Oqaluuserisassani immikkoortoq 11-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Anders
Andreassen, Inatsisartut Siulittaasuat:
Siullermik nalunaarutigissavara
Inatsisartunut Naalakkersuisunullu ilaasortaq Konrad Steenholdt akuerineqartoq
Inatsisartuni peqataannginnissaminut febr. arfernanniit 16-annut 1998-imi.
Tamatunnga peqatigitillugu sinniisussaa
Peter Thomsen aggersarneqarpoq aamma qinersinerup misilinneqarnera pillugu
ataatsimiititaliap Peter Thomsen-p Inatsisartuni qinigaasinnaassuseqarnera
akuersissutigaat. Inatsisartunut Siverth K.Heilmann akuerineqarpoq
Inatsisartuni peqataannginnissaminut katersuunnerup aallartinneraniit februarip 10-ngata tungaanut. Tamatumunnga
peqatigitillugu sinniisussaa Daniel Heilmann aggersarneqarpoq. Aamma
qinersinerup misilinneqarnera pillugu ataatsimiititaliap Daniel Heilmann-ip
Inatsisartuni qinigaasinnaassuseqarnera akuersissutigaa.
Siulittaasoqarfiup Inatsisartunut
inassutigissavaa sinniisussatut taaneqartut piffissani pineqartuni
Inatsisartuni ataatsimeeqataassasut. Oqaaseqartoqarusunnerluni? Naamik. Taava
Peter Thomsen aamma Daniel Heilmann qinnuigissavakka Inatsisartuni
issiavissaminnut ingeqqullugit.
Aammalu Inatsisartut ataatsimiinnissaat
ammarneqarmat marlunngormat febr. 3-anni peqataanngitsut tikilluaqqussavakka
tassalu Inatsisartunut ilaasortat Hans Enoksen, Ruth Heilmann, Karl Lyberth,
Otto Steenholdt Finn Karlsen-ilu. Ajoraluartumilli ulloq manna tikillugu
Naimanngitsoq Petersen suli maanga apuussinnaasimanngilaq. Tikilluaritsi.
Taavalu oqaluuserisassat pillugit nassuiaatinnguaq
nalunaarutigilaassavara. Siulittaasoqarfiup matumuuna Inatsisartunut
inassutigissavaa oqaluuserisassani immikkoortoq 8 marlunngornermi febr.
10-nganni 1998 oqaluuserineqartussatut inissisimagaluartoq pingasunngornermut
febr. 18-annut. Februarip qulinganni oqaluuserisassat allat
oqaluuserineqarnissaat pitsaanerusumik piffissaqarfiginissaat pissutigalugu.
Siulittaasoqarfiup siunnersuutigissavaa oqaluuserisassani immikkoortoq 6 febr.
qulinganni siulliullugu oqaluuserineqassasoq. Tamatuma kingornagut immikkoortut
13 - 14-lu.
Pingasunngornermut febr. 11-annut 1998-mi
Siulittaasoqarfiup siunnersuutigissavaa immikkoortup 22-ip Inatsisartuni
oqaluuserineqarnissaa nuunneqassasoq marlunngornermut febr. 17-annut 1998.
Taamatut oqaseqarlunga inassutigissavara
siunnersuutit akuersissutigineqassasut. Akerliusoqarnerluni?
Taamaattoqanngilaq. Taamaalilluni taanna akuersaarneqarpoq.
Taavalu ullumikkut oqaluuserisassat makku
oqaluuserineqassapput: Immikkoortoq 11 Mittarfeqarfiit
Aktieselskab-inngortinneqarnissaat pillugu Inatsisartut peqqussutissaannut
siunnersuutip siullermeerneqarnera. Naligiissitaanermut siunnersuisoqatigiit
pillugit Inatsisartut inatsisissaannut siunnersuutip sillermeerneqarnera.
Kiisalu immikkoortoq 15 radiokkut fjernsynikkullu aallakaatitsisarneq pillugu
Inatsisartut peqqussutaata allanngortinneqarnissaanut Inatsisartut
peqqussutissaanut siunnersuutip siullermeerneqarnera.
Peter Grĝnvold Samuelsen,
Takornariaqarnermut, Angallannermut, Niuernermut Attaveqaatinullu
Naalakkersuisoq, Siumut:
Nuannaarutigaara Naalakkersuisut
sinnerlugit Mittarfeqarfiit A/S pillugit Inatsisartut peqqussutissaattut
siunnersuut saqqummiussinnaagakku.
Mittarfeqarfiit aktiaateqarluni
ingerlatseqatigiiffinngortinneqarnerat Naalakkersuisut
nalinginnaasumik anguniagaannut, tassalu suliffeqarfinnut atugassarititaasut,
unammillersinnaanermut ineriartornissamullu periarfissaannut aalajangiisuusut
pitsanngorsarneqarnissaannik atatillugu isigineqassaaq. Naalakkersuisut
niuerneq tunngavigalugu ineriartorneq ingerlanniarpaat, tamannalu
naapertorlugu inuutissarsiornikkut sinaakkutitut atugassarisaasut
naleqqussarneqarnissaat isumaginiarneqarluni. Taamaaliornikkut
isertitaqarnerulernissaq suliffissaqartitsinerulernissarlu siunertaralugit
aningaasaqarniarnikkut toqqammavissaq pilersinneqarsinnaavoq.
Mittarfeqarfiit A/S-imik pilersitsinikkut
suliffeqarfiup niuerneq tunngavigalugu ingerlataqarfiisa, tassa niuertarfinnik,
neriniartarfinnik akunnittarfinnillu ingerlatsinerata, annertusineqarsinnaanerannut
periarfissat qularnaarneqarsinnaassapput. Peqatigisaanik namminersortunik
unammilleqateqarsinnaaneq paasiuminartumik unammilleqatigiinnermillu
equtitsiviunngitsumik atugaqarfiussaaq, 1997-imi Inatsisartut Upernaakkut
ataatsimiinneranni Inatsisartut Aningaasaqarnermut Ataatsimiititaliaanit
kaammattuutigineqartutut.
Mittarfeqarfiit aktiaateqarluni
ingerlatseqatigiiffittut suli inatsisit malillugit mittarfinnik
piler-sitsinermut, ingerlatsinermut aserfallatsaaliinermullu akisussaassapput,
ingerlatseqatigiiffinngortitsinikkulli ilaatigut ullumikkut pisortat
sinnerlugit oqartussaasutut ingerlatsisutullu suliassat akulersuunneqarnerisa
unitsinneqarnissaat periarfissaqalissaaq, taamalu nunatsinni mittarfeqarnermik
isumaginninneq nunat tamalaat akornanni ineriartornermut
naleqqussarneqassalluni.
Mittarfeqarfiit aktiaateqarluni
ingerlatseqatigiiffinngortinneqarneratigut suliffeqarfiup suliarisartagaani
aningaasartuuteqariaaseq ersarissisissavarput. Suliat taakku pingasunngorlugit
avissinnaavagut:
inuiaqatigiinnit suliassiissutigineqartut,
assersuutigalugu tassaasut allakkerinermi ilanngaaserinermilu suliassat,
innaallagissamillu pilersuineq
suliat niuerneq tunngavigalugu
ingerlanneqartut, assersuutigalugu tassaasut niuertarfinnik, neriniartarfinnik
akunnittarfinnillu ingerlatsinerit
kiisalu suliat
akuersissuteqarfigineqarnermik tunngaveqartut, assersuutigalugu tassaasut timmisartunik,
ilaasuinik usiinillu isumaginninneq.
Aningaasartuuteqariaatsip
ersarissarneratigut Mittarfeqarfiit suliaqarfiit isertitaqarfiusartut
ineriartortinnissaannut annerusumik periarfissaqalissapput, peqatigisaanillu
qulakkeerneqarluni tapiissutaasartut atorlugit namminersortunik
naligiinngitsumik unammilleqatigiittoqarnissaa pinngitsoorneqassalluni.
Niuerneq tunngavigalugu unammilleqatigiiffiusumik inuussutissarsiummik
ingerlataqarfiusumi siunissami ingerlatsisoqassappat pissusissamisuussaaq
aningaasatigut sukangasumik aqutsisoqarnissaa kiisalu piviusorsiortumik
aserfallatsaaliinissamut aningaasaliissuteqaqqittarnissanullu
pilersaarusiortoqartarnissaa, siunissaq isigalugu sinneqartooruteqarfiusumik
angusaqartoqartassappat. Taamaaliornikkut Naalakkersuisut kissaatigaat
qularnaarneqassasoq, suleriaaseqarneq taamaattoq Mittarfeqarfiit A/S-imut inuiaqatigiit
suliassiissutaanut tuniluunnissaa, taamaalilluni aningaasartuutikillisaanerup
nukittorsarneratigut atuisut ilaatigut ulluinnarni sullissinernut ilaatigullu
nunap attaveqarnermut pilersuinermullu atortuinik atuinermut
akiliinikinnerulernissaat qularnaarniarlugu. Taamaaliornikkut inuuniarnermi
aningaasartuutit annikillisinnaassapput, tamannalu nunatsinni inuuniarnermi
atukkanut nalinginnaasunut iluaqutaassaaq.
Taamatut oqaaseqarlunga Mittarfeqarfiit
A/S pillugit Inatsisartut peqqussutissatut Naalakkersuisut siunnersuutaat
Inatsisartunut suliassanngortippara.
Lars Karl Jensen, Siumup oqaseqartua:
Mittarfeqarfiit A/S pillugit Inarsisartut peqqussutissaattut siunnersuut, saqqummiunneqartoq Siumumiit imatut oqaaseqarfigissavarput.
Siumumiit maluginiarparput, maannakkut suliffeqarfinnik namminersortitamik Mittarfeqarfinnik taaneqartartup inuiaqatigiinni piumasaqaataasunik kiffartuussinera allanngortippallaarnagu Mittarfeqarfiit A/S-inngortinnissaannik Naalakkersuisut piareersaasiorsimasut.
Tamannalu Kalaallit nunatsinni suliffeqarfiit A/S-inngortinneqarneranni suliassaqarfiit sorliit kikkunnik ingerlanneqarnissaannut takussuissat misissuataarlugit, Siumut isumaqarpoq, aktiaateqarluni ingerlatseqatigiiffinngortitsinermi pingaartillugit immikkoortissimasariaqakkat - inatsisartutigoortumik naalakkersuinikkut aalajangiiffigineqartartussaasut malillugit - pitsaasumik pissusissamisoortumillu aaqqiiffigineqarsimasut.
Naalakkersuisut saqqummiussinerminni - aktiaateqarluni ingerlatseqatigiiffinngortitsinermi suliffeqarfiup suliarisartagaani aningaasartuuteqariaatsip ersarissarnissaanik tassalu suliassaqarfiit pingasut avissaartinneqarnissaanik oqarnerat - Siumumit tunngaviatigut taperserparput.
Selskabenimi pilersitsinermi Inatsisartut siunertatut anguniagaraat ingerlatsinermi aningaasatigut inuiaqatigiinnut oqilisaassinissat.
Siumumit oqaatigissavarput ilanngullugu pingaartikkatsigu niuernermi akilersinnasumik ingerlatsinissaq unammilleqatigiinnerlu periarfissaqartinneqassasut, taamannallu aallaavigineqartillugu eqqumaffigisariaqarpoq, suliffeqarfiit pisortaniit tapiiffigineqarlutik ingerlatsiviusut pisortaniit aningaasaliiffigineqarsinnaaneq isumalluusiullugu, namminersorlutik ingerlatsiniartunut naligiinngitsunik unammillertuunnginnissaat.
Kiisalu pingaartipparput Naalakkersuisut suliassarissagaat, ingerlatsiviit pisortaniit aningaasaliiffigineqartut inuiaqatigiinnut kiffartuussinermi suliassaqarfiisa attuumassuteqarfigisaat ingerlatsiviit pisussaaffiisut ersarissumik inissisimassasut, tamakkua unammillerniartunit paasiuminartuunissaat siunertaralugu.
Taamatullu oqarnerput tunngavigalugu Naalakkersuisunut piumasarissavarput, Mittarfeqarfiit aktiaateqarluni ingerlatsivinngortinneranni, mittarfeqarfiit iluanni namminersortunngorsaanermi periarfissiinissamut aaqqiivigineqarsimasussatut Siumup tungaaniit pingaartillugit isumaqarfigisagut misissuiffigineqassasut tassaasut;
Kangerlussuarmi, Narsarsuarmilu mittarfeqarfiit maannakkut inuiaqatigiinni aaqqissuussaanikkut inissisimanerisa namminersorlutik suliffeqarfinnik ingerlatsivigineqarnissaannut i-nooriaatsimut sunniuteqartussanik inissisimanerisa ersarissarlugit misissornissaat assersuutigalugu soorlu,
Narsarsuup Kangerlussuullu siunissami inuiaqatigiinni qanoq inissisimanissaat,
Najugaqarfiit illuliorfiusinnaanerat, meeqqanut paaqqinnittarfiit, atuarfeqarneq, peqqinnissakkut ingerlatsineq aammalu allatigut inooriaatsimut attuumassuteqartunut periarfissaasut sutigut naleqquttunngorsassanersut,
Siumut isumaqarpoq tamakkua ataatsimiititaliani aammalu Naalakkersuisoqarfinni susassaqartuni paasiniaqqaarnissaat pingaaruteqartoq, ilisimasatsitummi aktiaateqarluni ingerlatsiffinni imaluunniit namminersorluni ingerlatsisuni niuernikkut akilersinnaasumik ingerlatsinissaq avaqqunneqarsinnaanngimmat.
Siumumi isumaqarpugut Mittarfeqarfiit A/S-inngortineqarneranni aallaqqaataaniilli ingerlatsinermi aningaasaqarnikkut iluaqutigisartakkat piiarneqassappata, tamanna inuiaqatigiinni ingerlatsinikkut akitsorsaataassasoq, kiissalu Siumumiit aarleqqutigaarput, Mittarfeqarfiit iluanni namminersortunut tunniunneqartussatut isummersorfigineqartut ilaat imminnut napatissinnaanngitsutut inissisimasut paasineqarpata tamanna inuiaqatigiinnut akisunerungaartumik aaqqiiniarnikkut ingerlanneqartariaqalissasoq. Taamaattumik aallaqqaataaniit silatusaarluta inuiaqatigiinnut pitsaanerusussaq akikinnerusussarlu toqqartariaqarparput.
Taamatulli oqareeraluarluta illoqarfiit mittarfeqarfiusut nutaamillu mittarfeqalertussat eqqarsaatigalugit Siumut isumaqarpoq, siornatigut suliffeqarfinnik namminersortitanik aktieselskab-inngortitsisarnermi Inatsisartuni periusisusarsimasut ingerlateqqittariaqartut.
Tassalu ingerlatseqatigiiffinngortinneqartup aningaasatigut imminut napatissinnaanera isumannaarlugu qulakkeerneqassasoq, tamannalu iluatsereerpat, Inatsisartut inimi maani naliliiffigisinnaavaat, ingerlatsiviup pineqartup iluani ingerlatat sutigut qanorlu annertutigisumik namminersortunut attartortinneqartarsinnaanersut (periuseq ulluinnarni franchising-imik taaneqartartoq najoqqutaralugu). Soorlumi aamma maannakkut KNI-mi aaqqissuusseqqinnermi tamanna aalajangiunneqarsimasoq - tassalu ingerlatat tutsuiginassusii aaqqeqqaarlugit - namminersortunit ingerlanneqarsinnaasut kikkunnilluunniit tiguneqarsinnaanerat siunertarineqassammat.
Taamatut oqaaseqarluta Mittarfeqarfiit A/S pillugit Inatsisartut peqqussutissaattut Naalakkersuisut saqqummiussaat A/S-millu pilersitsinissamik atuutilerfissatut innersuussutaasoq ilanngullugu Siumut akuerseqataaniarpoq.
Anders Nielson, Atassutip oqaaseqartia:
Mittarfeqarfiit A/S aktiaateqarluni ingerlatseqatigiiffinngortinniarneqarnerannik siunnersuut Atassut-ip tapersersorpaa. Kissaataavoq suliffeqarfiit namminersortunik ingerlanneqartut Namminersornerusuniit avissaartillugit landskassemut atajunnaarsinneqassasut.
Taama oqaqqaariarluta siunnersuummut saqqummiunneqartumut arlalinnik siunnersuutissaqarpugut oqaaseqaatissaqarlutalu.
Inuussutissarsiorniarluni ingerlatsinermi iseritaqarfiusarput nioqqutissanik tunisaqarneq allatigullu kiffartuussinerit
Mittarfeqarfiit aktiaatileqatigiiffittut landskassemiit suli tapiiffigineqartarnissaat tunngaviatigut akerlerigaluarparput. Tapiissuteqartarnissaq pisariaqarsimassappat tamanna sullissinissamut isumaqateqarnikkut tapiissutaasassapput.
Mittarfeqarfiit kiffartuussaat nalunanngeqaat, soorlu Tele Greenland, Nukissiorfiit, Royal Arctic Line allarpassuillu taamaattut.
Tassalu Mittarfiit kiffartuussinerat sulissutaasa akiligassaraat, taakkuupput isumaqatigiissuteqarfiginiassaasut, taakkulu kiffartuunneqarnertik naammaginarnersoq nammineq naliligassaraat. Mittarfeqarfiit isertitsivigisnnaavaat timmisartut nunninneranni, sulissunneqarneranni tinginermilu akileraarutaat - tassaappullu Grĝnlandsfly timmisartortitseqatigiillu allat.
Atassummiit isumaqarpugut equngasoqartoq, tassa kiffartuussat akiliisanngimmata atortuutinut - aningaasartuutillu landskassemit akilerneqaannartarlutik.
Atassummiit nalunngilarput heliportit mittarfiillu atorneqarpianngitsut landskassemiit tapiiffigisariqartassasut. Tapiissutissalli naatsorsuutit saqqummiunneqareersimasut tunngavigalugit angissusilerneqartariaqarput, soorlu KNI, Royal Arctic Line, Royal Greenland aammalu Grĝnlandsfly taama pineqarsimasut.
Aamma Atassummiit aalajangiusimavarput Mitarfeqarfiit aktiaatileqatigiiffinngortinnerat ingerlanneqassasoq inuussutissarsiorneq pillugu aningaasanik ingerlatsinissamik inatsit 1998-imut tunngasoq tunngavigilluarlugu.
Inatsisartut 1998-imut aningaasanut inatsisaattut siunnersuummi konto 10.13 (bind 2 qupp. 32) imatut allassimasoqarpoq:
Naalakkersuinikkut anguniakkat.
Inuussutissarsiutinik ingerlatsineq pineqartoq isumamineertumik unammilleqatigiinnikkullu aqunneqarsinnaappat aammalu sulassat pinaarutillit inuiaqatigiinnut tunngasut ingerlanneqarnerat naammassineqarsinnaappat NamminersornerullutikOqartussat inuussutissarsioernermik ingerlatsissanngillat.
Tamanna isumaqarpoq Mittarfeqarfiit Namminersornerusunit tapiiffigineqartutut suliffeqarfittut imaluunniit kingusinnerusukkut aktiaatileqatigiiffittut ingerlalernermigut aningaasarsiutaasinnaasunik ingerlatsissanngitsoq.
Mittarfeqarfiit ingerlatassarinngisaannik siunnersuummi taaneqarsimapput pisiniarfiit, neriniartarfiit hotelinillu ingerlatsineq, naluneqanngilarli iluanaarniarfiusinnaasunik allanittaaq ingerlataqariartuinnartut, soorlu qatserinermik annanniutinik tuniniaallutillu piareersaasarnerit.
Taaneqartut
kingulliit politikkikkut anguniakkatsinnut akerliuinnanngillat. Aammali
Mittarfeqarfiit ingerlanneqarnissaannik siunertanut akerliupput, soorlu
aningaasanut inatsimmi konto 70.11.02 Grĝnlands Lufthavnsvĉsen -
Mittarfeqarfiit (bind 4 qupp. 844)
-mi imatut allassimasoqarmat.
Aningaasaliissutit siunertaat
Namminersornerullutik Oqartussat
mittarfeqarfii, heliportii, helistoppiilu ingerlatissallugit. Taakku saniatigut
Kangerlussuarmi Narsarsuarmilu mittarfeqarfiit ingerlanneqarnerinut taakkunani
akunnittarfiit niuertarfiillu ingerlanneqarnerat aamma ilaapput. Taamatuttaaq
Thule Air Base-mi speditĝreqarneq aamma ilaavoq.
Siunnersuut saqqummiunneqartoq malillugu
Mittarfeqarfiit A/S tigusassarilissavaat suliffigisamik imminut tunngasuinnaat
illutaat, pequtaat atortorissaarutaallu, allallu ingerlatsinissaannut
tunngasut.
Kangerlussuarmut Narsarsuarmullu
tunngatillugu naatsorsuutigineqarpoq suut tamangajaasa tigussagaat, taamaallaat
aqqusernit (ikaartarfik ilanngullugu) umiarsualiveqarfik, aqqusernit
qaammaqqutaat kiisalu illuutit soorlu innuttaasut illui, oqaluffiit
katersugaasiviillu pinnagit.
Aammali - pingaartumik Kangerlussuarmi -
illoqarpoq Mittarfeqarnermik ingerlatsiviup atunngisaanik, soorlu illut
inunnut inissiat, atuarfik bĝrnehavelu, kiisalu illut allanut attartortitat.
Nalunarpoq tamakku Mittarfeqarfiit A/S-imut tunniunneqassanersut.
Atassut isumaqarpoq Mittarfeqarfinnut tunniunneqartariaqartut
tassatuaassasut mittarfeqarfiup ingerlanneqarnissaanut pisariaqartut kisimik.
Aamma SULISA A/S-ip illut Kangerlussuarmi
atorneqanngitsut taakku artorfissaqartilluarsinnaassavai, Kangerlussuup
nunarsuarmi timmisartornikkut assartuinermi eqiteruffittut pilersinneqarsinnaaneranut
atatillugu. Tamanna siusinnerusukkut siunnersuutigineqarsimavoq inuussutissarsiornermik
ineriartortitsinissaq eqqarsaatigalugu.
Kangerlussuaq takornariaqarnissamut aamma
periarfissaqarluarpoq, taamannalu ingerlanneqarlualersinnaavoq Greenland
Tourism aqqutigalugu akikitsumik attartortitsinikkut aallartitsiniartunullu
tapissuteqarnikkut.
Kiisalu taasariaqarpoq nunarsuarmi
ataatsimeersuartarfissatut Kangerlussuaq naleqquttunngorsarneqarsinnaanersoq.
Ataatsimeersuarfiusinnasut pioreerput. Avatangiiseq kusanaqisoq. Kangerlussuaq
silaannakkut sumiilluunniit tikitsiriaannaavoq. SULISA A/S-mut suliassaqqeqaaq. Kangerlussuaq
ingerlatiinnarniarlugu aalajangissagutta taava ineriartortinneqarsinnaasut
misissoqqissaartariaqarput, suliniaqatigiinnit naleqquttunit
tapersersortariaqartunit mittarfeqarfinnik ingerlatsinermit pinnani.
Atassummiit makku
siunnersuutigiumavagut:
Mittarfeqarfiit
aktiaalileqatigiiffinngornissaat 1. januar 199-imut kinguartinneqassasoq.
Tamatuma tungaanut suliassat
timmisartoqarfeqarnermut tunngassuteqanngitsut immikkoortiterneqassapput!
Suliassat ikkoortitat ima
inissinniarneqarsinnaapput:
Illut ullumi pigisat,
timmisartortitsinermulli atorfissaqanngitsut Naminersornerusunut tunniunneqassapput
INI A/S-imiit aqunneqalissallutik.
SULISA A/S-imut, Greenland Tourism-imut
aammalu inuussutissarsiornermik ingerlataqartunut allanut
nalunaarutigineqassaaq Kangerlussuarmi illoqartoq atorneqanngitsunik.
Hotelit pisiniarfiillu Kangerlussuarmi Narsarsuarmilu
ittut Namminersornerusut pigisarilissavaat, attartortinneqarsinnaappullu -
soorlu Mittarfeqarfinnut, pisariaqassappallu inuiaqatigiinnut
tunngassuteqartunut, allanik soqutiginnittoqanngippat suliassamik
tigusisinnaasumik.
Pituffimmi nassiussanik aaqqissuillunilu
ingerlatsisarneq namminersortunut ingerlatassanngortinneqarsinnaavoq.
Ingerlatat allat, soorlu qatserinermut
annaassiniarnermullu atortut namminersortunut ingerlatassanngortinniarneqassapput.
Taamatut ingerlatsiniarluni
nalunaaruteqarnikkut avammut uppernarsassavarput inuiaqatigiinni inuit
ataatsiakkaat suliassanik assigiinngitsunik ingerlatsilernissaat pimoorullugu
anguniaripput.
Pisariaqavissorigutsigu Atassummiit
siunnersuutigaarput aappassaaneerlugu oqaluuserineqarnissaa 1998-mi ukiakkut
ataatsimiinnissamut kinguartinneqassasoq.
Piffissamilu tassani siunnersuutit
saqqummiunneqartut naliliiffigineqarlutik.
Josef Motzfeldt, Inuit Ataqatigiit
oqaaseqartuat:
Inuiattut oqaluttuarisaanitsinni
1980-90-kkut ilaatigut eqqaamaneqaatigisussaavaat inuiaqatigiinni
ingerlassiviit pingaaruteqartut pisortanit pigineqartut
aktieselskabinngortiterneqarfiattut.
Royal Greenland, KNI, Royal Arctic Line,
Tele, INI oqaluuserisassamilu matumani pineqartoq tullinnguutinniarneqartoq
tassa Mittarfeqarfiit.
Naak aktieselskabinngortiterineq
aallarteqqaarmat piginneqatigiiffinnik namminersortunngorsaanermik ilaatigut
isumaqartinneqaraluartoq, siuliani taaneqartut tamarmik ilisarnaatigaat
tamakkiisumik pisortanit, tassalu Namminersornerulluni Oqartussanit,
pigineqarnertik.
Taamaakkaluartoq innuttaasumit
inatsisartunillu isigalugu aktieselskabinngortitsinermi ullormiit ullormut
malunniuttartoq tassa ingerlatsiviup pineqartup imaasiallaannaq innuttaasunit,
allaat inatsisartut ombudsmandiannit, anguneqarsinnaajunnaartarnera,
inatsisinik inuiaqatigiinnut atuuttunik piumanngikkuni
malinnittariaaruttarnera, soorlu suliarinnittussarsiuussisarnermi inatsit
aammalu atorfinitsitsinermi atugassarititaasunik akissarsiaqartitsinermilu
aalajangersakkanik inuiaqatigiinnut atuuttunik atuisariaaruttarneq.
Ingerlatsiviup ulluinnarni qullersaannut
aktieselskabinngorneq taamaasilluni nalinginnaasumik maluk-pingasoriaammik
akissarsiaqarnerulernermik, taakkununnga qujanaqisumik, kinguneqarajuttarpoq.
Taama periuseqarnermut pikkorissunik pisortaqartariaqarneq taakkulu
pisinnaasaannnut naleqquttumik akissarsiaqartitsisariaqarneq
utoqqatsissutigineqartarpoq.
Soorunami sutigut tamatigut pisortat
aalajangersagaannik malittariaqarneq pisortaqarfinnullu pituttorsimasunut
misigisimasinnaaneq, eqaatsumik pinasuartumillu ingerlatsiniarnermi sulifeqarfinnut
aporfiusarmata tamanna miserratigineqartariaqanngilaq.
Taamaattumik aktieselskabenngortiterinerup
annaffissatuatut isigineqaneranut illua'tungiliullugu pisortaqarfinni
ingerlatseriaaseq qivianngitsoortariaqanngikkipput Inuit Ataqatigiit
isumaqarput. Innuttaasut nalinginnaasumik
sunniuteqarsinnaajunnaarsitaasarnerannut taarsiullugu Namminersornerulluni
Oqartussat allaffeqarfiata ingerlatitaanerata ittangavallaalersimasinnaanera
arajutsinaveersaartariaqarpoq. 1979-miimmi periutsit naalagaaffiup taamanikkut
ingerlatsinermini atorsimasai suli allanngortingaarnagit kiisa ukiut
20-nngulerput.
Taamaattumik ukiarmi Namminersornerulluni
Oqartussat allaffeqarfianni sulisut katitigaanerisa oqaluuserinerani,
pisariillisaanermik siunnerfeqarluni pissutsinik allaffissornermi atuuttunik
misissuisoqarluni nutarterisoqartariaqarneranik oqaatsivut naalakkersuisunut
eqqaasitsissutigeqqikkusuppagut. Qitiusumimmi allaffissornerup inuiaqatigiinni
pissutsinut atuuttunut naleqqukkunnaarsimanera eqqarsarnartoqarteqaarput.
Soorunami Mittarfeqarfiit
aktieselskabinngortittariaqarnerat tusaruminakannersumik tunngavissarsiortariaqarmat,
naalakkersuisunut ilaasortap saqqummiinermini Mittarfeqarfiit A/S-nngorpata
aningaasartuutikinnerulernissaq taamaasillunilu nunatsinni inuuniarmermi
nalinginnaasunut iluaqutaassasoq qujasaatigimmagu maluginianngitsuunngilarput.
Inatsisartuni oqaatsit taama tusaruminarsakkat
ukiut ingerlanerini uppernarsiveqqaarnagit isummernerni
tunngavigineqartarsimanerat arlalitsigut unnersiutissaanngitsumik
misilittagaqarfigilersimavagut.
Taamaattumik Mittarfeqarfiit
A/S-inngortinnerisigut sutigut ingerlatsinermi akikillisaataasinnaasut suullu
innuttaasunut akikinnerulissangatinneqarnersut naalakkersuisunut ilaasortamik
itisilerneqarnissaat uppernarsarneqarnissaallu pisariaqartipparput.
Ilaatigummi A/S-inngortitsisarnermi taama qujasaataasartut
kiffartuussinerup imaluunniit pisiassat ajornerulernerisigut amerlarnertigut
timitalerneqartarsimarnerat inatsisartuniinnaanngitsoq aammali innuttaasunit
arajutsisimaneqanngilaq.
Oqaannarluni takussutissaqanngitsunik
akikinnerulersitsinissanik ilimasaarinerit naammanngillat. Mittarfeqarfiit
ulluinnarni akisussaasui ukiunut tulliuttunut pilersaarutinik anguniakkanik
peqareersimasariaqarput.
Ilumut eqaannerusumik
ingerlatsisoqalernissaanut suut takorloorneqarnersut aningaasatigullu ingerlatsinermi
ukuni tullerni pingasuniluunniit missinersuinertigut takussutissat
peqqussutissatut siunnersuutip aappassaaneerneqannginnerani inatsisartut
ataatsimiititaanniit susassaqartunit naliliiffigineqartariaqartut
susassaqartullu allat tusarniaavigisariaqartut Inuit Ataqatigiit kaammattuutigaat.
Ataatsimiititaliat susassaqartutut
oqaatigineqarsinnaasut arlaqarput, soorlu niuernermut ataatsimiititaliap
niuertarfinnut, akunnittarfinnut neriniartarfinnullu tunngasortai
angallannermullu ataatsimiititaliap timmisartortitseqatigiinnut samminerusut
isumagisinnaavaat.
Qulaajaavigisariaqakkat qiterisariaqarpaat
Mittarfeqarfiit ingerlataat suut napaniarnerminni tunngavissarineraat
aalajangersaavigissallugu.Ullumikkut mittarfinni pingaarnermi ilaasunut aammalu
milernermi akitsuutit, orsussaarniarneq timmisartunullu qangatsiisarfinnik
attartortitsinerit aningaasarsiutiginerisa saniatigut ileqquliunneqaannartumik
akunnittarfiuteqarneq niuertarfinnik ingerlatsineq, neriniartarfeqarneq,
annaassiniarnermut qatserinermilu atortunik nioqquteqarnerit Mittarfeqarfinnit
ingerlanneqarput.
Peqqussutissatullu siunnersuut
saqqummiunneqarnermisut akuerineqasssaguni, siuliani taagukkavut maaginagit
Mittarfeqarfiit killeqanngiusartumik ingerlatsisinnaanngortinniarneqarput.
Tamanna innuttaasut ataasiakkaarlutik peqatigiillutilluunniit
tamalikaarnerusumik inuussutissarsiutitigut ingerlataqalersinnaanerannut
akornusiiginnarani, aammali nunatta ingerlanneqarnerata tatigineqarneranut
ilungersunartorsiorfiusinnaasoq Inuit Ataqatigiit annilaangatigaarput.
Namminersornerulluni Oqartussat kisimik
pinnatik aammali allat aningaasaleerusuttut peqataaqqullugit
oqaluffigiitigalugit A/S-nngortittsineq iluatsillugu killeqanngiusartumik,
innuttaasunit imaasiallaannaq akuleruffigineqarsinnaajunnaartumik
ammaassininiarneq aningaasaleerusunnermik kajumilersitsinavianngilaq.
Tamatumanilu tusarniaavigineqartariaqartut
tassaapput nunatsinni takornariaqarnermik ingerlatsiniarlutik aallartisartut,
akunnittarfiutillit, kiffartuussiviutillit assartuinernillu ingerlatsisut
suleqatigiiffii, Greenland Tourism aammalu nunatsinni Atuisut pisisartullu
Siunnersuisoqatigiivi. Taakkuli kisiisa pinnagit Kangerlussuarmi Borgerrċdi
aammalu Narsarsuarmi Nunaqarfinni Aqutsisut tusarniaavigineqarnissaat Inuit
Ataqatigiit pingaartutut naammassineqassasoq kaammattuutigaat.
Inuit Ataqatigiinnimi innuttaaqatitsinnit
ilisimatinneqartarnivut najoqqutaralugit nalunngilarput assersuutigalugu
nunatsinni takornariaqarnermik ingerlataqareersut Kangerlussuarmi Mittarfeqarfinnit
ingerlatat ilaannik ingerlatsilersinnaaneq noqqaassutaasarsimagaluartoq
itigartinneqartuartorli. A/S-inngortinneqassappata tamanna pitinnagu tamakku
aaqqereertariaqarput, oqareernitsitummi A/S-nngortitsereernerup kingorna,
taama pisoqassappat, pissutsit tamakku tamatsinnit
pallinneqarsinnaajunnaassapput.
Mittarfeqarfiit aningaasatigut
missingersuusiaasa eqaannerusumillu ingerlatsisinnaalernermut
A/S-inngortitsinerup kingunerisassaasut takorluugaasa saniatigut, inatsisartut
aalajangivitsinnatik ilisimasariaqagaat arlaqaqaat.
Soorlu sulisutigut ineriartortitsineq
qanoq pilersaarutaava? A/S-inngortitsisarnerni sulisussanik amerlanaarlugit
avataaniit tikisitsisarnertigut misilittagaareersut
ingerlateqqittariaqanngimmata maani qassiiuliuutaasariaqarunanngilaq.
Nunami maani nammineq aningaasatigut
ilinniarsimanikkullu pisinnaasavut annertunerpaamik toqqammavigalugit
ingerlatsisoqartariaqarneranik isuma Inuit Ataqatigiit aalajangiusimavaat.
Taamaattumik Mittarfeqarfiit A/S-nngortinneqassappata ullumikkornit
annertunerusumik maani nunaqavissunik sulisoqarnermik pisortaqarnermillu
pimaffigisariaqarput.
Suluusalinnut mittarfissat
arfineq-marluusut ukiualunnguit qaangiuppata tamakkerlutik atorneqalersussaapput.
Taakkunani qanoq pisortalersorlunilu sulisoqarnissaq naalakkersuisut
Mittarfeqarfiit aqqutigalugit pilersaaruteqarfigaat? Timmisartut
qangattalernerini milernerinilu nakkutilliisunik ilinniartitsineq ukiut
marluk-pingasut matuma siorna Narsarsuarmi aallartinneqartoq ilisimavarput.
Taamaaliornermi suluusalinnut mittarfiliarineqartuni suliffissatsiarsuit
nutaaviit nunaqavissunik inuttalersornissaat anguniarneqarpoq.
Ilinniarfik pineqartoq
aqqaneq-marlukkaarlugit ilinniartitsiviusoq piffissami kingullermi Kangerlussuarmut
nuunneqarsimasoq paasivarput. Ajuusaarnarnerusorli tassa ukiuni
pingasunngulersuni nunaqavissut amerlanerpaami marluinnaat mitsitsisartutut
ilinniarnerminnik naammassinnissimanerat. Ullumikkullu nunatta
avataaneersuinnaat ilinniartorineqarput.
Mittarfeqarfiit A/S-inngortinneqassappata
tamanna pitinnagu Kangerlussuup ullumikkumut Inissisimanera
isumerfigineqartariaqarpoq. Ullumikkumut Kangerlussuaq nunatta kommuninut
aggorneqarsimanerata avataaniittuarsinnarpoq. Tamannalu utoqqatsissusiullugu akitsuuteqarfiunngitsumik
ingerlatsiviuvoq. Kangerlussuarmilu nunaqartut borgerrċdeqaraluartut taakku
annertunerusumik suli isumasiorneqaratillu oqartussaaffeqanngillat.
Taama immikkut aaqqissuussisimaneq tamaanga
killeqartariaqarpoq. Kangerlussuaq nunatsinnut utertinneqareerpoq. Mittarfiillu
arlaqartut nunanut allanut aallartarfiullutillu tikittarfiusut assigiimmik
atugassaqarfiullutik ineriartortinnissaat mittarfinni assigiinngitsuni
sulisunut unneqqarissaarnerussasoq Inuit Ataqatigiit isumaqarput.
Tamakku taagukkavut innersuussutigalugit
ilumut Mittarfeqarfiit aktieselskabenngortinneqassanersut
isummerfiginissaannut inatsisartut naammattumik toqqammavissaqanngitsut Inuit
Ataqatigiit isumaqarpugut. Aammami inatsisartut ombudsmandiata susassaqarfiinik
annertunerusunngortitsiniarluni inatsimmik allannguiniarneq, ukiarmili
oqaluuserineqartussaagaluartoq, naammassineqaqaartariaqartoq isumaqarpugut.
Taamaattumik ataatsimiinnerup matuma
aallartinnerani oqaluuserisassat oqaaseqarfigineranni oqareernitsitut
naalakkersuisut peqqussutissatut sinnersuutaata maanna oqaluuserisatta aappassaaneerneqarnissaa
upernaakkut ataatsimiinnissamut kinguartinneqassasoq siunnersuutigaarput.
Bjarne Kreutzmann, Akulliit Partiiata
oqaaseqartua:
Ingerlatsiviit pisortanit tigummineqartut
suliat ingerlataat Namminersortunngorsaanissamut naleqquppata
namminersortunngorsarneqarnissaannut Akulliit Partiianiit tunngaviatigut isumaqatigaarput.
Mittarfeqarfinnut tunngatillugu Akulliit
Partiianiit inassutigissavara, siunissaq ungasinnerusoq eqqarsaatigalgu
periarfissiisoqassasoq, suliat Mittarfeqarfiit kalaallit inuiaqatigiit
sinnerlugit ullumikkut ingerlassaasa tigumminnittussarsiorlugit avammut
neqeroorutigineqarsinnaanissaannut, taamaanngippat isumaga naapertorlug
Mittarfeqarfiit Aktiaateqarluni ingerlatseqatigiiffinngortinneqarnissaat
isumaqassanngimmat.
Tassunga tunngatillugu Akulliit
Partiiannit paaserusuppara sulianut akuersissutigiffigineqarnermik tunngaveqartunut
atugassarititaanut suunersut. Soqutiginnittorlu avataaneersoq
Mittarfeqarfiit-nut unammillertitut isumaqatigiissuteqarnikkut
sullissinissamut akuerineqassappat Mittarfeqarfiit-tulli, atugassaqartitaanissaanut
periarfissat qanoq annertutiginersut. Soqutiginnittut avataaneersoq, siunissaq
ungasinnerusoq eqqarsaatigalugu Mittarfeqarfiit naligalugit
isumaqatigiissuteqarnikkut sullissinissamut akuerineqarsinnaappat, taava AP-nit
akuersaarsinnaavunga Mittarfeqarfiit aktie-teqarluni ingerlatseqatigiiffinngornissaanut.
Taamak naatsumik oqaaseqarlunga
inassutigissavara siunnersuut aappassaaneerneqannginnermini
ataatsimiititaliamut attuumassuteqartunut ingerlatinneqassasoq.
Anthon Frederiksen, Kattusseqatigiit:
Mittarfeqarfiit aktie-teqarluni ingerlatseqatigiiffinngortinnissaanut
Kattusseqattigiit-niit tunngaviatigut maannakkut pissutsit
taamaakkarlartillugit isumaqataanngilanga.
Makku pissutigalugit. Mittarfeqarfissuit
sanaartorneqartut suli inerneqanngillat. Suliarineqareerlutit naammassineqarpata
atagu takutigu qanoq ingerlalluartigissanersut. Taamanikkut inuiaqatigiinnut
immikkut aningaasartuutaanngitsumik ingerlanneqarsinnaappata, nalilersorneqarlik
qanoq kikkunnillu ingerlanneqarsinnaanerat. Nunani allani misilittakkat qanoq
ippat, paasiniarneqarsimappaat. Soorlu assersuutigalugu Danmark-imi
mittarfeqarfiit ilaat kommune-ni ingerlanneqarput, nunatsinni aamma
mittarfeqarfiit ilaat kommune-nit ingerlanneqarsinnaappaat? Apeequtilli allat
soqutiginarsinnaasut suuppat?
Maannamummi inuiaqatigiit
pigisaannik oqaatigineqartartuni suliffeqarfissuarni aktie-teqarluni
piginneqatigiiffinngortitsinerup misilittakkat ilaatigut nunatta karsianut
million-erpassuarnik akeqarput. Assersuutigalugu KNI, Royal Greenland ilaallu
ilanngullugit. Piginnittut sinniisaanniit, tassalu Inatsisartuniit,
oqaasissaqarfigineerullugit inissinneqartarnerat tamatigut akuerineqarsinnaanngimmat.
Massa suliffeqarfissuit pineqartut amigartuullaraangata nunatta karsianiit
soorunami unittuunnginnissaat anguniarlugu aningaasaliiffigineqartuartartut.
Aammalu minnerunngitsumik suliffeqarfissuit inuiaqatigiinnit pigineqartut
namminersortut ingerlataannik ilaatigut ipiorartitsillutik unammillertuarnerat
akuersaarneqarsinnaanngimmat, uffa naalakkersuinermit suliaqartugut
oqaluttuaraluartugut namminersortut periarfissinneqartariaqaraluartut.
Atagu mittarfeqarfissuit
suliarineqarnerat naammassippat atorneqalerpatalu misilttagaalersussat
takutikkumaarpaat, qanoq ingerlatsineq qanoq ikkumaarnersoq suna tamaat
siumoorlugu aalajangersariinngikkaluarlugu. Aamma Mittarfeqarfiit
A/S-inngortissagaluarpata angallannermi billet-it akiinut, ilaasunik
angallassinermut, nioqqutissanik pilersuinermut pilersaarusiortarnermut
Inatsisartut qanoq sunniuteqarsinnaassappat? Tassami timmisartoqarfinnik
sanaartornermi billet-it akiisa appartinneqarnissaat naalakkersuinikkut
naatsorsuutigineqarmat.
Taamaattumik suliap
aappassaaneerneqannginnerani apeqqutit assigiinngitsut akineqarnissaat
Kattusseqatigiinniit kissaatigaara. Taamatut oqaaseqarlunga isumaga
saqqummiuppara.
Peter G. Samuelsen,
Takornariaqarnermut, Angallannermut, Niuernermut Attaveqaatinullu
Naalakkersuisoq:
Siullermik oqaaserineqartunut
qujassaanga. Oqaaserinartut pillugit naatsumik paasinninnera imak oqaatigeqqaalaarlara.
Siunnersuut Naalakkersuisut siunnersuutigisaat Siumut-mit taperserneqarpoq
Atassuk-miillu, aammalu paasiniagassat paasineqareerpata aamma IA AP-allu aamma
A/S-inngortitsisinnaanermut apeqqut tunuttunngilaat. Taavalu
aappassaaneernissaanut oqaluuserinnikkumasut, tassa upernaaru april-imi
maj-imilu inatsisartut ataatsimiilerpata pissasoq IA-p kissaatigaat aammalu
Siumup kissaatigalugu. Atortuulernissaali eqqarsaatigalugu Atassut-minngaaniik
inassutigineqarluni atortuulerfissaa matuma ukiup naaneranut inissinneqassasoq.
Taavalu apeqqutit ujartorneqartut, taakkua uuma peqqussutissatut saqqummiunneqartup
aappassaaneerneqarnissaata tungaanut suliarineqarnerisa qularnanngitsumik
erseqqarinnerulersissavaat. Kingumoortumik januarip aallaqqaataani atuutilissanersoq
1998-imi atuutilissanersoq imaluunniit Atasssut-minngaaniik
inassutigineqartutut ukiup naanerani atuleruni pitsaanerunersoq. Taannartaa
sukumiisumik paasivara nalilersorumaneqartoq ataatsimiititaliami susassaqartuni
kiisalu aamma tusarniaanerit pisariaqartut oqaatigineqartullu aqqutigalugit.
Tassa siullermik paasinninnikka.
Partiillu ataasiakkaat oqaaserisai
tikilaassagukkit paasivara Siumup oqaaseqartuata Lars Karl Jensen-ip
siunnersuut tamakkiisumik tapersersoraa. Taavalu aamma
A/S-inngortitsisoqaraluarpalluunniit aamma mittarfeqarfiit iluini
suliassaqarfiit assigiinngitsut nalilersorneqarnermikkut kikkunnit
isumagineqarnissaat aamma tikkuarneqartoq.
Kiisalu aamma Siumut sinnerlugu Lars
Karl Jensen-ip oqaaseqarnermini mianersoqqussutigisaa aajuna quupernerit
pingajuanni oqaatsimi eqqaasissutigisaa. Tassa aallaqqaataaniit Mittarfeqarfiit
landskarsimit tapiiffigineqartartutut ingerlanerani, taava taassuma saniatigut
isertitaqarfiusartut suliassaqarfiit Mittarfeqarfiit iluaniittut tamakkerlugit
piiarneqarpata taava ullumikkut ukiumut kr. 60 mio.-inik aningaasaliisarnerput
Mittarfeqarfiit-nut taamaaginnassanerpa imaluunniit qaffariaat akiligassarput
qanoq naatsorsorneqarsinnaava.
Atassut-minngaaniit Anders Nilsson-ip
oqaaseqarnermini aallaqqaasiutigalugu tassa oqaatigivaa Atassut tapersersuisoq
Mittarfeqarfiit A/S-inngortinneqarnissaanut. Aammalu taamaaliornikkut
suliassat naliginnaasut pisortaqarfinnit ingerlanneqartariaqanngitsut,
Namminersornerullutik Oqartussanit avissaartinneqartariaqartut pisortat
pigigaluarpatigilluunniit. Tamanna soorunami isumaqatigaara.
Aamma Anders Nilsson-ip
eqqaasitsissutigaa Mittarfeqarfiit A/S-inngortinneqarpata taava politikkikkut
siunnerfivut, taakkua najoqqutarineqartariaqartut, tassalu
Namminersornerullutik Oqartussat suliffeqarfii namminersortunik,
nutserluaannarlugu, equngasumik unammillertariaqanngitsut tamanna
qulakkeersimaneqartariaqartut.
Tassunga oqaasererusutakka
ukuusinnaapput. Aallaavik taamaattoq aamma selskab-inut allanut
atuuttariaqarpoq, aamma Tele-mut aamma KNI-mut aamma allanut. A/S-inngoreersimagaluartut
suliffeqarfiit uuminnga eqqaasitsissutigineqartutuut naalakkersuinikkut
anguniakkatsinnut naapertuuttumik ingerlatsinerpat, apeqqut ammasoq
assigiinngitsunik isummersorfigineqarsinnaasoq.
Aamma assersuut tiguneqartuartartoq
Mittarfeqarfinnut atatillugu tassaavoq qatserutinik suliaqartarnera, tassa
Mittarfeqarfiit ulluinnarni annertuumik suliaqarput ikuallattoornissamut sillimaniarnermut.
Taakkulu atortuutit aamma suliffeqarnermikkut isumagisarpaat. Taanna suliassaq
qangali Mittarfeqarfinni isumagineqarsimavoq. Kisianni suliffeqarfeerannguaq
Brand-Teknik nunatsinnut pigami qallunaat nunaaninngaaniit pigineqarluni,
Nuummi pilersilluni. Taava oqarpoq pisortat suliffeqarfiutaasa
unammillerpaatigut, kinaana tassani unammillertoq? Aamma Mittarfeqarfiit
qatserutitigut isummannaallisaanermullu tunngasutigut suliassaataat qanoq
akilersillugit isumaginiarneqassagaluaramik, aamma taanna apeqqut akisuneruva
akikinneruva imaluunniit suliffeqarfiup taassuma sinneqartoorutai
nunatsinninngaaniit annisissappat? Aamma suliassaq taanna konkurrencenĉvne-mi
suliarineqarsimavoq, tassanilu naliliineq imaappoq. Naatsorsuutitigut
suliassat taakkununngarpiaq tunngasut Mittarfeqarfiit ingerlatitaanerininngaaniit
immikkoortiterneqarsinnaappata taava taanna suliassaq ajunngitsoq, aammalu
taanna taamaalereersimavoq aammalu kukkunersiuisut nalunaarutaasigut
takuneqarsinnaalluni.
Anders Nilsson-ip aamma takingaatsiartumik
Kangerlussuaq sammivaa, ilaatigut Sulisa A/S piukkullugu.
Eqqaasissutigiinnassavara Kangerlussuarmi suliassat assigiinngitsut Mittarfeqarfiit
ulluinnarni oqartussaaffigigaluarpatigilluunniit, suliassat arlalippassuit
aamma namminersortunik ingerlanneqarmata. Aamma takornariaqartitsinermik
selskab-eqarpoq Kangerlussuarmi takornariaqartitsinermik assigiinngitsutigut
ineriartortitsisumik, Greenland Tourism-imillu piginneqataaffigineqartumik.
Anders Nilsson-ip Atassut sinnerlugu
oqaasii taavalu IA sinnerlugit Josef Motzfeldt-ip apeqqutit saqqummiussuutai.
Taakkua ataatsimut imatut naatsumik akerusuppakka. Isumaqatigiikkunarpugut
maani inatsisartuni. Apeqqut una peqqussutissatut siunnersuut uani katersuunnermiunngitsoq,
katersuunnerulli tulliani inatsisartuni aappassaaneerlugu suliarissagipput naammassiniarneqarnissaa
siunertaralugu. Taannalu pitinnagu tusarniagassat inatsisartullu ataatsimiititaliaat
susassaqartut tassani qaqelerillutik sulissasut.
Taavalu AP-iata apeqqutigisaa tassa kina
koncession-imik tunisisartuuva. Tassani koncession-imik oqarneq tassa
timmisartoqarfiit ilaasut isumagineqarnerannut nassatallu isumagineqarneranut
tunngasut, taakkua SLV-iminngaaniit, tassa Statens Luftfartsvĉsen, tassani
aalajangersakkat naapertorlugit tunniunneqartarput. Nunatsinnilu taamatut
pigisaqartoq tassaavoq Mittarfeqarfiit, Namminersornerullutik Oqartussat
suliffeqarfiutigisaat. Mittarfeqarfiillu isumagisassaraat mittarfiit,
helikopter-inut mittarfiit, helikopter-iaqqanut mittarfiit nunaqarfinniittut.
Naluara taassumap saniatigut allanik mittarfeqarfinnik isumaginnittussanik
pilersitsissanersugut imaluunniit namminersortunngussaassanersugut. Tassa
saqqummiussanni pingasoqiusat isumagisassaraat ullumikkumut ilaat annertoqisut
oqaluutuarisaanermit kingornussaraagut naalagaaffimminngaaniit.
Taamatut oqaaseqareerlunga
eqikkaanerusumik ukua oqaatigerusuppakka. Maluginiagara aajuna maannakkut
inatsisartuninngaanniit oqartoqarmat Kangerlussuaq aamma Narsarsuaq, taakkua
piorsarneqarnissaannut inatsisartut piareersimanerulersimasut. Ilaatigut
qularnanngitsumik angallanneq pillugu isumasioqatigiinnerup kingornatigut
siunniussat, naalakkersuinikkut siunniussat oqaluuserineqartut aallaavigalugit.
Aammalu ulluinnarsiutaanerusut eqqarsaatigalugit Kangerlussuarmut
tunngassuteqartut, tassunga atatillugu eqqaasissutigissavara ukiarmi inatsisartut
maani akuersissutigimmassuk Kangerlussuup inissisimarnga ukiuni tallimani allanngortitsinertaqanngitsumik
atagallassasoq. Tassa kommunit avataanni inissisimassalluni. Aammalu
nalunaarutip annertuup ersarissullu suliarineqarnerani tusarniagassat
assigiinngitsut tusarniaaffigineqarsimapput. Aamma kommunit
oqaloqataasimapput, ilaatigut kommunit Kangerlussuarmit tigusiumasut aamma
tassani oqalliseqataasimallutik.
Aamma oqaatigilaassavara
A/S-inngortitsineq ajortunut tamanut ilisarnaatitut maani oqaluuserisariaqannginnatsigu.
Suliffeqarfiit ingerlatsiveqarfiit ataasiakkaat, naalagaaffimminngaaniik
kingornussimasatta, nutaamik aaqqissuuteqqinneqarnerinut atatillugu aap
eqqaamasaqarpugut. Ilaannikkut aallariarnerit oqimaassimapput, taanna
miserratigineqanngilaq naalakkersuisuusartunit aamma siusinnerusukkut.
Kisianni imatut paasineqarsimasappat A/S-inngortitsineq pisimasoq pisortat
suliassaataannut namminersortunngorsaanermut atatillugu imaluunniit taannaannavik
anguniarlugu, taava paatsoortoqarsimassaaq.
Namminersornerullutik Oqartussat suliffeqarfiutai
A/S-inngortinneqarsimapput ingerlalluarnissaat aammalu innuttaasunut
kiffartuussilluarnissaat anguniarlugu siunertaralugu. Taanna oqallinnermi
tusartakkatsitut naammassineqarsimanngippat taava taanna
iluarsineqartariaqarpoq. Aamma ulluinnarni maanngaanniit imaluunniit
naalakkersuisoqarfinninngaanniit toqqaannartumik suliffeqarfinnik aqutsisutut
qinikkat inissisimasarnerput taanna assigiinngitsunik isumaqarfigineqarsinnaavoq,
kisiannili inatsisitigut akisussaaffiit sumiinnersut A/S-inngortitsinikkut tassani
ersarissarneqartarput.
Aamma suliassat pisortaninngaaniit
isumagineqartut taakkua namminersortuninngaaniit isumagineqartinneqalissappata,
tassani apeqquterujussuuvoq nalilersussallugu ilumut inuiaqatigiit
tungaanninngaaniik akilersinnaanersooq. Akisussaaffik suliassaqarfilluunniit
ajunngitsumik ingerlasoq pisortat pigigaluarunikkulluunniit taava
namminersortunngorsaanerup aqqani, tassani soorunami suliffeqarfik imminut
aningaasatigut napatittussaammat taava iluanaarutit inunnut ataasiakkaanut
tussapput. Tassanilu qulakkeersinnaanngilarput sumut ingerlaqqissasut, nunatta
avataanut imaluunniit sumut.
Aamma naggasiullugu
namminersortunngorsaanermut oqallinnermi isumaqarpunga Mittarfeqarfiit
A/S-inngortinniarneqarneranut tunngasunik oqaluuserisassaq pissangarnerujussuaq
allamiittoq. Tassalu ataatsimoornerusumik naalakkersuinikkut
isummerfiginiassagipput suliffeqarfissuit Namminersornerullutik Oqartussat
pigisaat taakkulu iluiniittut suliassaqarfiit qanoq iliorluta suliffeqarfinnut
allanut imaluunniit inunnut ataasiakkaanut pigisassanngortinnissaat
ingerlatassanngortinnissaalluunniit isummerfiginiassallugu.
Isumaqarpunga taanna
pilersaarusiussallugu soqutiginaateqarsinnaasoq manna tikillugu naalakkersuisut
tassani suliassatut immikkoortutut isiginiarsimanngilaat, kisianni inatsisartut
tamanna kissaatigisimassappassuk siunnerfik taanna qaqilissallugu
aningaasaliisariaqarpugut. Aammalu suliffeqarfiit sukutsitai namminersortunik
ingerlanneqalersinnaanersut, tassani naliliiviginiarlugu taavami
akilersinnaasortai peerutsigit taava akilersinnaanngitsortai landskarsip
nammatassai qassiussappat tamanna ilisimalluinnartariaqarparput.
Isumaqarpunga suliffeqarfimmut uunga
eqqartukkatsinnut taanna kisimi attuumanngitsoq. Annertunerujussuarmik attuivoq suliffeqarfinnut
allanut. Namminersortunngorsaaneq aap KNI ilaasunik angallassinera imaatigut
tikkuaannarsinnaavarput maannakkut ingerlavii ataasiakkaat namminersortunut
neqeroorutigineqarput. Aamma qisuariarsimasut arlaqarput november-imi
december-imilu aamma suliassamik tigusisimasut arlaqarput.
Fantais-inngi Lars Karl Jensen-ip
eqqaammagu aamma assersuutissaqarpoq Sisimiuni pisiniarfimmi KNI-p
pisiniarfigisaani tassani aamma sisoraataarniartoqarpoq namminersortumik. Tassa
imaappoq takornartaajunnaaraluttuinnarpoq pisortat ingerlataasa iluini aamma
namminersortunik ingerlanneqarsinnaasut tiguneqartarnerat.
Naggaterpiaatigut oqaatigissavara
Mittarfeqarfiit A/S-inngortinniarneqarneranni aamma mittarfiit ulluinnarni
ingerlanneqarnerat imaalillugu ersarissarniarneqarmat. Tassa heliport-imi, helistop-imi
mittarfimmiluunniit sumiluunniit Mittarfeqarfiit sullisissagai suliffeqarfik
kinaagaluarpalluunniit Grĝnlandsfly-uppat Air Alpha-ppat allatulluunniit
assigiinngisitsinertaqanngitsumik. Tassaniippoq aamma siunnerfimmut
qanilliartornerput silaannakkut nunatta iluani angallannermi
timmisartortitseqatigiiffiit amerlisinnaanerat imaluunniit Grĝnlandsfly-p
saniatigut ingerlataqartoqalersinnaanera. Tassani
assigiinngisitsinertaqanngitsumik aamma sullissisoqarnissaa ersarissartariaqarpoq.
Josef Motzfeldt, IA:
Aallaqqaatigalugu IA-minngaaniit erseqqissaatigerusupparput oqaaseqarnitsinni erseqqissumik naggataatigut oqaatigigatsigu inatsisartut naammattumik toqqammavissaqanngitsutut isigigatsigit ilumut A/S-inngortitsineq annaffissatuarineripput matumani aalajangiiffigissallugu. Taamaammat peqqussutissap aappassaaneernissaanut misissorneqareerpata, taamanikkut uagut isummerfigiumaarparput naleqquttuunersoq taamatut pilersaaruteqarneq. Aamma naminersortunut agguaassanersugut imaluunniit nammineq pigisagut ingerlanniarsarissanerigut, tassani misissugassat arlaqarput.
Ilaatigut Siumut oqaluttuata oqaatigaa aningaasanik isaatitsivimmini Mittarfeqarfiit A/S-inngornerminut atatillugu arsaarneqassappata, tassani qularnanngilaq mittarfivinnut tunngasuunngitsut kisiannili akunnittarfinni, neriniartarfinni pisiniarfinnullu tassani tunngasut pineqarugunarput. Taakkua peerneqassappata taava inuiaqatigiinnut akisunerulissasoq. Qularnanngilaq taamaassinnaavoq kisianni aamma allatut isigineqarsinnaavoq. Namminersortunik tiguneqarpata aamma aningaasartuutitai ilanngullugit aamma Mittarfeqarfinniit avissaartinneqartussaapput. Taamaammat sattaaserluta taama apeqqut annertutigisoq, taamak oqartariaqarpugut, quppernernik marluunngitsunilluunniit tunngavilersuutinik taamaallaat toqqarmaveqarluta inatsisartuni aalajangersinnaanngitsugut pingaartinneruvarput.
Misissugassat Mittarfeqarfinninngaaniit piareersarnermi sulisunut paasisitsiniaanissat. Aningaasatigut ukiuni aggersuni qanoq ilimasuttariaqarnerluta. Mittarfeqarfiit sulisuisa A/S-uneq A/S-iunngikkunilluunniit ilisimasariaqagaat suut pitsannguutaassanersut, suut akikillisaataassanersut inuttaasunik iluaqutaasumik. Tamakku uppernarsaatitalerlugit uagut takorusuppavut. Avaartartukassaagatta kukkussutinik ukiuni kingulliunerusuni nalaattakkatsinni, tamanna miserratissaanngilaq.
Kiisalu akuersissuteqarnissamut qaqugu tamanna pinissaa aappassaaneerinnermi paasissutissat qanoq annertutigisut, qanorlu sukumiitigisut qanorlu qularunnaarsitsitigisut. Takugutsigit takussavarput upeernakkut aappassaaneerinneq pingajussaaneerinnerlu naammassanersut imaluunniit Atassut siunnersuuteqarneratut aamma kinguartitereqqissanersugut.
Kangerlussuarmut tunngatillugu ilumoorpoq ukiuni tallimanik kinguartitseqinnikuugatta taamatut fristad-ipajaatut, kunngiitsuuffiaqqatut nunatta iluani inissisimatitsilluta. Soorunami aalajangerneq taanna ataqqisariaqarpoq. Apeqqutaavorlu taava immikkut aaqqissuussisimanerup taassuma Kangerlussuaannarmut atuutsinneqarnissaa imaluunniit arlariinnut assigiimmik inissisimasutut taaneqarsinnaasumik atuutsinneqarsinnaanersoq isummefissat ilagisariaqarpaat. Massakkut ukiut kingulliit kingumut qiviarutsigit mittarfiit imarpik qulaallugu timmisartunik miffiusartut piorsareneqarnermikkut nersorneqartarnerat assigiinngitsunik tunngaveqarluni ineriartortitsisimanermut aallaaveqarmat arajutsisimaneqartariaqanngilaq.
Orniginarnerusarput akikinnerusumik annertunerusumillu kiffartuussiviit annertusaavigineqarnerusut. Uagullu IA-ninngaaniit isumaqarpugut unneqqarissaarnerussasoq mittarfinnut arlariinnut nunatsinnut isaaffiusunut nunatsinniillu aallartarfiusunut assigiimmik naligiimmik atugassaqartitsinissaq anguneqarsinnaasuuppat. Aammalu apeqqummut matuma Kangerlussuaq siullermik eqqarsaatigalugu innuttaasut Kangerlussuarmi najugaqartut tusarniarneqarnerunissaat isumasiorneqarnerunissaat pisariaqarluinnartutut isigaarput.
Pingaaruteqarpoq Siumut oqaaseqartuata oqaasiinut sanilliullugu oqaatigissallugu aningaasatigut inissisimanissaanut apeqqutaasorujussuaq tassaavoq naatsorsuutit aallartinneranni A/S-inngussappat naatsorsuutit aallartinneranni piumasarisaasut nalillit qanoq nalilerneqassanersut. Eqqaamajunnarsivarsi ukiarmi Nukissiorfiit eqqartoratsigit, Nukissiorfiit kr. 1 mia.-inik akiitsulerlugit saniatigullu taamannamininnguaq ingerlatsinerannut tunisarlugit. Tassani allartinnermi naatsorsuutit aallartinneranni tunngavigitinneqarsimasut eqqumiiginakulussinnaammata aamma Mittarfeqarfiit A/S-inngussagaluarpata aallartinnermi naatsorsuutit qanoq innissaanik eqqaamasaqartariaqarpugut.
Bjarne Kreutzmann, AP:
Akissutigeqaatigineqartunut qujavunga.
Isumaqarpunga AP-at assigiinngissuteqarpallaanngitsut saqqummiunneqartunut
uanili isumaga malillugu ataatsimoornerusumik eqikkaanerusumillu taakkartuinera
nammineq nalilerpara. Tassa oqaatigalugu taanna periarfissaq allanik aamma
tiguneqarsinnaasariaqarpoq, taanna suli eqikkarnerullugu oqaatigalugu.
Unaliuna naalakkersuisuminngaaniit
apeqqutinut tunngatillugu oqaatigineqartoq isumaqarama paatsorneqarsinnaasoq.
Uanga paasinninnera malillugu oqaatigineqarmat apeqqutigisimagiga kina
akuersissummik tunineqassanersoq. Tassanin uani taanna pinnginnakkut
apeqqutinni, nutserisut eqqarsaatigalugit oqaatigilaassavara imm. pingajuat
issukissuassagakku. Tassa
issuaanera aallartippoq. Tassunga tunngatillugu AP-anniit paaserusuppara
suliamut akuersissuteqarfigineqarnermik tunngaveqartumut, tassa
koncession-imik tunineqarsimasumut atugassarititaasut suunersut,
soqutiginnittorlu avataaneersoq Mittarfeqarfinnut unammilertitut isumaqatigiissuteqarnikkut
sullissinissamut akuerineqassappat Mittarfeqartulli atugassaqartitaanissaanut
periarfissat qanoq annertutiginersut, taanna apeqqutigiteqqiinnarpara
paatsoorneqarsinnaasoralugu oqaatigineqarneratuut.
Lars Karl Jensen, Siumut:
Siullermik uani aallartiffissaanut
innersuussutigineqartut partiini allaninngaaniik qularinngilara uagut aamma
naaperiarfigisinnaagatsigit. Tassa aappassaaneerneqarnissaanut oqaluuserineqarnissaa
upernaamut inissikkusunneqarmat taavalu 1. Jan. 1999 selskab-imik
pilersitsinissamik ulloq taaneqartoq taakkua naaperiaaffigisinnaavagut.
Uani selskab-it pilersittarnerannik
inuiaqatigiinni sullissineq qiteralugu akikinnerusumik aallaaveqarnissaq
angujartuaarneqassasoq siunertaasoq oqaatigigatsigu. Aammalu, quppernerni
marluunngitsuniluunniit IA-p oqarneratuut, saqqummiussaqarnitsinnit imatut
pisariaqartissimanngilarput mikisualuit tamaasa maani oqallissaarutigissallutigit.
Tassa tunngaviatigut saqqummiunneqartoq selskab-inik pilersitsinissaq
Siumut-minngaaniik akuerivarput. Aammalu uani selskab-imik pilersitsinermi
aningaasaliissutissatut kr. 3 mio.-nit aallaavigineqartussat taakkua ilutsinni
oqalliserigalugit akuereernikuuvagut.
Mittarfeqarfiit maannakkut
ingerlatitaanerattut inissisimaneranni pigisaata nalilersorneqarneranni
nassuiaatit taakkua arajutsineqarsimassappata inatsisatuni sulinitsinni
agguaatereerneqartut taakku partiinut allanut innersuussutigiinnassavakka,
uagut tamakkua tunngaviisigut akuersaareeratsigit.
Siumut tungaaninngaaniik
annilaangatigisagut selskab-ip aallartikkaluaannarluni ingerlassinnaasaasa
inuiaqatigiinnut namminersortunit ingerlatitassanngornerat annilaangatigigatsigu.
Toqqavigisarput tassaavoq akilersinnaanngissappatami nammineq privat-imik
ingerlanneqarlutik taakkua. Qanoq pineqassappat taakkua.
Naatsorsuutiginngisatsinninngaanniik nunatsinni nammatassavut
amerlanerulersinnaanerat annilaangatigivarput. Taamaattumillu selskab-inngortitsinermi
ingerlatat tamaasa ingerlanneqalereerpata selskab-ip siulersuisuini
nalilersorneqassapput suunukua inuiaqatigiinnut namminersortunik
ingerlatsisunut oqinninngorlugit tunniussinnaagivut, atukkiussinnaagivut.
Uanga isumaqarpunga maani Siumut-i piffissaqanngitsugut mikisualuit tamaasa
oqaaseqarfigissallugit saqqummiussaq ersaarereermat.
Ukua ussernartorsiorniaraluartut
allat oqaaseqaataat oqaaseqarfigissallugit kisianni oqaatigeriikkattut Siumut-iminngaaniit
akuersaarsinnaavagut upernaamut aappassaaneerneqarnissaanut peqataanissamut
taavalu aamma taamanikut 1. Jan. 1999-imi atuutilernissaa aalajangiiffigineqassappat
aamma ilutsinni oqallisereqqaarumaarparput.
Anders Nilsson, Atassut:
Uanga mikisualukkuutaat
oqaluusererusuppakka pingaaruteqarujussuarsinnaammata. Siunnersuut
saqqummiunneqartoq misissuataarutsigu allassimavoq Mittarfeqarfiit A/S
pilersinneqarneranut suliffeqarfiup aningaasarsiorfia annertusineqarsinnaasoq.
Tassani niuertarfiit sutorniartarfiit akunnittarfiillu eqqarsaatigalugit.
Quppernermi tullermi allassimavoq Mittarfeqarfiit A/S-p immikkoortunut
pingasunut avissaarsimasut. Tassa inuiaqatigiit suliassarititaat taavalu
suliassat aningaasannanniarfiusut, assersuutigalugu niuertarfiit
sutorniartarfiit akunnittarfiillu. Taakkua malittarisassatut siunnersuutini
sanilliukkaanni taava Mittarfeqarfiit A/S isertitat allat allatigut
isertinniartariaqarpai aningaasarsisinnaassaguni.
Tassa tamakkua mikisualukkuutaat annertuumik pingaaruteqarput, tassa kalaallit nunaaminngaaniik kr. mia.-it danmark-imut ingerlasarput. Inuussutissarsiutissatut siunnersuutit assigiinngitsut saqqumiunneqaraangata tassa aningaasat amigaatigisanngilavut. Landskarsi aningaasassaaleqivoq namminersortulli aningaasassaaleqinatik. Suliffeeqqanik pilerinartumik pilersitsiniaraanni taava aningaaserivimmut saaffiginnittariaqarpoq aammalu aningaasanik atorniarluni. Taava kisianni itigartitsissutigineqartarpoq, assersuutigalugu Mittarfeqarfiit qatserinermut annaassiniutillu tunngasut aallartissimavaat. Taava Namminersornerullutik Oqartussat suliffeqarfii qanoq iliorsinnaappat. Tassa tamakkua mikisualukkuutaat annertoorujussuarmik pingaaruteqalersinnaapput. Tassa taamaalillutik immaqa kr. mia. kalaallit nunaannut nuunneqarsinnaammata tassanilu sulisinneqarlutik. Tassani Atassummi Mittarfeqarfiit eqqarsaatigalugit Mittarfeqarfiit nammineq akunnattuungaffiginngilagut kisiannili suliassanik unittoortitsisut taakku akunnattuungafigalugit.
Anthon Frederiksen, Kattusseqatigiit:
Inatsisissamut akerliugaanni imaattariaqassagunanngikkaluarpoq, apeqqutigisat aammalu paaserusutat tassa akineqartariaqanngitsut aammami naatsorsuutiginngilara (akineqanngisss...) saqqummiussanni eqqartukkakka tassa ilaatigut billitsit akii aammalu Mittarfeqarfinni ingerlatsinerit assigiinngitsut nunani allani qanoq misilittagaqarfigineqarnersut paasissallugit isumaqarpunga soqutiginartoq. Misilittakkammi assigiinngitsut tunngavigineqarluarsinnaasullu immaqalu aamma nunatsinni atorluarneqarsinnaasut allaninngaanniit pissarsiarisinnaasagut nassaarineqarsinnaasariaqarmata.
Siumup oqaluttuaniit aappaatigut pakatsissutigilaarpara maannakkut oqalunnermi nalornissutigineqapajaalereermat ilumut akilersinnaassappammi? Mittarfeqarfiit tamarmik naammassineqarpata.
Taamanikkut 1995 ‑imi upernaakkut ataatsimiinnermi inatsisartut amerlanerpaat immaqa uanga kisima pinnanga timmisartoqarfiit suliarineqarnissaanut tunngatillugu tamavissi oqarpusi timmissartoqarfiit taakku imminnut akilersinnaassapput, billitsit akikillissapput, kisianni massakkut nalornisoqapajaalersoq malunnarsereerpoq, taamaattumik apeqqutit arlaqarput, paaserusutat piffissarlu isumaqarpunga apriilip tungaanut sivikippallaartoq paasisassat assigiinngitsut sukumiisumik paasiniassagaanni tunngavissamik aalajaatsumik isumannaatsumillu pissarsissagutta piffissaq atorluarneqartariaqarpoq. Taamaattumik Atassut isumaqatigivara, aappassaaneerneqarnissaalu ukiamut aatsaat suliarineqarniarli.
Bjarne Kreutzmann, Akulliit partiiat:
Oqaatiginiarluguuna apeqqutinngortitaasoq
taanna aappassaaneerneqarnissaa qaqugu pissasoq apeqquserneqarmat uanga
oqaaseqaatinni (agguar...) imatut nipilimmik allakkama aappassaaneerneqarnissaa
tikitsinnagu ataatsimiititaliami tassunga tunngassuteqartunik oqaluuserineqassasoq.
Imatummi paasineqarsinnaammat ataatsimiinnermi tassani naammassineqassasoq,
kisianni saqqummiussisut kingulliit aappassaaneerneqarnissaannik
tunuartitseqqusisut akerlerinnginnakkit taannaana erseqqissumik oqaatiginiarlugu.
Peter Grĝnvold Samuelsen, Takornariaqarnermut Angallannermullu naalakkersuisoq:
Oqaasereqqinneqartut pillugit qujavunga. Aamma Inuit Ataqatigiit oqaaseqartuata ersarissaataanut. Tassunga atatillugu ilaatigut Mittarfeqarfiit sulisoqarnera eqqaalaassallugu, tassa ilaatigut ernumassutigineqarsinnaasut ilaattut oqaatigineqarmat Mittarfeqarfiit ingerlatseqatigiiffinngorpata taava sulisut qanoq, oqaatigissavara ullumikkut Mittarfeqarfiit 400‑t missaannik sulisoqartut ilai 82,5 procentit nunaqavissuummata, taamaattumik Mittarfeqarfiit ingerlatsitaaneranni kalaallit sulisorineqarnerat annertuutut oqaatigineqarsinnaavoq.
Akulliit Partiianniit aappassaannut apeqqutaanut naluara siullermik akissutiga qanoq ersarinnerulersinnaanerlugu, tassa suliassaqarfik Mittarfeqarfiup iluiniittut pingasut taakku immikkoortuisa ilaat akuersissuteqarfigineqarluni isumagineqartartut (b...) SLV‑minngaanniit aalajangersakkat taakkuupput piumasat annertuut taava ersarilluinnartut SLV‑minngaanniit mittarfinnik ingerlatitsinissamut akuersissuteqarnermi naammassineqarsinnaagaangata taava akuersissummi tunniussisoqartarpoq. Tassanilu pineqartut tassaapput: Mittarfiit eqqai, illorsuit timmisartunik eqqussisarfiit allallu. Taavalu timmisartornermi ilaasut usillu aamma isumagineqarnerat taakkununnga piumasaqaatit ersarissut aalajangersakkanik naapertuuffiusussat ilaapput. Taakkununnga aamma ilaavoq akitigut, Athon Frederiksen‑ip apeqqutaanut tunngatillugu Mittarfeqarfiit suliassaqarfimmi iluini timmisartunik ilaasunik usinillu kiffartuussinerminni akitigut qanoq piumasaqarsinnaanerat tunngassuteqartoq aamma taakkunani aalajangersakkaniippoq.
Aamma Athon‑ip akulersuuppai mittarfiit akilersinnaanngitsut mittarfiit akilersinnaasussat ilaasunut sullissinermi akitigut pitsaanerusumik neriorsuuteqartoqarsimanera tassani immikkoortilluinnartariaqarput mittarfiit nunami atortulersuutit taakkua aningaasartuutaanerat tassanngaanniillu mittarfiliortiternermi tunngavik tassaavoq ilaasunik angallassinermi pisariinnerusumik pilertornerusumik kiffartuussinnaalernermi billitsit akiisa sunniuteqarfigineqarsinnaanerat. Ukua mittarfiit sanaartorneqartut ulluinnarni ingerlatsitaanissaat qanoq inuiaqatigiinnut akeqarnersut qanoq amerlatigisumik isertitaqarsinnaanersut tamarmik naatsorsorneqarnikuupput inatsisartunullu suliaanikuullutik. Kisiaani kipparissamik oqarluni inuiaqatigiinninngaanniit suliakkiissutaasut taakkuinnaviit eqqarsaatigalugit taava pinngitsoorani mittarfeqarfiit landskarsiminngaanniit tapiiffigineqartartussaapput, taassumali avataatigut suliassat allat imminut akilersinnaasut landskarsip tapiissutaanut apparsaataasinnaappata taanna taava atorneqartarpoq mittarfeqarfinni taamaallaat atorneqarani allanili suliffeqarfinni aamma eqqarsaatigalugu.
Josef Motsfeldt, Inuit Ataqatigiit:
Naalakkersuisoq nassuiaateqarneranut qutsavigissavarput, Siumumut una oqaatigilaaginnarniaringa, quppernerit marluunngitsulluunniit A/S‑inngortitsiniarnermi tunngavilersuutit tassani naalakkersuisut soorunami saqqummiussinerminni najoqqutarisaat pivarput. Kiisalu Atassutip oqaluttuanut oqaatigissavarput, unamminissamut soorlu qatserutinut tunngatillugu unammerusunnermik (tunngasoq) mittarfeqarfiit siulliusimappata taava nunatsinni niuerfissaq ima annikitsigaaq taanna niuernikkut nukiit tamakkiisumik sulisinneqarnissaanut takorluugaq sinnattupilunngorsinnaalluni allaat, nammineq takorloorsinnaasariaqarpoq nunatsinni unammissutigineqarsinnaasut sualummik aalajangersimasunik atortussanik eqqartuineq annikittoralaajummata. Kiisalu uteqqilaaginnassavata Kangerlussuup nakkutigineqannginnera massakkut Mittarfeqarfiit Kangerlussuarmi naalagaapput, taavalu A/S‑sinngorpat naalagaanera suli sakkortusineqartussaavoq, sulisut 80 procentiisa sinnerlugit nunaqavissutut oqaatigineqarput, qassimmita tikiinnarlutik nunaqavissutut taaguuteqalersimasut ukiuni kingullerni nalaassimavagut suliffeqarfimmi tassaniinnaq, taava A/S‑pinngortitsinissamut sulisut amerlinissaanik siunnerfeqarnerup upalugaarsimaffigineqarnissaa uagut pingaartipparput, ilinniartitsinerit sukumiisut Mittarfeqarfiit pilersaarutigisariaqarpaat, ullumikkulli Mittarfeqarfiit ilinniartitsinermik mitsitsisartunik ilinniartitsinermik ingerlatsisuullutillu nakkutilliisuunerat eqqarsarnartoqalaanngitsuunngimmat aamma assersuutitut taavarput.
Anders Andreassen, Inatsisartut siulittaasuat:
Taamaalilluta ullumikkut oqaluuserisassat immikkoortuisa aqqarngat siullermeerneqarnera naammassivarput. Aappassaaneerneqartinnanilu ataatsimiititaliani susassaqartuni suliarineqarallassaaq, matumalu kingorna aappassaaneerneqarnissaa upernaakkut ataatsimiinnermi piumaarluni.
Oqaluuserisaq naammassivoq