Oqaluuserisassani immikkoortoq 29-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq sisamaat, tallimanngorneq majip 3-at 2002, nal.
10:10.
Ataatsimiinnermik
aqutsisoq: Daniel Skifte, Inatsisartut Siulittaasuat, Atassut.
Jonathan
Motzfeldt, Naalakkersuisut Siulittaasuat, Siumut.
Siullermik
qujassutigissavara Naalakkersuisut sinnerlugit Inatsisartut Kultureqarnermut
Ilinniartitaanermut Ataatsimiititaliaata atuarfik pillugu Inatsisartut
Peqqussutissaattut Siunnersuummut sukumiisumik suliarinnissimanera. Tamanna
pillugu Naalakkersuisuniit nersualaarumavara. Tassa saqqummiussaq
suliarilluagaasutut nalilerparput.
Atuarfitsialak
pillugu suliap ingerlaqqinnerani ammasumik pissuseqarnissaq suleqatigiinnerlu
pingaaruteqarluinnarput. Aamma takusinnaavarput ataatsimiititaliap
Atuarfitsialammik tapersiinera Naalakkersuisut aamma nuannaarutigilluinnarpaat.
Taava
tulliulluni ataatsimiitsitap inassuteqaatai maannakkut agguaanneqareerlutik
tamarmik atuarneqareersimasut pillugit Naalakkersuisunit ima
oqaaseqaateqartoqassaaq.
Naalakkersuisut
siunnersuut pingajussaannerlugu oqallisigineqarnissaanut allannguutissatut
siunnersuummik saqqummiussaqassapput. Tamatumunngalu malitsigitillugu atuarfiup
siulersuisui atuartut ilaasortaatitaat akissaateqartinneqalissapput angajoqqaat
ilaasortaatitaasa akissaataasa pingajorarterutaattut annertussuseqartunik.
Soorlu aamma tamanna Danmarkimi atorneqartoq.
Tamatumuuna
aningaasartuutit missingersunneqarput ukiumut 128.000 kroneussasut.
Naalakkersuisut
isumaqarput angajoqqaat ilaasortaatitaasa atuartullu ilaasortaatitaasa
tassunga tunngatillugu assigiinngitsumik pineqarnissaat tunngavissaqartoq.
Angajoqqaat ilaasortaatitaat atuarfiup siulersuisuini sulipput tatigisaallutik
qinikkatut. Atuartullu atuarfiup siulersuisuini sulinermut peqataanerat
atuarnerannut ilaasutut aamma inuit tamat oqartussaaqataanerannit
paasinnilersarlutik inerikkiartornerannik ilaasutut isigisariaqarluni.
Atuartut
inuit ataasiakkaat pillugit apeqqutit suliarineranni peqataasassanngillat.
Aamma Naalakkersuisut tusaatissatut tiguaat annertusisamik immikkut
atuartitsinermut tunngatillugu ataatsimiititaliap KANUKOKA isumaqatigimmagu.
Naalakkersuisut pilersaarput siunnersuutip pingajussaaneerlugu
oqalliginissaanut allannguutissatut siunnersuummik saqqummiussiniarlutik.
Taannalu
malillugu aaqqissuussineq maannamut atuuttoq atuutiinnarallassaaq.
Aaqqissuussinerup nutaap perorsaanermut atuarfiup aaqqissugaanerannut
aningaasaqarnikkullu tunngasortaasa piviusunngortinneqarsinnaalernissaasa
tungaannut.
Naalakkersuisut
isumaqarput aningaasaqarnerup sukannersumik aqutarinissaa pisariaqartoq.
Aammalu ingerlaavartumik atuartut annertusisamik immikkut
atuartinneqarnissamut innersuunneqartartut amerlassusaat
malinnaaviginiarparput.
Taavalu
atuartut kolligiani ineqartinneqartarnerannut tunngatillugu ataatsimiititaliap
inassuteqaatai Naalakkersuisut isumaqatigaat maluginiarlugulu ineriartornerup
malinnaaffigilluartariaqarnera pillugu KANUKOKA isumaqatigineqartoq.
Tassami
kommunini ataasiakkaani atuarfiit ilusiligaanissaat il.il. pillugit
aalajangiinerit ininik pisariaqartitsinermut aammalu taakkua qanoq
annertussusissaannut sunniuteqarsinnaammata.
Taavalu
atuarfiit illuutaannut tunngatillugu ilimagineqarpoq sanaartorneq pillugu
isumasioqatigiinnissani pilersaarusiornerup ingerlateqqinneranut
tunngavigisassanik saqqummiisoqassasoq. Taamaalilluni atuarfiit
nutarternissaat allanngortiternissaat nutaaliornissallu pillugit atuarfiit
qanoq issusissaannut atuartut amerlassusaasa allanngoriartornerannut
Atuarfitsialammilu atuartitseriaatsit takorluukkanut tunngatillugu
pilersaarusiornissaq tunngavilerneqarniarpoq.
Aamma
Naalakkersuisut erseqqissassavaat pineqartumut tunngatillugu
pilersaarusiornissamut akisussaaffik KIIIP-imiimmat Ineqarnermut
Attaveqarnermullu Pilersuinermullu Pisortaqarfik tamatumani siunnersortigalugu.
Ataatsimiititaliap
isumaliutissiissummini oqaaseqarfigaa siunnersuummut tusarniaaffigineqartunut
naleqqiullugit tiimit ikinnerpaaffissaasa maanna siunnersuutaasumi
appartinneqarsimanerat. Tassunga tunngatillug ataatsimiitaliap piumasaraa
tiimissat illersorneqarsinnaasumik minnerpaaffilerneqarsimanissaat.
Tassalu
taakku ajornaquteqanngitsumik neqerooruteqarsinnaasutut amerlassusiusinnaasut
oqaatigalugu sulineq pitsaanerpaamik iluatsinnissamut naammattumik
aningaasaliiffigisariaqartoq.
Naalakkersuisut
tamatumani malugeqqussavaat siunnersuummut saqqummiunneqartumut tiimit
ikinnerpaaffissaat peqqussummi maanna atuuttumi klassit siullerninngaanniit
aqqarngannut klassini tiimit ataatsimut amerlassusissaannut naleqqiullugu
ukiuni qulini atuarnermi katillugit taamaallaat 68 tiiminik ikilisaammata.
Erseqqissarneqassaaq
pineqarmata tiimit ikinnerpaaffissaat nalinginnaasumik tiiminit
atorneqartartunit naleqqiullugit ikinnerusut. Taamaakkaluartoq Naalakkersuisut
isumaqarput siunnersuummi tiiminut ikinnerpaaffiliussat
ikinnerpaaffissaliussat atuartut ilimagisaattut atuarnerminni
pissarsiaqarnissaat siunertaralugu atuartinneqarnissaannut naammattutut.
Taamatut
isumaqarnermut tunuliaqutaavoq nalinginnaasumik akuerisaammat atuartut
atuartitaanerminni pissarsiaat tiimillu atuartinneqarfiisa amerliartornerat
imminnut attuumassuteqanngitsut.
Taamaammat
peqqussutip nutaat makku taperserpai. Eqaatsumik pilersaarusiortarneq ukiumi
atuarfiusumik ataqatigiissumik atuartitsinerit arlaqartillugit
pilersaarusiorfiusinnaasoq. Aamma ilinniartitsisut suleqatigiikkuutaarlutik
atuartitsisarnerat ilinniartitsisut klassini ataasiakkaani aalajangersimasumik
suleqatigiittassallutik atuartitseriaasiat nutaat pitsaanerusullu
atorneqarnissaat. Kiisalu ilinniartitsisut ilinniartitaaqqinnissaat tamakkualu
ataatsimut isigalugit atuartitsinerup pitsaassusaanik piffissamillu
atorluaanermik annertussaassapput.
Tiimit
atuartitsiviusut ilinniartitsisut suleqatigiittalernera eqaatsumillu
pilersaarusiortalernerup kingunerissaanik amerlissasut naatsorsuutigineqarpoq.
Tamakkununnga
ilutigalugu atuartitsissutit nutaat imarissaalu nutaamik aaqqissuunneqarnerisa
nassatarissavaat atuartut atuartitsissutaasunik pissarsinerisa
pitsanngorsarneqarnerat.
Taavalu
tiimit ikinnerpaaffissaat pillugit apeqqummut ilaassutitut ataatsimiititaliap
siunnersuutigaa peqqussut naapertorlugu ikaarsaariarnermi aalajangersakkanik
1-7 klassit tiimissaanik minnerpaaffiliussap peerneqarnissaa.
Ikaarsaariarfimmi
ilinniartitsisunut tiiminik atuineq annertuseriartussaavoq. 11. klassit 2003-p
tungaanut tassalu peqqussutip nutaap tamakkiisumik atortuulernissaata
tungaanut. Tassa 2003-mi.
Naalakkersuisut
isumaqarput klassini 1-miit 7-mut tiimit amerlinerisa pitsaassuseq
annertunerusoq nassatarinavinngikkaat ilinniartitsisoqarniarneq
ilisimaneqartutut imaammat ilinniartitsisut ilinniarsimasut
amigaatigineqarlutik. Immikkut tiimiliussat ilarpassui pissusiviusut
naarpertorlugit ilinniarsimanngitsunik qaangiuttoornertulluunniit
ingerlanneqartariaqartussaalissapput.
Misilittakkat
naapertorlugit taamak aaqqissuussineq meeqqat atuarfiata atuartitsineranut
pitsanngorsaataasanngilaq. Piffissamilluunniit atuilluarnerunermik
nassataqarani. Kiisalu aammattaaq erseqqissarneqassaaq pissusiviusut
naapertorlugit tiiminik atuisarneq tiimit ikinnerpaaffissaattut
aalajangersakkani annertunerummat.
Taamaammallu
ikaarsaariarnermi aalajangersakkat pineqartut aatsaat immikkut pisoqartillugu
atorneqartarumaarnerat ilimagisariaqarmat.
Naggasiullugu
oqaatigineqassaaq ataatsimiititaliaq allannguutissatut siunnersuummik
taamaalilluni peqqussutissap atuuttulernissaannik siunnersuummik tapersiinera
Naalakkersuisut nuannaarutigimmassuk.
Taamak
oqaaseqaateqarlutik Naalakkersuisut inassutigaat siunnersuut pingajussaanik
oqallisigisassanngortinneqassasoq allannguutissatut siunnersuutaasut
naapertorlugit. Akissuteqaammi eqqaaneqartut naapertorlugit Naalakkersuisut
pingajussaaneerinissamut allannguutissanik siunnersuuteqassapput.
Ruth
Heilmann, Siumut.
Qujanaq.
Tassa ataatsimiititaliami ilaasortat kissaatigisimavaat una isumaliutissiissut
maanngaaniit atuarneqassasoq. Akuerineqarmat qujassutigaara.
Meeqqat
atuarfiat pillugu Inatsisartut peqqussutissaattut siunnersuut pillugu
Inatsisartut Kultureqarnermut Ilinniartitaanermullu Ataatsimiititaliaata
isumaliutissiissutaa aappaassaaneerinissamut saqqummiunneqartoq Inatsisartut
Kultureqarnermut, Ilinniartitaanermullu Ataatsimiititaliaat suliarinninnermini
ukuninnga inuttaqarpoq:
Siuliitaasoq
Inatsisartunut ilaasortaq Ruth Heilmann, Siumut.
Siulittaasup
tullia, 2001-imi ukiakkut ataatsimiinnermit, Inatsisartuni ilaasortaq
Lars-Karl Jensen, Siumut.
Inatsisartuni
ilaasortaq Naimanngitsoq Petersen, Atassut.
Inatsisartuni
ilaasortaq Olga Poulsen, Inuit Ataqatigiit.
Paninnguaq
Olsen, ukiakkut ataatsimiinermi 2001-imi sinniissussaq.
Inatsisartuni
ilaasortaq Mogens Kleist, Kattusseqatigiit.
Inatsisartut
Kultureqarnermut Ilinniartitaanermullu Ataatsimiititaliaata ukiakkut
ataatsimiinnermi 2001-imi siullermeerneqarnerata kingorna meeqqat atuarfiat
pillugi Inatsisartut peqqussutissaattut siunnersuut misissuataarpaa
imaattunillu oqaaseqarfigissallugu.
Siunnersuutip
ataatsimiititaliami suliarineqarneranut atatillugu ataatsimiititaliaq ukiakkut
ataatsimiinermi 2001-imi ukiullu ingerlanerani arlaleriaqaluni
ataatsimiittarpoq. Ilanngullugu ataatsimiititaliamit IMAK aamma KANUKOKA
ukiakkut ataatsimiinnermi 2001-ip nalaani kiisalu 2002-mi upernaakkut
ataatsimeeqatigiumallugit aggersartarsimavai. Aamma Naalakkersuisunut
ilaasortaq Atuarfitsialak pillugu pingasoriarlugu isumasioqatigalugulu
ataatsimeeqatigineqartarpoq.
Ukiakkut
ataatsimiinnermi 2001-mi kiisalu 2002-mi upernaakkut. Taakku saniatigut
ataatsimiititaliaq marloriarluni Kangerlussuarmi isumasioqatigiinnermut 2001-p
upernaavani Atuarfitsialak pillugu siunnersuusiornermi peqataavoq.
Tulliuttumik
ataatsimiititaliap immikkoortut oqaaseqarfigissavai makkuusut. Inatsisissanik
nalilersuineq ataatsimiititaliap nalinginnaasumik isummernera.
Paasissutissiisarnerup ingerlanera, ataatsimiititaliap oqaaseqaatai,
annertusisamik immikkut ittumik ilinniartitsineq, ineqarfiutigalugit
atuartunut angerlarsimaffinni inissat, sanaartugassat iluarsagassalu akunnerit
ilinniartitsiviusussat, piffissap atortuulersitsiviusussap kinguartinneqarnera
atuartunut angajullernut tapiissuteqartarneq aamma ataatsimiititaliap
inassuteqaataa.
Immikkoortoq
1-imi inatsisissanik nalilersuisarfik pillugu, Inatsisartut inatsisissanik
nalilersuisarfiata inatsisissamut siunnersuut misissuataarpaa arlalinnillu
oqaaseqaateqarfigalugu. Ataatsimiititaliap kiipip oqaaseqaatinut taakkununnga
akissutai pissarsiarisimavai paasillugulu pisortaqarfimmit allannguutissatut
inassutigineqartut annertunerpaamik atortuulersinneqarsimasut.
Oqaatigineqassaarli
atuartut sinniisaasa aningaasarsianik pissarsisannginnerat ataatsimiititaliap
pissusissamisuunngitsutut isigigaa.
Angajoqqaat
sinniisaasa aningaasarsiaqartinnerat ataatsimiititaliap
pissusissamisuunngitsutut isigaa. Angajoqqaat sinniisaasa
aningaasarsiaqartinnerat ataatsimiititaliap pissusissamisoortutut isigaa.
Soorlu inatsisissamik nalilersuinikkut oqaaseqaatigineqartutut siunnersuummut
oqaaseqaatigineqartariaqarput uppernarsartariaqartoq taamatut
assigiinngisitsineq naammaginartunik pissusiviusunillu tunngaveqartunik
piumasaqaatitaqartoq imaluunniit assigiinngitsitsineq
atorunnaarsinneqartariaqartoq.
Ataatsimiititaliap
isumaqatigiittup Naalakkersuisut qinnuigissavai atuartut sinniisaat
angajoqqaat sinniisannut sanilliunneqarsinnaasunngorlugit sulinermullu
aningaasaqartilerlugit allannguutissatut siunnersuummik saqqummiusseqqullugit.
Ataatsimiititaliap
pingaartutut isigimmagu atuarfiit siulersuisuini sulinerup
pilerinartunngortinneqarnissaa. Meeqqat atuarfiat pitsaasoq iluarinartoq
angajoqqaat atuartut ilinniartitsisullu akornanni suleqatigiinnikkut
pilersinneqartussaq.
Immikkoortoq
2, ataatsimiititaliap nalinginnaasumik isummernera. Inatsisartut
Kultureqarnermut Ilinniartitaanermullu Ataatsimiititaliaata meeqqat atuarfiat
pillugu Inatsisartut peqqussutissaattut siunnersuut manna pitsaasutut isigaa.
Siunnersuut
meeqqat atuarfianni atuartunut atuartitaanikkut pitsanngortitsinissamik
nuannersumik ilimasulersitsivoq. Inuiaqatigiinnut avatangiisaasunut
sunniisinnaassuseqarluartussaammat.
Atuartitaanikkut
pitsanngortitsineq atuartut tunngaviusumik piginnaasaannik
pitsanngortitsinermik annerulersitsisussaq tamatumalu kingunerisaanik
suliffeqarnikkut imminut pilersorsinnaanerunermut
sunniisinnaassuseqarluartussaq.
Meeqqat
atuarfianni suliassat pingarnerpaat ilagaat atuartut eqqarsartaatsikkut
timikkullu ilisimasaannik piginnaasaannillu ineriartortitsinissaq.
Inuiaqatigiit silarsuarmi allanngorartuartumi ineriartorneranut aamma kikkut
tamat oqartussaaqataatillugit eqqarsartaaseqalernissaannut meeqqaat
atuarfianni atuartut paasinnittarnerat siuarsarneqassaaq.
Meeqqat
atuarfiat pillugu Inatsisartut peqqussutissaattut siunnersuutip
ilusilersorneqarnerani pingaarnerpaavoq meeqqat atuarfiata suliassat
naammassissagai. Tamakku siarsarneqarsinnaanerinut periusissat ilagaat
atuartitsinermi atuartitsissut klassimiluunniit alloriarfimmi sorlermiinneq
apeqqutaatinnagit init atuartitsiviusussat meeqqat samminerullugit
aaqqissuunneqarsimassasut meeraq qitiutillugu.
Maannakkut
meeqqat atuarfiat ukiuni kingullerni annertuumik isornartorsiorneqartarpoq.
Ilaatigut atuartitsinerup pitsaasuunnginnera pissutigalugu. Meeqqat atuarfiani
atuartut naammaginartumik pitsaassusilimmik angusaqartarsimanngillat.
Tamatumalu kingunerisarsimallugu ingerlaqqiffiusunik ilinniaqqinnermi
ilinniagaqartut ilaasa naammassinissaminnut angusatigut
ajornartorsiuteqalersarnerat.
Siunnersuutikkut
siunniunneqarpoq atuarfik ataqatigiiffiunerusoq atuartunik alloarnernik
nukarlernut alloriarnernut akullernut aamma alloriarnermut angajullernut
agguataarisoq. Taamaalillunilu klassit akornanni killiussaasartut akimorlugit
ilinniartitsineqartarluni.
Tamatumap
kingunerissavaa ullumikkornit pitsaanerusumik atuartup ataatsip
pisariaqartitsineranik atuartitsinerup naleqqussarneqarnissaanik
periarfissaqartoqalernissaa.
Ataatsimiititaliaq
ima paasinnippoq. Meeqqat atuarfiat pillugu Inatsisartut peqqussutissaattut
siunnersuutikkut siusinnerusukkut isornartorsiutaasartut tusaaniarneqartut
aaqqiissutissatullu siunnersuummik pitsaalluinnartumik
anguniaqarfiulluartumillu saqqummiussisoqartoq.
Immikkoortup
pingajuat. Paasissutissiisarnerup ingerlanneqartarnera. Siunnersuutip
suliarineqaqqaalenerata nalaani ataatsimiititaliap annertuumik akuutinneqarpoq
ilisimatinneqartarlunilu isumasioqatigiissitsisarnertigut Kultureqarnermut
Ilinniartitaanermullu Naalakkersuisumit isumasioqateqarluni
ataatsimeeqatiginnittarnertigut.
Ataatsimiititaliaq
taamatut ammasumik periuseqarneq taamatullu suleqateqarneq
pitsaalluinanartutut nalilerpaa neriuutigalugulu taamatut suleriaaseqarneq
siunissami Naalakkersuisuni ilaasortani qanoq iliorluni
suleqateqartarsinnaanermut assersuutissaallualerumaartoq.
Immikkoortut
sisamaat, ataatsimiititaliap oqaaseqaatai:
Ataatsimiititaliamit
ilaatigut tusarniaanermi akissutigineqartut aamma siunnersuutip
siullermeerneqarnerani oqaatigineqartut tunngavigalugit
ajornartorsiorfiusartut arlallit oqaloqatigiissutigineqartarput
minnerunngitsumik uku pillugit.
Annertusisamik
immikkut ittumik ilinniartitsineq. Ineqarfiutigalutik atuartunik
angerlarsimaffinni inissat sanaartugassat iluarsagassallu ikinnerpaamik
akunnerit atuartitsiviusussat, piffissap atortuulersitsiviusussap
kinguartinneqarnera. Atuartunut angajullernut tapiissuteqartarneq.
Oqaatigineqassaaq pingaartumik annertusisamik immikkut ittumik
ilinniartitsineq aamma ikinnerpaamik akunnerit atuartitsiviusussat
suliarineqarneranut atatillugu ataatsimiititaliami kommunit KANUKOKA-llu
isummerneri annertuumik pingaartinneqarmata.
Immikkoortoq
4.1; Annertusisamik immikkut ittumik ilinniartitsineq. Meeqqat atuarfiat
pillugu peqqussutissatut siunnersuummut nalinginnaasumik oqaaseqaatini
allassimavoq immikkut ittumik ilinniartitsisarnerup tungaa tamarmik
aaqqissuussaanikkut aningaasalersorneqarnikkullu kommunimiitinneqalissasoq.
Naalakkersuisuni
ilaasortaq naapertorlugu taamatut aaqqiisoqarnissaa kissaatigineqarpoq.
Pissusissamisoornerpaatullu isigineqarmat akisussaaffiup oqartussaanerup
aningaasaqarnerullu akornanni ataqatiittoqarnissaa. Ullumikkut kommunit
atuartut immikkut ittumik annertusisamik ilinniartinneqartussatut
innersuussugisarpai aningaasaqarnikkulli akisussaaffik Namminersornerullutik
Oqartussaniilluni.
Ataatsimiititaliamit
Naalakkersuisunut ilaasortaq isumaqatigineqarpoq oqarami kommunini atuartut
ataasiakkaat pisariaqartitaannik kommunit ilisimasaqarnerusut. Aamma suliamik
suliarinninneq sukkanerullunilu ajornannginnerussaaq kommunit kisimiillutik
atuartoq immikkut ittumik annertusisamik ilinniartinneqartariaqarnersoq
pillugu aalajangiisartussaappata.
Siunnersuut
naapertorlugu perorsaanikkut psykologimullu tunngasunik siunnersuisarfik PPR
siunissami taamaallaat kommuninut siunnersuinerinnarmik suliaqalersussaavoq.
Ataatsimiititaliamit aaqqissuussinerup taamak ingerlalluartigisup
pingaaruteqartigisullu annertusisamik immikkut ittumik ilinniartitsinerup
allanngortinneqarnissaa pissusissamisoorsorinanngilaq.
Tassa
siusinnerusukkut annertusisamik immikkut ittumik ilinniartitsineq kommunit
akisussaaffigisimavaat. Taamatulli aaqqissuussineq allanngortinneqarpoq.
Tamatumalu kingorna oqartussaanerup Namminersornerullutik Oqartussanut
nuunneqarnissaa qinerneqarluni.
Maannakkut
aaqqissuussineq atorsinnaavoq kommunilu najugarisaq apeqqutaatinnagu
atuartunik assigiiaartumik tapersersuinermik qulakkeerinnittarluni.
Perorsaanermut psykologimullu tunngasunik siunnersuisarfiup PPR-ip qitiusumik
inissisimasup aalajangiisuusarnera pissutigerpiarlugu.
Taamaattumik
ataatsimiititaliami tunngavissaqartinneqanngilaq tamatumap
allanngortinneqarnissaata kaammattuutigineqarnissaa.
Aningaasalersuinissaq
eqqarsaatigalugu uparuarneqassaaq kommunimiit kommunimut immikkut ittumik
ilinniartitsisoqarnissaanik pisariaqartitsineq assigiinngisitaartorujussuummat.
Tamatigullu periarfissaqartoqartarani innarluutilinnik immikkut
atuartinneqarnissaanik innersuussisinnaaneq. Taamaattumillu suliassaq tamanna
meeqqat atuarfiata isumagisariaqarlugu.
Aamma
kommuneqarsinnaavoq pisariaqarneratut ikiorsiinissamik neqerooruteqarnissamut
aningaassatigut ilinniakkatigullu nukissaqanngitsunik. Tassunga ilanngullugit
atuartunik immikkut annertusisamik ilinniartitsinissamut eqqarsartaatsikkut
ikiorsiineq peqqussutissatut siunnersuutikkut isummerfigisassanngortinneqarpoq
ataatsimoortumik tapiissutinik agguaassisarnermik kommunikkaartumik
nalimmassaalluni aaqqissuisoqarnissaa.
Ataatsimiititaliap
pissusissamisoornerungaartutut isigaa maannakkutut aningaasat atuartunut
nalimmassarnissaat. Atuartunik annertusisamik immikkut ittumik
ilinniartitsinermi kommuni sorlerluunniit allamut nuuttoqarnerani
kommunimulluunniit nuuttoqarneranik kommuni immikkut ittumik
aningaasartuuteqartinneqalissanngitsoq ataatsimiitialiap annertuumik
pingaartutilittut tamanna isigaa.
Ataatsimiititaliap
isumaqatigiittut Naalakkersuisut qinnuigissavai annertusisamik immikkut
ittumik ilinniartitsinermi ullumikkutut aaqqissuussinerup
attatiinnarneqarnissaa pillugu allannguutissatut siunnersuummik
saqqummiusseqqullugit.
Immikkoortoq
4.2; Ineqarfiutigalutik atuartunut angerlarsimaffinnik sanaartorneq.
Kingullermik ataatsimiititaliamit KANUKOKAp ataatsimeeqatigineqarnerani
oqaatigineqarpoq atuarfitsialaap atortuulersinneqarnerani ineqarfiutigalutik
atuartunut angerlarsimaffinnik pisariaqartitsineq annertusisussatut
naatsorsuutigineqartoq.
Tamanna
pisariaqartuussaaq taamatummi allorfinnut pingasunut nutaanut avitsilluni
aaqqissuussinerup kingunerissammagu atuarfinni ukiunik pingasuni
sivisussusilimmik atuartut angajulliit allorfimmiittut allanngortitsineq
taanna atuartitaanikkut annertunerpaamik pissarsiffigisinnaajumallugu
illoqarfiliartariaqalertarnissaat ilimanarsinnaammat.
Naalakkersuisunullu
ilaasortamit imaannerarneqarpoq maannakkorpiaq amerlanerusunik
sanaartortoqarnissaanik pisariaqartitsoqanngitsoq.
Taamatummi
nutaamik aaqqissuussinermik klassit ataatsit atorunnassammata. Ilanngullugu
nuna tamakkerlugu meeqqat atuarfianni atuartut ineqarfiutigalutik atuartunut
angerlarsimaffinni inissanik sinneruttoqarmat.
Ineqarfiutigaluni
atuarfimmi angerlarsimaffittut init pitsanngorsarneqarsimapput
taamaalillutillu ikinnerulernermikkut maannakkut pitsaassusissamik
piumasarisaasunut eqquutitsisunngorsimallutik. Ineqarfiutigalutik atuartunut
angerlarsimaffinnik initigut qulaani taaneqartutut taamaanneraanik KANUKOKA-p
ilumuunnginnerarpaa. Namminersornerullutik Oqartussani oqaatigineqartunit
ikinnerunerarneqarmata.
Ataatsimiititaliamit
pingaartutut isigineqarpoq atuarfitsialaap aallarnisarneqarnerani
pitsaanerpaamik tunngavissiijumalluni pisariaqartinneqartunik aningaasanik
immikkoortitsisoqarnissaa.
Taamaattumik
aamma ataatsimiititaliamit pingaartutut isigineqarput ineqarfiutigalutik
atuartut angerlarsimaffinni inissat pisariaqartinneqartutut amerlasussaasa
pigineqarnissaat. Ataatsimiititaliap isumaqatigiittup ineqarfiutigalutik
atuartunut angerlarsimaffiit tungaatigut qanoq killiffeqartoqarnerata
misissuiffigineqarnissaa Naalakkersuisunut KANUKOKA-mullu qanoq
pingaaruteqartiginera uparuaassutigissavaa.
Aamma
ingerlaavartumik paasitinneqartarnissaq ineqarfiutigalutik atuartunut
angerlarsimaffinni inissinneqarnerup qanoq ittuunerata maannakkorpiaq
sukumiisumik ilisimatitsissutigineqarnissaa. Taamaalilluni inissaqassuseq
kommunini ataasiakkaani pisariaqartitsinermut piumasaqaatinullu
naleqqussarneqassalluni.
Immikkoortoq
4.3; Sanaartugassat iluarsagassallu. Atuarfiit ineqarfiutigalutillu atuartunut
angerlarsimaffiit illuutaannut sanaartornissamut iluarsaassisarnissamullu
pisussaaffik ullumikkut Namminersornerullutik Oqartussaniippoq. Maannakkulli
meeqqat atuarfiat pillugu peqqussummi aamma meeqqat atuarfiat pillugu
peqqussutissatut siunnersuummi siunertaavoq pisussaaffiup kommuninut
nuunneqarnissaa.
Sanaartornissamut
iluarsaassisarnissamulli pisussaaffik annertuumik
aningaasartuuteqarfiusussaavoq. Pingaartumik kommuninut mikinerusunut
tigussallugu ajornartorsiutitaqartussaq. Ajornartorsiut suli
ilungersunarnerulissaaq illuutit pitsaassusiat inillu ininillu amigaateqarneq
kommunimiit kommunimut assigiinngisitaartorujussuummat.
Ataatsimiititaliaq
isumaqarpoq innuttaqassuseq naapertorlugu kommunit aningaasatigut assigiinnik
atugassaqartittariaqartut. Taamaasilluni nunatsinni sumiikkaluaraanniluunniit
iliniartitaanikkut illutatigullu pitsaassutsit assigiit
neqeroorutigineqartariaqarmata. Taamaattumik ataatsimiititaliap
Naalakkersuisut kaammattorpai isumaqatigiinniarnikkut taakkua KANUKOKA-mut
paaseqatigiissutiginiaqqullugit.
Atuarfitsialak
iluatsissappat nunatsinni atuarfiit allineqarnissaasa iluarsarneqarnissaasalu
atuarfitsialammik siunertarineqartunut aammalu illoqarfinni nunaqarfinnilu
pisariaqartitsinermut naapertuuttumik ingerlanneqarnissaat
ataatsimiititaliamit pingaartinneqarpoq. Atuarfiit sanaartugassatut
iluarsagassatigullu pilersaarusiornerini Naalakkersuisut qanoq iliorlutik
piviusunngortinniarnerlugit pilersaarutaat ataatsimiititaliap arlaleriarluni
ujartortarsimavai.
Ataatsimiititaliaq
isumaqarpoq atuarfiit illutaasa avatangiisaasalu pitsaassusaat atuartut
ilikkaraqarusussuseqarnerannut aalajangiisuusumik pingaaruteqartut.
Ataatsimiititaliap
isumaqatigiittup Naalakkersuisunut ilaasortaq atuarfinnut sanaartugassatigut
iluarsatigullu pilersaarummik piaartumik saqqummiussaqaqqullugit
kaammattussavaa. Taamaasilluni atuafiit illutaat atuarfitsialammi
siunertarineqartumut naapertuuttunngortinneqassamata.
Immikkoortoq
4.4; Akunnerit ilinniartitsiviusussat. Meeqqat atuarfiat pillugu Inatsisartut
peqqussutissaattut siunnersuutaasumi ikinnerpaamik akunnerit
ilinniartitsiviusussat qassiuneri klassinut atatsimut ukiunut nalunaaquttap
akunnerinik 30-nik ikilisinneqarsimasut peqqussutissatut siunnersuummut
tusarniaassutigineqartut naleqqiullugu ataatsimiititaliamit paasineqarpoq.
Siunnersuutaaqqaartumik
siunertaagaluarpoq maannakkut akunnerit ukiunut 11.-12.-nut agguataakkat
ukiunut qulinut agguataarneqassasut. Peqqusutissap nutaap atuutilerneratigut
ukiut aturfiusussat ikilisinneqaraluartut atuartut nalunaaqquttap akunneanik
atuarfissaminnik annaasaqassanngillat.
Peqqussutissatut
siunnersuummut matumunnga oqaaseqaatini oqaatigineqarpoq taamannak akunnernik
ikilisitsineq pissasoq aaqqissuussinerup atortuulersinneqarneranut atatillugu
aningaasartuuteqarnerussutissat ikilisinneqarnissaat siunertaralugu.
Siunnersuummut
oqaaseqaatinik oqaatigineqarpoq kommunit maannakkutut akunnernik
amerlanerusunik neqerooruteqartarsinnaasut. Ataatsimiititaliap
pissusissamisoortutut isiginngilaa nalunaaquttap akunneri ima ikilitigissasut
naatsorsuutigineqartariaqassalluni kommunit nalunaaquttap akunnerinik
amerlarnerusunik tunniussisaqalernissaat.
Ataatsimiititaliamit
naatsorsuutigineqarpoq akunnernik ikinnerpaaffigisassatut amerlassusilinni
illersorneqarsinnaasumik ajornartorsiutitaqanngitsumik
neqeroorutigineqarsinnaasunik aalajangersaasoqarsimassasoq.
Ataatsimiititaliaq
isumaqatigiittoq isumaqarpoq aallaavittut pilersinniakkamut aningaasanik
sapinngisamik iluatsiffiutitsinissamut pisariaqartinneqartunik
aningaasaliisoqartariaqartoq.
Naalakkersuisunit
oqaatigineqarpoq alloriarfiusumik atuartuartitsisarnermi
ilinniartitsisussaqarniarnermilu atuarfitsialammi siunertarineqartutut
vikarinik atuineq aamma nalunaaquttap akunnerinik atuanngitsoortitsisarnerit
annertuumik ikilisinneqarsimanissaat. Ikinnerpaamik akunnerit
ilinniarfiusussat naak ikilisinneqaraluartut ataatsimiititaliamit
neriuutigineqarpoq nalunaaquttap akunneri atorneqavissut ullumikkutut
amerlatigiinnarumaartut.
Siunnersuummut
oqaaseqaatini oqaatigineqarpoq sapaatip akunneranik ataatsimi 1. klassimiit 7.
klassimut alloriarfiusutut ilinniagassatigut suli minutsinik 45-nik
annikillisitseqqittoqassasoq.
Tamannali
ataatsimiititaliap akuersaarsinnaanngilaa. Matumani pineqarput atuartut
ullumikkut peqqussutaasup nalaani atuarnerminnik aallartitsisimasut. Taakku
atualernerminniit ukiumik ataatsimik siusinnerusukkut ukioq atuarfitsik
naammassisussaavaat.
Aammattaaq
ilinniartitsisut atuartitsinerup nutaamik aaqqissuunneqarneranut
ikaarsaariartinneqartussaanerat eqqarsaatigisariaqarmat. Piffissaq
ikaarsaariarfiusumi atuartut ikinnerpaamik akunnerit atuarfigisassaasa
ikilisinneqannginnissaat pillugu ataatsimiititaliap isumaqatigiittup
Naalakkersuisut qinnuigissavai allannguutissatut siunnersuummik
saqqummiusseqqullugit.
Immikkoortoq
4.5. piffissap atortuulersitsiviusussap kinguartinneqarnera. Naalakkersuisut
allannguutissatut siunnersuummik 2002-mi augustimi atuuttuulerfissap 2003-mut
augustimut kinguartinneqarneranik kinguneqartumik saqqummiussaqarput.
Ataatsimiititaliap naammagisimaarlugu maluginiarpaa peqqussutissatut
siunnersuutip atortuulersinneqarnissaanut piffissaliussaq ukiumik ataatsimik
august 2003-mut kinguartinneqartoq.
Tamanna
peqqussutissap iluatitsiviunissaanut tassalu aallaqqaataaniilli
Naalakkersuinikkut ingerlatsisuniit soorluttaaq pisortanit ilinniartitsisunit
atuartunit aamma angajoqqaanit sapinngisamik siammasinnerpaamik
tapersersorneqarnissaa pingaarluinnarpoq. Taamalu atortuulersitsineq aatsaat
pissasoq taamaasiornissamut naatsorsuutigisat pingaaruteqarnerpaat
eqquutsinneqarpata.
Ataatsimiititaliamuttaaq
pitsaasuuvoq allannguutissatut siunnersuummi atuarfiit piareersimasut
maannakkut peqqussummi atuuttumi aalajangersakkat sanioqqunnissaanut
akuersissummik piniarnissaanut aalajangersakkanik ilanngussisoqarnissaa.
Peqqussutissatullu
nutaatut atuutilersussatut naartorsuutigisaq malillugu ilinniartitsineq
aallartillugu. Ataatsimiititaliap isumaqatiittup atortuulersitsinissamut
piffissap august 2003-mut kinguartinneqarnissaa taperserpaa. Ilanngullugu
ataatsimiititaliap isumaqatigiittup atuarfiit piareersimasut august 2002-mi
peqqussut nutaaq malillugu ilinniartitsinermik aallartitsisinnaanerat
taperserlugu.
Immikkoortoq
4.6. Atuartunut angajullernut tapiissuteqartarneq. Naalakkersuisut
allannguutissatut siunnersuummik atuartunut angajullernut tapiissutaasartut
attatiinnarneqarnissaanik kinguneqartumik saqqummiussipput.
Ataatsimiititaliap
isumaqatigiittup atuartut anginerit tapiissuteqarfigineqartarnissaat pillugu
allannguutissatut siunnersuut Naalakkersuisunit saqqummiunneqartoq taperserpaa.
Immikkoortoq
5; Ataatsimiititaliap inassuteqaata. Ataatsimiititaliap isumaqatigiittup
ataatsimiititaliaq qulaani taaneqartutut kaammattuutigissaannut
naapertuuttumik Naalakkersuisut allannguutissatut siunnersuummik
saqqummiussippata siunnersuut tamanna tunngavigalugu
akuersissugitigineqassasoq inassutigaa.
Kultureqarnermut
Ilinniartitaanermullu Ataatsimiititaliaq taamak oqaaseqarluni meeqqat
atuarfiat pillugu Inatsisartut peqqussutissaattut siunnersuut
pingajussaaniigassanngortippaa. Qujanaq.
Daniel
Skifte, Inatsisartut Sulittaasuat, Atassut.
Ruth
Heilmann qutsavigaarput. Taava maannakkut partiit, Kattusseqatigiit
Attaviitsullu oqaaseqartuinut nuuppugut. Siulliulluni oqaaseqassaaq.
Lars-Karl
Jensen, Siumup oqaaseqartua.
Meeqqat
atuarfiat pillugu Inatsisartut peqqussutissaattut siunnersuut manna
siullermeerlugu saqqummiunneqarmat atuarfitsialammut isumalluarnerput oqaatsit
annertuut takisuullu atorlugit ersersittarsimavarput.
Ataatsimiititaliap
isumaliutissiissutaatigut takusinnaavarput Ataatsimiititaliaq peqqissaartumik
sulisimasoq. Nuannaarutigaarpullu isumaliutissiissutip suliarinerata nalaani
kattuffiit IMAK aammalu KANUKOKA aggersarlugit tusarniaanertigut
peqqussutissap atuutilersinneqarnissaanut aaqqitassat Ataatsimiititaliamiit
eqqumaffiginiarneqarsimammata.
Peqqussutissaq
suliarineqalermat oqallinneq annertooq pereernikuuvoq taamaattumillu
maannakkut isumaliutissiissummi saqqummiunneqartut aallaavigalugit
Naalakkersuisut akissuteqaataat Siumumiit paasilluarlutigit
oqaatigeriissavagut.
Taakkulu
aallaavigalugit uani oqaasissagut tulleriinnilerlutigit.
Siumup
aalajangiusimavaa annertusisamik immikkut ittutmik ilinniartitsineq
aaqqissuussaanikkut pisariaqartitsinerlu malillugit meeqqat atuarfiini
kommunimiit oqartussaaffigineqarluni ingerlanneqassasoq.
Taamatut
ingerlatsisoqarnissaani pinngitsoorneqarsinnaanngilaq meeqqat atuarfiisa
perorsaanermut psykologimullu tunngasumik pitsaasumik assigiiaartumillu
qitiusumiit siunnersorneqarlutik immersortuarneqarnissaat. Tassuuna
qulakkeerneqassammat atuartitsinermi najoqqutassat siunertaasunut
naleqquttuunissaat.
Siumumiit
aamma ataatsimiititaliaq isumaqatigaarput aningaasalersueriaatsini tunngasuni
oqarmat aningaasat atuartunut malinnaasariaqartut. Tamanna
pissusissamisoortutut isigaarput isumaqatigalugulu.
Annertusisamik
immikkut ittumik ilinniartitsineq kommuniniit kommuninut amerlaqatigiinnik
atuartoqarfiunngimmat. Aamma ukiup atuarfiusup iluani illoqarfinnut allanut
nuuttoqartillugu aningaasaliissutit malinnaasariaqarput. Tamanna maannakkut
periusiusut malillugit atuarfiup pisortaqarfimmut nalunaaruteqartarneratigut
ingerlareersoq ingerlatiinnarneqassappat Siumumiit tutsuiginartinneruvarput.
Atuarfik
pillugu peqqussutissaq suliarineqalermalli Siumumiit pingaartillugu
oqariartuutigisarparput atuarfitsialammik pilersitsinissami
qulakkertariaqaripput atuartitaanerup pisariaqartinneqartutut
pitsaassuseqarnissaa.
Naalakkersuisut
saqqummiussaatigut maluginiarparput tiimit atuartitsiviusussat
ikinnerpaaffissaat pineqartoq. Tamannalu Siumup akuerseqataaffiginiarpaa.
Tamatumuuna nalunaaquttap akunneri atuartitsiviusut amerlineqasagaluarpata
naatsorsuutigineqassammat nalunaaquttap akunneri amerlissutaasut
ilinniartitsisutut ilinniarsimanngitsunik isumagisassanngortinneqassasut.
Apeqqusertariaqalissallunilu
tamanna atuartut siunertaasutut faginut ataasiakkaanut ilikkarluarnissaannut
pitsaasuunersoq.
Aamma
uani oqaatiginngitsoorusunngilarput ilisimatusarnikkut misilittakkatigut
oqaatigineqartarmat tiimit atuartitsiviit amerlassussaat atuartut
ilikkariartortarnerannut pingaarnerunngitsoq. Pingaarnerusorli tiimit
atuartitsivissat piareersarluarnermit suleqatigiillu akornanni
pilersaarusiorluakkanik aallaaveqartut tassaasartut atuartut
ilikkarluarnissaannut tunngaviliisuusartut.
Siumumiit
aamma pingaartipparput atuarfitsialaap ingerlatitaanerani ilinniartitsisut
ingerlatassanut pikkorissartinneqarnissaat qulakkeersimasariaqartoq.
Taamatuttaaq peqqussummi taaneqanngikkaluartoq isumaqarpugut
ilanngutinngitsoorneqarsinnaanngitsoq ilinniartitsisut atorfigisaminni
aalajaatsumik piffissarlu sivisunerusoq atorlugu ilinniartunut
atuartitsisuusarnissaannik siunertaqarneq aamma atuartut pitsaasumik
angusaqarsinnaanerannik qulakkeerisussaammat. Siunissami
atorfinitsitsisarnermi tamatuma ilusiliivigineqarnissaa
soqutiginaateqarsinnaavoq.
Atuarfitsialak
aallartinneqarpat tamatuma nassatarisussaavaa atuartut nunaqarfiummiut
illoqarfimmut maannakkorniit siusinnerusumik atuariartortalernissaat.
Siumumiit paasilluarparput kommunit amerlasuunik nunaqarfeqartut illoqarfinni
ineqarfiutigalugit atuartuni angerlarsimaffiit naammannersut apeqqusermatigit.
Siumumiit
neriuppugut atuarfiit pillugit peqqussut manna suliarisarput aallaavigalugu
pilersaarusiornikkut takussutissaqalereersimassasoq taamatut ingerlatsinissami
ineqarfiutigalugit atuartunut angerlarsimaffiit pigineqartut naapertuunnersut.
Siumumiit
aallaqqaataaniilli pingaartipparput Atuarfitsialak siunertaasutut pitsaasumik
tunngavissaqarluni ingerlanneqasoq taamaattumik aamma matumani atuarfiit
illutaasa nutartigassat kiisalu atuartunut najugaqarfiutigisunut
naapertuuttumik sanaartugassatigut aningaasaliissutitigullu tulleriiaarinerup
Naalakkersuisuniit eqqumaffiginiarneqarnera nuannaarutigaarput.
Naggataatigut
peqqussutissap uumap suliarineqareerneratigut IMAK qisuariaateqarpoq
eqqaasitsissutigalugu Atuarfitsialaap ineriartornissaanut ilinniartitsisutut
ilinniarsimasunik pisortaqarnissaq pisariaqarluinnartoq.
Siumumiit
tamatuma pitsaasumik naliliiffigineqarnissaa pisariaqarluinnartutut
isumaqarfigaarput.
Taamaattumillu
kaammattuutigissavarput peqqussutissap pingajussaaneerlugu
suliarineqannginnerani Inatsisartut Kultureqarnermut Ilinniartitaanermullu
Ataatsimiititaliaani tamanna nalilersuiffigineqaqqaassasoq.
Siumumiit
taamatut oqaaseqarluta atuarfik pillugu peqqussutissap atuutilernissaa
augustimi 2003-mi pisussatut akuersissutigaarput kaamattuutaasullu malillugit
atuarfiit piareersimasut augustimi ukioq manna 2002-mi peqqussutissaq
malillugu akuerineqarnissaat inassutigalutigu.
Siumumiit
taamatut oqaaseqarluta Naalakkersuisullu allannguutissanut
siunnersuutiginiagaaq akuerseqataaffigalugit ataatsimiititaliap
isumaliutissiissummik saqqummiussaatigut kaammattuutaasut allat ersarissumik
oqariartuuteqartut akuerseqataaffigaagut. Suliallu uumap
pingajussaaneernissaanut IMAK-ip kaammattuutaanut oqariartuutigisarput
ilanngullugu nalilersorluaqqullugu.
Jakob
Sivertsen, Atassutip oqaaseqartua.
Qujanaq.
Meeqqat atuarfiat pillugu Inatsisartut inatsisissattut siunnersuut kiisalu
Inatsisartut Kultureqarnermut Ilinniartitaanermullu Ataatsimiititaliaata
isumaliutissiissutaanut Atassummit imatut oqaaseqaniarpugut. Pitsaasumik
ilinniartitaaneq nunatsinni kikkut tamarmik atorfissaqartitaat
kissaatigisaallu aammalu inuiaqatigiit ineriartortut nammineeriartuinnartullu
atorfissaqartitsinerat najoqqutaralugit qaffasinnerusumik ilinniarfissanut
ikaarsaariarfittalik tassaaginnanngilaq inuttut ataasiakkaatut
piginnaatitaaffik. Aammattaarli tassaavoq inuiaat kikkugaluartulluunniit
tamarmik ineriartornerannut tunngaviusoq pingaaruteqarluinnartoq.
Taamaattumik
nunatsinni atuartitaanerup ilinniartitaanerullu piorsagaanera
nutarteriffigineqarneralu sumillu ilinniartitaanikkut imaqartitaanissaa
tunngaviliisuussapput inuaqatiginnit kalaallini nammineeriartuinnarluni
suliassat sulisussanit pikkorissunit ilinniarluarsimasunillu
amerlanerujartuinnartunit uagut nammineerluta ingerlatsilernissatsinnut
sulisussanik avataaniit ullumikkutuut taamak amerlatigusunik
tikisitsisariaarulluta piginnaanngorsartariaqartugut.
Meeqqat
atuarfiat ineriartornermi pitsanermpaamik angusaqarnissamut ineriartornermilu
mianerisassanut ilikkagaqarnissamut tunngaviliisuulluinnartarpoq. Taamaammat
atuarfik pillugu peqqussutissaq meeqqat ilinniartitaaneranni siunnerfimmik
nutaamik Atuarfitsialammik siunertaqartoq siunissami meeqqat qanoq
ilinniartitaanerannut angusaqarnissaannullu assut pingaruteqarmat matumuuna
Atassummit oqaatigaarput.
Ataatsimiititaliap
isumaqatigiissup Naalakkersuisunut kaammattuutigivaa annertusisamik immikkut
ittumik ilinniartitsisarnerup ullumikkut atuuttup atatiinnarneqarnissaa
pillugu allannguutissamik saqqummiussaqarnissaannik. Piusaqaat Atassummit
taperserparput annertusisamik ilinniartitsisarneq meeqqanut
namminiivissinnaanngitsunut angusaqarluarnissaannut assut pingaaruteqarmat.
Ataatsimiititaliamiit
illoqarfinni nunaqarfinnilu atuarfiit Atuarfitsialammut
naleqqussarneqarnissaat pingaartinneqarmat Atassummit tupiginngilarput.
Sineriatsinni piffinni assigiinngitsuni atuarfiit pisoqalisimaqisut
nutarterneqarnissaat nukinginnarsisimammat. Atuarfiimmi ilaat piaartumik
iluarsaanneqanngikkunik nutaamik atuarfiliortariaqalerneq
pinngitsoorneqarsinnaanngitsoq Atassummit nalunnginnatsigu.
Taamaattumik
Atassummi illoqarfinni nunaqarfinnilu atuarfiit nutarterneqarnissaannut
tulleriiaarilluni pileraarummik takussutissiinissaq assut ataatsimiititaliamit
pingaartinneqarmat Atassummit taperserparput piaartumillu naammassineqarnissaa
Naalakkersuisut suliarissagaat matumuuna piumasaqaatigaarput.
Ataatsimiititaliap
isumaqatigiittup peqqussutissap pilersaarutaasutut atuutilerfissaata ukiumik
ataatsimik tassa augustip aallaqqaataaniik 2003-mut kinguartinneqarnissaa
piumasaqaatigimmagu Atassummit tupiginngilarput ikaarsaariarnermi atortussat
pilersaarusiorluarnissarlu ulluinnarni atuarfinni ingerlatsisuusunit
angajoqqaanillu kissaatigineqartoq tamatumani Ataatsimiititaliap
tusaaniarsimammagu Atassummit pissusissamisoortutut isigalugu aamma
taperserparput.
Taamaakkaluartoq
Atassummit isumaqarpugut piffiit ilaanni atuarfiit Atuarfitsialammut
naleqqussarneqareersimasut ilinniartitsisoqarnikkullu piareersareersimasut
eqqarsaatigalugit augustip aallaqqaataa 2002-miit peqqussutissaq nutaaq
malillugu aallartissinnaanerat ammatinneqartariaqartoq.
Tamakkiisumik
ikaarsaariarnissamut misilittakkat equngassutaasinnaasullu
paasisaqarfigineqarnissaat ilinniutigineqarsinnaanissaallu Atassummit
iluartinnaatinnaateqartut isumaqarfigigatsigit.
Naalakkersuisut
Inatsisartut Kultureqarnermut Ilinniartitaanermullu Ataatsimiititaliaata
isumaliutissiissutaanut akissuteqarnerminni atuarfiup siulersuisuini atuartut
ilaasortaatitaasa akissaateqartinneqalernissaannik anguniagaqarlutik
saqqummiussaat Atassummit assut iluarisimaaratsigit matumuuna oqaatigaarput.
Ajunngitsorsiaqalersitsinikkut
pisussaaffimmik atorluaasinnaaneq kingunerissagaa Atassummiit
naatsorsuutigilluinnaratsigu. Atuarfitsialaap pilersaarusiorneraniit
piviusunngortinniarneqarnissaanut Atassummit ilungersorluta
suleqataasimavugut.
Sapinngisamillu
atuarfiit ulluinnarni ingerlatitaaneranni ilisimaarinnittut tassa
ilinniartitsisut qanimut suleqatigineqarsimapput. Meeqqammi ikaarsaariarnermi
pitsaanerpaamik atuartitaanerminni periarfissinneqassappata ilinniartitsisut
qanimut suleqatigineqarnissaat pingaartorujussuummat.
Ullumikkut
atuarfinni ilinniartitsisuusut ilinniarsimasunik pingaartumik kalaallinik
atuarfiit pisortaqartinniarnerat assorsuaq amigaatigaarput pingaartumik
nunaqarfiit tamatumani eqqarsaatigalugit.
Taamaattumik
Atuarfitsialaap tamakkiisumik atuutilernissaanut peqatigitillugu nunaqarfinni
ilinniartitsisunik ilinniarluarsimasunik amigaateqarnerujussuaq
eqqarsaatigalugu nunaqarfinni ilinniartitsisunngortussanik
piumasaqaateqarsinnaanerup sulissutigineqarnissaa Atassummit piumasaraarput.
Atuarfitsialaammi
atuutilernissaanut nunaqarfinni ilinniartitsisunik ilinniarluarsimasunik
ilinniartitsisussaqarniarnikkut ajornartorsiutinik aaqqiisoqanngippat
ullumikkutuut nunaqarfinni ilinniartitaanikkut angusarineqartartut
illoqarfinni sanilliullugit appasinnerujuaannartussaamata.
Peqqussutissamut
siunnersuutip pingajussaaneerneqarnissaa Naalakkersuisut allannguutissamik
saqqummiussaqarnissaannut nunatsinni ilinniartitsisut kattuffiata allakkatigut
saaffiginnissutai ilanngullugit Inatsisartut Kultureqarnermut
Atuartitaanermullu Ataatsimiititaliaani nalilersorneqarnissaat aamma
Atassummit piumasarissavarput.
Pifissaq
manna iluatsillugu Atassummit oqaatigissavarput ilinniartitaanikkut
nutariuarnissaq aatsaat taamak nunatsinni pingaaruteqartigilerpoq. Kalaallit
Nunarput ukiuni nutaani namminiilivinnissamik siunnerfeqarluni ikaarsaarpoq.
Kalaallit Nunatta asassatta namminiilivinnissaa oqarluartaarnerinnakkut
inuillu taasisinnerinnaatigut anguneqarsinnaanngitsoq tamatta nalunngilarput.
Siunnerfik
aatsaat piviusunngortinneqarsinnaaavoq ilinniartitaanikkut
pitsanngorsaajuarnitsigut inuttullu ataasiakkaatut pisussaaffimmik
atorluaanitsigut sulilluarnitsigullu anguniagaq aatsaat angusinnaagatsigu.
Ukiut
nutaat tikissimavagut angallannikkut niuernikkut ilinniartitaanikkut
tusagassiuuteqarnikkullu. Ineriartornerujussuup nassataanik nunarsuarmi
innuttaaqataalersimavugut qaammataasa aqqutigalugit nunarsuarmi sumiluunniit
pisut ingerlaannartumik malinnaaffigisinnaalersimavagut. Tassa piusut
ullumikkut taamaapput.
Taamaattumik
sianigilluinnartariaqarparput kalaallit uagut immikkoorniarnermik
pilersitsissannginatta ilinniartitaanerpulli ima aaqqissuuttariaqarparput
nunarsuarmioqatigiit peqatigiikkaluttuinnarnerannut piumasarisaannut
periarfissanullu naleqqussartuartariaqarluta. Taamatut oqaaseqarluta
Ataatsimiititaliap isumaliutissiissutaani Naalakkersuisunut kaammattuutaasut
akuersaarpagut.
Naalakkersuisullu
akisuteqaataat aamma akuersaarlutigit. Peqqussutissatullu siunnersuutip
taamatut iluseqarluni pingajussaaneerneqarnissaanut akuersilluta
taaseqataassagatta matumuuna oqaatigaarput.
Ataatsimiititaliamillu
suliareqqitassat Atassummit suleqataaffigissagatsigit matumuuna aamma
oqaatigaarput. Qujanaq.
Olga
Poulsen, Inuit Ataqatigiit oqaaseqartuat.
Qujanaq.
Siullermik nipera utoqqatsissutigilaassavara. Neriuppunga ajussanngitsoq.
Inuit Ataqatigiit qujassutigissavarput nunatta siunissami
pingaaruteqarluinnartumik ingerlatsisussaasa pitsaasumik
atuartinneqarnissaanut aqqutissiuinerup naammassileraluttuarnera.
Atuarfitsialaap
ukiuni kingullerni inuppassuit peqataffigisaannik suliarineqarneranut Inuit
Ataqatigiinninngaanniit nuannersumik pissarsiffiusumillu suleqataasimavugut.
Suliaq imaannaasimanngilaq sapinngisarlu tamaat atorlugu tamanit
naammagisimaagassanngorlugu ingerlanneqarpoq.
Inuppassuit
meeqqaniit immikkut ilisimasallit ilanngullugit suliamut uunga atatillugu
suleqatigisarsimavagut. Piffissaq manna iluatsillugu suleqatigisarsimasagut
Inuit Ataqatigiinniit qutsavigerusuppagut.
Inuit
Ataqatigiinniit iluarisimaarparput ataatsimiititaliamit allannguutissatut
siunnersuutigisat Naalakkersuisunit tusarniarneqarmata. Atuarfiup
siulersuisuini angajoqqaat meeqqallu inissisimanerisa assigiinngissuseqarnera
paasilluarsinnaavarput. Taamaattorli atuartut siulersuisuini peqataanermikkut
ajunngitsorsiaqarsinnaalernissaat qularinngilarput sulerusussutsimik suli
annermik atuartut akornanni pilersitsiumaartoq.
Inunnut
ataasiakkaanut tunngatillugu atuartut peqataasannginnissaat Inuit
Ataqatigiinniit tapersersorparput isumaqaratta ilaatigut inunnut
ataasiakkaanut tunngassuteqartut ima atornarsinnaatigisartut meeqqanut
atuartunut akisusaaffigitissallugit tulluartuunani.
Immikkut
annertusisamik atuartitsinerup Namminersornerullutik Oqartussaniit
ingerlanneqaannarnissaa siunertaralugut Naalakkersuisunut siunnersuummut
allannguutissamik siunnersuuteqarnerat pitsaasutut isigaarput.
Taamaaliortoqaneratigut
nunatsinni immikkut atuartittariallit assigiimmik
periarfissaqartittuaannarnissaat qulakkeerneqassammat.
Siunissami
sinerissami atuartut kolligiani pisariaqartitsilernissaannut Naalakkersuisut
paasinnissimanerat aammalu ineriartorneq naapertorlugu malinnaajuarnermik
neriorsuuteqarnerat akisussaaffimmik tigusinertut Inuit Ataqatigiinniit
isigaarput. Taamatuttaaq sinerissami illoqarfinnippat
nunaqarfinniippalluunniit atuarfiit illutaasa pitsanngorsaavigineqarnissaannut
pilersaarusiornissamut tunngavissiuiniarneq minnerunngitsumillu atuarfiit
illutaannut akisussaaffiup ersarsissumik sumiinneranik Naalakkersuisut
akissuteqaatiminni oqaatiginninnirat Inuit Ataqatigiinniit
oqaatigerusupparput.
Tiimit
ikinnerpaaffissaannut tunngatillugut Naalakkersuisut nassuiaataat
paasilluarlugu Inuit Ataqatigiinniit tusaatissatut tigujumavarput. Nunatsinni
atuarfik imarisamigut avatangiisimigut sulisoqarnermigullu ingerlalluartoq
atorfissaqartipparput. Atuarfimmik taamaattumik atorfissaqartitsivugut
siunissami ingerlatsinitsinni nammineerluta sulisussatsinnik
pilersorsinnaanerulernissarput anguniagarigatsigu.
Taamatut
angusaqarniarnitsinni atuarfitsialak aqqutissatut isigaarput. Taamaattorli
qularinngilarput anguniagarput iluatsissappat atuarfiup ingerlanneqarnissaanut
sutigut tamatigut Namminersornerullutik Oqartussat KANUKOKA-llu
suleqatiginnartuarnissaat pisariaqartoq.
Taassumap
saniatigut pisariaqarluinnarpoq ulluinnarni angajoqqaajusugut atuarfimut
ilinniartitsisunut meeqqatsinnullu tapersersuijuaannarnissarput.
Nalunngilarpummi sunaluunniit tapersersuinernik ilaqartinneqanngikkaangami
iluatsinnissaa ungasinnerusartoq.
Taamaattumik
kikkut tamaasa kaammattorusuppagut atuarfiup Atuarfitsialaalluni
ingerlanissaanut peqataaqqullugit siunissami nunatta ingerlanneqarnissaanut
sulisussagut pitsaanerpaamik angusaqarsinnaaqqullugit.
Inuit
Ataqatigiinniit taamatut oqaaseqarluta atuarfik pillugu peqqussutissatut
siunnersuut pingajussaaniigassanngortipparput.
Mogens
Kleist, Kattusseqatigiit oqaaseqartuat.
Qujanaq.
Atuarfik pillugu Inatsisartut peqqussutissaattut siunersuummut
aappassaaneerneqarneranut Kattusseqatigiinninngaaniit imatut naatsumik
oqaaseqaateqassagut.
Nuannaarutigaarput
ukioq kingulleq Inatsisartutigut Atuarfitsialammut tunngatillugu oqallinnermi
oqariartuutigisimasagut tassalu peqqussutissap ukiumik ataatsimik
kinguartinneqarnissaa Naalakkersuisuniit tusaaniarneqarsimammat. Taamatut
kinguartitsiniarnermut oqaaseqaatigisimasagut tassa ukioq kingulleq
innersuussutigissavagut.
Ataatsimiititaliap
piffissaq annertooq atorlugu suliani suliarisimavaa. Ullumikkullu
Inatsisartunut saqqummiuppaa Atuarfitsialaap toqqammavissaa. Taamaammat
Ataatsimiititaliap isumaqatigiilluni saqqummmiussaanut annertunerusumik
oqaaseqaateqarata peqqussutissatut siunnersuut akuersaassallugu
Kattusseqatigiinniit oqaatigissavarput.
Taamaattorli
oqaatigerusupparput kommunit kattuffianniit aammalu ilinniartitsisut
kattuffianniit oqariartuutigineqartut ataatsimiititaliamiit
eqqumaffigeqqullugit suliassap pingajussaaneerneqannginnerani. Tassami
pingaaruteqarpoq suliassaq pitsaasumik naammassineqarnissaa tamatta
anguniaratsigu aammalu attuumaassuteqartut eqqumaffigeqqusaat tamaasa
maluginiassallugit pingaartuteqarmata.
Taamatut
naatsumik Kattusseqatigiinnit oqaaseqarluta suliassap
aappassaaneerneqarneranut tunngatillugu oqaaseqarpugut. Siornatigullu
oqaatigisimasagut innersuussutigalugit. Qujanaq.
Per
Berthelsen, attaviitsoq.
Meeqqat
atuarfiat pillugu Inatsisartut peqqussutissaattut siunnersuut pillugu
Kultureqarnermut Ilinniartitaanermullu Ataatsimiititaliap
isumaliutisissiissusiaa atituumik isumaqatigaara. Naak ilaatigut
takorlooruminartikkaluarlugu anguniakkap qanoq ililluni qaqugulu
anguneqarnissaa. Tassami suli amigaataalluinnarmata ilaatigut ataatsimoortumik
tulleriaarinermi takussutissat aammalu tassunga atatillugu
aningaasaliissutissat qanoq qaqinniarneqarneri.
Immikkut
annertusisamik atuartitsinermut atatillugu isumaqatigilluinnarpara
siunnerfiusoq tassalu aammalu inassutigineqartoq tassalu aningaasat atuartoq
malittassagaat. Taannami aqqutigalugu atuarfiit assigiinngitsut
assigiinngitsuniittut periarfissaat assigiissarneqassapput. Tamannalu
iluarisimaarneqartariaqarpoq.
Isumaqarpungali
suli nalilersuinissaq pingaarluinnartuusoq. Minnerunngitsumik eqqarsaatigalugu
akunnerit atuartitsissutissat ikililerniarnerisigut qulakkeerinninnissaq
tamatuma pinissaa qulakkeerniarlugu tassalu atuartitsinerup
illersorneqarsinnaasumik ingerlajuarsinnaanissaa. Aammalu taamatut
aaqqiiniarnermi kommuninut aningaasartuutit qanoq innissaannut nalersuinissaq.
Tassami
ernumassutigineqarsinnaavoq akunnerit atuartitsissutissat ikililerneqarpata
kommunit ataasiakkaat aningaasatigut nanertorneqarnerat annertusisinnaasoq.
Kommunini ataasiakkaani pissutsit piviusut aallaavigalugit amerlanerusunik
akunnernik atuartitsinissaq pisariaqartutut isigineqarpat. Isumaqarpungalu
tamakkua pingajussaaneerinnitsinnani Kultureqarnermut Ilinniartitaanermullu
Ataatsimiititaliami nalilersorneqarluassasut.
Eqqaamajuartigulugu
inerisaaneq siuarsaanerlu oqalulluarnerinnakkut pilersinneqarsinnaanngimmata.
Otto Steenholdt, attaviitsoq.
Siullermik oqaatigissavara maani oqaaseriumasakka siusinaarlugit suliaasimammata. Tassa ataatsimiititaliap sulinera utaqqeqqaarnagu, kisianni saniatigoorujussuanngimmata malugeqquinnassavara.
Atuarfitsialak oqallisigigaangatsigu uanga tulleriiaarisarpunga immaqa allaalaartumik. Ilinniartitsisut ilinniarluarsimasut siulliutittarpakka, meeqqat tulliullugit taavalu kingulliullugu atuarfik. Isumaqarluinnarama ilinniartitsisut qanoq pingaaruteqartigisut. Ilinniartitsilluarsinnaanerat ilinniarluarsimanerat tassaasarmat allunaasaq siaarluarsimasorlusooq atuarfik iluamik ingerlassaguni aqqutissaa.
Taamaattunik ilinniartitsisunik pikkorissunik ilinniartitsisoqartut meeqqat aatsaat tassuuna iluamik angusaqarsinnaapput. Takusarpara oqarluartaarut meeqqat qitiutillugit. Tusarneraluaqaaq kisianni meeqqat iluamik ilinniartitsisoqanngitsut iluamik angusassaqanngillat. Taakkualu marluk kattuffigissavaat ilinniartitsisut ilinniarluarsimasut meeqqat ilinniarluaritassat atuarfimmi pitsaasumi ataatsimoorlutik suleqatigiittut.
Ukiuni makkunani naalisaasanerujussuit uanga iluarinngisama ilagaat IMAK iluamik tusarnaarsimanngikkaanni qanoq isumaqarnersoq aasiit paatsiveqanngitsoq, kisianni paasivara ilinniartitsisut meeqqat atuarfianneersut kattuffiat.
Taamaakkaluartoq kisianni assut taanna qutsavigissavara siusinaartumik sulininni taakkua allagaat assut toqqammavigisimagakku.
Tassa inatsisissap matuma siullermeerneqarnerani qarsupissimasara kiisalu annilaajallaatigalugu eqqarsariaatigisimasara tassanngaaniit tassa IMAK-iminngaanniit Inatsisartunut ilaasortanut agguaanneqarmat. Taannalu assut iluatigalugu ataatsimiititaliamut eqqarsaatigilluaqqullugu oqaatigisassasara tassa avataaniit ilisimatinneqarsimagama siunissami atuarfiit pisortassaannut ilinniartitsisutut ilinniarsimanissaq piumasarineqanngitsoq. Aamma uani inatsisissami pisortamik qulequtaqartoq atuarluaqattaaraluarpara piumasarineqartorli nassaassaanngilaq.
Siullermik allanneqarsimagaluarpoq atuarfiup pisortaa atuartitsinermik ilisimasaqartuussasoq tamanna naluneqanngitsutut peqanngilaq. Kisiannili erseqqissarneqarani pisortaq qanoq ittoq atorfinitsinneqassasoq. Tassa oqaaseqatigiit peerneqarsimasut taakkua paragraf 44 tassaniissimagaluarput. Tassa taanna piumasaqaannarluni pisortaq atorfinitsinneqartussaq atuartitsinikkut pisinnaasaqassasoq. Pisinnaasaqassasoq piumasaqaatigineqaannarluni.
Eqqarsaatigineqarsinnaavoq ilinniartitsisuunngivissoq atuarfimmi pisortanngortoq nalilerneqaannarluni atuartitsinikkut pisinnaasaqartoq. Taanna eqqortuusorinanngilaq. Aamma ilinniartitsisut amerlaqaat atuarfinni pisortanngorusuttartut. Allanit ingiarniarniarneqassagunik avataaninngaaniit tulluartuunngilaq.
Ilinniartitsisut ilinniarluarsimasut aamma pisortanngornissamut kisimilluunniit aqqutissiuunneqartariaqaraluarput. Tassa ilinniaritsisuusimasutut piumasarissavara uanga Atuarfitsialak aterminik eqquutitsissaguni ilinniartitsuinnik ilinniartitsisoqartariaqartoq. Taakkuninngalu tassa aqutsisussaq tassaassaaq pisortaasussaq pinngitsuunngivilluni ilinniartitsisutut ilinniarsimasuusoq.
Taamaanngikkuni aqutassani ilinniartitsisut aamma ilinniarluarsimasut aqulluarsinnaanavianngilai. Tassa Ataatsimiititaliamut pinngitsoornagu assorujussuaq nalilersoqquvara qulaani uparuagara allaat imatut siunnersuuteqarfigerusullugu soorlu IMAK-iminngaaneersup taamatut piumasarigaa §43-mi immikkoortut siulliat ima ilaneqaqqullugu pisortatut atorfinitsinneqartussap atuartitsinikkut pisinnaasaqarnissaa tassa ilinniartitsisutut ilinniarsimanissaa piumasaqaataavoq.
Aamma suli kingusinaartigata avataaniit nipinut tusarnaarniarnerusariaqarpugut. Oqartarpugut aamma uanga privatimik atuarfissamik siunnersuuteqarninnut taassumalu kinguartinneqarneranut ippassaaniinnannguaq oqarpunga qamannga qutsatigalugu taanna kinguartinneqarmat pitsaalluinnartumik pilersaarusiorlugu aallartinneqartussaanissaanut tamanna pisariaqassappat.
Aamma taamatorluinnaq isumaqarpunga atuarfitsialak pillugu qujanartumillu aamma paasivara Naalakkersuisut tamanna tusaanialersimagaat. Tassa suliaq nukingiunnagu eqqortumillu suliaralugu ingerlattariaqartoq.
Tassa taamaattumik inatsisip atortuulernissaanut ulluliussaq ersarissumik nipperlugu kinguartikkallaqqusaq avataaniit iluamik nalilersortariaqarpoq. Ilami aamma uanga uparuartuutit imaannaanngitsut takullugillu tusareerlugit ukiumik ataatsimik kinguartitsisinnaaneq sulilluarnissamut tunngavissiisinnaasutuut isigilerakku. Tassa aamma paasivara IMAK-iminngaaniit aamma KANUKOKAminngaaniit aamma taamak isumaqartut. Tassa Ataatsimiititaliamut tunniukkusutakka aajuku pisortap ilinniartsisutut ilinniarsimasuunissaa aalajangiunniaqqullu
gu aappassaanillu inatsisip atortuulernissaa ukiumik ataatsimik kinguartikkallaqqullugu.
Ruth
Heilmann, Siumut.
Qujanaq.
Tassa nuannaarutigeqaara ataatsimiititaliaq sinnerlugu taamatut partiit,
Kattusseqatigiit attaviitsullu Per Berthelsen aammalu Otto Steenholdt taamatut
akuersaartumik Ataatsimiititaliap isumaliutissiissutaanut oqaaseqarmata.
Ilumoorpoq
ataatsimiititaliap piffissaq annertooq atorlugu isumaliutissiissut
saqqummiutassani suliarisimagaa tassani aamma Kattusseqatigiit taamatut
oqarnerat isumaqatigilluinnarpara. Aammalu Per Berthelsenip isumaqataanera
atituumik pisoq taamatut oqaatigimmagu aamma nuannaarutigaara.
Soorunami
uani oqaaserineqartut pingajussaaneerneqartinnagu aamma Ataatsimiititaliap
nalilersortussammagit taamaattumik Otto Steenholdt qinnuigisariaqarpoq
allakkatigut saqqummiutassani Ataatsimiititaliamut apuussinnassappagit aamma
iluaqutaassagaluartoq tunngavilersuinitsinnut.
Naalakkersuisut
akissutaat aamma qujassutigingaarpara tassani tamakkiisumik
isumaliutissiissummut aamma allannguutissanut siunnersuutigisatsinnut
akuersaartumik aamma oqaaseqarmat.
Tassani
atuartut sinniisaat aamma ilaasortaasut akissaateqartinneqalernissaannik
immikkoortitaanatik angajoqqaatullu pineqarnissaannut tunngatillugu aamma
akissuteqarput angajoqqaat ilaasortaatitaasa akissaataat pingajorarterutaatut
annertutigisut aamma naatsorsuisoqarsimalluni iliuuseqartoqarsinnaasoq.
Tamanna
ataatsimiitiliami soorunami eqqartoqqissavagut aamma tassani
siunnersuutigineqartut allannguutissatut siunnersuutissat Naalakkersuisut
pingajussaaneerneqartinnagu neriorsuutigivaat tunniutissallugit.
Taamaattumillu taasinissamik ataatsimoortumik isumaliutissiissutip taassumap
taasissutigineqarnissaa siulittaasup sillimaffigilaassagaa oqaatigissavara.
Siumuminngaaniit
Lars-Karl Jensen aamma naggataatigut kaammattuutigisaa tassa IMAK
ilinniartitsisut meeqqat atuarfianni kattuffiat taanna suleqatigilluinnarlugu
Ataatsimiititaliami ingerlasimavugut. Taamaattumillu aamma nuannaarutigaara
taamatut pingajussaaneerneqartinnagu ilinniartitsut taamatut kattuffiat aamma
ilisimatitsissuteqarmat pingaarutilimmik. Tassa atuarfiit pisortaasa
ilinniartitsisutut ilinniarsimasuuniissaat tamanna pingaartillugu aamma
allaaserimmassuk. Aammalu tunngavilersuutaat paasilluarpagut. Taamaattumillu
qilanaaraara Ataatsimiititaliami taanna pingajussaaneerneqartinnagu aamma
saqqummiiffigissallugu.
Kisianni
naatsorsuutigaara aamma soorunami Ataatsimiititaliami ilaasortat aamma tamanna
allagarsissutigeermassuk aamma sillimaffigiumaaraat. Ilumoorpoq aamma Inuit
Ataqatigiit oqaaseqarneratigut aamma saqqummiussaminni erseqqarissaraat
angajoqqaat Atuarfitsialammut tunngatillugu annertuumik tapersersuillutillu
suleqataanissaat.
Taanna
Atuarfitsialaap ingerlanneqarnerani Ataatsimiititaliamit pingaartorujussuartut
oqaatigisarparput tassami angajoqqaat tassaapput meeqqaminnut akisussaanerpaat
taamaattumillu aamma atuartitaaneratigut malittarinnittussat. Kisiannilu
soorunami aamma ilinniartitsisut ilinniarsimasuunissaannik aamma Atassutip
ilaatigut tamatut isumalimmik erseqqarissaateqarnera aamma soorunami
ataatsimiititaliami taanna pingaarteqaarput ilinniartitsisut amerlasuut
ilinniarsimasut pigisariaqarpagut Atuarfitsialaap pitsaasumik iluatsinnissaa
eqqarsaatigalugu.
Taamaattumik
inissaqartikkusuppagut aamma Ataatsimiititaliami piffissaqartikkusullugit
ilinniarititsisut pikkorissarnissaminnut aamma periarfissaqartinneqarnissaat.
Tassami ukiup ingerlanerani ilinniartitsisut atuartuutitik qimallugit taamatut
pikkorissanermik annertuumik ingerlaqarnerat aamma meeqqanut
sunniuteqarnerluttarnera taanna ataatsimiititaliami eqqartorsimavarput.
Taamaattumillu
tassuunakkut atuartitsinerup piareersarluagaasumik ingerlanneqarnissaanut
aamma sillimmartitaarluni ilinniartitsisut pikkorissarnissaannut
nukissaqarnissaq aamma tassani silimaffigisariaqartoq erseqqissaatigalugu.
Tassa
imaappoq ilinniartitsisut pilersaarusiorluarnissaat ataatsimoorlutik
pingaaruteqarpoq. Taamaattumik tassani alloriarnermiittut ilinniaritsisut suli
ullumikkornit ataatsimoornerulernissaminnik piumasaqarfigineqarput. Aammalu
taanna nalunngilara ilinniaritsisut iliuusissaq nuannaralugu tigugaat. Aamma
tigujumaaraat.
Isumaqatigeeqigatta
isumaliutissiissut taamatut saqqummiussarput pillugu qujassutigaakka
oqaatigineqartut. aammalu qilanaaralugu pingajussaaneerneqartinnagu
Ataatsimiititaliami ataatsimeeqatigeeqqinnissarput.
Jonathan
Motzfeldt, Naalakkersuisut Siulittaasuat, Siumut.
Naalakkersuisuninngaaniit
nuannaarutigaara isumaqatigiinneqaqimmat. Taamaattumillu aamma
annertunerusumik oqaaseqarfiginagu pingajussaaneernissaanut
innersuussuteqarnissaq maannakkut piareertutut oqaatigisariaqarpoq.
Aammalu
taamatut paaseqatigiinneq qujassutigalugu udvalgimi inaarsagassanut
tunngatillugit Naalakkersuisuninngaaniit
saqqummiussassagut neriorsuutigineqartut aamma naammassiniarumaarpagut.
Aamma
erseqqissaassutigilaavinnassavakka arlalinnguit oqaatigineqartut uani
ilaatigut peqqussutissami aaqqissuunneqarnerani tunngaviusussaammat siunissami
kommunit atuarfimmut oqartussaassusiat ingerlatsinermilu akisussaanerat
maannamut ingerlanerminngaaniit pitsaanerusorujussuarmik
ilusilerneqarnialersoq.
Tassa aamma
maannakkut namminersornerulersimanerup kinguneranik killiffigaarput ingerlatat
taaneqartartut Naalagaaffiup ingerlatassaattut isigiukkagut ukiorpassuarni
aamma atuarfik tassaniippoq. Taanna maannakkut kommunit tassalu meeqqat
angerlarsimaffittalu eqqaani atuarfiit ingerlanneqartut kommunit peqatigalugit
aaqqissuussinerit tassaniittut ingerlanneqalissapput. Taanna pingaartuvoq
aamma eqqaassallugu.
Ilaatigut
oqaatigineqarpoq aningaasat tungaatigut isumaqatigiinnginniarnerit immaqa
erseqqinnerusariaqartut. Tassa siullermik oqaatigissavara aappaagumut taanna
aallartinnissaanik aalajangigaq ukioq mannalu aamma pisinnaasunik
aallartitsereerneq periarfissinneqarnerat nuannaarutigaara. Tassanilu
oqaatigissallugu soorunami Naalakkersuisut naliliiniarnerminni manna tikillugu
atuartitsinermi minnerpaaffissatut piusarisatut minnerpaaffissatut
isigineqartut aallaavigalugit taava ima paasisariaqarpoq inuiaqatigiinni
meeqqat ilisimasassaat atuarfitsinni minnerpaaffissaat aallaavigalugit
naliliinerit qiviassagaanni aningaasatigut aamma naatsorsuinerit tassaniittut
ilanngullugit ukiuni tulliuttuni tallimani ukiut tamaasa maannamut
naatsorsuigallarnerput najoqqutaralugu pitsaassuseq ajunngitsoq aallaavigalugu
ullumikkullu killiffigisimasaminngaaniit ingerlariaqqiffissatut kiffigisamit
najoqqutaralugu.
Ukiut
tamaasa 6-8 millionit missaanni nalilimmik taanna pitsaassuseq uagut
nalilerparput ukiuni tulliuttuni tamaasa aningaasartaqarnissaa.
Oqaatigissavara
pitsaassuseq taamak ittoq qinerneqarpat aallaaviullunilu taava taassumap
qaavatigut kommunit namminneq akisussaaffigigamikku akileraarutillu namminneq
akisussaaffigalugit taava atuarfimminnik aamma annertunerusumik
ingerlatseriarnissaminnut kiffaanngissuseqarniarlik. Aamma taamaalilluni una
peqqussutissaq suliarisaavoq.
Taamaattumik
Kalaallit Nunaanni takoreerparput aamma ilaatigut ukiut kingulliit
Atuarfitsialammut ikaarsaarialernermi misileraarnerit ingerlanneqarsimaneri
najoqqutaralugu kommunit ilaat piareersimapput ukioq manna
aallartissinnaallutik, piareersaasimapput misileraanermilu aamma
ingerlaqataasimallutik.
Taamaattumillu
ingerlatsinissamut taamaattumut aamma ilai piginnaanngorsarsimapput tamannalu
aamma nuannaarutissaavoq atoriaqarsimaneralu qujassutissaalluni.
Siumup
oqaaseqartuata oqaatigisaa una isumaqatinartilluinnagara aamma maluginiarpara
ilisimatusarnikkut misilittakkatigut oqaatigineqartarmat tiimit atuartitsiviit
amerlassusaat ilikkalertornerannut pingaarunngitsoq. Pingaarnerusorli tiimit
atuartitsiviit piareersarluarnermut suleqatiillumi akornanni
pilersaarusiorluakkamik aallaaveqartoq Siumup oqariartuutaa taanna uanga
paasilluarsinnaavara neriuppunga aamma allat paasilluarsinnagaat.
Takorloorneqarsinnaanngilaq
tiimit amerleqattaarujussuarnerisigut kisiat ilisimasassat tunniunneqartartut.
Tamatta atuarfimmiissimavugut nunaqarfinnilu illoqarfinnilu. Taamaattumik
ilikkakkagut aamma imaanneq ajorput tiimerparujussuarnik issiatitaalluta
atuarfimmiinnitsigut.
Ilikkakagut
pissuteqartaqaat atuartitsisoq kinaanersoq. Qanoq pikkorilluni
pilersaarusiorluarluni atuartitsinersoq nunaqarfimmi illoqarfimmiluunniit.
Tamakkua aamma isumaannarniarneqarneri atuartitsisut
pikkorissarneqarnissaannut pilersaarusiat atuartitsinermik qullersaqarfiup
aallartippai. Nunaqarfinni pisortat ukiarumiit pikkorssarneqarneri
aallartissapput taannalu aamma atajuartumik neqeroorutaassaaq. Tiimilærerit
pikkorissarneqarnerat aallartereerpoq. Aamma ingerlassalluni. Aamma
sermitsiamik atuarsimasut ullumikkut takusinnaavaat aamma nunaqarfinni
atuarfiit siunnersortissaannik inerisaavimmi atorfimmik maannakkut
pilersitsisimagatta. Taanna inuttassarsiorparput nunaqarfinni taamaalilluni
atuarfiit aamma inerisaavik aqqutigalugu immikkut isumagineqarnera
tassaniittoq pitsanngorsarneqarnissaa aamma siunnerfigalugu.
Aamma
Atassumminngaaniit oqaaserineqartut tapersiissutit ilanngullugu
oqaatigineqartuni aammalu allanit taanna aamma oqaatigineqaraluartoq
nuannaarutigalugu Jakob Sivertsenip Atuarfitsialaap aamma anersaavanik aamma
uagutsitulli paasinnissimanera isumaqarpunga qutsatigissallugu aamma.
Ilumoorluinnaqqissaarpoq
ilinniartitaanerput ullumikkut silarsuarmi aamma avatangiisitsinnut qiviarluni
aaqqissuuttariaqarpoq aamma taamaaliorluni pilersaarusiugaavoq maannakkut.
Silarsuarmi aamma avatitsinni inuunermik paasisimasaqarnissaq aammalu taakkua
qanoq ilillugit unammiuaarnerisigut allatigullu pitsanngorsaatissat
anguneqarsinnaasut atuarfiup taamak ittup sianigissagaa aamma tikkuarneqarpoq.
Aamma
taamatut Inuit Ataqatigiit oqaaseqartuianit maluginiagara nuannerisara Olga
Poulsenip aamma taasaqarfigaa. Uani atuarfimmi maannakkut Atuarfitsialammik
pilersaarusiat nuannersut ajugnngitsut siunertaqarluartullu iluatsissappata
ulluinnarni angajoqqaat atuarfimmik soqutiginnillutik ilinniaritsisunik
suleqatiginnillutik aammalu kaammattuillutik meeqqaminnik tapersersuillutik
inissisimanissaanik Olga Poulsenip oqariartuutaa atuarfiup Atuarfitsialaap
iluatsinnissaanut sunniuteqartussaavoq annertuumik.
Taava aamma
allat oqaaseqarfigisaa aamma Mogens Kleistip oqaaseqarnermini tikkuagaa tassa
ilinniartitsisut kattuffiata oqariartuutaasa alaatsinnaanneqarnissaannut
tunngasut aamma partiit allat oqaaseqartuininngaaniit taaneqartut. Ilumoorpoq
tassani aamma tikkuaasoqarsimammat aammalu maannakkut uparuarneqartut
tassaniittut tunngavigalugit oqaloqatigiinnerit udvalgimi aamma
ingerlateqqinniarneqarmata. Aamma oqaatigissavara Naalakkersuisuninngaaniit
Naalakkersuisoqarfimmiillu atuartitsinermut qullersaqarfimmi
nakkutigineqarluinnaqqissaarmat uani iluatsinniarneqartussat Atuarfitsialammi.
Ilinniartitsisut aamma suleqataanissaannik annertuumik pitsaasumik
aaqqinissamik tunngaveqassammata.
Taamaattumik
IMAK-ip saaffiginnissutaa aamma Naalakkersuisuni misissuataassavagut. Aammalu
taakkua misissuataarneqarnerat soorunami siuliini attaveqartarsimanitsinnut
tunngatillugu aamma misissuataarumaarlugit.
Taavalu
aamma ilinniartitsisunut tunngatillugu oqaatigilaassavara una
Atuarfitsialammik soorunami ilinniartitsisunut annertoorujussuarmik
suliakkersuutaanissaanut takorluinngikkaluarluta ima kingunilimmik aamma
ilinniartitsisut akissarsiaasalu allatigullu pissarsiassaanik aamma
annertunerusumik kinguneqartussanik. Taamak takorluuineqanngilaq uani
saqqummiussami.
Takorloorneqarput
suliffiup maannakkut ilinniartitsisutut suliffigisap nutaamik
aaqqissuunneqarnera. Taamaalillunilu pilersaarusiorluakkamik aaqqissuussamik
ilinniartitsisup pikkorissup ilinniartitsisussat pikkorissut qanoq
atorluarneqarnissaat taamaalilluni piffissani taakkunani atorluarneqarnerat
pilersaarusiorneqassammat.
Soorunami
tamanna nutaamik aamma tjenestetidsaftalemik taaneqartartumik tassa suliffiup
tungaatigut isumaqatigiissutissanik aamma pisariaqartitsinera naapertorlugu
uterfigineqartarumaarpoq.
Tassa
imaappoq maannakkut Atuarfitsialak nunatsinni piareertutut oqaatigisariaqarpoq
maannakkut aappassaaneerneqarnerani taamaattumik taasissutigineqarnissaa
maannakkut isumaqarpunga tunngavissaqalersoq. Allannguutissallu uagut
tungitsinninngaaniit Naalakkersuisuninngaaniit suliassagut
pingajussaaneerneqarnerani naammassineqarsinnaapput.
Daniel
Skifte, Inatsisartut Siulittaasuat, Atassut.
Naalakkersuisut
Siulittaasuat qutsavigaarput. Erniinnannguaq atuarfik pillugu Inatsisartut
peqqussutissaattut siunnersuutip aappassaaneerneqarnerani taasisoqassaaq.
Kultureqarnermut Ilinniartitaanermullu Ataatsimiititaliap isumaqatigiittup
isumaliutissiissummini allannguutissatut siunnersuummik Ataatsimiititaliami
inassuteqartunut naapertuuttumik Naalakkersuisut saqqummiusseqqullugit
qinnuigai.
Naalakkersuisut
aappassaaneerinissamut allannguutissatut siunnersuummik saqqummiussinngillat.
Allanngutissatut siunnersuummi Ataatsimiititaliap kissaataatut
tamakkiinngikkaluartumik malinnittumik pingajussaaneernerunissamut
saqqummiussinissartik Ataatsimiititaliamut ilimasaarutigaat.
Partiit
oqaaseqartui aammalu Inatsisartuni oqaaseqartut tamarmik avataaninngaaniit
saaffiginnissutit tapullugit nalilersoqquvaat. Taamaattumik siunnersuutip taamak
iluseqarluni pingajussaaneerneqarnissaminut ingerlaqqinnissaanut maanna
taasisoqassaaq.
Taavalu
apeqqutigissavara kikkut siunnersuut taamak isikkoqarluni
pingajussaaneerneqannginneranilu Kultureqarnermut Ilinniartitaanermullu
Ataatsimiititaliami suliarinqassasoq isumaqatigaat. Qinnuigissavakka
isumaqataasut nikueqqullugit. 29. kikkut isumaqataanngillat. Soqanngilaq. Kikkut
taaseqataanngillat soqanngilaq. Najuuttut tamarmik.