Kalaallit Nunaanni Inatsisartut

Oqaluuserisassani immikkoortoq 15-2		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 18.februar 1998 nal. 13.02

 

Oqaluuserisassani immikkoortoq 15.

 

Radiukkut Fjernsynikkullu aallakaatitsineq pillugu Inatsisartut peqqussutaata allan-ngortinneqarneranik Inatsartut peqqussutissaannut siunnersuut.

(Kultureqarnermut Ilinniartitaanermullu Ataatsimiititaliap isumaliutissiissutaa, Ataatsimiititaliap siulittaasua, Kristine Raahauge, Kultureqarnermut, Ilinniartitaanermut Ilageeqarnermullu Naalakkersuisoq)

Aappassaaneerneqarnera.

 

 

 

Ataatsimiinnermik aqutsisoq: Inatsisartut Siulittaasuat Anders Andreassen.

 

Kristine Raahauge, Ataatsimiititaliap siulittaasua, Siumut:

Inatsisartut Kultureqarnermut Ilinniartitaanermullu Ataatsimiititaliata Radiukkut fjernsynikkullu aallakaatitsisarneq pillugu Inatsisartut peqqussutaata allangortinneqarneranik Inatsisartut peqqussutissaattut siunnersuut pillugu aappassaanneerneqarnissaanut 

isumaliutissiissutaa saaqqummiutissavara.

 

Inatsisartut Kultureqarnermut Ilinniartitaanermullu Ataatsimiititaliaanni siunnersuutip suliarine­qarnerani ataatsimiititaliami ilaasortat uku peqataasimapput: Manasse Berthelsen, Inuit Ataqati­giit, Knud Sørensen, Atassut, Ruth Heilmann, Siumut aamma Kristine Raahauge, Siumut, siulittaasoq.

 

Inatsisartut Kultureqarnermut Ilinniartitaanermullu Ataatsimiititaliaata peqqussutissatut siunner­suut Inatsisartuni siullermeerluni oqaluuserineqareerneratigut peqqussutissatut siunnersuut oqaaseqaatigaalu misissuataarpai.

 

Ataatsimiititaliami ilaasortat amerlanerussuteqartut Siumut aamma Atassut sinnerlugit ilaasortaa­sut Radiukkut fjernsynikkullu aallakaatitsisarneq pillugu Inatsisartut peqqussutissaata allangor­tinneqarneranik Inatsisartut peqqussutissaannut siunnersuutigineqartutut isikkoqarluni appas­saanniigassanngortinneqarluni ingerlateqqinnissaa taperserpaat.

 

Peqqussummi piumasarineqarmat Kalaallit Nunaata Radioani siulersuisunut ilaasortat ataatsi-moortumik inunnut tusagassiuutinut, kulturimut, siulersuinermut inuussutissarsiornermullu tunngasunut paasisimannittut sinniisuusalernissaat. Taamaasillutik siulersuisut annertuumik akisussaaffiligaammata.

 

Tamatumani ataatsimiititaliami amerlanerussuteqartut siunnersut akuersaarpaat pineqarmat  peqqussummi immikkoortoq arferngat, tassalu ”Siulersuisut aningaasarsiaqartinneqarnerat aamma siulersuisunut ilaasortat KNR-mik sullissitillutik taakkununnga ilanngullugit soorlu angalanermut, nerisaqarnermut ineqarnermullu aningaasartuutaasa matussuserneqartarneri pillugit Naalakkersuisut malittaarisassiussapput.”, taasuma ilanngunneqarnissaa aalajangiuppaat.

 

Ataatsimiititaliami Inuit Ataqatigiit ilaasortaatitaat siunnersuummut akerliulluni ikinnerussute­qarluni imatut oqaaseqaateqarpoq:

 

Inuit Ataqitigiit maannakkut piffissaasorinngilaat Radiokkut fjernsyn-ikkullu aallakaatitsisarnerit pillugit peqqussut allanngortissallugu. Ukiarmi ataatsimiinnermi iluarsiissutaasut nammattutut Inuit Ataqatigiinniit  isigineqarmata. Isumaqarlutilli upernaamut ataatsimut iluarsaaqqinnissaq kajungernarnerusoq.

 

Kultureqarnermut Ilinniartitaanermullu Ataatsimiititaliami ilaasortaapput:

Naimángitsoq Petersen, uumallu suliarineqarnerani piareersarnermi sinniisussaa Otto Steenholdt aamma ilaasimalluni, Knud Sørensen, Atassut, Manasse Berthelsen, Inuit Ataqatigiit, Ruth Heilmann, Siumut, uangalu Kristine Raahauge, Siumut.

 

Konrad Steenholdt,  Kultureqarnermut Ilinniaritaanermut Ilageeqarnermullu Naalakkersuisoq:

Qujanaq. Naalakkersuisut naammagisimaarlugu paasivaat Inatsisartut Kultureqarnermut Ilinniar­titaanermullu Ataatsimiititaliaanni amerlanerussuteqartut Naalakkersuisut siunnersuutaat Ataatsimiititaliap isumaliutissiissuteqarnerani tapersersormassuk. Taamaattumik suliassaq oqaaseqarfigeqqinnagu, Naalakkersuisut Inatsisartunut inassutigaat, siunnersuut saqqummiunne­qarnermisut iluseqarluni pingajussaanniigassanngortinneqassasoq.

 

Ruth Heilmann, Siumup oqaaseqartua:

Siunnersuutip siullermeerneqarnerani Siumumiit oqaaserisagut innersuussutigalugit aappassaan­neerneqarnera akuersaarparput, taamatullu isikkoqarluni pingajussaanneerneqarnissaa innersuus­sutigaarput.

 

Knud Sørensen, Atassutip oqaaseqartua:

Maannakkut akuerseqataasuugut, aamma pingajusaanneerneqarpat aamma akuersissuugut.

 

Manasse Berthelsen, Inuit Ataqatigiit oqaaseqartuat:

Oqaaseqannginnitsinni siullermik ajuusaarutigalugu oqaatigissavarput inatsisiliornerit taama tuaviuussaatigalutik ingerlanneqartarmata, ippassarmi isumaliutissiissut naammassivarput, Naalakkersuisullu akissuteqaataat ullumikkut tigullugu.

 

Siullermeerinninnermi oqaaserisimasagut Inuit Ataqatigiinniit innersuussutigeqqisavagut ingammik Naalakkersuisut siullermeerneqarnerani saqqummiinerminni KNR-imi siulersuisut inatsisit malittarisassallu unioqqutillugit akissarsiaqarsimanerat aatsaat novemberimi paasisima­nerarlugu oqarmata, naak nalusimanngikkaluarlugu KNR-imi naatsorsuutit saqqummermata marts-imi 97-imi.

 

Ataatsimiitsitaliap isumaliutissiissutaanni ikinnerussuteqarnitsinnut pissutigineqarpaavarput maannakkut peqqussut mikisunnguakkuuttaarlugu allanngortiterneqarnissaannut piffissaasorinn­ginnatsigu, kiisalu Inatsisartut Aningaasaqarnermut Ataatsimiititaliaata uani pineqartoq aalajan­giiffigereermagu, aalajangiinneralu maannakkumut atuutsilereermat. Inuit Ataqatigiinnilu neriuutigaarput Aningaasaqarnermut Ataatsimiititaliami ilaasortat aalajangiussimasartik attatiin­nassagaat, Naalakkersuisumullu ilanngullugu apeqqutigerusupparput KNR-imi siulersuisuni akissaatisiaasa saniatigut ataatsimiinnersiuteqassanersut.

 

Inuit Ataqatigiit oqaatigeqqiinnassavarput tusagassiutit pillugit isumasioqatigiinnissarsuaq, tamatumalu kingorna peqqussutip nutarternissaannut suleqataanissarput qilanaarigatsigu, uani siunnersuumut akerliussalluta nalunaarutigissavarput.

 

Bjarne Kreutzmann, Akulliit Partiiat:

Isumaliutissiissutip siullermeerneqarnerani Akulliit Partiaata oqaaseqaataa innersuussutigalugit inassutigissavara isumaliutissiissut taama isikkoqarluni pingasussaanik oqallisissanngortinneqas­sasoq. Siulersuisut katitigaanerat pillugu Akulliit Partiiata inassutaa malinneqarsimammat nuannaarutigalugu, peqqussutip ' 10-ani immikkoortutut, immikkoortup arferngattut nutaatut siunnersuummut isumaqataavunga.

 

Anthon Frederiksen, Kattusseqatigiit:

Radiukkut fjernsynikkullu aallakaatitsisarneq pillugu Inatsisartut peqqussutaata allangortinneqar­nissaanik Inatsisartut peqqussutissaattut siunnersuutip siullermeerneqarnerani Kattusseqatigiin­niit oqaaseqaatikka innersuussutigalugu Kultureqarnermut Ilinniartitaanermullu Ataatsimiititalia­mi ikinnerussuteqartut, Inuit Ataqatigiit oqaaseqaataat taperserpara, taamaattumillu taakkua taaseqatigissallugit.

 

Konrad Steenholdt, Kultureqarnermut Ilinniaritaanermut Ilageeqarnermullu Naalakkersuisoq:

Uuma siunnersuutip siullermeernerani maanniissimanngilanga, periarfissarlu manna iluatsillugu qutsavigerusuppara Naalakkersuisut Siulittaasuat, sinnerlunga siullermeernerani Naalakkersuisut sinnerlugit apeqqutinut assigiinngitsunut akissuteqarluni ingerlatsisimammat.

 

Malugaara Ataasimiititaliap ilaasortat amerlanerussuteqartut inassuteqaataat tapersersorneqartoq, tassalu inasutigissallugu taamatut isikkoqarluni pingasussaanneernerminut ingerlatinneqarnisaan­nut inassutaasoq malinneqaqqullugu.

 

Inuit Ataqatigiit apeqqutaannut oqassaanga, apeqqutaat ataaseq erseqqissumik una oqaatigissa­vara, tassa apeqqutigimmassuk taamatut aalajangersakkap saniatigut ataasimiinnersiuteqassaner­sut, taanna erseqqissumik oqaatigissavara: Naamik, ataatsimiinnersiuteqassanngillat.

 

Ilumoorpoq apeqqut taanna Aningaasaqarnermut Ataatsimiititaliami ingerlanneqarsimavoq, tassanilu amigaataasimavoq aalajangersaanissaq aningaasarsiat qanoq annertutiginissaat, tassa siulersuisuni ilaasortaanermusiat annertutiginissaat inatsisini, tassani inatsimmi atuuttumi ilannguneqarsimannginnerat, taannarpiarlu tassa aaqqinniarlugu maannakkut taamatut allanngui­sumik siunnersuuteqarpugut.

 

Isumaqarpunga pisariaqartoq erseqqissassallugu KNR-imut tunngasut annertuumik maannakkut oqallisigisavagut, siornatigut pereersimasut uterfiginissaat kissaatiginngilara isumarpungalu suliffiup annertuumik pisussaaffeqarfiusup, ullumikkuminngaanniit siunissamilu qanoq ingerla­nissaa aaqqiiffigissallugu taanna pingaarnerusoq, taamaattumik partiimiit tapersiillutik oqaase­qartut tapersersuisullu qutsavigissavakka, paasinnillutik akuersaarmata KNR-imi pissutsit aaqqiiffigineqarnissaat pisariaqarluinnartutut uangattaaq isigigakku. Qujanaq.

 

Kristine Raahauge, Ataatsimiititaliap siulittaasua, Siumut:

Inuit Ataqatigiit aallaqqaasiinnerminni eqqaasaat kingusinaarpallaamik isumalitissiissumik tigusineq, ajuusaarutigaarput, kisiat aamma Ataatsimiititaliami ilaasortaatitat amma nalunngilaat suut pissutaasut. Uanilu Ataatsimiititaliami amerlanerussuteqartut, tassa KNR-imi taamatut aaqqiiniarnermi pingaartissimavaat KNR-imi siulersuisut inissisimanerat, tassa qullersatut akisussaaffimmittut tamaasillutik qullersaallutik ulluinnarni ingerlanneqarnerani akisussaallutik.

 

Aappatigut Inuit Ataqatigiit tassani paatsungalaarsinnaasoraakka Naalakkersuisut akissuteqar­neranut, tassami siullermeerinermi saqqummiussani aamma aningaasartuutissat eqqartorneqar­mata, tassa ukiumoortumik pissarsiaqartalernissaat tassani aamma eqqartorneqartorneqarsimallu­tik, kisianni Ataatsimiititaliap taakku annerusumik tikissimanngilai, una inatsisip imassa taanna tassa aallaavigalugu sulisimalluta.

 

Manasse Berthelsen, Inuit Ataqatigiit:

Qujanaq. Aap, maluginiarparput aammattaaq uagut Kultureqarnermut Naalakkersuisoq maan- nga ataatsimiitarfimmut appakaateqqissimasoq, tamannalu iluatsillugu siullermeerinninnermi una saqqummiussimasarput, ilumoorsorinngisarpullu, tassa 97-imi november-imi aatsaat paasisimagaanngooq KNR-imi siulersuisut malittarisassat inatsisillu unioqqutillugit pissarsiaqar­tinneqarsimanersut.

 

Tamanna ilumoorsorinngilarput, marts-imimi 97-imi KNR-ip naatsorsuutai saqqummerput, tassanilu erseqqissumik allassimapput qanoq angitigisumik siulersuisut akissarsiaqartinneqarsi­manersut.

 

Taamaasimappat tupinnassaqaaq nakkutiginnittussaanermik tigummisut, tassa Naalakkersuisut, ileqqoreqqusallu malillugit siulersuisut KNR-mi ataatsimiinnerit tamaasa imaqarniliaat Naalak­kersuisunut ingerlatseqqinneqartarput, imaluunniit malittarisassat malillugit taamaattussaapput.

 

Anders Andreassen, Inatsisartut Siulittaasuat, ataatsimiinnermik aqutsisoq:

Taavalu tassissaagut. Siullermik taasissutigissavarput ikinnerussuteqartut oqaaseqaataat.

 

Tassunga ikinnerussuteqartut oqaaseqaataannut qassit isumaqataapat? 7-it.

 

Taavalu qassit ikinnerussuteqartut oqaaseqaataannut akerliuppat? 23.-it.

 

Taasinngitsoortoqarpa? Naamik.

 

Taavalu Ataatsimiititaliamit siunnersuutigineqartutut isikkoqarluni pingajussaanneerneqarnissaa­nut akuersisut nikueqqussavakka. 23-it.

 

Akerliusut nikueqqussavakka. 7-it.

 

Taamaalilluni immikkoortoq 15, ullumikkut aappassaannerneqarnera naammassivoq.