Oqaluuserisassani immikkoortoq 44-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq, 18. februar 1998
Ataatsimiinnermik aqutsisoq, Inatsisartut
Siulittaasuat, Anders Andreassen.
Anthon Frederiksen, Kattusseqatigiit:
Naluneqanngitsutut politiit angallatissaat
nutaat pingasut maannakkut suliarineqartut. Taakkualu naammassippata
naatsorsuutigineqarpoq nunarujussuatta imartaa politiit angallataannik sisamaannarnik
kiffartuunneqalertussaasoq. Aamma naluneqanngilaq politiit angallataat
ujaasinerpassuarnut nunatsinnilu politeeqarnerup politiitullu sullissinerup
iluani annertuumik illoqarfinniit illoqarfinnut aammalu illoqarfinniit
nunaqarfinnut atorneqartut. Taamaattumik siunissami angallatit
sisamaannanngortinneqassappata qularnanngilaq ajornartorsiutit assigiinngitsut
takkuttalerumaartut, taamaattumik naalakkersuisut tamatumunnga tunngatillugu
qanoq pilersaaruteqarnersut apeqquteqarfigaakka.
Jonathan Motzfeldt, Naalakkersuisut Siulittaasuat:
Inatsisartuni ilaasortap Anthon
Frederikseni apeqquteqarpoq nunatsinni politiit angallataasa siunissami
sisamaannanngortinneqarnissaat naalakkersuisut qanoq iliuuseqarfiginiarneraat.
Tamatumani politeeqarfik nunatta imartaani ataasiakkaani ilaatigut
annaassiniartartoqarnermut kiisalu politiit angallataasa atorneranni
akisussaammat naalakkersuisut politimesteri qinnuigisimavaat nassuiaammik
saqqummiussaqaqqullugu politimesteri politiit angallatai sisamat atorneqarnera
pillugu qanoq pilersaaruteqarneranik. Politimesterip tamanna tunngavigalugu
allakkani 16. februar 1998-meersuni ilaatigut imaattunik akissuteqarpoq,
issuarpara: Kutterit nutaat pillugit missingersuutinut ilanngussamik 1995-mi
danskit aningaasanik inatsisaanni takuneqarsinnaavoq Kalaallit Nunaanni
politiit angallataat siunissami tassaasut kutterit sisamat Sisak-mit sanaajusut
angallat Sisak kiisalu nutaanik sanaat pingasut. Kutterit qisuusut nutaamik
sanaat tunniunneqarnerat ilutigalugu taarserneqartassapput siulleq
isumaqatigiissutit naapertorlugu 1998-mi 15. april tunniunneqassaaq aappaa 1998
15. oktober pingajuallu 1999 15. april. Kutterit nutaat taakku atorlugit
politiit immakkut angalasarnermikkut nutaamik suleriaaseqalissapput. Siunissami
angallatit tamarmik Nuummi angerlarsimaffeqalissapput politimestereqarfiullu
allattoqarfiani aqunneqassallutik. Tamanna isumaqassaaq kiffartuussineq tamarmi
Nuummiit pisalissalluni, ilinniartitaaneq ataatsimiittarnerillu tassanissaaq
pisassallutik. Kutterit sumiiffii tamaasa Qaanaaq Ittoqqortoormiillu kisiisa
pinnagit angalasarnissami pilersaarutit allattoqarfimmiit suliarineqartut
malillugit angallavigisassavaat. Tamanna 1993-mili politimestereqarfiup
sumiiffinni inissiisarnerit allanngortippai ukiup qanoq ilinera naapertorlugu
angalasarnissamut pilersaarusiortalernikkut, taakkua malillugit kutterit
sumiiffii allat angerlarsimaffimmi avataaniittut angallavigisartussaallugittaaq.
Tamanna kutterit avannaatungaani ukiuunerani sikusimasartut pitsaanerusumik
atorneqarnissaannik pisariaqartitsinerup ilumoornera paasillugu pivoq.
Issuaaneq nangippoq: Sumiiffinni politeeqarfiit sapinngisamik amerlanerpaat
kiffartuuneqarnissaasa taamalu angallatit sunniuteqartumik atornissaasa
qularnaarnissaasa isiginiarnissaat aaqqiinermi siunertarineqarpoq, kiisalu
siunertarineqarpoq piareersimanerup annerusumut siaruarsimasup pilersinnissaa
kiisalu politiit angallataasa aningaasaqarnikkut siunertaqarnerpaamik
aqunneqarnissaasa pingaartinnissaat, issuaaneq naavoq.
Naalakkersuisut maannakkut suliamut
annerusumik iliuuseqarnialersaanngillat aammalu politiit angallataasa
atorneqartarnerat eqqarsaatigalugu suleriaatsip allanngortinnissaanik
politimesterip nassuiaataa najoqqutariinnarniarallarlugu.
Anthon Frederiksen, Kattusseqatigiit:
Nalunngilarput politeeqarneq naalagaaffiup suli tigummigaa.
Aammalu naalakkersuisut siulittaasuata akissuteqaataanut kiisalu
politimestereqarfimmut paasiniaasimanerani aamma akissutigineqartut
qujassutigaakka. Nalunngilara naalakkersuisut danskit naalakkersuisui isumaqarniuteqartartut
assigiinngitsutigut. Neriuppungalu maannakkut paasisat aamma tunngavigalugit
naalakkersuisut siunissami politiit angallateqarneranut tunngasut aamma
ilanngullugu eqqumaffigiumaaraat.
Jonathan Motzfeldt, Naalakkersuisut
Siulittaasuat:
Oqaatigilaassavara Anthon
Frederiksen-imut. Ukiarmi savalimmiuniikkama taavalu savalimmiuni
tikeraarninni takutinneqarsimammata taakkua sananeqartut ilaat tamakkualu
pillugit nassuiaanneqarsimalluta qanoq sananeqarnerannik assigiinngitsunik.
Soorunami aamma inerpata tassani iserfigineqarumaarput. Oqaaserineqartut
arlallit tassani sananeqarneranut nersualaarutit aammalu uparuaatit
taaneqarsimapput, ilaatigut motooriisa sakkukippallaarneranit allaat uparuarneqarsimalluni,
kisianni taakkua sanatitsisut akisussaaffigaat.
Anders Andreassen, Inatsisartut
Siulittaasuat:
Qujanaq.