Kalaallit Nunaanni Inatsisartut

Oqaluuserisassani immikkoortoq 35-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 18. februar 1998 nal. 16.19

 

Immikkoortoq 35.

 

Inatsisartunut ilaasortap Anthon Frederiksen-ip Kalallit Nunaanni sanaartornermi SIKU-blokkit pitsaanerusumik atorneqarnissaat pillugit Naalakkersuisut qanoq iliuuseqarniar­nerat apeqquteqaataa.

 

 

 

Ataatsimiinnermi aqutsisoq, Inatsisartut siulittaasuat Anders Andreassen:

 

Anthon Frederiksen, Kattusseqatigiit:

SIKU-blokkip nunatsinni sanaartornermi atorluarneqarnerulernissaa eqqarsaatigalugu naalakker­suisut qanoq suliniuteqarpat?

 

Daniel Skifte, Aningaasaqarnermut Ineqarnermullu naalakkersuisoq:

Qujanaq. Siulittaasoq qinnuigissavara akissuteqaat allaganngorluni agguaatereermat nalisaasin­naanissannut.

 

Inatsisartuni ilaasortap Anthon Frederiksen-ip SIKU-blokkip nunatsinni sanaartornermi atorluar­neqarnerulersinnaanera iluaqutigineqarsinnaaneralu naalakkersuisunit qanoq iliuutigineqarnera­nik apeqquteqaataa sammisaavoq inatsisartut 1997-mi ukiakkut katersuunneranni aammattaaq taanna oqaluuserineqarmat.

 

Tassani inatsisartuni ilaasortat SIKU-blokkinik suliariniakkat aammalu tamanna tikillugu nunatsinni sanaartornermi SIKU-blokkit atortorineqarneranni misilittagaareersut pillugit peqqis­saartumik allakkatigut nassuiaat agguaanneqarsimavoq. Sammisaq tamatuma kingorna tusagas­siorfinni oqallisigineqarpoq uanga KNR-TV-mi tamanna pillugu oqallinnermi peqataavunga piffissamilu kingullermi naalakkersuisut SIKU-blokkit sanaartornermi annerusumik atorneqaler­nissaannik tapersersuinissamut periarfissat oqaluuseraat. SIKU-blokkit ineriartortinneqarnerat suliniutaavoq nersualaartariaqartoq aammalu qularnanngivippoq nioqqutissiaq teknikukkut atorsinnaalluartuusoq aammalu illut silatimikkut iigaasa sananeqaataannut ullumikkut sanaartor­nermi atorneqartartunut illuatungiliulluarsinnaasoq. Narsami misiliummik illuliat atortussiat atorsinnaalluassusianik misilittagaqalersippaatigut, tamannalu tunngavigalugu naalakkersuisut tapersersorpaat SIKU-blokkit atornerisa siunissami siammarnerunissaat. Illuliortitsisut ataasiak­kaat teknikikkut siunnersuisartutik isumasioqatigalugit tassaapput sanaartukkat ilusissaannik sanaartornermilu atortussanik toqqaanermi aalajangiisartut. Taamaattumik SIKU-blokkinik suliniuteqartut inakkumassavakka assersuutigalugu A/S Inissiaatileqatigiiffik INI, kommunit aammalu teknikikkut siunnersuisartut namminersortut SIKU-blokkit atorlugit periaatsit ilisima­neqarnerulernissaat aammalu illuliornermi atortussanik atuinerup siuarsarnissaanik soqutiginnin­nerulernissaat siunertaralugu taakkununnga saaffiginneqqullugit. Tamatumunnga peqatigitillugu pisariaqartinneqarpoq SIKU-blokkit kiammik uninngatitsisinnaassusiata aammalu sanaartorner­mi atortussaat taakku teknikikkut qanoq innerisa misissorneqarnissaat taamaalilluni pitsaassusiat siunissami sanaartornissami sapinngisamik qularnaarneqarsinnaaqqullugu. Naalakkersuisut SIKU-blokkinik suliniuteqartut aammalu Namminersornerullutik Oqartussat akornanni suleqati­giinnissaq suliniutiginiarpaat. Sanaartornermi atortussiat siammarnerullugit atorneqarnissaanni periarfissat pitsaaqutit aammalu pitsaanngequtaasinnaasut paasilluarnissaat siunertaralugu. Taamaattumik naalakkersuisut taperserniarpaat 1999-mut aningaasamut inatsimmi misiliilluni sanaartornissamut aningaasanik amerlanerusunik immikkortitsisoqarnissaa. Tamaalilluni sanaartortitsisunut sanaartugassaminni atortussiat suut atornissaannik aalajangernissaminnut tunngavissaqarnissaat pilersinneqarsinnaavoq aammalu SIKU-blokkit atornissaannut soqutigin­ninnerup annertusinissaanut taamaaliorneq ilangaaqutaasussaavoq.

 

Anthon Frederiksen, Kattusseqatigiit:

Qujanaq akissuteqaammut. Aamma nuannaarutigaara naalakkersuisup akissuteqarnermi ilaani oqaatigimmagu qularnanngilluinartoq SIKU-blokkit nioqqusiornermi teknikikkut atorluarsinnaa­nera, taamatut oqaatigimmagu aammalu 1999-mut aningaasaliisoqarnissaa aamma ilanngullugu oqaatigalugu. Kisianni SIKU-blokkinik sanaartornermi Narsarsuarmi illuliarineqartoq aqagu 19.-ani februarip ukioq ataasinngortussaavoq aammalu atoqqaartinnerani uanga peqataasimavunga aammalu sapinngisara naapertorlugu malinnaaffiginiarsimallugu. Minnerunngitsumik paasisat nutaat SIKU-blokkimut pingaartumik kiassarneqarneranut tunngasut aammalu sananeqaataanut tunngasut assorujussuat iluatinnaateqarput, minnerunngitsumik nunatta iluani aammalu nunatta avammut niuernerani pingaaruteqarluinnartuummat, tassami naatsorsueqqissaartarnermi paasis­sutissat qiviaraanni takuneqarsinnaapput nunatta nunanut allanut niuernermi amigartoorutai paasissutissat kingulliit 577 millionit allaat angullugit nunatta allanut niuernermi amigartooruti­gigai. Taamaattumik nunatta iluani aningaasat aammalu atorluagassagut uagut atorluassagutsigit SIKU-blokki piaartumik atorneqarsinnaanissaa taanna kaammattuutigissavara.

 

Anders Andreassen, Inatsisartut Siulittaasuat:

Ja, qujanaq. Taavalu ingerlaqqitsinnata oqaatigilaassavara apeqquteqartut akineqaraangamik, taava naammaginngikkunikku apeqquteqaat naammaginagu oqaatigissammassuk, una oqaatsinik uteqqiineq pinngikkaluarlugu.