Samling
Teksten mangler
| Anthon Frederiksen UKA-2003-110-01 |
ulloq, 18. november 2003 |
Allanik aningaasarsiorfiusinnaasunik ujartuinissaq pillugu Naalakkersuisut peqquneqarnissaannik Inatsisartut aallajangiiffigisassaattut siunnersuut.
Kattusseqatigiit sinnerlugit Nunatsinni aningaasarsiorfiusinnaasunik allanik ujartuinissap pimoorunnerullugu sulissutigineqarnissaa pillugu Naalakkersuisut peqquneqarnissaasa saqqummiunneqarneranut soorunami Kalaallit Nunatta siunissami nammineernerunissaanut aamma pitsaanerusunik toqqammaveqarnissaq Kattussqatigiinniit pingaarteqingatsigu taamatut saqqummiussaqarpugut.
Siunnersuummik oqallissaarutitut saqqummiutatta ilagaat nunatsinni aalisakkanik tunisassiassat tunisassiornermi tunisassiat ilaatigut nunanut allanut suliareqqitassanngorlugit imaluunniit suliarisassanngorlugit annissuunneqartarnerat, soorunami tupinnanngitsumik aalisakkanik tunisassiorneq eqqaavarput, taanna nunatsinni aningaasarsiuutitta suli pingaarneresarimmassuk. Aammalu aalisakkanik tunisassiornermi ilaatigut aalisagaqarfinniik tunisassiassanik nutseraluni angallassisarnerit akikitsuinnaanngimmata.
Tamatta nalunngilarput suut tamarmik imminnut annerusumik annikinnerusumilluunniit ataqatigiimmata, taamaattumik Kattusseqatigiinni aamma pingaartitatta ilagaat; tunisassiornerup sapinngisamik imminut akilersinnaasumik ataqatigiissaalluakkamillu ingerlanneqarnissaat pingaaruteqarmat, minnerunngitsumik aamma tunisassianut akitsorsaataavallaanngitsumik ingerlanneqarnissaa anguniarlugu. Naluneqanngimmammi nunatta iluinnaaniluunniit assartuinermut aningaasartuutit annertoorujussuusut.
Taamaattumik taakkununnga ilanngullugu Nunatsinni tunisassiat sapinngisamik naammassereernerullugit nunatsinniik avammut tunineqartarnissaat Kattusseqatigiinniit Nunatsinni aningaasarsiornermut aammalu Nunatsinni aningaasat amerlanerusut kaaviiaartinneqarnerulernissaannut iluaqutaasinnaasoq qularutiginngilarput.
Soorunami aamma tunisassiat naammassereerlugit avammut tunineqartarnissaat pingaaruteqaraluartoq aamma tunisassiat nutaajutillugit Nunarsuup ilaani toqqaannartumik tuniniaavinnut timmisartut atorlugit ukiuunerani tuniniarneqartarsinnaanerat Kattusseqatigiinni isumarput naapertorlugu periarfissanut pitsaasunut ilaatinneqartariaqartoq, tassa pingaartumik ukiuunerani qaleralinnik aalisakkanillu allanik uninngatitsiinnarnerup saniatigut avammut niuersinnaaneq aamma aningaasarsiorfigineqarsinnaasoq.
Taakkua saniatigut imermik sermimillu tunisassiorneq suli annerusumik aallunneqartariaqartoq Kattusseqatigiinniit aamma siusinnerusukkulli oqaluttarfik manna atorlugu piumasaqaatigiuartarsimavarput, soorlu maannamut ilaatigut Qeqertarsuarmi puilasup ernganik tunisassiorsinnaanerup piaarnerusumik piviusunngortinneqarnissaa. Tassami Qeqertarsuarmi erngup avammut tunisassiarineqarsinnaaneranut tunngasut suli annerusumik angusaqarfiunatik ukiup qulit anguai, uffalu Nunarsuup ilaani imermik amingaateqarneq annertoorujussuusoq naluneqanngikkaluartoq.
Takornariaqarnikkut aningaasarsiornerup annertusineqarnissaa aamma Nunatsinni isumalluutit annertuut ilagaat, taamaattumik Nuup Ilulissallu mittarfiisa 1199-meterinut tallineqarnissaat maannamut aamma takornariartitsinerup annertusineqarnissaanut akimmiffinnut ilaavoq, tassa Nunatta aningaasarsiornikkut suli annerusumik iluanaaruteqarsinnaanera ullumikkut mittarfiit taakku imminut akilersinnaasumik ingerlareersut tallineqarnerisigut aningaasat amerlanerusut Nunatsinnut isaatinneqarsinnaanerat aqqutissiuunneqassammat ilaatigut aamma tallimanngormat Sermitsiakkut Ilulissat mittarfiata tallineqarnissaanut tunngasut ajunngilluinnartut saqqummiunneqartut Ilulissani inuutissarsiornermut takornariaqarnermullu pisortap allaaserisai kommune-mi aamma annertuumik tapersersorneqartut innersuussutigerusuppakka.
Ila Nunatsinni aningaasarsiornissamut periarfissarpassuarnik peqarpugut tamakkiisumik-una atorluaanngiinnartugut, taamaattumik aamma aningaasarsiorfigisinnaasatta aningaasaliiffiginissaat Kattusseqagiinni isumarput anguniakkavut naapertorlugit tunuarsimaarfigineqartariaqanngillat.