Kalaallit Nunaanni Inatsisartut

Oqaluuserisassani immikkoortoq 41-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Pingasunngorneq 18. februar 1998 nal. 16.37

 

Immikkoortoq 41.

 

Inatsisartunut ilaasortap Mannasse Berthelsen-ip Kangerlussuup siunissaa pillugu siun­nersuutinik saqqummiussisussamik suleqatigiissitaliortoqarsinnaanera apeqquteqaatigaa.

 

 

 

Ataatsimiinermi aqutsisoq, Inatsisartut siulittaasuat Anders Andreassen.

 

Mannasse Berthelsen, apeqquteqartoq, Manasse Berthelsen, Inuit Ataqatigiit:

Ukiaq ataatsimiinnermi naalakkersuisut saqqummiipput Kangerlussuup siunissaa pillugu. Taamanilu Siumukkormiut siunnersuuteqarnerisigut isumaqatigiissutigineqarpoq suleqatigiissita­liortoqassasoq Maniitsumiit Sisimiuniit Kangerlussuarmiillu inuttaaffigineqartumik. Taamaam­mat naalakkersuisunut apeqqutiginiarpara qaqugu suleqatigiit aallartsisarniarneqarnersut.

 

Jonathan Motzfeldt, Naalakkersuisut Siulittaasuat:

Mannasse Berthelsen-ip Kangerlussuup siunissaa pillugu ukiakkut ataasimiinnermi oqallinneq innersuussutigalugu apeqqutigaa suleqatigiit Maniitsumeersunik, Sisimiuneersunik Kangerlussu­armeersunillu inuttaqartussat Siumup siunnersuutigisai qaqugu pilersinneqassanersut.

 

Iliuusinut pilersaarut 1997-mi ukiakkut ataatsimiinnermi inatsisartut aallartitassatut aalajangigaat eqqaaqqissallugit pissutissaqarpunga tassappullu, Kangerlussuaq kommunit aggornerisa avataa­niiginnassasoq, allaqqaammut kommuninut aamma nunaqqatigiit siunnersuisoqatigiivinut ukioq 2001 qinersinissap tungaanut. Piffissaq ukioq 2000 tungaanut misiliiffissatut atorneqassasoq, tamanut nunaqqatigiit siunnersuisoqatigiivi suliassanik innuttaasunut tunngasuni annerusumik oqartussaaffilerneqarlutillu akisussaaffilerneqassallutik aammalu suliassaqartunut ataasiakkaanut inatsisit isumalluutinillu atuineq naleqqussarneqassallutik.

 

Kangerlussuaq nunap iluani pissutsinik allaffiup kommunit mikisunut aaqqissuussinerannut ilanngunneqassasoq, tassani nunaqqatigiinni ikittunut isumagisassanik naammassinnittarneq iluarsartuussivigineqarmata.

 

Taava misiliutitut aaqqissuussinerit naliliivigalugit nalunaarusiaq kingusinnerpaamik ukioq 2000 inatsisartut ukiukkut ataatsimiinneranni saqqummiunneqassasoq, taassuma imarissallugit ukioq 2001-mi qinersinermi kingornatigut Kangerlussuup inissisimanissaata allangortinneqarsinnaa­neranut siunnersuutit.

 

Akileraartarnermut tunngasunut ukioq 2001 tungaanut allannguuteqaratit ingerlassasut, kommu­nitulli inissinneqarsimaneranut isumaliutersuutinut ilaatinneqassallutik.

 

Akitsuusiisarnermut tunngasut eqqarsaatigalugit akitsuusiiffiunnginnerata atorunnaarsinneqarnis­saata kingunerisassai pillugit misissuinerit aallartinneqassasut.

 

Aaqqiineq assortuunnermi pilersitsiffiunngitsoq anguniarlugu Siumumiit kissaatigineqarpoq kommunit eqqaamiorisai, tassa Sisimiut Maniitsorlu suleqatigiit sulineranni annertunerusumik peqataatinneqassasut, taamaammat akissutinni oqaatigaara soorunami Maniitsoq Sisimiullu kommunii piffissanngorpat isumaqatiginiarneqassasut, soorluttaaq nunatsinni sakkutuut imar­siortut, Grønlands Kommando, mittarfeqarfiit, Grønlandsfly ilaallu ilanngullugit suliareqqin­neranni ilanngunneqassasut.

 

Suliaq aallartinneqareerpoq, nunallu iluani pissutsinut allaffimmi ataqatigiissarneqarluni. Allaffillu ukiakkut ataatsimiinnerup kingorna innuttaasut siunnersuuteqatigiivinik iliuusissatut pilersaarutip aallartinneqarnissaa pillugu qanittumik attaveqarsimavoq. Kommunit sanilerisaasa toqqaannartumik peqataalernissaasa suli siusippallaarpoq, suleqatigiissitammi suliassat Nuummi qitiusumik allaffeqarfimmi pinnani najukkami aaqqinneqartariaqartut pingaarnerutissimammagit.

 

Suliassat ilaat pingaartinneqarnerpaasut ilagaat meeqqat inuusuttunullu sullissineq kiisalu isumaginninnermi suliassanik isumaginnittarneq. Suliami tassani Isumaginninnermut Pisortaqar­fik KIIP-lu peqataatinneqarput. Aaqqeeriaaserlu nassaariniarneqarpoq suliassat ilaat innuttaasut siunnersuisoqatigiivinit namminernit aammalu allaffissornikinnerulluni aaqqinneqarsinnaasaq­qullugit.

 

Suliassaq alla pingaartoq innuttaasut siunnersoqatigiivisa pingaartitaat tassaavoq sakkutooqarfiu­simasup sanaartugassatigut pilersaarusiorfigineqarnera. Suliap tamatuma upernaap ingerlanerani aallartinneqarnissaa naatsorsuutigineqarpoq, tamatumanilu aattuumassuteqarsinnaasut tamarmik peqataatinneqasssapput aamma kommunit eqqaamiorisaat.

 

Maanna kommunit killeqarfii oqallisigineqaleruttormata aamma oqallisigineqarput pisortat suliassaataat suliaqarfinni annerusuni aaqqiineqartarnissaat qanoq naleqqutsiginersoq. Oqalinneq tamanna inerisitaqarfiusussaavoq upperilluinnarparalu misiliutitut aaqqissuussinerit pillugit inatsimmi periarfissat ilanngunneqarnerisigut Kangerlussuup siunissami inissisimalersinnaanera­nut aqqutissat nutaarluinnaat saqqummerumaartut. Naalakkersuisut qularnaarniagaraat iliuusissa­tut pilersaarutigineqartut naammassineqarnissaat, soorunalimi aamma kommunit eqqaamiorisaa­sa naleqqutsillugu sulinermi peqataatinneqartarnissaat.

 

Mannasse Berthelsen, Inuit Ataqatigiit:

Qujavunga, Naalakkersuisup siulersuisuanut akissuteqaataanut, akissuteqaataannullu tunngasu­nik aperisinnaaguma.

 

Una qanoq eqqarsaateqartoqarnersoq mittarfeqarfiit aktieselskab-inngortinneqarpata nalilersuiso­qarsimanersoq, suut qinikkat oqartussaaffigissavaat, suullu mittarfeqarfiup iluani inissinneqassa­nersut. Tassami naluneqanngilaq massakkut mittarfeqarfiit suut tamarluinnangajaasa oqartussaaf­figimmagit imaluunniit pimisut inissinnikuummagit.

 

Taavalu aappaattut, siunissami qaninnermi suut borgeråd-it oqartussaaffigilissanerai imaluunnit tigussanerai apererusuppunga.

 

Oqaluuserisassap tullianut ingerlaqqippugut.