Oqaluuserisassani immikkoortoq 10-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 11. februar 1998
nal. 14.45
Ataatsimiinnermik aqutsisoq: Inatsisartut
Siulittaasuat Anders Andreassen.
Peter Grĝnvold Samuelsen,
Takornariaqarnermut, Angallannermut, Niuernermut Attaveqaatinullu
Naalakkersuisoq, Siumut:
Imarsiornermi pissutsit pillugit
nassuiaammik matuminnga Naalakkersuisut saqqummiussinerannut pissutaavoq
ataatsimiinnerni kingullerni - ulluinnarnilumi oqallinnerni - imarsiornermut,
pingaartumillu inuttalersuineq pillugu malittarisassanut, tunngasut
akuttunngitsumik apeqqutigineqartarnerat.
Naalakkersuisut nassuiaatikkut
matumuuna apeqqutit taakku imminnut atanerisa eqqortumik paasineqarnissaat
kissaatigaat, tamannalu tunualiaqutaralugu ajornartorsiutit piffissami aggersumi
misissoqqissaarneqarnerusussat saqqummiunniarlugit.
Apeqqutini qitiutillugu
saqqummertuaannartoq tassaavoq umiarsuarni maani angerlarsimaffeqartuni
kalaallit inuttaasut amerlinissaannik kissaatigisaq - minnerunngitsumik aqumiut
akornanni.
Nassuiaammi aqqusaarlugit
sammineqarput umiarsuarni inuttaqartitsineq pillugit inatsisit maanna atuuttut,
suliat pillugit akissaateqarnermullu isumaqatigiissutinut tunngasut
kiisalu tassunga atasumik
imarsiornermik inuussutissarsiuteqarnermi ilinniagaqarnissamut periarfissat
ilaat allaaserineqarlutik. Apeqqutit saqqummiunneqartut paasisinnaajumallugit
isummerfigisinnaajumallugillu immikkoortut taakku pingasut ataatsimut
sanileriisinneqarnissaat pisariaqarpoq.
Imarsiornermik
inuussutissarsiuteqarneq suliffissaqartitsiniarnikkut
periarfissaqarnerpaaffigisatsinnut ilaavoq, tassa ilaasunik angallassinermi
aamma aalisarnermi, nunatullu imarsiortoqarfiusutut eqqortumik immitsinnut
oqaatigisinnaavugut. Taamaammat Naalakkersuisut pingaartippaat inuttanut aamma
umiarsuaatilinnut imarsiornerup inuussutissarsiutitut kajuminnartuutinneqartuarnissaata
sulissutigiuarneqarnissaa.
Inuusuttortatta ilinniagassaminnik
qinersiniarnerminni imarsiornermik ilinniagaqarnermi periarfissat suunerinik -
aamma nunat tamalaat akornanni - ilisimanninnissaat pingaaruteqarpoq.
Taamaammat inatsisivut ullutsinnut naleqquttuusariaqarput nunallu tamalaat
akornanni pitsaassutsinut naapertuuttariaqarlutik.
Naalakkersuisut tungaannit
nassuiaat manna saqqummiunneqartoq imarsiornermut pissutsinuttunngasut
misissoqqissaarneqarnissaannut aallarniutaavoq. Atorfilittanik
nunatsinneersunik anmarkimeersunillu
imarsiornermik naalagaaffimmilu inatsisinik ilisimasaqartunik inuttaqartumik
suleqatigiissitaliortoqarnissaa Naalakkersuisut siunertaraat. Inatsisit
imarsiornermut tunngasut atuuttut suleqatigiissitap misissussavi - tassunga
ilanngullugit nunatta nunat tamalaat akornanni pisussaaffii -
qulaajassallugulu inatsisiliorsinnaatitaaneq ilaatigut qanoq annertutigisumik
nunatsinnit tigummineqalersimanersoq ilaatigullu iluaqutaasumik siunissami
Namminersornerullutik Oqartussanut qanoq annertutigisumik isumagisassanngortinneqarsinnaanersoq.
Taamaattumik suleqatigiissitap
nassuiaataa aamma imarsiornermut tunngassutigut inatsisiliorsinnaanermik
tamakkiisumik ilaannakortumilluuniit tigusinerup allaffissornikkut
aningaasatigullu kingunerisassai pillugit paasissutissanik imaqassaaq, aammalu
tigusinerup nassatarisaanik iluaqutissartai ajoqutissaalu ersersissallugit.
Suliaq tamanna naammassippat
siunissami oqartussaanermut tunngassuteqartut tunngavissaqarluarluta
isummerfigisinnaalissavavut.
Taama oqaaseqarlunga
Naalakkersuisut sinnerlugit imarsiorneq pillugu nassuiaat Inatsisartunut
suliassanngortippara.
Lars Karl Jensen: Siumup
oqaaseqartua:
Imarsiornermi pissutsit pillugit
nassuiaammi saqqummiunneqartutigut malunnarpoq umiarsuit nunatsinni
angerlarsimaffeqartut pillugit inatsisitigut, atorfeqartitsinikkut kiisalu
ullumikkut ajornartorsiutaasut suunerinik Naalakkersuisut nassuiaataat
ersarissunik imaqartoq. Saqqummiunneqartuni taakkartorneqartut aammalu
tamakkununnga tunngatillugu Siumumi ilisimasagut aallaavigalugit
oqaaseqarfigissavagut. Aallaqqaataaniilli oqaatigeriissavarput imarsiornermi
pissutsit pillugit nassuiaatip malitsigisassaannik suleqatigiissitamik
pilersisitsinissamik Naalakkersuisut oqarnerat Siumumiit
tapersersorluinnaratsigu.
Nassuiaat malillugu ukiuni
imarsiornerup ineriartorfigisaani takuneqarsinnaavoq umiarsuarni
isumannaallisaanernut - inuttalersuinermut - inuttallu qanoq
ilinniagaqarsimanissaannik piumasaqaatitigut naalagaaffeqatigiinnerup iluani
kunngip peqqussutaatigut imarsionermut inatsisinik maleruagassanillu
toqqammaveqartumik tamakkua ingerlanneqarsimasut. Siumut isumaqarpoq,
imarsiornermi isumannaallisaanerup tungaa eqqarsaatigalugu
naalagaaffeqatigiinnermi inatsiseqatigiinneq avaqqunneqarsinnaanngitsoq - imartarpummi
inuutissarsiorfigineqartoq pinngortitamik peqqarneeqisumi avatangiiseqarluni
inissisimavoq - aamma kalaallit nunatsinnut iluaqutaasumik danskit
imarsiornermi aqutsisoqarfiat nunarsuarmiut tamat isumannaallisaanerup tungaatigut
piumasaqaatigut qanimut annertuumik suleqataavoq. Tamakkualu toqqammavigalugit
nunatsinni inatsisigut inissisimanerput kinguneqarpoq, umiarsuarni
isumannaallisaanikkut ilinniartitaanermi, inuttalersuinermi taakkualu sumi
sulisinnaaneranni inuiaqatigiit tamat akuerisaattut paasisariaqartumik.
Nassuiaatip immikkoortuisa ilaani
ersarissumik oqaatigineqarpoq, nunatsinni umiarsuaatillit ilaasa
inuttalersuineranni naalagaaffiup iluani inatsiseqatigiinnermi inatsisitigut
piumasaqaataasut minnerpaaffissaat akimorlugu umiarsuaatillit imminnut
pisussaaffilersimasut, Siumut isumaqarpoq imartatta angallaviginerani
isumannaatsuunissaq eqqarsaatigalugu tamanna avaqqukkuminnaatsoq, tamannalu
umiarsuaatillit namminneq aalajangiiffigisariaqaraat. Siulianilu oqaatigisagut
tunngavigalugit Siumut isumaqarpoq, umiarsuit nunatsinni angerlarsimaffeqartut
inuttaasa ilaasuisalu isumannaallisaaffigineqarnissaat eqqarsaatigalugu
nunarsuarmiut piumasaqaataannit appasinnerusunik nunatsinni imarsiornerup
iluani inatsiseqarnissaq pissutissaqanngitsoq.
Saqqummiussap oqallisiginerani
Siumumiit nuannaarutigaarput takusinnaagatsigu, umiarsuit nunatsinni
angerlarsimaffeqartut, nunatsinni inuutissarsiutitigut ilinniagaqarfiit qanimut
suleqatigalugit imarsiornermi sulisussanik inuttalersuineq ingerlammassuk,
aammalu umiarsuaatillit marlussuit Royal Arctic Line-p aammalu Royal
Greenland-ip kilisaataateqarfia aqumiussanik nammineq ilinniartitsinermikkut
nunaqavissunik sulisoqarnissamik anguniagaqarnermi tapersersuimmata.
Siumumiilli uani eqqumiigalugu maluginianngitsuunngilarput, KNI nunatsinni
imaatigut usinik ilaasunillu assartuinermi ukiorpassuarni suliaqartitaasimasoq,
umiarsuaatilittut siuliani taasatsigut aaqqissuussamik nammineq
ilinniartitsinngimmat, neriuppugullu tamanna siunissami KNI-p
umiarsuaatileqarfiani eqqumaffiginiarneqassasoq.
Siumumiilli nuannaarutigaarput
nassuiaammi takusinnaagatsigu KNI-p iluani kalaallit nunaqavissut
sulisorineqarnissaat salliutinniarneqartoq, tassami nassuiaatikkut
oqaatigineqarmat aqumiut tjenestemanditut
atorfeqartitat nalinginnaasumik peqquteqarlutik suliunnaarneranni, Angallatit
Naalagaasa Kattuffianiit ilaasortaasunit taarseneqartartut.
Imaatigut inuutissarsiuteqarnermut
attuumassuteqartunik ilinniarfiit ilinniartuisa qaffasinnerumik nangitsivigalugu
ilinniaqqinnissaannut ajornartorsiutigineqartartut taaneqartut pillugit Siumut
isumaqarpoq ilinniarfiit pioreersut atorlugit, piareersarfiusunik
atuatitsinerit pikkorissartitsinerit annertusarlugit ingerlannerisigut
qaffasinnerusumi ilinniagaqalernissat aqqutissiuunneqarsinnaasut.
Maannakkut imarsiornerup iluani
killiffik qiviaraanni naalagaaffiup iluani inatsiseqatigiinnermi
saneqqukkuminnaatsoq tassaavoq, nunat tamalaat akornanni umiarsuarni
pigaartoqartarnermi - sillimanissami - ilinniartitaanermilu
allagartalersuinerni aalajangersakkat, tamannalu nunatsinni umiarsuit
inuttalersorneranni inuttallu ilinniartitaaneranni tunngavigineqarpoq.
Piumasaqaatit sakkukilliartunngillat, maannakkut umiarsuit usisaatit
ilaasoqartartullu, aqumiuisa, qaamiutullu sulisut ilaasa umiarsuarmi
ikuallattumik qamisaanermi putsumut anersaartuuserluni atortunik
atuisinnaanermut allagartaqarnissaat piumasaqaataavoq. Aammalu tamanna
kilissatinut qualarnanngitsumillu aalisariutit aalajangersimasunik
angissuseqartut ilaasa inuttaannut piumasaqaataalersussaavoq.
Aamma maannakkut piumasaqaatinut
ilanngutereerpoq, umiarsuit usisaatit, ilaasoqartartut, kilisaatillu tamarmik
naalagaasa aquttuisalu raadiumik atuisinnaaneranni GMDSS-imik taaneqartartumut
atuisinnaanermut, 1. februar 1999 aallarnerfigalugu
allagartaqalereersimanissaat. Allagartaqalernissaq tuluttut oqaatsinik
atuisinnanermik piumasaqaatitaqarpoq.
Tamannalu allagartaq
pissarsiarinngikkaanni umiarsuarmi naalakkatut aquttutulluunniit atorfininniarnissaq
ajornarsisussavoq. Nunaqavissullu umiarsuarni maskinmesterit amigaatigineqarnerat
pissuteqarsorinarpoq maskinmesteritut soraarummeerneranni tyskisut oqaatsinik
pisinnaasaqarnissamik piumasaqaateqarneq.
Siumumiit ajuusaarnartutut
isigaarput, imarsiornermi piumasaqaatit tamakkua saneqqukkuminaatsut
umiarsuarni eqqortinneqarnissaata malitsinneqarnissaat pillugit, danskit
kalaallilluunniit inatsisiliortussaaneranik apeqqutip
assortuussutigineqarneranik pissuteqartumik, kalallinik sulisoqarsinnaanermut
killilersuisuussappat.
Taamaattumillu Siumut isumaqarpoq,
nunaqavisuut annertunerusumik sulisorineqarnissaat anguneqassappat umiarsuarni
inuttalersuinermi kalaallit nunaata imartaani nunanilu allani umiarsuit
angallavigisaat immikkut isiginiarlugit inatsiseqatigiinnermulli
akornutaanngitsumik nunatsinni tamakkunuuna aalajangersagaqartariaqartugut.
Inatsiseqatigiinnerummi iluani
allagartalersuinikkut immikkut akuersissuteqarfigineqarnissaq
sulissutigineqarsinnaavoq, nunatta imartaani immikkut nammineq
killeqarfeqarnerluunniit kisiat eqqarsaatigalugu.
Taamaattumillu tamakkua
pitsaasumik torersumillu aaqqinneqarnissaat siunertaralugu ataatsimiititaliamik
suligasuartussamik pilersitsinissap piaartumik piviusunngortinneqarnissaa Siumup
inassutigaa, aamma ataatsimiititaliap suliassaanut ilaasariaqartut imarsionermi
ilinniartitaanermi aamma umiarsuarnilu inuttalersuinermi - matumani
savalimmiuni imarsiornermi inatsisitigut aaqqissuussaanerup sutigut
iluaqutigineqarsinnaanera ilanngullugu - nunatsinni piumasaqaatitigut,
allagartalersuinikkullu maannamut ajornartorsiutaasup aaqqiiviginissaannut
suleriaqqinnissami isumaliutissiissummik suliaqarnissaq.
Naggataatigut Siumut isumaqarpoq
imarsiornermi pissutsit pillugit nassuiaat ersarissoq Naalakkersuisunit
saqqummiunneqartoq, taamatullu oqaaseqarluta nassuiaat tusaatissatut tiguarput.
Peter
Ostermann,Atassutip oqaaseqartua:
Imarsiorneq
issittumi najugalinnut takornartaanngilaq. Umiaq qajarlu imaatigut kisimik angalaataagallarmata
issittup sineriassua issittormiut angallavigiloortarpaat pujorsiuteqannguaratik
GPS-eqannguaratillu.
Pissutsit
ullumikkut allanngorsimaqaat. Imarsiornermi annertoqisumik
ineriartorneqarsimavoq, ineriartorneq inatsiserpassuit, peqqussuterpassuit
allarpassuillu pinngorfigisimasaat imarsiornermillu aqutsiffigisaat
Inuiaqatigiit
ineriartornitsinni imarsiorneq annertuumik pingaaruteqarpoq, soorlu aamma
imarsiornermi suliffissarpassuaqartoq inuppassuit, pingaartumillu inuusuttut,
ineriartornerminni toqqammavigisaat.
Atassutip
ilinniartitaanermut politikkiani qitiulluinnartoq tassaavoq, inuusuttortavut
ilinniartissagivut nunarsuarmut avatangiisigisatsinnut nallersuuttunngorlugit
inuusoqatiminnullu unammillersinnaanngorlugit - tamanna aalajangiusimavarput -
piffissanngorporli aamma imarsiornermi naleqqussaanissamut.
Imarsiornerup
uatsinnut pingaaruteqassusia aallaavigalugu Naalakkersuisut
misissuisitsiniarlutik aalajangersimanerat Atassummiit assut isumaqatigaarput.
Atassummiit
inassutigissavarput inatsiseqarnikkut pissutsit eqaallisarniarlugit
sulisoqassasoq, imarsiornerup oqartussaaffigilernissaa anguniarlugu
sulisoqassasoq, atorfilittat sulisitassat imarsiornermut atuarfimmiit
aquimiullu peqatigiiffiannit ANK-mit sinniisunik ilaqassasut.
Atassummi
isumaqarpugut nunatsinni taama pingaaruteqartigisoq politikkikkut tamakkiisumik
oqartussaaffigilertariaqaripput, suleqatigiissitalialli inassuteqarumaarnissaa
aalajangivinnissatsinnut utaqqigallarumavarput.
Suleqatigiissitap
aamma nalilersortariaqarpaa siunnersuuteqarfigalugulu oqaatsitigut aporfeqartarneq qanoq
qaangerneqarsinnaanersoq.
Tamaat
ataatsimut isigalugu qallunaatut tuluttullu piginnaaneqarnissaq
piumasarissallugu pissusissamisoorpoq, taamaakkaluartorli sooq kalaallisuinnaq
oqaasillit immikkoortinneqartuassappat, naak immaqa suliamut
ilisimasariaqakkatigut ajunngilluinnaraluarlutik.
Atassummut
assut pingaarpoq apeqqummi tassani suleqatigiissitap aaqqiissutissanik saqqummiussaqarnissaa.
Tamanna immaqa ilinniartitseqqinnikkut aaqqinneqarsinnaavoq, immaqaluunniit
isumannaallisaanissamut tunngassuteqartuni immikkut ittunik
piumasaqaateqarnikkut.
Taama
oqaaseqarlunga nassuiaat tusaatissatut tiguarput suleqatigiissitassarlu
sulilluarnissaanik kissaallugu.
Josef
Motzfeldt, Inuit Ataqatigiit oqaaseqartuat:
Nunarput
nunanut imarsiornermik annertuumik ingerlatsiviusunut ilaavoq. Umiarsuit atortorinngikkallaratsigilli
umiaq qajarlu nunarput kaajallallugu angallataasimapput. Taamaattumik imarsionermut,
minnerunngitsumillu imartatta pissusaannik, sarfaq, sikut silallu pisuusai
allat eqqarsaatigalugit, nunami maani imarsiortortatta inunngornerminniit
ilitsoqqussamikkut ilisimasaqassusiat allat atuagarsornerinnakkut
ilisimalersimasaannit nallerneqarsinnaanngillat.
Taamaattumik
tupinnanngilaq imarsiornermut angalaatinilu aquttussanik naalagassanillu
ilinniartitsineq 1960-imili nunatsinni aallartinneqarsimammat.
Taamaalilluni
umiartortortavut ilitsoqqussamik saniatigut atuagarsornikkut nunat tamat
akornani piumasarisaasunut qangali nallersuussinnaanngoreersimapput.
Ukiut
qulikkaat kingulliit kilisaatikillisaanikkut, ukiunilu ukunanerpiaq
sineriassortunik aalisariutikkillisaalernikkut aammalu KNI-p
allanngortiterneqartarnerisigut Royal Arctic Linellu pilersinneqarneratigut
imarsiortorpassuit nunamut qaqisariaqalersimapput.
Taamaattumik
tupinnanngilaq imarsiortortatta, qaamiut aqumiullu, ikiffissarserusuttut amerlanaarlutik
nipaat oqallinnermi ukiuni kingullerni ersarissigaluttuinnarsimammat.
Inatsisartuni
apeqqut pineqartoq ukiuni kingullerni saqqummersinneqallattaaraluartoq,
inatsisinik atuuttunik naleqquttunngorsaaniarneq ajuusaarnaqisumik
aallartinneqarsimanngilaq. Aatsaallu naalakkersuisut qulaajaasussanik
suleqatigiissitaliorniarlutik pilersaarumminnik saqqummiussaqarput.
Tamatumani
soorunami oqartussaaffiit Danmarkimi nunatsinnilu oqartussaasunut ilaatigut
avissaartinneqarsimanerat pissutaasimasinnaasoq paasinarpoq. Taamaakkaluartoq
umiarsuit inuttalersorneqarnerannik inatsisip 1975-imeersup suli nunatsinni
nangittumik atuutsinneqarneranik nunatsinni Aquttut naalakkallu Kattuffiata
1966-imeersup, ANK-66-ip, orulluteqartarsimanerigauata suli
timitaliivigineqannginnera Inuit Ataqatigiit assut paasiuminaatsipparput.
Inatsimmi
pineqartoq Danmarkimi 1975-ip kingorna arlaleriarluni nutarterneqartarsimavoq,
tassa siullermik 1985-imi aappassaanillu siorna 1997-imi.
ANK-66-ip
inatsisip nutarternerisa nunatsinni atuuttussanngortinneqartariaqarnerannik
noqqaassuteqartuarnermini qulakkeerniagaa ersarissoq tassaavoq nunatsinni
angallatit naalagaasut aammalu maskinistitut ilinniarsimasut umiarsuarni
nunatsinni angalasuni amerlanerpaani naalakkatut, aquttutut maskinchefitullu
atorfinissinnaalernissaat.
Piumasarisaq
tamanna paatsuugassaanngilaq, oqareernittummi maani nunaqavissut nunatsinni
imarsiornermik ilitsoqqussamikkut paasisimasamik saniatigut atuagarsornikkut
inorsaakkunnaareerput. Taamaallaat inatsisip pineqartup nutarnerisa nunatsinni
atuutsilernissaat aporfiuinnalersimavoq.
Inuit
Ataqatigiinni ilisimavarput Namminersornerulluni Oqartussat KNI-p
umiarsuaateqarfigisimasaani tjenestemanditut aqumiutut atorfeqartunik suli
arlaqartuni lastermiqarmata, taakkulu soraarsinneqartassagunik
atorfeqarnerminni ukiuni isumaqatigiissutaasuni aalajangersimasuni
akissarsiaqartussaanerat ajornartorsiorfiusoq.
Taamaakkaluartoq
inatsisip pineqartup nutarternerisa siullertut nunatsinni atuutsilersinneqarnissaat
pisariaqarpoq, taamaaliornikkut umiarsuarni aqumiunik avataanit suli
atorfinitsitsiuarneq unitsinneqanngikkuni
annikinnerujussuanngortinneqarsinnaanera anguneqarsinnaanngussammat.
Inatsisit
allallu maleruaqqusat nutarterneqarnissaanni nunat tamat akornanni
piumasarisaasut suusupaginngikkaluarlugit siunnerfiit pingaarnersarisariaqarpaat
umiartortut nunaqavissut amerlanerpaat maani umiarsuarni inuttaasinnaanissaat,
qanormi allatut?
Pissutsit
tamakku qaangerniarlugit suliassamut paasisimasaqartunik Naalakkersuisut
suleqatigiissitaliornialernerat Inuit
Ataqatigiit nukininnartutut isigaat, soorlumi taama suleqatigiissitaliupallattariaqarneq
1997-imi novemberip naalernerani Naalakkersuisunut allagaqarninni kaammattuutigereersimagiga
sulili ulloq mannamut akineqanngitsumik.
Suleqatigiissitaasussami
ANK-66 kattuffittut pissutsinik paasisimasaqarluartutut pinngitsoorani
akuutinneqartariaqarpoq, suleqatigiinni ilaasortaatitaqartutut imaluunniit
pinngitsoorani tusarniaavigineqartartussatut.
Taamali
suleqatigiissitaliaasussap suliaminik naammassisaqarumaarnera utaqqingikkaluarlugu
Naalakkersuisut Namminersornerullutik Oqartussat ingerlatsiviini inatsisit
sulisussarsiortarnermut tunngasut eqqortumik atuutsinneqarnersut
alaatsinaalluinnartariaqarpaat. Sulisussarsiortarnermummi maleruaqqusat
tamatigut malinneqartarsimannginnerat imarsiortortatta akornanni
tujormisitsisut ilagaat.
Tassungalu
ilanngullugu kilisaatini aqumiut 60 %-iisa nunaqavissuunissaannik piumasarisap
qaffanneqarsinnaanera, soorlu 80 %-inngorlugu, naliliivigigasuartariaqarpoq.
Ingerlatsiviit
qanorluunniit A/S-utigigaluarunik umiarsuarni inuttat, qaamiuugunik aqumiuugunilluunniit,
inuttut ataasiakkaarlutik imaluunniit kattuffeqarnermikkut
pisinnaatitaaffeqarmata ataqqisariaqarpaat. Ukiummi kingulliup
ingerlanerinnaani ingerlatsiviit pineqartup ilaata KNI-p angallatini
inuttaqarnermut allaffeqarfiata aqumiuinnaanngitsunik igasunulli allaat allagarseeqqaanngikkaluarluni
kinaassusersiortutut oqaatigineqartariaqarsorinartumik pissuseqarluni
inuttaliisarsimaneranik umiartortunit kalerrinneqarpugut.
Pissutsit
taamaattut Naalakkersuisut KNI-p siulersuisuini tamakkiisumik suliniutigaluni
siulittaasuutitamikkut nakkutigisariaqarpaat. Inatsisit
inatsisaapput inatsillu atortinneqartariaqarput.
Suleqatigiissitaliaasussaq
pinasuartumik sulisariaqartoq isumaqarpugut. Tamaattumik naggataatigut
Naalakkersuisumut apeqqutigissavarput, suleqatigiissitaliarilersaakkani qanoq
piffissalilersaarneraa.
Bjarne
Kreutzmann,Akulliit Partiiat:
Imarsiornermi
pissutsit pillugit nassuiaatip atuarnerani paasivara nassuiaat ukuninnga
imaqartoq. Siullermik umiarsuarni inuttaqartitsineq pillugu inatsit, inatsisit
maanna atuuttut, aammalu suliat pillugit akissaateqarnermullu
isumaqatigiissutinut tunngasut kiisalu ilinniagaqarnissamut periarfissat
allaaserinerat.
Imarsiorneq tassaammat suliffinnik amerlanerpaanik
peqarfitta ilaat, isumaqarpunga pissusissamisoortoq inatsisinut tunngasortaasa
naapertuussarnissaat. Minnerunngitsumik kissaatigigatsigu inatsisinut
tunngasortai ullutsinnut naapertuussartariaqartut taamatullu aamma nunat
tamalaat inatsisaannut naapertuuttariaqarlutik.
Taamaattumi
nassuiaat aallaaviusariaqarpoq suleqatigiissitamik pilersitsinissamut
ullumikkut pissutsinik inatsisinillu atuuttunik misissuisussamik. Misissuinerup
inernera neriulluta nutarinermik kinguneqarumaartoq - aqqutissiuussissaaq
nunatsinni imarsiornermi aalajangersakkat nunani tamalaani
aalajangersakkanut
naleqqussarnissaanut, taamaalilluni inuiaat kalaallit imarsiornermi
inatsisinut tunngasutigut nunanut allanut unammillersinnaaqqullugit.
Taama
naatsumik oqaaseqarlunga neriullunga suleqatigiissitaq sulilluarumaartoq,
nassuiaat tusaatissatut tiguara.
Anthon
Frederiksen: Kattusseqatigiit:
Kattusseqatigiit
sinnerlugit nuannaarutigaara imarsiornermi pissutsit pillugit nassuiaat kiisami
saqqummiunneqarsinnaalersimammat. Tassami naluneqanngimmat kalaallit
imarsiortut ukiuni arlaqalersuni ilaatigut umiarsuarni inuttalersuinermut
tunngasunik ilaatigut annertuunik ajornartorsiortinneqarmata.
Taammaattumillu
julip arfineq aappaanni 1996-mi inatsisartut 1996-mi ukiakkut ataatsimiinnissaannut
imaattumik siunnersuuteqarsimavunga. Nunatsinni umiartortut aalisartut,
niuffagiutini inuttat allallu imaatigut inuutissarsiuteqartut sulinerminni
atugarisaasa illersorneqarnissaat siunertaralugu, Danmarkimi sĝmandslovip
nunatsinnut naleqqussarlugu atuutilernissaa pisariaqarpoq.
Tamatumalu
kingorna apeqquteqartarnikkut ukiakkut 1997-mi ataatsimiinermi neriorsuutigineqarpoq
Naalakkersuisut upernaakkut 1998-mi ataatsimiinnermi umiartortut pillugit
inatsisit pillugu saqqummiussaqarumaartut.
Nassuiaammi
takuneqarsinnaasut ilagaat kalaallit imarsiornermik assigiinngitsutigut
ilinniakkaminnik naammassinnissimasut, allaammi 1981-miit 1996-simut
ilinniakkaminnik naammassinnissimasut 1000-ngajaallutik, taamaattumik
pissutissaqarluartpoq inatsisit malittarisassat il. il. umiarsuarni
inuttalersuisarnermut tunngasut ullutsinnut naleqqussassallugit.
Aamma
suliffissaqartsisiniarneq eqqarsaatigalogu Nunatsinni pisortat umiarsuaataanni
kalaallinik inuttaqartitsisarnermut tunngasutsukumiinerusumi
sammineqartariaqalerput, soorlu ippassaq nunatsinni sulisoqarneq pillugu
oqallinnermi ilaatigut umiarsuarni kalaallinik 60 %-ti angullugu
inuttaqarnissamik piumasaqaatit ilumut eqqortinneqarnersut apeqqutegineqarmat
naammaginartumik akineqanngitsoq.
Danmarkimi
Ministereqarfiup decemberimi 1996-mi allagai pillugit Namminersornerullutik
Oqartussani pisortaqarfiit akornanni maannamut nalornissutigineqarpoq, kikkut inatsisiliortussaanersut,
soormi inatsisilerituut imaluunniit Ministereqarfik tamatuminnga taamanikkulli
paasiniaaffigineqanngila?
Taamatut
naatsumik oqaaseqarlunga naassuiaatip imartuup soqutiginartullu imarsiornermik
inuutissarsiuteqartunut pitsaasumik inatsisitigut aaqqiisoqarnissaanut
aqqutissiinissaa innersuussutigalugu Naalakkersuisunut kaammattuutigissavara
inatsisitigut naleqqussaanissaq piaartumik sulissutigeqqullugu.
Peter
Grĝnvold Samuelsen,Takornariaqarnermut Angallannermut, Niuernermut Attaveqaatinullu
Naalakkersuisoq, Siumut, akissuteqaateqassaaq:
Tassa
pisarnittut partiit oqaaseqartui qutsavigeqqaarusuppakka. Maluginiarpara
oqaaseqartut tamarmik suleqatigiissitamik apeqqutinik pingaaruteqartunik
oqaluuserisatsinnik erseqqissasussat taakkua pilersinneqarnissaat pingaartumik
kissaatigigaat. Taavalu aamma tassani sulinissami apeqqutit pingaartillugit
ilanngullugit nalilersuiffigineqartariaqartutut isumaqarfigisatik aamma
tunniukkaat.
Neriorsuutigissavara
partiit kattusseqatigiillu oqaaseqartuisa oqaasii uani saqqummiussuunneqartut
tamarmik suleqatigiissitamut tassunga aamma innersuunneqarumaarmata. Taakkua
sulineranni aamma isumassarsiorfittut aammalu inatsisartut maani qanoq
isumaqarnerannik ersersitsisutut atorneqarniassammata.
Suleqatigiissitaq
qagugu imaluunniit qanoq piffissalerniiarneqarnersoq Inuit Ataqatigiit
siulittaasuata apeqqutigaa. Manna tikillugu aalajangersumik
ulluliinissatsinnik Naalakkersuisuni isummersimanngilagut. Kisiaani una
oqallinneq aallaavigalugu Naalakkersuisuni suleqatigiissitap sulinissaanik
najoqqutassaanut saqqummiininnut atatillugu ilanngullugu taanna innersuussutigissallugu
pisariaqassaaq. Imaaliinnarlugu nalileruminaatsippata kisianni
naatsorsuutigisinnaassavarput ukiup ataatsip ingerlanerani taanna suleqatigiissitaq
sulisinneqarsinnaassasoq. Aamma neriorsuutigissanngilara ukiamut taanna
saqqummerumaartoq. Apeqqutit oqimaapput ilinniartitaanermut tunngasut
inuttaliisarnermut tunngasut taavalu umiarsuit angalaneranni isumannaallisaanermut
tunngasut.
Aamma
Kattusseqatigiinniit Anthon Frederiksenip apeqqutaanut sooq qangalili
misissuisoqanngila. Soorlu nalunaarummi aamma ilaatigut nalunaarutigineqartoq
statsministeriaqarfiup sĝfartstyrelsillu taavalu ilinniartitaanermut
pisortaqarfiup Namminersornerullutillu Oqartussat angallannermut
pisortaqarfiup oqaloqatigiinneq, ataatsimeeqattaarnerit allaqattaarnerit
taakkua ingerlanneqarput.
Apeqqutit
ilai isumaqatigiinngissutigineqarput taakkulu suleqatigiissitap
nalunaallisittariaqarpai ingerlaqqinniassagatta.
Lars Karl
Jensen Siumut sinnerlugu oqaaseqarnermini aammalu partiit allat
oqaaseqarnerminni taakkartugaat pingaarutilik tassaavoq imarsiornermi
isumannaallisaanerup tungaa eqqarsaatigalugu ullumikkut najoqqutarineqartut
taakkua najoqqutarineqartuarnissaat. Imaappoq isumannaallisaanermi taavalu
nunat tamalaat akornanni umiarsuarnik aalajangersimasunik angissusillit
eqqarsaatigalugit ingerlatsinermi
tassani maleruaqqusat naapertorneqartariaqartut.
Tassami
soorunami taamatut aallaaveqarneq taava sĝfartsstyrelsip aalajangersagai
naapertortuaannarlugit ingerlassanersugut aammalu ilinniartitaanerit aqumiut
kiisalu maskiinalerisut maskinchefillu eqqarsaatigalugit qanoq immitsinnut
naleqqussaasinnaanerput oqariartuutigineqartoq maluginiarakku, aamma
suleqatigiissitanut imissutigissallugu suliassatut.
Imaappoq
inuttaliisarnermut Danmarkimut atuuttut naapertorlugit uagut allaat Danmarkimi
atuuttut atuutilersimannginnerat pissutigalugu sakkortunerusumik
piumasaqarnerput, tassani maluginiagassat ilagaat.
Taamaattumik
apeqqutip taassumap isummerfigigasuarnissaa suleqatigiissitami pissasoq soorlu
aamma oqaluttut tamarmik kissaatigisaattut pisariaqarpoq.
Ilinniartitaanermut
tunngasuteqartut taakkua tikissanngilakka. Aamma inuttaliisarnernut tunngasut
soorlu 60 %-ngaaniit 80 %-timut uani akissuteqarninni tikissanngilakka.
Kisianni taakkua nalilersorneqarniarlik suliffeqarfiit pineqartut
peqataatillugit.
Aamma
isumaqatigaakka oqartut nuannaarutigineqarmat ilaatigut pingaartumik Royal
Acrtic Line pilersinneqarnermi kingorna annertuumik ilinniartitsinerit
inuttassat eqqarsaatigalugit annertuumik suliniuteqarfiummat. Taamatuttaarlu
aamma taaneqanngitsuussanngilaq Royal Greenlandip kilisaataateqarfiat aamma
imarsiornermut ilinniarfik aamma isumaqatigiissuteqarfigalugu suleqatigimmagu.
Taavalu Siumuminngaaniit Lars Kaalip taavalu aamma Inuit Ataqatigiinninngaaniit
Josef Motzfeldtip KNI-mut sammitillugu oqaasii ilalertariaqarpakka. Sulisussanik
pikkorissartitsineq tassani aamma aallunneqartariaqarpoq. Malittarisassallu
malinneqartariaqarput soorunami oqanngilanga malittarisassat malinneqanngitsut
kisianni malinneqartariaqarput sumiluunniit.
Umiarsuaatileqatigiiffik
KNI-miittoq taanna ataatsimeeqatigisimavara, aammalu tassani isummersoqatigisimallugu,
soorlu Royal Greenland, Royal Arctic line sulisuminik pikkorissartitsisartoq
aamma KNI tassani pikkorissarnermik ingerlataqarneruleqqullugu.
Qularinngilaralu aamma taanna tusaatissamittut tigusimassagaat
iliuuseqarfigalugulu.
Soorlu aamma
nalunaarummi tikinneqartoq aammalu Inuit Ataqatigiit siulittaasuannit
tikinneqartoq ilumoorpoq KNI eqqarsaatigalugu sinersortaatit
eqqarsaatigalugit tjenestemandinik lastermioqarpugut. Taannalu ajornartorsiut
imminik aamma angisuujuvoq. Kisiannili hĝjestret-imi aalajangiinissaq taanna
pisariaqarpoq immikkut ittumik iliuuseqalinnginnermi. Lastermiugut taakku oqimaapput
tjenestemandit. Taamaattumik aamma lastermioriinnarnagit qaqugu taarserneqartariaqalerpata
taartissaanik ilinniartitsisariaqarpugut.
Tassa naatsumik oqaatigalugu
suleqatigiissitap taassuma ukiup ataatsip ingerlanerani suliaqartussap
qaqilissavaa inatsisinik atortitsinermik kikkut suna pillugu akisussaanersut.
Ilinniartitaanerit piumasarisasut manna tikillugu naapertorlugit
ingerlaannassanersut imaluunniit imarsiornermut ilinniarfik taavalu uagut
suliffeqarfigut taakkua peqatigalugit sulisussanik Tuusip oqarneratuut nunat
tamalaat akornanniit piumasarisaasut suusupaginngikkaluarlugit kisianni
Nunatsinni atorneqarsinnaasunik ilusiliinissaq taanna misissorneqassooq
suleqatigiissitami.
Assersuutigiinnarlugu
maskinmesterit ilinniarfiat maani pilersinneqarsimagaluarpoq kisiannili
unitsinneqarneranut ilaatigut pissutaasoq tikkuarneqartoq tyskit oqaasiisa
atorneqarnerat. Massa aamma nalunaarummi atuarneqarsinnaagaluartoq qallunaat
nunaminni inatsisitigut atortitsinerminni umiarsuit inuttalerneqartarnerinut
tunngatillugu piumasarisaat soorlu maskinistit tungaasigut
sakkukinnerugaluartut uagut maskinmesteritut
tassani umiarsuit eqqarsaatigiinnarnagit kisianni nukissiorfitsigut
aamma ingerlatsinermi tassani qissiminneqarsinnaavoq. Taamaattumik
suliassaaleqissanngilaq suleqatigiissitaq. Una tuaviornerpaamik
pinngikkaluarluni kisianni sukumiisumik taakkununnga nalilersuinissaa
pisariaqassaaq.
Peter Ostermann, Atassutip
oqaaseqartua oqaaseqaqqissaaq:
Uagutsinnut aamma assut
ussernartorsiornarsimagaluarpoq ulloq manna tikillugu umiartornermi
ajornartorsiutigisavut assigiinngitsut soorlu IA-minngaaniit ilaatigut
saqqummiussorneqartut aamma pulaffigissallugit. Kisianni oqallisigisarput
massakkut taamatut oqalliffissatut isigisimanngilarput tassami siunertaa
unaammat nassuiaateqarnitsinni Naalakkersuisut saqqummiussaqarnermikkut
erseqqissititaat. Suligasuartussanik suleqatigiinnik pilersitsissaagut taakkulu
ullumikkut inatsisit assigiinngitsut atuuttut nalilersussavaat, eqaallisarlugit
paasiuminarsarlugit ilikkarlugit aammalu siunnersuuteqarlutik qanoq aaqqiisinnaavugut.
Inatsisitigut oqartussaaffik tigusinnaavarput.Taava taakku saqqummiussaqarpata
qularinngilara oqallilluarumaartugut.
Kisianni Naalakkersuisunut
ilaasortap oqaaseqarfiginngimmagu una uagut assut pingaartitarput, aamma
paasivara IA-minngaaniit ilaatigut aamma pingaartinneqartoq assut
pingaartitarput. Suleqatigiissitami ilaassapput umiartornermi aatuarfipput
aammalu ANK avaqqunneqarsinnaanngillat taakkua. Ulloq manna tikillugu
umiartornermi inuttaqartitsinermi ajornartorsiutigut ilaatigut saamasumik
oqassagaanni ima avaanngunartigisarput ulluinnarni ingerlatsinermi
misilittagallit peqataasariaqarput aaqqissuusseqqinnermi taanna
avaqqunneqarsinnaanngilaq. Sakkortuumik uagut taanna piumasaraarput aammalu
Naalakkersuisup apeqqummut tassunga isumaqarnera assut paaserusupparput.
Aamma Nalakkersuisunut ilaasortaq
isumaqatigaara imatut eqikkaavallaartumik annikippallaartumillu
suleqatigiissitaq piffissalerneqassanngitsoq kisiannili sapinngisamik
naammattumik piffissalerneqassasoq, sukumiisumik pitsaasumillu nalilersuinissaq
siunnersuuteqarnissarlu pisariaqarmata.
Kiisalu naggataatigut
IA-minngaaniit aammalu Naalakkersuisunut ilaasortaminngaaniit KNI pillugu
oqaaserineqartut oqaaseqarfigilaartariaqarsoraakka. Siullermik erseqqissartariaqarpara
umiarsuarnik angallassineq KNI-p nammineq qitiusumik ingerlannerani massakkut
ingerlanneqanngimmat. Immikkulli umiarsuaatileqatigiiffiuvoq
Namminersornerullutik Oqartussat ataanni inissisimasoq.
Ilaatigut IA-mit aammalu
Naalakkersuisunut ilaasortamit oqaasi atuinnarlugit KNI isorineqarpoq
ilinniartisinermik ingerlataqanngitsoq. Taamaaqqajanngilaq annertuumik maani
ilinniarfiit nunatsinni aammalu Fanĝ-mi umiartornermik ilinniarfiit
suleqatigineqarput. Paamiuni umiartornermik ilinniarfik ingerlaavartumik
pitsaasumillu isumannaallisaanissaq pillugu suleqatigineqarpoq
ajunngivissumik. Aamma Fanĝ-mik atuarfik aamma ajunngitsumik
suleqatigineqarpoq.
KNI-p imaluunniit
umiarsuaatileqatigiiffiup ukiumut 2 mio. kr-nit missai kursusernernut
atortarpai, imaappoq nunatsinni atuarfiit umiartornermik assigiinngitsunut
tunngassuteqartut atorneqarput. Soorlu, massakkut ulluni makkunani inuit 15-t
nerisassalerinermut tunngassuteqartut Inuili-mi kursusertinneqarput.
Taamaattumik tupigikuluppakka qanoq pisoqannginneranik oqaaseqartoqarmat.
Aammalu isumannaallisaanermut
tunngassuteqartuni pujorsiornissamut atortoqarluni ingerlatsinissamut
pisariaqartitsinerit, allagartallu pisariaqartinneqartut tamarmik pigineqarput.
Josef Motzfeldt,Inuit Ataqatigiit
oqaaseqartuat oqaaseqaqqinniarpoq:
Paasisimasavut najoqqutaralugit
oqaluppugut. Una Atassutip oqaluttuata oqaatigisaa mikisuarsuit
tikikkusunnaraluaqisut kisianni ulloq manna nammineq piffissaasorinagu
taamaammat tamakkiinerusumik oqaaseqarfigisimallugu.
Isumaqarpugut Inuit
Ataqatigiinninngaaniit suleqatigiissitaq pilersinneqalerpoq taanna isumaqatigiissutaavoq.
Naalakkersuisut pilersissavaat. Suleqatigiissitaliassaq sulerissasoq
Inatsisartut sunniuteqarfigissagunikkut piffissaq kingulleq tassa aajuna umiarsuup
aallaanngilaattaani. Taamaammat uagut piffissaq manna atorniarsimavarput
oqqersuutinik suliassanik sunik sammisaqarumaarnersoq Naalakkersuisut nammineq
isummiuteriigasa avataasigut ilassuteqarsinnaanerput atorluarniarlugu.
Kiisalu utoqqatsissutigissavarput
umiarsuaateqarnermut tunngasut paasisimanerat malinnaaffiginiapiloornarsisimaammat
taamaattumillu eqqorpianngitsumik oqarsimavunga. Kisianni aana erseqqissoq
eqqortumillu oqaatigisarput, nunaqarfinni assartuinermut
umiarsuaatileqatigiiffik pilersinneqarsinneqarpoq1997-p naanerani, uagullu
oqaseqarnitsinni pissutsit uparuakkagut tassaapput ukiup kingulliup
ingerlanerani tassa siorna 1997 ukiortaamiit ullumikkumut pissutsit
uparuartuiffigivagut pissutsit taamaassimammata.
Kiisalu Atassutip oqaluttualu
isumaqatigiippugut aquttut naalakkallu kattuffiata 66-meersup
suleqatigiissitami ilaatinneqarnissaa. Taassumalu saniatigut Atassummiit
imarsiornermut ilinniarfik ilaatinneqartussatut siunnersuutigineqarmat uagut
taanna aamma ajorinngilluinnarparput.
Siumup oqaluttuanut tunngatillugu
oqaatigiinnassavara tjenestemandi qallunaaq soraarpat ANK 66-p ilaasortaanit
taarserneqartartoq tamanna taamaassimappat nalunaarusiami allassimasutut
soorunami taanna qujaruttariaqarpoq aamma allatut iliortariaqanngilaq.
Pingaaruteqarpoq massakkut nunatsinni umiartornermut allagartatigut
naammattunik pigisaqartut atorneqarnissaat aqqutissiuutissallugu. Tassami
inatsit pineqartoq 75-minngaaneersoq Danmarkimi 85-mi atorunnaarsinneqarpoq,
tamannalu tamannalu nunatsinnut atuutsinneqarlerpat nunatsinni
allagartartaarsimasut naalaganngorniat atuarfianinngaaniit maskinistit
umiarsuarni nunatsinni angalasuni tamani naalakkatut aquttutut maskinchefitullu
atorfittaarsinnaammata.
Lars Karl Jensen, Siumup oqaaseqartua
oqaaseqaqqissaaq:
Aap oqareernitsituut
Naalakkersuisut suleqatigiissitamik pilersitsinissaat qilanaarivarput. Aamma
taanna sapinngisatsinnik Siumuminngaaniit immersuinerup tungaatigut aammalu
suliffeqarfitsigut suleqataaffiumaaratsigu. Uani oqaatigisatsinni
allagartalersuinikkut Qallunaat nunnanni inatsiseqatigiinnerup iluani ilaatigut
inuttalersuineq nunatsinni umiarsuani angerlassimaffeqartuni
qerattarsarneqartarmat, taanna suleqatigiissitami aaqqiivigineqarsinnaaneranik
periarfissanik misissuisoqarnissaanut tunngatillugu pingaartillutigu
oqaatigivarput.
Uagut Siumuminngaaniit
takorloorparput soorlu aamma Naalakkersuisup oqaatigillatsiareeraa
oqaaseqaatigut tunngavigalugit maskinmesteritut ilinniarfik atorluassagutsigu
taava peqqussutit iluanni akornutaasut aaqqiivigisariaqarpagut. Aammami inuiaat
tamarmik imarsiornerup iluani isumaqatigiissutimikkut inuttalersuinikkullu
aallaavigisaat tunngaveqartarpoq imaq suna angallavigineqarnersoq.
Isumannaallisaanerup tungaatigut oqaatsit piumasaqaatigineqassappata
tupigissanngilarput. Kisianni Kalaallit Nunaatsinni umiarsuit
angerlarsimaffeqartut amerlanertigut nunaqavissunik maani angallassisut
tyskisut, imaluunniit aamma tuluttut tamakkiisumik piumaffigissagutsigit
equngasoqarsimassaaq.
Taamaappoq aamma ilinniakkatigut
allagartalersuinermi aporfiusinnaasut tassami atuagarsornikkut
assassornikkullu maskinmesterit angummassinnaasut tyskisut
soraarummeeruteqarnissamut anngussimanngikkunik, taava suliffigisinnaanngilaat
pappiaraq taanna pissarsiarisinnaannginnamikku. Taanna
assersuusiorfigilaarlara sumik peqquteqarnersoq. Tassagooq maskinmesterit
maskiinarsuit suliarisatik kingoraartissaannik piniassagunik qupperagassaat
tyskisoortuummata. Allaffeqarfeqarput umiarsuit taakkunani
atorfeqartitsisoqarsinnaavoq tyskisut paasisinnaasunik. Uagutsinnut cylinderi
cylinderiuvoq, oqaasersiarigaluarparput naluara tyskisut qanoq taaneqartarnersoq.
Uani KNI-p inuttalersuinerani
ilinniartitsinnginnerani uparuaanerput taanna nassuiaateqarfigilaassavara.
Pikkorissarnernut ilumoorpoq Piitap oqaasia Peter Ostermannip imarsiornermut
qanimut suleqatigineqarpoq. Siumuminngaaniit ippigalutigu uparuagarput
aallaaveqarpoq Royal Arctic Line aammalu Royal Greenlandi, taakkua aqumiussanik
aquttunik maskiinalerisunillu ilinniartitsimmata. Royal Arctic Line
qujanartumik umiarsuaatilik ukiorpassuunngikkaluartut matuma siornatigut
nunatsinni pilersinneqarami ilinniartitaanerit igaffimmi atorfeqalertussat
maskinnani atorfeqalertussat allallu aaqqissuussamik aspirantitut
ilinniartitaanermik taasamik tassa umiarsuarmiiteriarlugit ilinniarfinnut
qaffakkiartuaartumik ingerlatsinnerani nakkutigilluinnarlugit periuseqartumik
ingerlatsinerit eqqussimavaat.
Uagut KNI tikkuaratsigit
taakkunuunatut iliunngimmat tikkuaanitsinni aallaaviginngilarput. Uani
assigiinngitsunik oqaaseqarusunnaraluarpoq, kisianni oqaaseqaatigut taakkua
ilassilluarneqareermata Naalakkersuisuminngaaniit aammalu
suleqatigiissitassami tamakku nalilersorneqartussaammata oqaaseqaaterput
innersuussutigiinnassavarput.
Peter Grĝnvold Samuelsen,
Takornariaqarnermut, Angallannermut, Niuernermut Attaveqaateqarnermullu
akissuteqaqqissaaq:
Tassa naatsunnguamik
ujartorneqartoq taanna Atassumiit taavalu Inuit Ataqatigiinninngaaniit
kissaatigineqartoq suleqatigiissitami ANK-66-p peqataanissaa. Taanna
oqaatigissavara siullermik akissuteqarninni puigorakku oqaatigissallugu.
Neriorsuutigisinnaavara taakkua ilaassapput suleqatigiissitami tassani. Allat
kikkut ilaassanersut Naalakkersuisuni isummerfigissavarput. KIIP-kut angallannermi
pisortaqarfik taavalu imarsiornermi ilinniarfik tamakkua qanoq atsigisumik
tassani ilaassasut isummerfigiumaaraparput. Oqaatigiinnarpara ANK-66 tassani
ilaassaaq.
Taava naggasiullugu naatsunnguamik
aamma KNI-mut tunngasoq soorunami tinnersarneqarneq taanna neriuppunga
ajuallaatitut sukasaatitulli tiguneqassasoq taanna Lars Kaalip isummerfigereerpaa.
Aamma pikkorissartitsinerit ilarparujussui uku ulluinnarni piumasaqaataasut
inatsisitigut naammassineqartussat pinngitsoorani. Taavali aamma taassumap
qaavatigut suliffeqarfiit soorlu nuani assersuutigineqartut Royal Arctic
Line-kut akimorlugu iliuuseqarnerat kusanartutut oqaatiginiaannarpara.
Peter Ostermann, Atassutip
oqaaseqartua akissuteqaqqippoq:
Qujanaq suu. Oqaaseq uanga KNI-mut
tunngatillugu qisuariarfigisara tassaavoq oqartoqarmat Siumuminngaaniit soorlu
ilinniartitsisoqanngilaq. Eqqunnginnami taanna oqaaseq. Maani oqaaseq
atortuartagarput aana, pioreersut atorluartigit, umiartornermik
ilinniarfeqarpugut umiartornermut tunngassuteqartunik inuussutissalerinermut
ilinniarfeqarpugut Danmarkimi ilinniarfiit aamma atorsinnaavagut. Periarfissat
taamak pitsaatigisut sooq aamma saniatigut imaattussavagut. Taannaana uanga
qisuariarfigigiga.
Anthon Frederiksen,
Kattusseqatigiit:
Tupinnaqaaq 1996-mili
umiartornermut tunngasut pillugit siunnersuuteqarpunga. Taava suliassaq
imannak sivisutigisumik maannamut ingerlavoq ullumikkut 1998-si aallartippoq
aammalu Naalakkersuisut ilaatigut akissuteqarnermini oqaatigivaa suliassaq suli
ingerlagallassasoq ukioq ataaseq sinnerlugu immaqa.
Ilumut 1996-mili
siunnersuuteqarnera tunngavigalugu annerusumik pimoorussisoqaraluarpat taava
suliassaq immaqa piaarnerusumik naammassineqarsimassagaluarpoq. Qujanaq.
Peter Grĝnvold Samuelsen,
Takornariaqarnermut, Angallannermut, Niuernermut Attaveqaateqarnermullu
akissuteqaqqissaaq:
Isumaqarpunga oqaaseqartoq
kingulleq imatut oqarfigisariaqarlugu, ilumullimi kisimiilluta
oqartussaagaluarutta immaqa taanna ukiup ataatsip ingerlanera atorsimasinnaagaluarparput.
Kisianni uani illuatungeqarpugut suleqagisariaqakkatsinnik, tassalu
Naalagaaffik.
Anders Andreassen, Inatsisartut
siulittaasuat:
Taamaalilluta ullumikkkut
oqaluuserisassaq immikkoortoq 10 tassalu imarsiornermik pissutsit pillugit
nassuiaat naammassivarput.
Oqaluuserisaq naammassivoq.