Kalaallit Nunaanni Inatsisartut

Oqaluuserisassani immikkoortoq 15-3		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Sisamannngorneq 19. februar 1998 nal. 13.19

 

Oqaluuserisassaq immikkoortoq 15.

 

Radiukkut Fjersynnikkullu aallakaatitsineq pillugu Inatsisartut peqqussutaata allanngor-tinneqarneranik Inatsisartut peqqussutissaanut siunnersuut pingajussaaneerneqarnera.

(Kultureqarnermut, Ilinniartitaanermut Ilageeqarnermullu Naalakkersuisoq)

 

 

 

Ataatsimiinnermik aqutsisoq: Inatsisartut Siulittaasuat Anders Andreassen.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Radiukkut fjernsynikkullu aallakaatitsisarneq pillugu Inatsisartut peqqussutaata allanngortin-neqarneranik Inatsisartut peqqussutissaannut siunnersuut.

 

Siunnersuutip aappassaaneerneqarnerani Inatsisartuni amerlanerussuteqartut akuersissutigaat siunnersuut taama isikkoqarluni pingajussaaniigassanngortinneqassasoq. Tamanna innersuus­sutigalugu naalakkersuisut matumuuna inassutigaat siunnersuut akuersissutigineqassasoq.

 

Manasse Berthelsen, IA-p oqaaseqartua:

Aappassaaneernerani naalakkersuisoq aperaarput ilumoornersoq siullermik saqqummiinermi oqarnerat. Tassa KNR-ip siulersuisui malittarisassat inatsisillu unioqqutillugit akissarsi-aqartitaasimaner­at ilumut november-imi 1997-imi paasisimaneraat, tamannalu Kultureqarnermu­t, Ilinniartitaanermut Ilageeqarnermullu Naalakkersuisumut akeqqugaluarparput ilumoornersoq aatsaat november-imi 1997-imi paasisimaneraat naalakkresuisut KNR-imi siulersuisut unioqqutitsisumik akissarsiaqarsimanersut. Tamannalu neriuppunga akineqarumaartoq.

 

Anders Andreassen: Inatsisartut Siulittaasuat:

Taavalu taasissaagut imm. 15-ni, aap oqaaseqaqqinniarluni nalunaarpoq Manasse Berthelsen, IA.

 

Manasse Berthelsen, IA-p oqaaseqartua:

Tupinnaqaaq Naalakkersuisoq Inatsisartunut paasiumasaannik akissuteqarusunngimmat. Tamanna malittarisassani inatsisinik ileqqunik annertuumik unioqqutitsineruvoq. Ileqqut malillugit inatsisartut aperigaangata pisussaavoq Naalakkersuisoq akissalluni Inatsisartut paasiumasaannik.

 

Anders Andreassen, Inatsisartut Siulittaasuat:

Tassa allamik oqaasissaqartuerummat maannakkut taasissutigissavarput inatsisissap imaluunniit. Utoqqatserpunga Kultureqarnermut, Ilinniartitaanermut Ilageeqarnermullu Naalakkersuisusoq.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Suliassaq tassunga tunngasoq siusinnerusukkut oqallisigineqarsimavoq. Tassunga tunngatillugu oqaatigissavara, tassunga tunngasortaa Naalakkersuisoqarfinninngaaniik misissorneqarmat. Tassanilu aamma inatsisileritooq advokat-i sulisinneqarluni. Tassa naatsorsuutigilluinnarpara tassunga tunngasut kingusinnerusukkut saqqummiunneqarsinnaagumaartut. Tassalu toqqaannartumik taanna uani apeqqutigineqartoq ajoraluartumik toqqaannartumik massakkut akisinnaanngilara, kisianni suliassaq ingerlavoq. Neriuppunga taamatut akissuteqarnera apeqquteqartuminngaanniik naammagi-simaarneqassasoq.

 

Ippassaq aamma oqaaseqarninni oqarpunga pisariaqalersoq utertaqattaarfigiunnaarlugu una suliffeqarfimmi KNR-imi pissutsit aaqqinnissaat anguniartariaqaripput,ilaatigullu uani siunnersuummut pineqartoq tassarpiaavoq suliffeqarfiup taassuma eqqissisimasumik ingerlaqqinissaa anguniarlugu aaqqiiniutaasoq.

 

Josef Motzfeldt, IA:

Qularnanngilarmi aningaasarsiat qaffannerisigut aaqqiisoqarsinnaanerani neriunneq Naalakkersuisut attatiinnaraat. Eqqissisimasumik sulinissaq uagut aamma suliffeqarfinni tamani Namminersornerullutik Oqartussat ingerlatsiviini kissaatigaarput.

 

Tassani aalajangersimasunik eqqortunik Naalakkersuisunik suliassat killilersorneqarnissaat pisariaqarpoq. Tamatigut sulisut, siulersuisut pisuutinneqartariaqanngillat. Matumani apeqqutigineqartoq IA-ninngaanniik tassaavoq akineqaannarsinnaavoq marts-imili KNR-ip naatsorsuutai saqqummiunneqarmata allassimapput ataatsimiinnerit imaqarniliorneri naalakkersuisoqarfimmut saqqummiunne-qartuartussaapput ingerlaavartumik.

 

Kisiannili uumap peqqussutip allannguutissatut siunnersuutip siullermeerneranik Naalakkersuisunit saqqummiunneqarpoq Naalakkersuisut KNR-ip pisortaqarfia aperigamikku aatsaat november-ip 17-niani paasisimagaat siusinnerusukkut siulersuisuusartut eqqunngitsumik inatsit unioqqutillugu akissarsiaqartinneqarsimasut. Taavalu Naalakkersuisut nakkutilliinissaat marts-imi naatsorsuutit saqqummermata sumiissimava. Ilumoorpa Naalakkersuisut taanna sianigisimanngikkaat marts-imi naatsorsuutit saqqummermata.

 

Naalakkersuisut nakkutilliisussaanerat suliffeqarfiutitta aamma pisariaqartippaat eqqortunik maleruagassanik najoqqutaqassagunik ulluinnarni sulinerminni.

 

Anders Andreassen, Inatsisartut siulittaasuat:

Tassa allanik oqaasissaqartueruppoq. Taavalu taasissutigissavarput massakkut. Radiukkut fjernsynikkullu aallakaatitsisarneq pillugu Inatsisartut peqqussutaata al­lanngortinneqarneranik Inatsisartut peqqussutissaannut siunnersuut pingajussaaneerneratulli isikkoqarluni. Tassunga akuersisut nikueqqussavakka. 24. Taavalu akerliusut nikueqqussavakka. 7. Taaseqataanngitsut. 0. Taamaalilluni imm. 15 oqaluuserineqarnera naammassivoq, akuerineqarlunilu.

 

Oqaluuserisaq naammassivoq.