Oqaluuserisassani immikkoortoq 33-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 11.februar 1998 nal.16,10
Ataatsimiinnermik aqutsisoq, Anders Andreassen
Inatsisartut Siulittaasuat, Siumut:
Taavalu apeqquteqaatit tikissavavut. Taakkulu
tikitsinnagit erseqqissaatigissallugulu suleriaasissarput malillugu
apeqquteqaatit aperisuminngaaniit minutit sisamat akisullu minutinik arfinilinnik
sivisussuseqassammat. Taava siuliulluni apeqquteqartussaq Peter Ostermann.
Taassumap apeqqutigisussaavaa kujataani puisit amiinik nioqqutissiorneq pillugu
apeqquteqaat.
Peter Ostermann, Inatsisartunut ilaasortaq,
Atassut:
Qujanaq. Erseqqissalaallara aallaqqaataani
apeqquteqannginnama puisit amiinik tunissassiorneq pillugu kisianni puisit
neqaannik tunisassiorniarneq pillugu. Pilersaarutaasutut puisit neqaannik
tunisassiulernissaq kujataani pingaartumik Nanortalimmi annertuumik isumalluartitsivoq.
Aalisagaqannginnerani ukiorpanngulersuni periarfissaat erleqiuarluni
inuusimanermi allanngortitsilluinnartussat. Aalisagaqanngittuarnera
kujataarmiunut ilungersunaqaaq kingunerisaassami ilagimmassuk anngajaanik
aalisariuteqarnikkut annertuumik kinguarsimalerneq. Raajarniuteqarneq
eqqaassanngikkaani. Puisit neqaannik ataavartumik aalajaatsumillu
tunisassiussagaanni angallatit anngajaat pisariaqarput tamannalu
qulakkerniarlugu nalakkersuisut qanoq iliuuseqarniarpat ?
Jonathan Motzfeldt, Naalakkersuisut Siulittaasuat,
Siumut:
Hr. Peter Ostermannip apeqquteqaateqarpoq
Naalakkersuisut puisit neqaannik tunisassiulernissamut atatillugu angallatinik
pisariaqartitsineq pillugu sumik pisariaqartitsissamaarnersut. Nanortalimmi
puisit neqaannik tunissiulernissaq pillugu oqaatigineqarsinnaavoq
nalakkersuisut 29. December 1997 siulersuisuugallartunik Aaalisarnermut
Piniarnermut Inuussutissarsiornermut Nunalerinermut Pisortaqarfimmit
Nalakkersuisut allattoqarfianit aamma Royal Greenland A/S-mi inuttalimmit
pilersitsimmata.
Aalisarnermut Piniarnermut
Inuussutisssarsiornermut Nunalerinermullu Pisortaqarfik siulittaasoqartitsissaaq
imaluunniit siulittaasoqartitsivoq. Naalakkersuisut Allattoqarfiat
siulersuisunut allattoqarfiussalluni. Siulersuisuugallartut
ingerlatteqatigiiffimmik pilersitsinissaq aammalu tunisassiornerup
sapinngisamik piaarnerpaamik aallartinnissaa eqqarsaatigalugu misissueqqissaarnerit
ingerlateqqinnerisa siulersornissaannik siunertaqarput. Siulersuisuugalllartut
ilisimatitsissutigaat ilaatigut suliarinikkat imminut akilersinnaanerat
aammalu suliassap ingerlanissaannik innaallagissamik imermillu pilersuinikkut
tunisinermi atortorusaarutinik kiisalu assartuinermi
atortorissaarusersuinissamik pisariaqartitsineq nalilerniarneqalersoq.Tassunga
atatillugu aammattaaq tunisinermi atortorissaarutit pitsaasutsimut
eqquluisaarnermullu malitteqqusanut atalluinnartut eqqortinneqarnissaannut
sanaartornermi aningaasaliinerit sorliit pisariaqarnissaat peqqissaartumik
nalilerneqassapput.
Aamma siulersuisuugallartut ilisimatitsissutigaat
misissueqqissaarnerit allartinneqalersut. Qanoq ililluni suliariniakkami
tunisassiassanik pisariatinneqartunik tunngavissat pilersinneqarsinnaanersut.
Tassungasulu angallatit qanoq ittut piniarnermi assartuinermilu
naleqqunnerpaatut atorneqarsinnaassanersut aammattaaq nalilerniarneqassaaq.
Siulersuisuugallartunik misissueqissaarnerit naammasseriarpata Naalakkersuisut
Inatsisartut puisit neqaannik tunisassiornermik suliariniakkap inaarutaasumik
ilusilersorneranik kiisalu suliariniakkamik Inatsisartunut tapiissutit atorneqarnerannik
nassuiaammik ilisimatitsiumaarput.
Peter Ostermann, Atassut:
Qujanaq. Oqarsinnaavunga akissutisiara
naammagisimaarlugu aammalu soorunami pisariaqarpoq misissueqissaarnissat.
Kisiannili neriuutigissavara Nanortalimmi imermik ajornartorsiuteqarneq
pissutigalugu tamakkua sukumiisumik nalilersoqqissaarneqassasut. Ajussaqimmat
imermik ajornartorsiuteqarneq pissutaalluni tunisassiorneq
ajornartorsiulissappat. Kiisalu kissaatigiinassallugu angallateqarnikkut
pissutsit aamma sukumiisumik nalilersorneqarlutik piaartumik
aaqqiiviginiarneqarnissaat sulissutigineqassasoq. Qujanaq.
Anders Andreassen, Inatsisartut Siulittaasuat:
Taamaaliilluni apeqquteqaat immikkoortoq nr. 33 naammassivarput.
Oqaluuserisaq naammassivoq.