Kalaallit Nunaanni Inatsisartut

Oqaluuserisassani immikkoortoq 39-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 18. februar 1998 nal. 16.27

 

Immikkoortoq 39.

 

Inatsisartunut ilaasortap Anthon Frederiksen-ip GU-mi ilinniartut pillugit apeqquteqaa­taa.

 

 

 

Ataatsimiinnermik aqutsisoq, Inatsisartut siulitaasuat Anders Andreassen.

 

Anthon Frederiksen, Kattusseqatigiit:

GU-mi atuartut eqqunngitsumik pineqarsorisut immikkut naammagittaalliorfigisinnaasaannik peqarpaa imaluunniit pilersitsisoqarniarpa?

 

Aappaattut. GU-mi atuartut illoqarfimmi kollegianilu ineqartunut ersarissunik malittarisassaqar­pa? Qanoq ilinikkut ilinniagaqartoq GU-miit anisitaasinnaava? Suut ilinniartut ilinniartitsisullu pisinnaatitaaffigaat?

 

Pingajussaattut. Aasianni GU-mi atuartut skolebus-itaarsinnaanerat qanoq periarfissaqarpa?

 

Sisamassaattut. GU-mi atuartut qaammammut 1.650,00 kr.-nit missaanni ilinniarnersiuteqartin­neqartut joorlisioriarsinnaanermut akiliunneqartalersinnaanerat qanoq naalakkersuisuniit takorloorneqarpa?

 

Tallimassaattut. Angallannermi studenter-rabati Danmarkimi ilinniartunut atortinneqartoq nunatsinni ilinniartunut atortinneqalersinnaava?

 

Arfinilissaattut. GU-mi atuartut kalaallinik Universitet-mi ilinniarsimasunik ilinniartitsisunik amerlanerusunik ilinniartitsisoqalersinnaanerat siunissami qanoq isikkoqarpa?

 

Arfineq aappassaattut. Naluneqanngitsutut Aasiaat suluusalinnut mittarfittaartussaapput. Taanna­lu piareerpat Aasianniit Aasiannullu angallanneq qanoq isikkoqalissavara, tassa uani eqqarsaati­gineqarput Aasiaat avataaniit suluusalinnut mittarfeqanngitsuniittut aamma eqqarsaatigalugit. GU-mi, SPS-mi assigisaannilu ilinniartut akiliuneqarlutik ilaquttaminnut angerlarallarsinnaappat aamma angerlarsimaffimminni atuanngitsoortutut procentilersorneqassappat?

 

Qulaaluassaattut.  GU-mi ilinniartut timersornermillu ingerlataqartut ilinniarnerminnut atatillugu timersornermik ingerlatsiinnarsinnaanerannik qanoq periarfissaqartitsisoqarpa?

 

Qulissaattut. Kollegieinspektøreqartitsineq qanoq malittarisassaqarpa?

 

Isikkanilissaattut. GU-mi atuartut ilinniaqqinnissaminnut periarfissat amerlanerusut tigussaa­nerusullu isaasalerlugu Sunngorlanga-tuminngaanniit tassuma saniatigut allat periarfissat qanoq ippat. Saqqumilaarnerusariaqarpallu?

 

Isikkaneq aappaattut. Sooq ilinniartuunersiutit socialimit tiguneqartartuniit ikinneruppat?

 

Anders Andreassen, Inatsisartut Siulittaasuat:

Qujanaq. Apeqquterpassuit. Taava akissuteqassaat Kultureqarnermut, Ilinniartitaanermut Ilageeqarnermullu naalakkersuisoq, taannalu oqaaseqartinnagu erseqqissassavara apeqquteqartut minutsini sisamani periarfissaqarmat, taavalu akissuteqartoq naalakkersuisuni ilaasortaq minutsi­ni arfinilinni.

 

Konrad Steenholdt, Kultureqarnermut, Ilinniartitaanermut Ilageeqarnermullu Naalakkersuisoq:

Qujanaq. Inatsisartuni ilaasortaq Anthon Frederiksen ilinniarnerit ingerlaqqiffiusut pingaartumil­lu GU-mi ilinniartut atugaat pillugit arlalinnik maani apeqquteqarpoq.

 

Naatsumik apeqqutit akissuteqarfigineqassapput naalakkersuisuninngaanniit. Anthon Frederiksen-illi kissaatigiguniuk Kultureqarnermi, Ilinniartitaanermi Ilageeqarnermullu Pisorta­qarfimmut saaffiginnilluni sukumiinerusumik akissuteqarfigineqarsinnaavoq.

 

Apeqqutit ilarpassui taamaallaat malittarisassat atuuttut nassuiarneqarnissaannut tunngapput, taamaammallu nalakkersuisut aallaqqaasiullugu oqaatiginiarpaat Anthon Frederiksen inatsisartu­nullumi ilaasortat allat allaffissornikkut akineqarsinnaasunik apeqqutissaqarunik pisortaqarfinnut tamakkuninnga suliaqartunut saaffiginnissuteqarnissaminnut tikilluaqqusaammata.

 

Apeqquteqaammi apeqquterpassuarnut suna tunngaviunersoq ajoraluartumik erseqqinngilaq.

 

Taavalu ataasiakkaat akissavakka.

 

Apeqqummut siullermut. Tassa pingasunik naammagittaalliortarfeqarpoq. Tassa suliat ineqarfin­nut, ilinniartitaanermut imaluunniit ilinniagaqarnersiuteqarnermut tunngasuuneersut apeqqutaal­luni.

Aappaanut. Aasianni GU-p ineqarfiutaani ileqqorissaarnissamut maleruagassaqarpoq. Taakkuna­ni ersippoq qanoq pisoqartillugu ilinniartut ineqarfimmiit anisitaassanersut.

 

Pingajuannut. Ilinniagaqarnersiutit pillugit malittarisassanik tunngavissaqanngilaq. Nunatsinni ilinniarfinniit ilinniarfinnullu ilinniartut angallanneqarnermut aningaasartuutaannut matussusii­nissamut. Tamannalu ilinniarfeqarfiusuni ilinniarfiit angerlarsimaffinnut ungasippallaartanngin­nerannut attuumassuteqarpoq.

 

Sisamaannut. Ilinniagaqarnersiutit Namminersornerullutik Oqartussat nalunaarutanni nr. 29 17. december 1996-meersumi ' 44-mi piumasaqaatit naammassineqarsimatillugit akiliunneqarluni juullisioriartoqarsinnaavoq.

 

Tallimaannut. Suliassaq tamanna pillugu ilinniartut kattuffiisa angalatitseqatigiiffinnik pineqar­tunut oqaloqatiginninnissaa kaammattuutigineqarpoq.

 

Arfernannut. Kallallit Nunaanni ilinniaqartuunngortartut suli ukiorpassuarni ima ikitsigissapput ilinniagartuunik nunaqavissunik pisariaqartitsinermut matussusiisinnaassanatik. Ullumikkut ilinniaqartut nunatsinneersut ukiumut 17-19 ilinniakkaminnik naammassinnittarput. Taakkuli amerlanersaat ajoraluartumik GU-mi atorfeqalernissaminnik soqutiginninngillat.

 

Arfineq aappaannut. Aasianni mittarfik suli maannamut naammassinngilaq.

 

Arfineq pingajuannut. GU-mi ilinniartut pisariaqartitsinertik malillugu ilaquttaminnut akiliunne­qarlutik angalasarnissaminnut pisinnaatitaaffeqanngillat. Ilinniarnerup aallartinnerani ilinniarner­mik unitsitsigallarnermi ilinniarnerup naanerani ukiumoortumik akiliunneqarluni atuanngiffeqar­nermi kiisalu atuanngiffeqarnermi angalanermut akiliussisoqartarpoq. Taama pisoqarnerani atuanngitsoornermik nalunaarsuineq unitsinneqarallartarpoq.

 

Qulaaluaannut. Kultureqarmut, Ilinniartitaanermut Ilageeqarnermullu Pisortaqarfik ukiuni sisamani timersornermi sammisaqarfiusumik GU-mi ilinniarnermik pilersitsisoqarsinnaanerannik misissuileruttorpoq. Tamanna timersortartut timersuutiminnik aallussinissaannik piffissaqartitsi­nerulissaaq.

 

Qulingannut. Malittarisassat Namminersornerullutik Oqartussat kaajallaasitaaq nr. 14. 1992-mi allaaserineqarput.

 

Aqqarngat. Ilinniarnertuunngorniarfinni tamani quppersagaqarpoq Danmarkimi ilinniarfissanik tamanik imaqartunik.

 

Taavalu kingullermut. Ukiut tamaasa inatsisartut aningaasanut inatsimmi ilinniagaqarnersiutit angissusissaat aalajangertarpaat. Tunniuttakkat qanoq amerlatiginissaat naalakkersuinikkut aalajangersagaavoq. Ilinniartuni nerisaqaatigisut qaammammusiaannik 4.000,00 kr.-niusunik ineqarnermut 850,00 kr.-nit kiisalu nerisaqarnermut 1.500,00 kr.-nit ilanngaatigineqareertarput.

Tassa imaapput ilinniartut nerisaqaatigisut qaammammut 1.650,00 kr.-ninik kaasarfimmiussaqa­lersarput. Paasissutisat sukumiinerusut kissaatigineqarpata ilinniarnertuunngorniarfinnik ukiumo­ortumik nalunaarutit aamma innersuussutigineqarsinaapput.

 

Anders Andreassen, Inatsisartut siulitaasuat:

Qujanaq. Taavalu apeqquteqartoq Anthon Frederiksen. Tassani erseqqissaatigilaassavara tassa sivikitsunnguamik akisariaqassammat, minutsini marlunni.

 

Anthon Frederiksen, Kattusseqatigiit:

Qujanaq akissutigineqartunut. Akissutigineqartut ilai naammagaakka. Kisianni arlaqarput naammaginngisakka aammalu taamaaliorninni allagaqareerpunga naalakkersuisumut taannalu tunniunneqareerpoq taakkua annerusumik itisilerneqarnissaa erqarsaatigalugit. Taamaattumik taakkua neriussaanga kingusinnerusukkut aamma akineqarumaartut. Qujanaq.

 

Anders Andreassen, Inatsisartut siulittaasuat:

Qujanaq.