Oqaluuserisassani immikkoortoq 06-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Anders Andreassen, Inatsisartut Siulittaasuat, Ataatsimiinnermik aqutsisoq:
Oqaluuserisassat tikitsinnagit Inatsisartunut ilaasortaq Siverth K. Heilmann tikilluaqqussavara ataatsimeeqataanissaanillu ajunngitsunik kissaallugu.
Ullumikkut marlunngornermi februarip 10-ngani makku oqaluuserineqassapput: Kalaallit Nunaanni aatsitassat pillugit inatsisip allanngortinnissaanut Namminersornerullutik Oqartussat oqaaseqaataat. Imikkoortoq 13. Kalaallit Nunaanni annertuumik sunniuteqartussamik atortussanik iluaquteqarluni ingerlatsilernissap sunniutissartaasa misissoqqissaarneqarnissaanik nalunaarusiaq. Kiisalu immikkoortoq 14. Kalaallit Nunaanni sulisoqarneq pillugu nalunaarusiaq.
Jonathan Motzfeldt, Naalakkersuisut Siulittaasuat Siumut:
Naalakkersuisut maani aamma Danskit Naalakkersuisuisa januarip 8.-ni 1998-mi Kalaallit Nunaanni atortussiassanut aatsitassanut pisuussutinut tunngatillugu ingerlatsineq pillugu nutaamik isumaqatigiissuteqarput. Ukioq manna 1998-mi julip 1-ani atuutilersussamik. Tamatumap isumaqatigiissutip kingunerissavaa Kalaallit Nunaanni atortussiassanut aatsitassanut pisunut tunngatillugu ingerlatsinerup Naakkersuisunut maani nuunneqarnissaa.
Tamanna siunertaralugu Danskit Naalakkersuisuisa piffissaq siulleq atorlugu Folketingemi inatsisissatut siunnersuummik aamma saqqummiussaqarnissaat.Tassunga ilaallutik atortussiassanik aatsitassanik pisunit misissueqqaarinermut ujarlernernut aammalu iluaqutiginiarneqarnissaannut akuersissuteqartartussaatitaaneq. Kiisalu akuersissutit taakku naapertorlugit akuersissuteqarfigineqarsimasut ingerlataannut atatillugu oqartussatut suliaqarneq.
Taamaalilluni oqartussaaffiit tamakku Avatangiisinut Nukissiuuteqarnermullu Ministerimit maannamut oqartussaaffigineqarnerata maani nunatsinni Naalakkersuisunut nuunneqarnissaa aammalu Kalaallit Nunaannut atortussiassanik tunngasunik ingerlatsiviup ulloq manna tikillugu suliassarisimasaasa atortussiassalerinermut pisortaqarfimmut Naalakkersuisut ataanniittumut nuunneqarnissaat isumaqatigiissutikkut maanna anguniarneqarpoq.
Atortussiassanut tunngasutigut Kalaallit Nunaanni aaqqissuussinerup imarisai allat allangortinneqaratik ingerlatiinnarneqassapput. Tassa taamaalilluni danskit Naalakkersuisuisa Namminersornerullutillu Oqartussat aalajangigassani atortussiassanut tunngasuni pingaarutilinni ataatsimoorlutik aalajangiisussaatitaanerat.
Aamma tassunga ilanngullugu atortussiassalerinermut inatsit naapertorlugu taaneqareersunik akuersissuteqarnermi maani Naalakkersuisut daskillu Naalakkersuisuisa tamatumani isumaqatigiissuteqarsimanissaat aamma atatiinnarneqassaaq.
Aamma tamanna atuutissaaq atortussiassanik iluaquteqarniarnermi pisortat isertitaasa agguarneqartarnissaat pillugu inatsisimmi atuuttumi aalajangersarneqarsimasunut malittarisassanut, kiisalu Kalaallit Nunaanni atortussiassat aatsitassanit pisut pillugit siunnersuisoqatigiit suliassaannut tunngatillugu malittarisassanut tunngasut.
Isumaqatigiissummi matumani tamatuminnga ilanngunneqartumi nuussineq aamma nassuiarneqarpoq. Illuatungaani Ministerip Kalaallit Nunaanni atortussiasanut tunngasunik ingerlatsiviup illuatungaanilu Naalakkersuisut atortussiassalerinermut Pisortaqarfiup atortussiassat pillugit aaqqissuussinerup iluani inissisimaffimminnik paarlaannerattut.
1998-mi julip 1-aniit Namminersornerullutik Oqartussat atortussiassalerinermut Pisortaqarfiat atortussiassanut tunngatillugu aaqqissuussinerup iluani ataatsimut allaffissornikkut taamalu aqutsinikkut suliamut tunngasuni qitiulissaaq.
Nuussineq eqaatsooqqullugu pingaartumillu ingerlatsinermik suliassat suliaineqarnerat isumannaatsooqqullugu Naalakkersuisut maani danskillu Naalakkersuisuinit isumaqatigiissutigineqarpoq atortussiassalerinermut Pisortaqarfik Avatangiisinut Nukissiuuteqarnermullu Ministeriaqarfiup ataani suliffeqarfiinnik aqutsisoqarfinnillu siunnersornearsinnaassasoq, aamma ikiorserneqarsinnaassalluni.
Taamaalilluni atortussiassalerinermut Pisortaqarfiup ikummatissartalinnut tunngasunik oqartussatut suliaqartarnera Danmarkimi Kalaallillu Nunaanni ujarassiuutut misissuisoqarfimmit Danmarkimi Avatangiisinut misissuisoqarfimmit Nukissiornermik aqutsisoqarfimmit kiisalu Avangiisinut aqutsisoqarfimmit suliatigut ikiorteqarnermik tunngaveqassaaq.
Siunnersorteqarneq ikiorneqarnerlu tamanna nunami imartani taakkulu avataanni ikummatissanik ujarlernerup avatangiisinut periutsinut, isumannaallisaanermut, upalungaasimanermut aamma sulisunut aningaasaqarnermut tunngasortaanik imaqassaaq.
Atortussialerinermut Pisortaqarfik aatsitassalerinermut tunngasutigut aamma taamak ikiorteqarsinnaatitaassaaq.
Suliffeqarfinnit taakkuninnga taaneqartunit ikiorserneqartarneq ulloq manna tikillugu Kalaallit Nunaannut atortussiassanut tunngasutigut ingerlatsiviup pisimaneratut akeqanngitsumik ingerlassaaq. Nukissiornermilli aqutsisoqarfimmut tunngatillugu Kalaallit Nunaanut atortussiassanut tunngasuni ingerlatsiviup teknikkimut tunngasortaanut killissarititaasimasut atorneqassapput, tassa ingeniĝrit pingasut Kalaallit Nunaanni atortussiassanut tunngasunik ingerlatsivimmiit aqutsisoqarfimmut nuunneqartussat.
Isumaqatigiissutip aningaasatigut kingunerisassaasa aalajangerneranni Naalagaaffimmiit Namminersornerullutik Oqartussanut nuussinermi tunngavigineqartartoq tassa oqaaseq iluanaartoqaranilu ajunaartoqassanngilaq atorneqarpoq.
Taamaalilluni Kalaallit Nunaanni atortussiassanik tunngasunik ingerlatsivimmut Naalagaaffimmit aningaasalissutaasartut tunngavigalugit kiisalu nukissiornermit aqutsisoqarfimmit ikiorteqarsinnaatitaaneq eqqarsaatigalugu. Kiisalu Naalagaaffiup suliassariinnagassanik suliaqartussanik Naalagaaffiup ingerlataqarfia pingasunik sulisoqartup ingerlatiinnarneqarnissaa eqqarsaatigalugu isumaqatigiissutigineqarpoq Naalagaaffiup Namminersornerullutik Oqartussanut ataatsimoortumik tapiissutigisartagai 1999-miit ukiumut 9 mio. kr.-ninik amerlineqassasut. 1998-mut tunngatillugu isumaqatigiissutigineqarpoq Namminersornerullutik Oqartussat atortussiassalerinermut Pisortarfiup ingerlanneqarneranut 6,5 mio.kr.-ninik aningaasaliiffigineqassasut kiisalu 3 mio. kr.-ninik nuussisoqarnerani pilersitsinermi aningaasartuutissanut allanut atugassanik.
Isumaqatigiissutip aningaasatigut kingunissai 1998-mut ilassutitut aningaasaliisutinut inatsisitigut siunnersuummut ilanngunneqassapput.
Taamaalilluni Kalaallit Nunaanni atortussiassat aatsitassanit pisut pillugit inatsip imaani avatangiisit illersorneqarnissaannik inatsisip aammalu nunaviup ilaa immap ataaniittoq pillugu inatsisip allannguutissaanik Folketingip inatsisissaanut siunnersuut maanna saqqummiunneqartoq Naalakkersuisut danskillu Naalakkersuisuisa 1998-mi januarip 8-nni oqareernittut isumaqatigiissutaata kinguneraa. Inatsisissatut siunnersuummut oqaaseqaatitalimmut allatigut innersuussillunnga Naalakkersuisut sinnerlugit kaammattuutigissavara inatsisartut Folketingimut inassutigissagaat inatsisissatut siunnersuut taamatut isikkoqarluni akuerineqassasoq.
Ruth Heilmann: Partiit oqaaseqartuat,
Siumut:
Maannakkut nunatsinni inuussutissarsiornikkullu
tunngavigisavut pingaarutillit tassaapput: Aalisarneq, aatsitassarsiorneq
takornariaqarnerlu.
Nunarput nunarsuarmi qeqertat annersaraat,
tamanna nunarsuarmi meeqqat tamarmik ilikkaqqaagassaasa nalunannginnerit
ilaattut isumaqarfiginarsinnaasaraluartoq taamaattoq tusartaannarparput
nunarput inuilu nunarsuarmioqaterpassuatsinnit suli ilisimaneqanngitsut.
Tamanna pitsaaquteqarlunilu ajoqutitaqarpoq.
Nunarput asasarput alianaatsorsuuvoq
nunani allanit tamanit immikkuullarissuteqarami sermersuaqarlunik
qaqqarsuaqarluni aputitarasaartunik kangerluppassuaqarlunilu
qeqertarpassualinnik. Alianaatsorsuuginngilarli, qujanartumimmi aamma
aatsitassanik toqqortaqarlunilu pisuussuteqartoq nalunngilarput. Maannalu
missuinerit annertuut ingerlanneqaleruttorneranni paasisinneqartaannarpugut
arlalippassuarnik piiarneqarnissaminnik soqutiginaatilinnik peqartoq soorlu
aamma oliven, zink, guulti, diamant allarpassuillu.
Uuiaqarnerattaaq uppernarsineqartaannarpoq
piiaanissamullu pilersaarutit pissanganartut maanna aallunneqaleruttorput.
Qularutissaanngilluinnarpormi
aatsitassarsiorneq kunguaariinnit maanna inuusunnerusunit annertuumik
soqutiginaateqalerumaartoq siunissami ilaqutariippassuarni
inuussutissarsiutigissallugu toqqammavissanngortussaalluni.
Siumup neriuutigilluinnarpaa erniinnaq
arlaatigut piiaasoqalernissaa, tassami nunatta aningaasarsirneranut
suliffissaqartitsinikkullu annertuumik sunniuteqartussamik
kinguneqartussaammat.
Taamaattumik maannakkut
piffissaalluartutut isigaarput nunatsinni aatsitassarsiornikkut qullersaqarfeqalernissamik
suliniutit piviusunngortinneqarlernerat. Siumumit iluarisimaarnartuuteqaarput
Rċstofforvaltningip qallunaat nunaaniittup nunatsinnut nuunneqartussanngornera.
Maanna aatsitassarsiornikkut alloriarneq
angisooq ikaarsaarfigisarput inissaanut ilissallugu piareersaatit ilaat
naammassissutaat pingaaruteqartoq kiisami Naalakkersuisutta 8. januari 1998
atsioreersimalerpaat, tamanna Siumumit nuannaarutigingaarparput.
Ataqqinartoq Naalakkersuisut siulittaasuat
Jonathan Motzfeldt Naalakkersuisut sinnerlugit matuminnga saqqummiussisoq
Kalaallit inuiaat sinnerlugit angusaanik kusanartumik qujassuteqarfigingaarparput.
Kalaallillu nunaat pilluaqqujumavarput nammineq nunamini pisuussutaasut aamma
uumaatsunik pisakkatta iluaqutigineqarnissaanik kiisami aqutsisuulernissaa
piviusunngortussanngormat.
Minnerunngitsumik danskit Naalakkersuisui
politikkeriilu ataqqinartut matuminnga piumasaasumik paasinnillutik
Namminersornerulernitsinnillu ataqqinninnerat nuannersoq matumuunakkuttaaq
ersersitaasoq pillugu qamanngavik pisumik Siumumit
qujassuteqarfigerusuppavuttaaq.
Suliniut tamaana pisariaqartitaasoq
pingaaqisorlu Namminersornerulernitsinnit ukiuni 20-nngulersuni Siumumit
siuttuuffigisatsinnit kalaallit danskillu politikkeriisa aatsitassat pillugit
ukiualunngortuni naapeqatigiiffeqarnermikkut suliniutaasa pingaaruteqarnersaat
ilaattut ersarissutullu Siumumit
isumaqarfigisarput annertuumik Kalaallinut inuiannut nuannaarutaallunilu
tulluusimaarutissaasutullu oqaatigisariqarparput.
Taamaattumik taamatut anguniagaqarnermi
peqataasimasut tamaasa allaat aamma ilaqarmata
akunnitsinniikkunnaareersimasunik ataqqiniarlugillu eqqaanngitsoorumanngilagut
maanna pisumi pingaartorsiutigisatsinni qutsavigissallugit.
Siumup pingaartittuarsimavai
aatsitassarsiorneq uuliasiornissarlu pillugit misissuisoqartuarnissaa
piiaanissamullu alloriartoqarnissaa tapersersugariuarlugulu.
Tamatumuunakkuttaaq nunatsinni nunaniillu allanit soqutiginnittunit aningaasat ikittuunngeqisut
aamma misissuinikkut pilliutigineqareersimapput. Taamatullu Ujarassiorit
aqqutigalugu inuppassuarnik aqqutissiuussineq torrallataasutut Siumumit
isumaqarfigaarput.
Kalaallit inuiaat akornanni
aningaasarsiutigissallugu aatsitassarsiornerup pingaaruteqarluinnassusianik
paasinnilluinnarnerat tamakkiisumillu tapersiersuilernerat aamma
pingaaruteqarluinnartuuvoq. Tassami nunatsinni minguitsumi nunatta uumasui
aamma inuuniutigaavut, tassuunakkullu paaseqatigiilluinnarnissaq
pisariaqarluinnartuulluni.
Pinngortitamik aseruinertaqanngitsumik
piiaanissat ingerlanneqartarnissaannik inatsisit toqqissisimanartuupput,
sunaluunniit aatsitassarsiornikkut sulineq unitsinneqarpat atortorisimasat
tamarmik piiarneqassasut sapinngisamillu nuna siornatigutut isikkumisut
isikkoqalernissaanut periarfissinneqassasoq, naasut uumasut nunamiittut
imarmiullu aamma eqqarsaatigalugit.
Siumumit isumaqarluinnarpugut
piiaalernissami piumasaqaataasariaqartoq sapinngisamik nunami maani
najugaqartut ilinniartillugit sulisorineqartarnissaat anguniartariaqartoq,
taamalu sulisorereerneranni isumannaatsumik akissarsiatigut pineqarnikkullu
qularnaarivigineqarnissaat anguniartariaqarlunissaaq.
Inatsissami saqqummiunneqartumi Kalaallit
Nunaanni atortussiassalerinermut pisortaqarfik akeqanngitsumik arlalitsigut
immikkut ilisimasalinnik ikiorserneqartarnissaminik periarfissaqartinneqartussaanera
ilanngunneqarpoq soorlu avatangiisinut, teknikkimut, isumannaallisaanermut
sulisoqarnermilu nunami kulbrintisiornermut kiisalu imaani avataanilu tunngasutigut aamma allaffissornikkut
ikiorsiisoqartarnissaanik. Taamatut inatsimmi periarfissiisoqarnera Siumut
tungaanit tamakkiisumik iluarisimaaripput oqaatigissavarput.
Naalakkersuisup siulittaasuata
saqqummiinermini aamma erseqqissarpaa siornatigut oqartussaaffiit
avatangiisinut nukissiuuteqarnermullu ministerimit tigummineqartut aammalu
Kalaallit Nunaannut atortussiassanut tunngasunik ingerlatsiviup manna
Atortussiassalerinermut Pisortaqarfimmut Naalakkersuisoqarfitta ataaniittumut
aaqqissuussinerup imarisai allannguuteqartinnagit
isumaqatigiisuuteqartoqassasoq.
Taamatut Naalagaaffiup
Namminersornerusullu akornanni isertitanik agguaqatigiittarnermut tunngasut
taamaaginnartinneqassasut kisiannilu kalaallini danskinilu akileraartarnermut
oqartussaasut suleqatigalugit 1998-ip ingerlanerani imai naleqqunnerilu
pillugit nalilliiffigeqqinneqartussaassasut.
Taamatut ikaarsaariarnermi, qallunaat
kalaallillu aatsitassarsiornikkut aqutsiffimmik paarlaannermik taaneqarsinnasumi
nuussinermi, aningaasartuutaasut soorlu aamma inissatigut qallunaat nunaanniit
atorfeqartitaasut nuuttussat pingasuusut aningaasartuutissatigut
nassarisassaasa Naalagaaffimmit tamakkiisumik matussuserniarneqartussaanerat
Siumumittaaq iluarisimaarparput, tamannami ukiarmi Naalakkersuinikkut
isumaqatiginniaqqittussanut inatsisartunit suliniutigeqquneqartut
tapersersukkatta ilagimmassuk Naalakkersuisut tamatumuunakkut angusaqarluarnerat
Siumumit oqaatigissavarput iluarisimaarluinnaratsigu.
ukioq manna julip aallaqqaataaniit
allaffeqarfissuup Nuummi pisortatigoortumik atuutilerfissaa nalliuttussaavoq,
tamatumuunakkullu ujarassiorniarlutik uuliasiorniarlutillu qinnuteqaataasut
nunatsinnut toqqaannartumik ingerlanneqartalissapput.
Siunnersuisoqatigiinni ilaasortat
allannguuteqassapput inatsisartunit toqqaasoqassaaq taamalu nunatsinni
Naalakkersuisut ilaasortaanerat atorunnaassalluni, taakkuuppummi
qinnuteqarnermi naggataatigut akuersisartussanngortussat.
Taamatut paarlattuanik qallunaat nunaata
Naalakkersuisui nunatsinni Naalakkersuisut paaseqatigalugit dronningimit
akuerineqartussamik siunnersuisoqatigiinnut siulittaasussamik innersuussuteqartussaassapput.
Siunnersuisoqatigiinni maannamullu
ilaasortaasartut tamaasa siulittaasuusartullu soorlu aamma nalunngilluagarput
Naalakkersuisut siulittaasorisimasaat Lars Emil Johansen siulittaasuusarsimanerani
uummammik pisumik qujassuteqarfigerusutatta ilagivaat nunatsinni
aatsitassarsiornerup siuarsarneqarnissaanik annertuumik suliniuteqarsimanera
tunngavigalugu.
Maanna Naalakkersuisut siulittaasuat
Naalakkersuisut sinnerlugit inatsisissamik saqqummiinera Siumumiit
pingaaruteqangaartutut isumaqarfigisarput neriuutigeqaarput inatsisartunit tamanit
akuersaarneqarnissaa, maani akuersissut pereerpat qallunaat nunaanni
folketinngimi inaarutaasumik akuersissutigneqartussaammat Siumumiit
inatsisissaq tamakkiisumik taperserlugu folketingimut ingerlateqqinneqarnissaa
nuannaarluta inassutigaarput.
Jakob Sivertsen: Atassutip oqaaseqartua:
Kalaallit Nunaanni aatsitassat pillugit
inatsisip allanngortinneqarnissaanut Namminersornerullutik Oqartussat
oqaaseqaataat innuttaasunik soqutigineqartoq matumuuna Atassummiit imatut
oqaaseqarfiginiarparput.
Pinngortitarsuup inuuffigisatta
silaannaata allanngorartarneranik pissuteqartumik nunami minnerunngitsumillu
imaani pisuussutinik assigiinngitsunik inuussutissarsiuteqarnerput aningaasarsiornitsinnut
pingaaruteqarsimaqaaq, taamaattumik aalisarnikkut inuussutissarsiutitta annerpaamillu
aningaasarsiorfitta kisiartaavallaartup tapertarisinnaasaanik soorlu,
aatsitassanik assigisaanillu ujaasiuarnissaq Atassummiit pingaartissimaqaarput,
siunissami aningaasarsiornikkut suliffissaqartitisinikkullu iluaqutigisinnaasagut
suulluunniit pinngitsoorsinnaannginnatsigik.
Nunami maani inuuffigisatsinni ukiuni
kingulliunerusuni aatsitassanik assigiinngitsunik minnerunngitsumillu
uuliaqarsinnaaneranik ujaasinerit annertoorujussuarmik ingerlanneqalersimapput,
siunissami Nunatta aningaasarsiorneranut minnerunngitsumillu
suliffissaqartitsiniarnikkut isumalluarfigilersimasatsinnik,
isumalluarnissamummi pissutissarpugut.
Maannamut aatsitassanik ujaasinerni
sassaarineqartartut assigiinngitsut eqqarsaatigalugit, siornatigut nassaarineqanngisaannartut
nassaarineqartalerput, soorlu diamantit, guld-it assigisaallu.
Matumuuna Atassummit oqaatigissavarput,
nunatsinni aatsitassanik uuliamillu ujarlernerup pimoorunneqaleruttorfiani
atortussiassanik tunngasutigut allaffitsigut ingerlatsinerup danskit
naalagaaffianniit Namminersornerullutik Oqartussanut nuussinissamik
isumaqatigiissuteqarsimaneq siunissami pingaaruteqarluinnartuummat, taamatut
nunatsinni naalakkersuisut angusaqarnerat Kalaallit oqaluttuarisaaneranni
angusaavoq imaannaanngitsoq qaqugorsuarmut eqqaamarneqartussaq.
Atassut Partiiuvoq
naalagaaffeqatigiinnermut pingaartitsisoq, matumuuna paasivarput apeqqutini
pingaaruteqartuni, isumaqatiginninniarnerni illua-tungeriit ataqqeqatigiillutik
tatigeqatigiillutillu isumaqatiginninniarsinnaanerat qanoq pingaartigisoq,
soorlu qangalingaatsiaq Kalaallit Nunaanni piginnittussaanermut apeqqutit
danskit folketinngianni saqqummiunneqarmat eqqaamalluaripput apeqqutit
taamaattut assigisaallu, soorlu ullumikkut inatsisissamut siunnersuut
sammisarput, qanoq angujuminaatsiginerat oqaatigineqartoq puigunaatsumik
eqqaamagipput.
Taamaattumik atortussiassanik
aatsitassanit pisunik assigisaannillu allaffeqarfiup danskit naalagaaffiannit
Namminersornerullutik Oqartusssanut nuunneqarnissaanik isumaqatigiissusimanermut
tunngatillugu, Atassummit pissutissaqarpugut Kalaallit Nunatsinni
Naalakkersuisut, minnerunngitsumillu danskit Naalakkersuisuisuinut, uummammik
pisumik qujassuteqassalluta, angusamut Kalaallit Nunaannut siunissami
pingaaruteqartumut.
Atortussiassanut tunngasutigut
ingerlatsinerup Namminersornerullutik Oqartussanut nuunneqarnissaanut
isumaqatigiissut pitsaasuummat iluarisimaarnarluinilu, annertunerusumik oqaaseqarfiginissaa
pisariaqanngikkaluartoq, taamaattoq 1998-mi julip 1.-ataaniit inatsisip
atuutilernissaanut tunngatillugu nuussineq eqaatsooqqullugu pingaartumillu
ingerlatsinermi suliassat suliarineqarnerat isumannaatsooqqullugit,
atortussiassalerinermut pisortaqarfik kiisalu avatangiisinut nukissiuuteqarnermullu
Ministereqarfiup ataani suliffeqarfinnit aqutsisoqarfinnillu ikiorteqarsinnaaneq
siunnersorneqarsinnaanerlu ilanngullugit isumaqatigiissutigineqarsimammata
Atassummit iluarisimaarluinnaratsigu.
Taamatut aaqqiinikkut alloriarnermi
siullermi isumannaagassat sillimaffigisassallu tamakkiisumik
isumannaarneqarsimasut Atassummit takusinnaagatsigik.
Atortussiassat aatsitassanik pisut
pillugit inatsisip, immatigut avatangiisinik mingutsitsinaveersaarneq pillugu
inatsisip, aamma nunaviup ilaa immap ataaniittoq pillugu inatsisip allannguutissaanik
inatsisissatut siunnersuutinut tunngasut suliarilluagaammata, kiisalu
aningaasatigut kingunerisassai ilanngullugit isumannaarneqarsimammata
annertunerumik oqaaseqarfiginagit Atassummit tamakkiisumik taperserparput.
Taamatut naatsumik oqaaseqarluta
inatsisissatut siunnersuut taamatut isikkoqarluni akuerineqarnissaa
Inatsisartut Folketingimut inassutigissagaat Atassummit kaammattuutigaarput.
Johan Lund Olsen: Inuit Ataqatigiit
oqaaseqartuat:
Aatsitassat pillugit inatsisip
allanngotinnissaanut inatsisillu allat attuumassuteqartut allanngortinnissaannut
Namminersornerullutik Oqartussat oqaaseqaatissaat
Ukiut 18-it sinnerlugit
Namminersornerulereersimalluta Inuit Ataqatigiit nuannaarutigivarput
aatsitassat pillugit inatsit kiisalu inatsisit Aatsitassat pillugit
Allattoqarfiup maanga nunatsinnut nuutinniarneqarnissaanut attuumassuteqartut
allanngortinneqarnissaannik tamarmik imaqartitertut ullumikkut maani
inatsisartunit isummerfigisussanngoratsigit akuersissutigalugillu.
Taamaalilluta Aatsitassat pillugit
Allattoqarfiup 1996-imi ukiakkut ataatsimiinnitsinni nunatsinnut
nuunneqartariaqarneranik Inuit Ataqatigiit siunnersuuteqarfigereersimasarput
inatsisartuniillu tamarmiusunit akuersissutigitissimasarput 1. juli ukioq manna
aallarnerfigalugu timitalerneqartussanngorpoq.
Soorlu Naalakkersuisut siulittaasuata
saqqummiussinermini oqaatigeriigaatuut danskit naalagaaffiat peqatigalugu
1979-mi aatsitassat pillugit aaqqissuussisimarnerput allatigut allanngortinniarlersaarneqanngilaq.
Inuit Ataqatigiinniit
miserratigissanngilarput uagut aamma aatsitassarsiornermi pisortat isertittagaasa
maannakkutut avitseqatigiissutigineqartarnerat
allanngortikkusussimagaluaratsigu nunarput annerusumik siunissami
pissarsitinneqartalernissaa siunertaralugu. Tamanna tassaavoq aamma 1996-mi
ukiakkut maani siunnersuutigisimasarput ajoraluartumilli taamani aamma
amerlanerussuteqarfiginngisarput.
Taamaakkarluartorli maannamut
angusaagallartoq naammagisimaarallarparput oqassallutali suli isumaqartuaratta
inuiaqatigiit kalaallit aatsitassarsiornikkut maannamit annerusumik pissarsitinneqartariaqarnerat
pissusissamisuuginnassammat.
Pissusissamisoorpoq pissutigalugu
siullermik, aatsitasarsiorneq maani nunatsinni ingerlanneqarmat kiisalu
aappaatut aatsitassarsiornerup sumiluunniit ingerlanneqartillugu aamma pitsaanngequtertai
uagut inuiaqatigiit kalaallit kisitta nammattussaagatsigit.
Annertuumimmi nassaartoqassagaluarpat
inuiaqatigiit kalaallit tamarmiusut kalluarneqartussaavugut
aningaasarsiornitta ajutooraluttuarneranik aamma kinguneqaratarsinnaasumik
tassa ilaatigut ilisimatuut oqartarnerattut Pukkitsormiut nappaataannik taagorneqartumik
aammalu mingutsitsivigineqaratarsinnaalluta inuiattut qangaaniilli
kulturitoqatsinnut aamma aatsitassarsiorneq innarleeratarsinnaaneranik
kinguneqartumik.
Aatsitassarsiornermi Danmarkimi
ingerlanneqanngilaq - maaniuna pisoq maanilu aamma kinguneqapilussinnaasoq.
Taamaattorli maannamut isumaqatigiissutaasut malillugit pisortat isertitassaasa
affaat equngasorisatsinnik danskit naalagaaffiata pissarsiariuartussaassavaat.
Tamanna allanngortittariaqarpoq siunnersuutigerusupparpullu pisortat
isertitassaasa nutaamik danskit naalagaaffiannut aamma nangittumik isumaqatiginniutigineqaqqinnissaat.
Siunnerfiusariaqarpoq aatsitassarsiornermi
isertittakkanik Namminersornerullutik Oqartussat minnerpaamik 75 %-imik
pissarsitinneqartalernissaat imaluunniit Aatsitassarsiorneq pillugu
aningaasaateqarfiliortoqassasoq, tassa rċstoffond.
Danskit naalagaffiata taamaalilluni
nunatsinni aatsitassarsiortitsinermi isertittagaat aningaasaateqarfimmut
nunatsinniittussamut nakkakaatinneqassapput siunertanut inuiaqatigiinnut
tamarmiusunut isumatuumik pissarsissutaasumillu siunissaq ungasinnerusoq aamma
isigalugu atorneqarsinnaanissaat siunertaralugu.
Miserratiginngilarpummi kalaallit
sulisorineqarsinnaanissaat eqqarsaatigalugu aningaasarpassuit atorlugit
ilinniartitseqqittariaqassagatta - tunngaviusumik ilinniartitaanerit
aqqutigiinnarnagit kisiannili aamma qaffasinnerusumik ilinniartitaanerit
aqqutigalugittaaq. Taamatuttaaq suliffeqarfiit maani nunatsinni pioreersut
aatsitasarsiortitseqatigiiffissuarnut pilersuisutut kiffartuussinertigullu
annertunerpaamik peqataatinniarneqarnissaat anguniartariaqarparput amingaasat
maani nunatsinni kaaviiaartinneqaannarnissaat aamma anguneqarsinnaaqqullugu.
Tamannali ilisimaneqartutuut suliffeqarfiutigeriikkatsinnik ima piumasaqarpoq
teknikkikkut, ilisimasatigut minnerunngitsumillu aningaasatigut
unammillersinnaasssuseqartariaqarnitsinnik.
Tamakkuli aningaasarpassuarnik naleqarput
- taamaattumik pissusissamisoorpoq danskit naalagaaffiata
isertitsissutigisartagaassaat isumaqatiginninniutigeqqittuugutsigit Aatsitassarsiorneq
pillugu aningaasaateqarfiliorsinnaanissaq siunertaralugu.
Aningaasaateqarfik taamaattoq siunissamut
upalungaarsarneruvoq qaangiataaginnarsinnaanngisarput. Pisariaqarpoq
pissutigalugu aatsitassarsiortitsinerup pitsaasumik inuiaqatigiinnut kalaallinut
tamarmiusunut aamma kinguneqarsinnaanissaa angorusukkatsigu
aatsitassarsiortitseqatigiiffissuit kisimik iluanaaruteqaannarnissaat pinnagu.
Takorloorneqarsinnaasut aamma
ilagivaattaaq danskit naalagaaffiata Nuna Oil A/S-imik piginneqataassutaasa
pisiarineqarsinnaanissaanut aningaasaateqarfik taanna aamma aqqutigisinnaagatsigu,
Namminersornerullutik Oqartussat taamaasillutik tamakkiisumik
oqartussaaffigalugulu ingerlatseqatigiiffigilerninnaammassuk inuiaqatigiit
pigisaattut.
Siuliani taakkarsukkatta saniatigut Inuit
Ataqatigiinniit pisariaqarsorivarput Aatsitassat pillugit inatsisip
sukumiinerusumik
aatsitassarsiorfeeqqanik ingerlatserusussinnaasut eqqarsaatiginerullugit
qimerluuataaqqinneqarnissaa tassa tassani eqqarsaatigivakka Small Scale Mining,
inatsimmi piumasarineqartut sakkortuvallaartut aallartitsiniaraluartunullu
aporfiusinnaasarlutik, tamakku siunissami qaangerniarneqarnissaat
isumannaarniartariaqarparput. Tamanna maani nunatsinni suliffinnik nutaanik
pilersitsiniarnitsinni pisariaqarluinnarpoq.
Naalakkersuisuvut taamaattumik
kaammattorumavagut Aatsitassat pillugit Siunnersuisartoqatigiit peqatigalugit
inatsimmik allannguinissamik maannangaaq siunnersuusiulereeqqullugit.
Taamatullu oqaaseqaativut innersuussutigalugit
Inuit Ataqatigiit neriuutigivarput Folkitinngimi partiit saqqummiussavut aamma
eqqumaffiginiarumaaraat.
Bjarne Kreutzmann: Akulliit Partiiata
oqaaseqartua:
Kalaallit Nunaanni aatsitassat pillugit
inatsisip tassa atortussiassalerinermik inatsit, imaatigut avatangiisinik
mingutsitsinaveersaarneq pillugu inatsisip aamma nunaviup ilaa immap naqqaniittoq
pillugu inatsisip allanngortinneqarnerannik Folketinngip inatsisissaatut
siunnersuummut Inatsisartut oqaaseqaataannut tunngatillugu paasivara,
pineqartoq tassaasoq ministerip imaluunniit nunatsinni aatsitassat pillugit
ingerlatsiviup oqartussaaffiata Naalakkersuisunut imaluunnit aatsitassat
pillugit nunatsinni pisortaqarfimmut aatsitassat pillugit peqqussummi
killiliussat iluanni nuunneqarnissaa.
Pappiarartai atuarlugit qulakkeereerlugu,
aatsitassarsiornermut tunngatillugu aalajangiinissat pingaarutillit tamarmik,
tassunga ilanngullugit nunatsinni Naalakkersuisut aamma Danmarkimi
naalakkersuisut isumaqatigiissutaat atuutiinnassasoq, taaamatullu aamma
naalagaaffimmiit Namminersornerullutik Oqartussanut ataatsimoortumik
tapiissutit 1999-imi ukiumoortumik 9 mio. kruuninik qaffanneqassasut,
taamatullu aamma isumaqatigiissutip aningaasatigut sunniutissai 1998-mi
ilassutitut aningaasaliissutit pillugit ilassutissatut siunnersuummut
ilanngunneqassasut Inatsisartunut inassutigiinnassavara, inatsisissatut
siunnersuutip akuerineqarnissaa Folketinngimut inassutigeqqullugu.
Anthon Frederiksen: Kattusseqatigiit
oqaaseqartuat:
Naalakkersuisut danskillu naalakkersuisuisa
akornanni Kalaallit nunatsinni aatsitassanut il. il. tunngasunik
ingerlatsiviup, Danmark-imiit nunatsinnut nuunneqarnissaa pillugu
isumaqatigiissutip kingunerisaanik folketinngip inatsisissaatut siunnersuut
Kattusseqatigiinniit tunngaviatigut isumaqatigaara.
Isumaqatigiissut ajunngitsorpassuarnik
imaqarpoq, soorlu nunatsinni atortussiassalerinermut pisortaqarfissaq
akeqanngitsumik aatsitassanut attuumassuteqartunik paasissutissanik, nalunaarsuugaatinik
il.il. aqutsisoqarfinniit, misissuisoqarfinniillu assigiinngitsuniit
atuisinnaatitaasussaallunilu aatsitassanut tunngasunik misissuisarnerit,
ilisimatusarnerillu paasisanik atuinissamut periarfissaqartussaavoq.
Aammalu siunnersuinermut,
ilinniartitseqqittarnernut ikiorsiisarnissanullu assigiinngitsunut
periarfissaliunneqarsimasut naammaginartutut Kattusseqatigiinniit
isumaqarfigaakka, taamaattumik aamma ukiuni kingullerni aatsitassanik,
olie-mik il.il. ujaarlernernut aningaasaliunneqartartut 25 mio.-nit
missaaniittut eqqarsaatigalugit tamatuma akuersaarneqarnissaa isumaqatigaara.
Taamaattumik taamatut naatsumik
oqaaseqarlunga siunnersuutip taama isikkoqarluni folketinngimut
ingerlateqqinneqarnissaa akuerseqataaffigaara.
Jonathan Motzfeldt: Naalakkersuisut siulittaasuat,
Siumut akissuteqarpoq:
Partiit inimi maani tamarmik
inussiarnersumik tapersiinerat qamannga pisumik qujassutigaara. Aammalu
isumaqarpunga partiit oqaaseqartuisa uagutsinnut isumaqatigiinniarnernut
pilluaqqussutaat inuiaqatigiinnut tunniuttariaqariaqartoq aamma
pilluaqqullugit, inuiaqativut ullumikkut angusaqarluaratta.
Ullut tamaasa pinerloornivut TV-ikkut
radiokkut sisunerliulaarnivut ilanngullugit tamarmik tusagassiatigut
nalunaarutigineqartarput. Torrallaanivut nalunaarutigineqarneq ajorput amerlaqisut.
Ullumikkut Kalaallit Nunaat torrallaavoq torrallaavilluni mċleriarluni aamma
mċlerluartutut angusaqarpoq.
Ukiut ilaatigut oqaatigineqarput Siumup
oqaluttuanit aamma allanit ukiut 18-nit Iamiiut tassuunakkut eqqaamasaat aamma
ilumoorput suliaq taanna isumaqatigiinniutigineqarsimavoq. Aamma sivisoqisumik
angusaqarfiusanngitsumillu. Kisiannili alloriarnernik kigaatsumik ajunngitsup
tungaanut angusaqariartorsimalluta.
Aamma Siumup oqaluttuata Ruth Heilmannip oqaatigisai ilumoorput tassani aamma
angutit arnallu apeqqummi tassani sulisimasut akornatsinniikkunnaarsimasut
ilanngunneqarmata aamma ilumoortortalerujussuuvoq taanna.
Suliaq manna anguneqarsimavoq nukiit
ajunngitsut kattunnerisigut. Danskit amerlanersaasa folketinngimi paasinnilluarnerisigut,
inimilu maani aatsitassat tungaatigut isumaqatigiittumik angusaqartarnigut
aqqutigalugit. Taamaattumik ullumikkut nunatsinni angusarineqartoq taama
isumaqatigiinnitsigut annertuumik folketinngip tungaanut kaammattuutigaarput
akuerineqarluaqqullugu.
Qassissunnguanik oqaaseqarfinnilaassaanga
ilaatigut saqqummiussani taanngisara, ilaatigut partiit oqaaseqartuinit
attorneqartoq ataaseq. IA oqaaseqartuata Johan Lund Olsenip aamma
taasaqaatigisaa, tassa Nuna Oilip Selskabip tassani qanoq inissisimanera.
Apeqqut taanna ilumoorpoq ugguuna ilisivimmut erseqqissumut ilineqarnissaa suli
isumaqatiginninniutaammat. Imaanngikkaluarpoq assortuunneqarmat kisianni
naalagaaffiup piginneqataassutai Aktiet uagutsinni pisiarineqassanersut
imaluunniit danskit pigisatik naalagaaffimmit pigineqartinnagit allatut
aaqqiissanersut isumaqatigiinniutiginissaat maannakkut piareersarneqarmat.
Uagut tungitsinninngaaniit nalorninarpoq
uagut piginneqataanerput tassani allanngortikkumanngilarput. Nuna Oilip
uuliasiornikkut aamma aatsitassatigut ingerlanera tapersersorparput.
Piginneqataanerput milliallatsikkkusunngilarput, annertunerulersinnaappat
ammasumik Inuit Ataqatigiit oqaatigisaat aamma taanna arajutsisimanngilarput
periarfissaasinnaasoq.Kisianni danskit pigisamik qanoq ilillugit
aaqqiiviginissaat namminneq aamma isummerfigisassaraat.
Aamma Siumup oqaluttuata oqaatigisaani
katitigaasimanerput fĉllesrċdemi allannguuteqanngikkaluarluni inuttaasa
allannguuteqarnissaat ilumoorpoq. Tassani fĉllesċdemi ilaasortat kalaallit
ilaasortarisaat naatsorsuutigaarput Naalakkersuisuni ilaasortaajunnaarlutik
taava inimi maani inatsisartunit ilaasortanit toqqarneqartussanngortut, tassa
julip 1-taaninngaaniit ukioq manna atulersussamik. Tamannalu pisinnaassaaq
upernaaru ataatsimiinnermi majimi taava aalajangiiffissaq inatsisartuni
periarfissinneqarsinnaammat.
Fĉllesrċdep siulittaasua manna tikillugu
Kalaallit Nunaanninngaaneersuugaluartoq ilimanarluinnarpoq danskit taanna
siunnersuutigissagaat. Tassanilu Naalakkersuisut maani paaseqatigalugit
kinaassasoq isumaqatigiisutigineqarpat taava ataqqinartorsuarmit Dronning
Margrethemit tangeqartitaajumaarpoq, akuersissutaalluni. Taama ullumikkut
aaqqissuussineq ippoq. Taakku tamarmik julip 1-taat tikitsinnagu
naammassiniarneqartussaapput.
Aamma Inuit Ataqatigiit oqaatigisaani
aatsitassarsiorfiit annikinnerusut alaatsinnaallugit iliuuseqarnermi
eqqumaniartoqarnissaanik innersuussutaa ugguuna ilumoorpoq inatsisit maannakkut
atuuttut eqaannerusumik pisariinnerusumik pisortatigoortumik
suliarinnittarnissaat. Aammalu Selskabinut kajungernartunngorlugu maanga
iserniarnissamut periarfissat nalilerniarnissaat julip 1-taata kingornatigut
pisussat peqatigitillugit naliliiniarneq Naalakkersuisuni aamma uterfigineqarumaarpoq.
Manna tikillugu assersuutissatut
pitsaanertut takusariaqarpoq Nanortallip eqqaani aatsitassarsiorfik annikitsoq
maannakkut misiligarneqarmat. Ukioq mannalu misiligutaasumik tunisassiorneq
majimi aallarteqqissalluni. Taavalu ukioq manna naliliineq tunngavigalugu aappaagu
ukiup affaata siulliup ingerlanerani qinnuteqarsinnaaneq piiaanissamut aatsaat
ilimanarsinnaalluni. Taakkunatigut periarfissat aamma alaatsinaanneqarnissaanik
innersuussutigineqartut tusaatissatut inussiarnersumik tigorusuppakka. Aamma
pisariaqarluinnarmat tassuunakkut naammassisaqarniarnissarput.
Aamma ataaseq taanngitsoorumanngilara
Atassutip oqaaseqarnermini qujassutigisaminut ilanngullugu aamma partiit allat
oqaluttuisa taanna taagaluaraat, danskit naalakkersuisui qutsavigisariaqarput
ilumut isumaqatiginninniarnerup uani ingerlanneqarnerani ammasumik aammalu
matut unitsereernagit periuseqarsimammata. Isumaqatigiinniarnerit aamma
soorunami isumaqatigiinniarnivittut naammassiniarneqarput. Arlaannaataluunniit
ilaatigut tunngavigisani allanngortikkumanngilai kisiannili
paaseqatigiinnissaq siunertarineqarmat naggataatigut suli ajornartorsiutit
naggaterpiaa tikillugu atuukkaluartut paaseqatigiinneq anguneqarsinnaasimavoq.
Aammalu tassuunakkut nuannaarutigaara danskit naalakkersuisui periarfissami
tassani atuilluarsimasut aamma folketinngimi akuersaarluarneqarnissaat maani
neriuutigissagatsigu.
Taamak oqaaseqarlunga oqaaseqarsimasut
tamaasa qutsavigeqqippakka.
Johan Lund Olsen: Inuit Ataqatigiit
oqaaseqartuat oqaaseqaqqippoq.
Qujanaq, partiit oqaaseqartui allat
pingaartumik Siumup kisalu Atassutip oqaaseqartui aammalu Naalakkersuisut
siulittaasuata oqaaseqaqqinnermini saqqummiussaat taakkua oqaaseqarfigilaassavakka.
Siumup oqaaseqartuata Ruth Heilmannip
saqqummiussinermini ilaatigut oqaatigivaa aatsitassarsiornikkut pisortat
isertittagaat taakkua nutaamik pingaartumik akileraarusersuinikkut tunngasortaat
nutaamik nalilersorneqassammata, tamanna naammigisimaartariaqaripput. Kisianni
tassunga tunngatillugu erseqqissartariaqarpoq taanna teknikkiinnaammat nunatta
annerusumik akileraarutigut aatsitassarsiorfinninngaaniit annerusumik
pissarsinissaanik kinguneqarsinnaanngitsumik.
Naleqqussaanerunerinnaasussaavoq,
inatsisinut maannakkut atuutereersunut. Taamaattumik teknikkiinnaavoq nunattalu
annerusumik aningaasatigut isertitsissutigisinnaasaanik kinguneqarsinnaajumaarani.
Taamaattuminguna uagut oqaaseqarnitsinni
oqaatigigipput sanioqqussinnaanngilarput aamma nalunnginnatsigu nunarsuarmi
sumiluunniit aatsitassarsiornermik ingerlatsivigineqartuni aatsitassarsiorneq
aamma illuatungeqartarmat. Assigiinngitsorpassuartigut inuiaqatigiinnut
aatsitassarsiorfigineqartunut kinguneqapilussinnaasarpoq. Taamaattumik tamakku
eqqarsaatigalugit aamma maani nunatsinni uagut inuiaqatigiit kisitta tamakku
aatsitassarsiornerup illuatungerisai, mingutsitsisoqariataassagaluarpat
sineriatsinni eqaloqarfinnik aseruilluarsinnaanera uagut kisitta
nammattussaagatsigit. Kultuuritoqatsinnik qangaaniilli ingerlassimasatsinnik
aatsitassarsiorneq aamma aseruilluinnarsinnaammat. Taamaattumik oqaatigivarput
pissusissamisuussasoq aatsitassarsiornermi isertittakkat taakkua nutaamik
danskit naalagaaffianut isumaqatigiinniutigineqartuuppata.
Tassani periarfissat ilagisinnaavaat
danskit naalagaaffiata aatsitassarsiornikkut isertittagassaat, tassa maannakkut
isumaqatigiissut imaappoq aatsitassarsiornermi pisortat isertitassaat 500 mio.
tungaanut nunatta danskillu naalagaaffiata avitseqatigiiffigisussaavaat
tamarmik 50 %-timik pissarsitinneqartussaallutik. Siunnersuutigivarput nunarput
minnerpaamik 75 %-nik pissarsitinneqartalernissaa.
Imaluunniit imatut
aaqqissuussiniartoqarsinnaavoq aatsitassarsiorneq pillugu aningaasaateqarfiliortoqarsinnaalluni
danskit naalagaaffiata aningaasalersugassaanik. 500 mio. tungaanut danskit
pissarsiassaralui taakkua aningaasaateqarfimmut tassunga
nakkakaatinneqarsinnaapput, tamanna upalungaarsarneruvoq oqaatigisatsituut.
Tassami aatsitassarsiorneq illua-tungeqartuarmat. Aamma erniinnaq una
oqaluuserisassaq naammassigutsigu tikittussaassavarput aatsitassarsiornerup,
pingaartumik annertuunik nassaartoqarsimatillugu ingerlatsinerup
inuiaqatigiinnut kingunerisinnaasai.
Kingunerisinnaasai ilaatigut
saqqummiussinitsinni tassa eqqaavagut. Aningaasaarsiornitsinnut sillimanianngikkutta
aningaasarsiornitsigut annertoorujussuarmik aatsitassarsiortitsinerput
kinguneqapilussinnaavoq. Eqqaaginnarparput una ilisimatuut aamma
oqaaserisartagaat tassa pukkitsormiut nappaataannut taagorneqartoq tassagooq
Hollandsksyge. Taanna imatut tassa paasineqassaaq, aatsitassarsiorneq annertooq
maani nunatsinni ingerlanneqalerpat, assersuutigiinnarlugu aappaagu fyllap
ikkannersuani qillerisoqareerluni annertuumik uuliamik imaluunniit
gassimilluunniit nassaartoqarpat, aana mianerisassarput; tassa
inuussutissarsiutinik ingerlatsiviusut allat sunnerneqassagamik imaalillutik;
sulisorineqartut akissaataat inuiqatigiinni qaffaariapiloorsinnaammata;
imaassinnaavoq ilinniartitsisut aningaasarsiarisatik naammaginagit uuliasiortitseqatigiinnik
sulerusullutik akissarsiat qaffasinnerugamik taakkunani sulerusuttut; nunani
suliffeqarfinni fabrikkini sulisut Royal Greenlandip sulisorisai
aatsitassarsiortitseqatigiiffinni tamakkunani aningaasarsiat aamma
qaffasinnerungaaqimmata taakkunani suliffissarsiortut.
Taamaalisoqarpat ilinniartitsisut
akissarsiatik qaffakkusulissavaat Namminersornerullutik Oqartussat
suliffeqarfiutaanni sulisartut assersuutigiinnarlugu Royal Greenlandimi
sulisartut qaffakkusulissavaat taamaalillunilu inuiaqatigiit suliffeqarfiutitsinni
aningaasartuutit qaffariapiloorsinnaapput tamannalu inuiaqatigiit
taamaalissappat landskarsip tungaaninngaaniit nammassinnaanngilarput.
Taamaattumik upalungaarsimanissarput
eqqarsaatigalugu aammalu aatsitassarsiornerup kingunipilussai aamma eqqarsaatigereerlugit
pissusissamisoorluinnarpoq alloriaqqinnissarput. Soorunami ajorinngeqaarput
maannakkut aatsitassat pillugit allattoqarfik ukiuni 18-ni Kĝbenhavnimi
najugaqarfeqareersimasoq maanna nunatsinnut nuunneqartussanngormat.
Kisianni tassa alloriaqqittariaqarpugut,
taamaattumik aamma sanioqqukkuminnappoq ukiuni tulliuttuni
misilittuartariaqaratsigu danskit naalakkersuisuinut piumasaqarluta aatsitassat
pillugit pisortat isertittagassaat taakkua
isumaqatiginniutigeqqittariaqaratsigit.
Taava Atassutip oqaluttuata oqaaserisaa
aamma una oqaaseqarfigilaasavara tassa piginnittussaanermut apeqqut Atassutip
oqaluttuata oqarneratuut imatut oqarpoq qanoq angujuminaatsigisoq eqqaamanerarpaat.
Ila kisianni taamatut tunniutiinnarusunngilagut Inuit Ataqatigiit tungaanninngaaniit
aamma neriuppugut Siumut taamak tunniutiinnajatigissanngitsoq nuna manna
inuiaqatigiit kalaallit nunagivarput. Pisuussutai nammineq iluaqutiginiartussaavagut,
inuiaqatigiit kalaallit tamarmiulluta iluaqutigisinnaaniassagatsigit.
Tassani illersoriarfissaqarpugut
arlalitsigut. Nunap Inoqqaavisa pisinnaatitaaffii isumaqatigissuteqartoqarpoq
ILO Kovention 169 taanna atuariarussiuk aamma paasissavarsi tassani danskit
naalagaaffiata tungaanut illersoriarfissaqaratta. Aamma nunat tamalaat
akornanni isumaqatigiissuterpassuit qimerlooriarutsigit aammalu
malinniarsareriarutsigit aamma illersoriarfissaqarpugut manna nunarput
Kalaallit Nunarput uagut pigigatsigu taanna naqissuserniarnissaanut.
Inuit Ataqatigiinninngaaniit aamma
nuannaarutigivarput Naalakkersuisut Siulittaasuata saqqummiussatta ilaannut
ukua annikitsunnguamik aatsitassarsiornermik ingerlatserusuttut tassa Small
Scale Mining inatsisitigut sakkortuallaamik piumasaqarfigineqarnerat immaqa
qasukkartinniarneqarsinnaanisssaat julip 1-taata kingorna
qimerluuataaqqinnissaat Naalakkersuisut tungaaninngaaniit
ammaffigiumaneqarmat. Tamanna pisariaqarpoq ilisimaneqartutuummi
assersuutigiinnarlugu maani Nuup Kommunia pilersaaruteqarpoq
Qeqertarsuatsiaani aatsitassarsiorfeeqqamik ingerlatsiniarluni nunaqarfimmiut
amerlaqisut aamma suliassaqalersinnaaneranik kinguneqarumaartussamik.
Aamma taassumap saniatigut
ilisimariikkatsituut kujasinnerusumi, tassa Ivittuut kommuneat aamma
pilersaaruteqarnikuuvoq taqqavani qanga ingerlanikuusimasoq aamma
ingerlanneqarsinnaanissaa eqqarsaatigalugu. Kisianni maannakkut inatsit
aatsitassarsiorneq pillugu inatsit sukangavallaarpoq, suliffeqarfinnik
tamakkuninnga pilersitsiniarusuttunut. Taamaattumik soorunami
nuannaarutigivarput Naalakkersuisut inatsit taanna eqqartugarput
qimerlooqqinnissaa aamma piumassuseqarfigisutut ikkamikku. Kisianni aamma
tassani eqqaamaniagassarput uaniissaaq kommunet inissisimanerat aamma
eqqarsaatigissagatsigu. Kommunet qanormita periarfissaqarpat,
assersuutigiinnarlugu Nanortalik kommunea gultisiortoqalerpat qanormitaava
kommunemut iluaqutaanerpaamik kinguneqarsinnaasumik aaqqissuussinermi
peqataatinniarneqarsinnaava, tamakkuupput aamma inatsimmi maannakkut atuuttumi
immaqa naammaginavissumik isumannaarneqarsimanngitsut, taamaattumik
pisariaqarluinnarpoq inatsit, tassa aatsitassat pillugit inatsit,
qimerlooqqinneqarsinnaasuuppat.
Ruth Heilmann, Siumut,
oqaaseqaqqinniarpoq:
Qujanaq, annikitsunnguamik IA-mut,
oqaluttuanut erseqqissaateqalaaginnassaanga. Tassami oqartussaassuseq tamatta,
imaluunniit nunatsiniileraluarpalluunniit, aatsitassat aamma nunatsinniippoq,
tassa ajornartorsiutitaqartussaallunilu, taamaakkami piiaasoqalissagaluarpat
mingutsitsisoqalerpat taannalu aamma mingutsitsineq nunatsinniikkami, tassa
ajornartorsiutitassaa qanorluunniit ililluta immaqa soorunami
aaqqissinnaanngisarput, kisianni ikioqatigiinnitsigut aamma taama
isumaqatigiissusiornermi aamma nuannersut naalliunnartullu atugassat
aatsitassarsiornerup tujorminartumik mingutsitsinikkullu kingunerisinnaasai
pillugit soorunami isumaqatigiinniarnerit ingerlanneqartussaassapput, tassami
nuannaarutissatsinnik massakkut alloriarpugut aammalu uniinnassanngilagut,
tassunga suliniarneq killinngilaq, killissanngilarlu, aatsaallu
aallarteruttorpugut. Isumaqarpunga maannakkut alloriarneq tassaassanngitsoq
tassa unittariaqartugut tassunga, kisiannilu Siumuminngaanniit isumaqarpugut
aatsaat periarfissamik annertuumik Kalaallit Nunarput tunineqartoq, tassalu
aamma isumaqatigiinniarsinnaanermik aatsitassarsiornerup qanoq ittumik
nunatsinni piiarneqalissagaluarpat kingunerisinnaasai aamma eqqarsaatigalugit
piareersarnissat tamakkua ilai ilanngullugit.
Uani akileraartarnermut
sunniutigisinnaasai aammalu nassatarisai eqqarsaatigalugit ukioq-manna
misissueqqissaaqqinnissat taakkua oqaatigisimavagut, isumaqarpugullu aamma
oqaatigissallugu pingaaruteqartut, kisiannili aamma oqaatigisarput uani
qaangiinnarneqarsinnaanngitsutut isumaqarfigaarput, tassani oqaratta taamatut
aatsitassarsiornermi sulisorineqartut aamma aatsitassarsiorneq nunguppat
tassani isumannaatsumik akissarsiatigut pineqarnissaannik aamma
pineqarnissaannik aammalu qanoq aatsitassarsiornikkut soorunami inummut
sunniutigisinnaasai eqqarsaatigalugit, ajortut ajunngitsullu eqqarsaatigalugit,
kingunissai tassani isumannaarluarneqarnissaat tassani siunertarineqarpoq.
IA-p oqaatigaa immaqa
erseqqinnerusunngorlugu mineralfond, tassani aamma eqqarsaatigisaa ajoriinnagassaanngitsoq,
tassuunakkut periarfissaqalissammata aamma taamatut sulisorisaasut arlaatigut
ajutoornermi imaluunniit allatigut unittoornermi, soorlu siusinnerusukkut
misigisat, Marmorilimmi misigat, misigineqaqqissanngippata sillimanerulluta
massakkut inissisimalereernerput eqqarsaatigalugu isumaqarpugut
siusinnerusumut naleqqiulluta tassuunakkut isumannaannerusumik inatsisitigut
periarfissaqartoq aammalu periarfissaannik massakkut ujartuilluta
aallarteruttorpugut.
Uani quujagiinnarlugu oqaatigerusuppara,
tassa Ivittuut aamma eqqaaneqarmata, tassani Ivittuuni orsigissamik
aatsitassarsiornerup nalaani annertuumik sulisorisat tassani qallunaajusut
aamma eqqarsaatigalugit aamma kalaallinik arlalinnik sulisoqartarsimapput,
immaqa ulluinnarni suliassat oqitsut eqqarsaatigalugit tassani taamatut
kalaallinut aamma neqeroorutiginninneq aamma sulisutigut ingerlanneqarsimasoq
aamma iluaqutaasumik, taanna erseqqissaatigilaarusuppara, kisiannilu soorunami
tulliani iliortoqassappat annertunerpaamik nunatsinni najugaqartut
sulisorinissaat ilinniartitsinissaq aamma massakkut piareersarneqartussat
tullianilu immikkoortoq 13 aamma 14-imi eqqartorneqaqqittusat isumaqarpunga
tassani aamma eqqaaneqaqqittussaammata uani annerusumik soorunami eqqaarusunnaraluartut
kisianni tulliani aamma oqallisigineqartussaammata taamatut naatsumik
erseqqissaateqalaarpunga.
Jonathan Motzfeldt, Naalakkersuisut
Siulittaasuat, akissuteqaqqissaaq:
Tassa ataaseq julip aallaqqaataata
kingornatigut ilisimassavarput Folketingimillu akuerineqarpat atulerpat
aatsitassanik, oliamik imaluunniit aatsitassanik isumaqatigiinniartut, tassa
maanga ingerlallutik Kalaallit Nunaanni aatsitassat olialu
oqaloqatigiissutigiartorlugillu akuersissummik qinujartornerminni nuna manna
ornissavaat, qanoq tujorminarsinnaanera qanoq alianaatsigisinnanera allallu
tamaasa qanimut takusinnaalissavaat aamma aalajangigassat tungaatigut ornigunnerminni.
Tassa taanna avaqqukkuminaappoq, allanut
utoqqatsissut tunniussinnaajunnaassavarput, maani inimi aalajangikkagut
oliasiornermut, aatsitassarsiornermut tunngasut akisussaaffigilissavagut, allat
pisuutissinnaajunnaassavagut, taamaattumillu aalajangigassat tassaniittut
akisussaassusermik angisuumik aamma pisussaaffimmik angeqisumik
kinguneqartartussaapput. Paasisitsiniaanermut tunngasut ilaatigut Ruth
Heilmannip aamma Siumup oqaaseqartuata taasai aammalu partiit oqaaseqartuinit
allanit, maannaminngaanniit pilersaarusiorlugit ingerlanneqarput, ilaatigut
inuiaqatigiinnut kingunerisinnaasai oliasiornerup annertoqisup
aallartinneqarneratigut qanoq kinguneqarsinnaaneri, taakkua aamma
paasiniarneqassapput.
Piffissami allami tamakku
eqqartorneqarumaarput aningaasatigullu aviffigeqatigiittarnermut tunngasut,
kisianni ullumikkut taanna atuuppoq 500 millionit tikillugit tassani 50 %-imik
aviffigeqatigiinneqassaaq. 500 millionit qaangerneqarpata taava
isumaqatigiinniarnerit nutaat danskit uagullu akornatsinni pissapput.
Tamakkua eqqartorneranni ilanngullugu oqaatigilaassavara
Siumup oqaaseqartuata aamma erseqqissumik aamma uanga taasanni
erseqqissaatigimmagit, maannakkut Naalagaaffimminngaanniit tigusinitsigut
aamma akeqanngitsumik aamma sulisitassaqarpugut. Akeqanngitsumik arlalitsigut
immikkut ilisimasalinnik pissarsisinnaalluta. Taanna partiit oqaaseqartuinit
tamanit aamma malugineqarpoq. Avatangiisinut tunngasunik, teknikkimut
tunngasunik, isumannaallisaanermut sulisoqarnermullu nunami
kulbrintisiornermut, kiisalu imaani avataanilu tunngasutigut aamma allaffissornikkut
ikiorsiisoqartarnissaanik. Tamakkua aamma akeqanngitsumik naatsorsuutigisinnaavagut
atortassallugit. Taamaattumik tamakkua tungaatigut aamma aningaasanik nalillit
maannakkut isumaqatigiissutip iluani akeqanngitsumik pissarsiarisinnaasagut naatsorsuutigeqquakka.
Kommunet piginneqataasinnaapput maannakkut
aatsitassarsiornermik aallartitsisussani. Kommunet
aningaasaleeqataasinnaanerannut inatsit siornaanngorpoq akuerigatsigu, tassani
aamma periarfissiivugut kommuneminni aallarniiniartoqarpat
aatsitassarsiorfimmik, kommune imaluunniit kommunet sanileriit aamma
tassuunakkut periarfissaqarmata. Taamaattumik taanna aamma periarfiissaq
eqqaasissutaareernikuuvoq siornatigulli, tassuunakkut aamma qularnanngitsumik,
aamma tupinnanngitsumik kommunet ilaasa atorniartarumaaraat
ilimagisinnaavarput.
Tassa naatsumik oqaatigalugu periarfissat,
soorlu aamma ilaatigut oqaaseqartunit taaneqartut, julip
aallaqqaataaninngaanniit qimusseq aallarpat, tassa aamma tassani tunummut
uteriarfissaarutissaaq, taavalu tassani taava qimussip paarilluarnissaa
siunnerfiatalu ajunngitsumik ingerlaveqarnissaa maani iniminngaanniit
akisussaaffiussaaq angisooq.
Jakob Sivertsen, Atassut,
oqaaseqaqqinniarpoq:
Naatsunnguamik IA-p oqaaseqartuata
oqaaserisagut paasiuminaatsunngortinniarmagit erseqqissaateqalaassaanga.
Apeqqut ataaseq pingaaruteqartoq aamma
soqutiginartoq ataasiarluni danskit Folketingianni saqqummiunneqarsimavoq,
tassa ukiut 20-t sinnerlugit matuma siorna. Taamanikkut puigunaatsumik aamma uagut
malinnaalersimasugut politikkikkut paasivarput, kisianni maannakkut
angusaqarsinnaaneq isumaqatiginninniarnermi ataqqeqatigiilluni sulisinnaaneq
naalakkersuinikkut toqqammaveqarluarluni takuarput taamaalioraanni
angusaqartoqarsinnaasoq, taannaana assersuutigigipput. Tassaavoq taanna alloriarneq siulleq.
Peter Ostermann, Atassut, partiit
avataasigut oqaaseqartoq:
Qujanaq oqaaseqartutsinnut
akissuteqalaarnissamut akuerineqarama. Johan Lund Olsenip IA-meersup
oqaatigisaasa ilai oqaaseqarfigilaassavakka. Una ingerlatseqatigiiffinnut
assigiinngitsutigut teknikkikkut aaqqiisinnaanissamik oqaaseqarneq
apersuuserpaa, tassanilu una eqqaasitsissutigilaarlara aallarteqqaaratta
qanga, aatsitassat pillugit inatsit nutaaq pilerseqqaaratsigu
sakkortoorujussuuvoq, assut sakkortuumik piumaffiginnittoq ingerlatsisunut
assigiinngittumik, kisiat ukiut ingerlaneranni paasilerparput piumasagut
sakkortuallaartut akileraarutitigut allatigullu, taavalu maani inimi
sakkukillisalaartariaqarsimavagut, misissuijumallutik piiaajumallutillu
qinnuteqarsinnaasut pilerisaarlugit, kisiannili taassuma saniatigut aana
aalajangiusimasimasarput, aamma ulloq manna tikillugu aalajangiusimasarput
tamatta, mingutsitsinaveersaarnissamik piumasaq sakkortooq, allaat
oqaatigineqartarpoq nunarsuarmi sakkortunersaasoq, taanna
aalajangiusimassavarput aamma aalajangiusimajuassavarput.
Una tunniutiinnartutut aamma taavaatigut.
Taama oqaaseqarpugut. Uagut ataqqivarput isumaqatigiinniarluni sunaluunniit
angusaq, tassa ataqqisassarput, immaqa tamatigut tamakkiisumik
isumaqatiginngikkaluarlugu. Kisianni isumaqatigiinniarluni suna angusimasaq
ataqqisariaqarpoq. Aammalu ataqqinassuseq, isumaqatigiinniarsinnaanermut
ataqqinassuseq innarlernaveersaartittariaqarpoq. Isumaqatigeeriarluni illuata
tungaanut saallunilu allanngortinniarsarilerlugillu. Ullumikkut qallunaat
Folketingianni taama oqartariaqarpoq isumaqatigiissutit uagut ataqqivagut,
aammalu isumaqanngilagut tunngavimmikkut allanngortinniarneqartariaqartut. Una
aningaasaateqarfimmik pilersitsisinnaaneq - ilaana - uagut aamma taanna
pilersitseqataaffigisinnaavarput, aamma piumagutta uagut nammineq
pilersitsinnaavugut aningaasarpassuarnik isaatitsilissagaluarutta.
Sukkulluunniit ammavoq maani Inatsisartuni pilersitsisinnaanerput. Aamma
tulliani oqaluuserisassatsinni tamakku aamma tikillattaarneqarput. Oorit
takullugillu nunguinnarnagit, siunertalimmut atorneqarsinnaapput, ilai
toqqorlugit, ilai inuussutissarsiutinut allanut ingerlalluarsinnaasunut
pilersitsiniarnernut atorlugit. Tamakkua periarfissaareerput, piumagutta taamaaliorsinnaavugut.
Johan Lund Olsen, Inuit Ataqatigiit,
oqaaseqaqqinniarpoq. Pingajussaaniilerami naatsunnguamik:
Ja, tassa naatsunnguussaaq. Tassa
aatsaaginnaq oqaaseqartup kingulliup oqaaserisaanut tassa oqaatigerusussavara,
soorunami aamma uagut isumaqartuaratta mingutsitsinaveersaarnissamut
inatsiseqarnerput taanna ilumoormat immaqa nunarsuatsinni sakkortunerpaanut
ilaavoq, taanna qasukkarneqassanngilluinnarpoq. Tamanna aamma qulakkeerniarlugu
aammalu malinneqaqqullugu aatsitassat pillugit siunnersuisoqatigiinni Inuit
Ataqatigiit peqataaneranni tassa qulakkeerniartuartarparput. Kisianniuna una
oqaatigerusukkiga: Inatsisartut tamarmiulluta, tassa partiit tamarmiulluta
piumasaqaraangatta, tassa Siumut, Atassut, Inuit Ataqatigiit, Akulliit Partiiat
taavalu Kattusseqatigiit, tamarmiulluta 31-iulluta danskit Naalagaaffiannut
isumaqatigiilluta piumasaqaraangatta angusaqartarpugut. Tamanna maannakkut
timitalerneqartussanngorpoq julip aallaqqaataani aatsitassat pillugit
allattoqarfiup maanga nunatsinnut nuunneqartussanngormat. Atagu tamarmiulluta
aamma piumasaqalaariarta aatsitassat pillugit isertitat taakkua nutaamik
isumaqatigiinniutigineqarnissaat, aatsaat tamarmiugutta taava taanna
angusinnaassavarput.
Daniel Skifte, Atassut, Aningaasaqarnermut
Naalakkersuisoq akissuteqarniarpoq:
Tassaana oqaluttut ilaasa pingaartumik
IA-minngaanniit oqalunnermini imatut nipeqartumik oqaatigimmagu:
aatsitassarsiorfissuit kisimik iluanaaruteqartartut, Kalaallit Nunaallu
iluanaaruteqarneq ajortoq nunatsinni aatsitassarsiornermi. Oqaloqqaarnermini
taamak oqarmat siullermik ajuusaarutigissavara siunnersuutit ilai ajunngivissut
qaffakaasut IA-minngaanniit allaganngorlugit agguaanneqanngimmata,
taamaattumillu akerusutat qularnaatsut taamaalillutik qatangiinnartinneqarsinnaapput,
imaluunniit qatangiinnartinneqarlutik.
Assersuutitut taassavara Marmorilik ukiuni
kingullerni aatsitassarsiornikkut iluanaarutaammat landskassemut taamanikkut
annaasaqaatit ilai 250 millionit ukiumut annaasarineqarmata nunatta karsiani
imaluunniit suliffissaqartitsiniarneq eqqarsaatigalugu Uummannap kommuneani
sulisut aammalu Uummannap kommuneani akileraartartut, tamakkua annertuumik
malunniuteqarsimapput, allatut oqaatigalugu aatsitassarsiorfissuit kisimik
iluanaarsimanngillat aamma Kalaallit Nunaat isumaqatigiissutit malillugit
iluanaaruteqarsimapput. Aningaasat qasserpiaat pissarsiarisimagigut
kisivillugit maannakkut oqaatigisinnaanngilara. Taamaattumik taamatut oqalunneq
teknikkimut tunngaannanngilaq aammalu oqartoqarsinnaasorinanngilaq annerusumik
tamakkua aatsitassarsiorfiit annerusumik isertitsissutaaneq ajortut. Naagga,
nunatsinniuna inuussutissarsiorneq ataasiinnarmik sammiveqarpallaaqimmat
periarfissat atorniarigut, taamaattumik aamma aatsitassarsiorneq
siunnerfigineqarpoq.
Tassunga tunngatillugu
oqaatigisariaqassavara, ilumoorpoq IA oqarami, tamatta isumaqatigiilluta
oliasiornialerneq akuersaarsimavarput, maannakkut nipi tutsiunneqartoq tassaasorinarpoq
soorlumi nangaasoqalersoq. Taamatut oqarnikkut tunngavigaara ilaatigut
ilinniartitsisut immaqa oliasiortutut sulinissaat eqqartorneqarmat,
isumaqarpunga taanna annerusumik tigunagu imatut oqaatigiinnartariaqartoq
eqqaasitsissutigalugulu, piniartut ataqqinartut oqallisigineqarmata ukiarmi
taava aamma rockiunerarneqarput, piniartunngooq rockeriupput. Taamaattumik
qularnaatsumik Atassut taaneqarmat uanga piffissaq iluatsillugu
oqaatigissavara, Atassutip ataatsimut isiginnilluni isumaqatiginninniutigeqqinnissaa
isumaqatiginngilaa, isumaqatigiissutaasorlu ataqqiumallugu, ullumikkut
bloktilskudit Danmarkiminngaanniit pisartakkatta angissusiat annertussusiat
aammalu taakkua isumaqatigiinniutit ingerlanerat aammalu aalajangiusimanissaat
peqqutigalugu, tassami tassanngaanniit taakkua illuatungiliunneqassagaluarpat
isumaqarpunga nunarput akisussaassuseqanngitsumik ingerlatilissagipput.
Qujanaq.
Peter Ostermann, Atassut,
oqaaseqaqqiniarpoq:
Naggataarutaasumik oqaaseqassaanga. IA-p
oqaluttua Johan Lund Olsen oqarpoq aatsaanngooq tamatta isumaqatigiikkaangatta
angusaqartarpugut. Naa, amerlanerusut aamma isumaat aamma malinneqartarpoq.
Namminersornerulernerput eqqunnialeratsigu IA-kkut naaggaaqqusipput, allat
angeqqusipput, qujanaqaaq angertut amerlanerummata, imaallaat
Namminersornerulernitta iluaqutissartaasa ilaat maannakkut oqalligisarput
piviusunngortissinnaalerparput.
Una Atassummi uagut aalajangiusimavarput:
Isumaqatigiissutit isumaqatigiissutaareersut ataqqillugit aatsitassarsiornikkut,
oliasiornikkut naalagaaffik suleqatigalugu pilersitsiniarsarisa
allanngorteqattaarnagit maanaannakkut. Taamaasiorniarsarigutta
isumaqatigiinniarnermi tatiginassuseerutissaagut. Angusaqarniaqqaarallarta,
olia nassaareqqaartigu, aatsitassanik arlaannik nassaaqqaarta, piiarlugulu.
Taamanikkut pissutsit allanngorumaarput, taava qularnanngilaq aamma piumasagut
allanngussasut.
Maliinannguaq M. Mĝlgaard, Inuit
Ataqatigiit, partiit avataasigut oqaaseqarumasoq:
Qujanaq. Aap, unaana siornatigut aatsitasarsiortaneq
eqqarsaatigalugu aammalu IA-minngaanniit oqaatigineqartoq tapersilaarniarlugu
tassa ilaatigut isertitaasartut qanoq nunatsinnut sunniuteqartarneri aammalu
qanoq annertutigisarneri tassani ilisimatusartut ilaasa
doktorinngorniutitalugit, tassa ilisimatuut ilaasa allagaat toqqammavigalugu
ersarissumik oqaatigineqarsimammat, erseqqissaatiginiarlugu maanngaanniit.
Tassa naalagaaffiup Marmorilimmut, -minngaanniit iluanaarutigisimavai 788
millionit, taavalu taakkunannga kisitsisitalersimanngilarluunniit
annikitsunnguaq Kalaallit Nunaannut tussimasoq. Taamaattumik ilumoorpoq
pakkersimaartariaqarparput siunissami, uagut aatsitassat nunatsinni pigisatta
suli annertunersumik nunatsinni iluaqutaanissaat anguniarlugu, aammalu una
partiit tamarmik ukiarmi imaluunniit siorna eqqartuinitsinni nunatta imminut
nammineq napatissinnaalernissaa pimoorullugu anguniarutsigu tamatumani aamma
pinngitsoorata isertitat, uagut nunatta pisuussutaasa isertitaasa
annerpaartaat, imaluunniit aamma siunissaq ungasinnerusoq eqqarsaatigalugu,
tamaasa nunatsinnut tutsinneqartarnissaat taanna siunertarisariaqarparput
anguniarlugulu. Imatut iliortoqartuarsinnaanngilaq. Aap, Qallunaat
Naalagaaffianninngaannit taamannak 2,4 milliardinik pisarpugut, taavalu
illuatungaani aatsitassat isertittakkat affaat aamma Qallunaat Nunaannut
torartillugit. Uagut immitsinnut nammineq napatissinnaanerput aamma taakkua
annikillisikkiartornerani aamma uagut isertitatta annertusiartornissaat
anguniartariaqarparput.
Aap, Peter Ostermann oqarpoq Namminersornerulernissaq
79-imi uagut naaggaarsimagipput. Uagut Inuit Ataqatigiinninngaanniit
pingaartittuaannaratsigu nunamik piginnittussaaneq tamakkiisoq qaquguluunniit
tigussallugu. 79-imi piviusunngorsinnaasimanngimmat annikigalugu
naaggaarsimavarput. Taamaattumik siunissami aamma suli annertunerusumik
piginnittuussaanitta aammalu pisussutitsinnik oqartussaanitta
annertusartuarnissaa suliniutigiuassavarput.
Ruth Heilmann, Siumut, oqaaseqaqqiniarpoq,
pingajussaaniilerami sivikitsunnguamik:
Uangaana Siumup oqaaseqartuatut
naammagivallaanngikkiga allamut sangutitaarpallaaleqigata, tassami
atortussiassanut tunngasutigut ingerlatsinerup Namminersornerullutik
Oqartussanut nuunneqarnera massakkut pineqarpoq aammalu akuersissutiginissai
Siumumiit, Folketingimut ingerlateqqinnissai inassutiginikuuarput, taamaattumik
taannarpiaq massakkut pineqarmat makku allat saqqummiussuunneqartut
kingusinnerusukkut soorunami nangeqqinneqarumaartutut eqqarsaatigalugit
taamatut naatsunnguamik uterfigeqqiinnarusuppara maannakkut oqalliserput.
Jonathan Motzfeldt, Naalakkersuisut
Siulittaasuat:
Tassa, qanoq oqassaagut, motori maannakkut
aallartinniagarput julip aallaqqaataaninngaanniit ukioq manna ingerlalerpat
attugassaparujussuit aqqusaagassai umiatsiap taassuma, qamutit, taama taasama,
tikippagut. Tassa ilaatigut aatsitassat isertitaasa aningaasat qanoq
atorneqarnissaanut tunngasut. Taakku aamma uterfigineqarumaarput. Piffissaq
maannakkut aggersoq qularnanngilaq tamakkuninnga aamma tikinneqassaaq.
Taamaattumik qularutiginngilara aamma ilaatigut noqqaassutigineqartoq
oqaluttunit julip aallaqqaataata kingornatigut aatsitassat tungaatigut
inatsisitta sukkut qanorlu eqaallisarneqarsinnaanera periarfissat
taakkunaniittut alaatsinaanneqarnissaat qularutigineqassanngilaq aamma
tamakkua sammineqassammata.
Aammalu pingaarnerpaavoq Kalaallit
Nunaanni maannakkut taamatut periarfissat sumiittut nassaarineqarsimasut
atorsinnaasut paasinissaat mingutsitsinaveersaarnerup tamarmi aaqqissimasumik
suliarinissaa aammalu illersorneqarsinnaasumik, kiisalu aamma
aningaasaliisinnaasut nassaarineqarsinnaaneri avataani. Taanna
pingaaruteqarpoq. Pingaaruteqaqalunilu aamma aningaasaliisinnaasut
avataaninngaanniit nunarput kajungeralugu ornillugu paaseqatigalugu aammalu
piginneqataassutissakkut kommunet uagullu pisortatigoortumik periarfissatta
qularnaatsut atorniarnissaat.
Taama oqaaseqarlunga kingumut
qujassutigeqqippara ilassilluarnerqarnera saqqumiussama tungaa.
Taamaalilluta oqaluuserisassat
immikkoortuata arfernat oqaluuserineqarnera naammassivarput, suliarlu Qallunaat
Inatsisartuinut Naalakkersuisut nuannaarlutik ingerlateqqissavaat maani
Inatsisartunit tamanit taperserneqarnertik tunuliaqutaralugu.
Oqaluuserisaq naammassivoq.