Kalaallit Nunaanni Inatsisartut

Oqaluuserisassani immikkoortoq 38-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 18. februar 1998 nal. 16.15

 

Immikkoortoq 38.

 

Inatsisartunut ilaasortap Finn Karlsen-ip nunatsinni SIKU-blokkit atorlugit amerlarneru­sunik illuliortoqarsinnaanera apeqquteqaataa.

 

 

 

Ataatsimiinnermik aqutsisoq, Inatsisartut siulittaasuat Anders Andreassen:

Siuliulluni apeqquteqassaaq Finn Karlsen, Atassut.

 

Finn Karlsen, Atassut:

Siullermik oqaatigissavara apeqquteqaatikka nassiussimanngikkaluarakkit, tassa oqaluuserisassa­tut nassiussimagaluarakkit, kisianni tassa siulittaasoqarfimminngaanniit apeqquteqaatitut saqqummiunneqaqquneqarmat allatut ajornartumik akueriinnarsimavara.

 

Tassa siunnersuuteqarsimavunga illulioriaaseq SIKU-blokki maangaannaq unitsiinnarnagu sinerissami misiliutitut illuliortoqarnissaanut siunnersuuteqarlunga. Tassami maani nammineq najorlugu malinnaaffigalugu illuliaasimasut pitsaalluinnartutut isumaqarfigigakku, naak ilaatigut oqarniartaraluarluta akilersinnaanngitsut, oqornerungaanngitsut, suliffissanik pilersitsinaviann­gitsut, taamatut naliliisut uanga tikillugit malinnaasimaninnut isumaqatiginngivippakka.

 

Taamaattumik pitsaanerpaajusoraara illoqarfinni allani misiliutinik sanasoqaraluarpat, taava immaqa paasininnerat annerulissagaluarpoq. Immaqaluunnit pitsaanerussagaluarpoq upernaamut ataatsimiinnissamut inuttaa maanngartillugu nassuiaatikkiartoraanni inatsisartunut, taava qularnaatsumik politikerinut isumaqartitsilissagaluarpoq qulartunut isumalinnut. Aamma una oqaatigilaarusuppara tassa ippassaq Nunavut-minngaanniit saaffiginnissut takkuppoq, tassa Eqalunni misseqarnissaarsuarmut SIKU-blokki soqutigineqarluni taavunga qaaquneqarmat, kisianni tassa apeqqutaallutik periarfissat. Tassa qangali oqartarnivut nunani allani soqutigine­qarnera uppernarsilluarparput. Taamaattumik tupigissavara maani soqutigineqanngissappat politikerininngaanniit.

 

Daniel Skifte, Aningaasaqarnermut Ineqarnermullu Naalakkersuisoq:

Qujanaq. Siullermik siulittaasoq qinnuigilaassavara akissuteqaat allaganngorluni agguaatereer­mat, taamaattumik ilaanik alluisinnanissannut.

 

Inatsisartunut ilaasortap Finn Karlsen-ip siunnersuutigaa illoqarfinni arlalinni SIKU-blokkit atorlugit illuliortitsisoqassasoq misiliinertut. Tassunga oqaatigissavara 1998-mut aningaasanut inatsimmi konto pingaarnermi 22.11.14-mi misiliummik sanaartornermut 500.000,00 kr.-nit aningaasaliissutigineqarsimasut. Aningaasaliissuteqarnermi siunertaavoq, issuaanera aallartip­poq, Namminersornerullutik Oqartussat misiliutitut sanaartornermut killilimmik peqataassapput. Aningaasat annertunerusumik ajunngitsorsiassatut atorneqartarput, taamaalillunilu misiliutitut ingerlatanut aalajangersimasunut pitsaanerpaamik isummernissaq anguniarneqassalluni.

 

Tamatuma saniatigut misileraanernut toqqaannartumik tapiisoqartarpoq, tassa misiliutaasumut aningaasartuutit misiliutaasumik inissialiap aalajangersimasup aningaasartutaanut ilaangikkaan­gat. Siunertamut naapertuuppat ilisimatitsissutissanik ilitsersuutinillu sanasoqarsinnaavoq, taakkununnga ilanngullugit video-liorneq. Misiliutitut illuliortiternissat aningaasalersuiffigine­qarnissaannut aningaasanut inatsimmi amerlanerusunik aningaasanik 1998-mi immikkoortitsiso­qanngilaq. Naalakkersuisut piffissami kingullermi SIKU-blokkit sanaartornermi annerusumik atorneqalernissaannut tapersersuinissamut periarfissat oqaluuseraat. Taamaattorli illuliortitsisar­tut ataasiakkaat teknikikkut siunnersuisartutik isumasioqatigalugit tassaapput sanaartukkat ilusissaannik sanaartornermilu atortussanik toqqaanermi aalajangiisartut.

 

Taamaattumik siunnersuutigissavara SIKU-blokkinik suliniuteqartut kommunini Namminersor­nerullutik Oqartussani sanaartortitsisunik aammalu teknikikkut siunnersuisartunik namminersor­tunik SIKU-blokkinut soqutiginninnerulernissaat anguniarlugu saaffiginneqqullugit. Tamatu­munnga peqatigitillugu pisariaqartinneqarpoq sanaartornermi atortussiap teknikikkut naleqqu­tuussusiata peqqissaartumik misissorneqarnissaa. Naalakkersuisut SIKU-blokkinik suliniuteqar­tut aammalu Namminersornerullutik Oqartussat akornanni suleqatigiinnissaq suliniutiginiarpaat. Sanaartornermi atortussiat siammarnerullugit atorneqarnissaanni periarfissat pitsaaqutit aammalu pitsanngoqutaasinnaasut paasilluarnissaat siunertaralugu. Taamaattumik naalakkersuisut taper­sersorniarpaat 1999-mut aningaasanut inatsimmi misiliilluni sanaartornissanut aningaasanik amerlanerusunik immikkoortitsisoqarnissaa.

 

Taamaalilluni sanaartortitsisunut sanaartugassaminni atortussiat suut atornissaanik aalajangernis­saminnut tunngavissaqarniarnissaat pilersinneqarsinnaavoq aalajangernissamut tunngavissat pitsaanerulernerat sanaartortitsisut akornanni SIKU-blokkit atornissaannut soqutiginninnerup annertusarnissaanut tamanna ilangaaqutaasinnaassaaq.

 

Finn Karlsen, Atassut:

Naatsunnguamik. Siullermik akissuteqaammini oqaatigimmagu nalunaarusiamik inatsisartut agguaanneqarsimasut, tassa taanna Sermitsiakkut aamma saqqummertoq, taannalu tassa uanga nammineq nalilerpara SIKU-blokkinik atorsinnaanngitsutut naliliisoq. Taava naalakkersuisut paasivakka periarfissamik pitsaanerusumik oqaluqatigisisimanerminni tapersiinissaminnut, taanna assut iluarpoq. Taavalu teknikikkut ilisimasalinnik suleqateqarnissaa namminersortunut inassutigineqartoq, taanna tamavimmut amigaateqanngilaq. Ilisimaneqarpoq tamarmi. Tassani annertoorujussuarmik suleqatigiissutigineqarpoq taanna. Taava naggataatigut ataatsimut isigalu­gu isumaqarpunga tassa 99-mut aningaasanut inatsimmi ilanngussiniartoqarnera isumalluarfiga­lugu oqaatigissavara, akissuteqaammullu qujallunga.

 

Anders Andreassen, Inatsisartut Siulittaasuat:

Qujanaq.