Oqaluuserisassani immikkoortoq 07-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 16. februar 1998, nal.
18.00.
Ataatsimiinermik aqutsisoq: Anders Andreassen,
Inatsisartut Siulittaasuat.
Daniel Skifte, Aningaasaqarnermut
Ineqarnermullu Naalakkersuisoq:
Aningaasarsianit akileraarutit pillugit
Inatsisartut inatsisaat naapertorlugu Inatsisartut ukiup 1998-ip affaani
siullermi ataatsimiinnerminni 1999‑imut akileraarutitigut il.il. ilanngaatissat
aalajangersartussaavaat.
Ilanngaatit il.il. makku pineqarput:
1. Inummut
ilanngaat ‑ ' 32, immikkoortoq 1.
2. Ilanngaat
aalajangersimasoq ‑ ' 16, immikkoortoq 2.
3. Aningaasarsiat
B‑t akileraaruteqaataasussaanngitsut
‑
' 15,
immikkoortoq 2.
4. Akissarsiortunut
killilimmik akileraartussaasunut ilanngaat aalajangersimasoq ‑
' 2, immikkoortoq 2.
5. Kommuninut
ataatsimut akileraarut ‑ ' 28 a, immikkoortoq 2.
Ilanngaatit ataasiakkaat il.il.
erseqqinnerusumik nassuiarneqarnerannut, qanoq sunniuteqartarnerannut
kiisalu ukiuni siuliini qanoq angissusilerneqartarnerannut atatillugu
saqqummiussinermi ilanngussaq 1 innersuussutigineqassaaq. Taamatuttaaq
ilanngussaq 2-mi nassuiaateqarfigineqarput 1999-imi aningaasarsiat
tunngavissaattut naatsorsuutigisat.
Naalakkersuisut sinnerlugit
inassutigissavara 1999‑imut akileraarutitigut il.il. ilanngaatissat ima
angissusilerneqassasut:
1. Inummut
ilanngaat:
kr............................................. 40.000 (ukiumut)
2. Ilanngaat
aalajangersimasoq: .....8.000
(ukiumut)
3. Aningaasarsiat
B‑t akileraaruteqaataasussaanngitsut: 5.000 (ukiumut)
4. Killilimmik
akileraartussaasunut ilanngaat....... ......
1.000 (ukiumut)
5. Kommuninut
ataatsimut akileraarut:
...................... 4 %.
Kisitsisit taakkartorneqartut ukioq
naallugu ilanngaatissatut eqqartorneqarput.
Taamaalilluni 1999‑imut
ilanngaatissat il.il., ilanngaat aalajangersimasoq kisiat pinnagu, 1998‑imut
ilanngaatissatuulli angissusilerneqarnissaat inassutigineqarpoq.
Ilanngaat aalajangersimasoq
isertitakinnerusunit aamma akunnattumik isertitaqartartunit, ilaatigut SIK
malillugu akissarsialinnit
utoqqalinersiutilinnillu atugaanerummat, nammaqatigiinnissamik
anguniakkat pissutigalugit siunnersuutigineqarpoq taassuma 6.000 koruuniniit
8.000 koruuninut qaffanneqarnissaa. Aammattaaq ilanngaatip aalajangersimasup
qaffanneqarnera akileraaruserinermi allaffissornermut pisariillisaataassaaq.
Soorlu ilanngussaq 2-mi takuneqarsinnaasoq
qaffaanerup kingunerisaanik nuna tamakkerlugu isertitassat tunngavii 20 mio.
koruunit missinginik millissapput, tassa landskarsip isertitassaraluisa
ilaannik 2,5 mio. koruunit missinginik aammalu kommunit tamakkerlutik isertitassaraluisa
ilaannik 5,5 mio. koruunit missinginik annaasaqarnermik naleqarumaarlutik. Kommunit
isertitassaraluaminnik annaasaqartussat tassaanerussapput kommunit annerit
aammalu kommunit pigissaarnerit.
1999‑imi kommuninut ataatsimut akileraarutip
allanngornagu 4 %‑inut angissusilerneqarnissaa Kalaallit Nunaanni
Kommuneqarfiit Kattuffiata isumaqataaffigaa, taamatuttaarlu inummut ilanngaatip
allanngornagu aalajangerneqarnissaa Kattuffiup isumaqataaffigalugu.
Aallaqqaataani oqaatigeriikkattut
paasissutissat sukumiinerusut pillugit soqutiginnittut ilanngussanut
1-imut 2-mullu innersuutiitigalugit, inatsisartut qinnuvigissavakka 1999-imut
akileraartitigut ilanngaatissat il.il. taakkua pillugit aalajangeeqqullugit.
Laannguaq Lynge, Siumup oqaaseqartua:
1999-imi akileraarutitigut
ilanngaatissanik Naalakkersuisut siunnersuutaatigut
akileraarutitigut ilanngaatit 1998-imut
naleqqiullutik allannguuteqartinneqartusssaanngillat ilanngaat
aalajangersimasoq eqaasanngikkaanni. Ilanngaataasartup taassuma
aalajangersimasup 6000 kroniniit 8000 kroninut 1999-imi qaffanniarneqarnera
Siumumiit tapersersorparput.
Tamanna Naalakkersuinermi anguniakkanut
naleqquttutut isigaarput. Taamaaliornikkut innuttaasut isertitakinnerusut
eqqarsaatigalugit Naalakkersuisut aningaasarsiornikkut
naleqalersitsinerunissamik oqilisaassinerunissamillu siunertaqarnerat tassuuna
aamma timitalerneqartutut oqaatigisariaqarmat. Tamanna annersusumik
pensionilinnut SIK-llu isumaqatigiissutaanik akissarsiaqartinneqartunut
malunaateqarnerpaassaaq naak aamma illuatungaatigut kommuninut
akileraarutitigut isertitanut ataatsimut isigalugu
amerlagineqarsinnaanngikkaluartunik annaasaqataasussaagaluarluni.
Siumumi nuannaarutigaarput
ilanngaataasartup 8000 kroninut qaffanniarneqarnera. Oqareernitsitut akissarsiakinnernut
iluaqutissaavoq. Massakkumullu akissarsiakinnernut inuiaqatigiit
tapiissutigisartagaat annikigiinnagassaanngitsut taamaalillutik aamma
annertusiallaateqartinneqarput.
Inuiaqatigiit
aningaasaqarniarnerannut sunniutissaa 20 mio. kroninik naleqartussaq 1999-mut
aningaasanut inatsisissani ilanngullutik naatsorsuutigineqarnissaat Siumumi
suleqataaffigissavarput.
Taama oqaaseqarluta 1999-imut
akileraarutitigut ilanngaatissat il.il. Naalakkersuisut siunnersuutaat
Siumumiit taperserlugu akuersaarparput.
Knud Sĝrensen, Atassutip oqaaseqartua:
Ukiumut 1999-imut akileraarutitigut ilanngaatissat Atassut-mi peqqissaartumik misissuataareerlugit makku oqaatigissavagut.
Atassut-ip pingaartilluinnarlugu siunertaraa inuiaqatigiit akileraarutitigut, akitsuutitigullu nanertorneqarnerat sapinngisamik minnerpaaffigisinnaasamini inissisimasassoq ajornanngippallu akileraarutit appartinneqarnissaat siunertariuarlugu. Minnerunngitsumik oqaatigisarparput nunatsinni akileraartarnermi malitassiat ima paasiuminartigalutillu suliariuminartigisariaqartut kikkunnilluunniit tamanit ajornanngitsumik suliarineqarsinnaasariaqarlutik.
Atassut-mit akileraarutitigut ilanngaatissatut siunnersuutigineqartut soorunami akerlilissalugit pissutissaqanngilagut, tassami malugilluarparput ilanngaat aalajangersimasoq akileraartarnerup 1975-imiit eqqunneqarneranit ataasiarluni allanngortinneqarsimasoq ukiumut 1999-mut 8000 koruuninut qaffanneqarnissaa siunnersuutigineqarsimammat.
Atassut-ip taamatut siunnersuuteqarneq pingaartutut pitsaasumillu siunertaqartutut isigalugu ilalerluinnarpaa, tamatumami inuiaqatigiinni iluaqutissartaa annerusoq tassaammat pensionisiallit kiisalu SIK malillugu aningaasarsiaqartut, nunatsinni ikittuunngeqisut, tamatumuunakkut akileraartarnikkut ulluinnarnilu inuunikkut atugassarisaat pitsanngoriaateqartinneqassammata.
Atassut-mit manna iluatsillugu oqaatiginiarparput qularutiginnginnatsigu ukiuni aggersuni naligiimmik akeqartitsinerup allanngortinneqarsinnaaneranut atatillugu akileraarutitigut allaanerusumik aaqqissuussinissaq pisariaqarmat. Neriuutigaarput kissaatigalugulu ukiamut assigiimmik akeqartitsinerup oqaluuserineqarneranut atatillugu tamanna pissasoq. Kisianni soorunami tamanna saqqummiuneqarpat aatsaat annertunerusumik iserfiumaarparput.
Qulaani oqaaserisagut innersuussutigalugit ilanngaatissatut siunnersuutigineqartut allat allannguutinillu ilaqanngitsut immikkut oqaaseqarfigissanngilagut, siunnersuullu ataatsimut isigalugu Atassumminngaaniit akueraarput.
Mannasse Berthelsen, Inuit Ataqatigiit oqaaseqartuat:
Naalakkersuit 1999-imut akileraarutitigut ilanngaatissat pillugit siunnnersuutaannut Inuit Ataqatigiit ukua oqaatigiumavagut.
Oqaaseqaatissagullu aallartivitsinnagit una erseqqissalaarlara. Inuit Ataqatigiinniit naalakkersuisut siunnersuutaat sullugilluinnaratsigu. Tassa nalinginnaasumik ilanngaatip 6.000-imiit 8.000-imut qaffanniarlugu siunnersuuteqarmata.
Naalakkersuisooqatigiit, tassa Atassut Siumullu isumaqatigiissuteqarnerminni ilannguppaat, Isumaginninnermi iluarsaaqqinnissamik ataatsimiititaliarsualiorniarlutik, inunnik isumaginninnerup nalilersoqqinnissaannik pitsanngorsaaffigineqarnissaannillu. Ataatsimiititaliarsuullu isumaliutissiissutini upernaaq 1997-imi ataatsimiinnitsinni maani inimi saqqummiunneqarpoq, inatsisartunik tamarmiusunik akuersaarneqartumik.
Inuit Ataaqatigiinniilli ataatsimiisitaliarsuarmik sulisitsisimaneq Naalakkersuisoqatigiinniit qineqqusaarutaannartut imalunniit isumaqatigiissuteqarnerminni kusassaataaginnarsimasutut kiisa isigileratsigu.
Ilaqutariit mikisunik meerallit meeqqamik sivisunerusumik ilagisinnaasalernissaannut, tassa anaanaasup ataataasulluunniit sulinerata sivikillisaaffigineqarsinnaaneranik saqqummiisoqarmat aana kisimi akissutigineqartoq, akissaqanngilagut.
Akileraarutinut ilanngaatip maanna siunnersuutigineqartumiit annerunissaa neriulluarfigisimagaluarparput ukiaq piitsut pisuullu pillugit oqallinnermi Aningaasaqarnermut Ineqarnermullu naalakkersuisup inummut ilanngaatip qaffanneratigut Inuit Ataqatigiit saqqummiussaannut naaperiaalluni saqqummiussimmat. Maannali paasinarsivoq oqaatsini puigukatareersimagai.
Inuit Ataqatigiinniilli neriuutigeqaarput Isumaginninnermi Iluarsaaqqinnissamik ataatsimiititaliarsuup inassutai siunissami qaninnermi timitalersuinissaminnut Naalakkersuisut kommunillu piumassuseqarnerujumaartut, tamattami pilliuteqartariaqarpugut Inuit Ataqatigiinnimi orniginerusimagaluaratsigu akissarsiaqqortussuseq naapertorlugu akileraarusersuisoqarnissaa. Inuit Ataqatigiinniillu paasiuminaatsipparput, allaffissornerujussuarmik kinguneqartussaasoq ersisaarutigineqarmat.
Maannakkummi atortorissaarutitsigut ineriartorneq malinnaaffiginiarlugu aningaasaliisarpugut ikinngeqisunik. Taamaammat aperisariaqarpoq inuup ataatsip 350.000 koruunit sinnerlugit aningaasarsiallip 5%-imik 10%-imilluunniit akileraarnerulernissaat naatsersussallugu sooq inorsaatigissagipput.
Kommuninut ataatsimut akileraarutip agguaanneqartarnera Inuit Ataqatigiinniit nalilersoqqittariaqartutut isigaa. Ilumoorsinnaanngilarmi kommunit pisuut ajornartorsiortutut isigineqarlutik agguaassiffigineqaannarsinnaanngillat, illuatungaanilu kommunit ajornarsorsiulerfianni ikiuut ukiut pingasut aatsaat qaangiukkaangata takkuttarluni.
Aningaasaqarnermut Ineqarnermullu naalakkersuisup inummut ilanngaatip qaffanniarneranut piumassuseerutiivissimammat Inuit Ataqatigiinniit piumasariinnartariaqarparput, nunatsinni akileraariaaseq ataatsimut nalilersoqqinniarnissaa sulissutigequllugu, Inunnik Isumaginninnermi Iluarsaaqqinnissamik Ataatsimiititaliarsuup innersuussutigisimasaat naammassiniarneqassappata.
Bjarne Kreutzmann, Akulliit Partiiat:
Akulliit Partiiata aallaqqaammut
oqaatigissavaa, 1999-imut akileraarutitigut ilanngaatissat il.il.
aalajangersarnissaannut Aningaasaqarnermut Naalakkersuisup siunnersuutaa ima
imaqartoq tapersersoramiuk:
1. Inummut ilanngaat ukiumut.......................................................................... kr. 40.000
2. Ilanngaat aalajangersimasoq ukiumut........................................................... kr. 8.000
3. Aningaasarsiat B-t akileraaruteqaataasussaanngitsut ukiumut .................... kr. 5.000
4. Killilimmik akileraartussaasunut ilanngaat ................................................. kr. 1.000
5. Kommunenut ataatsimut akileraarut ukiumut.............................................. 4%.
Tassa 1999-imut ilanngaatissat il.il. 1998-imut ilanngaatissatuulli angissuseqassallutik, taamaallaat ilanngaat aalajangersimasoq pinnagu taanna inassutigineqarmat 6.000 kruuniniit 8.000 kruuninut qaffanneqassasoq.
Allanngortitsinermut patsisaasut paasivakka tassaasut akileraaruserinermi allaffissornikkut oqilisaanissaq aamma agguataarinermi politikkimut tunngasut, taanna tunngavigalugu isumaqataavunga.
Anthon Frederiksen, Kattusseqatigiit:
Kattusseqatigiit sinnerlugit 1999-mut akileraarutitigut ilanngaatissat il.il.aalajangersarneqarnerannut atatill0ugu saqqummiunneqartut tunngaviatigut isumaqatigaakka.
Naluneqanngitsutut Inatsisartut upernaakkut 1997-imi ataatsimiinnitsinn Inunnik Isumaginninnermut ataatsimiititaliarsuup suliaminik saqqummiussinermini ilaatigut nunatsinni utoqqaat, innarluutillit sulisinnaajunnaarnersiutillillu inuuniarnerminni atukkamikkut qanoq ajornartorsiuteqartiginerat ersersereerpaa.
Taamaattumik pissutsinik tamakkuninnga paasinnilluta aammalu immikkut ikiuisarnermut aningaasartuutaasartorpassuit ilaatigut pinngitsoortinniarlugit matumuuna Kattusseqatigiinniit inatsisartunut aammaarlunga siunnersuutigissavara utoqqaat, innarluutillit sulisinnaajunnaarnersiutillillu akileraarutinut akiliisarunnaarnissaat.
Tassami pissutsinik paasinnilluarsimagaanni inunnut pineqartunut tamatuma qanoq pingaarutigissuisia takuneqarsinnaammat.
Taamaaliornikkummi siullertut anguneqassammat inuit pineqartut tarnimikkut erloqissutaasa ilaat annertuumik oqilisarneqassamata, aammalu inunnik isumaginnikkut immikkut aningaasartuutaasartut soorlu: Ineqarnermut, kiassarnermut, kallerup inneranut il.il. sipaarneqalersinnaalissammata, taamaalillunilu ikiuisarnermut aningaasartuutit ilaat appartinneqarsinnaallutik.
Soorlu assersutigalugu 1987-imi inummut ilanngaat qaffanneqarmat kommuunit isertitamikkut annaasaqartussat iluarsiissutissatut 3 procentimik angissusilerlugu akileraarutitigut iluarsiisoqarpoq.
Aammalu naluneqanngitsutut utoqqalinersiutisialinnut sulisinnaajunnaarnersiutisialinnullu inummut tapiliuttagaq kommunemiit kommunemut assigiinngitsumik atortinneqarnera suli maannamut allanngortinneqarani taamaattuarpoq, naak tamanna inunnik isumaginninnermut ataatsimiititaliarsuup aaqqiivigineqassasoq ersarissumik uparuareeraluaraa, taamaattoq maannamut suli tamakkuluunniit iluarsiniarlugit qanoq iliuusissanik saqqummiussisoqanngilaq.
Taamaattumik pisariaqalerpoq inuit siuliani eqqartorneqartut inuuniarnerminni atukkamikkut oqilisaavigineqarnissaat oqaasiinnaanngitsumik timitalimmilli iliuuseqarfigissallugu, asuli utaqqilutsiinnarnagit.
Ajuusaarnarpoq akileraartarnermut ataatsimiititaliaq suliamut atatillugu isumaliuutissiissummik saqqummiussaqanngimmat, taamaattumik Kattusseqatigiit sinnerlugit kaammattuutigissavara suliap aappassaaneerneqannginnerani akileraartarnermut ataatsimiititaliami oqaluuserineqassasoq.
Daniel Skifte, Aningaasaqarnermut Ineqarnermullu Naalakkersuisoq:
Siullermik partiit oqaaseqartuinut kiisalu Kattusseqatigiinnut qujassuteqarpunga, qujavunga Naalakkersuisut siunnersuutaat amerlaneruussuteqarluartut erseqqissumik tapersersormassuk, tassami Siumukkut, Atassutikkut, Akulliit Partiiata Kattuseqatigiillu siunnersuut taperserpaat, taamaattumik taanna qujassutigaara.
Inuit Ataqatigiit immikkut annertunerulaartumik oqaaseqarfigilaassavakka, tassa siunnersuut sullugilluinnarpaat, taanna erseqqippoq siunnersuummilli sulluginnikkaluarlutik qanoq qaffatsiginissaa erseqqissumik taanngilaat, Naalakkersuisut siunnersuutigaat inummut ataatsimut 2.000 kronenik naleqartumik ilanngaatip qaffannissaa.
Illuatungaatigullu Inuit Ataqatigiit aamma oqaatigeqqillugu pitsaanerussagaluartoq akissarsiaqqortussuseq tunngavigalugu akileraarusersuisarnissaq, taanna Naalakkersuisut maannakkut ullumikkut periarfissatut isiginngilaat, taanna erseqittumik oqaatigisariaqarpoq.
Inummut ilanngaat eqqarsaatigalugu ullumikkut taamatut periarnissaq eqqarsaatigalugu tusagassiuutitigut oqallinnermi maluginiarpara Inuit Ataqatigiit taagaat 40.000 kroneniit 50.000 kronenut qaffatsitsinissaq, taanna annertunerusumik oqaaseqarfiginagu erseqqissaatigiinnassavara kisitsisit taaneqanngitsut una kingunerissammassuk qanorluunniit annertutigigunik, qanorluunniit annikitsigigunik, eqqorneqarnerpaat tassaasussaammata sinerissami kommuneqarfiit, eqqorneqannginnerpaat tassaasussaapput Namminersornerullutik Oqartussat, taamaattumik pingaartuusimavoq Naalakkersuisunut, taassuma nalilersornerani kikkut ajunnginnerpaamik ikiorserneqassasut, ikiorserneqartussat tassaapput akissaatikinnerusut, pingaartumik SIK malillugu akissarsiaqartitaasut, taamatullu aamma soraarnerussutisiaqartut.
Taamatut oqariarlunga tapiutigilaarusuppara ilaatigut Inuit Ataqatigiit nalilersuilluaqqusimmata, aammalu nalilersuisoriarlugit akileraartarnerup allanngortinnissaanut sulissuteqarnissamik kaammattuimmata, taanna pillugu oqaaseqassagama, uunga atanngitsumik, Naalakkersuisut qanoq ilioriusissaat ilaatigut assersuutigalugu Inunnik Isumaginninneq Pillugu Ataatsimiititaliarsuup inassutigisaa, Inatsisartullu akuersissutigisaat, taanna tunngavigalugu qanoq iliuusissat Naalakkersuisup tassunga susassaqartup maannakkut sulissutigigai ilisimagatsigit Naalakkersuisuni, aammalu naatsersuutigalugu ukiup matuma, 1998-ip ingerlanerani taanna apeqqut pillugu qaffatsitsisoqartussaasoq, taamaattumik tassunga atasumik aamma Naalakkersuisut nalilersorluartussaagaat, soorlu assersuutigalugu assigiimmik akeqartitsinerup atorunnaarsinneqarnissaanut tunngasumik akileraartitsinermi periaaseq ullumikkut atuuttoq nalilersoqqittariaqartoq, taannali siunissamut tunngavoq.
Unali apeqqut maannakkut pisarput, taanna pinngitsoorata Inatsisartuni upernaaq manna isummerfigisussaavarput, taamaattumik apeqqutit uani eqqartorneqartut ilaatigullu Inuit Ataqatigiinniit qaffatsinneqartut ilai suliassamut allamut tunngasumut qaffatsinneqartussaapput, soorlu oqareernittuut utoqqalinersiuteqarnermut tunngasut, meeqqanut tunngasut kiisalu aamma assigiimmik akeqartitsinermut tunngasut.
Taamatut oqariarlunga aamma Kattusseqatigiit ujartugaasa ilaat aamma utoqqarnut tunngasut, inunnik isumaginninnermut tunngasut taakkua innersuussutigaakka Naalakkersuisup taassuminnga suliaqartup ukiup ingerlanerani qafffatsitassaanut ilaammata, akileraartarnermulli tunngatinnagit qaffatsinneqartussaapput allakkut, kisianni paasivara erseqqipporlu aamma Kattusseqatigiit siunnersuummut tapersiilluarmata, taamatut aamma Akulliit Partiiat oqaaseqarmat soorngunami qujaqqissaanga, qujanaq.
Peter Ostermann, Atassut:
Oqaaseqartutta avataatigut
oqaaseqarnissannut akuerineqarama qujassutigaara, oqaaseqarumaninnut
pissutigaara Naalakkersuisunit saqqummiunneqartoq isumaqatigisinnaannginnakku,
marlunnik pissuteqarlunga.
Siullermik, ilanngaatip aalajangersimasup
6.000 kroneniit 8.000 kronenut qaffanneqarnissaannik Naalakkersuisut
saqqummiussinerminni nammaqatigiinnerunissaq tunngavilersuutigaat, tunngaviatigut
akerlerineqarsinnaanngitsoq, aningaasatigummi atukkat
pitsannguallatsinniarneqarmata, kisianni ulluinnarmi inuunerminni atukkaminnik
pitsanngorsaanissaminnut pisariaqartitsisut qanoq amerlatigisut
aallavigigaanni qaffaanissaq iluaqutaasussaanngilaq.
Pitsanngorsaavigineqarnissamillu pisariaqartitsivissut pingaartumik
meerartallit qarsupinneqartutut oqaatigisariaqarlutik. Politikkikkut
piumassuseqaraanni maannakkut inuuniarnerminni atukkaminnik
aaqqiivigineqarnissamik pisariaqartitseqisut aaqqiivigineqarsinnaapput.
Aappassaanik; Ukiuni makkunani aningaasatigut
isaatitsinerput nakkutigilluaqqissaartussaavarput, aningaasatigullu
sakkkortuumik mianersortumik ingerlatsisariaqarluta, aalisarnerinnarmik aningaasarsiornikkut
tunngaveqqartilluta, taamaattumik akileraarutitigut isertittakkatta ikileriaasissaanik
iliuuseqarnerit isumaqatigisinnaanngilluinnarpakka.
Taakkartukkakka tunngavigalugit
aalajangersimasumik ilanngaatip qaffanneqarnissaanik siunnersuut akerleraara,
naak saqqummiussap imarisai allat isumaqatigigaluarlugit.
Karl Lyberth, Siumut:
Anthon Frederiksen-ip
Kattusseqatigiinninngaaniit ujartormagu akileraarnermut ataatsimiititaliaminngaanniit
sooq peqannginnersoq uanga tassani ataatsimiititaliami siulittaasutut
nassuiaateqalaassaanga.
Ataatsimiititaliami suliaq taanna
saqqummiunneqartoq pingaartilluinnarparput, ataatsimiinnitsinni ilaatigut
Manasse Berthelsen-ip kissaateqarnera malillugu uangalumi aamma siulittaasutut
kissaateqarnera malillugu taanna suliaq aaamma saqqummiunneqarlunilu
oqaluuserineqarpoq.
Ataatsimiititaliaq aalajangersimavoq
isumaliuutissiissummik maannakkut uuma saqqummiunneranut saqqummiussinissarput
maannakkut pisariaqanngikkallartoq, ilaatigut pissutaallutik uani suliassami
partiit oqaaseqartuisa oqariartuutaat qanoq imaqarnersut tusarnissaat pingaaruteqarmat,
aammalu ataatsimiititaliami naliliivugut piffissami ungaserujussuanngitsumi,
qularnanngitsumik suliaq taanna aamma uterfigeqqinneqartussaammat, taakkua
akileraartarnermut ilanngaatit assigiinngitsut uterfigeqqinneqarnissaat
qularnanngilluinnarmat, tassa soorlu Atassutip oqaaseqartuata saqqummiussinermini
taagaa, assigiimmik akeqartitsineq pillugu oqallisilerutta aamma
akileraarutitigut ilanngaatit assigiinngitsut
attunngitsoorneqarsinnaanngimmata, taamaattumik taamanikkussamut suliaq taanna uterfigeqqinneqartussaammat
maannakkuugallartoq pisariaqartutut nalilersunngilarput.
Aamma ilaatigut Naalakkersuisut
saqqummiussinerminni inassuteqaataat erseqqimmata, aammalu kingunissai
erseqqimmata maannakkuugallartoq ataatsimiititaliap isumaliuutissiissummik
saqqummiinisssani pisariaqartissimanngilaa, kisianni oqaatigissavara
ataatsimiititaliami taanna pingaartinneqarluinnarmat, maani Inatsisartunut
ilaasortat amerlanerussuteqartut isumaqarunik pisariaqartoq suliaq
ataatsimiititaliamut apuunneqarnissaa, taava soorngunami piareerssimassaagut
suliap ataatsimiititaliami ingerlanneqarnissaanut.
Manasse Berthelsen, Inuit
Ataqatigiit:
Siullermik Atassutikkormiut
oqaaseqartuannut, taassuma taammagu naligiimmik akeqartitsinerup
allanngortinneqarnissaanut atatillugu akileraarutitigut allaanerusumik
aaqqissuussineq innersuussutigalugu.
Naluara Atassutikkormiut arlaatigut
takutitsisiinnaanersut siunissami qanoq pisoqarnissaa qularnaareersinnaallugu,
unami assigiimmik akeqartitsineq ullulerlugu atulersinniarneqanngilaq,
imaannissaavoq 1999-imi imaluunniit 2000, 2001-imiluunniit aatsaat
atulersinnaasoq, taamaammat taassuma utaqqinissaanut utoqqatsissutigissallugu
naleqquttuunngilaq.
Peter Ostermann isumaqatigaara,
tassani pitsanngorsaatissatut oqalunneq akissaatikinnerusunut takujuminaappoq,
tassami Naalakkersuisut saqqummiussinerminni oqaatigaat 20 millioner krone-nik
naleqassasoq, tassa Landskarsimut 2,5 millioner kronenik naleqassasoq,
akileraarutitigut isertittarpagut milliardit affai, taakkunannga 20 millioner
kronet takusassaanngillat, taamaattumik malunnaatilimmik oqilisaaniarnermik
taaneqarsinnaanani.
Kommunet 18-it akunnerminni
annaasassaat ataatsimoortillugit 5,5 millioner kroneupput, taamatullu
oqarluaannarutta, immaqa kommunet karsiini takuneqarsinnaassanngillat 1999-imi
akileraarutitigut annaasat.
Taamaattumik tassuuna Peter
Ostermann taperserusuppara aamma sulluginnilluni oqaaseqarmat.
Knud Sĝrensen, Atassut:
Siullermik Inuit Ataqatigiit kiisamiuna qimannialerunaraat akissarsiaqqortissuseq naapertorlugu akileraarusersuisoqarnissaanik isumartik, tassa 1984-imiilli akileraartarnermut ataatsimiititaliami ilaasortaaninni Inuit Ataqatigiinniit taanna saqqummiunneqartarsimavoq, aamma itigartuarput, aamma massakkut saqqummiukkaluarunikku uatsinnit Atassummiit akuerineqarunnanngillat, taanna Atassutip siunertarinngilluinnarpaa.
Malartaaserneq soorluuna sallaalliartulersoq, aammami taaamaattariaqaraluarpoq, paasisariaqaleraluarmassuk akuersaarneqarsinnaanngitsoq taamaaliornissaq, kisianni soorngunami misiliiuarneq inerteqqutaanngilaq.
Aamma Inuit Ataqatigiit oqaluttuata oqarfigaatigut akileraartarnerup allanngortinniarneqarsinnaaneranik eqqartuinitsinnut, ulloqanngilarooq taanna, aap ulloqanngilarmi, ullulersortariaqanngillat aamma taakkua, kisianni naatsorsuutigineqarpat ukiamut assigiimmik akeqartitsinerup allanngortinneqarnissaanik oqallinnissaq, taava piffissaalluarpoq taanna aqqutigalugu akileraartarnerup allanngortinniarneqarnissaa tunngaviusumik oqallisigissallugu.
2.000 kronenik qaffaaneq naleqannginnerassagussiuk tupigusuppunga, aningaasaq sunaluunniit naleqarpoq, aamma qujanasssagunarpoq, qujanassallunilu akissarsiakinnerusunut taamatut iliorfigineqarneq, assersuutigiinnartigu Danmark-imi assigiinngitsunik aningaasanut tunngasunik oqallittoqartillugu kisitsisimininnguit taaneqaraluaraangataluunniit naalakkersuinikkut oqartoqartarpoq taakkua iluaqutaassaqaat ukiut ingerlanerini, kisitsisit tamarmik taamaapput, kisianni soorngunami inuit pututinniassagaanni aamma pututinniarneqarsinnaapput, kisianni uagut isumaqarpugut taamatut qaffaaneq, tassa 6.000 krone-niit 8.000 krone-nut pingaartumik uagut akileraartarnerup eqqunneqarneranut aalajangeeqataasimasugut kingumut qiviarutta pissutsit allanngorsimanerat aamma takusinnaavarput, aningaasatigullu ineriartorsimaneq akileraarutillu allanngoriartorsimanerat malugilluarsinnaallutigu, taamaattumik inunnut akunnattumik akissarsiaqartunik pineqartartunut soorngunami malunniutissaaq pinngitsoorani, immaqa annertoorsuunngikkaluaruniluunniit malunniutissaaq, allatut ajornaqaaq.
Akileraarutinik ilanngaatinik suliaqartarneq marloriarneqarneq ajorpoq, pingasoriarneqarluniluunniit, taanna ataasiaannarluni suliarineqartarpoq, tassalu 1999-imut ukiumut ilanngaatissat assigiinngitsut ullumi aalajangersarneqartut akuersissutigineqarunik inatsisartuniit 1999-imut atuuttusssaapput, pissutigalugu taakkua piaartumik nalunaarutigineqartusssaammata tamakkuninnga suliaqarfinnut assigiinngitsunut, kommunenut atortussaammatigit.
Taamaattumik ukiamulluunniit akileraartarnermut tunngasut nutarterneqarnissaat oqallisigissagaluartutsigit naatsorsuutigisariaqanngilaq 1999-imi taakku ilanngaatit allanngortinneqarnissaat.
Piffissaqassanngimmata tamakkuninnga suliaqartussat suleriaqqinnissaminnut.
Kattusseqatigiit oqaluttuata oqaatigivaa utoqqaat, innarluutillit aammalu sulisinnaajunnaarnersiutillit akileraartarunnaarnissaat, soorngunami inuit naapittakkagut assigiinngitsuupput, aamma uagut qangali akileraaartarnerup Kalaallit Nunaannut eqqunniarneqarnerani oqallittarnitsigut taaamanikkut paasisarsimavagut inuit oqaloqatigisartakkagut, utoqqaat allallu aamma taakkua piumassuseqartut perusullutillu Kalaallit Nunaata ingerlanneqarnerani akileraarutitigut aamma akiliisarusullutik, tassa taamaattarpoq, inuit ataasiakkaat imaluunniit assigiinngitsut naapittagaat assigiinngittarput, kisianni aamma nalunngilarput akileraarutitigut tamakkununnga tunngasunik immikkut aaqqissuussisoqarsimammat, aammalu Inatsisartut sukkulluunniit aaqqissuussinissamik piumasssuseqarunik, aammalu amerlanerussuteqartut aalajangerpata tamakkununnga tunngasut qanorluunniit aaqqissuussivigisinnaammatigit.
Anders Andreassen, Inatsisartut Siulittaasuat:
Erseqqissaatigissavara amerlanerussuteqarluartut saqqummiussaq akuersaareermassuk!
Jonathan Motzfeldt, Naalakkersuisut Siulittaasuat:
Paasivara allamik siunnersuuteqanngimmat taanna Naalakkersuisut siunnersuutaat kisimi maannakkut periarfissaasoq, aamma oqaatigilaassavara, maannakkut inunnik isumaginninnermut aaqqissugassagut ukiaru tamakkiisumik saqqummiunneqartussaapput, qularnanngilaq aamma aningaasartaanut tunngasut saqqummiunneqassasut, kiisalu aamma asssigiimmik akeqartitsinerup allanngortinneqarneranut nassuiaat, tassanilu aamma akileraartarnikkut allannguutissanik imaqanngitsoorsinnaanngitsoq, eqqarsaatissagut oqallisigissavagut ukioq tulliuttoq tikillugu. Maannakkullu aamma aningaasat tapiissutit allanngortiterneqarnissaat qularnanngitsumik inunnik isumaginninnermut atatillugu tikinneqartussaapput.
Kiisalu aamma tikinngitsoorunnanngilarput ukiarulu nassuiaassinermi ilanngutissallugu maannakkut akit appartikaanngatsigit pisortatigoortumik ingerlatatta iluanni, ikummatissat appartinneqarpata, solar-it, Benzin-at allallu allanngorartinneqarpata, ilumut nioqqusiagut akikinnerulertarnersut tassani nakkutigineri qanoq ippat?
Pinngitsoorata assigiimmik akeqartitsineq allannguuteqarpat nioqqutissallu akivissaminnik akeqalerlutik, nioqqutissiorfinni KNI-mi Privat-inilu nioqqutigineqalerpata, taava nakkutigisariaqassavarput aamma ilumut taakkua akikilliliissutigut taamaalillutik aamma malinneqartut, nioqqutissatigut taamatut atuinermi, taama ittumik ukiaru saqqummiussassagut aamma imaqartussaajumaarput, assigiimmik akeqartitsinerup allannguutissaatut noqqaassutit naammassillugit saqqummiutissagutsigit, taanna sioqqullugu tamakkuninnga saqqummiisinnaanngilagut maannakkut.
Taamaattumik oqaatigilaassavara pissutisit tassaniittut, asigiimmik akeqartitsinerup allannguuteqartinneqarnissaa Inuit Ataqatigiit siunnersuutiginngilaat, siunnersuutiginngilluaasarpaat, naalakkersuisununa siunnersuuutaat, aamma siunnersuutissatut misissorneqarnera nammineq uagut illersorfissaqartutut isigigutsigu aatsaat saqqummiutissavarput!
Taamaattumik misissuinigut tassaniittut maani inimi neriorsuutigisimasatsitut ingerlappagut, aammalu uagut siunnersuutissarigatsigu nammineq aalajangissavarput illersorsinnaasatsinnik qanoq isikkoqartumik saqqummiussiumaarnerput, akuerineqarsinnaasutut saqqummiunneqassaaq, taanna neriuutigalugu, akuerineqassanngippat taava suliassaq unissammat tamarmi.
Taamaattumik uunga akuliussorlugu pinissaa maannakkut isumaqarpunga piaarpallaartumik oqallinneq aallartittoq, kisiannili uani allamik siunnersuuteqartoqarsimanngippat taava taanna uagut tungitsinniit akuersissutigitinniarnera paasivara amerlanernik tapersersorneqartoq, taannalu qujassutigaara.
Daniel Skifte, Aningaasaqarnermut Ineqarnermullu Naalakkersuisoq:
Inassutaasumik oqaaseqalaarniarpunga, Siullermik Peter Ostermann-ip oqaaseqaataa, soorngunami Peter Ostermann-ip inuttut nammineq isumaa nalunaarutaalu ataqqissavara, qularnaatsumik ataatigut titarlugu erseqqissumik Atassumiit paasivara Peter Ostermann-i kisimiilluni taanna isumagigaa, taamatullu oqarnera nammineq akisussaaffigissavara, tassungalu ataqqinninnera taavara, kisianni tassa oqareernittut, pitsanngorsaatit ilaat, soorlu maannakkut 2.000 krone-t tungaanut qaffaanissaq aammalu ukiup matuma ingerlanerani qaffatsinneqarumaartussat, soorlu utoqqalinersiutilinnut tunngasut, meeqqanut tunngasut, taakkua Naalakkersuisut suliniutigisaat qaffakkumaartut piffissami tassani qaffappata taava Naalakkersuisut piumassuseqarnerat erserpoq, ataatsimut akileraarutaannaanngitsut aammali assigiinngitsut taallatsiakkakka tunngavigalugit aaqqiissuteqarusunnermik.
Karl Lyberth-ip Akileraartarnermut ataatsimiititaliaq sinnnerlugu aamma oqaaseqarneranut aamma erseqqissunut qujarusuppunga, tassami tassani oqariartuuteqarpoq, ullumikkut pisariaqartinnagu taamatut inassuteqarnissaq, uanilu inimi partiit Kattusseqatigiillu oqaaseqarnissaat aallaavigalugu pisariaqartitsineq qanoq ittoq takoriarlugu oqaaseqarumallutik, taamaattumik taamatut nalunaaruteqarnerat erseqqissoq qujassutigaara, maannakkummi tusaasinnaasakka najoqqutaralugit Siumut, Atassut, Akulliit Partiiat Kattusseqatigiillu isumaqataapput siunnersuummut, taamaattumik pisariaqassanngilaq uanga naliliinera tunngavigalugu taakkua suliseriaqqinnissaat.
Inuit Ataqatigiit oqaaseqartuannut Manasse Berthelsen-imut oqaaseqalaassaanga, ilaatigut suusupaginninnermik kommunet nammatassai soqutaanngitsutullusooq nipeqarluni oqaatigimmagit, aningaasat taasakka qanorluunniit qaffaatigigutta, qanorluunniit appaatigigutta eqqorneqarnerpaasut tassaapput kommune-t, kommune-t ilai pisuut angisuullu ajornartorsiummik tunissanngilagut, taava tassuuna immaqa Manasse isumaqatigaara, kisiannili kommunealuppassuaqarpoq assorujussuaq aningaasassaaleqisunik, aammalu taakkua nammagasssinneqassappata, taava apeqquterujussuussaaq, ilumut taamaaliorneq kommunet kalerrisaaqqaarnagit akisussaassuseqarnermik tunuliaqutaqarnersoq.
Naalakkersuisuniit malugeqquarput, Kommunet Kattuffiat taamatut siunenrsuummut isumaqataammat, aammalu kommunet taamatut nammatassinneqarnissaagaluat aamma Kommunet Kattuffiata nalunaarutaa tunngavigalugu aamma Naalakkersuisut siunnersuutaat ataatsimoortoq isumaqatigimmagu, taamaattumik Inuit Ataqatigiit oqaluttuanut oqasssaanga, pisuut piitsullu akornanni qunneq annertusigaluttuinnassanngippat, taava periaaseq una maannamut siunnersuutigineqartoq Naalakkersuisunit malikkaanni pitsaanerussaaq, taamatut naalakkersuisut isumaqarput.
Anthon Frederiksen, Katttusseqatigiit:
Oqaluuserineqartoq, akileraarutit pillugit inatsisip ataaniimmat, isumaqarpunga periarfissaqaraluartoq taasssuma oqaluuserisap akileraartarnermut ataatsimiititaliaq aqqusaarlugu aappassaaneerlugu pingajussaanneerlugulu oqaluuserineqartariaqartoq.
Minnerunngitsumik aamma maani oqallinnermi isumaginninnermut ataatsimiititaliarsuup saqqummiussai, ilaatigut eqqaaneqarput, aammalu aaqqiiniarnissamut atatillugu isumaqarpunga pingaaruteqartoq akileraartarnermut ataatsimiititaliami suliarineqarpat, soormi tuaviupiluutigineqassava? Ataatsimiinneq suli manna naammassineqanngilaq, aamma periarfissaqarpoq uuma ataatsimiinnerup ingerlanerani pingajussaaneerluguluunniit oqaluuserineqarsinnaanissaa.
Tassami inuit atukkamikkut ajornartorsiuteqartut annertuumik uani apeqqummi ilaatigut ilorraap tungaanut sunniuteqartumik aaqqiivigineqarsinnaanerat imaaliinnarlugu qaangiinnartariaqanngitsutut uanga isumaqarfigigakku.
Anders Andreassen, Inatsisartut Siulittaasuat:
Erseqqissaatigissavara Inatsisartut amerlanerussuteqqarluarlutik aatsaat kissaatigippassuk, suliaq Ataatsimiititaliamut ingerlaqqissinnaammat, kisianni taamatut isikkoqanngilaq maani.
Josef Motzfeldt, Inuit Ataqatigiit:
Oqallinnermi akuliunneqarsinnaasut, imaluunniit assersuutitut oqaaseqatigiinni ataatsini ilanngunneqarsinnaasut assigiimmik akeqartitsineq, innuttaasut atugarisaannut tunngappata maani inerteqqutaasariaqanngillat ilaannikkut taaneqatsiartassappata, oqallisigingaartariaqanngillat, massakkut aamma Naalakkersuisut Siulittaasuat ilumoornerassavarput ila, ila, Inuit Ataqatigiit assigiimmik akeqartitsinerup misissorneqarnani peerneqarnissaa siunnersuutigisimanngisaannarpaat, aamma siunnersuutiginavianngilarput.
Soqutiginarnerusorli massakkut, Naalakkersuisut Siulittaasuata assigiimmik akeqartitsinermut tunngasunut oqalunnerani tassaavoq, misssuinerinuku suut Naalakkersuisut ingerlakkaat? Qanga aallartikkaat, tassami inatsisartut aningaasaligaat, inatsisartut akuerisaat, misissuisussatut ataatsimiitassat marluk ukiup nikinnerata kingulliup nalaani oqaatigineqarput aallartinneqarsimanngisaannartut, ataatsimiigiaqquneqanngisaannarsimasut.
Kisianni Inuit Ataqatigiinniit Atassummut aamma oqaatigerusupparput, soorngunami ilaana malartaasiinnaarnavianngilagut, paasereerutsigu taamatut isikkoqartillugu anguniagarput angunaviarnagu, tamanna uagut ilikkarparput, kisannili tamakkiisumik aaqqiinissaq anguniartuassavarput, sakkussat arlaqarput, nalinginnaasumik akileraartarnermut oqilisaassinissami ilaatigut kommunet assigiimmik akileraaruserneqarsinnaanerat ilaatigut eqqartorneqarsinnaavoq, utoqqalinersiassat qanoq pineqarnissaat takorloorneqarsinnaavoq.
Isertitakinnerit malugineqarsinnaasumik oqilisaaffigineqarnissaat arlaatigut anguneqarsinnaavoq, imaappoq qularnanngilaq mumillugu akissarsiaqqortunerit annertunerusumik nammagaqarnissaannik oqalunneq mumilllugu nioqqutiginiarneqarsinnaavoq imaalillugu isertitakinnerit malunnaateqartumik oqilisaassivigineqarnissaannik siunnersuutitut, taamaalillugu misilikkaluarumaarparput.
Manasse Berthelsen, Inuit Ataqatigiit:
Una 20 millioner krone-t imaluunniit Namminersornerullutik Oqartussanut 2,5 millioner krone-t kommune-nullu 5,5 millioner kronet mikisuararsuunerarlugit oqarama aamma Siumup oqaaseqartuanit taperserneqarama, oqaaseqartuanit aamma imatut oqaatigineqarpoq, kommune-nut akileraarutitigut isertitanut naatsumik isigalugu amerlagineqarsinnaanngikkaluartunik annaasaqaataasussaagaluarluni, tassa akissarsiakinnerusunik oqilisaassinermi annaasassat amerlagineqarpallaanngillat.
Piitsuunerusut pisuunerillu kommune-nut tunngatillugu oqaaseqarnitsinni eqqaavarput 4 procent kommunenut ataatsimut akileraarutip agguaanneqartarnera naapertuilluarnerusumik agguaannneqarsinnaasuugaluarpat taamatut inummut ilanngaatip qaffanneqarnerani eqquinerit annertugisassaanngikkaluarput, ullumikkumut naleqqiullugu, taamaammat inassutigaarput Naalakkersuisunut taanna misissorluaqqullugu, nalilersoqqeqqullugu, kommune-t pisariaqartitsisut tunineqarlik, taavalu pisuut 4 procent-i taanna aqqutigalugu pilliuteqarnerulik piitsuunerusunut.
Jonathan Motzfeldt, Naalakkersuisut Siulittaasuat:
Inuit Ataqatigiit siulittaasuat eqqaasilaaginnarniarpara oqaaseq una atormagu ataatsimiigiarsimanngisaannarput, ataatsimiigiarsimasunnguakkuluupput, aammalu nalunaarusiaat tunngavigalugu taanna agguaanneqarsimavoq, ataatsimiittarnerminni misissugarisarsimasaat, maani aamma inimi taanna agguaanneqarsimammat, kisanni taanna tunngavissatut tamakkiisumik atorneqarnissaa Naalakkersuisut isigisimanngilaat ingerlatitseqqinnissaminni, taamaattumillu suliassaq ingerlaqqilluni maannakkut, suliassaq nangeqqippoq.
Unalu aamma oqaatigilaassavara, aningaasat ullumikkut eqqartorneqartut soorngunami aamma Naalakkkersuisuni nalunngilara taanna Aningaasaqarnermut Naalakkersuisup taallatsiaraa, procent-imik qanorluunniit ittumik pigaluarutta taanna personfradrag-imiittoq imaluunniit allatigut ikkukkaluarutsigu kommune-ni kingunerisassai naatsorsorneqarsimammata, aammalu maannakkut qaffaanermi kommune-nut kingunerisinnaasai aamma naatsorsukannerneqarsimallutik, taamaalillunilu eqquinissaq tamatsinnut annernannginnerusutut aamma isigisaq ukiamut erseqqinnerusumik tamakku saqqummerartussat ilaatigut utaqqineranni.
Laannguaq Lynge, Siumut:
Imatut paasineqassanngilagut Siumumi kommmunet annaasaqarnissaat soorlu soqutiginngikkipput, immaqaluunniit iluariinnaripput.
Tassani eqqarsaatigisariaqarparput kommunenut soorngunami annaasaqaataassagaluarpalluunniit isertitakinnerit inuiaqatigiinniit inatsisitigut isumannaakkamik piginnaatitaaffeqarput tapiissutigineqarnissaminnut, soorlu assersuutigalugu ineqarniarnerup tungaatigut meeqqanut tapiiffigineqartarput, saniatigut boligsikring-imik pisinnaatitaapput, saniatigut aamma meeqqerivinni inissat sapinngisamik akikinnnerit taaakkununnga aamma akigitinneqartarput, nalinginnaasumik meeqqanut tapiissutaasartut qaffaneeqarnikuupput angajoqqaat isertitaat 280.000 kronet tungaanut, milliartoraluarlutik, kisianni aamma inatsisimi tassani pisinnaatitaapput eqqanaarneqarlutik, taakkua tapiiffigineqartarput taamaalillutik.
Tassani paaseqqoqaara Siumumi allat aamma taagorsinnaagaluarlugit suut saniatigut angajoqqaanut, immaqaluunniit ilaqutariinnut isertitakinnnernut tapiutaasartut, inuiaqatigiiinnit tapiutigineqartartut, taanna 5,5 millioner kronenik kommunet aningaasarsiornerinnut nakkariaataasussaagaluaq soorngunami uggorigaluarlugu, kisianni sunniutigisinnaasai allatigut isertitakinnernut tapiliutaasartut imaluuunniit pitsanngoriaatit taanna uagut Siumumiit illersoratsigu.
Lars Sĝrensen, Inuit Ataqatigiit:
Tassaana qaffaanissamut tunngatillugu ilaatigut aamma erseqqissaatiginiariga, Naalakkersuisuniit oqaatigineqarmat akissarsiakinnernut malunnaatilimmmik qaffaaniartoqartoq, kisitsisit pinnguarerujooraanni, tassani takuneqarsinnaavoq qaffaat ullormut 5 krone-nik kinguneqartussaavoq, ullormut 5 krone, massakkut suua?
Taamaattumik oqartoqarsinnaanngilaq malunaatilimmik tamanna qafffaanerusoq, aamma akissarsiakinnernut saatinniarneqarnissaa taanna eqqunngilaq, taamatut qaffaaniarneq kikkunnut tamanut atuuppoq, taamaattumik qunnerup taassuma aaqqeriarnissaanik oqalunneq taaanna eqqortuunngilaq.
Oqalunnermi ulllumi aammma oqaaatigineqarpoq nammaqatigiinneq Siumukkunniit Atassutikkunniillu oqallinnermi tunngaviusariaqartoq, nammaqatigiinnertut oqaatigineqarsinnaanngilaq, oqaaseq asuli oqaatsitut imaarussimasutut asulilu inuiaqatigiinnut taamatut sassaalliutigineqartarnera isumaqarpunga mianersuunneqartariaqartoq.
Nammaqatigiissagaanni taava pisariaqarpoq inuit pisinnaanerusut annertunerusumik nammagaqarnissaat, taamaalilluni aamma nammaqatigiinnerup isumaa eqqortumik atorneqarsinnaasariaqarpoq.
Kikkunnut tamanut iluaqutaasumik taanna aaqqiiniarneq nammaqatigiinnertut oqaatigineqarsinnaanngilaq, aammalu oqaatigineqarsinnanngilaq akissarsiakinnerusunut tamakkua pitsaanerusumik iluaqutissaassasut, ullormummmi 5 krone suua?
Siunissami akileraartarnermut tunngatillugu alllannguinissaq taanna saneqqunneqarsinnaajunnaarpoq, ippassigami nunatsinni kommunet pisuunerpaat ilaatigut ima pisuutigilersimapput, allaat akileraarutit appartinnissaat eqqarsaatigilersimallugu.
Akileraaartarnermi qaffaasarneq soorngunami aallaaveqarpoq innuttaasunik sullissinerup pitsaanerunissaa anguniarlugu, kommunet mikinerit aningaasatigut periarfissakinnerit tasssaapput nunatsinni akileraartarneq eqqarsaatigalugu qaffasinnerpaajusut, maannakkut kommunet pisuunerusut Namminersornerullutik Oqartussanut annertoorujussuarmik aningaasaliiffigineqarsimasut nammaqataarusunnatik allaat akileraarutitigut appaanissartik eqqarsaatigilersimavaat, tamanna siunissami pinngitsoornani aammma aaqqinniarneqartariaqarpoq, oqaaseq nammaqatigiinneq ilumut tunngaveqarluni ingerlassappat.
Tassani erseqqissaatiginiaannarpara taamatut aaqqiiniarneq ullormut 5 krone, taamatuttaaq siunissami akileraartariaatsimut tunngatillugu nutaaliorsinnaanissaq, nammaqatigiinnnermik tunngavilik pilersinniassagutsigu, tamakkua assigiinngitsut saneqqunneqarsinnaanngillat, ingerlasoqarsinnaanngilaq, nunatsinni pisuut pisuunngoriartuinnartillugit piitsullu piitsunngoraluttuinnartillugit, taamatut inuiaqatigiinnut politik-ikkut ingerlatsisoqarpat, ukiut qassit qaangiuppata nunarput qanoq isikkoqalissava?
Isumaqarpunga oqallinnerni pingaarutilinni tamakkua aamma eqqarsaatigisariaqarigut saneqqunnaveersaarlugillu.
Anders Andreassen, Inatsisartut Siulittaasuat:
Ja, naatsorsueqqissaarnermut sangungajalluinnarluta, taamaalilluni oqaaseqarniartut tamaanga killeqarput.
Una oqaatigineqartoq kingullermiit 5 krone suusupagineqarluni, oqaatigilaasssavara pilerigisamik pisiniarluni 5 krone-ninnguarlu amigaatigigaanni uggornassaqaaq.
Taavalu amerlanerussuteqarluartut Naalakkersuisut saqqummiussaat akuersaarpaat, ataaatsimiititaliamilu suliarineqarnissaa kissaatiginagu, taamaattumik saqqummiussap akuerineqarnera matumuuna nalunaarutigaara.
Oqaluuserisaq naammassivoq.