Oqaluuserisassani immikkoortoq 23-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 17. Februar 1998 nal. 13.03
Ataatsimiinnermik aqutsisoq: Inatsisartut
Siulittaasuat Anders Andreassen.
Anthon Frederiksen, siunnersuuteqartoq,
Kattusseqatigiit:
Suliffeqarfissuarni Namminersornerullutik
Oqartussanit pigineqartuni politikerinik atorfi-nitsitsisarnerup
siulittaasulersortarnermullu piaartumik atorunnaarsinneqarnissaanik
siunnersuut.
Naluneqanngitsutut inatsisartunut
qinersinerup kingorna inatsisartuni naalakkersuisooqatigiit
naalakkersuisunngortitaat suliffeqarfinnut sinniisoqarfinnullu
inuttalersuissarput. Ilaatigut politikerinik pikkorissunik, tamanna
takornartaanngilaq. Kisiannili arlalitsigut takusarparput inuit taamatut
atorfinitsinneqartartut. Ajoraluartumik suliffeqarfimmut, siulittaasoqarfimmut
imaluunniit oqaatigilluaannarlugu direktør-inngorfimmut naleqqutttumik
ilinniagaqarneq ajortut. Tassami kialluunniit nalunngilaa, assersuutigiinnarlugu
saffiooq napparsimavimmi nakorsiartitsilluni sulisinnaanngitsoq imaluunniit
palasi kigutileriffimmi kigusiortutut sulisinnaanngitsoq il. il.
Taamaattumik ilinniartitsisut, nakorsat
il. il. suliffeqarfinni tunngaviatigut ilinniagaqar-figisimanngisaminni atorfinitsinneqartarnerat
piaarnerpaamik atorunnaarsinneqartariaqarpoq. Soorlu politikeriusimasut
akuersaarneqarsinnaanngilluinnartumik Royal Greenland-imi
atorfinitsinne-qarnermi kingorna Kalaallit Nunatsinni Aalisartut Piniartullu
Kattuffiata RG-mut isumaqa-tigiissuterpassuisa tassanngaannaq
atorunnaarsinneqarnissaat sulissutigigaa.
Inuiaqatigiit pigisaanni pissutsit ajortut
iluarsineqassappata politikerinik suliffeqarfissuit inuttalersorneqartarnerat
atorunnaarsinneqartariaqarpoq, tamatumanilu akisussaassuseqarlutik
oqartussaanerpaasut tassaapput Inatsisartut.
Taamaattumik pissutsit
ajornerulissanngippata iluarsiisoqartariaqarpoq.
Jonathan Motzfeldt, Naalakkersuisut
Siulittaasuat:
Anthon Frederiksen naalakkersuinermik
suliallit Namminersornerullutik Oqartussat aktiaateqarluni
ingerlatseqatigiiffiutaanni pisortatut imaluunniit siulersuisuni
siulittaasutut atorfinit-sinneqartarunnaarnissaannik siunnersuuteqarpoq. Taama
atorfeqartitsinerit naalakkersuinermik suliallit ilinniagaannut naapertuukkajuttannginnerat
tunngavilersuutigineqarpoq.
Ukiuni kingullerni Inatsisartut
naalakkersuinikkut isumaqatigiilluarlutik suliffeqarfiit
namminersortitaasimasut arlallit aktiaateqarluni ingerlatseqatigiiffinngortinneqarnissaat
aalajangertarpaat. Aalajangiinernut tunngavinni ingerlatseqatigiiffiillu
pillugit peqqussutini, kiisalu aktiaateqarluni ingerlatseqatigiiffiit pillugit
inatsimmi suliffeqarfinni akisussaaffiit piginnaatitaaffiillu
naalakkersuinikkut aqutsinikkullu agguataarneqarnerinut killiliussanik
erseqqissunik aalajangersaasoqarsimavoq.
Aktiaateqarluni ingerlatseqatigiiffiit
pillugit inatsit malillugu siulersuisut kisimik ingerlatseqatigiiffimmi
pisortanik atorfinitsitsisinnaapput soraarsitsisinnaallutillu. Aktiaatillit ataatsimeersuarnerulluunniit
ingerlatseqatigiiffimmi pisortanik toqqaasinnaanerannik soraarsitsisinnaanerannilluuniit
inatsit periarfissiinngilaq.
Pisortat ingerlatseqatigiiffiup
siulersuisuisa innersuussutaat malittussavaat. Siulersuisut pisortat peqatigalugit
aamma ingerlatseqatigiiffiup ulluinnarni siulersorneqarnera isumagisussaavaat
aaqqissuuttussaallugulu.
Ingerlatseqatigiiffiup siulersuisui
kisimik pisortat sulinerannik nalilersuisussaapput, pisortat inatsisinik
malittarisassanillu atuuttunik unioqqutitsinngippata.
Naalakkersuisut inuiaqatigiit kalaallit
aningaasaqarniarnermut nutaaliaasumut niuernermik tunngavilimmut
naleqqussarnissaat pingaarnertut anguniagaraat. Taamaammat naalagaaffiup
kisermaassilluni ingerlatseqatigiiffitoqarsui aktiaateqarluni
ingerlatseqatigiiffinngortiterneqarput nutaaliaasut, niuernermik
tunngaveqarlutik ingerlasussat.
Allanngortiterinerni Inatsisartuni
isumaqatigiissutigineqarpoq Naalakkersuisut ingerlatseqatigiiffinni
siulersuinik inuttalersuinerminni aamma naalakkersuinermik suliallit
qinersinnaasassagaat, taamaaliornikkut allanngortiterinerit naalakkersuinikkut
anguniakkat naapertorlugit ingerlanersut malinnaavigineqarnissaat
qularnaarneqarsinnaammat.
Naalakkersuisut anguniarsimavaattaaq nunatsinni
Danmarkimilu inuussutissarsiortunit sinniisoqarfiusumik siulersuisut
pineqartut katiternissaat.
Ingerlatseqatigiiffiit taamatut suliamik
paasisimasaqartuunissaat Naalakkersuisut ingerlatsinerminni
ingerlatiinnarniarpaat. Tamanna erseqqissumik takutinneqarpoq siulersuisut
katitigaanerisa kingullermik nalunaarsorneqarneranni.
Ingerlatseqatigiiffinni
Namminersornerullutik Oqartussanit pigineqartuni siulersuisunut ilaasortanit
tamarmiusunit 1998-imi januaarip aallaqqaataani taamaallaat 14%-it naalakkersuinermik
suliaqartuupput. Siulittaasut eqqarsaatigalugit ullumikkut siulittaasunit
19-iusunit taamaallaat pingasut naalakkersuinermik suliaqartuupput.
Taamalu Naalakkersuisooqatigiit
naalakkersuinermik sulialinnik ikittuinnarnik siulersuisuni ilaasortatut
siulersuisunilu siulittaasutut toqqaagaasimapput.
Aamma erseqqissarusuppara siulersuisunut
ilaasortat maannarpiaq naalakkersuinermik suliaqartuusut naalakkersuinermik
suliaqartuunertik kisiat pissutigalugu toqqarneqarsimanngimmata.
Naalakkersuisut anguniarsimavaat
siulersuisunut ilaasortat siulittaasullu inuussutissarsiornikkut
tunuliaqutaqarluartut inuiaqatigiinnilu kalaallini pissutsinik
ilisimasaqarluartut toqqarneqartarnissaat. Naalakkersuinermik suliallit
Namminersornerullutik Oqartussat ingerlatseqatigiiffiutaaniittut aamma
piumasaqaatinik taakkuninnga naammassinnipput.
Naggataatigullu oqarsinnaavunga
naleqqussorinnginnakku siunnersuummi siulersuisunut siulittaasup ataasiinnaap
suliaminik ingerlatsinera Anthon Frederiksenip oqallisiginiarsarimmagu.
Naalak-kersuisut Inatsisartunit piginnaatinneqarsimapput Namminersornerullutik
Oqartussat ingerlat-seqatigiiffiutaanni piginnittut soqutigisaannik
isumaginninnissaminnut Inatsisartut killiliussaat tunngavigalugit, tassungalu
ilanngullugu siulersuisunut ilaasortanik toqqaasinnaanissaminnut.
Namminersornerullutik Oqartussat ingerlatseqatigiiffiutaanni siulersuisunut
ilaasortat piginnaanerisa pisinnaasaasalu nalilerneqarnissaat naalakkersuisut
suliassaraat. Naalakkersuisut isumaqarput maanna siulersuisunut ilaasortaasut
suliassaminnik isumaginninnissamut naleqqulluinnartut piginnaaneqarluartullu
pigineqartut. Taamalu Naalakkersuisut Namminersornerullutik Oqartussat
ingerlatseqatigiiffiutaanni naalakkersuinermik suliallit siulersuisunut
ilaasortaasut piivinneqarnissaat pissutissaqarsorinngilaat.
Laannguaq Lynge, Siumup oqaaseqartua:
Siumumiit aallaqqaammulli
oqaatigissavarput inatsisartunut ilaasortap hr. Anthon Frederiksenip siunnersuutaa
tunngaviatigut isumaqatiginnginnatsigu. Siumumi isumaqarpugut kinaluunniit
inuk piukkunnartoq selskabit siulersuisuini imaluunniit qullersaqarfiini
atorfinitsinneqarluni inissinneqarsinnaasariaqartoq, aamma
politekeriugaluaruniluunniit.
Siumumi ukiarmi KNI pillugu oqallinnermi
isumarput imaattoq allanngortinngilarput, taamani ima oqaratta.
”Selskabeliornermi sumiluunniit, ingammik pisortat aamma
pi-ginneqataaffigisaannik, imaluunniit tamakkiisumik pigisaanni, politikerit
piukkunnartut siulersuisuni siulittaasutulluunniit inissinneqartarneri
ullutsinni avaqqunneqarsinnaanngitsoq. Massakkummi nunatsinni niuernermik
paasisimasaqarluartunik ilinniagartuunilluunniit suli amigaateqarnitsinni,
politikerit allallu piukkunnartut tamakkununnga ikkunneqartarneri
ammatinneqartariaqarpoq.” Tassa allatut oqaatigalugu inuk kinaluunniit
piukkunnartoq politikeriunini piinnarlugu selskabit siulersuisuini
inissinnaveersaarneqassanngilaq.
Naalakkersuisut akissuteqaamminni oqarmata
ingerlatseqatigiiffiit siulersuisuisa suliaminnik paasisimasaqartuunissaat
aammalu kalaallini pissutsinik ilisimasaqarluartuunissaat pingaartikkitsik,
tassani Siumumi isumaqatigaavut.
Siumumi isumaqarpugut siunissami
naalakkersuisunngortitseqatigiittarnissani Namminersor-nerullutik Oqartussat
ingerlatseqatigiiffiini siulittaasussanik inissiiniartarnerit naalakkersuinikkut
isumaqatigiinniarnerni qimanneqartariaqartut. Tamannalu naalakkersuisut
isumaliutigissagaat inassutigissavarput.
Taama naatsumik oqaaseqarluta hr. Anthon
Frederiksen siunnersuutaani ilaatigut tusatsiagaannarnik
tunngaveqartinneqartumi isumaqatiginngilarput siunnersuutillu Inatsisartuni
itigartinneqarnissaa inassutigissallugu.
Jakob Sivertsen, Atassutip oqaaseqartua:
Naalakkersuinermik suliallit Namminersornerullutik
Oqartussat aktiaateqarluni inger-latseqatigiiffiutaanni pisortatut
siulersuisunulluunniit siulittaasutut atorfinitsinneqarta-runnaarnissaannik
Inatsisartunut ilaasortap Anthon Frederiksen siunnersuutaa Atassut-mit
misissorluareerlugu imatut oqaaseqarfiginiarparput.
Namminersornerullutik Oqartussat
aktiaateqarluni ingerlatseqatigiiffiutaasa pillugit peq-qussutini kiisalu
ingerlatseqatigiiffiit pillugit inatsimmi periarfissarititaasut iluanni
nammineerlutik naqisimaneqaratik ingerlatsisinnaanerat Atassut-mit ataqqivarput
suleqataaffigisimallugulu. Kiisalu ingerlatseqatigiiffiit ingerlalluarnissaat
siunertaralugit ulluinnarni suliffeqarfinni ingerlatsisut tassa sulisut
saniatigut aamma siulersuisoqarput, ingerlatseqatigiifinni pisortat
ingerlatsineranni malinnaajuartussanik.
Ingerlatseqatigiiffinni siulersuisunut
ilaasortat siulittaasullu inuussutissarsiornikkut ilisima-saqartuunissaat
Atassut-mit pingaartitarigatsigu ingerlatseqatigiiffiit siulersuisussaannik
imaluunniit siulittaasussaannik toqqaaniarnermi naalakkersuinermik suliaqarneq
kalaaliuneq qallunaa-junerluunniit apeqqutaatinneqanngisaannarpoq, tamatumani
misilittagaqarneq piginnaaneqarnerlu toqqammavigineqartarmat.
Aamma puigussanngilarput kalaallit
Naalakkersuisut Inatsisartunit piginnaatinneqarmata Namminersornerullutik
Oqartussat ingerlatseqatigiiffiutaanni piginnittut soqutigisaannik
isumaginninnissamut, kiisalu ingerlatseqatigiiffiit siulersuisunut
ilaasortassaannik toqqaasinnaanissaminnut. Taamatut Naalakkersuisut
Inatsisartuni piginnaatinneqarnerisa siunertaraa naalakkersuinikkut
anguniakkat naapertorlugit ingerlatseqatigiiffiit ingerlassinersut
Naalakkersuisut Inatsisartullu malinnaatinneqarnissaat pingaartinneqarmat.
Taamaatut naatsumik oqaaseqarluta Anthon
Frederiksen-ip siunnersuutaa ingerlatseqatigiiffinnut tamanut
tunngassuteqanngitsutut paasillugu Atassut-mit akuersaarsinnaanngilarput.
Josef Motzfeldt, IA-p oqaaseqartua:
Inuit Ataqatigiit paasivaat inatsisartuni
ilaasortap Anthon Frederiksen-ip siunnersuutaani apeqqutit marluk pineqartut.
Siullermik Naalakkersuisut Namminersornerulluni Oqartussat suliffeqarfiutaanni
siulersuisuni ilaasortanik taakkunanilu siulittaasussanik toqqaasarnerat.
Aappaattullu suliffeqarfiit pineqartut sulisussaminnik atorfinitsitsisarnerat.
Kingulleq aallaqqaatigissagaanni
inatsisartut akuleruffigisinnaanngilaat. Suliffeqarfiummi suulluunniit,
Namminersornerullutik Oqartussanik pigineqaruni imaluunniit namminersortumik pigineqaruni,
sulisussaminik atorfinitsitsisarnerat suliffeqarfiup nammineq pisortaasa
imaluunniit siulersuisuisa kisimik oqartussaaffigaat.
Siullermut tunngatillugu
siunnersuuteqartup oqarneratut ersarereerpoq qinikkat tamakkivillutik
suliffeqarfiit siulersuisuini ilaasortaanissamut imaluunniit taakkunani
siulittaasuunissamut piukkunnaateqanngivissutut oqaatigineqarsinnaanngitsut.
Taamaattumik Inuit Ataqatigiit isumaqarput
qinikkat akornanni suliffeqarfiit siulersuisuini ilaasortaanissamut
piukkunnartut innuttaasutut allatulli toqqarneqarsinnaasariaqartut.
Taamaattumik inatsisartuni
qinigaasimanerinnaq suliffeqarfinni siulersuisunut ilaasortaanissamut
imaluunniit taakkunani siulittaasuunissamut piukkunnassutsimut
uppernarsaataasariaqanngitsoq aamma Inuit Ataqatigiit isumaqarput. Tamanna
inatsisartuni isumaqatigiissutigineqarsinnaappat suliffeqarfinni siulersuisut
inuttalersorneqartarnerat naalakkersuisunngortitseqatigiinnermi
”niuerutaasariaqanngitsoq” Inuit Ataqatigiit isumaqarput.
Taamaakkaluartoq Namminersornerulluni
Oqartussat suliffeqarfiutaanni A/S-iusuni piginnittut sinnerlugit
siulersuisutigut naalakkersuisut, inatsisartut sinnerlugit, ulluinnarni pissutsinut malinnaajuartariaqarnerat pisariaqarmat,
Inuit Ataqatigiit isumaqarput partinut naalakkersuisuutitaqartunuinnaq kina
toqqarneqassanersoq niuerutigitinnagu Namminersornerulluni Oqartussat
sinniisigisassaannut inassuteqartarneq inatsisartuniittariaqartoq.
Mannalu iluatsillugit
eqqaasissutigissavarput periuseq tamannarpiaq inatsisartut
siulittaasus-sarsiortarneranni atorneqartariaqartoq. Siunnerusukkut IA-t
saqqummiutereeratsigu
Aamma taamaappoq Namminersornerulluni
Oqartussat nunat assigiinngitsut akornanni sinniiseqartarnerat
eqqarsaatigalugu. Soorlu Nordisk Rådimi FN-nimilu aallartitaasartut nikerarlu-
tik naalakkersuisuusartut kisimik susassaqarfigisariaqanngilaat, inatsisartulli
tamakkerlutik.
Naatsumik oqaatigalugu
Namminersornerulluni Oqartussat tassa inatsisartut naalakkersuisullu. Taakkulu
sumiluunniit sinniisissaat toqqarneqartariaqarput atuuffimmut pineqartumut
piukkunnassuseq toqqammavigalugu, partimut sorlermut ilaasortaanera
qinigaasimanera qinigaasiman-nginneraluunniit apeqqutaatinnagu.
Bjarne Kreutzmann, AP:
AP isumaqarpoq akissuteqaammi immikkoortoq
una apeqqummi pineqartoq qitiusoq. Issuaaneq aallartippara ”Naalakkersuisut
anguniarsimavaat siulersuisunut ilaasortat siulittaasullu
inuussutissarsiornikkut tunuliaqutaqarluartut inuiaqatigiinnilu kalaallini
pissutsinik ilisimasaqarluartut toqqarneqartarnissaat. Naalakkersuinermik
suliallit Namminersornerullutik Oqartussat ingerlatseqatigiiffiutaanniittut
piumasaqaatinik taakkuninnga aamma naammassinnipput”, issuaaneq naavoq.
Isumaga naapertorlugu immikkoortoq taanna
ingerlatsitseqatigiiffinnut pineqartunut pitsaa-nerpaasussamik taamaalillunilu
inuiaqatigiinnut sapinngisamik pitsaanerpaasussamik siunertaqarnermut
naammattumik takussutissiisoq tunuliaqutsiillunilu.
Taamaalillunga matumuuna ersersinniarpara
Naalakkersuisut inassuteqaataannut isumaqataagama, tassa naalakkersuinermik
suliallit ingerlatseqatigiiffinni Namminersornerullutik Oqartussanit
pigineqartuni siulersuisunut ilaasortaanissaasa piivinneqarnissaa
pissutissaqanngitsoq.
Anthon Frederiksen, Kattusseqatigiit:
Siunnersuutigisannut Naalakkersuisuniit
akissutigineqartut pillugit imatut Kattusseqatigiit sinnerlu-git
oqaaseqarniarpunga.
Namminersornerullutik Oqartussat
suliffeqarfissuini aktie-teqarluni ingerlatseqatigiiffiit pillugit inatsit
naapertorlugu siulersuisut ingerlatseqatigiiffimmi pisortanik
atorfinitsitsisarnerat minnerpaamilluunniit akuleruffiginianngilara. Kisianni
naalakkersuisut akissuteqaamminni ilaatigut oqaatigaat ukiuni kingullerni
Namminersornerullutik Oqartussat suliffeqarfiutaanni aktie-teqarluni
ingerlatseqatigiiffiusuni akisussaaffiit piginnaatitaaffiillu
naalakkersuinikkut aqutsinikkullu agguataarneqarnerinut tunngasut inatsisartut
aalajangertaraat. Tamanna ajunngilaq.
Kisianni-una ajortua uvaniittoq, aammalu
avataaniik Namminersornerullutik Oqartussat isigi-nerluutigilersinnaasaat,
tassa qaangerniartariaqartoq. Oqallissaarutigigiga unaavoq, Suliffeqarfissuit
Namminersornerullutik Oqartussanit pigineqartut siulersuisoqarfiini
politikerinik imaluunniit politikeriusimasunik siulittaasulersorneqartarnerat
tamatigut akuersaarneqarsinnaanngitsutut isumaqarfigigakku, aammalumi
innuttaasunit arlalinnit tamanna iluarinagu eqqartorneqartarmat.
Soorlu assersuutigalugu ippassaq
oqallinnermi inatsisartunut ilaasortap Hans Enoksen-ip siunnersuutaa kalaallit
siusarneqarnissaannut tunngasoq inimi maani oqallisigigatsigu arlalinnik
oqaatigineqarpoq kammalaatit, qanigisat allallu annerusumik aallunneqalerpata
uagut pisussaaffigisariaqaripput uparuartuissalluta pissutsinillu
iluarinanngitsunik qaangiiniarluta suleqataassasugut. Aap taamaaliorusuppugut,
kisianni ilungersunassaqaaq uagut nammineq, isaasalerlugu ”igalaaminermi
najugaqarluta, siulliulluta ujaqqanik milluulissagutta”. Taamaammat ippassaq
iluarsiniagassatut aalajangiunneqartut saniatigut inatsisartut
naalakkersuisullu iliuuserisartagaat qiviaqqaartariaqarpagut
iluarsiniassallugillu.
Soorlu assersuutigalugu KNI-mi
politikerinik siulersuisuini siulittaasulersoratta, ilaatigullu kalaallit
allakkeriviat, KNI naatsorsuuserivia, qarasaasiaqarfik il. il. illoqarfinniit
illoqarfinnut noo-qattaarneqarput inuiaqatigiinnut akisoqisumik. Tamakkuupput
niuernermut, ingerlatsinermut, aningaasarsiornermut il. il.
ilinniagaqarsimanngitsut politikerit kukkussutigisartagaat
akueri-neqarsinnaanngitsut. Tupinnaqaaq kukkussuterpassuit tamakku annerusumik
ilinniarfigine-qanngimmata. Aamma suli takussaammat aningaasarsiornikkut
niuernikkullu ilinniaga-qarsimanngitsut amerlaqisut Namminersornerullutik
Oqartussat suliffeqarfiutaanni suli siulittaasutut inissisinasut.
Tassami taamatut periuseqarnerup
iluaqutaasa ilaat tassaapput. Suliffeqarfissuit ilaat politikerinik imaluunniit
politikeriusimasunit siulittaasulersorneqartut. Aktie-eteqarluni
ingrlatsinermut inatsit tunngavigalugu inatsisartunit, tassalu innuttaasut
sinniisaanit pallinneqarsinnaajunnaarlugit, isaasalerlugu ”nersussuartut
iluartuutitatut” inissinneqarsinasut.
Soorlu assersuutigalugu suliffeqarfissuit
pineqartut inuiqatigiillu ulluinnarni suliffeqarnikkut aningaasarsiornikkullu
pinngitsoorsinnaanngisaat ingerlatsinerliornikkut tassanngaannaq
matuneqaraangata. Imaluunniit KNI-ip nunaqarfinnut pilersuinera
ajorluinnaleraangat il. il. innuttaasunut ilaqutariinnullu ataasiakkaanut
ilungersunartumik sunniuttarput. Taavami taamaattoqartillugu inuiaqatigiit
sinniisaat, tassa inatsisartut, sumut atussagamik?
Naalakkersuisut anguniagaat
isumaqatigilluinnarpakka, tassalu kalaallit aningaasaqarniarnermut
nutaaliaasumut niuernermut tunngavilimmut naleqqussarnissaat.
Taamaattoqassappammi pisariaqarluinnarpoq aningaasarsiornikkut, niuernermut
ingerlatsinermullu ilinniagaqarluarsimasut suliffeqarfissuarni siuttutut
inissisimanissaat.
Naalakkersuisut akissuteqaamminni
ilaatigut oqaatigaat naalagaaffiup ingerlatseqatigiiffitoqarsui aktie-teqarluni
ingerlatseqatigiiffinngortinneqarmata niuernermik tunngaveqarlutik
ingerlassasut. Kisiannili taamaakkaluartoq ullumikkut ingerlatsineq qiviaraanni
suliffeqarfissuit aktie-teqarluni ingerlatseqatigiiffinngortinneqarnerisa
kingorna, kalaallit inuiaat suliffeqarnikkut, pilersorneqarnikkut il. il.
akulerussinnaatitaanerat aatsaat taamak ajortigilersimavoq. Allaat pissutsit
ilaat nunasiaqarnerup nalaani pissutsinut assersuunneqarsinnaallutik.
Ilami inatsisartulluunniit piginnittutut
sinniisaaniarlutik, aktie-teqarluni ingerlatseqatigiiffissuarni pissutsinut
ilaatigut iluarinanngeqisunut misissuisinnaatitaanngillat. Soorlu tamanna KNI
pillugu misissuisitsisoqarniarmat paasigipput.
Taamaammat naalakkersuinikkut kukkussutit
nassuerutigineqartariaqarput. Niuernermullu nutaaliaasumut ikaarsaarniarneq
tassaasariaqarpoq niuernerpalaartumik ingerlatsineq politikerinik
aqunneqanngitsoq.
Taamaattumik qaquguluunniit
upperilersinnaanngilara nakorsap imaluunniit ilinniartitsisup,
ilinniartitaanerminut atatillugu fabrik-imik ingerlatsisinnaanermut,
aningaasarsiornermut, niuerner-mut il. il. ilinniartitaasarsimanissaat.
Massakkut pissutsit imaapput.
Politikerip politikereqanni, ikinngutini il. il. suliffimmik pitsaasumik aningaasarsiorluarfigisinnaasaanik
tunisarpaa. Naak ilaatigut atorfinitsinneqartoq imaluunniit
siulittaasunngortinneqartoq suliffeqarfissuarmi pineqartumi ilinniakkaminut
naleqqutinngikkaluartoq.
Tamakku arlalinnik ersarissunillu
takussutissaqareerput. Ilaatigut soorlu naalakkersuisut nikinner-minni qanoq
iliuuseqartarneri arajutsisimaneqanngitsut.
Pissutsinik malinnaagaanni aamma
ajornanngilaq nunani allani pisartut ilaatigut qiviassallugit. Soorlu
assersuutigalugu ukioq Danmark-imi professor-it ilaat imatut oqaaseqarpoq.
Politikerit kammalaatitik, politikereqatitik, ilaquttatik il. il. politikkikkut
atornerluinermik taaneqarsinnaasumik ikiulerpatigit taava ajortoqassasoq.
Tamannalu pinngitsoorniarlugu
Kattusseqatigiit sinnerlugit pissutsit taamaattut piaartumik
iluarsineqarnissaat inussiarnersumik kaammattuutigaara. Soorlu naalakkersuisut
akissuteqaatiminni oqaatigigaat inatsisartut ingerlatseqatigiiffiit pillugit
peqqussutit naapertorlugit iliuuseqartartut. Taamaattumik peqqussutit
pineqartut allanngortinneqarnissaasa sulissutigineqarnissaat Inatsiseqarnermut
Ataatsimiititaliami suliarineqarnissaa inassutigaara.
Qanittumi KNR-imi siulersuisoqarneq
pillugu oqallinnermi ilaatigut makku assersuutigaakka. Naak inatsisartunut
ilaasortat ilaannik mamaagineqaraluartut. Tassalu takuneqarsinnaasariaqarmat
ruujorilerisoq peqquneqarsinnaanngitsoq ullut tamaasa napparsimavimmi
nakorsiartitseqqullugu imaluunniit nakorsaq eqqakkanik ikuallaasartutut
suleqqullugu. Taamaattoqassappammi kialluunniit takusinnaavaa ajortoqassasoq.
Soorlu ullumikkut oqaluuserisassatta
ilaanni aamma inatsisartunut ilaasortap Hans Enoksen-ip KNAPK-p
illersorneqarnissaa pillugu oqaluuserisassanngortitsinermini
piginneqatigiiffissuit kisimik naalaganngorsinnaanerat, kisermaassillutillu
ingerlatsilrenissaat aarloqqutigaa.
Ilaatigullu imatut oqarluni. Siulittaasoq
qinnuvigilaassavara issuaalaaqqullunga. Issuaaneq aallar-tippoq. ”Inuinnaat
pisortanut oqartussaaqataanerat tamarmi aserorneqassaaq,
piginneqatigiiffissuillu naalagaaniapilunnerat ataatsimoorluta
akiorsinnaajunnaassavagut”. Issuaaneq naavoq.
Tamakku assersuutissaalluarput aamma
oqallinnermi maani.
Taamaattumik politikerit,
politikeriusimasulluunniit ingerlatseqatigiiffinnut assigisaannulluunniit
inissinneqartarnerat allanngortinneqartariaqarpoq.
Jonathan Motzfeldt, Naalakkersuisut
Siulittaasuat:
Oqaaserineqartunut partiit
amerlanerusut oqaasii qujassutigaakka. Tassa Siumup oqaaserisamini aamma
oqaatigimmagu naalakkersuinikkut isumaqatigiinniarnermi siulittaasussat
tikinneqartarneri qimanneqaqqullugit, tamanna
naalakkersuisunngortitsisartussanut periarfissatut aamma
inner-suussutigineqassaaq aamma taanna tusaatissatut tigussavarput.
Kiisalu aamma IA maani
oqaatigisaannut tunngatillugu. Piffissaq maannakkut nalerornerpoq eqqortoq
taamaalissallugu inatsisartut tamatumani toqqaasarnissaani apeqqut
misissortissallugu. Aammalu tamanna assigiinngitsutigut qanoq
kinguleqarsinnaanera aammalu periarfissaqarnersoq eqqortumik tunngavissaqarpa,
allatulluunniit aamma misissorneqarsinnaavoq. Kisianni aamma soorunami
periarfissaasinnaalluni aamma maannakkut taaneqartoq, nikuinnarlunga taanna
akisinnaanngilara aamma misissortinnissaa misissorneqarnissaa aamma
eqqortumillu akineqarnissaa tusarfigineqarsinnaavoq.
Kattusseqatigiit oqaatigisaat,
saqqummiussai uani, oqartariaqarpunga inatsisartut oqaluttarfiat taamatut
atussallugu pitsaasutut uanga isiginngilara. Maani oqaatsit
saqqummiussorneqartut, qallunaat jantelov-imik taasagaat nalunngilarput, uagut
DK-mi aamma kummassarsimasugut, aam-ma kaalaallit akornanni oqaaseq, sinnganeq,
mianersuutissavarput aamma oqallinermi maani atussannginnatsigu.
Suliassat Kalaallit Nunaanni
aallartinneqartut maani eqqartugarigatsigit, soorlu A/S-inik nutaanik aallartitsisimanigut,
Kalaallit Nunaani naalagaaffimmik tamakkiisumik ingerlatsinerminngaanniik
niuernerpalaartumik ingerlatsinermi ikaarsaarnermi tamakkiivissumik
ingerlatsinerit taama ittut ullormiik ullormut aamma
ilinniarneqarsinnaanngillat. Inuit immikkut ilinniarluarsimasut tamatumani
tiguneqartarput, ilumoorpoq. Kisiannili aamma imatut pissuseqassanngilagut
soorlu sumi tamani inortuilersugut. Allaanngilaq sumi umiulersuminngaanniik
annanniutinut pisserarniartugut, taamaattoqanngilluaasarpoq.
Maannakkut uagut A/S-ini aamma
suliaqarsimasugut aammalu akissussaaqataalluinnartugut, msigisimavugut
eqqortumik KNI-ikkut maannakkut aaqqinneqarput. Niuerneq taanna KNI-imut
tunngasoq Kattusseqatigiit immikkut taakkartortuarmassuk siorna ukiakkut maani
inimi, inatsisartut namminneq udvalg-iat KNI-mi misissuisimasoq
oqallisigaarput. Aamma tassani inner-suuttariaqarpagut aamma takuneqaqqullugit
inatsisartut taamanikkut naliliineri aammalu oqaatigisaat.
Maani piffissat tamaasa
atortariaqanngillat suut tamakku qaqilerlugit saqqummiuttuarnerinut.
Iluarsiissutigalugit iluarsillugillu suliat taakkua maannakkut tunngavigalugit
sulisariaqarpugut. Taamaattumik sorparujussuarnik kattusseqatigiit maani
oqalugiarnerat, apeqqutinik uanga tulluarinngisannik maani aamma
oqallisigissallugit. Pitsaanerutillugulu qineqqusaarluta, aamma
qineqqusaaraangatta oqaatsit imak ittut aniatinneqartarmata, qineqqusaarfinni
tamakku aamma naapilluta eqqartorsinnaavagut. Kisianni maani suliassat KNI-mut
tunngasut inimi maani oqallisaareersimapput.
Alloriarneq iluarsissutissat
Siumut-p taasai IA-llu misissoqqusai, tamaattut misissorneqarsinnaapput
pitsanngorsaatissatut kinguneqassappata.Aap, kisianni Anthon Frederiksen-imit
ilaliussat ajortu- mit pipput, taamak
oqaraanni immaqa naleqqunnerusutut issuaaneqarsinnaavoq.
Tassani taama oqaaseqarlunga uani
akissutit partiinik allaninngaanneersut tamaasa qujassutigaakka. Aammalu
suliassaq taamatut misissugassartalik ingerlatseqqinnissaa suliarineqassalluni.
Anthon Frederiksen, Kattusseqatigiit:
Soorunami
nuannaarutigisariaqarparput suulluunniit oqaluttarfimmi maani
saqqummiunneqartut qisuariarfigineqaraangata. Aamma nuannerpoq naalakkersuisut
siulittaasuata, minnerunngitsumik aamma IA-p saqqummiinerat tunngavigalugu
nalilersueqqissinnaaneq aammalu apeqqutik pineqartunik eqqartueqqissinnaaneq
ammatimmagu.
Erseqqissaatigissavara taamatut
oqaaseqarninnut minnerpaamilluunniit sinnganeq, oqaaseq sinnganeq,
eqqarsaatiginngilluinnarlugu saqqummiigama.
Una pingaarnerutippara inuiaqatigiit
pigisaat suliffeqarfissuit, taakkua isumannaatsumik inger-lalluarnissaat
aammalu ajornanngippat politikerinik aqunneqannginnissaat. Tassami politikerit
amerlanertigut niuernermik, aningaasarsiornermik suliffeqarfissuillu
ingerlannissaanut annerusumik amerlanerpaatigut ilinniagaqarsimaneq ajorput.
Ilinniagaqarsimasut tassaapput niuernermik, aningaasaqarnermik aammalu
ingerlatsinermik ingerlatsisut taakkua immaqa ajunnginnerusumik
ingerlatsisinnaasutut oqaatigineqarsinnaasut.
Uterfigiuarpakka maannamut kukkussutigisarsimasagut naalakkersuinikkut, tamakkualu nalunngilarput assersuutigiinnarutsigu aamma eqqartortuassavagut. Tassa KNI-ikkut Royal Greenland A/S-ilu ukiuni kingullerni qulit iluanni amigartoorutigisaat qanoq amerlatigippat. Siullermik RG-p amigartoorutigivai kr. 300 mio.-it, aappassaanillu KNI-p kr. 400 mio.-it missaani. Qanoq tamakku naleqarpat? Tassaannginnerlutik naalakkersuinikkut kukkusumik iluuseqarsimanerup kingunerisai?
Uanga akerlerinngilluinnarpara sinniisoqarfiit siulersuisoqarfiillu politikerinik ilaasortaa-titaqassappata, kisianni siulittaasulersoqinagit. Malinnaasinnaasunik siulersuisoqarfiit siulittaasoqarfiillu aallartitaqarfigineqarsinnaapput politikerinik. Politikeri naalaganngoreerluni tamakkununnga inissittariaqanngitsutut uanga isumaqarfigaara.
Kisianni tassa nuannaarutigaara taamatut qisuariaateqarneq aamma qanoq iliuuseqarfiginiarneqarmat. Qujavunga.
Josef Motzfeldt, IA:
Tassa maani ilaatigut oqallinnerup nassatarisaanik pineqartoq tassaavoq sinniisoqarfiit, ilaatigut ingerlatseqatigiiffinni sinniisoqarfiit oqartussaaffiisa ullumikkornit annertusineqarsinnaanerat.
Aamma ilisimaneqartutut Namminersornerullutik Oqartussat ingertsiviutaanni tamani sinniisoqarneq, tassa susassaqartuni inuiaqatigiit sinniisaannik sinniisuutitaqarneq taanna annikippallaamik atorneqarpoq. Aamma atorneqaraluarfiini sunniuteqarsinnaanerat killeqartorujussuusoq tamatta nalunngilarput.
Taamaattumik naalakkersuisut suliffeqarfissuarni tamakkuninnga ataatsimeersuarnerni oqartussaanerisa saniatigut inatsisartut toqqaannartumik nakkutilliisoqartitsisinnaanerat IA siusinnerusukkut siunnersuutigisimasaraluarput misissorneqarsinnaasariaqarpoq, uani apeqqut allamut sangutillugu soqutiginarnerusoq IA-ninngaanniit tassaavoq innuttaasut sunut attuumassuteqartittunik taamak annertugisumik attuumassuteqartunut suliffeqarfissuarnut oqallinnerni innuttaasut sinnerlugit oqartussaaqataanerup ullumikkornit nunatsinni pissutsini naleqqussarsinnaanera orniginarsinnaammat inatsit A/S-nut tunngasut immaqa sanioqquppallaanngikkaluarlugit.
Naalakkersuisunngortitsineq, tassa taanna paasivarput Siumut-minngaanniik isumaqatigineqartoq naalakkersuisunngortitsineq tassa naalakkersuisussanik toqqaaneq, taassumap saniatigut inissiffissat piukkunnassuseq toqqammavigalu toqqartorneqartariaqarput. Ataatsimiititaliani siulittaasus-sarsiorneq inatsisartut ataatsimiititaliaanit isumagineqassaaq, ataatsimiititaliap ilaasortaasut nammineq isumagissavaat.
Kiisalu siunnersuuteqartup oqarneratut ruujorilerisoq ulloq naallugu nakorsiartitsisinnaanngilaq, soorunami. Kisianni pingaaruteqartoq tassaavoq aamma oqaatigissallugu, inatsisartunimi kikkut ilaasortaassappat. Inatsisartuni ilaasortanngorniarnermi aamma ilinniarfeqalissanerluta.
Suliffeqarfinni pineqartuni siulersuisunut ilaasortat pingaaruteqarluinnarpoq nunatsinni pissutsinik alakkaamasaqarnissaat. Matumani assersuutissaasinnaavoq niuernerinnavimmik annertunerusumik aallutaqarluni nunatsinni pissutinik ilisimasaqanngissutiminik ersersartitsisartoq tassaavoq umiarsuaatileqatigiiffik Royal Arctic Line A/S. nammineq oqartarnera najoqqutaralu nunaqarfiit misissoqqaarusuttarpai nunaqarfiit suut pineqarnersut kiffartuussivigiligassani.
Taamaattumik siulersuisuni ilaasortassarsiornermi oqareernitsituut toqqammaviit pingaarnerpaar- tariaqagaat tassaavoq piukkunnassutsimik aallaveqarneq.
Jonathan Motzfeldt, Naalakkersuisut Siulittaasuat:
IA-p oqaaserisaanut inatsisatuninngaaniit nakkutilliisoqarsinnaanermut apeqqut, taanna tikinne-qarmat imak paasillugu isumaqarpunga eqqarsaatit siornatigut aamma arlaleriarluni saqqummiunneqartareernikuummat inimi maani.
Soorlu taamaattoqartoq RAL-imi immikkut repræsentskab tassani sinniisuutitanik tassaniittoqarpoq. Sulliviup ingerlanera tamakkiisumik oqallisigisinnaallugu aamma oqaloqatigiissutigisinnaallugu. KNI-mi taamak iliortoqarsinnaanera isumaqarpunga neriorsuutaareerniaraluartoq siusinnerusukkut. Kisianni aamma piffissaq manna iluatsillugu apeqqut saqqummiuteqqinneqartut taanna tunngavigalu assortornanngilaq. Aammalu allani taamaatumik sinniisuutitanik oqallittuusinnaasunik peqarnissaa taanna orniginarneruvoq oqallisereqqissallugu.
Una selskab-i ingerlanerani inatsisit tunngavigalugit ingerlasuunerat taassumalu ingerlanerminni aningaasartuutissami tungaatigut annertuumik pisussaaffeqarneri, niuernerpalaartumik ingerlaneri taamaattumillu aamma ullormut isertitassaminnik ussassaarinermik allatigullu niuernerpalaartumik ingerlatsinerminni.
Uagut aamma pingaartittakkagut ilaanni tunulliuteqqittariaqarpaat, tassa inuiaqatigiinninngaannik isumagineqartussat taakkulu immikkut akilertakkavut. Soorlu isorliunerusunut, nunaqarfinnut, assartuinermut allanullu ilanngullugit suliareqquneqarput. Taakkua selskab-it aningaasaannaat isigalugit iluanaarniarsarisup suliassaasa avaataaniittutut isigineqartarmata, kisiannili inimi maani suliassiissutigineqartarlutik.
Taamaatumik taakkua repræsentskab-eqarneq, sinniisoqartitaaneq aqqutigalugu aaqqiissutissani maani eqqaaneqareersimasut aamma uterfigissallugit kajungernarput.
Kisianni aamma oqaatigilaassavara uani siulersuusut eqqarsaatigineranni, aamma maannakkut qinigaaffimmi uani ilaatigut isumaqatigiissutit qimakkiartuaarneqarneri malunnaateqareermata. Ilaatigut oqaatigneqarsimagaluarpoq Grønlandsfly A/S-mi, taanna pigineqarpoq naalagaaffimmit, SAS-mit uagutsinnillu, uagut tassani ikinnerussuteqarpugut aktionær-itut kisianni isumaqatigiissutigineqartut najoqqutaralugit siulittaasuuneq tassani aamma uagut sinniisuutitatsinnut ikkussimavoq. Tassani naluara Jørgen Høy naluara Siumut-kuunersoq, kisianni Siumut-kuunngitsutut imaluunnit Siumut-kutut isumaqarfigigaluaraanni taava aamma avataaninngaanniik aningaa-sarsiornermik allatigullu siornatigullu ilisimasaqarluarnera selskab-imi tunngavigalugu aamma toqqarneqarsimavoq.
Aamma IA siulittaasuata oqaatigisaa ilumoorpoq. Sumi ilinniarsimaneq tunngavigalugu toqqartuisoqartalissappat aamma ilinniarsimasagut tunngavigalugit qinigaasalissagalutta, alutornassagaluaqaagummi kisianni assigiinngisataartaqigatta inuit maani assorujussuaq aamma taanna demokrati-mut pinnersaataasarpoq.
Peter Ostermann, Atassut:
Oqaluttorput oqaloqatigilaariarlugu
ilassuteqalaassaanga. Siunnerssuuteqartup siunnersuummini saqqummiussinermini
aammalu Kattusseqatigiittut oqaaseqarnermini oqaasii tusaallugit assorsuaq
malunnarpoq misissuilluaqqaarani siunnersuusiorsimasoq. Paasiniaasimanngilaq
paasiniaaffissanut eqqortunut. Siulittaasunngooq allaanngillat nersussuit iluartut,
tassa nammineq piumasannguaminnik. Kujataamiutoorlugu ilaalaa.
Siunnersuuteqartup
ilisimasariaqaraluarpaa, paasiniaanermini aamma paasisimassagaluarpaa
siulittaasut siulersuisullu A/S-imut inatsit malillugu sulisussaammata
akisussaaffigilugillu. Kukkuluttuuteqarunik piginnittunik soraarsitaasinnaapput
minutsimiik minutsimut aamma aningaasanik kukkusumik ingerlatsisimagunik
akissussaatinneqarsinnaapput A/S-imi inatsit naapertorlugu. Siunnersuuteqartup
tamakkua misissorsimasariaqaraluarpai siunnersuutimi tunngavilersuutissatut
allatsinnagit.
Aamma una ulluinnarni aqutsinermi
eqikkaanerit isornartorsiorpai oqaatsit assigiinngitsut atorlu- git. Takuuk KNI-kut Royal Greenland-ikkut Tele-kkut
allallu A/S-innortitagut. A/S-inngortikkaangatsigit oqarfigisarpavut
naliginnaasumik niuernermik tunngaveqarlusi ingerlatsissaasi nalinginnaasumik
unammillerlusi. Unammillilersullu ajorilerlugillu, taamatut
ingerlatsisoqarsin-naanngilaq.
Aamma eqqaamasariaqarparput
suliassaa tassaanerummat siulersuisuni akuersissutaasut piviusunngortissallugit
piviusunngortinneqarnissaalu isumagissallugit, tassa suliassaa pingaarnerpaaq
annerpaarlu. Siunnersuuteqartup oqarneratigut asuli namminersorlutik sumi
tamaani piaaraluni ingerlatsinngilaq, taamaattoqanngilluinnarpoq.
Kiisalu Siumut-minngaaniit
oqaatigineqartoq una naalakkersuisunngortitsinermi tamakkua
ingalassimaniarneqassasut isumaqatigilluinnarparput Atassut-miit aammalu
isumaqatigaarput IA-minngaanniik saqqummiussorneqartut, soorlu
siulittaasunngortitsinissamut allamullu tunngassuteqartut inatsisartuni
suliarineqartalernissaanut naalakkersuisut misissuiumanerat aamma
isumaqatigilluinnarparput.
Anthon Frederiksen,
Kattusseqatigiit:
Soorunami inuit ataasiakkaat maani
taagorneqassanngillat aamma taamaaliorusunngilanga. Kisianni oqaluttumut
kingullermut tunngatillugu oqassaanga assersuutigineqareersut suliffeqarfissuit
marluk, tassalu Royal Greenland A/S KNI-lu taakkua
assersuutissaqqittuaannarmata taakkunani taamak annertutigisumi
ajutoortoqarmat. Soormi piginnittut, tassa inatsisartut, soormi
akulerus-sinnaatitaanerat taama annertutigisumik killilerneqarpa. Tassa
patsisigineqarmat A/S-it inatsisaat pillugu inatsisartut taamannak
killeqartigisumik noqinneqarmata.
Tamakkuupput ilaatigut soorlu immaqa
IA oqarnerattuut siulersuisunut inissitsiterinermi niuerniutiginagit
isumannaatsumilli toqqaasarnikkut anguneqarsinnaagaluartut.
Erseqqissaatigissavara uanga
akerlerinnginnakku siulersuisoqarfinni A/S-ini aammalu A/S-iunngikkaluartuni
Namminersornerullutik Oqartussanik pigineqartuni siulersuisunut
malinnaasussamik, ilaasussanut toqqaanissamut akerliunnginnama. Unaliuna
akerliuffigisara ingerlaannarlugu siulittaasumik, oqareerluta siulittaasoq uuma
siulittaasussaa. Taakkua piginneqatigiiffiit soormi siulittaasussartik
namminneq toqqarsinnaassanngilaat.
Aamma ilumut uagut qinikkat,
inatsisartuni qinikkat, sumi ilinniagaqarnerput apeq-qutaatinneqartalissappat.
Tamakkua eqqartorneqanngillat, taamaattumik pissutsit tamakkua uunga
assersuunneqarsinnaanngillat.
Finn Karlsen, ataatsimiinnermik aqutsisoq:
Tassalu taamaasilluni, oqaatigissavara
siunnersuut partiinit tamanit akuerineqanngimmat, itigartinneqarmat. Kisiannili
misissuiffigineqarnissaa isumaqatigiissutigineqarluni siunissami.
Taamaasilluni imm. 23, Suliffeqarfissuarni
Namminersornerullutik Oqartussanit pigineqartuni politikerinik
atorfinitsitsisarnerup siulittaasulersortarnerullu piaartumik
atorunnaarsinneqarnissaanik siunnersuut tunngavigalugu oqallinneq tamaanga
killeqarpoq.
Oqaluuserisaq naammassivoq.