq kommuninut tunniunneqarnissaanut.

 

Taamaattumik assortuussutissaanngillat maannakkut killiffigisagut. Uangattaaq nuannaarutigeqaara Naalakkersuisut sinnerlugit taamatut Atuarfitsialammut isumaqatigiissut naammassineqarmat. Kiisalu aamma oqaatigissallugu qularutissaanngilluinnarpoq soorlu oqaatigineqartoq aamma Siumup oqaaseqartuani Ruth Heilmannimit avataaninngaaniit aamma usorineqarlutalu nuannarineqarpugut atuarfimmik taamak ittumik aallartitsiniarnermut taamatut sapiilluta aaqqiiniarnermi suliaqarsimagatta.

 

Taamaattumik misilissavarput misiliinnarnagulu iluatsittumik suliarisariaqarparput.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Naalakkersuisut Siulittaasuannut qujavugut. Taava aappassaanik oqaaseqarniarpoq Olga Poulsen.

 

Olga Poulsen, Inuit Ataqatigiit oqaaseqartuat.

Qujanaq. Unajuna Naalakkersuisut Siulittaasuanut apeqqutigilaarniarlugu. Kultureqarnermut ataatsimiititaliami tassa Naalakkersuisut allannguutissatut siunnersuutaannut, allannguutissatut siunnersuuteqarnikuuvugut.

 

Tassungalu atatillugu aamma nalinginnaasumik oqaaseqaatigineqartuni tassunga siunnersuummut tunngatillugu ataatsimiititaliaminngaaniit kissaatigineqarpoq taamatut immikkut atuartitsisarnermut tunngasut 2004-mi januarip aallaqqaataani tiguneqarnissaanut atatillugu ataatsimiititaliap aammalu KANUKOKA tusarniaavigineqartassasoq.

 

Tassani qulakkerniarlugu ilumut kommunit avalliunerusut pingaartumik taamatut sullissinissamut tunngatillugu sulisussatigut allatigullu atortussatigut piareersimanersut paaseqqaarnissaat pingaartikkatsigu.

 

Taanna Naalakkersuisuniit qanoq, uanga massakkut aamma pingaartumik aappassaanik Naalakkersuisut oqaaseqaqqinnerannut tunngatillugu soorlulusooq uagut ataatsimiititaliaminngaaniit tusarniaasarnissamut tunngatillugu piumasaqaaterput akuersaarneqanngitsoq malinneqarumanngitsoq.

 

Taanna isumaqarpunga pingaaruteqartorujussuaq aamma kaammattussavakka ataatsimiititaliami ilaasortaaqatikka ilumut taamatut uanga kisima paasinnissimanersunga tassami pingaaruteqarmat tusarniaqqaarneeqarnata januarip aallaqqaataani 2004-mi aammalu KANUKOKA tusarniaqqaarneqarnani 2004 januarip aallaqqaataani immikkut atuartitsineq aallartinneqassappat kommunini tamani.

 

Taaava taamanikkornissaanut nalussavarput ilumut qulakkeersimaneripput atuartitsisussaanermi taamatut immikkut atuartitsinissamut atortussat ilinniartitsisussat immikkut ilisimasallit tamakkununnga tunngasumik piareersimanersut.

 

Taannartaa akeqqulaaraluarpara.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Olga Poulsen qutsavigaarput. Taava maannakkut akissuteqassaaq Naalakkersuisut Siulittaasuat.

 

 

Jonathan Motzfeldt, Kultureqarnermut Ilinniartitaanermut Ilisimatusarnermut Ilageeqarnermullu Naalakkersuisuugallartoq, Naalakkersuisut Siulittaasuat, Siumut.

Aappassaaneerinermi Naalakkersuisut oqaaseqaatitsinni suliaq manna pillugu oqaaseqaatitta naggataani erseqqivissumik nalunaarutigisimavarput. Oqaratta aammattaaq pisarneq malillugu Naalakkersuisut siunissami qulakkeersimaniarpaat Inatsisartut Kultureqarnermut Ilinniartitaanermut Ataatsimiititaliaat ingerlaavartumik paasissutinneqartarnissaa, oqaloqatigineqartarnissaalu taanna neriorsuut aamma atuutissaaq maannakkut suliap uumap inaarsarneqarnerani.

 

Aammalu inaarsagassat arlallit tassaniittut soorlu Olga Poulsen nammineerluni taasai inaarsarneqarnerini tassani qanittumik udvalgi suleqatigineqarnissaat naatsorsuutigaarput minnerunngitsumillu aamma KANUKOKA. Tassaapput siunissami kommunit aamma atuarfinnik akisussaalernissaannut ikaarsaariarfik ornitarput.

 

Aammalu taanna ineriartorneq pitsaasutut tamanit nalilerneqarpoq atuarfigut taamaalilluni angajoqqaanik qanittumik pigineqarlutik akisussaaffigineqarlutillu ingerlasut ilusissaminnik pitsaasumik taamaalillutik anngussinnassammata.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Naalakkersuisut Siulittaasuannut qujavugut. Taava maannakkut oqaaseqarniarpoq Konrad Steenholdt. Pingajussaaneerinninnerummat oqaaseqartussat naatsuararsuarmik oqaaseqartussaapput. Tulliuppoq Ruth Heilmann.

 

Konrad Steenholdt, Atassutip oqaaseqartua.

Qujanaq. Nalunngilara pingajussaaneerinninnerusoq aamma malugisinnaavara periutsit oqaaseqartarnermut tunngasut allanngulaarsimasut. Kisianni periarfissaq manna iluatsillugu una oqaatigilaavinnarniarpara naatsunnguamik. Tassa siuliassaq Naalakkersuisut uumap qinersinerup siulianit taanna suliassaq tigummisimavara. Taamanilu aamma nalunngilarput aallartileratsigu oqaaserpassuit aninneqarsimasut.

 

Taamaattumik assut tulluarpoq maani issialaarluni taavalu sanerannianiit oqallinneq malinnaaffigisimallugu. Ilumoortoqarpoq oqartoqarami suliassaq angisooq aallarnerneqarsimavoq. Assullu nuannerpoq takussallugu suliassaq naammassillugu massakkut una suliaq pingajussaaneerneqarnera najuffigisinnaagakku.

 

Qujassaanga inuppassuit sinerissami taavalu aamma KIIPimi sulisuusimasut tunniusimalluarlutik suliassaq taanna ingerlassimammassuk. Soorunalumi aamma minnerunngitsumik Inatsisartut ataatsimiititaliaanni.

 

Tamassi pilluaqqussavassi isumaqarpunga aamma pissusissamisoortoq oqassalluni Kalaallit Nunaat pilluarit Atuarfitsialak aallartikkatsigu nalorninaraluartoq. Kisianni massakkut illinernut inissinneqarpoq aallarlunilu. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Konrad Steenholdt qutsavigaarput. Naleqqutiivippoq. Maannakkut oqaaseqassaaq Ruth Heilmann oqareernittuut naatsunnguamik.

 

Ruth Heilmann, Siumup oqaaseqartua.

Tassa immaqa pisariaqanngikkaluarpoq Olga Poulsenimuna apeqqutigimmagu ataatsimiititaliami ilaasortat aamma allat imminermisut paasinnissimanersut. Uani Naalakkersuisut akissuteqaammini ataatsimiititaliap piumasarisaanut malinnikkumanertik uanga taanna Siumuminnganiit akuerissutigaarput soorunami.

 

Uani Naalakkersuisut nassuiaateqarfigivaa qanoq namminneq siunnersuuteqarsimanerlutik. Taannalu siunnersuut uagut akuerinnginnatsigu tassa naatsorsuutigaarput ataatsimiititaliami susassaqartullu peqatigalugi taassumap oqaluusereqqinneqarnissaa pissallugu. Naluarput massakkut akuerineqarumaarnersoq. Kisianni naatsorsuutigaarput soorunami paaseqatigiilluarnikkut taanna suliassaq ingerlanneqarumaartoq. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Ruth Heilmann qutsavigaarput. Maannalu malugilaaqqussavara taaseqattaalissagatta tassa immikkoortoq 29 pillugu pingasoriarluta taasissaagut.

 

Naalakkersuisut pingajussaaneerinissanut allannguutissatut siunnersuummik saqqummiussipput. Kiisalu Inatsisartut Kultureqarnermut Ilinniartitaanermut Ataatsimiititaliaat allannguutissatut siunnersuummut allannguutissatut siunnersuummik saqummiussillutik.