Oqaluuserisassani immikkoortoq 08-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 18.februar 1998 nal.
13.19
Ataatsimiinnermik aqutsisoq: Inatsisartut
Siulittaasuat Anders Andreassen.
Marianne Jensen, Peqqinnissamut,
Ilisimatusarnermut, Avatangiisinullu Naalakkersuisoq:
Naalakkersuisut PAARISA pillugu
nassuiaataat Inatsisartut pinaveersaartitsinermi peqqinnerulersitsiniarnermilu
sulianik paasitinneqarnissamik kissaateqarnerat ilaatigut aallaavigalugu
suliaavoq, taamatuttaaq PAARISA-p siunertaanik aaqqissuussaaneranillu
saqqummiussinerulluni.
Nassuiaat Peqqinnissamut
Ilisimatusarnermullu Pisortaqarfimmit suliarineqarpoq, tamannalu
naalakkersuisoqarfinni allani tamakkiisumik pinaveersaartitsineq pillugu
sulianik takussutissiisuunani. Naalakkersuisut kissaatigaat
ataqatigiissaarinerup siunissami pitsaanerulersinneqarnissaa.
Suleqatigiissitaq pilersinneqartoq Kultureqarnermut, Ilinniartitaanermut
Ilageeqarnermullu Pisortaqarfimmit, Isumaginninnermut Suliffeqarnermut
Pisortallu Suliassaqarfiutaannut Pisortaqarfimmit kiisalu PAARISA-mit inuttaqartinneqartoq 1998-i aallartiinnartoq
pilersaarusiussaaq, Namminersornerullutik Oqartussat susassaqarfiini
pinaveersaartitsinermi ingerlanneqartut iluanni periusissat, sapinngisamik
tamakkiisumik ataatsimoorussaasumillu ataqatigiissaarinissaq anguniarlugu.
Naalakkersuinikkut angorusunneqartut
attatiinnarneqarnissaat qulakkeerumallugu pinaveersaartitsinermi periuusissat
pillugit Naalakkersuisut pilersaaruteqarput 1999-imi nassuiaammik
saqqummeeqqinniarlutik.
PAARISA pillugu nassuiaanermi
naalakkersuinikkut anguniakkatut siunniunneqartut oqallisi-gineqarnissaat Naalakkersuisut pingaartippaat,
siunniunneqartut suliniutigineqarneri kisiisa qulakkeerniarnagit.
Suliniutissatut siunniunneqarsimasut oqallisigineqarnissaat pisariaqartinneqarpoq,
nalilersorneqartuarnissaat pingaartillugu, kiisalu aningaasartassaasa
tulleriaarnissaannut oqallinneq pisariaqartinneqarluni.
Naalakkersuisooqatigiit 1995-imi
aalajangersagaat, 1997-imi upernaakkut ataatsimiinnermi Peqqinneq pillugu
nassuiaatip saqqummiunneqarneranut atatillugu pinaveersaartitsinermik
ingerlatsinikkut anguniagassat oqallisigineqarput. Taakku
siunnerfigineqarsimasut suliaapput
najukkani peqqinnissamut ataatsimiititalianit nalunaarutit malillugit
aammalu Pinaveersaartitsinermi Siunnersuisoqatigiit inassutaat
tunngavigalugit.
Naalakkersuisut nalunngilaat innuttaasut
peqqinnissakkut naammaginartumik sullinneqarnissaannut akisussaaqataallutik.
Ukiorpassuarni sungiusimavarput peqqinnissamut akisussaaneq qitiusumiit
ingerlanneqartoq: Inissianut pitsaasunut, imermut minguitsumut, eqqakkanut kuussiornerit
eqqaasarnermullu akisussaassuseqarneq.
Illoqarfinni tamani Napparsimmavinnut Kigutileriffinnullu akisussaassuseq,
nerisassanut peqqinnartunut niuertarfinni pissarsiarineqarsinnaasunut
assigisaanullu akisussaassuseqarneq.
Aammattaarlu pingaaruteqarpoq inunnit
ataasiakkaaniit tunngaviusumik peqqissuseq pilersikkiartorneqartarnera.
Meeqqat milutsinneqarnissaannik, naartusut imigassartunnginnissaannik
tupatunnginnissaannillu, meeqqat ukiumi issinnerani nasaqartarnissaannik,
kigutit salinneqartarnissaannik, inersimasut nammineq angerlarsimaffimminni
pujortannginnissaannik, imaluuniit peqqiillisaatigisaminnik
imigassartunnginnissaannik aammalu aningaasakilliuutigilikkaminnik Inatsisartut
inatsisiliorsinaanngillat.
Naalakkersuisut anguniagarivaat innuttaasut inuttut peqqissutsiminnik akisussaaqataanerminnik,
angajoqqaallu meeqqat peroriartortut peqqissusaannut akisussaaffeqarnerannik,
inuillu ataasiakkaat peqqissutsip
tungaatigut qaammaasaqarnerulernissaat. Tamaattumik Naalakkersuisut
isumagisariaqarpaat ilisimasat pigineqartut isumatuumik innuttaasunut
siammarneqarnissaat.
Ukiualuit matuma siorna pinaveersaartitsinermut siunnersortinik kommunini atorfinititsisoqarnissaa suliniutigineqarpoq. Kommuninit tamanit inummik ataatsimik peqataaffigineqartumik qitiusumiit pikkorissartitsisoqarpoq. Kingusinnerusukkulli paasinarsivoq kommunini ataasiakkaani pinaveersaartitsinermi siunnersortitut pikkorissartinneqarsimasut ikittuinnaat atorfinitsinneqarsimasut. Tamatumunnga pissutaanerarneqartut ilagaat kommunit aningaasakilliorneri.
Tamakku kingorna "Suliniut Pinaveersaartitsinermi Siunnersortit", KANUKOKA qanimut suleqatigalugu ineriartortinneqartoq, 1997-imi aallartinneqarnerani qitiusumik oqartussaasut najukkanilu suliniuteqartussat akornanni suleqatigiinnissamik periarfissiisoqarpoq. 1998-imut Aningaasanut Inatsisikkut PAARISA-mut aningaasaliissutit amerlinerisigut, kommunit neqeroorfigineqarsinnaalerput pinaveersaartitsinermut siunnersortimik atorfinitsitsinissaminnut, akissarsiaasa affaasa nalinganik tapiiffigineqarsinnaanerat periarfissaalermat.
Namminersornerullutik Oqartussat pinaveersaartitsinermi siunnersortit piukkunnarsartuarnissaat qularnaarumavaat, 1999-imullu Aningaasanut inatsisikkut najukkani pinaveersaartitsinermik suliniutit qulakkeerneqarnissaannut qitiusumit aningaasanik atugassiisoqarnissaa siunnersuutigineqassaaq.
Ukiut tamaasa kommunimi peqqinnissamut pilersaarusiortartut, najukkani peqqinnissamut ataatsimiititaliat tassaapput pinaveersaartitsinermik siunnersortimut paasititsisartussat, suut suliniarfigisariaqartuni suliniarnermi aallunneqarnerusariaqarnerinik.
Nunaqarfinni peqqissuseq illoqarfinnut naleqqiullugu kinguarsimaneruvoq. Peqqissutsimik misissuinermi tamattoqarnera uppernarsarneqartoq tunngavigalugu, peqqinnissaqarfiup najukkani napparsimmavinniit nunaqarfinni peqqissaanikkut attaveqaatinik pilersitsisoqarsimavoq, sulisunik siunnersuisartussatut sullissisartussatullu inissisimasunik, taakkualu immikkut ilinniartinneqarsimapput.
Kommunit Suliniummut Pinaveersaartitsinermi Siunnersortit peqataanerminnut atatillugu nunaqarfinni qaammarsaanernik sulianillu pinaveersaartitsissutaasunik qularnaarinissaminnik pisussaaffilerneqassapput. Kullorsuarmi peqqinnerulersitsiniarluni siunertaqartumik suliniuteqarnermi misilittagaasut maanna atuaganngorlugit allaaserineqarsimalerput. Innuttaasut namminneerlutik peqqinnerulernissamik suliniuteqarnissaasa pingaassusianik - aamma nunaqarfinni - Naalakkersuisut qularunnaarsippaat misilittagarineqartut uppernarsarneqarnerisigut. Ullumikkut Peqqik 2000-imit - Upernavimmi - misilittagaqarlualereerpugut, PAARISA-p najukkani pinaveersaartitsinermi siunnersortit qitiusumillu oqartussaasut attuumassuteqartut peqatigalugit misilittagarineqartut nunaqarfinni allani, qanoq iluaqutigineqarsinnaaneri nalilersorniartussaassavaat.
Pitsaaliunermik Siunnersuisoqatigiit, Naalakkersuisunut siunnersortaasut, 1996-imi martsimi pilersinneqarnerminniilli siunertaq malillugu ingerlasimapput. Ilaasortat, nunatta annersaanit peqqinnissamut ataatsimiititalianit sinniisaasut, kaammattuutigaat naalakkersuinikkut anguniagassatut aalajangiussat saniatigut meeqqat isumassorneqarnissaat avatitigullu nappaatit aallunneqarnerulissasut.
Meeqqat - siunissavut - Naalakkersuisunit eqqumaffigineqartorujussuupput. Ilisimavarput meerarpaalussuit sumiiginnagaasartut, aammalu atuarfinniit, Isumaginninnermut Pisortaqarfiup Immikkoortortaqarfiinit Saaffiginnittarfinniillu ilisimatinneqartarpugut meeqqat kinguaassiutitigut atornerlunneqartarnerat qaqutigoortuunngitsoq. Naalakkersuisut suliniutit pitsaasut tamaasa tapersersorniarpaat, meeqqat toqqissisimallutik peroriartorsinnaatitaanissaat qularnaarumallugu.
Tamatumunnga erseqqissaatitut Naalakkersuisut Mikael Petersen, Konrad Steenholdt uangalu isumaqatigiippugut Inuuneq Nakuunermut aningaasat atugassiissutaasartut, 1998-imi meeqqat isumassorneqarnerisa pitsanngorsarnissaasa isumannaarneqarnissaannut annertunerusumik atorneqassasut.
"Qitilunnerit", assigiiaaginnartumik suliaqarnerup kingunerisaanik nungullarnerit gigteqarnerillu Peqqissutsimik misissuineq malillugu tassaapput innuttaasut 18%-iisa nappaatigisaat.
Inuiaqatigiit sullissiviusut suliffissuaqarfiusullu pilersinniarlugit ilungersornitsinni timip sulinermini pitsaasumik allanngorartumillu inissisimarusuttarnera eqqumaffigisariaqarparput.
Taamaammat Naalakkersuisunit nuannaarutigaarput Pitsaaliunermik Siunnersuisoqatigiit suliniarfissaq tamanna tikkuarsimammassuk.
PAARISA pillugu nassuiaat suliniutaareersunik 1998-imilu suliniutigineqartussanik imaqarpoq.
Arlaqanngitsut nutaat eqqaalaarniarpakka:
PAARISA-p aviisia maannamiit ukiumut arfinileriarluni saqqummertassaaq. Normut pingasut saqqummeriiginnartut peqqinnissaq pillugu atuagassiap atuarneqartarnera, issuaavigineqartarnera oqallisigineqartarneralu paasillugu nuannerpoq.
Aalakoornartunik imigassanik atuinerup appariarsimanera naammagisimaarnaqaaq. Innuttaasunut agguaqatigiisillugu atuineq maanna qallunaat atuinerattut ippoq, nunanulli avannarlernut allanut naleqqiullugu suli annertulluni. Taamatut ajunngitsumik ineriartornerup ingerlaannartinneqarsinnaanissaa Naalakkersuisut neriuutigaat.
Nuummi Qaqiffik inissilluareersimavoq, Ilulissanilu katsorsaaveqalerneratigut imerajunnerminnik katsorsartikkusuttut ilaqutaasulluunniit utaqqigatik katsorsartinnissaminnik neqeroorfigineqarsinnaalernissaat naatsorsuutigineqarpoq.
Meeqqat silaannarmik minguitsumik pujoqanngitsumik najuussuisarnissaminnut pisinnaatitaaffeqarnerat 1998-imi sammineqassaaq. PAARISA tamanna pillugu annertuumik paasisitsiniaassaaq.
1994-imi atuartut peqqinnerup tungaatigut ileqquinik misissuisimanermit paasisat 1997-imi saqqummersinneqarput. Misissuineq taama ittoq ukioq manna Nunarsuarmi Peqqinnissaq pillugu Suliniaqatigiiffissuarmit World Health Organizationimit ingerlanneqassaaq. Tamatumani paasisat suut ajornartorsiutaanerpaanerinik paasisitsiniaanerillu qanoq aaqqissuunneqartariaqarnerinik ilisimasatsinnut ilapittuutaassaqaat. Naalakkersuisut, Ilisimatusarnermut atugassiinikkut aningaasatigut tapiissuteqarput, atuarfiillu tamaasa misissuinermut tamatumunnga peqataaqqullugit kajumissaassavaat.
HIV-imik tunillatsissimasut AIDS-imillu napparsimasut pitsaanerusumik inuuneqalernissaannik neqeroorfiginissaat Naalakkersuisut qangali kissaatigaat. 1997-imi Inatsisartut AIDS-imik napparsimasut nakorsaatit pingasut atorlugit katsorsarneqarnissaannut aningaasaliipput. 1998-imi nunatsinni AIDS-imut aningaasaateqarfik pilersinneqassaaq, tassanngalu isumassuinissamik neqeroortoqartassalluni.
100.000 kr.-it tassunga immikkoortinneqarput, aningaasaateqarfiullu Aningaasanut inatsimmi tapiissutitigut tunissutitigullu aningaasaateqaleriartornissaa naatsorsuutigineqarpoq.
Naalakkersuisut paasisinnaalluarpaat nunatsinni pinaveersaartitsinerup siunertaqarluartup, ataqatigiissup ingerlaavartullu pisariaqartinneqarnera, nassuiaatikkut saqqummiussakkut qulakkeerneqartoq.
Taamaammat Naalakkersuisut sinnerlugit saqqumiussissut manna naggaserniarpara Inatsisartut nuna tamakkerlugu pinaveersaartitsinerup peqqinnerulersitsiniarnerullu piviusunngortinnissaata qularnaarnissaanut iliuuserisassanik tapersersuinissaanik kaammattorlugit ukuninnga:
PAARISA-p nangittumik pinaveersaartitsinerup aamma peqqissutsip siuarsarnerata Naalakkersuisut politikkikkut siunertaasa piviusunngortinneqarnissaat nukittorsarnissaallu qulakkiissavai.
PAARISA-p apeqqutini peqqinnissamut tunngassuteqartuni, aamma pinaveersaartitsinermut peqqissutsillu siuarsarneranut tunngassuteqartuni politikerit, kommunit innuttaasullu sullitissavai.
PAARISA-p najukkani pinaveersaartitsinermik suliniuteqarnerit aallartillugit, tunngavissiorlugit aamma isumassarsitinniartassavai.
PAARISA-p ilisimasat politikikkut anguniakkanut attuumassuteqartut ingerlaavartumik katersortassavai, ilisimasallu tamakku suliffeqarfiup iluani avataaniillu suleqatigisanut attuumassuteqartunut ingerlateqqinneqartarnissaat isumagissallugu.
PAARISA pinaveersaartitsinerup iluani inatsisitigut tunngavigisat tulluarsarneqarnerinut ineriartorteqqinneqarnerinullu peqataassaaq.
PAARISA-p nangittumik qitiusumik DSAO-mut KIIP-mullu atatillugu kiisalu najukkani pinaveersaartitsinermut siunnersortinut atatillugu ataqatigiissaarisutut sulinini nukittorsarlugulu annertusassavaa.
PAARISA-p paasisitsiniaanerit ingerlatilinnginnerini pinaveersaartitsinermut siunnersortit aammalu najukkani peqqinnissamut ataatsimiititaliat piviusumik peqataatinneqartarnissaat qulakkiissavaa, assersuutigalugu paasisitsiniaanermi anguniagaqarfiusussat misiliutiginerini peqataatitsinikkut.
PAARISA-p nunat tamat akornanni suleqatigiinneq nunat avannarliit eqqarsaatigalugit nukittorsassavaa, kisiannili aamma Canadami Alaskamilu Inuit eqqarsaatigalugit.
PAARISA-p Suliniut Pinaveersaartitsinermut Siunnersortit-nut atatillugu makku sulissutigissavai:
- kommunini tamani pinaveersaartitsinermut siunnersortinut aningaasarsiatigut tapiissuteqartoqartarnissaata qulakkeernissaa,
- pinaveersaartitsinermut siunnersortit assigiinngitsunik ilinniagaqartunik attaveqaataasa nukittorsarneqarnerat,
- pinaveersaartitsinermut siunnersortit pikkorissarnertigut piginnaanngorsartuarnerisa qulakkeernissaat,
- najukkani pinaveersaartitsinermut atatillugu sammisaqartitsinermut atugassanik qitiusumi aningaasaateqalernissap ineriartortinnera.
Taama oqaaseqarlunga Nassuisaat Naalakkersuisut sinnerlugit Inatsisartunut oqallisigisassanngortippara.
Kristine Raahauge, Siumup oqaaseqartua:
Upernaakkut 1997-imi Inatsisartut
ataatsimiineranni, Naalakkersuisut, Peqqissuseq pillugu nassuiaammit
saqqummiussinerannut atatillugu,
Siumumit oqaaseqarnitsinni eqqaavarput, qanoq nukinginnarsitigisoq
Pitsaaliunermut siunnersuisartussanit atorfinititsiortornissaq aammalu
Paarisap pilerseqqinniarneqarnera pitsaaliuinissamut suliniutit ataqatigiissaarneqartarnis-saannut
aqqutissiuussisartussatut pingaartikkatsigu nuannaarutigalugu.
Tassungalu atatillugu isumaqarluta,
pitsaaliuineq aqqutigalugu inuiaat peqqinnarnerusumik inuuneqarnissaannut
aqqutissiuineq isumaginniffiit tamarmik suleqatigiissutigalugu ingerlattariaqaraat,
suliniarnermilu innuttaasut suleqatigineqarluartariaqartut. Siumut isumaqarpoq,
inuup peqqinnissani nammineq annertuumik akisussaaqataaffigisariaqaraa.
Ullumikkullu Paarisa pillugu nassuiaat
Naalakkersuisunit saqqummiunneqartoq, Siumumit soqutigalugu pingaartillugulu
sammisimavarput. Takusinnaallugulu nuannaarutigaarput suliniutissatut
pingaartitatut tikkuartorsimasavut ilanngullugit suliniutigineqartunut
ingerlanneqarsimammata.
Nassuiaallu ima oqaaseqarfiginiarparput:
Nunatsinni pitsaaliuinerup
siunertaqarluartup ataqatigiissup ingerlaavartullu pisariaqartinneqarnera,
nassuiaatikkut saqqummiussakkut qulakkeerniarneqarnera Siumup taperserpaa.
Takusinnaallugillu Nunarsuarmi
Peqqinnissaq pillugu Suliniaqatigiiffissuata (WHO) peqqinnissakkut
siuarsaanermut annertuumik suliaqarnissamut suliassatut Ottawami
isumaqatigiissutaata, Naalakkersuisunit isumaqataaffigineqarsimasumut
malitsitsitut aammalu Ottawami innersuussutigineqartut aallaavigalugit
Naalakkersuisut pitsaaliuisitsinissami suliniutissatut anguniagassatut
siunniussaanut ukununnga attuumassuteqartut:
Hashimik, tupamik aalakoornartunillu
atornerluineq ukiut tuusintillit nikinnginneranni annertuumik
millisarneqassasoq.
Innuttaasut imminnut isumagisinnaanerat
sumiiffinnilu peqqinnissakkut siuarsaaneq nukittor-sarneqassasut.
Nunaqarfinni peqqinnissakkut pissutsit
pitsanngorsaavigineqassasut.
Suli naartuusunik, inoorlaanik meeqqanillu
mikisunik kiisalu tamakku angajoqqaavinik isumassuineq annertusarneqassaaq.
Kissaatiginngisamik naartusarnerit
ikilisarneqassasut.
Kinguaassiutitigut nappaatit maannakkutut
atugaanerat millisarneqassaaq. HIV-p tunillaassuunnera sapinngisamik
killilersimaarneqassasoq, HIV-millu aamma tunillatsissimasunik AIDS-imillu
nappaatilinnik isumassuineq pitsanngorsarneqassasoq.
Ajunaartarnerit ikilisarneqassasut
ikuallattoornikkut ajunaartarnerit ilanngullugit.
Inuttussusermut sanilliullugu ingammik
inuusuttut akornanni imminoornerit amerlasisut pillugit pitsaaliuinermik suliat
nukittorsarneqassasut.
Taamaattumik Naalakkersuisut
innersuussutaat, nuna tamakkerlugu pitsaaliuisitsinerup peqqinnerulersitsiniarnerullu
piviusunngortinnissaata qulakkernissaanut iliuusissatut, ersarissumik
immikkoortunngorlugit, arfineq sisamanngorlugit/qulingiluanngorlugit,
suliaqarnissamut an-nertuummik pisariaqartitatut saqqummiussaat, Siumumit
akuersaarparput.
Siumumit suliassat pingaarutillit ilaatut
annertuutut taarusupparput, ullutsinni ajoraluartumik saqqumilaalersup tassalu
meeqqanik inuusuttuaqqanillu ikkatiginnittarneq atornerluisarnerlu.
Tassami taamak pineqarsimasut
ineriartornerminni timimikkut tarnimikkullu ajornartorsiuteqalersarput
ilaatigut anigunngisaannakkaminnik.
Aammalu ikiaroornartunik atuinerup
annertusiartornera ernumanartorqarluinnarpoq, atuisut aammalu atuisimasut
inuunerannut nakkarsaataasarnera eqqarsaatigalugu.
Suliniuteqarnerni tamani Politiit
Pinerluttaalisitsiniarnermillu suliallit peqataasarnerat Siumumit iluaqqutaalluartutut
isigigatsigu tamanit atugaanissaa kissaatigaarput.
Siumumit pingaartipparput
pitsaaliuisitsinikkut peqqinnissakkullu sullissinerni inuup, ilaqutariit
nunaqqatigiillu piginnaassusii ilanngullugit iluaqutiginiarneqartarnissaat, ilaatigut
sunngiffimmi sammisassaqartitsineq aqqutigalugu.
Inuimmi pisussaaffimminnik
paasinnilluarsimasut imminnullu akisussaaffimmik tigumminnillutik
takutitsisut, inoqatiminnut maligassiuisarmata, tamatigut ajunngitsunik
tapersersoqatigiillualernernillu kinguneqartartunik.
Ilaqutariinnik siunnersuisarneq arlalinni
aallartinneqarsimasut tapersersorluarneqarnissaa Siumumit pingaartipparput.
Ilanngullugu angajoqqaat meeqqamik
peroriartortinnerannut akisussaanerpaat, meeqqap paarilluarneqarnissaanut, oqaloqatigilluartarnissaanut
toqqissisimanartumillu atugaqarnissaanut.
Taamaattumik Siumup nuannaarutigaa
nalunaarusiami pingaartillugu eqqaaneqarmat, ungasinnerusoq eqqarsaatigalugu
kommuunit tamarmik immikkut pitsaaliuisitsinermut siunnersortimik
toqqaannartumik innuttaasunut attaveqartussamik atorfinititsiortornissaat,
tassami pingaartipparput piffinni suliniaqatigiit aammattaaq siunnersortimik
suliniutinut assigiinngitsunut ataqatigiisaarinerni ikiorluarneqartarnissaat,
suliniutit kinguneqarluartunik angusaqarfiulluartunillu angusaqarfiunissaat
eqqarsaatigalugit.
Nunaqarfiit pillugit Naalakkersuisut
allatseqarfianni nunaqarfinnut immikkoortortap pisortatigoortumik
suleqatigilernissaa Paarisap suliniutigilermagu Siumup iluarilluinnarpaa.
Tassungalu atatillugu eqqaarusullugit
massakkut Kommuunit arlaqarmata annertuumik pitsaaliuisitsinissaq pillugu
suliaqartunik, nunaqarfittatik ilanngullugit, tamakkua ikorfartoqatigiillutik
suliniartut tamatigut tapersersorluinnartariaqarput.
Naggataagut Siumup qutsaviginiarpai
sinerissami namminneq soqutiginninnertik tunngavigalugu aammalu peqatigiiffiit
assigiinngitsut meeqqat, inuusuttut, utoqqasaat utoqqaallu peqqillutik,
qaammaasaqarluarlutik nuannaarlutillu
inooqataanissaanik suliniuteqartuartut tamaasa.
Taamatut oqaaseqarluta Siumumit Paarisa
pillugu nassuiaat tusaatissatut tiguvarput. Suliassanillu ingerlatsisussat
tamaasa sulilluarnissaanik kissaallutigit.
Anders Nielsson, Atassutip oqaaseqartua:
Pinaveersaartitsinissami peqqinnissamillu
siammarsaanissami Inatsisartut Naalakkersuisullu naalakkersuinikkut anguniagaat
piviusunngortinniarlugit suleriaasissat siunertamut naleqquttut nassuiaammi
matumani ersersinneqartut Atassut-ip pingaaruteqarluinnartutut isumaqartippai.
Piviusunngortitsinissamut akisussaaffik
Paarisami Peqqinnissamut, Ilisimatusarnermut, Pinngortitamut Avatangiisinullu
Pisortaqarfimmiittumi pinaveersaartitsinissamut ataatsimii-titaliaq
suleqatigalugu inissisimavoq.
Tamannalu akisussaaffiuvoq annertooq suliarlu
isumassarsiullaqqissutsimik, sungiussianermik, suleriartitsinnaanermik aammalu
inuiaqatigiinni aporfissaararpassuinik Paarisap naammassisassaanik
paasisimannilluartunik pisariaqartitsisunik piumasaqaateqarfiuvoq.
Nassuiaammi erseqqissumik takuneqarsinnaavoq
atuagaaqqat qillalaartunik pappiarartallit, allagartarsuit kusanartut kiisalu
radiumi TV-milu aallakaatitassiat naatsukullaat atorlugit Paarisami
suliarineqartartut naammasineqartannginnerat paasisimaneqarluartoq. Aammattaaq
ilungersorluni sulisariaqarpoq. Pinaveersaartitsinermut siunnersortit taamatut
suleriaaseqar-nissami pingaarutilerujussuartut inissisimapput.
Qaammarsaanermik paasisitsiniaanermillu
suliaqarnerit tasisuasunik meterikkaartunik nioq-quteqarnermut assersuunneqarsinnaapput
- suliassiisut sulisussallu akornanni tatigeqatigiinnissaq pisariaqarpoq.
Tassami suliat naammassineqartut qanoq pitsaassuseqartiginerat aammalu sunniutigisinnaasaat
uuttorneqarsinnaanngilluinnarmata.
Taamaalilluta nuannaarutigalugu ukiut
kingullerpaat ingerlaneranni imigassartornikinneru-lersimaneq uppernarsivarput.
Tamanna qaammarsaanermik imaluunniit aningaasat imigassarsiutissat
ikilisimanerannik pissuteqarpa, imaluunniit allarluinnaat pissutaappat? -
Taamaallaat eqqoriaaginnarsinnaavugut.
Ernisarnerit amerlasusiannut naleqqiullugu
naartuersittarnerit suli amerlavallaarujussuarput.
Tamanna naartuersittarnerup navianaatai
pillugit qaammarsaasimannginnermik pissuteqarpa, imaluunniit suli
ajornerussagaluarnerluni naartuersittarnerup navianaatai pillugit qaammarsaaneqanngivissimasuuppat?
- Tamatumanissaaq taamaallaat eqqoriaaginnarsinnaavunga.
Paarisap qaammarsaanermik suliai
immikkoortunut immikkut eqqugaasunut - pingaartumik meerarpassuarnut
isumagineqannginnerminnik naalliuutilinnut aalajangersimasumik sulini-utaasunut
sanilliullugit salliutinneqarsinnaanngillat. Neriuutigissavarput Paarisap
meerarpassuit taamatut eqqugaasut immikkut maluginiarumaarai. Qimarnguinni
nammineq piumassutsimik sulineq annertoorujussuuvoq, neriuutigissavarpullu
tamatuma iserfiginiarnissaa
tapersersornissaalu Paarisap noqqaassutigissagaa.
Qaammarsaanerulli taamaallaat tamanna
pilersinnavianngilaa. Maani inersuarmi tamanna eqqaamassavarput.
Qaammarsaanerup ajornartorsiutit pinngitsoortinniartussaavai - qaqutigu-innaq
peersittarpai.
Ajornartorsiutit aatsaat
annertoorsuanngoraangata allaalluinnartumik aalajangersimalluinnar-tumillu
ikiuiniuteqarneq eqqunneqartassaaq. Tamannalu aningaasarparujussuarnik
akeqarpoq.
Tamanna pillugu aningaasaqarnerup annertussusissaata
inuup piginnaassusia sinnerlugu Paarisap suliaani pingaaruteqarpoq:
Aningaasartuuterparujussuit pinaveersaarneqarsinnaapput.
Tunngavilersuutissatsialaavorlu
pinaveersaartitsinermik suliassanut aningaasat akuersissutissat akuersaartumik
qiviassagaanni - suliap qanoq pitsaatigissusissaa sunniutissaalu piumasaqaatigalugit.
Nassuiaammi oqaatigineqarpoq Paarisa
pinaveersaartitsinermik suliaqarnermut Peqqinnissamut Ilisimatusarnermullu
Pisortaqarfimmik, Isumaginninnermut Pisortaqarfimmik aammalu Ilinniartitaanermut
Pisortaqarfimmik ataqatigiissitsissasoq. Tassani isumagineqarpoq
pisortaqarfinnit taaneqartunit pingasuusunit ilaasortaatitaqartumik
ataatsimiititaliortoqassasoq.
Tamanna ilutigalugu ingerlavoq Pinaveersaartitsinermi
Siunnersuisoqatigiit Paarisamit qulli-unerusumi, taannalu ingerlavoq
Peqqinnissamut Ilisimatusarnermullu Pisortaqarfiup ataani.
Atassut-mit nipaatsumik
qinnutigerusupparput Paarisap suliassavimminik aamma ingerlatsinissaa - allat
susassaqarfippassuit ataatsimeeqatigisassat, tusarniaavigisassat
eqqaamasassallu naak akornanniikkaluarluni.
Ataqatigiissaarisussatut pilersinneqartoq
aqqutigalugu Meeqqat Atuarfiat suleqatigineqassaaq.
Meeqqat Atuarfianni ilinniartitsisut
ukiorpassuarni paasisitsiniaanermik annertuumik ingerla-taqarsimapput, taamatut
sulinerat Paarisap suliassaqarfiisa killinnguaniippoq. Atassut-miit
qilanaaraarput Paarisap suliaasa aammalu atuarfinni suliarineqartartut
ataqatigiissinneqarnissaat. Soorlumi aamma naatsorsuutigigipput Meeqqat
atuarfianni pinaveersaartitsinermi paasisitsiniaanerni ilisimalersimasat
atorniarneqartarnissaat.
Atassut-miit isumaqatigaarput
pinaveersaartitsinerup peqqinnerulersitsiniarnerullu piviusunngortinnissaannik
iliuuserisassatut saqqummiunneqartoq.
Nalunaarutip naggataani iliuuserisassatut
pilersaarut arlalinnik tapersersoqquneqarpoq. Atassut-miit inassutigissavarput
tapersersueqqussutaasut nalilersorluarneqaqqullugit - tamarmimmi
pingaaruteqarluinnartuunngillat.
Atassut-ip pingaartinneruaa innuttaasut
sanngiinnerusutut inissisimasut inuuniarnerisigut qanoq
iliuuseqarfigineqarnissaat, tassani pingaartumik meerarpassuit iluamik
paaqqutarineqanngitsut.
Tamanna pingaarneroqaaq "Paarisa-p
nunat tamat akornanni suleqatigiinneq nunat avannarliit eqqarsaatigalugit
nukittorsassavaa, kisiannili aamma Canadami Alaskamilu Inuit eqqarsaatigalugit@ suliniarnissaanit.
Taperseeqqusissut kingulleq taanna
angalanernik soqutiginartunik kinguneqarsinnaagaluarpoq, Paarisalli sulinermini
maani ajornartorsiutaasut suliarisariaqarpai.
Tamakkulu ajoraluartumik amerlaqaat.
Suliassinnik iluatsitsilluaqqunaqaasi.
Maliinannguaq Markussen Mĝlgċrd, Inuit
Ataqatigiit oqaaseqartuat:
Qujanaq. Nunarsuarmi inuiaqatigiippassuit
ukiorpassuarni atugarisaat, ilungersuutigisartagaat, sungiunniapiluugaat,
sulilu ajornartorsiutigisartagaat, nuannaarniutit, ukiuni ikittuinnarni
nunatsinni atuussimapput. Tassami ukiut kingulliit 50-iinnaat eqqaassagaanni
nunatsinni ineriartorneq sukkasimaqaaq, sorpassuit eqqussuunneqarsimapput,
uagut kalaallit nammineq piliarinngisagut ilaatigullu paasiuminaatsittakkagut.
Taamaattumik Inuit Ataqatigiinniit
isumaqarpugut kialluunnniit tupigusuutigisariaqanngikkaa, uagut inuiattut ullumikkut
inuulluarniutinut, nappaatinut, inuiaqatigiinnilu ajornartorsiutinut
imaannaangeqisunut annertuumik sorsugassaqarnerput. Ilami inuiaat allat
ukiorpassuit ajornartorsiutigisatik, suli qaangersimaqqajanngilaat, naak
uatsinnit sivisuneroqisumik akiuiniarnissaminnut
periarfissaqarsimagaluarlutik.
Inuit Ataqatigiinniilli isumaqarpugut
naammanngitsoq tamanna utoqqatsissutigissallugu. Allat isumalluutiginagit
ajornartorsiutigut qaangerniartariaqarpagut, pingaarnerpaavormi sukkulluunniit
oqarsinnaalluni: uagut una nammineq aaqqinniarparput, oqarani:
ikiunngikkutsigut aaqqinnavianngilagut.
Tamannalumi patsisaaqataalluni Inuit
Ataqatigiit naalakkersuisooqataaneranni l985-imi PAARISA pilersinneqarsimavoq,
inuiaqatigiinnilu iluaqutaasumik paasisitsiniaanermik annertuumik
suliaqarsimalluni. Ukiulli kingulliit PAARISA atorunnaarsinneqaraluarsinnarluni
maanna pimoorussamik ingerlateqqinneqalernera Inuit Ataqatigiinnit sakkortuumik
tapersersorparput.
Paarisa suliassanik ulikkaarpoq,
pimaveersaartitsinerit peqqinnissakkut, isumaginninnikkut,
pinerluttaalisitsinikkut, imminortarnerpassuillu akiorniarnerisigut. Soorunami
Paarisap suut tamaasa suliarisinnaanngimmagit pisariaqarluinnarpoq, sumiiffinni
kommunit nunaqarfinni aqutsisut, peqqinnissaqarfik, politeeqarfiillu aammalu
peqatigiiffiit suleqatigilluarnissaat.
Ullumikkut inuiaqatigiinni
aningaasarpassuit nukippassuillu atorneqartarput, nappaatit ajortereersut,
pinerluutillu annertusereersut aatsaat qanoq iliuuseqartoqarnialersarmat. Ilami
ukiuni kingullerni pisartut, imminornerit, kinguaassiutitigut atornerluinerit,
pinerlunniartarnerit, ikiaroornartumik eqqussuinerit, hiv-millu
tunillatsissimasut amerliartuinnavipput.
Tamakkulumi
isiginngitsiisaaginnarneqarsinnaanngillat. Tamatumammi takutippaa, inuttaasunut
atugassarititaasut eqqarsaatigalugit, inuiaqatigiit aaqqissuussaanerat
annertuumik akornuteqartoq, aqutsinerlu pitsaanngitsoq.
Ukiorpassuarnimi inuiannguani uagutsinni,
Europamiut kulturianut assigunngilluinnartumik kultureqartuni, Europamiut
periusitoqaat eqqussorneqartuarsimapput, uagullu annermik isiginnaartuusimavugut,
malinnaaniapiloorluta. Taamaattumik apeqqummi matumani pingaaruteqaqisumi
annertoqisumilu Inuit Ataqatigiinniit pimoorussilluta suleqataarusuppugut,
isummersueqataarusullutalu.
Nalunngikkaluarlugulu sumiiffinni
ataasiakkanni pinaveersaartitsinerit ukiuni arlaqalersuni ingerlalluartut, suli
annertusartariaqartut ajornartorsiutit annertusiartornerisa takutippaat.
Aningaasarpassuilli atugassiissutaasut
qanoq atorneqassappat? Ajornartorsiutinuna suna sorlarigaat?
Aningaasaliissutaasut naammappat? Qanorlu iliorluta qaangiiniassaagut?
Inuit Ataqatigiinniit isumaqarpugut, naak
ajornartorsiutit imaaliallannarlugit qaangerneqarsinnaanngikkaluartut,
ungasissoq eqqarsaatigalugu anguniagalimmik siunnisilluni ingerlatsisoqartariaqarpoq.
Oqarluta ukiuni tulliuttuni suna angorsupparput, aamma qanoq? Naak
kattorsaanerit pinaveersaartitsinerillu inersimasunut annertuumik
tunngagaluartut, piffissaq ungasinnerusoq isigalugu eqqarsassagutta
meerartatsinniit, inuusuttuarartatsinnut annertuumik qanoq iliuseqartariaqarpugut.
Angajoqqaallumi tamatumani
peqataatinneqartuarnissaat pisariaqarpoq. Sumummi iluaqutaassava meeraq
inuusuttuararluunniit atuarfimmi
oqaluukkaanni pujortassanngilatit, imigassaq ulorianarpoq il.il.
angerlarsimaffimmi tamakku annertuumik atugaappata?
Taamatut pinaveersaartitsiniarnermi
ajornartorsiutaasartut sorlai suunersut ilisimanngikkaanni, qanorluunniit
iliortigigaluaraanni ajornartorsiut qaangerneqarsinnaanngilaq. Inuiaqatigiit
atukkamikkut taama assigiinngitsigisunik atugassaqartillugit, atugarissaartut
atugarluttullu assigiinngissutaat taama ersaritsigitillugit, toqqisisimasumik
inuunissaq nassaarineqarsinnaanngilaq.
Inissaaleqinerit, suliffissaaleqisarnerit,
ilinniarnissamut itigartitaasarnerit atuutsillugit ajornartorsiutit
atuuttuassapput. Nalunngilluinnarparpullu tamakku ullumikkut imaaliallaannaq
oqaannarluta qaangersinnaanagit. Pinaveersaartitsinermik suliaqartut suliaat
suliassatullu pilersaarutaat kusanartut nalunaarummi atuarneqarsinnaapput.
Tamannali naammanngilaq.
Imaalisariaqannginnattami pinaveersaartitsinermik suliniarnermik
aallartitsigatta, taava ajornartorsiutit qaangissavagut. Inuiaqatigiinni ajornartorsiutit
aallaavii isigisariaqarpagut aaqqiiviginiartariqarlugillu. Ilaqutariit atugaat
pitsanngorsartariaqarput, ullumikkummi meeqqat sulili milullutik angajoqqaatik
qimattariaqartarpaat, ullullu ilarujussua takussanagit.
Unnulernerani angerlaraanni meeqqat qasoreersut, namminerlu qasulluni,
igaassat errortassat illullu ilua sammisariaqartarput, taava unnuttaraaq
meeqqallu innarlutik.Taamaalilluni angajoqqaat meeqqallu attaveqatigiinnerat
annikkillisinneqartarpoq meeqqalli ukioqanngitsunnguusut. Ullumikullu
inuusuttorpassuit angajoqaallumi oqaatiginiartarpaat imminut
attaveqanngippallaarlutik.
Angajoqqaat immikkut, inuusuttuaqqalu
immikkut inuuneqartutut ilersarput, naak oqaloqatigiinnissat
attaveqatigiinnissallu piffissami tamatumani pisariaqarnerpaasartut. Tamakkulu
kingunerisarpaat naartuersittarnerpassuit, ikiaroorniaalunnerit,
kinguaassiutitigut nappaatit il.il.
Angajoqqaammi aamma inuiaqatigiit
atuarfillu kisiat isumalluutigisariaqanngilaat. Akisussaaffimmi annerpaaq
angajoqqaaniippoq.
Aammali soorunami ataatsimoorussamik
inuiaqatigiinni qanoq iliuuseqarniarnissaq pinngitsoorneqarsinnaanngilaq,
taamaattumik Inuit Ataqatigiinniit nuannaarutigaarput, kissaatigisatsitut
komuunit ataasiakkaat kisimik pinnatik, kommuunilli piumasut tamarmik
pinaveersaartitsinermik siunnersortimik atorfinitsitsinissaminnut
neqeroorfigineqarmata. Tamatumanilu aamma neriuutigaarput peqqinnissaqarfik
isumaginnittoqarfiit atuarfiillu suleqatigiinnerisigut, annertunerumik
ilaqutariinnut siunnersuisarnerit ingerlanneqalerumaartut.
Tamatumanilu Inuit Ataqatigiinniit
pingaaruteqartutut taasariaqarsoraarput, illoqarfiit pinaveersaartitsinermik
ingerlatsinermik sungiussisimareersut imaluunniit Paarisamik
ingerlatseqataasut, illoqarfinnut aatsaat aallarnisartunut ornigullutik
aallarnisaaqataasinnaanissaat periarfissiuutariaqartoq. Maluginiarparpullu
soorlu Qaanaami immikkut taama iliortoqarsimasoq.
Aasianni suliniutit arlalissuit
ingerlanneqartut maluginiarparput, aliikkusersoqatigiittarnerillu saniatigut
peqatigiiffiit suleqatigalugit iliuuseqartarnissat suliniutigineqarlutik.
Nuannaarutigisariaqarsoraarpullu Nuummi aallartissimasaq alianartumik
nalaataqarsimasut nukittorsaqatigiittarfiat aamma Aasianni
pilersinneqarsimammat. Tassami ajornartorsiummik imaannaanngitsumik
nalaassineq puiguinnagassaanngilaq nipangiutiinnagassaananilu.
Taamaattumik qaangiiniarnermi
nukittorsaqatigiittuarnissaq pisariaqarpoq. Taassuminngalu namminneq
piumassutsiminnik maanni Nuummi aallarniisimasut Inuit Ataqatigiinniit annertuumik
nersortariaqartutut isigaagut. Ilami tamatumani nukippassuit
atortariaqartarmata, inuiaqatigiinni tarnip pissusaannik ilisimasalinnik
amigaateqarfioqisumi.
Inuit ajornartorsiuteqalernermik
annaasaqarnermilluunniit misigisaqarsimasut pillugit, nalunaarummi
oqaatigineqarpoq, alloriaqqinnissamut suleqatigiisitamik
pilersitsisoqarsimasoq, nalunaarusiortoqareerpallu naalakkersuisunut
aalajangiiffigisassanngorlugu saqqummiunneqassasut.
Inuit Ataqatigiinni isumaqarpugut
apeqqummi matumani taama pingaartigisumi naalakkersuisut kisimik pinnatik,
Inatsisartut tamarmiusut peqataatinneqartariaqartut. Ajornartorsiummi Naalakkersuisut
kisimik piginngilaat inuiaqatigiilli tamatta attorneqaatigisarparput.
Maanna suliniatigiiffiit Kisimiinngilatit,
immikkullu annaasaqarsimasunik suliniaqatigiit namminerisaminnik sulinerat
inuiaqatigiit politikerit pisortaqarfiillu tapersersornerusariaqarpaat.
Ullumikkummi akisussaaffik annertooq taakkununnga tunniunneqatutullusooq
pisimavoq, taakkulu illoqarfiit ilaannaani ingerlapput. Ilami assersuutigalugu
tupannartumik annaasaqartartut sinerisammi annertunerusumik
oqaloqateqarnisssaminnut periarfissaqarneq ajorput, oqarasuaat
eqqaasanngikkaanni.
Taakkulu qanoq
iliuuseqarfigineqanngikkaangata aamma suli ajornerusumik kinguneqarsinnaaneri
takorloorneqasinnaalluni. Taamaattumik tamatumani ersarinnerusumik
politikkeqarnissaq pisariaqarpoq. Naak nalunngikkaluarlugu imminortarneq
akiorniarlugu pikkorissaasoqarsimasoq, suli annertunerusumik siunissami
iliuuseqarnissat pisariaqarput. Pinaveersaartitsinermummi siunnersortit
kisimiillutik sorpassuit ataatsimut suliarisinnaanngilaat. Taamatullu tarnikkut
napparsimanerit nanertuuteqarnerillu peqqinnissaqarfiup ataaniipput,
suliniarfigineqartariaqarlutillu.
Taamaattumik sakkortuumik
misigisaqarsimasut annaasaqarsimasullu katsorsarneqartarnissaat
eqqarsaatigalugu, tamakkuninnga aallutaqartut aaqissuussamik, ukiunullu
arlaqartunut ingerlanneqartuartussamik pikkorissartinneqartuarnissaat
pingaaruteqarluinnartuuvoq. Taamaaliortoqanngippammi suliat kusanartumik
naammassineqarnavianngillat.
Pinaveersaartitsneq eqqarsaatigalugu
Paamiuni maluginiarparput malunnaateqarluartumik suliniarneq aallartissimasoq.
Inuusuttuaqqanut inuulluarniutit ulorianarnerinik oqaassiinnarani,
illuatungaani sammisassanik neqerooruteqarneq pineqarpoq. Tassami
timigissartarfik nukissassartarfittalik pilersinneqarsimavoq, anaanat
angerlarsimaannartut naapisinneqartarput, aasaaneranilu imaaliallannaq
angalasinnaanngitsut asiarnissaannik periarfissinneqarsimapput, ilaatigut
asiaannaratik aserorterisarneq qinngarsuisarnerlu pillugit oqallinnertalimmik
aasamut aasarsiortinneqassallutik.
Sisimiuni ukiuni arlalinni
pinaveersaartitsineq eqeersimaartumik ingerlanneqartoq tamanit ilisimaneqarpoq,
Sisimiormiullu misilittagaasa nunatta sinnerani aamma ilinniarfiginissaat
piukkunnartuuvoq ingerlanneqartarlunilumi. Tassalu nuannaartunanngitsuunngillat
illoqarfiit tarnip pissusaannik ilisimasalinnik atorfeqartitsisut.
Inuiaqatigiinnimi taama annertutigisunik
ajornartorsiuteqarfiusuni pisariaqarluinnarpoq minnerpaamik illoqarfiit
tamarmik tarnip pissusaannik ilinniarsimasumik atorfeqartitsinissaat. Kommuunilli
ingammik minnerusut akissaqanngillat tamakkiisumik atorfinitsitsinissamut,
taamaattumik ingammik taakkunani qanoq ilisamik peqqinnissaqarfik, atuarfik
komuunimimilu isumaginnittoqarfik ataatsimoorussamik
atorfinitsitsisinnaanissaat pimoorussamik pilersaarusiorneqartariaqartoq Inuit
Ataqatigiinniit isumaqarpugut. Soorlu aamma tamanna siorna Inatsisartunut
apuussimagipput, ulloq manna malunniutaasumik kinguneqanngitsumik.
Kommuunini assigiinngitsuni
suliniuterpassuit aamma allat soqutiginarput tapersersornarlutillu. Matumanilu
nuna tamakkerlugu qaammarsaanerit eqaassagaanni ukiuni kingullerni pisimasut
eqqaalaasavagut. Tupaallaatigaarput siorna CD-liortitsisoqarsimammat 250.000
kr.-inik tapikkamik.
Taannalu inuiaqatigiinnut annertunerusumik
nittarsaanneqanngilaq oqariartuutaaneralu suunersoq iluamik paasineqarani.
Minnerunngitsumillu taamatut aningaasaaliisoqarsimatillugu paasiuminaappoq
CD-eq taanna maanna tuniniarneqarmat ullumikkut saqqummertartut imikkut
tapigaanngitsut akeqatigalugit.
Suna tamatumani taava anguneqarpa?
Taamatut tapiisarnerit immaqa sunniuteqarnerusumik oqariartuuteqarnerusumillu ingerlanneqarsinnaagaluarput, isiginnaartitsisartunik nuna tamakkerlugu takutitsiartortunik angalatitsinikkut. Taakkulu immaqa oqallisissiamik isiginnaartitsisinnerisigut, oqallinnermik kingunilimmik tigussaasunillu iliuuseqarnermik.
Atuipilunneq pillugu nuna tamakkerlugu tusagassiutitigut, tv-kut radiukkullu, inuppalaartunik amiilaarnartuniunngitsoq paasisitsiniaanerit pisariaqarput. Atuisut pineqartullu paasisinnaasaannik, ersarissunik ullumikkumut naleqqussakkanik.
Peqqinnissamut ataatsimiititat pinaveersaartitsinermi aamma pingaaruteqarluinnartuupput. Soorlulu naalakkersuisoq saqqummiinermini aamma oqartoq, ataatsimiititaliat tassaasut pinaveersaartitsinermik siunnersortimut suliniarfiusariaqartunik paasisitsisartussat. Maannali taakku ukiuni kingulerni sumiiffinni amerlaqisuni ingerlasimanngillat. Tamannalu pillugu Inuit Ataqatigiinniit, tassa Lars Sĝrensen-i, ukioq ataaseq sinnerlugu matuma siorna siunnersuuteqarsimagaluarpoq taakkua sumiiffinni peqqinnissamut ataatsimiititat pikkorissartinneqarnissaanik, partiinit tamanit akuersaarneqartumik.
Tamannali ulloq manna tikillugu suli pisimanngilaq, suliallu arriisaarunneqarpallaarnera pillugu, matumuuna Inuit Ataqatigiinniit peqqinnissaqarfimmut avoqqaarliuteqarniarpugut. Nalunaarusiamilu oqaatigineqarpoq taakku l998-ip ingerlanerani katitigaaneri nalilersorneqarumaartut. Soormi inatsisartunilli saqqummiunneqarmat piareersarneqarlutik aallartissimanngillat? Maannaami komuunimut qinersinermiit ukioq ataasinngulereerpoq taakkulu ingerlalluarnissaat pisariaqarpoq sumiiffinni peqqinnisaqarnikkut pinaveersaartitsinikkullu aallussilluartoqassappat.
Tupap imigassap ikiaroornartullu ajornartorsiutaanerisa akiorneqarnissaat anguniarlugu nutaamik eqqarsarluta iliuuseqartariaqarpugut. Tusagassiutit inatsisartunit aningaasaliiffigisartakkagut suleqatigalugit, tupatorpallaarsimalluni krĉfteqalersimasunik ulorianarneranillu qanimut nassuiaasinnaasunik aallakaatitassianik itisilerisunik suliaqartoqartariaqarpoq. Nunanit allaninngaaneersuuniunngitsoq, nunatsinniilli ullumikkut piviusunik aallaaveqartunik. Aamma taamanna ikiaroornartoq, imigassarlu eqqarsaatigalugit pisariaqarpoq. Inuit qanimut tikillugit misigisatik, taakkulu atornerisigut ajoqutigilersimasatik nassuiaateqarfigisariaqarpaat.
Ilami isiginngitsuusaaginnarneqarsinnaanngilaq imigassamik ikiaroornartumillu ataatsikkoorussillutik atornerluisut ilaat ima ajortigisarsimammata nunatsinni katsorsarneqarsinnaanatik, Qallunaat Nunaannut aallartittariaqartarlutik. Taakkulu saniatigut Dronning Ingrid-ip napparsimavissuani ikiaroortarnerup kinguneranik tarnimikkut napparsimalersimasunik kattorsaasarnissat pisariaqalersimallutik.
Taamaattumik tamakku ulorianaataat suli annertunerusumik paasisitsiniutigineqartariaqarput, siunissami aningaasarpassuit katsorsaanernut atortariaqalissanngikkutsigit.
Taakkununnga tunngatillugu Naalakkersuisut imigassaq ikiaroornartorlu pillugit siunnersuisoqatigiinnik ukioq manna pilersitsinialersaartut oqaatigineqarpoq. Paaserusunnarporlu taakku kikkunnik inuttaqassanersut?
Inuit Ataqatigiinniit kinguaassiutitigut nappaatit amerliartortuarneri maluginianngitsuunngilagut, assullu aarleqqutigisariaqakkatut isigalugu HIV-mik tunillatsissimasut amerleriarsimaneri. Taannaanngitsoq aammami klamydiamik, gonoremillu tunillatsittartut ukiuni kingullerni ikiliartunngilluinnarmata. Taakkulu saniatigut naartuersittarnerpassuit takutimmassuk imminut illersunngippallaarneq.
Taamaattuumik soorlu ukiarmi Nunamed-imi, tassa nakorsat ataatsimeeruartitsinerini, nakorsat ilaata misissuissimanermini aarleqqutigisaa Inuit Ataqatigiinniit aamma aarleqqutigaarput. Tassa taamatut illersuuteqarani atoqatigiittarnerit annertunerujussuisa kingunerinik hiv-mik tunillatsissimasut amerleriapiloorsinnaanerat. Taamaattumik matumani sakkortuumik kaammattutigerusupparput inuusuttuaqqat inuusuttullumi orniguttarfiini tigoriaannarnik usuup puuinik peqalernissaq. Ullumikkummi tamakku pisiarinngikkaanni napparsimavinnut aalleqqaarluni pisariaqartarmata.
Manna iluatsillugu Inuit Ataqatigiinniit apeqqutigerusupparput HIV-mik tunillatsissimasut pisortaqarfimmiit suliniarfigineqarneri qanoq ingerlanneqarnersoq? Tassami allaat tusartaleratsigu maani suliniarfigineqarnertik naammaginagu nunatsinniit qimaguttariaqalertarsimasut. Naalakkersuinikkummi isumagilluarneqarnissat pisussaaffigineqartariaqaraluarmat.
Taassuma saniatigut apeqqutigissavarput nunatsinni AIDS-imut aningaasaateqarfik ukioq manna pilersinniarneqalersaartoq, sumut qanorlu atussanersoq? Kikkullu aningaasaataasut qanoq atorneqarnissaannut aqutsisuussanersut?
Kinguaassiutitigut atornerluisarnerit pillugit qaammarsaanerit Inuit Ataqatigiinniit isumaqatigaagut, taakkuli aamma malitseqarnissaat pisariaqarput. Kinguaasiutitigummi atornerlugaasimasut tarnimikkut sakkortuumik attorneqartarput taamaattumillu aamma katsorsarneqartariaqartarlutik.
Taamaattumik qammarsaasoqaannarani malitseqartinneqartariaqarpoq, taamatullu immikkut katsorsaanermik sammisaqartussat pikkorissartinneqartuartariaqarput.
Imigassamik
ajornartorsiuteqartut kattorsartinneqartarfiat Qaqiffik atorluarneqartoq Inuit
Ataqatigiinniit maluginiarparput. Aammalu Ilulissani immikkoortortaqalernissaa
Naalakkersuisup siunniussimagaa. Ilulissaniinnissaanut suna patsisaava? Tassami ilisimanngilarput
komuunit allat taamatut neqeroorfigineqarsimanersut, siammasissumillu
aaqqissuussinerit ingerlassappata illoqarfinni ataasiakkaani eqiterinerit
naammaleraluarput, aammami nalunnginnatsigu illoqarfiit eqiteruffiusut
inissaqarniarnikkut ajornartorsiuteqartaqisut.
Aammattaaq Inuit Ataqatigiinniit
Qaqiffimmiittarsimasunit 307-init qassit iluatsissimanersut, qassit
uteqqittariaqartarnersut, qassillu tunniutiinnartarnersut paaserusupparput.
Soorunami nuannaarutigaarput katsorsarneqartartut iluatsittartut
tusartaratsigit, aammalu katsorsarneqartuinnaanngitsut aammali ilaqutaat
periarfissinneqartarmata. Kisiannili periusaasup ineriartortittuarnissaa,
nunatsinnullu naleqqussaajuarnissaq Inuit Ataqatigiinniit isumaqarpugut,
naleqqussaajuartoqassasoq Inuit Ataqatigiinniit isumaqarpugut.
Imminortarnerit nunatsinni
ajornartorsiutit annerit ilagilluinnarpaat. Imminut aperisariaqalerpugut,
sooruna inoqatinnguagut ikinngutigut ilimaginngilluinnakkagut allaat taama
kinguneqartitsisartut? Inuunerup
tunissutaanera erlinnarneralu paasisimannginerpaat?
Ajornartorsiutinik qaangiiniarsinnaanermik
ilisimasaqanngippallaannginnerpugut, sanngiippallaarnerpugut? Sunaana qamani
ilutsinni amigaatigigipput. Ilami inuiaqatigiit peqqissut taama
annertutigisumik imminortarnermik eqqorneqarnavianngillat.
Naalakkersuinikkut pimoorussamik
quppersaqaliornerinnaanngitsumik iliuuseqartoqartariaqalerpoq. Sorpassuit
pilersiortoraluarutsigit ajornartorsiutip sorlaa paasinngikkkutsigu
kinguneqarluartumik qaangernavianngilarput.
Taamaattumik tamanna pillugu sukumiisumik
paasititsiniaanerit paasiniaanerit misissuinerillu ingerlanneqartariaqartut
Inuit Ataqatigiinniit isumaqarpugut.
Taakkulu suliniutit saniatigut ilisimasat
malillugit imminortartut inuusuttuunerusarmata, taakku pillugit annerunerusumik
SORLAK-p SUKORSEQ-llu ilaasortaminnut suliniuteqarnerunissaat oqallinnernillu
ingerlataqarnissaat Inuit Ataqatigiinniit kaammattuutigerusupparput, taassami
taakkuusariaqaraluarmata qanimut ajornartorsiutinik ilisimannittut
sullisserusuttullu. Ajornaqaaq qaangiiniarnermi nukiit tamaasa
atorniartariaqarput.
Naggasiullugu ajuusaarurtigalugu Inuit
Ataqatigiinniit avoqqaarissavarput matumani nalunaarusiami malunnarmat
pisortaqarfiit pingasuusut tassalu peqqinnisssaqarfik, isumaginnittoqarfik,
atuartitaanermut kulturimut ilageeqarnermullu pisortaqarfik
suleqatigiissinnaasimanngimmata. Apeqqutinimi taama pingaaruteqartigisuni
imminullu atassuteqartigisuni minnerpaamik pisortaqarfiit taakku
suleqatigiissimasariaqaraluarmata, soorlu naalakkersuisunngortitsinermi tamanna
aamma kusanasaarlugu oqaatigineqaraluartoq.
Taamatut oqaaseqarluta apeqqut manna
annertoqisoq Inuit Ataqatigiinniit oqaaseqarfigaarput, innersuussutittalu
piviusunngortinniarnerat malinnaavigalugulu suleqataaffigerusullugu, kiisalu
aamma PAARISA-p siunissami sulilluarnissaanik kissaallugu.
Bjarne Kreutzmann, Akulliit Partiiat:
Inatsisartuni siornatigut
kissaatigisimavarput pinaveersaartitsinermi peqqinnerulersitsiniarnermilu
sulianik ataatsimoortumik takussutissinneqarnissaq. Naak nassuiaat
peqqinnissanut Ilisimatusarnermullu pisortaqarfiinnarmit suliarineqarsimagaluartoq
oqaatigisariaqarpoq, oqaluttuarisaanermik aamma anguniakkanik annertunerusunik
takussutissiisoq.
Sunngiffimmi sammisassaqartitsinermut aalajangersimasunik
atugassanik kommuninut ataatsimoortumik tapiissuteqarnissamik,
itigartinneqarsimasumilli, siunnersuuteqarsimalluni. Naak tamanna qinigaaffiup
matuma siuliani pisimagaluartoq, assorsuaq nuannaajallannarpoq 1998-mi
aningaasanut inatsimmi Paarisamut aningaassaliissutit qaffannerisigut
qullakkeerneqarsimammat, kommunit tamarmiusut neqeroorfigineqarnissaat,
pinaveersaartitsinermut siunnersortimik atorfinitsitinissaannut, akissarsiaasa
affasa nalingannik qitiusumik pisortaqarfimmiit tapiiffigineqarlutik.Matumuuna
oqaatigissavara nuannaarutigigakku, taamatut paasinnilluni iliuuseqarneq, naak
ukiut arlallit siunersuuteqarnermiit qaangiukkaluartut. Oqartoqartarpormi
kingusinaarneq sunngivinnermit pitsaanerusoq.
Taamanikkut tunngavilersuutima ilagaat
kommunini sipaarniartoqaleraanga, eqqorneqarajunnerusoq tassaammat, aammami
suli taamaappoq, sunngiffimmi sammisassaqartitsineq. Taanna piuminarnerusarmat
sipaarfiginiassallugu. Meeqqat atuarfiini atuartitsineq nammineq eqqorneqassanngippat.
Sunngiffimmi sammisassaqartitsineq Akulliit Partiiata pingaartilluinnagaassa
ilagaat, .isumaqaratta akissussaaffimmik tunussinertut isigisariaqartoq,
meeqqat inuusuttuaqqallu illersorneqanngippata.
Tassami Akulliit Partiianni isumaqaratta,
pingaaruteqarlluinnartoq imminut naalakkersinnaaneq, peqqinnissaq
ileqqorissaarnissarlu eqqarsaatigalugit isumannatsumik patajaatsumillu periaaseqarnissaat.
Akulliit Partiiat isumaqarpoq inuusuttut periarfissinneqassappata sunngiffimmi
sammisassatitsineq aqqutissaasoq. Taammaattumik assut nuannaajallannarpoq
Paarisamut aningaassaliissutit qaffanneqarnerisigut sunngiffimmi
sammisassaqartitsinermut aalajangersimasunik atugassat
akuersissutigineqarmata.
Naggasiullugu oqaatigissavara nuna
tamakkerlugu, tassami tamarluinnatta eqqarsaatigaluta, pinaveersaartitsinerup
peqqinnerulersitsinerullu piviusunngortinnissaata qulakkeernissaanik
iliuuserisassanik saqqummiusissutip naggataani Naalakkersuisut siunersuutaat
tapersersorakkit. Taamatut oqaaseqarlunga nassuiaat tusaatitut tiguara.
Anthon Frederiksen, Kattusseqatigiit:
Peqinnissamut, Ilisimatusarnermut, Avatangiisinullu
Naalakkersuisup Paasisa pillugu nassuiaat saqqummiussaa pillugu
Kattuseqatigiinniit imatut oqaaseqarniarpunga. Pisariaqarluinnarpoq nunatsinni
pinaveersaartitsinermik suliaqarnerup annertusarneqarnissaa. Taamaammat
ilaatigut inatsisartuni siusinnerusukkut pinaveersaartitsinermut
siunnersortinik kommuuneqarfinni tamani Namminersornerullutik Oqartussat
atorfinitsitinissaat siunnersuutigisimagaluarpara, kisiannili taammaallaat
allakatigut taamanikkut akineqarlunga.
Soorlu taamanikkut siunnerssuuteqarninnut
atatillugu ilaatigut eqqaagiga nunatsinni kommunit amerlanerit
pinaveersaatitsinermut siunnersortinik atorfinitsitisoqarsimagaluartoq,
Namminersornerullutik Oqartussat anigaassaleeqataaffigisaannik, kisiannili Namminersornerullutik
Oqartussat aningaasalersuinerat maanaannaq unitsinneqarmat, kommunit
amerlanerit akissaarullutik siunnersortit ilaat soraarsittariaqarsimavaat.
Taamaalillunilu pinaveersaartitsinermik suliaqarniaraluarneq maangaannaq
amerlanertigut kipineqarsimalluni. Qujanartumilli maanna annerusumik
paasineqalerpoq, pinaveersaartitsinermik suliaqarnerup qanoq
pisariaqartigissusia aammalu qanoq pingaaruteqassusia.
Taammattumik Kattuseqatigiinniit
kaammattuutigissavarput Inatsisartut kipeqattaangitsumik ataavartumillu
pinaveersaartitsinermik suliniutinut siunnersortinullu atorfeqartitsinerit
aningaassalersorneqarnerat kommuneqarfinnut tamanut assigiimmik
atortinneqarnissaat aalajangiusimaqqullugu. Tassami nunatsinni inuttut
ajornartorsiuterpassuit ersarereerput aammalu ajoraluartumik ikiliartunngitsut.
Qaangerniarlugit ataavartumik tamakkiisumillu suliniuteqarnisssaq pisariaqarluinnarmat.
Nunatsinni pinaveersaartitsinermik suliaqarnermi anguniagassat
siunniunneqarsimasut pimoorullugit anguniarneqarnissaat Kattuseqatigiinniit
tamakkiisumik tapersersorluinnarpavut, minnerunngitsumik
pinaveersaartitsinermi siunnersuisoqatigiit anguniagassatut aalajangiussimasaat,
tassaasut meeqqanik isumaginninnerup pitsaanerulersinneqarnissaanut tunngasut.
Pingaartumik meeqqanik kinguaassiutitigut
atornerluineq samminerullugu aammalu nunaqarfinni isorliunerusunilu peqqinneq
pillugu sulianik annertusaanissaq. Kiisalu imigassamik, tupamik
ikiaroornartumillu atornerluineq pillugit paasisitsiniaanerup annertusarneqarnissanik
tunngasut. Aammalu kommunini peqqinnisamut ataatsimitaliat inuttalersugaanerisa
suliassaqarfiisa piginnaatitaaffiisalu naliliiffigineqaqqinnissaat
Kattusseqatigiinniit pisariaqarsoraarput. Tassami ataatsimiitsitaliap
pineqartut siusinnerusukkut sundhedkommisioneqarallarmat, kommisioni
pisinnaatitaaffeqarnerulluni sulisarsimagaluarpoq.
Allaat imatut aalajangiisinnaatitaalluni
neriniartarfinni, kalaalimeerniartarfinni assigisaannilu peqqinnissamut
tunngasunik malittarissasanik unioqqutitsisoqartillugu matusisinnaatitaallutik
il. il. Taamaattumik kommunini peqqinnissamut ataatsimiitsitaliat
pitsaanerusumik eqaannerusumillu sulisinnaanissaat anguniarlugu, pissutsinik
naleqqussaasoqartariaqarpoq. Aamma naluneqanngilaq kommunini arlalinni
maannakkut SSPK-t ingerlanneqarmata, naak tamatuma saniatigut kommunini
taakkunani peqinnissamut ataatsimiitsitaliat SSPK-p suliaassa ilaannik
suliaqaraluartut kisiannili pissutsit ataatsimut isigigaanni,
oqaatigisariaqarpoq ilumut pitsaanerunnginnersoq SSPK kommuninilu
peqqinnissamut ataatsimiitsitaliap suleqatigiilluarnerulerlutik imminnut
kattutsinneqarpata, taamaalilluni nukinnik atorfissaqarteqisaminnik atorluaaneq
pilersinneqassagaluarmat.
Ukiuni makkunani Kalaallit Nunatsinni
ilaatigut nakorsassaaleqinerujussuup kingunerisaanik kommunini peqqinnissaq
pillugu ataatsimiitsitaliat tamakkiisumik sulisinneqanngillat. Maleruagassammi
atuuttut naapertorlugit peqqinnissaq pillugu ataatsimiitsitaliat
inuttalersorneqarneri illoqarfigisami peqqinnissaqarfik pisussaavoq,
ataatsimiitsitaliap aalajangigaasa piviusunngortinneqarnissaa isumagissallugu.
Soorlu peqqinnissaq pillugu ukiumoorumik pilersaarusiap avammut
saqqummiunissaa il. il. Taamaaliornissarlu arlalitsigut aporfissaqartarpoq.
Soorlu ilisimaneqareersutut peqqinnissaqarfimmi inuttassaaleqineq,
allarpassuillu ajornartorsiutaasut akimmiffiusarmata.
Peqqinnissaq pillugu kommunini
ataatsimiitsitaliat pimaffigineqarput ukiut tamaasa peqqinnissaq pillugu
kommunini suliniutissaminnik pilersaarusiortassasut. Tamannali naamaginartumik
naammassineqassappat, pisariaqarluinnarpoq, kommuunini peqqinnissaq pillugu
ataatsimiitsitaliat allaffissornikkut pitsaasumik isumagineqarnissaat. Tassami
kommunini takornartaanngimmat peqqinnissaq pillugu pilerssarusiat, ilaatsigut
kusanartumik suliat, tamatigut innuttaasunut apuunniarneqartanerat
ajornakusoortuusartoq. Paarisap atornerluinnernut tunngasut pillugit ukioq
mannamiit allartittumik suliniutigisimasai tamakkiisumik Kattusseqatigiinniit
tapersersorpavut. Aamma Qaqiffiup avannaani immikkoortortaqalernissaanut
tunngasut.
Kalaallit Nunatsinni tupa pillugu
paasisitsiniutit tassungaannaq killinnatik ingerlaavartariaqarput. Tupamik
atuinerujussuatsinnut pissutsit sukumiisumik paasiniaaqqissaartariaqarput.
Nalunaarusiamimi ersersinneqarpoq Kalaallit Nunatsinni inersimasut akornanni
70%-t pujortartuusut. Takorloorsinnaavarpullu tupamik patsiseqartumik
krĉfteqalersussat ukiuni makkunani aggersunilu peqqinnissaqarfimmut qanoq
sulisoqarnikkut, minnerunngitsumillu aningaatigut kinguneriumaagai
annertutigissanersut. Taamaattumik pisariaqarpoq tupamik atuinerup
kingunerisaanik nappaatit pilersartut pillugit paasisitsiniaassuarnissaq.
Ikiaroornartumik naammaanermillu
pinaveersaatitsineq pillugu Paarisap ukioq manna paasisitsiniaalluni aallutai
tamakkiisumik tapersersornarput. Naak nunatsinnut ikiaroornartumik aamma
eqqussineq inerteqqutaagaluartoq. Nalunngilarput ajornartorsiut, taanna
annertusereersimasoq, taamaattumik Namminersornerullutik Oqartussat
ajornartorsiummik qaangiiniarnermik suli annerusumik iliuuseqarnissaat
anguniartariaqarpoq. Ukiunilu makkunani ikiaroornartumik nunatsinnut
eqqusseriartarneq politiit tungaaniit annertuumik suliniutigineqartoq
tapersersortuartariaqarpoq. Taamaattumik akiuiniarnermi suliniutit
ingerlaannarnissaat qulakkeertariaqarput.
Paarisap atuagassiaata akuttunngitsumik
saqqummeqqittalernera naammagisimaarparput iluarisimaarparpullu innuttaasut
tassa atuartartut aamma suleqatigineqalermata. Pingaartumik allakkatigut
atuagassianut saaffiginissinnaalerneq, immikkullu ilisimasalinnik,
ajornartorsiutit pillugit akineqartalerneq eqiiallaataavoq annertooq.
Minnerunngitsumik inatsisilerituumik siunnersorteqalerneq
pisariaqartinneqaqisoq paasinarpoq. Nunatsinni naartuersittarneq ataatsimut
isigalugu suli annertuvallaarujussuarpoq. Naartuersittarnermullu patsisit
ilaginngitsoornavianngilaat inuiaqatigiinni ajornartorsiuteqartugut. Soorlu
makkuusunik. Meeqanik paaqqinnittarfiit ikippallaanerat, akissaatit
appasippallaanerat, erninermi sulinngiffeqartarnermi tunngasut il.il.
Unali tapersersorneqartuartariaqarpoq,
paasisitsiniaaneq naartunaveersaatinillu annerusumik atuineq. Nunaqarfinni
peqqinnissaq pillugit suliniutit suli annikippallaarput. Malunnarporlu
paasisitsiniaaneq suli anneertunerusoq ingerlanneqartariaqartoq. Taamaattumik
tamatumap suli annertusarneqarnissaa eqqumaffigisariaqarluni. Nunaqarfinni
pinaveersaartitsineq pillugu paasisitsiniutissatut aningaassaliissutissat
amerlanerusariaqarput. Kiisalu eqqaamasariaqarpoq peqqinnissaqarnermut
nunaqarfinni pingaarnerpaanut ilaasut. Tassalu imeqarnikkut, eqqagassalerinikkut
imeqarnikkullu atugassarititaasut iluarsisariaqarnerat pingaaruteqarluinnarmat.
Kinguaassiutitigut nappaatit pillugit
Kattusseqatigiinniit maluginiarpara kinguaasiutitigut nappaatit
appasinnerusinnarlutik kingumut qaffariaateqarsimasut. Taamaattumik suli
paasisitiniaauanissaq annertooq pisariaqarluinnarpoq, minnerunngitsumik HIV
AIDS-llu ilanngullugit pinaveersaartinneqarnissaat eqqarsaatigalugit.
Nunatsinni imminortarneq annertuvallaarujussuarpoq. Sooq.
Piffissanngunnginnerluni inuiaqatigiini, ineriartornerup sukkaqisup,
unikaallatinneqarnerasigut inuit anersaatorfilissallugit. Nalunaarusiami
ersersinneqarmat nunatsinni ukiumut imminortartut agguaqatigiissillugu sapaatip
akunnerata ataatsip iluani inuk ataaseq imminortartoq. Tassami imminortarnerup
ersersippaalusooq nunatsiini ajornartorsiuterpassuit iluarsisassallu allat
annertusiartuinnartut.
Paasisitsiniaallutik suliniuteqartut
Qanilaassuseq kiisalu Kisimiinngilatit aammalu inuit namminneq
piumassutsiminnik suliniuteqartut nersortariaqarput,
tapersersorneqartuartariaqarlutillu aamma aningaasatigut. Taamaattumik
kommunini imminortarnerup pinaveersaartinneqarsinnaanera pillugu isumatigineqarsinnaasumik
sulissuteqarnissaq tapersersortariaqarpoq. Pakatsinarpoq imminortarneq pillugu
ajornartorsiuitit taama annertutigisut Inatsisartuni suliassat taamaattut
kinguartinneqartarnerat. Soorlu imminortarneq pillugu ukioq manna januarip
arfineq pingajuannili Inatsisartunut ukiuunerani ataatsimiinissatsinnut
oqaluusereqqullugu siunnersuutigisimasara upernaamut kinguartinneqarpoq.
Taamaakkaluartoq Paarisa pillugu
nassuiaat, ataatsimut tamaat isigalugu, naammagisimaarpara. Paarisamilu sulisut
minnerunngitsumillu komminini pinaveersaartitsinermi suliallit sulilluarnissaani
tamaasa kissaallugit.
Marianne Jensen, Peqqinnissamut,
Ilisimatusarnermut, Avatangiisinullu Naalakkersuisoq:
Tassa siullermik qujassutigerusuppara partiit
oqaaseqartuisa aammalu Kattusseqatigiininngaanniit, matumani oqaaserineqartut
imartuut aammalu takisuut pingaartitsinermillu tikkuussisut, takutitsisut
ajornartorsiutit matuma aamma annertuut pinaveersaartitsinermi suliaqarnissamik
pisariaqartitsinerup annertussusianik aamma ersersitsisut. Tassuunakkullu aamma
Inatsisartuninngaanniit suleqataarusussuseqarnermik takutitsineq taanna
annertooq aamma qujassutigerusuppara.
Ilanngullugu aamma oqaaseqartuniit
tamaniit una ersersinneqartoq maluginiarpara. Pisortat, politiikerit,
Inatsisartut, Naalakkersuisut aammalu immikkut ilinniarsimasut kisimik suliami
matumani pisussaassuungitsut. Kisiannili aamma inuiaqatigiinni inuit
ataasiakkaarluta tamatta, kikkuugaluaruttaluunniit, suliniutini
peqataasariaqartugut. Kisiannili aamma tassuunakkut ajornartoorfitsinni kikkut
ikiortiserisinnaallugit aamma massakkorninngaaniit ima ersarinnerusumik
periarfissinneqartariaqartugut. Partiit ataasiakkaarlugit
oqaaseqarfigerusuppakka.
Siumut tungaaninngaanniit inatsisartunut
ilaasortaq Kristine Raahauge aamma qutsavigerusuppara Siumuminngaaniit
suliniutissanut, saqqummiunneqartunut siunniunneqartunullu aammalu
Inatsisartunut isummerfigeqqusatsinnut taamak ersaritsigisumik tapersiimmata.
Siumut oqaaseqartuata ilaatigut oqaatigivaa
ikiaroornartunik atuinerup annertusiartornera ernumanartoqarluinnartoq.
Matumuuna oqaatigisariapara tamanna annertusiartornersoq annertusiartunnginnersorluunniit
takussutissaqarneranik annertunerusumik uanga ilisimasaqannginnama. Tassami
kisianni una malunnartoq unaavoq. Ukiuni kingulliunerusuni, ingammik ukiumi
kingullermi aamma ikiaroornartunik atuinerup nunatsinni annertuup aammalu
ukiuni arlalissuarni annertusisimasup, tappiffigineqarnerunera
pisortaninngaanniit, aammalu minnerunngitsumik politiit tungaaninngaanniit.
Massakkut malunniuttoq. Tassuunakkullu aamma eqqussuinermi ikiaroornartumik
arsaarinnittarneq, tigusisarneq, taanna
annertusiartorjussuarsimasoq. Tamanna ikiaroornartumik atuinerup annertusiartorneranik
takussutissaanersoq takujuminaappoq. Kisianni qujanarpoq massakkut suliniutit
ataavarnerusumik ingerlanneqalermata.
Siumup tungaaninngaanniit aamma
oqaatigineqarpoq najugaqarfinni, illoqarfinni ataasiakkaani SSPK-mik
suleqatigiinnermik taaneqartartut aamma qitiusumik inerlatsinermi Namminersornerullutik
Oqartussat iluini pisortaqarfiiit akunnerminni suleqatigiiginnaratik kisiannili
aamma pinerlutsaalititsinermut suliaqartut kiisalu aamma politiit, tassani
suliniarnermi isumasiorlugit suleqatigisarnissaat kaammattuutigineqarluni. Taanna
aamma Naalakkersuisuninngaanniit tusaatissatut tiguarput aammalu
taamaattoqarnissaa pingaartutut isigalugu siunissami annertunerusumik taasumap
eqqumaffiginissaa aamma neriorsuutigissavarput.
Siumut oqaluttuata aamma oqaatigivaa
illoqarfinni ataasiakkaani imaluunniit kommunini tamani immikkut
pinaveersaartitsinermik siunnersortinik atorfinititsiniarneq neriulluni
siunissaq ungasinnerusoq eqqarsaatigalugu tamanna piviusunngorimaartoq.
Neriuppunga piffissaq imaluunniit piffissaq ungasinnerusoq tassani
pisariaqassanngitsoq. Neriuppunga ukioq manna kommuunit tamarmik
peqataarusullutik nalunaarsimassasut. Tassami soorlu aamma nassuiaammi
oqaatigineqartoq 1998-mut aningaasanut inatsimmi periarfissaqarpoq, kommunit
tamarmik peqataarusukkunik, akissarsiarititamik affaanik Paarisamut
qinnuteqartinnaallutik.
Taamaattumik neriuppugut aamma
Naalakkersuisunit pingaarteqigatsigu, taakkua suleqatigissallugit. Nerioqaagut
kommunit tamarmik, ukiorpassuit utaqqinngikkaluarlutik, sapinngisamik piaartumik
atorfinititsiortorimaartut.
Atassutip oqaluttuata saqqummiuppaa, qanoq
pingaartigisoq, atuagaaqqiat allallu kisiisa atornagit kisiannili aamma
sulineq ersarissumik, assigiingitsorpassuartigut, ingerlanneqartariaqartoq.
Tamanna aamma maluginiarpara malugineqarsimasoq siunertaasoq aammalu tamanna
Naalakkersuisunit isumaqatigilluinnaratsigu uani oqaatigiinnarusuppara.
Tassami suliniut ataaseq kisimi qanorluunniit pitsaatigigaluaruni
naammanngilaq. Suliniutit assigiingitsorpassuit imminnut ikorfartoqatigiillutik
ingerlasariaqarput.
Atassutip oqaluttuaninngaaniit
oqaatigineqarpoq, ataatsimeeqatissarpassuit assigiinngitsut neriuutigineqartut
tamakkua kinguarsaataavallaasanngitsut, pisarissersuutaavallaasanngitsut.
Tassani oqaatigerusuppara ilaatigut pitssaaliuinermi siunersuisoqatigiit aamma
taaneqarmata kiisalu aamma pisortaqarfiit assigiingitsut. Isumaqarama taakkua
suliqatigiinnerit pisariaqarluinnartoq. Tassami ataatsimiinnerit taakkua
pisariunnanngillat, soorunami piffissamik piareersarnissamullu
ingerlanneqarnerinullu piffissaq atorneqartariaqartarpoq.
Kisianni aamma tassani
pingaaruteqarluinnarpoq maani Nuummi qitiusumik allaffeqarfimminngaanniit
suliniutigineqartut paasisallu kisiat isumalluutiginagit kisianni aamma
nunatsinni najugaqarfinni ataasiakkaani misilitakkat nalunngisat
aallaavigalugit taakkua uagutsinnut immersuisinnaanerat assorujussuaq
pingaartipparput. Assullu isumallutigalugu taamaalilluta najugaqarfinni
ataasiakkaani suliniutit malunnaatillit pisariaqartinneqartullu aamma taakkua
qanimut ilisimaarinnittut nalunnginnerummatigit. Taakkua suleqatigilluarnissaat
ataavartumik suleqatiginissaat pingaartorujorujussuartut isigaarput.
Miinerunngitsumik atuarfinni sulisut iliniartitsisut aammalu meeqqani sullissivinni
allani suliaqartut aamma qanimut suleqatigineqarnissaat Atassutip oqaluttuata
pingaartutut tikkuarpaa. Tamanna aamma ilumoorluinnarpoq. Tassalu tammannarpiaq
aamma pissutigalugu massakkut Paarisa pilersinneqarneratigut siuner- tat
ilagerpiarpaat suliniutit assigiingitsut atuarfeqarfimmi ingerlanneqartut,
inunni isumaginnittoqarfinni ingerlanneqartut, kommunini ingerlanneqartut,
pisortaqarfinni allani ingerlanneqartut, peqqinnissami pisortaqarfimmi
ingerlanneqartut siunissami pilersaarusioqatigiinnikkut, imminnut
immersoqatigiinnikut malunnaataanerusumik pilersaarusiorluagaanerusumillu
ingerlalernissaat.
Atassumminngaanniit tapersersuineq
annertooq aamma qujassutigivarput unalu uparuarneqatsiartoq kisimi eqqaaneqarpoq.
Nunat tamat, nunat avannarliit Canadami Alaskamilu naggueqatitta
suleqatiginissaat taanna soorlu pingaaruteqartorujussuartutut
isigineqanngitsoq. Soorunalimi suliniarnermi tulleriiissaarisariaqarpugut
kisiannili aamma isumaqarpunga puiorneqassanngitsoq, tamakku aamma
iluaqutigisinnaagatsigit. Minnerunngitsumik nunani avannarlerni massakkut
ukiuni makkunanerpiaq, ikiaroornartunik suliniuteqarneq annertusarneqarpoq.
Tassani nunarput akuulerpoq aammalu uagut nunatsinni misissorsinnaasagut, ilisimatusarfigisinnaasavut,
suliniutigisinnaasavut killeqarmata. Isumaqarpugut taakkua suleqatiginerisigut
paasisat, suliniutit, ilioriaatsit aamma ilinniarfigisinnaallutigit.
Kiisalu aamma suliniarnermi tassani
ilisimartusarnermut suliniutinullu assigiitsunut aamma aningaassutaasalertussat
nutaat taakkua aamma immaqa ilanngullugit iluaqutiginiarsinnaallutigit.
Ukiuni tulliuttuni Naalakersuisuni
isumaqarpugut nunavut naggueqatitta Canadamiittut ingammik annertunerusumik
suleqatigilernissaat, taanna naalakkersuinikkut qilanaarnartoq aamma
peqqinnissaq eqqarsaatigalugu.
Nalunanngitsumik ajornartorsiuterpassuit
imminortarnernut tunngasut, tupanik atuisarnitsinnut tunngasut, nappaatit
assigiingitsut krĉfteqarlersarnernut tunngasut nunatinniinnangitsoq kisianni
tassani issittumi najugaqartuni assigiissuterpassuaqarpoq assigiingitsutigut.
Taamaatumillu taakkua aamma suleqatiginerisigut ajornartorsiutit
ajunnginnerusumik aaqqikkiartuaarsinnaanissat suliniutigineqasinnaanissaat
aamma isumaqarpunga pingaaruteqartoq. Kisianni soorunami aamma Atassutip
oqaluttuatuulli isumaqarpugut suliniutit nukiillu tulleriissarneqartariaqartut
aammalu pingaarnersiuisoqartariaqartoq, piffissami nukinnillu atuinermi.
Inuit Ataqatigiinningaanniit Maliinannguaq
M. Mĝlgċrdip oqaaserisaanut takisuunut aamma imartuunut qujavunga annertuumik.
Tassanilu maluginiarlugu aamma soorunalimi tassani soqutiginninneq
suleqataarusussuserlu annertusoq. Tassanilu aamma maluginiarlugu sakkortuumi
oqariartuutigineqartoq, allat isumalluutigiinnarnagit kisianni amma uagut
immitsinnut inuttullu ataasikkaarluta ajornartorsiutinik
qaangiiniarnissatsinnut aqqutissiussisinnaanissarput eqqarsarnissarpullu qanoq
iliorluta nammineq qaangersinnaavavut. Aamma tamanna pingaartillugu tamatta
eqqaamasariaqaripput.
Ukiuni tulliuttuni suna angorusupparput
aamma qanoq apeqqutigineqarpoq. Tassa tamannarpiaq pillugu massakkut
saqqummiussivugut Naalakkersuisuninngaaniit Inatsisartunut. Inatsisartut
isumasiorusullugit. Naalakkersuisut ukiuni tulliuttuni 1998-mi suliniarfissatut
siunniussaat qanoq isumaqarfigineqarnersut aammalu taamaammat
Naalakkersuisuninngaanniit oqaatigereerparput 1999-mi aamma Paarisap suliaanik
saqqummiussinissatsinnut pilersaaruteqareerluta taamaalilluta aamma maani
inimi Inatsisartuni suut pingaartinnerlutigit, qanorlu suliniartoqarnissaanik
isumasiuqatigiittarnissaq tamanna aamma pingaartikkatigu.
Inuit Ataqatigiit oqaluttuaninngaanniit
aamma tikkuarneqarpoq peqqinnissaqarfimmi suliniutit kisimik naammanngitsut.
Peqqinnissaqarfiup ajornartorsiutit tamaasa aaqqissinnaangikkai kisiannili
aamma inuiaqatigiinni inerlatsinermi ingerlatat taakkua aamma peqqissutitsinnut
inuttullu peqqissutut misigisimanitsinnut pingaaruteqarluinnartut. Taanna
isumaqatigilluinnarpara aamma oqarnera. Tassanimi qanoq ineqarneq,
suliffeqarneq, meeqqanut piffissaqarneq, qanorlu piffissamik taasuminnga
atuineq peqqinnissaqarfiup ulluni makkunani, ulluinnarnut suliarisaanut
ilaangitsut. Aamma tamakkua peqqissuunermut peqqissutullu misigisimanermut
pingaaruteqarluinnarmata.
Annertuumik tikinneqartarput Inuit
Ataqatiigiit oqaaluttuaninngaaniit takisuumik aamma arlalitsigut
tikinneqartarput, tarnimikkut arlaanik nalaataqarsimanermikkut anniaateqartut,
isumakuluuteqartut saaffissaaleqinerat. Aammalu tassani ilaatigut Nuummi
annernartumik nalaataqarsimasut suliniaqatigiiffiat taanna ilaatigut
isumassarsiorfigisinnaasatut eqqaaneqarluni aammalu nersorneqarluni.
Naalakkersuisuni aamma taanna
isumaqatigilluinnarparput. Pingaaruteqarpoq inuit ataasiakkaarluta immitsinnut
ilinniarsimanngikkaluaruttaluunniit asaqatigiinnitigut, nuannareqatigiinnitigut
tapersersoqatigiinnissarput. Kisiannili aamma pisariaqartitsisarpugut, immaqa
qaniginerpaasatta avataanut allanut saaffissaqarsiinnaanissamut. Tassanilu
massakkut periarfissat immaqa arlalissuugaluarlutik kisianni
ersernerluppallaartut aammalu aaqqissuuneqarsimanngippallaartut, taanna
isumaqatigaarput. Taamaattumik periarfissat assigiingitsorpassuit
iluatinnaateqarsinnaagaluartut namminneq kajumissutsiminnik suleqataasut
ilinniarsimasut, inuit ataasiakkaat suleqataarusuttut allarpassuillu qanoq
atorluarsinnaallutigit, erseqqarinnerusumik paaserusullutigu
Naalakkersuisuninngaaniit suliakkiisimavugut.
Tassa INUK CONSULT Nuummi annertuumik
alianartumik nalaataqarsimasut aamma tassani suleqataapput. Taakkualu aamma
misilittagaat iluatigalutigit aammalu sulinerminni paasisimasaat
misilittariliigaat iluatigalugit taakkua Naalakkersuisuninngaaniit
suliakkersimavavut, suliaq nunatsinni qanoq aaqqissuukkaanni, ukunnga
pineqartunut pitsaanerpaamik ersarinnerpaamillu aaqqissuuneqarsinnaanersoq.
Suliaq taanna naatsorsuutigaarput martsimi, martsip naanginnerani
Naalakkersuisunut tunniunneqarimaartoq. Taannalu nalilersoriarlugu aamma
Naalakkersuisuni nalilissavarput, qanoq annertutigisumik inatsisartunut
ingerlatitseqissanerluta tassani imaluunniit Naalakkersuisuni tassani
siunnersuutigineqartut qanoq ingerlaanartumik aammalu suut ingerlateqqisinnaasallutigu.
Uaguttaaq nuannaarutigaarput
pinaveersaartitsinermi siunnersortit kommunini ataasiakkaani
atorfinissimalersut, massakkut piffissaq taama sivikitsigisoq
ingerlareersimasoq, suliniarnerminni amerlasoorpassuit aallartilluarsimammata
aammalu malunnaateqarlualereersimallutik. Soorlu ilaatigut Paamiut, Aasiaat
taaneqarput, Sisimiut. Assigiingitsut illoqarfinni assigiingitsuni
aallartilluartoqartoq malunnarpoq aammalu tapersersorneqarneq kommunini
ataasiakkani soorunami pingaaruteqartorujussuuvoq. Suliniutit tammakku
ingerlalluarnissaat aamma siunissami ataatuunissaat siunertarerpiarlugu
Naalakkersuisuni pilersaarutigaarput naapeqatigiitittarnerisa ukiumoortumik
ingerlatiinnarnissaat, imminnut isumassarsioqatigiillutik pinissaat aammalu
Paarisamut isummersueqatigiillutik.
Kiisalu aamma Inatsisartunut inassutigivarput
pinaveersaartitsinermut siunnersortit, kommunini tamani, aamma ukiuni
tulliuttuni 98-miinnaangitsoq, Namminersornerusuniinnaaniit akileeqqataaffigineqarlutik,
ingerlasinnaanissaat. Tamannalu aamma paasivara Inatsisartunit tamanit,
oqaluttunit tamanit, taperserneqartoq.
Maliinannguup ilaatigut aamma oqatigivaa
HIV-mik tunillatsissimasut allatut ajornartumik nunarput qimallugu
aallartariaqartut. Taanna tassa ajoraluartumik nutaaunngilaq. Ukiuni arlariinni
tamatut pissusilersortoqartarsimavoq. Aamma uanga nammineerlunga oqaluttarfimmiinngaanniit
tamanna eqqaasarsimavara. Tassani pissutsit assigiingitsut soorunami taakkartorneqarsinnaapput,
ilaatigut nunatsinni periarfissanik annikippaallaanik tunisisimanerput
ilaatigullu aamma inuit ikitunnguugatta. Taamatut imminut saqqummersilluni
ilisimaneqalernissaq ilaasa aamma orniginatipallaangikkaat malunnarpoq.
Kisianni isumaqarluinnarpunga
inuiaqatigiinni aamma tamakkua ikiornissaat pisussaaffigigivut. Ammanerusumillu
immitsinnut pissusilersornissarput tassauunakkut pisariaqartoq. Taamaattumik
Paarisami sulinitsinni aamma tamatuma tungaa immikkut suliniarfiginissaa
massakkut pilersaarusiuleruttorparput. Ukiullu uuma ingerlanerani
malunnaatilimmik erseqqarinnerusunik suliniutinik saqqummiussinissarput aamma
naatsorsuutigineqassaaq.
Ilulissani Qaqiffiup
immikkoortortaqalernissaa sooq Ilulissaniittaraqarnersoq apeqqutigineqarpoq.
Tassunga innersuussutigiinnassavara Inatsisartut 1998-mut aningaasanut
inatsimmut oqallinerani aamma tamakku tikinneqareermata aammalu aningaasanut
inatsimmi, uumap suliap ingerlanneqarnissaa ilanngullugu akuersissutigineqarsimammat,
taassumalu malitsigisaanik massakkut taanna ingerlallugu.
Qaqiffimmi katsorsarneqartarsimasut qanoq
ingerlalluartigisimanersut imaluunniit qanoq sunniuteqarsimanera
paaserusunneqarpoq aamma uagut Naalakkersuisuni tamanna paaserusupparput
taamaattumik nalilersuisoqarpoq massakkut ukiut marluk qaangilaarlugu
ingerlareernerani suliaq katsorsartissimasullu taakkua qanoq
sunniuteqarsimanersoq taakkununnga ilaqutariinnullu tamanna nalilersorneqarpoq
aammalu neriuppugut nalilersuineq tamanna Inatsisartunut kingusinnerusukkut
saqqummiussinnaajumaassallutigu.
Suliap ingerlannerata
naleqqussartuarnissaa pisariaqarluinnarpoq. Misilittakkat ulloq manna
tikillugu Nunatsinni annikipput ukiut marluk sinnilaaginnarlugit taanna
ingerlanneqarsimavoq, kisiannili aamma neriulluarfigilluinnarparput kalaallit
imigassamut atornerluisunut katsorsartinnissamut ilitsersuisut ilinniarsimasut
massakkut amerliartuinnarnerisigut aamma massakkut ilinniartoqarpoq taakku
aamma kalaallit amerliartuinnarnerisigut aamma Nunatsinnut naleqquttumik
suliniarnerup naleqqussartuarnissaa aamma tassuunakkut
aqqutissiuunneqarumaartoq.
Imminortarnerit pillugit
quppersagaliornerinnaanngitsukkut suliniartoqartariaqarnera Inuit
Ataqatigiinniit aamma tikkuarneqarpoq, tamanna ilumoorpoq. Tassa quppersagaq
suliat ilagiinnarpaat, kisianni quppersagaq massakkut oqaatigisarput
qanilaassuseq saqqummersinneqaannanningilaq kisiannili taassuma
malitsigisaanik aamma illoqarfiit kommune-qarfiit tikillugit qanilaassuseq
tunngavigalugu suliaq sunaanersoq taassumalu isumaa, tunuliaqutaa siunertaalu
nassuiaatigineqartarpoq pikkorissaatigineqartarluni aammalu allatigut soorunami
suliat ingerlasariaqarput.
Tassani massakkut Tasiilami, Tunumi
Avannaanilu pikkorissartitsisoqareerpoq ulluni aggersumi Nuummi
pikkorissartitsisoqassaaq marlunngorpat unnukkut innuttaasuni maani
ataatsimiisitsinissami imminortarneq pillugu, aamma uanga peqataassaanga
aammalu sinerissap sinneranut aamma Kujataanut aamma taamatut
pikkorissartitsisoqarlunilu isumasioqatigiittoqarlunilu oqallitsitsisoqarnissaanik
aamma pilersaarusiortoqareerpoq.
Taamaattumik quppersagaq kisimi taanna
isumalluutaanngilaq ajornartorsiummut annertuumut tassani suliniutit
assigiinngitsut ingerlanniartariaqarput aammalu pilersaarutigineqarlutik.
Naggataatigut oqaatigerusuppara aamma
imminortarnermut tunngatillugu, ilaatigut innuttaasunit immaqa
nipangersimavallaarsimanerput ajornartorsiutinik
anitsiffissaqanngitsutulluunniit misigisimanerput isumaqarpunga taanna sooq
uppernarsisinnaanngilarput isumaqarpunga aamma taakkua annertuumik pissutaaqataasut.
Taamaattumik ulluni makkunani imaluunniit piffissami matumani
ajornartorsiutinik tusaanngitsuusaaginnarani aammalu isiginngitsuusaaginnarani
allaat nipituumik saqqummersitsisalerneq isumaqarpunga isumalluarnartuusoq
suulluunniit ajornartorsiutit nipangiullugit, nipangiutiinnarnerisigut
aaqqiivissaat ilimagisinnaanngilarput. Oqaatigalugit ajornartorsiutaaneri
nassuerutigalugit ingerlaqqeriarnissaq toqqissisimasumik aaqqissuunneqartariaqarpoq.
Tamatumunnga uppernarsaatitut immaqa
ilaatigut takuneqarsinnaavoq peqqissuseq pillugu Nunatsinni
annertoorujussuarmik misissuisimaneq tassani aamma aperineqarsimavoq kikkut
imminoornissamik eqqarsaateqarsimasut, tassanilu arnarparujussuit
imminoornissamik eqqarsaateqarsimallutik oqarsimapput, angutillu ikinnerusut
taamatut oqarsimallutik.
Taamaakkaluartoq arnat imminoornissamik
eqqarsaateqarsimasut amerlanerugaluaqisut taamaattoq angutit imminortartut
amerlanerujorujussuupput. Imminortartuniit ulloq manna tikillugu imminortartut
81 %-ii angutaapput 19 % arnaallutik. Naak arnat taamatut eqqarsaateqartut
amerlanerusimagaluartut.
Aperinermi aamma apeqqutigineqarsimavoq;
imminornermik eqqarsaateqaravit oqaloqateqarpit tamakku pillugit
oqaloqateqarpit? Tassani arnat amerlasoorparujussuit angersimapput tamakku
pillugit oqaloqateqartarsimallutik angutilli aamma tassani
oqaloqateqartarsimasut ikinneroqalutik.
Ilaatigut isumaqarpunga tamakkua
ajornartorsiutinik qamaniittuuteqaliinnarsinnaanermut pissutaaqataasut.
Taamaattumillu oqaloqateqarsinnaaneq taanna pingaaruteqarluinnarpoq, qanigisanik
imaluunniit allanik tamannalu aaqqissuunnerullugu pilersaarusiornissaa
Naalakkersuisuni suliniutigivarput.
Aqqannginninni aamma maanngaanniit
tikilluaqqulaarusuppakka maanga tusarnaariarsimasut Danmark-iminngaanniit pualluutinik
ikiuiniaqatigiiffimminngaanniit tikeraartut Nunatsinnut taakkualu aamma
piffissaq manna iluatsillugu ilanngullugit qutsavigerusullugit
pujortartarnerup annikillisaavigineqarnissaanik Nunatsinni
suliniaqataarusunnerannik annertuumik. Ilaatigut ukioq manna inoorlaanut
tamanut tunissutigineqartussat imatut ittut inequnartut aamma taakkunanngaanniit
aningaasaateqarfimmiit pivagut, allassimavoq puakka paarikkit. Neriuppunga
meeraaqqat ima ittunik inequnartunik atisaqarlutik oqariartuut taanna puakka
paarikkit aamma avatangiisaasa, ilaqutaasa, pulaartut allallu paasilluarlugu
aamma meeraarartatta meerartattalu puaata paarinninnissatsinnut aamma tamakku
ilapittuutaajumaartut.
Naggataamut aamma Naalakkersuisut
sinnerlugit Kisimiinngilatikkut Neriuffiit allallu kajumissutsertik
tunngavigalugu suliniaqataasut tamaasa qamannga pisumik qutsavigerusuppakka
aamma soorunami suliniarfiit kisiisa pinnagit kisiannili aamma innuttaasut
ataasiakkaat inoqatiminnut ikiuukkusussuseqarlutik suleqataasut tamaasa
qutsavigalugit.
Konrad Steenholdt, Atassut:
Naatsunnguamik. Nuannaarutigaara ilaatigut oqaaseqartuninngaanniit aamma tikinneqarmat ullumikkut ilinniartitsisut Meeqqat atuarfianni suliniutaasa pingaaruteqarnerat erseqqissarniarneqarmat. Uanga una pingaartittorujussuuvara suleqatigiinnermi uani, pioreersut pilersinneqareersimasut atorlugit suliap matuma aamma nakussassarneqarnissaa.
Soorunami atuarfinni Meeqqat atuarfiini uani sammisagut aamma annertuumik ingerlanneqartarput, isumaqarpungalu aamma maani periarfissaasoq tassani suliniuteqarneq qujassutigissallugu naak ilaatigut ilinniartitsisussaaleqineq patsisaalluni immaqa suliaq naammaginartumik ingerlanneqanngikkaluartoq. Kisianni uani oqaaseqartut atuarfiup pingaaruteqarneranik erseqqissaasut qujassuteqarfigilaarusuppakka.
Soorunami aamma sunngiffimmi sammisassaqartitsiniarneq imaannaanngitsorujussuarmik uani sunniuteqarpoq. Ukiuni tulliuttuni inatsit nutarterniartussaavarput, sunngiffiup nalaani sammisassat assigiinngitsut qanoq ingerlanniarneqarnissaat nalilersussallutigu.
Qimarratigineqarsinnaagunanngilaq imaluunniit kialuunniit arlaata assortorsinnaagunanngilaa illoqarfinni timersortarfinnik peqarnerit ilaatigut inuusuttortatsinnut annertuumik sunniuteqarmata immaqa arlaatigut eqqarsaatipiloqarsinnaanerigaluannik taamaatitsisinnaasunik.
Soorunami aamma puigunngilagut peqatigiiffippassuit matumani suleqataasut, Radio-t illoqarfinni assigiinngitsuni ingerlanneqartut aamma annertuumik tassani sammisaqalersimaneri isumaqarpunga aamma puigorneqartariaqanngitsut.
Maangali oqaluttarfimmut ornigunninnut pissutiginerpaasara aajuna eqqaasitsissutigilaassallugu oqaluttuni ataatsinilluunniit tikinneqanngitsoq tassaaviq Ilageeqarnerup Ilagiillu suliamut uunga tunngatillugu qanoq iliuuseqarfigisarsimasaat qanoq iliuutigisarsimasaat soorlulusooq puigorneqartutut immata.
Oqaluffik tassaasannguatsiarpoq sumilluunniit annertuumik alianartumik pisoqartillugu nunaqqataasut tamarmik katersuuffigisartagaat taannali tikinnianngilara kisianni taassuma saniatigut naluneqanngereerpoq palasit neqerooruteqarsimammata dĝgn-ip ingerlanerani telefon-erfigineqarsinnaallutik kikkunnilluunniit atorfissaqartinneqarunik. Taakkua maani Nuummi qangali ingerlapput, isumaqarpungali aamma taakkua periarfissatuut innersuutigisariaqarneri uani puigortariaqanngikkivut imaanngitsoq uanga Ilageeqarnermut Naalakkersuisuugama massakkut taanna saqqummiuppara, kisianni aamma nutaaginnaviit uani kisiisa eqqarsaatiginatigit soorlu oqaluttut tamaasa tusarnaareerlugit imatut paasinarami tarnit nakorsaanik psykolog-inik amerlanerusunik Nunatsinni peqartariaqartugut. Suut tamaavimmik nutaaginnavinnik pilersitsiniarnerit uani eqqarsaatigineqarpallaaqaat. Sumik arlaanik aallartitsiortortariaqassaagut pisortalersorlugit nutaanillu akilersorlugit.
Kisianni aamma uani puigorneqartariaqanngitsut ilagivaat pioreersut atorluarneqarsinnaanissaat tassanilu isumaqarpunga Ilageeqarneq aammalu tassani atorfeqartitaasut ulluinnarni inuit akornanni sulinerminni qanoq iliuutaat oqallinnermi matumani puigortariaqanngitsoq.
Taamatut naatsunnguamik oqaaseqarlunga uangattaaq qujavunga, sulilluaqqusillutik uani kissaateqarnerit eqqarsaatigalugit. Soorunami ilumoorpoq Naalakkersuisooqatigiinneq aallartimmat anguniakkat ilagivaat Paarisap aallarteqqinneqarnissaa, taanna aallarteqqippoq maannakkut ukiullu ataatsip ingerlanerinnaani kissaatigisarpassuit tamaasa naammassisinnaasimanngilagut ilaatigut uani oqaluttut oqaatigimmassuk Pisortaqarfinni assigiinngitsuni suleqatigiinneq suli inissaminut inississimanngitsoq. Aap, ilumoorpoq taanna, uaniuna aamma paaserusukkipput Inatsisartut tungaanninngaanniit sutigut assigiinngitsutigut inassuteqaataasinnaasut katersorusullutigit.
Kisianni suleqatigiinneq taanna aallartereerpoq, uanilu aamma oqaatigineqartoq tunngavigalugu suleqatigiinnerput ingerlateqqissavarput. Qujanaq.
Marianne Jensen, Peqqinnissamut, Ilisimatusarnermut Avatangiisinullu Naalakkersuisoq:
Utoqqatsissutigissavara aatsaannguaq oqaatsikka immaqa takigilerlugit oqaaseriniakkama ilai oqaatiginngitsoorakkit.
Tassani una aamma ilanngukkusullugu Akulliit Partiianinngaanniit aamma tapersiineq annertooq tamakkiisoq aamma taanna qujassutigerusukkakku.
Kiisalu aamma Kattusseqatigiinninngaanniit aamma tassani tapersersuinermik suleqataarusussusermillu annertuumik takutitsisut aamma taakkua qamannga pisumik qujassutigerusuppakka.
Anthon Frederiksen, Kattusseqatigiinninngaanniit Peqqinnissamut Ataatsimiitsitaliat eqqartorpai taakkualu allaanerusumik aaqqissuussivigineqartariaqarnerat kiisalu suliaasa immaqa nalilersoqqittariaqarnera eqqartorlugu tassani isumaqatigilluinnarpara sumiiffinni ataasiakkaani immikkoortukkuutaat amerlavallaat immaqa assigiikannersunik suliaqartut taakkua soorunalimi pinaveersaartariaqarpavut, nukiit sapinngisamik ataqatigiissaartumik pisariitsumillu atorluartariaqarpavut. Ilaatigut tamakkua eqqarsaatigalugit Peqqinnissamut Ataatsimiititaliat pillugit ukiamut Inatsisartut ataatsimiilerpata saqqummiussissuugut Naalakkersuisuninngaanniit.
Aamma tupa pillugu suliniutit annertuut aammalu immaqa annertunerusumik suliniuteqartariaqarneq taanna Anthon Frederiksen-iminngaanniit eqqaaneqarpoq. Tassungalu aamma ilanngullugu oqaatigiinnarusuppara, oqaatsikka allat uteqqinnagit, ilanngullugu oqaatigerusuppara naatsorsuutigigatsigu ukiamut Inatsisartut ataatsimiinnissaannut pujortartarneq pillugu inatsit tassuunakkut aamma nutarsaanissaq Inatsisartunut saqqummiutissallugu naatsorsuutigigatsigu.
Kiisalu aamma ikiaroornartumik naamaartarnermillu tunngassuteqartut eqqaaneqarput Anthon Frederiksen-iminngaanniit annertuumik suliniutigineqartut taakkua tapersersortuartariaqartut ilanngullugulu aamma oqaatigerusuppara nuannaarutigatsigut massakkut politiit tungaanninngaanniit ataavarnerusumik kipeqattaanngitsumik pilersaarusiorluagaanerusumillu pikkorissaanerit ilanngullugit, tamanna aamma Nunarput tamakkerlugu annertunerusumik suliniutigineqarmat.
Naalakkersuisuninngaanniit kissaatigeqaarput tamatuma ataavartumik piffissami sivikitsuinnarmi ingerlannginnissaa aammalu tamannarpiaq pillugu Inatsisilerinermut Ministeri Randi Jenseni aamma oqaloqatigitsiarsimavara aammalu oqaloqatigeqqinnissaa naatsorsuutigalugu.
Tassani pinaveersaartitsinermut suliniutit Nunatsinni ingerlatavut aammalu inatsisitigoortumik politiillu suliassaat, Danmark-iminngaanniit akisussaaffigineqartut, taakkua ataqatigiissumik aammalu suleqatigiittumik ingerlasariaqarmata pitsaanerpaamik sunniuteqassagunik.
Naggataatigut Anthon Frederiksen-ip ajuusaarutigivaa massakkut ataatsimiinnermut siunnersuutigisimasaraluani imminoortarneq pillugu Inatsisartuni oqaluuserineqassanngimmat, kisiannili kingusinnerusumut kinguartinneqarluni, oqaatigisariaqarpara Inatsisartut aalajangigarivaat massakkut oqaallisigineqanngikkallarnissaa, kisiannili oqaatigerusuppara Naalakkersuisuninngaanniit taanna uniffiginagu siunniukkatsigu suliaq Nunatsinni ingerlassasoq taamaattumillu aamma soorlu oqaatigeriikkattut pikkorissartitsinerit, isumasioqatigiinnerit, oqallitsitsinerit suliallu allat ingerlasussaammata ukioq manna.
Karl Lyberth, Siumut:
Peqqinnissaq, pingaartumik meeqqat
ajunngitsumik peroriartornissaat taakkartortillugu uani oqallinnermi amigaat
ataaseq taaneqanngitsoortoq maanna saqqummiukkusuppara.
Meeqqat amerlasuut pitsaanerusumik
aammalu amigaateqannginnerusumik peroriartornissaanut ajoqutaasoq annertooq
pinngitsoornata maani saqqummiukkusutara tassaavoq uagut inersimasut
amerlasuut, angajoqqaat amerlasuut, bingo-rpallaarnerujussuarput immaqa taanna
qatsunnarsinnaagaluarpoq taassallugu, bankorpallaarnerujussuarput allaat aamma
bingo-ararpallaarnerujussuarput.
Taamaattumik angajoqqaat amerlasuut imminnut
qiviartariaqarput meeqqatik pitsaanerpaamik peroriartornissaat anguniarunikku
imminnut qiviaqqaartariaqarput aamma, allanik immaqa ajortuliorsimasunik
tikkuartuiinnarnatik aamma imminnut qiviartariaqarput. Bingorneq, bankorneq
bingoararnerlu ajortuliornerunngilaq kisianni imminnut qiviartariaqarput.
Takorlooriartigumi angajoqqaat
sulisartut ullaaminngaanniit anigunik immaqa sisamanut soraassapput
immaqaluunniit tallimanut soraassapput taava soraarunik pisiniarfilerigunik
arfininngoriartornerani apuutissapput angerlarsimaffimminnut, nerisassiorunik
taava arfineq marlunngulerpat anissapput bingoriarlutik, 2 time taava
peqarnatik bingoreerlutik angerlassapput.
Meeqqat, ilumoorpunga meeqqat
oqarsinnaasuugaluarunik uagutsitut inersimasutut oqarsinnaasuugaluarunik
oqassagaluarput ataata anaana massakkut bingorianngilaariarit,
ilagilaariannga.
Taamaattumik taanna ajornartorsiut
bingorneq bankornerlu ajornartorsiutaavoq annertooq immaqa imaaliallaannarlugu
takuneqarsinnaanngikkaluarpoq ilumut ajornartorsiutaanersoq kisianni meeqqap
peroriartorneranut ajornartorsiutaavoq. Pitsaasumik peroriartorneranut
ajornartorsiutaavoq annertooq.
Taamaattumik immaqa
taamaalioqqusaanngikkaluarlunga bingorpallaartut bankorpallaartut, immaqa
mikisunik meerallit, kajumissaassavakka meeqqatik eqqarsaatigineroqqullugit.
Unnukkut piffissami arfineq marlunngulerneraninngaannit qulingiluanngulernerata
tungaanut aamma ilaginissaat aamma eqqarsaatigilluaqqullugu.
Tassami allaat ullut
tamarluinnaaviisa ataasinngorneq, marlunngorneq, pingasunngorneq,
sisamanngorneq, tallimanngorneq, arfininngorneq, sapaat ullut tamaasa anisarput
piffissami tassani, taamaattumik ajornartorsiut angisuujuvoq.
Taamatut oqaloreerluta taava
aperisariaqarpugut immitsinnut, soormiuna taamatorujussuaq bingorneq
ingerlasoq, bankorneq ingerlasoq?
Patsisit annersaat uaniipput,
peqatigiiffiit assigiinngitsorparujussuit paasinartumik aningaasaqarniarnissartik
anguniarlugu, arlaannik angalasoqarnissaa, timersoqatigiit angalanissaat,
akissaqarniarlutik bingortitsisarput bankortitsisarput.
Tassa imaapput taakkua
peqatigiiffiit qujanartumik pitsaalluinnartumik suliniuteqarlutik suliniuteqarnerminni
aningaasanik katersuiniarnerminni aamma saniatigut meeqqanik, angajoqqaaminnik
pisariaqartitsisunik, eqquipput.
Taamaattumik peqatigiiffeqarnermut
assigiinngitsutigut tapiisarnerit immaqa qiviaqqittariaqarpavut maani
Inatsisartuni. Peqatigiiffiit bingornernik bankornernillu
pisariaqartitsivallaarnerujussuat millisinniarlugu immaqa nutaamik
eqqarsarluta maani Inatsisartuni iliuuseqartariaqalerpugut. Ilumoorpunga
bingorneq bankornerlu ajornartorsiutaasoq meeqqat eqqarsaatigigaanni.
Bingoaraq aamma taanna taavara.
Paasisakka malillugit illoqarfippassuarni inersimasut aamma angajoqqaat
amerlasuut, meeqqatik puigorlugit, unnuk naallugu ilaannilu unnuaq
ilanngullugu bingoarartalersimapput inini assigiinngitsuni immaqa festsal-ini
sumiikkaluarnerpoq. Taanna akueriuminaatsorujussuuvoq meeqqat pitsaasumik
peroriartornissaat anguniassagutsigu.
Taamaattumik tassunga tunngasoq
inatsisiliorfigiuminaammat, taamatut bingoarartartut, unnuk naallugu
unnuarsuarlu naallugu ilaanni immaqa allatut ajornartumik qinnuigiinnassavagut
maanngaanniit meeqqatik eqqarsaatiginerulaaqqullugit, pisariaqartippaat
angerlarsimanissaat.
Bingo, banko naammaginagu aamma
bingoararneq ingerlanneqalersimavoq, taanna uanga inuttut
akueriuminaatsittorujussuuara.
Nalunngilara bingot bankollu annikilligaanni
ajornartorsiut imaaliallaannarlugu, taanna kisimi ajornartorsiutaanngitsoq.
Kisianni nalunngilara, ilumoorlunga oqaruma bingo, banko bingoararlu
ajornartorsiutaapput, meeqqat nilliasinnaagaluarunik oqassagaluarput taakkua
unitsiimilaariarsigit uagut samminerulaariartigut, angajoqqaaminnut taamatut
oqarsinnaasuugunik oqassagaluarput.
Taamaattumik angajoqqaat taamatut
ingerlatsivallaartut oqarfigisariaqarput eqqarsaqqilaariaritsi, meeqqasi
eqqarsaatiginerulaariarsigit piffissami tassani sivisuumi bingornermut
bankornermullu atortakkassinni immaqa meeqqasi sammigussigit
pitsaanerussagaluarpoq.
Maliinannguaq M. Mĝlgaard, Inuit
Ataqatigiit:
Ilaatigununa
Naalakkersuisuninngaanniit aamma oqaatigineqarmat meeqqat eqqumaffigineqartorujussuusut
taavalu aamma illu´tungaanit Atassumminngaanniit oqaaseqartup oqaatigalugu
eqqartorlugit meeqqat sumiginnagaasartut ilaatigut
suliniuteqarfigineqartariaqartut.
Uanilu aamma Naalakkersuisut
anguniagaanni, tassa pinaveersaartitsinermi ukiuni 1995-imiit 1999-imut
anguniagassatut isigineqartut ilaatigut oqaatigineqarpoq suli naartunik,
inoorlaanik meeqqanillu mikisunik kiisalu tamakku angajoqqaavinik
isumaginninneq annertusarneqassasoq.
Tassani qanorpiaq isumaginninneq
eqqarsaatigineqarnersoq ilaatigut atisaaqqat takutinneqaraluarput,
tupatornermut tunngasut, kisianni ilaaqutariinni inuunerup pitsaanerulernissaa
anguniarlugu qanorpiaq pimoorussamik Naalakkersuisut suliniuteqarnerat
assorujussuaq tamatumani paaserusunnaraluarpoq.
Aamma uagut Inuit
Ataqatigiinninngaanniit ataasialinnginnatta maanngaanniit saqqummiilluta
oqarlutalu meeqqat angajoqqaaminninngaanniit annertunerusumik
ilagineqartarnissaat aammalu isumagineqartarnissaat taanna pingaartuusoq
aammalu Karl Lyberth-imut oqaatigissavara angajoqqaat tamarmik taamaanngimmata
aammali angajoqqaaqarmat suleruluttartunik. Taamaalillutik aamma ullorsuaq
naallugu sulereerlutik angerlaraangamik suliassarpassuatik suliarisariaqartaraat
ilaatigullu meeqqaminnut annertunerusumik piffissaqarneq ajortunik. Meeqqat
iggallugillu, atisaallu suliaralugit tamakku assigisaallu illullu ilua
suliarinissaa eqqarsaatigalugit.
Taamaattumik tassuunakkut
ilumoorussiniaraanni isumaqarpunga angajoqqaat suli annertunerusumik
meeqqaminnik isumaginnilluarnerunissaat anguniaraanni taava immaqa suliffiup
annikillisarnissaa tamatumani aamma eqqarsaatigineqartariaqartutut
taakkartortuaratsigu aamma anguniartariaqartoq isumaqarfigigatsigu.
Taavalu aamma anguniakkani tassamo
erseqqissumik oqaatigineqartut ilagivaat, Nunaqarfinni peqqinnissakkut
pissutsit pitsanngorsaavigineqassasut. Nalunngilarput Kullorsuarmi imaluunniit
Upernaviup eqqaani annertuumik suliniuteqartoqarsimasoq aammalu tamanna
iluarisimaarneqartoq kisianni uani saqqummiussami kikkut tullinnguunnersut
aammalu qanoq pilersaaruteqartoqarnersoq nunaqarfiit eqqarsaatigalugit
erseqqissumik oqaatigineqanngilaq, oqaatigineqaannarlunili Nunaqarfinnut
Naalakkersuisoqarfik tassuunakkut attavigineqarumaartoq.
Isumaqarpunga Peqqinnissakkut
pissutsit pitsanngorsarneqassappata pimoorussissagaannilu aamma erseqqissumik
Nunaqarfiit qanoq siunissami suliniuteqarfigineqarneri oqaatigineqartariaqartoq
oqaasiinnaassanngippat.
Taavalu aamma taassuma saniatigut
AIDS-ertut HIV-imik tunillatsissimasut eqqarsaatigalugit assorsuaq
pissangagivarput taakku 100.000-it sumut ammalu qanoq atorneqassanersut
eqqarsaatigineqarnersut. Aammalu eqqumiigikujulaarlugu taamatut taamatut
aningaasanik ilisiniarnermi eqqarsaatigineqareersimanngimmat sumut
atorneqassanersut.
Tassami ullumikkut annilaarnartut
Nunatsinni ilagivaat HIV-imik tunillatsissimasut 76-inngorsimammata,
taakunanngalu AIDS-ilersimasut 22-ullutik. Taamaattumik aarleqqutissaq
annertoorujussuuvoq aammalu naluarput taakku 76-it taakkuinnaanersut,
taamaattumik ajortorujussuarmik pisoqassanngippat isumaqarpunga suliniutip
taassuma tungaatigut paasisitsiniaanerit suli annertusartariaqarput. Aamma inuusuttuaqqat akornanni.
Taavalu aamma uani Konrad-ip oqaatigivaa oqaatigisarput
taanna Pisortaqarfiit pingasut taakku suleqatigiinnissaat
pingaaruteqartorujussuuvoq aammalu isumalluarsimavugut suleqatigiilluassasut
kisianni massakkut uani saqqummiinermi annerpaamik Peqqinnissaqarfik uani
saqqummiivoq.
Ilaatigut Kultur-imut, Atuartitaanermut
Ilageeqarnermullu Pisortaqarfik qanoq nammineerluni pinaveersaartitsinikkut
iliuuseqarnissaminut saqqummiinngilaq aamma Isumaginninnermut Pisortaqarfik
taamaasiunngilaq. Taamaattumik uani Konrad-ip allaat ajorerpasillutalusooq oqarmat
sooruna ilageeqarneq eqqaaneqanngitsoq, illua´tungaanut saatsillugu
apeqqutigissavara soormi Ilageeqarneq pillugu Naalakkersuisoq
saqqummiussinngila isummersuutissanik? Soorlu aamma Peqqinnissamut
Naalakkersuisoq taamaaliorsimasoq.
Misissuilluni ilageeqarnerup qanoq
ilagiinnit sinniisit attaveqarfigalugit pinaveersaartitsinikkut qanoq
annertunerusumik taakku suliaqarsinnaaneri paasiniaaffigalugit aamma maani
Inatsisartuni uagut taakku tungaatigut iliuuseqarsinnaanissarput immaqa
ataatsimoorussamik nalilersorsinnaassagaluarparput.
Uani nuannaarutigalugu oqaatigissavara
ilaatigut Peqqinnissamut Naalakkersuisup oqaatigisaa aammalu nassuerutigisaa
periarfissat ersernerluppallaartut ilaatigut Kisimiinngilatit aammalu
annertuumik annaasaqarsimasut sakkortuumillu misigisaqarsimasut
eqqarsaatigalugit sulinialerneq nuannaarutigivarput aammalu
paasiniaatitsinerit, taakkua ingerlanneqartut immikkut ilisimasalinnik,
neriulluarfigalugit. Neriuppunga aamma taanna nalunaarut saqqummiussaat
Peqqinnissamut Ataatsimiititaliami takujumaarlutigu.
Taavalu naggasiullugu una
oqaatigerusuppara uani Nalunaarummi annertuumik PAARISA isumalluutigineqarmat
aammalu sorparujorujussuarnik suliaqartussatut immersorneqarluni taamaattumik
pingaartutut isigisariaqarsoraarput, soorlu igarsuup iluanut sorparujuit
tamaasa ikioraannarnagit aammalu pitsanngorsaanissat taakkartuinnarnagit
taassuma saniatigut anguniagassat ersarissut, soorlu Nunaqarfinni
peqqinnissamut pisutsit pitsanngorsaavigineqassapput, naartusut inoorlaat
meeqqanullu, tamakku assigiinngitsut eqqarsaatigalugit oqaasiinnaanngitsumik
anguniagassat imatut imatullu anguniarniarpagut piffissap uuma iluani.
Isumaqarpunga tassani taanna amigaataasoq aammalu sulinissami ersarissumik
aammalu angusaqarluartumik ingerlatsinissami taakkuinnaanngitsut
apeqquterpassuit assigiinngitsut eqqarsaatigalugit taakku amigaataasut
neriuppunga aamma eqqumaffiginiarneqarumaartut.
Kisianni tassa PAARISA aallartinneqarnera
aammalu suliniuterpassuit massakkumut oqaatigineqartut soorunami
tapersersorpagut.
Anthon Frederiksen, Kattusseqatigiit:
Soorunami sunaluunniit suliniut
ingerlalluassappat aamma aningaasartaqarnissaa pinngitsoorneqarsinnaanngitsoq
amerlanertigut tamanna tamatta nalunngikkipput ilisimavarput.
Ilageeqarnermut Naalakkersuisup ilagiinnut
tunngasut akuleruteriasaarmagit assut tupigusuallappunga. Tassami
nalunngilarput ullumikkut ilaageeqarnerup iluani oqaloqatiginnittarnerit tarnikkut
ajornartorsiuteqartut aammalu imminorniarlutik ajornartorsiuteqartut palasinik
sinerissami annertuumik aamma suliniutigineqartarput.
Ilaatigut palasit sulinerminni
oqilisaavigineqarnissaat siunertaralugu siusinnerusukkut Inatsisartuni
siunnersuutigisimagaluarpara palasit allaffissornikkut ikiortissaannik tassa
kordegn-inik taaneqartarunarput atorfinitsitsisoqarnissaa. Tamanna
akuersaarneqarsimanngilaq aammalu ataatsimiinnermi matumani
siunnersuutigigaluarpara ajoqit akissarsiaasa pitsanngorsarneqarnissaat. Aamma
tamanna akuersaarneqanngilaq.
Palaseqarfiit suliniarnermi matumani aamma
ilanngutsinneqassappata pisariaqarluinnarpoq aamma Palaseqarfinnut
aningaasaliissutit qaffanneqarnissaat. Assersuutigigaannimi illoqarfinni
angisuuni ajoqip akissarsiai 5000-it missaaniittut ajoqit marluuppata pingasuuppataluunniit
taakku aningaasat pingasuullutik immaqaluunniit arlaqarnerugunik taakku
aningaasannguit agguassavaat.
Taamaattumik pissutsit taamatut
akuersaaruminaakkallartillugit isumaqarpunga aamma ilageeqarnerup tungaanut
suliakkersuivallaalernissaa Naalakkersuisup mianersuuttariaqartoq.
Peqqinnissamut Naalakkersuisup
akissuteqaataanut qujavunga, unali tikinneqanngimmat annerusumik
uterfigilaarusuppara tassa Nunaqarfinni peqqinnissamik suliniarnermi,
illoqarnikkut, ineqarnikkut, eqqaavilerisarnikkut aammalu imeqarnikkut
pissutsit ilaatigut naammaginanngilluinnartut Nunaqarfinniimmata.
Ukiarmi Inatsisartuni ataatsimiikkatta
aamma Boligstĝtte pillugu nassuiaat saqqummiunneqarmat ilaatigut Boligstĝtte-narmi
illullit illuisa pisariaqarluinnartumik iluarsaattariaqalersimasut
608-nerarneqarput. Boligstĝtte-mi illuutit kisimik tassani pineqarput,
taakkualu saniatigut illut Nunaqarfinni aserfallassimaqisut
iluarsaattariaqartullu isumaqarpunga aamma Peqqinnissaq eqqartortillutigu
tamakkua iluarsaanneqarnissaat pinngitsoorata eqqaasariaqaripput, naak
Peqqinnissaqarfiup ataaniinngikkaluartoq illoqarnermut imeqarnermut
eqqaavilerisarnermullu tunngasut.
Marianne Jensen, Peqqinnissamut,
Ilisimatusarnermut Avatangiisinullu Naalakkersuisoq:
Siullermik qujaffigerusuppara
Siumuminngaanniit Karl Lyberth oqaaseqarmat oqaluttut avataatigut tassani
angajoqqaat pisussaaffiinik annertuumik tikkuaalluni ilaatigut immaqa
soorunami ilaannit sakkortugineqakulussinnaagaluartoq Karl Lyberth taama
erseqqitsigisumik oqaaseqarnera, kisianni aamma neriuppunga
eqqarsartitsissasut inuppassuarnut tassani una ilaatigut aamma
oqaatigerusukkaluarlutigit ilaatigut nipituumik oqaatigerusuttanngisagut soorlu
oqareersunga isumaqarpunga aamma uanga nammineerlunga amerlavallaartut
taamaattumillu allatut ajornartumik ilaatigut annernarsinnaagaluarpalluunniit
allaat nipituumik anittarsinnaanissaat isumaqarpunga taanna pisariaqarpoq.
Soorunami tamanna kikkunnut tamanut taanna
atuutinngilaq, kisianni ajornartorsiut annertusoq malunnarpoq,
taannaannaanngitsoq ajornartorsiut kisianni allarpassuaqartoq soorunalimi aamma
nalunngilarput.
Kisianni pisariaqarpoq angajoqqaanut
minnerunngitsumik meeqqanik oqaloqateqartarnissaq ilaatigullu allaat
oqatigininnissutigissallugit immaqa ajornakusoortutut isigineqarsinnaasut.
Inuusuttuuteqaleraanni ilaqartalernikuuit aappaqartalernikuuit suut
atortarpisigit taamaaliornerni, nalunngilagut tamakkua angajoqqaarpassuit
oqaloqatigissutigissallugit aamma kisissutigisaraat kisianni isumaqarpunga
pisariaqartoq meeqqat inuusuttullu misigisimasariaqarput soqutigineqarlutik
malinnaavigineqarusullutik aamma killilerneqartariaqartarlutik angajoqqaatillu
tatigeqatigiillutik allaat oqaloqatiginnissutigissallugit tamatta
ajornakusoortutut isigisinnaasatsinnik aamma oqaloqatiginnissuteqarsinnaaneq
taanna pingaaruteqarluinnarpoq. Taamaattumik artornaraluartulluunniit
oqaatigissallugit ammanerulluta sapiissuseqarlutalu oqaloqatiginnissutigisariaqarpagut.
Maliinannguaq Markussen Mĝlgaard-ip
oqaatigivai Naalakkersuisuninngaannit meeqqat tappiffigineqarneri oqarninni
tassani aamma meeqqat ulluinnarni atugarisaat arlariit tikippai. Tassanilu
aamma Inatsisartut Siulittaasuata aatsaannguaq oqaatigisaa oqaatigiinnassavara
massakkut PAARISA-p pillugu nalunaarusiaq sammigatsigu, soorunalimi aamma
tamakkua meeqqerivinnut tunngassuteqartut, qanoq sivisutigisumik angajoqqaat
sulisarneri, tamakkorpassuit soorunami meeqqat ulluinnarni atugaannut aamma
pingaaruteqarluinnaraluartut kiisalu aamma Anthon Frederiksen oqarneratut
Nunaqarfinni illoqarnikkut imeqarnikkut assigiinngitsutigullu
attuumassuteqartut Peqqinnermut aamma tunngagaluaqisut taamaattoq neriuppunga
PAARISA suliaasa pillugu nassuiaat una eqqartussagipput, piffissani allani
taakkua allat aamma soorunalimi tikinngitsoornaviannginnatsigit.
Nunaqarfinnut annertunerusumik
suliniuteqarsinnaaneq Maliinannguaq Markussen Mĝlgaard-ip qanoq ilillugu
suliniutiginiarneripput erseqqissumik paaserusuppaa, tassanilu Kullorsuarmi
misilittakkat aamma eqqaallugit. Oqaatigisariaqarpara oqareernittuut massakkut
tassani Kullorsuarmi misilittakkat nalilersorneqarmata uagut
akunnitsinniinnaanngitsoq kisianni aamma suleqatit allat matuma iluani aammalu
matuma avataani peqatigalugit.
Imaaliinnarlugu oqaatigisinnaanngilarput
nunaqarfik sorleq tullinnguuttoq aammalu qanoq annertutigisumik tassani
suliniartoqassanersoq, Kullorsuarmituut annertutigissanersoq. Tassami
nunaqarfiit tamarmik assigiinngitsuupput, assigiinngitsunik aallaaveqarput
assigiinngitsunik pisariaqartitsipput taakkua nalilersorluartariaqarput aammalu
Kullorsuarmi suliniutaasimasut ataatsimut isigalugu aningaasarpassuarnik allaat
mio-erparpassuarnik naleqarput taamaattumik suliniarnerit,
iluatinnartorpassuarnik tassani paasisaqarpugut tassani suliniarnermi, taakkua
nalilersorlugit qanoq atoqqissinnaanissaat sumi massakkut nalilersuineq
aallartippoq.
Kiisalu aamma oqaatigineqarpoq
Maliinannguaq Markussen Mĝlgaard-iminngaannit suliniutissarpassuit uani
taakkartorneqartut annertusut aammalu oqaatigiinnarlugit soorunalumi piviusunngortinnisai
tamaasa ajornakusoorsinnaasut qanorlu pilersaarusiorluarnissaq tassani
pisariaqarluinnarpoq. Qanoq ukua taakkua suliniutissat suliniutiginiarneqartut?
Tamakkorpiaat pillugit siornali uanga Naalakkersuisoqarfinni ukiumoortumik
suliniutissarpassuatta qanoq piviusunngortissinnaaneri kikkut, qanoq, qanoq
sivisutigisumik suliaqassasut pilersaarusiortalersimavarput aamma 1998-imut
massakkut pilersaarusiaq naammatseqqinnaalerpoq tassanilu allattorneqarsimallutik
allaat sulisut ataasiakkaat suna suliarissavaat, qanoq sivisutigisumik taanna
nalilersussava, qaqugu naammassinissaa naatsorsuutigisinnaavarput. Tassa
taamaalilluta allatut ajornartumik pilersaarusiorneq Pisortaqarfimmi
ingerlanneqarpoq, ilumut sapinngisamik suliassatut siunniussat amerlaqisut,
qanoq annertutigisumik qanorlu amerlatigisut ilumut naammassisinnaanerlutigit
ukiup ingerlanerani tassani aamma paasisaqarfigerusullutigit.
Naatsorsuutigaarput uani
naleqqussagassaalunnguit naammassippata 1998-mi Pisortaqarfimmi sulinissamut
pilersaarusiaq taanna naammassippat qanittunnguami aamma Peqqinnissamut
Ataatsimiititaliamut ilisimatitsissutitut nassiukkumaarlutigu.
Naggataatigut una oqaatiginngitsuugara
aamma oqaatigilaarusuppara tassa Maliinannguaq Markussen Mĝlgaard-iminngaanniit
aamma tikkuarneqarmat siullermik oqaaseqarnermini Inuit Ataqatigiit
sinnerlugit CD-liaq eqqaammagu soorlu avoqqaarinnerpalaartumik tassani aamma
nipeqarluni. Oqaatigissavara uanga nammineerlunga assut pingaartuutikkakku
aamma eqqumiitsuliortugut tassani aamma ilaatigut eqqaallugu Atassutip
oqaluttuata pingaartitsinera suliniutit tamalikaartut tassani pisariaqarput,
eqqarsariallaqqissuseq aamma tassani pisariaqarpoq.
Isumaqarpunga isumassarsiaq nammineq
pitsaasuusoq, nipilersortartut erinarsortartut tassuunakkut
suleqataarusussutsimik takutitsisimapput, aningaasarpaalussuit tassunga
atorsimapput kisiannili isumaqatigiissut imaappoq taassumap CD-ip
tuniniarneqarnerani aningaasat isertussat utertussaammata PAARISA-mut
taamaalillutillu suliniutinut aamma atortussaallutik. Neriuppugut
aningaasaliissutaasimasut taakkua aningaasartuutaaginnaratik kisianni
aningaasaliissutaasimassasut allaat atorsinnaasagut aamma neriuppugut ima
tunisaalluartigisimassasoq, massakkut tunisaanera pitsaasumik ingerlavoq,
allaat aningaasartuutaasimasut taakkua matussuserneqarsinnaajumaassallutik,
taamaalillutik aamma aningaasartuutaaginnarani kisianni aamma iluaqutaasumik
atorneqarsinnaallutik.
Taamaalilluta aamma eqqumiitsuliortunik
allatigut suleqataarusullutik kajungertunik nalunaarfigineqallattaalereersimavugut
aamma eqqarsaatigaarput tamakku aamma ilanngullugit suleqataarusuttut
iluatigerusullutigit suliassanut assigiinngitsunut.
Qujaqqippunga taama soqutigineqartigaluni
pingaartinneqartigaluni tapersersorneqartigalunilu massakkut oqallinneq
ingerlanneqarmat.
Josef Tuusi Motzfeldt, Inuit Ataqatigiit:
Inuit Ataqatigiit oqaaseqartutta oqaaseqarnermini
apeqqutigisaasa ilagivaat imigassamik ajornartorsiuteqartut
katsorsarneqartarfiata Qaqiffiup Ilulissani immikkoortortaqalernissaa sooq
Ilulissani inissinniarneqarnersoq. Naalakkersuisuni ilaasortap
akissuteqarnermini oqaatigiinnarpaa ukiarmigooq Aningaasanut Inatsisissaq
1998-imut Aningaasanut inatsisissaq suliarinerani taaneqareermat tassa
Naalakkersuisuninngaanniit taanna aalajangiusimaneqarpoq.
Naalakkersuisunut ilaasortaq
eqqaasilaarusuppara 1998-imut Aningaasanut Inatsisissap aappassaaneerlugu
suliarinerani Aningaasaqarnermut Ataatsimiititaq isumaqatigiilluni imatut
oqaaseqaateqarmat; nuna tamakkerlugu peqqinnissakkut siunertat pillugit
tamanna eqqarsaatigalugu Aningaasaqarnermut Ataatsimiititaliap kissaatigaa
erseqqinnerusumik nassuiaateqartoqassasoq, sooq imerajuttunik katsorsaavik
Ilulissaniitinniarneqarnersoq, tassami illoqarfimmi tassani inissaaleqinermut
tunngatillugu annertuunik ajornartorsiuteqartoqarmat. Ilisimasamik malillugu
taanna nassuiaat nassuiaassutitaqanngilaq Naalakkersuisuninngaanniit.
Ilulissat piukkunnarsimaqippata, arlaatigut ilumut pitsaaquteqarsimappata
ajorinngilarput, taamaallaalli piumaannarparput Inatsisartut piumasarisaat
sooq taamak inissiiniartoqarnersoq nassuiaateqarfigineqassasoq.
Kristine Raahauge, Siumut:
Siumumiit PAARISA pilersitseqqinnissaanut
akuerseqataasimavugut, tassani pingaartikkatigu Nunatsinni sullissinerit
peqqinnissakkut aammalu pitsaaliuinermik suliaqartut ataqatigiissaarinermut
aallaavissatut atorluassammassuk.
Taamaakkaluartoq aamma Siumuminngaanniit
aamma PAARISA-mik suliaqartut Nunat allani suleqateqarnissaat isumaqarpugut
pissusissamisoortoq, aamma nalunngilarput aamma ajornartorsiutit arlaqaqisut
avataaniit takkuttartut soorlu aamma Naalakkersuisup eqqaareeraa ikiaroornartut
aammalu assigiinngitsut soorlu massakkut fjernsyn-ikkut Nunat assigiingitsut
attaveqarfigilernikuuagut tassanilu aamma meerartagut uagullumi allallu aamma
takusartakkavut assigiinngeqaat immaqa aamma taakku atorluarlugit
pitsaaliuinermi suleqatigilluarsinnaagatsigit nunat saniligut.
Ajornartorsiutimmi ilaat sanileriilluta
ajornartorsiutigisarpagut, massakkullu aamma angallannerup
pitsanngoriartornera, takornarissallu angalaneri amerliartortut tamakku
eqqarsaatigigaanni pissusissamisoorsoraarput. Aamma taakku attaviginissaat.
Kisianni tassa pingaarnerpaatipparput aamma Nunatsinni ajornartorsiutit
siulliunneqarnissaat.
PAARISA tassa siorna maj-imi
aalajangiiffigineqarpoq aallarteqqinnissaa, allaffeqarfeqarnissaanullu
aningaasaliisoqarluni, aatsaallu massakkut februar-imi piariivipput tassa
suliassat aatsaat iluamik aallartisalissapput, taamaattumik uagut
avoqqaarlertumik oqarnerit ilaatigut akuersaaruminaatsilaarpagut, tassami
isumaqaratta uagut tamatta akisussaaqataalluta PAARISA sulinissaa
immersussagipput aammalu sineriammi kikkut tamarmik aamma soorunami palasit
allallu suleqataasut tamaasa atorluarlugit suliaq ingerlanneqassasoq.
Taavalu Inuit Ataqatigiinninngaanniit
ujartorneqartoq Naalakkersuisup ersarissumik akinngimmagit tassa suli
naartusut, inoorlaanik meeqqanillu mikisunik kiisalu angajoqqaanik isummersuinerit
taakku annertusarneqarnissaat tassani nalunngisaqarpugut sinerissami aamma
illoqarfiit ilaanni tamakku Peqqinnissaqarfik, kommunet, Inunnik
Isumaginnittoqarfik, Atuarfeqarfik taavalu aammalu Pinerlutsaalisitsisut
politiillu suleqatigiillutik aamma tamakkua periarfissaqartikkaat
agguataaralutik kikkut taanna isumagissavaat, soorlu ukua naartusut
inoorlaanillu mikisunik meeraallit taakku peqqinnissaqafiup iluani
siunnersorneqarput taava inissinneqarlutik angajoqqaallu Inunnik
Isumaginnittoqarfimmi imaluunniit angajoqqaat akunnerminni oqaloqatigiittarnerisigut
qaangerniarneqartartut.
Daniel Skifte, Aningaasaqarnermut Ineqarnermullu
Naalakkersuisoq:
Uangaanga oqaaseqarfigilaarniariga IA-p
oqaluttuata Maliinannguaq Markussen Mĝlgaard taassumap oqaasiisa ilaat.
Ilaatigut Naalakkersuisut qanoq iliorniarnersut ilaqutariit toqqissisimanissaannik
tunngasumik inuunissaat anguniarlugu. Ilaatigut tassani Atassut aammalu Siumut
naalakkersuisooqatigiit taputartuunneqarput taannalu tunngavigalugu
qaqilaarpunga. Naak ullumikkut taanna maani eqqartugassarinngikkaluaripput.
Kisianni meeqqap toqqissisimasumik
ineriartornissaa aammalu PAARISA-p suliassaasa pitsaasut PAARISA-mut
tunngasumik suliassaasa pitsaasut ilaasa ikilisarniarnissaat tunngavigalugu
imatut iliortoqarpoq; meeqqamut sammisumik:
1997-imi anaanaq ungaavaraatitaartoq aamma
nammineq sapaatit akunneri imannaat tamatumalu kingorna imannaat, taanna
apeqqut sivitsorneqarpoq meeraq toqqissisimasumik ineriartorniassammat. Ukioq
manna 1998 januarip aallaqqaataaninngaanniit ataataq inatsisitigut
illersorneqartumik aamma barselsorlov-eqartitaasinnaalerpoq, taavalu taakku naammaginagit
1999-imi januarip aallaqqaataaninngaanniit qanoq iliuuseqarnissaq taamaalilluni
anaanaq aammalu ataataq suli sivisunerusumik taamaaliornissaannut neriorsuutit
Inatsisartunut saqqummiunneqarnikuupput 1996-imi oqallinnermi taamaattumik
taakkua innersuutigaakka oqarlunga tassani angusaqarniarnermi atorfiliinnaanngitsut
kisiannili aamma sulisut privat-ini sulliveqartut, inatsisitigut
illersorneqartumik taakkua aamma qanoq iliuuseqarfigineqarput.
Taamaattumik taamaalillunga apeqquteqaat qulartumik
nipeqartoq erseqqissuugunartumik akissuteqarfigaara.
Lars Sĝrensen, Inuit Ataqatigiit:
Ilaatigununa Naalakkersuisup Karl
Lyberth-ip oqqarluineranut ilaatigut isumaqataavallaannginnera aamma uanga
oqaaseqarfigilaarniarlugu.
Ilaatigut oqallinnermi oqaatigineqarpoq
pinaveersaartitsinermi sunngiffik pingaartinneqartariaqartoq taava
aperisariaqarpugut sunngiffik tassaanersoq bingorneq bingoararneq imaluunniit
timersorneq allallu nalunnginnakku Karl Lyberth-ip timersorneq
nuannarisorujussuugamiuk aamma unnuppassuit angerlarsimasarnissaa
ilimanarpallaanngitsoq.
Kisianni qaqininnut soorunami taanna
tunngaviginngilara. Maluginiarigaana qujanartumik taamatut
pinaveersaartitsinermut tunngatillugu suliniarnermi PARISA-llu aamma siunissami
suliniarnissaani paasineqalersimannguatsiarmat ajornartorsiutit assigiinngitsut
Nunatsinni pigisavut qitiusuminngaanniit taamaallaat
aaqqinniarneqarsinnaanngitsut. Aaqqiiniarnissaq siammartinniarneqartariaqarpoq,
taanna misilittakkat maannakkut ilisimalikkavut takussutissereerpaat.
Siornatigut suna tamarmik qitiusumik
aaqqinniarneqartarput aammalu aaqqiissutinik assigiinngitsunik ersarissunik
takussutissaqarneq ajorpugut. Soorlu naalakkersuisunngortitsinermi 1995-imi
ilaatigut anguniakkat assigiinngitsut Naalakkersuisup PAARISA sinnerlugu
saqqummiinermini allassimavai. Takuneqarsinnaavoq qitiusumik aaqqiiniarnermi
ajornartorsiutit assigiinngitsut amerlarsoorparujussuit taakkua
pitsanngoriarnatik akerlianilli killormut ingerlaarsimasut. Taamaattumik
taamatut inuunitsinni ajornartorsiutinik aaqqiiniarnermi pingaarnerpaaq
tassaavoq ataqatigiissaarineq.
Nuannerpoq tusarlugu kiisami
Peqqinnissaqarfik, Isumaginnittoqarfik taavalu aamma Ilageeqarnermut
Ilinniartitaanermut Naalakkersuisup suleqatigiillutik ajornartorsiut taanna
pingaaqisoq anigorniarsarimmassuk.
Siornatigut kommuneni ataasiakkaani
aaqqiiniaraangatta immikkut saaffiginnikkaangatta, soorlu peqqinnissaqarfimmut
saaffiginnikkaangatta amerlanertigut oqaatigineqartarpoq akissaqanngilagut.
Kultureqarnermut Ilinniartitaanermut saaffiginnikkaangatta assiffaarianik
aamma taamatut akineqartarpugut. Neriunnarpoq siunissami taamatut
ajornartorsiutit assigiinngitsut ullumikkut eqqartukkavut
pinaveersaartissagutsigu aammalu suliniarnerput pitsaasumik ingerlassappat
ataqatigiissaarinissaq saneqqunneqarsinnaanngilaq.
Naalakkersuisut oqartarput nammineq
ataqatigiittutut. Kisiannili Naalakkersuisut ataasiakkaat annertuallaamik
atortalersimavaat, taanna ulluni kingullerni maluginiartarparput uanga, uanga
taanna suliassaq aallartippara taavalu aamma suliassaq ingerlavoq.
Taamatut soorunami pissuseqarnissaq
soorunami taanna qimanniarneqartariaqarpoq. Ataatsimoorutinngikkutsigit
ajornartorsiutit massakkut pigisagut taava aamma aaqqissinnaanngilagut. Uanga
maani imaluunniit allap kisimiilluni aaqqissinnaanngilai, taanna
eqqaamasariaqarparput ataqatigiissaarinissaq taanna suliassamut tulliuttumut
pingaarnerpaasariaqarpoq.
1996-imi ilaatigut Inatsisartunut
siunnersuutiginikuuara piffinni ataasiakkaani sundhedsnĉvn-it pinngitsoornatik
pikkorissartinneqartariaqartut, ilaatigut Peqqinnissaqarfimminngaanniit
annertuunik suliassinneqarnertik peqqutigalugu. Tamanna Inatsisartunit
tamarmiusunit taamaanikkullu akuersaarneqarnikuuvoq, kisiannili ugguutigivara
maannamut taassuma pilersaarutip pimoorullugu piviusunngortinniarnissaa
sulissutigineqanngimmat.
Neriuutigissavarali aamma
suliniaqqinnissami piffinni ataasiakkaani sundhedsnĉvn-i aamma
peqataatinneqarnissaa taanna pingaaqimmat.
Oqaatigereerpara SSPK-mi suliniarneq
aallartittoq ukioq mannaannaanngitsoq kisiannili siunissami pinngitsoornani
ataqatigiissarneqarlunilu Inatsisartunit aningaasalerneqartariaqarpoq. Tassami
nalunnginnatsigu akisussaaffik assigiinngitsumik inissikkaangatsigu taava aamma
aningaasartuut killormut inissittarparput.
Meeqqat iluamik paarinngikkutsigit taava
pinngitsoornatik isumaginninnermut aningaasartuutinngortarput. Taamatuttaaq
aamma assigiinngitsut aallaqqaataaninngaanniit akisussaaffik tiguneqanngikkaangat
taava aamma inuiaqatigiinninngaanniik aningaasanik atuinermik kinguneqartarpoq.
Taamaattumik ajornartorsiut
aaqqinniassagutsigu akisussaaffik aallaqqaataaninngaanniit tamatta
tiguniartigu. Aatsaammi suleqatigiikkutta inuiaqatigiittut
piviusunngortissinnaavagut.
Neriuutigivara taamatut suliniarnerup
tamakkiisumik maani tapersersorneqarnissaa siunissami inuiaqatigiit nukittuut
pilersikkusullugit.
Marianne Jensen, Peqqinnissamut,
Ilisimatusarnermut Avatangiisinullu Naalakkersuisoq:
Inuit Ataqatigiit oqaluttuaninngaanniit
Ilulissani Qaqiffiup immikkoortortaqarnissaa taanna suli utikulunneqarpoq.
Tassa oqaatigisariaqarpara taakkua aatsaannguaq Inatsisartuni ilaasortap Josef
Motzfeldt-ip issuagai aningaasaqarnermut ataatsimiititaliaminngaanniit
kissaatigineqarsimasut maani oqallinnermi ilanngullugit eqqartorneqarput.
Aningaasaqarnermullu Ataatsimiititaliap taamatut kissaateqarsimanera
naammassisimanngikkukku Naalakkersuisutut taanna tusarfigeqqinngilara.
Taamanikkut taamatut kissaateqarneq
oqallinnermi maani ilanngullugu oqaaseqarfigivagut Naalakkersuisuninngaanniit
aammalu tamatuma kingunerisaanik Aningaasaqarnermut Inatsit 1998-imut
akuersissutigineqarpoq tassani ilaalluni Ilulissani Qaqiffiup
immikkoortortaqarnissaa.
Tamatuma kingorna saaffiginnissummik
annertunerusumik itisiliilluni paasissutissanik suli perusuttunik
saaffiginnissummik taama ittumik Naalakkersuisunit arlaannaanilluunniit
tigusaqarsimanngilagut. Kisianni soorunalimi suli tamanna suli
itisilerneqaqqikkusuppat saaffiginnittoqarpat aamma soorunalimi
akissaqqaarpagut.
Oqaatigerusuppara ilaatigut Inuit
Ataqatigiit oqaluttuaninngaanniit soorluuna nipi avoqqaallerpaluttoq
saqqummiunneqallattaartoq ilaatigut sulianik sullusilluni sooruna
suleqatigiittoqanngippallaartoq.
Eqqaasitsissutigisariaqarpara PAARISA
nutaamik sulilernera massakkut nutaajoqimmat, ukiaq inatsisartut
ataatsimiimmata aningaasanut inatsimmut atatillugu aningaasaliissutit
PAARISA-p inissilluni naammassilluni sulinissaannut aqqutissiuussisut aatsaat
tamakkiisumik aningaasaliissutigineqarput, tassa november-imi
qaammatialunnguit matuma siornatigut. PARISA-p tamakkiisumik
sulilersinnaanissaanut aningaasat ivertinneqarput november 97.
Taamaattumik uani nalunaarusiornermi
nalunaarusiaq Inatsisartut matumani ataatsimiinnissaanni piffissaq eqqorlugu
tunniutereersimassappat januari aallartilaartoq tunniunneqareersimasussaavoq.
Taamaalilluni suliffigisinnaasaq annikitsuaraararsuuvoq Inatsisartut
kingullermik ataatsimiinnitsinninngaanniit nalunaarusiap tunniunneqarnissaanut
qaammatit marlussunnguit.
Tamakkuuku patsisaallutik
ataqatigiissaariniarnermik siunertamut tamakkiisumik suli nalunaarusiornermi
suleqatigiissinnaanikkut ersinngitsut, kisianni taanna siunniulluinnarsimavarput
aamma suleqatigiinneq aallartereerpoq, tulliani Naalakkersuisut PARISA pillugu
saqqummiusseqqikkunik nalunaarusiami taanna ataqatigiissumik suliniarsimaneq
tassani erserumaarpoq.
Suliaq aallartereerpoq tamatta
pingaartipparput, suliat pisortaqarfinni assigiinngitsuni ingerlasut aammalu
ingerlasussaasut imaanngilaq PAARISA-p tamaasa suliarissagai, kisianni
ingerlasut taakkua PAARISA isumaginnittuussasoq suliat
ataqatigiissaarneqarnissaannik aammalu tamanna taamatut sulinissaq Naalakkersuisoqarfinni
ataasiakkaani Naalakkersuisunilu tamani isumaqatigiissutaavoq aammalu
siunnerfigineqarluni.
Taamaattumik isumaqarpunga tupinnanngitsoq
piffissap taama sivikitsigisup ingerlanerani tamakkiisumik suli
takussutissiisinnaasimannginnatta. Illua´tungaanit isumaqarpunga piffissap
taamak sivikitsigisup ingerlanerani sulinissamut siunniussat qanoq
suliarineqarnissaat, pilersaarutit aammalu saqqumilaarneq,
pinaveersaartitsinermut tunngasunik saqqumilaartitsineq,
pinaveersaartitsinermut siunnersortinik suleqateqarneq, assigiinngitsorpassuartigullu
sulinerup aallartissimanera takussutissiisoq, ingerlallualereersimasoq taama
piffissakitsigaluni taamaattumik taamatut suleqataasimasut tamaasa
ilanngullugit uanga aamma qutsavigerusuppakka.
Lars Sĝrensen-i maluginiarpara suliniutini
matumani aamma pingaartitsilluni imatut siunnerfilimmik, kingumut qanga qanoq
ittoqarsimanerigaluanik pivallaarnani kisianni massakkut ataqatigiissaarineq
siammasissumik kommuneqarfinnik najukkanillu ataasiakkaanik qanimut
suleqateqarluni pingaartitsillunilu ingerlatsitsiniarneq taanna tamakkiisumik
tapersersoraa aammalu isumalluarfigalugu. Ilanngulluguli aamma
erseqqiissaatigiinnarusuppara Lars Sĝrensen-ip oqaaseqarneranut bingortarneq pillugu
ajortuinnartut uanga aamma taanna isiginnginnakku. Kisianni sunaluunniit
bingortarnerusinnaavoq imaluunniit allaasinnaavoq, sunaluunniit ingasaakkaanni
soorunalimi ajornartorsiutinngorsinnaavoq. Aammalu uani nuannaarutigivara Karl
Lyberth-ip erseqqissaateqarnera angajoqqaat annertuumik
akisussaassuseqarnerannik aammalu piffissaminnik atuinerminni aamma
eqqarsarluaqataanissanut meeqqaminnut ajunngitsumik kinguneqartussat tassani
eqqarsaatigalugit.
Karl Lyberth, Siumut:
Bingortarnersuaq, bankortarnerusuaq
bingoarartarnersuarlu pillugit sakkortuumik uparuaateqarama.
Nalunngilluinnarpara inuit arlallit aamma uannut nuannarinnissinnaagaluit
immaqa nuannarinnilinngitsuussasut politikeritut uanga. Nalunngilara inuit
ilaasa oqarfigissagaannga Kaali ingasappallaarnak. Pingaartumik bingortartut.
Kisianni taakkua taamaanniarlik ajorinninniarlik kisianni neriuppunga
eqqarsalersimassasut; immaqa pitsaanerussagaluarpoq ilaanni angerlarsimasaruma
bingornanga. Taannaana anguniariga pisariaqarmat, meeqqat pisariaqartimmassuk.
Lars Sĝrensen-ip oqaatigimmagu
timersortarnera pillugu oqaatigiinnassavara sapaatip akunneranut
marloriarlunga piffissaqaraangama sungiusariartortarpunga, utoqqasaanut.
Anders Andreassen, ataatsimiinnermik
aqutsisoq, Inatsisartut Siulittaasuat:
Aap, qujanaq. Taamaalilluni
ullumikkut oqallisigisap PAARISA pillugu nassuiaatip oqaluuserineqarnera
tamaannga killeqarpoq.
Oqaluuserisaq naammassivoq.