Oqaluuserisassani immikkoortoq 94-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqarnat, sisamanngorneq 25. april 2002, nal. 15:30
Ataatsimiinnermik aqutsisoq: Anders Andreassen, Inatsisartut Siulittaasuata tullia, Siumut.
Josef Motzfeldt, Inuit Ataqatigiit.
Suleriaatsitsinni §32 naapertorlugu Inatsisartut aalajangiiffigisassaatut siunnersuut imaattoq saqqummiuppara.
Inissiat Namminersornerullutik Oqartussat suliusuinut aammalu nalinginnaq attartortittakkanut naatsorsuussat pisortanit pigineqartut qanoq angissusilerneqartarnerat Inatsisartuni aalajangiivigineqaqqaassasumik siunnersuut.
Sanaartornerup ingerlasimaneranut nassuiaammut uiggiullugu oqaluuserineqarsinnaasut taamani siunnersuutitut nassiukkakku oqaasertalersimavara.
Ukiut amerlanngitsut tassalu 1990-ikkut qiteqqunneraniit inissiat marlunnik initalinnik pisakkagut 45 kvadrat missaanik angissuseqartut ullumikku 70 kvadratmeterit qaangerlugit angissusilerneqartalersimapput. Suna toqqammavigalugu aamma kimit kikkunnit tamanna aalajangerneqarsimanersoq aamma Inatsisartut allattoqarfianit ilisimaneqanngilaq.
Aningaasat aningaasanut inatsisikkut atugassiissutigineqartartut amerliartunngillat. Taamaakkaluartoq siuliani assersuutitut taaneqartup takutippaa aningaasat killeqaleriartornerannut naapertuutinngitsumik soorlu sanaartornermut ingerlatsisoqartoq. Aammami atuarfitsialaap illutaasa qaffasissusilerneqarsimanerannut taamaappoq. Taamaattumik kissaatigaarput Naalakkersuisut periuseq atugartik Inatsisartuni nassuiaateqarfigissagaat.
Tamatumunngalu uiggiullugu Inatsisartuni oqaluuserineqartariaqarpoq aalajangiissarnerit Inatsisartut susassaqarfigilluinnagaat aningaasaliissartutut. Taamaattu aatsaat atuutsilersinneqartassasut Inatsisartunit oqaluuserineqareernerisigut.
Jørgen Wæver Johansen, Ineqarnermut, Attaveqarnermut Pilersuinermullu Naalakkersuisoq.
Inatsisartunut ilaasortap Josef Motzfeldt siunnersuutigaa inissiat attartortittakkat pisortanit pigineqartut atorfimmut atasut inissiallu nalinginnaasumik attartortittakkat angissusilerneqartarnerini oqartussaassutsip Inatsisartunut tunniunneqarnissaa.
Siunnersuut Naalakkersuisut tamakkiisumik taperserpaat imaattunillu tamanut tunngatillugu oqaaseqassallutik.
Inissiat angissusilerneqartarnerat inatsisiliornikkut aalajangersagaanngilaq. Maleruagassarli allanneqarsimanngitsoq atorneqartarsimavoq. Nalinginnaavoq inissiap marlunnik initallip 45 kvadratmeterit missaannik inoqutigiinnullu inissiat anginerpaat tassa arfineq marlunnik initallit 120 kvadratmeterit missaannik angissuseqartarnerat.
Kisianni inoqutigiit inissamik pisariaqartitsinerat taamaaginnartuunngilaq. Inoqutigiillu sissamanik inuttallit tamarmik inissamik assigiimmik pisariaqartitsisuunngillat. Nunani sanilerisatsinni soorlu Canadami Islandimilu inissiap angissusissaanut piusaqaatit ukiut 20-t kingulliit ingerlaneranni aamma annertusiartorsimapput. Inuit ullumikkut anginerusunik amerlarusunillu pequteqartarput ukiut 20-t matuma siornamut naleqqiullugu.
Maannamut assersuutigalugu inoqutigiinnut marlussunnik meeralinnut inissiaq 80 kvadratmeteri naleqqussimavoq. Taamaattoq Naalakkersuisut oqaatiginngitsoorusunngilaat inissiat angissusiinut Naalakkersuisut anginerulersitsisuusimannginnerat. Kommunit ataasiakkaat sanatitsisutut inissiaatimik qanoq angissuseqarnissaannik matumanittaaq teknikkikkut pitsaassusissaannut atortulersorneqarnerannut angissusilerneqarnerannullu aalajangiisuusoq.
Kommunit inissiaataannut attartortittakkanut tapiissutit pillugit Namminersornerullutik Oqartussat nalunaarutaata iluarsaanneqarnera Naalakkersuisut aallartereerpaat. Iluarsaassinerup ilaatigut kingunerissavaa 6040 atorlugu sanaartornerup aqutsivigineqarnerata kommuninit namminermit isumagineqalersinnaanissaa.
Ullumikkut kommunit sanaartornerup aqutsivigineqarneranut A/S Inissiaatileqatigiiffik INI sulisussarsiarisussaavaat. Iluarsaassinermik tassani inissiat marlunnik initallit 60 kvadratmeterinik anginerunnginnissaannik inissiat pingasunik initallit 85 kvadratmeterinik anginerunnginnissaannik inissiat sisamanik initallit 110 meterinik anginerunnginnissaannik inissiallu sisamanik initallit 130 kvadratmeterinik anginerunnginnissaannik aalajangersagaq ilanngunneqassasoq Naalakkersuisut siunnersuutigaat.
Immikkorluinnaq pisoqartillugu maleruagassat taakku sanioqqunneqarnissaannut Naalakkersuisut immikkut akuersissuteqarsinnaatitaassapput.
Immikkut akuersissuteqarsinnaatitaanissamut tunngaviuvoq inissiat nalinginnaasut aamma pisortat atorfimmut atasumik inissiaataat soorlu najukkami nakorsanut kommunaldirektørinut suliffeqarfinnut pisortanut Naalakkersuisunut ilaasortanut Inatsisartut Siulittaasuannut aningaasaqarnermut ataatsimiititaliami siulittaasumut il.il. inissiat Inatsisartunut ilaasortap Josef Motzfeldt aalajangiiffigisassatut siunnersuutaanut pineqartunut ilaammata.
Taamatut oqaaseqarlutik Inatsisartunut ilaasortap Josef Motzfeldtip siunnersuutaata akuersaarneqarnissaa Naalakkersuisut taperserpaat.
Daniel Skifte, ataatsimiinnermi aqutsisoq.
Ineqarnermut Naalakkersuisumut qujavugut. Maannakkut partiit Kattusseqatigiit Attaviitsullu oqaaseqartuinut nuuppugut.
Per
Rosing-Petersen, Siumut.
Qujanaq.
Inatsisartunut ilaasortap Josef Motzfeldtip aalajangiiffigisassatut
siunnersuutaa imatut oqaasertalik Pisortat inissiaataata attartortittakkat
inissiat Namminersornerullutik Oqartussat sulisuinut naatsorsuussat
nalinginnaasumillu attartortittakkat ilanngullugit angissusilerneqarnissaannik
oqartussaassutsip Inatsisartunut tunniunneqarnissaanut aalajangiiffigisassatut
siunnersuut Siumumiit imatut oqaaseqarfigissavarput.
Siunnersuuteqartup
una qaqitaa una soqutiginaateqarpoq tassami ilumoorami inissiani
angissusiliiniarnermi manna tikillugu allattorsimanngitsut
malinneqartarsimammata.
Taamaattumik
Siumumit paasilluarlugu siunnersuut tapersissavarput ilassutigalugulu
oqaatigalugu Naalakkersuisut akissuteqaateqarnerminni inissiat
assigiinngitsut ilaqutariit qanoq angitiginerannut naapertuuttut
toqqammavigalugit qanorlu amerlatigisunik sinittarfeqassanersut
tunngavigalugit maannangaaq aalajangersimasumik toqqammaveqartalernissaat
Naalakkersuisut siunnersuut aallaavigalugu sulissutiginiarneqalermat.
Sulissutiginiakkat
taagorneqartut tamaasa Siumumiit ilalernartuutippagut. Taamatut oqaaseqarluta
innersuutigissavarput siunnersuutip aappassaaneertinnani ataatsimiitaliami
suliarineqarnissaa.
Godmand
Rasmussen, Atassut.
Inatsisartunut
ilaasortaq Josef Motzfeldt siunnersuutaa apeqquteqarnertuut
nipeqarnerugaluartoq
Atassummiit imatut oqaaseqarfigissavarput.
Saqqummiussisup
soorlu oqaatigeeraa nassuiaammi tunulliullugu oqaluuserineqarsinnaanera
periarfissatuut taasimagaa. Naalakkersuisut akissuteqaamminni oqartussaanerup
Inatsisartunut tunniunneqarnissaanik isummernerat Atassummiit tapersissavarput.
Akissuteqaammili kommunit aalajangiisinnaassuseqarnerat immikkut
ataqqiniarneqarsimanera ajunngitsutuut isigalutigu.
Siunnersuummi
kiisalu Naalakkersuisut akissuteqaataat imminnullu naapiffeqarneri ersarimmata
taamaattoq Naalakkersuisut aammattaaq immikkut qanoq iliuuseqarsinnaanermik
ammaffigimmassuk Atassummit iluarsimaarparput. Atassummiit taamak
oqaaseqarluta siunnersuut taperserparput.
Paninnguaq
Olsen, Inuit Ataqatigiit.
Inuit
Ataqatigiit nuannaarutigaarput Inatsisartunut ilaasortaq Josef Motzfeldtip,
Inuit Ataqatigiinneersup, pisortat inissiaataasa attartortittakkat inissiat
Namminersornerullutik Oqartussat sulisuinut naatsorsuussat
nalinginnaasumillu attartortittakkat ilanngullugit angissusilerneqarnissaanni
oqartussaassutsip Inatsisartuni tunniunneqarnissaannik siunnersuutaa
Naalakkersuisut tamakkiisumik tapersermassuk.
Inatsisartut
taamaalillutik periarfissinneqarput inissiat angissutsimikkut inoqutigiit
qanoq amerlassuseqarnerat naapertorlugu inigisassat qanoq
angissuseqarnissaannik aalajangiisarnissamut. Tamanna pingaaruteqarpoq
siunissami inissialiornikkut ineriartortitsinermi inoqutigiinnut
naleqquttumik oqimaaqatigiinnerusumillu piorsaanissamut. Inuit Ataqatigiit
inassutigissavarput Naalakkersuisut inissiat qanoq angissuseqarnissaannut
killiliussassatut siunnersuutaat Inatsisartut ineqarnermut
ataatsimiititaliaata oqaluuserisassap aappassaaneerneqannginnerani
ataatsimoortumik isummerfigissagaa.
Inuit
Ataqatigiit inissiat angissusissaatut siunnersuutigineqartut
isumaqatiginartikkatsigit oqaatigereersinnaavarput. Taamatuttaaq
Naalakkersuisut immikkut akuersissuteqarsinaatitaanissamik kissaatigissaat
isumaqatigalutigu.
Taamatut
oqaaseqarluta Inuit Ataqatigiit qujassutigaarput Inatsisartunut ilaasortap
Josef Motzfeldt aalajangiiffigisassatut siunnersuutaa taperserneqarmat.
Mogens
Kleist, Kattusseqatigiit.
Qujanaq.
Aalajangiiffigisassatut siunnersuut tamakkiisumik taperserusupparparput.
Tassami ullumikkut naliliiffigiisariaqartutut isigigatsigu init
attartortittakkat eqqarsaatigalugit. Taamatut kvadratmeterinik
qaffaasimanerat soorunami sanaartornermi akinut apparsaataasinnaanerat
tungitsinninngaaniit ilimagivagut. Taamaattorli ullumikkut sanaartornermi akit,
eqqarsaartigalugit nalimmassaanissat Kattuseqatigiinniit oqaatigerusuppavut.
Qanoq
aaqqiissoqarsinnaanersoq sukumiisumillu sammineqarnissaa oqaatigerusupparput.
Tamaattumik iluaqutai aammattaaq ajoqutai qanimut, qulaajarneqarnissaat
kissaatigissavarput.
Taamaammat
Kattusseqatigiinniit aalajangiiffigisassatut siunnersuutip
aappassaaniinnginnerani, ataatsimiititaliamut tassani Ineqarnermi
ataatsimiititaliamut innersuussutigerusupparput aappassaaniinnginnerani.
Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Mogens
Kleist qutsavigaarput. Tulliullunilu oqaaseqassaaq Per Berthelsen, attaviitsoq.
Per
Berthelsen, attaviitsoq.
Nunatsinni
ajornartorsiut tassaavoq, inissiat ikippallaarnerat. Tassanilu taamaattumik
angissusaat taanna apeqqutit oqimaannginnerusunut ilaavoq.
Ajornartorsiullu
tassa taanna tassalu inissiat ikippallaarnerat aallaavigalugu politikkikkut
aamma aalajangiisariaqarpugut.
Aammalu
isumaqarluinnarpunga innuttaasut takorusunnerussagaat, inuiaqatigiinni
aningaasat amerlanerusunik inissialiornermut atorneqarnissaat, angissusaat
tassani salliutillugu apeqqutaatinnagu.
Aammami
puigussannginnatsigu inissiat alliartortillugit taakkua ingerlannerannut
angingaasartuutit aamma qaffakkiartortarmata.
Taamaattumik
aningaasatitta killeqareersut, atorluarnissaat ilaatigut eqqarsaatigalugu
isumaqatigilluinnarpara, siunnersuuteqartup aamma taakkartuinera ilaatigut
kvadratmeterit tassani qummut killeqartinnissaat. Tassani nuannaarutigaara
takullugu Naalakkersuisut tamakkiisumik siunnersuuteqartup Josef Motzfeldtip,
Inuit Ataqatigiinniinngaanneersup siunnersuutaa taperserlugu.
Aappassaaneerneqartinnagulu ataatsimiititalianut susassaqartunut
ingerlatinneqarnissaa uangattaaq ilalerumavara.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Per
Berthelsen qutsavigaarput. Tulliulluni oqaaseqassaaq Josef Motzfeldt.
Josef
Motzfeldt, Inuit Ataqatigiit.
Oqaaserineqartunut
qujavunga, aamma immikkut oqaaseqarfigerusutara tassaavoq siullertut
Naalakkersuisut akissuteqaataat.
Soorunami
assersuuteqajaasarpugut nunanut sanilerisatsinnut. Isalndikkunni Canadakkunni
aningaasarsiornerup qaffakkiartorsimanera, nunatsinni aningaasatigut
ullumikkut atugarisatsinnut sanilliutissagaanni, taamatut oqaannarluni
sanilliussiniarneq uani apeqqummi pissusissamisuunngitsutut uanga
isigerusuppara.
Aamma
ukiut 20-t matuma siorna naleqqiullugu amerlanerusunik pequteqartartut
anginerusunillu pequteqartartut uani soqutiginaateqarnerunngilaq. 1990-ikkut
qiteqqunneranni pissutsit assersuuppakka ullumikkut 2002-mi
pissusiulersimasunut.
Aammalu
kommunet oqaatigiinnassallugu kommunemi pisuupput, taamatut angissusiilarnerup
taamatut annertuseriarsimaneranut. Namminersornerullutik oqartussat
Inatsisartut aqqutigalugit 60%-imik nalinginnaq uagut
aningaasalersuisuuvugut.
Taamaammat
aamma aningaasaleqataanermik piumasaqaateqarsinnaaneq, imaasiallaarnaq
qarsupiinnarneqarsinnaanngitsutut uanga oqaatigerusuppara.
Siunnersuuteqartutut.
Inissaaleqineq
oqaaseqartup kingulliup Per Berthelsenip oqaatigisaa, nunatta nunatsinni
innuttaasut akornanni erloqissutaasa angisuut sorlaqarfigaat, inissiat
majuartarfeqarfiini sinngumasut illoqarfissuarni ilisimavagut.
Matumani
siunnersuuteqarninni qulequtsiussanni qulequtsiussanni taasara tassaavoq,
Namminersornerulluni oqartussat sulisuinut aamma nalinginnaq
attartortittakkanut naatsorsuussat Pisortanit pigineqartut inissiat pivakka.
Naalakkersuisut
siulittaasuata Inatsisartut siulittaasuata aningaasaqarnermut
ataatsimiititaliap siulittaasuata, immikkut inissaqartinneqarnissaanik
Inatsisartut aaliangersaasimanerat, imaluunniit aaliangersaasoqarsimanera
tassani pineqanngilaq.
Aammalu
Inatsisartut ineqarnermut ataatsimiititaliaata siulittaasuata Atassutip
oqaaseqartua, oqaaseqarfigissagukku uparuaannassavara, ugguuna oqarmat una
apeqqutitut nipeqarnerugaluartoq, qulequtaa atuarukku, aaliangiisarnerup
Inatsisartunut utertinneqarnissaa aaliangersaasarneq Inatsisartuni
tigummineqassasumik oqarama, taanna apeqqutitut isigissagukku
ataatsimiititaliami siulittaasuuffinni naammassinnissinnaanera ajoraluartumik
apeqquserusuppata matumuuna.
Kisianni
nalinnginnaasumik partiininngaannit oqaaserineqartut Naalakkersuisullu aamma
akissuteqaamminni aallaqqaataani tamakkiisumik tapersersuinerminnut oqarnerat
apeqqusersorneqarsinnaagaluartoq, qujassutigaara.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Josef
Motzfeldt qutsavigaarput. Tilliulluni oqaaseqassaaq Naalakkersuisunut
ilaasortaq, Jørgen Wæver-Johansen.
Jørgen
Wæver-Johansen, Ineqarnermut, Attaveqarnermut Pilersuinermullu
Naalakkersuisoq, Siumut.
Isumaqarpunga
allamut sangutitsiniaqattaarneq tamaanga killeqartariaqartut. Aamma
assortuunniaannarluni manna assortuuffittut atorneqartariaqanngilaq.
Oqaaseqartut
tamarluinnarmik siunnersuutigineqartoq taperserpaat. Tapersiisut
tunngavilersuipput assigiinngitsunik aamma taamaappoq Naalakkersuisut,
kisianni tamakkiisumik taperserparput, aamma piumasaqaateqarsinnaaneq
isumaqatigigatsigut siunnersuteqarpugut, qanoq
piumasaqaateqartoqarsinnaanersoq.
Taamaattumik
uani tapersiinerput tamakkiisoq, tassaniippoq aamma taamatut isumaqarpoq.
Naggataatigut
oqaatigilaassavara, ajoriffissaqartinnginnatsigu kissaatigineqarpat
ataatsimiititaliami misissorneqarnissaa, aamma ataatsimiititaliaq
kissaatigissappagu isumasiorneqarsinnaanerput taanna periarfissaammat
immitsinnut neqeroorpugut.
Daniel
Skifte, ataatsimiinnermik aqutsisoq, Inatsisartut Siulittaasuat.
Naalakkersuisumiut
ilaasortamut qujavugut. Tulliulluni oqaaseqassaaq Godmand Rasmussen.
Godmand
Rasmussen, Atassut.
Naatsuararsuarmik.
Una utoqqatsitsissutigissavara oqaaseqaammi oqaaseq issualaassagakku.
Suna
toqqammavigalugu aamma kimit kikkunnit tamanna aaliangerneqarsimanersoq
Inatsisartuni aamma Inatsisartut allattoqarfianni ilisimaneqanngilaq. Taanna
paasiuminaatsissimagakku taamaattumik isumaqarpunga ajuallaatigisimassagukku
assut utoqqatserfigissavakkit.
Aamma
kikkulluunnit tamatta paasinnittaaserput assigiinngilaq. Aammalu uannit
apeqqusiisinnaanerit assorujussuaq apeqquserusuppara imaalillugu, ukiut
siusinnerusut aamma uanga ilinnut apeqqusiisarsimaqaanga taamatorpiaq,
taamaattumik una oqaaseq isumaqarpunga anissagukku tulluartuusoq,
ajorteqanngittortassi miloqqaarlinga. Qujanaq.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Godmand
Rasmussen qutsavigaarput. Tulliuluni oqaaseqassaaq Josef Motzfeldt,
Josef
Motzfeldt, Inuit Ataqatigiit.
Qujanaq.
Naalakkersuisumut ilaasortamut ajorinninniaannarlunga oqaaseqarninnut,
qujavunga Naalakkersuisut akissuteqaatertik ima aallartimmassuk titarnertaata
aappaanni, siunnersuutip Naalakkersuisut tamakkiisumik taperserpaat.
Kisiannilu
Naalakkersuisuni ilaasortaalluni innuttaasut sinnerlugit oqaaseqassagaanni,
torinngitsunik ilaartorneqarsimanera uani oqaluuserineqartumi
attuumassuteqangaanngtsut Canadami Islandimilu inissiat ukiuni 20-ni
annertusiartorsimasut, ukiut 20-t kingulliit ingerlaneranni pequtit
annertusiartorlutillu amerliartorsimasunik oqaluunerit, kommunet kisimik
pisuunerarlugit oqalunnerit, naluara tamakku
ilanngunneqartariaqarsimagaluarnersut. Taakkuukua apeqqusiinnarikka.
Daniel
Skifte, ataatsimiinnermik aqutsisoq, Inatsisartut Siulittaasuat, Atassut.
Taava Josef
Motzfeldt qutsavigaarput. Akissuteqassaaq Naalakkersuisuni ilaasortaq.
Jørgen Wæver-Johansen,
Ineqarnermut, Attaveqarnermut Pilersuinermullu Naalakkersuisoq.
Isumaqarpunga
maani Inatsisartuni oqaluuserissallugit pingaarnerpaat tassaasut,
aaqqiissutissat
suut siunnerfigineqarnissaat maani inuiaqatigiinni. Taakkulu
isumaqatigiissutigisinnaasagut aallaavigalugit ingerlatsinissarput. Taamaattumik
Naalakkersuisut tamakkiisumik tapersiinerat aammalu angissutsimik
siunnersuuteqarnerat innersuussutigalugu, Josef Motzfeldt taamatut
akissuteqarfigerusuppara.