Oqaluuserisassani immikkoortoq 22-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 17.februar 1998 nal. 15.17
Ataatsimiinnermik aqutsisoq: Inatsisartut
Siulittaasuat Anders Andreassen.
Hans Enoksen, siunnersuuteqartoq, Siumut:
Aalisatut Piniartullu Kattuffiat KNAPK
isumannaatsumik ingerlanissaa qularnaarlugu aaqqivigineqarnissaanik
siunnersuuteqarsimavunga Inatsisartut ukiukkut ataatsimiinnissaannut, taannalu
matumuuna saqqummiutissavara. Naluneqanngitsutuut Royal Greenland A/S-ip
Aalisartut Piniartullu Kattuffianik isumaqatigiissuteqarsimanertik unitsippaa,
ilaasortallu akiliutaannik killilimmik ikiuukkumassuseqarluni
tigujoraajumalerluni.
Aalisartut piniartullu inuuniarnermikkut
taamak ajornartorsiortigitillugit atasinnaanerat Kattuffiullu
ingerlaannarsinnaanera isumannaatsumik aaqqiivigineqartariaqarpoq.
Inatsisartunut siunnersuutiginiarpara nunatsinni inuussutissarsiutit
pingaarnersaanik ingerlatsisut kattuffiat KNAPK isumannaatsumik
ingerlaannarnissaa qularnaarniarlugu isumannaarisoqassasoq. Inuiaqatigiit
suliffeqarfiutaat taama torinngitsigisumik pissusilersornera
akuersaarneqarsinnaanngilaq. Kattuffiup ilaasortaasa akiliutaanik killilimmik
tigooraasuujumavoq, Qaammarsaanermullu Aningaasaateqarfimmut allaat
akiliiumajunnaarluni.
Taamatut ingerlaaseqarneq
illersorneqarsinnaanngivippoq akuersaarneqarsinnaanngilluinnarlunilu.
Inatsisartunut siunnersuutiginiarpara nunatsinni aalisarnikkut piniarnikkullu
pisisartut pisiamik akiata, tapeqarpatalu tapiata nalingata 3 procentianik
tamatigut Kattuffimmut nakkartitsisoqartalissasoq. Royal Greenland-iuppat
imalluunniit namminersortuuppata tamaaliornissarlu inatsisiliornikkut
aaqqiifigineqassasoq, tassami akuersaarneqarsinnaanngilaq siunissami kattuffiit
peqatigiiffiillu atorunnaarsinneqartalissappata piginneqatigiiffissuillu
kisimik naalaganngussappata.
Taamatut ingerlasoqalissappat
qanorluunniit isertorniartigigaluaraanni kisermaasineq eqqunneqassaaq inuinnaat
kattuffiillu suujunnaarsillugit. Kaatuffiit peqatigiiffiillu ingerlaasiat
illersorneeruppat ilungersunarluinnartumik inissisimalissaagut, inuinnaat
pisortanut oqartussaaqataanerat tamarmi aserorneqassaaq,
piginneqatigiiffissuillu naalagaaniapilunnerat ataatsimoorluta
akiorsinnaajunnaassavarput, namminerlu iluarisannguaminnik qanoq
iliuuseqarfigiinnartalissavaatigut isiginnaaginnartussanngorluta.
Ullumikkut ingerlaasiulersoq
allanngortinneqanngippat inuiaqatigiit suliffeqarfiutaat allaat peqatigiit
kattuffiillu ingerlanneqarnissaannut peqataajumanngitsut sakkortunerpaamik
naalakkerneqartariaqarput, pinngitsooratik inuiaqatigiit ingerlatitaanerannut
ikiuuteqqullugit.
Taamatut kiffartuussinissamut
peqataajumanngippata isummatillu aalajangiussimaannarniarpatigit inuiaqatigiit
tapiissutaat tamakkiisumik peerneqartariaqarput, pinnguarluni
naalagaajumaannarlunilu nunami maani inuuffikkuminaatsumi
inuusoqarsinnaanngimmat, inuiaqatigiit iluanni ilungersunartumik
inuuniarsarisut pilliutigalugit. Inuiaqatigiinni ingerlaaseq illersorneeruppat
kingunissaa suussasoq uagut inuinnaat akornanni inooqqataasugut nalunngilarput.
Akisussaaffik annertoqaaq,
eqqarsarluartoqartariaqarpoq. Qujanaq.
Paaviaaraq Heilmann, Aalisarnermut,
Piniarnermut, Inuussutissarsiornermut, Nunalerinermullu Naalakkersuisoq:
Inatsisartunut ilaasortaq Hans Enoksen siunnersuuteqarpoq,
KNAPK-p isumannaatsumik ingerlanissaa qularnaarumallugu nunatsinni
aalisarnermit piniarnermillu nioqqutissiassanik tunisaqartartut tunisamik
akiata nalingata 3 procentianik KNAPK-mut akiliisassassut.
Royal Greenland A/S-ip KNAPK-mut tunngaviusumik
isumaqatigiissummik atorunnaarsitsinissaa tikillugu Royal Greenland A/S
tunisinermi tamanit tunisat akiisa 1,25 procentiannik unitsitsisarpoq
aalisartut piniartullu ataasiakkaat KNAPK-mi ilaasortaanermut akiliutaattut.
Tunngaviusumik isumaqatigiissutip atorunnaarsinnerani Royal Greenland A/S-ip
aalisartut piniartullu Royal Greenland A/S-imut tunisisartut tamaasa
allaffigisimavai aalisartut piniartullu KNAPK-mut akiliutissaaminnik
ilanngaatitsittaannarumasut allakkatigut tamanna uppernarsassagaat, tamatumalu
kingorna Royal Greenland A/S-ip siunissami tunisinernit tamanit tunisat akiisa
1,25 procentiat ilanngaatigisassallugu.
Naalakkersuisut isumaqarput
tamaaliornikkut pissutsit imaalissasut, KNAPK-mut imaluunnit
soqutigisaqaqatigiiffimmut kattuffinnulluunniit suugaluartunut,
ilaasortaanermut akiliuteqartarneq inuit arlalikkuutaat
soqutigisaqaqatigiiffimmut imaluunniit kattuffimmut ilaasortaanissaannik
piumassuseqarnerannut erseqqissumik takussutissaqalissasoq.
Tassunga atatillugu Naalakkersuisut
erseqqissarusuppaattaaq sinerissami sumiiffinni arlalinni aalisartut
peqatigiiffiinni nutaanik pilersitsiniarluni suliniartoqarmat soolu
Qeqertarsuup Tunuani, tassani ilaatigut Ilulissani Raajarniat Peqatigiiffiat
aalisariutaatileqatigiiffinnit 20-t missaanik ilaasortaaffigineqarluni.
Suliniutit taamaattut qularnanngitsumik
piffissap ingerlanerani pilersartussaapput, Naalakkersuisut
akuliuffigisinnaanngisaannik sunniuteqarfigerusunngisaannillu. Tamanna
inatsimmi tunngaviusumi '
78-ip nassatariinnarpaa, tassuuna innuttaasut inatsisinik uniuinngitsumik
siunertalimmik peqatigiiffeqarnissaannut pisinnaatitaapput.
Naalakkersuisut qularutiginngilluinnarpaat
aalisarnermik piniarnermillu tunisassiassanik pisisartut ilaasortaanermut
akiliutinik kattuffimmut ataatsimut atiatigut taasamut iluaqutaasussamik
ilan-ngaassisarnissaanik piumasaqarfiusumik inatsisiliornikkut
soqutigisaqaqatigiiffimmik ataatsimik illuinnaasiortumik tapersersuinikkut
Inatsisartut inatsimmi tunngaviusumi tunngavissaatinneqqartut
qaangerujussuarlugit iliuuseqaraluttuartut imaluunnit iliuuseqassagaluartut.
Naalakkersuisut isumaqarputtaaq
peqatigiiffimmut kattuffimmulluunniit aalajangersimasumut akiliutissap
angissusissaa pillugu inatsisiliortoqartariaqanngitsoq. Ileqquuvoq ingerlatsinermut
missingersuutit naapertorlugit akiliutissap angissusissaanik peqatigiiffik
kattuffilluunniit ataatsimeersuarnermini aalajangiisarluni ingerlatsinermi
missingersuutit siulersuisut isumaa malillugu ingerlatsinermut
aningaasaliinermut, isumannaallisaanermut, sillimmatinut il.il.
pisariaqartitanut ersersitsisut naapertorlugit.
Tamanna eqqaassanngikkaanni kattuffik
sorleq inuussutissarsiortut allalluunniit soqutigisaviinik ingerlatsisuunersoq
illuinnaasiunngitsumik toqqassallugu ajornakusoortorujussuussaaq.
Siuliini oqaasereriikkakka
innersuussutigalugit Naalakkersuisut sinnerlugit inassutigissavara Inatsisartut
siunnersuut itigartissagaat. Piffissaq iluatsillugu oqaatigissavara
inussiarnersumik illuatungeriit, tassa KNAPK Royal Greenland-ilu inassagatsigit
isumaqatigiinniaqqullugit, isumaqatigiinniarsareqqullugit, nalinginnaasumik
isumaqatigiissutit pillugit aammalu Qaammarsaanermut Ilinniartitaanermullu
Aningaasaateqarfik pillugu.
Kingullerlu pillugu, tassa
Qaammarsaanermut Ilinniartitaanermullu Aningaasaateqarfimmut tunngasumik,
taanna pillugu Naalakkersuisut piumassuseqartutut uani oqaatigissavara
aqqutissueqataasallutik.
Lars Karl Jensen, Siumup:
Siumup pingaartippaa aalisartut piniartullu peqatigiiffitik kattuffitillu aqqutigalugit pitsaasumik sullinneqarnissaminnut siunnersorneqarnissaminullu periarfissaqartitaanissaat.
Siumumi siunertaraarput nunatsinni innuttaasut tamarmik assigiimmik naligiimillu sullinneqarnissaat, siunertarlu tamanna aamma nunatsinni kattuffinnut atuuttussatut isumaqarfigaarput.
Taamaattumik Hans Enoksen-imit siunnersuutigineqartumisut ilaasortaanngikkaluaruniluunnit kattuffimmut aalajangersimasumut akiliisitaasarnissaat Siumumiit naleqquttuusorinngilarput. Innuttaasoq kinaluunniit nammineq kajumissutsiminik peqatigiiffimmut kattuffimmulluunniit ilaasortaaffigerusutaminut ilaasortanngorsinnaanissaa kisianni innuttaasoq kattuffimmut ilaasortaangitsoq ilaasortaajumanngitsorluunniit pingitsaalillugu kattuffinnut aalajangersimasunut akiliisalernissaanik inatsisiliorsinnaanngilagut, tamanna inasisinut tunngaviusunut akerliussaaq.
Taamatut erseqqissaateqareerluta oqaatigerusupparput Siumumi ilisimagatsigu Kalaallit Nunatsinni Aalisartut Piniartullu Kattuffiat KNAPK tassaammat nunatsinni aalisartut piniartullu amerlanerpaartaasa ilaasortaaffigisaat.
Aamma ilisimavarput KNAPK Royal Greenland-illu akornanni tunisinerit tunisat akiisa procentiinik aalajangersimasunik KNAPK-mut nakkartitsisarneq tassaammat KNAPK-p allaffissornermi ingerlatsinermi uummataatut taaneqarsinnaasoq.
Aningaasat taakku assigiinngitsorpassuartigut aalisartunuinnaanngitsoq, inuiaqatigiinnulli suliniuteqarnermi iluaqutaasumik atorneqarput, soorlu isumaqatigiinniarnernut, aalisartunik piniartunillu siunnersuinernut, aalisartut piniartullu peqatigiiffiinnut ataasiakkaanut, pisortat kattuffiillu akornanni suleqatigiinnernut il.il.
Taamaattumik Siumumiit pingaartutut isigaarput KNAPK Qaammarsaanermut Ilinniartitaanermullu Aningaasateqarfiata innarlerneqarnani ingerlaannarnissaata aqqutissiuunneqarnissaa. Aamma ilisima-varput tamatuma nutaamik isumaqatigiinniutigineqarnissaa ingerlatseqatigiiffimmit KNAPK-mit isumaqatiginiarneqartartumit siunnersuutigineqarsimammat.
Periarfissarlu tamanna aalisartut piniartullu eqqarsaatigalugit KNAPK-mut iluatinnartutut isigaarput. Isumaqatigiinngissutit pillugit KNAPK aamma Royal Greenland matumuuna inussiarnermik kajumissaarusuppagut isumaqatigiinniaqqinnerit aallarnisarneqaqqinniissaat torersumillu inuiaqatigiittut inuiaqatigiinnullu iluaqutissamik aaqqiissuteqaqqullugit.
Suleqatigiinnermi tunngavigalugu nunatta siunissaa sanarfisariaqarparput.
Taamatut oqaaseqarluta Siumumiit Naalakkersuisunut kaammattuutigerusupparput KNAPK Qaammarsaanermut Ilinniartitaanermullu Aningaasateqarfiata ingerlaavartuunissaa qulakkeerniarlu Naalakker-suisut suleqataaniaqqullugit, tamatumani ilanngullugu tunitseveqarfiit aalisakkanik pisiortornermik ingerlataqartut tamaasa eqqarsaatigalugit ilaasortat KNAPK-mut akiliutaasa aammalu Qaammarsaanermut Ilinniartitaanermullu Aningaasateqarfimmut nakkartartussat isumannaarneqarnissaasa aqqutissiuunneqarnissaat isumaqatigiissutit aqqutigalugit pisariaqartoq.
Taamatut oqaaseqarluta siunnersuutigineqartoq ingerlatseqatigiiffiup kattuffiullu akornanni aaqqiivigineqarsinnaasutut Siumumiit isumaqarfigaarput, taamaattumillu aalajangiiffigisassatut siunnersuummut isumaqataannginnerput matumuuna oqaatigissavarput.
Sivert K. Heilmann, Atassutip oqaaseqartua:
Qujanaq. Inatsisartunut ilaasortap Hans
Enoksen-ip Aalisartut Piniartullu
Kattuffiata KNAPK-p isumannaatsumik ingerlanissaa qularnaarlugu
aaqqiivigineqarnissaanik imaqartumik Inatsisartuni oqaluuuserisassanngortitsinera
Atassummiit paasilluarsinnaavarput, imatullu oqaaseqaateqassalluta.
Aallaqqaamut Atassummiit assut ajuusaarnartutut isigaarput Royal Greenland A/S
Aalisartut Piniartullu Kattuffiannik
inuiaqatigiinnut taama pingaaruteqartigisumik isumaqatigiissuteqarnermik
unitsitsisoqarmat.
Siunnersuuteqartoq Atassummiit
isumaqatigaarput oqarmat ukiuni makkunani aalisartut piniartullu
inuuniarnermikkut ajornartorsiuteqarnerat annikigisassaanngitsoq, naak aamma
ukiuni kingullerni assigiinngitsutigut aalisartut piniartullu atugaat
politikkikkut oqilisaaffigineqartaraluartut.
Atassummiit Royal Greenland-ip KNAPK-llu
ullumikkut akunnerminni pissuserisartagaat naalakkersuinikkut
akulerussorfissatut aqqutissatullu isiginngilagut, kisianni Royal Greenland-ip suliffeqarfissui
Namminersornerullutik Oqartussanit tamakkiisumik pigineqartut
aktieselskabitullu ingerlanneqaraluartut aammalu Royal Greenland
akisussaassunik siulersuisoqarluni aqutsisoqaraluartoq, pisariaqalersarpoq
equngasumi ingerlasoqalersillugu politikkikkut aqqutissanik pitsaanerusorisanik
tikkuartuissalluni. KNAPK kattuffiuvoq piniartut aalisartullu
pinngitsoorsinnaangisaat.
Royal Greenland KNAPK-llu ataatsimoorlutik
soqutigisariaqarpaat peqatigiillutik tunisassiassanik akilersueriaatsimik
pilersitsissallutik, tunisassianut pitsaasunut akigissaartitsisumik.
Taamaattumik Atassut illuatungeriinnut
kajumissaaruteqarpoq imminut nassaariniaqqullugit, imminnullu
paaseqatigiinermikkut ullumikkut pisut ajuusaarnartut
oqaloqatigissuutigeqqullugit, tamatumani aaqqiinissaq pisariaqalermat.
Suleriaatsinik sunilluunniit
eqaallisaajuarnissaq avaqqunneqarsinnaanngilaq, illuatungeriilli iminnut
nassaarisinnaanngippata Atassummiit sakkortuumik kaammattuutigissavarput
piginnittut sinnerlugit Naalakkersuisut tamanut naammaginartumik
angusaqarnissaq siunertaralugu akuliuteqqullugit. Inatsisartuni ilaasortap Hans
Enoksens-ip siunnersuuteqarnermini oqaatigaa nunatsinni aalisarnikkut
piniarnikkullu nunatsinni pisisartut pisiamik akiata tapeq, tapeqarpatalu
tapiata nalinga 3 procentimik tamatigut Kattuffimmut
nakkartitsisoqartalissasoq, Royal Greenland-iuppat imaluunniit
namminersortuuppat.
Suliassaq taanna Kattuffiup isumaqatigiinniarnikkut anguniagassaattut
Atassummi isumaqarfigaarput. Apeqqutit taamaattut isumaqatigiinniarnikkut
anguniagassaammata.
Atassutip arajutsisimanngilaa kattuffiit
peqatigiiffiillu allat aalisarnermik ingerlataqartut, pingaartumillu KNAPK-p
suaartaatigiuarmatigit ilaasortamik atugaasa pitsanngorsaaffigiuarneqarnissaat,
soorlu aalisakkat akiisa qaffasinnerunissaannut tunngasut aammalu Inatsisartuni
tusarniaannermi suliakkiutaasartorpassuit kiisalu ilaasortamik
saaffiginnissuterpassui aammalu sulisuminnik amikkisaalertarnerat
aningaasaqarniarnikkullu aporfisaqartarnerat arajutsisimanngilarput.
Taamaattumik Atassummiit pingaarteqaarput
kattuffeqarneq saneqqunneqarsinnaanngitsoq aammalu suliniaqatigiiffiit allat
peqatigiillutik imminnut nassaariniarnissaat pingaarluinnartutut isigaarput.
Arajutsisimanngilarput naalagaaffimmit
tamatumalu kingorna Namminersorullutik Oqartussanit pigineqartunut
suliffissuarnut aalisartut piniartullu tulaassuuinermikkut inuiaqatigiinnut
suliffissaqartitsinikkut aningaasarsiornikkullu pingaaruteqarluinnartumik
napatitsiuarsimanerat. Ullumikkummi aalisartut piniartullu peqatigiiffitik
kattuffitsillu napatippaat tunisamikkut ilanngaatsittarnermikkut.
Ilumoorpoq Royal Greenland A/S-ip
tunngaviusumik isumaqatigiissutit KNAPK-mik atorunnaarsinniarmagit. Royal
Greenland A/S aalisartut piniartullu Royal Greenland A/S-imiit tunisisartut
tamaasa allaffigisimavai kiisalu ilanngaatsitaannarumasut allakkatigut
nalunaarffigisimallugit.
Atassumiit oqaatigissavarput
illuinnaasiunngitsumik ingerlatitsinissaq assut pingaartitarigatsigu,
siuliinnilu oqaatiqeriikkagut aallaavigalugit inassutigissavarput siunnersuut
itigartiinnarneqassan-ngitsoq, aallaavigalugulu Inatsisartut Naalakkersuisunut
piumasarissagaat Royal Greenland-imit piginnittut sinniisui
piumaffigineqassasut ajornartorsiutit qaangerniarlugit iliuuseqartoqassasoq.
Tamatta nalunngilarput KNAPK aamma Royal
Greenland nunatsinni aalisarnerup ingerlanneqarnerani
pinngitsoorneqarsinnaanngitsut, aaqqiissoqarnissaannilli Inatsisartut
piumasaqarnissaat pissusissamisoortoq.
Atassummiit naatsorsuutigaarput
Naalakkersuisut piffissami qanittumi aaqqiisoqarnissaa anguniarlugu
suleqataassasut upernaamullu ataatsimiinnissami nassuiaateqassasut. Qujanaq.
Johan Lund Olsen, Inuit Ataqatigiit
oqaaseqartuat:
Inuit Ataqatigiit Inatsisartunut ilaasortap
Hans Enoksen-ip siunnersuutigisaa sukumiilluinnartumik eqqartorsimavarput,
siunnersuummi apeqqutinik tunngaviusumik aamma isummerfigisariaqakkanik ilaqartiterpoq, soorlu peqatigiiffiit
kattuffiillu namminneq iluminni
aaqqinniagassaattut isikkoqartitertunut pisortat qinikkatik aqqutigalugit qanoq
annertutigisumik kalluussimatinneqarnissaannut tunngassuteqartunik kiisalu
isumaqatiginninniutigineqartussanut
qinikkat qanoq inissisimasariaqarnerannut aamma tunngassuteqartunik.
Taamatuttaaq Naalakkersuisut akissuteqaamminni oqarnerattut Inatsimmi
tunngaviusumi aalajangersakkat Inuit Ataqatigiit nalilersuiniarnitsinni
soorunami aamma qissimigaanngitsoorsimanngilavut.
Siullermilli
oqaatiginngitsoorusunngilarput eqqumiigilaanngitsuunnginnatsigu siunner-suuteqartup
matumani oqaluuserisassanngortitsinermini anguniagai, tassalu aamma kattuffimmut ataatsimut
tunngassuteqarluinnartut, sooq Inatsisartuni immikkut oqaluuserissanerivut
paasiumanaatsikkatsigu.
Inuit Ataqatiimmi isumarput malillugu
aamma imaappoq; siunnersuuteqartumit saqqummiunniarneqartut allakkatigut
akissuteqarfigineqarsinaalluareermata aammalu Inatsisiliortut tungaanniit
peqatigiiffiit, kattuffiit assigisaallu ataasiakkaarlugit pisortanit immikkut
qanoq pineqarnissaat qanorlu kissumiarneqarnissaat qangaaniilli Inatsisartut
toqqaannartumik akuleruffigissallugit ileqqorisimanngisaannaratsigu,
pingaartumik aamma illuatungeriit isumaqatiginninniarnerisa nalaanni.
Taamaattorli imaattunik oqaaseqassaagut:
Inuit Ataqatigiit pingaartipparput pisariaqartilluinnarlugulumi
Nunatsinni aalisartut piniartullu inuiaqatigiinni aamma nukittuumik
inissisimanissaat. Tamanna pisariaqarpoq
aalisartut piniartullu soqutigisaat tutsuiginartumik pitsaanerpaamillu
kinguneqartumik aamma Naalakkersuisunut, Inatsisartunut, Royal Greenland-imut,
Polar Seafood-imut nunanilu allani uumasunik illersuiniaqatigiinnut
allarpassuarnullumi tunngatillugu,
nipaat kissaataallu illersorneqassappata.
Oqaluuserisaq manna Royal Greenland-ip
aalisartut piniartullu kattuffiannut isumaqatigiissutinik tamanit 1. juli 1998
aallarnerfigalugu atorunnaarsitsiniarnerannik ilisimaneqareersutut
aallaaveqarpoq, tamanna tamatta nalunngilarput. Taamaattorli aamma
ilisimaqqissaartariaqarparput aalisarnermi pissutsit maani
Nunatsinniinnanngitsoq kisiannili nunani allani aalisarnikkut aamma
niuerniaqatigiiffigisatsinni, pingaartumik ukiuni kingullerni aamma
allanngoriartupiloorsimammata, aalisarnermik soqutigisallit kikkulluunniit
aamma naleqqussartuartariaqarnerannik aamma piumasaqartumik.
Tamanna soorunami Royal Greenland-imut
kiisalu Kalaallit Nunaanni Aalisartut Piniartullu Kattuffiannut aamma
attuumassuteqarpoq, taamaattumik tamanna aamma eqqaamaqqissaassagatsigu Inuit
Ataqatigiinniit tikkuanngitsuussanngilarput.
Eqqaamaniagassarli pingaaruteqarluinnartoq
aamma tassaavoq Royal Greenland A/S tassaammat suliffeqarfissuaq, nunarsuarmi
aalisakkanik tunisassiornermik tuniniaanermillu ingerlatsivissuaq
suliffeqarfinnut taamaaqataanut annernut aamma ilaasoq.
Taamaattorli, naak Royal Greenland-ip aalisartut piniartullu kattuffiannut
isumaqatigiissumminik tamanik atorunnaarsitsiniarluni periuserisaa
pakatsinarsinnaasutut isumaqarfigineqarsinnaagaluartoq, pisoq piffissami
aggersumi aalisartut piniartullu tungaannit nukillaarsaatitut
isiginiarneqarani, paarlattuanik Inuit Ataqatigiit isumaqarfigivarput
aalisarnermik piniarnermillu inuussutissarsiuteqartut - KNAPK-miippata,
79-eriutiliuppata allatigulluunniit aalisarnermik inuussutissarsiuteqarneq
attuumassuteqarfigippassuk - nukittunerusunngornissaannut periarfissaq manna
aamma atorluarniarumaaraat.
Taamaalinngikkunimmi illuatungerisaq
nukittunerulernissaanut aqqutissiuutiinnarneqassaaq aalisartut piniartullu
kattuffeqarnermikkut suli sanngiinnerulernissaannik aamma kinguneqaratarsinnaasumik.
Taamaattumik aalisarnermik piniarnermillu inuussutissarsiuteqartut,
soqutigisatik aallaavigalugit immikkoortortalersoraluarlutik, nukitik tamaasa
maannakkut ataatsimoortittariaqalermatigit Inuit Ataqatigiit sakkortuumik kaammattuutigissavarput.
Tamannali siunnersuuteqartup
siunnersuutigisaatut anguneqarsinnaasutut Inuit Ataqatigiit
isumaqarfiginngilarput Naalakkersuisut akissuteqarlutik
tunngavilersuutigisaannik aamma isumaqarluta.
Taamaattorli ukiuni kingullerni Inuit
Ataqatigiit tungaanniit siunnersuutigisarsimasatsitut isumaqarpugut, KNAPK
pisortanit aamma tapiissuteqarfigineqarsinnaasariaqartoq Aningaasanut Inatsit
aqqutigalugu, soorlu peqatigiiffippassuit, kattuffiit allallumi taamatut
pineqartartut, pingaartumik KNAPK-p nunat tamalaat akornanni suleqataanikkut
pinngitsooratik peqataaffigisariaqagaanni, pingaartumik piniartut soqutigisaat
aamma illersorniarumallugit.
Royal Greenland A/S ilisimasatsitut, aalisartut piniartullu KNAPK-mut akiliutissaminnik
ilanngaatitittaannarumasut maannakkut allaffigereersimalerpaat. Inuit
Ataqatigiinniit neqeroorutigineqartoq tamanna iluatikkupparput, Kattuffiummi peqatigiiffitik,
KNAPP-eeqarfiit qanimut suleqatigilluarlugit aqqutigalugillu atsiortitsiortornerit
ingerlalluarsinnaareerpaat, neqeroorutigineqartorlu taamaattoq
itigartivinneqassagaluarpat assut ajuusaarnartuutissagatsigu, taamaattumimmi Royal Greenland-imit
neqerooruteqartoqaqqinnissaa naatsorsuutigisinnaagunanngilarput.
KNAPK maannakkut piffissamilu aggersumi
nukittussutsini illuatungerisaminut takutittussanngorpaa. Inuit Ataqatigiit
neriutigivarput KNAPK-p siuliani oqaatigeriikkatsituut aalisarnermik
ingerlatsinermi pissutsit allanngoriartupiloorsimanerat aamma eqqaamallugu, periarfissaq manna aamma
atorniarumaaraat Kattuffeqartariaqarnerup pissutsinut tamakkununnga
allanngorsimasunut aamma naleqqussartuartariaqarnera.
Minnerunngitsumilli neriutigiinnarnagu
aamma kaammattuutigissavarput KNAPK-p periarfissaq manna
nukittunerulernissaminut aamma atorluarumaaraa, assersuutigalugu Qeqertarsuup tunuani raajarnianik allanillu
KNAPK-p iluani avataaniluunniit immikkut soqutigisalinnut qanimut
oqaloqatiginnilernissaminut, pingaarnertut anguniarlugu aalisartut piniartullu
akornanni maannakkut avissaartuutilerneq illuatungilerneqarsinnaaqqullugu.
Avissaartuutilernissaq piffissaanngilaq,
peqatigiinnermi nukiuvoq peqatigiiffeqarnikkullu Kattuffissuaqarnissaq
nukittuunngortitsisarpoq. Taamaattumik aalisartut piniartullu, raajarniartuugunik, qaleralinniartuugunik,
saattuarniartuugunik, piniarnerinnavimmik ingerlataqartuugunik, takorloorparput
soqutigisaqaqatiikkaarlutik imminnnulli ataqatigiillutik Kattuffissuaqalerlutik
illersoqatigissinnaallutilli nutaamik aaqqissuussiffigineqarsinnaasut.
Taamatullu oqaaseqareerluta tunngaviusumik
oqaluuserisassamut uunga Naalakkersuisutuulli isumaqarluta Inuit Ataqatigiit
neriutigivarput aalisarnermik piniarnermillu inuussutissarsiuteqartut tamarmik
agguluttuinnaratik periarfissaq manna atorluarniarumaaraat. Qularutiginngilarpummi
namminneq iliuuseqarsinnaammata, apeqqutaaginnalerporli piumassuseq.
Bjarne Kreutzmann, Akulliit Partiiat:
Akulliit Partiaata assut pingaartippaa
nunatsinni kattuffiit ingerlalluarnissaat, minnerunngitrsumik kattuffiit
inuiaqatigiinnut pingaaruteqarluinnartuugaangata, soorlumi aamma KNAPK
nunatsinnut taamatut atuuttoq.
Kisianni Akulliit Partiiata KNAPK
kattuffiilluunniit allat ingerlalluarnissaanik kissaalluartigigaluarpagit, una
ilumoortoq saneqqutiinnarneqarsinnaanngilaq, tassa issuaavunga: Naalakkersuisut qularutiginngilluinnarpaat
aalisarnermik piniarnermillu tunisassiassanik pisisartut ilaasortaanermut
akiliutinik kattuffimmut ataatsimut atiatigut taasamut iluaqutaasussamik
ilanngaassisarnissaanik piumasaqarfiusumik inatsisiliornikkut
soqutigisaqaqatigiiffimmik ataatsimik illuinnaasiortumik
tapersersuissagaluarunik Inatsisartut inatsimmi tunngaviusumi, tassa
Grundlovemik, tunngavissaatinneqqartut qaangerujussuarlugit
iliuuseqassagaluttuartut. Issuaaneq naavoq.
Itigartsinissamik Naalakkersuisut
inassutaanut tapersersuinissamut tunngavissamik pitsaanerusumik
imaaliinnarlunga nassaarsinnaannginnama, taamatut issuaallunga Naalakkersuisut
inassutaanut tapersersuinera nalunaarutigaara.
Anthon Frederiksen, Kattuseqatigiit:
Inatsisartunut ilaasortat Hans Enoksen-ip siunnersuutaa tunngaviatigut isumaqatigilluinnarpara, tassami suliffeqarfissuit Namminersornerullutik Oqartussanit pigineqartut namminersortunit isaassalerlugu ipioraatitsinerat aammalu maannakkut Royal Greenland-ip aalisartut piniartullu kattuffiannik suujunnaarsitseriaraluarnerat akuersaarneqarsinnaanngilluinnarmat.
Inatsisartunut ilaasortap Hans Enoksen-ip ilumoornera ilaatigut ugguuna taperserniarpra, tassa imatut oqarami: Piginneqatigiiffissuit naalagaaniapilunnerat ataasimoorlutaluunniit akiorsinnaajunnaassavarput kisermaasineq tunngavigalugu ingerlatsineq akuersaartuarneqassappat, taamaattumik pissusipalaat taamaattut Namminesornerullutik Oqartussat suliffeqarfiutaanni iliuuserineqartartut Inatsisartuni suliffissuit sinniisoqarfiisa ilaasortaatitaat aqqutigalugit unitsinneqarnissaat, imaluunniit pinngittoortinneqarnissaa inassutigisariqarpoq, aammalu isumaqarpunga Inatsisartut Royal Greenland-imi sinniisuutitaasa pissutsit maannamut annerusumik akuleruffiginerullugillu KNAPK-lu paaseqatiginerullugu aaqqiinniartoqarsimasariaqaraluartoq.
Ussernartorsiornaraluarpoq peqatigiiffeqarnermut kattuffeqarnermullu tunngasut annerusumik oqaaseqarfigissallugit, kisianni isumaqarpunga Inatsisartut peqatigiiffeqarnermut kattuffeqarnermullu tunngasut akuleruffiginissaat tulluartuunngittoq, tassami Inatsisartut peqatigiiffeqarnermut kattuffeqarnermullu tunngasunut akuleruttalissagaluarpata peqatigiiffeqarnerup kattuffeqarnerullu kiffaanngissuseqartimik nammineersinnaassuseqartumillu ingerlanerat akornusiinnarneqarsinnaannera aarleqqutigisariaqarmat.
Paaviaaraq Heilmann, Aalisarnermut, Piniarnermut, Inuussutissarsiornermut, Nunalerinermullu Naalakkersuisoq:
Qujanaq oqaaseqartunut. Ataatsimut isigalugu paasisakka malillugit inatsisitigut imaluunniit inatsisiliornikkut kattuffimmut aalajangersimasumut Naalakkersuisut aamma oqarnerattut inatsisiliornissaq, tassalu akiliissitsisarluni pinngitsaaliillunilusooq itigartinneqartoq.
Taamatut naatsumik oqariartuutit paasivakka partiinit tamaniit.
Taamaattoq partiit oqaaseqartui aamma soorunami ataasiakkaarlugit oqaaseqarfigilaarusuppakka. Siumuminngaanniit oqaaseqartup Lars Karl Jensen-ip inassutigivaa Naalakkersuisut KNAPK Qaammarsaanermut Ilinniartitaanermullu Aningaasaateqarfiata ingerlaqqissinnaanneranik aqqutissiuussineq Naalakkersuisut peqataaffigissagaat, soorlu SIK-mi aamma taamatut aaqqissuussisoqarsimasoq, taamatut paasivara ilusilimmik siunertaqartoqartoq. Aammalu Siumup oqaaseqartuata isumaqatigiissuteqarnissaq kaammattuutigivaa. Aammalu oqareernittut aamma partiip Siumup siunnersuut taamatut isikkoqartillugu itigartikkaa, ersarissumik paasillugu. Atassummiit aamma pissutsit kattuffinnut tunngasut imaaliinnarluni akuleruuffiginissaat mianeraat. Naalakkersuisullu piumasaqarfigalugit naapisitseriaanermik aamma naapisitsiniaanissaq isumageqqullugu. Aammali paasiuminaatsilarlugu siunnersuut itigartiinarneqarsinnangitsoq, tassa siunnersuutigineqarpoq 3 %-mik kattufimmut tunisartut tamarmik akiliisalissasut. Tassa imatut paasissavara, Atassummut ujartulaassavara ilumut 3%-mik tunisisartut tamarmik akiliisarnissaannik siunnersuut tapersersorneraat. Inuit Ataqatigiit aamma allatuulli imaluunniit Siumukkormiutuulli imaalitsiaannaq akuleruffiginissaa mianersuuppaat aammalu piumanngilaat. Taamaatumillumi nukittorsarnissamik kattufimmik kissaateqarluni. Inuit Ataqatigiit oqaaseqartuata aamma oqaatigivaa kattuffik assigiingitsutigut tapiiffigineqarsinnaasariaqartoq. Ilaatigut taallugu nunat tamalaat akornanni suleqataanikkut pingitsooratik peqataaffigisariaqagaanni, pingaartumik piniartut soqutigisaat aammalu illersorsinnajumallugit periarfissinneqarnissaat aningaaasatigut angalanikkulluunnit tapiifigineqarsinnaaneri, taanna paasivara. Tassa oqaatigissavara tunngatillugu taanna ingerlatilereernikuummat aammalu assersuutitut taasinnaallugu IWC-p ataatsimeersuarnerani, ukiaq Monaco-mi KNAPK-p peqataatsitaanik naalakkersuisut finanslovimi immikkoortitat ilaatigut aqqutigalugit akilussisimammata aammalu neqeroorfigisimavavut kattuffik imaluunnnit KNAPK neqeroorfigisimavarput ukiaq aamma Canadami puisit pillugit ataatsimeersuarnermi peqataasinnaanerat aammalu ukiaq Canadami qilalukkat pillugit ataatsimeeqqatigiinnermi akiliunnissaannut. Kisianni ajoraluartumik tamanna periaarfissaqarsimanngikkaat paasivara. Tassa kisianni maannakkut taamatut akiliussisarneq ingerlalereerpoq. Akulliit Partiiata Naalakkersuisut oqaaseqaataat taperseraat paasivara. Kisiannili Kattusseqatigiit tunngaviusumik isumaqatigaat siunnersuuteqartoq paasillugu aamma. Aammali illuatungaatsigut oqarluni Inatsisartut kattuffeqarnikkut peqatigiiffeqarnikkullu akulerunissaat tunuarsimaarfigisariaqartoq. Taamatut oqareerlunga ujartulaassavara Atassutip ersarissumik oqaaseqarnissaa, tassami siunnersuuteqartup itigartiinnarneqarsinnaangitsoq. Tassunga qanoq isumaqarnersut paaserusussavara.
Bjarne Kreutzmann, Akulliit Partiiat:
Naalakkersuisoq qutsavigissavara
oqaaseqaatinnut paasinninneranut. Unali oqaaseqarfigilaagiinarniarlugu
oqaluttut ilaannut, tassa IA-mit oqaaseqarfigineqartoq tapersersorluinnarakku.
Tassa sooq apeqqutigineqarmat apeqqutigineqarmallusooq sooq
oqaluuserisassanngortinneqarsimava. Isumaqarpunga oqaluuserisassat taamaattut
unitsinneqarsimasinnaasariaqaraluartut, uani kisiat eqqarsaatigaara, tassa uani
inatsisip tunngaviuaup kalluarneqarnera tunngavigalugu allakkatigulluunniit
akissuteqarfigineqarsimasariaqaraluartutut isigigakku. Unali allaalluinnarpoq.
Unalu allaalluinnartutut isigaara, tassa apeqqut taanna imaluunnit
oqaluuserisassaq taanna allakkoorlugu oqallisigineqarsinnaasariaqaraluarmat.
Lars Karl Jensen, Siumut:
Aap, uani Aalisarnermut Naalakkersuisumut
ersarissassavara SIK taannginnatsigu
Siumup tungaannin-ngaanniit. Tassani aaqqissuussineq ersarissumik
ilisimasaqarfiginngilara uanga, kisianni periarfissaassappat soorunimi
Naalakkersuisut misissorsinnaavaat kattufiimmut atorneqarsinnaanersoq. Siumumi
oqaaseqarnitsinni innersuussutigisagut tassa ilaasortat akiliutaannik qanoq iliuseqarnikkut
kattuffimmut apissiisarnissap aaqqiissuteqarfigineqarnissaa Naalakkersuisunut
sunniuteqarfiginiaqquvarput. Tassani eqqarsaatigalugu maannakkumut Royal
Greenlandi KNAPK-p isumaqatigineqarfigineratigut isumaqatigiissut atorallarmat,
taamatut periuseqartumik aaqqissuussaqarsimavoq, kattuffiup
aningaasalersorneranut pingaaruteqaqisumik. Kisiannili uani eqqarsaatigivarput,
aalisakkanik tunitsiviusinnaasut allat ammaakkiartuaarneqarnerat ilutigalugu
pisisinnaanerallu Naalakkersuisuninngaaniit akuersissutaagaanngat aamma
qullakkerniarneqartassasoq isumaqatigiissuteqarfiginiqarsinnaanera
Naalakkersuisuninngaaniingitsoq, ksianni
KNAPK-p imaluunniit allat ingerlatsisup ilaasortaminik akiliutaanik
taanna nioqqutissiortoq tigooraasinnaalissasoq. Taamaalillutillu aningaasat
akiliutigineqartut kattuffimmut ikisassat apisinneqartarnissaat
qulakkerneqassasoq. Tulluassanngilarmi Siumup isaanninngaannit isigalugu
suliffeqarfik, uagut nammineq ingerlatitsitutut oqaatigisinnaasarput, kisiat
taammatut piumasaqarfigissallugu. Isumaqarpugut tulluartuussasoq aamma
aalisagarsiniarnermik ingerlataqartut, soorlu Polar Seafood aamma taamatut
piumaffigineqarsinnaanera Naalakkersuisuninngaaniit aqqutissiunneqassappat.
Siverth K Heilmann, Atassut:
Qujanaq. Naalakkersuisunut ilaasortap
Atassut sinnerlugu saqqummiutaani erseqqissaateqarfigilaaqummanga aamma
taammaliussaanga. Soorunami siullermik oqaatigisinnaavara aamma una siunnersuut
pillugu oqartoqarsinnaagaluarpoq, soormiuna una allakkatigut akiinnnarneqarsimanngitsoq.
Aamma ima oqartoqarsinnaavoq, Naalakkersuisut sooruna Hans Enoksen 3%-mik
oqariartuuteqarnera itigartikkaat. Isumaqarpunga tassani massakkut
ilangaatigiittarnermi 1,25%-mik aaqqissuussineq massakkut kingunerisassaa
ulorianaqutaalu Hans Enoksenip erseqqiivissumik tikkuartorai. Aammalu
kattuffittut ingerlaannassappat uagut politikkikkut
”akuliussorfiginngikkaluarlugu”, kisianni itigartitsiinnartoqarani
Naalakkersuisunik nallilersuilluartoqarnissaa taanna pingaartikkipput.
Oqaatigisinnaasat ussernartorsiunnaraluarpoq oqaasissarpassuit sorparujussuit
tikinneqarsinnaasut. Kisianni siunnersuuteqartoq soorunami
tunngavilersorluarsimagaangata aamma erseqqissumik akineqarsinnaasarput.
Aammalu uagut oqarpugut Naalakkersuisunut itigartitsiinnarani nalilersuilluartoqarnissaa
pingaartikkipput. Massakkut akisinnaangikkaluaraanni taava kingusinnerusukkut
aamma aalisarneq pillugu oqallittoqartussaanera Naalakkersuisunut ilaasortap
ilisimasitsissutiginikuuvaa. Aalisarnermilu ingerlataqartut assigiingitsut aamma
oqallinnissaat pisariaqarluinnarpoq. Massakkut itigartitsereeraanni
kingusinnerusukkut uterfigeqqinneqarsinnaapput, nalilersuilluarnerit
aallaavigalugit.
Hans Enoksen, siunnersuuteqartoq, Siumut:
Tassa ajuusarnaarpoq siunnersuutiga
itigartinneqarmat aamma malugisinnaavara partiit amerlanerpaat
illersunngikkaat. Ilaatigut oqaluttoqarluni kattufffit allallu
kissumiarneqarsinnaangillat. Aap, taanna ilumoorpoq, kialuunniit
assortorsinnaangilaa. Kisianni eqqaamassajunnarsivarsi aamma ilissi SIK
aningaasaataarutillarmat 80-kkut ingerlaneranni. Annaasiniarnermi
Naalakkersuisut Inatsisartullu annertoorujussuarmik oqallipput. Taavalu
eqqaamanerlunngikkukku taamani 22 milliuunit atorlugit SIK annaaneqarluni.
Pissutigalugugooq sulisartut kattuffeqartariaqarmata. Innuttaasut
illersorneqartariaqarmata. Aamma uanga isumaqarpunga tupinnanngilluinnartoq,
aalisartut piniartullu taamatut aamma illersorneqassappata maani
saqqummiussissaguma. Soorunami inatsisitigut aporfissaqassaguni
aporfissaqassaaq. Kisianni inatsisit naassaanngitsumut atuutsinneqarneq
nalunngilagut. Arlalippassuariarluta iniimi maani inatsisinik
allanngortitserisarpugut, naleqqussaalluta.
Aamma piumassuseqarutta
taamaaliorsinnaagaluarpugut. KNAPK-mut ilaasortaangitsorpassuit inuiaqatigiinni
sullinnneqartarput KNAPK aqutigalugu, tassuunalu annertuumik nersussavakka
aalisartut piniartullu peqatigiiffiat kiffartuussilluarmat. Kattuffik
unittuussagaluarpat kingunissai ilaatigut oqitsuinnaannavianngillat, taanna
uanga takorloorsinnaavara. Inuiaqatigiit ingerlatitaanneranni peqqussutissat
inatsisiliassat, pisuussutit uummassusillit eqqarsaatigalugit,
atuutsinneqartussat annertoorujussuarmik kattuffimmut
suliakkersuutigineqartarput. Taava kattuffik unittuusagaluarpat kikkut tassani
sulisinneqalissappat. Soorunami inatsisartut inatsisiliortussaapput kommunit
suleqatigalugit, kisianni innuttaasut qanimut suleqataatinneqanngippata
suulluunniit peqqussutit iluatsinnavianngillat. Soorunami APK-kkut
raajarniarnermi aperineqarsinnaapput, raajarniartut peqatigiiffiat raajarniarnermi
aperineqassappat, allani aperineqarsinnaangillat.
Umimmanniartoqarniarpat
tuttunniartoqarniarpat, tikaagulliit allallu pinngitsoorani KNAPK
isumasiorneqartussaavoq. Kisianni neriunngiqaanga KNAPK unittuussasoq. Suliffissarpassuit inuiannut
aalisartut piniartullu tunniuttarsimavaat. Massakullu assorujussuaq
paasiuminaatsipara taamatut ajornartorsiorneranni annerusumik uagut
inatsisartut piumassuseqannginnatta ikiuunissatsinnut. Soorunami kattuffik
nammineersinnaasoq tamatta ataqqivarput, kisianni aamma pisariaqalertarpoq
nammineersinnaagaluartut ikiorneqarsinnaanissaat. Ilatigut oqaluttoqarpoq,
sooruna oqaluuserisassaq maanga anngunneqarsimasoq. Inuiaqatigiit iluanni
paaserusunneqarpoq, pissanngatigineqarpoq, aalisartunik piniartunillu qanoruna
pisoqartoq. Qanormi taava inatsisartut ataatsimiilerunik taakku
akerleriissuteqartut iliuseqarfigissavaat. Massakkut tusarnaarput. Taannalu
pissutigalugu isumaqarpunga tupinnartuungilluinnartoq KNAPK-mut tunngasut maani
saqqummiunneqassappata.
Aamma innuttaasut pissakinnerusunik
taasartakkavut illersorneqarnissaat uanga pingaartilluinnartuuvara. Taamaammat
allat qanorluunniit oqalukkaluarpata, sooruna taamaaliortutit, sooruna taamak sianiitsigisumik
iliortutit uanga uniffiginavianngilakka. Takusinnaasakka malillugit
ajornartorsiortoqarpoq. Uggornarpoq aqaguagu qinersisoqartussaanngimmat, taava
takkiisumik tupinnaannartumik pilerngutiinnarluta tapersuineq maani
takutissagaluaratsigu. Qujanaq.
Johan Lund Olsen, Inuit Ataqatigiit:
Ja, naatsunnguamik pingaartumik
kingullermik oqaaseqartumut, tassa siunnersuuteqarsimasumut Hans Enoksenimut.
Una aamma naqqiutigilaartariaqarpoq. Tassa oqaatigimmagu SIK 80-kkunni
nakkaatuulermat ikiorneqarsinnaasimappat taava sooq maannakkut
taammaliorsinnaasimanngilagut, KNAPK eqqarsaatigalugu imaluunniit
taammaaliorsinnaanngilagut. Ila assigiinngissutigivaa A-karsip illuutai taamani
pisortanit pisiarineqarput. Taakkulu maannakkut pisortat illuutigivai ilai INI
A/S-p allaffeqarfigivaa allallu allatut aamma pisortanit atorneqarlutik.
Aningaasat taakkua pisortat A-karsip illuutaannik pisiaqarniarlutik
akiliutigisaat SIK-mut tunngillat.SIK-mut tutsinneqanngillat. Tassa SIK
imaluunniit akiitsunut, tassa sanatitsisunut, taakkua
akiliutigineqartussaammata.
Taammattumik taanna
assersuussiniarneq 1980-kkunni pisimasumut taanna naleqqutinngivippoq. Taava
aamma una isumaqarpunga pingaaruteqartorujussuaq aamma eqqaamasariaqaripput.
Aamma taanna saqqummiussinitsinni tassa oqaatigereerparput. Aamma
eqqaamasariaqaripput aamma taanna saqqummiussinitsinni tassa
oqaatigereerparput. Isumaqatigiinniarnerit ingerlanniarneqartut aammalu
ingerlasut inatsisartuninngaanniit, maani oqaluttarfimminngaanniit akuleruffiginaveersaaqissaartaratsigit.
Taanna pissuseq, periuseq, qimassagaluarutsigu isumaqatigiinniartoqarnerit
tamaaviisa, soorlu ilinniartitsisut, nakorsat pisortanik
isumaqatigiinnialeraangata oqaluttarfik manna atortualissavarput aamma maani
isumaqatigiinniaqattaalerluta. Akuerinikuuvavut isumaqatigiinniarsinnaasutut,
kattuffeqartitermata aammalu pisortat, tassa inatsisartut sinnerlugit
naalakkersuisut taakkuummata aamma isumaqatigiinniartussat.
Kisiannili uani apequummi
isumaqatigiinniartussat tassaapput illuatungaatigut KNAPK taavalu
illuatungaanni Royal Greenland. Taanna imaaliallaannaq inatsisartuninngaanniit
isumaqatigiinniarnissaq akulerussuuffigisinnaangilarput.
Paaviaaraq Heilmann, Aalisarnermut,
Piniarnermut, Inuussutissarsiornermut Nunalerinermullu Naalakkersuisoq:
Qujanaq. Siumut oqaaseqartua Lars
Karl Jensen tunitsiviit allat akiliutit kattuffimmut aamma
ikiuuttarsinnaanerinut aqqutissioqataanissarput inassutigivaa, Siumup
oqaaseqartuata. Nalunngilara tamanna pisareersoq, taanna ajornartorsiutissatut
naatsorsuutiginngilara inissisimasoq. Tassami kattuffiup taavalu tunitsiviup
akornganni isumatigiissutitut aaqqinneqarsinnaassammat aamma
aqqinneqarsinnaasarnikuummat. Taanna amma uanga nalunngilluarakku.
Atassumminngaanniit Siverth K Heilmannip apeqqutigivaa sooq Nalakkersuisut 3
%-mik itigartitsippat. Isumaqarpunga Naalakkersuisut akissutitsinni
ersarissumik oqartugut, inuit kattuffimmut aalajangersimasumut
ilaasortaanissaat imaluunniit ilaasortaajumanngitsut aammalu innersuussilluta
tunngaviusumik inatsit, Kunngeqarfiup Danmarkip naalagaaffiata, tunngaviusumik
inatsisaa, inatsisaanni & 78-i aamma uagutsinnut atuuttoq, taanna
tunngavigalugu taamatut akulerunnissarput piumasimanngilarput. Tamannalu
amerlanerussuteqarluartut taanna ilalerneqarpoq. Ikiuusiinnaanerput
oqaatigaarput aamma soorlu oqaaseqarninni taagiga, qaammarsaanermut
ilinniartitaanermullu tunngasumik aningaasaateqarfimmik pilersitsinissamik
ataavartumik.
Taavalu tunisisartut kikkut tamarmik
tunitsiviillu tamarmik imaluunniit tunitsiviit tamarmik Royal Greenlandiippat
Royal Greenalndiunngipalluunniit immersueqataaffigisinnaassaannik. Taamatut
ilusiliinissaq taanna suleqataaffigerusukkipput Naalakkersuisunit oqaatigivara.
Siunnersuuteqartoq oqaatigivaa inatsisit qaqugorsuarmut uninngaanarsinnaangitsut,
taamatut isumalimmik aammalu allanngortinneqarsinnaasut. Una inatsit pineqartoq
tunngaviusumik inatsisaavoq, tunngaviusumillu inatsisit imaalitsiaannaq
allanngortisittagaanngillat. Soorunami peqatigiiffiit aammalu kattuffimmi
tassani KNAPK-mi sulisimasut inuiaqatigiinnut aalisartunullu ataasiakkaanut
iluaqutaasimasut aamma uagut soorunami Naalakkersuisuniit qutsvissaqarfigaagut
akissussaassuseqartumik suleqataassimammata. Taanna qularutigineqassanngilaq.
Aamma Hansip ersissutigisaa KNAPK-p
unittoorluinnarnissaa, taanna uanga ersissutiginngilara. KNAPK soorlu Inuit
Ataqatigiit oqarnerminni KNAPK-p nukittorsarfittut atuinnarsinnaavaa aammalu
kattuffittut ingerlaqqissinnaanini uani ajornartorsiorneq uani anigoruniuk suli
nukiitornerulluni inissisimalissaaq, taanna qularutissaasorinngilara.
Tassuunakkut Inuit Ataqatigiit oqaaseqartuat isumaqatigilluinnarpara.
Neqeroorutiqanngitsutut nipilimmik Naalakkersuisut imaluunniit akissutit
itigartiinnavillugit itigartinneqartutut nipilimmik ilaatigut oqaluttoqarpoq.
Kisianni oqaatigissavara soorlu oqareernittut, qaammarsaanermut
ilinniartitaanermullu aningaasaateqarffimmi tunngasuni sumik
aaqqissuusinissamik Naalakkersuisut pimassuseqarput ikiuutissallutik. Qujanaq.
Ataatsimiinnermik aqutsisoq, Anders
Andreassen Inatsisatut Siulittaasuat:
Suli oqaluttussat nalunaartarput,
kisianni erseqqissaatigissavara amerlanerussuteqarluartut oqaluuserisaq
isumaqatiginngimmassuk. Taavalu tulliullunik oqaaseqassaq Karl Lyberth, Siumut.
Karl Lyberth, Siumut:
Nunatsinni inuussutissarsiutit
pingaarnersaani kattuffik ingerlasinnaanginnermat maannukkut taamatut
saqqummiisoqarpa. Isumaqarpunga naamik, isumaqarpunga kattuffik taanna
nammineerluni ingerlasinnaasoq. Taamaattumik tupiginngitsuulaanngilara taamatut
oqaluuserisassatut siunnersuuteqartoqarmat. Kattuffik, aalisartut piniartullu
kattuffiat ingerlavoq. Aamma Inuit Ataqatigiit ilumoorput,
isumaqatigiinniarnerit Royal Greenlandimut aamma suli ingerlapput. Taamaattumik
ilumoorpoq allakkatigulluunniit akiinnagassaagaluarpoq.
Kisiannili una pisimasoq Royal
Greenland isumaqatigiissutinik tamanik atorunnaarsitsisimanera. Isumaqarpunga
KNAPK-p nukittorsaatitut atorsimasariaqaraluaraa. Nukittorsaatitut atoruniuk
taava ataqqinaatigissavaa KNAPK-p taanna ataatsimuulerlutik atorunikku.
Suulluunniit kattuffiup ataqqinaatigaa nammineersinnaallutik
ingerlasinnaagunik, inatsisartuningaanniit arlaatigut ikiorserneqarneq pinnagu.
Taava aperisoqarsinnaavoq, nunatsinni inuussutissarsiutit pingaarnersaanik
kattuffik ilumut ingerlasinnaaunnasappat imaluunniit avissaartuutilersimappata
taava aperissaagut sooq. Tamanna uanga akiuminaatsittorujussuuara. Immaqa
aqutsisut pisuussimassapput, naluara, tamanna aalisartut piniartullu namminneq
nalilissavaat. Aalisartut piniartullu inatsisartut tungaaninngaanik
annaaneqarnissartik, kattuffik eqqarsaatigalugu katuffiup ingerlanera
eqqarsaatigalugu annaaneqarnissartik uanga ilimaginngilluinnarpara taanna
unniginartikkaat, piniartut aalisartullu amerlanerpaat. KNAPK ukiorpassuarni nammineerlu
ingerlasimavoq. Imminut aningaasatigut napatilluni ingerlasimavoq aamma
aalisartut piniartullu suli nammineerlutik ingerlarusuttut
qularnanngilluinnarpoq taannalu aalisartut piniartullu tamarmiullutik
ingerlatsisut KNAPK-mik napatitsisut taanna ataqqinaatigissavaat.
Hans Enoksen, Siumut:
Johan Lund Olsenimut, nalunngilarput A-karsit illutaat taakku pisiarineqartut. Imaanngilaq SIK maler-sorniarsarigiga, assersuutigiinnarpara tassani. SIK unittuuissammat akiliisinnaaunnaarluni taavalu taamaalippat peqatigiiffik unittussaammat inatsisartuniit ikiorserneqarluni, qujanartumik massakumut suli ingerlavoq. Illuatungeriit kattuffik ingerlaniarsarisoq soorunami immaqa, inuinnaat isaannit isigalugu, avataattungaanninngaannit akuliunniarnerigaluarpoq.
Kisianni qanoq ilillutik illuatungeriit tatigeqatigiissinnaappat akunnerminni, allaat aviisiliortut siulliullutik ilisimatinneqartartut, ilisimatinneqarsimasut, KNAPK-mut isumaqatigiissutit, ulloq una imaalippat nalunaarutigissavavut piareersimaniaritsi. Taavalu aatsaat pifffissaq nallerluinnalermat KNAPK kingulliulluni ilisimatinneqarluni. Soorunami paasilluarsinnaavara uanga isumaqatigiinniarnerit ataqqeqatigiingitsumik massakkut ingerlammata, annilaangassutigineqarluni qanoq isilluta isumaqatigiisiinaavugut, illuata tungerisatta isumaqatigiissutit imaaliallannaq atorunnaarsissinnaapagit. Ilumoorpoq kattuffi ukiorpassuarni imminut napatilluni ingerlasimavoq. Taamanikkut aalisarnikkut pissutit massakkorninngaaniit allaanerusimaqaat. Saarullippassuaqarsimavoq. Kapisilippassuit pisarineqartarsimapput. Allallu aalisakkat ajornartorsiutigineqarsimanatik. Kisianni massakkut kattuffimmut isaatitsisutuaalersimapput annerusumik raajarniartut. Taakkulu aamma allamik peqatigiiffiliornerat pissutigalugu isaatitsineq killeqartorussuarmik ingerlalerluni. Taanna maluginialaarisiuk. Aalisakkatsigut piniarnikkullu isertinneqartartut massakkut samungarujussuaq apparnikuupput.
Taamaalilluni aningaatigut ajornarsiornissaq qanittuararakasinngorsimalluni. Ukua Naalakkersuisup oqaaaseqaqqinnermini tikitai qaammarsaanermut allamullu tunngasut, qujanartumik taakku malersorniarneqalerput. Taanna qujassutigissavara taamatut itigartitsivinnerminngaanniit pitsaanerusumik takusinnaagakku, pitsaasumik alloriaqqinnissamut peqataarusuttut, neriuppunga taanna Naalakkersuisuninngaanniit malittarilluarneqarumaartoq. Qujanaq.
Jonathan Motzfeldt, Naalakkersuisut Siulittaasuat:
Annertunerusumik ilassutissaqanngikkaluarpunga Naalakkersuisut oqaaserisaannut Inuussutissarsiornemut Nalakkersuisup saqqummiussaanut. Kisianni marluk erseqqissalaarusuppakka Naalakkersuisut qanoq iliuuseqanngivillutik piginnittutut isinnaginnarsimasutut oqaatigineqarnerat taanna aamma oqaaseqarfigilaarusuppara. Aamma SIK-p kattuffiillu allat oqallinnermik akulerussorneqarnerat pissusissamisuunngilaq.
Kattuffiit allat, ataaserluunniit inatsisartunut immikkut saaffiginninneq ajorput pissuserisatik namminneq inimi maani oqalliserissagivut, naamerluinnaq. Maani ini inatsisiliorfiuvoq, taavalu ullumi paasivarput KNAPK-mut tunngasumik inatsisiliorsinnaanata. Apeqqut tassa taamaalilluni akineqarpoq. Taava uagut piginnittutut, taammak pisimasut tunngavigalugit, aamma ilisimatipparput taakku isumaqatigiinniarnerit pissusissamittut nangeqqittariaqartut. Taamaattumillu Royal Greenland siulersuisuisa 16. Januar, isumaqatigiinniarnissamut tunngavissaq, nassiuppaat KNAPK-mut. Ullumilu kaammattuutigaat maani katersorsimasut, isumaqatigiinniarnerit tassani inussiarnersumik nanginneqaqqullugit, taamaalillutillu oqaloqatigiinnerit tassaniittut pissusissamittut aamma naammassineqaqqullugit. Ilinniartitaanermut qaammarsaanermullu tunngatillugu tassani aningaasaateqarfik aamma immikkut oqaluussserisassani ilaatinneqarpoq Royal Greenlandiminngaanniit. Taassumallu atatiinnarnissaanik oqaloqatigiissutissat assigiingitsut kattuffimmut oqaloqatigiissutigimaneqarpoq.
Taamaattumik
inussiarnermik saaffiginnissutit neruppunga aamma inussiarnersumik
akineqassasut. Aamma taanna ullumikkut oqaatigineqartut najoqqutaralugit
Naalakkersuisuninngaaniit pisussaafipput atorsimavarput Royal Greenland
tamatumuunakkut aamma eqqaasissimallugu. Taakkulu suliassartik aamma ingerlappaat.
Bjarne Kreutzmann, Akulliit Partiiat:
Naatsunnguamik. Oqaluuserisamut
tunngatillugu Grundlovimik kalluaanermik isigisannik tikkuaaniartutuut. Tassa
inatsisit tunngaviusunik kalluaanermik tikkuaaniartutuut. Nalornisoornera
peerniarlugu apeqquteqalaaruppunga. Tassa Atassutip oqaluutuaninngaaniit
aperineqarluni aappassaanik akinermi uteqqiineq. Tassa imaattoq.
Itigartitsiinnarani nalilersuilluartoqarnissaa pingaartikkitik, tassani
paaserusuppasuinnariga, sunaana nalilersorluarneqarnissaanik pingartinneqartoq.
Taava Hr. Hans Enoksenip oqaatigisaanut tungatillugu tassa aviisiliortut
siulliullugit nalunaarfigineqarsimasut, taanna isumaqarpu-nga tassami aamma
tusaratsigu ilumoorsimasututut naatsorsuutigissagukku, isumaqarpunga illua
tungerisanut mitallernerusoq taamatut iliorsimanerat.
Anthon Frederiksen, Kattusseqatigiit:
Aalisarneq piniarnerlu tassaapput
qangarsuaaniilli aktieselskabilli eqqarsaatigineqanngikkallarmata nunatsinni
ingerlanneqartut. Maannakkut aalisartut piniartullu allaat
oqaatigineqarsinnaapput A/S-niit missukutanngorput. Tamanna aalisarnermik piniarnermillu
inuussutissasiuteqarsimasuni aamma pinngortuulluni annernalaanngitsuungilaq,
pissutigalugu oqallittarnerni maani aktieselskabit pineqaleraangata taakkua
inatsisit tunngavigalugit illersugaanerat assiaqutatullusooq
inissinneqartarpoq. Matumani aamma suli taakkununnga illersuiffittut
sakkortuumik assiaqutatut inissinneqarpoq Grundlovi. Tassa inatsisit tunngaviusut. Taamaalilluni
aalisartut piniartullu oqarfigineqarput ilissi tassunga suliffeqarfissuarmut
qanoq ilioriarsinnaangilluinnarpusi, taanna inatsisartut naqissuserpaat
ullumikkut.
Taamaattumik oqallisigisami ullumi
uanga siunnersuuteqarnera tunngavigalugu punkt 23 ataatsinut allartikkatta
oqaluusserineqartumut attuumassuteqarluinnarmat aammalu aktieselskabit pillugit
oqallinnermut attuumammat, oqaatiginngitsoornianngilara taamatut
inissitsiterisarneq ullumikkut aamma uani oqaluuserisami uppernarsarneqarpoq
ilumut aktieselskabinik ingerlatineq ulorianaateqarpoq. Allaat kisermaassilluni
ingerlatsiniarnertut taaneqarsinnaavoq Inatsisatuniik
attorumaneqanngilluinnartoq, uunartorsuartullu isikkuli taanna A/S-ssuaq. Aamma
isumaqarpunga aalisartut piniartullu ilinniartitsisut imaluunniit atorfillit
allat isumaqatigiinniniartarnerinut assersuunneqarsinnaangitsut. Tassami ukiut kingulliit
qiviarutsigit takusinnaavarput, suliffeqarfissuup Royal Greenlandip aalisartut
ingiariartuaarpai. Kilisaatitigut pisiortornikkut allatigullu ingiaaniarnera
sakkortooq isiginngitsuusaaginnarsinnaangilarput.
Maannakullu aamma aalisartut
piniartullu kattufffiat sangitinneqarpoq, qujagineqarput raajarniat immikkut
peqatigiiffiliorsimasut. Taamaalillutik aggulullutik Royal Grenland
tungaaninngaanniit oqinaarneqarujussuartussapput siunissami. Taamaammallu
taamatut A/S-nik itummat qeqqaniititsineq isumaqarpunga inatsisitigut
aporfissaqaraluartoq taammaattoq inatsisartuni maani sinniisuutitaqarpugut
aamma tassani siulersuisoqarfimmi. Taakkua sinniisuusut annertunerusumik qanoq
iliuseqartariaqarput. Sooq oqallinneq taamak inuiaqatigiinnut pingaaruteqartigisoq
Royal Greenlandimut sinniisuusut, inatsisartut toqqagaat, sooq taakkua
minnerpaanngukulluunniit oqaaseqanngillat. Tutsiunnatillu.
Johan Lund Olsen, Inuit Ataqatigiit:
Neriorsuutigissavara naatsunnguussammat.
Tassa aamma siunnersuuteqartumut Hans Enoksenimut aamma una
erseqqissaatigeqqittariaqarmat. Aap, ilumoorpoq SIK taamani 1980-kunni
qiteqqunnerani akiitsuerutinneqarmat. Akiitsueruppoq. Kisianni tamatuma
kingorna SIK-mi ilaasortat namminneq kattuffimminnut SIK-mut aammalu SIP-finnut
akiliutissatik isumagivaat. Tassa allaassutaa. Kisianni illit uani
siunnersuutinni anguniarpat, pisortat pinngitsaaliissasut imatut
ilanngaassisoqartassasoq. Taanna ajornarpoq. Tassa tunngaviusumik inatsit aamma
ilaatigut innersuussutigineqarluni kisianni aajuna iluatinnartoq.
Matumani aalisartut allaat Royal
Greenlandiminngaanniit neqeroorfigineqarput allaat aamakku allakkat
immersupallaannariarlugit atsiorunik tunniunneqarunik tassa KNAPK-mut
pisarissersuutaangillutik aaqqinneqariaannaasut. Taamaatumiuna oqartugut
KNAPK-p tamanna ilutiginiarliuk, immikkoortortaqarfitillu aqqutigalugit
atsiortitsiortornerit taakkua ingerlanneqarniarlik. Nukittuunngornissaq
illuatungerisamut aamma nukittunissaq taanna anguniarlugu. Ajornanngilaq.
Jonathan Motzfeldt, Naalakkersuisut
Siulittaasuat:
Anthon Frederiksen oqaluttarfik
manna atortuarpaa allaanngivissumik atorumaneqanngitsoq suliassanut.
Naalakkersuisut aamma suliassanut killeqassusiat maani oqaatigisarpaat aammalu
suliarisinnaasavut aamma saqqummiuttarlugit. Ullumikkut maani inimi
erseqqissarparput nunamut tamarmut inatsisiliornitsigut
akileraarusiisinnaavugut ersersitat tungaatigut tamarmik assigiimmik.
Akileraarusiisinnaavugut nioqqutissat akitsuutaatigut tamarmik assigiimmik.
Kisianni akileraarusersuisinnaanngilagut innuttaasut ilaannai immikkoortillugit
maani. Inimi maani immikkoortitsilluta suliareqqusaanngilagut aamma taanna
isumaqatigiissutigisimavarput. Aamma taanna tunngavigalugu maani isummernertut
isigineqassaaq. Aamma ataqqivarput nammineerlutik kattuffiit, kattuffiit
pikkorissut, isumaqatigiinniartarmata aamma angusassartik angullugu. Taanna
aamma ataqqivarput. Taamaattumik ima isumaqartoqassanngilaq suliani maani
ingerlatseqqikkumannginneq pineqartoq, kisianni assigiinngisitsisoqassanngilaq,
aamma tassuunakkut assigiimmik iliuusissat ataqqisariaqarput inatsisiliornermi.
Paviaaraq Heilmann, Aalisarnermut,
Piniarnermut, Inuussutissarsiornermut Nunalerinermullu Naalakkersuisoq:
Uangattaaq Kattusseqatigiinniit
Anthon Frederiksen-ip oqaasiinut immikkoortitsiuminaatsitsinnguat-siarmat suut
sunalu eqqartoritsigit suut tunngavigalugit oqaaseqassasugut.
Royal Greenland-ip KNAPK-llu
akornanni isumaqatigiinniarnerit taakkua imaaliinnarlugit akuleruffigisinnaanngilagut,
tassanilu taanna aamma sapinngisamik inatsisartut soorlu amerlanerusut oqartut
sapinngisamik taanna isumaqatigiinniarnikkut aaqqinneqassaaq. Taava alla aana
ilaasortaasinnaanermut tunngasoq, peqatigiiffiliorsinnaanermut tunngasoq,
tassalu ' 78
tunngaviusumik inatsimmi pineqartoq kikkulluunniit innuttaasut akuersissummik
peqqaanngikkaluarlutik inatsisimik uniuinngitsunik siunertaqartunik
pilersitsisinnaaneri.
Taassuma iluaniippoq
pinngitsaaliissummik akiliisitsilluni pinngitsaaliissummik aalajangersimasumik
peqatigiiffimmik kattuffimmilluunniit ilaasortaasinnaatitaaneq imalunniit
ilaasortaasinnaatitaannginnissaaq. Tassa immikkoortitassatit Antuut taamak
oqarfigisariaqarpakkit. Akisussaasuteqartumik uani oqalluttariaqarpugut. Tusarnersaarsoriniartoqassanngilaq
inatsisit pioreersut aamma tunngavigalugit inatsisit pioreersut aallaavigalugit
oqallinneq aamma ingerlattariaqarparput. Soorunami kattuffeqarneq imaluunniit
peqatigiiffeqarneq kattuffeqarnerlu nukittooq naalakkersuisut takorusuppaat
aamma taamaattoqartarpoq. Kattuffiit piffissaq ilaanni nukilaallisarput
piffissaq ilaanni nukittortarput, taanna inuunerup ingerlanerata ilagivaat.
Otto Steenholdt, Atassut:
Uangattaaq aamma Anthon Frederiksen-imut oqaatigerusuppara kialluunniit inatsisiliorniartup inatsisiliortulluunniit tamatigorluinnaqqissaaq qiviallattaagaa ittoorisagut tassaavoq inatsisit tunngaviusut. Taanna qanorluunniit pitigigaluaruit assiaquttatut taaginnarlugu pisinnaanngilat. Inatsisit tamarmik tunuliaqutaat tassaavoq inatsisiliortup kialluunniit ataqqilluinnagassaa. Oqarsimaguit taannagooq tunngavigalugu tassa imaaliorpugut KNAPK-mut, taamaattoqanngilluinnarpoq. Taanna eqqaamallaqquara inatsisioliornermi suliaqartut tamaavimmik ittooralugu tunngavissaa tassaammat Grundlov-mik taaneqartartoq.
Peqatigiiffiit piginnaatitaanerat aammalu qanoq ittorineqarnissaat aamma Grundlov-miittut piumasaa naalakkersuisup erseqqarissumik oqaatigaa. Aamma attorneqarsinnaanngilaq ilumuungaarmat. Aamma siunnersuutip tunuliaqutaa 3%-mik kikkunnulluunniit tamanut akiliisitsiniarneq, Antuunaa ruujorilerisut peqatigiiffiata nakorsat peqatigiiffia oqarfigisinnaanngilaa imminut akilersueqqullugu. Piumanngikkuni oqassapput, soorunami piumanavianngillat, peqatigiiffiup nammineq ilaasortani qanorluunniit generalforsamlingip aalajangiiffigiligit, avataaniittulli taakkua susassarinngilaat. Aqaguluunniit qineqqusaartoqassagaluarpat oqaatsit taakku uteqqikkumaarpakka akerlilerniarukkillu akerlilersorniarigit.
Josef Motzfeldt, Inuit Ataqatigiit:
Oqallinnermi maani ilaatigut allaat killiffigineqaqqajaavoq aalisarnermik piniarnermillu inuussutissar-siuteqartut namminneq pisinnaanngitsutut raajarniarnut, qaleralinnianut avissaartuunneq taamaalillunilu nukissaarutitsinertut taaneqartoq. Qularnanngilarmi taamaasinnaavoq, kisianni aamma aperisariaqarpoq, sooq avissaartuuttuqarpa sunaana tassani pissutaasoq. Aamma taanna paasiniagassat ilagisariaqarpaat. Inuit Ataqatigiit qularinngilaat aalisarnermi piniarnermillu inuussutissarsiuteqartut ilaasortat pisinnaasut aamma piumassuseqartut perusuttut kattuffeqarumallutik nukittuumik ilaasortanut kiffartuusserusuttumik aammali eqaatsumik isummersorsinnaalluni isumaqatiginninniarsinnaasumik kattuffiup tamakku nalereerunigik kattuffik isumakulunnartoqanngilaq.
Kattuffik taama ingerlanneqartoq ilaasortaqarnissaminut isumanerluuteqassanngilaq. Ilaasortaaffigissallugu kajumernartuussooq. Isumannarsinnaasut ilumut taama avissaartuunneq nukillaarutut isigineqassappat isumannarsinnaasut tassanngillat kattuffiit KNAPK-kutut ittut. Isumannartut tassaapput umiatsiaararsortut uugarniat. Qaleralinniat raajarniallu annertuumik isumakuluutissaqarunanngillat, taakkua tuniniagaat isumannaatsorsuarmik ingerlanneqarmata nuna tamaat akornanni. Kiisalu KNAPP-nik KNAKP immikkoortortaqarfiini oqaloqateqartarninni paasivara amerlasuuni periarfissaq manna killiffimmi kattuffiup killiffianik nalilersuinertut atussallugu iluatigineqartoq.
Ukiup nikinnerani Inuit Ataqatigiit oqaaseqaateqarnitsinni pissutsit taamaannerat aalisarnermi piniarnermillu inuussutissarsiuteqartut kattuffeqarnermikkut nukittorsarfittut atussagaat oqariartuutigaarput soqutigasaqaqatigiit immikkuualattuusinnaapput kisianni ataatsimik nukittuumik kattuffeqarsinnaallutik. Naggataatigut qinersisarnermut tunngasut ilaatigut allaat sakkuliunneqarmata oqaatigiinnassavara siunnersuuteqartumut, neriuppunga qinersisissarsiorluni qujageqqunerinnaq inatsisartunut oqaluuserisassanngortitsisarnerni oqallittarnernilu tunngaviussanngitsoq. Taamaaliulissagaluarutta kiffartuussavut qinersisivut tamakkiisumik sullinnagit qujageqquffigut taamaallaat aallutilissagatsigit.
Hans Enoksen, Siumut:
Aalisartut
piniartullu annerpaamilluunniit pisinnaanngitsutut
isiginiarneqassanngilluinnarput aamma uanga isiginianngisaannarpakka. Unaliuna
malugeqqugiga isertittagaat ima annikitsigilersimapput kattuffimmut
aningaasalersuineq ima killeqartigilersimavoq allaat aningaasatigut
ingerlatsineq unittoorsinnaalluni immaqa. Qujageqqusaarluni
qineqqusaartoqanngilaq minnerpaarpaamilluunniit aamma uanga
taamaaliunngisaannarpunga kisianni takusinnaasakka malillugit innuttaasut
pissarsiassamikkut annikitsumik pisartagallit tassani
illersorniarneqarnerigaluat annertunerusumik soqutigineqanngilaq. Qujanaq.
Peter Ostermann, Atassut:
Qujanaq. Oqallinneq soorlu
nunannerunnaalersoq. Oqallisigisatsinnut tunngassuteqanngitsut
qaqinneqaqattaarput. Kattuffiit assigiinngitsut qanoq ingerlanerat, qanoq
ingerlatseriaaseqarnerat uagut susassarinngilarput maani
oqaluttarfimminngaanniit, nammineq taakkua akisussaaffigaat. Aamma ilaatigut
oqaluttoqarput soormi allakkatigut akineqaannanngila. Taamak oqaluttoq
oqarfigisariaqarpoq soormi oqaluuserisassani pappiliap nassuiaat
oqaluuserineqarmat itigartitsisoqanngila taanna peeqqullugu. Taamaasiortoqanngilaq,
akuerineqarpoq. Taava tamakku eqqartornagit oqallisigissavarput ajunngilaq.
Uagut oqaaseqarnitsinni naalakkersuisunut
una oqaatigaarput nalilersuilluarnissaq assut pingaartikkipput. Uagut
oqarnianngilagut Royal Greenland imaaliussooq aammalu ingammik oqarnianngilagut
KNAPK imaliussooq uagut taanna oqartussaaffiginnginnatsigu. Kisianni
oqarfigisinnaasarput aana 100 %-mik nammineq pigisarput
iliusseqartariaqalerpusi. Ullumikkut pissutsit akuersaarneqarsinnaajunnaarput.
Imminut pisuuteqattaannerit imaaginnarput aallarteriartoqarsinnaangilaq
annerusumik. Soorunami kattuffiit ingerlatsinerat akuliuffigissanngilarput
kisianni KNAPK inuiaqatigiinnut pingaaruteqarnera avaqqunneqarsinnaangilaq
kattuffiinnaagaluarpalluunniit.
Nunarput tamaat kaajallallugu
sunniuteqarpoq piniarnermit aalisarnermik ingerlatsiviusunik nunarput
kaajallallugu. Taamaattumik tassaniittariaqarput uagut soqutigisarput una
pigisarput oqarfigissallugu, haara pissutsit aaqqittariaqalerput. Tassanilu
sakkussagut tassa naalakkersuisut piginnittut sinnerlugit pigisatsinnut
oqariartuuteqartussat, taamaattumik Atassumminngaannit erseqqissumik
oqatigaarput una naaggaaginnavinnagu taamaaliorsinnaagaluarpugummi
siunnersuuteqartoq sinnerlugu taanna naaggaaginnavissinnaagaluarparput
inatsisiliorsinnaannginnatta, kisiannili oqarpugut naalakkersuisut
piumaffigissavagut Royal Greenland piumaffigineqassasoq arlaannik
iliuuseqassasoq, taava naalakkersuit Royal Greenland-illu
isumaqatigiinniarlutik qanoq iliuuseqarnissaq aaqqinniarsinnaavaat. Aamma
peqatigiiffimmut kattuffimmut sumulluunniit akiliutissaq pinngitsaaliinikkut
akilerneqaqqullugu inatsisiliortoqarsinnaanngilaq. Taanna ersarereerpoq
ilaatigut inatsisitigut tunngaviusut taakkartorneqarput.
Kisiannili taanna erseqqinnerusuni
eqqartuussisarnermi inatsimmi tassani erseqqissumik allassimammata akiligassat
suut inatsisit tunuliaqutaralugit pinngitsaaliinikkut tiguniarneqarsinnaasut.
Taannaannarluunniit tunngavigissagaanni itigartitsineq
tupigineqarsinnaanngilaq, naak siunnersuuteqartuulluni itigartinneqarluni
mamianartaraluartoq. Una Royal Greenland-ip tunisinermi ilanngaassisarnerata
iluaqutaa KNAPK-mut uanga takulluarsinnaavara assut iluassaaq. Tassami
eqqaamassavarput partiini ilaasortat ataasiakkat akiliisinniartarneri qanoq
ilungersunartigisoq tamatta nalunnginnatsigu. Taamaattumik taanna
uteqqissavarput Atassummiinngaanniit naalakkersuisunut piumasaraarput Royal
Greenland piumaffigineqassasoq aaqqiissuteqaataasussanik iliuuseqaqqullugu
taannalu anguniarlugu naalakkersuisut suleqataassasut soorlu aamma
naalakkersuisut siulittaasuata ilaatigut tamanna oqaatigillatsiareeraa.
Mikael Petersen, Isumaginninnermut, S
uliffeqarnermut Pisortallu Suliffeqarfiutaannut Naalakker-suisoq:
Qujanaq. Siumumiit oqaaseqartut avataatigut
aamma oqarsinnaatitaagama. Isumaqarpunga erseqqissartariaqartoq uani
oqallinnermi sorparujorujussuit assigiinngitsorpassuit
ilanngussunngikkaluarlugit suna pineqartoq paasinareermat
erseqqissartariaqartoq ajornartorsiut sunaanersoq.
Naatsukullannguamik oqaatigineqarsinnaavoq siunnersuuteqartoq siunnersuummi pimmagu nunatsinni aalisartut piniartullu kattuffissuata ingerlaniarsarinermini ajornartorsiutaa. Taanna tamatta uani paasereerparput. Uagut Siumuminngaanniit soorlu oqaaseqartutta oqatigigaa nunatsinni kattuffeqarneq pingaarteqaarput aamma tamanna partiitut suleqataaffigiuassavarput suleqataajuasallutalu. Unali oqariartuutigineqartoq ersarissoq tassaavoq maani oqaluttarfimminngaanniit maani iniminngaanniit inatsisit suliarineqartut aqqutigalugit kattuffiit ataasiakkaat immikkut pineqassanngitsut. Taanna tamatta naalakkersuisut inatsisartut tamatta taanna nalunngilarput aamma tamanna malinniarsaraarput malissallugulu.
Kisianni ajornartorsiuteqartoqarsimappat kattuffinnik inuiaqatigiit pigisatta ingerlatatta aamma pisooqataaffigisaanik, taava tamakku aaqqinniarlugit aamma suleqataasariaqarpugut naalakkersuinikkut sukkulluunniit inissisimagaluarutta. Inuiaqatigiinni kattuffeqarneq peqatigiiffeqarneq tamarmik nakooqutaapput ineriartornermilu sunniuteqaqataallutik. Pissutsit ajorsimappata isiginnaaginnarsinnaanngilagut aamma aaqqiiniaqataaffigisariaqarpagut. Erseqqissarlara Siumumiit kaammattuuterput ilassilluarneqartoq paasinarmat, tassalu naalakkersuisunik aammalu aalisartut piniartullu kattuffianni KNAKP-mi aalisakkanillu pisiortorfinni tamanik suleqatigisitsinissaq aammalu angusaqarnissaq isumaqatigiissuteqartitsinissaq taanna anguniaqqullugu. Isumaqarpunga taanna anguneqarpat aamma eqqisseqatigiinneq piumaartoq. Taamaattumik pisussaaffipput naapertorlugu aamma sunniuteqaqataasinnaanerput anguniarlugu qanoq iliuusissat aamma ingerlanneqartariaqartut.
Daniel Skifte, Aningaasaqarnermut Ineqarnermullu Naalakkersuisoq:
Qujanaq. Aalisarnermut naalakkersuisoq oqaaseqartinnagu una apuukkusutara apunniarpara tassaasoq oqallinneq tunngavilersorluakkamik aallaavilik nuannillaaraaq, maannakkut oqaluttarfimmi ualeq piffissaq annertooq atorlugu oqaatsit atorneqartut taakkua aallaavigilaarniarpakka. Soorlu assersuutigalugu Anthon Frederiksen-ip oqaatsit atugai issuaaneq, pissusipalaat taamaattut Namminersornerullutik Oqartussat suliffissuillu akornanni pisut pissusipalaat, taamaattut oqaatsit atukkat sakkortuut allaganngorlugit tunniunneqartut aammalu siunnersuuteqartup Hans Enoksen-ip oqaasi imatut nipillit isuaaneq aallartippoq, sooruna taama sianiitsigisumik sianiitsigisumik siunnersuuteqarpit, taamatut issuaaneq naavoq.
Takusinnaasakka malillugit partiini ataaserluunniit oqaatsini taamak ittunik atuinngilaq. Taamaattumik oqaluttarfik ataqqisarput aallaavigalugu oqallisissagutta isumaqarpunga partiit oqariartuutaat imaattariaqassasut oqaatsinik ataqqinnilluni asuli imaliallaannaq tiguinnaalluni oqallinneq naggataatigut tusarniilliornnermik nipeqartoq. Una peqqutigalugu meerartavut tusarnaartut inatsisartut maligassiorluanngilaat. Taamatut maligassiorluaannginneq ilaatigut oqaatsinik atuinerni isumaqarpunga eqqarsaatigisariaqartoq. Akisussaassuseqarpugut soorlu aamma uagut akisussaaffigissavarput aktieselskabit malillugit isornartorsiuineq, tassani aalajangiiffigisassarinngilaat inatsisartut aktieselskabit malillugit ingerlatsineq. Massuaneq ingasappallaaleqaaq. Tassami siunnersuut oqallisigisarput naalakkersuisut aammalu partiit erseqqilluinnartumik oqariartorfigereerpaat.
Tusarniilliuleraluttuinnarpugut isumaqarpunga taamatut iliorneq pissusissamisuunngitsoq maligassiuinerlu eqqarsaatigalugu KNAPK-mut pinngitsoorneqarsinnaangilaq aamma Royal Greenland inuiaqatigiit atorfissaqartippaat akisussaassuteqartumik ingerlassagutta taamaaliussaagut. Tassa oqaatsinut tunngasunut taarusutakka.
Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:
Qujanaq. Neriuppunga aamma naggataarutaasoq. Tassa Peter Ostermann-imut assummeersumik oqaatigerusukkiga naalakkersuisut akissuteqarnitsinni oqaratta naalakkersuisut piumassuseqartut aqqutissiuusseqataassallutik, taanna ersarissumik oqaatigereerparput taamaattumillu Royal Greenland-imut aamma kaammattuissaagut. Kisianni aamma manna oqaluttarfik atorlugu kaammattuinngitsoorsinnaanngilagut kattuffimmut KNAPK-mut aamma Royal Greenland tungaanut isumaqatigiissuteqarnissamik angusaqarniarnissaq ilungersuullugu sulissutigeqqullugu. Uagut Royal Greenland ilungersortumik aamma piumaffigissaqqaarparput.
Anders Andreassen, Inatsisartut Siulittaasuat:
Qujanaq. Taamaalilluni ullumikkut oqaluuserisassaq immikkoortoq 22 oqaluuserineqarnera naammassivoq.