Kalaallit Nunaanni Inatsisartut

Oqaluuserisassani immikkoortoq 03		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Sisamanngorneq 19. februar 1998 nal. 18.25

 

Oqaluuserisassani immikkoortoq 3.

 

1998-imi upernaakkut Inatsisartut katersuunnissaata qaqugu pinissaata aalajangerneqarneera.

(Inatsisartut Siulittaasuat Anders Andreassen)

 

 

 

Anders Andreassen, Inatsisartut Siulittaasuat:

1997-imi ukiakkut katersuunnerup naammassinerani Inatsisartut akuersissutigaat 1998-imi upernaakkut katersuunneq pissasoq 21. april-imiit maj-ip 21-ianut 1998-imi.

 

1998-imi upernaakkut katersuunneq taamaalilluni aallartissaaq marlunngornermi 21. april 1998-imi.

Tassunga akerliusoqarnerluni?

 

Naamik, akerliusoqanngilaq, taamaalillunilu taanna aallartiffiussaaq.

Qujanaq.

 

Aqagumiit 20. februar 1998, 11. marts 1998-ip tungaanut ulloq taanna ilanngullugu sulinngiffeqarnissa­mik qinnuteqarpoq Naalakkersuisunut ilaasortaq Marianne Jensen,  folketing-imut qinigassanngortinni­ni pillugu, taannali suleriaasitsinni ' 16, stk. 2 malillugu Inatsisartut maani aalajangertussaapput, taanna­lu tunngavigalugu aalajangiiffigissavarput.

 

Akerliusoqarnerluni tassunga tunngasumik?

 

Anthon Frederiksen, Kattusseqatigiit:

Akerliunanga, apeqquteqarniaannarpunga, tassa Inatsisartut inatsisaat naapertorlugu Inatsisartunut ilaasortat sulinngiffeqarnerminni aammalumi Inatsisartunut ilaasortaannaanngitsut sulinngiffeqarnermin­ni ulluni taakkunani peqanngiffimminni aningaasarsiaminnik ilanngaanneqartarput, Naalakkersuisunut aamma taanna atuuppa?

 

Jonathan Motzfeldt, Naalakkersuisut Siulittaasuat:

Naalakkersuisunut soorngunami aamma ullumi oqallisigineqarmat allaffeqarfiullu ilisimatitsinera najoqqutaralugu tunngavissaraarput, sulinngiffeqassaaq akissarsiaqarnani.

 

Marianne Jensen, Peqqinnnissamut, Avatangiisinut Ilisimatusarnermullu Naalakkersuisoq:

Paasitinneqarnerput naapertorlugu taamatut Naalakkersuisuniit sulinngifffeqarallarnissamik qinnu-teqarneq Folketing-imut qinigassanngortinnermut atatillugu pisariaqanngikkaluarpoq, kisiannili aamma inatsisit naapertorlugit taamatut pisoqarsinnaalluni, kisiannili pisariaqanngikkaluartumik.

 

Taamaattoq aningaasarsiaqassanngikkaluarumaluunniit, neriupppunga Inatsisartut taanna akuersaar­sinnaassagaat, isumaqarama pissuserissaarnerusoq taamatut qineqqusaarnerup nalaani sulinngiffe­qarallarnissaq.

 

Maliinannguaq Markussen Mølgaaard, Inuit Ataqatigiit:

Oqallinnianngilagut, aperilaaginnarniartungaana, Peqqinnissamut Ataatsimiititaliami ilaasortatut, tassa Naalakkersuisoq saaffigisinnaasaratsigu, taavalu peqannginnissaa sivisulaarmat apeqqutigeru­sullugu - kiap taarsissaneraa.

 

Anders Andreassen, Inatsisartut Siulittaasuat:

Taanna oqaatiginngitsoorakku utoqqatserpunga, tassa Marianne Jensen-ip sulinngiffeqarnerani Naalakkersuisut Siulittaasuat Peqqinnissaqarfimmut Naalakkersuisutut aamma ilaasortaassaaq.

 

Qunnuteqaat taamaalilluni akuerineqarpoq.

 

Ullumikkullu oqaluuserisassagut tamakkereeratsigit, katersuunnerup matuma naammassinerani inuulluaqqoqatigiinnialerpugunaasiit, takoqqinnissarpullu neriuutigalugu, tullianik takoqqikkutta upernaarpalaarnerulersimassagunarpoq, aamma tamanna ilimanarpoq, qaamanerulerlunilu aamma sila.

 

Katersuunnermi matumani suliassaaleqisimanngeqaagut, kisiannili qularutissaanngilaq upernaakkut katersuunnerup nalaani Inatsisartut ullut ataatsimiiffii takinerusarumaartut, amerlanerujumaartullu.

 

Inatsisartunut ilaasortat katersuunnermi matumani peqataasut tamaasa immikkut qutsaviginiarpak-ka, katersuunnerullu ammarneqarnerani oqaatsikka eqqaasitsissutiginiarpakka, taamanikkut kaju-missaarutigaara inatsisartunut ilaasortat Inatsisartut allattoqarfianni sulisut katersuunnerit akornanni ikiortiserisinnaagaat, siunnersuutissammi ataatsimiititaliat allattuinut oqaloqatiginnissutigineqarsin­naapput, taamaalillutik ilaasortat siunnersorneqarsinnaallutik, katersuunnerit nalaanisut.

 

Minnerunngitsumik qutsavigissavakka tusagassiortut, maanilu aamma allaffissuarmi suleqataasut tamaasa, immikkullu qutsavigissallugit maani ataatsimiinermi oqalunnerpaajusartut, tassalu nutseri­sut, oqaaseqarnerpaasarmata taakkua inuit marluk.

 

Ilaasortat Nuup avataani najugaqartut angerlamut ingerlalluarnissaannik kissaappakka, kiisalu tamassi ilaquttasilu ajunnginnerpaamik kissaallusi.

 

Matumuuna ukiukkut ataatsimiinnerup naammassinera nalunaarutigaara, ataatsimiinneq naamma­ssivoq.

 

Oqaluuserisaq naammassivoq.