Kalaallit Nunaanni Inatsisartut

Oqaluuserisassani immikkoortoq 36-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 11. februar 1998 nal. 16.35

 

Oqaluuserisassani immikkoortoq 36.

 

Inatsisartunut ilaasortap Anthon Frederiksen-ip pisortat, Namminersornerullutik Oqar­tussat Kommunillu inissiaataat attartortittakkat inissiatut namminerisatut pisiarineqarsin­naanerat apeqquteqaatigaa.

 

 

 

Ataatsimiinnermik aqutsisoq: Inatsisartut Siulittaasuat Anders Andreassen.

 

Anthon Frederiksen, apeqquteqaateqartoq, Kattusseqatigiit:

Nunatsinni pisortat, tassa Namminersornerullutik Oqartussat kommunillu inissiaataasa ilaasa najugaqartunit nammineq pigilivillugit pisiarineqarsinnaanerat qanoq isumaqarfigineqarpa?

 

Daniel Skifte, Aningaasaqarnermut Ineqarnermullu Naalakkersuisoq:

Qujanaq. 1992-imiilli ilaqutariinnut arlalinnut ineqarfinnut inissiat Namminersornerullutik Oqartussanit kommuninillu pigineqartut piginneqatigiilluni inissiaatileqatigiiffimmit pissarsiari­neqarlutillu ingerlanneqarsinnaannerannut periarfissaqareerpoq. Tamanna piginneqatigiilluni inissiat pillugit Inatsisartut peqqussutaatigut takuneqarsinnaavoq, maannakkumullu ukiut arfinillit tamanna atuutereerpoq. Tassani piumasarineqarpoq illoqarfimmi piginneqatigiilluni inissiaatileqatigiiffimmi inissiat arfinillit pineqassasut, nunaqarfimmiippallu inissiat sisamat. Taamatuttaaq piumasarineqarpoq inissiaatileqatigiiffinnit inissiaqarfik tamakkerlugu ataatsimo­orlugu tunniunneqassasoq, taamaalilluni piginneqatigiilluni inissiaatileqatigiiffik inissiaqarfim­mut tamarmut piginnittutut oqartussaasunngortillugu.

 

1992-imiit inissianik attartortittakkanik pioreersunik tigusinissaq ineqartunit soqutigineqarpal­laarsimanngilaq. Aningaasaqarnermut Ineqarnermullu Naalakkersuisoqarfik saaffiginnissumik ataasiinarmik ilisimasaqarpoq, Nuummi sanaartukkami pioreersumi arfinilinnik inissiartalimmik piginneqatigiilluni inissianngortitsinissaq pillugu. Naalakkersuisoqarfik taamaaliorsinnaanermut tapersersuivoq, maannakkullu nalunarpoq ilumut piginneqatigiilluni inissianngortitsinissaq piviusunngorsinnaanersoq. Naalakkersuisut isumaqarput inissiaqarfinni nutaanerusuni inissiaqar­fiit ilarpassuisa piginneqatigiilluni inissianngortinnissaannut periarfissaqartoq. Piginneqatigiillu­ni inissiaatileqatigiiffiit ukiuni kingullerni nutaanik sanatissimasaannik assersuusissagaanni tassani pineqarput peqatigiiffimmut ataatsimut agguaqatigiissillugu inissiat qulit. Ukiuni kingullerni pisortat inissialiortarneranni salliutillugu ilusiliunneqarumanerusartut eqqarsaatigalu­git isumaqarnerpoq ajornartorsiutitaqanngitsumik tigusinerni inissiaqarfittut atussallugit angis­sutsimikkut piukkunnartuusut.

 

Inissiat attartortittakkat pioreersut piginneqatigiilluni inissianngortitsinissanut pissutsinik akornutaasunik peqartoq paasineqaraluarpat, Naalakkersuisut inissiaqarnermut attuummassute­qartuni malittarisassat eqaallisarnissaanik suliniuteqarniarput. Inissiat attartortittakkat pisortanit pigineqartut, tassa Namminersornerullutik Oqartussat kommunillu inissiaataat attartortittakkat, 1995-ip kingorna najugaqatigiiffinnut agguataarneqarsimapput. Najugaqaqatigiiffinni siulersui­sunik qinersisoqarsimavoq. Najugaqaqatigiiffiit missingersuutaat naatsorsuutaallu aqqutigalugit attartortut paasiartuaassavaat ineqarnermut aningaasartuutit sorliit ineqarnermut akiliutinut ilaatinneqartartut aammalu inissiat pisortanit pigineqartut ingerlanneqarnerat qanoq akeqarner­soq. Taamaalilluni attartortoq inissianik attartortittakanik ingerlatsinermik paasisaqariartuaas­saaq, tamannalu peqatigitillugu ineqarfigisamik piginneqatigiilluni inissiaatitut tigunissaanik soqutiginnilernissamut, tigussagaluarunikkulu siunissami ineqarnermut akiliuteqarnissamik naliliisarnissamut pitsaanerusumik tunngavissaqarumaarput.

 

Piginneqatigiillu inissiaatileqatigiiffinnut ilaasortat ataasiakkaat ineqarnermut akiliutit peqatigiif­fiup inissiaqarfimmik pisinermini aningaasalersuutaanik aammalu peqatigiiffiup inissiaataanik ingerlatsinermut aserfallatsaaliinermullu aningaasartuutaanik matusissutaasinnaasut naatsorsuuti­gissavaat. Naalakkersuisut oqaatigisinnaavaat inissiaqarfiup pisiarinerani akia amerlanertigut inissiaqarfiup pineqartup teknikkikkut aningaasaqarnikkut nalinganut aalajangerneqartarmat, tassani pineqarpat inissiaqarfik nutaamik sanaaq pisiarinerani akia sananerani akianut erniat tapiliullugit aalajangerneqartassaaq. Niuernikkut pissutsit pisariqartippassuk Naalakkersuisut akit teknikkikkut aningaasaqarnikkut nalinginit aammalu sananeranit akia erniat tapiliullugit akinit allaasut aalajangersarsinnaavaat.

 

Inissiaqarfiup piginnittuata, tassalu Namminersornerullutik Oqartussat kommunillu piginneqati­giilluni inissiaatileqatigiiffiup pisinerani akiusup to trediedelianik erniaqartinnagillu akilersugassaan-ngitsunik tapiissuteqarfigisarpai tigusinermi aningaasartuutit ilanngullugit. Piginneqatigiilluni inissiaatileqatigiiffimmut ilaasortat ataasiakkaat inissiamut atornissaanik pisinnaatitaaffigilikkamik pisiarinerani akiata 7 procentianik akiliisarput. Pisiarinerani akiata sinnera aningaasalersorneqartarpoq, piginneqatigiilluni inissiaatileqatigiiffiup taarsigassarsinera­tigut. Piginneqatigiilluni inissianut nutaamik sanaanut atuuttut assingi aningaasalersueriaatsini atuupput. Naalakkersuisut Athon Frederiksen-ip apeqquteqaataa aammattaaq nuannaarutigaat, tassa Naalakkersuisut isumaqarmata inissiat pioreersut piginneqatigiilluni inissianngortinneqar­sinnaannissaannut periarfissaq ineqartut eqqaminnut avatangiisinut akuliussinnaanerulernissaan­nut aqqutissaasoq, tamannalu naleqquttuusoq.

 

Anthon Frederiksen, Kattusseqatigiit:

Qujavunga akissuteqaammut. Akissuteqaammi paasivara inissiat pioreersut andelsboligitut imaluunniit taamatut periuseqarluni pisiarineqarsinnaannerat ammasoq, kisiannili aamma paasillugu inissiat ataasiakkaat assersuutigalugu inissiaq ataaseq pisiariniarukku taanna periarfis­saqanngilaq, kisiannili inissiaq ilivitsoq tamaat piginneqatigiilluni pisiarineqarsinnaasoq. Qujanaq.