Sisamanngornikkut apeqquteqaatit |
|
||
Siullermeerneqarnera | Aappassaanneerneqarnera | Pingajussaaneerneqarnera |
Sisamanngorneq
2. oktober 1997 nal. 15.25
Ataatsimiinnermik
aqutsisoq: Inatsisartut Siulittaasuat Anders Andreassen.
Anthon
Frederiksen, apeqquteqaateqartoq, Kattusseqatigiit:
Inatsisartut
ukiakkut 1997-imi ataatsimiinnissatsinnut apeqquteqaatiginagu kisiannili
oqaluuserisassatut siunnersuutitut nassiussimagaluarpara, tassa Danmarkimut
peqqissariartartut kalaallit atugaasa pitsanngorsarneqarnissaanut tunngasoq,
kisiannili apeqquteqaatitut ullumikkumut inissinneqarsimavoq, aammali
taamaakkaluartoq takusinnaavara oqaluuserisassani immikkoortoq 29-imi
ilanngunneqarsimasoq.
Imatullu
allassimavunga; pissutsit qanimut takullugit napparsimasullu tikillugit,
oqaloqatigalugit tupinnaqaaq kalaallit Danmarkimut peqqissariartartut ilaasa
naammangittassusiat, minnerunngitsumik pingaartumillu qallunaatut
oqalussinnaanngitsut nutserisoqarnerup tungaatigut ajunngitsumik
sullinneqarnissaat pisariaqarluinnarpoq, tassami akuersaarneqarsinnaanngilaq
napparsimasoq nutserisussaminik Rigshospitalimi gangimi assersuutingalugu
ullaakkut arfineq pingasup eqqaaniit ulloq tamaat naallugu nutserisumik
utaqqisinneqassappat, soorlu upernaaq napparsimasup ilaata taama
misigisaqarsimanerminik oqaluuttuukkaanga, atsaallu ualineratigut ilaquttamik
ilaannik pulaarneqarnerminik taassuminnga nutserunneqarluni nakorsamik
oqaluussisinnaasimalluni.
Pissutsit
taamaattut ajorluinnarput iluarsisariaqarlutillu, aamma
akuersaarneqarsinnaanngilaq napparsimasut ilaat ukiut sisamat Danmarkimiittoq
nappaatinilu pissutingalugu Nunatsinnut angerlarsinnaasimanngitsoq
ilaquttaminik piffissami taama sivisutigisumi allaat marloriaannarluni
tikeraarneqartarsimappat, allaallu tikeraarnerup tikeraartitsinermi
ineqarnermut nerisaqarnermullu tunngasut, napparsimasup nammineerluni
akilersortariaqarsimallugit, pissutsit taamaattut isumaqarpunga aamma
misissuiffigisariaqartut iluarsiniartariaqarlutillu.
Kiisalu
krĉftimik nappaateqartunut tunngatillugu Kalaallit illuanik nerisaritinneqartut
ajunngikkaluartut ilaatigut krĉftimik napparsimaneq pissutingalugu nerisassat
allaat napparsimasut ilaannik saperneqartarsimapput, taamaalillutillu
nammineerlutik akilikkaminnik illoqarfimmi neriniartariaqartarsimallutik, naak
Kalaallit illuanik nerisassat imminnut akiliunneqartut nerisussaangaluarlugit
kisiannili nappaateqarneq pissutigalu taamaattarsimanatik.
Taamaattumik
tassunga tunngasoq neriuutingaara inatsisartuni aamma maani itinerusumik
itisilerlugu oqaluuserineqarlunilu misissuiffigineqassasoq.
Hans
Enoksen, Ataatsimiinnermik aqutsisoq:
Maannalu
akissuteqassaaq, Peqqinnissamut Avatangiisinut Ilisimatusarnermullu
Naalakkersuisoq.
Marianne
Jensen, Peqqinnissamut Avatangiisinut Ilisimatusarnermullu Naalakkersuisoq:
Inatsisartunut
ilaasortap Anton Frederiksen-ip taamatut apeqquteqaateqarnera Naalakkersuisunut
ilaasortatut akisussaasutut nuannaarutingaara.
Tassami
kalaallit napparsimasut taakkulu ilaqutaasa Danmarkimiinnerminni
kiffartuunneqartarnerat pillugu
nassuiaateqarnissannut periarfissimmanga, Anton Frederiksen-ip apeqquteqaataa
misilittakkanik pitsaanngitsunik ataasiakkaanik aallaaveqarpoq ajoraluartunik,
qanorluunniit ajuusaarnartigingaluarpat pisarsinnaasunik napparsimasut 900-it
missaat taakkulu ilaqutaat ukiut tamaasa Danmarkimut
katsorsartikkiartortinneqartartillugit.
Oqaluuserisassat
taama pingaaruteqartigisut suliassanik ataasiakkaanik aallaaveqartinneqartinnissaa
kissaatiginngilara, taamaattumillu akissuteqaatinni ataatsimut isigalugu
ajornartorsiutit inatsisartunut ilaarsortap Anton Frederiksen
apeqquteqaateqarneranut qaffatsinneqartut sammissavakka.
Kalaallit
napparsimasut Rigshospitalimut pisup Rishospitalip oqalutseqarfia aqqutigalugu
kiffartuunneqartarput, tamatuma saniatigut kiffartuussinerit arlallit Kalaallit
illuaniik Hellerup-imiittumiit neqeroorutigineqartarput. Rigshospitali
kalaallinik sisamanik oqalutseqarput immikkoortortaqarfinnut aggersarneqartartunik
Rigshospitalimiinnerup nalaani oqalutseqarnissaq pisariaqartinneqaraangat.
Kalaallit
illuat aamma pulaartartunik marlunnik aamma atorfinitsitsisimavoq ulluinnarni
Rigshospitaliniitsinneqartartuni, pulaartartut taakku kalaallit uninngasut
pulaartarlugillu oqaloqatigisarpaat, aammattaarlu uninngasut suliassaalunnik
assigiinngitsunik killilimmik ikiortarpaat, soorlu aningaaserivimmut
aningaasanik aalliullugit, allakkanik nassitsissullugit imaluunniit
annikinnerusutigut niiverniullugit.
Aammattaaq
Kalaallit illuata isumaginninnermut siunnersorti ataaseq atorfinitsissimavaa,
sapaatip akunnerisa ulluini marlunni Rishospitalimiittartoq, tassanilu
uninngasut kiffartuullugit.
Kalaallit
illuani ingerlatsisut Dronning Ingrid-ip napparsimavissuani nakorsap qullersaa
peqatigalugu Rishospitalimik ulluinnarni suleqateqarnerup ingerlanera
ataqatigiissaarlugulu nakkutigisaraat, Rishospitalip tungaaniit
napparsimasunut ingerlatsinermi tunngatillugu isornartorsiorneqarsinnaasunik
maanngaanniit paasisaqartoqarpat siullermik taakku Rishospitalimi susassaqartunut
uparuussissutigineqassapput, uparuaaneq taamaattoq iluaqutaanngippat suliassaq
taanna uanga pisortaqarfinniit Rishospitalip aqutsisuinit
saaffiginnissutigineqassaaq, taakkumi isumaqatigiissut atuuttoq malillugu
napparsimasut katsorsarneqarnerisa sapinngisamik pitsaanerpaamik
ingerlanneqartarnissaanik pisussaaffeqarmata.
Inuunermik
ulorianartorsiortoqartillugu nakorsap inassuteqarneratigut napparsimasup
ilaqutaanik peqataatitsisoqarsinnaavoq, tamannalu peqqinnissaqarfimmiit
akilerneqartarpoq allatigut napparsimasut sivisuumik Danmarkimiittut
ilaquttaminnik tikeraarneqartarnerat apeqqut ullumikkut malittarisassat
ilusilersugaanerat tunngavigalugu malittarisassat isumaginninnermut tunngasuniipput,
kommunini ataasiakkaani Isumaginninnermut ataatsimiititaliat tassaapput
napparsimasut katsorsarneqarnerminni nalaani ilaquttaminik tikeraarneqarnissaa
pillugu naliliisartuusut, tassani ilanngullugu naliliiffigalugu piumasaqaatit
suut piumasaqaataassanersut taamaattumillu apeqqut annertunerusumik
oqaaseqarfigissanngilara.
Taamaattorli
inatsisartumut ilaasortamut malugeqqussavara suliassaqarfimmi tassani malittarisassanik
eqaallisaaqqullu aqutsisoqarfiga piumasaqarfigisimagakku, tamatuma kingunerisimavaa
1996-imi inatsisartut ukiakkut ataatsimiinneranni peqqinnissaqarfiup
sullissineri ilaalu ilanngullugit pillugit inatsisartut peqqussutaata
allanngortinneqarneratigut inatsisitigut tunngavissaliisoqarsimanera,
najukkami peqqinnissaqarfimmi pineqartup najugaqarfigisaata avataani misissorneqartussanngorlugu,
katsorsarneqartussanngorlugulu innersuunneqarneranut atatillugu, Naalakkersuisut
malittarisassanik erseqqinnerusunik aalajangersaalersinnaalersillugit.
Pisortaqarfiga
massakkut nalunaarutit taamaattut ilusissaanut siunnersuusiorpoq tassani
ilaatigut Nunatta avataani misissorneqarnissamut katsorsarneqarnissamullu
innersuunneqarnissamut atatillugu pisinnaatitaaffii pillugit malittarisassat
aalajangersarneqassallutik, matumani Nunatsinni peqqissarneqarsinnaatitaaneq,
Nunattalu avataani sivisunerusumik katsorsarneqarnermi qanigisatut
tikeraartinneqartarnerat ilanngullugit eqqarsaatigalugit.
Uannut
oqaatigineqartut malillugit Kalaallit illuani nerisat katitinneqartarput inuussutissaqassusiat
aningaasaqarnerlu eqqarsaatigalugit, aningaasaqarneq pissutigalugu
kalaalerminernik ullut tamaasa sassaallertoqarsinnaasanngilaq, kisianni
Kalaallit illuani igaffiup sapinngisamik akulikinnerpaamik
taamaaliortoqartarnissaa anguniagaraa. Napparsimasut ilaasa immikkut ittunik
nerisaqarnissaat pisariaqartittarmassuk Kalaallit illuani eqqumaffigineqarpoq,
pisariaqartitallu taamaattut sapinngisaq tamakkerlugu malinniarneqartarput.
Naggasiullugu
oqaatigissavara napparsimasunut kiffartuussinerup pitsaassusiata ingerlaavartumik
naliliiffigineqartarnissaa uanga soorunalimi eqqumaffigigakku, taamaattumik
pisortaqarfimma Kaalaallit illua peqatigalugu illup suliassai assigiinngitsut
erseqqinnerusumik misissuiffigilersimavai suliassaqarfiit suut pitsaanerusumik
suliniuteqarfigineqarsinnanerannut periarfissat qulaajarneqarnissaat
siunertaralugu.
Anthon
Frederiksen, apeqquteqaateqartoq, Kattusseqatigiit:
Akissuteqaatigineqartumut
qujavunga, akissuteqaammi ataasiakkaanut tunngasut eqqaaneqarput, kisianni
erseqqissaatigissavara upernaaq nammineerlunga Danmarkimiinninni napparsimasut
Rigshospitalimi najugaqartut ataatsimut katitertillugit
tusarniaaffigisimagakkit, aammalu taakkunannga oqaatigineqartut napparsimasunit
namminerminngaanniit oqaatigineqartut tunngavigalugit manna siunnersuut
apeqqutiqaateqaatinngortinneqartoq saqqummiussimallugu, taammaattumik
pissanganarpoq ilaatigut Naalakkersuisup akissuteqarnermini malittarisassat
ersarinnerusut maannakkut suliarineqartut oqaatigisai periarpata immaqa aamma
tamakkununnga tunngasut napparsimasut atungarisaannut tunngasut
ersarinnerusumik qanoq iliuuseqarfigineqarsinnaaneri tamatumuunakkut
qulaajarneqalissammata.
Kiisalu
aamma napparsimasut oqaatigisaasa aamma ilaat tassaapput soorlu nappaammik
ullumik nalunngeqisatsinnik tassalu krĉftimik nappaateqartut ilaatigut
sivisuumik Danmarkimiittariaqartartut najugaqarnermik tungaasigut Kalaallit
Nunatsinni kiisalu ilaquttamik tungaannut pissuserisartagaat, kiisalu
atugarisartagaat aamma ajornartorsiutaammata annertuut, ilaatigummi napparsimasut
Danmarkimukarnerminni Nunatsinni najugarisaminniit anisinneqartarsimapput
allaat pequtaat sumut tamaannga inissinneqartarlutik.
Marianne
Jensen, Peqqinnissamut Avatangiisinut Ilisimatusarnermullu Naalakkersuisoq:
Aap,
tassa Anton Frederiksen ilumoorluinnarpoq napparsimaneq aallaavigalugu ilaatit
akuttun-ngitsumik ajornartorsiutit aamma allat takkuttartut ajoraluartumik
takornartaanngillat, taakkuali aamma akisussaaffeqartuni allaniipput, kisianni
aamma uanga taakkununnga sullissisutut ilanngullunga tamakkua aamma maani
allatigut tusagalliuutitigullu uparuartarsimavakka, aammalu neriullunga
tamakkua aaqqiivigineqarnissai sulissutigineqarumaartut, Naalakkersuisuni aamma
tamakkua eqqumaffigivagut, ajornartorsiutaasinnaasut allat napparsimanerup
kalitai.
Ilanngullugu
oqaatigilaassavara uanga aamma Danmarkimiitsillunga periarfissakka tamaasa
atortarakkit Rigshospitalimi napparsimasut, aammalu Kalaallit illuannut
alakkartarlunga tassani sulisut oqaloqatigalugit, aammalu napparsimasut
oqaloqatigalugit ersisimaaqatigalugilluunniit, taamaattumik aamma uanga taanna
qanimut malinnaaffiginissaa.
Ilanngullugu
naggataatigut oqaatigissallugu ingammik sivisuumik Danmarkimiittariaqartunut
Kalaallit illuani ilaatigut eqqarsaaterpassuit allat saniatigut
ajornartorsiutit ilagisarnikuuvaat kisimiiffissaqartannginnerlunniit inimi,
taamaattumik nuannaarutigalugu oqaatigissavara naammasseqqammermat
ungasinngitsukkut Kalaallit illuata aaqqissuunneqarnera, taamaalilluni ininit
ataasiartakkanik kiisami amerlanngikkaluartunik pisaartoqarnikuuvoq Kalaallit
illuanni, aammalu ilaqutariinnut inissiaq ataatsimik ilallutik, kiisalu
angerlarsimaffippalaarnerusunngorlugu aaqqissuunneqarluni, aammalu massakkut
siornatigut taamaaliorsinnaanngikkaluarlutik massakkut aamma namminneq
ingasalersinnaanikuupput, taamaattumik pitsanngorsaanissat ataavartumik
soqutigivagut uangut aamma takanani periarfissat soorunami aningaasatigut
periarfissallu allat killigititai eqqarsaatigalugit.
Anders
Andreassen, Ataatsimiinnermik aqutsisoq:
Taamaalilluni
taanna apeqqut naammassineqarpoq, taavalu apeqqutit aappaannut ingerlaqqissaagut,
tassanilu apeqquteqartuussaaq Anton Frederiksen, Kattusseqatigiit.
Anthon
Frederiksen, apeqquteqaateqartoq, Kattusseqatigiit:
Nunatsinni
Katersugaaseriveqarneq pillugu inatsisip allanngortinneqarnissaa pillugu
inatsisartunik siusinnerusukkut pillugu oqallittoqarpoq, tamatumalu
kingunerisaanik suleqatigiissitamik pilersitsisoqarsimavoq ilaatigut
KANUKOKA-miik, Namminersornerullutik Oqartussaniit, sinerissamilu
Katersugaasivinniik aammalu Museums nĉvnimiit ilaasortaaffigineqartumit,
paasisakkalu naapertorlugit suleqatigiisitaq kingullermik ataatsimiissimavoq
siorna junimi tassanilu ilaasortat
ilaasa nalornilersimavaat qaqugu ataatsimeeqqissanerlutik, imaluunniit
suleqatigiissitaq ingerlaqqissanersoq, tassami suleqatigiissitap
suleqqinnissaanut 1997-imi aningaasaliisoqarsimanngilaq, qanoq pisoqarniarpa,
suliarlu sumut killippa.
Konrad
Steenholdt, Kultureqarnermut, Ilinniartitaanermut Ilageeqarnermullu
Naalakkersuisoq:
Katersugaasiveqarnermi
allagaateqarfeqarnermilu inatsisartut peqqussutaata iluarsaateqqinneqarnera
pillugu inatsisartunut ilaasortaq Anton Frederiksen-ip apeqquteqaataanut
Naalakkersuisut nalunaarutigisinnaavaat peqqussummik iluarsaaqqinnissamik
suleqatigiissitaliaq suliaqarsimammat nalunaarusiamik sukumiisumik, taassuma
ilaatigut imaralugit, sulinerup ingerlaqqinnissaanut kaammattuutit arlaqartut
nalunaarusiat taanna tunngavigalugu Kultureqarnermut, Ilinniartitaanermut
Ilageeqarnermullu Naalakkersuisoqarfik suliamik ingerlatitseqqissimavoq,
isumaliuutersuutaagallartut inerneri sapaatip akunnerani tullermi ulluni
oktoberip arfineq pingajuaninngaanniit isikkaneq appaannut,
katersugaasiveqarneq pillugu ataatsimeersuartitsinermi Kangerlussuarmi
ingerlanneqartussami saqqummiunneqassapput.
Katersugaasiveqarneq
pillugu ataatsimeersuartoqareerpat peqqussutip iluarsaateqqinneqarnera
naalakkersuisoqarfiup ingerlateqqissavaa peqqussutip allanngortinneqarnissaanut
siunnersuutit inatsisartunut saqqummiunneqarnissaat siunertaralugu, sulinerup
ilimagineqaqqaartumik sivisunerusimaneranut patsisaanerpaavoq
naalakkersuisoqarfiup sulisoqarnikkut isumalluutik pigineqartut killigisa
iluanni piffissami ingerlasimasumi inatsisiliornikkut suliassat allat salliutittariaqarsimammagit.
Anders
Andreassen, Ataatsimiinnermik aqutsisoq:
Taamaalilluni
apeqqutit appaat aamma naammassivoq, taavalu apeqqutit pingajuannut, tassanilu
aamma apeqquteqarpoq inatsisartunut ilaasortaq Anton Frederiksen,
Kattuseqatigiit.
Anthon
Frederiksen, Kattusseqatigiit:
Inunnik
isumaginnittunngorniat ilinniarfianni Ilulissaniittumi ilinniartut
ilinniarnerminnut atatillugu sungiusarlutik sulisarnerminni maannamut
Ilulissani Aasiannilu taamaallaat sungiusarsinnaatitaapput, ilinniartut
ikinngeqaat, illoqarfiit tigusisinnaasut marlut eqqarsaatissagaanni
taamaattumik apeqqutiginiarpara ilinniartut siunissami ilinniarnerminnut
atatillugu Ilulissat Aasiaallu avataasigut illoqarfinnut allanut sungiusarlutik
suliartortarsinnaaneri periarfiussiuunniarnersut imaluunniit taakkununnga
tunngatillu qanoq iliuuseqartoqarniarpa.
Konrad
Steenholdt, Kultureqarnermut, Ilinniartitaanermut Ilageeqarnermullu
Naalakkersuisoq:
Siullermik
naqqiissutigilaarlara ullumikkut oqaluuserisassat allattorsimaffianni
allassimammat isumaginninnermi siunnersortissatuut, kisianni uani pineqartut
tassaapput isumaginninnermi perorsaasunngorniat, taanna paatsuungasoqaqqunagu
naqqiuteqarfigilaarpara.
Isumaginninnermi
perorsaasunngorniat sungiusarlutik sulinissaminni periarfissaasa Ilulissat
Aasiaallu avataasigut illoqarfinnut allanut ammaanneqarsinnaanerannut periarfissat
pillugit inatsisartunut ilaasortaq Anthon Frederiksen apeqquteqaateqarpoq.
Anthon
Frederiksen-ip apeqquteqaammini oqaatigisaatut ilinniagaqartut
sungiusaatigalugu sulinissaminnut periarfissaat Ilulissani Aasiannilu
ulluunerani aamma ulloq unnuarlu paaqqinnittarfinni
ingerlanneqarsinnaasuinnartut killeqarnera ilumoorpoq, tamatumunnga patsisaavoq
isumaginninnermi perorsaasunngorniat ilinniartitaanerisa 1995-imi Nuummiit
Ilulissanut nuunneqarnerani illoqarfiit taakku aallarnisaanerup nalaani
sungiusaatigalungu suliffissat pisariaqartinneqartut naammassisinnaangaat
ilimagineqarsimammat.
Nassuerutigisariaqarporli
isumaginninnermi perorsaasunngorniartut amerliartornerisa aamma
sungiusaatingalugu suliffissat immikkut sammisaqarfiuleriartornerisa
kingunerimmassuk Ilulissat Aasiaallu sungiusaatingalugu suliffigisassat
pisariaqartinneqartut naammassisinnaajunnaaraat, taamaattumillu sinerissami
sumiiffinni allami sungiusaatingalugu suliffissat pisariaqartinneqartutut
pitsaassusillit annertuumik pisariaqartinneqalersimallutik.
Isumaginninermi
perorsaasunik ilinniartitsineq maannakkut iluarsaateqqinneqarpoq, tassa
pilersinneqarsimammat ataatsimiititaliaq sulianik ilisimasaqartunik
inuttaqartitaq, taassuma suliassaralugu ilinniartitaanerup nutaap ullumikkut
inuunermi atugaasut naapertorlugit ullutsinnut naleqqussakkap
pilersinneqarnissaa, ataatsimiititaliaq taanna ukiap ukiullu ingerlanerani
ataatsimeeqattaartassaaq, tamakkunani ataatsimiititaliap ilaatigut
ilinniartitaanerup nalaani sungiusaatingalugu sulinissamut periarfissat
annertusaaffigineqarnissaanut pisariaqartitsineq, sulianut tunngatillugu
nalilersussallugu, aammalu tamakku illuarsiiffigineqarnissaannut siunnersuutinut
saqqummiussaqassalluni.
Taamaattumik
Anthon Frederiksen apeqquteqaataanut akissutitut naatsumik oqaatigineqarsinnaapput,
sungiusaatingalugu suliffissat ajornartorsiutaanerat Naalakkersuisuniit
arajutsisimaneqanngitsoq, ajornartorsiutip suliatigut illersorneqarsinnaasumik
aaqqinneqarsinnaanissaa sulissutigineqartoq, aammalu iluarsiissutissat
isumaginninnermi perorsaasunngorniat ilinniartitaanerisa nutaamik
aaqqissuunneqarnissaanut siunnersuummut ajornarunnaariarpat Naalakkersuisunit
inatsisartunut saqqummiunneqarumaartumik ilanngussorneqarumaartut.
Tassungalu
ilanngutilaassavara uani taamatut sungiusarfissaminnik inissinniiniarnerminnik
ajornartorsiutaat ukununnga isumaginninnermut perorsaasunngornianut kisimik
tunnganngimmat, kisianni aamma allanik ilinniagaqartut soorunami
aaqqiiffigineqarnissaat ilanngullugu misissorparput, kisiannili uani
apeqquteqaatit tunngavingalugu tassunga tunngatiinnarlugu akiniarsimavarput,
kisianni allanik soqutigineqassappat taanna oqaatigissavara sungiusaatigalugu
atorfininniarnermut tunngatillugu inissaqarniarnerat tamakkiisumik aamma
qissimingaartuaratsigu aaqqiiffiginiarsaralugu.
Anders
Andreassen, Ataatsimiinnermi aqutsisoq:
Maannalu
apeqquteqartoq Anthon Frederiksen, Kattusseqatigiit, naatsunnguamik.
Anthon
Frederiksen, Kattusseqatigiit:
Kultureqarnermut,
Ilinniartitaanermut Ilageeqarnermullu Naalakkersuisup akissutaanut marlunnut,
tassalu katersugaaseriveqarneq pillugu, aammalu isumaginnittunngornianut
tunngatillugu akissuteqaataanut qujavunga, akissuteqaatit ersaripput aammalu
malinnaaffigiumaarpakka pisussat taassuma kingorna.
Anders Andreassen, Ataatsimiinnermi
aqutsisoq:
Taamaalilluta ullumikkut
oqaluuserisassat tamakkerpavut, aamma apeqquteqaatit ilanngullugit. Taavalu
aamma naluneqanngitsutut tulliani ataatsimiinnissaq pissaaq sisamanngornermi 9.
oktober nal. ataatsinut, ullormi tassani makku oqaluuserineqassapput:
Immikkoortut 29-iat Peqqinnissaqarfiup sullissineri il.il. pillugit
inatsisartut peqqussutissaannut siunnersuut, tassanilu aamma inatsisartunut
ilaasortat marlut siunnersuuteqarsimapput, tassalu Anthon Frederiksen aammalu
Peter Ostermann, taannalu siullermeerneqassaaq, taavalu aamma immikkoortoq
41-uat, suleriaatsimik ' 41. naapertorlugu apeqquteqaat
oqaluuserisassaq, inatsisartunut ilaasortap Hans Inoksen-ip siunnersuutigaa
kommunit inuussutissarsiutitigut siuarsaaniarnermi erniaqanngitsumik
taarsigassarsisarnerisa atuutsinneqartalernissaat.
Kiisalu aamma sisamanngornikkut
apeqquteqaatit pineqarumaarput, apeqquteqaatit katillugit arfinillit,
inatsisartunut ilaasortaq Lisbeth Dahl apeqquteqaataa ataaseq, taavalu Manasse
Berthelsen-ip apeqquteqaatai marlut kiisalu Maliinannguaq M. Mĝlgaard
apeqquteqaatai aamma marlut aammalu inatsisartunut ilaasortap Anthon
Frederiksen-ip apeqquteqaataa.
Ataatsimiinneq naammassivoq.