Oqaluuserisassani immikkoortoq 43-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 18. februar 1998 nal.
13.05.
Ataatsimiinnermik aqutsisoq, Inatsisartut Sulittaasuat
Anders Andreassen.
Johan Lund Olsen, Inuit Ataqatigiit:
Qujanaq. Naalakkersuisup siulittaasuanut
apeqquteqaat.
Ukiuni kingullerni inuiaqatigiinni
pisortanut taarsigassarsitsisarfinnut Realkredit-inut, aningaaserivinnut
allanullu assigisaannut innuttaaqatitta akiligassatigut
malinnaasinnaajunnaarlutik akiitsoqalersarsimanerat qaangerniagassatsitut
eqqartortarsimaqaarput.
Aalisarnermik, piniarnermit
nunanelerinermillu inuutissarsiuteqartut ilaatigut inatsisitigut
periarfissaqarput akiitsumik isumakkeerinniffigineqarnissaminnut, soorluttaaq
inuiaqatigut allat isumaginninnikkut ikiorsiisarnikkut taamatut aamma
periarfissaqartitaasinnaasut. Akiitsunik isumakkeerinnittariaqarnerit
taamaattut soorunami inuit ataasiakkaat atugaasa nalilersorluarneqareernerisigut
pisarput, pineqartut akiitsuerullutit siunissami isumannaatsumik inuuneqalersinnaanerat
taama iliornikkut aamma anguneqarsinnaaqqullugu. Taamaattorli ulloq manna
tikillugu inatsisit peqqussutit assigisaallu periarfissiinnginneri patsisigalugit
inoqateqarpugut siulianit taariikkannut naatsorsuunneqarsinnaannginnertik
pissutigalugu suli oqilisaassiffigineqarsinnaanngitsunik, kisiannili
qularnanngilluinnartumik akiitsorisaminnik isumakkeerinniffigineqartuuppata
imminnut napatillutik isaasalerlugu nutaamik aallartissinnaagaluartunik.
Ukiuni kingullerni akiitsunik
isumakkeerinnissinnaanermut inatsiseqalernissarput pisariaqartinneqartoq
eqqartortarsimavarput, ajoraluartumilli maannamut suli timitaqanngitsumik.
Pisariaqartitsisoqarnerali tamanna assortugassaanngimmat naalakkersuisut
aperissavakka akiitsunik isumakkeerinnissinnaanermut
inatsiseqalersinnaanissarput ukioq manna inatsisartunut saqqummiutilersaarneraat
Danmarkimi taamaattumik inatsiseqartitsereernerannut aamma assingusumik.
Jonathan Motzfeldt, Naalakkersuisut
Siulittaasuat:
Akiitsunik isumakkeerinnissinnaanermi
inatsimmik Danmarkimi inatsimmik atuuttumik assingusumik naalakkersuisut ukioq
manna inatsisartunut saqqummiussilersaarnerat imaluunniit saqqummiussilersaarnersut
pillugu Johan Lund Olsen apeqquteqaata tunngatillugu nalunaarutigissavara
akiliisinnaajunnaarneq pillugu inatsisit akiitsumik isumakkeerinnissinnaanermut
maleruagassanik imaqareersoq, nunatsinni januarip aallaqqaataani 1998-miit
atortuulersinneqareersoq. Taamaattoq akiitsunik isumakkeerinnissinnaanermut
maleruagassat aatsaat nunatsinni atuutilissallutik julip aallaqqaataani 1998.
Akiliisinnaajunnaarneq pillugu inatsik nunatsinni atortuulersinneqarpoq
akiliisinnaajunnaarneq pillugu inatsimmi suut allanguutit nunatsinni
atuutsinneqassanersut inatsisartut 1994-mi ukiakkut ataatsimiinnerminni aammalu
1997-mi upernaakkut ataatsimiinnerminni aalajangiiffigereermatigit.
Akiitsunik isumakkerinnissinnaanermut
maleruagassanik pineqartunut kikkut ilaanerat eqqarsaatigalugu
pingaarnerutillugit pineqarput akissarsiortoq, soraarninngorsimasut inuillu
allat inuutissarsiummik ingerlataqarunnaarsimasut aammalu
inuussutissarsiutinik ingerlatsisuusimasut suliffiutiminnik
pigisaqarunnaareersimasut.
Taakkununnga akiitsunik
isumakkerinnissaanerup ilaatigut kingunerissavaa qaangigassaanngiusartumik
akiitsoqalersimanermut atatillugu qamuuna artorsaatigilersimasanik
oqilisaaffigineqarsinnaaneq.
Akiliisinnaajunnarneq pillugu inatsik malillugu
akiitsunik isumakkeeriffigineqarsinnaanermut piumasaqaatit naatsumik
oqaatigalugu ilaatigut tassaapput: akiitsoqalersimasup akiitsorilersimasaminik
tamarmiusunik akiliisinnaanissaminut periarfissaarulluinnarsimanera,
ilaatigullu pissutsit atugai allat aaqqissuussinermi taamaattumik
atuiffigineqarnissaanut pissutissaasinnaasut. Atortuulersissimavoq kingorna
akiitsunik isumakkeerinissaanermi maleruagassat qanoq annertutigisumik
atorneqarnissaat sioqqutisumik nalilersorneqarsinnaanngilaq, taamaattumik
akiitsunik isumakkeerinnissaanermi maleruagassat akiitsulinnut
ikiorusutatsinnut tamanut aamma iluaqutaasinnaanersut nalilersinnaanngilara.
Taamaattoqassanngikkaluarpat maleruagassat ulloq 1. juni 1998-mi
atortuulersinneqareerpat aatsaat pisoqarumaarnera utaqqimaaqqaassagipput
siunnersuutigerusuppara. Tamatuma kingorna nalilerneqarsinnaavoq,
assersuutigalugu akiitsunik isumakkeerinnissinnaanermi aaqqissuussineq pisortat
tungaannit taperneqassanersoq, soorlu akiitsunik isumakkeerinninnissamut
pisortat periarfissaqarnerulersinnerisigut.
Johan Lund Olsen, Inuit Ataqatigiit:
Ja, Naalakkersuisut siulittaasuat
erseqqissumik akissuteqarmat qutsavigissavara. Isumaqarpunga nuannaarutissaasoq
una apeqquteqaateqarninni siunnerfigisara maanna paasinarsimmat nunatsinnigooq
atuutilissaaq junip aallaqqaataani ukioq manna. Taamaattumik qularutiginngilara
aamma inoqatitta periarfissaq taanna nutaaq aamma atorluartarumaaraat.
Anders Andreassen, Inatsisartut
siulittaasuat:
Qujanaq.