Kalaallit Nunaanni Inatsisartut

Oqaluuserisassani immikkoortoq 34-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasuungorneq 11.februar 1998 nal.16.10

 

Oqaluuserisassami immikkoortoq 34.

 

Pingasunngornikkut apeqquteqaat:

 

Inatsisartunut ilaasortaq Maliinannguaq M. Mølgård Royal Greenlandip nunani allani suliffissuatai pillugit apeqquteqaateqarpoq.

 

 

 

Ataatsimiinnermik aqutsisoq, Inatsisartunut Siulittaasoq Anders Andreassen:

Taavalu tulliullugu immikkoortoq 34 Maliinannguaq M. Mølgård apeqquteqaateqassaaq.

 

Maliinannguaq M. Mølgård, Inatsisartunut ilaasortaq, Inuit Ataqatigiit:

Qujanaq. Matumuuna apeqquteqaatiginiarpara Royal Greenlandip nunatta avataani suliffissuaatai qanoqamerlatiginersut , sumiinnersut, ataatsimullu isigalugit qanoq ingerlanersut.Taakkunanilu ingerlanerliortoqarnersoq. Tassami naluneqanngilaq ukiuni kingullerni Royal Greenland suliffis­suarnik pisiortorsimasoq. Ukiorlu kingulleq tusaamalerparput Royal Greenlæand ingerlanerlior­toq ilaatigut raajat akiisa apparneri pissutaallutik. Suliffissuaq kalaallinut inuiaqatigiinnut pingaaruteqarluinnartuuvoq. Ilami illoqarfiit arlallit napaniarnerannut sunniuteqarluinnarluni.

 

Taamaattumik annilaanganangitsuungilaq suliffissuit nunatta avataaniittut Royal Greenlandip pigisai aamma amigartoorlutik nakkartuussagaluarpata tamanna inuiaqatigiiinnut annermik suliffissuaqarnermik isumalluuteqartunut sunniuteqarnerlussinnaanissaa. Ilumut nalakkersuisunit qulakkersimaneqarnerluni taakku suliffissuit nakkaattuunginnissaat. Nakkaatuusagaluarpatalu qanoq iliuuseqarnissaq, tassami nalunngilarput suliffeqarfissuit aktieselskabinngorsimasut soorlu KNI amigartuullarmat nunatta karsia annertoqisumik aningaasaleeqqittariaqarsimammat. Naak nalunngikkaluarlugu partiit ilaat Royal Greenlandip sinniisoqarfiani ilaasortaatitaqartut aamma Inuit Ataqatigiit. Taamatut apeqquteqarninnut pissutigaara tamanna erseqqissumik paasissallugu inuiaqatigiinnut pingaaaruteqarmat arlalinnillu qinersisartunut ataatsimiisitsinerni apeqqutigine­qartarluni.

 

Jonathan Motzfeldt, Naalakkersuisut Siulittaasuat:

Fru Maliinannguaq Mølgård Royal Greenlandip nunani allani suliffeqarfiitai pillugit apeqqute­qaataa pillugu tassunga ilanngullugit ingerlatseqatigiiffitk qassinik suliffiuteqarnersoq, qanoq ingerlanersoq aammalu nunani allani ingerlatseqatigiiffiit aqutat akiliisinnaajunnaassagaluarpata naalakkersuisut qanoq iliuseqarumaarnersut. Siullermik fru Maliinannguaq Mølgård-mut paaseqqussavara Royal Greenland A/S-ip ingerlatseqatigiifiutaasa aqutat ingerlatsinikkut naatsorsuutitigullu qanoq ingerlanerinut paasissutiossat ataasiakkaat oqaluttarfimmit maanngaa­niit oqaatigineqarneq ajormata, Nunat tamalaat akornanni inuussutissanik immamit pisunít niuerfinni unammilleqatigiinneq annertoorujussuuvoq. Taamalu unammillerfik ingerlatsinermi naatsorsuutinillu paasissutissanik Royal Greenland A/S-mit pissagaluarunik iluaqutigisinnallugit. Tamanna Royal Greenland A/S-mi sinniisoqarfimmik pilersitsisimanermut tunngaviiuvoq. Tassani ilaatigut nalakkersuinikkut partiit sinniisoqarlutik soorlu Maliinannguaq Mølgård partiianik Hr. Leif Fontain sinniisuulluni. Sinniisoqarfik Royal Greenland A/S-ip ingerlaneranik malinnaanissaminut periarfissaqarpoq. Ingerlatseqatigiiffissuarmi Royal Greenlandimi 1997-ip naanerani ingerlatseqatigiiffiup, aqutsisup saniatigut ingerlatseqatigiiffiit aqutat 23-put suliffe­qarfiillu peqataaffigisat 9-llutik.

 

Ingerlatseqatigiiffiit aqutat amerlanerpaartaat nunani allani arlalinni ingerlatseqatigiiffissuup nioqqutissiaataanik tuniniaanerinnavimmik suliaqarput. Nunatsinni nioqqutissiornerup saniatigut ingertseqatigiiffissuaq Danmarkimi Tysklandimilu nioqqutissiorfeqarpoq Royal Greenland Seafood A/S-mut atasunik kiisalu ingerlatseqatigiiiffissuaq kilisaammik ataatsimik Amerikkami sineriaata avataani aalisartunut piginneqatavoq. Royal Greenland aammattaaq russit kilisaataanik sisamanut Ruslandip imartaani, pingartumik saarullinniartussanut annikitsumik aningaaleqataa­voq. Kilisaat siulleq 1998-mi oktober qiteqqunnerani tunniunneqassasoq ilimagineqarpoq. Kilisaatip ingerlatseqatigiiffimmit aqutamit Royal Rybamit ingerlanneqassaaq. Nunani allani suliat soorunami iluanaaruteqarlutik ingerlanissamik siunertaqarlutik pilersitaapput. Suliallu taakku ukiut ikittunnguit ingerlanerini Royal Greenlandip ingerlaneranut pitsaasumik sunniute­qartussaaniartussaapput.

 

Taamaattorli Royal Greenland A/S-p ukiumut naatsorsuuteqarput 1997-mut amigartooruteqarnis­saminik ilimasuppoq ukiumi naatsorsuuteqarfiusumi naammasseqqammersumi amigartoorute­qarnissaq ilimagineqaraluartoq Royal Greenland A/S-p ingerlatseqatigiiffiillu aqutat akiligassa­qarfimminnullu akiliisinnaapput. Royal Greenland A/S nalunaarpoq ingerlatseqatigiiffissuaq akiliisinnaassuseqarluartoq. Ingerlatseqatigiiffisuup maanna siunissamini kikkunnut tamanut akiliisinnaanerinik qularnaarisumik. Oqaatigineqarsinnaavoq ukiumi naatsorsuuteqarfiusumi 1997-mi amigartoornissami ilimagisaq nunatsinni nunanilu allani sulianut tunngassuteqartoq. Taamaattorli amigartoorutit amerlanersaat nunatsinni nunami suliffissuarni kiisalu aningaaasat nalingisigut annaasaqarnermik pissuteqartineqarsinnaapput.

 

Taamaakkaluartoq takorlooriartigu Royal Greenland A/S-ip nunani allani suliffeqarfiutai ikilisinnaajunnaartut. Pisuni taamaattuni Royal Greenland A/S ingerlatseqatigiiffinni aqutani aktieatigut aningaaassaliissutini kisiisa annaasussaavai. Royal Greenland ingerlatseqatigiiffittut aqutsisutut ingerlatseqatigiiffimmut aqutamut qularnaveeqqusiisimappat taamaattoq Royal Greenland A/S-ip aammattaaq qularnaveeqqutit taakku tamaasa akilissavai. Ingerlatseqatigiiffik aqutaq ataasiinnaanngitsoq kisiannili ingerlatseqatigiiffissuaq Royal Greenland tamarmi aningaa­satigut ilungersortumik ajornartorsiulissagaluarpat, nalunanngilaq Naalakkersuisut ingerlatseqati­giiffiu kalaallinut pi-ngaaruteqarnerujussua tunngavigalugu ingerlatseqatigiiffiup illersorneqar­sinnaassumik ingerlaqqinnissaannut peqataasariaqarumaartut.

 

Kinaluunniit aningaasatigut ajornartorsiulernissamut tamakkiisumik sillimaniarssinnaanngilaq, aamma Royal Greenland A/S ingerlatseqatigiiffiilluunniit aqutai. Taamaattumik pingaartuuvoq Royal Greenland-ip ukiuni arlalinni sinneqartoortarnikkut patajaallisarneqarnissaa, taamaalilluni ingerlatseqqatigiiffik ukiunut ajornernut upalungaarsimaarneroqqullugu. Tamanna nunatsinni nunanilu allani ingerlatanik pisariillisaajuarnikkut naammassisinnaassanillu naapertuuttunngor­saajuarnikkut taamaallaat pisinnaavoq. Nunatsinni Royal Greenland A/S-ip nunami suliffiutqaani naammassisaqarsinnaanermik naapertuuttunngorsaanikkut annertuumik siunertarineqartoq tassarpiaavoq Royal Greenland A/S-ip suliffissuaataani niuernikkut piumasarisaasut kisiisa tunngavigalugit ingerlasuni naammassisaqarsinnaannerup annerpaamik iluaqutigineqarnissaata qularnaarnissaa.

 

Suliat Inatsisartut Naalakkersuisullu inuiaqatigiit soqutigisaat tunngavigalugu ilaatigut suliffissa­qartitsiniarneq eqqarsaatigalugu ingerlatsiinnarneqartut Royal Greenland A/S-ip aammalu Namminersornerullutik Oqartussat akornanni isumaqatigiissutit tunngavigalugit ingerlanneqar­put. Taamaallilluni Namminersornerullutik Oqartussat Royal Greenlands A/S-imut suliassat tamakku ingerlanerannut niuerneq tunngavigalugu akiliuteqartarlutik nioqqutissiornerit allatut ittut pilersinneqarnissaassa tungaanut. Naggataatigut oqaatigineqarsinnaavoq nunani allani peqataanermut tungaviusumik ilagimmassut raajat qalerallillu eqqarsaatigalugit akitigut amerlas­sutsisigullu ineriartornermi ingerlatseqatigiiffiup eqqorneqaqqajaanerata millisarnissaa. Nunani allani suliat taamaalillutik Royal Greenland-ip A/S-ip nunatsinni suliaanut tapertaapput aammalu Royal Greenland A/S-ip eqqorneqaqqajaanera millisarsinnaallugu, taamaalilluni ingerlatseqati­giiffiup nunatsinni suliaanik patajaallisaaqqataasallutik.

 

Maliinannguaq Markussen Mølgård, Inuit Ataqatigiit:

Naalakkersuisut siulittaasuata akissutaanut qujavunga aammalu uani naatsorsuutigisimanngilara ataasiakkaat aammalu niuernermut pingaarutillit tassani tamaasa itisilerlugit akineqassasut aammalu oqarneratuut soorunami sinniisuutitaqarpugut aamma uagut Inuit Ataqatigiinni, kisianni tassa aamma nipangersimasussaatitaanera pissutigalugu annertunerusumik paasisaqar­nissatsinnut periarfissaqanngilagut. Kisianni uani akissutini ersertut ilaat oqaatigineqatut ilaat oqaaseqarfigilaassavara, tassa 1997-imi amigartoornissamik ilimagisaq nunatsinni nunanilu allani sulianut tunngassuteqartoq, tassa imannak paasisariaqarpoq nunatsinniinnaanngitsoq aamma nunani allani amigartoornissaq naatsorsuutigineqarpoq, taamaattuminguna tamakku aamma eqqarsaatigalugit matumani erseqqissumik paasisaqarnissaq pillugu apeqquteqaateqar­tunga, kisianni akissuteqaatinut qujavunga.

 

Oqaluuserisaq naammassivoq.