Oqaluuserisassani immikkoortoq 13-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 10. februar 1998 nal. 14.20
Ataatsimiinnermik aqutsisoq: Inatsisartut
Siulittaasuat, Anders Andreassen,Siumut.
Mikael Petersen, Siumut,
Aningaasaqarnermut, Suliffeqarnermut Pisortallu Suliassaqarfiutaannut
Naalakkersuisoq:
Naalakkersuisut matumuuna "Kalaallit
Nunaanni pisuussutinik uumaatsunik annertuumik piiaarnerit
sunniutigisinnaasaat" pillugit nalunaarusiaq saqqummiuppaat.
Nalunaarusiakkut siunertarineqarpoq pisuussutinik uumaatsunik piiaanerit
suliffissaqartitsiniarnikkut sunniutissaasa qulaajarneqarnissaat.
Nalunaarusiaq "Kalaallit Nunaanni
suliffeqarneq" pillugu suliniummi, Isumaginninnermut, Suliffeqarnermut
Pisortallu Suliassaqarfiutaannut Pisortaqarfimmit aallartinneqarsimasumi nalunaarusiaagallartut
aapparaat. Misissueqqissaarnerit saniatigut nunatsinni suliffeqarnikkut
pissutsit paasiuminarnerulersinniarlugit suliffeqarnermik misissueriaatsip
SULIAQ-mik taaneqartartup ineriartortinneqarnera suliniummut ilaavoq.
Inatsisartut ukiakkut ataatsimiinnerminni "Namminersornerullutik
Oqartussani sulisut katitigaanerat suliffissaqartitsiniarnikkullu ingerlatsineq
pillugit nassuiaat" oqallisigaat. Ataatsimiinnermut matumunnga
saqqummiunneqarportaaq "Kalaallit Nunaanni sulisut katitigaanerat" pillugu
nalunaarusiaq.
Nalunaarusiaagallartup matuma
suliarineqarneratigut siunertarineqarpoq pingaartumik nunasinni pisuussutinik
uummaatsunik annertuumik piiaasoqarnerata suliffissaqartitsinikkut
sunniutissaasa qulaajarneqarnissaat. Aallaaviuvoq pisuussutinik uumaatsunik
piiaanerit annikitsut sumiiffinnut nunatsinnulluunniit tamarmut killilimmik
sunniuteqartussaammata, aningaasarsiatigut, suliffissaqartitsiniarnikkut
innuttaasutigullu pissutsit eqqarsaatigalugit. Akerlianilli pisuussutinik
uumaatsunik annertuumik piiaanerit assersuutigalugu kommunimi innuttaasut 5
%-iinik annertunerusumilluunniit amerleriarnernik nassataqartut nunamut
tamarmut, minnerunngitsumillu sumiiffinnut ataasiakkaanut qularnaatsumik
kinguneqarluarlutillu kissaatiginanngitsunik kinguneqarsinnaapput.
Inuiaqatigiit kalaallit
inoqarfippassuarnut aningaasarsiornikkut suliffissaqarnikkullu killilimmik
ingerlataqarfiusunut siammarsimammata, ingerlatat nutaat nunaqarfinnut
illoqarfinnullu eqqaamiuusunut malunnaatilimmik kinguneqarsinnaapput.
Taamaammat inuussutissarsiutit pioreersut
piujuartitsinissamik tunngaveqarluni pisuussutinik uumassusilinnik atuinermik
annertuumik tunngaveqarluni ineriartortinneqarsimanerat aamma tamatumani
ilisimalluartariaqarpoq. Eqqumaffigissavarput suliffissanik pisariaqartitsineq,
tassa nunami imaanilu ingerlatat eqqarsaatigalugit, qularnaatsumik uunga
ingerlammat nutarterinerit naammassisaqarsinnaanerulernerillu ilaatigut
kinguneqassallutik aalisarnerup ataatsimut isigalugu sulisunik pisariaqartitsiviunnginnerulerneranik.
Tamanna assortorneqarsinnaanngilaq naak Naalakkersuisut sullivinnik
ataavartunik pilersitsiortorneq nunallu aningaasaqarnera, nunallu
aningaasaqarnerata iluaqutissinniarlugit, imaluunniit nunallu aningaasaqarnera
iluaqutissinniarlugit ineriikkanik tunisassiornerit sapinngisamik
aqqutissiuunniaraluaraat.
Tamatuma saniatigut ilisimavarput
pisuussutinik uumaatsunik piiaaneq suliffissaqartitsiniarnikkut
sunniuteqanngitsoornavianngimmat, annerusumik minnerunngitsumilluunniit
avataaniit sulisussanik pisariaqartitsiviussaaq. Suliffissarpassuit,
pingaartumik aallarnisaarnermi, sulisunik nunatsinneersunik imaaliallaannaq
inuttalerneqarsinnaanaavianngillat, qularnanngitsumillu aamma suliffinnit
pioreersunit sulisussarsiviussallutik, taakkunani sulisussaaleqilernik nassaqarsinnaasumik
sulisussaqarniarnermut aningaasarsiaqarnermullu malunniutinngitsoornavianngitsumik.
Aammattaaq ilisimassavarput pisuussutinik
uumaatsunik piiaanerit, pingaartumik annertuumik, tamarmik killilimmik
piusarmata, taamaattumillu ingerlannerini inuiaqatigiit annerpaamik
iluaqutissarsinissaat pingaaruteqarluni. Pisuussutimmi uumaatsut
nunamiitiiinnarsinnaavagut qanorluunniit sivisutigisumik, taamaammallu
piiarneqarneranni annerpaamik iluaqutissarsivigisariaqarpagut.
Taamaammat inuiaqatigiinnut kalaallinut
pingaaruteqarpoq pisuussutinik uumaatsunik piiaalernissani suliffissat
amerlanerpaat inuttassaqartinneqarsinnaaqqullugit sulisussanik naammattunik
ilinniartitsisoqarnissaanut piaartumik suliniartoqalernissaa. Taamaammallu
aamma pingaaruteqarluinnarpoq inuiaqatigiinni susassaqartut assigiinngitsut,
suliniaqatigiiffiit, inuussutissarsiutinut ilinniartitaanerit kiisalu
pisortaqarfiit attuumassuteqartut pisuussutinik uumaatsunik iluaquteqarniarnermi
anguniakkat aallaavigalugit inuussutissarsiutinut ilinniartitaanerup
ineriartortinneqarnissaanut piaartumik iliuuseqarnissaat.
Taamaattumik aamma piiaalernissat
Inatsisartut Naalakkersuisullu ilungersuutigisimaqisaasa inuiaqatigiinnit
annerpaamik pissarsissutaaqqullugit pisuussutinik uumaatsunik piiaanerup
suliffissaqartitsiniarnikkut kingunerisinnaasaasa kisitsisitigut
misissuiffigineqarnissaat suliniuteqalernissamut nalunaarusiaagallartoq manna
peqataaqqunaqaaq.
Taama aallarniutaasunik naatsumik
oqaaseqarlunga Naalakkersuisut sinnerlugit nalunaarusiaq Inatsisartunut
oqaluuserisassanngortippara.
Laannguaq Lynge, Siumup oqaaseqartua:
Nalunaarusiaq imarisamigut
oqariartuutigisamigullu soqutiginaqisoq saqqummiunneqartoq Siumumi atuareerlugu
ima oqaaseqarfigissavarput.
Ullutsinni inuutisssarsiutitigut
isumalluutiginerpaasatta aalisarnerup ukiuni kingullerni qassiinngulersuni
ingerlanerliulersimanera tamatta nalunngilarput. Pissusissamisoorluinnarporlu
tamanna ilutigalugu nunatsinni inuussutissarsiutit suut nutaat allat
ingerlanneqalersinnaanerinik misissueqqissaarnissat aallartinneqarsimammata.
Uanilu nalunaarusiami pineqartut tassaapput atortussiassanik iluaquteqarluni
annertuumik ingerlatsilernissamut atatillugu sutigut tamatigut inuiaqatigiinnut
sunniuteqarsinnaanerinik qulaajaalluni nalunaaarusiortoqarsimanera. Tamanna
pisariaqarluinnarpoq assersuutigalugu aatsitassarsiornermik imaluunniit
uuliasiornermik annertuumik ingerlatsisoqalissagaluarpat qanoq
piareersarsimatigisariaqarneq eqqarsaatigalugu.
Assigiinngitsutigut suliffissuaqalernerup
inuiaqatigiinnut nassatarisinnaasai ataatsimut tamaasa eqqarsaatigalugit
aallartitsisoqartinnagu piareersaalluaqqaarnissaq pisariaqarpoq. Siumumi
isumaqarpugut aatsitassanik ujaasinermit inernerit erseqqissut
ingerlatsinissamilu missingersuutit piviusorpalaartut
pissarsiarineqaqqaartarnissaat pisariaqarluinnartoq; annertuumik inuiaqatigiinnut
aallaqqaammut akisuujusussaq pilersaarusiorluarneratigut aningaasarsiornikkut
nunatsinnut iluaqutaanerpaajunissaa siunertaralugu piareersartoqartariaqarpoq.
Taamaattumik suliffqarfiulersussat
malitsigisaanik nunami immamilu sulifffeqarfiit kiffartuussiviusussat
nunatsinni angerlarsimaffeqartuunissaat piumasaqaatigisassanut ilaasariaqarpoq.
Suliffeqarfiit taamaattut sinerissami pilersiortoneqarsinnaapput, imaanngitsoq
atortussanik suliffeqarfiup pilersinneqarfiani suliffiit kiffartuussiviusut
taamaattut pinngitsooratik aamma inissisimassasut. Massakkut nalitsinni
teknikkikkut atortorissaarfiulereeqisumi angallannikkullu
piorsagaaffiullualereeqisumi suliffeqarfiit pilersuiffiusussat
allatigulluunniit kiffartuussiviusussat sinerissami sumiluunniit
inissinneqarsinnaasariaqarput. Aningaasaqarnikkut nunatsinnut sunniutissaa
saoinngisaq tamaat atorlugu nunatsinni iluaqutigineqartariaqarpoq suliffinnik
allanik ataavartussanik pilersitsinermi. Taamaaliornikkut aningaasat
pissarsiarineqartussat nunatta avataanut annissorneqaratik nunatsinnili
kaaviaartinneqarlutik innuttaasunut annerpaamik iluaqutaanissaat anguneqarsinnaaqqullugu.
Siumumi pingaarluinnartuutipparput
sulisoqarnerup tungaatigut sapinngisaq tamakkerlugu nunatsinni nunaqavissut
sulisorineqarnissaat. Taamaattumik suliffiusussamik ingerlatsilivinnginnermi
sulisussanik ilinniartitsinissaq pingaaruteqartorujussuussaaq amerlavallaanik avataaniit tikisitsinissaq
pissanngippat.
Siumumi isumaqarpugut aatsitassanik
nassaartoqartillugu imaluunniit sumi piiaanissamik aalajangertoqarnera
malillugu sulisussanik ilinniartitsineq piaartumik aallartittariaqartoq.
Siumumi isumaqarpugut sumiluunniit periarfissat pioreersut siulliunneqarlutik
atorluarneqartariaqartut soorlu sulisoqarneq, inissaqarniarneq allallu
suliffinnik aallartitsinermi inuiaqatigiinnut nammatassannforsinnaasut tamaasa
eqqarsaatigalugit.
Nalunaarusiami allaatigineqartoq
sumiluunniit atortussiassanik sullivimmik pilersoqarneratigut aallaqqaammut
immikkut ilinniagaqarsimasunik tikisitsisariaqarnissaq pisariaqassasoq Siumumi
assortorsinnaanngilarput. Kisiannili tamanna qaangerniartariaqarpoq
ilinniartitaanerup iluani iliniarfiit pioreersut suleqatigalugit
ilinniarfissanik pilerinarsaanikkut imaluunniit nunani allani
ilinniagaqarsinnaanerit aqqutissiuunneqarnerisigut. Tamanna aamma
pisinnaasariaqarpoq suliffiulersussat iluini soorlu tikisitat annertuumik
immikkut ilinniagarsimasut atorfimminnut atatillugu nunaqavissunik
suleqatiminnik pikkorissaatitaasarnerisigut.
Atortussiassanik iluaquteqarluni
suliffiulersussat qujanartumik aamma sulisunik immikkut
ilinniagaqarsimanngitsunik amerlasuunik atofissaqartitsisuussapput.
Sulisuusartussat nunaqavissut suliffinnik taamaattumik tigusisussat aammattaaq
pinngitsoornatik minnerpaamik suliffimmi taamaattumi sulinerup tunngaviusumik
piumasaqaataanik aallaqqaammulli ilisimasaqarnissaat suliffeqarfiup
isumagisariaqagassaatut isumannaartariaqartoq Siumumi isumaqarpugut. Taamaattariaqarpormi
suliffiit atortussanik iluaquteqarluni ingerlatsiviulersussat iluatsittumik
ingerlassappata pilersaarusiornermi sulisoqarniarnerup pitsaasumik
patajaatsumillu aaqqissuussaanissaa isumannaassallugu.
Sulisoqarnermut atatillugu sulisorisanut
isumannaatsumik suliffeqarnissaq Siumumi pingaartilluguttaaq taarusupparput.
Suliffeqarfiulersussat piumaffigineqartariaqarput suliffimmi isumannaallisaanerup
tungaatigut annertuumik pitsaasumillu qularnaarinissaannik.
Maanna Kalaallit Nunaanni Aatsitassanut
Allaffiup nuunneqarnera annertuumik sunniuteqartussamik atortussanik
iluaquteqarluni ingerlatsilernissamut piareersarnermi alloriarneruvoq angisooq.
Allaffik taanna siuliini oqaatigisatta piareersarneqarnissaanni
piviusunngortinneqarnissaannilu qitiulluinnartussaassaaq tamannalu
inuussutissarsiutitigut allanik isumalluutqariartuelrnerup oqaluttuassartaata
aallaqqaatigiinnassavaa neriulluarfigisassarput.
Naalakkersuisut suliniutissaasa
pingaartittariaqarluinnartut ilagisariaqarpaat suliffiulersussanik
piarresarnermi paasisitsiniaanermik annertuumik ingerlataqarnissaq. Inuit
suliffeqarfissamut qaninnerpaallutik najugaqartut pitsaasumik
paasitinneqartariaqarput. Siumumi pingaarteqaarput suliffeqarfissanik
pilersitsiniarnermi innuttaasut qanimut peqataatinneqarnissaat oqaloqataanissaallu.
Innuttaasut paasitinneqartarnissaanni oqaloqataatinneqarnissaannillu FN-ip
iluani ILO-p nunap inoqqaavisa pisinnaatitaaffiinut tunngasunut
aalajangersagaanni immikkoortoq 15-imiittut najoqqutaralugit pisassasoq
isumaqarpugut. Isumaqatigiissutip immikkoortuani tassani immikkut ineqarput
nunap inoqqaavisa qanoq piginnaatitaanissaat kiisalu taarsiivigitittoqassappat
naalagaaffiup pisussaaffiligaanera. Inassutigissavarpullu immikkoortoq taanna
kalaallisut nutserneqareersimanngippat maannangaaq nutserneqartariaqartoq.
Nunatsinni atortussanik iluaquteqarluni
suliffiit annertuumik inuiaqatigiinnut sunniuteqartut killilimmik
atuuttarnerisa kingunerisartagai assigiinngitsut misilittagaqarfigereerpavut.
Taamaattumik suliffeqarfinnik taamaattunik pilersitsinermut ilanngullugu
eqqaamasassat ilaginngitsuugassarissanngilaat suliffeqarfik taamaattoq
atorunnaarpat qanoq iliuuseqartoqarnissaa ilanngullugu pilersaarusiussallugu
isumaqatigiinniutigissallugulu.
Pissusissamisuussaaq inatsisiliornertigut
tamanna isumannaarniarneqartassappat. Tamannali naammannavianngimmat aammattaaq
sulisorisanut tunngasumik toqqissisimanartunik ilaqartussaassaaq. Sulisorisat
suliffiup atorunnaarnerani qanoq ilillutik
"soraarnerussutisiaqarsinnaanerat" isumannaartariaqarpoq aammattaaq
sulisorisat qanoq ilillutik ilinniaqqitsitaanerit aqqutigalugit suliffinnut
allanut ingerlaqqissinnaalernissaat suliffeqarfimmit isumagineqassasoq
piumasaqaatigineqarsinnaasariaqarpoq. Ilanngullugit puiorneqassanngillat
massakkumut suliffeqarfimmik matusisoqartillugu inatsisitigut
piumasaqaataareersut tassa matusinermi avatangiisit qanoq ilillugit qimanneqarnissaanik
aalajaangersaanerit malinneqartussaasut. Piumasaqaatit taamaattut tamarmik
pisinnaappata matusinerup kingunerisinnaasai suliffinnik inuiaqatigiinnut
ataavartumik iluaqutaasussanik allaat kinguneqarsinnaalersimassaaq -
suliffeqarfiup ingerlanerat nalaani taamaallaat iluaqutaasumik pinnani.
Siumumit Naalakkersuisunut makku
maannangaaq suliniutigineqalereersussatut inassutigissavavut:
- aatsitassarsiornerup iluani
ilinniartitaanerit suut pisariaqartinneqartussaanerinik misissuititseqqullugit,
sulisorineqartussat sunik ilinniagaqartuunissaannik sumilu
ilinniartinneqarsinnaanerinik imalimmik.
- aningaasaqarnikkut sunniutaasussat
itinerusumik misissuiffigineqarnissaannik.
- suliffeqarfinnik qanoq ittunik
nassataqarnissaanik.
- avatangiisitigut sunniutigisinnaasaasa
misissuiffigineqarnissaannik.
Siumumi isumaqarpugut nalunaarusiaq
imartooq najoqqutassaqqissorlu qaquguluunniit suliffinnik annertuumik
sunniuteqartussanik aallartitsinialernissami piareersimaffissanik tikkuussisuusoq
atortussanik iluaquteqarniarluni suliffinnik pilersitsisalernissani
qaqinneqaqqittarumaartoq toqqammavissarsiffiulluarumaartorlu.
Taama oqaaseqarluta Siumumi nalunaarusiaq
tusaatissatut tiguarput.
Peter Ostermann, Atassutip oqaaseqartua:
Nunatsinni pisuussutinik uumaatsunik
annertuumik piiaanerit kingunerisinnaasaat pillugit nalunaarusiaq imartooq
saqqummiunneqaqqammerpoq, suliniuteqarnerit inuiaqatigiit ineriartornitsinni
amerlaqisutigut imaannaanngeqisumik sunniuteqarsinnaasut.
Tamanna tunngavigalugu Atassummut
pingaartuuvoq erseqqissariissallugu, arlaqartutigut suliniuteqarluta
aallartereertariaqartugut, qanoq pisoqassappat arlaqartutigut ullumikkornit
piareersimanerujumalluta.
Nalunaarusiap eqikkaanerit, inerniliineri
inassutigisaalu ima ersaritsigaat tunngavilersorluagaatigalutillu Atassummi
isumarput naapertorlugu ullumikkumiit assigiingitsunik iliuuseqarnissamut
nalorninaatsumik tunngavissaalluarlutik, tassami aatsitassarsiornermik
pisoqalissappat inuiaqatigiit peqataanissaminnut piareersimasariaqarmata.
Nalunaarusiap eqikkaaneri, inerniliineri
inassutigisaalu aallaavigalugit Atassummiit suliniutit imaattut
aallartinneqassasut inassutigissavarput.
Nunami ingerlatsisoqartillugu
sullissinerit suut uagut ingerlassinnaavavut?
Imaani ingerlatsisoqartillugu
sullissinerit suut uagut ingerlassinnaavavut?
Qulaani taaneqartut suliarinerinut
peqatigitillugu ilinnartitsinissamik ilinniartitseqqinnissamillu
pilersaarusiornerit suliffissaaleqisunut naleqqussagaanerusut pilersaarusiorlugit
aallartinneqassapput, ilaatigut Atassummi isumaqaratta
ilinniartitseqqinnermut aningaasaliinerit isumatusaartumik
aningaasaliinerusut.
Assut pingaartutut isigaarput
ilinniartitsinissami pioreersunik atuilluarnissaq aammalu ilinniarfioreersut
qanoq ilillutik suleqatigiissinnaanerannik periutsimik nassaarniassaaq.
Aamma pisariaqartutut isigaarput
suleqatigiinnik aqutsisussanik ilinniartitsinissamik aallarniinissaq
pilersaarusiorneqassasoq, tassanimi oqaatsinik allanik atuisinnaanissaq
pisariaqartussaammat. Taamatut ilinniartitsineq ullumikkut nunanik allanik
suleqateqarnermi ingerlareersumik ingerlanneqarsinnaavoq.
Atassummi aamma isumaqarpugut
ilinniartitsinerit eqqartukkavut ingerlaavartumik ingerlanneqassasut sulisussanik
pissaqartuarnissarput qulakkerumallugu pingaartumillu aamma ilinniartisinikkut
suliffissaaleqisut sulilerseqqinneqarsinnaammata.
Suliffeqareersut soorunami
mattunneqassanngillat, ilinniartitsinermilli ingerlatsinitsigut suliffioreersuni
sulisussaaleqilersinnaneq minnerpaatissavarput, suliffissaaleqisut
siunertaqartumik suliffeqartillugit, pingaarnerpaamilli, ataavartumik
suliffeqarlersinnaanissaannut periarfissiuullugit.
Siunissami aatsitassarsiornermi
inuiaqatigiit peqataallutillu iluaquteqarsinnaanerannut ilinniartitaaneq
annertuumik pingaaruteqarpoq - tamanna qularutissanngilluinnarpoq - kisianni
inuiaqatigiit annerpaamik iluaquteqarsinnaanerannut namminersortut
aallaqqaataanit peqatatinneqarnerat avaqqunneqarsinnanngilaq.
Ilinniartitaaneq inuiaqatigiit
isumagisariaqarpaat, sullissinissamillu ingerlatsivinnik pilersitsinerit
namminersortunit isumagineqartariaqarput. Atassummut assut pingaartuuvoq
sullissivissanik pilersitsinermi pisortat namminersortullu
unammilleqatigiilinnginnissaat.
Aatsitassarsiornermi
isertitariliumaagassat ilaasa inuutissarsiutinik allanik piorsaanissamut
atorneqarnissaannik nalunaarusiap inassuteqarnera Atassummiit assut
isumaqatiginartipparput - tamanna pissusissamisoorluinnarpoq, kisianni aamma
taamatulli pissusissamisoortigaaq ukiorissaarfiusuni ukiorlussiornissamut
toqqorterinissaq.
Qularnanngivippoq siunissami
isertitarineqarsinnaasussat sorpassuarnut atorfissaqassaqisut,
nalunaarusiamili taaneqartut ilaat eqqaamasariaqagarput tassaavoq, aatsitassarsiornerit
atuuffii killeqartarmata, taamaattumillu piffissaagallartillugu silatusaarneq
avaqqunneqarsinnaanngilaq.
Nalunaarusiap aamma taakkartorpaa,
aatsitassarsiornissaq pilersaarusiorneqalerpat peqatigitillugu atorunnarumaarnissaani
iliuuserisassat ilanngullugit pilersaarusiorneqalerpat peqatigitillugu
atorunnaarumaarnissaani iliuuserisassat ilanngullugit
pilersaarusiorneqartassasut. Tamanna Atassummiit isumaqatigaarput, ksianni
allanik suliffissaqartitsinissaq assiginngitsorpassuarnik
tunngaveqartussaavoq, soorlu suliffissat allat qassit iluatsittumik
ineriartortinneqarsimanersut.
Atassummi naliliinerput tunngavigalugu
aamma pingaaruteqartussaavoq inuiaqatigiinni ingerlatsivinni allani
tikisitanik atuineq qanoq annertutiginersoq. Tamanna aallaavigalugu
Atassummiit inassutigissavarput misissorneqassasoq tikisitanik sulisoqarneq
suliassanut aalajangersimasunuinnaq atorneqarsinnaanersoq, tamannalu
naalagaaffeqatigiinnermut Nunanilu-avannarlerni suleqatigiinnermut
akornutaasinnaanersoq.
Naggataarutigalugu nalunaarusiaq
suliaalluartutut nersoqqikkusuppara, annertuumimmi aatsitassarsiortoqalersillugu
sunniutaasinnaasut ersarissumik qulaarluarsimammagit. Atassummiit nalunaarusiaq
suliaalluartutut akuersaarparput suleqataanissamullu piareersimavugut.
Johan Lund Olsen, Inuit Ataqatigiit
oqaaseqartuat:
Inatsisartuni ukiuni kingullerni Inuit
Ataqatigiit inuiaqatigiit kalaallit, aatsitassarsiornermi aatsitassanillu
iluaquteqarsinnaanermik sunniuteqarluartumik, minnerunngitsumillu inuiaqatigiinnut
tamarmiusunut aatsitassarsiornerup iluaqtissanngorluni
pissarsiffiusinnaanissaa tunaartariuarlugu politikkikkut
suleqataaniartuarsimavugut.
Tamanna arlalitsigut ukiut ingerlanerini
Inatsisartunut aalajangiiffigisassanngorlugu oqaluuserisassanngortitsisarnertigut
ersersittarsimavarput. Kingullerlu angusaq tassaavoq 1996-imi ukiakkut
ataatsimiinnitsinni IA-mit piumasaralugu Inatsisartunut
akuersissutigisassanngortissimasarput, tassalu Aatsitassat pillugit Allattoqarfiup
tamarmiusup maanga Nunatsinnut nuunneqartussanngorsimanera. Maanna tamanna
timitalerneqarluni aatsaaginnaq oqaluuserisatsituut 1. juli ukioq manna
pisussanngorpoq - tamannalu inuiaqatigiiusugut tamatta tulluusimaarutissaraarput.
Ukiuni kingullerni tallimani Nunatsinni
aatsitassanik ujaasiniarlutik aatsitassarsiortitseqatigiinnit misissuinissamik
akuerineqaqqulluni qinnutigineqartartut amerleriapiloorsimapput. 1992-imi
misissuinissamut akuersissutit 22-it tunniunneqarsimariarlutik siorna 1997-imi
akuersissutit 70-inngorsimalereersimalerput, tassalu ukiut tallimat
ingerlanerinnaani pingasoriaatinngorsimallutik. Qularutissaanngilaq Nunarput
aatsitassarsiortitseqatigiinnit soqutigineqaqimmat oqarsinnaagunarpugullu
soqutiginninneq taamaatuarsinnarluni suli annikilliartortussaanngimmat.
Aatsitassanik piiaalersinnaaneq
imaluunniit qalluisoqalersinnaanera taamaattumik siunissami
ungaserujussuanngitsumi aamma naatsorsuutigilersinnaagatsigu
miserratigisinnaanngilarput - apeqqutaaginnartorliuna qanoq annertutigisumik
nassaartoqarumaarnersoq aammalu minnerunngitsumik inuiaqatigiinnut qanoq
tamanna sunniuteqarumaassanersoq.
Qularutissaanngilluinnarpormi
inuiaqatigiit aatsitassarsiorfigineqarnerput sunnerneqaatigiumaaratsigu -
ajunngitsunik kisiannili aamma sillimmartaariinngikkutta aatsitassarsiornerup
aamma pitsaanngequtigisinnaasaannik, pingaartumik annertuumik
aatsitassarsiorfiusinnaasumik nassartoqarsimatillugu.
Nalunaarusiaq matumani saqqummiunneqartoq
sillimaffigeriigassatsinnillu nalunaarsuisoq taamaattumik pisariaqartipparput
oqariartuutiginiarneqartullu tassani eqqumaffigisariaqarlutigit. Inuit
Ataqatigiit nalunaarusiaq taamaattunik iluatinnartunik paasissutissiisoq
iluarisimaarparput sorluttaaq Naalakkersuisup saqqummiussinera aamma
ilassilluarumagipput. Taamaatorli uggorilaanngitsuunngilarput nalunaarusiaq
atuareerlugu maanna paasigatsigu nalunaarusiami matumani sammineqartut
amerlanertigut aamma tassaammata 1997-imi ukiakkut kingullermik ataatsimiinnitsinni
sammisareersimasavut, tassa uuliamik gassimillu qalluinerup aatsitassarsiornerullu
inuuniarnermi aningaasaqarnikkut sunniutai pillugit
ataatsimiititaliaareersimasumit allaaserineqareerlutik aamma
nalunaarusiarineqareersimasut tassa una.
Nalunaarusiaq manna taamaattumik
annertunerpaatigut uteqqiineruvoq apeqqutigisariaqarsorivarpullu
ataqatigiissaarisoqartannginnersoq imaluunniit suleqatigiinniartoqannginnersoq?
Pisariaqarsorinanngilarmi Isumaginninnermut, Suliffeqarnermut Pisortallu Suliassaqarfiutaannut
Naalakkkersuisoqarfimmi immikkut nalunaarusiortitsinissaq Aatsitassat pillugit
qullersaqarfittaatsinni taamatorluinnaq aamma sammisaqartitsereerutta. Nukiit
ilisimasallu atulussunnginnissaat siunertaralugu taamaattumik Inuit
Ataqatigiinnit inussiarnersumik noqqaassutigissavarput Pisortaqarfiit taakku
marluusut suleqatigiissinneqaqqullugit - samminiagaammi assigiipput; tassalu
pisuussutinik uumaatsunik piiaanerup inuuniarnermi aningaasaqarnikkullu
inuiaqatigiinnuut kalaallinut sunniutissai pillugit nalunaarsuisitsineq.
Taamaattorli oqaatigeriikkattuut
nalunaarusiaq ilassilluarpaput kisiannili pissutsit makku aamma
oqaaseqarfigilaassallugit.
Aatsitassat - pisuussutinik
uumassusilinnit alllaasutigivaat ukiut ingerlanerini piiarneqarnermikkut
qalluinikkullu nunguttarmata. Taamaaattumik pingaaruteqarluinnartuuvoq
pisortaniit - tassalu Inatsisartuniit inuiaqatigiinniillu tamarmiusunit
isumatusaarniaqqissaarnissaq inuiaqatigiit aatsitassarsiornikkut annerpaamik
pissarsiaqarsinnaanissaat anguneqarsinnaaqqullugu, tassa inuiaqatigiit
siunissaq ungasinnerusoq aamma isigiumaniarlugu aningaasarsiornerannut suliffissaqartitsiniarnerannullu
iluaqutaasussamik.
Imaanngilarmi Fylla-p ikkannersuani uualiamik
gas-imillu nassaartoqarlunilu qalluineqaleriarpat imaluunniit diamant-isiortut
iluatsitseriarpata, pisortat isertittaligassaat imaaliallaannaq siunertanut
assigiinngitsorpassuarnut atupallalersinnaalissagigut.
Oqaatigineqareersutuummii eqqaamaqqissaagassarput pingaaruteqarluinnartoq
tassaavoq; pisuussutit uumaatsut - tassalu aatsitassat, uulia gas-ilu
naassaanngitsorsuarmik iluaqutigineqarsinnaanngimmata arlaannilu
nunguttussaammata.
Taamaattumik pisariaqarpoq isumatuumik
pilersaarusiorluakkamillu inuiaqatigiinni aningaasarsiornitta
patajaallisarneqartuarnissaa, mianerisassat aamma isiginiarneqartuarnerisigut.
Soorunami siunnerfigiuartariaqarparput
aatsitassarsiornermi sapinngisamik amerlanerpaamik kalaallinik
sulisoqartariaqarnissarput, sulisut aningaasarsiassat maani Nunatsinni
kaaviiaaginnarnissaat aamma anguneqarsinnaaqqullugu. Annertunerpaamilli
tamanna angulertorumagutsigu sanioqqussinnaanngilarput
ilinniartitsiuartariaqaratta - tunngaviusumik ilinniartitaanerit aqqutigalugit
kisiannili aamma qaffasinnerusumik ilinniartitaanerit aqqutigalugittaaq.
Taamatuttaaq aamma qulakkeersimaniartariaqarparput suliffeqarfiit Nunatsinni
pioreersut annertunerpaamik aatsitassarsiornermi aamma Aatsitassarsiortitseqatigiiffissuarnut
pilersuisutut kiffartuussinertigullu peqataatinniarnissaat. Tamanna
piumasaqarpoq teknik-ikkut, ilisimasatigut minnerunngitsumillu
aningaasatigut unammillersinnaasuseqarnissamik.
Taagukkat taakkuinnaat
aningaasarpassuarnik inuiaqatigiinni maannakkut piginngisatsinnik
naleqartussaapput peqataaniaruttalu pissarsiariniartariaqarpagut.
Aatsitassarsiornerup tungaatigut danskit naalagaaffiannut isumaqatigiisuteqarnitsigut
- pingaartumik aatsitassarsiornikkut pisortat isertitarisassaat
eqaarsaatigalugit maannakkut pituttoqqavugut, tassa danskit naalagaaffiata
isertitat siullit maannakkut 500 mio. kr.-it tungaanut affaat tamatigut
pisussaareermatigit uagullu inuiaqatigiit kalaallit aamma affaannaanik.
Inuit Ataqatigiit taama
avitseqatigiittariaqarneq qangaaniilli naammagisimanngilarput 1996-imilu
ukiakkut maani ataatsimiinnitsinni allanngortinneqarnissaa piumasarivarput
iluatsinngitsumilli. Pissusissamisoorsorigaluarparput inuiaqatigiit kalaallit
isertitassatigut annermik pissarsitinneqarsinnaanissarput - kikkummiuku
aatsitassarsiornerup pitsaanngitsortarisinnaasaannik eqqorneqaratarsinnaasut?
Uagut inuiatigiit kalaallit - taamaatorli danskit naalagaaffiata isertitat
affaat piumasariuarsinnarpaat naak aatsitassarsiornerup kingunipilorisinnaasai
Danmark-imi misigingaarnaviarnagit.
Tamanna equngavoq - ila ilarpa. Pissutsit
tamakku akuersaaginnarneqasinnaajunnaareerput, pissusissamisoorporlu danskit
naalagaaffiannut nutaamik isumaqatiginninniaqqinnissaq aatsitassarsiornikkut
isertitarineqarumaartussat allatut agguaanneqartalernissaat siunertaralugu.
Suliani ilinniartitsisariaqarnitsinnik
pisariaqartitsisoqarmat oqarpugut, soorlu maani Nunatsinni suliffeqarfioreersut
peqataatinneqarsinnaanissaat aamma pingaartikkipput. Tamakku aningaasartornangaartut
aningaasassaqartinnissaat siunertaralugu taamaattumik periarfissaq manna
tulluartuutillugu siunnersuutigerusupparput naalagaaffiup
pissarsiarisartagassaannit aningaasaateqarfiliortoqassasoq (Rċsstoffond).
Allatut oqaatigalugu pisortat isertittagassaat isumaqatiginninniutigeqqittariaqarput.
Taamatullu naggataarutaasumik
oqaaseqarluta Inuit Ataqatigiit nalunaarusiaq saqqummiunneqartoq tusaatissatut
ilassivarput.
Bjarne Kreutzmann, Akulliit Partiiat:
Nunatsinni pisuussutinik uumaatsunik
annertuumik piiaanerit sunniutigisinnaasaat pillugit nalunaarusiaq
soqutigalugu atuarsimavara. Immaqa isumalluarpallaarsimavunga, tassa pakatsissutigilaarakku
maannakkorpiaq isertitassaasinnaasunik tigussaasunik amerlanerusunik takussutissartaqanngimmat
maannakkorpiaq, kisianni nalunaarusiaq imartuvoq suliarilluagaallunilu, ilaatigullu
teknikkimut annertuumik tunngassuteqaraluarluni, amerlasuutigut paasissutissanik
annertuunik pissarsiffiuvoq silarsuarmullu annertusiallaataalluni.
Piffissaq atorunnaariartuaartitsivik.
Piffissaq atorunnaariartuaartitsivik
aallarniutigigaanni silatusaavissumik oqaatigineqarpoq,
atorunnariartuaartitsinerup nalaani ajornartorsiutaasassasoq sulisut sulianut
inuussutissarsiutinullu allanut nuutsinnissaat. Taamaattumik pisuussutinik
uumaatsunik piiaanermi piffissaq atorunnaariartuaartitsivik sioqqulluarlugu
sulisorisat ilinniartinneqarnissaannut periarfissat
misissorluarneqartarnissaat inassutigineqarpoq, tamanna siumut isigineruvoq
pitsaalluartoq.
Sulisussaqarniarneq ilinniartitaanerlu
pillugit oqallinnermut naleqqutsillugu nalunaarusiami inassutigineqartut ilaat
issuaavigissavara - issuaaneq aallartippoq: "Atortussiassanik iluaquteqarnissamut
ingerlatani sutigut tamatigut aamma suliffitsigut suliaqarfinni tamani
kalaallinik sulisorineqarsinnaasut peqataatinneqarnissaat annertunerpaamik
isumannaarneqartariaqarpoq.
Taamaammat ingerlatat aallartinneqarnerat
aatsaat pisariaqarpoq kalaallinik sulisorineqarsinnaasut peqaatinneqarnissaannut
periarfissat tamakkerlugit pivisunngortinniarneqareerpata. Taamaammat
atortussiassanik iluaquteqarniarnermut ingerlatanut tunngasumik suliaqarnermi
ilinniartitsinissamik pisariaqartitsinerit siumut misissuiffigineqarnissaat aallartisarneqartariaqarpoq,
taassumalu ataani qulaajarneqartariaqarluni maannakkut ilinniarfissatigut
aaqissuussani tigusisinnaanerup annertussusii, tigusisinnaanerullu
annertussutsit killissarititaat".
Taamatut eqqarsaatersorneq assorsuaq
tapersersornarpoq, taamaattumillu ilinniartitsinissamik pisariaqartitsinerup
annertussusia aallarnersaataasumik misissuiffigineqartariaqarpoq.
Taama naatsumik oqaaseqarlunga
nalunaarusiaq akueraara.
Anthon Frederiksen, Kattusseqatigiit:
Qularutissaanngilaq nunatsinni olie-mik
aatsitassanilluunniit piiaasoqalissagaluarpat, tamatuma nunatsinnut inuinullu
ajortunik ajungitsunillu sunniuteqarnissaa, taamaattumik pisariaqarpoq
maannangaaq sapinngisamik piareersimanissaq sulissutigissallugu.
Minnerunngitsumik ilinniartitaanermut
tunngasut suliniutinut annertuunut ilaasariaqarput. Ilumoorpoq nunat allat
aatsitassarsiornermik, olie-siornermillu misilittagallit ilinniartitaanermut
tunngatillugu isumaqatigiissusiorfiginiartariaqarput.
Avataaniit sulisussanik immikkut
ilinniagaqarsimasunik tikisitsisarnissaq miserratigineqanngikkaluartoq,
taamaattoq pisariaqarpoq sapinngisamik kalaallit amerlasuut
olie-siulersinnaanermi, aatsitassarsiulersinnaanermiluunniit
ilinniartinneqarlutik sulisorineqarnissaat.
Nunatsinni olie-qarsinnaaneranik,
aatsitassaqarsinnaaneranillu misissuinerit ukiuni kingullerni 100-ini
arlaqalersuni ingerlanneqareerput. Misissuisarnerillu kingunerisaannik ukiut
1900-ikkut aalartinneranni Qaarsuarsunni aamaruutissanik piiaaneq
ingerlanneqarsimavoq, tamatumalu kingorna 1920-ikkut qiteqqunneranni Qullissani
aamarutissiorfik ammarneqarluni, illoqarfimmik pilersitsiviusoq. Taamatullu
aatsitassarsiornerit Mestersvig-imi, Ivigtut-ni Uummannallu eqqaani Inngili
Qernertumi kingornalu tunumi Jameson Land-imi olie-siorluni qillerinerit
ingerlanneqarsimallutik.
Taamaattumik aappaatigut
pakatsissutigaara, nalunaarusiami siuliani taagukkama ingerlanneqarsimaneranni
nunatsinnut inuinullu qanoq sunniuteqarsimanerat eqqartorneqarsimanngimmat,
tassami nalunngilarput Qullissanut tunngatillugu qanoq pisoqarsimasoq aammalu
Uummannap avannaani Arfarlikassaani immamik mingutsitsineq pisimavoq. Allaat
aalisakkat ilaat taavani aalisarneqarsinnaajunnaarsimapput - qanoq tamakku
maannamut nunatsinnut inuinut, aalisakkanut aammalumi uumasunut allanut
sunniuteqarpat? Soorlu tamakku sunniutaat misissuinermi
ilanngunneqarsimanngillat?
Tassami nalunaarusiat suulluunniit
pissutsinik piviusunik tunuliaquteqaraaangamik, suleriaqqinnissamut aallaavissanik
pitsaasunik tikkuussisarmata.
Aningaasaannaat, suliffissalu
pilersinneqarsinnaasut kisiisa eqqarsaatigalugit suliniarneq
ingerlanneqarsinnaanngilaq. Aammalu eqqaamasariaqarpoq inuiannguugatta
ikittuinnaat pinngortitarsuarmi minguinnerpaami najugaqartugut, taamaattumik
aatsitassarsiortoqassagaluarpat, olie-siortoqassagaluarpalluunniit
pinngortitamut, inunnut, aalisakkanut uumasunullu sunniutigisinnaasai
ilanngullugit piareersimaffiginiartariaqarpavut.
Oqallinnerit aamma radio/tv-ilu atorlugit
ingerlanneqartariaqarput.
Tupinnanngitsumik nalunaarusiami danskit
naalagaaffianiit ataatsimoortumik tapiissutaasartut eqaartorneqarsimapput,
aamma aatsitasarsiortoqassagaluarpat, imaluunniit olie-siortoqassagaluarpat
iluanaarutit sumut atorneqarnissaat ilanngullugu eqqartorneqarlutik.
Tassami nalunarusiami pingaarnerutillugit
misissuiffigineqarsimasut tassaapput: akuleriiaartitatut ingerlatat
inoqarfiusunut ataasiakkaanut qanoq sunniuteqarsinnaanerat.
Qanormi olie-siortoqalissagaluarpat, imaluunniit
aatsitassamik annertuumik piiaasoqalissagaluarpat - ikiaroornatup ullumikkut
aamma nunatsinni ajornartorsiutinut ilaallualereersup annerusumik
atugaalersinnaanera, soorlu Heroin, Kokain, Amfetamin allallu ikiaroorniutit
sakkortunerusut nunatsinni atugaalersinnaanerat qanoq ilillugit tamakku
ingalassimatinniarneqassappat aamma qanoq pilersaaruteqartoqarpa? Il.il.
Tassami qularnanngimmat nunatsinni aningaasarsiorneq pitsaanerulissappat
ikiaroorniutit sakkortuut aamma nunatsinnut anngussinnaanerat aarleqqutigisariaqarmat.
Nalunaarusiaq qujanaqaaq assigiinngitsunik
paasissutissiimmat kisianni pissutsinik piviusunik annertunerusumik
eqqartuiffiunerusariaqartutut isumaqarfigaara, tassami sinnattuaqinerit
takorluukkersaarnerillu atuakkanik annerusumik najoqqutallit
saqqummiunneqarmata.
Taamatut naatsumik oqaaseqarlunga
nalunaarusiaq oqaaseqarfigaara.
Mikael Petersen, Isumaginninnermut,
Sulisoqarnermut Pisortallu Suliffiutaannut Naalakkersuisoq:
Siullermik nassuiaat pillugu
oqaatigineqartunut qujassuunga aammalu partiininngaannit Kattusseqatigiinniillu
nassuiaatigineqartut saqqummiussuunneqartut soorunami ilai ataasiakkaat
oqaaseqarfigineqaraluartut naammagisimaarinnittumik aammalu suliap
ingerlaqqinnissaanut inassuteqarfigineqartut akuersaarneqarlutik
oqaatigineqarmata qujassaanga.
Partiininngaanniit ataasiakkaaniik
oqaatigineqartut oqaaseqarfiginnginnerani pinngitsoorusunngilanga
oqaaseqaqqaalaassallunga ataatsimut isiginnittumik.
Siullermik una nassuiaat Inatsisartunut
massakkut saqqummiunneqartoq tassaavoq siullerpaaq taamatut imaqartinneqartoq.
Tassa imaappoq Inatsisartuni aatsaat siullerpaamik saqqummiisoqarpoq
aatsitassarsiornerit annertuut pilissagaluarpata tamakku
kingunerisinnaasaatigut sulisussatigut qanoq inissisimasoqarneranik
ullumikkut aammalu siunissami qanoq iliortoqarsinnaaneranik imaqartumik.
Siornatigut aatsitassarsiorneq pillugu
maani inimi oqallittoqaraangat sorparujorujussuit ataatsimut
eqqartorneqartarput paatsiveqanngitsumik. Aatsitassanik piiaaneq
eqqartorneqartarpoq, aatsitassaq sunaanersoq Zink-iunersoq, Guld-iunersoq
Sĝlv-iunersoq, taassuma iluani avatangiisit uumasut, aqqusernit, sulisussat,
nerisassat ilami sorpassuit aatsitassarsiornermi piiaanermut akuliullugit
paatsiveqanngitsumik oqallisigineqartarput. Aamma maluginiarpara matumani
taamatut ileqqajaasoqartoq.
Uani uanga saqqummiussanni saqqummiuppara
sulisussatigut kingunissat pisussallu aammalu qanoq iliuusissat.
Saqqummiutinngilakka avatangiisinut tunngasut, aningaasanut tunngasut.
Tamakkuali soorunami pinngitsoorneqarneq ajorput aamma arlaata tungaatigut
attupillalaassallugit, nalilersuineq eqqarsaatigalugu.
Kisianni eqqaamaqquara uani
sulisorineqartarumaartussat pillugit nassuiaat imaqarmat aatsitassarsiornernut
atatillugu.
Nassuiaammi ersarilluinnartumik
oqaatigineqartut assersuutit taalaarlakka.
Maani Nuup eqqaani Fylla-mi gas-imik
piiaasoqalissagaluarpat allaat taaneqarput 1.600 angullugit, toqqaannartumik,
sulisorineqarsinnaasut. 1.600 inuit.
Zink-imik akuiaavissuarmik
pilersitsissagutta nunatsinni toqqaanartumik tassani suliffeqartussaassapput
400-it.
Allani taagorsinnaavoq
assigiinngitsorpassuarni aamma siornatigut pisimasut. Qullissat sukaruttoramik
taamanikkut 2.300 angullugit inoqaleraluarput, 2.300-it. Taava inoqarfiup
taassuma aamaruutissanik piiaanerat tunngavigalugu tassa inuit taakku
napatitai.
Taamaattumik uani eqqartorneqartoq
qassupittumik isigineqassappat tupigissavara maani Inatsisartuni.
Siunissami aatsitassarsiorneq annertooq
ingerlanneqalissappat Nunatsinni, soorlu aatsaannguaq taaneqartut kisitsisit
1.600-it inuit sulisorineqassappata toqqaannartumik, taassuma avataasigut aama
malitsissai nalunngilagut
Allarpassuusut aamma suliffinnik nutaanik
pilersitsiviusussat.
Taakkualu ullumikkorpiaq
takusinnaanngivippagut suusut, nalunaarsorsimannginnatsigit suli. Ila
suliffippassuarnik nassataqassaaq, allanik aamma.
Tamakkuuppullu tassaasut
sulisussaqarniarnikkut uagut piareersimaffiginiarlugit aammalu piareersarneri
aallartinniarlugit Inatsisartunut nassuiaat manna pilersinneqartoq.
Taamaattumik oqaatsit inussiarnersut paasinnittullu assorujussuaq
nuannaarutigaakka partiiniik ataasiakkaaniik aammalu tassunga atatillugu
inassutigineqartut partiiniik ataasiakkaaniik akuersaarneqartut paasivakka,
soorlu assersuutigalugu aatsitassanik piiaanissamut assersuutigalugu Zink-imik
piiaasoqassappat, Olie-siussagutta, Gas-imik piiaassagutta allanilluunniit
aatsitassanik piiaasoqassappat suut ilinniartitaanerit pisariaqassanersut,
nalilersorneqaqqissaassasoq aammalu ilinniartitaanikkut periusissat suliassallu
aallartisarneqalissasut Naalakkersuisunut.
Tassunga atatillugu soorunami
nalilersuutit piumasarineqartut aamma paasivakka Siumup oqaluttuaniit
aningaasarsiornikkut kingunerisinnaasat, taakkua ukiarmi ilanngullugit
eqqartorneqartut, taakkua suliassanut aamma ilaassapput.
Kiisalu aamma inassutigineqarpoq
suliffeqarfinnik qanoq ittunik nassataqarnissaat, tassa aatsitassarsiornerit
nassataqarnissaat ilanngullugu nalilersuiffigineqassasoq.
Avatangiisinut tunngasut, takkua allami
ingerlanneqassapput suliarineqarlutillu.
Naalakkersuisuni piumasaqaatit taakku
suliareqqissavavut aammalu Inatsisartuni kingusinnerusukkut taakku pillugit
saqqummiussiumaarluta, minnerunngitsumik sulisoqarnikkut siunissami qanoq
nunatsinni aaqqissuussisoqarsinnaanersoq aatsitassarsiornernut
takkukkumaartussanut tunngatillugu, taakkua tungaasigut itisuumik
imaqartussamik.
Immikkut oqaaseqarfigilaarusuppara Inuit
Ataqatigiit oqaaseqartuat. Inuit Ataqatigiit oqaaseqartuata saqqummiinermini
ilanngullugu taavaa Aatsitassarsiornermut Allaffissarput tassa 1. juli maanga
nuunneqartussaq uagullu tassa Sulisoqarnermik Pisortaqarfik
suleqatigiissinnaannginnersugut? Soorunami suleqatigiissinnaavugut taanna
ajornartorsiutaanavianngilaq. Aamma imatut oqartoqassanngilaq Aatsitassanut
Allattoqarfiup suna tamaaviat suliarissagaa, allaat sulisunut tunngasut.
Aatsitassanut Allattoqarfiup suliassani suliarissavai aamma ersarilluinnareerput
aatsitassat suut nunatsinni misissorneqassanersut, piiaarneqassanersut, ila
taanna suliassaq annertoreeqaaq. Imaannaanngeqaaq.
Taamaattumik sulisussaqarniarnikkut
tunngasut, suliassat Sulisoqarnermik Pisortaqarfimmit pilersaarusiorneqarlutik
nalilersorneqarlutik soorunami Allaffeqarfik suleqatigalugu ingerlakkutsigit,
soorluna ajornavianngitsoq.
Tassa Naalakkersuisuni akisussaaffiit assigiinngitsut
agguataarneqarnerat aammalu suliassat siunissami qanoq ilusilersorneqarnissaat
pillugu Naalakkersuisut namminneq tamanna ilusilissavaat.
Oqarfigiinnassavara Inuit Ataqatigiit
oqaaseqartuat, ilaana suleqatigiissaqqaarpugut aamma tamanna avaqqunneqarsinnaanngilaq.
Kiisalu Inuit Ataqatigiit
tungaanninngaanniit immikkortoq 6-imut, tassa matuma siulianut oqallinnermut
atatillugu saqqummiussuunneqartut aamma saqqummiunneqaqqipput matumuuna
naqitanngorlugit tassa aatsitassanik piiaanermi Naalagaaffiup ilua,
Naalagaaffiip uagullu Namminersornerullutik Oqartussat akornatsinni
aningaasatigut avitseqatigiittarnermut tunngassuteqartoq.
Oqaatigiinnassavara taanna uani massakkut
pineqartumi eqqartussannginnatsigu, siuliani aamma eqqartorneqareermat aamma
siunissami taanna aatsitassat pillugit isumaqatigiissutit nalilersorneqarneranni
ilanngunneqartarumaarmat, soorlu Naalakkersuisut Siulittaasuata aamma erseqqissareeraa.
Nassuiaat matumani saqqummiunneqartoq
ilassilluarneqarpoq soorlu oqareertunga, taamaattumik suliassat
inassutigineqartut ilanngullugit Naalakkersuisoqarfinni Naalakkersuisunilu
tamani ingerlatseqqikkumaarpagut.
Johan Lund Olsen, Inuit Ataqatigiit
oqaaseqartuat:
Oqaaseqarfigilaarniarpakka marlussuinnaat,
tassa siullermik Naalakkersuisup una oqaatigisaa tassagoq aatsaat maannakkut
aatsitassarsiortitsilernermi pingaartumik nassaarsimasoqartillugu
sulisoqarniarnermi pissutsit aatsaat saqqummiussinermi
nalunaarsorneqarsimammata.
Saqqummiussinitsinni tassa eqqaasissutigivarput
Inatsisartut ukiaq ataatsimiikkatta aamma sammisaqarsimagatta, tassa
nalunaarusiortoqareersimammat aatsitassat pillugit Allattoqarfiup ataani
suleqatigiissitariaareersimasumik, tassani aamma takusinnaavara
Isumaginninnermi Naalakkersuisoqarfik aamma Suleqatigiissitaliamut
peqataasimasoq. Tassanilu nalunaarusiami erseqqilluinnartumik
nalunaarsorneqarsimapput soorlu assersuutigiinnarlugu maani Nuummi
zinkraffinaderi-mik pilersitsisoqassappat inuit qassit sulisorineqarsinnaanersut,
tassani erseqqilluinnartumik allassimareermat.
Taava Fylla-p ikkannersuani
olie-siortoqartillugu aammalu nassaartoqartillugu sulisoqarniarnermut
tunngassuteqartut aamma nalunaarsorneqareersimapput aamma Fylla-p ikkannersua
gas-imik nassaartoqarsimappat qassimmitaava tassani sulisorineqarsinnaappat,
tassa Naalakkersuisup eqqorluinnartumik oqaatigivaa amerlanerpaaffissaat
taggissagutsigu tassa 1.600-t gas-imik nassaartoqassagaluarpat
sulisorineqarsinnaapput.
Tunup Avannaarsuani zink-imik ujaasinermi
tassa Citronfjord-imi nassaartoqassagaluarpat aamma inuit qassit
sulisorineqarsinnaasut aamma tassani nalunaarsorneqareerput.
Aammalu Nanortalimmi guld-isiorneq
iluatsissappat, guld-imillu iluaquteqarnissaq tanna iluatsissappat qassit
sulisorineqarsinnaanissaat aamma tassani nalunaarsorneqarsimallutik.
Kisianni tassa una oqaatigiinnassavara,
qujanassusiami ila maannakkut suleqatigiissammata. Kissaatiginaqaarmi,
marloqiusamik ingerlatsisariaqanngilagut, ilisimasat aammalu aningaasat taama
iliornitsigut aningaasat atulussuinnartaratsigit pisariaqanngitsumik.
Taamaattumik tassa neriuutigivarput
Pisortaqarfiit taakkua marluk pineqartut, tassa Suliffeqarnermut
Pisortaqarfik taavalu Aatsitassat pillugit Pisortaqarfittaarput qanimut
suleqatigiinnialerumaartut.
Taava aamma una
oqaaseqarfiginngitsoorusunngilarput, maani saqqumiussisut partiini allaneersut
tassa Atassummeersut Siumumeersut allallu tamassi oqaatigivarsi
ilinniartitseqqinnissarput taanna sanioqqussinnaanngilarput.
Aamma suliffeqarfiutigisagut pioreersut
aatsitassarsiornermi peqataatinniarnissaat taanna aamma
qulakkersimaniartariaqarparput. Kisianniuna tassa saqqummiussuinissinni
aningaasalersorneqarnissaat qanorlu aningaasalersorneqarsinnaanersut taakkua
tikinneqanngitsut. Inuit Ataqatigiit taakku uagut
siunnersuutissaqarfigereerpagut qanoq aningaasalersorneqarsinnaanersut.
Maannakkut inuiaqatigiinni
aningaasarsiornerput ima inissisimavoq ilinniartitaanernik nutaanik
aallartitsisinnaanata. Kisiannili uani tamassi oqaluppusi, aap
ilinniartitseqqittariaqarpugut, ilinniarfinnik nutaanik aallartitsisariaqarpugut,
naammi akissasi?
Taamaammanuna uagut siunnersuutigigipput,
atagu danskit Naalakkersuisui isumaqatiginninniarfigeqqeriartigit aatsitassarsiornermi
aningaasatigut Pisortat isertittagaat taakkua allatigut
agguaanneqartarsinnaanissat taanna anguniarumallugu.
Anguniarsinnaavarput, aatsitassat pillugit
aningaasaateqarfiliorsinnaanissaq danskit Naalakkersuisuisa danskit
Naalagaaffiatalu aningaasalersugaannik, taanna anguneqarsinnaavoq piumasarigutsigu.
Tamannalu maani Inatsisartuni partiit tamarmiulluta isumaqatigiissutigalugulu
danskit tungaannut piumasarissallugu isumaqatigiissutigigutsigu.
Taamaattumik taakkarsukkasi assigiinngitsorpassuit
oqaasiinnaassanngippata tassa sanioqqunneqarsinnaanngilaq aamma
aningaasalersornissai taakkua qulakkeerniartariaqassagatsigit, Inuit
Ataqatigiit taanna uagut eqqarsaatigereerparput.
Lars Karl Jensen, Siumut:
Unaana sunniuteqarsinnaanermisut takussutissiaq
pitsaasorujussuartut oqaatigeqqaalaariarlugu maqaasisanni
taasaqalaarniartunga.
Aatsitassarsiorneq, olie-siorneq
imaluunniit gas-imilluunniit qalluineq imartatsinni pilissagaluarpat,
aatsitassallu nunatsinni. Illoqarfinnik pilersitsisinnaaneq ersarinnerusumik
eqqartorneqanngilaq. Suliffeqarfinnik qassinik sulisoqarnissamik
takorluuinerit taakkartorneqarput.
Maannakkumut upalungaarsimanermi
ilannguttariaqarpoq illoqarfiit pioreersut soorlu imartatsinni gas-eqarfinnik
qalluisoqalissagaluarpat umiarsualiveqarneri sukkut atorneqarsinnaanersut?
Olie-siortoqalissagaluarpat tamanna aamma umiarsuarnik pilersuisoqarnermi
nassataqartussaasoq eqqarsaatigalugu tassa siusinnerusukkut
oqaluuserisassanngortinniarnikuugaluarpaa upalungaarsornermut ilanngullugu
Paamiut pilersuivittut umiarsualivittut atorsinnaanera, tassa
forsyningsstation-itut, innersuussutigalugu.
Qularutiginngilara malitseqarumaartoq
tamakkuninnga ersarinnerusunik maani oqaluuserisassatsinni kingusinnerusukkut.
Aammalu avinngarusimasuni ungasissuni
illoqarfinnut pilersitsisoqassappat aatsitassarsiorfinnik sulisutigut aamma
pisinnaaffissat pisussaaffissallu
aaqqissuunneqartussaapput.
Imaappoq ataatsimut inuiaqatigiit inooriaatsitsinnik
annertoorujussuarmik eqqorneqartussaavugut aammalu siusinnerusukkut
pilersaarutaasartut kingumut qiviaraanni sunaluunniit sivitsoruttoorsinnaasoq
aamma takorlooreersinnaavarput.
Soorlu zink-imik akuiaanissaq 1956-imi
AG-imi Atuagagdliutiniittoq, Atuagagdliutinik taaneqartarallarmata,
eqqartorneqalerpoq maani Nuup eqqaani ikani qeqertannguami Aqissersiorfimmi
inissinneqarnissaa piukkunneqarluni.
Ukiorpassuit qaangiussinnaapput aamma
upalungaarsornitsinninngaanniit piviusunngortitsinissap tungaanut.
Kisianni uani ilaatigut illoqarfinnik
nutaanik pilersitsinissaq immaqa ruujorersualersornissaq immap
naqqatigoortumik akikinnerunissaat eqqarsaatigalugu illua'tungilertariaqarpoq
inuiaqatigiit aningaasarsiornerannik illoqarfioreersuni qanoq ililluni
akikinnerusumik siunissamullu ungasinnerusumik iluaqutaasinnaasumik
takorluukkersaarutit ilaneqarpata.
Ilaatigummi aamma Qullissat
taatsiarneqarput inuppassuaqalernikuupput aammarsuarsiornerup nalaanni, ukiut
arlallit najugarineqarput, qimanneqaramillu nalunngilarput inuussutikkut qanoq
najugaqartunut oqimaatsigisoq. Tamakku tamaasa nalelersueqqinnissami
ilanngunneqassasut neriuutigissavara.
Peter Ostermann, Atassut:
Siullermik una erseqqissaqqilaarlara
soorlu oqaaseqarnitsinni ersarissumik oqaatigigipput maannangaaq
aallartittariaqartugut paasiniarlugu suut uagut nammineq inuiaqatigiinni
isumagisinnaavagut, sullissinerit imaaniippat nunamiippat, suut
sapinngilagut? Isumaqarpunga assut taanna pingaartoq maannangaaq utaqqinata
arlaannik takkuttoqarnissaannut, soorlu assersuutigisinnaavarput aasaq manna
Fylla-p ikkannersuani qillerinissaagaluaq aappaagumut kinguartinneqarpoq.
Maannakkut pilersaarusiortoqarpa nunaminngaanniit sullinneqarnissaq
isumagineqarnissaq suut pisariaqartinneqartussaappat? Suuppat? Uanga
tusagaqanngilanga -
Ilisimasaqanngilanga.
Piareersartoqalereersoq sullissinissamut.
Pisariaqartitsissapput nunaminngaannit arlaatigut sullinneqarnissamut, taanna
qularnanngilaq.
Isumaqarpunga taanna assut pingaartoq oqallinnermi
uani qulaariissallugu. Massakkumiit aallartittariaqarpugut.
Aamma uagut isumaqarpugut massakkut
suliffissaaleqineq annertuutut taasariaqagarput millisarniassagutsigu
ilinniartitsinerit tamakkua aqqutigisariaqarigut, utaqqinagu soorlu IA oqartoq
isaatitsileruttagooq aatsaat akissaqalissuugut tassagooq taakku
akilersuutissagut. Soqanngippammi, soqanngippammi taava? Utaqqissavarput
isaatitsilerumaarnissarput aatsaallu ilinniartitsinialerluta? Suut tamarmik
aallartereerpata, taamatut pilersaarusiortoqarsinnaanngilaq, pilersaarusiornerunngilaq
tamanna.
Ullumikkut aana uagut oqaaseqarnitsinni
ilinniartitsinissami, ullumikkut aana ...... suliffissaaleqisut, immikkut
ilinniartitaasartut imaluunniit ilinniarteqqittariaqartut, siunissaq
imaqarnerusoq eqqarsaatigalugu isumaginninnikkut aningaasanik
tunioraannarnagit tapersersorniassagutsigit. Ilinniartitsineq
aallartittariaqarparput.
Imaassinnaavoq uuliasiornermut
aatsitassarsiornermulluunniit suliffissarseriataartu iluaqutissaasa ilagivaat
maannakkut aallartinnerup aamma uagut piumassuseqarpugut aningaasanik
amerlanerusunik pisariaqartitsisoqassaaq, pisariaqartitsisoqassappallu aamma
uagut piareersimavgut tassani nalileeqataassalluta. Piareersimavugut, kisianni
utaqqerusunngilarput arlaannik takkuttoqarnissaa, massakkut
piareersarusuppugut.
Una IA-p uteqattaagaa Naalakkersuisumut
Ilaasortap ersarissumik akereeraluaraa uanga tupigikulukkiga eqqumiigimmagu
qangali naatsorsuinerit ersereersut aamma uani atoqqinneqarmata. Tassa
suleqatigiinneq allanik paasisat uani atorneqarput nalilersuinermilu
ikorfartuutigalugit tunngavilersornermi erseqqissaatigalugit
siunnersuuteqarnermi inassuteqarnermi tunngavilersuutigalugit aajuku
imaattussaapput uku paasisaat, taava uagut sumut atussavarput taakkua ilinniartitseqqinnissamik
pisariaqartitsivugut, sumilluunniit tupinnaateqanngilaq taamatut atorluaaneq.
Laannguaq Lynge, Siumut:
IA-minngaannit ujartorneqarpoq uagut ilinniartitaanermut tunngatillugu siunnersuutinik eqqaasaqarsimannginnerput, ilinniarfinnik nutaanik uagut eqqarsaateqanngilagut siullermik, kisiannili oqarpunga erseqqivissumik ilinniartitaanerup iluani ilinniarfiit pioreersut suleqatigalugit ilinniarfissanik pilerinarsaanikkut imaluunnit nunani allani ilinniagaqarsinnaanerit aqqutissiuunneqarnerisigut. Isumaqarpunga tassani Siumumi uagut assut tikkuagaqarluta erseqqissumik maanni ilinniarfinnik nutaavissuarnik sanaqqaanngikkaluarluni ilinniarfiit pioreersut atorlugit ilinniartitsineq aqqutissiuunneqassasoq, aamma taamaaliortoqassatillugu soorunami pisussaavugut aningaasaqarniarnissaa aamma isumaginiarsarissallugu. Taamaattumik aamma isumaqarpunga tamaatut oqareeratta aamma arlaatigut aningaasaliiffigineqarnissaa eqqanaartariaqarumaarippput piffissaq taanna tikippat.
Mikael Petersen, Isumaginninnermut, Suliffeqarnermut Pisortallu Suliassaqarfiutaannut Naalakkersuisoq:
Uteqqaataarinianngikkaluarpunga aammalu Atassutip oqaaseqartuata kingullermik oqaaseqarnermini isumaqarpunga ersarissumik erseqqissaraa suliassat pineqartut uani aammalu nassuiaammi saqqummiussuunneqartut nalilersuutinik arlalinnik imaqarmata aamma siornatigut saqqummiunneqartareersimasuni soorlu Inuit Ataqatigiit oqaluttuata ilanngullugit taagorai, ukiarmi aatsitassat pillugit aamma oqallinnermi saqqummiunneqarsimasut fylla-mi gassimik piiaasoqassappat 1.600 sulisorineqarsinnaasut.Uani erseqqissaqqilaarusuppara aatsitassat piiarneqartussat eqqarsaatigalugit sulisussatigut ilinniartitsinissat imaannaanngitsuummata tamatta nalunnginnatsigu aamma piffissarujussuaq atorlugu ilinniartitsinerit ingerlanneqartarmata, maannangaaq aallartereernissaat eqqarsaatigalugit massakkut naalakkersuisuninngaanniit Inatsisartunut piumasavut akuersaarneqartut paasinarmata tassa aallartinniaritsi pilersaarusiorniaritsi aatsitassarsiornermut sillimaffigisassavut massakkut tamaasa eqqanaarsarlugit sulilluta aallartissinnaanngorpugut taamaalilluta. Taamaattumik tamanna assorujussuaq nuannaarutigaara oqaluuseriinnarnagu kisianni qanoq iliuuseqarfigalugu massakkut taamaalilluta aallartissinnanngoratta.
Aamma Siumut oqaaseqartuata erseqqissaataa naalakkersuisuni pingaartilluinnarpaparput ilinniarfiit pioreersut atorlugit ilinniartitsinissat ingerlanneqassasut, ilami ilinniaffitsialassuarnik peqarpugut, Sanaartornermi Ilinniarfimmi Sisimiuni, maani Savimminilerinermi Ilinniarfimmi Nuummi aammalu allani naalagaaffeqatigiinnerup iluani immaqalu aamma Danmarkimi periarfissat assigiinngitsut atorlugit aamma ilinniartitsinerit ingerlanneqarsinnaassapput. Naatsorsuutigaarput Naalakkersuisuni periarfissarititaasut aningaasatigut aamma ilinniartitaanikkut atorlugit tamanna naammassianiarsinnaassallutigu nutaanik aningaasalersuinernik allanik ujarlinngikkaluarluta. Soorunami pisariaqartinneqarpat aningaasaleeqinnissaq allatigut tamanna naalakkersuisuni uterfigiumaarparput.
Anders Andreassen, Inatsisartuni Siulittaasoq:
Taamaalilluni ullumikkut oqaluuserisassani immikkoortup 13-ip oqaluuserineqarnera naammassivoq.
Oqaluuserisaq naammassivoq.