Oqaluuserisassani immikkoortoq 05-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 16. Februar nal.17.30
Ataatsimiinnermik aqutsisoq: Inatsisartut
Siulittaasuat Anders Andreassen.
Jonathan Motzfeldt, Naalakkersuisut
Siulittaasuat:
Inatsisinut atortitsinermi
Ministereqarfiup, danskit naalakkersuisui sinnerlugit Kalaallit Nunaanni
politiitut sulisut naammagittaalliutigineqartarneri pinerluuteqarsimasutullu
suliassanngortinneqartarneri pillugit inatsisissamut siunnersuummut
Namminersornerullutik Oqartussat oqaaseqaateqaqqullugit qinnuigai.
Inatsisissatut siunnersuutip tunngavigaa
Kalaallit Nunaata eqqartuusiveqarneq pillugu ataatsimiitsitaliarsuup
inassuteqaataa, taassuma siunnersuutigimmagu Kalaallit Nunanni politiit
pillugit naammagittalliteqartarnermik maannakkut aaqqissuusineq
allanngortinneqassasoq. Taamaalilluni naammagittaaliuuteqartarneq
aaqqissuusaalissammat tapertarineqarlunilu attaveqarani nakkutilliisoqarfimmit
siunnersuummi politeeqarnermi naamagittaalliuuteqatarfimmik taaneqartumik.
Ataatsimiitsitaliarsuup kissaatigitisamavaa siunnersuut naammasineqassasoq
immikkut inatsisikkut. Taamaalilluni naammagittaalliuuteqartarneq
aaqqissuussaasoq pilersinneqareerniassammat nunatsinni eqqartuussaasut
pillugit inatsisit iluarsiissutissaannut, ataatsimiitsitaliarsuup inaarutaasumik
siunnersuutissaa utaqqeqqaanngikkaluarlugu.
Inatsisissatigut siunnersuutip imarisai pillugit
ilisimasitsissutigissavara naammagittaalliuuteqartarnermik aaqqissuussinermi
suliassanut ilaassammata, politiit sulinerminni pissusilersuutaannik naammagittaaliutit
aammalu politiitut sulinerup nalaani pinerluuteqarluni iliuutsit pillugit
nalunaarutiginninnerit. Uuma siunnersuutip avataaniipput politiitut sulisut,
sulinermik avataatigut iluusaat pillugit suliassa aamma suliassat
annikinnerusut.
Siunnersuummi pingaartinneqarpoq
naammagittaalliuuteqartarnermik aaqqissuussinerup nunatsinni
periarfissaatitaasunik tunngaveqarnissaa. Peqatigitillugulu
isiginiarneqassalluni
naammagittaalliuuteqartarnermik aaqqissuussinermi peqataasut nunatsinni
pissutsinik ilisimasaqarnissaat.
Taammattumik naammagittaalliutit
suliarineqarneri Kalaallit Nunaanni politimesterip siulersortassavaa.
Taassumap naammagittaalliuutinik suliarinninnera innuttaasunik isumannaatsumik
nakkutigineqarsinnaaqallugu peqatigitillugu politeeqarnermik
naammagittaalliuteqartarfik pilersinneqassallini. Siunnersuutigineqarpoq
Politeeqarnermi Naammagittaalliuteqartarfik inuttaqartinneqassasoq eqqartuussissuserisumik,
suliaminik Kalaallit Nunaanni ingerlataqartumik inuinnarnillu marlunnik.
Eqqartuussissuserisoqatigiit
siulersuisuisa (Advokatrċdip) aamma Naalakkersuisut inassuteqareernerisigut
ilaasortassat Inatsisinik atortitsinermut ministerimit toqqarneqartassapput.
Naammagittaalliutit imaluunniit
naammagittaalliuutitut suliakkiutit Politimesterip paasiniaaffigissallugiillu
aalajangiiffigissavai. Politeeqarnermi Naammagittaalliuuteqartarfiup
akulerunneqarnissaa politimeesterip aamma akisussaaffigissavaa. Politeeqarnermi
naammagittaalliuuteqartarfik danskit politeeqarnermi
nammagittaalliuuteqartarfiatut ingerlassaaq, taamaalillunilu suliassanut
tunngassunik takkuttoqarnera malillugu nassinneqartassalluni aammalu
Politimesteri qinnuigisinnaassallugu misissueqqinnissat imaluunniit
paasisiaaqqinnissat aalajangersimasut ingerlanneqarnissaannik. Kiisalu
Politeeqarnermi Naammagittaalliuuteqartarfik suliassatut
pingaarutilerujussuartut Politimessterimut nalunaartarsinnaavoq
ataatsimiitsitaliami isummani malillugu suliassaq qanoq ililluni
aalajangiiffigineqartariaqarnersoq. Politimesterimut
isumaqatigiinngissutaassut, assersuutigalugu taassuma suliassamut
aalajangiineranut, ataatsimiitsitaliamit naalagaaffimmi unnerluussisinnaatitaasut
qullersaannut, Rigsadvokatimut, suliassanngortinneqarsinnaapput.
Inatsisissamut siunnersuut pillugu
naggasiullugu ilisimatitsissutigissavara suliassami pineqartut inatsisitigut
inissisimanerat isumannaarniarlugu aamma siunnersuutigineqarmat
illersuisussaqartitsisoqarsinnaalissasoq, allatigullu innersuussutigissallugit
atortussat agguaaneqarsimasut taakkunani inatsisitigut siunnersuutip imarisai
taasummunngalu oqaaseqaatit sukumiinerusumik allaaserineqarmata.
Naalakkersuisut isumaqarput ullumikkut
naammagittaalliuuteqartoqarsinnaanerata ilusiligaaneratut politiit imminnut tunngasunik
naammagittaalliuutinik misissuisuusussaatitaasarunnaarnissaat
pingaartorujussuussoq. Taammattumillu politiit pillugit naammagittaalliuutinik
suliarinnittarnissamut siunnersuutigineqartutut naammagittaalliuuterqartarfiup
pilersinneqarnissaa akuersaarsinnaallugu. Naammagittaalliuuteqartarfik
taammaattoq attuummassuteqassanngilaq taammaattumillu innuttaasunit
politiinillu sulisuusunit tatiginartuussalluni.
Taammaattumik Naalakkersuisut taamatut
oqaaseqarlutik Inatsisartunut inassutigaat Kalaallit Nunaanni politiini sulisut
naammagittaalliuutigineqartarneri pinerluuteqarsimasutullu suliassanngortinneqartarneri
pillugit inatsisissatut siunnersuutip Folketingimi akuersissutiginissaa
Naalakkersuisunit kaammattuutigineqassasoq.
Laannguaq Lynge, Siumup oqaaseqartua:
Eqqartuuusiveqarneq pillugu
ataatsimiitsitaliarsuaq sulinermini atatillugu politiitut sulisut naammagittaalliuutigineqartarneri
pinerluuteqarsimasutullu suliassanngortinneqartari pillugit inatsisiqalernissaanik
siunnersuuteqarpoq.
Inatsiseqalernissarlu pineqartoq
Ataatsimiititaliarsuup suliaminut atatillugu 1999-mi isumaliuutissiinissaa
utaqqinngikkaluarlugu inatsinngortinneqassasoq kissaatigisimavaa. Siumumit
iluarisimaarparput politeeqarnermi naammagittaalliuteqartarfimmik,
arlaannaanulluunniit attuumassuteqanngitsumik inatsisitigullu
tunuliaqutalimmik, pilersitsisoqarnialermat. Politiit annertuumik
pingaarutilinnik inuiaqatigiinnut suliqartartut, sulinerminni
pissusilersuutaannik naammagittaalliutinik takkuttoqartillugu maannamut
suliaqartarnerit inatsisinik tunngaveqanngitsunik ingerlanneqartartutut
oqartariaqarpugut.
Politiit suleqatiminnik
maalaarutaasoqartillugu akornerminni misissuisariaqartarnerat taakkuulluni
nuanniitsuusassaqaaq, taammaattumik politeeqarnermi
naammagittaalliuuteqartarfimmik peqalernikkut aamma politiit suliamikkut
oqilisaaneqassapput illuatigullu inuttaasut inatsisitigut illersugaallutik
maalaarsinnaatitaalissapput. Siumumi inatsip taassumap immikut ittup atuutilinnginnerani
paasisitsiniaasoqartariaqartoq isumaqarpugut. Pisariaqarluinnartutut
isumaqarfigaarput naammagittaalliortarnermik periarfissatut nutaap sulineranut
innuttaasut aallaqqaataanniit tatiginninnissaat pingaarluinnartuussasoq
isumaqarfigigatsigu.
Taammak naatsumik oqaaseqarluta
inatsisissap danskit Folketingianni akuersissutigineqarnissaanut
Naalakkersuisut kaammattuutigisaat Siumumiit taperserparput.
Peter Ostermann, Atassutip oqaaseqartua:
Qujanaq. Oqaluuserisassatut
saqqummiunneqartumi pineqartoq ukiorpaaluunngulersuni oqallisigineqartarsimavoq.
Atassummilu naammagisimaarparput Naalagaaffeqatigiinnerup Naalakkersuisut
Eqqartuusisarneq pillugu Ataatsimiitsitaliarsuup inassuteqarneratigut
maannakkut inississummut siunnersuumik saqqummiussaqarmata. Ullumanna tikillugu
oqallittarnerni, soorlu aamma eqqartuusisarneq pillugu Ataatsimiitsitaliarsuup
siunertarigaa, siornertarineqartarpoq politiit imminnut naammagittaalliutaasut
namminneq misissortarunnaassagaat. Tassa imaappoq. Ullumikkut periaassiusoq
qimanneqassasoq.
Tunngaviusumik isummerneq Atassummiit
tamakkiisumik tapersersugarput. Taamak siunertaqartumik Danmarkimi aamma
oqallittoqartarnerata kinguneraa politiit imminnut misissuiffigisarnerat
qimanneqarmat, dansk advokatinillu suliarineqartalerluni. Tassa politiit
avataanni. Inatsisissatut siunnersuut misissorlugu annertuumik tupaallannarpoq
siunnersuutip ullumikkut pissusiusut allan-ngortinngilluinnarmagit.
Nakkutilliisoqarfissamik nutaamik politeeqarnermik nakkutilliisoqarfimmik
taasamik ilaannarlugit. Siunnersuummimi saqqumiunneqartumi ersarippoq,
naammagittaalliorfigisassaq tassaasoq Politimesteri. Taassumalu suliassat
suliarissagai aalajangiiffigalugillu. Ullumikkumiuna taamak ingerlatsisoqartoq,
allanngorteqquneqartumik.
Ataatsimut isigalugu ullumikkut
innuttaasut politiillu akornanni pitsaasumik tatigeqatigiinneqarpoq,
politiinullu attuumassuteqanngitsumik naammagittaalliortarfeqalernissaanik
kissaateqarnermi politiit pasinapilussarniarneqanngillat, tatigeqatiinnerli
attatiinnarniarneqarpoq, ilami aamma imminut misissuiffigisarneq ajormat. Taamatut tunngaviusumik isumaqarneq
Atassummit tapersersorluinnarparput.
Siunnersuummi pineqarput Kalaallit Nunaanni
politiini sulisut, taakkununngalu ilaapput kommunefogedit reservebetjentillu.
Siunnersuutip '5-ta
erseqqissarpaa, illersuisoqarnermi aningaasartuutit pisortanit
akilerneqartassasut, tassanilu tunngavigineqarpoq atorfillit pillugit
inatsissmi ' 23 -
kommunefogedimmi reservebetjentillu qanoq pissappat, taakkumi atorfiliunngillat
isumatigiissutilli malillugit atorfinitsitaasarlutik.
Taamaattumik Atassutip siunnersuut
saqqummiunneqarneratut iluseqartillugu akuerisinnaanngilaa,
inassutigissallugulu utertinneqassasoq suliareqqitassanngorlugu.
Kiisalu Atassummiit
siunnersuutigissavarput naammagittaalliortarfeqarnerup eqqartuussivinnut
inissinneqarsinnaanera misissorneqassasoq. Isumaqarpugut nunarput immikkoortortanut
pingasut aggorneqarsinnaasoq, immikkoortortamilu eqqartuussivimmi ataatsimi
inatsisilerituumik atorfinitsitsisoqassasoq immikkoortortami eqqartuussiviit
ulluinnarni suliassaannik ikiornerisa saniatigut naammagittaalliuutaasunik
suliarinnittartussamik eqqartuussivimmullu aalajangigassanngortitsisartussamik.
Tamanna soorunami pinerluuteqarsimasutut unnerluutiginninnermi aamma
atuutissaaq.
Johan Lund Olsen, Inuit Ataqatigiit
oqaaseqartuat:
Inuit Ataqatigiit siunnersuut
matumani pineqartoq Nunatsinni Eqqartuussiveqarneq pillugu Ataatsimiititaliarsurmit
sukumiisumik aamma suliarineqareerluni inatsisissatut maannakkut
inassuteqaatigisaat iluarisimaarparput taamaattumillu aamma
ilalersorniarlutigu.
Inuit Ataqatigiit
arajutsisimanngilarput politiit ukiut ingerlanerini aamma naammagitaalliutigineqartarmata - naak tamanna
annertugisassaanngikkaluartoq. Naammagittaalliutilli politiit iluminni maannakkut nammineq misissuiffigalugillu
nalilersortarmatigit periuserineqartoq tamanna kikkunnulluunniit soorunalumi
naammaginarsimanngilaq, qularnanngitsumik aamma politiinussaaq.
Taamaattumik pissusissamisoorpoq
politiitut sulinermi arlaannaannulluunniit attuumassuteqanngitsumik aamma nakkutilliisoqartitsinissaq Politeeqarnermi
Naammagittaalliuuteqartarfimmik pilersitsinikkut. Tamanna innuttaasut
inatsisit naapertorlugit innarlitsaalineqarnernissaannut qulakkeerinninniarneruvoq - taamaattumillu kikkuugaluilluunniit politiinit eqqunngitsumik
qaqugukkulluunniit pineqartannginnissaannut
aamma aaqqissuussiniarnerulluni.
Naak naammagittaalliutitut
suliakkiissutigineqarumaartussat ulluinnarni Politimester-imit aamma
ingerlanneqartarnissaat aaqqissuussinerup sanngeequtigisinnaagaluaraa -
paasinarpoq allatut aaqqissuussiniarsinnaaneq aamma Eqqartuussiveqarneq
pillugu Ataatsimiititaliarsuarmit inassutigineqarsinnaasimanngitsoq Nunatsinni
statsadvokat-eqannginnerput ilaatigut pissutaalluni. Taamaakkaluartorli
Nunatsinni politeeqarfiit Danmark-imit allaassutigalugu immikkut aaqqissussaammata kiisalu Politimestereqarfiup
politeeqarfinnut ataasiakkaanut tunngatillugu
aamma namminersortutut immikkut inissisimareermat, taamatullu aamma
kiffaanngissuseqartitaalluni - maannakkut taamatut ilusiliinissaq Inuit
Ataqatigiinnit aamma akuersaarsinnaavarput.
Taamatullu oqaaseqarluta aammalu
siunnersuummi aalajangersakkat allat isumaqatiginartikkatsigit neriutigivarput
innuttaasut naammagittaalliorfigisinnaasaannik nutaamik taamaattumik
pilersitsivigineqarniarnerat sukumiisumik matuma kingorna inuiaqatigiinnut
aamma paasititsiniutigineqassasoq.
Bjarne Kreutzmann, Akulliit Partiiat:
Kalaallit Nunaanni politiitut sulisut
naammagittaalliuutigineqartarneri pinerluuteqarsimasutullu
suliassanngortinneqartarneri pillugit inatsisissatut siunnersuummut aamma politiit sulinerminni
pissusilersuutaat pillugit kiisalu politiitut sulinerup nalaani
pinerluuteqarluni iliuutsit pillugit unnerluutiginninnerni
naammagittaalliuuteqartarnerup qanoq aaqqissuussaanissaanut Namminersornerullutik
Oqartussat oqaaseqaataat misissuataareerlugit Akulliit Partiiat isumaqarpoq
assut silatusaarnerusoq, naammagittaalliuuteqartarnerup ullumikkutut
aaqqissuussaaneratulli namminneq pillutik naammagittaalliuutit politiit
namminneerlutik misissuiffigisarunnaassammatigik.
Imaanngitsoq isumaqarama ullumikkut
periaaseq isornartortaqartoq imaluunniit ullumikkut periaatsip
atornerlunneqartarneranik pasisaqarama, kisiannili isumaqarama periaaseq
nutarterneqarpat tamanna innuttaasunut politiitullu suliaqartunut
toqqissisimanarnerussasoq.
Taamaattumik inassutigissavara
Inatsisartut inassutigissagaat, siunnersuutip taama isikkoqarluni Folketingimit
akuersissutigineqarnissaa.
Anthon Frederiksen, Kattusseqatigiit:
Kattusseqatigiinniit
pingaartilluinnarparput nunatsinni innuttaasut kikkulluunniit pitsaasumik
naammaginartumillu sutigut tamatigut sullinneqarnissaat.
Taamaattumik inatsisissatut siunnersuutip
Folketing-imi akuersissutigineqarnissaa tamakkiisumik taperserpara imatullu
siunnersuummut oqaaseqassallunga:
Kalaallit Nunatsinni eqqartuussiveqarneq
pillugu ataatsimiititaliarsuup inassutigisimavaa, politiit pillugit
naammagittaalliuuteqartarneq allanngortinneqassasoq, sulianullu ataasiakkaanut
attuumassuteqannginnissaq qulakkeerniarlugu nutaamik politeeqarnermi
naammagittaalliuuteqarfimmik taaneqartumik inatsisiliornikkut aaqqiisoqassasoq.
Kalaallit Nunatsinni politiitut sulisut
naammagittaalliuutigineqartarneri pinerluuteqarsimasutullu
suliassanngortinneqartarneri pillugit inatsisissatut siunnersuut Kattusseqatigiinniit
pissusissamisoortutut isumaqarfigaara, tassami tamanna suliniut ukiuni arlaqalersuni aamma Kalaallit
Nunatsinni politiit peqatigiiffiata iluani arlaleriarluni
oqaluuserineqartareermat. Aammalu politiit pillugit naammagittaalliuutinik
aalajangiiniartartut inuttalersorneqarnerannut siunnersuut tamakkiisumik
taperserlugu.
Inatsisissatut siunnersuutip ' 25-ani politiit pillugit
naammagittaalliuutinik aalajangiiniartartussatut siunnersuutaasimasut
isumaqatiginartippakka, tassami politiit naammagittaalliutigineqartarnerannut
sulianut assigiinngitsunut attuumassuteqarsinnaaneri
pinngitsoortinneqassammata, suliallu arlaatigulluunniit ippinnaateqanngitsumik
naammassiniarneqarsinnaanngornerat tassuunakkut ersarissineqassamat.
Politiit imminnut tunngasunik
naammagittaalliuutinik misissuisuusussaatitaasarunnaarnissaat
Kattusseqatigiinnit innuttaasunut pingaarutilittut isumaqarfigaara,
taamaaliornikkummi innuttaasut kiffartuunneqarnerat naammaginartumik
naapertuilluartumillu aaqqiigivigineqassammat.
Taamatummi suleriaaseqalernissaq aammalu
naammagittaalliuutinik aalajangiiniartartussat toqqarneqartussat sapinngisamik
arnat angutillu naligiimmik amerlassusilerneqarnissaat nunatsinni inuiaqatigiit
naapertuilluartumik sullinneqarneranut nukittorsaataassaaq, aammalu
tamatumuunakkut takuneqarsinnaavoq arnat angutillu naligiissitaajartornerat
oqaasiinnaanngitsumik inatsisitigulli aamma ajunngitsumik timitaleriartuaarneqartoq.
Taamatut naatsumik oqaaseqarlunga
Kattusseqatigiit sinnerlugit Kalaallit Nunatsinni politiitut sulisut
naammagittaalliuutigineqartarneri pinerluuteqarsimasutullu
suliassanngortinneqartarneri pillugit
inatsisissatut siunnersuummut isumaqataanera nalunaarutigaara.
Jonathan Motzfeldt, Naalakkersuisut
Siulittaasuat:
Erseqqissaatigilaassavara qallunaat
naammagittaalliortarneq taamaattoq pillugu aaqqissuussiffigineqarnerat
inatsimmi jannuaarip aallaqqaataaniit 1996-imi atuulersukkut
naammassineqarsimammat, taavalu taanna tunngavigalugu saqqummiussanni
allaassutit ilagivaat ataatsimiititaliarsuup isumalioqutigisimammagu
Danmark-imi inatsisit misissorneranni
Danmark-mi statsadvokatit atorneqarnerat
assigalugu Kalaallit Nunaani aamma
(taamaaliorsinnaanngilaq)
Kisianni taanna Kalaallit Nunaani statsadvokateqanngimmat
aammalu rigsadvokatit aamma taasiguuneqarsinnaanatik statsadvokatimut.
Taamaattumik taakkununnga taarsiullugu Kalaallit Nunaanni Politimesterip
suliassamut uani ingerlatsisussatut toqqarneqarsimalluni
aalajangiunneqarsimavoq. Aammalu suliassanut taakkunani pineqartuni aalajangiisuussalluni. Tassani
statsadvokatip rigsadvokatillu Kalaallit Nunaanni ilisimasaat naammattumik
ilisimaarinninnissaat qularnartutut isigineqarmat, taava Politimesteri tassani
toqqammavigineqarpoq annertuumik aalajangingassanillu qitiutinneqarluni.
Uani pineqanngillat poliiteeqarfinni allaffimmiusut sulisut, kisianni tassa
politiit atorfeqartitat aammalu tassani sulisuusut pineqarlutik. Kiisalu aamma
naammagittaalliutit tassa susassaqarfiullutik pingaarnerit
suliassaalersinnaasut taakkua taagorneqarsimammata aamma
innersuussutigissavara.
Soorlu tigusarineqarnermut
pikitsitsinermut assigisaanullut atasumik persuttarneqarneq allatullu
sakkortuuliorfigineqarneq pillugit naammagittaalliuutit oqartussaassuseqarnermi
atornerluineq soorlu assersuutigalugu tigusarineqarnermi imaluunniit
ajarlerfigineqarnermi atasumik pillugit naammagittaalliuutit sulianik
ingerlassinerup nalaani allatut eqqunngitsunik iliuuseqarfigineqarneq pillugit
naammagittaalliuutit kiisalu politiimit namminermit soqqusaatsuliorfigineqarneq
imalluunniit allatut eqqunngitsuliorfigineqarneq pillugu naammagittaalliuutit
taakua suliassiissutaasinnaasut aamma tassani taaneqarput.
Qujavunga taamatut maani
tapersersorneqarmat, taamaalillunilu naalakkersuisunut Danmark-imut nalunaarutigineqassaaq,
inatsisissaq maanngaanniit akuersaarneqarnera tunngavigalugu.
Peter Ostermann, Atassutip oqaaseqartua:
Siullermik una oqaatigilaarlara
saqqummiussamut oqaaseqaatigut Naalakkersuisunut paasilaaqquarput allaalluinnarmata, tassa saqqummiunneqaratut
iluseqartillugu uagut akuerisinnaanngilarput.
Upperaarput una uagut siornatigulli
oqallittarneq kusananngilaq naammagittaalliuutigineqartut imminnut
misissortarnerat, uagut taakkua isumaqatigaagut taama oqaluttut aamma
ilumoorami, kusanannginnami. Imaanngitsoq pasipilullugit arlaannik
eqqunngitsumik iliortut, kisianni nammineq periuseq taanna kusananngilaq.
Taamaattumik aallaqqaataanit (oqaa) massakkut inatsisiliorluni
aaqqiiniartoqalernera taanna naammagisimaarparput. Kisiannili atuaraanni
nammineq imaa, nassuiaatit ullumikkut periutsimit allanngortitsisoqanngilaq,
politiit naammagittaalliuutaasut imminnut namminneq Politimesterip
misissussavai aalajangiiffigalugillu.
Taamaallaalli aana ilaliussaq
sanianiittussaq poliitinik nakkutilliiisoqarfimmik taasaq politiklagenĉvn,
pingasunik inuttaqartussaq, misissuisussaanngilaq taanna taamaallaalli
malinnaassaaq, ajunngitsumik suliaq suliarineqarpa, aalajangiineq ajunngila, aatsaallu
isumaqataanngikkuni ingerlatsitseqqissinnaalluni.
Ullumikkut periutsit
ingerlatiinnarneqassapput, uagut isumaqarpugut taanna allanngortittariaqartoq.
Erseqqissarlugu politiinik nakkutilliisoqarfimmik taasat
misissuisussaanngillat, taamaallaalli suliap ataatsip suliarinerani
ilisimatinneqartuartussaallutik.
Aamma isumaqarpugut kommunefoget
reservebetjentillu eqqarsaatigalugit ersarinnerusumik
aalajangersagaqartariaqartoq, sooq atorfilittut tjenestemanditut
atorfeqartitaasut kisimik aningaasartuutiminnik akiliunneqassappat? Tassami
uani saqqummiussani inatsisissanilu kommunefoget reservebetjentillu aamma
ulluinnarni politiitut sulisut
piginnaatitaallutik sulisut ataatsimilluunniit eqqaaneqanngillat.
Taakkua eqqarsaatigalugit
Naalakkersuisunut inassutigerusupparput saqqummiussaq taanna inatsiseqarneq
pillugu ataatsimiititaliamit nalilersoqqissaarneqassasoq, upernaamullu qaammatialunnguit qaangiuppata
Inatsisartut ataatsimiinnissaannut
saqqummiussisoqassasoq. Isumaqaratta taakkartukkagut ersarissumik
misissuiffigisariaqartut aammalu misissuinerup naammassinera najoqqutaralugu
maani taperseqqittariaqartumik.
Jonathan Motzfeldt, Naalakkersuisut
Siulittaasuat:
Naatsorsuutigaara aamma oqallinnermi maani
oqallinnerup assilineqarnera Folketingimi ataatsimiititaliami aamma
suliarineqalerpat taama ( pisarpar..) Kalaallit Nunaannut
ataatsimiititaliaasoq, Grĝnlandsudvalgiusoq Folketing-imi taamak ittoq
akuersissut pitinnagu naammattumik suliassat amigartutut issappata aamma
attaveqarfigineqarsinnaasut, kisiannili taakkuninnga iliuusaasinnaasunik
naammagittaalliuutit pillugit suliassaqarfinni pingaarnerni taakkua taasakka
innersuussutigaakka aatsaannguaq atuakkakka, taakkualu tunngavigalugit tassa
suliassat ingerlanneqartarnerannut akisussaalluni aammalu immikkut
Politimesterip maani inissinniarneqarnera statsadvokatimik taarsiullugu tassani
periarfissinniarneqarmata.
Isumaqarpunga uani allannguutissaq
soorunami politiit sulineranik aamma pissuserissaarnissamik
unneqqarissutsimillu imalimmik suliniarnerusoq, innuttaasut naammagittaalliuutissaqartut politiinit
suleqateqarnermi imaluunniit pineqartarnermi
taamaalillutik periarfissaat erseqqinnerulersinneqarmata.
Anders Andreassen, Inatsisartut
Siulittaasuat:
Oqaasissaqartuerummat oqaatigissavara
partiit amerlanerussuteqartut kiisalu Kattusseqatigiit ataatsimoorlutik
Naalakkersuisut saqqummiussaat akuersaareermassuk taanna akuerineqartutut
taasariaqarpoq.
Taamaalilluta ullumikkut oqaluuserisaq
immikkoortoq 5-ip oqaluuserineqarnera tamaanga killip- poq.
Oqaluuserisaq naammassivoq.