Oqaluuserisassani immikkoortoq 45-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 18. februar 1998
Ataatsimiinnermik aqutsisoq, Inatsisartut Siulittaasuat,
Anders Andreassen.
Karl Lyberth, Siumut:
Naalakkersuisunut ilaasortaq Peter
Grĝnvold Samuelsen apeqquteqarfigissavara.
Inatsisartuni aalajangereernitta
kingunerisaanik nunaqarfinnut nioqqutissanik inunnillu angallassineq
allanngortinneqarnikuusoq tamatta nalunngilarput. Aalajangiinialeratta
paasiniakkatta ilagisimavaat umiartortut inuttat qasserpiaat aalajangiinitta
kingunerisaanik soraarsinneqassanersut. Taamani paasitinneqarpugut inuttat
ikittuinnaat soraarsinneqarumaartut. Paasitinneqarnera malillugu
Maniitsumiinnaq umiartortut sisamat aalajangiinitta kingunerisaanik
soraarsinneqarsimapput. Taamaattumik pissanganarpoq pasissallugu nunarput
tamakkerlugu umiartortut qassimmita soraarsitaasimanersut.
Inussiarnersumik qinnuigissavakkit nassuiaatigeqqullugu
aalajangiinitta kingunerisaanik nunatsinni umiartortut qassit
soraarsitaasimanersut, taakkunanngalu kalaallit qassiunersut. Naggataatigut
paaserusunnarpoq umiartortut soraarsinneqartut qanoq iliorfiginiarneqarnersut,
tukiinnarneqassanersut imaluunniit arlaatigut ikiorniarlugit
iliuuseqartoqarniarnersoq.
Peter Grĝnvold Samuelsen,
Takornariaqarnermut, Angallanermut, Niuernermut Attaveqaatinullu
Naalakkersuisoq:
Inatsisartut 1998-mi ukiukkut
ataatsimiinneranni pingasunngornikkut apeqquteqaateqarputit, tassanilu
nunaqarfinnut pilersuinerup ilaasunillu angallassinerup
allangortinneqarnissannik inatsisartut aalajangiinerisa kingunerisaannik
sulisoqarnikkut umiartortunut kingunerisassaa pillugit paasissutisinneqarnissat
kissaatigalugu.
Allannguutit taakku kingunerisaannik
1998-mi januarip aallaqqaataa aallarnerfigalugu nunatsinni nunaqarfinnut
nunaqarfinnillu usinik assartuineq tamarmi Royal Arctic Bygdeservice A/S-mit
tiguneqarpoq. Nunap immikkoortuini angallassinerup assartuinerup
allanngortinneqarnerata ilaatigut sulissutigut naleqqussaasoqarneranik
kinguneqarpoq, tamannalu tulliuttuni naatsumik nassuiarneqarsaaq.
Nunap Immikkooortuini usinik assartuinermi
ilaasunillu angallassinermi sulisut tamarmik najugaqavissuupput SIK-mit
ANK-millu isumaqatigiissutit tunngavigalugit atorfeqartinneqartut. Tamaalilluni
angallassinermi assartuinermilu allanngortitsivigineqartunut atatillugu nuna
tamakkerlugu sulisutigut naleqqussaaneq naalakkat aquttullu eqqarsaatigalugit
sulisut pingasut soraarninngornerisigut sulisullu marluk
suliunnaarsinneqarnerisigut naammassineqarsimavoq. Tamannalu
allanngortiterilernermi naatsorsuutigineqartumit annikinneruvoq. Naalakkat
aquttullu ukioq kaajallallugu qaammammusiaqartuupput tamaattumillu assartuinermi
angallassinermilu ineriartornerup kingunerisaanik suliarineqartut
allanngorarnerat eqqoqqissaartumik nalunaarsorneqarsinnaalluni. Kisianni
umiartortut nalunaaqquttap akunnermusiaqarlutik sulisorineqartut sulinerat
ukiup ingerlanerani allanngorartorujussuuvoq, qanoq sikuutiginera
apeqqutaatillugu. Nalunaaqquttap akunnermusiallit tamarmik ukiuunerata nalaani
angallatit amoqqanerisa nalaani soraartarnerat ileqquuvoq. Kisianni
oqaatigineqarsinnaavoq qeqqani sikuneq ajortumiittut suliaat assartuinerup
angallassinerullu allanngortinneqarnerata kingorna annertunerusumik allanngorsimanngitsut.
M/S Anders Olsen-ip tallimanik inuttaqartussaatitaasup M/S Aqqaluk Ittuk
1998-mi taarserpaa, taannalu nunatsinni umiarsuarnik inuttalersuisarneq pillugu
inatsik atuuttoq malillugu arfilinnik inuttaqartussaatitaavoq.
Allanngortitsinerup kingunerisaanik assersuutigalugu oqaatigineqarsinnaavoq
Uummannami eqqaani M/S Aqqaluk Ittuup angallatillu namminersortunit
pigineqartut atorneqalernerisigut sulisut amerleriarsimammata. Sisimiut
kommunianni nunaqarfiit 1997-mi M/S Siumut-mit Maniitsumiit
pilersorneqarsimasut 1998-mi allanngortitsinikkut angallammik Sisimiunit
toqqaannartumik pilersorneqalissapput. Angallat Sisimiunitpilersuinermi
atorneqartoq Sisimiormiuinnangajannik inuttaqassaaq, kisianni sulisut
amerlassusiat allangortitsinerup kingunerisaanik allannguuteqassanngilaq.
Aammattaaq ilisimatitsissutigineqassaaq angallassinerup assartuinerullu
allanngortinneqarnerisa kingunerisaannik umiarsuaatillit namminersortut
angallatinik attartornissat arlallit pillugit
isumaqatigiissuteqarfigineqarsimammata, kiisalu taamaaliortoqarneratigut
suliffiit nutaat pilersinneqarsimallutik. Aammattaaq nuannerpoq M/S Disko-mut
pilersaarutigineqartut kingunerisaanik atorfiit assigiinngitsut arlalissuit
iluanni 60-it suliffissaat massakkut pilersinneqarmata. Angallassinerup
assartuinerullu allanngorterneqarneranni anguniagaavoq pilersuinikkut
ilaasunillu angallasinikkut nunaqarfiit pitsaanerusumik
ingerlatsivigineqarnissaasa qulakkeerneqarnissaat. Anguniagaq taanna
nunaqarfinnut angallassinermik assartuinermillu pilersaarutitigut nutaatigut
anguneqarsimasorinarpoq.
Karl Lyberth, Siumut:
Akissuteqaammut qujavunga aamma nuannerpoq
pasillugu ilaatigut M/S Disko atulerneratigut umiartortut 60-it missaaniittut
taammalillutik aamma suliffittaarsinnaanngorsimaneranik kinguneqartumik
paasinarmat. Kisianni taanna oqaatigissavara miserratiginagu oqaatigissavara
akissuteqaammut naammaginarsinnaasutut immaqa oqaatigineqarsinnaagaluartumik
naammaginninnera tamakkiisuunngimmat, tassa ilaatigut akissuteqarninni
oqarputit qeqqani soraarsinneqarsinnaasut ikittuararsuusut, imaluunniit
aalajangiinerup kingornatigut soraarsinneqartut immaqa ataasiinnartuluunniit
taallugu. Kisianni oqariinnittuut Maniitsumi nalunngilara umiartortut
ukiorpassuarni naalagaallutik sulisimasut sisamat soraarsinneqarsimasut
taamatut paasiniaanera malillugu. Ajunngilaq paasiniassavara qanoq
pisoqarsimanersoq aqqutit immaqa allat aqqutigalugit. Akissuteqaannut
qujavunga.
Anders Andreassen, Inatsisartut
Siulittaasuat:
Qujanaq, taamaalilluta ullumikkut
oqaluuserisassat apeqquteqaatillu tamakkerpavut, taavalu aqagu sisamanngornermi
19. februar 1998 makkua oqaluuserineqassapput: Immikkoortoq 15, Radiukkut
fjernsynikkullu aallakkaatitsineq pillugu inatsisartut peqqussutaata
allanngortinneqarnerani inatsisartut peqqussutissaannut siunnersuut, immikkut
akuersinikkut pingajussaaneerneqartussaq, taavalu immikkoortoq 40, SULISA
A/S-ip pilersinneqarnerminiit naammassisaai pillugit suleriaatsini ' 41 naapertorlugu apeqquteqaat
oqaluuserisassaq, tassani inatsisartuni ilaasortaq Finn Karlsen
siunnersuuteqartuuvoq, kiisalu immikkoortoq 46, Royal Greenland-ip sinerissap
qanittuani aalisarnermi atugassanik angallatitaarnissaminik pilersaarutaata
unitsinneqarnissaanik siunnersuut aalajangiiffigisassaq,
siunnersuuteqartuulluni inatsisartuni ilaasortaq Hans Enoksen, immikkoortoq 31,
Peqqinissamik Ataatsimiititaliap isumaliutissiissutaa, tassani
siunnersuuteqartoq Anthon Frederiksen, taavalu immikkoortoq 26,
Kultureqarnermut, Ilinniartitaanermut Ataatsimiititaliap isumaliutissiissutaa,
siunnersuuteqartuullutik inatsisartuni ilaasortat Jakob Siverthsen, Kristine
Raahauge, Maliinannguaq M. Mĝlgaard, kiisalu immikkoortoq pingajuat 1998
upernaakkut katersuunnissat qaqugu pinissaat aalajangerneqarnera.
Ullumikkullu ataatsimiinnerneq
tamaanga killeqarpoq.