Oqaluuserisassani immikkoortoq 42-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 18. februar 1998
Ataatsimiinnermik aqutsisoq, Inatsisartut
Siulittaasuat, Anders Andreassen.
Johan Lund Olsen, Inuit Ataqatigiit:
Qujanaq. Tassa Aalisarnermut,
Piniarnermut, Nunalerinermut Inuussutissarsiornermullu Naalakkersuisumut una
apeqquteqaataavoq.
Ilisimaneqalereersutut ukiuunerani
Kangerlussuarmi umimmanniarneq piniartut inuussutissarsiornerannut
iluaqutaasussamik maanna ingerlanniarneqaleruttorpoq. Umimmanniarneq Sisimiut
Maniitsullu kommuuniini piniartuinik peqataaffigineqassaaq. Sisimiormiunik
qimussimik Maniitsulli kommuuniineersunik qamuteralannik atuinikkut.
Qimusserlutik umimmanniartut qamutitik soorunami namminneq pigisarivaat,
tamannalumi ajunngilaq. Paasisakkali kingulliit malillugit imaassimavoq
Maniitsup kommunia Aalisarnermut, Piniarnermut, Nunalerinermut
Inuussutissarsiutinullu naalakkersuisoqarfimmit qamuteralannik marlunnik
umimmanniarnermullu atugassanik pitsinneqarsimammata. Naalakkersuisunut
apeqqutigissavara inatsisinik peqqussutinik nalunaarutinilluunniit sunik
tunngaveqarlutik naalakkersuisut taamatut iliuuseqarsimanersut. Taavalu aamma
tamanna ima paasisariaqarpata matuma kingorna naalakkersuisut
piniutissaqanngitsunut atortussaannik tunniussuisalissasut, soorlu qimuttunik
qimmeqarlutik qamuteqanngitsunut qamutissaannik tunniussuisalerlutik
aallaasissaqanngitsoq aallaasissaannik imaluunniit allatigut aamma tunniussuisalerlutik.
Paaviaaraq Heilmann, Aalisarnermut,
Piniarnermut, Nunalerinermut Inuussutissarsiuteqarnermullu Naalakkersuisoq:
Qujanaq. Inatsisartuni ilaasortaq Johan
Lund Olsen Maniitsup kommuniani ukiuunerani umimmanniarnissamut snescooterinik
marlunnik pisinermi inatsisitigut tunngavissat pillugit apeqquteqaateqarpoq.
Aningaasanut inatsimmut Aalisarnermut,
Piniarnermut, Nunalerinermullu naalakkersuisoqarfimmut atasumik misissuinernut
ineriartortitsinernullu aningaasaliissuteqarpoq 1997-mi 4,2 million
aningaasaliissutaapput, taakkulu ukiunit siulianit ikinnerupput. Ukiut
nikinneranni pisortaqarfimmi immikkoortortanut aningaasaliissutit
ingerlanniakkanut qinnuteqaatinullu pingaarnersiukkanut kiisalu
siunnersuutinut tiguneqarsimasunut sanilliullugit atorneqarnissaannut
missingersuusiortarput. Piniarnermut immikkoortortamut atatillugu
aningaasaliissutit ilaatigut miluumasut annertunerusumik
iluaqutigineqarnissaannut kiisalu suliniutinut piniarnermut periarfissanik
annertusaasussanut atorneqartussaapput. Suliat aningaasaliissutitigut
taperserneqartut ingerlanneqartarput Aalisarnermik, Piniarnermik
Nunalerinermillu inuussutissarsiutit pisuussutitigut
tunngavissaqarnerulernissaat siunertaralugu. Ukiuunerani umimmanniarneq
ingerlanneqartarpoq ilaatigut umimmaat aasaanerani tikikkuminaatsumiittut
tikinneqarsinnaanngitsumiittulluunniit ukiuunerani tikinneqarsinnaanerinik
isumaliuutit tunngavigalugit. Snescooterit pissarsiarineqarnerat aammattaaq
ukiuunerani neqimik annertunerusumik pissarsisinnaanermik kissaateqarnermik
atatinneqartariaqarpoq. Ukioq manna ilanngullugu ukiuunerani umimmanniarneq
ukiuni tallimani ingerlanneqareersimassaaq naalakkersuisoqarfiup siunertarivaa
ukiuni taakkunani umimmanniartarsimanerup
nalilersornissaa taamaalilluni takuniarlugu ukiuunerani umimmanniartarnerup
ingerlanneqartarneranut atasumik allannguisoqassanersoq. Ukiuunerani umimmattassiissutit
Sisimiut Maniitsullu kommuniinut agguarneqartarput. Maniitsup kommuniani
piniarnermi manna tikillugu piniartut illoqarfimmeersut kisimik
piniaqataasinnaasimapput piniartut Kangaamiormiut isertitakissusertik
pissutigalugu snescooterinik pissarsisinnaanngimmata.
Immikkoortut tulleriit qaangilaassavakka,
immikkoortullu kingulliup tullia allartillugu piffissaq eqqarsaatigalugu.
Soorlu taaneqareersoq Aalisarnermut,
Piniarnermut Inuussutissarsiornermut Nunalerinermullu pisortaqarfik ukiup
aallartinnerani kontomut missingersuusiortarpoq. Suliariniakkat naatsorsuutigisamit
akisunerugaangata imaluunniit akikinnerugaangata
ingerlanneqanngitsoorpataluunniit taamalu aningaasanik ukiup naanerani
sinneruttoortoqarluni qinnuteqaatit suliariniakkallu tiguneqarsimasut
isummerfigeqqinneqartarput, tamakkua kontup siunertaanut naapertuukkaangata
aningaasat agguaannissaanni eqqarsaatigineqartarput. Kangaamiunit qinnuteqaat
qulaani taaneqartut naliliinerup kingorna suliariniakkanik
ineriartortitsinermillu kontomi siunertat ilasannut naleqquttutut
isumaqarfigineqarpoq.
Johan Lund Olsen, Inuit Ataqatigiit:
Tassa apeqquteqaqqaanngikkaanni
paasisaqarneq ajornaqaaq. Matumani apeqquteqarninni paasisara aajuna, tassa
piniartut Kangaamiormiut Maniitsup kommunianit ikiorserneqarumasimanngitsut
aammalu matumani paasivara suli pisariaqartoq misissueqqittoqartariaqarneranut,
tamannalu ilimasaarutigissavara akissummi uani tunniunneqartoq
naammaginanngitsutut isumaqarfigigakku.
Paaviaaraq Heilmann, Aalisarnermut,
Piniarnermut, Nunalerinermut Inuussutissarsiuteqarnermullu Naalakkersuisoq:
Ilanngullugu taalaassavara aamma
snescooterit taakku aamma piniarnermut nakkutilliisunit atorneqartarnissaat
naatsorsuutigineqarmat. Aammalu tassunga assingusunik taasaqarsinnaavunga
ikiorsiissutinik, tassa assagiarsunniarnermi pullatinik ukiut siuliini
arlariinni tapiissuteqartarsimavugut tunngaviatigut allaanerunngitsut,
nipisanut qassutit aamma assigiinngitsutigut sinerissami
tapiissuteqarfigineqarsimapput. Taamatut iliornitsinnut pissutaappuut ukiuni
arlalissuarni piniartut aalisartullumi aningaasatigut isertitaat
annikissimanerat pissutigalugit aallarteriaqqinnissaannut ikiorsiissutinut
aningaasaliissuteqartarsimallunga, kontop una pineqartup aallaavigalugu.
Anders Andreassen, Inatsisartut
siulittaasuat:
Qujanaq.